BTV NEWS

TOP STORY : រដ្ឋមន្រ្តីក្រសួងការពារជាតិថៃ ចេញបំភ្លឺថា ការផ្សព្វផ្សាយរបស់កាសែតថៃដែលថា «សម្តេចបវរធិបតី ហ៊ុន ម៉ាណែត បានសូមទោសភាគីថៃរឿងប្រាសាទតាមន្តធំ» គឺជាព័ត៌មានក្លែងក្លាយ និងប្រកាសច្រានចោលទាំងស្រុង

ការបង្កើនពិពិធកម្មសេដ្ឋកិច្ច គឺជារឿងចាំបាច់ ដើម្បីសម្រេចបានចក្ខុវិស័យកម្ពុជាឆ្នាំ២០៥០

ឯកឧត្តម ហេង រតនា៖រដ្ឋាភិបាលអាមេរិកឱ្យបើក និងបន្តកិច្ចសហប្រតិបត្តិការបោសសម្អាតគ្រាប់មីន និងសំណល់យុទ្ធភណ្ឌសង្គ្រាមនៅកម្ពុជាឡើងវិញតាមកិច្ចសន្យាដែលមានស្រាប់

សមាគមអភិរក្សសត្វត្មាតពីការផុតពូជប្រចាំទ្វីបអាស៊ី SAVE បានវាយតម្លៃថាវត្តមានសត្វត្មាតនៅកម្ពុជាឆ្លុះបញ្ចាំងពីកិច្ចការពារនិងអភិរក្សធនធានធម្មជាតិបានយ៉ាងល្អ

ព័ត៌មានជាតិ

សម្ដេចធិបតី៖ កម្ពុជារក្សាជំហរដោះស្រាយបញ្ហាព្រំដែនតាមសន្ដិវិធីប៉ុន្ដែនឹងប្រើកម្លាំងបើមានការឈ្លានពាន

សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជា មានប្រសាសន៍បញ្ជាក់ថា ទាក់ទងនឹងការដោះស្រាយបញ្ហាព្រំដែនជាមួយប្រទេសជិតខាង ប្រទេសកម្ពុជា គឺរក្សាជំហរដោះស្រាយតាមសន្ដិវិធី ប៉ុន្ដែកម្ពុជានឹងប្រើកងកម្លាំង និងអាវុធ ប្រសិនបើមានការឈានពានចូលបូរណភាពទឹកដីរបស់កម្ពុជា។ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា មានប្រសាសន៍បញ្ជាក់បែបនេះ ក្នុងឱកាស អញ្ជើញជាអធិបតីប្រគល់សញ្ញាបត្រជូននិស្សិតសាកលវិទ្យាល័យ អាស៊ី អឺរ៉ុប នៅមជ្ឈមណ្ឌលសន្និបាត និងពិព័រណ៍កោះពេជ្រ នៅព្រឹកថ្ងៃទី១៩ ខែកុម្ភៈ ឆ្នាំ២០២៥នេះ។ក្នុងឱកាសនោះសម្ដេចធិបតី នាយករដ្ឋមន្រ្ដីមានប្រសាសន៍បញ្ជាក់ថា រឿងបញ្ហាព្រំដែនអ្នកណាក៏គិតដែរ មិនមែនមានតែអ្នកជាតិនិយមរត់ចោលស្រុកនោះទេ។ សម្ដេចមានប្រសាសន៍ថា រាជរដ្ឋាភិបាល មន្រ្ដីកិច្ចការព្រំដែន និងប្រជាពលរដ្ឋនៅទូទាំងប្រទេសសុទ្ធតែជាអ្នកជាតិនិយម ហើយជាអ្នកជាតិនិយមឆ្អិនឆ្អៅថែមទៀត។ បើមន្រ្ដីកិច្ចការព្រំដែន ធ្វើកិច្ចការងារលើការចរចារឿងព្រំដែនជាមួយប្រទេសជិតខាងដាច់បាយដាច់ទឹក ដើម្បីការពារបូរណភាពទឹកដីរបស់កម្ពុជាក្នុងមួយចំអាមៗ។ ប៉ុន្ដែរឿងព្រំដែននេះមិនមែនជារឿងងាយស្រួលដោះ១ថ្ងៃចប់នោះទេ ខណៈសូម្បីតែទំនាស់ដីធ្លីក្នុងគ្រួសាររឿងព្រំដីក្នុងប្រទេសផងត្រូវចំណាយពេលដោះស្រាយជាង ២០ ឆ្នាំក៏មានដែរ។ក្នុងឱកាសនោះសម្ដេចធីបតីនាយករដ្ឋមន្រ្ដីមានប្រសាសន៍បញ្ជាក់ថា កិច្ចការងារបោះបង្គោលព្រំដែនគោក កម្ពុជា-ថៃ គឺមានពីរចំណុចក្នុងចំណុចទីមួយត្រូវបោះបង្គោលពីតំបន់ជាំទៅដល់តំបន់ចាំយាម ត្រូវបោះបង្គោលចំនួន៧៤បង្គោល។ ប៉ុន្ដែពីតំបន់មុំ៣ទៅដល់ចំណុចតំបន់ចាំយាម គឺមិនទាន់មានការបោះបង្គោលព្រំដែនរួចរាល់នៅឡើយទេ ប៉ុន្ដែមានផែនទីក្នុងឆ្នាំ១៩០៨ ដែលធ្វើដោយក្រុម គណៈកម្មការកំណត់ព្រំដែនរវាងឥណ្ឌូចិន និងសៀម (La Commission de délimitation entre l’Indochine et le Siam) ដូច្នេះក្នុងរយៈពេលតាំងពីឆ្នាំាំ ១៩៩៨ រហូតមក រាជរដ្ឋាភិបាលកម្ពុជាបានបន្តធ្វើលើកិច្ចការងារព្រំដែនេះ តាមគោលការសន្ដិវិធី និងនីតិវិធីច្បាប់អន្តរជាតិ៕ អត្ថបទ៖ វ៉ន ដារ៉ា

រោងចក្រ ហ្វ័រម៉ាត នឹងបើកប្រាក់ឈ្នួលនិងប្រាក់បំណាច់ផ្សេងៗដល់កម្មករនិយោជិតនៅថ្ងៃទី២០ កុម្ភៈស្អែកនេះ

ក្រសួងការងារ និងបណ្តុះបណ្តាលវិជ្ជាជីវៈ នឹងសហការជាមួយរោងចក្រ ហ្វ័រម៉ាត (ខេមបូឌា) ខូ អិលធីឌី ចាប់ផ្តើមបើកប្រាក់ឈ្នួល និងប្រាក់បំណាច់ផ្សេងៗជូនដល់កម្មករនិយោជិត ចាប់ពីម៉ោង៨ព្រឹក ថ្ងៃទី២០ ខែកុម្ភៈ ឆ្នាំ២០២៥នេះតទៅ នៅសាលាខណ្ឌដង្កោ រាជធានីភ្នំពេញ។ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ប្រាប់ព័ត៌មាន ប៊ីធីវី ឲ្យដឹងថា ការបើកផ្តល់ប្រាក់ឈ្នួល និងប្រាក់បំណាច់ផ្សេងៗជូនដល់បងប្អូនកម្មករនិយោជិតនេះ បន្ទាប់ពីរោងចក្រ ហ្វ័រម៉ាត ដែលមានទីតាំងស្ថិតនៅភូមិអន្លង់គងថ្មី សង្កាត់ព្រៃស ខណ្ឌដង្កោ ទទួលរងឧបទ្ទវហេតុដោយសារអគ្គិភ័យ កាលពីថ្ងៃទី១១ ខែកុម្ភៈកន្លងទៅ។ ឯកឧត្តម បានបន្តថា កម្មករនិយោជិតដែលនឹងត្រូវមកបើកប្រាក់ទាំងនេះ សូមភ្ជាប់មកជាមួយនូវឯកសារមួយចំនួន មានដូចជា៖ ១.បណ្ណសម្គាល់ខ្លួនកម្មករនិយោជិត ឬកិច្ចសន្យាការងារ និងសៀវភៅការងារកម្មករនិយោជិត ឬបណ្ណសមាជិក ប.ស.ស. ឬអត្តសញ្ញាណប័ណ្ណសញ្ជាតិខ្មែរ ឬលិខិតឆ្លងដែន និងបណ្ណបើកប្រាក់ឈ្នួលប្រចាំខែរបស់កម្មករនិយោជិតម្នាក់ៗ។ ឯកឧត្តមរដ្ឋលេខាធិការ បានបន្ថែមទៀតថា ចំពោះកម្មករនិយោជិតដែលមិនទាន់ទទួលបានការងារថ្មីធ្វើ ឬមានបំណងចង់ស្វែងរកការងារ គឺអាចទទួលយកឱកាសការងារថ្មីពីមជ្ឈមណ្ឌលការងារចល័តនៃទីភ្នាក់ងារជាតិមុខរបរ និងការងារ (NEA) ដែល ប្រចាំការនៅរោងចក្រ ហ្វ័រម៉ាត និងនៅសាលាខណ្ឌដង្កោ ដើម្បីផ្តល់ឱកាសការងារសម្រាប់បងប្អូនកម្មករនិយោជិត ក្នុងការទទួលបានការងារថ្មីធ្វើនៅតាមតំបន់នានាដែលបងប្អូនពេញចិត្ត។ក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ថា ក្រៅពីការបើកផ្តល់ប្រាក់ឈ្នួល និងប្រាក់បំណាច់ផ្សេងៗ កម្មករនិយោជិតនៅតែអាចប្រើប្រាស់ប័ណ្ណ ប.ស.ស. បានជាធម្មតា រួមមាន ផ្នែកថែទាំសុខភាព ជាពិសេសអត្ថប្រយោជន៍នៅពេលពិនិត្យផ្ទៃពោះ និងសម្រាលកូន៕ អត្ថបទ៖ ឈិត បូរ៉ាវី

ករណីបណ្ឌិត សុខ ទូច ជាមួយនគរបាលចរាចរ! សម្ដេចតេជោ អំពាវនាវឱ្យជនរួមជាតិក៏ដូចជាអ្នកពាក់ព័ន្ធបញ្ចប់តាមរបៀបឈ្នះ ឈ្នះ

សម្ដេចតេជោ អំពាវនាវឱ្យជនរួមជាតិក៏ដូចជាអ្នកពាក់ព័ន្ធសូមបញ្ចប់រឿងត្រឹមនេះតាមរបៀបឈ្នះ ឈ្នះ និងសហការគ្នាបន្តការងាររៀងៗខ្លួន ចំពោះករណីបណ្ឌិត សុខ ទូចជាមួយនគរបាលចរាចរ។សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានអំពាវនាវឱ្យជនរួមជាតិក៏ដូចជាអ្នកពាក់ពន្ធ័សូមបញ្ចប់រឿងត្រឹមនេះតាមរបៀបឈ្នះ ឈ្នះ និងសហការគ្នាបន្តការងាររៀងៗខ្លួន ចំពោះករណីបណ្ឌិត សុខ ទូច ជាមួយនគរបាលចរាចរ។ តាមរយៈទំព័រហ្វេសប៊ុកផ្លូវការរបស់សម្តេចតេជោ ហ៊ុន សែន នៅថ្ងៃទី១៩ ខែកុម្ភៈ ឆ្នាំ២០២៥ សម្ដេចបានមានប្រសាសន៍ថា ករណីបណ្ឌិត សុខ ទូច ជាមួយនគរបាលចរាចរបានក្លាយជាអាជីវកម្មដោយមិនដឹងខ្លួន។ អ្នកមិនចូលចិត្តបណ្ឌិត សុខ ទូច បានថែមអំបិលប្រហុក ដើម្បីទាញទម្លាក់បណ្ឌិត សុខ ទូច។ ឯអ្នកមិនចូលចិត្តនគរបាលចរាចរក៏ប្រឹងថែមទឹកត្រី និងប៉ីចេងដើម្បីវាយប្រហារនគរបាលចរាចរ។សម្ដេចតេជោបានសង្កត់ធ្ងន់ថា តើអ្នកណាជាអ្នកទទួលផលចំណេញលើហេតុការណ៍នេះ? គ្មានអ្នកណាចំណេញនោះឡើយតែផ្ទុយទៅវិញគឺខាតទាំងអស់គ្នា។សម្ដេចតេជោ បានអំពាវនាវសូមបងប្អូនជនរួមជាតិក៏ដូចជាអ្នកពាក់ព័ន្ធសូមបញ្ចប់រឿងនេះត្រឹមនេះតាមរបៀបឈ្នះ ឈ្នះ និងសហការគ្នាបន្តការងាររៀងៗខ្លួន។ សម្ដេចបន្តថា «សង្ឃឹមថាអ្នកថែមអំបិលប្រហុកទឹកត្រី ប៉ីចេងបញ្ឈប់ថែមសាំងចាក់លើភ្លើងរាប់ទាំងអ្នកផ្តល់សារមកខ្ញុំវាយប្រហារម្ខាងៗ។ បើលុបសារនោះចោលខ្លួនឯង ជាការល្អព្រោះខ្ញុំបានមើលរួចហើយ»៕ អត្ថបទ ៖ ប្រាក់ វ៉ាន់ដា

ប្រសាសន៍សំខាន់ៗរបស់សម្តេចធិបតី ហ៊ុន ម៉ាណែត ក្នុងឱកាសអញ្ជើញប្រគល់សញ្ញាបត្រជូននិស្សិតសាកលវិទ្យាល័យ អាស៊ី អឺរ៉ុប

ភ្នំពេញ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅព្រឹកថ្ងៃទី១៩ ខែកុម្ភៈ ឆ្នាំ២០២៥ បានអញ្ជើញជាអធិបតីប្រគល់សញ្ញាបត្រជូននិស្សិតសាកលវិទ្យាល័យ អាស៊ី អឺរ៉ុប នៅមជ្ឈមណ្ឌលសន្និបាត និងពិព័រណ៍កោះពេជ្រ ។ប្រសាសន៍សំខាន់ៗរបស់សម្តេចធិបតី ហ៊ុន ម៉ាណែត ដែលមានខ្លឹមសារដូចខាងក្រោម៖-សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ណែនាំដល់ក្រសួងការងារបណ្ដុះបណ្ដាលជីវៈ និងស្ថាប័នផ្សេងទៀត ត្រូវយកចិត្តទុកដាក់ពង្រីកឱកាសការងារ ឱ្យមានភាពបត់បែន និងបើកច្រកការងារឲ្យបានច្រើន ដល់អ្នកមានជំនាញស្រាប់ ។-សម្តេចធិបតីនាយករដ្ឋមន្ត្រីនៃកម្ពុជា ផ្ដល់អនុសាសន៍មួយចំនួនដល់លោកគ្រូអ្នកគ្រូ ជាឪពុកម្ដាយទី២ ត្រូវដើរមុនទាំងការដឹកនាំធ្វើជាគំរូទាំងក្រមសីលធម៌ ទាំងប្រតិបត្តិផ្ទាល់ ដល់សិស្ស និងដល់យុវជនជំនាន់ក្រោយ ។ -សម្តេចធិបតីនាយករដ្ឋមន្រ្ដី រឿងសមត្ថកិច្ច និងរឿងឯកឧត្តម សុខ ទូច ទុកឱ្យអាជ្ញាធរមានសមត្ថកិច្ចធ្វើការងារនេះចុះ។ ដោយឡែករឿងលូមួយកង់តម្លៃ ៤០ ដុល្លារ អាជ្ញាធរក៏បានពន្យល់រួចអស់ហើយដែរ។ ខណៈលូការដាក់លូជូនពលរដ្ឋរដ្ឋាភិបាលមានគោលនយោបាយសម្រាប់ធ្វើ ប៉ុន្ដែកន្លែងខ្លះពលរដ្ឋស្នើដាក់មុន។-សម្តេចធិបតីនាយករដ្ឋមន្រ្ដី ប្រាប់ទៅក្រុមហ៊ុនស្ថាបនា ផ្លូវទាំងអស់ ដែលទទួលបានកិច្ចសន្យាពីរដ្ឋាភិបាល បើធ្វើផ្លូវ កាយលូហើយ ត្រូវដាក់លូទៅវិញភ្លាម មិនអាចទុកឱ្យកន្លែងនោះ នៅទុកចោលយូរនោះទេ។-សម្ដេចធិបតីនាយករដ្ឋមន្រ្ដី មានប្រសាសន៍បញ្ជាក់ថា ទាក់ទងនឹងសៀវភៅបំពេញបន្ថែម មានចំណងជើងថា «ខ្មែរ និងដំណើរឆ្ពោះទៅកាន់វិបុលភាព» ដែលអ្នកលេងហ្វេសប៊ុក មួយចំនួនបានយកមកផ្សព្វផ្សាយ ក្នុងបំណងបំពុលសង្គមនោះ គឺជាសៀវភៅ ដែលបានពន្យល់បន្ថែម តាមដំណាក់កាលតាប្រវត្តិសាស្រ្ដដែលបានកើត និងធ្វើទំនើបកម្ម ដើម្បីកុមារចាប់សិក្សា និងទទួលបានចំណេះដឹង។-សម្ដេចធីបតីនាយករដ្ឋមន្រ្ដីបញ្ជាក់បន្ថែមថា សៀវភៅ «ខ្មែរ និងដំណើរឆ្ពោះទៅកាន់វិបុលភាព» ដែលជាគឺជាសៀវភៅសិក្សាបន្ថែម មានក្តោបខ្លឹមសារប្រវត្តិសាស្ត្ររបស់ប្រទេសកម្ពុជា ចាប់ពីតាំងសម័យសង្គមរាស្រ្តនិយម រហូតមកដល់បច្ចុប្បន្ន ដែលមានប្រភពឯកសារមកពីឯកសារប្រវត្តិសាស្រ្តដែល បានចងក្រងកន្លងមក ឈរលើគោលជំហរប្រកាន់ខ្ជាប់នូវការពិត មិនក្រឡៃប្រវត្តិសាស្រ្ត ប្រកបដោយក្រមសីលធម៌ វិជ្ជាជីវៈ។-សម្ដេចធិបតីនាយករដ្ឋមន្រ្ដី សៀវភៅ «ខ្មែរ និងដំណើរឆ្ពោះទៅកាន់វិបុលភាព» មិនមែននិយាយពីការដឹងគុណប្រទេសណាមួយនោះទេ ប៉ុន្ដែគឺជាសៀវភៅ មានក្តោបខ្លឹមសារប្រវត្តិសាស្ត្ររបស់ប្រទេសកម្ពុជា ដើម្បីបន្សល់ទុកនូវតឹកតាងប្រវត្តិសាស្រ្ដដល់កូនខ្មែរគ្រប់ជំនាន់។-សម្ដេចធិបតីនាយករដ្ឋមន្រ្ដី អំពាវនាវដល់បងប្អូនប្រជាពលរដ្ឋ និស្សិតបញ្ញវន្តមុននឹងចែករំលែកព័ត៌មាន ឬខ្លឹមសារនៅលើបណ្ដាញសង្គម ឬបកស្រាយ សូមធ្វើការសិក្សាស្រាវជ្រាវឱ្យបានច្បាស់លាស់ ចៀសវាងការចែករំលែកព័ត៌មានមិនពិតនាំឱ្យបំពុលសង្គម។-សម្ដេចធិបតី នាយករដ្ឋមន្រ្ដី បានបញ្ជាក់ថា សៀវភៅនេះ មិនមាននិយាយអំពីការដឹងគុណរបស់មិត្តវៀតណាមនោះទេ។ សៀវភៅនេះ និយាយពីប្រវត្តិសាស្ត្រ និងការតស៊ូរបស់ថ្នាក់ដឹកនាំខ្មែរគ្រប់ជំនាន់ ។ សូមឱ្យក្រសួងអប់រំយុវជន និងកីឡាបោះ ពុម្ពផ្សាយបង្ហោះតាមអនឡាញ ដើម្បីឲ្យមហាជនប្រជាពលរដ្ឋយើងបានសិក្សាច្បាស់ ពីសៀវភៅនេះ ។ -សម្ដេចធិបតីនាយករដ្ឋមន្រ្ដី ក្នុងថ្មីៗនេះ ចលនាជំរុញស្មារតីជាតិនិយមនៅក្រៅប្រទេស កំពុងរុញចលនាជាច្រើនពាក់ព័ន្ធ នឹងបញ្ហាព្រំដែនកម្ពុជា និងប្រទេសជិតខាង ដូចជាករណី CLV, កោះគត់ និងមកដល់ពេលនេះ ប្រាសាទតាមាន់។ សម្ដេច បញ្ជាក់ថា រឿងព្រំដែនអ្នកណាក៏គិតរឿងព្រំដែនដែរ ក្នុងនោះរាជរដ្ឋាភិបាលគឺជាអ្នកគិត និងទទួលខុសត្រូវធំបំផុតចំពោះមុខប្រជាពលរដ្ឋ ហើយការងារនេះ គឺផ្អែកទៅលើការដោះស្រាយស្របទៅតាមច្បាប់។-សម្ដេចធិបតីនាយករដ្ឋមន្រ្ដី ផ្ដាំទៅអ្នកនយោបាយទាំងអស់ ទាំងខ្មែរ និងថៃ សូមកុំយករឿងនយោបាយ ទៅលូកលាន់លើកិច្ចការងារបច្ចេកទេសរបស់រាជរដ្ឋាភិបាល ដែលកំពុងអនុវត្តការងារទាំងអស់ គឺលើគោលការបច្ចេកទេស ផែនទី និងច្បាប់អន្តរជាតិ ពាក់ព័ន្ធឹនងរឿងព្រំដែននេះ។-សម្ដេចធិបតីនាយករដ្ឋមន្រ្ដី ប្រកាសថា កម្ពុជារក្សាជំហរដោះស្រាយបញ្ហាព្រំដែនតាមសន្ដិវិធី ប៉ុន្ដែកម្ពុជាក៏រក្សាសិទ្ធិការពារអធិបតេយ្យភាព និងបូរណភាពទឹកដីរបស់ខ្លួនមិនខ្លាច នឹងប្រើកម្លាំងប្រសិនបើមានអ្នកចូលមកឈ្លានពាន។-សម្ដេចធិបតីនាយករដ្ឋមន្រ្ដី បង្ហាញការសោកស្ដាយ និងហួសចិត្ត ចំពោះក្រុមជ្រុលនិយមមួយក្ដាប់តូច ដែលបន្តអួតខ្លួនឯងថាជាអ្នកស្នេហាជាតិរឿងទឹកដី ព្រំដែនកម្ពុជា ប៉ុន្ដែកន្លងទៅនៅពេលដែលប្រទេសជាតិមានបញ្ហាព្រំដែន គឺមិនដែលឃើញមុខក្រុមពួកគេចូលរួមជួយ ឬធ្វើសកម្មភាពណាមួយដើម្បីជួយរឿងព្រំដែននេះទេ។

ឯកឧត្តមសាស្ត្រាចារ្យ ឈាង រ៉ា បានធ្វើបាឋកថាលើភាពជាអ្នកដឹកនាំ និងនវានុវត្តន៍ ស្តីពី "វិធីសាស្រ្តនៃការគិតពិចារណាតាមបែបវិចារវិទ្យា" ផ្នែកទី២

ភ្នំពេញ ÷ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានធ្វើបទបាឋកថាក្នុងវគ្គភាពជាអ្នកដឹកនាំ និងនវានុវត្តន៍ ជូនថ្នាក់ដឹកនាំ និងមន្រ្តីសុខាភិបាលគ្រប់ឋានានុក្រមក្រោមឱវាទក្រសួងសុខាភិបាល តាមប្រព័ន្ធវីដេអូសន្និសីទ (Zoom) ដែលមានសមាសភាពចូលរួមសរុបចំនួន ៤១០៥នាក់, នារសៀលថ្ងៃទី១៨ ខែកុម្ភៈ ឆ្នាំ២០២៥នេះ។ជាកិច្ចចាប់ផ្តើម ឯកឧត្តមសាស្រ្តាចារ្យរដ្ឋមន្រ្តី បានគូសរំលឹកនូវចំនុចការពង្រឹងសេវាសុខាភិបាល ដល់ថ្នាក់ដឹកនាំ មន្រ្តីរាជការ បុគ្គលិកនៅតាមមណ្ឌលសុខភាព និងមន្ទីរពេទ្យបង្អែកស្រុក ត្រូវយកចិត្តទុកដាក់លើកិច្ចការគាំពារមាតា និងទារក ឱ្យបានគត់មុតទាន់ពេលវេលា និងសកម្មបំផុត។ ក្នុងនោះ ឯកឧត្តមសាស្រ្តាចារ្យ ក៏បានលើកយកករណីសិក្សាមួយទាក់ទងនឹងការផ្តល់ សេវាថែទាំនឹងព្យាបាល មកបង្ហាញនឹងបានធ្វើការពន្យល់ពីវិធីសាស្រ្ត និងរបៀបពិចារណាសម្រាប់ ដោះស្រាយបញ្ហាចំពោះមុខ ក៏ដូចជាត្រៀមខ្លួនកុំឱ្យមានករណីណាមួយ កើតឡើងជាបន្តទៀតនៅតាមមណ្ឌលសុខភាព និងមន្ទីរពេទ្យ។ជាកិច្ចបន្តឯកឧត្តមសាស្រ្តាចារ្យរដ្ឋមន្រ្តី លើកយកនិយមន័យរបស់ទស្សនវិជ្ជាមកចែករំលែក និងបានលើកឡើងពីសារៈសំខាន់នៃការសិក្សាទស្សនវិជ្ជា ក៏ដូចការប្រើប្រាស់ទស្សនវិជ្ជានៅក្នុងជិវិតរស់នៅ និងជីវិតការងាររបស់មន្រ្តីសុខាភិបាល។ ឯកឧត្តមសាស្រ្តាចារ្យ បានចាប់ផ្តើមបាឋកថាដោយពន្យល់ពាក្យគន្លឹះ មួយចំនួនសម្រាប់ស្វែងយល់ពីទស្សនវិជ្ជា រួមមានៈ អង្គវត្ថុ បាតុភូត ដំណើរការវិវឌ្ឍន៍ ទម្រង់ ។ល។ ដែលពាក្យគន្លឹះទាំងនេះ នឹងត្រូវយកទៅប្រើប្រាស់ សម្រាប់ធ្វើការពិចារណាតាមបែបទស្សនវិជ្ជាទាំងពីរប្រភេទ គឺបែបសំភារៈនិយម (Dialectical Materialism) និងមនោនិយម (Idealism)។ ឯកឧត្តមសាស្រ្តចារ្យ ក៏បានជំរុញឱ្យមន្រ្តីសុខាភិបាលគ្រប់ឋានុក្រម ខិតខំស្វែងយល់ពីទស្សនវិជ្ជា និងប្រើប្រាស់ទស្សនវិជ្ជា ដើម្បីបង្កើនគុណភាពនៃការពិចារណាឱ្យកាន់ តែមានភាពគ្រប់ជ្រុងជ្រោយ និងសមស្របតាមកាលវេលា និងបរិបទ។ដោយមានការអនុញ្ញាតពី ឯកឧត្តមសាស្រ្តាចារ្យរដ្ឋមន្រ្តី នៅក្នុងសប្តាហ៍នេះ មានការធ្វើបទបង្ហាញការចែករំលែកបទពិសោធន៍ លើការងារបង្កើនការប្រើប្រាស់សេវាពិនិត្យជំងឺក្រៅនៅមន្ទីរពេទ្យអង្គរបូរី នៃមន្ទីរសុខាភិបាលនៃរដ្ឋបាលខេត្តតាកែវ៕អត្ថបទ រដ្ឋា

ឯកឧត្តមសាស្រ្តាចារ្យរដ្ឋមន្រ្តី «គម្រោងមជ្ឈមណ្ឌលស៊ីក្លូត្រុង នៅមន្ទីរពេទ្យកាល់ម៉ែត នឹងរួមចំណែកបង្កើនប្រសិទ្ធភាពការធ្វើរោគវិនិច្ឆ័យ និងព្យាបាលជំងឺមហារីកនៅកម្ពុជា»

ភ្នំពេញ ៖ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានទទួលជួបសម្តែងការគួរសម និងពិភាក្សាការងារជាមួយក្រុមការងារជំនាញផ្នែក Cyclotron ប្រចាំ តំបន់មហាសមុទ្រឥណ្ឌា ដឹកនាំដោយលោក Christian MERIAU, Directeur du GIP CYROI, ថ្ងៃទី១៨ ខែកុម្ភៈ ឆ្នាំ២០២៥ នៅទីស្តីការក្រសួងសុខាភិបាល ។ឯកឧត្តមសាស្រ្តាចារ្យរដ្ឋមន្ត្រី បានស្វាគមន៍យ៉ាងកក់ក្តៅ និងថ្លែងអំណរគុណដល់ក្រុមការងារបច្ចេកទេសផ្នែក Cylotron ដែលបានមកជួយសិក្សាលម្អិតអំពីសុវត្ថិភាពវិទ្យុសកម្ម និងការការពារកាំរស្មី ក្នុងគម្រោងសាងសង់អគារវេជ្ជសាស្រ្ត ស៊ីក្លូត្រុងបន្ថែម និងផ្តល់យោបល់ ដើម្បីជាមូលដ្ឋានកាន់តែរឹងមាំសម្រាប់គម្រោងបង្កើតមជ្ឈមណ្ឌល Cyclotron នៅក្នុងមន្ទីរពេទ្យកាល់ម៉ែត គាំទ្រដល់ការធ្វើរោគវិនិច្ឆ័យ និងព្យាបាលជំងឺមហារីកនៅកម្ពុជា ស្របតាមផែនការយុទ្ធសាស្ត្រជាតិគ្រប់គ្រងជំងឺមហារីក។លោកសាស្ត្រាចារ្យ Christian MERIAU បានថ្លែងអំណរគុណដល់ ឯកឧត្តមសាស្ត្រាចារ្យរដ្ឋមន្ត្រី និងបានអបអរសាទរដល់កម្ពុជា ជាពិសេសមន្ទីរពេទ្យកាល់ម៉ែត ដែលបានចាប់ផ្តើមគម្រោងសាងសង់មជ្ឈមណ្ឌល Cyclotron ហើយនឹងដាក់ឱ្យដំណើរការម៉ាស៊ីន PET CT ដើម្បីដើរឱ្យទាន់សភាពការណ៍វិវត្តរីកចំរើនផ្នែកខាងវិទ្យាសាស្រ្តវេជ្ជសាស្រ្ត។ ជាមួយគ្នានេះ លោកបានបញ្ជាក់អំពីគោលបំណងជួយកម្ពុជាបន្ថែមរួមមាន៖១- ជួយបណ្តុះបណ្តាលនិស្សិត និងអ្នកជំនាញការជនជាតិខ្មែរ លើបច្ចេកទេសស៊ីក្លូត្រុង ២- ទទួលនិស្សិតខ្មែរដែលចង់ធ្វើកម្មសិក្សា និងសិក្សាស្រាវជ្រាវពាក់ព័ន្ធនឹងការងារស៊ីក្លូត្រុង៣- ជួយសម្របសម្រួលបញ្ជូនអ្នកជំនាញផ្នែកស៊ីក្លូត្រុងមកជួយបណ្តុះបណ្តាលនៅកម្ពុជា៤- ជួយផ្តល់ប្រឹក្សាលើបច្ចេកទេសសាងសង់សំណង់ និងដំណើរការមជ្ឈមណ្ឌលស៊ីក្លូត្រុងនៅមន្ទីរពេទ្យកាល់ម៉ែត។ក្នុងនាមក្រសួងសុខាភិបាល ឯកឧត្តមសាស្ត្រាចារ្យរដ្ឋមន្ត្រី បានឯកភាពជាគោលការណ៍លើគម្រោងសហប្រតបត្តិការ ដែលបានស្នើឡើងខាងលើដោយភាគីបារាំង ព្រមទាំងសង្ឃឹមនិងជឿជាក់ថា ក្រុមការងារជំនាញនៃមន្ទីរពេទ្យកាល់ម៉ែត និងក្រុមការងារបច្ចេកទេស របស់លោកសាស្ត្រាចារ្យ Christian MERIAU សហការយ៉ាងជិតស្និទ្ធជាមួយគ្នា ក្នុងការរៀបចំ និងការដំណើរការប្រព័ន្ធស៊ីក្លូត្រុង (Cyclotron System) នៅមន្ទីរពេទ្យកាល់ម៉ែត ឱ្យបានឆាប់រហ័សសម្រាប់ជាប្រយោជន៍ដល់អ្នកជំងឺមហារីក ដែលកំពុងទន្ទឹងរង់ចាំទទួលបានសេវាព្យាបាលកម្រិតខ្ពស់បំផុតនេះ ដើម្បីចូលរួមចំណែកជាមួយរាជរដ្ឋាភិបាលកម្ពុជា ឈានទៅសម្រេចបានការគ្របដណ្តប់សុខភាពជាសកល ស្របតាមផែនការយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាលអាណត្តិទី៧ នៃរដ្ឋសភា ក្រោមការដឹកនាំដ៏ឈ្លាសវៃ និងមុះមុត ប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា៕អត្ថបទ រដ្ឋា

ទេសរដ្ឋមន្រ្ដី គន់ គីម អញ្ជើញដឹកនាំកិច្ចប្រជុំបូកសរុបលទ្ធផលការងាររបស់សមាគមអតីតយុទ្ធជនកម្ពុជាឆ្នាំ២០២៤ និងលើកទិសដៅឆ្នាំ២០២៥

ភ្នំពេញ ៖ នៅថ្ងៃទី១៨ ខែកុម្ភៈ ឆ្នាំ២០២៥នេះ ឯកឧត្តម នាយឧត្តមសេនីយ៍ កិតិសង្គហបណ្ឌិត គន់ គីម អនុប្រធាននិងជាអគ្គលេខាធិការសមាគមអតីតយុទ្ធជនកម្ពុជា (ស.អ.ក) បានអញ្ជើញជាធិបតីភាពដឹកនាំកិច្ចប្រជុំបូកសរុបលទ្ធផលការងាររបស់សមាគមអតីតយុទ្ធជនកម្ពុជា ឆ្នាំ២០២៤ និងលើកទិសដៅអនុវត្តបន្តឆ្នាំ២០២៥។នៅក្នុងឱកាសដឹកនាំកិច្ចប្រជុំបូកសរុបលទ្ធផលការងារ ឆ្នាំ២០២៤ និងលើកទិសដៅឆ្នាំ២០២៥នេះ ឯកឧត្តម កិត្តិសង្គហបណ្ឌិត គន់ គីម ទេសរដ្ឋមន្ត្រី មានប្រសាសន៏ថាសម្រាប់ឆ្នាំ២០២៥ សមាគមអតីតយុទ្ធជនកម្ពុជាបន្តអនុវត្តន៍អនុសាសន៍ទាំង ១៤ចំណុចរបស់ប្រមុខរដ្ឋាភិបាល ដែលបានដាក់ជូន និងខិតខំបន្តសាងសង់ផ្ទះជូនអតីតយុទ្ធជន ដែលពុំមានផ្ទះស្នាក់នៅសមរម្យតាមបណ្តារាជធានី ខេត្ត។ ឯកឧត្តម ទេសរដ្ឋមន្រ្ដី គន់ គីម បន្តថា សមាគមកន្លងមកបានសហការជាមួយក្រសួងរៀបចំដែនដី នគរូបនីយកម្ម និងសំណង់ និងក្រសួងសង្គមកិច្ច អតីតយុទ្ធជន និងយុវនីតិសម្បទា ជំរុញការដោះស្រាយសម្ប ទាន ដី សង្គមកិច្ច ដើម្បីបែងចែកជូនអតីតយុទ្ធជន ដែលក្រីក្រ គ្មានដីបង្កបង្កើនផលពិតប្រាកដ។ ជាមួយគ្នា ឯកឧត្តម ទេសរដ្ឋមន្រ្ដី គន់ គីម បន្តទៀតថា សមាគមក៏បានពង្រឹងរបបរាយការណ៍ និងរបបធ្វើការងារនៅគ្រប់ថ្នាក់ ជាពិសេសគណៈជំនាញពាក់ព័ន្ធត្រូវរៀបចំផែនការ ចុះធ្វើការអប់រំ និងពង្រឹងសមត្ថភាពការងារដល់ក្រុមការងារ សមាគមអតីតយុទ្ធជនកម្ពុជា ថ្នាក់រាជធានី ខេត្ត ដើម្បីធានា អោយការអនុវត្តការងារ នៅ មូលដ្ឋានទទួលបាននូវគុណភាព និងប្រសិទ្ធភាព។ លើសពីនេះ ឯកឧត្តម ទេសរដ្ឋមន្រ្ដី គន់ គីម បន្ថែមថា គោលនយោបាយរបស់រាជរដ្ឋាភិបាលចំពោះអតីតយុទ្ធជនដល់សមាជិកសមាគមអតីតយុទ្ធជនកម្ពុជា និងបងប្អូន អតីត យុទ្ធជន ដែលមិនទាន់ចូលជាសមាជិកបានជ្រួតជ្រាបពីផលប្រយោជន៍របស់ សមាគមអតីតយុទ្ធជនកម្ពុជា ហើយស្ម័គ្រចិត្ត ចូលរួមជា សមាជិក អតីតយុទ្ធជនកម្ពុជាឲ្យបានគ្រប់គ្នា។ឯកឧត្តម កិត្តិសង្គហបណ្ឌិត គន់ គីម ទេសរដ្ឋមន្ត្រី ក្នុងនាមអគ្គលេខាធិការសមាគមអតីតយុទ្ធជនបានជំរុញដល់ សមាជិកសមាគមអតីតយុទ្ធជនកម្ពុជា ស.អ.ក. រាជធានី ខេត្ត ក្នុងការបង់ថវិកាភាគទាន និងថវិកាបេឡាមរណសង្គ្រោះ មក សមាគមអតីតយុទ្ធជនកម្ពុជា ថ្នាក់កណ្តាល តាមរយៈមូលនិធិជាតិជំនួយសង្គម (ម.ជ.ជ.) ឲ្យបានទាន់ពេលវេលា។តាមរបាយការណ៍របស់សមាគមអតីតយុទ្ធកម្ពុជា បានឲ្យដឹងថា ការងារចាត់តាំង និងគ្រប់គ្រងបច្ចុប្បន្ន សមាគមអតីតយុទ្ធជនកម្ពុជា មានសមាជិកសរុបចំនួន ៨៧.៥៩០នាក់។ ក្នុងចំណោមនេះ គ្រួសារជនពលី ចំនួន ១៦.៦០០នាក់, ជនមរណៈ ចំនួន ២.៨៧៨នាក់, ជនពិការ ចំនួន ២៧.៤៦១នាក់, និវត្តជន ចំនួន ៣៩.២៥២នាក់, ជនបាត់បង់សមត្ថភាពការងារ ចំនួន ១.៣៥៦នាក់ និងមន្រ្តីរាជការស៊ីវិល ចំនួន៤៣នាក់។ គណៈហិរញ្ញវត្ថុ និងបេឡាមរណសង្រ្គោះ សមាគមអតីតយុទ្ធកម្ពុជា បានទទួលស្ថិតិសមាជិកមរណភាពរបស់ សមាគមអតីតយុទ្ធកម្ពុជា រាជធានី ខេត្ត សរុបចំនួន២.១៨៣នាក់។គួរជម្រាបជូនថា ដោយបានការយកចិត្តទុកដាក់គិតគូរពី សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានសមាគមអតីតយុទ្ធជនកម្ពុជា និង សម្តេចមហាបវរធិបតី ហ៊ុន ម៉ាណែត ជានាយករដ្ឋមន្រ្តី ទន្ទឹមនឹងលទ្ធផលដែលសម្រេចបានខាងលើ សមាគមអតីតយុទ្ធជនក៏នៅមានចំណុចសេសសល់និងបញ្ហាប្រឈមមួយចំនួន ដែល ត្រូវយកចិត្តទុកដាក់បន្ថែមទៀតនោះគឺ៖-ការសាងសង់ផ្ទះជូនអតីតយុទ្ធជន នៅមិនទាន់ឆ្លើយតបនឹងចំនួនអតីតយុទ្ធជនដែលជួបការលំបាក ខ្វះ ខាត ដែល មានដីប៉ុន្តែមានផ្ទះស្នាក់នៅមិនសមរម្យ។-សមាជិក សមាគមអតីតយុទ្ធជនកម្ពុជា មួយចំនួនធ្វើចំណាកស្រុកទៅរកស៊ីនៅតំបន់ឆ្ងាយ មានការលំបាកក្នុងការទំនាក់ទំនង ដើម្បី បំពេញឯកសារផ្សេងៗឲ្យបានទាន់ពេលវេលា ទោះបីមានលេខទូរស័ព្ទទំនាក់ទំនងក៏ដោយ។ តែយ៉ាងណាក្រោមការដឹកនាំដោយផ្ទាល់ពី ឯកឧត្តម នាយឧត្តមសេនីយ៍ កិត្តិសង្គហបណ្ឌិត ទេសរដ្ឋមន្ត្រី អគ្គលេខាធិការ អគ្គលេខាធិការរង បានខិត ខំពុះពារដឹកនាំ អនុវត្តភារកិច្ច ដោយស្មារតីទទួលខុសត្រូវខ្ពស់ តាំងពីថ្នាក់ កណ្តាលរហូតដល់ ថ្នាក់រាជធានី ខេត្ត ក្រុង ស្រុក ខណ្ឌ ឃុំ សង្កាត់៕

ឯកឧត្តម ជិន ម៉ាលីន ៖ការបង្កើតអាជ្ញាធរជាតិដោះស្រាយវិវាទក្រៅប្រព័ន្ធតុលាការគឺផ្អែកលើនយោបាយ, ច្បាប់, និងសង្គម

ភ្នំពេញ ៖ រដ្ឋលេខាធិការក្រសួងយុត្តិំធម៌ ឯកឧត្តម ជិន ម៉ាលីន បានលើកឡើងថា ការបង្កើតនូវអាជ្ញាធរជាតិ ដោះស្រាយវិវាទក្រៅប្រព័ន្ធតុលាការ ត្រូវបានធ្វើឡើងផ្អែកលើមូលដ្ឋានសំខាន់ៗមួយចំនួន ដោយក្នុងនោះ រួមមានមូលដ្ឋានផ្នែកគោលនយោបាយ, មូលដ្ឋានផ្នែកច្បាប់, និងមូលដ្ឋានផ្នែកសង្គម ហើយមួយវិញទៀតការបង្កើតនូវកម្មវិធីនេះក៏ដើម្បីធានាបាននូវបរិយាកាសសន្តិភាពនិយម និងភាពសុខដុមរមនាក្នុងសង្គមជាតិផងដែរ។ ថ្លែងក្នុងឱកាសអញ្ជើញក្នុងពិធីចុះហត្ថលេខាលើអនុស្សរណៈនៃការយោគយល់គ្នា ស្តីពីកិច្ចសហ ប្រតិបត្តិការក្នុងការសម្រុះសម្រួលផ្សះផ្សាវិវាទរវាង អ.ដ.កនិងនិយ័តករមូលបត្រកម្ពុជា និងរវាងអ.ដ.ជា មួយនិយតករសន្តិសុខសង្គម នាថ្ងៃទី១៨ ខែកុម្ភៈ ឆ្នាំ២០២៥នេះ នៅបណ្ឌិត្យសភាភូមិន្ទយុត្តិធម៌កម្ពុជា ឯកឧត្តម ជិន ម៉ាលីន អនុប្រធានអាជ្ញាធរជាតិដោះស្រាយវិវាទក្រៅប្រព័ន្ធតុលាការផងនោះ បានលើកឡើងថា រាជរដ្ឋាភិបាលនីតិកាលទី៧ នៃរដ្ឋសភា បានដាក់ចេញជាទិសដៅអាទិភាពក្នុងការលើកកម្ពស់យន្តការ សម្រុះសម្រួល និងផ្សះផ្សាវិវាទ ទាំងក្នុងប្រព័ន្ធតុលាការ ទាំងក្រៅប្រព័ន្ធតុលាការដំដៅបង្កើនប្រសិទ្ធភាព និងភាពឆាប់រហ័សនៃការដោះស្រាយវិវាទ, បង្ខិតសេវានៃការដោះស្រាយវិវាទដែលមានលក្ខណៈងាយ ស្រួល និងសម្បូរបែបឲ្យទៅជិតប្រជាពលរដ្ឋ និងធានាបាននូវបរិយាកាស«សន្តិភាពនិយម និងភាពសុខដុមរមនាក្នុងសង្គមជាតិ»ជាដើម។ ឯកឧត្តម បានលើកឡើងទៀតថា ស្របតាមគោលនយោបាយកែទម្រង់ប្រព័ន្ធយុត្តិធម៌នៅកម្ពុជា សម្រាប់នីតិកាលទី៧ នៃរដ្ឋសភានេះអាជ្ញាធរជាតិដោះស្រាយវិវាទក្រៅប្រព័ន្ធតុលាការ ដែលជាស្ថាប័នថ្មី ត្រូវបានបង្កើតឡើងដោយព្រះរាជក្រឹត្យកាលពីថ្ងៃទី២ ខែវិច្ឆិកា ឆ្នាំ២០២៣កន្លងទៅ ដើម្បីជាយន្តការបំពេញបន្ថែមប្រព័ន្ធដោះស្រាយវិវាទ ដែលមានស្រាប់នៅព្រះរាជាណាចក្រកម្ពុជា។ ដោយឡែកសម្រាប់ការចុះអនុស្សរណៈយោគយល់គ្នាទាំងពីរខាងលើនេះ គឺជាការបោះជំហ៊ានថ្មី មួយទៀតទៅតាមផែនការរបស់ អ.ដ.ក.បានគ្រោងទុកសំដៅលើកកម្ពស់យន្តការនៃការសម្រុះសម្រួលផ្សះ ផ្សាវិវាទក្រៅប្រព័ន្ធតុលាការឲ្យកាន់តែមានភាពងាយស្រួល, កាន់តែសម្បូរបែប, កាន់តែខិតជិតប្រជាពល រដ្ឋនៅមូលដ្ឋាន និងកាន់តែមានប្រសិទ្ធភាពក្នុងការដោះស្រាយវិវាទ ជូនប្រជាពលរដ្ឋដែលមានបំណងស្វែងរកការសម្រុះសម្រួលដោះស្រាយបញ្ចប់វិវាទរបស់ខ្លួនឲ្យឆាប់រហ័សនោះ។ ឯកឧត្តមរដ្ឋលេខាធិការ បានបន្ថែមទៀតថាអនុស្សរណៈទាំងពីរខាងលើនេះ ក៏ត្រូវបាន ធ្វើឡើងក្នុងគោលបំណងបើកច្រកឲ្យនិយ័តករមូលបត្រកម្ពុជា និងនិយ័តករសន្តិសុខសង្គមអាចយកវិវាទ ដែលខ្លួនបានសម្រុះសម្រួលផ្សះផ្សាបញ្ចប់ដោយជោគជ័យក្នុងក្របខ័ណ្ឌនៃដែនសមត្ថកិច្ចរបស់និយ័តករ នីមួយៗដាក់ជូនមកអ.ដ.ក. ដើម្បីរៀបចំចេញជាកំណត់ហេតុព្រមព្រៀបបញ្ចប់វិវាទផងដែរ៕អត្ថបទ បាន ចក់

គណៈប្រតិភូសហរដ្ឋអាម៉េរិកបានកោតសរសើរកម្ពុជា បានកំពុងរួមគ្នាដើម្បីសម្រេចចក្ខុវិស័យឆ្នាំ២០៥០

ភ្នំពេញ ៖ គណៈប្រតិភូសភាសហរដ្ឋអាម៉េរិក បង្ហាញនូវការកោតសរសើរខ្ពស់ ចំពោះការតាំងចិត្តយ៉ាងមុតស្រួចរបស់រាជរដ្ឋាភិបាល និង ប្រជាជនកម្ពុជា ដែលបានកំពុងពួតដៃរួបរួមគ្នា សំដៅសម្រេចឱ្យបាននូវចក្ខុវិស័យកម្ពុជាឆ្នាំ២០៥០។ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នៅក្នុងជំនួបសម្តែងការគួរសមជាផ្លូវ ការ និងពិភាក្សាការងារជាមួយ គណៈប្រតិភូសភាសហរដ្ឋអាម៉េរិក នៅថ្ងៃទី១៨ ខែកុម្ភៈ ឆ្នាំ២០២៥ នេះ, ឯកឧត្តមឧបនាយករដ្ឋមន្ត្រី បានជម្រាបទៅកាន់គណៈប្រតិភូសភាសហរដ្ឋអាម៉េរិក អំពីដំណើរអភិវឌ្ឍន៍របស់កម្ពុជា បន្ទាប់ពីទទួលបានជ័យជម្នះលើរបបប្រល័យ ពូជសាសន៍ប៉ុលពត និងទទួលបាននូវសុខសន្តិភាពពេញលេញ តាមរយៈការអនុវត្តដោយជោគជ័យនៃនយោបាយឈ្នះឈ្នះ របស់ ប្រមុខរាជរដ្ឋាភិបាល។ ជាមួយគ្នានេះ ឯកឧត្តមបានលើកឡើងអំពីសាវតានៃការបង្កើតក្រុមប្រឹក្សាអភិវឌ្ឍន៍កម្ពុជា ក៏ដូចជាបេសកកម្ម និងចក្ខុវិស័យ ក្នុងនាមជាសេនាធិការ និងជាច្រកចេញចូលតែមួយរបស់រាជរដ្ឋាភិបាល លើការងារគ្រប់គ្រងការវិនិយោគឯកជន និងតំបន់សេដ្ឋកិច្ចពិសេស ដែលបាននិងកំពុងបន្តខិតខំជំរុញការកែលម្អ ធ្វើឱ្យប្រសើរឡើងនូវបរិយាកាសធុរកិច្ច និងការវិនិយោគ។ឯកឧត្តមឧបនាយករដ្ឋមន្ត្រី បានរំលេចអំពីសក្តានុពលវិជ្ជមាននានា របស់ព្រះរាជាណាចក្រកម្ពុជាមានជាអាទិ៍៖ ទីតាំងភូមិ សាស្រ្តដែលមានអំណោយផលខ្ពស់, សុខសន្តិភាព និងស្ថិរភាពនយោបាយ, លំនឹងម៉ាក្រូសេដ្ឋកិច្ច, កម្លាំងពលកម្មវ័យក្មេងដែលមាន លក្ខណៈរួចរាល់ សម្រាប់បរិវត្តកម្មឌីជីថល, ការគាំទ្រពីសំណាក់រាជរដ្ឋាភិបាល ដល់ការរីកលូតលាស់នៃវិស័យធុរកិច្ចឯកជន, បែបបទ នៃការវិនិយោគដែលមានភាពបត់បែន និងអនុគ្រោះ ព្រមទាំងហេដ្ឋារចនាសម្ព័ន្ធអន្តរមធ្យោបាយដែលបាន និងកំពុងអភិវឌ្ឍឱ្យកាន់តែ មានភាពសម្បូរបែប និងប្រទាក់ក្រឡា ទាំងផ្លូវគោក ផ្លូវទឹក ផ្លូវដែក និងផ្លូវអាកាស ជំរុញឱ្យសមាហរណកម្មនៅទូទាំងប្រទេស និងទៅ កាន់តំបន់កាន់តែប្រសើរឡើង។ក្នុងជំនួបនេះ, គណៈប្រតិភូសភាសហរដ្ឋអាមេរិក បានថ្លែងនូវការកោតសរសើរជាពាក្យពេចន៍ភាសាអង់គ្លេសថា៖ The 3Is Presentation: Insightful, Impressive and Illuminated (បរិបូរណ៍ ដោយព័ត៌មានពិតប្រាកដ, ពោរពេញដោយថាមពល ជំរុញ ឱ្យមានការចាប់អារម្មណ៍ខ្ពស់ និងស្រាយបំភ្លឺនូវរាល់ចម្ងល់ផ្សេងៗដែលធ្លាប់មាន)។ គណៈប្រតិភូ បានគូសបញ្ជាក់ថា ការរីកចម្រើន របស់កម្ពុជា បានបង្ហាញឱ្យឃើញពីការតាំងចិត្តយ៉ាងមុតស្រួចរបស់រាជរដ្ឋាភិបាល និងប្រជាជនកម្ពុជា ក្នុងការពួតដៃរួបរួមគ្នាលើក ស្ទួយប្រទេសជាតិ ដើម្បីសម្រេចឱ្យបានចក្ខុវិស័យកម្ពុជាឆ្នាំ២០៥០ ដែលបានកំណត់។ ទន្ទឹមនឹងនេះ គណៈប្រតិភូសភាសហរដ្ឋ អាម៉េរិក បានវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការដ៏ល្អរវាងសហរដ្ឋអាម៉េរិក និងកម្ពុជា ស្របពេលដែលឆ្នាំនេះ ក៏ជាខួបទី៧៥ឆ្នាំ នៃទំនាក់ទំនងការទូតកម្ពុជា-សហរដ្ឋអាម៉េរិក ព្រមទាំងបានបង្ហាញនូវសុឆន្ទៈក្នុងការជំរុញការពង្រឹង និងពង្រីកកិច្ច សហប្រតិបត្តិការរវាងប្រទេសទាំងពីរ និងលើកកម្ពស់កិច្ចសហប្រតិបត្តិការក្នុងភាពជាដៃគូ កម្ពុជា-សហរដ្ឋអាម៉េរិក ឱ្យឈានដល់ កម្រិតខ្ពស់ និងកាន់តែរឹងមាំបន្ថែមទៀត។សូមជម្រាបថា នៅក្នុងជំនួបសម្តែងការគួរសម និងពិភាក្សាការងារ គណៈប្រតិភូសភាសហរដ្ឋអាម៉េរិក ដែលបានអញ្ជើញចូលរួមមាន៖ ឯកឧត្តម Jimmy Panetta សមាជិកសភាប្រចាំរដ្ឋកាលីហ្វ័រញ៉ា មកពីគណបក្សប្រជាធិបតេយ្យ, ឯកឧត្តម Darin Lahood សមាជិកសភាប្រចាំរដ្ឋអ៊ីលីណយ មកពីគណបក្សសាធារណរដ្ឋ, ឯកឧត្តម Salud Carbajal សមាជិកសភាប្រចាំរដ្ឋកាលីហ្វ័រញ៉ា មកពី គណបក្សប្រជាធិបតេយ្យ ព្រមទាំងសហការីអមដំណើរ ក្នុងឱកាសដែលគណៈប្រតិភូកំពុងបំពេញទស្សនកិច្ចផ្លូវការ នៅព្រះរាជាណា ចក្រកម្ពុជា៕អត្ថបទ៖ សុន រ៉ាឌី

ការអភិវឌ្ឍហេដ្ឋារចនាសម្ព័ន្ធជនបទ ជាការជំរុញដំណើរអន្តរកម្មផ្នែកសេដ្ឋកិច្ចនៃកម្ពុជា

ភ្នំពេញ÷ ក្រសួងអភិវឌ្ឍន៍ជនបទ ចាត់ទុកការអភិវឌ្ឍហេដ្ឋារចនាសម្ព័ន្ធរូបវ័ន្ត និងគមនាគមន៍ដឹកជញ្ជូននៅជនបទ មានសារៈសំខាន់បំផុត ក្នុងការជំរុញដំណើរអន្តរកម្មផ្នែកសេដ្ឋកិច្ច និងសង្គមកិច្ច ដើម្បីកាត់បន្ថយគម្លាតរវាងតំបន់ជនបទនិងទីក្រុង។ឯកឧត្តម ប៊ុន ច័ន្ទវណ្ណៈ រដ្ឋលេខាធិការក្រសួងអភិវឌ្ឍន៍ជនបទ លើកឡើងក្នុងការចុះត្រួតពិនិត្យ និងវាយតម្លៃបញ្ចប់សុពល ភាព លើការងារស្ថាបនាផ្លូវក្រាលកៅស៊ូ DBST ចំនួន ១ ខ្សែ ប្រវែង ៣ ៥០០ ម៉ែត្រ ទទឹង ៦ ម៉ែត្រ និងសំណង់សិល្បការ្យផ្សេងៗ ឃុំជយោ ស្រុកចំការលើ ខេត្តកំពង់ចាម នៅថ្ងៃទី ១៨ ខែ កុម្ភៈ ឆ្នាំ ២០២៥ នេះថា ជុំវិញការអភិវឌ្ឍន៍ផ្លូវ និងហេដ្ឋារចនាសម្ព័ន្ធ, ក្រសួងអភិវឌ្ឍន៍ជនបទ បាននិងកំពុងផ្ដោតការយកចិត្តទុកដាក់យ៉ាងខ្លាំង លើការស្ថាបនាជាពិសេសផ្លូវជនបទ ដោយក្នុងនោះបាន គិតគូរពីភាពធន់ នឹងការប្រែប្រួលអាកាសធាតុរួមមាន៖ ផ្លូវដីស ផ្លូវល្បាយ ក្រួស និងផ្លូវកៅស៊ូពីរជាន់ ឬក្រាលបេតុង ដើម្បីបង្កភាព ងាយស្រួលដល់ប្រជាពលរដ្ឋក្នុងការធ្វើដំណើរ, ចំណេញពេលវេលា, កាត់បន្ថយការចំណាយលើការដឹកជញ្ជូនសម្ភារ ឬផលិតផល ផ្សេងៗទៅកាន់ទីផ្សារ និងងាយស្រួលក្នុងការទទួលបាននូវសេវាសាធារណៈ។ជុំវិញផ្លូវនេះ, ឯកឧត្តមបានវាយតម្លៃខ្ពស់ ចំពោះការខិតខំប្រឹងប្រែងស្ថាបនា របស់នាយកដ្ឋានផ្លូវលំជនបទ រហូតដល់បញ្ចប់ សុពលភាព ព្រោះការអភិវឌ្ឍន៍ហេដ្ឋារចនាសម្ព័ន្ធរូបវ័ន្ត និងគមនាគមន៍ដឹកជញ្ជូននៅជនបទ មានសារៈសំខាន់បំផុត ដើម្បីលើក កម្ពស់ជីវភាពរស់នៅ និងកាត់បន្ថយភាពក្រីក្ររបស់ប្រជាពលរដ្ឋនៅជនបទ ។ ឯកឧត្តម រដ្ឋលេខាធិការបានរំលេចនូវគុណបំណាច់ របស់រាជរដ្ឋាភិបាល ជាពិសេសនៅក្នុងអាណត្តិទី ៧ នៃរដ្ឋសភានេះ, រាជរដ្ឋាភិបាលកម្ពុជា នឹងបាននិងកំពុងបន្តការគាំទ្រដល់ ការជួស ជុល ថែទាំផ្លូវ ស្ពាន ការស្ថាបនាហេដ្ឋារចនាសម្ព័ន្ធគមនាគមន៍ដឹកជញ្ជូនជនបទ និងការលើកកម្ពស់កម្រិតផ្លូវជនបទ ពីផ្លូវក្រាលក្រួស ក្រហម ទៅជាផ្លូវក្រាលកៅស៊ូឬបេតុង ដើម្បីជំរុញធ្វើអន្តរកម្មផ្នែកសង្គមនិងសេដ្ឋកិច្ច ការតភ្ជាប់សកម្មភាពធុរកិច្ចផ្សេងៗ រវាងតំបន់ ជនបទ និងទីប្រជុំជនជាដើម, បច្ចុប្បន្នក្រសួងអភិវឌ្ឍន៍ជនបទ ដែលជាសេនាធិការរបស់រាជរដ្ឋាភិបាល ក៏បានកំពុងខិតខំយកចិត្ត ទុកដាក់ អនុវត្តការងារទាំងនេះឱ្យឆ្លើយតបទៅតាមផែនការរបស់រាជរដ្ឋាភិបាល។ក្នុងពិធីសំណេះសំណាលជាមួយប្រជាពលរដ្ឋ, ឯកឧត្តម ប៊ុន ច័ន្ទវណ្ណៈ បានសំណូមពរដល់អាជ្ញាធរ និងប្រជាពលរដ្ឋនៅ មូលដ្ឋាន សូមចូលរួមថែទាំសមិទ្ធផលទាំងនេះទាំងអស់គ្នាដូចជា ការហាមឃាត់ឡានដែលដឹកលើសចំណុះ និងការកាប់គាស់ដែលប៉ះ ពាល់ទ្រូងផ្លូវជាដើម។ ក្នុងជំនួបនេះដែរ, ឯកឧត្តមក៏បាននាំយកអំណោយដ៏ថ្លៃថ្លារបស់ឯកឧត្តមរដ្ឋមន្ត្រី ឆាយ ឫទ្ធិសែន រដ្ឋមន្ត្រី ក្រសួងអភិវឌ្ឍន៍ជនបទ ចែកជូនដល់ប្រជាពលរដ្ឋជាច្រើននាក់ ដោយម្នាក់ៗទទួលបាន ក្រម៉ា១៕អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

មនុស្សម្នាក់ស្លាប់ និង ៣នាក់រងរបួស ក្នុងការវាយប្រហាររបសរុស្ស៊ីលើទីក្រុង Kherson ប្រទេសអ៊ុយក្រែន

ប្រមុខចារកម្មយោធាអ៊ុយក្រែន និយាយថា បទឈប់បាញ់អាចកើតមាន នៅឆ្នាំ២០២៥

មនុស្សម្នាក់ស្លាប់ និង ២នាក់រងរបួសក្នុងហេតុការណ៍បាក់អគារនៅភាគខាងលិចប្រទេសឥណ្ឌា

អូទ្រីសឆ្ពោះទៅបង្កើតរដ្ឋាភិបាលចម្រុះក្រុមកណ្ដាលនិយម ក្រោយក្រុមស្តាំនិយមជ្រុល សម្រេចមិនបាន

ពលរដ្ឋអ៊ុយក្រែនបង្ហាញការគាំទ្រដល់លោក Zelenskiy ក្រោយលោក Trump ចាត់ទុកគាត់ថាជាជនផ្តាច់ការ

ស្រ្តីប៉ាឡេស្ទីននៅតំបន់ហ្កាហ្សាអំពាវនាវឲ្យបញ្ចប់សង្រ្គាម ពេលក្រុមហាម៉ាស់ប្រគល់សាកសពចំណាប់ថ្នូរដល់អ៊ីស្រាអែល

រដ្ឋមន្ត្រីការបរទេស G20 ជួបប្រជុំគ្នា ចំពេលមានភាពតានតឹង ជុំវិញពាណិជ្ជកម្ម និងអ៊ុយក្រែន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877