BTV NEWS

មនុស្សប្រុសស្រីពាក់ព័ន្ធករណីបង្កគ្រោះថ្នាក់ចរាចរណ៍នៅខណ្ឌឫស្សីកែវ បណ្តាលឲ្យក្មេងម្នាក់រងរបួសធ្ងន់នឹងត្រូវបញ្ចូនទៅតុលាការទាំង ២នាក់

ជនបរទេស ១,៥៥៦នាក់ ត្រូវបានបណ្ដេញចេញពីកម្ពុជាពាក់ព័ន្ធករណី Online Scams និងធ្វើការងារស្នាក់នៅខុសច្បាប់

ស្នងការរាជធានី បញ្ជាឲ្យកម្លាំងសមត្ថកិច្ចចុះពិនិត្យទីតាំងផាប់មួយកន្លែង នៅខណ្ឌទួលគោក ក្រោយឃើញមានក្មេងៗទៅប្រមូលផ្តុំផឹកស៊ីទាំងថ្ងៃ

ពលរដ្ឋម្នាក់ស្លាប់ និងម្នាក់រងរបួសករណីផ្ទុះគ្រាប់បែកចង្កោម នៅស្រុកស្វាយចេក ខេត្តបន្ទាយមានជ័យ

សន្តិសុខ និង សង្គម

ពលរដ្ឋមូស្លីមនៅនូវែលហ្សេឡង់ រំលឹកខួប៥ឆ្នាំ នៃការបាញ់ប្រហារនៅទីក្រុង Christchurch

សហគមន៍មូស្លីមនៅប្រទេសនូវែលហ្សេឡង់ នៅថ្ងៃសុក្រ ទី១៥ ខែមីនានេះ បានរំលឹកខួប៥ឆ្នាំ នៃការបាញ់ប្រហារនៅទីក្រុង Christchurch ដែលបានបណ្តាលឱ្យអ្នកបួងសួងមូស្លីមចំនួន ៥១ នាក់ស្លាប់កាលពីឆ្នាំ ២០១៩ ជាការបាញ់ប្រហារទ្រង់ទ្រាយធំអាក្រក់បំផុតរបស់ប្រទេស រហូតមកដល់បច្ចុប្បន្ននេះ។ក្រុមអ្នកបួងសួងនៅទីក្រុង Christchurch បានមកជួបជុំគ្នានៅវិហារឥស្លាម Al Noor ជាកន្លែងដែលការវាយប្រហារមួយបានកើតឡើង ដោយបានដាក់គ្រឿងគោរពបូជាផ្កា នៅទីពិធីរំលឹក និងបានបួងសួង។ប្រដាប់ដោយអាវុធពាក់កណ្តាលស្វ័យប្រវត្តិសមត្ថភាពខ្ពស់ លោក Brenton Tarrant បានបាញ់សម្លាប់មនុស្ស ៥១ នាក់ និងបណ្តាលឲ្យរាប់សិបនាក់ផ្សេងទៀតរងរបួស ខណៈលោកបានបាញ់ប្រហារនៅក្នុងវិហារអ៊ីស្លាមចំនួនពីរកន្លែង កាលពីថ្ងៃទី ១៥ ខែមីនា ឆ្នាំ ២០១៩ នៅទីក្រុង Christchurch ។លោក Tarrant បានផ្សាយបង្ហាញពីការរើសអើងជាតិសាសន៍ភ្លាមៗមុនពេលការបាញ់ប្រហារ ហើយបានបង្ហោះការបាញ់រះនេះនៅលើបណ្តាញសង្គម Facebook ។ក្រោយមក នាយករដ្ឋមន្ត្រី លោកស្រី Jacinda Ardern បានណែនាំច្បាប់គ្រប់គ្រងកាំភ្លើងថ្មីភ្លាមៗ និងបានចាប់ផ្តើមចលនាជាសកលមួយ ដើម្បីលុបបំបាត់ភាពស្អប់ខ្ពើមតាមបណ្តាញអ៊ីនធឺណិត ក្នុងការឆ្លើយតប ដែលត្រូវបានសាទរថាជាគំរូមួយសម្រាប់មេដឹកនាំផ្សេងទៀត។

ការធ្លាក់ព្រិល និងអាកាសធាតុត្រជាក់ខ្លាំងធ្វើឱ្យមនុស្ស ៦០ នាក់ស្លាប់នៅអាហ្វហ្គានីស្ថាន

អ្នកនាំពាក្យអាជ្ញាធរគ្រោះមហន្តរាយជាតិ លោក ម៉ូឡាស ចាណាន សាអេក (Mullah Janan Saeq) បាននិយាយថា មនុស្ស ៦០ នាក់បានស្លាប់ និង ២៣ នាក់ផ្សេងទៀតបានរងរបួស ដោយសារការធ្លាក់ព្រិលខ្លាំង ភ្លៀង និងអាកាសធាតុត្រជាក់ខ្លាំងនៅទូទាំងប្រទេសអាហ្វហ្គានីស្ថាន ក្នុងរយៈពេលបីសប្តាហ៍កន្លងមកនេះ។លោក សាអេក បាននិយាយកាលពីថ្ងៃពុធនៅក្នុងខ្សែវីដេអូដែលបានចេញផ្សាយនៅលើប្រព័ន្ធផ្សព្វផ្សាយសង្គម X ថា «លំនៅឋានជាង ១.៦០០ ខ្នងត្រូវបានបំផ្លាញដោយផ្នែក ឬទាំងស្រុង ហើយសត្វគោជាង ១៧៧.០០០ ក្បាលបានងាប់ដោយសារតែអាកាសធាតុត្រជាក់ពេកក្នុងរដូវនេះ»។អ្នកនាំពាក្យរូបនេះ បានបញ្ជាក់ថា អាជ្ញាធរគ្រោះមហន្តរាយជាតិ ដោយមានកិច្ចសហការពីអង្គការជាតិ និងអន្តរជាតិ បានផ្តល់គ្រឿងឧបភោគបរិភោគ អាហារក្រៀម និងសាច់ប្រាក់ ដល់គ្រួសារដែលរងផលប៉ះពាល់ជាង ២២,៤០០គ្រួសារ នៅតាមតំបន់ផ្សេងៗគ្នានៃប្រទេស។អាកាសធាតុត្រជាក់ខ្លាំង និងព្រិលធ្លាក់ បានបោកបក់ពាសពេញតំបន់មួយចំនួននៃប្រទេសអាហ្វហ្គានីស្ថាននាពេលថ្មីៗនេះ ដែលសីតុណ្ហភាពបានធ្លាក់ចុះដល់ដក ៣០ អង្សាសេនៅក្នុងតំបន់មួយចំនួននៃប្រទេស៕

អូស្ត្រាលី នឹងបន្តផ្តល់មូលនិធិដល់ទីភ្នាក់ងារសង្គ្រោះសំខាន់របស់ប៉ាឡេស្ទីន UNRWA

រដ្ឋមន្ត្រីការបរទេសអូស្ត្រាលី លោកស្រី ផេននី វ័ង (Penny Wong) បាននិយាយនៅថ្ងៃសុក្រ (១៥ មីនា) នេះថាប្រទេសអូស្ត្រាលី នឹងបន្តផ្តល់មូលនិធិដល់ទីភ្នាក់ងារសង្គ្រោះប៉ាឡេស្ទីនដ៏សំខាន់របស់អង្គការសហប្រជាជាតិ ពោលគឺជិតពីរខែបន្ទាប់ពីខ្លួនបានផ្អាក ជុំវិញការចោទប្រកាន់ថាបុគ្គលិកមួយចំនួនរបស់ទីភ្នាក់ងារនេះបានចូលរួមក្នុងការវាយប្រហាររបស់ពួកហាម៉ាស នៅថ្ងៃទី០៧ ខែតុលា។លោកស្រី វ័ង បាននិយាយថា អូស្ត្រាលីបានពិគ្រោះយោបល់ជាមួយទីភ្នាក់ងារជំនួយ និងការងារសម្រាប់ប៉ាឡេស្ទីន UNRWA និងប្រទេសម្ចាស់ជំនួយផ្សេងទៀត ហើយពួកគេពេញចិត្តនឹងបន្តនេះ ហើយទឹកប្រាក់ចំនួន ៦ លានដុល្លារអូស្ត្រាលី (៣,៩ លានដុល្លារ) នៅក្នុងការផ្អាកមូលនិធិនឹងត្រូវបញ្ចេញភ្លាមៗ។រដ្ឋាភិបាលអូស្រ្តាលី នឹងផ្តល់មូលនិធិបន្ថែមចំនួន ៤ លានដុល្លារដល់អង្គការយូនីសេហ្វ និង ២ លានដុល្លារដល់យន្តការថ្មីរបស់អង្គការសហប្រជាជាតិ ដើម្បីផ្តល់ជំនួយទៅកាន់តំបន់ហ្កាហ្សា ដែលនាំមកនូវជំនួយមនុស្សធម៌សរុបរបស់ប្រទេសអូស្ត្រាលី ចាប់តាំងពីវិបត្តិបានចាប់ផ្តើម មានរហូតដល់ទៅ ៥២,៥ លានដុល្លារ។អូស្ត្រាលី រួមជាមួយនឹងប្រទេសជាច្រើនទៀត បានផ្អាកការផ្តល់មូលនិធិដល់ទីភ្នាក់ងារជំនួយ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីននៅតំបន់ជិតបូព៌ា (UNRWA) ក្នុងខែមករា បន្ទាប់ពីអ៊ីស្រាអែលបានចោទប្រកាន់បុគ្គលិក ១២ ក្នុងចំណោមបុគ្គលិក ១៣.០០០ នៅហ្កាហ្សា ថាបានចូលរួមក្នុងការសម្លាប់ដ៏បង្ហូរឈាមនៃការវាយប្រហាររបស់ក្រុមហាម៉ាស កាលពីថ្ងៃទី០៧ តុលា៕

អ៊ុយក្រែន ចាប់ផ្តើមប្តូរវេនកងទ័ពនៅសមរភូមិមុខ

លោក អូឡេកសានឌ័រ ស៊ីស្គី(Oleksandr Syrsky) មេបញ្ជាការកងកម្លាំងប្រដាប់អាវុធអ៊ុយក្រែន បាននិយាយកាលពីថ្ងៃព្រហស្បតិ៍ថា អ៊ុយក្រែនបានចាប់ផ្តើមប្តូរវេនកងទ័ពនៅសមរភូមិមុខ ក្នុងជម្លោះជាមួយរុស្ស៊ី។លោក Syrsky បានសរសេរនៅលើបណ្តាញសង្គម Facebook ថា ទោះបីជាមានស្ថានភាពលំបាកខ្លាំងនៅសមរភូមិមុខក៏ដោយ ពួកយើង រៀបចំចាប់ផ្តើមដំណើរការប្តូរវេន និងការជំនួសអង្គភាព និងកងពលនានា ដែលបានបំពេញភារកិច្ចប្រយុទ្ធនៅសមរភូមិមុខ អស់រយៈពេលជាយូរមកហើយ។លោក Syrsky បាននិយាយថា ការប្តូរវេននេះ នឹងជួយធ្វើឱ្យស្ថានភាពនៅសមរភូមិមានស្ថេរភាព ហើយនឹងមានឥទ្ធិពលវិជ្ជមានទៅលើស្ថានភាពអារម្មណ៍ និងផ្លូវចិត្តរបស់ទាហានអ៊ុយក្រែន។នៅចុងខែនេះ សភាប្រទេសអ៊ុយក្រែន ត្រូវបានគេរំពឹងថានឹងបោះឆ្នោតលើសេចក្តីស្នើច្បាប់រឹតត្បិតច្បាប់កែណ្ឌកងទ័ពនៅក្នុងប្រទេស ហើយកាលពីពេលមុន អាជ្ញាធរអ៊ុយក្រែន បានបញ្ចេញផែនការកែណ្ឌកងទ័ពចន្លោះពី ៤៥ ម៉ឺន ទៅ ៥០ ម៉ឺននាក់។ទន្ទឹមនឹងនេះ អគ្គលេខាធិការសម្ព័ន្ធយោធាណាតូ លោក Jens Stoltenberg បាននិយាយកាលពីថ្ងៃព្រហស្បតិ៍ ថា អ៊ុយក្រែនកំពុងអស់គ្រាប់រំសេវ នៅក្នុងសង្គ្រាមរបស់ខ្លួនប្រឆាំងការឈ្លានពានរបស់រុស្ស៊ី ហើយសមាជិកសម្ព័ន្ធយោធាណាតូ ពុំទាន់បានធ្វើអ្វីគ្រប់គ្រាន់ដើម្បីជួយទីក្រុងគីវ នៅឡើយ ។នៅក្នុងការអត្ថាធិប្បាយចំៗខុសធម្មតាអំពីស្ថានភាពសង្រ្គាម លោក Stoltenberg បាននិយាយថា សម្ព័ន្ធយោធាណាតូ មានសមត្ថភាពផ្តល់ជំនួយបន្ថែមទៀតដល់អ៊ុយក្រែន ប៉ុន្តែចាំបាច់ត្រូវបង្ហាញពីឆន្ទៈនយោបាយដើម្បីធ្វើបែបនេះ។

ការវាយប្រហាររបស់អ៊ីស្រាអែលនៅហ្កាហ្សា សម្លាប់ជនស៊ីវិលរង់ចាំជំនួយ យ៉ាងហោចណាស់២៩នាក់

ក្រសួងសុខាភិបាលតំបន់ហ្កាហ្សា បាននិយាយថា ពលរដ្ឋប៉ាឡេស្ទីនយ៉ាងហោចណាស់២៩នាក់បានស្លាប់ ខណៈកំពុងរង់ចាំជំនួយ ក្នុងការវាយប្រហាររបស់អ៊ីស្រាអែល២លើកដាច់ដោយឡែកពីគ្នា នៅក្នុងតំបន់ហ្កាហ្សា កាលពីថ្ងៃព្រហស្បតិ៍។ នៅក្នុងឧបទ្ទវហេតុដំបូង មន្ត្រីសុខាភិបាលប៉ាឡេស្ទីន នៅក្នុងតំបន់ហ្កាហ្សា គ្រប់គ្រងដោយក្រុមហាម៉ាស បាននិយាយថា មនុស្ស៨នាក់បានស្លាប់ ក្នុងការវាយប្រហារតាមអាកាស ទៅលើមជ្ឈមណ្ឌលចែកចាយជំនួយ ក្នុងជំរំអាល់នូសេរ៉ាត(Al-Nuseirat) នៅតំបន់ហ្កាហ្សាភាគកណ្តាល។ បន្ទាប់មកទៀត មនុស្សយ៉ាងហោចណាស់ ២១ នាក់ បានស្លាប់ និងជាង១៥០នាក់ បានរងរបួស ដោយការបាញ់រះរបស់អ៊ីស្រាអែល លើហ្វូងមនុស្ស ដែលកំពុងរង់ចាំរថយន្តដឹកជំនួយ នៅរង្វង់មូលតំបន់ហ្កាហ្សាភាគខាងជើង។ ការកើនឡើងចំនួនជនស៊ីវិលដែលកំពុងរង់ចាំជំនួយនៅតំបន់ហ្កាហ្សាស្ទ្រីប កំពុងក្លាយជាជនរងគ្រោះចំពោះប្រតិបត្តិការយោធារបស់អ៊ីស្រាអែល។ អាជ្ញាធរសុខាភិបាលតំបន់ហ្កាហ្សា បាននិយាយថា កុមារចំនួន ២៧នាក់ បានស្លាប់ដោយសារកង្វះអាហារូបត្ថម្ភ នៅភាគខាងជើងតំបន់ហ្កាហ្សា។ មានការអំពាវនាវកាន់តែខ្លាំងឡើងពីសហគមន៍អន្តរជាតិ ដើម្បីធ្វើឲ្យប្រសើរស្ថានភាពមនុស្សធម៌នៅក្នុងតំបន់ហ៊ុមព័ទ្ធមួយនេះ ខណៈមានកង្វះអាហារកាន់តែធ្ងន់ធ្ងរ។ រដ្ឋមន្ត្រីការបរទេសអេហ្ស៊ីប លោក សាម៉េ ស៊ូគ្រី (Sameh Shoukry) បាននិយាយនៅក្នុងសន្និសីទសារព័ត៌មាន កាលពីថ្ងៃព្រហស្បតិ៍ថា ត្រូវការបទឈប់បាញ់ឱ្យបានឆាប់តាមដែលអាចធ្វើទៅបាន ហើយការដឹកជញ្ជូនជំនួយទៅកាន់តំបន់ហ្កាហ្សាត្រូវតែបង្កើន ប៉ុន្តែអ៊ីស្រាអែល កំពុងធ្វើឲ្យបញ្ហានេះស្មុគស្មាញ។ សភាអឺរ៉ុប បានអនុម័តសេចក្តីសម្រេចមួយដោយជំរុញឱ្យប្រទេសអ៊ីស្រាអែល បើកច្រកឆ្លងកាត់ទាំងអស់ទៅកាន់តំបន់ហ្កាហ្សា សម្រាប់ជំនួយមនុស្សធម៌។ អ្នកនាំពាក្យក្រសួងការបរទេសសហរដ្ឋអាមេរិក លោក Matthew Miller បាននិយាយនៅក្នុងសន្និសីទសារព័ត៌មានថា សហរដ្ឋអាមេរិក ចង់ឃើញអ៊ីស្រាអែលមានចំណាត់ការដើម្បីកាត់បន្ថយចំនួនជនស៊ីវិលស្លាប់។ លោក ក៏បានជំរុញឱ្យអ៊ីស្រាអែល មានចំណាត់ការដើម្បីធានាបានថា ជំនួយត្រូវបានចែកចាយដោយប្រសិទ្ធភាព ដល់ជនស៊ីវិលប៉ាឡេស្ទីន។

ប្រជាជនអ៊ីស្រាអែលរាប់ពាន់នាក់ តវ៉ាទាមទារឱ្យដោះលែងចំណាប់ថ្នូរដែលត្រូវបានឃុំខ្លួន នៅហ្កាហ្សា

ប្រជាជនអ៊ីស្រាអែល រាប់ពាន់នាក់បានចេញធ្វើបាតុកម្មកាលពិថ្ងៃព្រហស្បតិ៍ ដោយទាមទារឱ្យមានការដោះលែងចំណាប់ថ្នូរជាបន្ទាន់ពីតំបន់ហ្កាហ្សា។ក្រុមអ្នកតវ៉ា ដែលកំពុងទាមទារឱ្យដោះលែងចំណាប់ថ្នូរ បានធ្វើបាតុកម្មពីទីលាន ទីក្រុង Tel Aviv មានកាន់រូបភាពធំៗរបស់ស្ត្រីជាច្រើននាក់ ដែលត្រូវបានក្រុមហាម៉ាសចាប់ជាចំណាប់ថ្នូរកាលពីថ្ងៃទី ៧ ខែតុលា ដោយបានបិទផ្លូវរយៈពេលខ្លីផងដែរ។អ៊ីស្រាអែល ជឿថា ចំណាប់ថ្នូរចំនួន១៣៤នាក់ នៅតែស្ថិតក្នុងតំបន់ហ្កាហ្សា បន្ទាប់ពីការវាយប្រហារដឹកនាំដោយក្រុមហាម៉ាសទៅលើសហគមន៍ភាគខាងត្បូងរបស់ប្រទេសអ៊ីស្រាអែល កាលពីថ្ងៃទី ៧ ខែតុលា បណ្តាលឲ្យមនុស្ស ១.២០០នាក់បានស្លាប់ និង ២៥៣នាក់ ត្រូវបានចាប់ខ្លួន។នៅក្នុងការតវ៉ាមួយផ្សេងទៀតកាលពីថ្ងៃព្រហស្បតិ៍ ពលរដ្ឋអ៊ីស្រាអែល បានតវ៉ាប្រឆាំងរដ្ឋាភិបាលចម្រុះរបស់លោក Netanyahu ដោយទាមទារឱ្យបញ្ចប់ការលើកលែងបុរសជនជាតិជ្វីហ្វសាសនាអូថូដុក ជ្រុលនិយម ពីការបំពេញកាតព្វកិច្ចយោធា។នៅក្នុងសេចក្តីថ្លែងការណ៍ ដែលចេញផ្សាយបន្ទាប់ពីកិច្ចប្រជុំជាមួយតំណាងគ្រួសាររបស់ចំណាប់ថ្នូរកាលពីថ្ងៃព្រហស្បតិ៍ នាយករដ្ឋមន្ត្រី លោក Benjamin Netanyahu បាននិយាយថា រដ្ឋាភិបាលរបស់លោក បានប្តេជ្ញាចិត្តក្នុងការនាំមនុស្សគ្រប់គ្នាដែលត្រូវបានចាប់ខ្លួនត្រឡប់មកវិញ ប៉ុន្តែក្រុមហាម៉ាសនៅតែប្រកាន់ខ្ជាប់នូវការទាមទារដែលមិនអាចទទួលយកបាននៅក្នុងការចរចា។ក្រុមហាម៉ាស បានស្តីបន្ទោសអ៊ីស្រាអែលចំពោះការរារាំងវឌ្ឍនភាពនៅក្នុងកិច្ចចរចាបទឈប់បាញ់។

ក្រុមហ៊ួទីនៅយេម៉ែនអះអាងថា ខ្លួនមានមីស៊ីលលឿនជាងសំឡេងដែលអាចបង្កើនហានិភ័យ នៅសមុទ្រក្រហម

ប្រព័ន្ធផ្សព្វផ្សាយរដ្ឋរបស់រុស្ស៊ី បានរាយការណ៍កាលពីថ្ងៃព្រហស្បតិ៍ថា ក្រុមឧទ្ទាមហ៊ួទីនៅប្រទេសយេម៉ែន បានអះអាងថា មានមីស៊ីលលឿនជាងសំឡេងថ្មីនៅក្នុងឃ្លាំងអាវុធរបស់ពួកគេ ដោយបានបង្កើនហានិភ័យ ក្នុងការវាយប្រហាររបស់ពួកគេលើការដឹកជញ្ជូន នៅសមុទ្រក្រហម និងជុំវិញផ្លូវទឹកប្រឆាំងនឹងស្ថានភាពនៃសង្គ្រាមរបស់អ៊ីស្រាអែលជាមួយក្រុមហាម៉ាស នៅតំបន់ហ្កាហ្សាស្ទ្រីប។របាយការណ៍របស់ទីភ្នាក់ងារសារព័ត៌មានរដ្ឋ RIA Novosti បានដកស្រង់សម្តីមន្ត្រីមិនស្គាល់អត្តសញ្ញាណម្នាក់ ប៉ុន្តែមិនបានផ្តល់ភ័ស្តុតាងសម្រាប់ការអះអាងនោះទេ។ វាកើតឡើងនៅពេលដែលទីក្រុងមូស្គូ រក្សានូវគោលនយោបាយការបរទេសប្រឆាំងលោកខាងលិចយ៉ាងខ្លាំងក្លា ចំពេលមានសង្រ្គាមកាន់តែខ្លាំងឡើង លើអ៊ុយក្រែន។ទោះបីជាយ៉ាងណាក៏ដោយ រយៈពេលជាច្រើនសប្តាហ៍ហើយ ក្រុមហ៊ួទីបានលើកឡើងអំពី«អ្វីដែលគួរឲ្យ ភ្ញាក់ផ្អើល»ដែលពួកគេគ្រោងសម្រាប់ការប្រយុទ្ធគ្នា នៅសមុទ្រ ដើម្បីប្រឆាំងនឹងសហរដ្ឋអាមេរិក និងសម្ព័ន្ធមិត្តរបស់ខ្លួន ដែលរហូតមកដល់ពេលនេះ អាចបាញ់ទម្លាក់យានដ្រូន ឬដ្រូនផ្ទុកគ្រាប់បែកណាមួយ ដែលចូលមកជិតនាវាចម្បាំងរបស់ពួកគេ នៅក្នុងដែនទឹកមជ្ឈិមបូព៌ា។ កាលពីថ្ងៃព្រហស្បតិ៍ លោក អាប់ឌុល ម៉ាលីក អាល់ហ៊ួទី (Abdul Malik al-Houthi) មេដឹកនាំកំពូលមិនសូវមាត់ករបស់ក្រុមហ៊ួទី បាននិយាយថា ក្រុមឧទ្ទាម នឹងចាប់ផ្តើមវាយប្រហារទៅលើនាវានានា ដែលធ្វើដំណើរឆ្ពោះទៅកំពង់ផែ Cape of Good Hope នៅតំបន់ភាគខាងត្បូងនៃទ្វីបអាហ្វ្រិក។ រហូតមកទល់ពេលនេះ ក្រុមឧទ្ទាម បានវាយប្រហារយ៉ាងធំទៅលើនាវាដែលធ្វើដំណើរទៅកាន់សមុទ្រក្រហមឆ្ពោះទៅកាន់ព្រែកស៊ុយអេ (Suez) ហើយការកើនឡើងបែបនេះ នឹងកំណត់គោលដៅដែលវែងជាងនេះ ជាផ្លូវជំនួសប្រើប្រាស់ដោយនាវាមួយចំនួន។ វានៅតែមិនច្បាស់ថាតើពួកគេនឹងធ្វើការវាយប្រហារ ដែលអាចកើតឡើងដោយរបៀបណាទេ។ទន្ទឹមនឹងនេះ តាមសេចក្តីរាយការណ៍ អ៊ីរ៉ង់និងសហរដ្ឋអាមេរិក បានបើកកិច្ចចរចាដោយប្រយោលនៅក្នុងប្រទេសអូម៉ង់ ដែលជាលើកដំបូងក្នុងរយៈពេលជាច្រើនខែ ចំពេលមានភាពតានតឹងដ៏យូរអង្វែងរបស់ពួកគេជុំវិញកម្មវិធីនុយក្លេអ៊ែរដែលរីកចម្រើនយ៉ាងឆាប់រហ័សរបស់ទីក្រុងតេអេរ៉ង់ និងការវាយប្រហារដោយក្រុមតំណាងរបស់ខ្លួន។

នគរបាលនិយាយថា មនុស្សរាប់រយនាក់ត្រូវបានជួយសង្រ្គោះនៅមជ្ឈមណ្ឌលឆបោក ក្នុងប្រទេសហ្វីលីពីន

យោងតាមនគរបាល មនុស្សរាប់រយនាក់ ដែលត្រូវបានបង្ខំឲ្យធ្វើការនៅមជ្ឈមណ្ឌលឆបោកតាម online នៅក្នុងប្រទេសហ្វីលីពីន ត្រូវបានជួយសង្រ្គោះកាលពីថ្ងៃទី១៤មីនា និងជនសង្ស័យ៨នាក់ត្រូវបានចាប់ខ្លួនផងដែរ។ ដោយធ្វើសកម្មភាពតាមព័ត៌មានពីបុរសជនជាតិវៀតណាមម្នាក់ដែលត្រូវបានចោទប្រកាន់ថាបានរត់គេចពីបរិវេណដ៏ធំនៅភាគខាងជើងនៃរដ្ឋធានីម៉ានីល(Manila)បាននិយាយថា ពួកគេបានបិទបាំងប្រតិបត្តិការមួយជាទីដែលមានការសង្ស័យថាមានការជួញដូរមនុស្សលើជនរងគ្រោះជាច្រើន ត្រូវបានបង្ខំឱ្យធ្វើការឆបោកតាមអ៊ីនធឺណិត។ លោក ជីប៊ើតូ គ្រូស (Gilberto Cruz) នាយកប្រតិបត្តិកងកម្លាំងពិសេសបង្ក្រាបឧក្រិដ្ឋកម្ម ដែលដឹកនាំការវាយឆ្មក់មុនព្រឹកព្រលឹមបាននិយាយថា កម្មករដែលត្រូវបានជួយសង្គ្រោះបានប្រាប់យើងថា ក្រុមហ៊ុននេះ ពាក់ព័ន្ធក្នុងការឆរបោកមនោសញ្ចេតស្នេហា ការបោកប្រាស់រូបិយប័ណ្ណឌីជីថល និងសកម្មភាពបោកប្រាស់ផ្សេងជាច្រើនទៀត។ជនរងគ្រោះត្រូវបានគ្រប់គ្រងដោយការរឹបអូសលិខិតឆ្លងដែន ដូច្នេះពួកគេមិនអាចចាកចេញបានទេ។នគរបាលបានរកឃើញជនជាតិចិនចំនួន ៤៣២ នាក់ ហ្វីលីពីន ៣៧១ នាក់ វៀតណាម ៥៧ នាក់ ម៉ាឡេស៊ី ៨ នាក់ តៃវ៉ាន់ ៣ នាក់ ឥណ្ឌូនេស៊ី ២ នាក់ និងរ្វ៉ាន់ដា ២ នាក់។ យោងតាមសេចក្តីថ្លែងការណ៍របស់នគបាល បរិវេណទំហំ១០ហិកតានៅទីក្រុងបាំបាន(Bamban)កំពុងក្លាយជាក្រុមហ៊ុនហ្គេមតាមអ៊ីនធឺណិត។នៅទូទាំងអាស៊ីអាគ្នេយ៍ មជ្ឈមណ្ឌលបោកប្រាស់ឬឆបោកបានរីកដុះដាល ដោយមានក្រុមឧក្រិដ្ឋជនអូសទាញចាប់ជំរិតឬការបង្ខិតបង្ខំកម្មករឱ្យចូលទៅក្នុងសកម្មភាពតាមអនឡាញ។ យោងតាមការិយាល័យរបស់អង្គការសហប្រជាជាតិទទួលបន្ទុកបញ្ហាគ្រឿងញៀន និងឧក្រិដ្ឋកម្ម ចំណូលបានពីឧស្សាហកម្មឆបោកកំពុងកើនឡើងខ្លាំងមិនធ្លាប់មាន ដែលស្មើនឹងរាប់ពាន់លានដុល្លារ៕

អគ្គិភ័យ ឆាបឆេះនៅពន្ធនាគារ រដ្ឋធានីប្រទេសហៃទី ខណៈប្រទេសនេះរកមធ្យោបាយដោះស្រាយវិបត្តិនយោបាយ

យោងតាមសេចក្តីរាយការណ៍ពីប្រព័ន្ធផ្សព្វផ្សាយក្នុងស្រុកបានឱ្យដឹងថា អគ្គិភ័យ បានឆាបឆេះនៅពន្ធនាគារធំ ក្នុងរដ្ឋធានីប្រទេសហៃទី កាលពីថ្ងៃព្រហស្បតិ៍។វីដេអូ បានបង្ហាញពីផ្សែងខ្មៅហុយចេញពីអគារពន្ធនាគារ ជាកន្លែងដែលកាលពីដើមខែនេះ ក្រុមប្រដាប់អាវុធបានរំដោះអ្នកទោស។ វាពុំអាចដឹងភ្លាមៗនៅឡើយទេ ថាតើមានមនុស្សប៉ុន្មាននាក់នៅក្នុងពន្ធនាគារ និងមូលហេតុអ្វីដែលបានបង្កឱ្យមានអគ្គិភ័យឆាបឆេះ។ប្រទេសនៅតំបន់សមុទ្រការ៉ាអ៊ីបមួយនេះ កំពុងព្យាយាមរិះរកមធ្យោបាយដោះស្រាយវិបត្តិនយោបាយ និងសង្គម ដែលបានកើតឡើងជាយូរមកហើយ បណ្តាលឲ្យមនុស្សរាប់ពាន់នាក់ភៀសខ្លួនចេញ ដោយសារតែក្រុមជនអន្ធពាលប្រដាប់អាវុធ បង្កើនសកម្មភាពគ្រប់គ្រងរបស់ពួកគេនៅក្នុងរដ្ឋធានី។សហគមន៍តំបន់សមុទ្រការ៉ាអ៊ីប ជាប្លុកប្រចាំតំបន់ បានពិភាក្សាលម្អិតអំពីគណបក្សនយោបាយ និងវិស័យសង្គមនានា ដើម្បីកំណត់ពេលបង្កើតក្រុមប្រឹក្សាអន្តរកាលមួយ មានសមាជិក៩រូប ដែលនឹងចូលកាន់តំណែងពីនាយករដ្ឋមន្ត្រីដែលមិនបានជាប់ឆ្នោត លោក អារីយ៉ែល ហេនរី (Ariel Henry) ដែលលោកបាននិយាយកាលពីថ្ងៃចន្ទ ទី១០ ខែមីនា ថា លោកនឹងលាលែងពីតំណែង។ការចរចា ជុំវិញក្រុមប្រឹក្សានេះ ត្រូវបានសម្របសម្រួលដោយមេដឹកនាំតំបន់សមុទ្រការ៉ាអ៊ីប និងរដ្ឋមន្ត្រីការបរទេសសហរដ្ឋអាមេរិក លោក Antony Blinken ប៉ុន្តែការតែងតាំងជាផ្លូវការ នៅមិនទាន់ត្រូវបានធ្វើឡើងនៅឡើយ។

ជនអន្តោប្រវេសន៍៦០នាក់ស្លាប់ ក្នុងពេលម៉ាស៊ីនទូកកៅស៊ូរបស់ពួកគេខូច នៅកណ្ដាលសមុទ្រមេឌីទែរ៉ាណេ

យោងតាមក្រុមអ្នកនៅរស់រានមានជីវិត ជនអន្តោប្រវេសន៍យ៉ាងហោចណាស់៦០នាក់ បានស្លាប់ បន្ទាប់ពីទូកកៅស៊ូមួយគ្រឿងរបស់ពួកគេមានបញ្ហានៅក្នុងសមុទ្រមេឌីទែរ៉ាណេ ។ អ្នកនៅរស់រានមានជីវិត២៥នាក់ ត្រូវបានជួយសង្រ្គោះដោយនាវា អូហ្សិន វីឃីង (Ocean Viking) ជានាវាមួយគ្រឿងដែលបានធ្វើប្រតិបត្តិការដោយក្រុមជំនួយមនុស្សធម៌ប្រចាំសមុទ្រមេឌីទែរ៉ាណេ SOS។ ពួកគេបានប្រាប់ក្រុមអ្នកជួយសង្រ្គោះពួកគេថា ខ្លួនបានចាកចេញពីតំបន់ Zawiya នៅតាមតំបន់ឆ្នេរមួយចំនួនរបស់ប្រទេសលីប៊ី ប៉ុន្មានថ្ងៃ មុនត្រូវបានជួយសង្រ្គោះ។ម៉ាស៊ីនទូកបានខូច រយៈពេល៣ថ្ងៃក្រោយការចាកចេញតាមទូកដោយគ្មានអាហារ និងទឹក។ ក្រុមអ្នកនៅមានជីវិតបាននិយាយថា ជនរងគ្រោះរួមទាំងស្ត្រី និងកុមារម្នាក់។គេជឿថាពួកគេបានស្លាប់ដោយសារខ្វះជាតិទឹក និងឃ្លាន មិនមែនដោយសារលង់ទឹកទេ។ ក្រុមផ្ដល់ជំនួយមនុស្សធម៌ប្រចាំសមុទ្រមេឌីទែរ៉ាណ ខាងលើបាននិយាយថា ក្រុមសង្រ្គោះ Ocean Viking បានមើលឃើញទូកកៅស៊ូ ដែលបានចាកចេញកាលពីថ្ងៃសុក្រសប្ដាហ៍មុនតាមកែវយឹតកាលពីថ្ងៃពុធសប្ដាហ៍នេះនិងបានដឹកជញ្ជូនជនអន្តោប្រវេសន៍ទាំងនោះទៅកាន់មជ្ឈមណ្ឌលជម្លៀសវេជ្ជសាស្ត្រ ដោយមានការកិច្ចសហប្រតិបត្តិការជាមួយអង្គភាពឆ្មាំល្បាតឆ្នេរអ៊ីតាលី។ ក្រុមនេះនិយាយថា អ្នកនៅមានជីវិតទាំងនោះ មានសុខភាពខ្សោយខ្លាំងណាស់ និងកំពុងទទួលការព្យាបាល៕

បណ្ដាញសង្គម

ព័ត៌មានថ្មីៗ

អ៊ីស្រាអែលនិយាយថា អ៊ីរ៉ង់បាញ់មីស៊ីលរយៈចម្ងាយ ៤ពាន់គ.ម ជាលើកដំបូងក្នុងសង្រ្គាម

នគរបាលបង្ក្រាបមុខសញ្ញាក្រុមវាយប្លន់ម៉ូតូ០៤នាក់ ដកហូតគ្រឿងញៀន និងដាវជាច្រើន នៅខណ្ឌពោធិ៍សែនជ័យ

លោក Netanyahu ធ្វើបច្ចុប្បន្នភាពការវាយប្រហាររបស់អ៊ីរ៉ង់លើតំបន់ភាគខាងត្បូងអ៊ីស្រាអែល

មេដឹកនាំអាមេរិកឡាទីន ទាមទារឲ្យមានបទឈប់បាញ់សកលអំឡុងការជជែកគ្នានៅកិច្ចប្រជុំកំពូល CELAC

ស្នងការដ្ឋាននគរបាលរាជធានីភ្នំពេញ បន្តផ្តល់ស្បៀងអាហារ និងសម្ភារ ទៅកាន់ជនភៀសសឹក ក្នុងភូមិសាស្ត្រខេត្តសៀមរាប

អ្នកនាំពាក្យ៖ រាជរដ្ឋាភិបាល បន្តតាមដានដោយយកចិត្តទុកដាក់ខ្ពស់បំផុតចំពោះសកម្មភាពកងកម្លាំងថៃ ឈ្លានពានដែនអធិបតេយ្យភាពកម្ពុជា

សមរាត្រីអង្គរ! ទេសចរជិត៤ម៉ឺននាក់ មកផ្ដិតយកទិដ្ឋភាពថ្ងៃរះចំកំពូលប្រាសាទ

សម្ដេចតេជោ ហ៊ុន សែន ឆ្លៀតពេលសួរសុខទុក្ខ អតីតតារាកំប្លែងល្បី នាយក្រិន កំពុងសម្រាកព្យាបាលជំងឺ នៅមន្ទីរពេទ្យកាល់ម៉ែត

ក្រុមមន្រ្តី៖ ទាហានអាមេរិករាប់ពាន់នាក់បន្ថែមទៀត នឹងដាក់ពង្រាយទៅកាន់តំបន់មជ្ឈិមបូព៌ា

អ្នកនាំពាក្យយោធាអ៊ីរ៉ង់ព្រមានថា មន្រ្តីកងទ័ពអ៊ីស្រាអែល-អាមេរិក នឹងក្លាយជាគោលដៅវាយប្រហារជុំវិញពិភពលោក

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877