BTV NEWS

លិចទូកស្មាច់នៅកណ្តាលទន្លេ ក្នុងខណ្ឌជ្រោយចង្វា រកឃើញសពមនុស្ស៣នាក់ ខណៈ៥នាក់ទៀតកំពុងបាត់ខ្លួនក្នុងទឹក

កម្លាំងសមត្ថកិច្ចបើកប្រតិបត្តិការបង្ក្រាបសំបុក Online Scams នៅសង្កាត់អូរបែកក្អមឃាត់ខ្លួនមនុស្ស ៤៩នាក់

មនុស្សប្រុសស្រីពាក់ព័ន្ធករណីបង្កគ្រោះថ្នាក់ចរាចរណ៍នៅខណ្ឌឫស្សីកែវ បណ្តាលឲ្យក្មេងម្នាក់រងរបួសធ្ងន់នឹងត្រូវបញ្ចូនទៅតុលាការទាំង ២នាក់

ជនបរទេស ១,៥៥៦នាក់ ត្រូវបានបណ្ដេញចេញពីកម្ពុជាពាក់ព័ន្ធករណី Online Scams និងធ្វើការងារស្នាក់នៅខុសច្បាប់

សន្តិសុខ និង សង្គម

នាវាមួយគ្រឿង បើកការបាញ់ប្រហារនៅជិតជំរំទីក្រុង Rafah នៅតំបន់ហ្កាហ្សា

នាវាមួយគ្រឿង បានបើកការបាញ់រះ នៅឆ្នេរសមុទ្រក្បែរជំរំសម្រាប់ជនភៀសខ្លួននៅទីក្រុង Rafah តំបន់ហ្កា កាលពីថ្ងៃព្រហស្បតិ៍ ដោយបានបាញ់ជាច្រើនគ្រាប់ក្នុងទិសដៅទៅលើអ្វីដែលមើលទៅដូចជាទូកតូចមួយគ្រឿង។វីដេអូ បង្ហាញពីទូកតូចមួយគ្រឿង កំពុងខិតទៅជិតឆ្នេរសមុទ្រ ហើយនាវាដែលបានបាញ់រះនោះ បានបើកចេញ បន្ទាប់ពីការបាញ់ប្រហាររបស់ខ្លួន។អ៊ីស្រាអែល បានគំរាមបើកការវាយប្រហារពេញលេញលើក្រុង Rafah ជាទីក្រុងចុងក្រោយនៅជាយភាគខាងត្បូងតំបន់ហ្កាហ្សា ទោះបីជាមានការស្នើសុំពីអន្តរជាតិ រួមទាំងពីសម្ព័ន្ធមិត្តសំខាន់របស់ខ្លួននៅក្នុងក្រុងវ៉ាស៊ីនតោនក៏ដោយ។ពលរដ្ឋដែលបានភៀសខ្លួនទៅទីក្រុង Rafah ពីកន្លែងផ្សេងៗនិយាយថា គ្មានកន្លែងណាដែលត្រូវទៅនោះទេ។ ទន្ទឹមនឹងនោះ លំហូរជំនួយតិចតួច ស្ទើរតែអស់ទាំងស្រុង។ប្រទេសអ៊ីស្រាអែល បានចាប់ផ្តើមយុទ្ធនាការរបស់ខ្លួននៅតំបន់ហ្កាហ្សា បន្ទាប់ពីក្រុមសកម្មប្រយុទ្ធហាម៉ាស ដែលគ្រប់គ្រងតំបន់ហ្កាហ្សា បានសម្រុកចូលក្រុងចាច្រើនរបស់អ៊ីស្រាអែលកាលពីថ្ងៃទី ៧ ខែតុលា ដោយបានសម្លាប់មនុស្ស ១.២០០នាក់ និងចាប់ចំណាប់ថ្នូរ ២៥៣នាក់។ ចាប់តាំងពីពេលនោះមក មនុស្សជិត ៣០.០០០នាក់ត្រូវបានបញ្ជាក់ថាបានស្លាប់នៅក្នុងតំបន់ហ្កាហ្សា ដោយមនុស្សរាប់ពាន់នាក់ទៀត គេបរាម្ភថាបានស្លាប់ រកមិនទាន់ឃើញនៅក្រោមគំនរបាក់បែក។

ទីភ្នាក់ងារអឺរ៉ុបសម្រាប់កិច្ចសហប្រតិបត្តិការអនុវត្តច្បាប់ បំផ្លាញបណ្តាញរត់ពន្ធជនអន្តោប្រវេសន៍នៅអឺរ៉ុប

នគរបាលប្រទេសបារាំង និងបែលហ្សិក បាននិយាយថា ទីភ្នាក់ងារសហភាពអឺរ៉ុបសម្រាប់កិច្ចសហប្រតិបត្តិការអនុវត្តច្បាប់ (Europol) បាននិយាយកាលពីថ្ងៃព្រហស្បតិ៍ថា បណ្តាញរត់ពន្ធជនអន្តោប្រវេសន៍ធំបំផុតមួយឆ្លងកាត់ព្រែកជីកអង់គ្លេស ត្រូវបានបំផ្លាញនឹងបានចាប់ខ្លួនមនុស្ស ១៩នាក់នៅក្នុងប្រទេសអាល្លឺម៉ង់ រួមទាំងអ្នកដឹកនាំ និងអ្នករៀបចំ ចំនួន ៤ នាក់ ។ ជនសង្ស័យក្នុងការស៊ើបអង្កេត ដែលបានចាប់ផ្តើមនៅចុងឆ្នាំ ២០២២ បានរៀបចំការទិញ ស្តុកទុក និងដឹកជញ្ជូនទូកកៅស៊ូ ដែលភាគច្រើនមានប្រភពមកពីប្រទេសចិន ដែលពួកគេធ្លាប់រត់ពន្ធជនអន្តោប្រវេសន៍ ពីឆ្នេរសមុទ្រ នៅក្បែរទីក្រុង Calais របស់ប្រទេសបារាំង ឆ្ពោះទៅកាន់ចក្រភពអង់គ្លេស។ទីភ្នាក់ងារសហភាពអឺរ៉ុបសម្រាប់កិច្ចសហប្រតិបត្តិការអនុវត្តច្បាប់ (Europol) បាននិយាយថា ជាមធ្យម ក្រុមជនអន្ធពាល ដាក់ជនអន្តោប្រវេសន៍ចំនួន៥០ នាក់ នៅក្នុងទូកដែលអាចផ្ទុកអ្នកដំណើរអតិបរមា ត្រឹមតែ ១០ នាក់ ដោយទារប្រាក់ចន្លោះពី ១.០០០ទៅ៣.០០០ អឺរ៉ូ ឬ ១.០៨១ ទៅ ៣.២៤២ ដុល្លារ សម្រាប់ជនអន្តោប្រវេសន៍ម្នាក់។ការិយាល័យរដ្ឋអាជ្ញាសហព័ន្ធប្រទេសបែលហ្ស៊ិក បាននិយាយនៅក្នុងសេចក្តីថ្លែងការណ៍ដាច់ដោយឡែកមួយថា មន្ត្រីនគរបាលអាល្លឺម៉ង់ប្រហែល ៩០០នាក់ បានចូលរួមក្នុងប្រតិបត្តិការនេះ។កាលពីដើមខែនេះ ទីភ្នាក់ងារព្រំដែន Frontex របស់សហភាពអឺរ៉ុប បាននិយាយថា ការធ្វើអន្តោប្រវេសន៍មិនទៀងទាត់ ទៅកាន់ប្លុកនេះមកពីអាហ្វ្រិកខាងលិច បានកើនឡើងច្រើនជាង ១០ ដង កាលពីឆ្នាំមុន នៅក្នុងខែមករា។

អង្គការសុខភាពពិភពលោក មានផែនការជម្លៀសអ្នកជំងឺបន្ថែមទៀត ពីមន្ទីរពេទ្យតំបន់ហ្កាហ្សា

យោងតាមមន្ត្រីអង្គការសុខភាពពិភពលោក បាននិយាយកាលពីថ្ងៃព្រហស្បតិ៍ថា ទីភ្នាក់ងារផ្តល់ជំនួយ សង្ឃឹមថានឹងជម្លៀសអ្នកជំងឺប្រមាណ១៤០នាក់ ដែលជាប់គាំងនៅក្នុងមន្ទីរពេទ្យ Nasser តំបន់ហ្កាហ្សា ខណៈអាជ្ញាធរប៉ាឡេស្ទីន បានរាយការណ៍ថាទាហានអ៊ីស្រាអែល បានដកថយ ប៉ុន្តែនៅតែហ៊ុមព័ទ្ធបរិវេណនោះ។ ក្រសួងសុខាភិបាលតំបន់ហ្កាហ្សា បាននិយាយថា ក្រុមគ្រូពេទ្យបានបញ្ចុះសាកសពអ្នកជំងឺ ១៣ នាក់នៅបរិវេណមន្ទីរពេទ្យ ដែលបានស្លាប់ដោយសារអគារនោះគ្មានថាមពល ឬអុកហ្សីសែន។ អង្គារសុខភាពពិភពលោក និយាយថា មន្ទីរពេទ្យនៅទីក្រុង Khan Younis ជាមន្ទីរពេទ្យធំទីពីរនៅតំបន់ហ្កាហ្សា និងមានសារៈសំខាន់ចំពោះសេវាសុខភាពដែលមិនដំណើរការនៅដែនដីនោះចាប់តាំងពីសប្តាហ៍មុន បន្ទាប់ពីការហ៊ុមព័ទ្ធរបស់អ៊ីស្រាអែល ក្រោយពីមានការវាយឆ្មក់។ មន្ត្រីទីភ្នាក់ងារអង្គការសហប្រជាជាតិ បាននិយាយនៅក្នុងសន្និសីទសារព័ត៌មានថា អង្គការសុខភាពពិភពលោក និងដៃគូ រហូតមកដល់ពេលនេះបានធ្វើការជម្លៀសអ្នកជំងឺចំនួនបីលើក ចេញពីមន្ទីរពេទ្យ ដែលការជម្លៀសចុងក្រោយធ្វើឡើងកាលពីថ្ងៃពុធ ដោយបានផ្ទេរអ្នកជំងឺសរុបចំនួន ៥១នាក់ទៅកាន់ភាគខាងត្បូងតំបន់ហ្កាហ្សា។ មន្ត្រីអង្គការសុខភាពពិភពលោកនិយាយថា អង្គការសុខភាពពិភពលោក នឹងបន្តព្យាយាមជម្លៀសអ្នកជំងឺឈឺធ្ងន់ និងរបួសធ្ងន់ចេញពីមន្ទីរពេទ្យ Nasser ទៅកាន់មន្ទីរពេទ្យផ្សេងទៀតនៅភាគខាងត្បូង រួមទាំងមន្ទីរចល័តដែលត្រូវបានបង្កើតឡើងនៅទីក្រុងរ៉ាហ្វា។ ទោះជាយ៉ាងណា វាជាបេសកកម្មដ៏លំបាក និងមានហានិភ័យខ្ពស់។ ក្រសួងសុខាភិបាលតំបន់ហ្កាហ្សាបាននិយាយថា កងកម្លាំងអ៊ីស្រាអែល បានដាក់ទីតាំងនៅជុំវិញបរិវេណមន្ទីរពេទ្យ ដោយរារាំងការសកម្មភាពចូលនិងចេញពីមន្ទីពេទ្យ។ ក្រសួងសុខាភិបាលតំបន់ហ្កាហ្សា បាននិយាយនៅក្នុងសេចក្តីថ្លែងការណ៍ថា អ្នកជំងឺ ១១០ នាក់កំពុងរង់ចាំឲ្យគេជម្លៀសចេញ។ ក្រសួងនិយាយថាអ្នកជំងឺ ៨ នាក់នៅមន្ទីពេទ្យ Nasser បានស្លាប់ដោយសារតែខ្វះថាមពល និងអុកហ្សីសែន កាលពីបួនថ្ងៃមុន ហើយសាកសពរបស់ពួកគេបានចាប់ផ្តើមរលួយ ដែលបង្កហានិភ័យដល់អ្នកជំងឺផ្សេងទៀត។

ការវាយប្រហាររបស់អ៊ីស្រាអែល សម្លាប់មនុស្ស៤០នាក់ និងជាង១០០នាក់រងរបួសក្នុងតំបន់ហ្កាហ្សា

ការិយាល័យប្រព័ន្ធផ្សព្វផ្សាយរបស់រដ្ឋាភិបាលគ្រប់គ្រងដោយក្រុមហាម៉ាសក្នុងតំបន់ហ្កាហ្សា បាននិយាយនៅក្នុងសេចក្ដីប្រកាសព័ត៌មានកាលពីថ្ងៃព្រហស្បតិ៍ថា ជនជាតិប៉ាឡេស្ទីន យ៉ាងហោចណាស់៤០នាក់ បានស្លាប់ និងជាង១០០នាក់ផ្សេងទៀតបានរងរបួសក្នុងការវាយប្រហារតាមអាកាសរបស់អ៊ីស្រាអែលលើតំបន់ហ្កាហ្សាស្ទ្រីប។ ប្រភពពីកងកម្លាំងសន្តិសុខប៉ាឡេស្ទីន បានប្រាប់សារព័ត៌មាន ស៊ីនហួ ថា យន្តហោះអ៊ីស្រាអែលបានវាយឆ្មក់ជាច្រើនលើកលើលំនៅឋានប្រជាពលរដ្ឋក្នុងទីក្រុង ឌៀរ អេល បាឡា (Deir el-Balah) ដែលបានបំផ្លិចបំផ្លាញទាំងស្រុង។ ក្រសួងសុខាភិបាលគ្រប់គ្រងដោយក្រុមហាម៉ាស បានបញ្ជាក់ថាសាកសពជនរងគ្រោះមួយចំនួន ត្រូវបានបញ្ជូនទៅកាន់មន្ទីរពេទ្យអាល់ អាកសា (al-Aqsa )។ រថយន្តគិលានសង្គ្រោះ និងក្រុមការពារជនស៊ីវិល បានប្រញាប់ប្រញាល់ទៅកាន់កន្លែងកើតហេតុដើម្បីជួយជីវិតមនុស្ស បន្ទាប់ពីការវាយឆ្មក់របស់អ៊ីស្រាអែល កម្ទេចភូមិឋាននោះយ៉ាងធ្ងន់ធ្ងរ ។ ប្រភពពីក្រុមវេជ្ជសាស្ត្រ បាននិយាយថា មន្ទីរពេទ្យអាល់ អាកសា បច្ចុប្បន្ន ផ្ទុកណែនដោយអ្នករបួស អ្នកជំងឺ និងជនភៀសខ្លួនរាប់ពាន់នាក់៕

កំទេចកំទីពីមីស៊ីលកូរ៉េខាងជើង ដែលរុស្ស៊ី ប្រើនៅអ៊ុយក្រែន អាចលាតត្រដាងបណ្តាញលទ្ធកម្ម

ក្រុមអ្នកជំនាញបាននិយាយថា ការលាតត្រដាងនៃមីស៊ីលកូរ៉េខាងជើងមួយគ្រាប់ដែលបាញ់ដោយរុស្ស៊ី នៅអ៊ុយក្រែន មានសមាសធាតុមួយចំនួនធំ ដែលភ្ជាប់ទៅនឹងក្រុមហ៊ុនមានមូលដ្ឋាននៅសហរដ្ឋអាមេរិក បានគូសបញ្ជាក់អំពីការលំបាកក្នុងការអនុវត្តទណ្ឌកម្មប្រឆាំងនឹងទីក្រុងព្យុងយ៉ាង ប៉ុន្តែការបើកបង្ហាញនេះអាចជួយស្វែងរកបណ្តាញលទ្ធកម្ម (ភាពជាកម្មសិទ្ធដោយការទិញ ឬលក់) ខុសច្បាប់របស់កូរ៉េខាងជើង។នៅក្នុងរបាយការណ៍មួយដែលបានចេញផ្សាយនៅសប្តាហ៍នេះ ស្ថាប័នស្រាវជ្រាវអារុធជម្លោះ (CAR) ដែលជាអង្គការមានមូលដ្ឋាននៅចក្រភពអង់គ្លេស និងតាមដានប្រភពដើមនៃអាវុធដែលប្រើក្នុងជម្លោះបាននិយាយថា ខ្លួនបានពិនិត្យមើលសមាសធាតុអេឡិចត្រូនិច រួមទាំងប្រព័ន្ធរុករករបស់មីស៊ីលនេះ ហើយបានរកឃើញថា សមាសធាតុជាច្រើនត្រូវបានផលិតថ្មីៗនេះ និងដាក់ស្លាកសញ្ញារបស់ក្រុមហ៊ុនដែលមានមូលដ្ឋាននៅសហរដ្ឋអាមេរិក។អង្គការនេះបាននិយាយថា ចំនួន ៧៥% នៃសមាសធាតុទាំងនោះត្រូវបាន «ភ្ជាប់ជាមួយក្រុមហ៊ុនដែលដាក់បញ្ចូលអាជីវកម្មក្នុងសហរដ្ឋអាមេរិក» ហើយចំនួន ១៦% ជារបស់ក្រុមហ៊ុននៅអឺរ៉ុប និង ១១% របស់ក្រុមហ៊ុននៅអាស៊ី។ក្រុមអ្នកជំនាញការដាក់ទណ្ឌកម្មបាននិយាយថា ការរកឃើញនេះមិនគួរឱ្យភ្ញាក់ផ្អើលទេ ទោះបីជាអស់រយៈពេលជាច្រើនឆ្នាំដែលសហរដ្ឋអាមេរិក បានដឹកនាំកិច្ចខិតខំប្រឹងប្រែងអន្តរជាតិដើម្បីរឹតបន្តឹងសមត្ថភាពរបស់កូរ៉េខាងជើង ក្នុងការទទួលបានគ្រឿងបន្លាស់ និងមូលនិធិសម្រាប់កម្មវិធីមីស៊ីលបាលិស្ទិក និងនុយក្លេអ៊ែររបស់ខ្លួនក៏ដោយ៕

អូស្ត្រាលី ចេញការព្រមានជាថ្មីឲ្យជម្លៀសពលរដ្ឋ ខណៈចំហេះព្រៃគំរាមកំហែងទីក្រុងតូចៗ កាន់តែច្រើន

អូស្ត្រាលីបានចេញការព្រមានជាថ្មី នៅថ្ងៃសុក្រទី២៣សប្ដាហ៍នេះ ចំពោះទីក្រុងតូចៗរាប់សិបកន្លែងនៅជាយប្រទេស ខណៈក្រុមអ្នកពន្លត់អគ្គិភ័យប្រហែល១ពាន់នាក់ បានប្រឹងប្រែងពន្លត់អណ្ដាតភ្លើងនៅក្នុងរដ្ឋវីកតូរីយ៉ា (Victoria) ដែលត្រូវបំផ្លិចបំផ្លាញទ្រព្យសម្បត្តិ សម្លាប់បសុសត្វ និងកំពុងគំរាមកំហែងរាលដាលចូលដល់ទីក្រុងតូចៗកាន់តែច្រើន ។កាលពីថ្ងៃព្រហស្បតិ៍ ទី២២កុម្ភៈ មនុស្សជាង២ពាន់នាក់ បានចាកចេញពីទីក្រុងនានាក្នុងភាគខាងលិចរដ្ឋវីកតូរីយ៉ា បន្ទាប់ពីមានបញ្ជាឲ្យប្រជាពលរដ្ឋជម្លៀសចេញជាបន្ទាន់ ខណៈតំបន់ទាំងនោះនៅតែមានសុវត្ថិភាពនៅឡើយ ហើយបានធ្វើដំណើរទៅកាន់ភាគខាងកើតទីប្រជុំបាឡារ៉ាត( Ballarat ស្ថិតនៅចម្ងាយ៩៥គីឡូម៉ែត្រពីភាគខាងលិចក្រុងមេលប៊ន( Melbourne)។ ដោយទទួលបានជំនួយពីយន្តហោះជាង៥០គ្រឿងបន្ថែមទៀត ក្រុមអ្នកពន្លត់អគ្គិភ័យ បានព្យាយាមពន្លត់អណ្ដាតភ្លើងដែលកំពុងឆាបឆេះយ៉ាងសន្ធោសន្ធៅនៅថ្ងៃសុក្រនេះ។ មានក្ដីរំពឹងថា ការបោកបក់កម្លាំងខ្យល់ខ្លាំងហួសពីការរំពឹងទុក នឹងជំរុញឲ្យអណ្ដាតភ្លើងរាលដាលកាន់តែលឿន និងជិតទីក្រុងតូចៗនានា ខណៈដែលក្រុមអ្នកសង្រ្គោះបន្ទាន់ បានជំរុញឲ្យស្នាក់នៅក្នុងផ្ទះ ប្រសិនបើ មិនអាចចាកចេញបាន។ ផ្ទៃដីដ៏ធំនៃរដ្ឋនេះ ត្រូវបានដាក់ក្នុងគ្រាអាសន្ន ដោយសារចំហេះព្រៃ ហើយមន្ទីរឧតុនិយមកាលពីថ្ងៃព្រហស្បតិ៍សប្ដាហ៍នេះដែរ បានចេញការព្រមានដ៏គ្រោះថ្នាក់សម្រាប់សង្កាត់មួយចំនួនដោយសារតែអាកាសធាតុក្ដៅ ខ្យល់ស្ងួត និងអាចមានផ្គររន្ទះ៕

ម្តាយរបស់លោក Navalny ចោទអ្នកស៊ើបអង្កេតរុស្ស៊ី ថាព្យាយាមបញ្ចុះសពកូនប្រុសខ្លួនដោយសម្ងាត់

ម្តាយរបស់អតីតមេដឹកនាំបក្សប្រឆាំងដ៏សំខាន់របស់រុស្ស៊ី លោក អាឡិចស៊ី ណាវ៉ាលនី (Alexei Navalny) បានចោទប្រកាន់ក្រុមអ្នកស៊ើបអង្កេតរុស្ស៊ី កាលពីថ្ងៃព្រហស្បតិ៍ (២២ កុម្ភៈ) ថាមានគម្រោងបញ្ចុះសពកូនប្រុសរបស់ខ្លួនដោយសម្ងាត់ដោយគ្មានពិធីបុណ្យសព បន្ទាប់ពីតស៊ូអស់ជាច្រើនថ្ងៃមកទល់ពេលនេះដោយឥតប្រយោជន៍ ក្នុងការបញ្ចុះបញ្ចូលពួកគេឱ្យប្រគល់សាកសពរបស់លោក ណាវ៉ាលនី។លោកស្រី ល្យូដមីឡា ណាវ៉ាលណាយ៉ា (Lyudmila Navalnaya) បានធ្វើការចោទប្រកាន់នេះនៅក្នុងវីដេអូបណ្ដាញសង្គមយូធូបមួយ ដែលបានផ្សព្វផ្សាយរយៈពេលប្រាំមួយថ្ងៃបន្ទាប់ពីអ្នកនយោបាយប្រឆាំងដ៏ល្បីរបស់រុស្ស៊ីនេះបានស្លាប់ភ្លាមៗនៅក្នុងពន្ធនាគារអាណានិគមព្រហ្មទណ្ឌអាកទិក ជាទីដែលលោកត្រូវបានកាត់ទោសយ៉ាងយូរ។លោកស្រី ណាវ៉ាលណាយ៉ា បាននិយាយថា «ពួកគេចង់ឱ្យការបញ្ចុះសពនេះ ត្រូវបានធ្វើឡើងដោយសម្ងាត់ដោយគ្មានពាក្យលាចុងក្រោយ ហើយយើងមិនយល់ស្របនឹងរឿងនេះឡើយ»។ ក្រុមអ្នកស៊ើបអង្កេតរុស្ស៊ី មិនបានឆ្លើយតបភ្លាមៗជុំវិញការលើកឡើងនេះទេ។ក្រុមជំនួយការ និងក្រុមគ្រួសាររបស់លោក ណាវ៉ាលនី បានចោទលោកប្រធានាធិបតី វ្ល៉ាឌីមៀ ពូទីន ថាបានសម្លាប់អ្នកនយោបាយប្រឆាំងរូបនេះ ដែលនេះជាការចោទប្រកាន់ដែលវិមានក្រឹមឡាំង បានច្រានចោលយ៉ាងខឹងសម្បារ។ អតីតមេដឹកនាំប្រឆាំងដែលបានទទួលមរណភាពលោក ណាវ៉ាលនី វ័យ ៤៧ ឆ្នាំ ត្រូវជាប់ពន្ធនាគារសរុបច្រើនជាង ៣០ ឆ្នាំលើការចោទប្រកាន់រួមទាំងការក្លែងបន្លំ និងសកម្មភាពជ្រុលនិយម ដែលលោកនិយាយថាត្រូវបានបង្កើតឡើងដើម្បីបំបិទមាត់លោក៕

ប្រមុខ MSF រិះគន់អាមេរិកនៅ UN ដោយនិយាយថា កុមារហ្កាហ្សា រងគ្រោះទាំងផ្លូវកាយ និងផ្លូវចិត្ត

ប្រធានអង្គការ វេជ្ជបណ្ឌិតគ្មានព្រំដែន (MSF) បានប្រាប់ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃព្រហស្បតិ៍ (២២ កុម្ភៈ) ថាក្រុមវេជ្ជសាស្រ្តនៅតំបន់ហ្កាហ្សាស្ទ្រីប បានបង្កើតអក្សរកាត់ថ្មីមួយគឺ WCNSF ដែលមានន័យថា «កុមាររងរបួស និងគ្មានគ្រួសារនៅរស់រានមានជីវិតទេ»។អគ្គលេខាធិការអន្តរជាតិរបស់អង្គការ MSF លោក គ្រីសស្តូហ្វឺ ឡុកយៀ (Christopher Lockyear) បានប្រាប់ក្រុមប្រឹក្សាដែលមានសមាជិក ១៥ រដ្ឋនេះថា «កុមារដែលរួចរស់ជីវិតពីសង្រ្គាមនេះ នឹងមិនត្រឹមតែទទួលនូវរបួសផ្លូវចិត្តដែលអាចមើលឃើញប៉ុណ្ណោះទេ ប៉ុន្តែពួកគេក៏រងរបួសផ្លូវកាយយ៉ាងធ្ងន់ធ្ងរផងដែរ»។លោក ឡុកយៀ បានថ្កោលទោសសហរដ្ឋអាមេរិក ដោយនិយាយថាលោកមិននឹកស្មាននោះទេថាអាមេរិកបានប្រើអំណាចវ៉េតូម្តងហើយម្តងទៀតដើម្បីរារាំងក្រុមប្រឹក្សាពីការទាមទារបទឈប់បាញ់មនុស្សធម៌ភ្លាមៗនៅក្នុងសង្គ្រាមរវាងអ៊ីស្រាអែល និងពួកសកម្មប្រយុទ្ធប៉ាឡេស្ទីនហាម៉ាស នៅតំបន់ហ្កាហ្សា។ប្រធានអង្គការ MSF រូបនេះបន្ថែមថា «ការរត់ភៀសខ្លួនម្តងហើយម្តងទៀត ការភ័យខ្លាចឥតឈប់ឈរ និងការមើលឃើញសមាជិកគ្រួសារបានបាត់បង់ជីវិតនៅចំពោះមុខពួកគេ បង្កជារបួសផ្លូវចិត្តយ៉ាងធ្ងន់ធ្ងរ ហើយបញ្ហាទាំងនេះបានធ្វើឱ្យកុមារអាយុត្រឹមតែ ៥ ឆ្នាំ អាចប្រាប់យើងបានថាពួកគេចង់ស្លាប់វិញប្រសើរជាង»៕

អ៊ីស្រាអែល បង្ខំឲ្យរំលាយទីភ្នាក់ងារទទួលបន្ទុកជនភៀសខ្លួនប៉ាឡេស្ទីនរបស់UN ខណៈវិបត្តិមនុស្សធម៌កាន់តែធ្ងន់ធ្ងរ

ទីភ្នាក់ងារទទួលបន្ទុកជនភៀសខ្លួន និងការងារប៉ាឡេស្ទីនរបស់អង្គការសហប្រជាជាតិបានព្រមានកាលពីថ្ងៃព្រហស្បតិ៍ថា ខ្លួនបានឈានដល់ចំណុចរបត់មួយ ខណៈទីភ្នាក់ងារនេះ កំពុងតស៊ូទប់ទល់នឹងសង្គ្រាមនៅក្នុងតំបន់ហ្កាហ្សា។ ប្រធានទីភ្នាក់ងារនេះ លោក ហ្វីលីប ឡាហ្សារីនី (Philippe Lazzarini) បាននិយាយថា ពិតជាសោកស្តាយខ្លាំងបំផុតដែលឥឡូវនេះលោកត្រូវតែជូនដំណឹងដល់អ្នកថាទីភ្នាក់ងារទទួលបន្ទុកជនភៀសខ្លួន និងការងារប៉ាឡេស្ទីនរបស់អង្គការសហប្រជាជាតិ (UNRWA) បានឈានដល់ចំណុចរបត់ ខណៈក្រុមម្ចាស់ជំនួយបង្កកមូលនិធិ អ៊ីស្រាអែលដាក់សម្ពាធឱ្យរំលាយទីភ្នាក់ងារនេះចោល និងតម្រូវការមនុស្សធម៌កើនឡើង។ លោកបានថ្លែងក្នុងលិខិតមួយទៅសភាថា សមត្ថភាពរបស់ទីភ្នាក់ងារក្នុងការបំពេញអាណត្តិដែលបានផ្តល់ឲ្យតាមរយៈដំណោះស្រាយមហាសន្និបាតលេខ ៣០២ ឥឡូវត្រូវបានគំរាមកំហែងយ៉ាងធ្ងន់ធ្ងរ។ នោះគឺជាសេចក្ដីសម្រេចដែលទីភ្នាក់ងារនេះ ត្រូវបានបង្កើតឡើងក្នុងឆ្នាំ១៩៤៩ បន្ទាប់ពីការបង្កើតអ៊ីស្រាអែល។ UNRWA បានផ្តល់ការងារដល់មនុស្សប្រមាណ៣ម៉ឺននាក់ ដែលកំពុងធ្វើការនៅក្នុងដែនដីហ្កាហ្សាកាន់កាប់ដោយអ៊ីស្រាអែល នៅក្នុងប្រទេសលីបង់ ហ្ស៊កដានី និងស៊ីរី។ ប្រទេសជាច្រើន រួមទាំងសហរដ្ឋអាមេរិក អង់គ្លេស អាល្លឺម៉ង់ និងជប៉ុន បានផ្អាកការផ្តល់មូលនិធិដល់ អង្គការ UNRWA ឆ្លើយតបទៅនឹងការចោទប្រកាន់របស់អ៊ីស្រាអែលថា បុគ្គលិករបស់ខ្លួនមួយចំនួនបានចូលរួមក្នុងការវាយប្រហារកាលពីថ្ងៃទី៧ ខែតុលា លើអ៊ីស្រាអែល។ នៅក្នុងបទសម្ភាសន៍មួយដែលត្រូវបានចេញផ្សាយកាលពីចុងសប្តាហ៍ លោកហ្សារីនី បាននិយាយថា ថវិកាចំនួន៤៣៨លានដុល្លារត្រូវបានជាប់គាំង ស្មើនឹងជាងពាក់កណ្តាលនៃមូលនិធិដែលរំពឹងទុកសម្រាប់ឆ្នាំ២០២៤។ លោកបាននិយាយថា អ៊ីស្រាអែលកំពុងខិតខំប្រឹងប្រែងរួមគ្នាដើម្បីបំផ្លាញ ទីភ្នាក់UNRWA ៕

បុរសជនជាតិចិនម្នាក់ បើករថយន្តបុកម៉ូតូខ្ទាតជាច្រើនម៉ែត្របណ្ដាលឲ្យស្លាប់បុរសម្នាក់

ភ្នំពេញ៖ បុរសជាអ្នកដឹកជញ្ជូនតាមអនឡាញម្នាក់ស្លាប់ភ្លាមៗនៅនឹងកន្លែងហេតុ ខណៈពេលកំពុងជិះម៉ូតូត្រូវបានរថយន្តសេរីទំនើបបើកបរដោយបុរសម្នាក់ជាជនជាតិ ចិនបើកលឿនដូចហោះបុកពីក្រោយពេញទំហឹងខ្ទាតម៉ូតូជាច្រើនម៉ែត្រ ចំណែករថយន្តបង្កព្យាយាមបើករត់គេចត្រូវបានប្រជាពលរដ្ឋនាំគ្នាដេញតាមស្ទាក់ឃាត់បាន។ហេតុការណ៍គ្រោះថ្នាក់ចរាចរណ៍នេះបានកើតឡើង នៅវេលាម៉ោង១រំលងអាធ្រាត្រឈានចូលថ្ងៃទី២៣ ខែកុម្ភៈ ឆ្នាំ២០២៤ស្ថិតនៅតាមបណ្ដោយមហាវិថីសហព័ន្ធរុស្ស៊ី សង្កាត់កាកាបទី១ ខណ្ឌពោធិ៍សែនជ័យ។ប្រភពព័ត៌មានបានឱ្យដឹងថា មុនពេលកើតហេតុគេឃើញជនរងគ្រោះជិះម៉ូតូម្នាក់ឯងម៉ាក ហុងដាឌ្រីម ស៊េរី២០១៧ ពណ៌ខ្មៅ ពាក់ស្លាកលេខ សៀមរាប1V-9127 ធ្វើដំណើរក្នុងទិសដៅពីកើតទៅលិច ខណៈមកដល់ចំណុចកើតហេតុ ស្រាប់តែត្រូវបានរថយន្តម៉ាក LAMBORGHINI HURACAN STO ពណ៌ទឹកក្រូច ពាក់ស្លាកលេខ កម្ពុជាF.R.999 បើកបរដោយបុរសជនជាតិចិន ឈ្មោះ ប៉ាហ្វីដូ ដែលជាតារាល្បី តាមបណ្ដាញសង្គមFacebook ខាងធ្វើម្ហូប ធ្វើដំណើរស្របទិសគ្នាក្នុងល្បឿនយ៉ាងលឿនទៅបុកម៉ូតូរងគ្រោះពីក្រោយពេញទំហឹងបណ្ដាលឲ្យខ្ទាតម៉ូតូជាច្រើនម៉ែត្រ បន្ទាប់មករថយន្តបង្កបានព្យាយាមបើករត់គេចខ្លួនចេញពីមហាសហព័ន្ធរុស្ស៊ីចូលផ្លូវ២០០៤ទៅឆ្ពោះទៅផ្លូវដួងងៀប ក្នុងសង្កាត់ស្ទឹងមានជ័យ៣ ខណ្ឌមានជ័យ ទើបប្រជាពលរដ្ឋនាំគ្នាស្ទាក់ឃាត់ខ្លួនបានរួចទាក់ទងរាយការណ៍ទៅសមត្ថកិច្ចមូលដ្ឋានចុះមកអន្តរាគមន៍ភ្លាមៗធ្វើការឃាត់ខ្លួនអ្នកបើកបរនិងបក្ខពួកផ្សេងទៀតដែលបើករថយន្តម៉ាក BMW ពណ៌ខៀវ ពាក់ស្លាកលេខ កម្ពុជា MR. TOMI មកបំរុងរំដោះយកអ្នកបើកបររថយន្តបង្ករត់គេចខ្លួន ។ប្រភពដដែលបានបន្តទៀតថា ពេលដែលសមត្ថកិច្ចសួរនាំ បុរសជនជាតិចិនរូបនេះបានបដិសេធថាខ្លួនមិនមែនជាអ្នកបើកនោះទេ គឺអ្នកផ្សេងជាអ្នកបើក តែប្រជាពលរដ្ឋឃើញច្បាស់ថាគាត់ជា អ្នកចុះពីលើរថយន្តបង្ក ទោះជាយ៉ាងណាខាងសមត្ថកិច្ចបាននាំអ្នកបើកបររថយន្តបង្ក និង មិត្តភក្តិ ២នាក់ទៀតយកទៅផ្នែកជំនាញដើម្បីសួរនាំបន្តនៅខណ្ឌពោធិសែនជ័យ ។ក្រោយពេលកើតហេតុសពរងគ្រោះត្រូវបានសមត្ថកិច្ចប្រគល់ទៅសាច់ញាតិក្រុមគ្រួសារដឹកយកទៅធ្វើបុណ្យតាមប្រពៃណី ចំណែកម៉ូតូរងគ្រោះ និងរថយន្តបង្កសមត្ថកិច្ចមូលដ្ឋាន និងសមត្ថកិច្ចជំនាញចុះវាស់វែងយកទៅរក្សាទុកនៅការិយាល័យនគរបាលចរាចរណ៍ផ្លូវគោករង់ចាំធ្វើការដោះស្រាយបន្តពេលក្រោយ ៕ អត្ថបទ៖ កុម្ភៈ

បណ្ដាញសង្គម

ព័ត៌មានថ្មីៗ

[BREAKING NEWS] ធ្លាក់យន្តហោះយោធានៅប្រទេសកូឡុំប៊ី បណ្តាលឲ្យមនុស្សស្លាប់ និងរងរបួសរាប់សិបនាក់

កម្ពុជាជម្រាបជូនឥណ្ឌាអំពីការវិវត្តថ្មីៗ ពាក់ព័ន្ធនឹងស្ថានការណ៍ព្រំដែនកម្ពុជា-ថៃ

បារ៉ែន ស្នើឱ្យក្រុមប្រឹក្សាសន្តិសុខ UN អនុម័តការប្រើប្រាស់កម្លាំងដើម្បីការពារនាវាដឹកជញ្ជូនតាមច្រកហ័រមូស

អ៊ុយក្រែនអះអាងថា ខ្លួនមានភស្តុតាង «ដែលមិនអាចប្រកែកបាន» ថា រុស្ស៊ីកំពុងផ្តល់ចារកម្មសម្ងាត់ឱ្យអ៊ីរ៉ង់

អ៊ីស្រាអែល វាយប្រហារភាគខាងត្បូងទីក្រុងបេរូត និងនិយាយថា បានចាប់ខ្លួនសមាជិកក្រុមហេសបូឡា

លោកTrump៖ អ៊ីរ៉ង់ចង់ចុះកិច្ចព្រមព្រៀង ខណៈទីក្រុងតេអេរ៉ង់បានហៅការអះអាងនោះថាជាព័ត៌មានក្លែងក្លាយ

ក្រុមអ្នកស្រាវជ្រាវនិយាយថា បម្រែបម្រួលអាកាសធាតុនឹងបំផ្លាញប្រពៃណីនេសាទត្រីលើបឹងទឹកកកនៅអឌ្ឍគោលខាងជើង

នាវាដឹកប្រេងរឹបអូសបានរបស់រុស្ស៊ី ធ្វើដំណើរទៅដល់ទីក្រុង Marseille ប្រទេសបារាំង

កម្ពុជាជម្រាបជូនឥណ្ឌាអំពីការវិវត្តថ្មីៗពាក់ព័ន្ធនឹងស្ថានការណ៍ព្រំដែនកម្ពុជា-ថៃ

ស្ថាប័នការពារស៊ីវិល៖ មនុស្ស ៥នាក់ស្លាប់ នៅអូម៉ង់ ក្រោយរថយន្តហូរទៅតាមទឹកជំនន់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877