BTV NEWS

គិតពីឆ្នាំ២០២៣មក សមត្ថកិច្ចបង្ក្រាបបទល្មើសគ្រឿងញៀនជាង៣ម៉ឺនករណី និងឃាត់ខ្លួនមនុស្សជិត៩ម៉ឺននាក់ និងរឹបអូសសារធាតុញៀនគ្រប់ប្រភេទជាង ២៦តោន

ស្នងការខេត្តកំពតបន្តតាមដានមន្ត្រីនគរបាល២រូបចំពោះរបាយការណ៍មិនប្រក្រតីអំពីគ្រោះថ្នាក់ចរាចរ

រាជរដ្ឋាភិបាលកម្ពុជា បានចាត់វិធានការក្ដៅ លើទីតាំងកាស៊ីណូ ពាក់ព័ន្ធនឹងសកម្មភាពឆបោកតាមប្រព័ន្ធបច្ចេកវិទ្យា (ONLINE SCAMS)

រយៈពេលជាង ៥ខែ កម្ពុជាបណ្តេញជនបរទេសចេញជិត ៣ម៉ឺននាក់ និងជិត ២ពាន់នាក់ទៀតត្រៀមបណ្តេញចេញ ពាក់ព័ន្ធករណី Online Scams និងការប្រព្រឹត្តបទល្មើសផ្សេងៗ

សន្តិសុខ និង សង្គម

មេដឹកនាំពិភពលោកព្យាយាមទប់ស្កាត់សង្គ្រាមអ៊ីស្រាអែល-ក្រុមហាម៉ាស់ និងការពារជនស៊ីវិល

ខណៈប្រទេសអ៊ីស្រអែល ត្រៀមសម្រាប់ការវាយលុកតាមដីគោកចូលទៅក្នុងតំបន់ហ្គាហ្សា សហគមន៍អន្តរជាតិ បានរួបរួមគ្នា ដើម្បីព្យាយាមការពារជនស៊ីវិលនិងទប់ស្កាត់ជម្លោះ មិនឲ្យរាលដាលនៅទូទាំងតំបន់។ ប៉ុន្តែការប្តេជ្ញាចិត្តដែលបានសន្យារបស់អ៊ីស្រាអែល ដើម្បីកម្ទេចក្រុមហាម៉ាស់ ជាក្រុមនៅពីក្រោយការវាយប្រហារកាលពីថ្ងៃទី៧ ខែតុលា កំពុងរារាំងកិច្ចប្រឹងប្រែងសម្របសម្រួល។ ដូច្នេះមានការប៉ះទង្គិចគ្នាច្រើននៅតាមបណ្តោយព្រំដែនភាគខាងជើងរបស់អ៊ីស្រាអែល ជាមួយប្រទេសលីបង់។ក្នុងចំណោមតួអង្គអន្តរជាតិសកម្មបំផុតគឺសហរដ្ឋអាមេរិក ដែលរដ្ឋមន្ត្រីការបរទេសលោក Antony Blinken បានចាប់ផ្តើមដំណើរទស្សនកិច្ចទៅកាន់ប្រទេសអារ៉ាប់ចំនួន៦ កាលពីថ្ងៃសុក្រទី ១៣ ខែតុលា ដោយបានធ្វើទស្សនកិច្ច នៅប្រទេសហ្សកដានី កាតា បារ៉ែន អារ៉ាប់រួម អារ៉ាប៊ីសាអូឌីត និងប្រទេសអេហ្ស៊ីប។ ទីក្រុងវ៉ាស៊ីនតោន ក៏ដូចជាសម្ព័ន្ធមិត្តអឺរ៉ុបរបស់ខ្លួនមានការព្រួយបារម្ភដើម្បីបញ្ចៀសការបើកសមរភូមិលើកទី២ជាមួយជីវពលក្រុមហេសបូឡា ដែលគាំទ្រដោយអ៊ីរ៉ង់ នៅក្នុងប្រទេសលីបង់។ ប៉ុន្តែពួកគេប្រាកដណាស់ចំពោះការគាំទ្ររបស់ពួកគេ សម្រាប់សិទ្ធរបស់អ៊ីស្រាអែល ដើម្បីកាពារខ្លួន។ ប្រទេសអេហ្ស៊ីប កាតា និងទួរគី ក៏កំពុងព្យាយាមទប់ស្កាត់វិបត្តិនេះ។ ប្រទេសទាំងអស់នេះមានទំនាក់ទំនងល្អជាមួយប្រទេសអ៊ីស្រាអែល ហើយអ្នកជំនាញគិតថាពួកគេនឹងមានឥទ្ធិពលខ្លះលើក្រុមហាម៉ាស់។ ប្រទេសចិន និងរុស្ស៊ី មានការយកចិត្តទុកដាក់កាន់តែខ្លាំង ចំពោះការឆ្លើយតបទៅនឹងការវាយប្រហារ។ប៉ុន្តែប្រទេសទាំងពីរនេះ អាចមានឥទ្ធិពលខ្លះលើប្រទេសអ៊ីរ៉ង់ជាសត្រូវដែលអ៊ីស្រាអែលបានស្បត់ ដើម្បីការពារជម្លោះមិនឲ្យរាលដាល។ ទីក្រុងតេអេរ៉ង់ បានគាំទ្រក្រុមហេសបូឡា និងក្រុមហាម៉ាស់ជាយូរមកហើយ។ប្រធានក្រុមប្រឹក្សាអឺរ៉ុប លោក Charles Michel បានអំពាវនាវតាមកិច្ចប្រជុំកំពូលតាមវីដេអូ ដល់មេដឹកនាំសហភាពអឺរ៉ុប នៅថ្ងៃអង្គារនេះដើម្បីស្វែងរកជំហររួមគ្នាចំពោះសង្គ្រាមនេះ។

អង្គការខុសភាពពិភពលោក និយាយថា ជំនួយត្រូវតែទៅដល់តំបន់ហ្គាហ្សារយៈពេល២៤ម៉ោង មុនកើតមានមហន្តរាយ

ប្រធានអង្គការសុខភាពពិភពលោកប្រចាំតំបន់របស់អង្គការសហប្រជាជាតិ បានប្រាប់សារព័ត៌មាន AFP កាលពីថ្ងៃចន្ទថា តំបន់ហ្គាហ្សា នៅសល់ទឹកប្រើប្រាស់ ថាមពលអគ្គិសនី និង ប្រេងឥន្ធនៈសម្រាប់ត្រឹមរយៈពេលតែ២៤ម៉ោងទៀតប៉ុណ្ណោះ ខណៈសម្ពាធកើនឡើងខ្លាំង ដែលជំនួយចាំបាច់ត្រូវតែទៅឲ្យដល់។ ប្រធានប្រចាំតំបន់សម្រាប់មេឌីទែរ៉ាណេខាងកើត លោក អាម៉េដ អាល់-ម៉ាណហារី (Ahmed al-Mandhari) បាននិយាយនៅក្នុងបទសម្ភាសន៍ជាមួយសារព័ត៌មាន AFP ថា ប្រសិនបើជំនួយមិនត្រូវបានអនុញ្ញាតឲ្យចូលទៅក្នុងដែនដីរងការឡោមព័ទ្ធ ក្រុមវេជ្ជបណ្ឌិត នឹងត្រៀមការចុះបញ្ជីអ្នកស្លាប់នៃអ្នកជំងឺរបស់ខ្លួន។ ជម្លោះបានឈានចូលដល់ថ្ងៃទី១០ កាលពីថ្ងៃចន្ទនៃការវាយប្រហារតាមអាកាសឥតឈប់ឈររបស់អ៊ីស្រាអែល ដាក់គោលដៅលើតំបន់រស់នៅរបស់ជនជាតិប៉ាឡេស្ទីន រងការឡោមព័ទ្ធ ចាប់តាំងពី ការវាយប្រហាររបស់ក្រុមហាម៉ាសមានមូលដ្ឋាន នៅតំបន់ហ្គាហ្សា កាលពីទី៧ខែតុលារ ដែលបានសម្លាប់មនុស្សជាង១.៤០០នាក់ ភាគច្រើនជាជនស៊ីវិលនៅក្នុងប្រទេសអ៊ីស្រាអែលភាគខាងត្បូង ។ ក្រសួងសុខាភិបាលគ្រប់គ្រងដោយក្រុមហាម៉ាសនៅក្នុងតំបន់ហ្គាហ្សា បាននិយាយថាមនុស្សប្រហែល២.៧៥០នាក់ បានស្លាប់និងជាង៩.៧០០នាក់រងរបួស ។ យោងតាមអង្គការសហប្រជាជាតិមនុស្ស១លាននាក់ ត្រូវបានភៀសខ្លួនចេញពីលំនៅឋាន។ កង្វះខាតថាមពលអគ្គិសនី គំរាមកំហែងដល់ប្រព័ន្ធគាំទ្រជីវិត ចាប់ពីរោងចក្របន្សុតទឹកសមុទ្រ រហូតដល់ទូរទឹកកកស្តុកអាហារ និង ឃ្លាំងស្តុករក្សាគុណភាពសម្ភារៈវេជ្ជសាស្ត្រជាដើម៕

ទឹកទន្លេអាម៉ាហ្សូន ធ្លាក់ចុះដល់កម្រិតទាបបំផុតក្នុងរយៈពេលជាងមួយសតវត្ស ស្របពេលគ្រោះរាំងស្ងួតរបស់ប្រេស៊ីល

ទឹកទន្លេអាម៉ាហ្សូន បានធ្លាក់ចុះដល់កម្រិតទាបបំផុត ក្នុងរយៈពេលជាងមួយសតវត្ស កាលពីថ្ងៃច័ន្ទ (១៦ តុលា) នៅចំកណ្តាលនៃព្រៃជប់ភ្លៀងប្រេស៊ីល ខណៈគ្រោះរាំងស្ងួត បានបង្កផលប៉ះពាល់ដ់ជីវិតមនុស្សរាប់សែននាក់ និងបំផ្លាញប្រព័ន្ធអេកូឡូស៊ីរបស់ព្រៃអាម៉ាហ្សូន មួយនេះផងដែរ។កត្តារីងស្ងួតយ៉ាងឆាប់រហ័សនៃដៃទន្លេ ដែលភ្ជាប់ទៅកាន់ទន្លេអាម៉ាហ្សូនដ៏ធំ បានធ្វើឲ្យទូកជាច្រើនគ្រឿងបានជាប់គាំងនៅទីនោះ ដោយកាត់ផ្តាច់ការផ្គត់ផ្គង់អាហារ និងទឹកទៅកាន់ភូមិដាច់ស្រយាល ខណៈដែលសីតុណ្ហភាពទឹកខ្ពស់ ត្រូវបានគេសង្ស័យថា បានសម្លាប់សត្វផ្សោតទន្លេ ដែលជិតផុតពូជជាង ១០០ក្បាល។ទីក្រុងកំពង់ផែ ម៉ាណាអូស (Manaus) ដែលជាទីក្រុងមានប្រជាជនច្រើនជាងគេក្នុងតំបន់ បានកត់ត្រាកម្រិតទឹកទន្លេកម្ពស់ ១៣,៥៩ម៉ែត្រ កាលពីថ្ងៃចន្ទ បើប្រៀបធៀបទៅនឹងកម្ពស់ ១៧,៦០ម៉ែត្រកាលពីឆ្នាំមុន នៅក្នុងកិច្ចប្រជុំនៃទន្លេរីអូ និងទន្លេអាម៉ាហ្សូន នេះបើយោងតាមគេហទំព័ររបស់ខ្លួន។ នោះជាកម្រិតទាបបំផុត ចាប់តាំងពីកំណត់ត្រាបានចាប់ផ្តើមក្នុងឆ្នាំ១៩០២មក។ក្រសួងវិទ្យាសាស្ត្ររបស់ប្រទេសប្រេស៊ីល បានស្តីបន្ទោសគ្រោះរាំងស្ងួតថាជាមូលហេតុនៃការចាប់ផ្តើមរបស់បាតុភូតអាកាសធាតុ អ៊ែល នីញ៉ូ ក្នុងឆ្នាំនេះ ដែលកំពុងជំរុញឱ្យមានបម្រែបម្រួលអាកាសធាតុធ្ងន់ធ្ងរនៅទូទាំងពិភពលោក។ នៅក្នុងសេចក្តីថ្លែងការណ៍មួយកាលពីដើមខែនេះ ក្រសួងវិទ្យាសាស្ត្របាននិយាយថា ខ្លួនរំពឹងថា គ្រោះរាំងស្ងួតនឹងអូសបន្លាយរហូតដល់យ៉ាងហោចណាស់ខែធ្នូ នៅពេលដែលឥទ្ធិពលរបស់បាតុភូតអាកាសធាតុ អ៊ែល នីញ៉ូ ត្រូវបានព្យាករណ៍ថានឹងឈានដល់កម្រិតកំពូលផងដែរ៕

ប្រធានាធិបតីកូឡុំប៊ី លោក Petro គំរាមកាត់ផ្តាច់ទំនាក់ទំនងជាមួយអ៊ីស្រាអែលជុំវិញសង្រ្គាមនៅតំបន់ហ្គាហ្សា

ប្រធានាធិបតីកូឡុំប៊ី លោ Gustavo Petro កំពុងគំរាមកាត់ផ្តាច់ទំនាក់ទំនងការទូតជាមួយអ៊ីស្រាអែល បន្ទាប់ពីអាជ្ញាធរអ៊ីស្រាអែល ផ្អាកការនាំចេញសម្ភារៈផ្នែកសន្តិសុខទៅកាន់ប្រទេសអាមេរិកខាងត្បូង ជុំវិញការលើកឡើងរបស់លោក ដែលប្រៀបធៀបរដ្ឋាភិបាលអ៊ីស្រាអែលទៅនឹងពួកណាស៊ី និងការបរាជ័យរបស់លោកក្នុងការថ្កោលទោសការវាយប្រហារកាលពីថ្ងៃទី៧ ខែតុលាពីក្រុមសកម្មប្រយុទ្ធហាម៉ាស ទៅលើអ៊ីស្រាអែលភាគខាងត្បូង។លោក Petro បាននិយាយកាលល្ងាចថ្ងៃអាទិត្យនៅលើបណ្តាញសង្គមX ដែលពីមុនគេស្គាល់ថាជា Twitterថា៖«ប្រសិនបើយើង ត្រូវផ្អាកទំនាក់ទំនងការបរទេសជាមួយអ៊ីស្រាអែល យើងព្យួរពួកវា។ យើងមិនគាំទ្រអំពើប្រល័យពូជសាសន៍ទេ»។ លោកបាននិយាយថា៖«អ្នកមិនប្រមាថប្រធានាធិបតីកូឡុំប៊ីទេ» ដោយឆ្លើយតបទៅនឹងសេចក្តីថ្លែងការណ៍មួយនៅលើបណ្តាញសង្គម X ដោយលោក Lior Haiat អ្នកនាំពាក្យក្រសួងការបរទេសអ៊ីស្រាអែលដែលបានរិះគន់ការរិះគន់ការអធិប្បាយរបស់លោកប្រធានាធិបតីកូឡុំប៊ីថា ជាការប្រឆាំងជនជាតិជ្វីហ្វ។លោក Haiat បានប្រកាសថា ជា«វិធានការដំបូង» អ៊ីស្រាអែលបានសម្រេចចិត្តបញ្ឈប់កិច្ចសហប្រតិបត្តិការសន្តិសុខជាមួយប្រទេសកូឡុំប៊ី។ អ៊ីស្រាអែល បានផ្តល់ឲ្យប្រទេសកូឡុំប៊ីនូវមីស៊ីល យានដ្រូន យន្តហោះយោធា ឧទ្ធម្ភាគចក្រ និងសម្ភារៈសន្តិសុខផ្សេងទៀត។ ប្រទេសទាំងពីរ ក៏មានកិច្ចព្រមព្រៀងពាណិជ្ជកម្មសេរី តាំងពីឆ្នាំ ២០២០មកម្ល៉េះ។

ជនជាតិស៊ុយអែតពីរនាក់ ត្រូវបានបាញ់សម្លាប់នៅបែលហ្ស៊ិក ខណៈបង្កើនការប្រកាសអាសន្នភេរវកម្មដល់កម្រិតកំពូល

ជនជាតិស៊ុយអែតពីរនាក់ ត្រូវបានបាញ់សម្លាប់ និងអ្នកទីបីបានរងរបួស នៅកណ្តាលទីក្រុងព្រុចសែលកាលពីយប់ថ្ងៃច័ន្ទ (១៦ តុលា) ហើយបុរសម្នាក់ដែលបានកំណត់អត្តសញ្ញាណខ្លួនឯងថា ជាសមាជិកនៃក្រុមរដ្ឋអ៊ីស្លាម បានអះអាងទទួលខុសត្រូវលើការបាញ់ប្រហារនោះ នៅក្នុងវីដេអូមួយដែលបានបង្ហោះតាមអ៊ីនធឺណិត។ជនសង្ស័យដែលជាឃាតករនោះ បានរត់គេចខ្លួនចេញពីកន្លែងកើតហេតុ បន្ទាប់ពីការបាញ់ប្រហារ ខណៈដែលការប្រកួតបាល់ទាត់រវាងបែលហ្ស៊ិក និងស៊ុយអែត ហៀបនឹងចាប់ផ្តើម ដែលបង្កឱ្យមានការតាមប្រមាញ់ជនឧក្រិដ្ឋដ៏ធំ និងបានជំរុញឱ្យប្រទេសបែលហ្ស៊ិក បង្កើនការប្រុងប្រយ័ត្ននៃអំពើភេរវកម្មដល់កម្រិតខ្ពស់បំផុត។រដ្ឋអាជ្ញាសហព័ន្ធបែលហ្ស៊ិកម្នាក់ បាននិយាយថា មិនមានភ័ស្តុតាងណាមួយដែលបង្ហាញថា អ្នកវាយប្រហារ ដែលនៅតែមិនទាន់ចាប់ខ្លួនបាននោះ មានទំនាក់ទំនងណាមួយទៅនឹងជម្លោះជាថ្មីរវាងអ៊ីស្រាអែល និងពួកសកម្មប្រយុទ្ធប៉ាឡេស្ទីនឡើយ ដោយបន្ថែមថា ហេតុផលសម្រាប់ការវាយប្រហារនេះ គឺប្រហែលជាមកពីសញ្ជាតិរបស់ជនរងគ្រោះ។គួររម្លឹកផងដែរថា ប្រទេសស៊ុយអែត កាលពីខែសីហា បានបង្កើនការប្រកាសអាសន្នភេរវកម្មរបស់ខ្លួនដល់កម្រិតខ្ពស់បំផុតទីពីរ ដោយព្រមានអំពីកំណើននៃការគំរាមកំហែង ប្រឆាំងនឹងផលប្រយោជន៍ស៊ុយអែតនៅបរទេស បន្ទាប់ពីជម្លោះដុតគម្ពីរកូរ៉ាន និងទង្វើផ្សេងទៀតនៅក្នុងប្រទេសស៊ុយអែត ប្រឆាំងនឹងអត្ថបទធម៌ដ៏ពិសិដ្ឋបំផុតរបស់សាសនាអ៊ីស្លាម ដែលបានធ្វើឱ្យប្រជាជនម៉ូស្លីមខឹងសម្បារ និងបានបង្កជាការគំរាមកំហែងពីពួកសកម្មប្រយុទ្ធអ៊ីស្លាម ជីហាត ផងដែរ៕

ក្រុមហាម៉ាស ចង់ដោះដូរចំណាប់ថ្នូរជាមួយអ្នកទោសប៉ាឡេស្ទីនទាំងអស់ ដែលជាប់ក្នុងពន្ធនាគារអ៊ីស្រាអែល

មេដឹកនាំជាន់ខ្ពស់ក្រុមហាម៉ាសមួយរូប បាននិយាយកាលពីថ្ងៃចន្ទ (១៦ តុលា) ថាក្រុមនេះ «មានអ្វីដែលខ្លួនត្រូវការសម្រាប់ការដោះដូរ» ដើម្បីដោះលែងពលរដ្ឋប៉ាឡេស្ទីនទាំងអស់ នៅក្នុងពន្ធនាគាររបស់អ៊ីស្រាអែល ដោយបង្ហាញថា ក្រុមសកម្មប្រយុទ្ធមួយនេះ អាចព្យាយាមប្រើប្រាស់ជនជាតិអ៊ីស្រាអែល ដែលខ្លួនបានចាប់ជំរិតជាការដាក់បន្ទុកចរចា ដើម្បីធានាការដោះលែងអ្នកទោសប៉ាឡេស្ទីន ដែលមានប្រហែលជា ៦.០០០នាក់ ក្នុងពន្ធនាគាររបស់រដ្ឋជី្វហ្វមួយនេះ។រយៈពេលភ្លាមៗបន្ទាប់ពីមន្ត្រីរបស់ក្រុមហាម៉ាស លោក Khaled Meshaal បានធ្វើការលើកឡើងលើចំណាប់ថ្នូរ ដែលរួមមានជនជាតិអ៊ីស្រាអែល និងពលរដ្ឋបរទេស ដែលត្រូវបានចាប់ខ្លួនដោយក្រុមហាម៉ាស កាលពីថ្ងៃទី៧ ខែតុលា កងកម្លាំងស្លាបប្រដាប់អាវុធរបស់ក្រុមនេះ បាននិយាយដាច់ដោយឡែកថា ពលរដ្ឋដែលមិនមែនជាជនជាតិអ៊ីស្រាអែល គឺជា «ភ្ញៀវ» ដែលនឹងត្រូវបានដោះលែង «នៅពេលដែលកាលៈទេសៈអនុញ្ញាត»។ខ្មាន់កាំភ្លើងមកពីក្រុមហាម៉ាស បានចាប់ចំណាប់ថ្នូរជាច្រើននាក់ បន្ទាប់ពីបានវាយលុកតាមសហគមន៍ និងមូលដ្ឋានយោធាអ៊ីស្រាអែលភាគខាងត្បូង ដោយបានសម្លាប់មនុស្សជាង ១.៣០០នាក់។ យោធាអ៊ីស្រាអែលនិយាយថា ក្រុមនេះបានចាប់ចំណាប់ថ្នូរចំនួន ១៩៩នាក់នៅក្នុងតំបន់ហ្គាហ្សា ប៉ុន្តែក្រុមហាម៉ាសនិយាយថា ខ្លួនមានចំណាប់ថ្នូរចន្លោះពី ២០០នាក់ទៅ ២៥០នាក់។កាលពីឆ្នាំ២០១១ អ៊ីស្រាអែលបានផ្លាស់ប្តូរអ្នកទោសប៉ាឡេស្ទីនរាប់រយនាក់ ជាថ្នូរនឹងការដោះលែងទាហានអ៊ីស្រាអែលម្នាក់ ឈ្មោះ Gilad Shalit ដែលត្រូវបានឃុំខ្លួនអស់រយៈពេល ៥ឆ្នាំ។ ការដោះដូរបែបនោះ ដែលនៅពេលនោះត្រូវបានរិះគន់ដោយជនជាតិអ៊ីស្រាអែល មួយចំនួនថា ជារឿងមិនស្មើភាពនោះ មើលទៅប្រហែលជាការចរចាមួយដែលមិនអាចទៅរួច ព្រោះមានមនុស្សរាប់សិបនាក់ត្រូវបានឃុំខ្លួនដោយក្រុមហាម៉ាស៕

នាយករដ្ឋមន្ត្រីកាណាដា អំពាវនាវឲ្យមានច្រករបៀងមនុស្សធម៌ជាបន្ទាន់ ចូលទៅក្នុងតំបន់ហ្គាហ្សា

នាយករដ្ឋមន្ត្រីកាណាដា លោក ចាស្ទីន ទ្រូដូ (Justin Trudeau)កាលពីថ្ងៃចន្ទ បានអំពាវនាវសុំឲ្យមានច្រករបៀងមនុស្សធម៌មួយត្រូវបានបើកចូលទៅក្នុងតំបន់ហ្គាហ្សាស្ទ្រីប ដោយនិយាយថា ត្រូវការជំនួយជាបន្ទាន់ ដើម្បីដោះស្រាយស្ថានការណ៍កាន់តែអាក្រក់ នៅក្នុងតំបន់ ដែលឡោមព័ទ្ធមានមនុស្ស ២,៣លាននាក់។អ៊ីស្រាអែល ដែលប្រតិកម្មតបទៅនឹងការវាយប្រហារដោយក្រុមហាម៉ាសកាលពីសប្តាហ៍មុន ដែលបានសម្លាប់មនុស្សជាង ១.៣០០ នាក់នោះ បានដាក់តំបន់ហ្គាហ្សា នៅក្រោមការបិទខ្ទប់ទាំងស្រុង និងវាយលុកដែនដីប៉ាឡេស្ទីន ដែលមានមនុស្សដ៏ច្រើនលើសលប់ ដោយការវាយប្រហារតាមអាកាសដែលមិនធ្លាប់មានពីមុនមក។អាជ្ញាធរហ្គាហ្សា បាននិយាយថា ការទម្លាក់គ្រាប់បែកពីលើអាកាសរបស់អ៊ីស្រាអែល បានសម្លាប់មនុស្សជាង ២.៨០០នាក់ ប្រហែលមួយភាគបួននៃពួកគេជាកុមារ និងបានធ្វើឲ្យមនុស្សយ៉ាងហោចណាស់ ១០.000នាក់ផ្សេងទៀត រងរបួស។បន្ថែមពីលើការវាយប្រហារតាមអាកាសនោះ អ៊ីស្រាអែល បាននិយាយថា ខ្លួនគ្រោងនឹងបើកការវាយលុកលើដីដ៏ធំមួយទៅកាន់តំបន់ហ្គាហ្សាភាគខាងជើង ក្នុងគោលបំណងកម្ទេចក្រុមហាម៉ាស ដែលជាកងជីវពលគាំទ្រដោយអ៊ីរ៉ង់ដែលគ្រប់គ្រងដីតំបន់ឆ្នេរដែលវាយដណ្តើមបានពីប្រទេសអេហ្ស៊ីប ដោយអ៊ីស្រា អែល នៅឆ្នាំ១៩៦៧ ។

ទីក្រុងអូតាវ៉ា៖ ការស្ទាក់ចាប់យន្តហោះយោធាប្រទេសកាណាដា ដោយយន្តហោះចិន មិនអាចទទួលយកបាន

រដ្ឋមន្ត្រីក្រសួងការពារជាតិលោក Bill Blair បាននិយាយថា ការស្ទាក់ចាប់យន្តហោះយោធាកាណាដាដោយយន្តហោះចម្បាំងរបស់ចិន នៅលើដែនទឹកអន្តរជាតិកាលពីថ្ងៃចន្ទ មិនអាចទទួលយកបានទេ ដែលគ្រោះថ្នាក់ និងមិនមានការទទួលខុសត្រូវ។ លោកបាននិយាយបន្ទាប់ពី សារព័ត៌មាន Global News របស់កាណាដា និយាយថា យន្តហោះចម្បាំងចិន បានចូលមកក្នុងចម្ងាយ៥ម៉ែត្រពីយន្តហោះស៊ើបការណ៍របស់កាណាដា ដែលកំពុងចូលរួមក្នុងប្រតិបត្តិការអង្គការសហប្រជាជាតិដើម្បីបង្កើនការដាក់ទណ្ឌកម្មលើប្រទេសកូរ៉េខាងជើង។Global News និយាយថា ឧបទ្ទវហេតុ បានកើតឡើងនៅក្នុងដែនទឹកអន្តរជាតិ នៅជិតឆ្នេរសមុទ្រចិន ដែលមានសមាជិកយានិកនៅលើយន្តហោះ។ លោក Blair បាននិយាយថា ខណៈកងកម្លាំងទ័ពអាកាសចិន បានធ្វើអន្តរកម្មជាទៀងទាត់ជាមួយយន្តហោះជាច្រើនលើបេសកម្មអង្គការសហប្រជាជាតិ ដែលឧបទ្ទវហេតុកាលពីថ្ងៃចន្ទ បានដាក់យន្តហោះកាណាដាឲ្យស្ថិតក្នុងហានិភ័យខ្ពស់។លោក Blair និយាយថា លោកពិតជាបារម្ភអំពីមធ្យោបាយគ្មានវិជ្ជាជីវៈ ដែលបញ្ហានេះត្រូវបានធ្វើឡើង។ វាពិតជាគ្រោះថ្នាក់ខ្លាំង និងជាការមិនទទួលខុសត្រូវ ហើយឥរិយាបថបែបនេះពុំអាចទទួលយកបាននោះទេ ហើយយើងនឹងបង្ហាញបញ្ហាទៅដល់សាធារណៈរដ្ឋប្រជាមានិតចិន ក្នុងវិធីសមស្រប។កាលពីខែ មិថុនាឆ្នាំ២០២២ យោធាប្រទេសកាណាដា បានចោទប្រកាន់យន្តហោះចម្បាំងចិន ពីការរំខានយន្តហោះល្បាតរបស់ខ្លួន ខណៈយន្តហោះទាំងនោះ តាមដានការគេចវ៉េសពីទណ្ឌកម្មរបស់ប្រទេសកូរ៉េខាងជើង ដែលពេលខ្លះបង្ខំឲ្យយន្តហោះកាណាដា ត្រូវបង្វៀងផ្លូវហោះហើររបស់ខ្លួន។

លោក Biden គ្រោងជួបលោកនាយករដ្ឋមន្ត្រី បេន ចាមីន ក្នុងដំណើរទស្សនកិច្ចទៅអ៊ីស្រាអែល

អាមេរិក៖ ខណៈអ៊ីរ៉ង់ព្រមាន រដ្ឋមន្ត្រីការបរទេសអាមេរិកលោក Antony Blinken បានប្រកាសកាលពីថ្ងៃអង្គារថាលោកប្រធានាធិបតី Joe Biden នឹងធ្វើទស្សនកិច្ចនៅអ៊ីស្រាអែលនៅថ្ងៃពុធស្អែក ដើម្បីពិភាក្សាជាមួយនាយករដ្ឋមន្ត្រីអ៊ីស្រាអែល Benjamin Netanyahu និងធ្វើឱ្យច្បាស់ថាអ៊ីស្រាអែលមានសិទ្ធិការពារខ្លួន ។លោក Blinken បាននិយាយបន្ទាប់ពីកិច្ចពិភាក្សាដ៏យូរជាមួយលោក Netanyahu ថាលោក Biden នឹងបញ្ជាក់ជាថ្មីនូវសាមគ្គីភាពជាមួយអ៊ីស្រាអែល ដែលត្រូវគេរំពឹងយ៉ាងទូលំទូលាយ ថានឹងចាប់ផ្តើមការវាយលុកលើដីនៅតំបន់ហ្គាហ្សា។ អ៊ីស្រាអែលបានប្តេជ្ញាថានឹងកម្ទេចក្រុមចលនាហាម៉ាសគ្រប់គ្រងតំបន់ហ្គាហ្សាបន្ទាប់ពីក្រុមអ្នកប្រយុទ្ធមួយនេះ បានចូលក្នុងទឹកដីអ៊ីស្រាអែលកាលពីថ្ងៃទី ៧តុលា សម្លាប់មនុស្សចំនួន១.៣០០ នាក់ ដែលភាគច្រើនជាជនស៊ីវិលនៅក្នុងថ្ងៃដ៏អាក្រក់បំផុតក្នុងប្រវត្តិសាស្ត្ររយៈពេល៧៥ឆ្នាំ របស់ប្រទេសនេះ។អ៊ីរ៉ង់ព្រមានអ៊ីស្រាអែល អំពីកំណើនភាពតានតឹងនៃសង្រ្គាមក្នុងតំបន់ ប្រសិនបើការឈ្លានពានមិនបញ្ឈប់លោក Blinken បានប្រាប់ក្រុមអ្នកយកព័ត៌មានបន្ទាប់ពីកិច្ចពិភាក្សាជាច្រើនម៉ោងជាមួយគណៈរដ្ឋមន្ត្រីសង្គ្រាមរបស់អ៊ីស្រាអែលនៅទីក្រុង Tel Aviv ថា លោក Biden នឹងបញ្ជាក់យ៉ាងច្បាស់ថា អ៊ីស្រាអែលមានសិទ្ធិ និងកាតព្វកិច្ចដ៏ពិតប្រាកដដើម្បីការពារប្រជាជនរបស់ខ្លួនពីក្រុមហាម៉ាស និងភេរវករផ្សេងទៀត និងដើម្បីទប់ទល់ការវាយប្រហារនាពេលអនាគត។ ក្នុងអំឡុងការពិភាក្សានោះ លោកត្រូវបានបង្ខំឱ្យស្នាក់នៅក្នុងលេណដ្ឋានមួយ រយៈពេល៥នាទីនៅពេលដែលស៊ីរ៉ែនបានបិទ។លោកបាននិយាយថា អ៊ីស្រាអែលនឹងផ្ដល់របាយការណ៍ជូនលោក Biden អំពីគោលបំណង និងយុទ្ធសាស្ត្រសង្គ្រាមរបស់ខ្លួន និងអំពីរបៀបដែលខ្លួននឹងធ្វើប្រតិបត្តិការ ក្នុងមធ្យោបាយមួយក្នុងការកាត់បន្ថយការស្លាប់ និងរបួសរបស់ជនស៊ីវិល និងអាចឱ្យជំនួយមនុស្សធម៌ហូរទៅកាន់ជនស៊ីវិលនៅតំបន់ ហ្គាហ្សា (Gaza) តាមរបៀបមួយដែលមិនផ្តល់ផលប្រយោជន៍ដល់ក្រុមហាម៉ាស។លោកBlinken បាននិយាយថា សហរដ្ឋអាមេរិក និងអ៊ីស្រាអែល បានព្រមព្រៀងបង្កើតផែនការមួយ ដែលនឹងអនុញ្ញាតឱ្យជំនួយមនុស្សធម៌ពីប្រទេសម្ចាស់ជំនួយ និងអង្គការជាច្រើន អាចចូលទៅដល់ជនស៊ីវិលនៅតំបន់ហ្គាហ្សា៕

អ៊ីរ៉ង់ព្រមានពីការត្រៀមខ្លួនជាស្រេចដើម្បីធ្វើសកម្មភាពប្រឆាំងអ៊ីស្រាអែល

អ៊ីរ៉ង់៖ កាលពីថ្ងៃចន្ទប្រទេសអ៊ីរ៉ង់ បានព្រមានពីសកម្មភាពត្រៀមខ្លួនជាស្រេចប្រឆាំងអ៊ីស្រាអែល ក្នុងរយៈពេលប៉ុន្មានម៉ោងខាងមុខនេះ ខណៈប្រទេសអ៊ីស្រាអែលត្រៀមការវាយលុកតាមដីគោកទៅលើតំបន់ហ្គាហ្សា។ទីក្រុងតេអេរ៉ង់ បានព្រមានម្តងហើយម្តងទៀត ថាការវាយលុកតាមដីគោកនៅតំបន់ហ្គាហ្សាដែលត្រូវបានរារាំងរយៈពេលយូរ នឹងត្រូវបំពេញដោយការឆ្លើយតបពីសមរភូមិផ្សេងទៀត ដែលកំពុងជំរុញឲ្យមានការព្រួយបារម្ភ ពីជម្លោះកាន់តែរីកធំ ដែលអាចទាញឲ្យធ្លាក់ចូលជម្លោះក្នុងប្រទេសផ្សេងទៀត។ រដ្ឋមន្ត្រីការបរទេសអ៊ីរ៉ង់លោក Hossein Amir-Abdollahian បាននិយាយនៅក្នុងការផ្សាយផ្ទាល់តាមទូរទស្សន៍រដ្ឋ ខណៈលោកនិយាយយោងទៅរកជំនួបរបស់លោកជាមួយមេដឹកនាំក្រុម Hezbollah លោក Hassan Nasrallah ថាលទ្ធភាពនៃការត្រៀមខ្លួនជាស្រេចដើម្បីធ្វើសកម្មភាព ដោយសម្ព័ន្ធមិត្តប្រឆាំង ត្រូវបានគេរំពឹងថា នឹងកើតមានក្នុងរយៈពេលប៉ុន្មានម៉ោងខាងមុខ។កាលពីព្រឹកថ្ងៃចន្ទអ្នកការទូតជាន់ខ្ពស់អ៊ីរ៉ង់ និងប្រធានាធិបតីលោក Ebrahim Raisi បាននិយាយថា ពេលវេលាអស់ហើយដើម្បីឈានដល់ដំណោះស្រាយនយោបាយ និងបានព្រមានប្រឆាំងការរីកកាន់តែធំសង្គ្រាមអ៊ីស្រាអែល-ក្រុមហាម៉ាស់ ទៅកាន់សមរភូមិមុខដ៏ទៃទៀត។ លោក Amir-Abdollahian បាននិយាយកាលពីថ្ងៃចន្ទថាមេដឹកនាំដ៏រឹងរុស នឹងមិនអនុញ្ញាតឲ្យអ៊ីស្រាអែលធ្វើអ្វីក៏ដោយដែលខ្លួនចង់ធ្វើនៅក្នុងតំបន់ហ្គាហ្សានោះទេ។ ប្រសើនបើយើងមិនការពារតំបន់ហ្គាហ្សានៅថ្ងៃនេះ ថ្ងៃស្អែកយើងត្រូវតែការពារប្រឆាំង គ្រាប់បែកផូស្វ័រ នៅមន្ទីរពេទ្យកុមារនៅប្រទេសផ្ទាល់របស់យើង។អ៊ីរ៉ង់ បានសាទរការវាយប្រហាររបស់ក្រុមហាម៉ាស់ ប៉ុន្តែបានទទូចថា ខ្លួនមិនជាប់ពាក់ព័ន្ធក្នុងជម្លោះនេះទេ៕

បណ្ដាញសង្គម

ព័ត៌មានថ្មីៗ

កិច្ចប្រជុំលើកដំបូងនៃគណៈកម្មការផ្សះផ្សាកម្ពុជា-ថៃ ក្រោមអនុសញ្ញា UNCLOS នឹងប្រព្រឹត្តទៅពីថ្ងៃទី១៤-១៦ ខែកញ្ញា

ពិធីចុះហត្ថលេខាលើកិច្ចព្រមព្រៀងហិរញ្ញប្បទានសម្រាប់គម្រោងគ្រប់គ្រងធនធានទឹកចម្រុះហ្វូណនតេជោ (BOT)

វិមានក្រឹមឡាំង៖ រុស្ស៊ីសង្ឃឹមថា កិច្ចប្រជុំសម្របសម្រួលដោយអាមេរិកជាមួយអ៊ុយក្រែន នឹងចាប់ផ្តើមឡើងវិញ ក្នុងពេលឆាប់ៗនេះ

គណបក្សប្រឆាំងដ៏ធំរបស់ជប៉ុន ប្រកាសរំលាយ ក្រោយបង្កើតបានរយៈពេល ៨ខែ

ឥណ្ឌូនេស៊ី ស្វែងរកអ្នកសារព័ត៌មានបាត់ខ្លួន ក្រោយពេលពួកគេធ្វើសេចក្តីរាយការណ៍ពីបន្ទុះភ្នំភ្លើង Anak Krakatau

អ៊ីរ៉ង់សងសឹកអាមេរិកជាមួយការវាយប្រហារលើនាវាដឹកប្រេងរបស់ទីក្រុងវ៉ាស៊ីនតោន

ការវាយប្រហាររបស់រុស្ស៊ីសម្លាប់មនុស្សម្នាក់ និងធ្វើឲ្យខូចខាតកំពង់ផែនៅទីក្រុង Mykolaivរបស់អ៊ុយក្រែន

មនុស្ស ៤នាក់ស្លាប់ ក្រោយការវាយប្រហារយានដ្រូនអ៊ុយក្រែនលើទីក្រុង Novorossiysk របស់រុស្ស៊ី

ប្រធានាធិបតីស៊ែប៊ី បញ្ជាក់ថា ការបោះឆ្នោតសភា នឹងត្រូវបានធ្វើនៅថ្ងៃទី២៥ ខែតុលា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877