BTV NEWS

អាវុធហត្ថរាជធានីភ្នំពេញ បង្ក្រាបគ្រឿងញៀនជាង ៦គីឡូក្រាមឃាត់ខ្លួនមនុស្ស ១១នាក់

ជនជាតិខ្មែរ និងបរទេសជិត ៥ពាន់នាក់ ត្រូវជាប់ឃុំ ខណៈមន្ត្រីនគរបាល ៧៧នាក់ ត្រូវវិន័យធ្ងន់ធ្ងរដោយសារ Online Scams

នគរបាលរាជធានីឃាត់ខ្លួនបុរសម្នាក់ បែកធ្លាយសម្លេងតាមបណ្តាញសង្គម ម៉ាក់ងាយធ្ងន់ធ្ងរលើវីរជនកងទ័ពកម្ពុជា

កម្លាំងសមត្ថកិច្ចឃាត់ខ្លួនជនជាតិចិនចំនួន០៧នាក់ និងដកហូតសារធាតុញៀនជិត១តោន រួមទាំងអាវុធវែងខ្លីជាច្រើនដើម

សន្តិសុខ និង សង្គម

តម្លៃបន្លែនៅប្រទេសឥណ្ឌាកើនឡើងខ្ពស់ដោយសារបញ្ហាអាកាសធាតុ

ឥណ្ឌា៖ បញ្ហាអាកាសធាតុដ៏ធ្ងន់ធ្ងរកំពុងវាយលុកប្រទេសឥណ្ឌា ដែលសីតុណ្ហភាពហក់ឡើងខ្ពស់ជាបន្តបន្ទាប់ ព្រមទាំងភ្លៀងធ្លាក់ខ្លាំងបានធ្វើឱ្យបញ្ហាប្រឈមក្នុងការផលិត និងដឹកជញ្ជូនអាហារនៅប្រទេសនេះកាន់តែធ្ងន់ធ្ងរ បណ្ដាឱ្យតម្លៃបន្លែ និងផ្លែឈើឡើងថ្លៃខ្ពស់។ ចាប់តាំងពីដើមខែមិថុនាមក ប្រទេសឥណ្ឌាបានទទួលរងនូវអាកាសធាតុក្តៅខ្លាំង ជាមួយនឹងសីតុណ្ហភាពលើសពី៤០អង្សាសេនៅក្នុងតំបន់ជាច្រើន។ការលិចលង់ និងទឹកជំនន់ គួបផ្សំនឹងសីតុណ្ហភាពខ្ពស់ផងនោះ បានកាត់បន្ថយទិន្នផលដំណាំ ខណៈដែលភ្លៀងធ្លាក់ខ្លាំងបានរំខានដល់ការដឹកជញ្ជូន ដោយសារស្ពាន និងផ្លូវត្រូវជន់លិចដោយទឹកជំនន់ ដែលបង្កការលំបាកយ៉ាងខ្លាំងដល់កសិករក្នុងការថែរក្សាបន្លែ និងផ្លែឈើដែលខូចគុណភាព។ដោយសារទិន្នផលត្រូវបានកាត់បន្ថយ ហើយការដឹកជញ្ជូនអាហារកាន់តែពិបាក តម្លៃបន្លែទូទៅរួមមាន ស្ពៃខ្មៅ ស្ពៃក្តោប និងននោង បានកើនឡើងយ៉ាងឆាប់រហ័ស។តម្លៃលក់រាយរបស់ប៉េងប៉ោះ ដែលជាមុខម្ហូបទូទៅមួយក្នុងគ្រួសារឥណ្ឌាបានកើនឡើង ដោយតម្លៃធម្មតាគឺចាប់ពី៥រូពី ទៅ១០រូពីក្នុងមួយគីឡូក្រាម (ចន្លោះពី ០,០៦ ទៅ ០,១២ ដុល្លារអាមេរិក) តែពេលនេះឡើងដល់១០០រូពី (ប្រហែល១,២២ដុល្លារអាមេរិក) ក្នុងមួយគីឡូក្រាម។យោងតាមការព្យាករណ៍របស់នាយកដ្ឋានឧតុនិយមឥណ្ឌា (IMD) ខ្យល់មូសុងនឹងនាំមកនូវភ្លៀងធ្លាក់បន្ថែមទៀតដល់រដ្ឋជាច្រើននៅទូទាំងប្រទេសឥណ្ឌា។ ជាមួយនឹងភ្លៀងធ្លាក់ខ្លាំងដែលរំពឹងថានឹងស្រោចស្រពលើតំបន់មួយចំនួន រួមទាំងតំបន់ភាគខាងលិច ភាគខាងកើត និងភាគឦសាន ដោយតម្លៃបន្លែ និងផ្លែឈើទំនងជានឹងកើនឡើងខ្ពស់ជាងនេះទៀត៕

ហេតុការណ៍បាញ់ប្រហារនៅបារាំងបង្ហាញពីបញ្ហាប្រឈមថ្មីសម្រាប់លោក ម៉ាក្រុង

បារាំង៖ ការបាញ់សម្លាប់យុវជនម្នាក់ ដែលជាពលរដ្ឋបារាំងមានដើមកំណើតអាល់ហ្សេរី និងម៉ារ៉ុក ដោយមន្ត្រីនគរបាលនៅខាងក្រៅទីក្រុងប៉ារីស បានបញ្ឆេះរលកនៃការតវ៉ាដ៏ហិង្សា ដែលធ្វើឲ្យលោកប្រធានាធិបតីបារាំង អ៊ីម៉ានុយអែល ម៉ាក្រុង (Emmanuel Macron) ប្រឈមមុខជាថ្មីម្តងទៀតជាមួយនឹងភាពចលាចលនៅតាមដងផ្លូវ និងបានធ្វើឱ្យមានការចោទប្រកាន់ឡើងវិញ អំពីការរើសអើងជាតិសាសន៍នៅក្នុងបណ្ដាទីភ្នាក់ងារអនុវត្តច្បាប់របស់ប្រទេសបារាំង។ភាពច្របូកច្របល់ពីការបាញ់ប្រហាររបស់នគរបាលទៅលើយុវជនវ័យ១៧ឆ្នាំម្នាក់នៅជាយក្រុងភាគខាងលិចនៃទីក្រុងNanterre ( ណង់ទែរ) កាលពីថ្ងៃអង្គារ បានកើតឡើងតែប៉ុន្មានសប្តាហ៍បន្ទាប់ពីការធ្វើបាតុកម្មទូទាំងប្រទេសជុំវិញការសម្រេចចិត្តរបស់លោក ម៉ាក្រុង ក្នុងការបង្កើនអាយុចូលនិវត្តន៍ ដោយធ្វើឲ្យមេដឹកនាំបារាំងរូបនេះជួបជាមួយនឹងរលកនៃកំហឹងដ៏ខ្លាំងក្លាជាថ្មីម្ដងទៀត។មនុស្សជាង៤០០នាក់ ត្រូវបានចាប់ខ្លួន និងមន្ត្រី១៧០នាក់ បានរងរបួសក្នុងអំឡុងពេលការតវ៉ាកាលពីយប់ថ្ងៃពុធ។ លោក ហ្សេនរ៉ាល់ ដាម៉ាណាំង (Gerald Darmanin) រដ្ឋមន្ត្រីក្រសួងមហាផ្ទៃ មានជំហរប្រកាន់តឹងរបស់ប្រទេសនះ បាននិយាយថា នគរបាលចំនួន ៤០.០០០ នាក់នឹងត្រូវដាក់ពង្រាយនៅទូទាំងប្រទេស។សម្រាប់លោក ម៉ាក្រុង ដែលចូលចិត្តដាក់ខ្លួនជាកណ្តាលនិយមក្នុងនយោបាយបារាំង ប៉ុន្តែពុំមានសំឡេងភាគច្រើនដាច់ខាតនៅក្នុងសភានោះ ហេតុការណ៍នេះ បានបង្ខំលោកឱ្យធ្វើការសម្រេចក្នុងជំហរថ្លឹងថ្លែងដ៏សមស្របមួយ។ជាលទ្ធផល នៅពេលដែលការតវ៉ាផ្ទុះឡើង កំហឹងរបស់ប្រជាជនបារាំងមានទំនោរនឹងកើនឡើងទ្វេដងទៅលើលោកប្រធានាធិបតី ម៉ាក្រុង បន្ថែមទៀត៕

សេតវិមានគ្របដណ្តប់ដោយផ្សែង ខណៈពេលដែលភ្លើងឆេះព្រៃកាណាដានៅតែបន្តឆាបឆេះ

អាមេរិក៖ កាលពីថ្ងៃព្រហស្បតិ៍ម្សិលមិញ សេតវិមានត្រូវបានគ្របដណ្តប់ដោយផ្សែងហុយពីចំហេះព្រៃ ពេលដែលភ្លើងឆេះព្រៃកាណាដា នៅតែបន្តឆាបឆេះ ក្នុងនោះខ្យល់បក់បាននាំខ្យល់កខ្វក់ឆ្ពោះទៅកាន់ទីក្រុងវ៉ាស៊ីងតោនផងដែរ ។ ការប្រកាសអាសន្នពគុណភាពខ្យល់បង្កឡើងដោយសារតែផ្សែងអណ្តែតពីភ្លើងឆេះព្រៃនៅប្រទេសកាណាដា បានចូលជាធរមាននៅរដ្ឋ New York New Jersey, Pennsylvania, Washington, D.C និងតំបន់ជាច្រើនទៀតនៃរដ្ឋ សោត ការ៉ូឡៃណា។ ប្រជាពលរដ្ឋអាមេរិកជាង ១០០លាននាក់ បានប្រឈមនឹងគុណភាពខ្យល់មិនល្អកាលពីរសៀលថ្ងៃពុធ ។ គួរឲ្យដឹងថា ប្រទេសកាណាដា កំពុងទប់ទល់នឹងការចាប់ផ្តើមដ៏អាក្រក់បំផុតពុំធ្លាប់មានពីមុនមកនៃរដូវភ្លើងឆេះព្រៃ ដែលបានឆាបឆេះផ្ទៃដីព្រៃ ៨លានហិចតារួចទៅហើយ គឺជាផ្ទៃក្រឡាមួយធំជាងរដ្ឋ West Virginia ទៅទៀត ។ កាលពីថ្ងៃពុធ មាននូវភ្លើងឆេះព្រៃ ៤៧៧កន្លែង ក្នុងនោះប្រហែលពាក់កណ្តាលលែងអាចគ្រប់គ្រងបានទៀតហើយ ដោយវាកំពុងឆាបឆេះរាលដាលចាប់ពីតំបន់ឆ្នេរសមុទ្រប៉ាស៊ីហ្វិក រហូតដល់តំបន់ឆ្នេសមុទ្រអាត្លង់ទិក ៕

ការសិក្សាបង្ហាញពីការបន្តធ្លាក់ចុះចំនួនត្រីបាឡែនពណ៌ប្រផេះនៅតំបន់ឆ្នេរសមុទ្រប៉ាស៊ីហ្វិករបស់អាមេរិកខាងជើង

អាមេរិកខាងជើង៖ ក្រុមអ្នកវិទ្យាសាស្រ្ត រាយការណ៍ថា នៅឆ្នាំនេះពពួកត្រីមាឡែនពណ៌ប្រផេះ នៅតាមតំបន់ឆ្នេរប៉ាស៊ីហ្វិករបស់អាមេរិកខាងជើង បានធ្លាក់ចុះដល់ចំនួនទាបបំផុត ចាប់តាំងពីចុងទសវត្សរ៍ឆ្នាំ ១៩៦០ ហើយនិងទសវត្សរ៍ឆ្នាំ ១៩៧០ ប៉ុន្តែពួកគេបានបង្ហាញពីសញ្ញាមានសង្ឃឹមតិចតួចពីកំណើនចំនួនកូនចាប់កំណើត និងត្រីបាឡែនដែលមានសុខភាពជាងមុន ។ ត្រីបាឡែនពណ៌ប្រផេះ គឺជាសមាសធាតុដ៏សំខាន់មួយនៃប្រព័ន្ធអេកូឡូស៊ីនៅតំបន់ឆ្នេរភាគខាងលិច ដែលគេអាចមើលឃើញពួកវាពីតំបន់ឆ្នេរ ពេលដែលពួកវាធ្វើបម្លាស់ទីចម្ងាយរាប់ពាន់ម៉ៃល៍ទៅវិញ-ទៅមករវាងដែនទឹក Alaskanនឹងបឹងទឹកប្រៃ Baja California Surនៅប្រទេសម៉ិកស៊ិក ជាទីដែលពួកវាបង្កបង្កើតកូន និងរកឃើញដៃគូ ។ ក្រុមអ្នកជំនាញនិយាយថា ការធ្លាក់ចុះចំនួនត្រីបាឡែននេះ ត្រូវបានគេជឿថាមានការជាប់ពាក់ព័ន្ធនឹងប្រភពចំណីតិចតួចរបស់វា បន្ថែមពីលើកត្តារបស់មនុស្សដូចជាការបុកជាមួយនាវា និងជាប់ក្នុងសំណាញ់នេសាទ ។ រដ្ឋបាលបរិយាកាស និងមហាសមុទ្រជាតិ បាននិយាយនៅក្នុងរបាយការណ៍ដែលបានចុះផ្សាយកាលពីថ្ងៃអង្គារថា ការប៉ាន់ស្មានកាលពីពេលថ្មីៗនេះពីចំនួនរបស់ត្រីបាឡែនពណ៌ប្រផេះ ១៤.៥២៦ក្បាល ថាបានធ្វើបម្លាស់ទីកទៅភាគខាងត្បូងអំឡុងឆ្នាំ ២០២២-២០២៣ ពោលគឺជាចំនួនប្រហែលនឹងឆ្នាំ ១៩៦៨-១៩៧០ ដែលស្ថិតក្នុងចំណោមចំនួនទាបបំផុត ចាប់តាំងពីការកត់ត្រាចាប់ផ្តើមនៅក្នុងឆ្នាំ ១៩៦៧ ៕

ជនរងគ្រោះដោយសារទឹកជំនន់នៅឥណ្ឌា ជួបការពិបាកខ្លាំងដោយសារផ្ទះសម្បែង និងដំណាំរបស់ពួកគេបន្តជន់លិច

ឥណ្ឌា៖ ជនរងគ្រោះដោយសារទឹកជំនន់នៅរដ្ឋភាគឦសាន Assam ប្រទេសឥណ្ឌា ពិបាករស់រានខ្លាំងណាស់ ពេលដែលផ្ទះសម្បែងរបស់ពួកគេនៅតែបន្តជន់លិច ហើយដំណាំត្រូវបានហូរនាំយកទៅអស់ ដោយសារទឹកជំនន់ ។ សារព័ត៌មាន បានរាយការណ៍កាលពីថ្ងៃព្រហស្បតិ៍ថា មនុស្សយ៉ាងហោច ៧នាក់ បានស្លាប់នៅក្នុងរដ្ឋមួយនេះ ស្របពេលដែលស្រុកចំនួន ១២នៅបន្តរងផលប៉ះពាល់ ។ រដូវមូសុងវស្សាមានភ្លៀងធ្លាក់ខ្លាំង កើតមានប្រចាំឆ្នាំនៅរដ្ឋ Assam ធ្វើឲ្យជន់លិច និងកើតមានបំណាក់ដី បង្ខំឲ្យប្រជាពលរដ្ឋរត់ភៀសខ្លួនចេញពីផ្ទះសម្បែងរបស់ពួកគេ ទុកចោលទ្រព្យសម្បត្តិរបស់ខ្លួន។ ប្រជាពលរដ្ឋក្នុងស្រុក Barpeta ជាទីដែលមានមនុស្សប្រហែល ៤៣.០០០នាក់ រងផលប៉ះពាល់ មិនត្រឹមតែបាត់បង់ផ្ទះសម្បែងរបស់ពួកគេប៉ុណ្ណោះទេ ប៉ុន្តែដំណាំ និងដីស្រែចម្ការផងដែរ ធ្វើឲ្យពួកគេគ្មានប្រភពប្រាក់ចំណូលទៀតឡើយ ។ ទន្លេ Brahmaputra(ព្រហ្មបុត្រ) ដែលស្ថិតនៅក្នុងចំណោមទន្លេវែងបំផុតនៅលើពិភពលោក ហើយទឹករបស់វាបានប្រៀបច្រាំងនៅរដ្ឋ Assam នោះ បានជន់លិចភូមិឋានប្រជាពលដ្ឋជាច្រើនកន្លែង ហើយនិងធ្វើឲ្យប៉ះពាល់ដល់អ្នកស្រុកក្នុងរដ្ឋរាប់ម៉ឺននាក់ ៕

WHO៖ អ្នកដែលនិយមចូលចិត្តរបស់មានជាតិផ្អែម អាចប្រឈមនឹងហានិភ័យនៃជំងឺមហារីក

WHO៖ យោងតាមរបាយការណ៍ថ្មី បានឲ្យដឹងថា របស់មានជាតិផ្អែមសិប្បនិម្មិតប្រើប្រាស់នៅក្នុងផលិតផលរាប់ពាន់មុខនៅទូទាំងពិភពលោក រួមទាំងកូកាកូឡា ការ៉េមកី និងស្កកៅស៊ូ ត្រូវបានគេប្រកាសថា គឺជាហានិភ័យនៃជំងឺមហារីកដល់មនុស្ស ។ ទីភ្នាក់ងារស្រាវជ្រាវជំងឺមហារីកអន្តរាជាតិ(IARC)របស់អង្គការសុខភាពពិភពលោក(WHO) បានពិនិត្យមើលសុវត្ថិភាពរបស់មានជាតិផ្អែមទាំងនេះ ហើយពួកគេនិងចេញរបាយការណ៍នៅខែក្រោយ ។ ទីភ្នាក់ងារព័ត៌មានរ៉យទ័រ បានរាយការណ៍កាលពីថ្ងៃព្រហស្បតិ៍ថា ពួកគេនឹងរៀបចំដាក់ស្លាកសារធាតុផ្អែមដែលអាចបង្កជាជំងឺមហារីកដល់មនុស្ស ។ វានឹងមានន័យថា មានភស្តុតាងមួយចំនួនដែលពាក់ព័ន្ធនឹងរបស់មានជាតិផ្អែមជាមួយជំងឺមហារីក ។ ទោះបីជាយ៉ាងណាក៏ដោយ របាយការណ៍នេះ ទំនងជានាំឲ្យកើតមានជម្លោះ ។ ទីភ្នាក់ងារ IARC បានប្រឈមការរិះគន់រួចទៅហើយសម្រាប់ការធ្វើឲ្យមានការប្រុងប្រយ័ត្នចំពោះសារធាតុ ឬស្ថានភាពពិបាកជៀសបែបនេះ ។ កាលពីមុនពួកគេធ្លាប់និយាយដែរថា ការធ្វើការពេលយប់ និងប្រើប្រាស់សាច់ក្រហម ត្រូវបានចាត់ថ្នាក់ថាបណ្តាលឲ្យមានជំងឺមហារីក ហើយនិងបានចុះបញ្ជីការប្រើប្រាស់ទូរស័ព្ទដៃ ថាអាចបណ្តាលឲ្យកើតមានជំងឺមហារីកទៀតផង ៕

គណៈវិនិច្ឆ័យសម្រេចឲ្យអតីតស្នងការរងរដ្ឋផ្លរីដារួចទោស ពាក់ព័ន្ធនឹងករណីមិនបានការពារសិស្ស ក្នុងការបាញ់ប្រហារ នៅផាកឡែន

អាមេរិក៖ គណៈវិនិច្ឆ័យនៃរដ្ឋផ្លរីដា (Florida) កាលពីព្រហស្បតិ៍ (ទី២៩ ខែមិថុនា) បានសម្រេចឲ្យអតីតស្នងការរង ដែលត្រូវបានចោទប្រកាន់ពីបទបរាជ័យក្នុងការការពារសិស្ស អំឡុងការបាញ់ប្រហារដ៏ធំឆ្នាំ២០១៨ នៅវិទ្យាល័យ Marjory Stoneman Douglas ក្នុងទីក្រុងផាកឡែន (Parkland)។លោក Scot Peterson ដែលជាមន្ត្រីធានាសុវត្ថិភាពតាមសាលារៀនដែលកំពុងបំពេញភារកិច្ច នៅពេលដែលខ្មាន់កាំភ្លើង បានចូលអគារ កាលពីថ្ងៃទី១៤ ខែកុម្ភៈ ឆ្នាំ២០១៨ ហើយបានបាញ់សម្លាប់មនុស្ស ១៧នាក់ និងរបួស ១៧នាក់ទៀត ត្រូវបានចោទប្រកាន់ចំនួន ១១ករណីពីបទមិនអើពើនឹងក្មេងៗ ជាការធ្វេសប្រហែស និងភូតកុហកដែលអាចមានទោស។លោក Peterson វ័យ ៦០ឆ្នាំ បានឈ្ងោកក្បាលនៅលើតុ និងយំខ្សឹកខ្សួលជាមួយភាពធូរស្រាលក្នុងទ្រូង នៅពេលដែលចៅក្រមអានសាលក្រមលឺៗពីភាព «មិនមានទោសកំហុស» ចំពោះករណីនីមួយៗ។ សាលក្រមរបស់គណៈវិនិច្ឆ័យនេះ បាននាំឲ្យរូបលោករួចផុតពីការចោទប្រកាន់ ដែលអាចឲ្យរូបលោកជាប់ពន្ធនាគារដល់ទៅ ៩៧ឆ្នាំ។នៅក្នុងសេចក្តីថ្លែងការណ៍មួយ ការិយាល័យមន្ត្រីក្រសួងយុត្តិធម៌រដ្ឋ Broward ដែលបានលើកយកករណីនេះឡើងមក បាននិយាយឡើងវិញនូវអំណះអំណាងរបស់ខ្លួនថា លោក Peterson អាចធ្វើអ្វីបានច្រើនជាងនេះ ដើម្បីការពារសមាជិកនៃសហគមន៍សាលា ហើយថា ភាពអសកម្មរបស់លោក «មានផលប៉ះពាល់យ៉ាងធ្ងន់ធ្ងរ» លើជនរងគ្រោះ។ ឪពុកម្តាយជនរងគ្រោះមួយចំនួនដែលបានចូលរួមសវនាការ ក៏សម្ដែងការខកចិត្ត ចំពោះការសម្រេចនេះដែរ។យោងតាមការិយាល័យនគរបាលស្រុក Broward និងវីដេអូឃ្លាំមើល លោក Peterson មានអាវុធនៅក្នុងដៃ ប៉ុន្តែមិនដែលចូលទៅខាងក្នុងនោះឡើយ ខណៈពេលដែលការបាញ់ប្រហារកំពុងប្រព្រឹត្តទៅ។ លោកគឺជាមន្ត្រីអនុវត្តច្បាប់មួយរូបក្នុងចំណោមមន្ត្រីអនុវត្តច្បាប់មួយចំនួន ដែលធ្លាប់ត្រូវបានកាត់ទោសពីបទមិនចាត់វិធានការ ឬផ្តល់ការថែទាំ៕

យានិកអ៊ីតាលីត្រឡប់មកដល់ផែនដីវិញ បន្ទាប់ពីមានការហោះហើរពាណិជ្ជកម្មលើកដំបូងដ៏មិនគួរឲ្យជឿរបស់យានចម្លង Virgin Galactic

អ៊ីតាលី៖ អាកាសយានិកបុរស ៣រូបមកពីប្រទេសអ៊ីតាលី បានហោះឡើងចម្ងាយជាង ៥០ម៉ាយល៍ (៨០គីឡូម៉ែត្រ) ពីលើវាលខ្សាច់របស់រដ្ឋញូវម៉ិកស៊ីកូ (New Mexico) សហរដ្ឋអាមេរិក កាលពីថ្ងៃព្រហស្បតិ៍ (ទី២៩ ខែមិថុនា) នៅលើយន្តហោះរ៉ុក្កែតរបស់ក្រុមហ៊ុន Virgin Galactic ដែលជាការហោះហើរលើកដំបូងរបស់ក្រុមហ៊ុនដោយការបង់ប្រាក់ពីអតិថិជន ដែលធ្វើដំណើរទៅកៀកនឹងទីអវកាស គិតចាប់តាំងពីមហាសេដ្ឋីអង់គ្លេសលោក Richard Branson បានបង្កើតក្រុមហ៊ុននេះ ក្នុងឆ្នាំ២០០៤។មន្ត្រីកងទ័ពអាកាសអ៊ីតាលី ២នាក់ និងវិស្វករអវកាសមកពីក្រុមប្រឹក្សាស្រាវជ្រាវជាតិ (CNR) របស់ប្រទេសអ៊ីតាលី បានជិះយានអវកាសលំដាប់ទី២ រយៈពេលខ្លីជាមួយសមាជិកយានិកករបស់យន្តហោះរ៉ុក្កែត Virgin Galactic ៣នាក់ ដែលក្នុងនោះ ២នាក់ បានបើកយាន VSS Unity នៅពេលដែលយាននោះ ត្រូវបានបាញ់បង្ហោះ ក្នុងរយៈកំពស់យ៉ាងខ្ពស់ពីផ្ទៃនៃយានតួភ្លោះ ដែលដឹកយន្តហោះរ៉ុក្កែតនោះ។វិស្វករអវកាសមកពីក្រុមប្រឹក្សាស្រាវជ្រាវជាតិ (CNR) លោក Pantaleone Carlucci បាននិយាយក្នុងអំឡុងសន្និសីទសារព័ត៌មានថា៖ «វាពិតជាមិនគួរជឿសោះ។ ការបង្កើនល្បឿន ការហោះឡើង និងបន្ទាប់មក មីក្រូទំនាញ ហើយខ្ញុំត្រូវផ្តោតអារម្មណ៍ជាមួយនឹងការធ្វើតេស្តសាកល្បងរបស់ខ្ញុំ ជាមួយនឹងក្តារបន្ទះទ្រាប់ជង្គង់របស់ខ្ញុំ ប៉ុន្តែខ្ញុំក៏ឆ្លៀតឱកាសមើលទៅខាងក្រៅដែរ ហើយទិដ្ឋភាពគឺអស្ចារ្យណាស់»។ប្រមាណជា ៧៥នាទីបន្ទាប់ពីការចាកចេញពីដីជាមួយនឹងយានមេ យានអវកាស VSS Unity បានហោះត្រឡប់មកកាន់ចំណុចចាប់ផ្តើមវិញ ដោយសុវត្ថិភាពលើផ្លូវរត់នៅឯ Spaceport America ដែលជាអគារគ្រប់គ្រងដោយរដ្ឋ នៅជិតទីក្រុង Truth or Consequences របស់រដ្ឋញូវម៉ិកស៊ីកូ (New Mexico)៕

ការខូចខាតដោយទឹកជំនន់ធ្ងន់ធ្ងរ បណ្តាលឲ្យរថយន្តដឹកទំនិញរាប់ពាន់គ្រឿងនៅជាប់គាំងនៅព្រំដែនឈីលី-អាហ្សង់ទីន

ឈីលី-អាហ្សង់ទីន៖ រថយន្តដឹកទំនិញរាប់ពាន់គ្រឿង បានជាប់គាំងនៅជិតព្រំដែនប្រទេសឈីលីនិងអាហ្សង់ទីន បន្ទាប់ពីមានភ្លៀងធ្លាក់ខ្លាំង ហើយព្យុះព្រិលបានបណ្តាលឱ្យមានការបំផ្លាញរចនាសម្ព័ន្ធផ្លូវថ្នល់ ដែលតភ្ជាប់ប្រទេសទាំងពីរ។ ទិដ្ឋភាពពីយានដ្រូន បានបង្ហាញរថយន្តដឹកទំនិញរាប់សិបគ្រឿង បានចតនៅតាមដងផ្លូវ ខណៈអ្នកបើកបររង់ចាំការឆ្លងកាត់ព្រំដែនបើកឡើងវិញ។ អ្នកបើកបរទាំងនេះ មួយចំនួនបានជាប់គាំងជាច្រើនថ្ងៃមកហើយ។យោងតាមការរាយការណ៍ក្នុងតំបន់បានឲ្យដឹងថា រថយន្តដឹកទំនិញប្រមាណ ២.០០០ គ្រឿង ត្រូវបានប្រជ្រៀតនៅខាងប្រទេសឈីលីរង់ចាំឆ្លងកាត់ព្រំដែន។ អាជ្ញាធរក្នុងតំបន់ជឿថា វាអាចមានរយៈពេលប្រាំពីរថ្ងៃទៀត មុនពេលព្រំដែនបើកឡើងវិញ។ ភ្លៀងធ្លាក់ខ្លាំង ដែលបានស្រោចស្រពមកលើប្រទេសឈីលីចាប់តាំងពីសប្តាហ៍មុន បានបំផ្លាញតំបន់ជាច្រើន បណ្តាលឣោយផ្ទៃដីពេញដោយភក់ល្បាប់ ជន់លិចភូមិឋាន បំផ្លាញលំនៅឋាន និងផ្លូវថ្នល់៕

រដ្ឋាភិបាល៖ កម្តៅឡើងហក់ឡើងខ្ពស់ សម្លាប់មនុស្សជាង ១០០នាក់ នៅម៉ិកស៊ិក

ម៉ិកស៊ិក៖ រដ្ឋាភិបាលបានឲ្យដឹងថា មនុស្សជាង ១០០នាក់ បានស្លាប់ដោយសារតែកម្ដៅឡើងក្ដៅខ្លាំង នៅប្រទេសម៉ិកស៊ិក ក្នុងខែមិថុនានេះ បន្ទាប់ពីមានរលកកំដៅជាបន្តបន្ទាប់ នៅក្នុងប្រទេសអាមេរិកឡាទីនមួយនេះ ស្របពេលដែលអ្នកវិទ្យាសាស្ត្រនិយាយថា ការឡើងកម្ដៅផែនដីកំពុងធ្វើឲ្យអាកាសធាតុកាន់តែអាក្រក់ទៅៗ ដោយប្រទេសជាច្រើនជួបប្រទះនូវសីតុណ្ហភាពខ្ពស់បំផុត។បើយោងតាមតួលេខរបស់ក្រសួងសុខាភិបាល ដែលចេញផ្សាយ កាលពីថ្ងៃពុធ (28 មិថុនា) ការជួយសង្គ្រោះបន្ទាន់ទាក់ទងនឹងកម្ដៅជាង ១.០០០ករណី ត្រូវបានរាយការណ៍នៅក្នុងប្រទេសម៉ិកស៊ិក ចន្លោះពីថ្ងៃទី១២ ខែមិថុនា ដល់ថ្ងៃទី២៥ ខែមិថុនា ដែលក្នុងនោះ ១០៤ករណី បានបណ្តាលឲ្យមានការបាត់បង់ជីវិត។អាជ្ញាធរបានរាយការណ៍ថា មានអ្នកស្លាប់ចំនួន ៨នាក់រួចហើយ នៅចន្លោះថ្ងៃទី១៤ ខែមេសា ដល់ថ្ងៃទី៣១ ខែឧសភា ដែលនាំឲ្យចំនួនសរុបកើនឡើងដល់ ១១២នាក់ ហើយបើតាមក្រសួងសុខាភិបាលបានឲ្យដឹងថា មូលហេតុចម្បងនៃការស្លាប់នោះ គឺដាច់សរសៃឈាមដោយសារក្ដៅខ្លាំង និងបន្ទាប់មកដោយសារការខ្សោះជាតិទឹក។ក្រសួងសុខាភិបាល បានឲ្យដឹងទៀតថា សីតុណ្ហភាពអតិបរិមា ៤៩អង្សាសេ គឺជាការឡើងកម្តៅខ្ពស់បំផុត ក្នុងសប្តាហ៍នេះ នៅរដ្ឋសូណូរ៉ា (Sonora) ភាគពាយ័ព្យ។ នៅប្រទេសម៉ិកស៊ិក សីតុណ្ហភាពអតិបរិមាជាមធ្យម ក្នុងកំឡុងរដូវក្តៅប្រែប្រួលចន្លោះពី ៣០ទៅ ៤៥អង្សាសេ ហើយអាជ្ញាធរបានព្រមានថា រលកកម្តៅមួយផ្សេងទៀត អាចប៉ះពាល់ដល់ប្រទេស ដែលមានប្រជាជនចំនួន ១២៧លាននាក់នេះ ចាប់ពីថ្ងៃទី១ ខែកក្កដា៕

បណ្ដាញសង្គម

ព័ត៌មានថ្មីៗ

ទូតកម្ពុជាប្រចាំនៅជប៉ុន៖ យុវជនមានតួនាទីសំខាន់ក្នុងការរួមចំណែកពង្រឹងទំនាក់ទំនងរវាងកម្ពុជា-ជប៉ុន ឱ្យកាន់តែរឹងមាំថែមទៀត

សិស្សានុសិស្ស លោកគ្រូអ្នកគ្រូ រួមទាំងអាណាព្យាបាល នៅក្រុងស្ទឹងត្រែង ចំនួន ៣ ៥៩៩នាក់ ទទួលបានសេវាព្យាបាលពីក្រុមគ្រូពេទ្យ TYDA

ក្រសួងការងារបន្តផ្សព្វផ្សាយឱកាសការងារជាច្រើនម៉ឺនកន្លែងក្នុងស្រុក ដល់យុវជន និងអតីតពលករ នៅខេត្តប៉ៃលិន-បាត់ដំបង

ក្រុមការងារចលនាស្ត្រី នៃក្រុមការងារគណបក្សចុះមូលដ្ឋានខេត្តកណ្ដាល ប្តេជ្ញាបន្តសកម្មភាពបម្រើពលរដ្ឋដោយបេះដូងនិងស្មោះត្រង់

ប្រធានក្រុមការងារជួសជុល និងសាងសង់ឡើងវិញអគារសិក្សាអំណោយសម្ដេចតេជោ ចុះពិនិត្យ និងវាយតម្លៃស្ថានភាពអគារសិក្សាចំនួន ៤ ទីតាំងបន្ថែមទៀត ក្នុងស្រុកអង្គរជ័យ ខេត្តកំពត

ប្រមុខ UN ទទួលបន្ទុកជនភៀសខ្លួន ព្រមានពីស្ថានភាព «កាន់តែធ្ងន់ធ្ងរឡើង» នៅតំបន់ Sahara ខាងលិច

មនុស្សរាប់លាននាក់នៅភាគឦសានរបស់សហរដ្ឋអាមេរិក ត្រៀមប្រឈមនឹងព្យុះដ៏ខ្លាំងក្លា

កុមារនៅភាគខាងត្បូងលីបង់ ត្រឡប់ទៅសាលារៀនដែលត្រូវបានបំផ្លាញដោយការវាយប្រហាររបស់អ៊ីស្រាអែល

UN បន្ថែមក្រុមហ៊ុន ៦១ទៀតក្នុងបញ្ជីពាក់ព័ន្ធនឹងការតាំងទីលំនៅអ៊ីស្រាអែលធ្វើឲ្យចំនួនសរុបកើនដល់ ២១៤

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877