នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
កម្ពុជាចាប់ផ្តើមទទួលបានកំណើនភ្ញៀវទេសចរអន្តរជាតិលំដាប់ខ្ពស់
PATA ផ្តោតលើទីផ្សារទេសចរណ៍រុស្ស៊ី ក្នុងជុំចុងក្រោយ​នៃយុទ្ធនាការ​ផ្សព្វផ្សាយ​កម្ពុជា​ទៅ​កាន់​ពិភពលោក
មន្រ្តីជាន់ខ្ពស់វប្បធម៌ អញ្ជើញបិទមហោស្រពល្ខោននិយាយលើកទី២ ថ្នាក់រាជធានីភ្នំពេញ ឆ្នាំ២០២៦
ទេសចរចុះពីនាវា Villa Vie Odyssey អរគុណកម្ពុជា​ដែល​បាន​ផ្ដល់​ជំនួយ​យ៉ាង​កក់​ក្ដៅ​លើស​ការ​រំពឹង​ទុក

វប្បធម៌ និងទេសចរណ៍

កម្ពុជាចាប់ផ្តើមទទួលបានកំណើនភ្ញៀវទេសចរអន្តរជាតិលំដាប់ខ្ពស់

2026/11/04 03:29:58 pm        447
Facebook Telegram Linkin
ក្នុង​ឆ្នាំ២០២៦នេះ កម្ពុជាមិនរំពឹងថាមានកំណើនភ្ញៀវទេសចរអន្តរជាតិនោះទេ ប៉ុន្តែ​ចាប់​ពី​ចុង​ខែ​តុលា រហូតដើមឆ្នាំ២០២៧ គឺគ្រប់ភ្ញៀវទេសចរអន្តរជាតិ ដែលបាន​កក់​ទិញ​កញ្ចប់​ទេសចរណ៍​មក​ទស្សនា​កម្ពុជា​ និងបាននាំគ្នាមកទស្សនាកម្ពុជាជាបណ្តើរៗហើយនោះ ភាគច្រើន​ជា​ភ្ញៀវ​លំដាប់​ខ្ពស់​ អ្នកមាន និងមានលទ្ធភាពស្នាក់នៅតាមសណ្ឋាគារលំដាប់ផ្កាយ៤ ផ្កាយ៥ និងស្នាក់​នៅយូរ​ថ្ងៃ​។ មគ្គុទេសក៍ទេសចរណ៍ បានប្រាប់BTV នៅថ្ងៃទី៤ ខែវិច្ឆិកា នេះថា នៅក្នុងអំឡុងពេលនេះ នៅ​រាជ​ធានី​ភ្នំពេញ សម្គាល់ឃើញមានភ្ញៀវទេសចរអន្តរជាតិ មកពីតាមបណ្តាប្រទេសនៅអឺរ៉ុប អាម៉េរិក តំបន់​អាស៊ីកណ្តាល និងមជ្ឈិមបូពាហ៍ ជាដើម គឺបាននាំគ្នាមកទស្សនាកម្ពុជាច្រើន ដែល​ទេសចរ​អន្តរជាតិទូទៅបានកក់ទិញកញ្ចប់ទេសចរណ៍ ស្នាក់នៅតាមសណ្ឋាគារលំដាប់ផ្កាយ មាន​ការ​ចំណាយ​ច្រើន ដែលកត្តានេះនឹងរួមចំណែកជំរុញកំណើនសេដ្ឋកិច្ចកម្ពុជាផងដែរ។ ចំនួន​ទេសចរ​អន្តរជាតិ​មកតិច តែចំណូលទទួលបានច្រើន។ ទេសចរអន្តរជាតិ បាននិយាយថា ការមកទស្សនាកម្ពុជា អំឡុងពេលនេះ គឺមានទេសភាព​បៃតង​ស្រស់​ស្អាត​។ ពលរដ្ឋរួសរាយរាក់ទាក់ គោលដៅទេសចរណ៍នានាមានភាពទាក់ទាញខ្លាំង សុវត្ថិភាព​ខ្ពស់ តម្លៃសណ្ឋាគារ ការធ្វើដំណើរ ម្ហូបអាហារ និងតម្លៃទំនិញផ្សេងៗមិនថ្លៃ បើប្រៀប​ធៀប​ប្រទេសរបស់គេ ហើយពេលត្រឡប់ទៅវិញ ភ្ញៀវទាំងនោះនឹងរៀបរាប់អំពីបទពិសោធន៍ និង​ណែនាំ​ឲ្យ​ប្រជាជននៅក្នុងប្រទេសគេនាំគ្នាមកទស្សនាកម្ពុជា។ ប្រធានសមាគមទីភ្នាក់ងារទេសចរណ៍កម្ពុជា CATA លោកជំទាវ ឆាយ ស៊ីវលីន ថ្លែងថា ភ្ញៀវ​ទេសចរ​អន្តរជាតិ ដែលបានកក់ទិញកញ្ចប់ទេសចរណ៍មកទស្សនាកម្ពុជាតាំងពីពេលមុនៗមក គឺ​គេ​បានចាប់ផ្តើមអញ្ជើញមកទស្សនា កម្ពុជាដោយចាប់ផ្តើមកើនតាំងពីចុងខែតុលា ឆ្នាំ២០២៦​នេះ ​រហូតដល់ខែកុម្ភៈ ឆ្នាំ២០២៧ ។ លោកជំទាវ ឆាយ ស៊ីវលីន បន្តថា ភាគច្រើន ភ្ញៀវអន្តរជាតិអន្តរជាតិ ដែលមកទស្សនានោះ ជា​ភ្ញៀវ​លំដាប់ខ្ពស់ ដែលមានលទ្ធភាពចំណាយស្នាក់នៅនៅតាមសណ្ឋាគារលំដាប់ផ្កាយប្រាំ និង​មាន​តម្រូវការដឹកជញ្ជូន អាហារដ្ឋានលំដាប់ខ្ពស់ និងមានទំនោរខ្លាំងចង់ទស្សនានៅខេត្តសៀមរាប ទស្សនាតំបន់ប្រាសាទ តំបន់សហគមន៍ទេសចរណ៍ បឹងទន្លេសាប ទេសភាពវាលស្រែ ទស្សនា​វប្បធម៌បែបជនបទ និងទស្សនារាជភ្នំពេញ និងបន្តទៅតំបន់ឆ្នេរសមុទ្រជាដើម ។ លោក​ជំទាវ បន្តថា នៅក្នុងរដូវទេសចរណ៍ high season អមដោយមានព្រឹត្តិការណ៍ Francophonie គឺពិតជា​បាន​រួម​គ្នា​ចំណែក​ខ្លាំង​បង្កើន​ភាព​ទាក់​ទាញ​ទេសចរ​អន្តរជាតិ​ផ្សេង​ៗ​មក​កម្ពុជា​កាន់​តែ​ច្រើនថែមទៀត៕ អត្ថបទ៖ ស៊ុម សុខជា

PATA ផ្តោតលើទីផ្សារទេសចរណ៍រុស្ស៊ី ក្នុងជុំចុងក្រោយ​នៃយុទ្ធនាការ​ផ្សព្វផ្សាយ​កម្ពុជា​ទៅ​កាន់​ពិភពលោក

2026/11/03 01:24:19 pm        106
Facebook Telegram Linkin
នៅក្នុងដំណើរអនុវត្តយុទ្ធនាការផ្សព្វផ្សាយគោលដៅទេសចរណ៍កម្ពុជា ទៅកាន់ពិភពលោក នៅជុំចុងក្រោយនេះ សមាគមទេសចរណ៍អាស៊ីប៉ាហ្វិក PATA ប្រចាំនៅកម្ពុជា នឹងអញ្ជើញទីភ្នាក់ងារទេសចរណ៍ និងអ្នកធ្វើទីផ្សារទេសចរណ៍ធំៗនៅប្រទេសរុស្ស៊ី មកបំពេញទស្សនកិច្ចសិក្សាស្វែងយល់អំពីសក្តានុពលទេសចរណ៍កម្ពុជា ស្វែងរកដៃគូសហការ រៀបចំកញ្ចប់ទេសចរណ៍ នាំភ្ញៀវទេសចររុស្ស៊ី មកទស្សនាកម្ពុជា។ លោកបណ្ឌិត ធួន ស៊ីណាន ប្រធានសមាគមទេសចរណ៍ទេសចរណ៍អាស៊ីប៉ាហ្វិក PATA ប្រចាំនៅកម្ពុជា ថ្លែងប្រាប់BTV នៅថ្ងៃទី៣ ខែវិច្ឆិកា នេះថា នេះជាលើកទី៦ ដែលសមាគម PATA និងសមាគមទេសចរណ៍នានាទៀតនៅកម្ពុជា ក្រោមការគាំទ្រពីក្រសួងទេសចរណ៍ រៀបចំយុទ្ធនាការផ្សព្វផ្សាយកម្ពុជាទៅកាន់ពិភពលោក ដោយមានការអញ្ជើញ ទីភ្នាក់ងារទេសចរណ៍ និងក្រុមហ៊ុនអ្នកធ្វើទីផ្សារចំនួន ៦ក្រុមហ៊ុន នៅតាមទីក្រុងផ្សេងៗនៅប្រទេសរុស្ស៊ី មកបំពេញទស្សនៈកិច្ចសិក្សាស្វែងយល់សក្តានុពលទេសចរណ៍កម្ពុជា និងស្វែងរកដៃគូសហការ ចំនួន៧ថ្ងៃ ចាប់ពីថ្ងៃទី៦ ដល់ថ្ងៃទី១២ ខែវិច្ឆិកានេះ នឹងត្រៀមរៀបចំព្រឹត្តិការណ៍ជំនួបពាណិជ្ជកម្មទេសចរណ៍CTM 2027 ដែលនឹងមានក្រុមហ៊ុនទេសចរណ៍រុស្ស៊ីជាង១២០ក្រុមហ៊ុនអញ្ជើញចូលរួម ដើម្បីជំរុញការតភ្ជាប់ជើងហោះហើរ និងជំរុញកំណើនទេសចររុស្ស៊ីមកទស្សនាកម្ពុជា។លោក បណ្ឌិត ធួន ស៊ីណាន បានបន្តថា នៅក្នុងដំណើរការអនុវត្តយុទ្ធនាការផ្សព្វផ្សាយកម្ពុជាទៅកាន់ពិភពលោកឆ្នាំ២០២៦ចំនួន៦លើកនេះ សមាគមPATA បានអញ្ជើញទីភ្នាក់ងារទេសចរណ៍ ក្រុមហ៊ុនអាកាសចរណ៍អន្តរជាតិ អ្នកធ្វើទីផ្សារទេសចរណ៍ និងអ្នកផលិតមាតិការ ចំនួនសរុបប្រមាណជាង១៤០ក្រុមហ៊ុន មកពីប្រទេសវៀតណាម ឥណ្ឌូនេស៊ី ម៉ាឡេស៊ី សឹង្ហបូរី មីយ៉ាន់ម៉ា ហ្វីលីពីន ចិន ឥណ្ឌា រុស្ស៊ី និងនេប៉ាល់ ជាដើម មកបំពេញទស្សនៈកិច្ចសិក្សាស្វែងយល់សក្តានុពលទេសចរណ៍កម្ពុជា នៅខេត្តសៀមរាប រាជធានីភ្នំពេញ កែប កំពត និងខេត្តព្រះសីហនុ កោះរ៉ុងជាដើម និងការស្វែងរកដៃគូសហការជាមួយក្រុមហ៊ុនទេសចរណ៍ក្នុងស្រុក ដើម្បីរៀបចំផ្សព្វផ្សាយលក់កញ្ចប់ទេសចរណ៍ និងជំរុញនាំភ្ញៀវទេសចរអន្តរជាតិមកទស្សនាកម្ពុជា។តាមរយៈការអនុវត្តយុទ្ធនាការនេះ សមាគមPATA ប្រចាំនៅកម្ពុជា រំពឹងថា នៅក្នុងឆ្នាំ២០២៧ និងឆ្នាំបន្តបន្ទាប់ខាងមុខទៀត ក្រុមហ៊ុនទេសចរណ៍តាមប្រទេសនានានោះ នឹងមានការនាំភ្ញៀវទេសចរអន្តរជាតិមកទស្សនាកម្ពុជាកាន់តែច្រើន។សូមបញ្ជាក់ថា យុទ្ធនាការផ្សព្វផ្សាយគោលដៅទេសចរណ៍កម្ពុជាទៅកាន់ពិភពលោក ដែលធ្វើឡើង នៅជុំទី៦នេះ គឺជាជុំចុងក្រោយ នៅក្នុងឆ្នាំ២០២៦នេះ ហើយនៅឆ្នាំ២០២៧ សមាគមPATA ប្រចាំនៅកម្ពុជា នឹងបន្តរៀបចំចំនួន៣ជុំ ដោយក្នុងមួយជុំៗ នឹងអញ្ជើញក្រុមហ៊ុនទេសចរណ៍ ទីភ្នាក់ទេសចរណ៍ឲ្យបានលើសពី១០០ក្រុមហ៊ុន មកពីជុំវិញពិភពលោក ដើម្បីពង្រីកវិសាលភាពការផ្សព្វផ្សាយកម្ពុជាទៅកាន់ពិភពលោក៕ អត្ថបទ៖ ស៊ុម សុខជា

មន្រ្តីជាន់ខ្ពស់វប្បធម៌ អញ្ជើញបិទមហោស្រពល្ខោននិយាយលើកទី២ ថ្នាក់រាជធានីភ្នំពេញ ឆ្នាំ២០២៦

2026/11/02 03:56:19 pm        396
Facebook Telegram Linkin
លោកជំទាវ សុទ្ធ សុមាលី អនុរដ្ឋលេខាធិការ តំណាងដ៏ខ្ពង់ខ្ពស់លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានអញ្ជើញបិទមហោស្រពល្ខោននិយាយលើកទី២ ថ្នាក់រាជធានីភ្នំពេញ ក្រោម ប្រធានបទ «កិច្ចការពារ អភិរក្ស និងថែរក្សាសម្បត្តិបេតិកភណ្ឌវប្បធម៌ជាតិ» រៀបចំដោយមន្ទីរវប្បធម៌និងវិចិត្រសិល្បៈរាជធានីភ្នំពេញ ថ្ងៃអាទិត្យ ទី១ ខែវិច្ឆិកា ឆ្នាំ២០២៦ (ផ្លូវថ្មើរជើងចតុម្មុខ)។ លោកស្រី ណម ណារីម ប្រធានមន្ទីរវប្បធម៌ និងវិចិត្រសិល្បៈរាជធានីភ្នំពេញ បានបញ្ជាក់ថា ក្រុមសិល្បៈដែលឈានដល់វគ្គផ្តាច់ព្រ័តនេះមានចំនួន ៥ក្រុម ដែលមកពីអង្គការ និងសាលាដូចខាង ក្រោម៖ ក្រុមសិល្បៈអង្គការមូលនិធិកុមារកម្ពុជា, សាលាបញ្ញាសាស្រ្តអន្តរជាតិ សាខាទី១, សាលាប៊ែលធី អន្តរជាតិទី១៨, សាលាសុវណ្ណភូមិទី៥៣ និងសាលាបញ្ញាសាស្រ្តអន្តរជាតិវណ្ណហុង។ លទ្ធផលជ័យលាភីលេខ១ សាលានីសិនគ្រីប អាខាដេមីទទួលបានពានលេខ១ អមដោយទឹកប្រាក់, ជ័យលាភីលេខ២ សាលាប៊ែលធីអន្តរជាតិទី១៨ ទទួលបានពានរង្វាន់លេខ២ អមដោយទឹកប្រាក់ និងជ័យលាភីលេខ៣ សាលាបញ្ញាសាស្ត្រអន្តរជាតិ សាខាទី១ ទទួលបានពានរង្វាន់លេខ៣ អមដោយទឹកប្រាក់។ ចំណែកសាលារៀនសុវណ្ណភូមិទី៥៣ ទីតាំង២៧១ និងសាលាបញ្ញាសាស្រ្តអន្តរជាតិ វណ្ណហុង ទទួលបានបណ្ណសរសើរ។ ជាមួយគ្នានោះដែរ តំណាងឱ្យប្អូនៗសិស្សានុសិស្ស ក៏ដូចជាក្រុមសិល្បៈល្ខោននិយាយរបស់សាលានីសិនគ្រីប អាខាដេមី ពិតជាមានក្តីរំភើបរីករាយជាអនេក និងមានមោទនភាពយ៉ាងខ្លាំង ដែលអាចដណ្តើមបានជ័យលាភីលេខ១ នៅក្នុងមហោស្រពថ្នាក់រាជធានីភ្នំពេញលើកទី២ ឆ្នាំ២០២៦ នេះ។ ជ័យលាភីដ៏មានតម្លៃនេះ មិនមែនកើតឡើងដោយចៃដន្យនោះទេ ប៉ុន្តែវាជាលទ្ធផលនៃការខិតខំប្រឹងប្រែងហ្វឹកហាត់យ៉ាងស្វិតស្វាញ ភាពអត់ធ្មត់ និងសាមគ្គីភាពយ៉ាងស្អិតរមួតរបស់សមាជិកក្រុមទាំងអស់ ព្រមទាំងមានការគាំទ្រ និងជ្រោមជ្រែងយ៉ាងពេញទំហឹងពីសំណាក់លោកគ្រូ អ្នកគ្រូ និងថ្នាក់ដឹកនាំសាលា។ នាឱកាសនោះលោកជំទាវ សុទ្ធ សុមាលី បានសង្កត់ធ្ងន់ថា ប្អូនៗបានចូលរួមក្នុងកិច្ចការពារ អភិរក្ស និងថែរក្សាប្រកបដោយចីរភាពនូវវិស័យសិល្បៈវប្បធម៌ខ្មែរ ស្របតាមបញ្ចកោណទី៤ មុំទី២ នៃយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា ដែលដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដោយមានក្រសួងវប្បធម៌ និងវិចិត្រសិល្បៈជាតួអង្គប្រតិបត្តិ លើកិច្ចការងារនេះ។ ការចូលរួមរបស់ប្អូនៗនៅថ្ងៃនេះគឺមានសារៈសំខាន់ខ្លាំងណាស់សម្រាប់វិស័យវប្បធម៌ ព្រោះវាបានបង្ហាញថាក្រសួងវប្បធម៌ តាមរយៈមន្ទីរវប្បធម៌ និងវិចិត្រសិល្បៈរាជធានីភ្នំពេញ បានធ្វើត្រូវហើយ ក្នុងការដែលធ្វើឱ្យយុវជនរបស់នាសម័យទំនើបនេះ ងាកមកចូលរួមគាំទ្រ វិស័យសិល្បៈខ្មែរយើងកាន់តែច្រើនឡើង និងដោយក្តីស្រឡាញ់ពិតប្រាកដឥតងាករេ។ ឆន្ទៈដ៏មុតមាំ របស់ប្អូនៗនាពេលនេះ គឺជាក្តីរំពឹងរបស់ថ្នាក់ដឹកនាំគ្រប់ជាន់ថ្នាក់នៃក្រសួងវប្បធម៌ និងវិចិត្រសិល្បៈ ដែលបានខិតខំប្រឹងប្រែងធ្វើនាពេលកន្លងមក ក្នុងការអូសទាញស្រទាប់យុវជនឱ្យចូលមកគាំទ្រ វិស័យសិល្បៈ រហូតបានក្លាយជាប្រធានបទសំខាន់របស់វិស័យវប្បធម៌របស់យើង នោះគឺ «យុវជន ដើម្បីវប្បធម៌ជាតិ» ៕ អត្ថបទ រដ្ឋា  

ទេសចរចុះពីនាវា Villa Vie Odyssey អរគុណកម្ពុជា​ដែល​បាន​ផ្ដល់​ជំនួយ​យ៉ាង​កក់​ក្ដៅ​លើស​ការ​រំពឹង​ទុក

2026/11/02 02:04:43 pm        199
Facebook Telegram Linkin
ក្រោយពីចាកចេញពីនាវាអន្តរជាតិ Villa Vie Odyssey ដោយមិននឹកស្មានដល់ ទេសចរ​អន្តរជាតិ​នៅ​លើកប៉ាល់នេះ ត្រូវបានផ្ដល់ជំនួយយ៉ាងកក់ក្ដៅពីកម្ពុជា ដែលពួកគេចាត់​ទុក​ជំនួយ​នេះ​លើស​ពីការរំពឹងទុក។ មកដល់ពេលនេះ ទេសចរតិចតួចក្នុងចំណោមជាង២០០នាក់ បាន​ចាក​ចេញ​ពីកម្ពុជា ខណៈភាគច្រើនបន្តស្នាក់នៅច្រើនសប្តាហ៍ទៀត ដើម្បីបន្តដំណើរកម្សាន្ត​ទៅ​តាម​គោលដៅទេសចរណ៍នានានៅកម្ពុជា។អ្នកដំណើរលើនាវា Odyssey ដែលបានធ្វើដំណើរចាកចេញកម្ពុជា តាមអាកាសយានដ្ឋានអន្តរជាតិតេជោ TIA បានថ្លែងប្រាប់BTV ថា គេបានមកទស្សនាកម្ពុជាច្រើនដងរួចហើយ ហើយការមកស្នាក់នៅច្រើនថ្ងៃមកនេះ គឺគេទទួលបានបទពិសោធន៍ដ៏អស្ចារ្យលើសការំពឹងទុក អំឡុងពេលគេនាំគ្នាចាកចេញពីនាវា Odyssey នោះ។ អ្នកដំណើរទាំងអស់បានថ្លែងអំណរគុណដល់ប្រមុខថ្នាក់ដឹកនាំរាជរដ្ឋាភិបាល ក្រសួងទេសចរណ៍ និងអាជ្ញាធរគ្រប់ផ្នែក ដែលបានជួយសម្រសសម្រួល ជួយអន្តរាគមន៍ ជួយដោះស្រាយ រាល់សំណូមពរ រាល់តម្រូវការផ្សេងៗដែលធ្វើឲ្យគេមានសុវត្ថិភាព និងភាពកក់ក្តៅខ្លាំង ហើយគេពិតជាចង់ឲ្យទេសចរអន្តរជាតិមកទស្សនាកម្ពុជាឲ្យបានច្រើនខ្លាំងណាស់។លោក តាំង សុចិត្តគ្រឹស្នា ប្រធានមន្ទីរទេសចរណ៍ខេត្តព្រះសីហនុ បានឲ្យដឹងថា តាមការស្នើពីថ្នាក់ដឹកនាំនាវា កាលពីថ្ងៃទី៣០ ខែតុលា ឆ្នាំ២០២៦ គឺនាវាអន្តរជាតិ Villa Vie Odyssey គ្រោងនឹងធ្វើដំណើរចាកចេញពីកំពុងពីកំពង់ផែខេត្តព្រះសីហនុ នៅថ្ងៃទី៤ ខែវិច្ឆិកា នេះ ក្រោយពីនាវាអន្តរជាតិមួយនេះ បានចូលចតកាលថ្ងៃទី២៣ ខែតុលា និងនៅគាំងជាប់នៅកំពង់ផែខេត្តព្រះសីហនុ ដោយសារបញ្ហាប្រេងកំពុងឡើងថ្លៃជាសកល ដែលតាមផែនការ នាវានេះ ត្រូវចាកចេញនៅថ្ងៃទី២៨ ខែតុលា ឆ្នាំ២០២៦។លោកបានបន្តថា យ៉ាងណា រហូតមកដល់ពេលនេះ មន្ត្រីជំនាញ អាជ្ញាធរមានសមត្ថកិច្ច បាននិងកំពុងរួមសហការគ្នាប្រចាំការ ដោះស្រាយរាល់សំណូមពរ រាល់តម្រូវការចាំបាច់នានា សម្រួលការដឹកជញ្ជូនធ្វើដំណើរទៅភ្នំពេញ និងធ្វើដំណើរទេសចរណ៍កម្សាន្តក្នុងខេត្ត និងក្រៅខេត្ត ដោយមានមគ្គុទេសក៏ទេសចរណ៍នាំ និងមិនមានការគិតថ្លៃ ព្រមជាមួយគ្នានេះ ក្រសួងទេសចរណ៍ ក៏បានជួយចុះអន្តរាគមន៍ឲ្យសណ្ឋាគារនានាផ្តល់ការបញ្ចុះថ្លៃឲ្យបាន៤០ទៅ៥០% ជូនអ្នកដំណើរលើOdyssey ស្នាក់នៅ និងមានឱកាសដើរកម្សាន្តបានយូរថ្ងៃនៅកម្ពុជា។លោក បន្តថា ក្នុងចំណោមអ្នកដំណើរតាមនាវាអន្តរជាតិ Villa Vie Odyssey ចំនួន២០៣នាក់ រហូតមកដល់ថ្ងៃទី២ ខែវិច្ឆិកានេះ គឺមានអ្នកដំណើរប្រមាណជាង៦០នាក់ បន្តស្នាក់នៅតាមសណ្ឋាគារនានា និងនាំគ្នាអញ្ជើញធ្វើដំណើរកម្សាន្តទេសចរណ៍ នៅក្នុងខេត្តព្រះសីហនុ ខ្លះទៀតបន្តធ្វើដំណើរកម្សាន្តទេសចរណ៍ទៅតាមខេត្តគោលដៅទេសចរណ៍នានាច្រើនសប្តាហ៍ទៀត ជាលក្ខណៈឯកជន ហើយអ្នកដំណើរជិត៣០ទៀត បានធ្វើដំណើរតាមផ្លូវអាកាសត្រឡប់វិញទៅកាន់ប្រទេសគេវិញ៕ អត្ថបទ៖ ស៊ុម សុខជា 

ភ្ញៀវទេសចរអន្តរជាតិ ១៥សញ្ជាតិ នៃនាវា Odyssey ថ្លែងអំណរគុណរាជរដ្ឋាភិបាលកម្ពុជា ចំពោះ​​ការទទួលស្វាគមន៍យ៉ាងកក់ក្តៅ និងការយកចិត្តទុកដាក់ខ្ពស់

2026/10/29 04:05:00 pm        698
Facebook Telegram Linkin
ថ្ងៃទី២៩ ខែតុលា ឆ្នាំ២០២៦នេះ ភ្ញៀវទេសចរអន្តរជាតិប្រមាណ ២០០នាក់ មកពី ១៥សញ្ជាតិ រួមជាមួយនាវិក និងក្រុមការងារប្រមាណ ១៥០នាក់ នៃនាវាទេសចរណ៍ Villa Vie Odyssey បានសម្តែងនូវការដឹងគុណ និងថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាលកម្ពុជា ដែលបានផ្តល់ការទទួលស្វាគមន៍ប្រកបដោយភាពកក់ក្តៅ បដិសណ្ឋារកិច្ចដ៏ល្អ ការយកចិត្តទុកដាក់ និងការសម្របសម្រួលចាំបាច់នានា ក្នុងអំឡុងពេលដែលនាវាទេសចរណ៍នេះកំពុងចតនៅកំពង់ផែស្វយ័តក្រុងព្រះសីហនុ។ ដោយទទួលបានអនុសាសន៍ដឹកនាំដ៏ខ្ពង់ខ្ពស់ពី សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា, ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ រួមជាមួយឯកឧត្តម សាមុត សុធារិទ្ធ អភិបាលស្តីទីនៃគណៈអភិបាលខេត្តព្រះសីហនុ ឯកឧត្តម លូ គឹមឈន់ ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានអគ្គនាយកកំពង់ផែស្វយ័តក្រុងព្រះសីហនុ ព្រមទាំងតំណាងអគ្គនាយកដ្ឋានអន្តោប្រវេសន៍ មន្ទីរទេសចរណ៍ខេត្ត និងមន្ទីរ អង្គភាពពាក់ព័ន្ធគ្រប់លំដាប់ថ្នាក់ បានអញ្ជើញចុះពិនិត្យករណីនាវា Villa Vie Odyssey ដែលជួបបញ្ហាប្រេងដើម្បីបន្តដំណើរ ព្រមទាំងបានចុះសាកសួរសុខទុក្ខផ្ទាល់ ស្តាប់ក្តីកង្វល់ និងសំណូមពររបស់ភ្ញៀវទេសចរអន្តរជាតិ នាវិក និងក្រុមការងាររបស់នាវា ដើម្បីស្វែងរកដំណោះស្រាយសមស្រប និងឆ្លើយតបចំពោះតម្រូវការចាំបាច់នានា។ ទន្ទឹមនេះ ឯកឧត្តមរដ្ឋមន្ត្រី ក៏បានថ្លែងអំណរគុណដល់គ្រប់ផ្នែក និង គ្រប់ភាគីពាក់ព័ន្ធទាំងអស់ ដែលបានចូលរួមសហការយ៉ាងជិតស្និទ្ធ ជាពិសេសឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ក្រុមប្រឹក្សាអភិវឌ្ឍន៍កម្ពុជានិងជាប្រធានក្រុមប្រឹក្សាជាតិភស្ដុភារកម្ម និង ឯកឧត្តម នេត ភក្ត្រា រដ្ឋមន្ត្រីក្រសួងព័ត៌មាន ក៏បានផ្តល់កិច្ចសហការយ៉ាងសកម្មផងដែរ។ បន្ទាប់ពីការពិភាក្សា និងវាយតម្លៃស្ថានភាពជាមួយគ្រប់ភាគីពាក់ព័ន្ធ ក្រសួងទេសចរណ៍ រដ្ឋបាលខេត្តព្រះសីហនុ និងក្រសួង ស្ថាប័នមានសមត្ថកិច្ច បានចាត់តាំងក្រុមការងារសម្របសម្រួល និងបានដាក់ចេញនូវវិធានការចាំបាច់ និងទាន់ពេលវេលា ដើម្បីជួយសម្រួលដល់ការទទួលបានព័ត៌មាន និងការផ្តល់សេវាកម្មចាំបាច់ផ្សេងៗ ដោយផ្តោតជាសំខាន់លើ សុវត្ថិភាព សុខុមាលភាព ផាសុកភាព និងភាពកក់ក្តៅរបស់ភ្ញៀវទេសចរអន្តរជាតិគ្រប់រូប។ សម្រាប់កម្ពុជា ភ្ញៀវទេសចរអន្តរជាតិមិនត្រឹមតែជាអ្នកមកទស្សនាប៉ុណ្ណោះទេ ប៉ុន្តែជាមិត្តភក្តិដែលត្រូវទទួលបានការគោរព ការយកចិត្តទុកដាក់ និងភាពកក់ក្តៅ ជាពិសេសនៅពេលដែលពួកគេជួបប្រទះការលំបាក។ ក្នុងឱកាសនោះ ភ្ញៀវទេសចរអន្តរជាតិ ក៏ដូចជានាវិក និងក្រុមការងាររបស់នាវា បានសម្តែងនូវក្តីរំភើប ការដឹងគុណ និងទំនុកចិត្តចំពោះការយកចិត្តទុកដាក់របស់រាជរដ្ឋាភិបាលកម្ពុជា និងអាជ្ញាធរពាក់ព័ន្ធ។ ពួកគាត់ក៏បានកោតសរសើរចំពោះទឹកចិត្តមនុស្សធម៌ ស្នាមញញឹម និងភាពរួសរាយរាក់ទាក់របស់ប្រជាជនកម្ពុជា ព្រមទាំងកោតសរសើរអំពីសម្រស់ធម្មជាតិ និងសក្តានុពលទេសចរណ៍ដ៏សម្បូរបែបរបស់កម្ពុជា។ គួរឱ្យកត់សម្គាល់ ក្នុងអំឡុងពេលស្នាក់នៅកម្ពុជា ភ្ញៀវទេសចរអន្តរជាតិមួយចំនួនបានឆ្លៀតឱកាសបន្តដំណើរកម្សាន្តទៅកាន់តំបន់ឆ្នេរ កោះ និងគោលដៅទេសចរណ៍ជុំវិញខេត្តព្រះសីហនុ ខណៈដែលមួយចំនួនទៀតបានបន្តដំណើរទស្សនកិច្ចមកកាន់រាជធានីភ្នំពេញ។ ភ្ញៀវទេសចរមួយចំនួនក៏បានបង្ហាញពីចំណាប់អារម្មណ៍ និងបំណងវិលត្រឡប់មកទស្សនាកម្ពុជាជាថ្មីម្តងទៀតនាពេលអនាគត។ ការយកចិត្តទុកដាក់របស់កម្ពុជាចំពោះនាវា Odyssey នាពេលនេះ ក៏បានរំលេចឡើងវិញនូវកេរដំណែលមនុស្សធម៌ដ៏មានតម្លៃរបស់កម្ពុជា ដែលពិភពលោកបានចងចាំតាមរយៈព្រឹត្តិការណ៍ទទួលស្វាគមន៍នាវាទេសចរណ៍ Westerdam កាលពីខែកុម្ភៈ ឆ្នាំ២០២០ កន្លងទៅ។ នៅពេលនោះ ក្រោមការដឹកនាំប្រកបដោយចក្ខុវិស័យ និងទឹកចិត្តមនុស្សធម៌របស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភានៃព្រះរាជាណាចក្រកម្ពុជា កម្ពុជាបានអនុញ្ញាតឱ្យនាវា Westerdam ចូលចតនៅកំពង់ផែក្រុងព្រះសីហនុ បន្ទាប់ពីនាវានេះបានជួបប្រទះការលំបាកក្នុងការស្វែងរកកំពង់ផែចូលចត ដោយសារការព្រួយបារម្ភអំពីការរីករាលដាលនៃជំងឺកូវីដ-១៩។ កាយវិការប្រកបដោយមនុស្សធម៌នេះបានទទួលការកោតសរសើរពីមជ្ឈដ្ឋានអន្តរជាតិ និងបានធ្វើឱ្យសារដ៏មានអត្ថន័យ «កម្ពុជាជាប្រទេសតូច ប៉ុន្តែមានបេះដូងធំ» (A Small Country with a Big Heart) ក្លាយជានិមិត្តរូបនៃសាមគ្គីភាព និងភាពកក់ក្តៅរបស់ប្រជាជនកម្ពុជា។ សកម្មភាពទាំងនេះបានចូលរួមពង្រឹងកិត្តិនាមរបស់កម្ពុជានៅលើឆាកអន្តរជាតិ ក្នុងនាមជាគោលដៅទេសចរណ៍ប្រកបដោយសុវត្ថិភាព មិត្តភាព និងបដិសណ្ឋារកិច្ចដ៏កក់ក្តៅ ស្របតាមស្មារតី «កម្ពុជា ព្រះរាជាណាចក្រអច្ឆរិយៈ ផ្តល់ភាពកក់ក្តៅ»៕

កម្ពុជា ពង្រីកបណ្តាញតភ្ជាប់ផ្លូវអាកាសជាមួយកូរ៉េខាងត្បូង និងចិន តាមរយៈអាកាសយានដ្ឋានអន្តរជាតិសៀមរាប-អង្គរ

2026/10/28 03:40:14 pm        678
Facebook Telegram Linkin
ភ្នំពេញ៖ មន្រ្តីជាន់ខ្ពស់នៃរដ្ឋលេខាធិការដ្ឋានអាកាសចរស៊ីវិល (SSCA) បានស្វាគមន៍ចំពោះការគ្រោងបើកដំណើរការជើងហោះហើរអន្តរជាតិថ្មីចំនួនពីរ មកពីសាធារណរដ្ឋកូរ៉េ និងសាធារណរដ្ឋប្រជាមានិតចិនមកកាន់អាកាសយានដ្ឋានអន្តរជាតិសៀមរាប-អង្គរ (SAI)។ ជើងហោះហើរទាំងនេះនឹងជួយគាំទ្រដល់កំណើនវិស័យទេសចរណ៍របស់កម្ពុជានិង​ការពង្រឹងបណ្តាញតភ្ជាប់អន្តរជាតិ។ ឯកឧត្តម ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យ នៃរដ្ឋលេខាធិការដ្ឋានអាកាសចរណ៍ស៊ីវិល (SSCA) បានឱ្យដឹងនៅថ្ងៃទី ២៨ ខែតុលា ឆ្នាំ ២០២៦ថា ការបើកដំណើរការជើងហោះហើរអន្តរជាតិថ្មីទាំងពីរនេះ រួមមាន ទី១-ក្រុមហ៊ុនអាកាសចរណ៍ Trinity Airways (TW)ដែលនឹងហោះហើរពីទីក្រុងសេអ៊ូល-អ៊ីនឈុន (ICN) មកកាន់ខេត្តសៀមរាប (SAI) ប្រទេសកម្ពុជា។ ក្រុមហ៊ុននេះ នឹងប្រតិបត្តិការជើងហោះហើរជារៀងរាល់ថ្ងៃចាប់ពីថ្ងៃទី ២៤ ខែធ្នូ ឆ្នាំ ២០២៦ ដល់ថ្ងៃទី ៣ ខែមីនា ឆ្នាំ ២០២៧ ដោយប្រើប្រាស់យន្តហោះប្រភេទ Boeing 737-800។ ការដាក់ឱ្យដំណើរការជើងហោះហើរថ្មីនេះ គឺចំពេលដែលកម្ពុជាស្ថិតក្នុងរដូវកាលដែលមានភ្ញៀវទេសចរមកទស្សនាក្រាស់ក្រែលបំផុត។ទី២- ក្រុមហ៊ុនអាកាសចរណ៍ China Eastern Airlines (MU)ដែលមានផ្លូវហោះហើរពីទីក្រុងគុនមីង (KMG) មកកាន់ខេត្តសៀមរាប (SAI)។ ក្រុមហ៊ុននេះបានបង្កើនចំនួនជើងហោះហើរលើផ្លូវគុនមីង-សៀមរាប ពី ៣ ជើង ទៅ ៤ ជើងក្នុងមួយសប្តាហ៍ (ថ្ងៃអង្គារ ព្រហស្បតិ៍ សៅរ៍ និងអាទិត្យ) ដោយប្រើប្រាស់យន្តហោះប្រភេទ Boeing 737-800 ដែលបានចាប់ផ្តើមតាំងពីថ្ងៃទី២៥ ខែតុលា ឆ្នាំ ២០២៦។ការបន្ថែមជើងហោះហើរនេះ នឹងជួយសម្រួលដល់ការធ្វើដំណើរពីតំបន់ភាគនិរតីនៃប្រទេសចិនមកកាន់កម្ពុជា។ ឯកឧត្តម បាននិយាយថា ការពង្រីកបណ្តាញតភ្ជាប់ផ្លូវអាកាសទាំងពីរនេះ នឹងផ្តល់អត្ថប្រយោជន៍សំខាន់ៗ រួមមាន ពង្រឹងទំនាក់ទំនងជាមួយទីផ្សារទេសចរណ៍សំខាន់ៗចំនួនពីរនៅអាស៊ីឦសាន, បង្កើនចំនួនភ្ញៀវទេសចរអន្តរជាតិ និងបង្កើតឱកាសសេដ្ឋកិច្ចបន្ថែមទៀតសម្រាប់ខេត្តសៀមរាប, និងពង្រឹងតួនាទីរបស់ខេត្តសៀមរាប ក្នុងនាមជាគោលដៅទេសចរណ៍វប្បធម៌ និងបេតិកភណ្ឌដ៏លេចធ្លោមួយ ព្រមទាំង ជំរុញវឌ្ឍនភាពនៃយុទ្ធសាស្ត្ររបស់កម្ពុជា ក្នុងការធ្វើពិពិធកម្ម និងពង្រីកបណ្តាញតភ្ជាប់ផ្លូវអាកាសអន្តរជាតិ។ ឯកឧត្តម មានប្រសាសន៍ថា៖ «រដ្ឋលេខាធិការដ្ឋានអាកាសចរស៊ីវិលនៅតែបន្តប្តេជ្ញាចិត្តក្នុងការសម្របសម្រួលប្រតិបត្តិការរបស់ក្រុមហ៊ុនអាកាសចរណ៍ ជំរុញលទ្ធភាពចូលទៅកាន់ទីផ្សារ និងសហការយ៉ាងជិតស្និទ្ធជាមួយដៃគូក្នុងវិស័យអាកាសចរណ៍ និងទេសចរណ៍ ដើម្បីលើកកម្ពស់បណ្តាញតភ្ជាប់ និងការអភិវឌ្ឍសេដ្ឋកិច្ចរបស់កម្ពុជា»។ របាយការណ៍ SSCA បង្ហាញថា គិតត្រឹមថ្ងៃទី១៨ ខែតុលា ឆ្នាំ២០២៦ បានបញ្ជាក់ថា កម្ពុជាមានក្រុមហ៊ុនអាកាសចរណ៍ កំពុងប្រតិបត្តិការហោះហើរចំនួន ៣៥ ក្រុមហ៊ុន (ជាតិ ៤ និងអន្តរជាតិ ៣១) និងមានជើងហោះហើរ ជាមធ្យម ១១០០ជើង(ទ្វេទិស)ក្នុងមួយ​សប្តាហ៍ ក្នុងនោះ អាកាសយានដ្ឋានអន្តរជាតិតេជោ (KTI) មានចំនួនជើងហោះហើរច្រើនជាងគេចំនួន ៨២០ ជើង(ទ្វេទិស) ក្នុងមួយ សប្តាហ៍ តាមពីក្រោយដោយអាកាសយានដ្ឋានអន្តរជាតិសៀមរាបអង្គរ (SAI) មានចំនួន ២៩២ ជើង(ទ្វេទិស) ក្នុងមួយសប្តាហ៍ និងអាកាសយានដ្ឋានអន្តរជាតិព្រះសីហនុ (KOS) មានចំនួន ៥២ ជើង/ សប្តាហ៍ (ទ្វេទិស)៕ អត្ថបទ៖ ធូ វិរៈ

ក្រុមការងារអន្តរក្រសួងប្រារព្ធពិធីក្រុងពាលីបើកការដ្ឋានសាងសង់«ភូមិហ្វ្រង់កូហ្វនី»

2026/10/28 03:08:09 pm        307
Facebook Telegram Linkin
ភ្នំពេញ៖ នៅថ្ងៃទី២៨ ខែតុលា នេះ ក្រុមការងារអន្តរក្រសួង ដែលដឹកនាំដោយរដ្ឋមន្ត្រីក្រសួងទេសចរណ៍, ក្រសួងកិច្ចការនារី និងក្រសួងវប្បធម៌ និងវិចិត្រសិល្បៈ និងមន្ត្រីក្រោមឱវាទ បានប្រារព្ធពិធីក្រុងពាលីបួងសួងសុំសេចក្តីសុខចម្រើន បើកដំណើរការសាងសង់«ភូមិហ្វ្រង់កូហ្វនី» ដើម្បីបង្ហាញអត្តសញ្ញាណជាតិ ប្រពៃណី វប្បធម៌ សិល្បៈ និងផលិតផល កម្ពុជា និងពិភពហ្វ្រង់កូហ្វូនី ទៅនៅសួនវត្តបុទុមវតី។ ឯកឧត្តមបណ្ឌិត ជុក ជំនោរ អគ្គនាយក អគ្គនាយកដ្ឋានអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ នៃក្រសួងទេសចរណ៍ បានឲ្យដឹងថា នៅសល់រយៈពេល១៨ថ្ងៃទៀតប៉ុណ្ណោះ កិច្ចប្រជុំកំពូលហ្វ្រង់កូហ្វូនី លើកទី២០ ដែលកម្ពុជាធ្វើម្ចាស់ផ្ទះរៀបចំ ចាប់ពី១៤ ដល់ថ្ងៃទី១៦ ខែវច្ឆិកា នឹងឈានចូលមកដល់ ហើយក្នុងរយៈពេលនេះ ក្រុមការងារអន្តរក្រសួង នឹងប្រើពេលជាងពីរសប្តាហ៍ពេញ បើកការដ្ឋានសាងសង់ភូមិហ្វ្រង់កូហ្វូនី ឲ្យល្អឥតខ្ចោះ និងរៀបចំឲ្យហើយមុនពិធីបើកសម្ពោធជាផ្លូវការព្រឹត្តិការណ៍អម «ភូមិហ្វ្រង់កូហ្វនី»ដែល នឹងប្រព្រឹត្តទៅចាប់ពីថ្ងៃទី១៣ ដល់ថ្ងៃទី១៧ ខែវិច្ឆិកា ឆ្នាំ២០២៦ឈានចូលមកដល់។ ឯកឧត្តមបណ្ឌិត បានបន្តថា ថា ព្រឹត្តិការណ៍អម «ភូមិហ្វ្រង់កូហ្វនី» នឹងសាងសង់សម្រាប់រៀបចំកម្មវិធី សំខាន់ៗដូចជា៖ ទី១ រៀបចំទីតាំងពន្លាជាតិ សម្រាប់តាំងបង្ហាញពីសក្តានុពលទេសចរណ៍ វប្បធម៌ និង អត្តសញ្ញាណរបស់បណ្តាប្រទេសជាសមាជិកអង្គការហ្វ្រង់កូហូនី ។ ទី២ រៀបចំទីតាំងស្តង់ពិព័រណ៍ទូទៅ សម្រាប់តាំងបង្ហាញសមិទ្ធផលរបស់ក្រសួង-ស្ថាប័នរដ្ឋ ផលិតផលពីវិស័យឯកជន ។ ទី៣ រៀបចំទីតាំងភូមិម្ហូបអាហារ សម្រាប់ផ្តល់នូវបទពិសោធន៍ភ្លក់រសជាតិម្ហូបអាហារប្រពៃណីខ្មែរ និងអន្តរជាតិ និងផលិតផលក្នុងស្រុកនានាទៀត និងទី៤ រៀបចំទីតាំងសម្ដែងសិល្បៈ និងវប្បធម៌ បង្ហាញទស្សនីយភាពចម្រុះជាតិ និងអន្តរជាតិជារៀងរាល់ថ្ងៃ និងមានការរៀបចំសកម្មភាពអមផ្សេងៗជាច្រើនទៀត។ សូមបញ្ជាក់ថា ព្រឹត្តិការណ៍អម «ភូមិហ្វ្រង់កូហ្វនី» គឺជាបេះដូងវប្បធម៌នៃកិច្ចប្រជុំកំពូលហ្រ្វង់កូហ្វូនី ដែលផ្ដល់ឪកាសមាសសម្រាប់កម្ពុជាក្នុងការបង្ហាញអត្តសញ្ញាណជាតិ ប្រពៃណី សិល្បៈ និងផ្សព្វផ្សាយគោលដៅទេសចរណ៍សក្តានុពលតំបន់បេតិកភណ្ឌ និងផលិតផល ទេសចរណ៍ថ្មីៗ ទៅកាន់ គណៈប្រតិភូជាន់ខ្ពស់ និងភ្ញៀវអន្តរជាតិមកពីជាង ៨០ ប្រទេស ហើយក៏នឹងផ្តល់អត្ថប្រយោជន៍សេដ្ឋកិច្ច ការពង្រីកទីផ្សារផលិតផលក្នុងស្រុក តភ្ជាប់ដៃគូរវាងសហគ្រិន សិប្បករ ផលិតករ និងសិល្បករកម្ពុជាទៅកាន់បណ្តាប្រទេសហ្វ្រង់កូហ្វនី៕ អត្ថបទ៖ ស៊ុម សុខជា

ក្រសួងទេសចរណ៍ ចុះអប់រំផ្សព្វផ្សាយការប្រយុទ្ធ​ប្រឆាំងផលិតផល​ក្លែងក្លាយ​ដែល​បង្ក​គ្រោះ​ថ្នាក់​ដល់​សុខភាព និងផលប៉ះពាល់​លើ​វិស័យ​ទេសចរណ៍​ដល់​មូលដ្ឋាន​អាជីវកម្ម​ទេសចរណ៍​ក្នុង​ក្រុង​បាត់ដំបង

2026/10/28 11:07:20 am        184
Facebook Telegram Linkin
បាត់ដំបង៖ ក្រុមការងារក្រសួងទេសចរណ៍ដឹកនាំដោយ លោក គុន វិភា អគ្គាធិការរង សហការ​ជាមួយ​មន្ទីរទេសចរណ៍ខេត្តបាត់ដំបង​ ចុះអប់រំផ្សព្វផ្សាយ​ការ​ប្រយុទ្ធ​ប្រឆាំង​ផលិត​ផល​ក្លែង​ក្លាយ​ដែល​បង្ក​គ្រោះ​ថ្នាក់ដល់សុខភាព និងផលប៉ះពាល់លើវិស័យ​ទេសចរណ៍​ដល់​មូលដ្ឋាន​អាជីវកម្ម​ទេសចរណ៍​ក្នុង​ក្រុងបាត់ដំបង។ លោក ហម អរុណ អនុប្រធានមន្ទីរទេសចរណ៍ខេត្តបាត់ដំបង គូសបញ្ជាក់ថា ដើម្បីធានាសុវត្ថិភាពដល់ភ្ញៀវទេសចរក្នុងការប្រើប្រាស់ផលិតផលទេសចរណ៍ ជាពិសេសក្នុងវិស័យម្ហូបអាហារ ក្រសួងទេសចរណ៍ក្នុងនាមសមាជិកគណៈកម្មាធិការប្រយុទ្ធប្រឆាំងផលិតផលក្លែងក្លាយ បានចុះផ្សព្វផ្សាយបញ្ជ្រាបការយល់ដឹងដល់ប្រតិបត្តិករទេសចរណ៍ ស្តីពីការការពារ ទប់ស្កាត់ ការប្រយុទ្ធប្រឆាំងផលិតផលក្លែងក្លាយ ទាំងផលិតផលខូចគុណភាព ការក្លែងបន្លំម៉ាក និងផលិតផលហួសសុពលភាពជាដើម។ លោក ហម អរុណ សង្កត់ធ្ងន់ថា ការយកចិត្តទុកដាក់ចំពោះសុខភាពប្រជាពលរដ្ឋ និងភ្ញៀវទេសចរជាកត្តាសំខាន់ខ្លាំងណាស់ព្រោះម្ហូបអាហារជាគុណតម្លៃក្នុងវិស័យទេសចរណ៍ ដូច្នេះការចុះអប់រំផ្សព្វផ្សាយអំពីការប្រយុទ្ធប្រឆាំងផលិតផលក្លែងក្លាយដែលបង្កគ្រោះថ្នាក់ដល់សុខភាព និងផលប៉ះពាល់លើវិស័យទេសចរណ៍ពិតជាទទួលបានការគាំទ្រយ៉ាងខ្លាំងពីម្ចាស់មូលដ្ឋានអាជីវកម្មទេសចរណ៍ក្នុងក្រុងបាត់ដំបង។ លោក ហម អរុណ ឱ្យដឹងបន្ថែមថា ម្ចាស់មូលដ្ឋានអាជីវកម្មទេសចរណ៍ក្នុងក្រុងបាត់ដំបងមានឆន្ទៈខ្ពស់ក្នុងការចូលរួមលើកកម្ពស់ផលិតផលក្នុងស្រុក និងបន្តពហិកាទំនិញរបស់ថៃ។ លោក ហម អរុណ បញ្ជាក់ថាក្នុងនាមក្រុងបាត់ដំបងជាសមាជិកទីក្រុងដែលមានភាពច្នៃប្រតិដ្ឋផ្នែកម្ហូបអាហាររបស់អង្គការយូណេស្កូ ម្ចាស់អាជីវកម្មទេសចរណ៍ប្ដេជ្ញាធ្វើយ៉ាងធានាឱ្យម្ហូបអាហារមានរសជាតិ គុណភាព និងមិនប៉ះពាល់ដល់សុខភាពភ្ញៀវទេសចរ៕

ក្រសួងទេសចរណ៍ ជំរុញកាត់បន្ថយគម្លាត​បណ្តុះបណ្តាលជំនាញ និង​ការ​ផ្តល់​ឱកាស​ការងារ​ជូន​យុវជន

2026/10/27 01:57:50 pm        331
Facebook Telegram Linkin
ក្រសួងទេសចរណ៍ ដៃគូម្ចាស់ជំនួយ​ សាលាបណ្តុះបណ្តាលជំនាញវិជ្ជាជីវៈទេសចរណ៍ អាជីវកម្ម​ទេសចរណ៍ និងដៃគូ​នានាទៀត បានសហការជំរុញកាត់បន្ថយគម្លាត ការ​បណ្តុះ​បណ្តាល​ជំនាញ​ទេសចរណ៍​ជូនយុ​វជន និងតម្រូវការរបស់អាជីវកម្មទេសចរណ៍ និងការផ្តល់ឱកាស​ការងារ​ជូន​យុវជន​។នៅក្នុង​ពិភាក្សាពង្រឹងកិច្ចសហការសម្រាប់កម្លាំងពលកម្មជំនាញ និងសមត្ថភាព​ប្រកួត​ប្រជែង​ក្នុង​វិស័យ​ទេសចរណ៍ ថ្ងៃទី២៧ ខែតុលានេះ ក្រុមអ្នកជំនាញមកពីក្រសួងការងារ និង​បណ្តុះ​បណ្តាល​វិជ្ជាជីៈ ​និងផ្នែកឯកជនក្នុងវិស័យទេសចរណ៍ បានលើកឡើងថា គ្រប់ក្រុម​ហ៊ុន​អាជីវកម្ម​ដែល​មាន​ត្រូវ​ការ​កម្លាំងពលកម្ម និងសាលាបណ្តុះបណ្តាលជំនាញវិជ្ជាជីវៈជូនយុវជនជាដើម គួរ​ត្រូវ​ពង្រឹង​អភិបាល​កិច្ច​សហការ បង្កើនការទំនាក់ទំនង ពិភាក្សាកាត់បន្ថយគន្លាត និងដោះស្រាយ​អំពី​តម្រូវ​ការ​នានា​របស់អាជីវកម្ម ការពង្រីកសមត្ថភាពបណ្តុះបណ្តាលជំនាញ និងការផ្តល់​ឱកាស​ការ​ងារ​របស់​យុវជន​ជាដើម ដើម្បីធនាថា អាជីវកម្មទទួល​បាន​ធន​ធាន​មនុស្ស​មាន​សមត្ថភាព​ជំនាញ​ការងារ​ខ្លាំង​ និងជំរុញអាជីវកម្មមានភាពរីកចម្រើន ផ្តល់សេវាកម្មមានគុណភាពខ្ពស់។នៅក្នុងឱកាសប្រារព្វពិធីបិទ ទិវាជំនាញហូកា ឆ្នាំ២០២៦ ឯកឧត្តម ហួត ហាក់ រដ្ឋមន្ត្រី​ក្រសួង​ទេសចរណ៍​ បានណែនាំឲ្យគណៈកម្មការគ្រប់គ្រងគម្រោងហូកា អង្គការដៃគូម្ចាស់ជំនួយ មន្ទីរ​ទេសចរណ៍​តាមខេត្តគោលដៅ និងភាគីពាក់ព័ន្ធទាំងអស់បន្តពង្រឹងស្មារតីម្ចាស់ការ នវានុវត្តន៍ និង​កិច្ច​សហការ ដើម្បីពង្រីកវិសាលភាពនៃការបណ្តុះបណ្តាល ឱ្យកាន់​តែ​ឆ្លើយ​តប​នឹង​តម្រូវ​ការ​ទីផ្សារ​ការងារ និងបង្កើតឱកាសអាជីពកាន់តែប្រសើរសម្រាប់យុវជន និងអ្នក​ប្រកប​វិជ្ជាជីវៈ​ទេសចរណ៍​។ឯកឧត្តម រដ្ឋមន្ត្រី បន្តថា ចាប់តាំងពីឆ្នាំ២០២០ រហូតដល់ ត្រីមាសទី៣ ឆ្នាំ២០២៦, គម្រោង​ហូកា ​បានបណ្តុះបណ្តាល និងពង្រឹងសមត្ថភាព យុវជនក្រីក្រ និងងាយរងគ្រោះ អ្នកជំនាញ​កម្រិត​ទាប​ ម្ចាស់អាជីវកម្ម និងអ្នកគ្រប់គ្រងក្នុងវិស័យបដិសណ្ឋារកិច្ច សរុប ១០.៤៨៨នាក់ និង​បានពង្រីកវិសាលភាពរហូតដល់ ១៦ ខេត្តគោលដៅ។ព្រម​ជា​មួយគ្នានេះ ឯកឧត្តម រដ្ឋមន្ត្រី ហួត ហាក់ ក៏បាន លើកទឹកចិត្តឱ្យគ្រប់ភាគីពាក់ព័ន្ធ បន្ត​ពង្រឹង​កិច្ចសហការរវាងរាជរដ្ឋាភិបាល វិស័យឯកជន ស្ថាប័នបណ្តុះបណ្តាល ដៃគូអភិវឌ្ឍន៍ និង​អ្នក​ជំនាញ​ក្នុងឧស្សាហកម្ម ដើម្បីធានាថា ការអភិវឌ្ឍ​ជំនាញ​ត្រូវ​ឆ្លើយ​តប​នឹង​តម្រូវ​ការ​ទីផ្សារ​ការងារ​ និងអាចបង្កើតឱកាសការងារ និងការរីក​ចម្រើន​ក្នុង​អាជីព​សម្រាប់​អ្នក​ប្រកប​វិជ្ជាជីវៈ​ទេសចរណ៍​៕ ​អត្ថបទ ស៊ុម សុខជា

អាជ្ញាធរជាតិព្រះវិហារនឹងពន្លឿនការទល់ទ្រសង្គ្រោះបន្ទាន់ប្រាសាទព្រះវិហារដំណាក់កាលទី២ ឲ្យរួចរាល់នៅ​​ចុងឆ្នាំនេះ

2026/10/22 03:06:41 pm        311
Facebook Telegram Linkin
អាជ្ញាធរជាតិព្រះវិហារនឹងពន្លឿនការអនុវត្តគម្រោងអន្តរាគមន៍ទល់ទ្រសង្គ្រោះបន្ទាន់ប្រា សាទ​ព្រះវិហារ​ ដំណាក់កាលទី២ ឲ្យរួចរាល់នៅចុងឆ្នាំ២០២៦ ដើម្បីបង្ការហានិភ័យផ្សេងៗ។ឯកឧត្តម គង់ ពុទ្ធិការ អគ្គនាយកអាជ្ញាធរជាតិព្រះវិហារ នៅព្រឹកថ្ងៃទី២២ ខែតុលា ឆ្នាំ​២០២៦​នេះ បានប្រាប់BTVថា ឥលូវនេះ​ក្រុម​ការងារ​អាជ្ញាធរ​ជាតិ​ព្រះវិហារ​កំពុង​ធ្វើ​ការ​ទល់​ទ្រ​សង្គ្រោះ​បន្ទាន់​ប្រា​​​​សា​ទព្រះវិហារដំណាក់ទី២ ដោយខិតខំប្រឹងប្រែងធ្វើការងារនេះ ឲ្យរួចរាល់នៅ​អំឡុង​ខែ​វិច្ឆិកា ​ឬយ៉ាងយូរនៅក្នុ​​ងខែ​​ធ្នូ ឆ្នាំ២០២៦ ដើម្បីបង្ការកុំ​ឲ្យមាន​ភាពចៃដន្យ​ណា​មួយ​ដែល​បណ្តាល​ឱ្យបា​ក់បែ​កប្រា​សាទព្រះវិ​​ហា​​​រប​ន្ត​​ទៀត។ ​បន្ទាប់ពីការងារសង្គ្រោះបន្ទាន់រួចរាល់ អាជ្ញាធរជាតិ​ព្រះវិហារ​នឹង​ធ្វើកា​រសិ​​​ក្សា​​​​​វាយតម្លៃពីផលប៉ះ​​ពាល់ និងរបៀបជួសជុលប្រាសាទ​ព្រះវិហារ​ឡើង​វិញ​ក្នុង​កម្រិត​ណាមួ​យ ដើម្បីរក្សាតម្លៃ​​​​​នៃភាពលេចធ្លោ​​​​ជាសកលរបស់ប្រាសាទព្រះវិហារ។ ការអនុវត្តគម្រោងអន្តរាគមន៍ទល់ទ្រសង្គ្រោះបន្ទាន់ប្រាសាទព្រះវិហារ ដំណាក់ទី២ ចាប់ផ្តើមអនុវត្តតាំងពីថ្ងៃទី១៩ ខែតុលា ឆ្នាំ២០២៦ ដែលចំនួន២៩ទីតាំងក្នុងនោះរួមមាន៖ គោបុរៈទី១ មានចំនួន១០ទីតាំង, គោបុរៈទី២ ចំនួន៨ទីតាំង, ស្ពានហាលចន្លោះគោបុរៈទី២ និងទី៣ ចំនួន២ទីតាំង, គោបុរៈទី៣ ចំនួន៥ទីតាំង, គោបុរៈទី៤ ចំនួន១ទីតាំង, ស្ពានហាលចន្លោះគោបុរៈទី៤ និងទី៥ ចំនួន១ទីតាំង គោបុរៈទី៥ ចំនួន១ទីតាំង និងនៅខឿនទ្រក្បាលនាគខាងលិច (ថ្នាក់ទី១ជណ្ដើរបុរាណខាងជើង) ចំនួន១ទីតាំង។ រីឯដំណាក់កាលទី១ បានធ្វើការអន្ដរាគមន៍ទល់ទ្រសង្គ្រោះបន្ទាន់ប្រាសាទព្រះវិហារ រួចរាល់ចំនួន២៣ទីតាំង​​ ដោយចាប់ពីគោបុរៈទី១ ដល់គោបុរៈទី៥។ គួរបញ្ជាក់ដែរថា គម្រោងអន្ដរាគមន៍ទល់ទ្រសង្គ្រោះបន្ទាន់ប្រាសាទព្រះវិហារ មានគោលបំណងដើម្បីទប់ស្កាត់ការដួលរលំ និងការខូចខាតរចនាសម្ព័ន្ធសំណង់ប្រាសាទ ការពារតម្លៃបេតិកភណ្ឌប្រ​​​វត្តិសា​ស្រ្ត​​​ ដើម្បីធានាថា ប្រាសាទព្រះវិហារនៅតែរឹងមាំ និងមានសុវត្ថិភាព មុននឹងឈានដល់ការជួសជុលនាពេលអនាគត៕ អត្ថបទ៖ទូច សោភ័ណ

បណ្ដាញសង្គម

ព័ត៌មានថ្មីៗ

សម្ដេចតេជោផ្ដល់អនុសាសន៍ដល់គុនខ្មែរ និងសមាគមខ្មែរនៅជប៉ុនឱ្យខិតខំបន្ថែម ដើម្បីនិរន្តរភាពស្ថាប័ន
11/04/2026 08:11 PM
Facebook Telegram Linkin
អ្នកដំណើរលើ​នាវា Villa Vie Odyssey ចោទប្រកាន់ប្រព័ន្ធផ្សព្វផ្សាយថៃថា បាន​​ «ឃោសនា​» ខណៈ​កោតសរសើរ ចំពោះបដិសណ្ឋារកិច្ចរបស់ប្រជាជនកម្ពុជា
11/04/2026 07:11 PM
Facebook Telegram Linkin
ទីប្រឹក្សា​ IRGC៖ អ៊ីរ៉ង់គំរាមកំណត់គោលដៅមេដឹកនាំរបស់សត្រូវ បើមេបញ្ជាការរបស់ខ្លួនត្រូវបាន​វាយប្រហារ
11/04/2026 07:11 PM
Facebook Telegram Linkin
ឯកឧត្តម គីម វីរៈ អញ្ជើញចូលរួមពិធីបើកសន្និសីទចិន (ក្វាងស៊ី)-អាស៊ាន ស្តីពីកិច្ចសហប្រតិបត្តិការ និងការអភិវឌ្ឍក្នុងវិស័យគ្រប់គ្រងគ្រាអាសន្ន ឆ្នាំ២០២៦
11/04/2026 07:11 PM
Facebook Telegram Linkin
ចិន បញ្ជាក់​ថា ការបញ្ចៀស​ជម្លោះថ្មី នៅតំបន់​មជ្ឈិមបូព៌ា គឺជា «អាទិភាពចម្បងបំផុត»
11/04/2026 06:11 PM
Facebook Telegram Linkin
នាយករដ្ឋមន្ត្រីលីបង់ព្រមានក្រុមហេសបូឡា កុំឱ្យចូលរួមក្នុងសង្គ្រាមផ្សេងទៀត
11/04/2026 06:11 PM
Facebook Telegram Linkin
ក្រសួងការបរទេសឥណ្ឌា៖ ជនជាតិឥណ្ឌាម្នាក់ ស្លាប់ក្នុងការវាយប្រហារលើនាវាជិតប្រទេសអូម៉ង់
11/04/2026 06:11 PM
Facebook Telegram Linkin
អ្នកនយោបាយបារាំង សាទរជ័យជម្នះរបស់បក្ស​ប្រជាធិបតេយ្យ ក្នុងការបោះឆ្នោតពាក់កណ្តាលអាណត្តិ
11/04/2026 06:11 PM
Facebook Telegram Linkin
កូរ៉េខាងត្បូង និងទួរគី សហប្រតិបត្តិការលើវិស័យថាមពលនុយក្លេអ៊ែរ ការពារជាតិ និងហេដ្ឋារចនាសម្ព័ន្ធ
11/04/2026 06:11 PM
Facebook Telegram Linkin
ឥណ្ឌូនេស៊ីដាក់ពង្រាយទាហាន ២ម៉ឺននាក់ទៅកាន់ទីក្រុងហ្សាកាតា ស្របពេលការស៊ើបអង្កេតពីការលួចស្តាប់ដោយខុសច្បាប់
11/04/2026 06:11 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.