នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ក្រសួងវប្បធម៌ រំឭកសាធារណជន សិល្បករ សិល្បការិនី​ទាំងអស់​ចំពោះ​ការចូលរួម​ថែ​រក្សា​វប្បធម៌​ប្រពៃណី​ទំនៀម​ទម្លាប់ដ៏ផូរផង់របស់ខ្មែរ និងការការពារតម្លៃស្ត្រីក្នុងសង្គម
សម្រស់កំពូលទាំង ៥ របស់ប្រាសាទអង្គរវត្ត មើលពីជ្រុងនិរតីកំពុងទាក់ទាញទេសចរមកថតរូបភាព
រដ្ឋមន្ដ្រីទេសចរណ៍ កោតសរសើរឆន្ទៈកីឡាករ-កីឡាការិនីជាតិ និងអន្ដរជាតិ ក្រោយរួមគ្នាជិះកង់ដើម្បីផ្សព្វផ្សាយទេសចរណ៍ភ្នំដា
រដ្ឋមន្រ្តីក្រសួងទេសចរណ៍​៖ «ការអនុវត្តសាកល្បងលើកលែងទិដ្ឋាការជូនពលរដ្ឋចិន ជាចលករ​នៃការ​អនុវត្ត​ឆ្នាំទេសចរណ៍ កម្ពុជា-ចិន»

វប្បធម៌ និងទេសចរណ៍

ភ្ញៀវជាតិ អន្តរជាតិ ធ្វើលំហាត់យោគៈអបអរសាទរទិវាយោគៈអន្តរជាតិ លើកទី១២

2026/06/21 06:08:44 pm        209
Facebook Telegram Linkin
នៅព្រឹកថ្ងៃទី២១ ខែមិថុនានេះ តំណាងថ្នាក់ដឹកនាំតាមស្ថាប័នរដ្ឋ ឯកជន និងភ្ញៀវជាតិ អន្តរជាតិ ជាច្រើនកុះករ នាំគ្នាធ្វើលំហាត់យោគៈ សម្មាធិ នៅសួនមាត់ទន្លេចតុមុខ មុខវត្តឧណ្ណាលោម រាជធានីភ្នំពេញ ដើម្បីលើកកម្ពស់សុខុមាលភាពសង្គម និងអបអរសាទរទិវាយោគៈអន្តរជាតិ ២១ មិថុនា លើកទី១២។ ភ្ញៀវជាតិ និងទេសចរមកពីឥណ្ឌា បានថ្លែងថា រៀងរាល់ថ្ងៃព្រឹក និងល្ងាច គេតែងតែធ្វើលំហាត់ប្រាណតាមបែបយោគៈ បែបសម្មាធិ នៅក្នុងផ្ទះ ហើយពេលខ្លះធ្វើនៅតាមទីសាធារណៈដែលមានទេសភាពស្រស់ស្អាតខ្យល់អាកាសបរិសុទ្ធ ដើម្បីធ្វើឲ្យប្រសើរឡើងនូវសុខភាពផ្លូវកាយ ផ្លូវចិត្ត កាត់បន្ថយភាពតានតឹងនានា ហើយតាមរយៈទិវាយោគៈអន្តរជាតិនេះ ភ្ញៀវឥណ្ឌានានានោះ ក៏បានអំពាវនាវឲ្យទេសចរឥណ្ឌា និងទេសចរអន្តរជាតិនានាទៀត នាំគ្នាមកទស្សនាកម្ពុជា ជ្រើសរើសកម្ពុជាជាគោលដៅទេសចរណ៍លំហាត់យោគៈ ជាពិសេសនៅតំបន់ទេសចរណ៍វប្បធម៌ខេត្តសៀមរាប រាជធានីភ្នំពេញ និងគោលដៅទេសចរណ៍តាមខេត្តនានាជាច្រើនទៀត។ ឯកឧត្តម គុជ បញ្ញាសារ រដ្ឋលេខាធិការក្រសួងទេសចរណ៍ បានថ្លែងថា កម្ពុជា ឥណ្ឌា បច្ចុប្បន្នបាននិងកំពុងអនុវត្តយុទ្ធនាការ ឆ្នាំទេសចរណ៍កម្ពុជា ឥណ្ឌា សំដៅជំរុញការផ្លាស់ប្តូរលំហូរទេសចររវាងប្រទេសពីរឲ្យមានកំណើនល្អប្រសើរ។ ឯកឧត្តម បន្តថា តាមរយៈការរៀបចំទិវាយោគៈអន្តរជាតិ ឆ្នា២០២៦ គឺបង្ហាញកាន់តែច្បាស់ថា គោលដៅទេសចរណ៍នៅកម្ពុជា គឺមានសុខសុវត្ថិភាពល្អប្រសើរ មានភាពរស់រវើកទាំងលើផ្នែកសេដ្ឋកិច្ច នយោបាយ និងវប្បធម៌ សាសនា ហើយព្រឹត្តិការណ៍នេះទៀត ក៏កំពុងជំរុញអភិវឌ្ឍន៍រាជធានីភ្នំពេញ ក្លាយជា គោលដៅទេសចរណ៍ទីក្រុងបែបសុខុមាលភាព ធ្វើលំហាត់យោគៈ ដ៏មានភាពទាក់ទាញ។ ឯកឧត្តម ហួត ហៃ អភិបាលរង រាជធានីភ្នំពេញ ថ្លែងថា គំនិតផ្តួចផ្តើមនិងកិច្ចខិតខំប្រឹងប្រែង របស់ស្ថានទូតឥណ្ឌាប្រចាំនៅកម្ពុជា និងក្រសួងទេសចរណ៍ សហការរៀបចំរៀបចំទិវាយោគៈអន្តរជាតិរៀងរាល់ឆ្នាំ បានរួមចំណែកខ្លាំង ការលើកកម្ពស់សុខុមាលភាពសង្គមតាមរយៈ ការធ្វើលំហាត់ប្រាណ ការអភិវឌ្ឍហិត្ថារចនាសម្ព័ន្ធកីឡា និងការចូលរួមចំណែកផ្សព្វផ្សាយពិសក្តានុពលទេសចរណ៍នៅកម្ពុជា និងការទាក់ទាញភ្ញៀវទេសចរជាតិ អន្តរជាតិមកទស្សនាកម្សាន្តកាន់តតែច្រើន ស្នាក់នៅយូរថ្ងៃ ពិសេសសម្រាប់គោលដៅទេសចរណ៍នៅរាជធានីភ្នំពេញ ។ សូមបញ្ជាក់ថា ក្នុងរយៈពេល៤ខែ ឆ្នាំ២០២៦នេះ កម្ពុជាទាក់ទាញទេសចរអន្តរជាតិមកទស្សនាមានប្រមាណ១លាន៣សែននាក់ ក្នុងនោះទេសចរឥណ្ឌាមកទស្សនាមានប្រមាណជាង២ម៉ឺននាក់៕ អត្ថបទ ស៊ុម សុខជា

ទេសចរជាតិ-អន្ដរជាតិ៖ អាកាសយានដ្ឋានតេជោ ស័ក្ដិសមនឹងចំណាត់ថ្នាក់​អាកាស​យានថ្មី​ល្អ​លំដាប់​ពិភពលោក

2026/06/19 06:49:04 pm        313
Facebook Telegram Linkin
ប្រជាពលរដ្ឋខ្មែរ និងភ្ញៀវទេសចរអន្ដរជាតិ ថា អាកាសយានដ្ឋានអន្ដរជាតិតេជោ ពិតជា​ស័ក្កិសម​នឹង​ចំណាត់ថ្នាក់ ជាអាកាសយានដ្ឋានអន្ដរជាតិថ្មី ដ៏ស្រស់ស្អាត និងទំនើបស្ដង់ដារ លំដាប់​ពិភពលោក​។ប្រជាពលរដ្ឋខ្មែរ ដែលធ្វើដំណើរទៅក្រៅប្រទេស បានប្រាប់ BTV នៅថ្ងៃទី១៩ ខែមិថុនា ឆ្នាំ​២០២៦​នេះថា រាល់ពេលធ្វើដំណើរមកដល់អាកាសយានដ្ឋានអន្ដរជាតិតេជោ (KTI) ពួកគេ មាន​អារម្មណ៍រំភើប និង​មោទនភាព​យ៉ាង​ខ្លាំង​ចំពោះ​អាកាស​យាន​ដ្ឋាន​ដ៏​អស្ចារ្យ​របស់​កម្ពុជា​មួយ​នេះ។​ អ្វីដែលពួកគេ ពេញចិត្តបំផុត គឺរចនាបថខ្មែរ អង្គបដិមាដ៏ធំដែលប្រៀបបាន ជាកា​រ​ឱ្យ​ពរ​ជ័យ​ដល់​អ្នកដំណើរចេញចូលកម្ពុជា។ ហើយការទទួលបានចំណាត់ថ្នាក់ ជាអាកាសយានដ្ឋាន​អន្ដរ​ជាតិ​ថ្មីល្អបំផុត និងស្រស់ស្អាតបំផុត លើពិភពលោក គឺពិតជាស័ក្ដិសមបំផុត។ ចំណែកភ្ញៀវទេសចរបរទេស មកពីប្រទេសបារាំង និងឥណ្ឌា ដែលធ្វើដំណើរមកលេងកម្ពុជា បាន​ប្រាប់​ថា ​ពួកគេស្រឡាញ់កម្ពុជា ពីព្រោះមានអារម្មណ៍ថា កក់ក្ដៅដូចជានៅប្រទេសរបស់ពួកគេ។ ហើយ​ចំពោះបរិយាកាសនៅអាកាសយានដ្ឋានអន្ដរជាតិតេជោ ពួគគេពេញចិត្ត ពីព្រោះសេវាកម្ម​បម្រើ​អតិថិជនប្រកបដោយយកចិត្តទុកដាក់ខ្ពស់។សូមជម្រាបជូនថា អាកាសយានដ្ឋានអន្ដរជាតិតេជោ (KTI) កាលពីថ្ងៃទី១៨ ខែមីនា ឆ្នាំ២០២៦ ត្រូវ​បាន Skytrax World Airport Awards ផ្ដល់ចំណាត់ថ្នាក់លេខ ៥ បន្ទាប់ពីប្រទេស ឥណ្ឌា អាមេរិក, ចិន និងជប៉ុន ដែលជាស្ថានីយអាកាស ថ្មីល្អបំផុតរបស់ពិភពលោក (World’s Best New Airport Terminal 2026) ដោយផ្អែកលើការវាយតម្លៃ ទៅលើវិសាលភាពពេញលេញ នៃ​បរិក្ខា, សេវាកម្មមានគុណភាព និងបទពិសោធន៍របស់អ្នកដំណើរ។ ហើយនៅថ្ងៃទី១៥ ខែមិថុនា ឆ្នាំ​២០២៦នេះ អាកាសយានដ្ឋានអន្ដរជាតិតេជោ ត្រូវបានចាត់ថ្នាក់លេខ ៧ ជាអាកាស​យាន​ដ្ឋាន​ ដ៏ស្រស់ស្អាតបំផុតមួយ របស់ពិភពលោក។ នេះបើយោងតាមសេចក្ដីប្រកាសព័ត៌មានរបស់ Prix Versailles 2026។ ចំណាត់ថ្នាក់នេះ ត្រូវបានផ្ដល់ជូនដោយផ្អែកលើ ស្ថាបត្យកម្មវិសេស ប្រកបដោយភាពច្នៃប្រឌិត ស្ដង់ដារទំនើប និងការរំលេចនូវវប្បធម៌របស់ខ្លួន បង្ហាញ​ដល់​អ្នក​ដំណើរ​ឆ្លង​កាត់​កម្ពុជាតាមជើងអាកាស៕ អត្ថបទ៖ ស៊ីណា

តំណាងវិនិយោគិនចិនទៀជីវជាង ២០០នាក់នឹងមកកម្ពុជាម្តងទៀត ដើម្បីស្វែងរកការបណ្តាក់ទុនវិយោគ

2026/06/16 09:12:45 pm        321
Facebook Telegram Linkin
នៅថ្ងៃទី១៦ ខែមិថុនា អ្នកវិនិយោគទុនចិនជាង ២០០នាក់ ដែលបានអញ្ជើញមកចូ​ល​រួម​កិច្ច​ប្រជុំបើកទូលាយ ប្រធានសមាគម នៃមហាសន្និបាតធុរជនចិនទៀជីវពិភពលោក លើកទី១១ នៅរាជធានីភ្នំពេញ បានត្រឡប់ទៅវិញអស់ហើយ ហើយបណ្តាអ្នកវិនិយោគទុនចិនទាំងនោះ ក៏បានសន្យាមកកម្ពុជាម្តងទៀតនៅចុងឆ្នាំនេះ ដើម្បីចូលរួមកិច្ចប្រជុំមហាសន្និបាតនិងស្វែងរកឱកាសការបណ្តាក់ទុនវិនិយោគទុននៅកម្ពុជា។ បណ្តាអ្នកវិនិយោគទុនចិន បានថ្លែងប្រាប់BTVនៅអាកាសយានដ្ឋានអន្តរជាតិតេជោថា នៅក្នុងដំណើរចូលរួមកិច្ចប្រជុំប្រធានសមាគមនៃមហាសន្និបាតធុរជនចិនទៀជីវពិភពលោក លើកទី១១ និងធ្វើដំណើរកម្សាន្តទេសចរណ៍នៅកម្ពុជាក្នុងរយៈពេលប៉ុន្មានថ្ងៃកន្លងមកនេះ អ្នកវិនិយោគទុនចិននានា ទទួលបានការយល់ដឹងជាច្រើនពីថ្នាក់ដឹកនាំក្រសួងទេសចរណ៍នៅកម្ពុជា ពាក់ព័ន្ធនឹងសក្តានុពលទេសចរណ៍វប្បធម៌ និងវិនិយោគនៅកម្ពុជា ហើយគេក៏បានសន្យាមកកម្ពុជាម្តងទៀត នៅចុងឆ្នាំនេះ ដើម្បីចូលរួមមហាសន្និបាតធុរជនចិនទៀជីវពិភពលោក លើកទី១១ និងស្វែងរកឱកាសការបណ្តាក់ទុនវិនិយោគនៅកម្ពុជា ខណៈកម្ពុជា បច្ចុប្បន្នមានការអភិវឌ្ឍរីកចម្រើន មានសុវត្ថិភាព ពលរដ្ឋមានស្នាមញញឹមរាក់ទាក់ ស្មោះត្រង់ ស្រួលរស់នៅ ជាដើម។ សូមបញ្ជាក់ថា កិច្ចប្រជុំបើកទូលាយ ប្រធានសមាគមនៃមហាសន្និបាតធុរជនចិទៀជីវពិភពលោកលើកទី១១ ឆ្នាំ២០២៦ បានបើកដំណើរការដោយ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងឯកឧត្តម វ៉ាង វិនពីន ឯកអគ្គរដ្ឋទូវិសាមញ្ញនិងពេញសមត្ថភាពចិន ប្រចាំនៅកម្ពុជា ដោយមានប្រធាន អនុប្រធាន សមាគមចិន និងក្រុមហ៊ុនចិនទៀជីវធំៗមកពីតាមប្រទេសនានាលលើពិភពលោក និងនៅកម្ពុជា ចូលរួមប្រមាណជាង៤០០នាក់ ហើយកិច្ចប្រជុំក៏បានព្រមព្រៀងឯកឆន្ទឲ្យកម្ពុជាធ្វើជាម្ចាស់ផ្ទះជាលើកដំបូង រៀបចំមហាសន្និបាតធុរជនចិនទៀជីវ លើកទី១១ ដែលនឹងប្រព្រឹត្តទៅនៅថ្ងៃទី២ ដល់ថ្ងៃទី៥ ខែធ្នូ ឆ្នាំ២០២៦ នេះ ៕ អត្ថបទ៖ ស៊ុម សុខជា

អាកាសយានដ្ឋានអន្តរជាតិតេជោ ជាប់ចំណាត់ថ្នាក់ក្នុងបញ្ជី អាកាសយានដ្ឋាន​ដ៏ស្រស់ស្អាតបំផុតមួយលើពិភពលោក ក្នុងឆ្នាំ ២០២៦

2026/06/16 06:48:22 pm        515
Facebook Telegram Linkin
អាកាសយានដ្ឋានអន្តរជាតិតេជោ (KTI) ជាប់ចំណាត់ថ្នាក់ក្នុងបញ្ជីជា អាកាសយានដ្ឋានដ៏ស្រស់ស្អាតបំផុតមួយក្នុងចំណោមអាកាសយានដ្ឋាន ចំនួន ៧ នៅក្នុងពិភពលោក ក្នុងឆ្នាំ២០២៦។ នេះបើយោងតាមសេចក្តីប្រកាសព័ត៌មានរបស់ Prix Versailles 2026 ដែលចេញផ្សាយនៅថ្ងៃទី១៥ ខែមិថុនា ឆ្នាំ២០២៦ ម្សិលមិញនេះ។សេចក្តីប្រកាសព័ត៌មានបានបញ្ជាក់ថា គម្រោងទាំងប្រាំពីរនេះបានបង្ហាញអំពីស្ថាបត្យកម្មដ៏វិសេសវិសាល និងប្លែកពីគេ បង្ហាញពីរបៀបដែលអាកាសយានដ្ឋានកំពុងងាកចេញពីស្តង់ដារចាស់ ដើម្បីផ្តល់ជូនពិភពលោកនូវស្តង់ដារថ្មីកាន់តែសម្បូរបែប និងស្រស់បំព្រង។លោក Jérôme Gouadain អគ្គលេខាធិការនៃ Prix Versailles បានបញ្ជាក់ពីការជ្រើសរើសនៅឆ្នាំនេះថា៖ “…មិនថាពួកគេទើបនឹងលេចចេញនៅលើជើងមេឃ ឬបានឆ្លងកាត់ការជួសជុលធំដុំនោះទេ អាកាសយានដ្ឋានទំនើបៗគឺជាភាពច្នៃប្រឌិត ហើយដែលចំណុចសំខាន់ៗត្រូវបានរំលេចដែលទាក់ទងនឹងវប្បធម៌ក្នុងប្រទេស និងតំបន់របស់ពួកគេ។ ភាពច្នៃប្រឌិត ស្ថាបត្យកម្មនៃអាកាសយានដ្ឋាន ការធ្វើទំនើបកម្ម ដើម្បីសម្រួលដល់ការកើនឡើងនៃការធ្វើដំណើរ និងតម្រូវការសម្រាប់ល្បឿនទៅកាន់អាកាសយានដ្ឋានដទៃទៀត”។អាកាសយានដ្ឋាន និង/ឬស្ថានីយចេញដំណើរ-ស្ថានីយមកដល់ ចំនួន ៣ ដែលឈ្នះជ័យលាភីពីក្នុងបញ្ជីឆ្នាំ២០២៦នេះ នឹងទទួលបានចំណាត់ថ្នាក់ពិភពលោក ហើយដែលនឹងត្រូវផ្តល់រង្វាន់នៅចុងឆ្នាំ២០២៦នេះ ដោយ Prix Versailles។សូមរម្លឹកថា អាកាសយានដ្ឋានអន្តរជាតិតេជោ នៅក្នុងខេត្តកណ្តាល និងមួយផ្នែកនៃខេត្តតាកែវ អាកាសយានដ្ឋានកម្រិត 4F ដែលមានទុនវិនិយោគប្រមាណ ២ ០០០លានដុល្លារអាម៉េរិក ដែលអនុញ្ញាតឱ្យយន្តហោះឆ្លងទ្វីបគ្រប់ប្រភេទចុះចតបាន។អាកាសយានដ្ឋាននេះ ត្រូវបានបើកការដ្ឋានសាងសង់នៅថ្ងៃទី០៧ ខែមករា ឆ្នាំ២០២០ ហើយការសាងសង់ដំណាក់កាលទី១ ត្រូវបានបិទបញ្ចប់ទាំងស្រុងនៅថ្ងៃទី៣១ ខែកក្កដា ឆ្នាំ២០២៥ ព្រមទាំងសម្ពោធជាផ្លូវការនៅថ្ងៃទី២០ ខែតុលា ឆ្នាំ២០២៥ ដោយប្រើប្រាស់កម្មករ និងស្ថាបត្យកម្មដោយកូនខ្មែរសុទ្ធសាធ។សូមបញ្ជាក់ផងដែរថា សម្រាប់ដំណាក់កាលទី១ អាកាសយានដ្ឋានអន្តរជាតិតេជោ អាចទទួលអ្នកដំណើរបាន១៣លាននាក់ក្នុងមួយឆ្នាំ ជាមួយនឹងទំនិញប្រមាណ ២ ៦០០តោន ពីឆ្នាំ២០២៥-២០៣០។ សម្រាប់ដំណាក់កាលទី២ ពីឆ្នាំ២០៣០-២០៥០ អាកាសយានដ្ឋានអាចទទួលអ្នកដំណើរបានដល់ប្រមាណ៣០លាននាក់ក្នុងមួយឆ្នាំ៕ https://share.google/e5SwxJseBP3hLc0jn

ក្រុមនិស្សិតសាកលវិទ្យាល័យជាតិគ្រប់គ្រងបង្កើតបច្ចេកវិទ្យា AI ជួយសម្រួលការងារវិស័យទេសចរណ៍ និងបដិសណ្ឋារកិច្ច

2026/06/12 10:23:40 pm        1543
Facebook Telegram Linkin
ក្រុមនិស្សិត មកពីជំនាញទេសចរណ៍ បដិសណ្ឋារកិច្ច និងសេដ្ឋកិច្ចឌីជីថល នៃសាកលវិទ្យាល័យជាតិគ្រប់គ្រង នៅថ្ងៃទី១២ ខែមិថុនា ឆ្នាំ ២០២៦នេះ បានដាក់បង្ហាញបច្ចេកវិទ្យា AI ដែលពួកគេរួមគ្នាបង្កើតឡើង ពាក់ព័ន្ធនឹងបំប្លែងគំនិតឱ្យទៅជាដំណោះស្រាយជាក់ស្តែង គាំទ្រដល់សេវាកម្មទេសចរណ៍ ប្រតិបត្តិការបដិសណ្ឋារកិច្ច ការអប់រំ សុខាភិបាល ហិរញ្ញវត្ថុ ការអភិវឌ្ឍអាជីព និងការធ្វើសេចក្តីសម្រេចចិត្តក្នុងជីវភាពរស់នៅប្រចាំថ្ងៃ។ ក្រុមនិស្សិតចំនួន ១៤ ក្រុម បានដាក់បង្ហាញស្នាដៃ ជាបច្ចេកវិទ្យា AI របស់ខ្លួន ដែលដើរស្របនឹងសង្គមបច្ចេកវិទ្យានាពេលបច្ចុប្បន្ន និងជាដំណោះស្រាយបញ្ហាសង្គមនានា។ ការដាក់បង្ហាញបច្ចេកវិទ្យា AI របស់ក្រុមនិស្សិត សាកលវិទ្យាល័យជាតិគ្រប់គ្រងនៅថ្ងៃនេះ រួមមាន ប្រព័ន្ធប្រឹក្សាយោបល់លើការស្នើសុំទិដ្ឋាការ ប្រព័ន្ធប្រឹក្សាយោបល់លើការស្នើសុំទិដ្ឋាការ ប្រព័ន្ធបណ្តុះបណ្តាលការប្រាស្រ័យទាក់ទងផ្នែកបដិសណ្ឋារកិច្ចការិយាល័យខាងមុខ ប្រព័ន្ធរៀបចំកម្មវិធីទស្សនកិច្ចទេសចរណ៍ផ្ទាល់ខ្លួន ប្រព័ន្ធត្រួតពិនិត្យថ្លៃសេវាកម្មទេសចរណ៍ ប្រព័ន្ធរៀបចំផែនការសេវាកម្មម្ហូបអាហារ ប្រព័ន្ធរៀបចំផែនការទេសចរណ៍ធម្មជាតិផ្អែកលើសហគមន៍ ប្រព័ន្ធរៀបចំផែនការអាពាហ៍ពិពាហ៍ ប្រព័ន្ធរៀបចំផែនការធ្វើដំណើរទៅកម្សាន្តនៅខេត្តសៀមរាប ប្រព័ន្ធជំនួយការផ្នែកអាហារូបត្ថម្ភផ្ទាល់ខ្លួន ប្រព័ន្ធជំនួយការរៀបចំផែនការថវិកា ប្រព័ន្ធប្រឹក្សាយោបល់ពិនិត្យនិងវិនិច្ឆ័យស្បែក ប្រព័ន្ធណែនាំមុខម្ហូប និងអាហារក្នុងស្រុក ប្រព័ន្ធដៃគូត្រៀមប្រឡង IELTS ប្រព័ន្ធ GPT ផ្គូរផ្គងការងារ។ ក្រុមនិស្សិតដែលផ្តោតលើវិស័យទេសចរណ៍ ក៏បានពន្យល់លម្អិតបន្ថែមលើ ប្រព័ន្ធ AI របស់ខ្លួន អាចមានលទ្ធភាពបង្កើតជាគម្រោងមួយច្បាស់លាស់សម្រាប់អ្នកចង់ធ្វើដំណើរកម្សាន្ត ដោយលម្អិតការប្រើប្រាស់ថវិកា សកម្មភាពកម្សាន្ត ទីកន្លែងស្នាក់នៅ ទីកន្លែងពិសារអាហារថែមទៀតផង។ សម្រាប់ការដាក់បង្ហាញបច្ចេកវិទ្យា AI នៅថ្ងៃនេះដែរ លោកសាស្ត្រាចារ្យ ហោ ប៉េង សាកលវិទ្យាធិការ នៃសាកលវិទ្យាល័យជាតិគ្រប់គ្រង បានលើកឡើងថា គម្រោងទាំងនេះបានបង្ហាញពីសមត្ថភាពរបស់និស្សិតក្នុងការស្វែងរកបញ្ហាប្រឈមក្នុងពិភពពិត ស្វែងយល់ពីតម្រូវការរបស់អតិថិជន និងអភិវឌ្ឍដំណោះស្រាយដែលជំរុញដោយ AI ជាមួយនឹងការអនុវត្តជាក់ស្តែង។ សមត្ថភាពទាំងនេះ គឺពិតជាខ្វះមិនបានសម្រាប់កម្លាំងពលកម្ម និងប្រព័ន្ធអេកូឡូស៊ីសហគ្រិនភាពនាពេលអនាគតរបស់កម្ពុជា។ សាកលវិទ្យាធិការ បានលើកឡើងដែរថា កិច្ចការទាំងនេះ ក៏ដើរស្របទៅនឹងគោលដៅកម្ពុជា ដែលកំពុងរុញច្រានរបៀបវារៈបច្ចេកវិទ្យាឌីជីថល នៅតាមគ្រឹះស្ថានសិក្សា និងសាកលវិទ្យាល័យ នានា លើតួនាទី និងការទទួលខុសត្រូវយ៉ាងសំខាន់ក្នុងការបំពាក់បំប៉នសិស្ស-និស្សិត នូវចំណេះដឹង បំណិន និងផ្នត់គំនិតបច្ចេកវិទ្យាដែលចាំបាច់ ដើម្បីអាចរីកចម្រើន និងប្រកួតប្រជែងនៅក្នុងយុគសម័យថ្មីនេះបាន៕អត្ថបទ៖ គឹម ហុក  

កិច្ចប្រជុំបច្ចេកទេសលើកទី៤២ នៃគណៈកម្មាធិការអាស៊ីស៊ី-អង្គរ និងសំបូរព្រៃគុក បន្ត​ជជែកលើ​បច្ចេកទេសការងារ​អភិរក្ស និងអភិវឌ្ឍន៍ប្រកបដោយចីរភាព

2026/06/09 10:47:11 pm        223
Facebook Telegram Linkin
គណៈកម្មាធិការអន្តរជាតិ សម្របសម្រួលកិច្ចគាំពារ និងអភិវឌ្ឍន៍តំបន់រមណីយដ្ឋានប្រវត្តិសាស្រ្តអង្គរ និងសំបូរព្រៃគុក(ICC-Angkor /Sambor Prei Kuk) បានបើកកិច្ចប្រជុំបច្ចេកទេសលើកទី៤២ រយៈពេល២ថ្ងៃ (៩-១០ មិថុនា ឆ្នាំ២០២៦) នៅសណ្ឋាគារសុខា អង្គរ។ កិច្ចប្រជុំបច្ចេកទេសនេះ ផ្តោតលើការជជែកលម្អិតជុំវិញការងារជួសជុល អភិរក្ស និងអភិវឌ្ឍន៍ប្រកបដោយចីរភាព នៃតំបន់រមណីយដ្ឋានអង្គរ និងសំបូរព្រៃគុក។ កិច្ចប្រជុំនេះដែរ ដឹកនាំដោយសហប្រធាន លោក NAGASE Kensuke អនុប្រធានបេសកកម្មស្ថានទូតជប៉ុនប្រចាំកម្ពុជា និងលោក Pierre VINCENT ទទួលបន្ទុកបេសកកម្ម និងវប្បធម៌នៃស្ថានទូតបារាំងប្រចាំកម្ពុជា និងក្រោមវត្តមានដ៏ខ្ពង់ខ្ពស់របស់លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលនៃអាជ្ញាធរជាតិអប្សរា។ នៅក្នុងពិធីបើកកិច្ចប្រជុំនេះ លោកជំទាវរដ្ឋមន្រ្តី ភឿង សកុណា បានសម្តែងនូវការគោរព និងសោកស្តាយជាពន់ពេកចំពោះមរណភាពរបស់ឯកឧត្តម ជុំ សុភមករា អគ្គនាយករងអាជ្ញាធរជាតិអប្សរា ដែលទទួលមរណភាពនៅថ្ងៃទី១ ខែមិថុនាកន្លងទៅ ដោយសារគ្រោះថ្នាក់ចរាចរណ៍។ នេះជាការបាត់បង់ធនធានមនុស្ស និងថ្នាក់ដឹកនាំសំខាន់មួយរូបរបស់អាជ្ញាធរជាតិអប្សរា ដែលកន្លងមក ឯកឧត្តមបានរួមចំណែកលើការងារបណ្តុះបណ្តាល និងផ្ទេរចំណេះដឹងផ្នែកធនធានមនុស្ស នៅក្នុងស្ថាប័នជាតិមួយនេះ។ល។ ក្នុងនោះដែរ អ្នកចូលរួមក៏បានធ្មឹងធ្មាតគោរពវិញ្ញាណក្ខន្ធឯកឧត្តម ជុំ សុភមករា ផងដែរ។ សូមជម្រាបថា នៅក្នុងកិច្ចប្រជុំបច្ចេកទេសលើកទី៤២នេះដែរ ទាំងអ្នកជំនាញកម្ពុជា និងអន្តរជាតិនឹងពិភាក្សា និងពិនិត្យមើលរបាយការណ៍អភិរក្ស ដំណើរការជួសជុលប្រាសាទបុរាណ ក្នុងតំបន់រមណីយដ្ឋានអង្គរ និងសំបូរព្រៃគុក ព្រមទាំងផ្ដល់អនុសាសន៍បច្ចេកទេសមួយចំនួនថែមទៀតផង។ បន្ថែមលើនេះស្មារតីនៃកិច្ចប្រជុំ ក៏បានបង្ហាញពីគោលបំណងសំខាន់ដោយផ្តោតទៅលើការអភិរក្សថ្មប្រាសាទបុរាណ និងគម្រោងអភិវឌ្ឍន៍ក្នុងតំបន់រមណីយដ្ឋាន ការធ្វើឱ្យមាននិរន្តរភាពបរិស្ថាន ព្រៃឈើ ព្រមទាំងគាំទ្រដល់ការបណ្ដុះបណ្ដាលធនធានមនុស្ស លើជំនាញអភិរក្ស និងផ្នែកបច្ចេកទេសជាច្រើន៕

ទេសចរ៖ បរិស្ថានធម្មជាតិស្រស់ស្អាតរបស់កម្ពុជាបានរួមចំណែកខ្លាំងទាក់ទាញទេសចរអន្តរជាតិ

2026/06/05 10:14:44 pm        320
Facebook Telegram Linkin
ខណៈថ្ងៃនេះ កម្ពុជា ប្រារព្ធទិវាបរិស្ថានជាតិ និងពិភពលោក ៥ មិថុនា, បណ្តា​ភ្ញៀវទេសចរ​អន្តរជាតិបានទទួលស្គាល់ថា កម្ពុជាជាប្រទេសមានបរិស្ថានធម្មជាតិបៃតងស្រស់ស្អាត អនាម័យ សោភ័ណភាព ខ្យល់អាកាសបរិសុទ្ធ មានសុវត្ថិភាព និងមានភាព​ទាក់ទាញ​ខ្លាំង​ក្នុង​ការ​ស្នាក់​នៅ​ដើរ​ទស្សនាកម្សាន្ត។ ទេសចរអន្តរជាតិ បានថ្លែងប្រាប់BTV នៅថ្ងៃទី៥ ខែមិថុនា នេះថា ការមកទស្សនាកម្ពុជា នៅក្នុង​អំឡុងពេលនេះ គឺគេចង់មកទទួលយកពិសោធន៍ការដើរកម្សាន្ត ការស្នាក់នៅ នៅប្រទេស​ដែល​មានបរិស្ថានធម្មជាតិស្រស់ស្អាតល្អបំផុតនៅក្នុងពិភពលោក។ គេមើលឃើញថា កម្ពុជា​មាន​ការ​អភិវឌ្ឍ ការរៀបចំតាំងពីទីក្រុងរហូតដល់ជនបទឱ្យមានបរិស្ថាតស្រស់ស្អាត ទេសភាពបៃតង អនាម័យ មានសុវត្ថិភាព ស្ងប់ស្ងាត់ នេះគឺពិតជាមានភាពទាក់ទាញខ្លាំង និងចង់មកទស្សនាកម្ពុជាម្តងហើយ ម្តងទៀត ពិសេសនៅក្នុងរដូវកាលទេសចរណ៍បៃតង។ បណ្តាភ្ញៀវទេសចរអន្តជាតិ ក៏បានណែនាំឲ្យទេសចរអន្តរជាតិ នាំគ្នាមកទស្សនាកម្ពុជា នៅក្នុងរដូវទេសចរណ៍បៃតងនេះដែរ ដើម្បីទស្សនាពីស្ថានភាពពិតជាក់ស្តែង ខណៈកម្ពុជាត្រូវបានគេទទួលស្គាល់ជាសកល នៅក្នុងបញ្ជីទេសចរណ៍បៃតងប្រចាំឆ្នាំ២០២៦ របស់ទស្សនាវដ្តី Wanderlust Magazine ហើយតាមការសិក្សាស្រាវជ្រាវរបស់ U.S. News & World Report ក៏បានចាត់ថ្នាក់កម្ពុជា ជាប្រទេសដែលមានបរិស្ថានធម្មជាតិល្អបំផុតលេខ១ នៅលើពិភពលោក នៅឆ្នាំ២០២៦ លើកិច្ចខិតខំប្រឹងប្រែងរបស់កម្ពុជា ដែលបានថែរក្សាតុល្យភាពយ៉ាងល្អរវាងការអភិវឌ្ឍ និងការការពារបរិស្ថាន ក្នុងនោះមានការគ្រប់គ្រងបរិស្ថាន ខ្យល់អាកាសល្អ ការគ្រប់គ្រងធនធានធម្មជាតិ និងការអភិរក្សជីវៈចម្រុះប្រកបដោយនិរន្តភាព។ សូមបញ្ជាក់ថា ទិវាបរិស្ថានជាតិ និងបរិស្ថានពិភពលោក ៥ មិថុនា ឆ្នាំ២០២៦នេះ ប្រារព្ធក្រោមប្រធានបទ «សំណល់សូន្យ» ហើយទិវានេះប្រារព្វក្នុងគោលបំណងលើកកម្ពស់ការយល់ដឹងអំពីបរិស្ថាន និងជំរុញចលនាប្រជាពលរដ្ឋព្រះសង្ឃ កងកម្លាំងប្រដាប់អាវុធ មន្ត្រីរាជការគ្រប់លំដាប់ថ្នាក់ សិស្ស និស្សិត និងសាធារណជនទាំងអស់ចូលរួមឱ្យបានផុសផុល ក្នុងកិច្ចគាំពារបរិស្ថាន ការគ្រប់គ្រងសំរាម ប្លាស្ទិក និងសំណល់រឹង ដើម្បីរួមគ្នាការពារភពផែនដី ឱ្យមានភាពស្អាត បៃតង និងចីរភាព ជាឧត្តមប្រយោជន៍ដល់សង្គម និងមនុស្សជាតិគ្រប់ជំនាន់៕ អត្ថបទ៖ ស៊ុម សុខជា

សាជីវកម្មហិរញ្ញវត្ថុអភិវឌ្ឍន៍អន្តរជាតិអាមេរិក-DFC អនុម័តទឹកប្រាក់ ១០០លានដុល្លារ គាំទ្រ​ដល់​កា​​រពង្រីក​ហេដ្ឋារចនាសម្ព័ន្ធអាកាសយានដ្ឋានអន្តរជាតិតេជោ

2026/06/04 11:39:26 pm        506
Facebook Telegram Linkin
ភ្នំពេញ៖ នៅថ្ងៃទី៤ ខែមិថុនា ឆ្នាំ ២០២៦ សាជីវកម្មហិរញ្ញវត្ថុអភិវឌ្ឍន៍អន្តរជាតិរបស់​សហរដ្ឋ​អាមេរិក​ (DFC) បានអនុម័តទឹកប្រាក់ចំនួន ១០០ លានដុល្លារអាមេរិក សម្រាប់​គម្រោង​អាកាស​យាន​ដ្ឋានអន្តរជាតិតេជោ ដើម្បីគាំទ្រដ​ល់​ការ​ពង្រីក​ហេដ្ឋា​រចនា​សម្ព័ន្ធ​អាកាសចរណ៍​របស់​ព្រះរាជា​ណា​ចក្រកម្ពុជា។ ការព្រមព្រៀងទើបត្រូវបានសម្រេច បន្ទាប់ពីការសិក្សាវាយតម្លៃយ៉ាងយកចិត្តទុកដាក់ ក្នុងនោះរួមមាន សមិទ្ធលទ្ធភាពនៃគម្រោង លើតថភាពលក្ខណៈបច្ចេកទេស ប្រតិបត្តិការ ការវាយតម្លៃហេតុនិងផលប៉ះពាល់បរិស្ថាន និងសង្គម (ESIA)ផងដែរ។ ស្របតាមការអនុវត្តនីតិវីធីកន្លងមក នីតិវិធីជាបន្តរបន្ទាប់នឹងត្រូវបំពេញ រួមបញ្ចូលទាំងដំណើរការជូនដំណឹងរបស់សភាជាន់ខ្ពស់ផងដែរ មុននឹងហិរញ្ញប្បទាននេះ ត្រូវទទួលបានភតិសន្យានិងចូលជាស្ថាពរបាន ។ ការសម្រេចបានដ៏សំខាន់នេះ គឺបានមកពីការខិតខំនិងទំនាក់ទំនងរយះពេលជាច្រើនឆ្នាំ រវាងក្រុមហ៊ុនសម្ព័ន្ធកាណាឌីយ៉ា និង OCIC ជាមួយស្ថាប័នផ្សេងៗរបស់សហរដ្ឋអាមេរិក រួមមានស្ថានទូតសហរដ្ឋអាមេរិក សភាពាណិជ្ជកម្មអាមេរិកនៅកម្ពុជា និងបណ្តាក្រុមហ៊ុនអាមេរិកជាច្រើនផ្សេងទៀតដូចជា General Electric, OTIS, Caterpillar, Ford និង Apple ។ តាមរយៈគណៈប្រតិភូធុរកិច្ច ការចូលរួមសន្និបាត និងការសន្ទនាផ្សេងៗ យើងទាំងអស់គ្នាបាននិងកំពុងធ្វើការរួមគ្នាដើម្បីគាំទ្រដល់ការអភិវឌ្ឍន៍ និងការតភ្ជាប់ហេដ្ឋារចនាសម្ព័ន្ធរបស់ព្រះរាជាណាចក្រកម្ពុជា។ ប្រធានក្រុមប្រឹក្សាភិបាល របស់ក្រុមហ៊ុនសម្ព័ន្ធកាណាឌីយ៉ា និង OCIC លោកអ្នកឧកញ៉ាបណ្ឌិត ពុង ឃាវសែ បានប្រសាសន៍ថា “យើងមានសេចក្តីសោមនស្សរីករាយស្វាគមន៍ សាជីវកម្មហិរញ្ញវត្ថុអភិវឌ្ឍន៍អន្តរជាតិរបស់សហរដ្ឋអាមេរិក (DFC) ក្នុងនាមជាដៃគូក្នុងគម្រោងអាកាសយានដ្ឋានអន្តរជាតិតេជោ។ នេះគឺជាការប្តេជ្ញាចិត្តរួមគ្នារវាងកម្ពុជា និងសហរដ្ឋអាមេរិក ដើម្បីឆ្ពោះទៅរកការអភិវឌ្ឍន៍ហេដ្ឋារចនាសម្ព័ន្ធដែលគាំទ្រដល់ការរីកចម្រើននិងលើកកម្ពស់ការតភ្ជាប់ក្នុងតំបន់ និងពិភពលោក”។ នៅក្នុងសេចក្តីប្រកាសរបស់ខ្លួន DFC បានបញ្ជាក់ថា "ការវិនិយោគនេះនឹងគាំទ្រដល់ការពង្រីកហេដ្ឋារចនាសម្ព័ន្ធអាកាសចរណ៍របស់ព្រះរាជាណាចក្រកម្ពុជា និងលើកកម្ពស់ឱកាសសេដ្ឋកិច្ចកាន់តែទូលំទូលាយសម្រាប់ពាណិជ្ជកម្ម កំណើនសេដ្ឋកិច្ច និងការអភិវឌ្ឍន៍។ ការសម្រេចបាននេះ បានគូសបញ្ជាក់ពីតួនាទីរបស់ DFC ក្នុងនាមជាដៃគូដែលមានសមត្ថភាពក្នុងការផ្តល់ទុនហិរញ្ញាវត្ថុ ជំនាញពិសោធន៍ និងការច្នៃប្រឌិត ដើម្បីពង្រឹងហេដ្ឋារចនាសម្ព័ន្ធដ៏សំខាន់បំផុតមួយនេះរបស់ព្រះរាជាណាចក្រកម្ពុជា"៕

រដ្ឋមន្រ្ដីក្រសួងបរិស្ថាន៖ រាជរដ្ឋាភិបាលកំពុងជំរុញគំរូអភិវឌ្ឍន៍ថ្មី​ដឹកនាំដោយ​សហគមន៍​ក្នុងតំបន់ទេសចរណ៍​ធម្មជាតិនានា​នៅកម្ពុជា

2026/06/04 10:34:31 pm        251
Facebook Telegram Linkin
រដ្ឋមន្ត្រីក្រសួងបរិស្ថាន ឯកឧត្តមបណ្ឌិត អ៊ាង សុផល្លែត បានបញ្ជាក់ថា បច្ចុប្បន្ននេះ រាជ​រដ្ឋាភិបាល​កំពុងជំរុញគំរូអភិវឌ្ឍន៍ថ្មីដឹកនាំដោយសហគមន៍​នៅតំបន់​ទេសចរណ៍​ធម្មជាតិនានា​នៅ​ក្នុង​កម្ពុជា ខណៈតំបន់អភិវឌ្ឍន៍គម្រោងលម្ហែបៃតងនៅតំបន់រមណីយដ្ឋានធម្មជាតិភ្នំខ្នងផ្សារ និង​ទេទឹកពុះ ដែលនឹងត្រូវគ្រប់គ្រងដោយសហគមន៍មូលដ្ឋានផ្ទាល់ដោយមិនអនុញ្ញាតឱ្យអង្គការ ដៃគូ​អភិវឌ្ឍន៍ ឬស្ថាប័នណាមួយចូលរួមការគ្រប់គ្រងជំនួសឡើយ។ ឯកឧត្តមបានបញ្ជាក់តាមរយៈសារសំឡេងផ្ដល់ដល់អ្នកសារព័ត៌មាននៅថ្ងៃទី៤ ខែមិថុនា ឆ្នាំ២០២៦នេះ ថា គោលការណ៍អភិវឌ្ឍន៍ក្រោមការដឹកនាំរបស់សម្តេចធិបតីនាយករដ្ឋមន្ត្រី ហ៊ុន ម៉ាណែត គឺផ្តោតលើការពង្រឹងសិទ្ធិ និងតួនាទីរបស់ប្រជាសហគមន៍ ដើម្បីឱ្យក្លាយជាម្ចាស់ពិតប្រាកដនៃសហគមន៍របស់ខ្លួន មានសិទ្ធិពេញលេញក្នុងការដឹកនាំ គ្រប់គ្រង ថែរក្សា និងប្រើប្រាស់ធនធានធម្មជាតិក្នុងមូលដ្ឋានដោយខ្លួនឯង។ ឯកឧត្តមរដ្ឋមន្រ្ដីបានបន្ថែមថា ការរៀបចំគោលការណ៍នេះមានគោលបំណងធានាការគ្រប់គ្រងធនធានធម្មជាតិ និងគម្រោងអភិវឌ្ឍន៍នៅមូលដ្ឋានមានភាពច្បាស់លាស់ប្រកបដោយភាពជាម្ចាស់កម្មសិទ្ធិរបស់សហគមន៍ ព្រមទាំងលើកកម្ពស់ការចូលរួមអភិវឌ្ឍ និងការពារធនធានធម្មជាតិដោយផ្ទាល់របស់ប្រជាពលរដ្ឋ។ ឯកឧត្តមបានបញ្ជាក់ថា៖ «ការអភិវឌ្ឍរបស់សម្ដេចធិបតី គឺពង្រឹងប្រជាសហគមន៍ កែប្រែប្រជាសហគមន៍ ទៅជាម្ចាស់ដឹកនាំ គ្រប់គ្រង និងថែរក្សាសហគមន៍របស់ពួកគាត់ដោយខ្លួនគាត់។ គឺមិនឱ្យក្រសួង អាជ្ញាធរដែនដី ក្រុមហ៊ុន ឬអង្គការទៅគ្រប់គ្រងទេ»។ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា ថ្លែងក្នុងពិធីសម្ពោធអគារ និងប្រគល់សញ្ញាបត្រនៅវិទ្យាស្ថានជាតិអប់រំកាយនិងកីឡាកាលពីថ្ងៃទី៣ ខែមិថុនា ឆ្នាំ២០២៦ ម្សិលមិញនេះថា រាជរដ្ឋាភិបាលកំពុងជំរុញការអភិវឌ្ឍតំបន់រមណីយដ្ឋានធម្មជាតិភ្នំខ្នងផ្សារនិងតំបន់ទេទឹកពុះ ដោយផ្តោតលើរូបមន្តអភិវឌ្ឍន៍ដែលដឹកនាំដោយសហគមន៍ ដើម្បីបង្កើនចំណូលជូនប្រជាពលរដ្ឋ ព្រមទាំងធានាការអភិរក្សធនធានធម្មជាតិឱ្យបានគង់វង្ស។ សម្តេចធិបតីបានកោតសរសើរដល់ក្រសួង និងអាជ្ញាធរពាក់ព័ន្ធ ដែលបានសហការគ្នាអភិវឌ្ឍតំបន់នេះ ដោយចាត់ទុកថាវឌ្ឍនភាពដែលបានសម្រេចលទ្ធផលល្អប្រសើរ និងសមស្របនឹងទិសដៅអភិវឌ្ឍន៍ទេសចរណ៍ធម្មជាតិរបស់ប្រទេស។ សម្តេចធិបតីបានរំលឹកពីបទពិសោធចុះទៅតំបន់ខ្នងផ្សារកាលពីឆ្នាំ២០២៥ និងការចុះពិនិត្យជាបន្តបន្ទាប់ ដោយអះអាងថា ការអភិវឌ្ឍត្រូវផ្តោតលើការផ្តល់អំណាចដល់សហគមន៍មូលដ្ឋានក្លាយជាម្ចាស់ពិតប្រាកដនៅតំបន់របស់ខ្លួន។ សម្តេចធិបតីបានបន្ថែមថា រូបមន្តនេះបានជួយប្រជាពលរដ្ឋប្តូរពីការពឹងផ្អែកលើការកាប់ឈើនិងធនធានព្រៃឈើមកជាការបង្កើតចំណូលពីវិស័យទេសចរណ៍ ដូចជាការលក់ដូរ និងសេវាបដិសណ្ឋារកិច្ចជាដើម។ សម្តេចធិបតីបានបញ្ជាក់ថា ការវិនិយោគឯកជននឹងត្រូវរៀបចំសមស្រប ដោយមិនជំនួសតួនាទីសហគមន៍ទេ ប៉ុន្តែជួយគាំទ្រនិងបំពេញបន្ថែម ដើម្បីបង្កើតប្រព័ន្ធសេដ្ឋកិច្ចទេសចរណ៍ដែលមានតុល្យភាព។ លោកបានណែនាំដល់ក្រសួងជំនាញនិងអាជ្ញាធរពាក់ព័ន្ធបន្តអភិវឌ្ឍហេដ្ឋារចនាសម្ព័ន្ធ ដូចជាផ្លូវ កន្លែងសម្រាក កន្លែងងូតទឹក និងតំបន់សេវាកម្មសហគមន៍ ដើម្បីបង្កើនភាពទាក់ទាញទេសចរណ៍»។ សម្តេចធិបតីថ្លែងថា៖«យើងបានដកអាជ្ញាប័ណ្ណវិនិយោគឯកជនគម្រោងតូចៗនៅទីនោះ ព្រោះប្រជាសហគមន៍គាត់បារម្ភ គាត់ខ្លាចការវិនិយោគមិនស្រួលប៉ះដល់អាជីពរបស់គាត់។ អ៊ីចឹងយើងកែសម្រួលការវិនិយោគឯកជន ដោយផ្ដល់ទីតាំងណាដែលជួយគាំទ្រគ្នាទៅវិញទៅមក»។ សម្តេចធិបតីបានបន្ថែមថា ការអភិវឌ្ឍតំបន់ទេសចរណ៍ធម្មជាតិមិនត្រឹមតែជួយលើកកម្ពស់សេដ្ឋកិច្ចមូលដ្ឋានប៉ុណ្ណោះទេ ប៉ុន្តែថែមទាំងជួយពង្រឹងការការពារព្រៃឈើ និងធនធានធម្មជាតិ ដោយសារប្រជាពលរដ្ឋមានជម្រើសអាជីពថ្មី និងកាត់បន្ថយសកម្មភាពប៉ះពាល់ដល់បរិស្ថាន។ សម្តេចធិបតី ហ៊ុន ម៉ាណែត បានសង្កត់ធ្ងន់ថា ការអភិវឌ្ឍតំបន់ខ្នងផ្សារនិងទេទឹកពុះ គឺជាគំរូសម្រាប់ការអភិវឌ្ឍសេដ្ឋកិច្ចមូលដ្ឋានដែលភ្ជាប់ជាមួយការអភិរក្សធម្មជាតិ ដោយរដ្ឋាភិបាលនឹងបន្តអនុវត្តគម្រោងស្រដៀងគ្នានៅតំបន់សក្តានុពលផ្សេងៗទៀតនៅទូទាំងប្រទេស។ សូមជម្រាបថា ភ្នំខ្នងផ្សារជាតំបន់ទេសចរណ៍ធម្មជាតិដ៏ធំមួយដែលមានទីតាំងនៅភូមិតាំងបំពង ឃុំតាសាល ស្រុកឱរ៉ាល់ ខេត្តកំពង់ស្ពឺ។ តំបន់នេះជាតំបន់ទេសចរណ៍ធម្មជាតិដ៏ពេញនិយមសម្រាប់ទេសចរដែលចូលចិត្តដើរកម្សាន្តតាមព្រៃភ្នំនិងតំបន់ធម្មជាតិដ៏ស្រស់ត្រកាល។ ចំណែកទេទឹកពុះ ជាតំបន់ទេសចរណ៍ធម្មជាតិដ៏កម្រមួយ ដែលមានបាតុភូតធម្មជាតិចម្លែក ដោយទឹកមានសីតុណ្ហភាពខ្ពស់រហូតដល់៧០អង្សារសេ និងជាតំបន់ពោរពេញដោយស្មៅខ្ពស់ៗដ៏ស្រស់ស្អាត៕

ប្រាសាទប្រែរូប ស្ថាបត្យកម្មឥដ្ឋដ៏លេចធ្លោសម័យអង្គរ និងការគ្រប់គ្រងបេតិកភណ្ឌ

2026/06/01 10:36:49 pm        318
Facebook Telegram Linkin
ប្រាសាទប្រែរូប គឺជាសមិទ្ធផលស្ថាបត្យកម្មកំពូលមួយដែលស្ថិតនៅតាមបណ្តោយផ្លូវវង់ធំ ក្នុង​ភូមិ​ស្រះស្រង់ខាងជើង សង្កាត់នគរធំ ក្រុងសៀមរាប។ ក្នុងទិដ្ឋភាពភូមិសាស្ត្រវប្បធម៌ ប្រាសាទ​ភ្នំ​មួយ​នេះ​បានសាងសង់ឡើងនៅលើដីទួលខ្ពស់ត្រដែត ដែលមិនត្រឹម​តែ​ឆ្លុះ​បញ្ចាំង​ពី​ទស្សន​ទាន​នៃ​លទ្ធិ​ទេវរាជក្នុងការបង្កើតភ្នំព្រះសុមេរុជានិមិត្តរូបនាសម័យបុរាណ។ ប៉ុន្តែសព្វថ្ងៃ ទីតាំងខ្ពស់​នៃ​សំណង់​នេះ ក៏បានក្លាយជាចំណុចយុទ្ធសាស្ត្រដ៏សំខាន់ក្នុងការទាក់ទាញទេសចរណ៍វប្បធម៌ ដើម្បី​ទស្សនាទិដ្ឋភាពថ្ងៃរះនិងថ្ងៃលិច ដ៏ស្រស់បំព្រងដែលឆ្លុះបញ្ចាំងសម្រស់វាលស្រែ និងប្រព័​ន្ធ​អេកូ​ឡូ​ស៊ី​ព្រៃឈើធម្មជាតិជុំវិញ។ ផ្អែកលើការសិក្សាស្រាវជ្រាវផ្នែកបុរាណវិទ្យា ប្រាសាទប្រែ​រូប​តំណាង​ឲ្យ​របត់​នៃកា​រ​ប្រែប្រួល​យ៉ាង​សំខាន់​នៅ​ក្នុងប្រវត្តិសាស្ត្រស្ថាបត្យកម្មខ្មែរ ដោយបង្កើតបានលក្ខណៈចំណាំនៃ «រចនាបថប្រែ​រូប​»។​ ភាពលេចធ្លោផ្នែកវិស្វកម្មសំណង់នៃប្រាសាទនេះ គឺទម្រង់ស្ថាបត្យកម្មឥដ្ឋខ្នាតធំ ដែលជា​គំរូ​នៃសំ​ណង់​ដែល​មាន​ក្តី​នានា​ធ្វើ​អំពីឥដ្ឋក្នុ​ង​ទំហំធំ​បំផុត​មួយ​ដែល​បាន​កសា​ងឡើ​ង​ក្នុង​សម័​យអង្គ​រ។ លើសពីនេះ បុព្វបុរសខ្មែរបានបង្ហាញពីភាពឆ្លាតវៃ និងបច្ចេក​ទេសក​ម្រិត​ខ្ពស់​ក្នុង​ការ​ប្រើប្រា​ស់​សម្ភា​រៈបីប្រភេទរួមគ្នាឱ្យមានភាពចុះសម្រុងគ្នាយ៉ាងអស្ចារ្យ ដោយក្នុងនោះ​មា​ន​ការ​ប្រើ​ប្រាស់​ឥដ្ឋ​សម្រា​ប់សាងសង់ក្តីខាងលើ និងការឆ្លាក់ក្បាច់លម្អ ប្រើប្រាស់ថ្មបាយក្រៀ​ម​សម្រា​ប់​ធ្វើ​ជា​ខឿន​ថ្នាក់​ៗ ​បាតគ្រឹះ និងជញ្ជាំងព័ទ្ធជុំវិញដើម្បីទ្រទ្រង់ទម្ងន់ដ៏ធ្ងន់ និងប្រើប្រាស់​ថ្ម​ភក់​សម្រាប់​តែ​ផ្នែក​សំណង់​ដែល​ត្រូវទទួលសម្ពាធខ្លាំង និងកន្លែងលម្អប្រណីត ដូចជា ផ្តែរ ស៊ុមទ្វារ និងសរសរ​ពេជ្រ​។ ​របត់នេះបានលេចត្រដែតខ្លួនចេញពីឥទ្ធិពលស្ថាបត្យកម្មមុនអង្គរ ដែលភាគ​ច្រើន​ប្រើ​ប្រាស់​តែ​ឥដ្ឋ និង​មានទម្រង់ជាក្តីដាច់ៗពីគ្នា មកជាការរៀបចំរចនាសម្ព័ន្ធជាលំដាប់ថ្នាក់នៅលើខឿនថ្នាក់ៗ បែ​ប​ប្រាសាទភ្នំយ៉ាងពិតប្រាកដ។ ប្រភពទិន្នន័យចម្បង និងជាឯកសារយោងដ៏មានតម្លៃបំផុតសម្រាប់ប្រាសាទប្រែរូប គឺសិលា​ចារឹក​លេខ​ K.806 ដែលចារិកជាភាសាសំស្ក្រឹត ជាកាព្យមានប្រវែងវែង​ជាង​គេបំ​ផុ​ត​នៅ​ក្នុ​ង​ប្រវត្តិ​សាស្ត្រ​ខ្មែរ​ ដោយ​មានរហូតដល់២៩៨ល្បះ ត្រូវជា២,១៨៥ គាថា។ តាមរយៈខ្លឹមសារនៃសិលាចារឹកនេះ បាន​បញ្ជាក់យ៉ាងច្បាស់ថា ប្រាសាទប្រែរូបត្រូវបានកសាងឡើងនៅក្នុងឆ្នាំ ៩៦១ នៃគ្រិស្តសករាជ ក្នុងរជ្ជកាលព្រះបាទរាជេន្ទ្រវរ្ម័នទី២ ដើម្បីឧទ្ទិសថ្វាយដល់ព្រះឥសូរក្នុងលទ្ធិព្រហ្មញ្ញសាសនា។ សិលា​ចារឹ​កក៏បានរៀបរាប់អំពីការតម្កល់សិវលិង្គសម្រាប់រាជ្យឈ្មោះ «រាជេន្ទ្របាទ្រេសូរ» នៅក្តី​កណ្តាល​ ដែលជាព្រះនាមដើមផ្លូវការរបស់ប្រាសាទ ព្រមទាំងមាន​ការ​ឧទ្ទិសក្តី​រណ​បនា​នាជូន​ចំពោះ​ទេព​តំណាងឲ្យបុព្វការីជន។ នេះស្តែងឲ្យឃើញពីការអនុវត្តគុណធម៌ដ៏ស្មោះស្ម័គ្រ និង​ជា​យុទ្ធ​សាស្ត្រន​យោបាយ​ក្នុង​ការផ្សា​រ​ភ្ជា​ប់​រាជ​វ​ង្ស​របស់​ព្រះអង្គទៅ​នឹង​ខ្សែស្រ​ឡាយ​ដ៏រុ​ង​រឿង​នៃ​មហាន​គរខ្មែរ។ ក្នុងក្របខណ្ឌគ្រប់គ្រងបេតិកភណ្ឌពិភពលោក ក្រោមការសម្របសម្រួលបច្ចេកទេសនៃគណៈកម្មាធិការអន្តរជាតិ ICC-Angkor អាជ្ញាធរជាតិអប្សរាបានដាក់ចេញ និងអនុវត្តនូវវិធានការវិទ្យាសាស្ត្រ ដើម្បីធានាចីរភាពនៃរចនាសម្ព័ន្ធប្រាសាទ។ ការងារនេះផ្ដោតសំខាន់លើការគ្រប់គ្រងប្រព័ន្ធជលសាស្ត្រ ដោយពង្រឹងប្រព័ន្ធបង្ហូរនិងរំដោះទឹកភ្លៀង ដើម្បីការពារមិនឲ្យទឹកហូរច្រោះចូលផ្ទាល់លើជញ្ជាំងឥដ្ឋ និងគ្រឹះជើងទម្រ ដែលអាចបណ្តាលឱ្យចុះខ្សោយកម្លាំងទ្រទ្រង់សំណង់។ ក្នុងទិដ្ឋភាពបច្ចេកវិទ្យាសម្ភារៈ អ្នកជំនាញបានបន្តស្រាវជ្រាវពិសោធន៍ និងអនុវត្តបច្ចេកទេសពង្រឹងគុណភាពឥដ្ឋបុរាណ និងសាច់បាយអឱ្យមានប្រសិទ្ធភាពខ្ពស់ ដើម្បីរក្សាទម្រង់ដើមនៃប្រាសាទ និងការពារក្បាច់ចម្លាក់លម្អកុំឲ្យរងការខូចខាតបន្តទៀត៕

បណ្ដាញសង្គម

ព័ត៌មានថ្មីៗ

ការរីករាលដាលឆ្លងជំងឺអេបូឡានៅកុងហ្គោក្លាយជាករណីឆ្លងស្លាប់មនុស្សច្រើនបំផុតក្នុងប្រវត្តិសាស្រ្ត
08/17/2026 09:08 PM
Facebook Telegram Linkin
ភ្លៀងធ្លាក់ផ្តល់ក្តីសង្ឃឹមក្នុងការប្រយុទ្ធប្រឆាំងនឹងភ្លើងឆេះព្រៃធំបំផុតនៅបែលហ្ស៊ិក
08/17/2026 09:08 PM
Facebook Telegram Linkin
ថ្នាក់ដឹកនាំក្រសួង-ស្ថាប័ន កម្ពុជា​ និងទីម័រឡេស្តេ ផ្លាស់ប្ដូរបទពិសោធលើការប្រើប្រាស់ថ្នាល verify.gov.kh ដើម្បីផ្ដល់សេវាសាធារណៈកាន់តែល្អប្រសើរជូនប្រជាពលរដ្ឋ
08/17/2026 09:08 PM
Facebook Telegram Linkin
អាល្លឺម៉ង់បញ្ជាក់​ថា Bundeswehr ស្ថិតនៅលើផ្លូវត្រូវ ក្នុង​ការ​សម្រេចគោលដៅកងទ័ពឆ្នាំ២០២៦
08/17/2026 08:08 PM
Facebook Telegram Linkin
រុស្ស៊ីមានគម្រោងសាងសង់ហេដ្ឋារចនាសម្ព័ន្ធអាកាសចរណ៍ដ្រូន ក្នុងតំបន់ចំនួន ៣៥ នៅឆ្នាំ២០៣០
08/17/2026 08:08 PM
Facebook Telegram Linkin
មនុស្សយ៉ាងហោច ៦នាក់ ស្លាប់ នៅក្នុងការវាយប្រហារមីស៊ីលអ៊ុយក្រែនលើតំបន់ Belgorod របស់រុស្ស៊ី
08/17/2026 08:08 PM
Facebook Telegram Linkin
មនុស្សជាង ១០នាក់ស្លាប់ ក្នុងហេតុការណ៍គ្រោះថ្នាក់រថយន្តក្រុងប៉ូឡូញនៅហុងគ្រី
08/17/2026 08:08 PM
Facebook Telegram Linkin
នាវាដឹកយន្តហោះចម្បាំងអាមេរិកចុះប្រតិបត្តិការពេលយប់ ស្របពេលភាពតានតឹងជាមួយអ៊ីរ៉ង់
08/17/2026 08:08 PM
Facebook Telegram Linkin
មនុស្សយ៉ាងហោច ៧នាក់ ស្លាប់ ក្នុងហេតុការណ៍អគ្គិភ័យឆាបឆេះសណ្ឋាគារនៅរដ្ឋ West Bengal ប្រទេសឥណ្ឌា
08/17/2026 08:08 PM
Facebook Telegram Linkin
អ៊ីរ៉ង់ថា កិច្ចពិភាក្សាជាមួយអូម៉ង់នៅបន្ត ហើយកិច្ចខិតខំការទូតធ្វើឡើងសម្រាប់អ្នកបើកបរយន្តហោះឃុំខ្លួននៅកាតា
08/17/2026 08:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.