BTV NEWS

ក្រសួងអភិវឌ្ឍន៍ជនបទ បើកការដ្ឋានស្ថាបនាផ្លូវកៅស៊ូ DBST ១ខ្សែជូនប្រជាពលរដ្ឋឃុំស្វាយលួង ស្រុកកណ្តៀង

អ្នកនយោបាយលើកឡើងពីជោគជ័យដ៏ធំធេងរបស់សម្តេចធិបតីនៅអាម៉េរិក និងអឺរ៉ុប

អ្នកនយោបាយមានសុទិដ្ឋិនិយមថាបេសកកម្មការទូតរបស់សម្តេចធិបតីនឹងមានប្រយោជន៍ចំពោះបញ្ហាព្រំដែន

ក្រុមការងារក្រសួងធនធានទឹក ចុះពិនិត្យវឌ្ឍនភាពការងារសាងសង់ទំនប់អាងទឹកវិទ្យាស្ថានពហុជំនាញយោធាតេជោសែនក្នុងខេត្តតាកែវ ខណៈសម្រេចការសាងសង់បាន ៩៥%

នយោបាយ និង ការអភិវឌ្ឍន៍

រុស្ស៊ី រិះគន់ខ្លាំងៗកិច្ចប្រជុំកំពូលសន្តិភាពអ៊ុយក្រែនថា ជាវេទិកាគ្មានន័យ និងគ្មានតម្លៃ

រដ្ឋមន្ត្រីការបរទេសរុស្ស៊ី លោក Sergey Lavrov បានរិះគន់ខ្លាំងៗថា ជាវេទិកាគ្មានន័យ និងគ្មានតម្លៃចំពោះសន្និសីទអន្តរជាតិនៅពេលខាងមុខនេះ ជាផែនការសន្តិភាព ត្រូវបានស្នើឡើងដោយប្រទេសអ៊ុយក្រែន ដែលនឹងត្រូវពិភាក្សា។ទីក្រុងមូស្គូ នឹងមិនចូលរួមក្នុងកិច្ចប្រជុំនេះទេ។ លោក Lavrov បាននិយាយដូច្នេះ កាលពីថ្ងៃអង្គារ បន្ទាប់ពីលោកបានចូលរួមកិច្ចប្រជុំរដ្ឋមន្ត្រីការបរទេស ប្រទេស ប្រ៊ីក(BRICS) រយៈពេលពីរថ្ងៃ ដែលកិច្ចប្រជុំនេះ ត្រូវបានធ្វើឡើងនៅទីក្រុង នីស្នី ណូវហ្គូរ៉ូដ(Nizhny Novgorod) ភាគខាងលិច ប្រទេសរុស្ស៊ី។ក្រុមប្រទេស BRICS រួមមាន ប្រេស៊ីល រុស្ស៊ី ឥណ្ឌា ចិន អាហ្វ្រិកខាងត្បូង និងប្រទេសកំពុងរីកចម្រើនផ្សេងទៀត។ ប្រទេសអ៊ីរ៉ង់ អារ៉ាប់រួម និងប្រទេសផ្សេងទៀត បានចូលរួមជាមួយក្រុមនេះ នៅឆ្នាំនេះ។ លោក Lavrov បាននិយាយថា ចំនួនប្រទេសដែលចាប់អារម្មណ៍ក្នុងការធ្វើការជាមួយប្រទេស BRICS កំពុងតែកើនឡើងជាលំដាប់ ហើយមានតួលេខខិតជិតដល់ចំនួន៣០ប្រទេស។លោក រដ្ឋមន្ត្រីការបរទេស បានរិះគន់ខ្លាំងៗចំពោះកិច្ចប្រជុំកំពូលស្តីពីសន្តិភាពនៅអ៊ុយក្រែនដែលនឹងប្រព្រឹត្តទៅនៅប្រទេសស្វីស នៅថ្ងៃសៅរ៍ និងថ្ងៃអាទិត្យ ខាងមុខនេះ។ការលើកឡើងរបស់លោក Lavrov ធ្វើឡើងខណៈប្រទេសលោកខាងលិច កំពុងជំរុញការគាំទ្ររបស់ខ្លួនចំពោះអ៊ុយក្រែន។ ក្រុមប្រទេសG7 ត្រូវបានគេរំពឹងថា នឹងពិភាក្សាអំពីបញ្ហាគាំទ្រអ៊ុយក្រែននៅក្នុងកិច្ចប្រជុំកំពូលមួយនៅក្នុងប្រទេសអ៊ីតាលី ដែលកិច្ចប្រជុំនេះ នឹងចាប់ផ្តើមនៅថ្ងៃព្រហស្បតិ៍។

សម្តេចធិបតី៖ ការអនុវត្តវិធានការគន្លឹះកែទម្រង់រដ្ឋបាលសាធារណៈជាមូលដ្ឋានដ៏ចាំបាច់ កសាងប្រព័ន្ធរដ្ឋបាលសាធារណៈប្រកបដោយសមិទ្ធកម្ម និងភាពធន់

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា មានប្រសាសន៍បញ្ជាក់ថា ការអនុវត្តវិធានការគន្លឹះ ក្នុងការកែទម្រង់រដ្ឋបាល សាធារណៈ គឺជាមូលដ្ឋានដ៏ចាំបាច់បំផុតក្នុងការកសាងនូវប្រព័ន្ធរដ្ឋបាលសាធារណៈមួយដែលប្រកបដោយសមិទ្ធកម្ម មានជវភាព និងមានភាពធន់។សម្ដេចធិបតី នាយករដ្ឋមន្រ្ដី បានបញ្ជាក់បែបនេះ ក្នុងឱកាស អញ្ជើញដឹកនាំកិច្ចប្រជុំលើកទី២ របស់គណៈកម្មាធិការជាតិជំរុញការអនុវត្ត វិធានការគន្លឹះ ក្នុងការកែទម្រង់រដ្ឋបាលសាធារណៈរបស់រាជរដ្ឋាភិបាលនីតិកាលទី ៧ នៃរដ្ឋសភា នាព្រឹកថ្ងៃទី១២ ខែមិថុនា ឆ្នាំ២០២៤ នៅវិមានសន្ដិភាព។មានប្រសាសន៍នៅក្នុងកិច្ចប្រជុំសម្តេចធិបតី បានសង្កត់ធ្ងន់អំពីសារៈសំខាន់នៃការអនុវត្តវិធានការគន្លឹះ ក្នុងការកែទម្រង់រដ្ឋបាលសាធារណៈ ដែលជាមូលដ្ឋានដ៏ចាំបាច់បំផុត ក្នុងការកសាងនូវប្រព័ន្ធរដ្ឋបាលសាធារណៈ មួយ ប្រកបដោយសមិទ្ធកម្ម មានជវភាព និងមានភាពធន់។ ការអនុវត្តវិធានការគន្លឹះនេះ ក៏ជាបុរេលក្ខខណ្ឌ នៃការសម្រេចនូវចក្ខុវិស័យកម្ពុជា ឆ្នាំ២០៥០ ដែលត្រូវបានកំណត់ក្នុងយុទ្ធសាស្ត្របញ្ចកោណ-ដំណាក់កាលទី១ ថា ក្នុងរយៈពេល២៥ឆ្នាំខាងមុខ កម្ពុជាជាសង្គមជាតិមួយដ៏រស់រវើក ដោយមានរដ្ឋរឹងប៉ឹង មានអភិបាលកិច្ចល្អ និងស្ថាប័នរឹងមាំ ប្រកបដោយតម្លាភាព និងគណនេយ្យភាព ហើយបម្រើជាតិ និងប្រជាជន ប្រកបដោយ ប្រសិទ្ធភាព នៅក្នុង ជវភាពនៃប្រព័ន្ធតួអង្គតែមួយ (Dynamics of Stakeholder System) ។ជាកិច្ចបន្ទាប់ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាអនុប្រធានប្រចាំការ នៃគណៈកម្មាធិការជាតិជំរុញការអនុវត្តវិធានការគន្លឹះក្នុងការកែទម្រង់រដ្ឋបាលសាធារណៈ (គ.វ.រ.) បានធ្វើរបាយការណ៍សង្ខេបស្តីពីវឌ្ឍនភាពនៃការរៀបចំ និងការដាក់ឱ្យអនុវត្តវិធានការគន្លឹះ ក្នុងការកែទម្រង់រដ្ឋបាលសាធារណៈរបស់រាជរដ្ឋាភិបាលនីតិកាលទី ៧ នៃរដ្ឋសភា ដោយផ្តោតលើ៖ (១) ការដាក់ ឱ្យអនុវត្តប្រព័ន្ធជ្រើសរើសមន្ត្រីចូលបម្រើការងារប្រកបដោយគុណាធិបតេយ្យ តម្លាភាព យុត្តិធម៌ និងប្រសិទ្ធភាព, (២) ការពង្រឹងសមត្ថភាព និងសមិទ្ធកម្មស្ថាប័ន ដើម្បីលើកកម្ពស់គុណភាពការងារប្រកបដោយវិន័យ សីលធម៌ វិជ្ជាជីវៈ ប្រសិទ្ធភាព និងស័ក្តិសិទ្ធិភាព និង (៣)ការដាក់ឱ្យអនុវត្តប្រព័ន្ធលើកទឹកចិត្តគាំទ្រសមិទ្ធកម្មក្នុងរដ្ឋបាលសាធារណៈ ប្រកបដោយសង្គតិភាព សមធម៌ ប្រសិទ្ធភាព និងចីរភាព។បន្ទាប់ពីបានស្តាប់របាយការណ៍របស់ ឯកឧត្តម ហ៊ុន ម៉ានី សម្តេចធិបតី បានសម្តែងការកោតសរសើរ និងវាយតម្លៃខ្ពស់ចំពោះវឌ្ឍនភាព និងលទ្ធផលសម្រេចបានក្នុងរយៈពេល ៩ខែមកនេះ និងបានគូសបញ្ជាក់ លើចំណុចសំខាន់ៗដូចខាងក្រោម៖ (១) ការដាក់ឱ្យអនុវត្តប្រព័ន្ធជ្រើសរើសមន្ត្រីចូលបម្រើ ត្រូវអនុវត្តបន្ត តាមអភិក្រម «រើសឱ្យចំ ប្រើឱ្យត្រូវ រក្សាឱ្យនៅ» (២) ការពង្រឹងសមត្ថភាព និងសមិទ្ធកម្មស្ថាប័ន ត្រូវបន្ត យកចិត្តទុកដាក់ខ្ពស់ និងធ្វើឱ្យបានសម្រេចលើការងារនេះឱ្យបានតាមគោលដៅ គឺ ត្រឹមដំណាច់ត្រីមាសទី៣ ឆ្នាំ២០២៤ នេះ និង (៣) ក្រសួងមុខងារសាធារណៈត្រូវជំរុញការរៀបចំ និងការដាក់ឱ្យអនុវត្តប្រព័ន្ធ លើកទឹកចិត្តគាំទ្រសមិទ្ធកម្មនេះឱ្យបានសមស្រប និងទាន់ពេល។នៅក្នុងកិច្ចប្រជុំនេះដែរសម្តេចធិបតីក៏បានប្រកាសដាក់ឱ្យប្រើប្រាស់ជាផ្លូវការផែនការសកម្មភាព ២០២៤-២០២៨ ដើម្បីអនុវត្តវិធានការគន្លឹះ ក្នុងការកែទម្រង់រដ្ឋបាលសាធារណៈរបស់រាជរដ្ឋាភិបាល នីតិកាលទី ៧ នៃរដ្ឋសភា។ សម្តេចធិបតី ក៏បានផ្តល់អនុសាសន៍បន្ថែមមួយចំនួនសម្រាប់ជាទិសដៅ ការងារដែលត្រូវអនុវត្តបន្តរបស់ គ.វ.រ. ដូចខាងក្រោម៖ (១) ក្រសួងមុខងារសាធារណៈ ក្នុងនាមជាលេខាធិការដ្ឋានរបស់ គ.វ.រ. ត្រូវបន្តដឹកនាំ និងសម្របសម្រួល ការងារអនុវត្តផែនការសកម្មភាពវិធានការគន្លឹះ ក្នុងការកែទម្រង់រដ្ឋបាលសាធារណៈ ជាមួយនឹងការចូលរួម សហការ និងគាំទ្រពីគ្រប់ក្រសួង-ស្ថាប័ន និងរដ្ឋបាលថ្នាក់ក្រោមជាតិ។(២) ត្រូវបន្តរៀបចំការប្រឡងប្រជែងជ្រើសរើសមន្ត្រីរាជការសម្រាប់ផែនការក្របខណ្ឌដែលបានអនុម័តក្នុងឆ្នាំ២០២៣ និង ផ្អែកលើគោលការណ៍អនុញ្ញាតរបស់រាជរដ្ឋាភិបាល ដោយត្រូវរៀបចំឱ្យមានផែនការប្រឡង ប្រជែងជ្រើសរើស និងអនុវត្តទៅតាមនិយាមនីតិវិធីប្រតិបត្តិសម្រាប់ការប្រឡងប្រជែងជ្រើសរើសមន្ត្រីរាជការ ស៊ីវិល ដែលរាជរដ្ឋាភិបាលបានអនុម័តកាលពីខែកុម្ភៈឆ្នាំ២០២៤កន្លងមក។(៣) ត្រូវជំរុញក្នុងការរៀបចំក្របខណ្ឌគតិយុត្តនៃការជ្រើសរើស និងគ្រប់គ្រងមន្ត្រីបច្ចេកទេសសុខាភិបាល (ផ្អែកលើកិច្ចព្រមព្រៀង) ឱ្យបានរួចរាល់ត្រឹមត្រីមាសទី៣ ឆ្នាំ២០២៤ ដើម្បីមានមូលដ្ឋានក្នុងការជ្រើសរើស នាពេលខាងមុខ ហើយក៏ជាមូលដ្ឋានសម្រាប់ការគិតគូរៀបចំក្របខណ្ឌគតិយុត្តនៃការជ្រើសរើស និងគ្រប់គ្រង មន្ត្រីបច្ចេកទេសក្នុងវិស័យ អប់រំ និងក្នុងវិស័យគន្លឹះដទៃផ្សេងទៀត។(៤) ត្រូវបន្តកិច្ចការពិនិត្យឡើងវិញ, ការវិភាគមុខងារ និងរចនាសម្ព័ន្ធរបស់ក្រសួង-ស្ថាប័ន ក៏ដូចជាការធ្វើ បច្ចុប្បន្នភាពទិន្នន័យមន្ត្រីក្រសួង-ស្ថាប័ន និងមន្ត្រីថ្នាក់មូលដ្ឋានសម្រាប់វិស័យ អប់រំ និងវិស័យសុខាភិបាល ដោយឈរលើអភិក្រមពង្រឹង និងរៀបចំផ្ទះរបស់ខ្លួនឱ្យបានស្អាត ដោយក្នុងនោះត្រូវ៖ - មានការកំណត់មុខងារឱ្យបានច្បាស់លាស់នៅក្នុងកម្រិតក្រសួង និងអង្គភាពរបស់ក្រសួង។ការរៀបចំរចនាសម្ព័ន្ធរបស់អង្គភាព ត្រូវគិតគូរដល់ការគាំទ្រការអនុវត្តមុខងារ ដែលអាចធានាបាននូវ ប្រសិទ្ធភាព ភាពប្រទាក់ក្រឡាគ្នា និងគាំទ្រគ្នានៅក្នុងដំណើរការក្នុងក្របខណ្ឌការងាររបស់ក្រសួងនីមួយៗ សំដៅឆ្ពោះទៅគាំទ្រក្របខណ្ឌរដ្ឋាភិបាលទាំងមូល ដោយភាពប្រទាក់ក្រឡាគ្នានេះអាចធានាបាននូវផលវិជ្ជមាន ប្រសើរជាងមុន និងផ្តល់ផលប្រយោជន៍ជារួមជូនដល់ប្រជាពលរដ្ឋដែលជាអ្នកទទួលនិងប្រើប្រាស់សេវាសាធារណៈការប្រើប្រាស់ធនធានមនុស្ស ត្រូវអនុវត្តទៅតាមរចនាសម្ព័ន្ធដែលបានកំណត់ ដែលក្នុងនោះត្រូវកំណត់ក្របខណ្ឌមុខតំណែងឱ្យបានច្បាស់លាស់ ដើម្បីមានមូលដ្ឋានក្នុងការភ្ជាប់ការអនុវត្តជាមួយមុខងាររបស់ អង្គភាព ដែលកិច្ចការនេះនឹងផ្តល់ជាមូលដ្ឋានឈានទៅបន្តការពិនិត្យមើលស្ថានភាពលើស ឬ ខ្វះមន្ត្រី ការរៀបចំ ផែនការជ្រើសរើស ការរៀបចំផែនការពង្រាយមន្ត្រី ការរៀបចំផែនការបណ្តុះបណ្តាល ព្រមទាំងជាមូលដ្ឋាន គិតគូរអំពីលទ្ធភាពរៀបចំផែនការចូលនិវត្តន៍មុនកាលកំណត់ផងដែរ។ជាចុងក្រោយ សម្តេចធិបតី បានស្នើ និងលើកទឹកចិត្តឱ្យក្រសួង-ស្ថាប័ន និងរដ្ឋបាលរាជធានី-ខេត្ត ទាំងអស់ បន្តខិតខំអនុវត្តការងារប្រកបដោយស្មារតីបុរេសកម្ម ព្រមទាំងពង្រឹងនូវកិច្ចសហប្រតិបត្តិការ ឱ្យបានកាន់តែល្អប្រសើររវាងគ្នាទៅវិញទៅមក ក្រោមអភិក្រម “ជវភាពនៃប្រព័ន្ធតួអង្គតែមួយ”៕

មេដឹកនាំក្រុមយុវជនសង្គមស៊ីវិល និងពលរដ្ឋនៅសេដ្ឋកិច្ចក្រៅប្រព័ន្ធ បន្តអំពាវនាវជនរួមជាតិរួមគ្នាលុបបំបាត់ព័ត៌មានក្លែងក្លាយ និងកម្ចាត់មនោគមខ្មៅកខ្វក់ជ្រុលនិយមចេញពីកម្ពុជា

មេដឹកនាំក្រុមយុវជនសង្គមស៊ីវិល និងពលរដ្ឋនៅសេច្ឋកិច្ចក្រៅប្រព័ន្ធ នៅថ្ងៃទី១២ ខែមិថុនានេះ បន្តអំពាវនាវដល់ជនរួមជាតិ បន្តរួមកម្លាំងគ្នាលុបបំបាត់ព័ត៌មានក្លែងក្លាយ ពិសេសរួមគ្នាកម្ចាត់មនោគមខ្មៅកខ្វក់ដែលបង្កើតឡើងដោយក្រុមជ្រុលនិយម និងអង្គការសមាគម រណបបរទេស។លោក ហេង សំណាង ប្រធានក្រុមយុវជនសង្គមស៊ីវិល នៃសមាគមយុវជនខ្មែរមហានគរ និងបណ្តុំអង្គការសមាគមសង្គមស៊ីវិល បានឱ្យដឹងថា អស់រយៈកាលកន្លងមកនេះទាំងក្រុមយុវជន ទាំងក្រុមអ្នកប្រកបរបរសេដ្ឋកិច្ចក្រៅប្រព័ន្ធ បានធ្វើយុទ្ធនាការជាច្រើនស្តីពី៖«យើងរួមគ្នាលុបកម្លាំងមនោគមវិជ្ជាខ្មៅកខ្វក់របស់ក្រុមប្រឆាំងជ្រុលនិយមឱ្យចេញផុតពីកម្ពុជា និងអំពាវនាវដល់មហាជនកុំចាញ់កល និងគាំទ្រ សកម្មភាពណាមួយរបស់ក្រុមជ្រុលនិយមនៅក្រៅស្រុក។ លោកបន្តថា ក្រុមប្រឆាំងជ្រុលនិយមនៅក្រៅស្រុក តែងតែផ្សព្វផ្សាយនូវមនោគមវិជ្ជាខ្មៅកខ្វក់របស់ពួកគេតារមយៈព័ន្ធផ្សព្វផ្សាយបរទេស ក្នុងនោះទណ្ឌិតភៀសខ្លួនក្រៅប្រទេស តែងតែធ្វើការឃោសនា និយាយវាយប្រហារជាន់ពន្លិចរាជរដ្ឋាភិបាលជាប្រចាំ ដោយមិនគិតពីផលប៉ះពាល់ដល់ការអភិវឌ្ឍសង្គមជាតិ និងសុខទុក្ខរបស់ប្រជាពលរដ្ឋកម្ពុជាម្ដងណាឡើយ។ ចំណែក ក្រុមអង្គការសមាគមជ្រុលនិយមរណបម្ចាស់ជំនួយបរទេស ក៏ដូចគ្នា ពួកគេគ្មានភក្តីភាពចំពោះសង្គមជាតិ ឬមនសិការស្នេហាជាតិកម្ពុជាសោះឡើយ។ ពួកគេក្រៅតែពីការរិះរកវិធីសាស្រ្តជាន់ពន្លិចសមិទ្ធផលរាជរដ្ឋាភិបាលដែលកំពុងខិតខំអភិឌ្ឍនាពេលសព្វថ្ងៃនេះ។ លោក ហេង សំណាង បន្តថា ជាការពិតណាស់ សូម្បីតែវិទ្យុបរទេសខេមរភាសាមួយចំនួនដែលទទួលជំនួយពីបរទេស ពួកគេក៏ជាដើមចម ជាអ្នកចាក់ឆ្គឹះឆ្កៀលនៅពីក្រោយបន្ថែមទៀតលើការផ្សព្វផ្សាយមនោគមវិជ្ជាខ្មៅកខ្វក់នេះ ក្នុងគោលបំណងធ្វើយ៉ាងណា បន្ទោសបង្អាប់មកកាន់រាជរដ្ឋាភិបាល តាមរយៈការបង្ហាញរូបភាពប្រឌិត ក្រឡៃការពិត ញុះញង់ឱ្យប្រជាជនខ្មែរស្អប់គ្នាទៅវិញ។ លោកចោទសួរថា តើពួកគេធ្វើបែបនេះដើម្បីប្រជាជនខ្មែរ ឬចង់បំផ្លាញ់ជាតិខ្លួនឯង?។ មេដឹងនាំយុវជនសង្គមស៊ីវិលរូបនេះបានបញ្ជាក់ថា ក្នុងនាមជាយុវជនជំនាន់ក្រោយ និងជាកូនខ្មែរ លោករួមនឹងសមាជិក សមាជិកា និងពលរដ្ឋសេដ្ឋកិច្ចក្រៅប្រព័ន្ធគ្រប់មជ្ឈដ្ឋាន និងប្រើសិទ្ធតាមគ្រប់រូបភាពវាយបក ចំពោះក្រុមប្រឆាំងជ្រុលនិយមទាំងនោះដោយមិនលើកលែងឡើយ៕

តុលាការប្រទេសថៃ នឹងជំនុំជម្រះលើសំណុំរឿងរំសាយបក្សប្រឆាំង Move Forward

តុលាការធម្មនុញ្ញរបស់ប្រទេសថៃ នៅថ្ងៃពុធ (១២ មិថុនា) នេះ គ្រោងនឹងធ្វើការជំនុំជម្រះលើសំណុំរឿងដែលស្វះស្វែងរកការរំសាយគណបក្សប្រឆាំង បោះជំហានទៅមុខ (MFP) ដែលជាបក្សឈ្នះការបោះឆ្នោតសកលកាលពីឆ្នាំមុន ជុំវិញការសន្យាក្នុងយុទ្ធនាការដ៏សំខាន់មួយ។សវនាការនេះគឺជាផ្នែកមួយនៃសំណុំរឿងតុលាការដ៏រសើបចំនួនបី ដែលបានបង្កើនភាពមិនច្បាស់លាស់ផ្នែកនយោបាយនៅក្នុងប្រទេសសេដ្ឋកិច្ចធំទីពីររបស់អាស៊ីអាគ្នេយ៍។ តុលាការ ដែលគេរំពឹងថានឹងចេញសេចក្តីថ្លែងការណ៍នៅថ្ងៃពុធនេះ មិនបានកំណត់ថ្ងៃប្រកាសសាលក្រមលើសំណុំរឿងដែលពាក់ព័ន្ធនឹងការរំសាយបក្ស បោះជំហានទៅមុខ MFP នេះទេ។កាលពីខែមេសា តុលាការបានយល់ព្រមបើកសវនាការលើសំណុំរឿងរបស់គណៈកម្មាធិការរៀបចំការបោះឆ្នោត ដែលស្វះស្វែងរកការរំលាយបក្ស MFP និងដាក់បម្រាមនយោបាយរយៈពេល ១០ ឆ្នាំលើបណ្ដាថ្នាក់ដឹកនាំរបស់គណបក្ស ដោយសារយុទ្ធនាការកំណែទម្រង់លើច្បាប់ប្រមាថព្រះមហាក្សត្រ ឬច្បាប់ប្រមាថព្រះចេស្ដា របស់ប្រទេស។ច្បាប់ ដែលការពាររបបរាជានិយមពីការប្រមាថ និងការបរិហារកេរ្តិ៍ ផ្តន្ទាទោសដាក់ពន្ធនាគាររហូតដល់ ១៥ឆ្នាំសម្រាប់បទល្មើសនីមួយៗតាមជាក់ស្ដែង។ យោងតាមសេចក្តីថ្លែងការណ៍មួយកាលពីថ្ងៃអាទិត្យ សប្ដាហ៍មុនបានឱ្យដឹង នៅក្នុងឯកសារសំណើការពារក្តីរបស់ខ្លួន បក្សបោះជំហានទៅមុខ បាននិយាយថា ពាក្យបណ្តឹងរបស់គណៈកម្មាធិការរៀបចំការបោះឆ្នោត គឺមិនស្របច្បាប់ទេ ហើយបានជំទាស់នឹងយុត្តាធិការរបស់តុលាការធម្មនុញ្ញលើបញ្ហានេះផងដែរ៕

UN៖ អ៊ីស្រាអែល និងក្រុមប្រដាប់អាវុធប៉ាឡេស្ទីន ប្រហែលជាបានប្រព្រឹត្តឧក្រិដ្ឋកម្មសង្គ្រាម ក្នុងការវាយឆ្មក់មួយ

ការិយាល័យសិទ្ធិមនុស្សរបស់អង្គការសហប្រជាជាតិ កំពុងលើកឡើងពីលទ្ធភាពឧក្រិដ្ឋកម្មសង្រ្គាមដោយកងកម្លាំងអ៊ីស្រាអែល និងក្រុមប្រដាប់អាវុធប៉ាឡេស្ទីនពាក់ព័ន្ធនឹងការវាយឆ្មក់ដ៏សាហាវរបស់កងកម្លាំង អ៊ីស្រាអែល ដែលបានដោះលែងចំណាប់ថ្នូរ ៤នាក់ កាលពីចុងសប្តាហ៍ និងបានសម្លាប់ប្រជាជនប៉ាឡេ ស្ទីនរាប់រយនាក់។អ្នកនាំពាក្យការិយាល័យសិទ្ធិមនុស្ស លោក Jeremy Laurence បានសម្តែងការព្រួយបារម្ភអំពីការរំលោភលើច្បាប់នៃភាពស្មើគ្នា ភាពខុសគ្នា និងសន្តិសុខ ដោយកងកម្លាំងអ៊ីស្រាអែល ក្នុងការវាយឆ្មក់ កាលពីថ្ងៃសៅរ៍ នៅឯជំរំជនភៀសខ្លួនNuseirat។មន្ត្រីសុខាភិបាលប៉ាឡេស្ទីន បាននិយាយថា យ៉ាងហោចណាស់ជនជាតិប៉ាឡេស្ទីន ២៧៤នាក់ រួមទាំងស្ត្រី និងកុមារជាច្រើននាក់ ត្រូវបានសម្លាប់ នៅក្នុងប្រតិបត្តិការនេះ។លោក Laurence បាននិយាយថា ក្រុមប្រដាប់អាវុធប៉ាឡេស្ទីនដែលកំពុងឃុំខ្លួនចំណាប់ថ្នូរ នៅក្នុងតំបន់ដែលមានប្រជាជនច្រើន កំពុងធ្វើឲ្យជីវិតរបស់ជនស៊ីវិល នៅក្បែរនោះ និងចំណាប់ថ្នូរប្រឈមនឹង«ហានិភ័យបន្ថែម»ពីអរិភាពនេះ។លោកបានប្រាប់សន្និសីទរបស់អង្គការសហប្រជាជាតិ នៅទីក្រុងហ្សឺណែវថា៖«សកម្មភាពទាំងអស់នេះរបស់ភាគីទាំងពីរ អាចស្មើនឹងឧក្រិដ្ឋកម្មសង្គ្រាម»។

ជប៉ុន ពិចារណាទណ្ឌកម្មលើក្រុមហ៊ុនក្នុងប្រទេសចិន ដែលជួយដល់ការប្រឹងប្រែងធ្វើសង្រ្គាមរបស់រុស្ស៊ី

ប្រភពព័ត៌មានស្និទ្ធទៅនឹងរដ្ឋាភិបាលប្រទេសជប៉ុននិយាយថា ទីក្រុងតូក្យូ កំពុងពិចារណាការដាក់ទណ្ឌកម្មថ្មីលើអង្គភាពទាំងឡាយណាដែលសង្ស័យថាមានជាប់ពាក់ព័ន្ធក្នុងការផ្តល់សម្ភារៈដល់ប្រទេសរុស្ស៊ី ដែលអាចបំប្លែងទៅជាការប្រើប្រាស់សម្រាប់ផ្នែកយោធា។ ពួកគេនិយាយថា ទណ្ឌកម្មអាចរួមមាន បម្រាមលើការនាំចេញពីប្រទេសជប៉ុន ទៅកាន់ការធ្វើពាណិជ្ជកម្មនៅក្នុងប្រទេសទីបី រួមទាំងនៅក្នុងប្រទេសចិន។ផែនការនេះ គឺសំដៅបង្កើនសម្ពាធលើសកម្មភាពនានាដែលជួយដល់ប្រតិបត្តិការយោធារបស់រុស្ស៊ីក្នុងសង្គ្រាមនៅអ៊ុយក្រែន។ សហរដ្ឋអាមេរិក បានសម្តែងការព្រួយបារម្ភកាលពីដើមឆ្នាំនេះ អំពីការនាំចេញរបស់ប្រទេសចិន ទៅកាន់ប្រទេសរុស្ស៊ី នូវសារធាតុនីដ្រូស៊ែលលុយឡូស(nitrocellulose) ជាសម្ភារៈប្រើប្រាស់បានពីរផ្នែក ដែលអាចត្រូវបានប្រើប្រាស់សម្រាប់ការផលិតគ្រាប់រំសេវ។នៅពេលដែលគោលនយោបាយដាក់ទណ្ឌកម្ម ត្រូវបានអនុវត្ត នាយករដ្ឋមន្ត្រីជប៉ុន លោក Kishida Fumio នឹងបង្ហាញដល់ក្រុមប្រទេសមានសេដ្ឋកិច្ចរីកលូតលាស់ទាំង៧ផ្សេងទៀត ឬ ប្រទេស G7 នៅក្នុងកិច្ចប្រជុំកំពូលនៅប្រទេសអ៊ីតាលី។ កិច្ចប្រជុំនេះ គ្រោងនឹងធ្វើឡើងចាប់ពីថ្ងៃព្រហស្បតិ៍។ការដាក់ទណ្ឌកម្មរបស់ប្រទេសជប៉ុន លើក្រុមហ៊ុននៅក្នុងប្រទេសចិន នឹងក្លាយជាលើកដំបូងដែលទាក់ទងទៅនឹងការវាយលុករបស់រុស្ស៊ីនៅអ៊ុយក្រែន។ក្រុមអ្នកសង្កេតការណ៍ បាននិយាយថាចំណាត់ការនេះ នឹងជំរុញឱ្យប្រទេសចិន ធ្វើសកម្មភាពប្រកបដោយការទទួលខុសត្រូវ សម្រាប់សន្តិភាព និងស្ថិរភាពពិភពលោក។

UN ដាក់អ៊ីស្រាអែល ក្រុមហាម៉ាស និងគូជម្លោះស៊ូដង់ ចូលក្នុងបញ្ជីសម្លាប់ និងរំលោភបំពានលើកុមារ

អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយតឺរ៉េស (Antonio Guterres) កាលពីថ្ងៃអង្គារ (១១ មិថុនា) បានបញ្ចេញឈ្មោះកងកម្លាំងប្រដាប់អាវុធ និងសន្តិសុខរបស់អ៊ីស្រាអែល ក្រុមសកម្មប្រយុទ្ធប៉ាឡេស្ទីនហាម៉ាស និងក្រុមជីហាតអ៊ីស្លាម ព្រមទាំងភាគីជម្លោះនៅក្នុងសង្រ្គាមស៊ូដង់ សម្រាប់ការសម្លាប់ និងបង្ករបួសលើកុមារក្នុងឆ្នាំ២០២៣ ដោយដាក់ពួកគេទៅក្នុងបញ្ជីពិរុទ្ធភាពសកលប្រចាំឆ្នាំសម្រាប់ការរំលោភបំពានដោយហិង្សាប្រឆាំងនឹងកុមារ។នៅក្នុងរបាយការណ៍មួយទៅកាន់ក្រុមប្រឹក្សាសន្តិសុខអង្គការសហប្រជាជាតិ ដែលមើលឃើញដោយសារព័ត៌មានរ៉យទ័រ លោក ហ្គុយតឺរ៉េស ក៏បានរិះគន់ដល់កងកម្លាំងប្រដាប់អាវុធរបស់អ៊ីស្រាអែល និងស៊ូដង់ ដែលបានវាយប្រហារសាលារៀន និងមន្ទីរពេទ្យ ព្រមទាំងក្រុមហាម៉ាស និងក្រុមជីហាតអ៊ីស្លាមសម្រាប់ការចាប់ពង្រត់កុមារ។បញ្ជីរាយនាមដែលភ្ជាប់ជាមួយរបាយការណ៍នេះ មានគោលបំណងធ្វើឱ្យភាគីជម្លោះទាំងឡាយមានភាពខ្មាស់អៀនក្នុងក្តីសង្ឃឹមថានឹងជំរុញឱ្យពួកគេអនុវត្តវិធានការការពារកុមារ។ បញ្ជីនេះរាយការណ៍តែអំពីការរំលោភបំពានដែលត្រូវបានផ្ទៀងផ្ទាត់ដោយអង្គការសហប្រជាជាតិប៉ុណ្ណោះ។ប្រេសិតអង្គការសហប្រជាជាតិរបស់អ៊ីស្រាអែល លោក ហ្គីឡាដ អឺដាន (Gilad Erdan) បាននិយាយកាលពីថ្ងៃសុក្រ សប្ដាហ៍មុនថា លោកត្រូវបានគេជូនដំណឹងថាយោធារបស់អ៊ីស្រាអែលត្រូវបានបញ្ចូលទៅក្នុងបញ្ជីនោះ ដោយពណ៌នាការសម្រេចនេះថា «ជារឿងដ៏គួរឱ្យអាម៉ាស់»៕

អ៊ុយក្រែន សង្ឃឹមថា រុស្ស៊ីនឹងចូលរួមកិច្ចប្រជុំកំពូលសន្តិភាពអ៊ុយក្រែន លើកទីពីរ

នៅមុនកិច្ចប្រជុំកំពូលលើកដំបូងស្តីពីសន្តិភាពនៅអ៊ុយក្រែន ទីក្រុងគីវ បាននិយាយកាលពីថ្ងៃអង្គារ ថា ខ្លួនចង់ឱ្យរុស្ស៊ីចូលរួមក្នុងកិច្ចប្រជុំកំពូលលើកទីពីរ ដើម្បីទទួលបានផែនទីបង្ហាញផ្លូវដែលបានព្រមព្រៀងជាអន្តរជាតិ ឈានទៅរកការបញ្ចប់ជម្លោះ។ ទីក្រុងមូស្គូ និយាយថា ខ្លួនគ្មានចំណាប់អារម្មណ៍ក្នុងការចូលរួមកិច្ចប្រជុំនៅចុងសប្តាហ៍នេះទេ។ ដូច្នេះ ពុំត្រូវបានអញ្ជើញដោយប្រទេសស្វីស ជាម្ចាស់ផ្ទះនៃកិច្ចប្រជុំនោះទេ ខណៈអ៊ុយក្រែន ចង់ទទួលបានលទ្ធផលជាក់ស្តែងមួយចំនួន ពីកិច្ចប្រជុំដើម្បីឈានទៅដល់កិច្ចប្រជុំកំពូលលើកទីពីរ។លោក អាន់ឌ្រី យឺម៉ាក(Andriy Yermak) ប្រធានការិយាល័យរបស់ប្រធានាធិបតីអ៊ុយក្រែន លោក Volodymyr Zelenskyy បាននិយាយថា មាន «បទពិសោធន៍មិនល្អ» នៃទម្រង់ការចរចា កាលពីពេលមុនដែលពាក់ព័ន្ធជាមួយទីក្រុងមូស្គូ មុនពេលការវាយលុកពេញលេញរបស់រុស្ស៊ីលើអ៊ុយក្រែន ក្នុងខែកុម្ភៈ ឆ្នាំ ២០២២។លោក Yermak បាននិយាយទៅកាន់អង្គភាពប្រព័ន្ធផ្សព្វផ្សាយអឺរ៉ុប តាមរយៈបណ្តាញវីដេអូ ពីទីក្រុងប៊ែរឡាំង ថា សម្រាប់កិច្ចប្រជុំកំពូលលើកទីពីរ យើងនឹងធ្វើការជាមួយក្រុមការងារទាំងអស់ ជាមួយនឹងប្រទេសទាំងអស់ ដែលចាប់អារម្មណ៍ចូលរួម។ យើងមានផែនការរៀបចំរួមគ្នា ដែលនឹងត្រូវបានគាំទ្រដោយប្រទេសមានទំនួលខុសត្រូវទាំងអស់ ហើយយើងកំពុងស្វែងរកលទ្ធភាពសម្រាប់កិច្ចប្រជុំកំពូលលើកទី២ ដើម្បីអញ្ជើញអ្នកតំណាងរបស់ប្រទេសរុស្ស៊ី ។លោកនិយាយថា ទស្សនវិស័យដែលគាំទ្រដោយ ប្រទេសជាង១០០ មានមកពីគ្រប់ទ្វីប នឹងក្លាយជាផែនការពិតប្រាកដ។ប្រទេសជាង១៦០ និងអង្គការអន្តរជាតិ ត្រូវបានអញ្ជើញដោយប្រទេសស្វីស ទៅកាន់កិច្ចប្រជុំកំពូលរយៈពេលពីរថ្ងៃ នៅរមណីយដ្ឋាន ប៊ឺហ្គេនស្តុក(Burgenstock) ដោយទទួលបានការបញ្ជាក់ចូលរួមពីប្រទេសជាង៩០ រហូតមកដល់ពេលនេះ។

រដ្ឋាភិបាលថ្មីប្រទេសកុងហ្គោ ស្បថចូលកាន់តំណែង បន្ទាប់ពីការពន្យារពេលជាច្រើនខែ

លោកស្រី ជូឌីត ស៊ូមីនវ៉ា ទូលូកា(Judith Suminwa Tuluka) បានស្បថចូលកាន់តំណែងជានាយករដ្ឋមន្ត្រី របស់សាធារណរដ្ឋប្រជាធិបតេយ្យកុងហ្គោ កាលពីថ្ងៃអង្គារ រួមជាមួយសមាជិកដែលបានកាត់បន្ថយរួចចំនួន៥៤រូប ដោយបញ្ចប់ការពន្យារពេលជាងប្រាំមួយខែ បន្ទាប់ពីការបោះឆ្នោតឡើងវិញរបស់ប្រធានាធិបតី លោក ហ្វីលិក ស្ស៊ីសេកកេឌី(Felix Tshisekedi)។លោក Tshisekedi បានទទួលជ័យជម្នះអាណត្តិទីពីរកាលពីចុងឆ្នាំ២០២៣ បន្ទាប់ពីការបោះឆ្នោតដែលបានផ្តល់ឱ្យក្រុមចម្រុះសហព័ន្ធរបស់លោកប្រហែល ៩៥ភាគរយ នៃអាសនៈនៅរដ្ឋសភា។ ប៉ុន្តែជម្លោះផ្ទៃក្នុងលើតំណែងរដ្ឋមន្ត្រី បានពន្យារពេលការបង្កើតរដ្ឋាភិបាល។នៅទីបំផុត លោកប្រធានាធិបតី បានតែងតាំង លោកស្រី Suminwa ជានាយករដ្ឋមន្ត្រីស្ត្រីដំបូងរបស់ប្រទេសកុងហ្គោ នៅថ្ងៃទី១ ខែមេសា និងអតីតនាយសេនាធិការរបស់លោក លោក វីតាល់ កាំមែហេ(Vital Kamerhe) ជាប្រធានសភា នៅថ្ងៃទី២២ ខែឧសភា ដោយត្រួសត្រាយផ្លូវសម្រាប់ការតែងតាំងគណៈរដ្ឋមន្ត្រីថ្មី។រដ្ឋាភិបាលថ្មី មានរដ្ឋមន្ត្រីចំនួន៥៤រូប ជាការបង្រួមតិចជាងការរំពឹងទុកពី៥៧រូប កាលពីពេលពីមុន ទោះបីជាមានសម្ពាធដើម្បីឲ្យមានការកាត់បន្ថយការចំណាយក៏ដោយ។ នាយកផ្នែកទំនាក់ទំនងរបស់ លោក Tshisekedi លោកអ៊ីរីក នីយីនឌូ(Erik Nyindu) បាននិយាយថា ការពន្យារពេល បានអនុញ្ញាតឱ្យមានពេលវេលាដើម្បីស្វែងរកការសម្របសម្រួលរវាងភាគីចម្រុះ។

កូរ៉េខាងជើង លើកសរសើរទំនាក់ទំនងដ៏រឹងមាំជាមួយរុស្ស៊ី ស្របពេលការរំពឹងទុកនៃទស្សនកិច្ចលោក ពូទីន

ប្រព័ន្ធផ្សព្វផ្សាយរដ្ឋ KCNA បាននិយាយនៅថ្ងៃពុធ (១២ មិថុនា) នេះថា មេដឹកនាំកូរ៉េខាងជើង លោក គីម ជុងអ៊ុន (Kim Jong Un) បាននិយាយថា ប្រទេសរបស់លោកគឺជា «សមមិត្តដ៏រឹងមាំដែលមិនអាចកាត់ថ្លៃបាន» ជាមួយរុស្ស៊ី នៅក្នុងសារមួយទៅកាន់លោកប្រធានាធិបតី វ៉្លាឌីមៀ ពូទីន (Vladimir Putin) ស្របពេលមានការរំពឹងទុកជុំវិញដំណើរទស្សនកិច្ចរបស់លោក ពូទីន ទៅកាន់ប្រទេសកូរ៉េខាងជើង។ដោយប្រារព្ធទិវាជាតិរបស់រុស្ស៊ី លោក គីម បាននិយាយថា ជំនួបរបស់ខ្លួនជាមួយលោក ពូទីន នៅឯទីតាំងបាញ់បង្ហោះយានអវកាសរុស្ស៊ី កាលពីឆ្នាំមុន បានលើកកម្ពស់ចំណងនៃ «ទំនាក់ទំនងយុទ្ធសាស្ត្រដែលមានអាយុកាលរាប់សតវត្សរ៍» របស់ពួកគេ។ សារនេះបានកើតឡើងបន្ទាប់ពីសារព័ត៌មាន វ៉េដូម៉ូស្ទី (Vedomosti) របស់រុស្ស៊ី កាលពីថ្ងៃចន្ទ បានរាយការណ៍ថាលោក ពូទីន នឹងទៅបំពេញទស្សនកិច្ចនៅកូរ៉េខាងជើង និងវៀតណាម ក្នុងប៉ុន្មានសប្តាហ៍ខាងមុខនេះ។មន្ត្រីម្នាក់ក្នុងប្រទេសវៀតណាម បានប្រាប់សារព័ត៌មានរ៉យទ័រថា ដំណើរទស្សនកិច្ចនៅវៀតណាមនោះ ត្រូវបានគ្រោងធ្វើនៅថ្ងៃទី ១៩ និងថ្ងៃទី ២០ ខែមិថុនា ប៉ុន្តែមិនទាន់ត្រូវបានគេបញ្ជាក់នៅឡើយទេ។ វិមានក្រឹមឡាំងបាននិយាយថា រុស្ស៊ី ចង់ជំរុញកិច្ចសហប្រតិបត្តិការជាមួយកូរ៉េខាងជើង «លើគ្រប់វិស័យ» ប៉ុន្តែមិនបានបញ្ជាក់ពីកាលបរិច្ឆេទនៃដំណើរទស្សនកិច្ចនោះទេ។លោក គីម បានធ្វើដំណើរទៅតំបន់ចុងបូព៌ារបស់រុស្ស៊ី កាលពីខែកញ្ញា ឆ្នាំមុន ដោយទៅទស្សនាមជ្ឈមណ្ឌលបង្ហោះយានអវកាស វ៉ូស្តូឆ្នី ខូស្មូដ្រូម (Vostochny Cosmodrome) ជាទីដែលលោក ពូទីន បានសន្យាថានឹងជួយលោកបង្កើតផ្កាយរណប។ ទីក្រុងព្យុងយ៉ាង និងទីក្រុងមូស្គូ បានបង្កើនទំនាក់ទំនងការទូត និងសន្តិសុខកាន់តែខ្លាំងឡើង ដោយធ្វើជាម្ចាស់ផ្ទះទទួលរដ្ឋាភិបាល សភា និងគណៈប្រតិភូផ្សេងទៀតរវាងគ្នាទៅវិញទៅមកក្នុងប៉ុន្មានខែថ្មីៗនេះ៕

បណ្ដាញសង្គម

ព័ត៌មានថ្មីៗ

ប្រមុខការទូតអ៊ីរ៉ង់៖ ការជ្រើសរើសលោក Mojtaba Khameneiជាមេដឹកនាំកំពូលអ៊ីរ៉ង់បង្ហាញពីនិរន្តរភាពនិងស្ថិរភាព

CMAC សហការជាមួយក្រុមហ៊ុនជប៉ុន អភិវឌ្ឍន៍បច្ចេកទេសម៉ាស៊ីនបោសសម្អាតមីនយន្តទំនើប Robot

ទីផ្សារអាស៊ីងើបឡើងវិញ តែប្រេងធ្លាក់ចុះ ខណៈលោក Trump ថាសង្គ្រាមអ៊ីរ៉ង់អាចនឹងបញ្ចប់ឆាប់ៗនេះ

អ្នកជំនាញ៖ តម្លៃប្រេងហក់ឡើងថ្លៃមិនប៉ះពាល់ដល់លំហូរការធ្វើពាណិជ្ជកម្មអន្តរជាតិរបស់កម្ពុជាទេ

ខេត្តជាប់មាត់សមុទ្រចំនួន៤ខេត្តមានឱកាសការងារជាង៥ពាន់កន្លែង កំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

ខេត្តកណ្ដាលមានឱកាសការងារជាង ១ម៉ឺនកន្លែង កំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

អាជ្ញាធរជាតិអប្សរានឹងត្រួតពិនិត្យចំពោះការថតរូបភាព និងវីដេអូផ្សព្វផ្សាយនានានៅរមណីយដ្ឋានអង្គរដែលអាចប៉ះពាល់ដល់ក្រមប្រតិបត្តិអង្គរ និងតម្លៃបេតិកភណ្ឌ

ក្រសួងពាណិជ្ជកម្មដាក់ចេញវិធានថ្មីៗបន្ថែមដោះស្រាយបញ្ហាប្រេងឥន្ធនៈដើម្បីរក្សាប្រភពផ្គត់ផ្គង់ និងការចែកចាយ

កម្ពុជា និងមូលនិធិ IMF ពិភាក្សាលើលទ្ធភាពពង្រីកទីផ្សារការងារ ការអភិវឌ្ឍជំនាញ និងការធ្វើសមាហរណកម្មអតីតពលករ

លោក Trump ព្រមានវាយប្រហារអ៊ីរ៉ង់ «ខ្លាំងជាងមុន ២០ដង» បើរារាំងលំហូរប្រេងនៅច្រកសមុទ្រ Hormuz

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ​ និង ការអភិវឌ្ឍន៍