នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចធិបតីអញ្ជើញចុះត្រួតពិនិត្យ និងសួរសុខទុក្ខពលរដ្ឋរងគ្រោះដោយទឹកជំនន់នៅបន្ទាយមានជ័យ
សម្តេចតេជោ ហ៊ុន សែន អនុញ្ញាតឱ្យ លោកជំទាវ រ៉េឡែន ស្យ៉ាល់ តាហ្គាឡ័រ លៀវហ្វាឡានី (Raylene Siale Tagaloa LIUFALANI) ឯកអគ្គរដ្ឋទូតតែងតាំងថ្មី នៃប្រទេសនូវែលសេឡង់ ប្រចាំនៅកម្ពុជាចូលជួប និងប្រគល់សារតាំង
សម្តេចតេជោ ហ៊ុន សែន អនុញ្ញាតឱ្យ ឯកឧត្តម ទ្រីសម៉ាន់ អ៉ីហ្គោរ៍ (Driesmans Igor) ឯកអគ្គរាជទូតសហភាពអឺរ៉ុបប្រចាំកម្ពុជា និងជាប្រេសិតពិសេស EU ប្រចាំនៅមីយ៉ាន់ម៉ា ចូលជួបសម្ដែងការគួរសម
សម្តេចតេជោ ហ៊ុន សែន អនុញ្ញាតឱ្យ ឯកឧត្តមឯកអគ្គរដ្ឋទូតសហភាពអឺរ៉ុប ប្រចាំកម្ពុជា ចូលជួបសម្តែងការគួរសម

នយោបាយ​ និង ការអភិវឌ្ឍន៍

វៀតណាម ថាខ្លួននឹងពិភាក្សាជាមួយហ្វីលីពីន លើបណ្ដឹងទាមទារដែនសមុទ្រនៅ UN របស់ក្រុងម៉ានីល

2024/06/21 08:52:49 pm        101
Facebook Telegram Linkin
វៀតណាម បាននិយាយនៅថ្ងៃសុក្រ (២១ មិថុនា) នេះថា ខ្លួនមានឆន្ទៈក្នុងការពិភាក្សាជាមួយប្រទេសហ្វីលីពីន ដើម្បីស្វែងរកវិធានការដែលសមស្របនឹងផលប្រយោជន៍នៃប្រទេសទាំងពីរ បន្ទាប់ពីទីក្រុងម៉ានីល កាលពីសប្តាហ៍មុន បានដាក់បណ្ដឹងទៅអង្គការសហប្រជាជាតិ ទាមទារសិទ្ធិលើតំបន់ខ្ពង់រាបសមុទ្រទឹកជ្រៅនៅសមុទ្រចិនខាងត្បូង។អ្នកនាំពាក្យក្រសួងការបរទេសវៀតណាម លោកស្រី ហ្វាំ ធូហាំង (Pham Thu Hang) បាននិយាយនៅក្នុងសេចក្តីថ្លែងការណ៍មួយដែលបានបង្ហោះនៅលើគេហទំព័ររដ្ឋាភិបាលថា «វៀតណាមអះអាងជាថ្មីម្តងទៀតនូវអធិបតេយ្យភាពរបស់ខ្លួនចំពោះប្រជុំកោះ ហ័ងសា (Hoang Sa) និង ទ្រឿងសា (Truong Sa) ស្របតាមច្បាប់អន្តរជាតិ» ដោយសំដៅទៅលើប្រជុំកោះ ប៉ារ៉ាសែល (Paracel) និង ស្ព្រាតលី (Spratly)។ វៀតណាម និងហ្វីលីពីន ស្ថិតក្នុងចំណោមអ្នកទាមទារផ្នែកខ្លះនៃសមុទ្រចិនខាងត្បូង ដែលជាផ្លូវទឹកសមុទ្រពិភពលោកដ៏មមាញឹក ដែលស្ទើរតែទាំងអស់ត្រូវបានទាមទារដោយចិន។ ហ្វីលីពីន កាលពីសប្តាហ៍មុនបានដាក់បណ្ដឹងទៅអង្គការសហប្រជាជាតិទាមទារតំបន់ខ្ពង់រាបសមុទ្រទឹកជ្រៅមួយនៅសមុទ្រចិនខាងត្បូង ដែលគេជឿថាសម្បូរទៅដោយប្រេង និងឧស្ម័នធម្មជាតិ ព្រមទាំងជង្រុកត្រី។លោកស្រី ហាំង បានបន្ថែមនៅក្នុងសេចក្តីថ្លែងការណ៍ថា «បណ្ដារដ្ឋឆ្នេរសមុទ្រ ដែលបញ្ចូលព្រំដែនខ្ពង់រាបសមុទ្រទឹកជ្រៅខាងក្រៅរបស់ពួកគេ ចាំបាច់ត្រូវតែគោរពសិទ្ធិ និងផលប្រយោជន៍ស្របច្បាប់នៃរដ្ឋឆ្នេរសមុទ្រពាក់ព័ន្ធផ្សេងទៀត ដែលមានឆ្នេរសមុទ្រទល់មុខ ឬនៅជាប់គ្នា»៕

អ្នកបោះឆ្នោតអាមេរិក ទន្ទឹងរងចាំការជជែកដេញដោលរវាងលោក Biden និងលោកTrump

2024/06/21 08:48:12 pm        68
Facebook Telegram Linkin
ជនជាតិអាមេរិក ដែលមិនប្រាកដប្រជាអំពីបេក្ខភាពប្រធានាធិបតីដែលពួកគេពេញចិត្តនៅក្នុងការបោះឆ្នោតសហរដ្ឋអាមេរិកនាពេលខាងមុខ ដែលលោកប្រធានាធិបតី ចូ បៃដិន (Joe Biden) ប្រកួតទល់នឹងលោក ដូណាល់ ត្រាំ (Donald Trump) ឥឡូវនេះកំពុងទន្ទឹងរងចាំការជជែកដេញដោលនៅសប្តាហ៍ក្រោយនេះ ដើម្បីជួយពួកគេសម្រេចចិត្តថាតើត្រូវគាំទ្រអ្នកណានៅឆ្នាំនេះ។ មនុស្សជាច្រើន ដែលធ្លាប់បានបោះឆ្នោតឱ្យលោក ត្រាំ ក្នុងឆ្នាំ២០១៦ មុនពេលងាកទៅគាំទ្របេក្ខភាពលោក បៃដិន ក្នុងឆ្នាំ២០២០ ដោយសារតែពួកគេមានអារម្មណ៍ថាការដឹកនាំរបស់លោក ត្រាំ មានភាពច្របូកច្របល់ខ្លាំងពេក បាននិយាយថា ឥឡូវនេះពួកគេកំពុងងាកទៅគាំទ្រលោក ត្រាំ ម្តងទៀត ដោយសារមិនសប្បាយចិត្តចំពោះការធ្វើអន្តោប្រវេសន៍ខុសច្បាប់នៅព្រំដែនអាមេរិក-ម៉ិកស៊ិក និងអតិផរណាដ៏ខ្ពស់នៅក្រោមការគ្រប់គ្រងលោក បៃដិន។ពួកគេបន្ថែមថា ទោះជាយ៉ាងណាក៏ដោយ លោក បៃដិន អាចយកចិត្តពួកគេបាន ប្រសិនបើលោកបង្ហាញសំណើដ៏រឹងមាំមួយដើម្បីធានាសន្តិសុខព្រំដែន និងសុខភាពរឹងមាំរបស់ខ្លួន ទោះបីជាលោកមានអាយុច្រើនក៏ដោយ។ ប្រហែល ២០ ភាគរយនៃអ្នកបោះឆ្នោតនិយាយថា ពួកគេមិនទាន់បានជ្រើសរើសបេក្ខជនប្រធានាធិបតីឆ្នាំនេះនៅឡើយទេ ហើយកំពុងពឹងផ្អែកលើជម្រើសរបស់ភាគីទីបី ឬប្រហែលជាមិនបោះឆ្នោតទាល់តែសោះនៅក្នុងការបោះឆ្នោតថ្ងៃទី០៥ ខែវិច្ឆិកា នេះបើយោងតាមការស្ទង់មតិរបស់សារព័ត៌មានរ៉យទ័រ និងស្ថាប័នស្រាវជ្រាវ អ៊ីបសូស (Ipsos) ថ្មីៗនេះ។សុខភាពរឹងមាំខាងផ្លូវចិត្ត ជាពិសេសសម្រាប់លោក បៃដិន គឺជាបញ្ហាសំខាន់សម្រាប់អ្នកបោះឆ្នោតដែលមិនទាន់សម្រេចចិត្តទាំងនេះ ដែលនឹងរងចាំមើលការជជែកដេញដោលលើកដំបូង ដើម្បីមើលថាតើបេក្ខភាពវ័យចំណាស់ជាងគេទាំងពីរនាក់ ដែលឈរឈ្មោះជាប្រធានាធិបតីអាមេរិកនេះ អាចគិតបានល្អកម្រិតណា។ ការគ្រប់គ្រងសេដ្ឋកិច្ចរបស់លោក បៃដិន និងជាពិសេសការគ្រប់គ្រងអតិផរណារបស់លោកក៏ជាប្រធានបទក្តៅគគុកផងដែរសម្រាប់ការបោះឆ្នោតអាមេរិក៕

បេក្ខជនប្រធានាធិបតីវេណេស៊ុយអេឡា ព្រមព្រៀងគោរពលទ្ធផលបោះឆ្នោត ខណៈបក្សប្រឆាំងធំ អនុបវាទ

2024/06/21 06:53:08 pm        119
Facebook Telegram Linkin
ប្រធានាធិបតីប្រទេសវេណេស៊ុយអេឡា លោក Nicolas Maduro និងបេក្ខជន ៧រូបផ្សេងទៀត សម្រាប់ការបោះឆ្នោតនៅខែកក្កដា កាលពីថ្ងៃព្រហស្បតិ៍ បានចុះហត្ថលេខាលើកិច្ចព្រមព្រៀងមួយ ដើម្បីគោរពលទ្ធផលបោះឆ្នោត ទោះបីជាគណបក្សប្រឆាំងធំរបស់ប្រទេសនេះ បានអនុបវាទ ដោយនិយាយថា រដ្ឋាភិបាល បានរំលោភលើកិច្ចព្រមព្រៀងដែលមានស្រាប់។ កិច្ចព្រមព្រៀងចំនួនប្រាំបួនចំណុច ត្រូវបានបង្ហាញដោយ ក្រុមប្រឹក្សាជាតិរៀបចំការបោះឆ្នោត (CNE) ជាអាជ្ញាធររៀបចំការបោះឆ្នោតកម្រិតខ្ពស់បំផុតរបស់ប្រទេសវេណេស៊ុយអេឡា ដែលអ្នករិះគន់និយាយថា ជាការបន្ថែមពេលរបស់គណបក្សកាន់អំណាច។បេក្ខជនគណបក្សប្រឆាំងធំ លោក អ៊ីដមុនដូ ហ្កុនហ្សាឡេស(Edmundo Gonzalez) បានបដិសេធមិនចុះហត្ថលេខា។ នៅក្នុងសេចក្តីថ្លែងការណ៍ ដែលបានចេញផ្សាយកាលពីថ្ងៃព្រហស្បតិ៍ លោក Gonzalez បាននិយាយថា គណបក្សប្រឆាំងបានគោរពតាមលក្ខខណ្ឌមុនសម្រាប់ការបោះឆ្នោត ដែលត្រូវបានបង្កើតឡើងនៅក្នុងកិច្ចព្រមព្រៀង ចុះហត្ថលេខារវាងរដ្ឋាភិបាល និងគណបក្សប្រឆាំងនៅក្នុងទីក្រុង Barbados កាលពីឆ្នាំមុន។ប្រធានក្រុមប្រឹក្សាជាតិរៀបចំការបោះឆ្នោត (CNE) លោក Elvis Amoroso បាននិយាយថា លោក Gonzalez ពុំបានឆ្លើយតបទៅនឹងការអំពាវនាវរបស់ប្រទេសនោះទេ បន្ទាប់ពីអញ្ជើញលោកឲ្យមកចុះហត្ថលេខា ខណៈស្ថានីយ៍ទូរទស្សន៍ផ្លូវការ បានផ្សាយបង្ហាញពីកៅអីនៅទទេ។ លោក Gonzalez អតីតអ្នកការទូតអាយុ ៧៤ឆ្នាំ បាននិយាយទៅកាន់អ្នកសារព័ត៌មាន កាលពីថ្ងៃព្រហស្បតិ៍ថា លោកពុំបានទទួលការកោះហៅណាមួយពីក្រុមប្រឹក្សាជាតិរៀបចំការបោះឆ្នោត (CNE) ឡើយ។

លោក Biden ហាមឃាត់ការលក់កម្មវិធី Kaspersky នៅសហរដ្ឋអាមេរិក ជុំវិញទំនាក់ទំនងរុស្ស៊ី

2024/06/21 06:50:34 pm        112
Facebook Telegram Linkin
រដ្ឋបាលសហរដ្ឋអាមេរិក របស់លោក Joe Biden កាលពីថ្ងៃព្រហស្បតិ៍ បានប្រកាសពីផែនការដើម្បីរារាំងការលក់កម្មវិធីកំចាត់មេរោគដែលផលិតដោយមន្ទីពិសោធ កាសភឺស្គី ឡេប(Kaspersky Lab) របស់រុស្ស៊ី នៅសហរដ្ឋអាមេរិក ដោយនិយាយយោងទៅរកអតិថិជនធំៗនៅសហរដ្ឋអាមេរិករបស់ក្រុមហ៊ុននេះ រួមទាំងក្រុមហ៊ុនផ្តល់ហេដ្ឋារចនាសម្ព័ន្ធសំខាន់ៗ រដ្ឋាភិបាលរដ្ឋ និងរដ្ឋាភិបាលតំបន់។លោក Gina Raimondo រដ្ឋមន្ត្រីក្រសួងពាណិជ្ជកម្ម បាននិយាយក្នុងការសន្ទនាតាមទូរស័ព្ទ ជាមួយអ្នកសារព័ត៌មាន កាលពីថ្ងៃព្រហស្បតិ៍ថា ឥទ្ធិពលរបស់ទីក្រុងមូស្គូលើក្រុមហ៊ុន ត្រូវបានគេរកឃើញថាបង្កឱ្យមានហានិភ័យគួរឱ្យកត់សម្គាល់។ ប្រភពព័ត៌មានមួយបាននិយាយថា ដំណើរការដែលមានឯកសិទ្ធិរបស់កម្មវិធី ទៅកាន់ប្រព័ន្ធកុំព្យូទ័រ អាចអនុញ្ញាតឱ្យក្រុមហ៊ុនលួចយកព័ត៌មានរសើបពីកុំព្យូទ័ររបស់អាមេរិក ឬដំឡើងកម្មវិធីមេរោគ និងរក្សាការធ្វើបច្ចុប្បន្នភាពសំខាន់ៗ ដែលនឹងបង្កើនការគំរាមកំហែង។មន្ទីរពិសោធន៍ Kaspersky Lab និងស្ថានទូតរុស្ស៊ី ពុំបានឆ្លើយតបទៅនឹងសំណើសុំការអត្ថាធិប្បាយនោះទេ។ កន្លងមកក្រុមហ៊ុន កាសភឺស្គី(Kaspersky) ធ្លាប់បាននិយាយថា ក្រុមហ៊ុននេះ ជាក្រុមហ៊ុនគ្រប់គ្រងដោយឯកជនសុទ្ធសាធ ពុំមានទំនាក់ទំនងជាមួយរដ្ឋាភិបាលរុស្ស៊ីទេ។ចំណាត់ការនានាបង្ហាញថា រដ្ឋបាលរបស់លោក Biden កំពុងព្យាយាមបំបាត់ហានិភ័យនៃការវាយប្រហារតាមប្រព័ន្ធអ៊ីនធឺណិតរបស់រុស្ស៊ី ដែលកើតចេញពីកម្មវិធីកំចាត់មេរោគ Kaspersky និងរក្សាការប្រជ្រៀតចូលរបស់ទីក្រុងមូស្គូ ខណៈកិច្ចខិតខំប្រឹងប្រែងសង្រ្គាមរបស់ខ្លួននៅអ៊ុយក្រែន ទទួលបានសន្ទុះឡើងវិញ។

ប្រទេសចិន ថ្កោលទោសការលក់អាវុធរបស់សហរដ្ឋអាមេរិក ឲ្យទៅកោះតៃវ៉ាន់

2024/06/21 06:35:30 pm        76
Facebook Telegram Linkin
ទីក្រុងប៉េកាំង បានថ្កោលទោសយ៉ាងដាច់អហង្ការ កាលពីថ្ងៃព្រហស្បតិ៍សប្ដាហ៍នេះ ចំពោះការលក់អាវុធលើកទីពីររបស់ទីក្រុងវ៉ាស៊ីនតោន ក្នុងខែនេះទៅឱ្យតំបន់តៃវ៉ាន់ ដោយនិយាយថា អ្វីដែលសហរដ្ឋអាមេរិកបានធ្វើគឺដើម្បីជួយដល់ការប៉ុនប៉ងរបស់អាជ្ញាធរគណបក្សប្រជាធិបតេយ្យជឿនលឿនក្នុងការស្វែងរកឯករាជ្យតាមរយៈការកសាងកម្លាំងយោធា ដែលនឹងទទួលបានការវាយប្រហារត្រលប់ទៅវិញតែប៉ុណ្ណោះ។ ការអត្ថាធិប្បាយនេះ ត្រូវបានធ្វើឡើង ស្របពេលក្រសួងការបរទេសសហរដ្ឋអាមេរិកបានអនុម័តកាលពីថ្ងៃអង្គារលើការលក់យានដ្រូន និងមីស៊ីលទៅឱ្យតៃវ៉ាន់ក្នុងតម្លៃប្រមាណ ៣៦០ លានដុល្លារអាមេរិក។កាប្រកាសនេះបានកើតឡើងត្រឹមតែពីរសប្តាហ៍ប៉ុណ្ណោះ បន្ទាប់ពីរដ្ឋបាលអាមេរិកបានសម្រេចចិត្តលក់គ្រឿងបន្លាស់ និងជួសជុលយន្តហោះចម្បាំង F-16 ក្នុងតម្លៃ ៨០លានដុល្លារទៅឱ្យកោះនេះ។ថ្លែងនៅក្នុងសន្និសីទសារព័ត៌មានប្រចាំថ្ងៃ អ្នកនាំពាក្យក្រសួងការបរទេសចិន លោក លីន ចៀន (Lin Jian) បាននិយាយថា ការលក់អាវុធរបស់អាមេរិកទៅកាន់តំបន់តៃវ៉ាន់ ដោយមិនគិតពីការប្រឆាំងរបស់ចិន គឺបំពានយ៉ាងធ្ងន់ធ្ងរលើគោលការណ៍ចិនតែមួយ និងសេចក្តីថ្លែងការណ៍រួមទាំងបីរបស់ចិន និងសហរដ្ឋអាមេរិក ជាពិសេសសេចក្តីថ្លែងការណ៍កាលពីថ្ងៃទី ១៧ ខែសីហា ឆ្នាំ១៩៨២។ លោកបាននិយាយថា ការលក់បែបនេះធ្វើឱ្យប៉ះពាល់ដល់អធិបតេយ្យភាព និងផលប្រយោជន៍សន្តិសុខរបស់ចិនយ៉ាងខ្លាំង និងធ្វើឱ្យប៉ះពាល់ដល់ទំនាក់ទំនងចិន-អាមេរិក សន្តិភាព ព្រមទាំងស្ថិរភាពនៅទូទាំងច្រកសមុទ្រតៃវ៉ាន់ ហើយផ្ញើសារខុសដ៏ធ្ងន់ធ្ងរទៅកាន់កងកម្លាំងបំបែកខ្លួនទាមទារឯករាជ្យតៃវ៉ាន់៕

អាមេរិក និងចិន ធ្វើកិច្ចចរចានុយក្លេអ៊ែរក្រៅផ្លូវការលើកដំបូងក្នុងពេល ៥ ឆ្នាំ ដោយផ្ដោតលើកោះតៃវ៉ាន់

2024/06/21 06:17:19 pm        141
Facebook Telegram Linkin
សហរដ្ឋអាមេរិក និងប្រទេសចិន បានបន្តកិច្ចចរចាអាវុធនុយក្លេអ៊ែរពាក់កណ្តាលផ្លូវការក្នុងខែមីនា ជាលើកដំបូងក្នុងរយៈពេល ៥ ឆ្នាំ ដោយតំណាងរបស់ទីក្រុងប៉េកាំង ប្រាប់សមភាគីអាមេរិក ថាពួកគេនឹងមិនងាកទៅរកការគំរាមកំហែងនុយក្លេអ៊ែរលើកោះតៃវ៉ាន់ នោះទេ នេះបើយោងតាមប្រតិភូអាមេរិកពីរនាក់ដែលបានចូលរួមកិច្ចចរចានោះ។តំណាងចិន បានផ្តល់ការធានាឡើងវិញបន្ទាប់ពីអន្តរការីអាមេរិក បានលើកឡើងពីការព្រួយបារម្ភដែលថាចិន អាចនឹងប្រើ ឬគំរាមប្រើអាវុធនុយក្លេអ៊ែរ ប្រសិនបើខ្លួនប្រឈមនឹងការបរាជ័យក្នុងជម្លោះលើកោះតៃវ៉ាន់ ដែលចិន ចាត់ទុកថាជាទឹកដីរបស់ខ្លួន ប៉ុន្តែរដ្ឋាភិបាលទីក្រុងតៃប៉ិ បដិសេធ។ទីក្រុងវ៉ាស៊ីនតោន ត្រូវបានតំណាងដោយគណៈប្រតិភូប្រហែល ៦ នាក់ រួមទាំងអតីតមន្ត្រី និងអ្នកប្រាជ្ញនៅឯការពិភាក្សារយៈពេលពីរថ្ងៃនោះ ដែលបានធ្វើឡើងនៅក្នុងបន្ទប់សន្និសីទសណ្ឋាគារក្រុងសៀងហៃ (Shanghai)។ ចំណែកទីក្រុងប៉េកាំង បានបញ្ជូនគណៈប្រតិភូអ្នកប្រាជ្ញ និងអ្នកវិភាគ ដែលរួមមានអតីតមន្ត្រីកងទ័ពរំដោះប្រជាជនចិនមួយចំនួន។ សូមបញ្ជាក់ថា អ្នកចូលរួមក្នុងកិច្ចពិភាក្សា កម្រិតពីរ (Track Two) ជាទូទៅគឺជាអតីតមន្ត្រី និងក្រុមអ្នកសិក្សាដែលអាចនិយាយជាមួយអាជ្ញាធរលើមុខតំណែងរដ្ឋាភិបាលរបស់ពួកគេ ទោះបីជាខ្លួនមិនពាក់ព័ន្ធដោយផ្ទាល់ក្នុងប្រធានបទក៏ដោយ ហើយការចរចារវាងរដ្ឋាភិបាល និងរដ្ឋាភិបាលត្រូវបានគេស្គាល់ថាជា កម្រិតមួយ (Track One)។អ្នកនាំពាក្យក្រសួងការបរទេសអាមេរិក បាននិយាយនៅក្នុងការឆ្លើយតបទៅនឹងសំណួររបស់សារព័ត៌មានរ៉យទ័រថា កិច្ចពិភាក្សា កម្រិតពីរ នេះអាចនឹង «មានប្រយោជន៍» ដោយបន្ថែមថា ក្រសួងបានដឹងលឺពីកិច្ចចរចានោះ ប៉ុន្តែមិនបានចូលរួមនោះទេ៕

ក្រុមប្រដាប់អាវុធមីយ៉ាន់ម៉ា ចោទរបបសឹក ថាបានបំពានបទឈប់បាញ់ដែលចិនសម្របសម្រួល

2024/06/21 06:12:59 pm        116
Facebook Telegram Linkin
សម្ព័ន្ធភាពនៃក្រុមប្រដាប់អាវុធជនជាតិភាគតិចមីយ៉ាន់ម៉ា បានចោទប្រកាន់របបយោធាថាបានរំលោភលើបទឈប់បាញ់ ដែលសម្របសម្រួលដោយប្រទេសចិន ម្តងហើយម្តងទៀតនៅភាគខាងជើងនៃប្រទេសក្នុងខែនេះ ព្រមទាំងបណ្តាលឱ្យជនស៊ីវិលស្លាប់ និងរបួសជាច្រើន។ ទីក្រុងប៉េកាំង បានសម្របសម្រួលបទឈប់បាញ់មួយរវាងរបបសឹក និងសម្ព័ន្ធក្រុមប្រដាប់អាវុធ ឈ្មោះថា «សម្ព័ន្ធភាតរភាពត្រីភាគី» នៅក្នុងខែមករាបន្ទាប់ពីការប្រយុទ្ធគ្នាជាច្រើនខែ ដែលបានជម្លៀសប្រជាជនជាងកន្លះលាននាក់នៅជិតព្រំដែនភាគខាងត្បូងរបស់ចិន។បទឈប់បាញ់នោះ បានអនុញ្ញាតឱ្យសម្ព័ន្ធភាពដែលបង្កើតឡើងដោយកងទ័ពរំដោះជាតិតាអាំង (TNLA) កងទ័ពសម្ព័ន្ធប្រជាធិបតេយ្យជាតិមីយ៉ាន់ម៉ា (MNDAA) និងកងទ័ពអារ៉ាកាន (AA) កាន់កាប់ទឹកដីជាច្រើនដែលខ្លួនវាយដណ្តើមបាននៅភាគខាងជើងរដ្ឋសាន (Shan)។សម្ព័ន្ធនេះបាននិយាយថា កងទ័ពរបបសឹក កាលពីថ្ងៃពុធ (១៩ មិថុនា) បានបើកការវាយប្រហារតាមអាកាសលើទឹកដីដែលកងទ័ពតាអាំង TNLA កាន់កាប់នៅជិតមជ្ឈមណ្ឌលរុករករ៉ែត្បូងទទឹម នៅភូមិម៉ូកូក (Mogok) ដោយសម្លាប់ជនស៊ីវិលម្នាក់ ហើយបន្ថែមថា កាលពីថ្ងៃអង្គារ កងទ័ពរបបសឹកក៏បានធ្វើការវាយប្រហារដោយយានដ្រូន ដែលបានសម្លាប់សមាជិកកងទ័ពតាអាំង ម្នាក់ និងរងរបួសយ៉ាងធ្ងន់ធ្ងរ ៤ នាក់ផ្សេងទៀត។កងទ័ពតាអាំង TNLA បាននិយាយថា ការវាយប្រហារនេះគឺជាការរំលោភចុងក្រោយបំផុតក្នុងខែនេះដោយរបបយោធា ដែលបានបាញ់ផ្លោងលើទីតាំងកងទ័ពប្រដាប់អាវុធជនជាតិភាគតិចមួយនេះ ហើយកាត់ផ្ដាច់ផ្លូវ និងរឹតបន្តឹងលំហូរទំនិញទៅកាន់ភូមិនានាដែលគ្រប់គ្រងដោយកងទ័ព TNLA ដែលបំពានបទឈប់បាញ់យ៉ាងធ្ងន់ធ្ងរ៕

អាមេរិក៖ ការលើកឡើងរបស់លោក ពូទីន ពីការបញ្ជូនអាវុធឱ្យកូរ៉េខាងជើង ជារឿងគួរឱ្យបារម្ភ

2024/06/21 06:09:02 pm        136
Facebook Telegram Linkin
អ្នកនាំពាក្យក្រសួងការបរទេសអាមេរិក លោក ម៉ាធូ មីលឡឺ (Matthew Miller) បាននិយាយថា ការអត្ថាធិប្បាយរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) កាលពីថ្ងៃព្រហស្បតិ៍ ដែលថាទីក្រុងមូស្គូ អាចផ្គត់ផ្គង់សព្វាវុធដល់កូរ៉េខាងជើង បន្ទាប់ពីបានចុះហត្ថលេខាលើកិច្ចព្រមព្រៀងការពារជាតិជាមួយទីក្រុងព្យុងយ៉ាង គឺជារឿង «គួរឱ្យព្រួយបារម្ភយ៉ាងខ្លាំង»។លោក ពូទីន បានលើកឡើងបន្ទាប់ពីដំណើរទស្សនកិច្ចទៅកាន់ប្រទេសកូរ៉េខាងជើង ក្នុងសប្តាហ៍នេះថា ការផ្គត់ផ្គង់សព្វាវុធដល់ប្រទេសផ្ដាច់ខ្លួនប្រដាច់ដោយអាវុធនុយក្លេអ៊ែរមួយនេះ នឹងក្លាយជាការឆ្លើយតបឆ្លុះបញ្ចាំងចំពោះការបំពាក់អាវុធរបស់លោកខាងលិច ដល់អ៊ុយក្រែន។ លោក មីលឡឺ បានប្រាប់សន្និសីទព័ត៌មានមួយនៅពេលត្រូវសាកសួរអំពីការលើកឡើងរបស់លោក ពូទីន អំពីលទ្ធភាពនៃការផ្គត់ផ្គង់សព្វាវុធដល់កូរ៉េខាងជើង នេះថា «វាជារឿងគួរឱ្យព្រួយបារម្ភយ៉ាងខ្លាំង»។លោកបន្ថែមថា «ប្រាកដណាស់ វានឹងធ្វើឱ្យឧបទ្វីបកូរ៉េអស្ថិរភាព ហើយអាចនឹងបំពានលើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដែលរុស្ស៊ីខ្លួនឯងបានគាំទ្រ ប៉ុន្តែក៏អាស្រ័យលើប្រភេទអាវុធដែលពួកគេផ្តល់»។ កិច្ចព្រមព្រៀងដែលចុះហត្ថលេខាដោយលោក ពូទីន និងមេដឹកនាំកូរ៉េខាងជើង លោក គីម ជុងអ៊ុន (Kim Jong Un) កាលពីថ្ងៃពុធសប្ដាហ៍នេះ ភាគីនីមួយៗនឹងផ្តល់ជំនួយយោធាភ្លាមៗដល់ភាគីម្ខាងទៀត ក្នុងករណីមានការឈ្លានពានប្រដាប់អាវុធប្រឆាំងនឹងភាគីណាមួយក្នុងចំណោមពួកគេ។ អ្នកនាំពាក្យសន្តិសុខជាតិសេតវិមាន លោក ចន ឃឺបប៊ី (John Kirby) បានហៅកិច្ចព្រមព្រៀងនោះថាជាមូលហេតុនៃការព្រួយបារម្ភ ប៉ុន្តែគ្មានអ្វីភ្ញាក់ផ្អើលឡើយ ហើយតម្រូវការរបស់រុស្ស៊ី សម្រាប់ជំនួយបរទេសបែបនេះ គឺជាសញ្ញានៃភាពអស់សង្ឃឹមរបស់ខ្លួន៕

លោក ពូទីន៖ កូរ៉េខាងត្បូងនឹងបង្កើត «កំហុសឆ្គងដ៏ធំមួយ» បើខ្លួនផ្គត់ផ្គង់អាវុធដល់អ៊ុយក្រែន

2024/06/21 05:58:58 pm        147
Facebook Telegram Linkin
ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) បាននិយាយកាលពីថ្ងៃព្រហស្បតិ៍ (២០ មិថុនា) ថា កូរ៉េខាងត្បូងនឹងបង្កើត «កំហុសដ៏ធំមួយ» ប្រសិនបើខ្លួនសម្រេចចិត្តផ្គត់ផ្គង់អាវុធដល់អ៊ុយក្រែន ហើយថាទីក្រុងមូស្គូ នឹងឆ្លើយតបចំពោះទង្វើបែបនេះ តាមរបៀបមួយដែលជាការឈឺចាប់សម្រាប់ទីក្រុងសេអ៊ូល។លោក ពូទីន ដែលលើកឡើងបែបនេះនៅក្នុងសន្និសីទសារព័ត៌មាននៅប្រទេសវៀតណាម បានកំពុងប្រតិកម្មតបទៅនឹងរបាយការណ៍ពីសារព័ត៌មានយ៉ុនហាប់ កាលពីព្រឹកថ្ងៃព្រហស្បតិ៍ ដែលបាននិយាយថា កូរ៉េខាងត្បូង នឹងពិនិត្យមើលលទ្ធភាពនៃការផ្គត់ផ្គង់អាវុធដល់អ៊ុយក្រែន បន្ទាប់ពីលោក ពូទីន និងមេដឹកនាំកូរ៉េខាងជើង លោក គីម ជុងអ៊ុន (Kim Jong-un) បានចុះហត្ថលេខាលើកិច្ចព្រមព្រៀងការការពារគ្នាទៅវិញទៅមកមួយថ្ងៃមុននោះ។លោក ពូទីន បាននិយាយថា ទីក្រុងសេអ៊ូល មិនមានអ្វីដែលត្រូវព្រួយបារម្ភទេ ចំពោះកិច្ចព្រមព្រៀងរវាងទីក្រុងមូស្គូ និងកូរ៉េខាងជើង។ លោកបានព្រមានក្រុងសេអ៊ូល ប្រឆាំងនឹងការបញ្ជូនអាវុធឱ្យទីក្រុងគីវ។ ប្រធានាធិបតីរុស្ស៊ីរូបនេះបានប្រាប់អ្នកយកព័ត៌មានថា «កូរ៉េខាងត្បូង មិនមានអ្វីត្រូវព្រួយបារម្ភនោះឡើយ ពីព្រោះជំនួយយោធារបស់យើងក្រោមសន្ធិសញ្ញាដែលបានចុះហត្ថលេខានោះ កើតឡើងបានលុះត្រាតែការឈ្លានពានត្រូវបានអនុវត្តប្រឆាំងនឹងប្រទេសហត្ថលេខីណាមួយប៉ុណ្ណោះ»។លោកបន្តថា៖ «ចំពោះការផ្គត់ផ្គង់អាវុធដែលអាចបង្កគ្រោះថ្នាក់ដល់តំបន់សង្គ្រាមអ៊ុយក្រែន នោះនឹងជាកំហុសឆ្គងដ៏ធេងធំណាស់»។ លោកបន្ថែមថា «ខ្ញុំសង្ឃឹមថារឿងនេះនឹងមិនកើតឡើងទេ។ ហើយប្រសិនបើវាកើតឡើងនោះ យើងក៏នឹងធ្វើការសម្រេចចិត្តសមស្រប ដែលទំនងជាមិនពេញចិត្តដល់ថ្នាក់ដឹកនាំកូរ៉េខាងត្បូងនាពេលបច្ចុប្បន្ននេះទេ»៕

ស្ថានទូតចិន៖ ជប៉ុន គ្មានសិទ្ធិជ្រៀតជ្រែកនៅក្នុងបញ្ហាដែនសមុទ្ររវាងចិន និងហ្វីលីពីនទេ

2024/06/21 05:55:26 pm        119
Facebook Telegram Linkin
អ្នកនាំពាក្យស្ថានទូតចិន ប្រចាំប្រទេសជប៉ុន បាននិយាយនៅថ្ងៃសុក្រ (២១ មិថុនា) នេះថា ប្រទេសជប៉ុនមិនមែនជាភាគីនៃបញ្ហាសមុទ្រចិនខាងត្បូងទេ ហើយមិនមានសិទ្ធិធ្វើអន្តរាគមន៍ក្នុងបញ្ហាដែនសមុទ្រចិន-ហ្វីលីពីនឡើយ។ អ្នកនាំពាក្យរូបនេះបានលើកឡើងថា «យើងបង្ហាញពីការមិនពេញចិត្តយ៉ាងខ្លាំង និងការប្រឆាំងដាច់ខាត ចំពោះការពិតដែលថាភាគីជប៉ុន បានធ្វើការអត្ថាធិប្បាយខុសម្តងទៀតលើបញ្ហាសមុទ្រចិនខាងត្បូង ដែលបំភាន់ត្រូវ ទៅជាខុស ហើយធ្វើការចោទប្រកាន់មិនសមហេតុផលប្រឆាំងនឹងប្រទេសចិន»។ក្រសួងការបរទេសជប៉ុន បាននិយាយនៅសប្តាហ៍នេះថា ខ្លួនមានការព្រួយបារម្ភយ៉ាងខ្លាំងលើសកម្មភាពម្តងហើយម្តងទៀតដែលរារាំងសេរីភាពនៃការធ្វើនាវាចរណ៍ និងបង្កើនភាពតានតឹងក្នុងតំបន់ រួមទាំងសកម្មភាពគ្រោះថ្នាក់នាពេលថ្មីៗនេះ ដែលបានធ្វើឱ្យខូចខាតនាវាហ្វីលីពីន និងធ្វើឱ្យប្រជាជនហ្វីលីពីនរងរបួសនៅលើនាវា។ក្រសួងការបរទេសហ្វីលីពីន បានថ្កោលទោសទង្វើរបស់ចិន ថាជារឿង «ខុសច្បាប់ និងកម្រោល» ក្នុងអំឡុងពេលបេសកកម្មផ្គត់ផ្គង់ឡើងវិញតាមទម្លាប់កាលពីថ្ងៃចន្ទ ដែលយោធាហ្វីលីពីនបាននិយាយថា ទាហានជើងទឹកម្នាក់បានរងរបួសធ្ងន់ធ្ងរ និងធ្វើឱ្យនាវាទីក្រុងម៉ានីល បានខូចខាត។ប្រទេសចិន បានបដិសេធការចោទប្រកាន់នោះ ខណៈប្រទេសទាំងពីរបានប៉ះទង្គិចគ្នាម្ដងហើយម្ដងទៀតជុំវិញតំបន់ថ្មប៉ប្រះទឹក សេខិន ថូម៉ាស ស្ហូល (Second Thomas Shoal) ដែលជាដែនទឹកជម្លោះនៅក្នុងតំបន់សេដ្ឋកិច្ចផ្តាច់មុខរបស់ហ្វីលីពីន នៅសមុទ្រចិនខាងត្បូងដ៏ធំល្វឹងល្វើយ៕

បណ្ដាញសង្គម

ព័ត៌មានថ្មីៗ

អង្គភាពប្រឆាំងអំពើពុករលួយបានបញ្ជូនសំណុំរឿង៤ករណីនៃឃុំព្រែកខ្សាច់ទៅសាលាដំបូងរាជធា​​នី​​​​ភ្នំ​​​​​ពេ​​​​​​​ញ
09/29/2026 08:09 PM
Facebook Telegram Linkin
ក្រសួងការងារ និងសេវាកម្មវាយតម្លៃសកល AQA នៃចក្រភពអង់គ្លេស ចុះ MoU ពង្រឹងភាពជាដៃគូអភិវឌ្ឍជំនាញ និងការពង្រឹងគុណភាព TVET ដើម្បីលើកកម្ពស់ជំនាញកម្លាំងពលកម្មស្របតាមតម្រូវការឧស្សាហកម្ម និងបច្ចេកវិទ្យា
09/29/2026 08:09 PM
Facebook Telegram Linkin
នេប៉ាល់ផ្អាកប្រតិបត្តិការស្វែងរក បន្ទាប់​ពី​មនុស្ស ១៦នាក់ បានប៉ើង​ទៅតាម​បំណាក់​​ទឹកកក ​
09/29/2026 07:09 PM
Facebook Telegram Linkin
ម្ចាស់សហគ្រាសផលិតសំបកវេចខ្ចប់ និងអ្នកវេចខ្ចប់ផលិតផល បានកំពុងរួមគ្នាបង្កើត និងគាំទ្រផលិតផលជាតិ
09/29/2026 07:09 PM
Facebook Telegram Linkin
លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញចូលរួមពិធីចម្រើនព្រះបរិត្ត និងដាក់បិណ្ឌវេនទី៤ នៅវត្តឧណ្ណាលោម
09/29/2026 06:09 PM
Facebook Telegram Linkin
កងកម្លាំងអាមេរិកចាកចេញពីអ៊ីរ៉ាក់ ក្រោយរយៈពេល​ ២ទសវត្សរ៍ ដោយបើកផ្លូវឱ្យអ៊ីរ៉ង់បង្កើន​ឥទ្ធិពល​
09/29/2026 06:09 PM
Facebook Telegram Linkin
ទ្រព្យសកម្មក្នុងវិស័យ អ.ស.ហ. កើនដល់ជាង ៩ ប៊ីលានដុល្លារ និងបានបង្កើតការងារ ១៦ ពាន់កន្លែង
09/29/2026 06:09 PM
Facebook Telegram Linkin
អ៊ីរ៉ង់​គំរាមវាយប្រហារហេដ្ឋារចនាសម្ព័ន្ធ ក្នុងតំបន់ ប្រសិនបើសន្តិសុខរបស់ខ្លួន មិនត្រូវបានធានា
09/29/2026 06:09 PM
Facebook Telegram Linkin
សារព័ត៌មានរដ្ឋ៖ ការវាយប្រហារលើបំពង់បង្ហូរឧស្ម័ននៅភាគខាងកើតស៊ីរី បានធ្វើឲ្យការផ្គត់ផ្គង់ឧស្ម័នត្រូវផ្អាក
09/29/2026 06:09 PM
Facebook Telegram Linkin
បេសកជនរុស្ស៊ី៖ អាល្លឺម៉ង់ និងសហភាពអឹរ៉ុប មិនមានតួនាទីក្នុងកិច្ចចរចាអំពីអ៊ុយក្រែន
09/29/2026 06:09 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.