BTV NEWS

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញប្រគល់ផ្ទះថ្មីចំនួន ៣ខ្នង ជូនក្រុមគ្រួសាររបស់វីរកងទ័ពពលី

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត តំណាងដ៏ខ្ពង់ខ្ពស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន នាំយកទៀនព្រះវស្សា ប្រគេនសម្តេចព្រះសង្ឃគង់ចាំព្រះវស្សានៅវត្តចំពុះក្អែក

សម្តេចអគ្គមហាពញាចក្រី ហេង សំរិន ប្រគេនទៀនព្រះវស្សា និងទេយ្យទាន ដល់ព្រះសង្ឃគង់ចាំព្រះវស្សាចំនួន ១៨វត្ត ក្នុងស្រុកពញាក្រែក ខេត្តត្បូងឃ្មុំ

ប្រសាសន៍សំខាន់ៗសម្ដេចធិបតី ហ៊ុន ម៉ាណែត ក្នុងឱកាសអញ្ជើញចែកវិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋជាង ២ម៉ឺនបណ្ណ នៅឃុំចំនួន៣ នៃស្រុកខ្សាច់កណ្ដាល ខេត្តកណ្ដាល

ព័ត៌មានសំខាន់ៗ

លោក Putin ជួបមេដឹកនាំអាមេនី និងអាហ្សៃបៃហ្សង់ និងថ្លែងពីកិច្ចព្រមព្រៀងគ្រាប់ធញ្ញជាតិ និងការកេណ្ឌកងទ័ព

រុស្ស៊ី៖ ប្រធានាធិបតីរុស្ស៊ីលោក Vladimir Putin កាលពីថ្ងៃចន្ទបាននិយាយថា ជំនួបរបស់លោកជាមួយនាយករដ្ឋមន្ត្រីអាមេនីលោក Nikol Pashinyan និងប្រធានាធិបតីអាហ្សៃបៃហ្សង់លោក Ilham Aliyev ក្នុងទីក្រុង Sochi ទទួលបានលទ្ធផលគាប់ប្រសើរ។ មេដឹកនាំទាំងបីបានជួបប្រជុំគ្នានៅទីក្រុង Sochi ដើម្បីពិភាក្សាអំពីភាពតានតឹងជុំវិញតំបន់ Nagorno-Karabakh ដែលការពិភាក្សាធ្វើឡើងបន្ទាប់ពីការប៉ះទង្គិចគ្នាកាលពីប៉ុន្មានខែថ្មីៗនេះ ដែលបានបណ្តាលឲ្យមានអ្នកស្លាប់ និងរងរបួសជាច្រើននាក់នៃភាគីទាំងអាមេនី និងអាហ្សៃបៃហ្សង់។ លោក Putin បាននិយាយថា ទោះបីជាពួកគេមិនអាចព្រមព្រៀងលើអ្វីគ្រប់យ៉ាងក៏ដោយ ប៉ុន្តែជំនួបបានបង្កើតបរិយាកាសល្អ សម្រាប់កិច្ចព្រមព្រៀងដែលអាចកើតមាននាពេលអនាគតលើបញ្ហាសំខាន់ៗមួយចំនួន។ ក្នុងអំឡុងសន្និសីទសារព័ត៌មានបន្ទាប់ពីជំនួបនោះលោក Putin បានថ្លែងលើកឡើងអំពីការផ្អាករបស់រុស្ស៊ី ចំពោះការចូលរួមក្នុងកិច្ចព្រមព្រៀងដែលអនុញ្ញាតឱ្យមានការនាំចេញគ្រាប់ធញ្ញជាតិពីអ៊ុយក្រែន។លោក Putin និយាយថា ប្រទេសរុស្ស៊ីបានព្រមព្រៀងចំពោះគំនិតផ្តួចផ្តើម ជាពិសេសនៅក្នុងផលប្រយោជន៍របស់ប្រទេសក្រីក្របំផុត ប៉ុន្តែបាននិយាយថា ស្ទើរតែពុំមានគ្រាប់ធញ្ញជាតិណាមួយបានទៅដល់ប្រទេសដែលត្រូវការវាច្រើនបំផុត។ លោកប្រធានាធិបតីនិយាយថា «តើយើងធ្វើវាដើម្បីអ្វី?»។ លោក Putin បានលើកឡើងពីរបាយការណ៍មួយរបស់ក្រសួងការពារជាតិ ដែលស្នើឱ្យមានការកេណ្ឌកងទ័ពមួយផ្នែកដែលត្រូវបានបញ្ចប់ ដោយជាក់ស្តែងបានបំពេញតាមការសន្យាដើម្បីបញ្ចប់ការកេណ្ឌទ័ពចំនួន 3សែននាក់។ ទោះយ៉ាងណា មេធាវីសិទ្ធិផ្នែកមនុស្សមួយចំនួនបានព្រមានថា មានតែលោក Putin ទេដែលអាចបញ្ចប់ការកេណ្ឌទ័ពនេះដោយការចុះហត្ថលេខាលើក្រឹត្យមួយ៕អត្ថបទ៖ ប៊ុនថន

ចិនព្រមានថា ផែនការរបស់អាមេរិកក្នុងការដាក់ពង្រាយយន្តហោះ B-52 ទៅកាន់អូស្ត្រាលីអាចបង្កឲ្យមានការប្រជែងអាវុធ

ចិន៖ ប្រទេសចិនកាលពីថ្ងៃចន្ទបាននិយាយថា ផែនការរបស់សហរដ្ឋអាមេរិកក្នុងការដាក់ពង្រាយយន្តហោះទម្លាក់គ្រាប់បែក B-52 ដែលមានសមត្ថភាពបំពាក់នុយក្លេអ៊ែររហូតដល់ ៦គ្រឿងទៅកាន់មូលដ្ឋានទ័ពអាកាសនៅភាគខាងជើងប្រទេសអូស្ត្រាលី អាចបង្កឱ្យមានការប្រជែងអាវុធនៅក្នុងតំបន់។ យោងតាមប្រភពដែលដឹងអំពីបញ្ហាបាននិយាយថា ទីតាំងសម្រាប់យន្តហោះទម្លាក់គ្រាប់បែកនឹងត្រូវបានបង្កើតឡើងនៅមូលដ្ឋានទ័ពអាកាស Tindal នៅដាច់ស្រយាលរបស់កងទ័ពអាកាសអូស្ត្រាលី មានចម្ងាយប្រហែល ៣០០គីឡូម៉ែត្រភាគខាងត្បូងទីក្រុង Darwin ជារដ្ឋធានីនៃដែនដីភាគខាងជើងប្រទេសអូស្ត្រាលី។ នៅពេលដែលត្រូវបានស្នើសុំការអត្ថាធិប្បាយនៅក្នុងសន្និសីទកាលពីថ្ងៃចន្ទ អ្នកនាំពាក្យក្រសួងការបរទេសចិនលោក Zhao Lijian បាននិយាយថា កិច្ចសហប្រតិបត្តិការលើវិស័យការពារជាតិ និងសន្តិសុខរវាងប្រទេសនានាមិនគួរដាក់គោលដៅលើភាគីទីបីនោះទេ។លោក Zhao និយាយថា ប្រទេសចិនជំរុញឱ្យភាគីពាក់ព័ន្ធបោះបង់សង្គ្រាមត្រជាក់ចាស់ និងទស្សនៈភូមិសាស្ត្រនយោបាយចង្អៀត ហើយធ្វើការងារបន្ថែមទៀតដើម្បីរួមចំណែកដល់សន្តិភាព និងស្ថិរភាពក្នុងតំបន់ និងដើម្បីបង្កើនការជឿទុកចិត្តគ្នាទៅវិញទៅមក៕អត្ថបទ៖ ប៊ុនថន

រុស្ស៊ីផ្អាកការកេណ្ឌពលរដ្ឋដោយផ្នែកសម្រាប់ប្រយុទ្ធក្នុងសង្គ្រាមអ៊ុយក្រែន

រុស្ស៊ី៖ ប្រទេសរុស្ស៊ីនៅពេលនេះបានប្រកាសបញ្ឈប់ការកេណ្ឌពលរដ្ឋដោយផ្នែក ដើម្បីប្រយុទ្ធនៅក្នុងសង្គ្រាមអ៊ុយក្រែន។ ក្រសួងការពារជាតិរុស្ស៊ីបាននិយាយ នៅក្នុងសេចក្ដីថ្លែងការណ៍មួយកាលពីថ្ងៃចន្ទថា រាល់សកម្មភាពកេណ្ឌកម្លាំងដោយផ្នែក រួមទាំងការបញ្ជូនលិខិតកោះអញ្ជើញត្រូវបានផ្អាក។ ក្រសួងនេះបានបន្ថែមថា គ្រប់សកម្មភាពទាំងអស់ទាក់ទងនឹងការកេណ្ឌកម្លាំង សម្រាប់ចូលបម្រើកងទ័ពត្រូវបានផ្អាក។ សេចក្ដីថ្លែងការណ៍នេះបានបន្តថា អង្គភាពយោធានានានឹងទទួលយកតែអ្នកស្ម័គ្រចិត្ត និងអ្នកជាប់កិច្ចសន្យាប៉ុណ្ណោះចាប់ពីពេលនេះទៅ។ ការអត្ថាធិប្បាយជំនួសមុខឲ្យរដ្ឋមន្ត្រីក្រសួងការពារជាតិរុស្ស៊ីលោក Sergei Shoigu ក្រសួងនេះបាននិយាយថា ក្រុមមេបញ្ជាការយោធាតំបន់នានា និងកងនាវាខាងជើង (Northern Fleet) ត្រូវបានបញ្ជាឲ្យដាក់របាយការណ៍ ស្ដីពីការបញ្ចប់សកម្មភាពកេណ្ឌកម្មដោយផ្នែកនៅត្រឹមថ្ងៃទី១ ខែវិច្ឆិកា។ការកេណ្ឌពលរដ្ឋដោយផ្នែក ដើម្បីប្រយុទ្ធនៅក្នុងសង្គ្រាមរបស់ប្រទេសនេះនៅអ៊ុយក្រែន ត្រូវបានគ្របដណ្ដប់ដោយបញ្ហាបណ្ដាលឲ្យផ្ទុះការតវ៉ា និងជំរុញឲ្យក្រុមបុរសៗរត់ចោលស្រុក ចាប់តាំងពីមានសេចក្ដីប្រកាសកាលពីខែកញ្ញាមក៕អត្ថបទ៖ សុខមាន

កូរ៉េខាងត្បូងចាប់ផ្ដើមស៊ើបអង្កេតករណីប្រជ្រៀតជាន់គ្នាសម្លាប់មនុស្សជាង ១៥០នាក់ក្នុងពិធីបុណ្យ Halloween

កូរ៉េខាងត្បូង៖ ក្រុមអ្នកស៊ើបអង្កេតកូរ៉េខាងត្បូង បានស្រាវជ្រាវវីដេអូកាលពីថ្ងៃចន្ទពីកាមេរ៉ាសុវត្ថិភាព ៥០គ្រឿងទាំងរដ្ឋ និងឯកជន ព្រមទាំងពីបណ្ដាញសង្គមដើម្បីស្វែងរកចម្លើយថា តើមូលហេតុអ្វីទើបបណ្ដាលឲ្យក្រុមអ្នកទៅចូលពិធីជប់លៀងបុណ្យ Halloween ប្រជ្រៀតជាន់គ្នាក្នុងផ្លូវឌឿងហែមដ៏តូចចង្អៀតស្លាប់ច្រើនយ៉ាងនេះ។ ខណៈប្រទេសនេះបានចាប់ផ្ដើមការកាន់ទុក្ខរយៈពេលមួយសប្ដាហ៍ ចំនួនអ្នកស្លាប់បានកើនឡើងដល់ ១៥៤នាក់។ មនុស្ស ១៤៩នាក់ផ្សេងទៀតបានរងរបួស ក្នុងចំណោមអ្នករបួសទាំងនោះមាន ៣៣នាក់របួសធ្ងន់។ ពលរដ្ឋយ៉ាងហោចណាស់ ២៦នាក់មកពីប្រទេសចំនួន ១៤ ស្ថិតក្នុងចំណោមអ្នកស្លាប់ទាំងនោះ។ លោកប្រធានាធិបតីកូរ៉េខាងត្បូង Yoon Suk-yeol បានអំពាវនាវឲ្យមានការស៊ើបអង្កេតឲ្យបានហ្មត់ចត់ ហើយក្រុមអាជ្ញាធរបាននិយាយថា ពួកគេផ្ដោតសំខាន់លើការស្ថាបនាឡើងវិញ និងស្វែងរកថា តើនរណាដែលអាចជាអ្នកទទួលខុសត្រូវ ចំពោះការបង្កឲ្យមានហេតុការណ៍ប្រជ្រៀតជាន់គ្នានេះ។ប្រធានក្រុមស៊ើបអង្កេតលោក Nam Gu-jun បានប្រាប់ក្រុមអ្នកសារព័ត៌មានថា យើងកំពុងវិភាគកាមេរ៉ាសុវត្ថិភាព ដើម្បីរកឲ្យឃើញមូលហេតុនាំឲ្យមានឧបទ្ទវហេតុនេះ។ លោកនិយាយថា យើងនឹងបន្តសាកសួរសាក្សីកាន់តែច្រើនថែមទៀត រួមទាំងក្រុមបុគ្គលិកហាងដែលនៅក្បែរនោះផងដែរ៕អត្ថបទ៖ សុខមាន

រាជរដ្ឋាភិបាល និងក្រុមហ៊ុនសម្ព័ន្ធទូរទស្សន៍កម្ពុជា ចុះហត្ថលេខាលើលក្ខន្តិកៈ "ថ្នាលទូរទស្សន៍ឌីជីថលកម្ពុជា”

ភ្នំពេញ ៖ រាជរដ្ឋាភិបាល តំណាងដោយក្រសួងសេដ្ឋកិច្ច និងហិរញ្ញវត្ថុ និងក្រុមហ៊ុនសម្ព័ន្ធទូរទស្សន៍កម្ពុជា នៅថ្ងៃទី០១ ខែ វិច្ឆិកា ឆ្នាំ២០២២ បានចុះហត្ថលេខាលើ "លក្ខន្តិកៈក្រុមហ៊ុន" ដើម្បីដំណើរការក្រុមហ៊ុន "ថ្នាលទូរទស្សន៍ឌីជីថលកម្ពុជា” ។ការបង្កើតក្រុមហ៊ុនថ្នាលទូរទស្សន៍ឌីជីថលកម្ពុជា ជាការវិនិយោគទុនរួម រវាងក្រុមហ៊ុនផ្សព្វផ្សាយធំៗចំនួន ៣ គឺក្រុមហ៊ុនទូរទស្សន៍បាយ័នគ្រុប របស់លោកជំទាវ ហ៊ុន ម៉ាណា និងក្រុមហ៊ុនរ៉ូយ៉ាល់គ្រុប មានទូរទស្សន៍ CBS និង Digital Sky របស់អ្នកឧកញ៉ា គិត ម៉េង និងក្រុមហ៊ុនទូរទស្សន៍ហង្សមាសគ្រុប របស់លោកឧកញ៉ា អ៊ឹង ឆៃងួន ។ក្រុមហ៊ុន “ថ្នាលទូរទស្សន៍ឌីជីថលកម្ពុជា” នឹងផ្តល់ជូនសេវាកម្មទូរទស្សន៍ឌីជីថល ដែលមានកម្មវិធីច្រើនប៉ុស្តិ៍ និងជម្រើសច្រើនប្រភេទដ៏សម្បូរបែប ប្រកបដោយគុណភាពខ្ពស់ សំដៅលើកស្ទួយការផ្តល់ព័ត៌មាន ចំណេះដឹង ការកម្សាន្ត និងទស្សនីភាព ដល់ប្រជាជននៅទូទាំងព្រះរាជាណាចក្រកម្ពុជា ព្រមទាំងឈានទៅសម្រេចឲ្យបានតាមអនុសាសន៍ របស់សហភាពទូរគមនាគមន៍អន្តរជាតិ (ITU) និយាយជារួម និងនិយាយដោយឡែក ស្របតាមយុទ្ធសាស្ត្ររបស់រាជរដ្ឋាភិបាលកម្ពុជា កាលបរិច្ឆេទ នៃការដាក់ឲ្យដំណើរការថ្នាលទូរទស្សន៍ឌីជីថលកម្ពុជា អាណាឡូកឯកជនទាំងអស់ មកប្រើប្រាស់សេវាទូរទស្សន៍ឌីជីថលកម្ពុជាអាណាឡូក និងប្រព័ន្ធឌីជីថល ស្របគ្នាមុននឹងដល់ដំណាច់ឆ្នាំ២០២៥ ដែលជាកាលបរិច្ឆេត សម្រាប់បិទការផ្សាយទូរទស្សន៍តាមប្រព័ន្ធអាណាឡូកជាស្ថាពរ។ក្នុងនោះក្រុមហ៊ុននីមួយៗបានបម្រើទស្សនីយអារម្មណ៍ ព័ត៌មាន អប់រំ ចំណេះដឹង និងសិល្បៈកម្សាន្ត ក្នុងវិស័យសោតទស្សន៍ ជូនប្រជាជនកម្ពុជាអស់រយៈពេល ២៥ ឆ្នាំមកហើយ រហូតមកដល់ពេលនេះ ផ្អែកលើបទពិសោធន៍ ជំនាញ និងធនធានមនុស្ស ក្រុមហ៊ុនមានជំនឿយ៉ាងមុតមាំថា នឹងអភិវឌ្ឍឧស្សាហកម្មសោតទស្សន៍ និងផ្សព្វផ្សាយឲ្យទទួលបានជោគជ័យ។សូមបញ្ជាក់ថា ក្រុមហ៊ុនទូរទស្សន៍បាយ័នគ្រុប រួមមាន៖ ប៉ុស្តិ៍ទូរទស្សន៍បាយ័ន BTV និងវិទ្យុបាយ័ន, ក្រុមហ៊ុនទូរទស្សន៍ CBS រួមមានប៉ុស្តិ៍ទូរទស្សន៍ CTN, CTN International, CNC, MyTV, ចំណែកក្រុមហ៊ុន Digital Sky រួមមានថ្នាលទូរទស្សន៍ឌីជីថលចំនួន ៣ ដូចជា ថ្នាលទូរទស្សន៍ឌីជីថលប្រព័ន្ធ DVB-T,ថ្នាលទូរទស្សន៍ឌីជីថលផ្កាយរណបប្រព័ន្ធ DTH, ថ្នាលទូរទស្សន៍ឌីជីថលតាមទូរស័ព្ទដៃប្រព័ន្ធOTT។ ចំពោះក្រុមហ៊ុនទូរទស្សន៍ហង្សមាសគ្រុប រួមមាន ប៉ុស្តិ៍ទូរទស្សន៍ហង្សមាស រស្មីហង្សមាស វិទ្យុហង្សមាស និងរស្មីហង្សមាស, ផលិតកម្ម WE, Pleng Records, ក្រុមហ៊ុនពិធីការ និងសារព័ត៌មាន២៤ម៉ោង។នៅក្នុងឯកសារ លក្ខន្តិកៈក្រុមហ៊ុននេះ មានសមាសភាពក្រុមប្រឹក្សាភិបាល ៧ រូប ដែល១រូប តំណាងមកពីរាជរដ្ឋាភិបាល និង ៦ រូបទៀត តំណាងមកពីក្រុមហ៊ុនស័ម្ពន្ធទូរទស្សន៍កម្ពុជា ក្នុងនោះ លោកជំទាវ ហ៊ុន ម៉ាណា ត្រូវបានជ្រើសតាំង ជាប្រធានក្រុមប្រឹក្សាភិបាលសម្រាប់អាណត្តិដំបូង៕ អត្ថបទ៖ សុន រ៉ាឌី

ប្រជាពលរដ្ឋទីក្រុង Kyiv ខ្វះអគ្គិសនី និងទឹកប្រើប្រាស់ ក្រោយការវាយប្រហាររបស់រុស្ស៊ី

អ៊ុយក្រែន៖ ប្រជាពលរដ្ឋនៅក្នុងរដ្ឋធានី Kyiv បានឈរតម្រង់ជួរត្រងទឹក ក្រោយមីស៊ីលរបស់រុស្ស៊ីបានបាញ់ស្រោចលើទីតាំងសំខាន់ៗទូទាំងប្រទេសកាលពីថ្ងៃចន្ទ។ របាយការណ៍វិវឌ្ឍន៍ថ្មីពេលល្ងាចពីអភិបាលក្រុងនេះលោក Vitaliy Klitschko បាននិយាយថា អ្នកប្រើប្រាស់ ៤០% នៅក្នុងទីក្រុង Kyiv នៅតែពុំទាន់មានទឹក និងលំនៅឋានប្រមាណ ២៧០,០០០ខ្នងគ្មានអគ្គិសនីប្រើប្រាស់។ អ៊ុយក្រែននិយាយថា មនុស្ស ១៣នាក់បានរងរបួសក្នុងការវាយប្រហារទូទាំងប្រទេស។ រុស្ស៊ីបាននិយាយថា ការវាយប្រហារនានាត្រូវបានដាក់គោលដៅលើប្រព័ន្ធគ្រប់គ្រងយោធា និងថាមពលរបស់ប្រទេសនេះ ហើយថាគោលដៅទាំងអស់ត្រូវបានវាយប្រហារចំៗ។ លោកប្រធានាធិបតីរុស្ស៊ី Vladimir Putin បាននិយាយកាលពីថ្ងៃចន្ទថា ពួកគេបានឆ្លើយតបដោយផ្នែក ចំពោះការវាយប្រហារលើនាវាចម្បាំងរុស្ស៊ីកាលពីចុងសប្ដាហ៍មុន។ ក្នុងរបាយការណ៍វិវឌ្ឍន៍ពេលល្ងាច យោធាអ៊ុយក្រែនបាននិយាយថា ខ្លួនបានបាញ់ទម្លាក់មីស៊ីលចំនួន ៤៥គ្រាប់នៃមីស៊ីលសរុប ៥៥គ្រាប់ដែលត្រូវបានបាញ់។នៅក្នុងទីក្រុងធំបំផុតទី២ របស់អ៊ុយក្រែនគឺទីក្រុង Kharkiv ក្រុមមន្ត្រីនិយាយថា ការវាយប្រហារនានាបណ្ដាលឲ្យផ្អាកប្រព័ន្ធរថភ្លើងក្រោមដី ខណៈនៅក្នុងតំបន់ Zaporizhzhia ដែលស្ថិតនៅភាគខាងត្បូងការកង្វះថាមពលក៏ត្រូវបានរាយការណ៍ផងដែរ។ ក្នុងតំបន់ផ្សេងទៀតនៃទីក្រុង Kyiv ប្រជាពលរដ្ឋបានសម្រុកទិញទឹកសុទ្ធតាមផ្សារទំនើបកាលពីថ្ងៃចន្ទ ក្រោយការវាយឆ្មក់តាមអាកាសទូទាំងប្រទេសអ៊ុយក្រែន ហើយការផ្ទុះមួយចំនួនបានលាន់លឺនៅក្នុងទីក្រុងនេះ ខណៈដែលរុស្ស៊ីបានបាញ់ស្រោចដោយមីស៊ីលនៅក្នុងការវាយប្រហារតាមអាកាសជាថ្មី៕អត្ថបទ៖ សុខមាន

កូរ៉េខាងជើងទាមទារឲ្យសហរដ្ឋអាមេរិក និងកូរ៉េខាងត្បូងផ្អាកសមយុទ្ធយោធារួមគ្នា

កូរ៉េខាងជើង៖ ក្រសួងការបរទេសកូរ៉េខាងជើងបានចេញសេចក្ដីថ្លែងការណ៍មួយ អំពាវនាវដល់សហរដ្ឋអាមេរិក និងកូរ៉េខាងត្បូងឲ្យបញ្ឈប់ការធ្វើសមយុទ្ធយោធារួមគ្នានេះ។ ក្រសួងនេះបានទាមទារឲ្យបញ្ឈប់ភ្លាមៗរាល់សមយុទ្ធទាំងឡាយ ដែលបានចាប់ផ្ដើមកាលពីថ្ងៃចន្ទដោយមានយន្តហោះប្រមាណ ២៤០គ្រឿង រួមទាំងយន្តហោះបំបាំងកាយ។ សមយុទ្ធកងកម្លាំងទ័ពអាកាសដែលនឹងបន្តរហូតដល់ថ្ងៃសុក្រសប្ដាហ៍នេះ គឺជាការចូលរួមដ៏ធំបំផុតរវាងប្រទេសទាំង២ ចាប់តាំងពីឆ្នាំ២០១៧ មក។ សេចក្ដីថ្លែងការណ៍ដែលបានធ្វើឡើងកាលពីថ្ងៃចន្ទនិយាយថា ស្ថានភាពនៅឧបទ្វីបកូរ៉េ និងនៅក្នុងតំបន់ជិតខាងរបស់ខ្លួន បានឈានចូលដំណាក់កាលប្រឈមដាក់គ្នាជាថ្មី ព្រោះតែការប្រជែងឥទ្ធិពល។ សេចក្ដីថ្លែងការណ៍ខាងលើនិយាយថា ទីក្រុងព្យុងយ៉ាងបានត្រៀមខ្លួនរួចរាល់ក្នុងការចាត់វិធានការចាំបាច់ទាំងអស់ ហើយថាប្រសិនបើសហរដ្ឋអាមេរិកនៅតែបន្តសកម្មភាពបង្ករឿងទៀត កូរ៉េខាងជើងនឹងពិចារណាលើវិធានការដ៏ខ្លាំងក្លាថែមទៀត ជាជំហានបន្ទាប់របស់ខ្លួន។ទោះយ៉ាងណា ក្រសួងនេះពុំបានបញ្ជាក់ឲ្យបានច្បាស់ទេថា តើវិធានការទាំងនោះគឺជាអ្វី។ កូរ៉េខាងជើងបានបាញ់មីស៊ីលបាលីស្ទីកកាលពីខែកញ្ញា និងតុលា ទំនងជាប្រឆាំងនឹងសមយុទ្ធយោធាធ្វើឡើងដោយប្រទេសជប៉ុន សហរដ្ឋអាមេរិក និងកូរ៉េខាងត្បូង។ ទីភ្នាក់ងារចារកម្មកូរ៉េខាងត្បូងព្រមានថា កូរ៉េខាងជើងអាចសាកល្បងនុយក្លេអ៊ែរទី៧ មុនការបោះឆ្នោតពាក់កណ្ដាលអាណត្តិនៅសហរដ្ឋអាមេរិកថ្ងៃទី៨ ខែវិច្ឆិកាខាងមុខនេះ៕អត្ថបទ៖ សុខមាន

នគរបាលចាប់ខ្លួនមនុស្ស ៩នាក់ពាក់ព័ន្ធករណីបាក់ស្ពាននៅឥណ្ឌាសម្លាប់មនុស្សជាង ១៣០នាក់

ឥណ្ឌា៖ នគរបាលឥណ្ឌាបានចាប់ខ្លួនមនុស្ស ៩នាក់រួមទាំងអ្នកលក់សំបុត្រ និងក្រុមអ្នកម៉ៅការជួសជុលស្ពាននោះ ខណៈពួកគេស៊ើបអង្កេតការបាក់ស្ពានយោលថ្មើរជើង ដែលបានសម្លាប់មនុស្សយ៉ាងហោចណាស់ ១៣៤នាក់រួមទាំងកុមារជាច្រើននាក់។ រូបភាពកាមេរ៉ាសុវត្ថិភាព មុនពេលស្ពានបាក់បានបង្ហាញពីក្មេងប្រុសជំទង់មួយក្រុមថតរូប ខណៈអ្នកខ្លះទៀតព្យាយាមអង្រួនស្ពានយោលនៅក្នុងស្រុក Morbi ពីចុងស្ពានម្ខាងទៅចុងស្ពានម្ខាងទៀត មុនពេលបាក់ធ្លាក់ចូលទន្លេ ស្របពេលដែលខ្សែកាបិ៍បានដាច់។ ស្ពានសម័យអាណានិគមអង់គ្លេសលើទន្លេ Machchhu មានអ្នកដើរកម្សាន្តពេញស្ពានដែលរីករាយនឹងថ្ងៃឈប់សម្រាក នៅពេលស្ពាននេះបានបាក់កាលពីល្ងាចថ្ងៃអាទិត្យធ្វើឲ្យមនុស្សធ្លាក់ចូលទឹកជម្រៅប្រហែល ១០ម៉ែត្រ។លោក Ashwin Mehra ដែលកំពុងសម្រាកព្យាបាលជើងបាក់ និងរបួសខ្នងក្នុងឧបទ្ទវហេតុនោះបាននិយាយថា លោក និងមនុស្ស ៦នាក់ទៀតបានហែលទៅដល់ច្រាំងទន្លេ ដោយសារតែតោងចំរឹងដែក និងសំណាញ់ស្ពាន។ លោកបានប្រាប់បណ្ដាញសារព័ត៌មាន ANI ដៃគូរបស់ទូរទស្សន៍ Reuters ថា មានក្មេងប្រុសប្រមាណ ១៥ ទៅ ២០នាក់ដែលមានអាយុចន្លោះពី ២០ ទៅ ២៥ឆ្នាំដែលបានអង្រួនយោគស្ពាននោះ៕អត្ថបទ៖ សុខមាន

សម្តេចតេជោ ហ៊ុន សែន សុំការយល់យោគពីពលរដ្ឋ ខណៈបិទផ្លូវនាំឱ្យស្ទះចរាចរពេលប្រជុំអាស៊ាននៅថ្ងៃខាងមុខ

ភ្នំពេញ៖អញ្ជើញថ្លែងក្នុងពិធីប្រគល់សញ្ញាបត្រជូននិស្សិតសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ចជាង ៦ពាន់នាក់នៅមជ្ឈមណ្ឌលសន្និបាត និងពិព័រណ៌ជ្រោយចង្រ វានាព្រឹកមិញនេះ សម្តេចតេជោ ហ៊ុន សែន នាយករដ្ឋមន្ត្រីបានយកឱកាសនេះ អំពាវនាវទៅកាន់ប្រជាពលរដ្ឋឱ្យមានការយល់យោគ ចំពោះការបិទផ្លូវនៅថ្ងៃខាងមុខនេះដែលនាំឱ្យមានការស្ទះចរាចរលើដងផ្លូវមួយចំនួន។សម្តេចបញ្ជាក់ថា មូលហេតុនៃការបិទផ្លូវសំខាន់ៗមួយចំនួននៅប៉ុន្មានថ្ងៃខាងមុខនេះ ដើម្បីសម្រួលជូននូវការធ្វើដំណើររបស់គណៈប្រតិភូជាថ្នាក់ដឹកនាំមិត្តភក្តិទាំងក្នុង និងក្រៅតំបន់ មកចូលរួមកិច្ចប្រជុំកំពូលអាស៊ាន និងកិច្ចប្រជុំជាមួយដៃគូពាក់ព័ន្ធនៅភ្នំពេញ ខណៈកម្ពុជាជាម្ចាស់ផ្ទះប្រធានអាស៊ានឆ្នាំ២០២២។គួរបញ្ជាក់ថា៖ កិច្ចប្រជុំកំពូលអាស៊ានលើកទី៤០-៤១ និងកិច្ចប្រជុំពាក់ព័ន្ធចាប់ពីថ្ងៃទី៨ដល់ថ្ងៃទី១៣វិច្ឆិកា ។កិច្ចប្រជុំដ៏មានសារៈសំខាន់សម្រាប់តំបន់ និងពិភពលោក ដែលកម្ពុជាធ្វើជាម្ចាស់ផ្ទះប្រធានកិច្ចប្រជុំនៅពេលខាងមុខនេះ នឹងក្រៅពីប្រមុខរដ្ឋ ប្រមុខរដ្ឋាភិបាលប្រទេសនៅក្នុងតំបន់ ក៏មានប្រធានាធិបតីមហាអំណាចនានា នឹងមកចូលរួមផងដែរ ដូចជាប្រធានាធិបតីសហរដ្ឋអាមេរិក ចូបៃឌិន ប្រធានាធិបតីចិន ស៊ីជីនពីង ជាដើម។ រីឯប្រធានាធិបតីរុស្ស៊ី វ៉្លាឌីមៀ ពូទីន កំពុងរង់ចាំការឆ្លើយតប។ក្នុងន័យនេះ សម្តេចបានបញ្ជាក់ហើយថា បើមិនមានសន្តិភាពទេក៏មិនអាចធ្វើអ្វីបានដែរ៕(ដោយ៖ មុត សុត)

សម្តេចតេជោ ហ៊ុន សែន៖ បើប្រទេសគ្មានសុខសន្តិភាព កុំនិយាយអំពីការសិក្សា និងការអភិវឌ្ឍ

ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី បានលើកឡើងជាថ្មីម្តងទៀតថា ប្រសិនបើប្រទេសពុំមានសុខសន្តិភាពទេនោះ ក៏គ្មានឱកាសសិក្សារៀនសូត្រ និងធ្វើការអភិវឌ្ឍប្រទេសឲ្យមានការរីកចម្រើននោះដែរ ជាក់ស្តែងដូចជាប្រទេសកម្ពុជាយើងនេះ បើគ្មានសន្តិភាពទេ នោះក៏គ្មានឱកាសដឹកនាំកិច្ចប្រជុំអាស៊ាន និងកិច្ចប្រជុំពាក់ព័ន្ធដទៃនោះដែរ។ ថ្លែងក្នុងឱកាសអញ្ជើញជាអធិបតីភាពដ៏ខ្ពង់ខ្ពស់ក្នុងសំណេះសំណាល និងប្រគល់សញ្ញាប័ត្រដល់និស្សិតសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច នៅមជ្ឈមណ្ឌលពិព័រណ៍ជ្រោយចង្វារ (OCIC) នាព្រឹកថ្ងៃទី១ ខែវិឆ្ឆិកា ឆ្នាំ២០២២នេះ សម្តេចតេជោ ហ៊ុន សែន បានបញ្ជាក់ថា ប្រទេសដែល មានសង្រ្គាមគឺគ្មានឱកាសបានសិក្សារៀនសូត្រស្រួលនោះទេ ហើយក៏គ្មានឱកាសធ្វើការកសាង និងអភិវឌ្ឍប្រទេសឲ្យមានការរីកចំរើននោះដែរ។ សម្តេចតេជោ ហ៊ុន សែន បានបញ្ជាក់បន្ថែមទៀតផងដែរថា ដោយសារតែប្រទេសកម្ពុជាមានសុខសន្តិភាព គ្មានអំពើភេរវកម្មនេះហើយ ទើបកម្ពុជាមានឱកាសដឹកនាំ កិច្ចប្រជុំធំៗ ជាពិសេសកិច្ចប្រជុំអាស៊ាន និងកិច្ចប្រជុំពាក់ព័ន្ធដ៏ទៃទៀត នាពេលប៉ុន្មានថ្ងៃខាងមុខនេះ ដោយកិច្ចប្រជុំនេះនឹងមានថ្នាក់ដឹកនាំប្រទេសធំៗនៅលើពិភពលោកចូលរួម ដូចជាលោក ចូ បៃឌិនប្រធានាធិបតីអាមេរិក នាយករដ្ឋមន្រ្តីចិន .ជប៉ុន. កូរ៉េ. ឥណ្ឌា. កាណាដា. អូស្ត្រាលី និងប្រទេសជាច្រើនទៀត៕

បណ្ដាញសង្គម

ព័ត៌មានថ្មីៗ

តម្លៃប្រេងធ្លាក់ចុះ ភាគហ៊ុនឈានដល់កំណត់ត្រាខ្ពស់ថ្មីជុំវិញក្តីសង្ឃឹមនៃការបើកច្រកសមុទ្រ Hormuz

ផ្លូវជនបទស្ថិតក្រោមក្របខណ្ឌក្រសួងអភិវឌ្ឍន៍ជនបទ កំពុងលើកកម្ពស់ដល់ការរស់នៅប្រជាពលរដ្ឋ

ក្រុមគ្រួសារជនរងគ្រោះប្រាប់ថា របួសមិនទាន់ជាសះស្បើយទេ ៦ឆ្នាំក្រោយការផ្ទុះនៅកំពង់ផែបេរូតរបស់លីបង់

ប្រមុខរតនាគារ៖ អាមេរិក និងអ៊ីរ៉ង់ អាចនឹងឈានដល់កិច្ចព្រមព្រៀងច្រកសមុទ្រ Hormuz នៅថ្ងៃអង្គារ ឬថ្ងៃពុធ

ប្រព័ន្ធផ្សព្វផ្សាយរដ្ឋ៖ បំណាក់ដីបណ្ដាលឱ្យមនុស្ស ១៤នាក់ស្លាប់ នៅតំបន់ Amhara របស់អេត្យូពី

កម្ពុជាទទួលបានការគាំទ្រឱ្យធ្វើជាម្ចាស់ផ្ទះកីឡាតេក្វាន់ដូអាយ-ធីអែហ្វជើងឯកអាស៊ី២០២៨

Brussels Airlines រាយការណ៍ពីការខាតបង់ប្រតិបត្តិការ ៨០លានដុល្លារ អំឡុងការចំណាយលើប្រេងឥន្ធនៈខ្ពស់

ប្រភព៖ អាមេរិកបានប្រើប្រាស់មីស៊ីលចម្ងាយឆ្ងាយមានភាពជាក់លាក់ខ្ពស់ស្ទើរទាំងអស់ អំឡុងសង្គ្រាម ជាមួយអ៊ីរ៉ង់

មនុស្សជាង ៨.០០០នាក់ នៅតែបន្តនៅក្នុងជម្រកបណ្ដោះអាសន្ន ក្រោយរញ្ចួយដី ១សប្តាហ៍ នៅជប៉ុន

ក្រុម AOT ចុះសង្កេតការណ៍ ផ្ទៀងផ្ទាត់ និងរាយការណ៍អំពីស្ថានភាពព្រំដែននៅតំបន់ច្រកបឹងត្រកួន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានសំខាន់ៗ

លោក Putin ជួបមេដឹកនាំអាមេនី និងអាហ្សៃបៃហ្សង់ និងថ្លែងពីកិច្ចព្រមព្រៀងគ្រាប់ធញ្ញជាតិ និងការកេណ្ឌកងទ័ព

ចិនព្រមានថា ផែនការរបស់អាមេរិកក្នុងការដាក់ពង្រាយយន្តហោះ B-52 ទៅកាន់អូស្ត្រាលីអាចបង្កឲ្យមានការប្រជែងអាវុធ

រុស្ស៊ីផ្អាកការកេណ្ឌពលរដ្ឋដោយផ្នែកសម្រាប់ប្រយុទ្ធក្នុងសង្គ្រាមអ៊ុយក្រែន

កូរ៉េខាងត្បូងចាប់ផ្ដើមស៊ើបអង្កេតករណីប្រជ្រៀតជាន់គ្នាសម្លាប់មនុស្សជាង ១៥០នាក់ក្នុងពិធីបុណ្យ Halloween

ប្រជាពលរដ្ឋទីក្រុង Kyiv ខ្វះអគ្គិសនី និងទឹកប្រើប្រាស់ ក្រោយការវាយប្រហាររបស់រុស្ស៊ី

កូរ៉េខាងជើងទាមទារឲ្យសហរដ្ឋអាមេរិក និងកូរ៉េខាងត្បូងផ្អាកសមយុទ្ធយោធារួមគ្នា

នគរបាលចាប់ខ្លួនមនុស្ស ៩នាក់ពាក់ព័ន្ធករណីបាក់ស្ពាននៅឥណ្ឌាសម្លាប់មនុស្សជាង ១៣០នាក់

សម្តេចតេជោ ហ៊ុន សែន សុំការយល់យោគពីពលរដ្ឋ ខណៈបិទផ្លូវនាំឱ្យស្ទះចរាចរពេលប្រជុំអាស៊ាននៅថ្ងៃខាងមុខ

សម្តេចតេជោ ហ៊ុន សែន៖ បើប្រទេសគ្មានសុខសន្តិភាព កុំនិយាយអំពីការសិក្សា និងការអភិវឌ្ឍ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានសំខាន់ៗ

រុស្ស៊ី​ផ្អាក​ការ​កេណ្ឌ​ពលរដ្ឋ​ដោយ​ផ្នែក​សម្រាប់​ប្រយុទ្ធ​ក្នុង​សង្គ្រាម​អ៊ុយ​ក្រែ​ន​

ប្រជាពលរដ្ឋ​ទីក្រុង Kyiv ខ្វះ​អគ្គិសនី និង​ទឹក​ប្រើប្រាស់ ក្រោយ​ការវាយប្រហារ​របស់​រុស្ស៊ី

កូរ៉េខាងជើង​ទាមទារ​ឲ្យ​សហរដ្ឋអាមេរិក និង​កូរ៉េខាងត្បូង​ផ្អាក​សមយុទ្ធ​យោធា​រួមគ្នា​

នគរបាល​ចាប់ខ្លួន​មនុស្ស ​៩​នាក់​ពាក់ព័ន្ធ​ករណី​បាក់​ស្ពាន​នៅ​ឥណ្ឌា​សម្លាប់​មនុស្ស​ជាង ​១៣០​នាក់​

សម្តេចតេជោ ហ៊ុន សែន សុំការយល់យោគពីពលរដ្ឋ ខណៈបិទផ្លូវនាំឱ្យស្ទះចរាចរពេលប្រជុំអាស៊ាននៅថ្ងៃខាងមុខ

សម្តេចតេជោ ហ៊ុន សែន៖ បើប្រទេសគ្មានសុខសន្តិភាព កុំនិយាយអំពីការសិក្សា និងការអភិវឌ្ឍ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

រុស្ស៊ីផ្អាកការកេណ្ឌពលរដ្ឋដោយផ្នែកសម្រាប់ប្រយុទ្ធក្នុងសង្គ្រាមអ៊ុយក្រែន

ប្រជាពលរដ្ឋទីក្រុង Kyiv ខ្វះអគ្គិសនី និងទឹកប្រើប្រាស់ ក្រោយការវាយប្រហាររបស់រុស្ស៊ី

កូរ៉េខាងជើងទាមទារឲ្យសហរដ្ឋអាមេរិក និងកូរ៉េខាងត្បូងផ្អាកសមយុទ្ធយោធារួមគ្នា

នគរបាលចាប់ខ្លួនមនុស្ស ៩នាក់ពាក់ព័ន្ធករណីបាក់ស្ពាននៅឥណ្ឌាសម្លាប់មនុស្សជាង ១៣០នាក់