BTV NEWS

សម្តេចធិបតី៖កម្ពុជាគាំទ្រពេញទំហឹង និងបន្តប្តេជ្ញាចិត្តធ្វើការយ៉ាងជិតស្និទ្ធជាមួយរដ្ឋសមាជិកអាស៊ាន ប្រទេសបូកបី និងដៃគូសន្ទនាដើម្បីបំប្លែងឯកសារទៅជាសកម្មភាពជាក់ស្តែង

សម្តេចធិបតី ហ៊ុន ម៉ាណែត៖នៅទូទាំងពិភពលោកនិន្នាការផ្លាស់ប្តូរចំនួនបីកំពុងរៀបចំរដ្ឋបាលសាធារណៈឡើងវិញទោះបីជាក្នុងកម្រិត និងល្បឿនខុសៗគ្នាក៏ដោយ

កិច្ចប្រជុំ ACCSM និង ACCSM+3 ជំរុញនវានុវត្តន៍ការផ្ដល់សេវាសាធារណៈកាន់តែប្រសើរនៅក្នុងតំបន់

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញប្រគល់ផ្ទះថ្មីចំនួន ៣ខ្នង ជូនក្រុមគ្រួសាររបស់វីរកងទ័ពពលី

ព័ត៌មានសំខាន់ៗ

ចំនួនអ្នកស្លាប់ដោយសារលិចសាឡាងក្រុមអ្នកធម្មយាត្រានៅបង់ក្លាដែសបានកើនឡើងដល់ ៦៦នាក់

បង់ក្លាដែស៖ ក្រុមមន្ត្រីបាននិយាយថា ក្រុមអ្នកជួយសង្គ្រោះក្នុងប្រទេសបង់ក្លាដែសភាគខាងជើង កាលពីថ្ងៃអង្គារបានរកឃើញសាកសពជាច្រើននាក់បន្ថែមទៀត ពីសាឡាងដែលផ្ទុកអ្នកធម្មយាត្រាហិណ្ឌូលើសចំណុះបានលិច ក្នុងមហន្តរាយមួយក្នុងចំណោមមហន្តរាយដ៏ធ្ងន់ធ្ងរបំផុតតាមដងទន្លេនាពេលថ្មីៗនេះ ដែលធ្វើឲ្យចំនួនអ្នកស្លាប់សរុបឡើងដល់ ៦៦នាក់។ លោក Dipankar Roy មន្ត្រីជាន់ខ្ពស់របស់រដ្ឋាភិបាលក្នុងស្រុក Panchagarh ជាទីដែលសាឡាងបានលិចកាលពីថ្ងៃអាទិត្យបាននិយាយថា មនុស្សហោចណាស់ ១៥នាក់នៅតែបាត់ខ្លួននៅឡើយ។ យោងតាមវីដេអូក្នុងប្រព័ន្ធផ្សព្វផ្សាយក្នុងស្រុក ក្រុមអ្នកធម្មយាត្រាប្រមាណ ១០០នាក់បានឆ្លងទន្លេ Karatoa ក្នុងតំបន់ Boda ដើម្បីអបអរសាទរពិធីបុណ្យសាសនាក្នុងព្រះវិហារមួយ នៅពេលដែលសាឡាងរបស់ពួកគេបានក្រឡាប់លិច។ ប្រមាណ ៨% នៃប្រជាជនជាង ១៦០លាននាក់ក្នុងប្រទេសបង់ក្លាដែសកាន់សាសនាហិណ្ឌូ។ឧបទ្ទវហេតុលិចសាឡាងតែងកើតឡើងជាធម្មតា ដោយសារការបើកនាវាខ្វះការប្រុងប្រយ័ត្ន ការផ្ទុកមនុស្សលើសចំណុះ និងការអនុវត្តន៍ច្បាប់ធូររលុងក្នុងប្រទេសទំនាបខ្វែងខ្វាត់ដោយទន្លេប្រមាណ ១៣០។ កាលពីឆ្នាំមុន ការលិចនាវាចម្លងមួយបានឆក់យកជីវិតមនុស្សយ៉ាងហោចណាស់ ៣៤នាក់ ចំណែកអគ្គិភ័យនៅលើសាឡាងមួយផ្សេងទៀតបានសម្លាប់មនុស្សយ៉ាងហោចណាស់ ៣៩នាក់៕អត្ថបទ៖ សុខមាន

ពលរដ្ឋរាប់លាននាក់ក្នុងរដ្ឋ Florida ត្រូវបានជំរុញឲ្យជម្លៀសចេញពីលំនៅឋាន ខណៈព្យុះសង្ឃរាអាយអិនចូលមកកាន់តែជិត

សហរដ្ឋអាមេរិក៖ ប្រជាពលរដ្ឋនៅក្នុងតំបន់ឆ្នេរសមុទ្ររបស់រដ្ឋ Florida កាលពីថ្ងៃអង្គារបានបិទទ្វារបង្អួចផ្ទះរបស់ពួកគេ ដោយបានចាកចេញតាមរថយន្តឆ្ពោះទៅកាន់តំបន់មានសុវត្ថិភាព ខណៈព្យុះសង្ឃរាអាយអិន (Ian) ជិតចូលមកដល់ ដែលគំរាមកំហែងកាន់តែខ្លាំងពីការមកដល់នៃព្យុះដ៏មានឥទ្ធិពលបំផុត និងជំនន់ទឹកភ្លៀងនៅតំបន់មួយចំនួន។ដោយបក់បោកពាសពេញតំបន់សមុទ្រការ៉ាអ៊ីបនៅលើផ្លូវឆ្ពោះទៅកាន់រដ្ឋ Florida ព្យុះសង្ឃរាអាយអិនបានវាយប្រហារចូលប្រទេសគុយបា បង្ខំឲ្យមនុស្សជាច្រើនជម្លៀសចេញពីលំនៅឋាន កាត់ផ្ដាច់ចរន្តអគ្គិសនីសម្រាប់ពលរដ្ឋរាប់ម៉ឺននាក់ និងជន់លិចភូមិនេសាទនានា។ ពលរដ្ឋ Florida ជាង ២លាន ៥សែននាក់ស្ថិតក្រោមបញ្ជាឲ្យជម្លៀស ឬព្រមានពីការវាយប្រហារដោយព្យុះនៅលើផ្លូវព្យុះសង្ឃរាកម្រិត៣ ដែលនឹងមកដល់នៅល្ងាចថ្ងៃពុធនេះនៅតាមតំបន់ជាប់ឆ្នេរសមុទ្រ។ព្យុះសង្ឃរាកម្រិត៣ នេះបានបក់នាំខ្យល់កម្លាំងអតិបរមារហូតដល់ ២០៨គីឡូម៉ែត្រក្នុងមួយម៉ោង។ យោងតាមមន្ទីរព្យាករណ៍អាកាសធាតុជាតិ តំបន់ខ្លះនៃភាគកណ្ដាលរដ្ឋ Florida អាចមើលឃើញកម្រិតទឹកភ្លៀង ០.៦ម៉ែត្រដោយសារតែព្យុះសង្ឃរាអាយអិន៕អត្ថបទ៖ សុខមាន

រុស្ស៊ីអះអាងជ័យជម្នះក្នុងការបោះឆ្នោតប្រជាមតិក្នុងតំបន់ ៤ របស់អ៊ុយក្រែន

រុស្ស៊ី៖ ក្រុមមន្ត្រីដែលលើកបន្តុបដោយរុស្ស៊ីនៅក្នុងតំបន់គ្រប់គ្រងនៃប្រទេសអ៊ុយក្រែន បានរាយការណ៍ពីការគាំទ្រដោយសំឡេងភាគច្រើនលើសលុបនៃការបោះឆ្នោតចូលរួមជាមួយរុស្ស៊ី ខណៈសហរដ្ឋអាមេរិកគ្រោងប្រើសេចក្ដីសម្រេចរបស់អង្គការសហប្រជាជាតិ ថ្កោលទោសការធ្វើប្រជាមតិនេះថា ជាទង្វើគ្មានការអៀនខ្មាស់ ហើយទីក្រុង Moscow នៅតែផ្គើន។ អឺរ៉ុបកំពុងស៊ើបអង្កេតនូវអ្វីដែលប្រទេសអាល្លឺម៉ង់ ស៊ុយអែត និងដាណឺម៉ាកបាននិយាយកាលពីថ្ងៃអង្គារថា មានការវាយប្រហារនានាដែលបានបណ្ដាលឲ្យបែកធ្លាយបំពង់បង្ហូរឧស្ម័ន ចេញពីបំពង់បង្ហូរថាមពលរបស់រុស្ស៊ី។ ប៉ុន្តែនៅតែមិនទាន់បានដឹងច្បាស់នៅឡើយថា តើនរណាអាចស្ថិតនៅពីក្រោយការវាយប្រហារនេះ។ ការបោះឆ្នោតដែលបានរៀបចំយ៉ាងប្រញាប់ប្រញាល់បានកើតឡើងរយៈពេលជាង ៥ថ្ងៃក្នុងតំបន់ Donetsk និង Luhansk ភាគខាងកើត និងនៅក្នុងតំបន់ Zaporizhzhia និង Kherson របស់ប្រទេសអ៊ុយក្រែនរហូតដល់ភាគខាងត្បូង ដែលមានផ្ទៃដីប្រមាណ ១៥% នៃដែនដីរបស់អ៊ុយក្រែន។យោងតាមក្រុមមន្ត្រីដែលតែងតាំងដោយរុស្ស៊ី និងប្រព័ន្ធផ្សព្វផ្សាយរុស្ស៊ី លទ្ធផលបឋមបានពីការបោះឆ្នោតកាលពីថ្ងៃអង្គារទទួលបានពី ៨៧% ដល់ ៩៨.៥% ដែលចង់ចូលរួមជាមួយរុស្ស៊ី។ ប្រធានសភាជាន់ខ្ពស់រុស្ស៊ីបាននិយាយថា សភាអាចនឹងពិចារណាដាក់បញ្ចូលតំបន់ទាំង៤ ជាឧបសម្ព័ន្ធរុស្ស៊ីនៅថ្ងៃទី៤ ខែតុលាខាងមុខ។ ប្រជាពលរដ្ឋក្នុងតំបន់ Luhansk សង្ឃឹមថា ការបោះឆ្នោតប្រជាមតិនេះនឹងនាំមកវិញនៅសន្តិភាព៕អត្ថបទ៖ សុខមាន

ជប៉ុននឹងបង្កើតរោងចក្រក្រុមហ៊ុនតូយ៉ូតា នៅប្រទេសកម្ពុជា

ក្នុងឱកាសស្នាក់នៅប្រទេសជប៉ុនចូលរួមបុណ្យសពថ្នាក់ជាតិ របស់អតីតនាយករដ្ឋមន្ត្រីជប៉ុន អាបេ ស៊ីនហ្សូ សម្តេចតេជោ ហ៊ុន សែន នាយរដ្ឋមន្រ្តីកម្ពុជា បានអញ្ជើញជួបសំដែងការគួរសម ឯកឧត្តមនាយករដ្ឋមន្រ្តីជប៉ុន Fumio Kishida ផងដែរ។ជាមួយនឹងការរំលឹកការដែលសម្តេច និងឯកឧត្តម គីស៊ីដា ធ្លាប់បានជួបគ្នា៣លើករួចមកហើយនោះ សម្តេចតេជោបានគូសបញ្ជាក់ថា សម្តេចសង្ឃឹមថានឹងបានជួបឯកឧត្តម គីស៊ីដា ហ្វុមិអូ សារជាថ្មីម្តងទៀតនៅកម្ពុជាដែលសម្តេចសូមអញ្ជើញឯឧ ទៅចូលរួមក្នុងកិច្ចប្រជុំកំពូល អាស៊ាន ជប៉ុន ដែលកម្ពុជាធ្វើជាម្ចាស់ផ្ទះនៅខែវិច្ឆិកាខាងមុខនេះ។សម្តេចបានថ្លែងអំណរគុណចំពោះឯកឧត្ដម គីស៊ីដា ដែលបានគាំទ្រកម្ពុជាធ្វើជាប្រធានអាស៊ាននៅក្នុងឆ្នាំនេះ និង ថ្លែងអំណរគុណ ចំពោះឯកឧត្តមនាយករដ្ឋមន្ត្រីជប៉ុនដែលបានថ្លែងសន្ទរកថា លើកពីការចូលរួមជាវិភាគទានពាក់ព័ន្ធនឹងប្រទេសកម្ពុជា ជាពិសេស ក្នុងក្របខណ្ឌការរក្សាសន្តិភាព ដែលជប៉ុនបានបញ្ជូនកងស្វ័យការពាររបស់ខ្លួនជាលើកដំបូងមកជួយដល់កម្ពុជាក្នុងក្របខណ្ឌក្រោមឆ័ត្រអង្គការសហប្រជាជាតិ ហើយឯកឧត្ដម ក៏បានលើកពីកម្ពុជាដែលបានបញ្ជូនកងកម្លាំងចូលរួមក្នុងប្រតិបត្តិការថែរក្សាសន្តិភាពនៅក្រោមឆ័ត្រអង្គការសហប្រជាជាតិផងដែរ។ សម្តេចក៏បានរំលឹកពីតួនាទីដ៏សំខាន់របស់ជប៉ុនក្នុងការចូលរួមស្វែងរកសន្តិភាពដល់ប្រទេសកម្ពុជា ហើយកិច្ចសហការជាង៣០ឆ្នាំកន្លងទៅនេះយើងនឹងបន្ត ចូលរួមនៅក្នុងប្រតិបត្តិការ រក្សាសន្តិភាពក្រោមឆ័ត្រអង្គការសហប្រជាជាតិនៅពេលខាងមុខទៀត។ឯកឧត្តមនាយករដ្ឋមន្ត្រីជប៉ុនក៏បានថ្លែងអំណរគុណ សម្តេចតេជោដែលបានអញ្ជើញឯកឧត្តមពេលចូលរួម កិច្ចប្រជុំកំពូលអាស៊ានជប៉ុន និងកិច្ចប្រជុំកំពូលអាស៊ីបូព៌ានៅកម្ពុជាក្នុងខែវិច្ឆិកាខាងមុខនេះ។ ឯកឧត្តមក៏បានលើក ពីកិច្ចពិភាក្សាទ្វេភាគីរវាងជប៉ុន កម្ពុជាផងដែរ ជាពិសេសលើវិស័យសន្តិសុខ ហើយក៏បានថ្លែងអំណរគុណចំពោះសម្តេចតេជោនាយករដ្ឋមន្ត្រីដែលកន្លងទៅបានទទួលនាវាជប៉ុនចូលចតកំពង់ផែ ខេត្តព្រះសីហនុ និងបានលើកឡើងពីការងារដែលត្រូវធ្វើបន្តដូចជាកិច្ចសហការលើវិស័យសេដ្ឋកិច្ច ជាពិសេសជប៉ុនបង្កើតរោងចក្រក្រុមហ៊ុនតូយ៉ូតានៅប្រទេសកម្ពុជា និងបានស្នើសម្តេចបន្តគាំទ្រក្រុមហ៊ុនជប៉ុនដែលបង្កើតនៅប្រទេសកម្ពុជា។ ទស្សនកិច្ចរបស់ឯកឧត្តមទៅកាន់ប្រទេសកម្ពុជានៅក្នុងខែវិច្ឆិកាខាងមុខនឹងបន្តពង្រឹងនិងពង្រីងកិច្ចសហប្រតិបត្តិការរវាងជប៉ុន កម្ពុជា ជាពិសេសធ្វើយ៉ាងណាបង្ហាញការខិតខំនិងយកចិត្តទុកដាក់ខ្ពស់ដល់កិច្ចហការទ្វេភាគីនិងជាមួយដៃគូពាក់ព័ន្ធហើយឆ្នាំក្រោយជាខួប៥០ឆ្នាំនៃកិច្ចសហការរវាងអាស៊ាន ជប៉ុន ឯកឧត្តមក៏បានស្នើសុំសម្តេចតេជោនាយករដ្ឋមន្ត្រីបន្តគាំទ្រជប៉ុនផងដែរ។ភាគីទាំងពីរក៏បានពិភាក្សាផ្លាស់ប្ដូរយោបល់ពាក់ព័ន្ធបញ្ហា តំបន់មួយចំនួន ដូចជាឧបទ្វីបកូរ៉េ បញ្ហាមីយ៉ាន់ម៉ា បញ្ហាសមុទ្រចិនខាងត្បូងនិង បញ្ហាសង្គ្រាមនៅប្រទេសអ៊ុយក្រេន។ ចំពោះបញ្ហាមីយ៉ាន់ម៉ា ឯកឧត្តមបានគូបបញ្ជាក់ ថា ឯកឧត្តមពិតជាអរគុណចំពោះការខិតខំប្រឹងប្រែងរបស់សម្ដេចតេជោនាយករដ្ឋមន្ត្រី ខណៈដែលស្ថានភាពនៅមីយ៉ាន់ម៉ា គួរឱ្យព្រួយបារម្ភហើយជប៉ុននឹងបន្តគាំទ្រដល់ ការខិតខំរបស់អាស៊ានទាំងឡាយ។ ចំពោះបញ្ហានៅឧបទ្វីបកូរ៉េវិញ ឯកឧត្តមបានគូបញ្ជាក់ថានឹងបន្តសហការជាមួយសម្ដេចតេជោជាពិសេសពាក់ព័ន្ធនឹងបញ្ហានុយក្លេអ៊ែរ ដែលបញ្ហានុយក្លេអ៊ែរនៅតែជាបញ្ហាព្រួយបារម្ភរបស់ប្រជាជនជប៉ុន ក៏ដូចជាសហគមន៍អន្តរជាតិផងដែរ។ជាការឆ្លើយតបសម្ដេចតេជោនាយករដ្ឋមន្ត្រីបានគូបញ្ជាក់ថា ចំពោះបញ្ហាមីយ៉ាន់ម៉ាយើងនឹងបន្តការងារនេះក្នុងក្របខណ្ឌអាស៊ាន យើងនឹងបន្តជំរុញទោះជាបញ្ហាប្រឈមក៏ដោយយើងមិនបោះបង់ចោលការងារនេះទេ។ ចំពោះបញ្ហាផ្សេងៗទៀតដែលឯកឧត្តមនាយករដ្ឋមន្ត្រីជប៉ុនបានលើកឡើង សម្តេចតេជោនាយករដ្ឋមន្ត្រីបានមានប្រសាសន៍ថាយើងនឹងបន្តធ្វើការជាមួយគ្នា នៅពេលខាងមុខទៀត ហើយសម្ដេចរំពឹងថានឹងទទួលឯកឧត្តមនាយករដ្ឋមន្ត្រីជប៉ុននៅប្រទេសកម្ពុជាក្នុងខែវិច្ឆិកាខាងមុខ៕

សម្តេចតេជោ ហ៊ុន សែន ដឹកនាំគណៈប្រតិភូចាកចេញពីជប៉ុន វិលត្រឡប់មកកាន់ប្រទេសកម្ពុជាវិញហើយនៅព្រឹកនេះ

ភ្នំពេញ៖ នៅវេលាម៉ោង១០ព្រឹក (ម៉ោងនៅជប៉ុន) ថ្ងៃទី២៨ ខែកញ្ញា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីកម្ពុជា បានអញ្ជើញដឹកនាំគណៈប្រតិភូជាន់ខ្ពស់ ចាកចេញពីប្រទេសជប៉ុនវិលត្រឡប់ទៅកាន់មាតុប្រទេសវិញតាមយន្តហោះពិសេស។ប្រសិនបើមិនមានការរំខានដល់ការហោះហើរទេនោះ យន្តហោះនឹងទៅដល់ព្រលានអន្តរជាតិភ្នំពេញនៅម៉ោង ២:៣០នាទីរសៀលនេះ៕

មានការវាយប្រយុទ្ធគ្នាដ៏ខ្លាំងក្លា ខណៈការបោះឆ្នោតចូលជាឧបសម្ព័ន្ធរុស្ស៊ីនៅអ៊ុយក្រែនចូលដល់ថ្ងៃចុងក្រោយ

អ៊ុយក្រែន៖ កងកម្លាំងអ៊ុយក្រែន និងរុស្ស៊ីកំពុងជាប់ដៃប្រយុទ្ធយ៉ាងខ្លាំងក្លា នៅក្នុងតំបន់ផ្សេងៗជាច្រើនក្នុងប្រទេសអ៊ុយក្រែននៅថ្ងៃអង្គារនេះ ខណៈការធ្វើប្រជាមតិរៀបចំដោយប្រទេសរុស្ស៊ីនៅក្នុងតំបន់ចំនួន៤ ដែលរុស្ស៊ីសង្ឃឹមថានឹងចូលជាឧបសម្ព័ន្ធជិតបញ្ចប់។ លោកប្រធានាធិបតី Volodymyr Zelenskiy បាននិយាយថា តំបន់ Donetsk ស្ថិតនៅភាគខាងកើតនៅតែជាដែនដីរបស់ប្រទេសលោក និងជាយុទ្ធសាស្ត្រអាទិភាពចម្បងបំផុតរបស់រុស្ស៊ី ដោយការវាយប្រយុទ្ធគ្នាកំពុងកើតឡើងនៅក្នុងទីក្រុងមួយចំនួន ស្របពេលទាហានរុស្ស៊ីព្យាយាមរុលចូលទៅក្នុងតំបន់ភាគខាងត្បូង និងខាងលិច។ ក៏មានការប៉ះទង្គិចគ្នាផងដែរនៅក្នុងតំបន់ Kharkiv ក្នុងភាគឦសាន ដោយផ្ដោតលើការវាយបករបស់ទាហានអ៊ុយក្រែននៅខែនេះ។ ហើយកងកម្លាំងអ៊ុយក្រែនបានវាយសន្ធាប់ខ្លាំងលើយុទ្ធនាការ ដើម្បីកាត់ផ្ដាច់ស្ពានចំនួន៤ និងផ្លូវឆ្លងកាត់ទន្លេផ្សេងទៀត ដើម្បីរំខានដល់ការផ្គត់ផ្គង់ដល់កងកម្លាំងរុស្ស៊ីក្នុងភាគខាងត្បូង។ទីបញ្ជាការកងកម្លាំងប្រដាប់អាវុធអ៊ុយក្រែនភាគខាងត្បូងបាននិយាយនៅថ្ងៃអង្គារនេះថា ការវាយបករបស់ខ្លួនក្នុងតំបន់ Kherson បានបណ្ដាលឲ្យសត្រូវបាត់បង់ទាហាន ៧៧នាក់, រថក្រោះ ៦គ្រឿង, កាំភ្លើងផ្លោង ៥គ្រឿង, កាំភ្លើងបាញ់យន្តហោះ ៣គ្រឿង និងរថពាសដែក ១៤គ្រឿង។ សារព័ត៌មាន Reuters មិនអាចផ្ទៀងផ្ទាត់របាយការណ៍សមរភូមិប្រយុទ្ធនេះបានភ្លាមៗនៅឡើយ៕អត្ថបទ៖ សុខមាន

ជប៉ុនគោរពដល់អតីតនាយករដ្ឋមន្ត្រី Shinzo Abe ដែលត្រូវបានគេធ្វើឃាត

ជប៉ុន៖ នៅថ្ងៃអង្គារនេះ ប្រទេសជប៉ុនបានគោរពដល់អតីតនាយករដ្ឋមន្ត្រីលោក Shinzo Abe ដែលត្រូវបានគេធ្វើឃាត ដែលលោកជាឥស្សរជនគ្រប់គ្រងនយោបាយសម័យទំនើប ជាមេដឹកនាំកាន់តំណែងយូរបំផុតរបស់ប្រទេស ដោយមានពិធីបុណ្យសពរដ្ឋដ៏កម្រត្រូវបានរៀបចំឡើង។ ពលរដ្ឋជាច្រើនបានដាក់ផ្កានៅកន្លែងរៀបចំពិធីបុណ្យសពរដ្ឋ សម្រាប់អតីតនាយករដ្ឋមន្ត្រីជប៉ុន Shinzo Abe នៅថ្ងៃអង្គារនេះ។ ក្នុងពេលមានសន្តិសុខតឹងរ៉ឹង សាធារណជនបានដាក់ផ្កានៅជុំវិញសាល Nippon Budokan ក្នុងទីក្រុងតូក្យូ។ ប្រជាជនជប៉ុនបានដាក់ផ្កាលើទីសក្ការៈបូជា ដើម្បីគោរពដល់អតីតនាយករដ្ឋមន្ត្រីលោក Abe Shinzo តាំងពីព្រឹកថ្ងៃអង្គារនេះ ដោយទីសក្ការៈចំនួន ២កន្លែងត្រូវបានបង្កើតឡើងនៅឧទ្យាន Kudanzaka ស្ថិតនៅជិតសាល Nippon Budokan ទីក្រុងតូក្យូ។ពិធីបុណ្យសពរដ្ឋសម្រាប់លោក Abe នឹងប្រារព្ធឡើងនៅសាល Nippon Budokan នៅរសៀលថ្ងៃអង្គារ។ ប្រជាជនបានចាប់ផ្តើមដាក់ផ្កាចាប់តាំងពីម៉ោងប្រហែល 9:30ព្រឹកដែលនោះលឿនជាងការគ្រោងទុក ដោយសារតែមនុស្សច្រើនជាងការរំពឹងទុកបានមកជួបជុំគ្នា។ អ្នកកាន់ទុក្ខបានរង់ចាំជាជួរ បន្ទាប់មកពួកគេបានដាក់ផ្កា និងបួងសួងនៅមុខរូបថតអតីតនាយករដ្ឋមន្ត្រី។ នគរបាលនៅក្នុងទីក្រុងតូក្យូស្ថិតក្នុងការប្រុងប្រយ័ត្នខ្ពស់ នៅថ្ងៃប្រារព្ធពិធីបុណ្យសពរដ្ឋសម្រាប់លោក Abe ដែលមន្ត្រីប្រមាណ ២ម៉ឺននាក់ត្រូវបានដាក់ពង្រាយដើម្បីធានាបានថា អ្វីៗនឹងដំណើរការដោយរលូន ខណៈមេដឹកនាំ មន្ត្រីជាន់ខ្ពស់បរទេស និងឯកអគ្គរដ្ឋទូតប្រមាណ ៧០០នាក់នឹងមកចូលរួមពិធីបុណ្យនេះ៕អត្ថបទ៖ ប៊ុនថន

ក្រុមអ្នកជួយសង្គ្រោះ ៥នាក់បានស្លាប់បន្ទាប់ពីព្យុះទីហ្វុង Noru វាយប្រហារប្រទេសហ្វីលីពីន

ហ្វីលីពីន៖ ក្រុមអ្នកជួយសង្គ្រោះ ៥នាក់បានស្លាប់នៅប្រទេសហ្វីលីពីន បន្ទាប់ពីព្យុះទីហ្វុង Noru បានវាយបោកបក់មកលើភាគខាងជើងប្រទេសបណ្តាលឱ្យមានទឹកជំនន់ និងកាត់ផ្តាច់ចរន្តអគ្គិសនី បង្ខំឱ្យមន្ត្រីផ្អាកថ្នាក់រៀន និងការងាររដ្ឋាភិបាលនៅក្នុងរដ្ឋធានី និងខេត្តនៅដាច់ស្រយាល។ ព្យុះទីហ្វុងដ៏មានឥទ្ធិពលបំផុតបានបោកបក់លើឆ្នេរសមុទ្រក្នុងទីក្រុង Burdeos ក្នុងខេត្ត Quezon កាលពីចុងសប្តាហ៍ បន្ទាប់មកបានចុះខ្សោយទៅវិញ ខណៈវាបានបោកបក់ពេញមួយយប់នៅទូទាំងតំបន់ Luzon។ មនុស្សរាប់ពាន់នាក់បានភៀសខ្លួនទៅកាន់ទីជម្រកសង្គ្រោះបន្ទាន់ដែលមួយចំនួនត្រូវបានបង្ខំ។ លោក Daniel Fernando អភិបាលខេត្ត Bulacan ភាគខាងជើងទីក្រុងម៉ានីលបាននិយាយថា ក្រុមអ្នកជួយសង្គ្រោះ ៥នាក់ដែលកំពុងប្រើប្រាស់ទូកដើម្បីជួយប្រជាជនជាប់ក្នុងទឹកជំនន់បានបុកជញ្ជាំងបាក់រលំ បន្ទាប់មកទំនងជាលង់ទឹកស្លាប់នៅក្នុងទឹកកំពុងហូរខ្លាំង។ លោក Fernando និយាយថា ពួកគេគឺជាវីរបុរសដែលធ្លាប់បានជួយសង្គ្រោះជីវិតជនរួមជាតិរបស់យើង ក្នុងពេលមានគ្រោះមហន្តរាយ ដែលការស្លាប់របស់ពួកគេពិតជាគួឲ្យសោកស្តាយខ្លាំង។ ក្រុមមន្ត្រីបាននិយាយថា មនុស្សជាង ១៧,០០០នាក់បានភៀសខ្លួនទៅកាន់ទីជម្រកសង្គ្រោះបន្ទាន់ពីសហគមន៍ ដែលមានហានិភ័យខ្ពស់ងាយនឹងមានការកើនឡើងទឹកជំនន់ និងបំណាក់ដីនៅក្នុងទីក្រុង Quezon។ទន្ទឹមនឹងនេះមនុស្សជាង ៣,០០០នាក់ត្រូវបានជម្លៀសទៅកាន់ទីទួលសុវត្ថិភាពនៅទីក្រុងម៉ានីល ដែលត្រូវបានបក់បោកដោយខ្យល់ខ្លាំង និងភ្លៀងពេញមួយយប់។ ប្រធានាធិបតីលោក Ferdinand Marcos Jr បានសរសើរក្រុមមន្ត្រីចំពោះការជម្លៀសប្រជាជនរាប់ពាន់នាក់ ទៅកាន់ទីទួលសុវត្ថិភាពជាការប្រុងប្រយ័ត្ន មុនពេលព្យុះទីហ្វុងវាយប្រហារ ដែលទប់ស្កាត់អ្នកស្លាប់ និងរងរបួសច្រើន ទោះបីជាកម្លាំងដ៏មហន្តរាយនៃព្យុះ Noru នឹងមានសក្តានុពលក៏ដោយ៕អត្ថបទ៖ ប៊ុនថន

ចំនួនអ្នកស្លាប់នៅសាលារៀនទីក្រុង Izhevsk កើនឡើងដល់ ១៧នាក់ និង ២៤នាក់រងរបួស

រុស្ស៊ី៖ ក្រុមអាជ្ញាធរបាននិយាយថា បាច់ផ្កា ប្រដាប់ប្រដាក្មេងលេង និងទៀនត្រូវបានដាក់នៅខាងក្រៅសាលារៀនមួយកន្លែងក្នុងប្រទេសរុស្ស៊ី បន្ទាប់ពីខ្មាន់កាំភ្លើងម្នាក់បានបាញ់ប្រហារកាលពីថ្ងៃចន្ទបណ្តាលឲ្យមនុស្ស ១៧នាក់ស្លាប់ និង ២៤នាក់ផ្សេងទៀតរងរបួសមុនពេលបាញ់សម្លាប់ខ្លួនឯង។ ការបាញ់ប្រហារនេះបានកើតឡើងនៅសាលារៀនមួយក្នុងទីក្រុង Izhevsk ជាទីក្រុងមានចម្ងាយ ៩៦០គីឡូម៉ែត្រភាគខាងកើតទីក្រុងមូស្គូក្នុងតំបន់ Udmurtia។ គណៈកម្មាធិការស៊ើបអង្កេតរបស់ប្រទេសរុស្ស៊ីបានកំណត់អត្តសញ្ញាណខ្មាន់កាំភ្លើងមានឈ្មោះ Artyom Kazantsev អាយុ ៣៤ឆ្នាំជានិស្សិតបញ្ចប់ការសិក្សានៅសាលារៀននេះ។ រដ្ឋាភិបាលតំបន់ Udmurtia និយាយថា មនុស្ស ១៧នាក់រួមមានកុមារ ១១នាក់បានស្លាប់នៅក្នុងការបាញ់ប្រហារនេះ។ យោងតាមគណៈកម្មាធិការស៊ើបអង្កេតរបស់រុស្ស៊ីបានឲ្យដឹងថា មនុស្ស ២៤នាក់ផ្សេងទៀតរួមមានកុមារ ២២នាក់បានរងរបួសក្នុងការវាយប្រហារនេះ។អាជ្ញាធរតំបន់និយាយថា ខ្មាន់កាំភ្លើងបានចុះឈ្មោះជាអ្នកជំងឺនៅមណ្ឌលព្យាបាលមនុស្សវិកលចរិត បានសម្លាប់ខ្លួនឯងបន្ទាប់ពីការវាយប្រហារ។ អ្នកនាំពាក្យវិមានក្រឹមឡាំងលោក Dmitry Peskov បានចាត់ទុកការបាញ់ប្រហារនេះថាជា «សកម្មភាពភេរវកម្ម» និងបាននិយាយថា ប្រធានាធិបតីរុស្ស៊ីលោក វ្ល៉ាឌីមៀ ពូទីន បានដាក់បទបញ្ជាចាំបាច់ទាំងអស់ដល់អាជ្ញាធរពាក់ព័ន្ធ។ ឆ្មាំជាតិរបស់រុស្ស៊ីបាននិយាយថា ខ្មាន់កាំភ្លើង Kazantsev បានប្រើប្រាស់កាំភ្លើងខ្លីចំនួន ២ដើមបាញ់គ្រាប់ពិត ដែលកាំភ្លើងទាំងនេះមិនបានចុះបញ្ជីជាមួយអាជ្ញាធរនោះទេ៕អត្ថបទ៖ ប៊ុនថន

អគ្គិភ័យឆេះផ្សារទំនើបនៅកូរ៉េខាងត្បូងបណ្តាលឲ្យមនុស្ស ៧នាក់ស្លាប់

កូរ៉េខាងត្បូង៖ ក្រុមមន្ត្រីបាននិយាយថា អគ្គិភ័យបានឆាបឆេះនៅបន្ទប់ក្រោមដីផ្សារទំនើបមួយកន្លែងក្នុងទីក្រុង Daejeon ប្រទេសកូរ៉េខាងត្បូងកាលពីថ្ងៃចន្ទ បណ្តាលឲ្យមនុស្សយ៉ាងហោចណាស់ ៧នាក់ស្លាប់។ លោក Go Seung-cheol មន្ត្រីទីស្នាក់ការកណ្តាលពន្លត់អគ្គិភ័យទីក្រុង Daejeon បាននិយាយថា ក្រុមអ្នកពន្លត់អគ្គិភ័យបានបន្តស្វែងរកអ្នកនៅរស់បន្ទាប់ពីបានពន្លត់ភ្លើង។ វាមិនដឹងទាន់ច្បាស់នៅឡើយនោះទេថា តើមានមនុស្សនៅបាត់ខ្លួន ឬអត់ ខណៈផ្សែងនៅតែមាននៅផ្នែកខ្លះក្នុងអគារ។ អគ្គិភ័យបានឆាបឆេះនៅពេលព្រឹក ហើយបានរាលដាលយ៉ាងលឿនពាសពេញកន្លែងផ្ទុកទំនិញក្នុងបន្ទប់ក្រោមដី ដោយបានជំរុញឱ្យជម្លៀសមនុស្សជាង ១១០នាក់រួមទាំងបុគ្គលិកផ្សារទំនើប និងអតិថិជននៅសណ្ឋាគារក្បែរនោះ។ មន្ត្រីអគ្គិភ័យនិយាយថា អ្នកពន្លត់អគ្គិភ័យជាង ៥០០នាក់ និងរថយន្ត ៩០គ្រឿងត្រូវបានដាក់ពង្រាយដើម្បីពន្លត់ភ្លើង។ មនុស្ស ៦នាក់ក្នុងចំណោមអ្នកដែលត្រូវបានគេរកឃើញស្លាប់គឺជាបុគ្គលិកផ្សារទំនើប ហើយក្រុមមន្ត្រីនៅព្យាយាមកំណត់អត្តសញ្ញាណជនរងគ្រោះម្នាក់ទៀត។ មន្ត្រីពន្លត់អគ្គិភ័យ និងនគរបាលកំពុងស្រាវជ្រាវរកមូលហេតុនៃអគ្គិភ័យនេះ ប៉ុន្តែប្រព័ន្ធផ្សព្វផ្សាយក្នុងស្រុកបានដកស្រង់សេចក្តីរាយការណ៍ ពីសាក្សីដែលឃើញហេតុការណ៍ថា អគ្គិភ័យអាចបណ្តាលមកពីការផ្ទុះរថយន្តអគ្គិសនីដែលឆាបឆេះនៅជាន់ក្រោមដី៕អត្ថបទ៖ ប៊ុនថន

បណ្ដាញសង្គម

ព័ត៌មានថ្មីៗ

បារ៉ែនប្រាប់អ៊ីរ៉ង់ឲ្យបញ្ឈប់ការវាយប្រហារលើប្រទេសជិតខាងក្នុងតំបន់ និងគោរពតាមសេចក្តីសម្រេចរបស់UN

អ៊ីតាលី៖ អ៊ីរ៉ង់មានតួនាទីសំខាន់ណាស់ក្នុងការបញ្ឈប់សកម្មភាពយោធារបស់ក្រុមហេសបូឡា

ប្រទេសអារ៉ាប់ និងអ៊ិស្លាម ថ្កោលទោសវិធានការរបស់អ៊ីស្រាអែលនៅទីក្រុងហ្ស៊េរុយសាឡឹម

Arsenal ព្រមព្រៀងតម្លៃផ្ទេរ ៧៥ លានផោននាំយក Bruno Guimaraes ពី Newcastle

គណៈប្រតិភូ ស.ស.យ.ក ធ្វើទស្សនកិច្ចនៅពុទ្ធិកសាកលវិទ្យាល័យព្រះសីហមុនីរាជា ស្វែងយល់ពីការជួយដល់និស្សិត

គិតត្រឹមខែឧសភាឆ្នាំនេះ CGCC បានធានាឥណទានមានទំហំជាង ៥៧៥លានដុល្លារ គាំទ្រដល់អាជីវកម្ម និងពាណិជ្ជកម្ម

អនុប្រធានទី១ រដ្ឋសភា ជំរុញឱ្យនិស្សិតជ័យលាភីអាហារូបករណ៍ទៅសិក្សានៅប្រទេសបារាំង និងប្រទេសអៀរឡង់ ដើរតួនាទីជា «ទូតមិត្តភាព» ដើម្បីលើកកម្ពស់មុខមាត់កម្ពុជា

អ្នកនាំពាក្យក្រសួងយុត្តិធម៌៖ ក្រសួងយុត្តិធម៌តែងតែបើកទ្វារស្វាគមន៍ និងទទួលរាល់ពាក្យបណ្ដឹង ឬពាក្យសុំអន្តរាគមន៍នានារបស់ពលរដ្ឋ និងគ្រប់ភាគីពាក់ព័ន្ធ

ពលរដ្ឋអរគុណរាជរដ្ឋាភិបាលដែលបន្តគិតគូរសុខទុក្ខ និងការផ្តល់សេវាសាធារណៈកាន់តែប្រសើរ

ឯកឧត្តម កែវ រ៉េមី ចាត់ទុកការឈ្នះមេដាយ ៨គ្រឿងថ្ងៃបើកឆាកតេក្វាន់ដូ ITF ជើងឯកអាស៊ី ជាកាដូ និងសារជូនពរដ៏ថ្លៃថ្លា ជូនសម្ដេចតេជោ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានសំខាន់ៗ

ចំនួនអ្នកស្លាប់ដោយសារលិចសាឡាងក្រុមអ្នកធម្មយាត្រានៅបង់ក្លាដែសបានកើនឡើងដល់ ៦៦នាក់

ពលរដ្ឋរាប់លាននាក់ក្នុងរដ្ឋ Florida ត្រូវបានជំរុញឲ្យជម្លៀសចេញពីលំនៅឋាន ខណៈព្យុះសង្ឃរាអាយអិនចូលមកកាន់តែជិត

រុស្ស៊ីអះអាងជ័យជម្នះក្នុងការបោះឆ្នោតប្រជាមតិក្នុងតំបន់ ៤ របស់អ៊ុយក្រែន

ជប៉ុននឹងបង្កើតរោងចក្រក្រុមហ៊ុនតូយ៉ូតា នៅប្រទេសកម្ពុជា

សម្តេចតេជោ ហ៊ុន សែន ដឹកនាំគណៈប្រតិភូចាកចេញពីជប៉ុន វិលត្រឡប់មកកាន់ប្រទេសកម្ពុជាវិញហើយនៅព្រឹកនេះ

មានការវាយប្រយុទ្ធគ្នាដ៏ខ្លាំងក្លា ខណៈការបោះឆ្នោតចូលជាឧបសម្ព័ន្ធរុស្ស៊ីនៅអ៊ុយក្រែនចូលដល់ថ្ងៃចុងក្រោយ

ជប៉ុនគោរពដល់អតីតនាយករដ្ឋមន្ត្រី Shinzo Abe ដែលត្រូវបានគេធ្វើឃាត

ក្រុមអ្នកជួយសង្គ្រោះ ៥នាក់បានស្លាប់បន្ទាប់ពីព្យុះទីហ្វុង Noru វាយប្រហារប្រទេសហ្វីលីពីន

ចំនួនអ្នកស្លាប់នៅសាលារៀនទីក្រុង Izhevsk កើនឡើងដល់ ១៧នាក់ និង ២៤នាក់រងរបួស

អគ្គិភ័យឆេះផ្សារទំនើបនៅកូរ៉េខាងត្បូងបណ្តាលឲ្យមនុស្ស ៧នាក់ស្លាប់

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានសំខាន់ៗ

ចំនួន​អ្នកស្លាប់​ដោយសារ​លិច​សាឡាង​ក្រុម​អ្នក​ធម្ម​យាត្រា​នៅ​បង់​ក្លា​ដែ​សបាន​កើនឡើង​ដល់ ​៦៦​នាក់

រុស្ស៊ីអះអាង​ជ័យជម្នះ​ក្នុងការ​បោះឆ្នោត​ប្រជាមតិ​ក្នុង​តំបន់​ ៤ ​របស់​អ៊ុយ​ក្រែ​ន​

ជប៉ុននឹងបង្កើតរោងចក្រក្រុមហ៊ុនតូយ៉ូតា នៅប្រទេសកម្ពុជា

សម្តេចតេជោ ហ៊ុន សែន ដឹកនាំគណៈប្រតិភូចាកចេញពីជប៉ុន វិលត្រឡប់មកកាន់ប្រទេសកម្ពុជាវិញហើយនៅព្រឹកនេះ

ជប៉ុន​គោរព​ដល់​អតីត​នាយករដ្ឋមន្ត្រី Shinzo Abe ដែល​ត្រូវបាន​គេ​ធ្វើឃាត

ក្រុម​អ្នក​ជួយសង្គ្រោះ​ ៥​នាក់​បាន​ស្លាប់​បន្ទាប់ពី​ព្យុះ​ទី​ហ្វុ​ង Noru វាយប្រហារ​ប្រទេស​ហ្វីលីពីន​

ចំនួន​អ្នកស្លាប់​នៅ​សាលារៀន​ទីក្រុង Izhevsk កើនឡើង​ដល់ ១៧នាក់ និង ២៤នាក់​រងរបួស​

អគ្គិភ័យ​ឆេះ​ផ្សារ​ទំនើប​នៅ​កូរ៉េខាងត្បូង​បណ្តាល​ឲ្យ​មនុស្ស ៧​នាក់​ស្លាប់

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ចំនួនអ្នកស្លាប់ដោយសារលិចសាឡាងក្រុមអ្នកធម្មយាត្រានៅបង់ក្លាដែសបានកើនឡើងដល់ ៦៦នាក់

រុស្ស៊ីអះអាងជ័យជម្នះក្នុងការបោះឆ្នោតប្រជាមតិក្នុងតំបន់ ៤ របស់អ៊ុយក្រែន

ជប៉ុនគោរពដល់អតីតនាយករដ្ឋមន្ត្រី Shinzo Abe ដែលត្រូវបានគេធ្វើឃាត

ក្រុមអ្នកជួយសង្គ្រោះ ៥នាក់បានស្លាប់បន្ទាប់ពីព្យុះទីហ្វុង Noru វាយប្រហារប្រទេសហ្វីលីពីន

ចំនួនអ្នកស្លាប់នៅសាលារៀនទីក្រុង Izhevsk កើនឡើងដល់ ១៧នាក់ និង ២៤នាក់រងរបួស

អគ្គិភ័យឆេះផ្សារទំនើបនៅកូរ៉េខាងត្បូងបណ្តាលឲ្យមនុស្ស ៧នាក់ស្លាប់