BTV NEWS

មន្ត្រីអាមេរិក៖ អ៊ីស្រាអែល និងហេសបូឡា ព្រមព្រៀងមានបទឈប់បាញ់ចាប់ពីថ្ងៃទី១៩ ខែមិថុនា

លោក Trump បញ្ជាក់ថា សង្គ្រាមធ្វើឲ្យអ៊ីរ៉ង់ខ្សោយ និងបដិសេធការរិះគន់របស់ក្រុមប្រជាធិបតេយ្យ

មនុស្ស ១៨នាក់ ត្រូវបានសម្លាប់ក្នុងការវាយប្រហាររបស់អ៊ីស្រាអែលនៅតំបន់ភាគខាងត្បូងលីបង់

ទីក្រុងតំបន់ភ្នំហេមពាន្តរបស់ឥណ្ឌា ប្រែក្លាយជាគំនរសំរាម ដោយសារភ្ញៀវទេសចរច្រើន

ព័ត៌មានអន្តរជាតិ

UN៖ ការប៉ះទង្គិចគ្នានៃអន្តរសហគមន៍ បន្ថែមទៅលើសង្គ្រាមនៅភាគខាងលិចប្រទេសស៊ូដង់

អង្គការមនុស្សធម៌របស់អង្គការសហប្រជាជាតិ បាននិយាយកាលពីថ្ងៃចន្ទថា អំពើហិង្សាអន្តរសហគមន៍នៅតំបន់ភាគខាងលិចប្រទេសស៊ូដង់ បានកើតឡើងក្នុងពេលនៃការផ្ទុះឡើងជំងឺអាសន្នរោគនិងសង្គ្រាម ដែលតំបន់ Darfur និងតំបន់Kordofan បានប្រឈមជាយូរមកហើយ។ ការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិ (OCHA) បាននិយាយថា ការប៉ះទង្គិចគ្នារវាងក្រុមសហគមន៍ជាគូប្រជែងនៅក្នុងរដ្ឋ South Darfur និងរដ្ឋភាគកណ្តាល បានបណ្តាលឱ្យមានអ្នកស្លាប់ អ្នករងរបួស និងជម្លៀសខ្លួន ដែលបង្ខំឱ្យគ្រួសារមួយចំនួនភៀសខ្លួនឆ្លងកាត់ព្រំដែនចូលទៅក្នុងប្រទេសឆាដដែលនៅជិតខាង។ អង្គការ OCHA បាននិយាយនៅក្នុងសេចក្តីប្រកាសព័ត៌មានថា «ភាពអសន្តិសុខ ដែលកំពុងកើនឡើង កំពុងរំខានដល់ប្រតិបត្តិការមនុស្សធម៌»។ «នៅទីក្រុង Darfur ភាគកណ្តាល សកម្មភាពមនុស្សធម៌ដែលកំពុងបម្រើដល់ពលរដ្ឋប្រហែល២១.០០០នាក់ ត្រូវបានផ្អាកបន្ទាប់ពីការប៉ះទង្គិចគ្នា»។ នៅតំបន់ West Kordofan ការផ្ទុះឡើងជំងឺអាសន្នរោគដែលសង្ស័យនៅតែបន្តរាលដាល ដោយមានករណីសង្ស័យជាង ៣០០ករណី និងអ្នកស្លាប់ចំនួន៧៧នាក់ ត្រូវបានកត់ត្រា គិតត្រឹមថ្ងៃអាទិត្យ កន្លងទៅនេះ។ អង្គការ OCHA និយាយថា «ដៃគូនានា កំពុងឆ្លើយតប ប៉ុន្តែត្រូវបានរារាំងដោយកង្វះការផ្គត់ផ្គង់ និងធនធានសំខាន់ៗ»។

មនុស្ស៧នាក់ស្លាប់ ក្នុងការបាញ់ប្រហារនៅរដ្ឋ Iowa ដែលជាប់ពាក់ព័ន្ធទៅនឹងជម្លោះ

យោងតាមអង្គភាពនគរបាលបានឲ្យដឹងថា មនុស្ស៧នាក់ រួមទាំងជនសង្ស័យជាខ្មាន់កាំភ្លើង បានស្លាប់បន្ទាប់ពីការបាញ់ប្រហារជាបន្តបន្ទាប់នៅទីតាំងជាច្រើនកន្លែងក្នុងទីក្រុង Muscatine រដ្ឋ Iowa។ នគរបាលនិយាយថា មន្ត្រីនគរបាលបានឆ្លើយតបទៅនឹងសេចក្តីរាយការណ៍នៃការបាញ់ប្រហារនៅលំនៅឋានមួយកន្លែង ហើយបានឃើញមនុស្សបួននាក់រងរបួសដោយសារគ្រាប់កាំភ្លើង ហើយក្រោយមកអ្នកទាំងបួនត្រូវបានប្រកាសថាស្លាប់នៅកន្លែងកើតហេតុ។ អ្នកស៊ើបអង្កេត បានកំណត់អត្តសញ្ញាណបុរសអាយុ ៥២ ឆ្នាំម្នាក់ជាជនសង្ស័យ ជាអ្នកដែលបានចាកចេញពីលំនៅឋានមុនពេលមន្ត្រីនគរបាលបានទៅដល់ ហើយក្រោយមកត្រូវបានគេរកឃើញដោយជនសង្ស័យបានបាញ់សម្លាប់ខ្លួនឯង។ ក្រោយមក មន្ត្រីនគរបាលបានរកឃើញបុរសវ័យជំទង់ម្នាក់ទៀតស្លាប់ដោយសារគ្រាប់កាំភ្លើងនៅក្នុងលំនៅឋានដាច់ដោយឡែកមួយ និងបុរសម្នាក់ទៀតស្លាប់នៅទីតាំងអាជីវកម្មក្នុងស្រុកមួយកន្លែង ជាការបាញ់ប្រហារដែលបានបណ្តាលឲ្យមនុស្សសរុប៧នាក់ស្លាប់។ នគរបាលបាននិយាយនៅក្នុងសេចក្តីប្រកាសព័ត៌មានមួយថា «ការស៊ើបអង្កេតបឋម បង្ហាញថា ការបាញ់ប្រហារបានផ្តើមចេញពីជម្លោះក្នុងគ្រួសារ» ខណៈនៅពេលនេះ ជនរងគ្រោះទាំងអស់ត្រូវបានគេជឿថាជាសមាជិកគ្រួសាររបស់ជនសង្ស័យដែលបានស្លាប់។

មេដឹកនាំកោះតៃវ៉ាន់៖ ការរក្សាស្ថានភាពនយោបាយបច្ចុប្បន្ន គឺល្អបំផុត ដើម្បីធានាខ្សែច្រវាក់ផ្គត់ផ្គង់

មេដឹកនាំកោះតៃវ៉ាន់ លោក Lai Ching-te បាននិយាយនៅថ្ងៃអង្គារ (ទី២ ខែមិថុនា ឆ្នាំ២០២៦) នេះថា ការរក្សាស្ថានភាពនយោបាយបច្ចុប្បន្នឲ្យនៅដដែលនេះ គឺជារឿងដែលមានការទទួលខុសត្រូវបំផុតដែលកោះនេះអាចធ្វើបាន ដើម្បីធានាខ្សែច្រវាក់ផ្គត់ផ្គង់សកល ខណៈដែលខ្លួនធ្វើជាម្ចាស់ផ្ទះទទួលក្រុមហ៊ុនឈានមុខគេមួយចំនួនខាងបច្ចេកវិទ្យារបស់ពិភពលោក សម្រាប់ព្រឹត្តិការណ៍ Computex។ កោះតៃវ៉ាន់ដើរតួនាទីយ៉ាងសំខាន់នៅក្នុងខ្សែច្រវាក់ផ្គត់ផ្គង់បញ្ញាសិប្បនិម្មិត (AI) សកល សម្រាប់ក្រុមហ៊ុននានា ក្នុងនោះរួមទាំង Nvidia និង Apple ផងដែរ ហើយតំណែងរបស់ខ្លួន ត្រូវបានគាំទ្រដោយក្រុមហ៊ុនផលិតបន្ទះឈីបកិច្ចសន្យាធំជាងគេបំផុតរបស់ពិភពលោក គឺ TSMC។ នៅឯពិធីបើកព្រឹត្តិការណ៍ Computex ក្នុងទីក្រុងតៃប៉ិ ជាកន្លែងដែលមេដឹកនាំនៃក្រុមហ៊ុនបច្ចេកវិទ្យាធំៗមួយចំនួនរបស់ពិភពលោកកំពុងជួបជុំគ្នា លោក Lai បានលើកឡើងថា៖ «នៅពេលដែលតម្រូវការ AI របស់ពិភពលោក កើនឡើង តម្រូវការ សម្រាប់កោះតៃវ៉ាន់ ដែលមានស្ថិរភាព គួរឲ្យទុកចិត្ត និងសមត្ថភាពទទួលខុសត្រូវ ក៏កើនឡើងដែរ»។ លោកបានសង្កត់ធ្ងន់ថា «រដ្ឋបាលនឹងការពារសន្តិភាព និងស្ថិរភាពយ៉ាងម៉ឺងម៉ាត់ នៅទូទាំងច្រកសមុទ្រតៃវ៉ាន់ ហើយប្តេជ្ញារក្សាស្ថានភាពដដែលនេះ» ដោយលោកបានបន្ថែមថា នេះគឺជាការសន្យា ដែលការទទួសខុសត្រូវបំផុតរបស់កោះតៃវ៉ាន់ ចំពោះខ្សែច្រវាក់ផ្គត់ផ្គង់សកល៕

ចិនបញ្ជូនអ្នកជំនាញផ្នែកវេជ្ជសាស្ត្រទៅកុងហ្គោ ដើម្បីជួយប្រយុទ្ធប្រឆាំងនឹងការផ្ទុះឡើងនូវជំងឺ Ebola

ប្រព័ន្ធផ្សព្វផ្សាយរដ្ឋ បានរាយការណ៍នៅថ្ងៃអង្គារ (ទី២ ខែមិថុនា ឆ្នាំ២០២៦) នេះថា ប្រទេសចិនបានបញ្ជូនក្រុមអ្នកជំនាញផ្នែកវេជ្ជសាស្ត្រទៅកាន់សាធារណរដ្ឋប្រជាធិបតេយ្យកុងហ្គោ ដើម្បីគាំទ្រដល់កិច្ចប្រឹងប្រែងទប់ស្កាត់ការផ្ទុះឡើងនូវជំងឺ Ebola ដែលអង្គការសុខភាពពិភពលោក (WHO) បានចាត់ថ្នាក់ជាគ្រាអាសន្នសុខភាពសាធារណៈដែលជាកង្វល់អន្តរជាតិ។ ក្រុមអ្នកជំនាញបានចាកចេញពីទីក្រុងប៉េកាំង នាព្រឹកព្រលឹមថ្ងៃនេះ ហើយនឹងធ្វើការជាមួយបុគ្គលិកពេទ្យចិនដែលឈរជើងរួចហើយ នៅក្នុងប្រទេសកុងហ្គោ ក៏ដូចជាអាជ្ញាធរសុខាភិបាល និងគ្រប់គ្រងជំងឺ ក្នុងស្រុក។ នេះបើយោងតាមទីភ្នាក់ងារសារព័ត៌មាន Xinhua។ បណ្ដាអ្នកឯកទេសដែលមានបទពិសោធន៍យ៉ាងទូលំទូលាយ ក្នុងការឆ្លើយតបនឹងជំងឺរាតត្បាត នឹងជួយដល់វិធានការបង្ការ និងព្យាបាលជំងឺ Ebola ផ្តល់ការបណ្តុះបណ្តាល សម្រាប់បុគ្គលិកថែទាំសុខភាព និងគាំទ្រដល់ជនជាតិចិន និងស្ថាប័នដែលធ្វើប្រតិបត្តិការ នៅក្នុងប្រទេសអាហ្វ្រិកកណ្តាល។ គួរបញ្ជាក់ថា យោងតាមការធ្វើបច្ចុប្បន្នភាពដែលចេញផ្សាយកាលពីថ្ងៃសុក្រ ដោយ WHO បានឲ្យដឹងថា យ៉ាងហោចណាស់ករណីឆ្លងជំងឺនេះចំនួន ១៣៤ករណី ត្រូវបានរាយការណ៍ អំឡុងការផ្ទុះឡើងនូវជំងឺនេះ នៅកុងហ្គោ និងអ៊ូហ្គង់ដា។ ការស្លាប់ដោយសារជំងឺ Ebola មានចំនួន ១៨ករណី ក្នុងចំណោមករណីដែលបានបញ្ជាក់ នៅក្នុងប្រទេសទាំង២។ អាជ្ញាធរសុខាភិបាលកុងហ្គោ បង្ហាញថា ករណីសង្ស័យថ្មីនៅតែត្រូវបានបន្តចុះបញ្ជី ដោយមានករណីសរុបជាង ១.០០០ករណី គិតចាប់តាំងពីការផ្ទុះឡើងនូវជំងឺនេះត្រូវបានប្រកាសកាលពីថ្ងៃទី១៥ ខែឧសភា៕

លោកស្រី Frederiksen ធានាបានតំណែងនាយករដ្ឋមន្ត្រីដាណឺម៉ាកអាណត្តិទី៣

លោកស្រី Mette Frederiksen មេដឹកនាំគណបក្សសង្គមប្រជាធិបតេយ្យ (Social Democratic) របស់ប្រទេសដាណឺម៉ាក បាននិយាយកាលពីថ្ងៃចន្ទ (ទី១ ខែមិថុនា ឆ្នាំ២០២៦) ថា លោកស្រីបានព្រមព្រៀងបង្កើតរដ្ឋាភិបាលចម្រុះកណ្តាល-ឆ្វេងនិយម ដោយបន្តការកាន់អំណាចរបស់លោកស្រី ស្របពេលមានវិបត្តិ ក្នុងទំនាក់ទំនងជាមួយប្រធានាធិបតីអាមេរិក លោក Donald Trump ពាក់ព័ន្ធនឹងអនាគតរបស់កោះ Greenland។ កិច្ចព្រមព្រៀងបង្កើតគណៈរដ្ឋមន្ត្រីសំឡេងភាគតិចនេះ ផ្តល់ឲ្យលោកស្រី Frederiksen នូវតំណែងនាយករដ្ឋមន្ត្រីអាណត្តិទី៣ ជាប់ៗគ្នា ដោយបញ្ចប់ភាពមិនប្រាកដប្រជាជាច្រើនខែ បន្ទាប់ពីមានការបោះឆ្នោតខែមីនា ដែលគណបក្សចំនួន ១២ បានឈ្នះអាសនៈនៅក្នុងសភាដាណឺម៉ាក។ លោកស្រី Frederiksen បានប្រាប់អ្នកសារព័ត៌មានថា លោកស្រីបានចូលគាល់ព្រះមហាក្សត្រ ហើយបានប្រកាសថា រដ្ឋាភិបាលមួយអាចត្រូវបានបង្កើតឡើង បន្ទាប់ពីមានការចរចាដ៏យូរ។ គួរបញ្ជាក់ថា ក្រុមចម្រុះកណ្តាលនិយមរបស់លោកស្រី បានបាត់បង់សំឡេងភាគច្រើនរបស់ខ្លួន នៅក្នុងការបោះឆ្នោតថ្ងៃទី២៤ ខែមីនា ខណៈដែលប្រជាជនដាណឺម៉ាក បានបង្ហាញការមិនពេញចិត្ត ដោយសារវិបត្តិការចំណាយនៃការរស់នៅ តែគណបក្សប្រជាធិបតេយ្យសង្គម នៅតែជាក្រុមធំបំផុត នៅក្នុងសភា ដោយមាន ៣៨អាសនៈ ក្នុងចំណោម ១៧៩អាសនៈ ដោយធ្លាក់ចុះពីចំនួន ៥០កៅអី។ បន្ទាប់ពីមានការចរចាអស់រយៈពេលជាង ២ខែ ដែលគណបក្សប្រជាធិបតេយ្យសង្គម និងគណបក្សស្តាំនិយមសេរីនិយម បានប្រឹងប្រែងបង្កើតរដ្ឋាភិបាលថ្មី លោកស្រី Frederiksen វ័យ ៤៨ឆ្នាំ ទទួលបានការគាំទ្រចាំបាច់ពីគណបក្សនានា នៅក្នុងសភា៕

ចិនអំពាវនាវឲ្យគ្រប់ភាគីអត់ធ្មត់ ក្រោយមានឧប្បត្តិហេតុយានដ្រូន នៅរ៉ូម៉ានី

កាលពីថ្ងៃចន្ទ (ទី១ ខែមិថុនា ឆ្នាំ២០២៦) លោក Fu Cong តំណាងអចិន្ត្រៃយ៍របស់ប្រទេសចិនប្រចាំអង្គការសហប្រជាជាតិ (UN) បានជំរុញឲ្យគ្រប់ភាគីទាំងអស់ដែលពាក់ព័ន្ធនឹងឧប្បត្តិហេតុយានដ្រូនថ្មីៗនេះ នៅក្នុងប្រទេសរ៉ូម៉ានី បន្តរក្សាភាពស្ងប់ស្ងាត់ និងអនុវត្តការអត់ធ្មត់។ អំឡុងពេលថ្លែង នៅក្នុងកិច្ចប្រជុំបើកចំហបន្ទាន់របស់ក្រុមប្រឹក្សាសន្តិសុខអង្គការសហប្រជាជាតិ (UNSC) លោក Fu បានសង្កត់ធ្ងន់លើតម្រូវការ សម្រាប់ការសន្ទនា និងទំនាក់ទំនង ដើម្បីបញ្ជាក់ការពិតឲ្យបានច្បាស់លាស់ ដោះស្រាយជម្លោះ និងទប់ស្កាត់កុំឲ្យមានភាពតានតឹងកើនឡើងបន្ថែមទៀត។ គួរបញ្ជាក់ថា យោងតាមក្រសួងការពារជាតិរ៉ូម៉ានី បានឲ្យដឹងថា កាលពីថ្ងៃសុក្រចុងសប្ដាហ៍កន្លងមក យានដ្រូនរបស់រុស្ស៊ី ១គ្រឿង បានធ្លាក់ទៅលើដំបូលអគារផ្ទះល្វែងមួយកន្លែង ក្នុងទីក្រុង Galati នៅភាគអាគ្នេយ៍នៃប្រទេសរ៉ូម៉ានី ដោយបានធ្វើឲ្យមនុស្ស២នាក់រងរបួស។ លោក Fu បាននិយាយថា ឧប្បត្តិហេតុនេះ គឺជាការរីករាលដាលដោយសារវិបត្តិអ៊ុយក្រែនដែលកំពុងបន្តមាន។ លោកបានព្រមានថា ប្រសិនបើស្ថានភាពនៅអ៊ុយក្រែនកាន់តែអាក្រក់ទៅៗ ហើយនៅទីបំផុតវាលែងអាចគ្រប់គ្រងបាននោះ វាអាចនាំឲ្យមានផលវិបាកធ្ងន់ធ្ងរ និងមិនអាចកែវិញបាន។ លោកបានសង្កត់ធ្ងន់ថា ប្រទេសក្នុងតំបន់ និងសហគមន៍អន្តរជាតិ ត្រូវតែធ្វើការរួមគ្នា ដើម្បីបន្ថយភាពតានតឹង ចូលរួមក្នុងការសន្ទនាដោយស្ងប់ស្ងាត់ និងស្មោះត្រង់ជាងមុន ហើយជៀសវាងការប្រើប្រាស់វោហាសាស្ត្របង្កហេតុដែលអាចធ្វើឲ្យស្ថានការណ៍កាន់តែធ្ងន់ធ្ងរឡើងៗ៕

លោក Trump ចុះហត្ថលេខាលើសេចក្តីប្រកាសកែសម្រួលពន្ធដែកថែប អាលុយមីញ៉ូម និងទង់ដែង

ប្រធានាធិបតីអាមេរិក លោក Donald Trump បានចុះហត្ថលេខាលើសេចក្តីប្រកាសមួយ កាលពីថ្ងៃចន្ទ (ទី១ ខែមិថុនា ឆ្នាំ២០២៦) ដោយកែសម្រួលពន្ធលើការនាំចូលដែកថែប អាលុយមីញ៉ូម និងទង់ដែង។ នេះបើយោងតាមការឲ្យដឹងពីសេតវិមាន នៅក្នុងសេចក្តីថ្លែងការណ៍។ សេចក្តីថ្លែងការណ៍នេះ បានឲ្យដឹងថា៖ «សេចក្តីប្រកាសនេះ កែសម្រួលអត្រាពន្ធ លើឧបករណ៍កសិកម្ម ដូចជាម៉ាស៊ីនច្រូតកាត់ជាដើម ក៏ដូចជាឧបករណ៍មួយចំនួនទៀត មកត្រឹម ១៥ភាគរយ ពីកម្រិត ២៥ភាគរយ»។ ចំណាត់ការនេះ ក៏ «ពង្រីកលើប្រភេទឧបករណ៍ឧស្សាហកម្មមានស្រាប់ដែលត្រូវបង់ពន្ធ ១៥ភាគរយ ដើម្បីរួមបញ្ចូលឧបករណ៍ឧស្សាហកម្មចល័ត ដូចជាប៊ុលដូហ្ស័រ (រថយន្តឈូសដី) និងរថយន្តលើកដាក់ទំនិញជាដើម នៅពេលនាំចូលពីប្រទេសមានកិច្ចព្រមព្រៀងពាណិជ្ជកម្មដែលមានសិទ្ធិទទួលបានលក្ខខណ្ឌបែបនេះ។ ក្រឹត្យនេះក៏ «ជំរុញឲ្យក្រុមហ៊ុនបរទេសប្រើប្រាស់ដែកថែប និងអាលុយមីញ៉ូមរបស់សហរដ្ឋអាមេរិកបន្ថែមទៀត ដោយអនុញ្ញាតឲ្យពួកគេមានសិទ្ធិរងអត្រាពន្ធ ១០ភាគរយ ប្រសិនបើឧបករណ៍របស់ពួកគេ រួមមានយ៉ាងហោចណាស់ ៨៥ភាគរយនៃដែកថែប ឬអាលុយមីញ៉ូមដែលដំណើរការកែច្នៃរបស់សហរដ្ឋអាមេរិក»។ សេចក្ដីថ្លែងការណ៍នោះបានបន្ថែមថា ការផ្លាស់ប្តូរអត្រាពន្ធទាំងនេះ គឺបណ្តោះអាសន្ន ហើយនឹងមានរយៈពេលរហូតដល់ថ្ងៃទី៣១ ខែធ្នូ ឆ្នាំ២០២៧ «ដើម្បីជំរុញការវិនិយោគរយៈពេលខ្លី ដែលនឹងកសាងមូលដ្ឋានឧស្សាហកម្មរបស់ប្រទេសឡើងវិញ»៕

សមាជិកភាគច្រើននៃក្រុមប្រឹក្សាសន្តិសុខ UN ថ្កោលទោសការបង្កើនប្រតិបត្តិការរបស់អ៊ីស្រាអែល នៅលីបង់

សមាជិកភាគច្រើននៃក្រុមប្រឹក្សាសន្តិសុខអង្គការសហប្រជាជាតិ (UNSC) កាលពីថ្ងៃចន្ទ (ទី១ ខែមិថុនា ឆ្នាំ២០២៦) បានថ្កោលទោសការពង្រីកប្រតិបត្តិការយោធារបស់អ៊ីស្រាអែល នៅក្នុងប្រទេសលីបង់ ខណៈដែលសហរដ្ឋអាមេរិកមិនបានរិះគន់ទីក្រុង Tel Aviv ឡើយ ហើយផ្ទុយទៅវិញ បានបង្វែរការបន្ទោសរបស់ខ្លួនទៅលើក្រុមហេបូឡា និងអ៊ីរ៉ង់។ បេសកជនបារាំងប្រចាំអង្គការសហប្រជាជាតិ (UN) លោក Jerome Bonnafont បាននិយាយថា សមាជិកទាំងនោះ បានអំពាវនាវឲ្យបើកសម័យប្រជុំបន្ទាន់មួយ «ដើម្បីឆ្លើយតបទៅនឹងការបង្កើនភាពតានតឹងយ៉ាងខ្លាំងដែលកំពុងដំណើរការនាពេលនេះ និងការពង្រីកប្រតិបត្តិការយោធាដ៏ធំដោយអ៊ីស្រាអែល នៅក្នុងប្រទេសលីបង់ ទោះបីជាមានបទឈប់បាញ់ដែលបានចូលជាធរមានកាលពីថ្ងៃទី១៧ ខែមេសា ក្រោមការគាំទ្ររបស់សហរដ្ឋអាមេរិកក៏ដោយ»។ លោក Bonnafont បានរិះគន់ទីក្រុង Tel Aviv ហើយបានព្រមានថា ការកាន់កាប់ថ្មី នឹងមានតែបង្កជាហានិភ័យធ្វើឲ្យជម្លោះកាន់តែធ្ងន់ទៅៗប៉ុណ្ណោះ។ លោកបានសង្កត់ធ្ងន់ថា៖ «មិនត្រឹមតែមិននាំមកនូវសន្តិសុខដល់អ៊ីស្រាអែល និងប្រជាពលរដ្ឋរបស់ខ្លួនប៉ុណ្ណោះទេ ការកាន់កាប់ថ្មីប្រឈមជំរុញឲ្យមានអស្ថិរភាព ពីព្រោះភូមិនីមួយៗ ត្រូវបានទម្លាក់គ្រាប់បែក និងបំផ្លិចបំផ្លាញ ហើយជនស៊ីវិលគ្រប់រូបដែលត្រូវបានសម្លាប់ នឹងជួយពង្រឹងក្រុមហេសបូឡាឲ្យកាន់តែរឹងមាំ និងធ្វើឲ្យអំណាចរដ្ឋាភិបាលលីបង់កាន់តែចុះខ្សោយ»។ ចំណែកលោក Vassily Nebenzia បេសកជន UN របស់រុស្ស៊ី បានគូសបញ្ជាក់ពីភាពស្រដៀងគ្នា រវាងសកម្មភាពយោធារបស់អ៊ីស្រាអែល នៅលីបង់ និងស្ថានភាព នៅតំបន់ហ្កាហ្សា ដោយបញ្ជាក់ថា ប្រទេសលីបង់កំពុងឃើញ «ទិដ្ឋភាពដែលស្ទើរតែដូចគ្នាបេះបិទនៃសេណារីយ៉ូបោសសម្អាតតំបន់ហ្កាហ្សា ដោយមានការបង្កើតការកាន់កាប់ទ្រង់ទ្រាយធំ និងការបង្ខំឲ្យប្រជាជនក្នុងតំបន់ផ្លាស់ទីលំនៅ»។ ក្រៅពីប្រទេសទាំង២ បេសកជនរបស់ប្រទេសផ្សេងទៀតនៃក្រុមប្រឹក្សានេះ ដែលមានដូចជាលោក Fu Cong របស់ចិន និងលោក James Kariuki របស់ចក្រភពអង់គ្លេសជាដើម សុទ្ធតែបានរិះគន់ ចំពោះការពង្រីកប្រតិបត្តិការរបស់អ៊ីស្រាអែល នៅប្រទេសលីបង់នេះ៕

អ៊ីរ៉ង់សម្លឹងកិច្ចព្រមព្រៀងបណ្ដោះអាសន្នជាមួយអាមេរិក ដើម្បីសម្រាលបញ្ហាសេដ្ឋកិច្ច និងចំណេញពេលថែម

យោងតាមប្រភព និងបណ្ដាអ្នកវិភាគ បានឲ្យដឹងថា ប្រទេសអ៊ីរ៉ង់កំពុងជំរុញឲ្យមានកិច្ចព្រមព្រៀងបណ្តោះអាសន្នមានកំណត់ជាមួយសហរដ្ឋអាមេរិក ជាកិច្ចប្រឹងប្រែង ដើម្បីបន្ធូរបន្ថយសម្ពាធសេដ្ឋកិច្ចដែលកំពុងកើនឡើង និងធ្វើឲ្យស្ថានការណ៍នៅក្នុងប្រទេសមានស្ថិរភាព ខណៈពេលដែលបញ្ចៀសការធ្វើសម្បទានសំខាន់ៗ ជុំវិញកម្មវិធីនុយក្លេអ៊ែររបស់ខ្លួន។ ប្រភពអ៊ីរ៉ង់ ៣រូប ដែលស្និទ្ធនឹងអ្នកធ្វើការសម្រេចចិត្ត បានបង្ហើបឲ្យដឹងថា វិធីសាស្រ្តនេះឆ្លុះបញ្ចាំងពីយុទ្ធសាស្ត្រស្រដៀងគ្នាពីមុន សម្រាប់សាធារណរដ្ឋឥស្លាម ដែលមានដូចជាទប់ទល់សម្ពាធដោយមិនចុះញ៉ម បញ្ចៀសការសម្របសម្រួលដែលមិនអាចកែប្រែវិញបាន និងរក្សាការចរចាឲ្យនៅដំណើរការ ដោយមិនផ្លាស់ប្តូរជំហរស្នូល។ ប៉ុន្តែកិច្ចប្រឹងប្រែងចុងក្រោយនេះ ក៏ត្រូវបានជំរុញដោយការមានក្ដីបារម្ភបន្ទាន់ផងដែរ។ មន្ត្រីនានាមើលឃើញកិច្ចព្រមព្រៀងមិនទូលំទូលាយ ជាមធ្យោបាយមួយ ដើម្បីមានពេលវេលាបន្ថែម ជួយសម្រាលសម្ពាធហិរញ្ញវត្ថុ និងទប់ស្កាត់ហានិភ័យក្នុងស្រុកដែលកំពុងកើនឡើង ដោយសារសេដ្ឋកិច្ចដែលកាន់តែអាក្រក់ទៅៗ ដោយមិនចាំបាច់ដោះស្រាយបញ្ហាចម្រូងចម្រាសបំផុតនោះទេ។ កិច្ចប្រឹងប្រែងការទូតនេះកើតឡើងបន្ទាប់ពីការកើនឡើងភាពតានតឹងជាច្រើនសប្តាហ៍ ក្រោយការវាយប្រហាររបស់សហរដ្ឋអាមេរិក-អ៊ីស្រាអែល កាលពីចុងខែកុម្ភៈ បានក្លាយទៅជាជម្លោះក្នុងតំបន់កាន់តែធំធេង។ ការវាយប្រហាររបស់អ៊ីរ៉ង់ នៅទូទាំងឈូងសមុទ្រពែក្ស បានបង្កើនក្ដីបារម្ភ អំពីសន្តិសុខនៃច្រកសមុទ្រ Hormuz ដែលជាផ្លូវតូចចង្អូចដ៏សំខាន់ សម្រាប់ការផ្គត់ផ្គង់ប្រេង និងឧស្ម័នធម្មជាតិរាវប្រហែល ១ភាគ៥ របស់សកលលោក។ ៣ខែក្រោយ ហើយទោះបីជាមានបទឈប់បាញ់ដ៏ផុយស្រួយ កាលដើមខែមេសាក៏ដោយ ក៏ជម្លោះនេះបានវិវត្តបន្តិចម្ដងទៅជាភាពជាប់គាំង។ ការបិទផ្លូវទឹករបស់សហរដ្ឋអាមេរិក ចំពោះកំពង់ផែអ៊ីរ៉ង់ និងការគ្រប់គ្រងយ៉ាងតឹងរ៉ឹងរបស់ទីក្រុងតេអេរ៉ង់ នៅច្រកសមុទ្រ បានធ្វើឲ្យមានសម្ពាធលើគ្នាទៅវិញទៅមក ដែលជំរុញឲ្យការចំណាយសេដ្ឋកិច្ចកើនឡើង ខណៈពេលដែលហានិភ័យនៃការប្រយុទ្ធគ្នាថ្មីស្ថិតមិនទាន់ត្រូវបានដោះស្រាយ៕

ចិន បង្កើនវិធានការទប់ស្កាត់គ្រោះមហន្តរាយ ខណៈរដូវទឹកជំនន់ចូលមកដល់

ក្រសួងធនធានទឹកចិន បានជំរុញក្រុមអាជ្ញាធរកាលពីថ្ងៃចន្ទឱ្យបង្កើនកិច្ចខិតខំប្រឹងប្រែងទប់ស្កាត់គ្រោះមហន្តរាយ ខណៈរដូវទឹកជំនន់របស់ប្រទេសនេះចាប់ផ្តើមចូលមកដល់។ ការព្យាករណ៍ជាផ្លូវការបង្ហាញថា ទឹកភ្លៀងនៅតំបន់ខ្លះនៃភាគឦសាន ខាងកើត ខាងត្បូង និងនិរតីនៃប្រទេសចិននឹងមានច្រើនជាងធម្មតាពី១០ ភាគរយទៅ២០ ភាគរយនៅក្នុងខែមិថុនានេះ ដែលបង្កើនហានិភ័យទឹកជំនន់នៅក្នុងតំបន់មួយចំនួនតាមបណ្តោយដងទន្លេយ៉ាងសេ និងនៅក្នុងអាងទន្លេគុជ។ ដោយព្រមានថា ស្ថានភាពទឹកជំនន់អាច "ធ្ងន់ធ្ងរ និងស្មុគស្មាញ" ក្រសួងបានអំពាវនាវឱ្យមានការព្រមានជាមុន និងការឆ្លើយតបជាបន្ទាន់ ដោយបន្ថែមថា ខ្លួននឹងបញ្ជូនក្រុមការងារ និងអ្នកជំនាញទៅកាន់ជួរមុខដើម្បីផ្តល់ការណែនាំនៅនឹងកន្លែង។ ក្រសួងបាននិយាយថា អាងស្តុកទឹកសំខាន់ៗនៅក្នុងអាងទន្លេ ដែលមានហានិភ័យខ្ពស់គួរតែបំពេញតួនាទីរបស់ខ្លួនយ៉ាងពេញលេញក្នុងការគ្រប់គ្រងទឹកជំនន់ និងការសង្គ្រោះគ្រោះមហន្តរាយ ខណៈការល្បាត និងការត្រួតពិនិត្យទំនប់ទឹកសំខាន់ៗត្រូវតែបង្កើន។ ក្រសួងបានបន្ថែមថា ខ្លួននឹងបន្តធ្វើការយ៉ាងជិតស្និទ្ធជាមួយក្រុមអាជ្ញាធរគ្រប់គ្រងគ្រាអាសន្ន និងឧតុនិយម ដើម្បីបង្កើនការចែករំលែកព័ត៌មាន និងពង្រឹងការគាំទ្របច្ចេកទេស៕

បណ្ដាញសង្គម

ព័ត៌មានថ្មីៗ

គិតត្រឹមត្រីមាសទី១ គ្រឹះស្ថានមីក្រូហិរញ្ញវត្ថុបានបញ្ចេញឥណទានមានទឹកប្រាក់ ៥,៤ ពាន់លានដុល្លារ

ទីភ្នាក់ងារទេសចរណ៍ចិនចាប់ផ្ដើមដំណើរកម្សាន្តជាក្រុមទៅជប៉ុនឡើងវិញ តែខ្លះបញ្ឈប់ការលក់ក្រោយមក

លីបង់ថ្កោលទោសការវាយប្រហារចុងក្រោយរបស់អ៊ីស្រាអែល និងជំរុញឲ្យមាន «បទឈប់បាញ់គ្រប់ជ្រុងជ្រោយ»

ការបំផ្ទុះគ្រាប់បែក ២ផ្សេងគ្នា បណ្តាលឲ្យនគរបាលរងរបួស ក្នុងខេត្ត Yala និង Pattani របស់ថៃ

ទីភ្នាក់ងារតាមដាន៖ ការឆ្លងកាត់របស់នាវា នៅចក្រសមុទ្រ Hormuz កើនឡើង ក្រោយមានកិច្ចព្រមព្រៀង

ពលរដ្ឋអ៊ីស្រាអែលរស់នៅតំបន់ព្រំដែន ព្រួយបារម្ភពីកិច្ចព្រមព្រៀងសន្តិភាពរវាងអាមេរិក និងអ៊ីរ៉ង់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានអន្តរជាតិ

UN៖ ការប៉ះទង្គិចគ្នានៃអន្តរសហគមន៍ បន្ថែមទៅលើសង្គ្រាមនៅភាគខាងលិចប្រទេសស៊ូដង់

មនុស្ស៧នាក់ស្លាប់ ក្នុងការបាញ់ប្រហារនៅរដ្ឋ Iowa ដែលជាប់ពាក់ព័ន្ធទៅនឹងជម្លោះ

មេដឹកនាំកោះតៃវ៉ាន់៖ ការរក្សាស្ថានភាពនយោបាយបច្ចុប្បន្ន គឺល្អបំផុត ដើម្បីធានាខ្សែច្រវាក់ផ្គត់ផ្គង់

ចិនបញ្ជូនអ្នកជំនាញផ្នែកវេជ្ជសាស្ត្រទៅកុងហ្គោ ដើម្បីជួយប្រយុទ្ធប្រឆាំងនឹងការផ្ទុះឡើងនូវជំងឺ Ebola

លោកស្រី Frederiksen ធានាបានតំណែងនាយករដ្ឋមន្ត្រីដាណឺម៉ាកអាណត្តិទី៣

ចិនអំពាវនាវឲ្យគ្រប់ភាគីអត់ធ្មត់ ក្រោយមានឧប្បត្តិហេតុយានដ្រូន នៅរ៉ូម៉ានី

លោក Trump ចុះហត្ថលេខាលើសេចក្តីប្រកាសកែសម្រួលពន្ធដែកថែប អាលុយមីញ៉ូម និងទង់ដែង

សមាជិកភាគច្រើននៃក្រុមប្រឹក្សាសន្តិសុខ UN ថ្កោលទោសការបង្កើនប្រតិបត្តិការរបស់អ៊ីស្រាអែល នៅលីបង់

អ៊ីរ៉ង់សម្លឹងកិច្ចព្រមព្រៀងបណ្ដោះអាសន្នជាមួយអាមេរិក ដើម្បីសម្រាលបញ្ហាសេដ្ឋកិច្ច និងចំណេញពេលថែម

ចិន បង្កើនវិធានការទប់ស្កាត់គ្រោះមហន្តរាយ ខណៈរដូវទឹកជំនន់ចូលមកដល់

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានអន្តរជាតិ

UN៖ ការប៉ះទង្គិចគ្នានៃអន្តរសហគមន៍ បន្ថែមទៅលើសង្គ្រាមនៅភាគខាងលិចប្រទេសស៊ូដង់

មនុស្ស៧នាក់ស្លាប់ ក្នុងការបាញ់ប្រហារនៅរដ្ឋ Iowa ដែលជាប់ពាក់ព័ន្ធទៅនឹងជម្លោះ

មេដឹកនាំកោះ​តៃវ៉ាន់៖ ការរក្សាស្ថានភាពនយោបាយបច្ចុប្បន្ន​ គឺល្អបំផុត ដើម្បីធានាខ្សែច្រវាក់​ផ្គត់ផ្គង់

ចិនបញ្ជូនអ្នកជំនាញផ្នែកវេជ្ជសាស្ត្រទៅកុងហ្គោ ដើម្បីជួយប្រយុទ្ធប្រឆាំងនឹង​ការផ្ទុះឡើងនូវ​ជំងឺ Ebola

លោកស្រី Frederiksen ធានាបានតំណែង​នាយករដ្ឋមន្ត្រីដាណឺម៉ាកអាណត្តិទី៣

ចិនអំពាវនាវឲ្យ​គ្រប់​​ភាគី​អត់ធ្មត់ ក្រោយមាន​​ឧប្បត្តិហេតុយាន​ដ្រូន នៅរ៉ូម៉ានី

លោក Trump ចុះហត្ថលេខាលើសេចក្តីប្រកាសកែសម្រួលពន្ធ​ដែកថែប អាលុយមីញ៉ូម និងទង់ដែង

សមាជិកភាគច្រើន​នៃ​ក្រុមប្រឹក្សាសន្តិសុខ UN ថ្កោលទោសការ​បង្កើន​ប្រតិបត្តិការ​​របស់អ៊ីស្រាអែល នៅលីបង់

ចិន បង្កើនវិធានការទប់ស្កាត់គ្រោះមហន្តរាយ ខណៈរដូវទឹកជំនន់ចូលមកដល់

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

មេដឹកនាំកោះតៃវ៉ាន់៖ ការរក្សាស្ថានភាពនយោបាយបច្ចុប្បន្ន គឺល្អបំផុត ដើម្បីធានាខ្សែច្រវាក់ផ្គត់ផ្គង់

ចិនបញ្ជូនអ្នកជំនាញផ្នែកវេជ្ជសាស្ត្រទៅកុងហ្គោ ដើម្បីជួយប្រយុទ្ធប្រឆាំងនឹងការផ្ទុះឡើងនូវជំងឺ Ebola

លោកស្រី Frederiksen ធានាបានតំណែងនាយករដ្ឋមន្ត្រីដាណឺម៉ាកអាណត្តិទី៣

ចិនអំពាវនាវឲ្យគ្រប់ភាគីអត់ធ្មត់ ក្រោយមានឧប្បត្តិហេតុយានដ្រូន នៅរ៉ូម៉ានី

លោក Trump ចុះហត្ថលេខាលើសេចក្តីប្រកាសកែសម្រួលពន្ធដែកថែប អាលុយមីញ៉ូម និងទង់ដែង

សមាជិកភាគច្រើននៃក្រុមប្រឹក្សាសន្តិសុខ UN ថ្កោលទោសការបង្កើនប្រតិបត្តិការរបស់អ៊ីស្រាអែល នៅលីបង់