នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
មន្ត្រីអាមេរិក៖ អ៊ីស្រាអែល និងហេសបូឡា ព្រម​ព្រៀង​មាន​​បទ​ឈប់បាញ់ចាប់ពីថ្ងៃទី១៩ ខែមិថុនា
លោក Trump បញ្ជាក់​ថា សង្គ្រាមធ្វើឲ្យ​អ៊ីរ៉ង់ខ្សោយ និង​បដិសេធ​ការ​រិះគន់​របស់​ក្រុម​ប្រជាធិបតេយ្យ​
មនុស្ស ១៨នាក់ ត្រូវបានសម្លាប់ក្នុងការវាយប្រហាររបស់អ៊ីស្រាអែលនៅតំបន់ភាគខាងត្បូងលីបង់
ទីក្រុងតំបន់ភ្នំហេមពាន្តរបស់ឥណ្ឌា ប្រែក្លាយជាគំនរសំរាម ដោយសារភ្ញៀវទេសចរច្រើន

ព័ត៌មានអន្តរជាតិ

ភាគហ៊ុនសកល​​​គ្មានស្ថិរភាព​ ខណៈក្ដីបារម្ភនៅមជ្ឈិមបូព៌ា បានធ្វើឱ្យសុទិដ្ឋិនិយម AI ធ្លាក់ចុះ

2026/06/02 12:14:21 pm        41
Facebook Telegram Linkin
ភាគហ៊ុនអាស៊ីបានចាប់ផ្តើមការជួញដូរដោយប្រុងប្រយ័ត្ននៅថ្ងៃអង្គារ ២ មិថុនា​​នេះ​​ ខណៈភាពមិនច្បាស់លាស់​អំពីថាតើបទឈប់បាញ់នៅក្នុងជម្លោះមជ្ឈិមបូព៌ានឹងមានឬអត់ បានរារាំងការកើនឡើងនៃអារម្មណ៍ពីសុទិដ្ឋិនិយមឡើងវិញជុំវិញបញ្ញាសិប្បនិម្មិត​ (​AI)។​ សន្ទស្សន៍ទូលំទូលាយបំផុតរបស់ MSCI នៃភាគហ៊ុនអាស៊ីប៉ាស៊ីហ្វិក នៅខាងក្រៅប្រទេសជប៉ុន ​បានប្រែប្រួលរវាងប្រាក់ចំណេញ និងការខាតបង់ ខណៈការជួញដូរបានចាប់ផ្តើម ដោយ​​​ចុងក្រោយបានធ្លាក់ចុះ ០,៥ ភាគរយ ដែលដឹកនាំដោយការធ្លាក់ចុះ ២ ភាគរយសម្រាប់ភាគហ៊ុនកូរ៉េ បន្ទាប់ពីការបើកការជួញដូរ​ខ្ពស់នៅពេល​​​ដំបូង។ តម្លៃ​ភាគហ៊ុន​ S&P 500 បានធ្លាក់ចុះ០,៣ ភាគរយ ខណៈនៅប្រទេសជប៉ុន ភាគហ៊ុន​ក្រុមហ៊ុន​ Nikkei 225 បានធ្លាក់ចុះ០,៧ ភាគរយ។ ចំណែក​សន្ទស្ស​​ន៍​ភាគហ៊ុន​​​​អឺរ៉ុប​​​​វិញ​បានធ្លាក់ចុះ​កាលពីថ្ងៃចន្ទ​ ​ខណៈភាពតានតឹង​​​​នៅមជ្ឈិមបូព៌ា​​​បង្អាក់ក្ដីសង្ឃឹម​​​សម្រាប់ការបញ្ចប់ជម្លោះ​​​អាមេរិក​-អ៊ីរ៉ង់​។ ក្រុម​​​​​អ្នកវិភាគមកពីក្រុម​ហ៊ុន​ Westpac បានសរសេរនៅក្នុងកំណត់ចំណាំស្រាវជ្រាវមួយថា "ព័ត៌មានផ្ទុយគ្នាដែលចេញពីមជ្ឈិមបូព៌ាបានធ្វើឱ្យទីផ្សារមានការរង្គោះរង្គើ​​​​ ដោយអ៊ីរ៉ង់បាននិយាយថា ការចរចាជាមួយអាមេរិកត្រូវបានផ្អាក ប៉ុន្តែលោក​​ប្រធានាធិបតី Trump បាននិយាយ​ប៉ុន្មានម៉ោងថ្មីៗនេះ​ថា ការចរចាកំពុងបន្តក្នុងល្បឿនលឿន។ ប្រេងឆៅប្រភេទ Brent នៅតែមានស្ថិរភាពប្រហែល ៩៥ ដុល្លារអាមេរិកក្នុងមួយបារ៉ែល បន្ទាប់ពីប្រទេសលីបង់បានប្រកាសពីបទឈប់បាញ់ដោយ​​ផ្នែករវាងក្រុមហេសបូឡា និងអ៊ីស្រាអែលកាលពីថ្ងៃចន្ទ ដែលអាចបើកផ្លូវសម្រាប់កិច្ចខិតខំប្រឹងប្រែងឡើងវិញដើម្បីបញ្ចប់សង្គ្រាមរយៈពេលបីខែរវាងសហរដ្ឋអាមេរិក និងអ៊ីរ៉ង់៕

ក្រុមជ្វីហ្វជ្រុលនិយម ប៉ះទង្គិចជាមួយនគរបាលនៅទីក្រុងយេរូសាឡឹម ជុំវិញការកែណ្ឌកងទ័ព

2026/06/02 12:03:24 pm        51
Facebook Telegram Linkin
នគរបាលអ៊ីស្រាអែល បានប៉ះទង្គិចជាមួយក្រុមអ្នកតវ៉ានៅទីក្រុងយេរូសាឡឹម កាលពីថ្ងៃចន្ទ ទី១ ខែមិថុនា ដោយប្រើប្រាស់កាណុងបាញ់ទឹក និងអង្គភាពជិះសេះដើម្បីបំបែកក្រុមបាតុករដែលបានបិទផ្លូវប្រសព្វធំមួយកន្លែង។ ក្រុមបាតុករ បានអង្គុយនៅលើផ្លូវ រារាំងរថយន្ត និងកងកម្លាំងនគរបាលដើម្បីតវ៉ាប្រឆាំងទៅនឹងសម្ពាធឲ្យចូលបម្រើកងទ័ពនៅក្នុងយោធាអ៊ីស្រាអែល ចំពោះសហគមន៍និយមជ្រុល។ ការប៉ះទង្គិចគ្នា បានផ្ទុះឡើងនៅពេលដែលនគរបាលរុលចូល ដោយក្រុមបាតុករបានប្រឈមមុខជាមួយមន្ត្រីនគរបាល។ នគរបាលបានដាក់ពង្រាយកាណុងបាញ់ទឹកដោយបាញ់ទឹកមានក្លិនស្អុយ ទៅលើក្រុមបាតុករម្តងហើយម្តងទៀត។ អង្គភាពនគរបាលជិះសេះ ក៏ត្រូវបានដាក់ពង្រាយដោយធ្វើដំណើររួមជាមួយមន្ត្រីនគរបាលនៅលើដី ដើម្បីជួយបំបែកហ្វូងមនុស្ស។ ក្នុងករណីមួយចំនួន មន្ត្រីនគរបាលត្រូវបានគេឃើញនាំយកក្រុមបាតុករចេញពីផ្លូវ។ ការចូលបម្រើយោធា គឺជាកាតព្វកិច្ចដោយច្បាប់របស់អ៊ីស្រាអែល ប៉ុន្តែប្រជាជនជ្វីហ្វនិយមជ្រុល ភាគច្រើនត្រូវបានលើកលែងពីកាតព្វកិច្ចនេះ ខណៈសមាជិកសភាមានចរិកជ្រុលនិយមក្នុងក្រុមចម្រុះរបស់នាយករដ្ឋមន្ត្រី លោក Benjamin Netanyahu ទាមទារច្បាប់មួយដែលនឹងធ្វើឱ្យការលើកលែងនេះ ស្របច្បាប់។ ក្រុមចម្រុះស្តាំនិយមផ្សេងទៀតរបស់ លោក Netanyahu ព្រមទាំងគណបក្សប្រឆាំង អះអាងថាបុរសត្រូវតែមានបន្ទុកនៃការចូលបម្រើយោធា ជាពិសេសបន្ទាប់ពីការប្រយុទ្ធគ្នារយៈពេលពីរឆ្នាំនៅតំបន់ហ្កាហ្សា និងនៅលីបង់ ដែលទាហានអ៊ីស្រាអែលជិត ១.០០០នាក់ត្រូវបានសម្លាប់។ 

រ៉ូម៉ានី ថ្កោលទោសការវាយប្រហារដោយយានដ្រូនរបស់រុស្ស៊ីថាជាការគំរាមកំហែងដល់សន្តិសុខអឺរ៉ុប

2026/06/02 12:00:36 pm        36
Facebook Telegram Linkin
ប្រទេសរ៉ូម៉ានី បានចោទប្រកាន់រុស្ស៊ីនៅឯក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃចន្ទ ទី១ ខែមិថុនា អំពីការឈ្លានពានដោយយានដ្រូនមិនប្រុងប្រយ័ត្ន ដែលបានធ្លាក់ទៅលើអគារលំនៅឋានមួយកន្លែងក្នុងទីក្រុង Galati ដែលបានបណ្តាលឱ្យម្តាយនិងកូនម្នាក់រងរបួស និងបណ្តាលឱ្យខូចខាតដល់អគារយ៉ាងច្រើន។ រដ្ឋមន្ត្រីការបរទេស លោកស្រី Oana Toiu បាននិយាយថា ប្រទេសរ៉ូម៉ានី បានកត់ត្រាការឈ្លានពានបែបនេះជាង៣០លើកនៅឆ្នាំនេះ។ ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិ លោក Vassily Nebenzia បានច្រានចោលអ្វីដែលលោកហៅថាការចោទប្រកាន់គ្មានមូលដ្ឋាន និងបាននិយាយថា ទីក្រុងមូស្គូបានត្រៀមរួចរាល់ដើម្បីចូលរួមក្នុងការស៊ើបអង្កេត ប្រសិនបើកម្ទេចកម្ទី និងទិន្នន័យវត្ថុតាងត្រូវបានចែករំលែក។ ឯកអគ្គរដ្ឋទូតអ៊ុយក្រែនប្រចាំអង្គការសហប្រជាជាតិ លោក Andrii Melnyk បាននិយាយថា ការវាយប្រហារនេះបានបង្ហាញថា អឺរ៉ុបត្រូវតែជួយអ៊ុយក្រែនកសាងខែលការពារដែនអាកាសរួមគ្នាឱ្យកាន់តែរឹងមាំ និងស្ទាក់ចាប់យានដ្រូនរបស់រុស្ស៊ីនៅលើទឹកដីអ៊ុយក្រែន។ សហភាពអឺរ៉ុប និងសហរដ្ឋអាមេរិក បានថ្កោលទោសឧប្បត្តិហេតុនេះ ដោយទីក្រុងវ៉ាស៊ីនតោននិយាយថា ខ្លួននឹងការពារទឹកដីសម្ព័ន្ធយោធាណាតូ គ្រប់អ៊ីញទំាងអស់។

ការវាយប្រហាររបស់ក្រុមជាប់ទាក់ទងជាមួយរដ្ឋអ៊ីស្លាម បានសម្លាប់មនុស្សច្រើននាក់ នៅកុងហ្គោ

2026/06/02 11:56:37 am        100
Facebook Telegram Linkin
អ្នកស្រុក និងមេដឹកនាំសង្គមស៊ីវិលក្នុងតំបន់បាននិយាយថា ក្រុមឧទ្ទាមកងកម្លាំងប្រជាធិបតេយ្យសម្ព័ន្ធមិត្ត (ADF)ដែលសង្ស័យ បានសម្លាប់មនុស្សយ៉ាងហោចណាស់ ១៦ នាក់ ក្នុងការវាយប្រហារនៅជិតទីក្រុង Beni ភាគខាងកើតប្រទេសកុងហ្គោ បង្កឱ្យមានការតវ៉ាប្រឆាំងអាជ្ញាធរជុំវិញអសន្តិសុខជាប់ជាប្រចាំនៅក្នុងតំបន់។ ប្រជាធិបតេយ្យសម្ព័ន្ធមិត្ត (ADF) ជាក្រុមប្រដាប់អាវុធមានប្រភពនៅប្រទេសអ៊ូហ្គង់ដា បានស្បថភក្ដីភាពចំពោះរដ្ឋអ៊ីស្លាមក្នុងឆ្នាំ ២០១៩ ត្រូវបានដាក់កំហុសចំពោះការស្លាប់ជនស៊ីវិលរាប់ពាន់នាក់នៅទូទាំងខេត្ត North Kivu និងខេត្ត Ituri ទោះបីជាមានប្រតិបត្តិការយោធារយៈពេលជាច្រើនឆ្នាំដោយកងកម្លាំងកុងហ្គោ និងអ៊ូហ្គង់ដា ក៏ដោយ។ ក្រុមរដ្ឋអ៊ីស្លាម បានអះអាងទទួលខុសត្រូវចំពោះការវាយប្រហារ នៅក្នុងសេចក្តីថ្លែងការណ៍មួយដែលបានចេញផ្សាយដោយទីភ្នាក់ងារសារព័ត៌មាន Amaq។ អ្នកស្រុកក្នុងតំបន់និយាយថា ការវាយប្រហារមួយបានកើតឡើងកាលពីពេលយប់ថ្ងៃចុងសប្តាហ៍ ថ្ងៃទី ៣០-៣១ ខែឧសភា នៅសង្កាត់ Ngadi ជាសង្កាត់មួយនៅជាយក្រុង Beni ជាកន្លែងដែលអ្នកវាយប្រហារប្រើប្រាស់កាំបិត បានសម្លាប់សមាជិកសហគមន៍ Twa ចំនួន ៦ នាក់។ ការវាយប្រហារលើកទីពីរបានកើតឡើងប្រហែល១០គីឡូម៉ែត្រនៅដែនដី Beni ជាកន្លែងដែលសាកសពចំនួន៩ត្រូវបានរកឃើញ បន្ទាប់ពីអ្នកវាយប្រហារបានគេចខ្លួន នេះបើយោងតាមអ្នកតំណាងសង្គមស៊ីវិលក្នុងស្រុក។ ការសម្លាប់នេះ បានបង្កឱ្យមានកំហឹងក្នុងចំណោមអ្នកស្រុក។ អ្នកស្រុក និយាយថា «យើងទុកចិត្តកងទ័ព ព្រោះមានវត្តមាន ប៉ុន្តែយើងមានការភ្ញាក់ផ្អើលដែលបានឃើញអ្នកវាយប្រហារចូលទៅដល់ ហើយពុំមានសកម្មភាពណាមួយត្រូវបានធ្វើឡើងប្រឆាំងអ្នកវាយប្រហារឡើយ»។

នគរបាលប្រើកាណុងបាញ់ទឹក បំបែកក្រុមអ្នកតវ៉ាប្រឆាំងរដ្ឋាភិបាល នៅរដ្ឋធានីប្រទេសឈីលី

2026/06/02 11:53:16 am        25
Facebook Telegram Linkin
ក្រុមអ្នកតវ៉ា បានប្រមូលផ្តុំគ្នានៅទីក្រុង Santiago កាលពីថ្ងៃចន្ទ ទី១ ខែមិថុនា ដើម្បីតវ៉ាប្រឆាំងរដ្ឋាភិបាលរបស់លោកប្រធានាធិបតី Jose Antonio Kast ប៉ុន្មានម៉ោងបន្ទាប់ពីសុន្ទរកថាស្តីពីស្ថានភាពប្រទេសលើកដំបូងរបស់មេដឹកនាំ។ ការជួបជុំគ្នានេះ ត្រូវបានអំពាវនាវដោយអង្គការសង្គមជាច្រើន រួមទាំងក្រុមគាំទ្រស្ត្រី ក្រុមនិស្សិត និងក្រុមកម្មករ។ ក្រុមអ្នកតវ៉ា បានចេញធ្វើបាតុកម្មដោយស្រែកពាក្យស្លោកប្រឆាំងរដ្ឋាភិបាល និងកាន់រូបត្លុកចំអកធ្វើពីក្រដាសកាតុងដ៏ធំនៃរូបភាពប្រមុខរដ្ឋ។ កាណុងបាញ់ទឹក និងនគរបាល ត្រូវបានដាក់ពង្រាយក្នុងអំឡុងពេលបាតុកម្ម ដើម្បីបំបែកហ្វូងមនុស្ស។ ប្រធានាធិបតីស្តាំនិយមរបស់ប្រទេសឈីលី លោក Jose Antonio Kast ដែលបានចូលកាន់តំណែងក្នុងខែមីនា បានប្តេជ្ញាចំពោះរបៀបវារៈនីតិបញ្ញត្តិដែលផ្តល់អាទិភាពដល់ការប្រយុទ្ធប្រឆាំងឧក្រិដ្ឋកម្ម កាត់បន្ថយការចំណាយ និងជំរុញកំណើនសេដ្ឋកិច្ចនៅក្នុងសុន្ទរកថាជាតិលើកដំបូងរបស់លោកកាលពីថ្ងៃចន្ទ នៅពេលចាប់ផ្តើមប្រជុំសភា។ ប៉ុន្តែយោងតាមក្រុមអ្នកតវ៉ា រដ្ឋបាលរបស់លោក Kast កំពុងអនុវត្តគោលនយោបាយ ដែលរុះរើការថែទាំសុខភាពសាធារណៈ ការអប់រំ និងសិទ្ធិសង្គម។ ចាប់តាំងពីលោក Kast ចូលកាន់តំណែងក្នុងខែមីនា ការវាយតម្លៃការពីប្រជាប្រីយភាពរបស់លោក បានធ្លាក់ចុះពី៥៧% មកត្រឹម៣៨% នេះបើយោងតាមក្រុមហ៊ុនស្ទង់មតិ Cadem។

លោកTrump ៖ កិច្ចព្រមព្រៀងជាមួយអ៊ីរ៉ង់អាចនឹងឈានដល់ «ក្នុងពេលមួយសប្តាហ៍ទៀត»

2026/06/02 11:51:29 am        46
Facebook Telegram Linkin
ប្រធានាធិបតីសហរដ្ឋអាមេរិក លោក Donald Trump បាននិយាយកាលពីថ្ងៃចន្ទថា លោកជឿជាក់ថា សហរដ្ឋអាមេរិកនឹងមានកិច្ចព្រមព្រៀងជាមួយអ៊ីរ៉ង់ក្នុងការបន្ថែមពេលបទឈប់បាញ់ និងបើកឡើងវិញច្រកសមុទ្រ Hormuz «ក្នុងពេលមួយសប្តាហ៍ទៀត»។ នៅពេលត្រូវបានសួរថា តើពេលណាអនុស្សរណៈនៃការយោគយល់ដែលភាគីទាំងពីរកំពុងចរចានឹងត្រូវបានបញ្ចប់និងព្រមព្រៀង នោះលោកTrump បានប្រាប់សារព័ត៌មាន ABC News ថា «ខ្ញុំគិតថា អ្នកនឹងនិយាយថា ក្នុងពេលមួយសប្តាហ៍ទៀត»។ លោក Trump និយាយថា លោកពុំទាន់ព្រមព្រៀងនៅឡើយទេ ព្រោះលោកត្រូវតែ «ទទួលបានចំណុចមួយចំនួនទៀត» ហើយកិច្ចព្រមព្រៀងសន្តិភាពជាមួយអ៊ីរ៉ង់អាច «ប្រសើរជាងជ័យជម្នះយោធា»។ លោក Trump បាននិយាយថា «ដូច្នេះ វាពុំមែនជារឿងងាយស្រួលសម្រាប់ពួកគេទេ។ តាមពិតទៅ វាមិនងាយស្រួលទេពីជំហររបស់យើង។ ប៉ុន្តែយើងនឹងទទួលបានអ្វីដែលយើងត្រូវការ»។ កាលពីថ្ងៃចន្ទ លោក Trump បាននិយាយនៅលើ បណ្តាញ Truth Social របស់លោកថា ការចរចារវាងសហរដ្ឋអាមេរិក និងអ៊ីរ៉ង់ «កំពុងបន្តក្នុងល្បឿនលឿន» បន្ទាប់ពីការប្រកាសរបស់លោកថា អ៊ីស្រាអែល និងក្រុមហេសបូឡា បានព្រមព្រៀងបញ្ឈប់ការបាញ់ប្រហារ។

ក្រុមហេសបូឡា និយាយពីការវាយប្រហារលើកងកម្លាំងអ៊ីស្រាអែលនៅខាងត្បូងលីបង់ និងខាងជើងអ៊ីស្រាអែល

2026/06/02 11:49:45 am        48
Facebook Telegram Linkin
ក្រុមហេសបូឡានិយាយថា ខ្លួនបានបើកការវាយប្រហារជាបន្តបន្ទាប់លើទីតាំងយោធាអ៊ីស្រាអែល ដោយកំណត់គោលដៅទៅលើការជួបជុំកងទ័ព ទីតាំងប្រព័ន្ធការពារដែនអាកាសIron Dome និងទីតាំងមូលដ្ឋាននៅភាគខាងជើង កាលពីថ្ងៃចន្ទ។ យោងតាមសេចក្តីថ្លែងការណ៍ បាននិយាយលម្អិតអំពីការវាយប្រហារចំនួន ៤១ លើកពេញមួយថ្ងៃ ដែលក្រុមនេះបាននិយាយថា ខ្លួនបានអនុវត្តប្រតិបត្តិការយោធាក្នុងការឆ្លើយតបទៅនឹងការរំលោភបំពានលើកិច្ចព្រមព្រៀងបទឈប់បាញ់របស់អ៊ីស្រាអែល និងការវាយប្រហារដែលនៅតែបន្តលើជនស៊ីវិលនៅភាគខាងត្បូងប្រទេសលីបង់។ ការវាយប្រហារទាំងនោះ រួមមានការបាញ់ស្រោចរ៉ុក្កែត និងការវាយប្រហារដោយយានដ្រូនដាក់គោលដៅទៅលើកងកម្លាំងអ៊ីស្រាអែលឈរជើងតាមបណ្តោយព្រំដែនភាគខាងត្បូងប្រទេសលីបង់ និងនៅភាគខាងជើងប្រទេសអ៊ីស្រាអែល។ ក្រុមហេសបូឡានិយាយថា ការបាញ់ស្រោចនេះ បានកំណត់គោលដៅទៅលើការជួបជុំកងទ័ពនៅក្នុងទីតាំងមូលដ្ឋាន និងមូលដ្ឋានត្រួតពិនិត្យដែនអាកាសរបស់អ៊ីស្រាអែល ខណៈយានដ្រូនបំពាក់គ្រឿងផ្ទុះ បានវាយប្រហារទីតាំងជើងទម្របាញ់មីស៊ីល Iron Dome។ ក្រុមនេះនិយាយថា នៅក្នុងភូមិព្រំដែនភាគខាងត្បូងប្រទេសលីបង់ ការប៉ះទង្គិចគ្នាយ៉ាងខ្លាំង និងប្រតិបត្តិការវាយឆ្មក់ បានធ្វើឡើងប្រឆាំងកងកម្លាំងឈ្លានពានរបស់អ៊ីស្រាអែលដែលកំពុងរុលចូល រួមទាំងប្រឆាំងការជួបជុំយោធា និងយានយន្តរបស់អ៊ីស្រាអែលនៅក្នុងតំបន់ជាច្រើន និងនៅជិតប្រាសាទ Beaufort ។

ព្យុះត្រូពិក Jangmi បណ្ដាលឲ្យមនុស្ស ៩ នាក់របួស និងរាប់ពាន់នាក់គ្មានអគ្គិសនីប្រើប្រាស់នៅជប៉ុន

2026/06/02 11:47:53 am        36
Facebook Telegram Linkin
ព្យុះត្រូពិកដ៏មានឥទ្ធិពលមួយបានវាយប្រហារភាគនិរតីនៃប្រទេសជប៉ុននៅថ្ងៃអង្គារ ទី ២មិថុនា នេះ ដោយបានបំផ្លាញបណ្ដាញផ្គត់ផ្គង់ថាមពលអគ្គិសនីដល់ផ្ទះរាប់ម៉ឺនខ្នង ជើងហោះហើររាប់រយ ត្រូវបានផ្អាក និងមនុស្ស ៩ នាក់រងរបួស។ ទីភ្នាក់ងារឧតុនិយមជប៉ុនបានព្រមានអំពីរលកខ្ពស់ៗ បំណាក់ដី និងទឹកជំនន់ ខណៈព្យុះ Jangmi ដែលត្រូវបានបន្ទាបកម្រិតពីព្យុះទីហ្វុង បានបោកបក់ឆ្ពោះទៅទិសខាងជើងបន្ទាប់ពីបានបោកបក់លើកោះអូគីណាវ៉ា ជាកម្រិតព្យុះត្រូពិកកាលពីថ្ងៃចន្ទដើមសប្ដាហ៍នេះ។ មនុស្សជាង ៣០.០០០ គ្រួសារនៅក្នុងតំបន់ Kagoshima ភាគនិរតីនៃប្រទេសជប៉ុន និង ១៧.០០០ គ្រួសារទៀតនៅកោះអូគីណាវ៉ា គ្មានអគ្គិសនីប្រើប្រាស់នៅព្រឹកថ្ងៃអង្គារនេះ។ អ្នកនាំពាក្យរដ្ឋាភិបាលលោក Minoru Kihara បាននិយាយថា ព្យុះ Jangmi ក៏បានបង្ករបួសដល់មនុស្ស ៩ នាក់នៅកោះអូគីណាវ៉ាផងដែរ។ ទូរទស្សន៍រដ្ឋ NHK បានរាយការណ៍ថា របួសត្រូវបានបង្កឡើងដោយព្យុះ Jangmi ដែលបក់កួចនាំយករបស់ផ្សេងៗទៅបុកនឹងរថយន្ត និងខ្យល់បក់ខ្លាំងបណ្តាលឱ្យមនុស្សដួល។ លោក Kihara បានព្រមានថា ការដឹកជញ្ជូនសាធារណៈនៅទីក្រុងតូក្យូ និងទីក្រុងក្បែរៗ អាចប្រឈម នឹងការរំខាននៅថ្ងៃពុធនេះ ខណៈព្យុះនេះខិតជិតមកដល់៕

លោក Putin ថា អ៊ុយក្រែនជាអ្នកបើកទំព័រថ្មីដោយវាយប្រហារលើតំបន់ Luhansk និងKherson

2026/06/02 11:42:23 am        62
Facebook Telegram Linkin
ប្រធានាធិបតីរុស្ស៊ី លោក Vladimir Putin បាននិយាយកាលពីថ្ងៃចន្ទ ១ មិថុនាសប្ដាហ៍នេះថា អ៊ុយក្រែនបាន «បើកទំព័រថ្មីមួយនៅក្នុងឧក្រិដ្ឋកម្មជាបន្តបន្ទាប់» ដោយការវាយប្រហាររបស់ខ្លួនលើអន្តេវាសិកដ្ឋានមួយនៅភាគឦសាននៃតំបន់ Luhansk និងលើអគារអឹផាតមិនមួយនៅក្នុងតំបន់ដែលកាន់កាប់ដោយរុស្ស៊ីនៃតំបន់ Kherson ភាគខាងត្បូង របស់អ៊ុយក្រែន។ ទីភ្នាក់ងារសារព័ត៌មានរុស្ស៊ីបានដកស្រង់សម្តីរបស់លោក Putin ខណៈបានប្រាប់កិច្ចប្រជុំមួយដែលរម្លឹកដល់ការវាយប្រហារលើអន្តេវាសិកដ្ឋាននៅមជ្ឈមណ្ឌលរដ្ឋបាល Starobilsk ថា ដោយចេតនាប្រព្រឹត្តបទឧក្រិដ្ឋធ្ងន់ធ្ងរបំផុតប្រឆាំងនឹងកុមារ និងក្មេងជំទង់នៅវិទ្យាស្ថានអប់រំមួយនៅ តំបន់Starobilsk ហើយឥឡូវនេះនៅទីក្រុង Henichesk មេដឹកនាំទីក្រុងគីវ បានសម្រេចចិត្តបើកទំព័រថ្មីមួយនៅក្នុងឧក្រិដ្ឋកម្មជាបន្តបន្ទាប់របស់ពួកគេ។ ការវាយប្រហារដោយយានដ្រូននៅក្នុងមជ្ឈមណ្ឌលរដ្ឋបាល Starobilsk ដែលកាន់កាប់ដោយរុស្ស៊ីបានសម្លាប់មនុស្ស២១ នាក់កាលពីចុងខែឧសភា ខណៈការវាយប្រហារដោយយានដ្រូនមួយលើអគារអឹផាតមិនមួយនៅក្នុងទីក្រុង Henichesk កាន់កាប់ដោយរុស្ស៊ីកាលពីថ្ងៃអាទិត្យបានសម្លាប់កុមារម្នាក់ និង១១នាក់រងរបួស។ លោក Putin បានចោទប្រកាន់អ៊ុយក្រែនថាបានប្រព្រឹត្តបទឧក្រិដ្ឋធ្ងន់ធ្ងរ ជាពិសេសកំណត់គោលដៅតំបន់នានានៅ Luhansk និង Kherson៕

លោក Trump ផ្ទុះកំហឹងលើមេដឹកនាំអ៊ីស្រាអែល ជុំវិញសកម្មភាពយោធានៅលីបង់ដែលប៉ះពាល់ការចរចាជាមួយអ៊ីរ៉ង់

2026/06/02 09:49:49 am        71
Facebook Telegram Linkin
ប្រធានាធិបតីអាមេរិក លោក Donald Trump ត្រូវបានគេរាយការណ៍ថាបានផ្ទុះកំហឹង សូម្បីតែប្រើពាក្យអសុរោះក៏ដោយ ក្នុងអំឡុងពេលសន្ទនាតាមទូរស័ព្ទជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu។ ប្រតិកម្មនេះកើតចេញពីការព្រួយបារម្ភថា សកម្មភាពយោធារបស់អ៊ីស្រាអែលដែលកំណត់គោលដៅលើក្រុមហេសបូឡាជាក្រុមប្រដាប់អាវុធគាំទ្រដោយអ៊ីរ៉ង់នៅក្នុងប្រទេសលីបង់ អាចធ្វើឱ្យការចរចារវាងសហរដ្ឋអាមេរិក និងអ៊ីរ៉ង់មិនមានស្ថិរភាព។ ក្រុមអ្នកវិភាគបានលើកឡើងថា នេះបង្ហាញពីការបែកបាក់ អាចមើលឃើញរវាងមេដឹកនាំទាំងពីរ ដែលកន្លងមកបានបង្ហាញពីសម្ព័ន្ធភាពមិនអាចបំបែកបាន។ សារព័ត៌មានអនឡាញរបស់សហរដ្ឋអាមេរិក Axios បានដកស្រង់សម្តីមន្ត្រីអាមេរិកជាច្រើននាក់កាលពីថ្ងៃទី១មិថុនាសប្ដាហ៍នេះ ដោយរាយការណ៍ថា លោក Trump បានរិះគន់យ៉ាងខ្លាំងចំពោះលោក Netanyahu ក្នុងអំឡុងការហៅទូរស័ព្ទមួយកាលពីថ្ងៃទី២៨ ខែឧសភា ថ្មីៗនេះ ដោយសួរថា "តើអ្នកកំពុងធ្វើផ្ដេសផ្ដាសអ្វី?" ។ ការហៅទូរស័ព្ទនេះត្រូវបានគេរាយការណ៍ថាបានកើតឡើងបន្ទាប់ពីការបង្កើនប្រតិបត្តិការយោធារបស់អ៊ីស្រាអែលនៅលីបង់។ អ៊ីរ៉ង់ធ្លាប់បានថ្កោលទោសការវាយប្រហាររបស់អ៊ីស្រាអែលនៅលីបង់ថាជាការរំលោភលើកិច្ចព្រមព្រៀងឈប់បាញ់ ហើយបានព្រមានអំពីការបញ្ឈប់ការចរចាជាមួយសហរដ្ឋអាមេរិក។ យោងតាមសារព័ត៌មាន Axios ដដែល លោក Trump ត្រូវបានគេរាយការណ៍ថាបានប្រាប់មេដឹកនាំអ៊ីស្រាអែលរូបនេះថា "អ្នកផ្ដេសផ្ដាសពេកហើយ" ហើយបានបន្ថែមថា "អ្នកនឹងត្រូវជាប់ពន្ធនាគារមិនខានបើគ្មានរូបលោកជួយទេនោះ"។សម្ដីនេះត្រូវបានបកស្រាយថាជាការសំដៅទៅលើការគាំទ្រនយោបាយពីមុនរបស់លោក Trump ចំពោះលោក Netanyahu ដែលកំពុងត្រូវបានកាត់ទោសពីបទពុករលួយ។ មន្ត្រីអាមេរិកមួយរូបបានប្រាប់សារព័ត៌មាន Axios ថាលោក Trump បាននិយាយថា "ខ្ញុំកំពុងជួយសង្គ្រោះអ្នក ប៉ុន្តែឥឡូវនេះមនុស្សគ្រប់គ្នាស្អប់អ៊ីស្រាអែល"។ ប្រភពមួយទៀតបានអះអាងថាលោក Trump បានស្រែកថា "តើអ្នកកំពុងធ្វើអ្វី?" ក្នុងអំឡុងពេលហៅទូរស័ព្ទ។ ប្រតិកម្មកាន់តែខ្លាំងរបស់លោក Trump បានឆ្លុះបញ្ចាំងពីការព្រួយបារម្ភថាសកម្មភាពយោធារបស់អ៊ីស្រាអែលអាចធ្វើឱ្យការចរចារវាងសហរដ្ឋអាមេរិក និងអ៊ីរ៉ង់រអាក់រអួល។ ប្រព័ន្ធផ្សព្វផ្សាយអ៊ីរ៉ង់ Tasnim News ក៏បានរាយការណ៍ផងដែរថាអ៊ីរ៉ង់បានផ្អាកការផ្លាស់ប្តូរសារជាមួយមន្ត្រីអាមេរិក៕

បណ្ដាញសង្គម

ព័ត៌មានថ្មីៗ

គិតត្រឹមត្រីមាសទី១ គ្រឹះស្ថានមីក្រូហិរញ្ញវត្ថុបានបញ្ចេញឥណទានមានទឹកប្រាក់ ៥,៤ ពាន់លានដុល្លារ
06/19/2026 09:06 PM
Facebook Telegram Linkin
មន្ត្រីអាមេរិក៖ អ៊ីស្រាអែល និងហេសបូឡា ព្រម​ព្រៀង​មាន​​បទ​ឈប់បាញ់ចាប់ពីថ្ងៃទី១៩ ខែមិថុនា
06/19/2026 08:06 PM
Facebook Telegram Linkin
លោក Trump បញ្ជាក់​ថា សង្គ្រាមធ្វើឲ្យ​អ៊ីរ៉ង់ខ្សោយ និង​បដិសេធ​ការ​រិះគន់​របស់​ក្រុម​ប្រជាធិបតេយ្យ​
06/19/2026 08:06 PM
Facebook Telegram Linkin
មនុស្ស ១៨នាក់ ត្រូវបានសម្លាប់ក្នុងការវាយប្រហាររបស់អ៊ីស្រាអែលនៅតំបន់ភាគខាងត្បូងលីបង់
06/19/2026 08:06 PM
Facebook Telegram Linkin
ទីក្រុងតំបន់ភ្នំហេមពាន្តរបស់ឥណ្ឌា ប្រែក្លាយជាគំនរសំរាម ដោយសារភ្ញៀវទេសចរច្រើន
06/19/2026 08:06 PM
Facebook Telegram Linkin
ទីភ្នាក់ងារទេសចរណ៍ចិនចាប់​ផ្ដើម​ដំណើរកម្សាន្តជាក្រុមទៅ​ជប៉ុនឡើងវិញ តែ​ខ្លះបញ្ឈប់ការលក់ក្រោយ​មក​
06/19/2026 08:06 PM
Facebook Telegram Linkin
លីបង់ថ្កោលទោសការវាយប្រហារចុងក្រោយរបស់អ៊ីស្រាអែល និងជំរុញឲ្យ​មាន «បទឈប់បាញ់គ្រប់ជ្រុងជ្រោយ​»
06/19/2026 08:06 PM
Facebook Telegram Linkin
ការបំផ្ទុះគ្រាប់បែក ២ផ្សេងគ្នា បណ្តាលឲ្យ​នគរបាល​រងរបួស ក្នុងខេត្ត Yala និង​ Pattani របស់​​ថៃ
06/19/2026 08:06 PM
Facebook Telegram Linkin
ទីភ្នាក់ងារតាមដាន៖ ការឆ្លងកាត់របស់​នាវា នៅ​ចក្រសមុទ្រ​ Hormuz កើនឡើង ក្រោយ​មាន​កិច្ចព្រមព្រៀង
06/19/2026 07:06 PM
Facebook Telegram Linkin
ពលរដ្ឋអ៊ីស្រាអែលរស់នៅតំបន់ព្រំដែន ព្រួយបារម្ភពីកិច្ចព្រមព្រៀងសន្តិភាពរវាងអាមេរិក និងអ៊ីរ៉ង់
06/19/2026 07:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.