នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
មន្ត្រីអាមេរិក៖ អ៊ីស្រាអែល និងហេសបូឡា ព្រម​ព្រៀង​មាន​​បទ​ឈប់បាញ់ចាប់ពីថ្ងៃទី១៩ ខែមិថុនា
លោក Trump បញ្ជាក់​ថា សង្គ្រាមធ្វើឲ្យ​អ៊ីរ៉ង់ខ្សោយ និង​បដិសេធ​ការ​រិះគន់​របស់​ក្រុម​ប្រជាធិបតេយ្យ​
មនុស្ស ១៨នាក់ ត្រូវបានសម្លាប់ក្នុងការវាយប្រហាររបស់អ៊ីស្រាអែលនៅតំបន់ភាគខាងត្បូងលីបង់
ទីក្រុងតំបន់ភ្នំហេមពាន្តរបស់ឥណ្ឌា ប្រែក្លាយជាគំនរសំរាម ដោយសារភ្ញៀវទេសចរច្រើន

ព័ត៌មានអន្តរជាតិ

អ៊ីរ៉ង់ ព្រមានថា ការវាយប្រហាររបស់អ៊ីស្រាអែលនៅលីបង់ និងហ្កាហ្សា គំរាមដល់កិច្ចចរចាបទឈប់បាញ់របស់អាមេរិក

2026/06/02 09:46:37 am        87
Facebook Telegram Linkin
មន្ត្រីអ៊ីរ៉ង់បានព្រមានថា ការវាយប្រហារកាន់តែខ្លាំងរបស់អ៊ីស្រាអែលលើប្រទេសលីបង់ និងអរិភាពដែលកំពុងបន្តនៅតំបន់ហ្កាហ្សា គំរាមកំហែងបង្អាក់ដល់ការចរចាបទឈប់បាញ់ជាមួយសហរដ្ឋអាមេរិក ដែលបន្តអូសបន្លាយពេល។ រដ្ឋមន្ត្រីការបរទេស លោក Abbas Araghchi បានលើកឡើងកាលពីថ្ងៃចន្ទថា ការឈ្លានពានកាន់តែខ្លាំង របស់អ៊ីស្រាអែលលើប្រទេសលីបង់ និងការវាយប្រហាររបស់ខ្លួនលើប្រទេសនេះ រួមជាមួយការហ៊ុមព័ទ្ធកំពង់ផែអ៊ីរ៉ង់ដែលនៅបន្តរបស់សហរដ្ឋអាមេរិក គឺជាការរំលោភបំពានលើបទឈប់បាញ់។ លោក Araghchi បាននិយាយនៅក្នុងសារលើបណ្តាញផ្សព្វផ្សាយសង្គមថា «បទឈប់បាញ់ រវាងអ៊ីរ៉ង់ និងសហរដ្ឋអាមេរិក គឺជាបទឈប់បាញ់យ៉ាងច្បាស់លាស់នៅគ្រប់ផ្នែក រួមទាំងនៅប្រទេសលីបង់ផងដែរ»។ ការរំលោភបំពានលើផ្នែកណាមួយ គឺជាការរំលោភបទឈប់បាញ់នៅគ្រប់ផ្នែកទាំងអស់ ហើយសហរដ្ឋអាមេរិក និងអ៊ីស្រាអែល ត្រូវទទួលខុសត្រូវចំពោះផលវិបាកនៃការរំលោភបំពានណាមួយ។ ប្រធានអ្នកចរចា និងជាប្រធានសភាអ៊ីរ៉ង់ លោក Mohammad Bagher Ghalibaf បានលើកឡើងពីចំណុចដូចគ្នានេះ។ លោកបានសរសេរនៅលើបណ្តាញផ្សព្វផ្សាយសង្គមថា «ការបិទផ្លូវទឹករបស់កងទ័ពជើងទឹក និងការកើនឡើងឧក្រិដ្ឋកម្មសង្គ្រាមនៅលីបង់ គឺជាភស្តុតាងច្បាស់លាស់នៃការមិនគោរពតាមបទឈប់បាញ់របស់សហរដ្ឋអាមេរិក»។ ប្រធានាធិបតីសហរដ្ឋអាមេរិក លោក ដូណាល់ ត្រាំ បានលើកឡើងថា លោកបានធ្វើអន្តរាគមន៍ដើម្បីបន្ធូរបន្ថយភាពតានតឹង ដោយបានបង្ហោះសារកាលពីរសៀលថ្ងៃចន្ទថា លោកបានទទួលការធានាថា កងទ័ពអ៊ីស្រាអែល នឹងមិនបន្តការរុលចូលទៅមុខរបស់ពួកគេឡើយ។

ប្រមុខUN៖ សំខាន់ណាស់ក្នុងការរក្សាទុកកងកម្លាំងUN នៅលីបង់ ក្រោយកងកម្លាំងរក្សាសន្តិភាពបច្ចុប្បន្នផុតអាណត្តិ

2026/06/02 09:23:04 am        136
Facebook Telegram Linkin
ប្រមុខអង្គការសហប្រជាជាតិ លោក Antonio Guterres បាននិយាយកាលពីថ្ងៃចន្ទ ទី១ ខែមិថុនា ថា វា ចាំបាច់ត្រូវរក្សាទុកកងកម្លាំងរក្សាសន្តិភាពនៅក្នុងប្រទេសលីបង់ បន្ទាប់ពីអាណត្តិនៃបេសកកម្មបច្ចុប្បន្ន ផុតកំណត់នៅចុងឆ្នាំ។ នៅក្នុងរបាយការណ៍មួយទៅកាន់ក្រុមប្រឹក្សាសន្តិសុខដែលសារព័ត៌មាន AFP បានឃើញ លោក Guterres បានស្នើជម្រើសសម្រាប់បុគ្គលិកអង្គការសហប្រជាជាតិ មានចាប់ពីជិត២.០០០នាក់ ដល់ជាង៥.៥០០នាក់ ដើម្បីនៅត្រួតពិនិត្យបទឈប់បាញ់ និងគាំទ្រដល់កងកម្លាំងប្រដាប់អាវុធលីបង់។ របាយការណ៍បាននិយាយថា «ក្រោមជម្រើសទាំងអស់ដែលបានស្នើឡើង វត្តមានរបស់អង្គការសហប្រជាជាតិ នឹងធ្វើការដើម្បីសម្រួលដល់ការបន្ធូរបន្ថយភាពតានតឹង ការសន្ទនា ទំនាក់ទំនង ការសម្របសម្រួល និងគាំទ្រដល់កងកម្លាំងប្រដាប់អាវុធលីបង់ ដែលនឹងចាំបាច់ឈានឆ្ពោះទៅរកគោលបំណងរួមនៃដំណោះស្រាយរយៈពេលវែងចំពោះជម្លោះ»។ ការព្រួយបារម្ភអំពីការចាកចេញនៃកងកម្លាំងបណ្តោះអាសន្នរបស់អង្គការសហប្រជាជាតិនៅក្នុងប្រទេសលីបង់ (UNIFIL) កើតឡើងក្នុងពេលកងទ័ពអ៊ីស្រាអែលកំពុងកាន់កាប់នៅតំបន់ព្រំដែនភាគខាងត្បូងប្រទេសលីបង់ និងខណៈអ៊ីស្រាអែលនិងលីបង់ ធ្វើការចរចាដោយផ្ទាល់ដើម្បីស្វែងរកការបញ្ចប់អរិភាពរាប់ទសវត្សរ៍។ បច្ចុប្បន្នអង្គការសហប្រជាជាតិនៅក្នុងប្រទេសលីបង់ (UNIFIL) មានកងកម្លាំងរក្សាសន្តិភាពប្រហែល៧.៥០០នាក់ មកពីជិត៥០ប្រទេស។ ពួកគេត្រូវបានដាក់ពង្រាយនៅភាគខាងត្បូងប្រទេសលីបង់ ជិតខ្សែបន្ទាត់ពណ៌ខៀវ ជាព្រំដែនជាក់ស្តែងមានប្រវែង១២០គីឡូម៉ែត្ររវាងលីបង់ និងអ៊ីស្រាអែល ជាកន្លែងដែលកងកម្លាំងបច្ចុប្បន្នស្ថិតនៅចំកណ្តាលនៃសង្គ្រាមរវាងអ៊ីស្រាអែល និងក្រុមហេសបូឡា។

លីបង់ ប្រកាសបទឈប់បាញ់ដោយផ្នែករវាងអ៊ីស្រាអែលនិងក្រុមហេសបូឡា ប៉ុន្តែការវាយប្រហារនៅតែបន្ត

2026/06/02 09:19:48 am        75
Facebook Telegram Linkin
ប្រទេសលីបង់ បានប្រកាសបទឈប់បាញ់ដោយផ្នែករវាងក្រុមហេសបូឡា និងអ៊ីស្រាអែល កាលពីថ្ងៃចន្ទ ជាលទ្ធផលចុងក្រោយត្រូវបានរំពឹងទុកចំពោះការថយចុះជម្លោះដែលបានសម្លាប់មនុស្សរាប់ពាន់នាក់ និងបង្កឱ្យមានសង្គ្រាមកាន់តែធំរបស់សហរដ្ឋអាមេរិក និងអ៊ីស្រាអែល ជាមួយអ៊ីរ៉ង់។ ស្ថានទូតលីបង់នៅក្នុងទីក្រុងវ៉ាស៊ីនតោន បានឲ្យដឹងថា កិច្ចព្រមព្រៀងនេះ នឹងមិនបញ្ចប់ជម្លោះនៅក្នុងប្រទេសនេះទេ។ ប៉ុន្តែវាអំពាវនាវឱ្យអ៊ីស្រាអែលបញ្ចៀសការវាយប្រហារលើទីក្រុងបេរូត និងតំបន់ជាយក្រុងដែលគ្រប់គ្រងដោយក្រុមហេសបូឡា ខណៈក្រុមសម្ព័ន្ធមិត្តអ៊ីរ៉ង់នឹងបញ្ឈប់ការវាយប្រហាររបស់ខ្លួនលើអ៊ីស្រាអែល។ អរិភាពនៅភាគខាងត្បូងប្រទេសលីបង់ ដែលអ៊ីស្រាអែលបានឈ្លានពានកាលពីខែមីនា បានបន្តកាលពីល្ងាចថ្ងៃចន្ទ ហើយនៅព្រឹកថ្ងៃអង្គារនេះ យោធាអ៊ីស្រាអែលបាននិយាយថា ខ្លួនបានស្ទាក់ចាប់គ្រាប់ផ្លោងពីរគ្រាប់ដែលឆ្លងកាត់ពីប្រទេសលីបង់ចូលទៅភាគខាងជើងអ៊ីស្រាអែល ប៉ុន្តែពុំមានរបាយការណ៍អំពីអ្នករងរបួសនោះទេ។ ប្រធានាធិបតីសហរដ្ឋអាមេរិក លោក ដូណាល់ ត្រាំ ដែលបានប្រកាសកិច្ចព្រមព្រៀងជាលើកដំបូងបាននិយាយថា ក្រុមហេសបូឡា តាមរយៈអន្តរការី បានប្តេជ្ញាថានឹងមិនវាយប្រហារអ៊ីស្រាអែលទេ។ លោក Trump ក៏បាននិយាយផងដែរថា នាយករដ្ឋមន្ត្រីអ៊ីស្រាអែល លោក Benjamin Netanyahu បាន ព្រមព្រៀងដកកងកងទ័ពណាមួយដែលត្រៀមវាយប្រហារលើទីក្រុងបេរូត។ បន្ទាប់ពីការប្រកាសរបស់លោកTrump លោកNetanyahu បាននិយាយថា អ៊ីស្រាអែលនឹងបន្តប្រតិបត្តិការយោធានៅភាគខាងត្បូងប្រទេសលីបង់ ជាកន្លែងដែលកងកម្លាំងជើងគោកកំពុងរុលចូលទៅកាន់ទន្លេ Zaharani ជាការឈ្លានពានចូលជ្រៅបំផុតរបស់អ៊ីស្រាអែលទៅក្នុងប្រទេសលីបង់ ក្នុងរយៈពេល២៥ឆ្នាំកន្លងទៅនេះ។ លោក Hassan Fadlallah សមាជិកសភារបស់ក្រុមហេសបូឡា បាននិយាយថា កងជីវពលនឹងគាំទ្របទឈប់បាញ់ពេញលេញនៅទូទាំងប្រទេសលីបង់ ជាជំហានដំបូងនៃការដកកងទ័ពអ៊ីស្រាអែល។

មនុស្ស៤នាក់ស្លាប់ និងមួយចំនួនរងរបួសបន្ទាប់ពីការវាយប្រហារដ៏ធំរបស់រុស្ស៊ីទូទាំងអ៊ុយក្រែន

2026/06/02 09:00:48 am        74
Facebook Telegram Linkin
មនុស្សយ៉ាងហោចណាស់៤នាក់ស្លាប់ និងមួយចំនួនបានរងរបួសនៅអ៊ុយក្រែន បន្ទាប់ពីរុស្ស៊ីបើកការវាយប្រហារដ៏ខ្លាំងក្លាទាំងយប់រំលងអធ្រាត្រ។រុស្ស៊ីបានបើកការវាយប្រហារទូទាំងអ៊ុយក្រែន រួមមាននៅទីក្រុង Dnipro ទីក្រុង Kharkiv និងរដ្ឋធានី Kyiv។ ក្រុមអ្នកមើលឃើញហេតុការណ៍ និងក្រុមមន្ត្រី បាននិយាយថា ការវាយប្រហារដ៏ខ្លាំងក្លាមួយរបស់រុស្ស៊ីបានកំណត់គោលដៅរដ្ឋធានីគីវ នៅព្រឹកថ្ងៃអង្គារ២មិថុនានេះ ដោយមានមនុស្សយ៉ាងហោចណាស់បួននាក់បានរងរបួស និងអគារអឹផាតមិនមួយនៅក្នុងរដ្ឋធានីអ៊ុយក្រែន ត្រូវបានខូចខាតយ៉ាងធ្ងន់ធ្ងរ ។ លោក Vitali Klitschko អភិបាលក្រុងគីវបាននិយាយថា ការវាយប្រហារដោយមីស៊ីលដែលសង្ស័យថាជាការវាយប្រហារលើអគារអឹផាតមិនកម្ពស់ ២៤ ជាន់បានបណ្តាលឱ្យមានការដួលរលំ ហើយមនុស្សអាចជាប់នៅក្រោមគំនរបាក់បែក។ លោកបានបន្ថែមថា យោងតាមរបាយការណ៍បឋមមនុស្សបួននាក់បានរងរបួស ។ អភិបាលក្រុងរូបនេះ បាននិយាយថា អគ្គិភ័យមួយបានផ្ទុះឡើងនៅក្នុងស្រុក Podil នៅលើបរិវេណនៃអចលនទ្រព្យមិនមែនលំនៅឋាន ហើយអគារអឹផាតមិនកម្ពស់៩ជាន់មួយត្រូវបានឆេះ បន្ទាប់ពីកម្ទេចកម្ទីទំនងជាបានប៉ះនឹងដំបូល។ លោក Klitschko បាននិយាយនៅលើ Telegram ថា នៅក្នុងស្រុក Obolon រថយន្តកំពុងឆេះបន្ទាប់ពីត្រូវបានកម្ទេចកម្ទីមីស៊ីលធ្លាក់ចំ។ ក៏មានអគ្គិភ័យនៅទីតាំងពីរកន្លែងនៅក្នុងតំបន់ទីវាលមួយចំនួនផងដែរ រួមទាំងមួយនៅជិតសាលាមត្តេយ្យមួយកន្លែង។ ប្រជាជនរាប់ពាន់នាក់នៃទីក្រុងគីវកំពុងជ្រកកោននៅក្នុងស្ថានីយ៍រថភ្លើងក្រោមដី និងជម្រកផ្សេងទៀត បន្ទាប់ពីការព្រមានពីការវាយប្រហារតាមអាកាស។ ប្រធានាធិបតីអ៊ុយក្រែន លោក Volodymyr Zelenskyy កាលពីថ្ងៃចន្ទដើមសប្ដាហ៍នេះ បានបញ្ជាក់សារជាថ្មីនូវការព្រមានអំពីការវាយប្រហារដ៏ធំដែលអាចកើតមានរបស់រុស្ស៊ី និងបានជំរុញឱ្យប្រជាជនយកចិត្តទុកដាក់ជាពិសេសចំពោះការព្រមានអំពីការវាយប្រហារតាមអាកាស៕

លោក Trump ថា ការចរចាជាមួយអ៊ីរ៉ង់កំពុងដំណើរការយ៉ាងលឿន ទោះមានការគំរាមកំហែងពង្រីកសង្គ្រាមក៏ដោយ

2026/06/02 08:46:10 am        115
Facebook Telegram Linkin
ប្រធានាធិបតីអាមេរិក លោក Donald Trump បាននិយាយកាលពីថ្ងៃចន្ទ ១ មិថុនា ថា ការចរចាជាមួយអ៊ីរ៉ង់កំពុងដំណើរការក្នុងល្បឿនលឿន ទោះទីក្រុងតេអេរ៉ង់បានគំរាមកំហែងពង្រីកសង្គ្រាមដោយបន្តបិទច្រកសមុទ្រ Hormuz និងធ្វើឱ្យចំណុចសម្ពាធផ្សេងទៀតនៅជុំវិញតំបន់នេះមានភាពច្របូកច្របល់ក៏ដោយ។ ទីភ្នាក់ងារសារព័ត៌មានអ៊ីរ៉ង់ Tasnim បានរាយការណ៍ថា ទីក្រុងតេអេរ៉ង់បានផ្អាកការសន្ទនាជាមួយក្រុមអ្នកសម្របសម្រួល ដើម្បីតវ៉ាប្រឆាំងនឹងការពង្រីកការវាយលុករបស់អ៊ីស្រាអែលនៅក្នុងប្រទេសលីបង់ ជាទីដែលសម្ព័ន្ធមិត្តអាមេរិកមួយនេះ បានគំរាមវាយប្រហារម្តងទៀតលើតំបន់ជាយក្រុងភាគខាងត្បូងនៃទីក្រុងបេរូត។ ក្រោយមក លោក Trump បាននិយាយថា លោកបានបញ្ចុះបញ្ចូលអ៊ីស្រាអែល និងក្រុមហេសបូឡា គាំទ្រដោយអ៊ីរ៉ង់ឱ្យបន្ថូរបន្ថយភាពតានតឹង ដោយស្ថានទូតអាមេរិកប្រចាំនៅប្រទេសលីបង់បាននិយាយថា ក្រុមសកម្មប្រយុទ្ធបានទទួលយកសំណើរបស់សហរដ្ឋអាមេរិកសម្រាប់ការបញ្ឈប់ការវាយប្រហារទៅវិញទៅមក។ លោក Trump បានបង្ហោះនៅលើប្រព័ន្ធផ្សព្វផ្សាយសង្គមថា ការចរចាកំពុងបន្ត ក្នុងល្បឿនយ៉ាងលឿន ជាមួយសាធារណរដ្ឋអ៊ីស្លាមអ៊ីរ៉ង់។ ការចរចាដោយប្រយោលរវាងសហរដ្ឋអាមេរិក និងអ៊ីរ៉ង់ ការគំរាមកំហែង និងការវាយប្រហារតាមអាកាសអស់រយៈពេលជាច្រើនសប្តាហ៍ បានបរាជ័យក្នុងការបញ្ចប់សង្គ្រាម ឬបើកច្រកសមុទ្រ Hormuz ឡើងវិញ ដែលជាច្រកដឹកជញ្ជូនដ៏សំខាន់សម្រាប់ប្រេង និងឧស្ម័ននៅឈូងសមុទ្រពែក្ស។ សហរដ្ឋអាមេរិកបាននិយាយកាលពីថ្ងៃអាទិត្យ៣១ឧសភា ថាខ្លួនបានបើកការវាយប្រហារការពារខ្លួនលើទីតាំងរ៉ាដា និងកន្លែងត្រួតពិនិត្យយានដ្រូនរបស់អ៊ីរ៉ង់នៅកោះ Goruk និង Qeshm របស់អ៊ីរ៉ង់ កាលពីចុងសប្តាហ៍ ដែលខ្លួនបាននិយាយថាជាការឆ្លើយតបទៅនឹងសកម្មភាព "ឈ្លានពាន" ពីទីក្រុងតេអេរ៉ង់។ ជាការឆ្លើយតប កងឆ្មាំបដិវត្តន៍អ៊ីស្លាមជាន់ខ្ពស់របស់អ៊ីរ៉ង់បាននិយាយនៅថ្ងៃចន្ទនេះថាកងកម្លាំងអវកាសរបស់ខ្លួនបានកំណត់គោលដៅមូលដ្ឋានទ័ពអាកាសដែលប្រើក្នុងអ្វីដែលខ្លួនហៅថាការវាយប្រហាររបស់សហរដ្ឋអាមេរិកលើប៉មទូរគមនាគមន៍នៅលើកោះ Sirik ប៉ុន្តែមិនបានផ្តល់ទីតាំងនៃមូលដ្ឋាននោះទេ៕

ប្រធានាធិបតីមីយ៉ាន់ម៉ាបញ្ជាក់ឡើងវិញពីការប្តេជ្ញាចិត្តចំពោះសន្តិសុខរបស់ឥណ្ឌា

2026/06/01 08:53:25 pm        28
Facebook Telegram Linkin
បន្ទាប់ពីកិច្ចប្រជុំរវាងមេដឹកនាំប្រទេសទាំង ២ រដ្ឋមន្រ្តីការបរទេសឥណ្ឌាលោក Vikram Misri និយាយនៅថ្ងៃចន្ទនេះថា ប្រធានាធិបតីមីយ៉ាន់ម៉ាលោក Min Aung Hlaing បានបញ្ជាក់ឡើងវិញថា ទឹកដីរបស់ពួកគេមិនត្រូវបានអនុញ្ញាតឲ្យប្រើប្រាស់សម្រាប់សកម្មភាពធ្វើឲ្យប៉ះពាល់ដល់ផលប្រយោជន៍សន្តិសុខឥណ្ឌានោះទេ ។នៅថ្ងៃចន្ទនេះ មេដឹកនាំរបបសឹកក្លាយជាប្រធានាធិបតីមីយ៉ាន់ម៉ាលោក Aung Hlaing បានជួបជាមួយនាយករដ្ឋមន្រ្តីឥណ្ឌាលោក Narendra Modi នៅក្នុងទីក្រុងញូវដែលី ។លោក Misri និយាយថា សន្តិភាព និងស្ថិរភាពនៅមីយ៉ាន់ម៉ា គឺជាអាទិភាពកំពូលរបស់ឥណ្ឌា មិនត្រឹមតែសន្តិសុខនៅតាមសហគមន៍ព្រំដែន និងតំបន់ភាគឦសានប៉ុណ្ណោះទេ ប៉ុន្តែសម្រាប់គំនិតផ្តួចផ្តើមតភ្ជាប់ក្នុងតំបន់ផងដែរ ដែលពាក់ព័ន្ធនឹងឥណ្ឌា ជាមួយតំបន់អាស៊ីអាគ្នេយ៍ ។ដណើរទស្សនកិច្ចផ្លូវការរយៈពេល ៥ថ្ងៃរបស់លោក Aung Hlaing បានគូសបញ្ជាក់ពីការវិលត្រឡប់មកវិញបន្តិចម្តងនៃការចូលរួមតំបន់ឡើងវិញសម្រាប់មីយ៉ាន់ម៉ា រយៈពេល ៥ឆ្នាំ ក្រោយប្រទេសជិតខាងរបស់ពួកគេ គេចវេះថ្នាក់ដឹកនាំយោធារបស់ប្រទេសនៅអាស៊ីអាគ្នេយ៍មួយនេះ បន្ទាប់ពីរដ្ឋប្រហារយោធា ៕

ប្រតិបត្តិករនាវា ជំរុញឲ្យមានច្បាប់ច្បាស់វិលត្រឡប់មកកាន់ច្រកសមុទ្រ Hormuz វិញ

2026/06/01 08:25:58 pm        28
Facebook Telegram Linkin
ជំនួបប្រតិបត្តិការដឹកជញ្ជូននៅទីក្រុងអាតែន ប្រទេសក្រិក បញ្ជាក់ថា រាល់កិច្ចព្រមព្រៀងសន្តិភាពណាមួយ ដើម្បីដោះស្រាយជម្លោះរវាងសហរដ្ឋអាមេរិក និងអ៊ីរ៉ង់ ត្រូវការផ្តល់ច្បាប់ច្បាស់លាស់ អនុញ្ញាតឲ្យនាវាចាប់ផ្តើមធុរកិច្ចរបស់ខ្លួនធម្មតាឡើងវិញ ឆ្លងកាត់ច្រកសមុទ្រ Hormuz ។នាវាត្រូវបានគេមើលឃើញនៅក្នុងដែនទឹក ជិតកំពង់ផែ Bandar Abbas របស់ប្រទេសអ៊ីរ៉ង់ រង់ចាំការអនុញ្ញាតឲ្យធ្វើដំណើរឆ្លងកាត់ច្រកសមុទ្រ Hormuz ស្របពេលមានកិច្ចចរចា ដើម្បីបញ្ចប់សង្រ្គាមរវាងអ៊ីរ៉ង់ និងសហរដ្ឋអាមេរិក ។ យោធាសហរដ្ឋអាមេរិកនិយាយកាលពីចុងសប្តាហ៍នេះថា ខ្លួនបានវាយប្រហារគោលដៅមូលដ្ឋានការពារដែនអាកាសអ៊ីរ៉ង់ ស្ថានីយគ្រប់គ្រងជើងគោក និងយានដ្រូន ២គ្រឿង ដែលគំរាមកំហែងដល់នាវារបស់ពួកគេ បន្ទាប់ពីសកម្មភាពឈ្លានពានរបស់អ៊ីរ៉ង់ ដែលបានបាញ់ទម្លាក់យានដ្រូនសហរដ្ឋអាមេរិកមួយគ្រឿង នៅដែនទឹកអន្តរជាតិ ។កងឆ្មាំបដិវត្តន៍អ៊ិស្លាមអ៊ីរ៉ង់និយាយនៅថ្ងៃចន្ទនេះថា ពួកគេមានគោលដៅលើមូលដ្ឋានទ័ពអាកាសដែលត្រូវបានប្រើប្រាស់ដោយសហរដ្ឋអាមេរិក ជាការឆ្លើយតបចំពោះការវាយប្រហារលើតំបន់ភាគខាងត្បូងអ៊ីរ៉ង់ ៕

កងទ័ពជើងទឹកបារាំងដោយមានការគាំទ្រពីអង់គ្លេស បានស្កាត់ចាប់នាវាដឹកប្រេងរុស្ស៊ី

2026/06/01 08:25:41 pm        24
Facebook Telegram Linkin
កងទ័ពជើងទឹកបារាំង ដោយមានការគាំទ្រពីចក្រភពអង់គ្លេស បានស្កាត់ចាប់នាវាដឹកប្រេងមួយគ្រឿងដែលសង្ស័យថាជាផ្នែកមួយនៃកងនាវាស្រមោលរងទណ្ឌកម្មរបស់រុស្ស៊ី ។ប្រធានាធិបតីបារាំងលោក Emmanuel Macronបានប្រកាសនៅថ្ងៃចន្ទនេះពីការស្កាត់ចាប់នាវាដឹកប្រេងនៅលើបណ្តាញព័ត៌មានសង្គម X ដោយរូបលោកនិយាយថា នាវា Tagor ត្រូវបានស្កាត់ចាប់កាលពីថ្ងៃអាទិត្យនៅក្នុងសមុទ្រអាត្លង់ទិក ។ពាក់ព័ន្ធនឹងការស្កាត់ចាប់នាវានេះដែរ វិមានក្រឹមឡាំងនិយាយនៅថ្ងៃចន្ទនេះថា ការស្ទាក់ចាប់ នាវាដឹកប្រេងរងទណ្ឌកម្មអន្តរជាតិដែលធ្វើដំណើរពីរុស្ស៊ី នៅមហាសមុទ្រអាត្លង់ទិកពីសំណាក់បារាំង គឺ ខុសច្បាប់ ។ អ្នកនាំពាក្យវិមានក្រឹមឡាំង លោក Dmitry Peskovនិយាយប្រាប់អ្នកសារព័ត៌មាននៅក្នុងសន្និសីទសារព័ត៌មានក្នុងទីក្រុងមូស្គូថា ពួកយើងចាត់ទុកសកម្មភាពបែបនេះថា ខុសច្បាប់ និងស្ទើរតែដូចគ្នាទៅនឹងទង្វើរបស់ចោរសមុទ្រអន្តរជាតិ ។ លោកបានបដិសេធចំពោះអំណះអំណាងថា ការឃាត់ទុកនាវាដែលធ្វើដំណើរពីរុស្ស៊ី គឺអនុលោមតាមច្បាប់អន្តរជាតិ ។ លោក Peskovបន្តថា រុស្ស៊ីនឹងចាត់វិធានការ ដើម្បីធានាសុវត្ថិភាព សម្រាប់ទំនិញរបស់ខ្លួន ហើយនឹងបន្តចាត់វិធានការទាំងនេះ ពាក់ព័ន្ធនឹងបទពិសោធន៍អវិជ្ជមានដែលខ្លួនធ្លាប់ជួប ៕

EU ជំរុញឲ្យ​អ៊ីស្រាអែលឈប់​បង្កើន​ភាពតានតឹងផ្នែកយោធា នៅលីបង់ និងគាំទ្រកិច្ចប្រឹងប្រែងការទូត

2026/06/01 08:25:21 pm        24
Facebook Telegram Linkin
សហភាពអឺរ៉ុប (EU) នៅថ្ងៃចន្ទ (ទី១ ខែមិថុនា ឆ្នាំ២០២៦) នេះ បានជំរុញឲ្យ​អ៊ីស្រាអែលបញ្ឈប់ការបង្កើន​ភាពតានតឹងផ្នែកយោធា នៅលីបង់ និងគោរពអធិបតេយ្យភាពរបស់ប្រទេសនេះ​ ខណៈពេលដែលបញ្ជាក់ជាថ្មីនូវការគាំទ្រ ចំពោះកិច្ចប្រឹងប្រែងផ្នែកការទូតដែលមានគោលបំណងជួយ​ឲ្យជម្លោះ​ថម​ថយ​។អ្នកនាំពាក្យគណៈកម្មការអឺរ៉ុប លោក Anouar El Anouni បានប្រាប់សន្និសីទសារព័ត៌មានមួយថា៖ «យើងសូមអំពាវនាវឲ្យ​អ៊ីស្រាអែលបញ្ឈប់ការបង្កើន​ភាពតានតឹងផ្នែកយោធា នៅក្នុងប្រទេសលីបង់ ហើយ​គោរពអធិបតេយ្យភាព និងបូរណភាពទឹកដីរបស់ប្រទេសលីបង់»។លោក El Anouni ក៏បានអំពាវនាវ​ឲ្យ​បន្តការចូលរួមផ្នែកការទូតដែល​ដឹកនាំដោយសហរដ្ឋអាមេរិក និងដៃគូអន្តរជាតិផ្សេងទៀត ដើម្បីសម្រេចបាននូវមាគ៌ាដែល​ទទួល​យក​បាន​ពី​ភាគី​ទាំង២ ក្នុង​ការ​ឆ្ពោះទៅរកស្ថិរភាពរយៈពេលវែង។ លោកបានបញ្ជាក់​ថា៖ «ប្រជាជនលីបង់បានស៊ូទ្រាំនឹងការលំបាកយ៉ាងខ្លាំងរួចទៅហើយ។ ពួកគេមិនបានជ្រើសរើសសង្គ្រាមនេះទេ ហើយសង្គ្រាមនេះមិនមែនបង្កើត​ឡើង​ដោយ​ពួកគេទេ»។លោក El Anouni បានបន្ថែមថា ប្រជាជននៅក្នុងប្រទេសលីបង់ និងអ៊ីស្រាអែល មានសិទ្ធិរស់នៅក្នុងសន្តិភាព សន្តិសុខ និងសេចក្តីថ្លៃថ្នូរ ដោយគ្មានការគំរាមកំហែងដោយសារ​ជម្លោះថ្មី​ឡើយ​។ លោកបានសង្កត់​ធ្ងន់​ថា EU បង្ហាញ​ពីការមានសាមគ្គីភាពជាមួយប្រជាជនលីបង់ ហើយនឹងបន្តផ្តល់ការគាំទ្រ និងជំនួយសង្គ្រោះបន្ទាន់ ដើម្បីជួយអាជ្ញាធរឆ្លើយតបទៅនឹងវិបត្តិនេះ។ពាក់ព័ន្ធ​នឹង​សន្តិសុខ លោក El Anouni បាននិយាយថា ប្លុកនេះកំពុងពិចារណាពីការមាន​វិធានការបន្ថែម ដើម្បីគាំទ្រដល់ស្ថិរភាព នៅក្នុងប្រទេសលីបង់ រួមទាំងលទ្ធ​ភាព​ដែល​អាច​មាន​បេសកកម្មថ្មី ក្នុង​គោលបំណងពង្រឹងអំណាចរដ្ឋ៕

មន្ត្រី៖ ក្រុម​ហាម៉ាសនឹងធ្វើកិច្ចពិភាក្សា​ជាមួយអន្តរការី​តំបន់​ហ្កាហ្សា នៅអេហ្ស៊ីប

2026/06/01 08:24:56 pm        21
Facebook Telegram Linkin
មន្ត្រីមកពីក្រុម​ចលនាឥ​ស្លាមប៉ាឡេស្ទីន បានប្រាប់សារព័ត៌មាន​ AFP ថា គណៈប្រតិភូហាក្រុម​ម៉ាសមួយក្រុម នឹងជួបជាមួយអ្នកអន្តរការី នៅប្រទេស​អេហ្ស៊ីប នា​ថ្ងៃទី៣ ខែមិថុនា ដើម្បីពិភាក្សាអំពីវិធីជំរុញបទឈប់បាញ់ដ៏ផុយស្រួយ នៅតំបន់​ហ្កាហ្សា។ដែន​ដីប៉ាឡេស្ទីន នៅតែត្រូវបានរួប​រឹត​ដោយអំពើហិង្សាជា​រៀង​រាល់​ថ្ងៃ ដោយយោធាអ៊ីស្រាអែល និងក្រុម​ហាម៉ាសចោទប្រកាន់គ្នាទៅវិញទៅមកថា បានរំលោភលើបទឈប់បាញ់ដែលមានសុពលភាពចាប់តាំងពីខែតុលាឆ្នាំមុន​។ដំណើរការ​ទៅកាន់​ដំណាក់កាលទី២ នៃបទឈប់បាញ់ ដែលត្រូវបានគេសន្មតថា ពាក់ព័ន្ធនឹងការរំសាយអាវុធរបស់ក្រុម​ហាម៉ាស និងការដកកងទ័ពអ៊ីស្រាអែលបន្តិចម្តងៗ ត្រូវបានជាប់គាំងអស់រយៈពេលជាច្រើនខែមក​ហើយ​។ដោយបាន​និយាយ​ក្នុង​លក្ខខណ្ឌមិនបញ្ចេញឈ្មោះ ព្រោះរូប​គេមិនត្រូវបានអនុញ្ញាតឲ្យ​និយាយ​ពី​បញ្ហានេះជាសាធារណៈ មន្ត្រីពី​ក្រុម​ហាម៉ាសមួយ​រូប​បានប្រាប់​ថា៖ «ប្រទេស​អេហ្ស៊ីបបានអញ្ជើញក្រុម​ហាម៉ាស និងក្រុមផ្សេងទៀតឲ្យ​ចូលរួមក្នុងកិច្ចចរចាជាមួយអ្នកសម្របសម្រួល នៅថ្ងៃពុធ ដែលក៏នឹងរួមបញ្ចូលមន្ត្រីកាតា និងទួរគីផងដែរ»។មន្ត្រី​រូប​នេះ បាន​បន្ថែមថា៖ «អន្តរ​ការី បានបង្ហាញគំនិត សម្រាប់ការបង្កើតសំណើថ្មី និងកែសម្រួលដែលអាចទទួលយកបានសម្រាប់ទាំងក្រុម​ហាម៉ាស និងអ៊ីស្រាអែល»។មន្ត្រីរូបនោះបាននិយាយទៀត​ថា គណៈប្រតិភូហាម៉ាស ដែលដឹកនាំដោយប្រធានក្រុម​អ្នកចរចា លោក​ Khalil al-Hayya ក៏ដូចជាតំណាងមកពីក្រុមប៉ាឡេស្ទីនផ្សេងទៀត ត្រូវបានគេរំពឹងថា នឹងទៅ​ដល់ទីក្រុងគែរ ដោយចាប់ផ្តើមនៅថ្ងៃទី២ ខែមិថុនា សម្រាប់កិច្ចពិភាក្សាដែលនឹងធ្វើឡើងនៅក្នុងទីក្រុង El-Alamein នៃ​សមុទ្រមេឌីទែរ៉ាណេ​៕

បណ្ដាញសង្គម

ព័ត៌មានថ្មីៗ

គិតត្រឹមត្រីមាសទី១ គ្រឹះស្ថានមីក្រូហិរញ្ញវត្ថុបានបញ្ចេញឥណទានមានទឹកប្រាក់ ៥,៤ ពាន់លានដុល្លារ
06/19/2026 09:06 PM
Facebook Telegram Linkin
មន្ត្រីអាមេរិក៖ អ៊ីស្រាអែល និងហេសបូឡា ព្រម​ព្រៀង​មាន​​បទ​ឈប់បាញ់ចាប់ពីថ្ងៃទី១៩ ខែមិថុនា
06/19/2026 08:06 PM
Facebook Telegram Linkin
លោក Trump បញ្ជាក់​ថា សង្គ្រាមធ្វើឲ្យ​អ៊ីរ៉ង់ខ្សោយ និង​បដិសេធ​ការ​រិះគន់​របស់​ក្រុម​ប្រជាធិបតេយ្យ​
06/19/2026 08:06 PM
Facebook Telegram Linkin
មនុស្ស ១៨នាក់ ត្រូវបានសម្លាប់ក្នុងការវាយប្រហាររបស់អ៊ីស្រាអែលនៅតំបន់ភាគខាងត្បូងលីបង់
06/19/2026 08:06 PM
Facebook Telegram Linkin
ទីក្រុងតំបន់ភ្នំហេមពាន្តរបស់ឥណ្ឌា ប្រែក្លាយជាគំនរសំរាម ដោយសារភ្ញៀវទេសចរច្រើន
06/19/2026 08:06 PM
Facebook Telegram Linkin
ទីភ្នាក់ងារទេសចរណ៍ចិនចាប់​ផ្ដើម​ដំណើរកម្សាន្តជាក្រុមទៅ​ជប៉ុនឡើងវិញ តែ​ខ្លះបញ្ឈប់ការលក់ក្រោយ​មក​
06/19/2026 08:06 PM
Facebook Telegram Linkin
លីបង់ថ្កោលទោសការវាយប្រហារចុងក្រោយរបស់អ៊ីស្រាអែល និងជំរុញឲ្យ​មាន «បទឈប់បាញ់គ្រប់ជ្រុងជ្រោយ​»
06/19/2026 08:06 PM
Facebook Telegram Linkin
ការបំផ្ទុះគ្រាប់បែក ២ផ្សេងគ្នា បណ្តាលឲ្យ​នគរបាល​រងរបួស ក្នុងខេត្ត Yala និង​ Pattani របស់​​ថៃ
06/19/2026 08:06 PM
Facebook Telegram Linkin
ទីភ្នាក់ងារតាមដាន៖ ការឆ្លងកាត់របស់​នាវា នៅ​ចក្រសមុទ្រ​ Hormuz កើនឡើង ក្រោយ​មាន​កិច្ចព្រមព្រៀង
06/19/2026 07:06 PM
Facebook Telegram Linkin
ពលរដ្ឋអ៊ីស្រាអែលរស់នៅតំបន់ព្រំដែន ព្រួយបារម្ភពីកិច្ចព្រមព្រៀងសន្តិភាពរវាងអាមេរិក និងអ៊ីរ៉ង់
06/19/2026 07:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.