BTV NEWS

លោក Macron៖ យុទ្ធសាស្ត្រយោធារបស់អ៊ីស្រាអែល នៅមជ្ឈិមបូព៌ា ប្រឈមធ្វើឲ្យអំពើហិង្សារាលដាល

រដ្ឋមន្ត្រីការពារជាតិជប៉ុន គ្រោងធ្វើដំណើរទៅទួរគី ទាក់ទងនឹងកិច្ចប្រជុំកំពូលរបស់អង្គការណាតូ

សារព័ត៌មានរ៉យទ័រ៖ IRGC បង្កើតក្រុមសម្ងាត់នៅអ៊ីរ៉ាក់ ដើម្បីធ្វើការវាយប្រហារដោយយានដ្រូនលើរដ្ឋឈូងសមុទ្រ

នាវាឆ្លងកាត់ច្រកសមុទ្រ Hormuz ខណៈកិច្ចព្រមព្រៀងអាមេរិក-អ៊ីរ៉ង់ ចូលជាធរមាន តែកង្វល់នៅតែមាន

ព័ត៌មានអន្តរជាតិ

ចិនល្បាតដែនទឹកភាគខាងកើតកោះតៃវ៉ាន់ ដើម្បីឆ្លើយតបទៅនឹងការចរចាព្រំដែនសមុទ្រជប៉ុន និងហ្វីលីពីន

នៅថ្ងៃចន្ទ១មិថុនានេះ ឆ្មាំល្បាតឆ្នេរចិនបាននិយាយថា ខ្លួនបានធ្វើការល្បាតជាការ "អនុវត្តច្បាប់" នៅក្នុងដែនទឹកភាគខាងកើតនៃកោះតៃវ៉ាន់ ដើម្បីឆ្លើយតបទៅនឹងផែនការរបស់ជប៉ុន និងហ្វីលីពីន ក្នុងការបើកកិច្ចចរចាកំណត់ព្រំដែនសមុទ្រ ត្រួតស៊ីគ្នាជាមួយតំបន់ដែលត្រូវបានអះអាងសិទ្ធិដោយប្រទេសចិន ។ ជប៉ុន និងហ្វីលីពីន បាននិយាយកាលពីសប្តាហ៍មុនថា ពួកគេនឹងចាប់ផ្តើមកិច្ចចរចាជាផ្លូវការលើការកំណត់ព្រំដែនសមុទ្រនៃតំបន់សេដ្ឋកិច្ចផ្តាច់មុខ និងខ្ពង់រាបបាតសមុទ្ររវាងប្រទេសទាំងពីរ "ស្របតាមច្បាប់អន្តរជាតិ"។ការកំណត់ព្រំដែននេះ ពាក់ព័ន្ធនឹងដំណើរការផ្លូវច្បាប់ និងផែនទីនៃការកំណត់ព្រំដែនរវាងតំបន់ ឬប្រទេសពីរ។ ខណៈពួកគេពុំបានផ្តល់ព័ត៌មានលម្អិត ក្រសួងការបរទេសចិនកាលពីថ្ងៃសុក្របាននិយាយថា តំបន់នោះគ្របដណ្តប់លើដែនទឹកភាគខាងកើតនៃកោះតៃវ៉ាន់ ដែលទីក្រុងប៉េកាំងចាត់ទុកថាជាទឹកដីរបស់ខ្លួន ដោយបន្ថែមថា ការចរចាបែបនេះ "ខុសច្បាប់ទាំងស្រុង ទុកជាមោឃៈ និងគ្មានសុពលភាព"។ ក្នុងសេចក្តីថ្លែងការណ៍មួយ អង្គភាពឆ្មាំល្បាតឆ្នេរចិននិយាយថា កងនាវាមួយបានអនុវត្តការល្បាតស្របតាមច្បាប់នៅភាគខាងកើតនៃកោះតៃវ៉ាន់ ទោះពុំបានបញ្ជាក់ពីកន្លែងណាពិតប្រាកដក៏ដោយ។ សេចក្តីថ្លែងការណ៍នោះបាននិយាយថា «នេះគឺជាសកម្មភាពចាំបាច់មួយដែលត្រូវបានធ្វើឡើងដើម្បីឆ្លើយតបទៅនឹងការប្រកាសជាឯកតោភាគីរបស់ប្រទេសជប៉ុន និងហ្វីលីពីន អំពីការចាប់ផ្តើមការចរចាកំណត់ព្រំដែនសមុទ្រនៅក្នុងដែនទឹកភាគខាងកើតនៃកោះតៃវ៉ាន់របស់ប្រទេសចិន។ យោធា និងឆ្មាំល្បាតឆ្នេរចិន បាននិយាយថា ពួកគេបានធ្វើការល្បាតនៅជិតដែនទឹកដែលមានជម្លោះនៅសមុទ្រចិនខាងត្បូងកាលពីថ្ងៃអាទិត្យ មួយថ្ងៃបន្ទាប់ពីហ្វីលីពីនបាននិយាយថា ខ្លួននៅតែស្ថិតនៅក្រោមការគំរាមកំហែងពីទីក្រុងប៉េកាំង ទោះបីជាមានការធូរស្រាលនៃភាពតានតឹងរវាងសហរដ្ឋអាមេរិក និងចិនថ្មីៗនេះក៏ដោយ៕

ចិន ល្បាតតំបន់ថ្មប៉ប្រះទឹក Scarborough Shoal បន្ទាប់ពីហ្វីលីពីនព្រមានពីការគំរាមកំហែងពីទីក្រុងប៉េកាំង

យោធា និងឆ្មាំល្បាតឆ្នេរចិន បាននិយាយថា ពួកគេបានធ្វើការល្បាតនៅជិតដែនទឹកដែលមានជម្លោះនៅសមុទ្រចិនខាងត្បូងកាលពីថ្ងៃអាទិត្យ មួយថ្ងៃបន្ទាប់ពីហ្វីលីពីនបាននិយាយថា ខ្លួននៅតែស្ថិតនៅក្រោមការគំរាមកំហែងពីទីក្រុងប៉េកាំង ទោះបីជាមានការធូរស្រាលនៃភាពតានតឹងរវាងសហរដ្ឋអាមេរិក និងចិនថ្មីៗនេះក៏ដោយ។ យោធាហ្វីលីពីនបាននិយាយកាលពីថ្ងៃអាទិត្យ៣១ឧសភា ថា កងកម្លាំងហ្វីលីពីន និងសហរដ្ឋអាមេរិកបានធ្វើសមយុទ្ធដែនសមុទ្ររយៈពេលប្រាំថ្ងៃនៅក្នុងដែនទឹកដូចគ្នាកាលពីសប្តាហ៍មុននៅជិតតំបន់ថ្មប៉ប្រះទឹក Scarborough Shoal ដែលជាសមយុទ្ធលើកទីបីនៅឆ្នាំនេះ ដើម្បីពង្រឹងអន្តរប្រតិបត្តិការ និងសន្តិសុខដែនសមុទ្រ ។ កោះថ្មប៉ប្រះទឹក Scarborough Shoal នៅក្នុងដែនទឹកដែលទីក្រុងម៉ានីលហៅថាសមុទ្រហ្វីលីពីនខាងលិច គឺជាទីតាំងមួយក្នុងចំណោមទីតាំងដែនសមុទ្រប្រកួតប្រជែងគ្នាបំផុតរបស់តំបន់អាស៊ី បានក្លាយជាចំណុចប៉ះទង្គិចគ្នាញឹកញាប់រវាងចិន និងហ្វីលីពីនលើអធិបតេយ្យភាព និងសិទ្ធិនេសាទ។ បញ្ជាការដ្ឋានភាគខាងត្បូងនៃកងទ័ពរំដោះប្រជាជនចិនបាននិយាយនៅក្នុងសេចក្តីថ្លែងការណ៍មួយនៅលើបណ្ដាញសង្គម WeChat ថា អង្គភាពកងទ័ពជើងទឹក និងអាកាសរបស់ខ្លួនបានធ្វើការល្បាតត្រៀមប្រយុទ្ធនៅក្នុងដែនសមុទ្រ និងដែនអាកាសរបស់ខ្លួន នៃប្រជុំកោះ និងតំបន់ជុំវិញ។ ទីបញ្ជាការនេះបាននិយាយថា ការល្បាតបែបនេះបម្រើជាវិធានការទប់ទល់ដ៏មានប្រសិទ្ធភាពមួយដើម្បីទប់ទល់នឹងការរំលោភសិទ្ធិគ្រប់ប្រភេទ និងសកម្មភាពញុះញង់។ បញ្ជាការនេះពុំបាននិយាយអំពីប្រទេសជាក់លាក់ណាមួយទេ៕

សារព័ត៌មានអាមេរិក៖ លោក Trump កំពុងស្វែងរកការកែសម្រួលកិច្ចព្រមព្រៀងអាមេរិក-អ៊ីរ៉ង់

ប្រព័ន្ធផ្សព្វផ្សាយអាមេរិក បានរាយការណ៍ថា លោកប្រធានាធិបតី Donald Trump បានស្នើសុំឱ្យមានការកែសម្រួលកិច្ចព្រមព្រៀងរវាងសហរដ្ឋអាមេរិក និងអ៊ីរ៉ង់ ក្នុងគោលបំណងបញ្ចប់ការប្រយុទ្ធគ្នា ដែលបានចាប់ផ្តើមកាលពីដើមឆ្នាំនេះ ។ តាមការចុះផ្សាយរបស់សារព័ត៌មាន CBS News ដែលជាដៃគូព័ត៌មានរបស់សារព័ត៌មាន BBC បានឲ្យដឹងថា ការផ្លាស់ប្តូរទាំងនេះទាក់ទងនឹងច្រកសមុទ្រហ័រមូស និងការដកយកសារធាតុអ៊ុយរ៉ានីញ៉ូមដែលចម្រាញ់រួច ។ សេតវិមានពុំបានឆ្លើយតបទៅនឹងសំណើសុំការអត្ថាធិប្បាយទេ។ លោក Mohammad Bagher Ghalibaf ប្រធានអ្នកចរចារបស់អ៊ីរ៉ង់ បាននិយាយកាលពីថ្ងៃអាទិត្យថា ទីក្រុងតេអេរ៉ង់នឹងមិនយល់ព្រមលើកិច្ចព្រមព្រៀងណាមួយឡើយ លុះត្រាតែសិទ្ធិរបស់អ៊ីរ៉ង់ត្រូវបានធានាយ៉ាងពេញលេញ។ ប្រធានាធិបតី និងក្រុមមន្ត្រីជំនិតជាន់ខ្ពស់ បានជួបប្រជុំគ្នាកាលពីថ្ងៃសុក្រ ដើម្បីធ្វើ "ការសម្រេចចិត្តចុងក្រោយ" អំពីក្របខ័ណ្ឌសម្រាប់ការពង្រីកបទឈប់បាញ់ជាមួយអ៊ីរ៉ង់ ប៉ុន្តែកិច្ចប្រជុំបានបញ្ចប់ដោយគ្មានភាពច្បាស់លាស់លើជំហានបន្ទាប់។ ការបញ្ជាក់ឡើងវិញចុងក្រោយនៃកិច្ចព្រមព្រៀង ដែលត្រូវបានរាយការណ៍ជាលើកដំបូងដោយសារព័ត៌មាន Axios កាលពីថ្ងៃសៅរ៍ រួមមានការបញ្ឈប់អំពើហិង្សារយៈពេល ៦០ ថ្ងៃ ការអំពាវនាវឱ្យបើកច្រកសមុទ្រហ័រមូសឡើងវិញ និងក្របខ័ណ្ឌគោលមួយដើម្បីបើកការចរចាឡើងវិញលើកម្មវិធីនុយក្លេអ៊ែររបស់អ៊ីរ៉ង់ នេះបើយោងតាមសារព័ត៌មាន CBS។ ប្រព័ន្ធផ្សព្វផ្សាយ CBS ដដែល បាននិយាយថា ប្រសិនបើការទូតមានវឌ្ឍនភាព កិច្ចព្រមព្រៀងនេះក៏ត្រូវបានគេរាយការណ៍ថាពាក់ព័ន្ធនឹងលទ្ធភាពនៃការបន្ធូរបន្ថយទណ្ឌកម្មចំពោះអ៊ីរ៉ង់ ដែលអាចអនុញ្ញាតឱ្យអ៊ីរ៉ង់ទទួលបានទ្រព្យសម្បត្តិរាប់ពាន់លានដុល្លារ ដែលត្រូវបានបង្កក ផងដែរ៕

[UPDATE] ចំនួនអ្នកស្លាប់ក្នុងហេតុការណ៍ដួលរលំអគារកំពុងសាងសង់នៅភាគខាងជើងហ្វីលីពីនកើនឡើងដល់ជាង១០នាក់

យោងតាមក្រុមអាជ្ញាធរមូលដ្ឋាន បានឲ្យដឹងថា ចំនួនអ្នកស្លាប់ដោយសារការដួលរលំអគារដែលកំពុងសាងសង់នៅទីក្រុង Angeles ខេត្ត Pampanga ភាគខាងជើងប្រទេសហ្វីលីពីន បានកើនឡើងដល់ ១២ នាក់ បន្ទាប់ពីក្រុមអ្នកជួយសង្គ្រោះបានរកឃើញសាកសពម្នាក់ទៀតពីគំនរបាក់បែកមុនពេលមេឃភ្លឺនៅថ្ងៃចន្ទ ១មិថុនាសប្ដាហ៍នេះ ។ សំណង់នេះបានដួលរលំភ្លាមៗមុនម៉ោង ៣ ព្រឹក ថ្ងៃទី ២៤ ខែឧសភា ២០២៦ កន្លងទៅថ្មីៗនេះ ខណៈក្រុមកម្មករសំណង់កំពុងលង់លក់ក្នុងដំណេក ដោយមានមនុស្សរាប់សិបនាក់ជាប់នៅក្រោមគំនរថ្មបាក់បែក។ ក្រុមអ្នកជួយសង្គ្រោះបន្តស្វែងរកមនុស្សយ៉ាងហោចណាស់ប្រាំបីនាក់ដែលនៅតែបាត់ខ្លួន ខណៈ ប្រតិបត្តិការស្វែងរក និងជួយសង្គ្រោះបានឈានចូលដល់ថ្ងៃទីប្រាំបី។ ក្រុមមន្ត្រីបាននិយាយថា មនុស្សចំនួន៧០ នាក់ ត្រូវបានជួលធ្វើការនៅទីតាំងការដ្ឋានសំណង់នោះ ទោះបីជាភាគច្រើននៃពួកគេបានទៅលេងផ្ទះសម្រាប់ថ្ងៃសម្រាកចុងសប្ដាហ៍ក៏ដោយ៕

អ្នកនយោបាយឃឺដអ៊ីរ៉ង់ អះអាងថាអ៊ីរ៉ង់បានវាយប្រហារមូលដ្ឋានគណបក្សនៅក្រុង Erbil ប្រទេសអ៊ីរ៉ាក់

មន្ត្រីជាន់ខ្ពស់គណបក្សឃឺដអ៊ីរ៉ង់ Komala បាននិយាយថាអ៊ីរ៉ង់ បានបាញ់មីស៊ីលពីរគ្រាប់ទៅលើមូលដ្ឋានមួយកន្លែងដែលជាកម្មសិទ្ធិរបស់ក្រុមនេះនៅក្នុងតំបន់ក្រុមឃឺដ ក្នុងខេត្ត Erbil ប្រទេសអ៊ីរ៉ាក់ភាគខាងជើង។ មេដឹកនាំគណបក្ស Komala លោក Amjad Hussein Panahi បាននិយាយនៅក្នុងការបង្ហោះសារលើបណ្តាញសង្គម Facebook ថា ការវាយប្រហារនេះបានធ្លាក់លើទីស្នាក់ការកណ្តាលរបស់គណបក្សនៅក្នុងស្រុក Khalidan នៅពេលយប់។ លោកបាននិយាយថា ការវាយប្រហារ បានធ្វើឱ្យចំនួនសរុបនៃមីស៊ីល និងយានដ្រូនរបស់អ៊ីរ៉ង់ ដែលបានបាញ់ទៅលើទីតាំងរបស់ក្រុមនេះ ឡើងដល់ជាង៨០គ្រាប់។ គណបក្សសេរីភាពឃឺដ ជាគណបក្សឃឺដអ៊ីរ៉ង់មួយផ្សេងទៀតមានមូលដ្ឋាននៅក្នុងទីក្រុង Erbil បាននិយាយថា មីស៊ីលរបស់អ៊ីរ៉ង់ក៏បានវាយប្រហារមូលដ្ឋានមួយកន្លែងរបស់ខ្លួននៅជិតទីក្រុងនេះ ដោយអ្នកនាំពាក្យម្នាក់បាននិយាយថា គណបក្សបច្ចុប្បន្ន ត្រូវបានវាយប្រហារចន្លោះពី៥០ ទៅ៦០ លើក ចាប់តាំងពីសង្គ្រាមអាមេរិក-អ៊ីស្រាអែលលើអ៊ីរ៉ង់ បានចាប់ផ្តើម។

ការជាសះស្បើយពីជំងឺអេបូឡានាំមកនូវសញ្ញានៃក្តីសង្ឃឹមនៅកុងហ្គោ ខណៈករណីសង្ស័យលេចឡើងនៅក្រៅទ្វីបអាហ្វ្រិក

អង្គការសុខភាពពិភពលោកបាននិយាយកាលពីថ្ងៃអាទិត្យ ៣១ឧសភា ថា គិលានុបដ្ឋាកចំនួនបួននាក់ដែលកំពុងទទួលការព្យាបាលសម្រាប់ជំងឺអេបូឡាបណ្តាលមកពីវីរុសប្រភេទ Bundibugyo ត្រូវបានអនុញ្ញាតឱ្យចេញពីមន្ទីរពេទ្យមួយក្នុងទីក្រុង Bunia ក្នុងសាធារណរដ្ឋប្រជាធិបតេយ្យកុងហ្គោ បន្ទាប់ពីបានជាសះស្បើយពីជំងឺនេះ។ ការជាសះស្បើយបន្ថែមទៀតត្រូវបានគេរំពឹងទុក ជាពិសេសនៅពេលមនុស្សត្រូវបានគេធ្វើរោគវិនិច្ឆ័យទាន់ពេលវេលា និងអាចទទួលបានការថែទាំ និងខណៈការឆ្លើយតបកាន់តែខ្លាំងចំពោះការផ្ទុះឡើងនៃជំងឺនេះ ។ ទីភ្នាក់ងារនេះបាននិយាយថា បុគ្គលិកមន្ទីរពិសោធន៍ម្នាក់ក៏បានជាសះស្បើយកាលពីដើមសប្តាហ៍មុននេះផងដែរ ដោយធ្វើឱ្យចំនួនសរុបនៃមនុស្សដែលបានជាសះស្បើយពីវីរុសកើនឡើងដល់ប្រាំនាក់។ ទោះជាយ៉ាងណាក៏ដោយ ករណីសង្ស័យកំពុងត្រូវបានតាមដាននៅក្នុងប្រទេសប្រេស៊ីល និងអ៊ីតាលីដែលជាប់ទាក់ទងនឹងការធ្វើដំណើរទៅកាន់បណ្ដាប្រទេសដែលរងផលប៉ះពាល់។ ចំនួនករណីឆ្លងជំងឺអេបូឡាដែលបានបញ្ជាក់នៅក្នុងប្រទេសនេះបានកើនឡើងដល់២៨២នាក់ ដោយមានអ្នកស្លាប់ចំនួន ៤២ នាក់ បន្ទាប់ពីលទ្ធផលតេស្តវិជ្ជមានថ្មីចំនួន១៩ករណី ត្រូវបានកត់ត្រា នេះបើយោងតាមទិន្នន័យចេញផ្សាយដោយក្រសួងទំនាក់ទំនង។ កាលពីដើមខែនេះ អង្គការសុខភាពពិភពលោក (WHO) បានប្រកាសពីការផ្ទុះឡើងនៃជំងឺអេបូឡាបង្កឡើងដោយវីរុស Bundibugyo ដ៏កម្រនៅក្នុងសាធារណរដ្ឋប្រជាធិបតេយ្យកុងហ្គោ និងអ៊ូហ្គង់ដា ជាគ្រាអាសន្នសុខភាពសាធារណៈនៃកង្វល់អន្តរជាតិ ទោះបីជាវាមិនគ្រប់គ្រាន់តាមលក្ខណៈវិនិច្ឆ័យនៃភាពអាសន្ននៃជំងឺរាតត្បាតក៏ដោយ។ អំឡុងពេលចុះពិនិត្យស្ថានភាពនៅខេត្ត Ituri ភាគខាងកើតនៃប្រទេសកុងហ្គោ កាលពីថ្ងៃសៅរ៍ចុងសប្ដាហ៍មុនេះ លោក Tedros Adhanom Ghebreyesus ប្រមុខអង្គការ WHO បានកត់សម្គាល់ថា ទោះបីជាបច្ចុប្បន្នមិនទាន់មានវ៉ាក់សាំង ឬការព្យាបាលដែលមានអាជ្ញាប័ណ្ណសម្រាប់ជំងឺអេបូឡា បង្កឡើងដោយវីរុស Bundibugyo ក៏ដោយ វាមិនមែនគ្មានសង្ឃឹមទេ ព្រោះអ្នកជំងឺអាចរស់រានមានជីវិតបានជាមួយនឹងការថែទាំសុខភាពល្អ៕

ការផ្ទុះគ្រាប់មីនក្នុងតំបន់គ្រប់គ្រងដោយក្រុមឧទ្ទាមនៅមីយ៉ាន់ម៉ា បានសម្លាប់មនុស្សរាប់សិបនាក់

បុគ្គលិកជួយសង្គ្រោះពីរនាក់បាននិយាយថា ការផ្ទុះគ្រាប់មីននៅភាគខាងជើងសហភាពមីយ៉ាន់ម៉ា បានសម្លាប់មនុស្សរាប់សិបនាក់កាលពីថ្ងៃអាទិត្យ ទី៣១ ខែឧសភា ដោយក្រុមឧទ្ទាមគ្រប់គ្រងតំបន់នោះបាននិយាយថា វាបណ្តាលមកពីការផ្ទុះគ្រាប់មីនដោយចៃដន្យ។ អ្នកឆ្លើយតបដំបូងម្នាក់ នៅក្នុងស្រុក Namhkam នៃរដ្ឋសាន ជាកន្លែងដែលការផ្ទុះបានកើតឡើង បាននិយាយថា មនុស្ស៤៦នាក់បានស្លាប់ រួមមានទាំងកុមារ៦នាក់ និងជាង៧០នាក់ផ្សេងទៀតបានរងរបួស។ អ្នកជួយសង្គ្រោះដែលបាននិយាយក្នុងលក្ខខណ្ឌអនាមិកដោយសារតែការព្រួយបារម្ភអំពីសន្តិសុខថា ការផ្ទុះដ៏ខ្លាំងនេះ បានបំផ្លាញលំនៅឋានជាច្រើនខ្នង ហើយអ្នករងរបួសច្រើននាក់ត្រូវបានបញ្ជូនទៅកាន់មន្ទីរពេទ្យក្នុងស្រុក។ លោកបាននិយាយបន្ថែមថា «អាចមានមនុស្សស្លាប់ច្រើនបន្ថែមទៀតនៅក្រោមលំនៅឋានដែលត្រូវបានបំផ្លាញរបស់ពួកគេ»។ អ្នកជួយសង្គ្រោះម្នាក់ទៀត បាននិយាយថា ចំនួនអ្នកស្លាប់មានចំនួនខ្ពស់ជាងនេះ ដល់៥៩នាក់ ហើយសាកសពត្រូវបានប្រមូលដោយបុគ្គលិកសង្គ្រោះបន្ទាន់ដើម្បីបូជា។ សហភាពមីយ៉ាន់ម៉ា ត្រូវបានញាំញីដោយសង្គ្រាមស៊ីវិល ចាប់តាំងពីយោធាដណ្តើមអំណាចក្នុងរដ្ឋប្រហារឆ្នាំ២០២១ ដោយកងកម្លាំងប្រដាប់អាវុធកំពុងប្រយុទ្ធប្រឆាំងនឹងក្រុមឧទ្ទាមគាំទ្រលទ្ធិប្រជាធិបតេយ្យ និងក្រុមប្រដាប់អាវុធជនជាតិភាគតិចដ៏មានឥទ្ធិពល។ កងទ័ពរំដោះជាតិតាអាង Ta'ang (TNLA) ជាក្រុមជនជាតិភាគតិចដ៏មានឥទ្ធិពលបំផុតមួយរបស់សហភាពនេះ បាននិយាយថា «ការផ្ទុះដោយចៃដន្យ» នៃគ្រឿងផ្ទុះដែលរក្សាទុកប្រើប្រាស់ដើម្បីបំផ្ទុះយករ៉ែ និងថ្ម បានផ្ទុះឡើងនៅម៉ោងប្រហែល ១២ ថ្ងៃត្រង់ ម៉ោងក្នុងស្រុក កាលពីថ្ងៃអាទិត្យ ក្នុងស្រុក Namhkam។

កងទ័ពអ៊ីស្រាអែលដណ្តើមបានប្រាសាទយុទ្ធសាស្ត្រនៅលីបង់ក្នុងការឈ្លានពានដ៏ជ្រៅបំផុតចូលប្រទេសនេះ ក្នុងរយៈពេល២៦ ឆ្នាំ

យោធាបាននិយាយកាលពីថ្ងៃអាទិត្យ ៣១ ខែឧសភា ថា កងទ័ពអ៊ីស្រាអែលបានដណ្តើមយកបន្ទាយបុរាណយុទ្ធសាស្ត្រមួយដែលស្ថិតនៅលើកំពូលភ្នំនៅភាគខាងត្បូងប្រទេសលីបង់ ក្នុងការឈ្លានពានដ៏ជ្រៅបំផុតចូលទៅក្នុងប្រទេសនេះក្នុងរយៈពេល២៦ឆ្នាំ។ ការដណ្តើមយកប្រាសាទ Beaufort នៅជិតទីក្រុង Nabatiyeh បានធ្វើឡើងបន្ទាប់ពីការវាយប្រហារតាមអាកាសជាច្រើនថ្ងៃ និងការប្រយុទ្ធគ្នាយ៉ាងខ្លាំងនៅក្នុងភូមិក្បែរៗនោះរវាងកងទ័ពអ៊ីស្រាអែល និងក្រុមសកម្មប្រយុទ្ធ ហេសបូឡា(Hezbollah)។ ការដណ្តើមយកនេះបានក្លាយជាការវាយរុលទៅមុខដ៏ខ្លាំងក្លារបស់អ៊ីស្រាអែលនៅក្នុងសង្គ្រាមអ៊ីស្រាអែល -ក្រុមហេសបូឡា ចុងក្រោយបង្អស់ ដែលបានចាប់ផ្តើមកាលពីថ្ងៃទី ២ ខែមីនា២០២៦ នៅពេលដែលក្រុមហេសបូឡា បានបាញ់រ៉ូកែតចូលទៅក្នុងភាគខាងជើងអ៊ីស្រាអែលពីរថ្ងៃបន្ទាប់ពីសហរដ្ឋអាមេរិក និងអ៊ីស្រាអែល បានវាយប្រហារខ្នងបង្អែកដ៏សំខាន់របស់ខ្លួនគឺ អ៊ីរ៉ង់។ ចាប់តាំងពីពេលនោះមក អ៊ីស្រាអែល បានបើកការឈ្លានពានដោយថ្មើរជើង ដោយដណ្តើមយកបានភូមិ និងទីប្រជុំជនលីបង់រាប់សិបកន្លែងនៅជិតព្រំដែន។ក្រុមហេសបូឡា បានបាញ់មីស៊ីល និងយានដ្រូនរាប់ពាន់គ្រាប់ទៅលើទាហានអ៊ីស្រាអែលនៅភាគខាងត្បូងប្រទេសលីបង់ និងភាគខាងជើងអ៊ីស្រាអែល។ ការវាយលុកកាន់តែខ្លាំងរបស់អ៊ីស្រាអែលបានកើតឡើងទោះបីជាមានបទឈប់បាញ់ដែលត្រូវបានអនុវត្តចាប់តាំងពីថ្ងៃទី ១៧ ខែមេសា និងប៉ុន្មានថ្ងៃមុនពេលលីបង់ និងអ៊ីស្រាអែលធ្វើកិច្ចចរចាជុំបន្ទាប់ដោយផ្ទាល់របស់ពួកគេនៅទីក្រុងវ៉ាស៊ីនតោន ដែលចាប់ផ្តើមនៅថ្ងៃអង្គារស្អែកនេះក៏ដោយ៕

រដ្ឋមន្រ្តីការពារជាតិជប៉ុនលោក Koizumi ច្រានចោលការចោទប្រកាន់ពីយោធានិយមថ្មី

រដ្ឋមន្រ្តីការពារជាតិជប៉ុនលោក Shinjiro Koizumi បានធ្វើការច្រានចោលការចោទប្រកាន់ចំពោះ “យោធានិយមថ្មី” នៅក្នុងសុន្ទរកថាថ្លែងនៅកិច្ចប្រជុំកំពូល Shangri-La Dialogue ស្ថិតក្នុងប្រទេសសិង្ហបុរី ដែលជាវេទិកាដ៏សំខាន់សម្រាប់ថ្នាក់ដឹកនាំការពារជាតិរបស់អាស៊ី ។នៅក្នុងសេចក្តីអត្ថាធិប្បាយមួយចង់សំដៅលើចិន លោក Koizumi និយាយថា គិតពីរឿងនេះ មានប្រទេសមួយដែលមានអាវុធនុយក្លេអ៊ែរដ៏ធំ ហើយនិងយន្តហោះទម្លាក់គ្រាប់បែកយុទ្ធសាស្ត្រ ។ ជប៉ុនគ្មានអាវុធទាំងអស់នេះទេ តើជប៉ុនត្រូវបានគេចាត់ថ្នាក់ថា “យោធានិយមថ្មី” បានយ៉ាងណាកើត?លោកបន្តថា ចាប់តាំងពីការបញ្ចប់សង្រ្គាមលោកលើកទី ២ ជប៉ុនបានគោរពយ៉ាងខ្ជាប់ខ្ជួនច្បាប់អន្តរជាតិ រួមទាំងធម្មនុញ្ញអង្គការសហប្រជាជាតិ ហើយនិងខិតខំដោយស្មោះត្រង់ ដើម្បីរក្សា និងពង្រឹងសណ្តាប់ធ្នាប់អន្តរជាតិដោយសេរី និងបើកទូលាយ ។លោក Koizumi បាននិយាយផងដែរថា លោកមានការអារម្មណ៍សោកស្តាយជាខ្លាំង កាលដែលមិនអាចជួបជាមួយសមភាគីចិនរបស់លោក នៅក្នុងវេទិកាមួយនេះ ។គួរឲ្យដឹងថា នៅក្នុងខែឧសភានេះ ក្រសួងការបរទេសចិន បានអំពាវនាវឲ្យបណ្តាប្រទេសនៅតំបន់អាស៊ី-ប៉ាស៊ីហ្វិក ត្រូវប្រុងប្រយ័ត្ន និងរួមគ្នាប្រឆាំងជាមួយសកម្មភាពដ៏ធ្វេសប្រហែសនៃយោធានិយមថ្មីរបស់ជប៉ុន ៕

ប្រមុខ WHO ទទួចសុំឲ្យមានការបញ្ចុះសពដោយសុវត្ថិភាព អំឡុងធ្វើដំណើរទៅកាន់តំបន់រីករាលដាលឆ្លងជំងឺអេបូឡា

ប្រមុខអង្គការសុខភាពពិភពលោក(WHO) បានជំរុញឲ្យប្រជាពលរដ្ឋរស់នៅក្នុងខេត្តដែលរងផលប៉ះពាល់ដោយសារការរីករាលដាលឆ្លងជំងឺអេបូឡានៅសាធារណរដ្ឋប្រជាធិបតេយ្យកុងហ្គោ ត្រូវស្វែងរកការព្យាបាល និងបញ្ចុះសាកសពឲ្យបានត្រឹមត្រូវប្រកបដោយសុវត្ថិភាព ដើម្បីទប់ស្កាត់ជំងឺមួយនេះ ។ការរីករាលដាលឆ្លងដែលជារីករាលដាលឆ្លងលើកទី ១៧ និងជាការរីករាលដាលឆ្លងធំបំផុតលើកទី ៣នៅកុងហ្គោ ចាប់តាំងពីជំងឺអេបូឡា ត្រូវបានរកឃើញកាលពីរយៈពេលកន្លះសតវត្សរ៍មុន ហួសពីសមត្ថភាពសកល គឺជាអ្វីមួយដែលអគ្គលេខាធិការ WHOលោក Tedros Adhanom Ghebreyesus ទទួលស្គាល់ការពិតក្នុងសប្តាហ៍នេះ ។លោក Tedros និយាយថា ជំងឺអេបូឡាដែលកំពុងរីករាលដាលឆ្លងនៅកុងហ្គោ គ្មានវ៉ាក់សាំង ឬការព្យាបាលត្រូវបានអនុម័តនោះទេ ។ ការបញ្ឈប់ការចម្លងជំងឺអេបូឡា គឺផ្អែកលើទាំងស្រុងលើការចូលដល់របស់មនុស្ស ។សូមបញ្ជាក់ថា ស្ថានភាពសន្តិសុខនៅតំបន់ភាគខាងកើតកុងហ្គោ ដែលញាំញីដោយសារជម្លោះពាក់ព័ន្ធនឹងក្រុមប្រដាប់អាវុធអស់រយៈពេល ៣ទសវត្សរ៍មកហើយនោះ គឺជាឧបសគ្គដ៏ធំមួយ ក្នុងការចូលដល់តំបន់រីករាលដាលឆ្លងជំងឺអេបូឡា ។ សេវាកម្មសុខភាពរដ្ឋនៅតំបន់ដាច់ស្រយាលនៅខេត្ត Itur ពុំមាននោះទេ អស់រយៈពេលជាច្រើនទសវត្សរ៍មកហើយ ៕

បណ្ដាញសង្គម

ព័ត៌មានថ្មីៗ

ក្រសួងការងារ នាំយកឱកាសការងារជាង ១ម៉ឺនកន្លែង អត្ថប្រយោជន៍ ប.ស.ស. និងកម្មវិធី TVET ដល់ប្រជាពលរដ្ឋនៅស្រុកសាមគ្គីមានជ័យ ខេត្តកំពង់ឆ្នាំង

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ផ្ញើសារលិខិតអបអរសាទរ ថ្វាយសម្តេចព្រះមហាក្សត្រី ព្រះវររាជមាតាជាតិខ្មែរ ត្រូវបានសហគមន៍ (OB-PS) ថ្វាយនូវ ពានសមាជិកភាពកិត្តិយសជើងឯក “Champions Award” នៅក្នុងឱកាសនៃមហាសន្និបាតកាយឫទ្ធិនារីពិភពលោក (WAGGGS)

មេដឹកនាំ EU នឹងជជែកតវ៉ាគ្នា ជុំវិញថវិការយៈពេល ៧ឆ្នាំបន្ទាប់របស់ប្លុក និងស្វែងរកប្រភពចំណូលថ្មី

របាយការណ៍៖ មន្ទីរបញ្ចកោណត្រូវការ ៨០ពាន់លានដុល្លារ ដើម្បីទូទាត់សង្គ្រាមអ៊ីរ៉ង់ និងការចំណាយផ្សេងទៀត

អនុប្រធានាធិបតីអាមេរិក លោក Vance លុបចោលការធ្វើដំណើរ សម្រាប់កិច្ចចរចាសន្តិភាពជាមួយអ៊ីរ៉ង់

អាល្លឺម៉ង់បើកមជ្ឈមណ្ឌលសង្គ្រាមចម្រុះ ស្របពេលមានការធ្វើយោធូបនីយកម្មកាន់តែទូលំទូលាយនៅក្នុងប្រទេសនេះ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877