BTV NEWS

យន្តហោះចម្បាំងស៊ុយអែត ស្ទាក់យន្តហោះប្រយុទ្ធរបស់រុស្ស៊ី នៅជិតព្រំដែន

លីបង់រាយការណ៍ពីការវាយប្រហាររបស់អ៊ីស្រាអែលនៅភាគខាងត្បូង ក្រោយមានការព្រមានជម្លៀស

ប៉ាគីស្ថាន និងអេហ្ស៊ីបស្វាគមន៍វឌ្ឍនភាព រវាងអាមេរិក និងអ៊ីរ៉ង់ ដោយសង្ឃឹមមានកិច្ចព្រមព្រៀងសន្តិភាពដំបូង

ចំនួនអ្នកស្លាប់ដោយសាររញ្ជួយដី នៅហ្វីលីពីន កើនឡើងដល់ ៦១នាក់ ខណៈប្រតិបត្តិការជួយសង្គ្រោះកំពុងបន្ត

ព័ត៌មានអន្តរជាតិ

លោក ស៊ី ជួបជាមួយនាយករដ្ឋមន្ត្រីប៉ាគីស្ថាន ខណៈសង្គ្រាមអ៊ីរ៉ង់ទំនងគ្របដណ្ដប់កិច្ចពិភាក្សា

ប្រព័ន្ធផ្សព្វផ្សាយរដ្ឋ បានរាយការណ៍ថា ប្រធានាធិបតីចិន លោក ស៊ី ជីនពីង (Xi Jinping) បានជួបពិភាក្សាជាមួយនាយករដ្ឋមន្ត្រីប៉ាគីស្ថាន លោក Shehbaz Sharif នៅទីក្រុងប៉េកាំង នាថ្ងៃចន្ទ (ទី២៥ ខែឧសភា ឆ្នាំ២០២៦) នេះ ខណៈដែលកិច្ចប្រឹងប្រែងផ្នែកការទូតរបស់ប្រទេសជាច្រើន ដើម្បីបញ្ចប់សង្គ្រាមអ៊ីរ៉ង់ជាផ្លូវការ នៅតែបន្តទៅមុខក្នុងល្បឿនយឺតៗ។កិច្ចប្រជុំកម្រិតខ្ពស់នេះ ដែលត្រូវបានរាយការណ៍ដោយទីភ្នាក់ងារសារព័ត៌មានរដ្ឋ Xinhua បានធ្វើឡើងបន្ទាប់ពីមានកិច្ចពិភាក្សារបស់លោក Sharif កាលពីព្រឹកនេះ ជាមួយនាយករដ្ឋមន្ត្រី លោក Li Qiang ដែលជាមេដឹកនាំលំដាប់ទី២ របស់ប្រទេស។ទូរទស្សន៍ប៉ាគីស្ថាន បានផ្សាយនៅថ្ងៃចន្ទថា ក្នុងដំណើរទស្សនកិច្ចរបស់លោកទៅកាន់ប្រទេសចិននេះ លោក Sharif ត្រូវបានអមដំណើរដោយមេបញ្ជាការកងទ័ព លោក Asim Munir ដែលជាអ្នកចរចាសំខាន់របស់ទីក្រុងអ៊ីស្លាម៉ាបាដ រវាងសហរដ្ឋអាមេរិក និងអ៊ីរ៉ង់។ ព័ត៌មានលម្អិត អំពីការពិភាក្សានេះ មិនត្រូវបានផ្សព្វផ្សាយភ្លាមៗដោយប្រព័ន្ធផ្សព្វផ្សាយរដ្ឋចិននោះទេ។ប៉ាគីស្ថានបានលេចឡើងក្នុងនាមជាអន្តរការី រវាងសហរដ្ឋអាមេរិក និងអ៊ីរ៉ង់ ដោយធ្វើជាម្ចាស់ផ្ទះនៃកិច្ចពិភាក្សាទល់មុខជាប្រវត្តិសាស្ត្រ កាលពីខែមុន តែមិនសម្រេចបាននូវកិច្ចព្រមព្រៀងយូរអង្វែងឡើយ។ ចំណែកប្រទេសចិនបានដើរតួនាទីយ៉ាងស្ងប់ស្ងាត់ ដោយដឹកនាំការជជែកតាមទូរស័ព្ទ និងកិច្ចប្រជុំជាមួយមន្ត្រីនៃប្រទេសឈូងសមុទ្រដែលរងផលប៉ះពាល់។ទូរទស្សន៍ PTV ដែលគ្រប់គ្រងដោយរដ្ឋរបស់ប៉ាគីស្ថាន បានរាយការណ៍ថា អំឡុងពេលថ្លែងទៅកាន់ថ្នាក់ដឹកនាំចិន នៅទីក្រុងប៉េកាំង រួមជាមួយលោក Munir លោក Sharif បាននិយាយថា «ពិភពលោកកំពុងឆ្លងកាត់ពេលវេលាដ៏សំខាន់មួយ»៕

សារព័ត៌មាន៖ កិច្ចព្រមព្រៀងក្របខណ្ឌរវាងសហរដ្ឋអាមេរិក និងអ៊ីរ៉ង់ សម្រេចបាន ៩៥%

សារព័ត៌មាន Fox Newsបានរាយការណ៍កាលពីថ្ងៃអាទិត្យ ដោយដកស្រង់ប្រភពថា កិច្ចព្រមព្រៀងក្របខណ្ឌរវាងសហរដ្ឋអាមេរិក គឺ «៩៥% រួចរាល់ហើយ»។ យោងតាមពួកគេ ទីក្រុងតេអេរ៉ង់បានយល់ព្រមជាគោលការណ៍ចំពោះកិច្ចព្រមព្រៀងក្របខណ្ឌ ហើយវាបានបញ្ចប់ ៩៥%ហើយ។មន្ត្រីម្នាក់បានប្រាប់សារព័ត៌មាននេះថា ៖«យើងមានកិច្ចព្រមព្រៀងលើឃ្លាំងស្តុកអាវុធនុយក្លេអ៊ែរ និងច្រកសមុទ្រហ័រមូស ប៉ុន្តែកំពុងចរចាអំពីការកែសម្រួលលក្ខខណ្ឌ»។លោកបាននិយាយាថា៖ «យើងមិនទាន់ទៅឈានដល់កិច្ចព្រមព្រៀងនៅឡើយទេ។ យើងនឹងមិនចុះហត្ថលេខាលើកិច្ចព្រមព្រៀងនៅថ្ងៃនេះ ឬថ្ងៃស្អែកទេ»។មន្ត្រីរូបនេះជឿជាក់ថា ប្រធានាធិបតីអាមេរិក លោក ដូណាល់ ត្រាំ អាចផ្តល់ពេលវេលា ៥-៧ ថ្ងៃទៀតដល់កិច្ចព្រមព្រៀងនេះ ដើម្បីបញ្ចប់វា។ ប្រភពដដែលបានបញញ្ជាក់ថា ប្រសិនបើទីក្រុងវ៉ាស៊ីនតោនមិនអាចឈានដល់កិច្ចព្រមព្រៀងអំណោយផលទេ យោធាអាមេរិកអាចបន្តទម្លាក់គ្រាប់បែកលើសាធារណរដ្ឋឥស្លាម ។ នាពេលមុននេះ លោក ត្រាំ បាននិយាយថា កិច្ចព្រមព្រៀងជាមួយអ៊ីរ៉ង់ មិនទាន់បានបញ្ចប់ពេញលេញនៅឡើយទេ។ លោកក៏បាននិយាយផងដែរថា លោកបានណែនាំអ្នកចរចារបស់លោក «កុំប្រញាប់ប្រញាល់ចូលទៅក្នុងកិច្ចព្រមព្រៀង»ជាមួយទីក្រុងតេអេរ៉ង់៕

កូរ៉េខាងជើងនឹងរៀបចំកិច្ចប្រជុំគណបក្សកាន់អំណាចដ៏សំខាន់ នៅខែក្រោយ

ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃចន្ទ (ទី២៥ ខែឧសភា ឆ្នាំ២០២៦) នេះថា ប្រទេសកូរ៉េខាងជើងនឹងរៀបចំកិច្ចប្រជុំពេញអង្គរបស់គណបក្សពលករកូរ៉េ (WPK) ដែលកំពុងកាន់អំណាច នៅខែក្រោយ។ទីភ្នាក់ងារសារព័ត៌មានកណមជ្ឈិមកូរ៉េ (KCNA) បានរាយការណ៍ថា ការិយាល័យនយោបាយរបស់ WPK បានសម្រេចរៀបចំកិច្ចប្រជុំពេញអង្គលើកទី២ នៃគណៈកម្មាធិការមជ្ឈិមលើកទី៩ នៅចុងខែមិថុនាខាងមុខ។KCNA បានឲ្យដឹងថា កិច្ចប្រជុំនេះនឹងត្រូវបានរៀបចំឡើង «ដើម្បីពិនិត្យឡើងវិញជាបណ្តោះអាសន្ន អំពីការអនុវត្តគោលនយោបាយរបស់គណបក្ស និងរដ្ឋ សម្រាប់ឆ្នាំ២០២៦ និងពិភាក្សាអំពីការងារ នៅក្នុងឆមាសទី២ នៃឆ្នាំនេះ និងបញ្ហាសំខាន់ៗមួយចំនួនទៀត»។គួរបញ្ជាក់ថា កូរ៉េខាងជើងតែងតែរៀបចំកិច្ចប្រជុំពេញអង្គ នៅចុងខែមិថុនា និងខែធ្នូ ខណៈពេលដែលក៏កោះប្រជុំផងដែរ នៅពេលដែលបញ្ហាសំខាន់ៗ ចាំបាច់ត្រូវពិភាក្សា។កិច្ចប្រជុំខែមិថុនា ដែលត្រូវបានគ្រោងទុកនេះ បានកើតឡើងនៅពេលដែលកូរ៉េខាងជើងស្វែងរកការអនុវត្តវិធានការតាមដាន សម្រាប់ការសម្រេចចិត្តដែលបានធ្វើឡើងនៅក្នុងសមាជគណបក្សលើកទី៩ ដែលបានរៀបចំឡើងកាលពីចុងខែកុម្ភៈ៕

ប្រធានចារកម្ម៖ ទីភ្នាក់ងារចារកម្មអូស្ត្រាលី ប្រឈមនឹងការគំរាមកំហែងយ៉ាងខ្លាំង មុនពេលមានការវាយប្រហារនៅឆ្នេរ Bondi

ប្រធានចារកម្មរបស់ប្រទេសនេះ បាននិយាយនៅថ្ងៃចន្ទនេះ ទីភ្នាក់ងារចារកម្មអូស្ត្រាលី បានប្រឈននឹងការគំរាមកំហែងជាច្រើន នៅមុនពេលមានការបាញ់ប្រហារដ៏ធំប្រឆាំងនឹងជនជាតិជ្វីហ្វនៅឆ្នេរ Bondi ក្នុងខែធ្នូ។ លោក Sajid Akram និងកូនប្រុសឈ្មោះ Naveed ត្រូវបានចោទប្រកាន់ពីបទបើកការបាញ់ប្រហារ នៅពេលដែលគ្រួសារជ្វីហ្វ បានប្រមូលផ្តុំគ្នានៅឆេ្នរ Bondi សម្រាប់ពិធីបុណ្យ Hanukkah ដែលបានសម្លាប់មនុស្ស ១៥នាក់ នៅក្នុងការបាញ់ប្រហារដ៏ធំបំផុតរបស់អូស្ត្រាលី ក្នុងរយៈពេលជាច្រើនទសវត្សរ៍។មន្ត្រីសន្តិសុខជាន់ខ្ពស់លោក Mike Burgess បានធ្វើការស៊ើបអង្កេតលើការបាញ់ប្រហារនេះ ជាកន្លែងដែលលោកត្រូវបានសួរអំពីសមត្ថភាពប្រឆាំងភេរវកម្មរបស់អូស្ត្រាលី។លោក Burgess បាននិយាយថា អង្គការចារកម្មសន្តិសុខអូស្ត្រាលី ត្រូវរងរគំរាមកំហែងជាច្រើន ចាប់ពីភាពជ្រុលនិយមខាងសាសនា រហូតដល់យុវជនជ្រុលនិយមតាមអ៊ីនធឺណិត។ប៉ុន្តែលោកបាននិយាយថា ទីភ្នាក់ងារចារកម្មនៅតែមានធនធានគ្រប់គ្រាន់ ដើម្បីធ្វើការងាររបស់ខ្លួន៕

របាយការណ៍៖ មេដឹកនាំកំពូលអ៊ីរ៉ង់ត្រូវបានកាត់ផ្តាច់ពីការទាក់ទងដោយផ្ទាល់ ដោយសារភ័យខ្លាចការវាយប្រហារ

មេដឹកនាំកំពូលអ៊ីរ៉ង់ លោក Mojtaba Khamenei កំពុងប្រតិបត្តិការពីទីតាំងដែលមិនបានបង្ហាញឲ្យ ឃើញ ជាមួយនឹងការចូលប្រើប្រាស់មានកម្រិតទៅកាន់ពិភពខាងក្រៅ ដោយពឹងផ្អែកលើបណ្តាញអ្នកនាំសារ ដើម្បីបញ្ជូនសារ ខណៈដែលថ្នាក់ដឹកនាំប្រទេសនេះ មានការភ័យខ្លាចចំពោះការវាយប្រហារបន្ថែមទៀត។ នេះបើយោងតាមការចុះផ្សាយផ្តាច់មុខរបស់សារព័ត៌មាន CBS News ដែលបានដកស្រង់សម្តី មន្ត្រីអាមេរិកដែលដឹងពីព័ត៌មានចារកម្ម។របាយការណ៍កាលពីថ្ងៃអាទិត្យ បានអះអាងថា បញ្ហាទំនាក់ទំនងនៅក្នុងជួរថ្នាក់ដឹកនាំអ៊ីរ៉ង់ បានក្លាយជាឧបសគ្គដ៏ធំមួយក្នុងការចរចាជាមួយរដ្ឋបាលលោក ដូណាល់ ត្រាំ (Donald Trump) ដោយមន្ត្រីអ៊ីរ៉ង់ ត្រូវបានអនុញ្ញាតឲ្យចូលរួមជាមួយទីក្រុងវ៉ាស៊ីនតោន ដែលកំពុងតស៊ូដើម្បីទំនាក់ទំនង សូម្បីតែនៅក្នុងប្រព័ន្ធផ្ទាល់ខ្លួនរបស់ពួកគេក៏ដោយ។មន្ត្រីអាមេរិកបានប្រាប់ CBS ថា នៅពេលដែលសំណើត្រូវបានផ្ញើទៅកាន់ទីក្រុងតេអេរ៉ង់ ការពន្យារពេលដ៏សំខាន់បានកន្លងផុតទៅ មុនពេលការឆ្លើយតបត្រូវបានទទួល ពីព្រោះសារនឹងធ្វើដំណើរតាមរយៈអន្តរការីទៅកាន់មេដឹកនាំកំពូលជាមុនសិន។យោងតាម CBS ថ្នាក់ដឹកនាំអ៊ីរ៉ង់បានអនុម័តវិធានការសន្តិសុខខ្លាំង បន្ទាប់ពីការវាយប្រហាររបស់សហរដ្ឋអាមេរិក និងអ៊ីស្រាអែលក្នុងអំឡុងពេលប្រតិបត្តិការ Epic Fury ដែលមន្ត្រីចារកម្ម បាននិយាយថា អាចឲ្យមានការកំណត់គោលដៅ និងការសម្លាប់ឥស្សរជនជាន់ខ្ពស់អ៊ីរ៉ង់ជាច្រើនរូប៕

រុស្ស៊ីធ្វើការវាយប្រហារសងសឹកទ្រង់ទ្រាយធំលើអ៊ុយក្រែន

ក្រសួងការពារជាតិរុស្ស៊ីបាននិយាយកាលពីថ្ងៃអាទិត្យថា យោធាបានធ្វើការវាយប្រហារដោយមីស៊ីល និងយានដ្រូនជាបន្តបន្ទាប់ប្រឆាំងនឹងគោលដៅកងទ័ពអ៊ុយក្រែន។យោងតាមក្រសួង ការវាយប្រហារនេះ គឺជាការសងសឹកចំពោះការវាយប្រហាររបស់អ៊ុយក្រែនប្រឆាំងនឹងគោលដៅស៊ីវិលនៅលើទឹកដីរុស្ស៊ី»។ ការវាយប្រហាររបស់រុស្ស៊ីពាក់ព័ន្ធនឹងមីស៊ីលបាលីស្ទីក Oreshnik មីស៊ីលបាលីស្ទីកចេញពីអាកាស Iskander មីស៊ីលបាលីស្ទីកល្បឿនលឿនជាងសំឡេងបាញ់ចេញពីអាកាស Kinzhal មីស៊ីលតម្រង់គោលដៅ Tsirkon ក៏ដូចជាមីស៊ីលតម្រង់គោលដៅបាញ់ចេញពីអាកាស ពីសមុទ្រ និងពីដី និងយានដ្រូនវាយប្រហារ។ ការវាយប្រហារនេះ បានកំណត់គោលដៅទៅលើទីតាំងបញ្ជាការ មូលដ្ឋានទ័ពអាកាស និងសហគ្រាសឧស្សាហកម្មការពារជាតិ។ក្រសួងសង្គ្រោះបន្ទាន់រុស្ស៊ីបាននិយាយថា មនុស្ស ២១នាក់ បានស្លាប់ នៅក្នុងការវាយប្រហារដោយយានដ្រូនរបស់អ៊ុយក្រែនលើអន្តេវាសិកដ្ឋានមហាវិទ្យាល័យមួយក្នុងតំបន់ Luhansk កាលពីថ្ងៃសុក្រ។ ទីក្រុងគីវបានបដិសេធការទទួលខុសត្រូវ ដោយនិយាយថា កងកម្លាំងរបស់ខ្លួនវាយប្រហារតែទីតាំងយោធា និងវត្ថុដែលប្រើប្រាស់សម្រាប់គោលបំណងយោធា ស្របតាមច្បាប់មនុស្សធម៌អន្តរជាតិ។ប្រធានាធិបតីអ៊ុយក្រែន លោក វ្ល៉ូឌីមី ហ្សេឡិនស្គី (Volodymyr Zelensky) បាននិយាយនៅក្នុងសារ Telegram កាលពីថ្ងៃអាទិត្យថា រុស្ស៊ីបានវាយប្រហារដោយដ្រូន ចំនួន ៦០០គ្រឿង និងមីស៊ីលចំនួន ៩០ គ្រាប់ ពេញមួយយប់ ដោយកំណត់គោលដៅលើទីក្រុងគីវ៕

តម្លៃប្រេងធ្លាក់ចុះដោយសារក្តីសង្ឃឹមនៃកិច្ចព្រមព្រៀងសន្តិភាពរវាងសហរដ្ឋអាមេរិក និងអ៊ីរ៉ង់

តម្លៃប្រេងបានធ្លាក់ចុះយ៉ាងខ្លាំង ហើយទីផ្សារភាគហ៊ុនអាស៊ីបានកើនឡើងដោយសារក្តីសង្ឃឹមនៃកិច្ចព្រមព្រៀងមួយដែលអាចនាំមកនូវការបញ្ចប់សង្គ្រាមរវាងសហរដ្ឋអាមេរិក និងអ៊ីស្រាអែលជាមួយអ៊ីរ៉ង់។លោក Marco Rubio រដ្ឋមន្ត្រីការបរទេសអាមេរិក បានថ្លែងក្នុងអំឡុងពេលទស្សនកិច្ចទៅកាន់ប្រទេសឥណ្ឌាថា ក្រុមអ្នកចរចាមាន "ចំណុចរឹងមាំមួយនៅលើតុ" ហើយកិច្ចព្រមព្រៀងដើម្បីបញ្ចប់ជម្លោះអាចនឹងឈានដល់នៅថ្ងៃចន្ទនេះ។នៅព្រឹកថ្ងៃចន្ទ២៥ឧសភា នេះ តម្លៃប្រេងឆៅសកល Brent បានធ្លាក់ចុះ ៥,៥ % មកនៅត្រឹម ៩៧ ,៩០ដុល្លារ ឬស្មើ ៧២,៦៤ ផោន ក្នុងមួយបារ៉ែល ខណៈប្រេងឆៅដែលជួញដូរនៅសហរដ្ឋអាមេរិកបានធ្លាក់ចុះ ៥,៩% មកនៅត្រឹម ៩០,៩៣ ដុល្លារក្នុងមួយបារ៉ែល។ប្រធានាធិបតីអាមេរិក Donald Trump ធ្លាប់បាននិយាយថា កិច្ចព្រមព្រៀងនេះនឹងរួមបញ្ចូលការបើកផ្លូវដឹកជញ្ជូនដ៏សំខាន់នៃច្រកសមុទ្រ Hormuz ឡើងវិញ ដោយពុំបានផ្តល់ព័ត៌មានលម្អិតបន្ថែម។អ៊ីរ៉ង់បាននិយាយថា ជំហររបស់សហរដ្ឋអាមេរិក និងអ៊ីរ៉ង់ បានស្របគ្នាកាលពីសប្តាហ៍មុន។ផ្លូវទឹកតូចចង្អៀតនេះ ដែលប្រេង និងឧស្ម័នធម្មជាតិរាវ (LNG) របស់ពិភពលោកប្រហែលមួយភាគប្រាំឆ្លងកាត់ជាធម្មតា ត្រូវបានបិទយ៉ាងជិតចាប់តាំងពីជម្លោះបានចាប់ផ្តើមកាលពីថ្ងៃទី២៨ ខែកុម្ភៈ ២០២៦នេះ៕

អវកាសយានិករបស់យាន Shenzhou-23 ចូលក្នុងស្ថានីយអវកាស Tiangong

អវកាសយានិកទាំង ៣រូប នៅលើយានអវកាស Shenzhou-23 របស់ប្រទេសចិន បានចូលទៅក្នុងស្ថានីយអវកាស Tiangong ហើយបានជួបជាមួយអវកាសយានិក ៣នាក់ទៀត នៅថ្ងៃចន្ទ (ទី២៥ ខែឧសភា ឆ្នាំ២០២៦)នេះ ដោយចាប់ផ្តើមដំណើរកាផ្លាស់ប្ដូរក្រុមអវកាសយានិកថ្មី នៅក្នុងគន្លងតារាវិថី។យោងតាមទីភ្នាក់ងារអវកាសចិន (CMSA) បានឲ្យដឹងថា ក្រុមអវកាសយានិករបស់យានអវកាស Shenzhou-21 នៅស្ថានីយ Tiangong បានបើកទ្វារនៅម៉ោង ៥:១៣នាទីព្រឹក (ម៉ោងនៅទីក្រុងប៉េកាំង) ហើយបានស្វាគមន៍អ្នកទៅដល់ថ្មី។បន្ទាប់មក ក្រុមអវកាសយានិកទាំងចាស់ និងថ្មី បានថតរូបជាក្រុមជាមួយគ្នា សម្រាប់ការជួបជុំអវកាសលើកទី៨ ក្នុងប្រវត្តិសាស្ត្រអវកាសរបស់ប្រទេសចិន។ CMSA បានបញ្ជាក់បន្ថែមថា ពួកគេនឹងធ្វើការផ្លាស់ប្ដូរភារកិច្ចនៅលើស្ថានីយអវកាសនេះ៕

ការតវ៉ានៅតែបន្តមាននៅបូលីវី ដោយកំពុងទាមទារឲ្យប្រធានាធិបតីលាលែងពីតំណែង

ការតវ៉ាប្រឆាំងរដ្ឋាភិបាលដែលទាមទារឲ្យប្រធានាធិបតីបូលីវី លោក Rodrigo Paz លាលែងពីតំណែងបានបន្តមាននៅថ្ងៃអាទិត្យ (ទី២៤ ខែឧសភា ឆ្នាំ២០២៦) ខណៈដែលប្រទេសនេះនៅតែជាប់ក្នុងវិបត្តិ។ នេះបើយោងតាមសេចក្ដីរាយការណ៍របស់ប្រព័ន្ធផ្សព្វផ្សាយក្នុងស្រុក។នៅក្នុងការតវ៉ានេះ ក្រុមបាតុករបានដាក់របាំងបិទផ្លូវ និងបិទផ្លូវហាយវេ នៅទីតាំង ៥៩កន្លែង នៅទូទាំងតំបន់រដ្ឋបាលចំនួន ៩ របស់ប្រទេស។ ដោយផ្អែកលើផែនទីប្រាប់ផ្លូវចុងក្រោយបំផុតដែលបានចេញផ្សាយដោយរដ្ឋបាលផ្លូវហាយវេរបស់បូលីវី ការដឹកជញ្ជូនត្រូវបានរំខាននៅក្នុងតំបន់ Andean របស់ទីក្រុង La Paz, Oruro និង Potosi ក៏ដូចជានៅក្នុងតំបន់កណ្តាលនៃទីក្រុង Chuquisaca និង Cochabamba និងតំបន់ភាគខាងកើតនៃទីក្រុង Santa Cruz de la Sierra។ការប៉ុនប៉ងរបស់កងកម្លាំងសន្តិសុខ ដើម្បីបើកផ្លូវហាយវេប្រវែង ២២៧គីឡូម៉ែត្រឡើងវិញ រវាងទីក្រុង La Paz និង Oruro ជាផ្នែកមួយនៃប្រតិបត្តិការមួយដែលមានឈ្មោះថា White Flag Humanitarian Corridor ត្រូវបានជួបនឹងការតស៊ូយ៉ាងខ្លាំងពីក្រុមបាតុករ ដែលត្រូវបានគេរាយការណ៍ថា បានគប់របស់មិនល្អ និងដុំថ្មទៅលើនគរបាល។ការតវ៉ា ដែលបានបន្តអស់រយៈពេលជិត ៣សប្តាហ៍ប្រឆាំងនឹងអ្វីដែលត្រូវបានពិពណ៌នាថា ជាវិបត្តិសេដ្ឋកិច្ចដ៏អាក្រក់បំផុតរបស់ប្រទេសបូលីវី ក្នុងរយៈពេល ៤០ឆ្នាំចុងក្រោយនេះ បាននាំឲ្យមានការប៉ះទង្គិចគ្នា រវាងក្រុមបាតុករ និងកងកម្លាំងសន្តិសុខ នៅទីក្រុងជាច្រើន ជាពិសេសរដ្ឋធានីរដ្ឋបាល La Paz។ ចំនួនមនុស្សដែលត្រូវបានឃុំខ្លួន ក្នុងអំឡុងពេលមានភាពចលាចល ត្រូវបានគេរាយការណ៍ថា បានកើនឡើងដល់ ១២០នាក់ហើយ។អតីតប្រធានាធិបតីបូលីវី លោក Evo Morales បានអំពាវនាវឲ្យរដ្ឋាភិបាលរៀបចំការបោះឆ្នោត ក្នុងរយៈពេល ៩០ថ្ងៃ ជាដំណោះស្រាយចំពោះវិបត្តិ។ រដ្ឋបាលរបស់លោក Paz បានស្តីបន្ទោសអ្នកគាំទ្ររបស់លោក Morales ដែលបច្ចុប្បន្នកំពុងប្រឈមនឹងដីកាចាប់ខ្លួនថា បានបង្កឲ្យមានអំពើហិង្សា និងភាពចលាចលនេះ៕

ចំនួនអ្នកស្លាប់កើនដល់យ៉ាងតិច ៣នាក់ ដោយ ១៧នាក់បាត់ខ្លួន ក្រោយបាក់រលំអគារ នៅហ្វីលីពីន

នៅថ្ងៃចន្ទ (ទី២៥ ខែឧសភា ឆ្នាំ២០២៦) នេះ មន្ត្រីបានប្រាប់ឲ្យដឹងថា ក្រុមអ្នកជួយសង្គ្រោះ បានទាញយកមនុស្ស ២នាក់ចេញពីគំនរបាក់បែកនៃអគារបាក់រលំដែលកំពុងស្ថិតក្រោមការសាសង់ នៅប្រទេសហ្វីលីពីន ដោយធ្វើឲ្យចំនួនអ្នកស្លាប់កើនឡើងដល់ ៣នាក់ហើយ ខណៈដែលក្រុមជួយសង្គ្រោះ បានបន្តប្រតិបត្តិការស្វែងរក និងជួយសង្គ្រោះ បន្ទាប់ពីការស្កេនពេញមួយយប់ បានរកឃើញសញ្ញាអ្នកនៅមានជីវិត នៅក្រោមគំនរបាក់បែកនោះ។អ្នកនាំពាក្យនៅការិយាល័យការពារអគ្គិភ័យក្នុងតំបន់ លោកស្រី Maria Leah Sajili បាននិយាយនៅក្នុងបទសម្ភាសន៍តាមទូរស័ព្ទថា ជនរងគ្រោះម្នាក់ ក្នុងចំណោមជនរងគ្រោះ ២នាក់ មានដង្ហើម នៅពេលដែលរគាត់ត្រូវបានទាញចេញ ប៉ុន្តែក្រោយមកបានបាត់បង់ជីវិត ខណៈដែលម្នាក់ទៀត បានគាំងបេះដូង ខណៈពេលដែលនៅតែជាប់ក្រោមនោះ។មន្ត្រីបាននិយាយថា ការស៊ើបអង្កេតមួយកំពុងដំណើរការ ជុំវិញមូលហេតុអ្វីដែលបណ្តាលឲ្យមានការបាក់រលំអគារកម្ពស់ច្រើនជាន់នេះ ដែលស្ថិតនៅក្នុងទីក្រុង Angeles ភាគខាងជើងនៃរដ្ឋធានីម៉ានីល។ជាមួយគ្នានេះ លោកស្រី Sajili បានឲ្យដឹងទៀតថា ក្រុមអ្នកជួយសង្គ្រោះ ក៏កំពុងធ្វើការផងដែរ ដើម្បីទាញយកសាកសពមួយទៀតដែលកប់នៅក្រោមគំនរបាក់បែក ប៉ុន្តែជនរងគ្រោះនឹងត្រូវបានបន្ថែមទៅក្នុងចំនួនអ្នកស្លាប់ផ្លូវការ នៅពេលដែលត្រូវបានទាញចេញមក។លោកស្រី Sajili បានបន្តថា អាចមានជនរងគ្រោះជាច្រើនទៀតជាប់នៅទីនោះ បន្ទាប់ពីការស្កេនកម្ដៅ បានរកឃើញសញ្ញាដកដង្ហើម និងចង្វាក់បេះដូង នៅក្រោមគំនរបាក់បែក។ លោកស្រី Sajili បានបន្ថែមថា ចំនួនអ្នកបាត់ខ្លួនមានចំនួន ១៧នាក់ ភាគច្រើនជាកម្មករសំណង់ដែលត្រូវបានចុះបញ្ជីថា កំពុងបំពេញការងារនៅការដ្ឋាននេះ៕

បណ្ដាញសង្គម

ព័ត៌មានថ្មីៗ

កាកបាទក្រហមកម្ពុជា ទទួលថវិកាពីសមាគមឧកញ៉ាកម្ពុជាចំនួន ១,០០៩,៩៩៩ ដុល្លារ អាមេរិក ក្នុងទិវា ៨ឧសភា ២០២៦

យន្តហោះចម្បាំងស៊ុយអែត ស្ទាក់យន្តហោះប្រយុទ្ធរបស់រុស្ស៊ី នៅជិតព្រំដែន

នាយករដ្ឋមន្ត្រីឥណ្ឌា លោក Modi ចាប់ផ្តើមដំណើរទស្សនកិច្ចផ្លូវការទៅកាន់បារាំង និងស្លូវ៉ាគី

[UPDATE] គ្រោះថ្នាក់ធ្លាក់យន្តហោះរបស់កងទ័ពអាកាសឥណ្ឌា មានអ្នកស្លាប់ ៥នាក់

យន្តហោះដឹកជញ្ជូនយោធាធ្លាក់ នៅឥណ្ឌា ខណៈចំនួនអ្នកស្លាប់ និងរបួស មិនទាន់ដឹងនៅឡើយទេ

ឱកាសការងារ ៣៥៥០កន្លែង ជាមួយនឹងអត្ថប្រយោជន៍ ប.ស.ស. និងកម្មវិធី TVET ត្រូវបាននាំយកទៅផ្សព្វផ្សាយជូនពលរដ្ឋដល់មូលដ្ឋានខេត្តសៀមរាប

វិស័យរដ្ឋបញ្ជាក់ពីការប្តេជ្ញាចិត្តក្នុងការជួយពង្រឹងការយល់ដឹងអំពីច្បាប់ និងនីតិវិធីគយដល់វិស័យ SMEs

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានអន្តរជាតិ

លោក ស៊ី ជួប​ជាមួយនាយករដ្ឋមន្ត្រីប៉ាគីស្ថាន ខណៈសង្គ្រាមអ៊ីរ៉ង់ទំនង​គ្រប​ដណ្ដប់​កិច្ចពិភាក្សា​