BTV NEWS

អ៊ីស្រាអែល ភ្ជាប់ល្បឿននៃការដកកងទ័ពពីលីបង់ ទៅនឹងវឌ្ឍនភាពក្នុងការរំសាយអាវុធរបស់ក្រុមហេសបូឡា

ព្យុះត្រូពិកដ៏ខ្លាំងក្លានៅប្រទេសជប៉ុន បានលុបចោលជើងហោះហើរ និងនាវាចម្លង

នាយករដ្ឋមន្ត្រីឥណ្ឌា ទទួលស្វាគមន៍មេដឹកនាំមីយ៉ាន់ម៉ាដែលជាប់ទណ្ឌកម្ម ដើម្បីសាងទំនាក់ទំនង

លោក Zelenskyy ព្រមានពីកង្វះខាតប្រព័ន្ធប្រឆាំងមីស៊ីល ខណៈអាមេរិកបង្វែរការផ្តោតទៅមជ្ឈិមបូព៌ា

ព័ត៌មានអន្តរជាតិ

កូរ៉េខាងជើង៖ ខ្លួនមិនជាប់កាតព្វកិច្ចដោយសន្ធិសញ្ញាណាមួយស្តីពីការមិនរីកសាយអាវុធនុយក្លេអ៊ែរទេ

បេសកជនរបស់ប្រទេសកូរ៉េខាងជើងប្រចាំអង្គការសហប្រជាជាតិ បានប្រកាសថាទីក្រុងព្យុងយ៉ាង មិនជាប់កាតព្វកិច្ចដោយសន្ធិសញ្ញាណាមួយស្តីពីអាវុធអាតូមិកនោះទេ ហើយគ្មានសម្ពាធពីខាងក្រៅណាមួយនឹងផ្លាស់ប្តូរឋានៈរបស់ខ្លួនជារដ្ឋមានអាវុធនុយក្លេអ៊ែរនោះដែរ។ សេចក្តីថ្លែងការណ៍របស់ឯកអគ្គរដ្ឋទូត លោក Kim Song ដែលបានចេញផ្សាយដោយប្រព័ន្ធផ្សព្វផ្សាយរដ្ឋនៅថ្ងៃព្រហស្បតិ៍នេះ បានធ្វើឡើងនៅពេលដែលសហរដ្ឋអាមេរិក និងប្រទេសផ្សេងទៀត បានរិះគន់កម្មវិធីនុយក្លេអ៊ែររបស់កូរ៉េខាងជើង នៅក្នុងសន្និសីទអង្គការសហប្រជាជាតិដែលកំពុងដំណើរការពិនិត្យឡើងវិញនូវសន្ធិសញ្ញាមិនរីកសាយអាវុធនុយក្លេអ៊ែរ (NPT)។ ទីក្រុងព្យុងយ៉ាង បានដកខ្លួនចេញពីសន្ធិសញ្ញាមិនរីកសាយអាវុធនុយក្លេអ៊ែរ (NPT) ក្នុងឆ្នាំ២០០៣ ហើយចាប់តាំងពីពេលនោះមក បានធ្វើការសាកល្បងនុយក្លេអ៊ែរចំនួន៦លើក ដែលជំរុញឱ្យមានទណ្ឌកម្មជាច្រើនពីក្រុមប្រឹក្សាសន្តិសុខអង្គការសហប្រជាជាតិ។ ប្រទេសនេះ ត្រូវបានគេជឿថាមានក្បាលគ្រាប់នុយក្លេអ៊ែររាប់សិបគ្រាប់។ យោងតាមទីភ្នាក់ងារសារព័ត៌មានកណ្តាលកូរ៉េផ្លូវការបានឲ្យដឹងថា លោក Kim បាននិយាយថា «នៅក្នុងសន្និសីទពិនិត្យឡើងវិញសន្ធិសញ្ញាមិនរីកសាយអាវុធនុយក្លេអ៊ែរ (NPT) លើកទី១១ ដែលកំពុងដំណើរការនៅទីស្នាក់ការកណ្តាលអង្គការសហប្រជាជាតិ សហរដ្ឋអាមេរិកនិងប្រទេសមួយចំនួនដែលដើរតាមការដឹកនាំរបស់ខ្លួន កំពុងចោទសួរដោយគ្មានមូលដ្ឋានអំពីស្ថានភាពបច្ចុប្បន្ន និងការអនុវត្តសិទ្ធិដែនអធិបតេយ្យភាព»។ លោកបាននិយាយបន្ថែមថា «ឋានៈរបស់សាធារណរដ្ឋប្រជាមានិតប្រជាធិបតេយ្យកូរ៉េ ជារដ្ឋដែលមានអាវុធនុយក្លេអ៊ែរ នឹងមិនផ្លាស់ប្តូរទេដោយផ្អែកលើការអះអាងវោហាសាស្ត្រពីខាងក្រៅ ឬបំណងជាឯកតោភាគី»។ ដើម្បីបញ្ជាក់ឱ្យច្បាស់ជាថ្មីម្តងទៀត សាធារណរដ្ឋប្រជាមានិតប្រជាធិបតេយ្យកូរ៉េ នឹងមិនជាប់កាតព្វកិច្ចដោយសន្ធិសញ្ញាណាមួយស្តីពីការមិនរីកសាយអាវុធនុយក្លេអ៊ែរឡើយ មិនថាក្នុងកាលៈទេសៈណាក៏ដោយ»។ វិទ្យាស្ថានស្រាវជ្រាវសន្តិភាពអន្តរជាតិស្តុកហូម បានរាយការណ៍ថា រដ្ឋដែលមានអាវុធនុយក្លេអ៊ែរចំនួន៩ រួមមានប្រទេសរុស្ស៊ី សហរដ្ឋអាមេរិក បារាំង ចក្រភពអង់គ្លេស ចិន ឥណ្ឌា ប៉ាគីស្ថាន អ៊ីស្រាអែល និងប្រទេសកូរ៉េខាងជើង មានក្បាលគ្រាប់នុយក្លេអ៊ែរចំនួន ១២.២៤១ គ្រាប់នៅក្នុងខែមករា ឆ្នាំ២០២៥។

បណ្ដារដ្ឋមន្ត្រីការបរទេសអាស៊ាន បានជួបជុំគ្នាមុនជំនួបកំពូលថ្នាក់ដឹកនាំលើកទី៤៨ក្នុងប្រទេសហ្វីលីពីន

បណ្ដារដ្ឋមន្ត្រីការបរទេសមកពីអាស៊ីអាគ្នេយ៍ បានជួបជុំគ្នានៅលើកោះ Cebu ភាគកណ្ដាលរបស់ប្រទេសហ្វីលីពីន នៅថ្ងៃព្រហស្បតិ៍ទី៧ឧសភា សប្ដាហ៍នេះ មុនជំនួបកំពូលមេដឹកនាំអាស៊ាន (ASEAN) លើកទី៤៨ ។ រដ្ឋមន្ត្រីការបរទេសហ្វីលីពីន និងជាប្រធានអាស៊ាន លោកស្រី ម៉ា ថេរេសា ឡាហ្សារ៉ូ (Ma. Theresa Lazaro) បានដឹកនាំកិច្ចប្រជុំនេះ ហើយបានសង្កត់ធ្ងន់លើតម្រូវការសម្រាប់កិច្ចសហប្រតិបត្តិការក្នុងតំបន់ក្នុងការដោះស្រាយបញ្ហាផ្សេងៗ រួមទាំងជម្លោះនៅមជ្ឈិមបូព៌ា ដែលកំពុងជះផលប៉ះពាល់ដល់ប្រជាជាតិអាស៊ីអាគ្នេយ៍។សម្ពាធលើក្រុមមេដឹកនាំក្នុងតំបន់បានកើនឡើងចាប់តាំងពីការវាយប្រហាររបស់សហរដ្ឋអាមេរិក និងអ៊ីស្រាអែលលើអ៊ីរ៉ង់កាលពីចុងខែកុម្ភៈ ២០២៦នេះ ដែលបានជំរុញឱ្យតម្លៃថាមពល ស្បៀងអាហារ និងជីកសិកម្ម កើនឡើងនៅទូទាំងអាស៊ីអាគ្នេយ៍។ បណ្ដារដ្ឋាភិបាលប្លុកអាស៊ាន បានរៀបចំកិច្ចប្រជុំរដ្ឋមន្ត្រីពិសេសស្តីពីថាមពល ការសម្របសម្រួលសេដ្ឋកិច្ច និងសន្តិសុខស្បៀងរួចហើយមុនកិច្ចប្រជុំកំពូលនេះ។ការពិភាក្សាក៏ត្រូវបានគេរំពឹងថានឹងរួមបញ្ចូលកិច្ចខិតខំប្រឹងប្រែងដើម្បីស្រោចស្រង់ឡើងវិញនូវក្រមប្រតិបត្តិដែលជាប់គាំងជាយូរមកហើយនៅក្នុងសមុទ្រចិនខាងត្បូងផងដែរ ខណៈភាពតានតឹងរវាងទីក្រុងម៉ានីល និងទីក្រុងប៉េកាំង បានកើនឡើងជាលំដាប់ក្នុងរយៈពេលប៉ុន្មានខែថ្មីៗនេះ។ ទោះជាយ៉ាងណាក៏ដោយ ការរំពឹងទុកសម្រាប់ការទម្លាយភាពទាល់ច្រកដ៏មានអត្ថន័យណាមួយនៅតែមានកម្រិត។ កិច្ចប្រជុំកំពូលរយៈពេលពីរថ្ងៃ គឺថ្ងៃទី៧ដល់៨ខែឧសភា សប្ដាហ៍នេះ នឹងត្រូវបានកំណត់ឱ្យប្រមូលផ្តុំមេដឹកនាំមកពីសមាគមប្រជាជាតិអាស៊ីអាគ្នេយ៍ដែលមានសមាជិកចំនួន១១ ប្រទេស ក៏ដូចជាបណ្ដាដៃគូសន្ទនាផងដែរ៕

ចិនរិះគន់ការបាញ់មីស៊ីលប្រយុទ្ធលើកដំបូងរបស់ជប៉ុនក្រោយសង្គ្រាមលោកលើកទីពីរ នៅក្រៅប្រទេស

អ្នកនាំពាក្យក្រសួងការបរទេសចិនបាននិយាយកាលពីថ្ងៃពុធ ៦ឧសភា សប្ដាហ៍នេះ ថាកងកម្លាំងស្តាំនិយមរបស់ជប៉ុនកំពុងជំរុញឱ្យមានការបង្កើនល្បឿននៃការបង្កើតយោធាឡើងវិញ ដោយបន្ថែមថា ចរឹតយោធានិយមបែបថ្មីរបស់ប្រទេសជប៉ុន កំពុងកើនឡើង និងបង្កការគំរាមកំហែងដល់សន្តិភាព និងស្ថិរភាពក្នុងតំបន់។អ្នកនាំពាក្យក្រសួងការបរទេសចិនលោក Lin Jian បានធ្វើអត្ថាធិប្បាយបែបនេះនៅក្នុងសន្និសីទសារព័ត៌មានប្រចាំថ្ងៃ ជាការឆ្លើយតបទៅនឹងសំណួរអំពីរបាយការណ៍ដែលនិយាយថា ជប៉ុនទើបតែបាញ់មីស៊ីលប្រភេទ Type 88 នៅក្នុងសមយុទ្ធយោធារួមគ្នាដែលមានឈ្មោះថា "Balikatan" រវាងសហរដ្ឋអាមេរិក និងហ្វីលីពីន ជាលើកដំបូងដែលជប៉ុនបានបាញ់មីស៊ីលប្រយុទ្ធនៅក្រៅប្រទេសចាប់តាំងពីសង្គ្រាមលោកលើកទីពីរ។លោក Lin បាននិយាយថា ជប៉ុនមានកំហុសប្រវត្តិសាស្ត្រយ៉ាងធ្ងន់ធ្ងរចំពោះការឈ្លានពាន និងរបប អាណានិគមរបស់ខ្លួនលើប្រទេសអាស៊ីអាគ្នេយ៍ រួមទាំងហ្វីលីពីនផងដែរ។ នៅក្នុងឆ្នាំពិសេសរម្លឹកដល់ខួប៨០ឆ្នាំ នៃការបើកតុលាការសឹកអន្តរជាតិតូក្យូ អតីតអ្នកឈ្លានពានបានបរាជ័យក្នុងការឆ្លុះបញ្ចាំងយ៉ាងស៊ីជម្រៅអំពីឧក្រិដ្ឋកម្មប្រវត្តិសាស្ត្ររបស់ខ្លួន។ ផ្ទុយទៅវិញ ខ្លួនបានបញ្ជូនកងកម្លាំងយោធាទៅក្រៅប្រទេស និងបាញ់មីស៊ីលប្រយុទ្ធ ក្រោមលេសនៃអ្វីដែលហៅថា "កិច្ចសហប្រតិបត្តិការសន្តិសុខ"។លោក Lin បានបញ្ជាក់ថា និន្នាការនេះបង្ហាញជាថ្មីម្តងទៀតថា កងកម្លាំងស្តាំនិយមរបស់ប្រទេសជប៉ុនកំពុងជំរុញប្រទេសនេះឱ្យពន្លឿនដំណើរការបង្កើតយោធាឡើងវិញ ដោយទម្លាយការរឹតបន្តឹងជាប់លាប់នៃគោលនយោបាយផ្តោតលើការការពារជាតិទាំងស្រុងរបស់ខ្លួន ក៏ដូចជាច្បាប់អន្តរជាតិ និងក្នុងស្រុកដែលពាក់ព័ន្ធ។ គោលនយោបាយ និងសកម្មភាពមួយចំនួនរបស់ខ្លួនបានដើរហួសពីវិសាលភាពនៃស្វ័យការពារ៕

អ្នកជម្លៀសខ្លួនពីនាវាទេសចរណ៍ដែលរងការវាយប្រហារដោយវីរុស Hanta បានចូលចតនៅអឺរ៉ុប

យន្តហោះមួយគ្រឿង ត្រូវបានគេជឿថាបានដឹកអ្នកដំណើរម្នាក់ចេញពីនាវាទេសចរណ៍រងការវាយប្រហារដោយការផ្ទុះឡើងវីរុស Hanta ចូលទៅប្រទេសហូឡង់កាលពីថ្ងៃពុធ ទី៦ ខែឧសភា បន្ទាប់ពីអ្នកជំងឺម្នាក់នេះត្រូវបានជម្លៀសចេញពីនាវានៅជិតកោះ Cape Verde នៅអាហ្វ្រិកខាងលិច។ ដោយនិយាយសម្រាលពីការព្រួយបារម្ភចំពោះការផ្ទុះឡើងវីរុសនៅលើនាវា MV Hondius ដែលបានបណ្តាលឲ្យមនុស្សបីនាក់ស្លាប់ ប្រមុខអង្គការសុខភាពពិភពលោក លោក Tedros Adhanom Ghebreyesus បានទទូចថា វាមិនអាចប្រៀបធៀបបានទេទៅនឹងជំងឺរាតត្បាតកូវីដ-១៩។អង្គការសុខភាពពិភពលោក បាននិយាយថា ក្រុមសង្គ្រោះបន្ទាន់ បានជម្លៀសមនុស្សបីនាក់ មានសមាជិកនាវិកឈឺពីរនាក់ និងមនុស្សម្នាក់ផ្សេងទៀតដែលបានប៉ះពាល់ជាមួយករណីដែលត្រូវបានបញ្ជាក់ ចេញពីនាវា ដែលបានចាកចេញពីកំពង់ផែនៅជិតកោះ Cape Verde ហើយក្រោយមក អ្នកដែលត្រូវបានជម្លៀសទាំងបីនាក់ បានឡើងជិះយន្តហោះនៅអាកាសយានដ្ឋានកោះ Cape Verde។មន្ត្រីប្រទេសអេស្ប៉ាញ បាននិយាយថា យន្តហោះនោះបានដឹកអ្នកជំងឺពីរនាក់ ហើយបានចុះចតដោយសារហេតុផលបច្ចេកទេស។ ក្រសួងសុខាភិបាលអេស្ប៉ាញបាននិយាយថា អ្នកជំងឺនឹងត្រូវការយន្តហោះថ្មីមួយគ្រឿងដើម្បីធ្វើដំណើរទៅកាន់ប្រទេសហូឡង់។ អ្នកជំនាញបានបញ្ជាក់ថា វីរុសដែលត្រូវបានរកឃើញនៅលើនាវា Hondius គឺជាវីរុសដ៏កម្រមួយប្រភេទ ដែលអាចត្រូវបានចម្លងរវាងមនុស្សនិងមនុស្ស។ប៉ុន្តែមន្ត្រីសុខាភិបាលបាននិយាយសម្រាលពីការព្រួយបារម្ភនៃការផ្ទុះឡើងជាសកលកាន់តែទូលំទូលាយពីវីរុសនេះ ថា មិនសូវឆ្លងដូចជាជំងឺកូវីដ នោះទេ វាមិនដូចជំងឺរាតត្បាតកូវីដ-១៩ ទេ ព្រោះហានិភ័យទៅដល់ពិភពលោកទាំងមូល គឺមានទាប។

កិច្ចពិភាក្សាពាណិជ្ជកម្មក្រុមប្រទេស G7 ផ្តោតលើរ៉ែសំខាន់ៗ ខណៈជម្លោះពន្ធរវាងអាមេរិក និងសហភាពអឺរ៉ុបធ្វើឱ្យខូចឯកភាព

ក្រុមរដ្ឋមន្ត្រីពាណិជ្ជកម្មនៃក្រុមប្រទេសទាំងប្រាំពីរ G7 ដែលបានជួបប្រជុំគ្នានៅទីក្រុងប៉ារីស ប្រទេសបារាំង កាលពីថ្ងៃពុធ៦ឧសភា សប្ដាហ៍នេះ បានស្វែងរកចំណុចរួមមួយលើការធានាការផ្គត់ផ្គង់រ៉ែសំខាន់ៗ ដែលគ្របដណ្ដប់ដោយប្រទេសចិន ប៉ុន្តែការគំរាមកំហែងពន្ធថ្មីៗរបស់សហរដ្ឋអាមេរិកប្រឆាំងនឹងរថយន្តផលិតនៅសហភាពអឺរ៉ុប បានប្រឈមនឹងការធ្វើឱ្យខូចឯកភាពគ្នាក្នុងសម្ព័ន្ធភាព។រដ្ឋមន្ត្រីពាណិជ្ជកម្មបរទេសរបស់បារាំង លោក Nicolas Forissier បាននិយាយនៅពេលទៅដល់សម្រាប់កិច្ចពិភាក្សាថា ប្រទេសបារាំងចង់ឱ្យការផ្គត់ផ្គង់រ៉ែសំខាន់ៗ ក្លាយជាលទ្ធផលជាក់ស្តែងបំផុតក្នុងអំឡុងពេលធ្វើជាប្រធានកិច្ចប្រជុំ G7 របស់ខ្លួន ខណៈក្រុមរដ្ឋមន្ត្រីរៀបចំសម្រាប់កិច្ចប្រជុំកំពូលមេដឹកនាំនៅពាក់កណ្តាលខែមិថុនា ។លោកថា រូបលោកជឿថាពួកលោកនឹងសម្រេចបានវឌ្ឍនភាពជាក់ស្តែងលើរ៉ែកម្រ និងរ៉ែសំខាន់ៗ ដោយធានាខ្សែច្រវាក់ផ្គត់ផ្គង់របស់ពួកលោក និងធានាថាពួកលោកមិនត្រូវបានចាប់ជាចំណាប់ខ្មាំងដោយប្រទេសមួយចំនួនឡើយ។រដ្ឋមន្ត្រីក្រសួងហិរញ្ញវត្ថុបារាំង លោក Roland Lescure បាននិយាយកាលពីថ្ងៃអង្គារថា ចំណែកទីផ្សាររបស់ប្រទេសចិនសម្រាប់រ៉ែដែលប្រើប្រាស់ក្នុងអ្វីៗគ្រប់យ៉ាង ចាប់ពីរថយន្តអគ្គិសនី ទួរប៊ីនខ្យល់ គ្រឿងអេឡិចត្រូនិច រហូតដល់ប្រព័ន្ធការពារជាតិ គឺមានឥទ្ធិពលខ្លាំង ដែលអាចកំណត់តម្លៃទាបគ្រប់គ្រាន់ដើម្បីបណ្តេញគូប្រជែងចេញពីទីផ្សារប្រកួតប្រជែង។ រដ្ឋមន្ត្រីពាណិជ្ជកម្មរូបនេះ បាននិយាយនៅក្នុងសេចក្តីថ្លែងការណ៍រួមមួយបន្ទាប់ពីកិច្ចប្រជុំរបស់ពួកគេថា ប្រទេស G7 នឹងព្យាយាមធានាថាការប៉ុនប៉ង ឬការគំរាមកំហែងក្នុងការប្រើសេដ្ឋកិច្ចជាអាវុធ នឹងបរាជ័យ។ឯកភាពរបស់ក្រុមប្រទេសមានសេដ្ឋកិច្ចលូតលាស់ខ្លាំងទាំង៧ ឬ G7 ក៏កំពុងត្រូវបានសាកល្បងដោយការអត្ថាធិប្បាយពីប្រធានាធិបតីអាមេរិក Donald Trump ផងដែរ ដែលបាននិយាយថា ទីក្រុងវ៉ាស៊ីនតោននឹងដំឡើងពន្ធលើរថយន្តដែលផលិតនៅសហភាពអឺរ៉ុបដល់២៥% ពីពន្ធស្រាប់ ១៥ % ដោយអះអាងថា ទីក្រុងព្រុចសែលមិនបានគោរពតាមកិច្ចព្រមព្រៀងពាណិជ្ជកម្មដែលត្រូវបានព្រមព្រៀងគ្នានៅទីក្រុង Turnberry របស់ដែនដី ស្កុតឡែន កាលពីឆ្នាំមុន៕

មេដឹកនាំអ៊ុយក្រែនថាខ្លួននឹងឆ្លើយតបវិញដូចគ្នា បន្ទាប់ពីរុស្ស៊ី បំបែកបទឈប់បាញ់របស់ទីក្រុងគីវ

លោកប្រធានាធិបតីអ៊ុយក្រែន Volodymyr Zelenskyy បាននិយាយ ដោយបញ្ជូនការព្រមានទៅកាន់ទីក្រុងមូស្គូថា ទីក្រុងគីវនឹង«ឆ្លើយតបវិញដូចគ្នា» ចំពោះការវាយប្រហាររបស់រុស្ស៊ី។ អ៊ុយក្រែននឹងសម្រេចចិត្តលើសកម្មភាពរបស់ខ្លួនឆ្ពោះទៅរកក្បួនព្យុហយាត្រាទិវាជ័យជម្នះរបស់រុស្ស៊ី «អាស្រ័យលើស្ថានភាពនៅយប់នេះ និងថ្ងៃស្អែក»។ លោក Zelenskyy បានចោទប្រកាន់រុស្ស៊ីពីបទបដិសេធកិច្ចខិតខំប្រឹងប្រែងឆ្ពោះទៅរកបទឈប់បាញ់ដោយការវាយប្រហារជារៀងរាល់ម៉ោងនៅទូទាំងប្រទេស ដោយព្រមានទីក្រុងមូស្គូថា ទីក្រុងគីវនឹង «ឆ្លើយតបវិញដូចគ្នា»។ការវាយប្រហារដោយយានដ្រូននិងមីស៊ីលរបស់រុស្ស៊ី លើអ៊ុយក្រែន កាលពីយប់ជ្រៅថ្ងៃអង្គារបានសម្លាប់មនុស្ស២២នាក់ និងជាង៨០នាក់រងរបួស ប៉ុន្មានម៉ោងមុនបទឈប់បាញ់ចូលជាធរមាន។លោក Zelenskyy បាននិយាយក្នុងសុន្ទរកថាពេលល្ងាចមួយកាលពីថ្ងៃពុធ ៦ឧសភា សប្ដាហ៍នេះថា គិតត្រឹមថ្ងៃនេះ ពួកលោកមើលឃើញថា រុស្ស៊ីបានឆ្លើយតបសំណើរបស់ពួកលោកសម្រាប់បទឈប់បាញ់តែជាមួយនឹងការវាយប្រហារថ្មីៗប៉ុណ្ណោះ។ អាស្រ័យលើស្ថានភាពនៅយប់នេះ និងថ្ងៃស្អែក ពួកលោកក៏នឹងកំណត់ការឆ្លើយតបដែលសមហេតុផលទាំងស្រុងរបស់ពួកលោកវិញផងដែរ។លោកក៏បានបញ្ជាក់ផងដែរថា រុស្ស៊ី បានទទួលសំណើច្បាស់លាស់ ពីទីក្រុងគីវទាក់ទងនឹងបទឈប់បាញ់ និងការទូត ហើយវិមានក្រឹមឡាំង ដឹងពីរបៀបទាក់ទងអ៊ុយក្រែន ឬដៃគូរបស់ខ្លួន ដើម្បីយល់ព្រមលើព័ត៌មានលម្អិត។ កាលពីដើមសប្តាហ៍នេះ រុស្ស៊ីបានប្រកាសថានឹងមាន "បទឈប់បាញ់ទិវាជ័យជម្នះ" រយៈពេលពីរថ្ងៃនៅថ្ងៃទី ៨និង៩ ឧសភា ដែលត្រូវបានគ្រោងទុកដើម្បីស្របពេលជាមួយនឹងក្បួនព្យុហយាត្រាទិវាជ័យជម្នះរបស់ប្រទេសនេះនៅលើទីលានចតុរង្គក្រហមក្នុងទីក្រុងមូស្គូ។អ៊ុយក្រែនបានឆ្លើយតបជាមួយនឹងសំណើឈប់បាញ់របស់ខ្លួនសម្រាប់ម៉ោង១២ យប់ថ្ងៃទី ៦ ខែឧសភា ដោយអះអាងថាពេលវេលាកំណត់របស់ខ្លួននឹងគ្រប់គ្រាន់ដើម្បីសាកល្បងថាតើការផ្អាកការប្រយុទ្ធពិតប្រាកដអាចកើតឡើងឬអត់៕

លោក Trump ចេញឱសានវាទឲ្យអ៊ីរ៉ង់ ទទួលយកកិច្ចព្រមព្រៀង បើមិនដូច្នេះប្រឈមនឹងការទម្លាក់គ្រាប់បែកបន្ថែមទៀត

ប្រធានាធិបតីសហរដ្ឋអាមេរិក លោក Donald Trump បានចេញឱសានវាទកាលពីថ្ងៃពុធ ទី៦ ខែឧសភា ឲ្យអ៊ីរ៉ង់ទទួលយកកិច្ចព្រមព្រៀងដើម្បីបញ្ចប់សង្គ្រាម បើមិនដូច្នេះទេត្រូវប្រឈមនឹងការទម្លាក់គ្រាប់បែកជាថ្មីយ៉ាងខ្លាំងពីសហរដ្ឋអាមេរិក ជាការផ្លាស់ប្តូរគោលនយោបាយភ្លាមៗជាបន្តបន្ទាប់។ លោក Trump បានបង្ហោះនៅលើវេទិកា Truth Social របស់លោកដោយប្រើឈ្មោះសហរដ្ឋអាមេរិកសម្រាប់យុទ្ធនាការយោធារបស់ខ្លួនប្រឆាំងនឹងអ៊ីរ៉ង់ ដោយសន្មតថា អ៊ីរ៉ង់ ឯកភាពផ្តល់អ្វីៗដែលបានព្រមព្រៀងគ្នា នោះប្រហែលជាការសន្មត់ដ៏ធំមួយនេះ នឹងត្រូវបញ្ចប់ ។ប្រសិនបើអ៊ីរ៉ង់មិនយល់ព្រម ការទម្លាក់គ្រាប់បែកនឹងចាប់ផ្តើម ហើយគួរឲ្យសោកស្តាយ វានឹងមានកម្រិតខ្ពស់ និងខ្លាំងក្លាជាងមុន។ ក្រោយមកលោក បាននិយាយនៅក្នុងបទសម្ភាសន៍មួយថា លោកមានសុទិដ្ឋិនិយមអំពីការឈានដល់កិច្ចព្រមព្រៀងជាមួយអ៊ីរ៉ង់ មុនពេលដំណើរទស្សនកិច្ចដែលបានគ្រោងទុករបស់លោកទៅកាន់ប្រទេសចិន នៅសប្តាហ៍ក្រោយ។ លោក Trump បានប្រាប់ប្រព័ន្ធផ្សព្វផ្សាយថា «ខ្ញុំគិតថា វាមានឱកាសល្អក្នុងការបញ្ចប់ ហើយប្រសិនបើវាមិនបញ្ចប់ទេ យើងត្រូវត្រឡប់ទៅរកការទម្លាក់គ្រាប់បែកជាថ្មី» ។ លោកក៏ត្រូវបានគេសួរអំពីរបាយការណ៍ថា ក្រោមកិច្ចព្រមព្រៀងដែលបានស្នើឡើង ទីក្រុងតេអេរ៉ង់នឹងនាំចេញសារធាតុអ៊ុយរ៉ានីញ៉ូមដែលចម្រាញ់រួច ប្រហែលជាទៅកាន់សហរដ្ឋអាមេរិកឬយ៉ាងណា នោះលោកបានឆ្លើយថា «ទេ មិនមែនប្រហែលទេ វាទៅកាន់សហរដ្ឋអាមេរិក» លោក Trump បាននិយាយដូច្នេះដោយមិនពន្យល់ពីរបៀបដែលចំណុចសំខាន់នៃការមិនចុះសម្រុងគ្នានេះ នឹងត្រូវបានដោះស្រាយ។ប៉ុន្តែអ៊ីរ៉ង់ បានបដិសេធយ៉ាងម៉ឺងម៉ាត់ក្នុងការបោះបង់ចោលអ៊ុយរ៉ានីញ៉ូមដែលចម្រាញ់រួចរបស់ខ្លួន ដោយទទូចថា ពុំមែនសម្រាប់ផលិតគ្រាប់បែកនុយក្លេអ៊ែរនោះទេ។

អាមេរិក៖ យន្តហោះចម្បាំង បានបញ្ឈប់នាវាដែលព្យាយាមទម្លាយការបិទផ្លូវទឹកនៅកំពង់ផែអ៊ីរ៉ង់

យោធាសហរដ្ឋអាមេរិក បាននិយាយកាលពីថ្ងៃពុធ ទី៦ ខែឧសភាថា យន្តហោះចម្បាំងរបស់កងទ័ពជើងទឹកសហរដ្ឋអាមេរិក បានបាញ់និងបញ្ឈប់នាវាដឹកប្រេងមួយគ្រឿងដែលព្យាយាមទម្លាយការបិទផ្លូវទឹករបស់ទីក្រុងវ៉ាស៊ីនតោននៅកំពង់ផែអ៊ីរ៉ង់។ នេះជាលើកទីពីរហើយ ដែលយោធាសហរដ្ឋអាមេរិក បានបាញ់ទៅលើនាវាដែលខ្លួននិយាយថាកំពុងព្យាយាមបំពានលើការបិទផ្លូវទឹក ដែលត្រូវបានដាក់ ចាប់តាំងពីថ្ងៃទី ១៣ ខែមេសា។ ទីបញ្ជាការកណ្តាលសហរដ្ឋអាមេរិក (CENTCOM) បាននិយាយនៅក្នុងសារមួយនៅលើបណ្តាញ X ថា កងកម្លាំងសហរដ្ឋអាមេរិក បានព្រមាននាវា M/T Hasna បំពាក់ទង់ជាតិអ៊ីរ៉ង់គ្មានផ្ទុកទំនិញថា នាវានេះកំពុងរំលោភលើការបិទផ្លូវទឹក ប៉ុន្តែក្រុមនាវិកមិនបានគោរពតាមនោះទេ ដូច្នេះយន្តហោះចម្បាំង F/A-18 Super Hornet របស់សហរដ្ឋអាមេរិក បានបញ្ឈប់ចង្កូតនាវាដឹកប្រេងនោះដោយបាញ់កាំភ្លើងជាច្រើនគ្រាប់ពីកាំភ្លើង២០មីលីម៉ែត្រ។ ទីបញ្ជាការកណ្តាលសហរដ្ឋអាមេរិក បាននិយាយថា នាវា Hasna លែងឆ្លងកាត់ទៅអ៊ីរ៉ង់ទៀតហើយ និងបាននិយាយបន្ថែមថា «ការបិទផ្លូវទឹករបស់សហរដ្ឋអាមេរិកប្រឆាំងនឹងនាវាដែលព្យាយាមចូល ឬចាកចេញពីកំពង់ផែអ៊ីរ៉ង់ នៅតែមានជាធរមានពេញលេញ»។ កងកម្លាំងរបស់ទីក្រុងតេអេរ៉ង់ បានបិទផ្លូវទឹកដ៏សំខាន់នៅច្រកសមុទ្រ Hormuz ដែលជាផ្លូវទឹកសម្រាប់ដឹកជញ្ជូនប្រេង និងឧស្ម័ន បន្ទាប់ពីការចាប់ផ្តើមយុទ្ធនាការតាមអាកាសរបស់សហរដ្ឋអាមេរិក និងអ៊ីស្រាអែល ប្រឆាំងនឹងអ៊ីរ៉ង់ នៅថ្ងៃទី២៨ ខែកុម្ភៈ។ សហរដ្ឋអាមេរិក ក៏បានប្រកាសបិទកំពង់ផែអ៊ីរ៉ង់ បន្ទាប់ពីកិច្ចចរចាសន្តិភាពនៅក្នុងប្រទេសប៉ាគីស្ថាន បានបរាជ័យក្នុងការឈានដល់ការទម្លាយភាពទាល់ច្រកកាលពីខែមុន។ ទីបញ្ជាការកណ្តាលសហរដ្ឋអាមេរិក បាននិយាយកាលពីថ្ងៃចន្ទថា នាវាពាណិជ្ជកម្មជាង ៥០ គ្រឿង ត្រូវបានណែនាំឱ្យត្រឡប់ក្រោយ ឬត្រឡប់ទៅកំពង់ផែវិញ ដើម្បីអនុវត្តតាមការបិទផ្លូវទឹក។

អ៊ីស្រាអែល វាយប្រហារទីក្រុងបេរូតរបស់ប្រទេសលីបង់ ជាលើកដំបូងចាប់តាំងពីមានបទឈប់បាញ់

អ៊ីស្រាអែល បានវាយប្រហារទីក្រុងបេរូត (Beirut)កាលពីថ្ងៃពុធ ៦ឧសភា សប្ដាហ៍នេះ ជាលើកដំបូងចាប់តាំងពីបានយល់ព្រមលើបទឈប់បាញ់ជាមួយក្រុមហេសបូឡា កាលពីខែមុន ដោយអ៊ីស្រាអែល និយាយថាខ្លួនបានដាក់គោលដៅលើមេបញ្ជាការនៃកម្លាំងរ៉ាដវ៉ាន់(Radwan)របស់ក្រុមសកម្មប្រយុទ្ធនេះ ក្នុងតំបន់ជាយក្រុងភាគខាងត្បូង និងបានបណ្ដាលឲ្យមនុស្សមួយចំនួនស្លាប់។នាយករដ្ឋមន្ត្រីអ៊ីស្រាអែលលោក ប៊េនចាមីន ណេតាន់យ៉ាហ៊ូ (Benjamin Netanyahu) និងរដ្ឋមន្ត្រីក្រសួងការពារជាតិ លោក អ៊ីស្រាអែល កាត់ស៍ (Israel Katz)បានប្រកាសពីសកម្មភាពនេះនៅក្នុងសេចក្តីថ្លែងការណ៍រួម។ប្រព័ន្ធផ្សព្វផ្សាយអ៊ីស្រាអែលបានរាយការណ៍ថាមេបញ្ជាការរូបនេះត្រូវបានសម្លាប់នៅក្នុងការវាយប្រហារនេះប៉ុន្តែពុំមានការបញ្ជាក់ភ្លាមៗពីយោធាអ៊ីស្រាអែលឬក្រុមហេសបូឡានោះទេ។បទឈប់បាញ់នៅលីបង់បានគាំទ្រដល់បទឈប់បាញ់រវាងអាមេរិក និងអ៊ីរ៉ង់ កាន់តែទូលំទូលាយ ដោយការបញ្ឈប់ការវាយប្រហាររបស់អ៊ីស្រាអែលនៅលីបង់គឺជាការទាមទារដ៏សំខាន់របស់អ៊ីរ៉ង់។ខណៈអ៊ីរ៉ង់ និងសហរដ្ឋអាមេរិក និយាយថា ពួកគេកំពុងខិតជិតដល់កិច្ចព្រមព្រៀងមួយដើម្បីបញ្ឈប់ជម្លោះរបស់ខ្លួន ការវាយប្រហារទាំងនេះគំរាមកំហែងដល់បទឈប់បាញ់ដែលបានបញ្ឈប់ការវាយប្រហាររបស់អ៊ីស្រាអែលលើទីក្រុងបេរូត។ កងទ័ពអ៊ីស្រាអែលនៅតែស្ថិតក្នុងតំបន់ភាគខាងត្បូងនៃទន្លេ លីតានី (Litani River) ហើយការវាយប្រហារនៅតែបន្តនៅភាគខាងត្បូងប្រទេសលីបង់។ក្រុមហេសបូឡាដែលជាសម្ព័ន្ធមិត្តអ៊ីរ៉ង់ បានឆ្លើយតបដោយការបាញ់ផ្លោង និងយានដ្រូនបំពាក់អាវុធទៅលើទាហានអ៊ីស្រាអែល។អ៊ីស្រាអែលកាលពីថ្ងៃពុធដដែល បានអំពាវនាវឲ្យប្រជាជនជម្លៀសចេញពីភូមិជាច្រើននៅភាគខាងជើងទន្លេ Litani ដែលអាចតំណាងឱ្យការពង្រីកតំបន់ធ្វើសកម្មភាពរបស់អ៊ីស្រាអែល។ ក្រសួងសុខាភិបាលលីបង់ និយាយថា មនុស្សជាង២.៧០០នាក់បានស្លាប់ក្នុងសង្គ្រាមនៅប្រទេសលីបង់ចាប់តាំងពីថ្ងៃទី២មីនា២០២៦នេះ៕

អ៊ីរ៉ង់កំពុងពិនិត្យសំណើរអាមេរិកដើម្បីបញ្ចប់សង្គ្រាម ទោះការទាមទារសំខាន់ៗនៅមិនទាន់បានដោះស្រាយក៏ដោយ

អ៊ីរ៉ង់ បាននិយាយកាលពីថ្ងៃពុធ៦ឧសភាសប្ដាហ៍នេះ ថាខ្លួនកំពុងពិនិត្យឡើងវិញលើសំណើសន្តិភាពរបស់សហរដ្ឋអាមេរិក ដែលប្រភពបាននិយាយថានឹងបញ្ចប់សង្គ្រាមជាផ្លូវការ ខណៈការទាមទារសំខាន់ៗរបស់សហរដ្ឋអាមេរិក នៅមិនទាន់ដោះស្រាយ ពោលគឺការតម្រូវឲ្យអ៊ីរ៉ង់ត្រូវផ្អាកកម្មវិធីនុយក្លេអ៊ែររបស់ខ្លួន និងបើកច្រកសមុទ្រ Hormuz ឡើងវិញ។ អ្នកនាំពាក្យក្រសួងការបរទេសអ៊ីរ៉ង់មួយរូប ដែលត្រូវបានដកស្រង់សម្តីដោយទីភ្នាក់ងារសារព័ត៌មាន ISNA របស់អ៊ីរ៉ង់បាននិយាយថា ទីក្រុងតេអេរ៉ង់នឹងបង្ហាញពីការឆ្លើយតបរបស់ខ្លួន។ប្រធានាធិបតីអាមេរិក Donald Trump បានព្យាករណ៍កាលពីយប់ថ្ងៃពុធថា សង្គ្រាមនៅអ៊ីរ៉ង់នឹងបញ្ចប់យ៉ាងឆាប់រហ័ស។ លោក Trump បានប្រាប់ការជួបជុំតាមទូរស័ព្ទសម្រាប់បេក្ខជនអភិបាលរដ្ឋ ចចា (Georgia) មកពីគណបក្សសាធារណរដ្ឋ លោក Burt Jones ថា នៅពេលអ្នកក្រឡេកមើលរឿងរ៉ាវដែលកំពុងកើតឡើង អ្នកនឹងដឹងថាពួកលោកកំពុងធ្វើដូច្នេះសម្រាប់ហេតុផលសំខាន់មួយ គឺ ពួកលោកមិនអាចអនុញ្ញាតឱ្យពួកគេមានអាវុធនុយក្លេអ៊ែរបានទេ។ ដូច្នេះរូបលោកគិតថាមនុស្សភាគច្រើនយល់ពីរឿងនោះ។ ពួកគេយល់ថាអ្វីដែលអាមេរិកកំពុងធ្វើពេលនេះ គឺត្រឹមត្រូវ ហើយវានឹងបញ្ចប់យ៉ាងឆាប់រហ័ស។លោក Trump តែងតែនិយាយថា លោកជឿថា អ៊ីរ៉ង់ចង់បានកិច្ចព្រមព្រៀងមួយ។លោកបានប្រាប់ក្រុមអ្នកសារព័ត៌មាននៅក្នុងការិយាល័យ Oval កាលពីថ្ងៃពុធថា ពួកគេចង់ធ្វើកិច្ចព្រមព្រៀងមួយ។ ពួកលោកមានការចរចាល្អណាស់ក្នុងរយៈពេល២៤ ម៉ោងចុងក្រោយនេះ ហើយវាពិតជាអាចទៅរួចដែលពួកលោកនឹងធ្វើកិច្ចព្រមព្រៀងមួយ៕

បណ្ដាញសង្គម

ព័ត៌មានថ្មីៗ

ក្រសួងព័ត៌មាន ប្រគល់ថវិកា ១០៦លានរៀល ប្រមូលបានពីព្រឹត្តិការណ៍រត់ដើម្បីមនុស្សធម៌ «ដើម្បីកុមារ ដើម្បីអនាគតយើង» ជូនមូលនិធិគន្ធបុប្ផាកម្ពុជា សម្រាប់គាំទ្រការព្យាបាល និងថែទាំសុខភាពកុមារដោយឥតគិតថ្លៃ

អាជ្ញាធរខេត្តប៉ៃលិនចុះពិនិត្យការប្រមូលផលទុរេន ដើម្បីបង្ការការក្លែងបន្លំ ខណៈឆ្នាំនេះទីផ្សារល្អជាងឆ្នាំមុន

ចៅក្រមស៊ើបសួរសម្រេចឃុំខ្លួនមន្ត្រីនគរបាល-អាវុធហត្ថខេត្តកំពត និងអ្នកទទួលផលចោរកម្មសរុបចំនួន ៤៧នាក់

គណៈកម្មការទី១ ព្រឹទ្ធសភា រួមជាមួយក្រុមសមាជិកព្រឹទ្ធសភាភូមិភាគទី៤ ប្រារព្ធទិវាកុមារអន្តរជាតិ និងទិវាប្រឆាំងពលកម្មកុមារ នៅខេត្តបាត់ដំបង

ការអបអរសាទរជើងឯកអឺរ៉ុបរបស់ក្រុម PSG នៅបារាំង ផ្ទុះហិង្សា ខណៈមនុស្សរាប់រយនាក់ត្រូវចាប់ខ្លួន ហើយម្នាក់ស្លាប់

ប្រធានាធិបតីអ៊ុយក្រែន ស្វែងរកវឌ្ឍនភាព មុនរដូវរងា ខណៈការចរចាឆ្ពោះទៅរកសន្តិភាពជាប់គាំង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877