BTV NEWS

សហរដ្ឋអាមេរិក សាទរចំពោះការចរចាសន្តិសុខដែលមានផលិតភាព រវាងអ៊ីស្រាអែល និងលីបង់

អ៊ីរ៉ង់ ប្រើសំឡេងយ៉ាងប្រុងប្រយ័ត្ន និងនិយាយថាការចរចានៅតែបន្ត ហើយការខ្វែងគំនិតគ្នានៅតែមាន

អាមេរិក និយាយថា បណ្តាញរបស់អ៊ីរ៉ង់ បានបោកប្រាស់ក្រុមហ៊ុនបច្ចេកវិទ្យាដើម្បីផ្គត់ផ្គង់ដល់យោធា

បណ្តារដ្ឋសម្ព័ន្ធយោធា NATO រិះគន់រុស្ស៊ី បន្ទាប់ពីការធ្លាក់យានដ្រូននៅប្រទេសរ៉ូម៉ានី

ព័ត៌មានអន្តរជាតិ

ប្រមុខចារកម្មតាមអ៊ីនធឺណិតអង់គ្លេសហៅ AI ថា ជា «កម្លាំងដែលមិនអាចបញ្ឈប់បាន» និងព្រមានអំពី រុស្ស៊ី

ប្រធានចារកម្មតាមអ៊ីនធឺណិតរបស់ចក្រភពអង់គ្លេស បានព្រមានកាលពីថ្ងៃពុធថា បញ្ញាសិប្បនិម្មិត (AI)គឺជា «កម្លាំងដែលមិនអាចបញ្ឈប់បាន» ដែលកំពុងត្រូវបានប្រើប្រាស់ជាអាវុធ តាមរបៀប ដែលមិនដូចសង្គ្រាមប្រពៃណី(ជម្លោះប្រដាប់អារុធរវាងរដ្ឋនិងរដ្ឋ)ទេ។ លោកស្រី Anne Keast-Butler នាយកទីភ្នាក់ងារចារកម្មទំនាក់ទំនង GCHQ បាននិយាយថា ចក្រភពអង់គ្លេស និងសម្ព័ន្ធមិត្តរបស់ខ្លួន ស្ថិតនៅក្នុង «ចន្លោះរវាងសន្តិភាព និងសង្គ្រាម» ខណៈដែលរុស្ស៊ីបង្កើន «សកម្មភាពចម្រុះប្រចាំថ្ងៃ» របស់ខ្លួនប្រឆាំងនឹងលោកខាងលិច ទោះបីជាចំនួនស្លាប់របស់យុទ្ធជនរុស្ស៊ីនៅអ៊ុយក្រែន កើនឡើងជិត ៥០0.០០០នាក់ ហើយក៏ដោយ។លោកស្រីបានលើកឡើងថា លោកខាងលិចប្រឈមនឹងការចាញ់ជម្លោះ ក្នុងលំហអ៊ីនធឺណិតប្រឆាំងនឹង រុស្ស៊ី និងសត្រូវផ្សេងទៀត ប្រសិនបើពលរដ្ឋ ក្រុមហ៊ុន និងរដ្ឋាភិបាលមិនការពារសន្តិសុខតាមអ៊ីនធឺណិត ឲ្យបានទាន់នោះទេ។លោកស្រី Keast-Butler បានថ្លែងនៅក្នុងសុន្ទរកថាមួយនៅមជ្ឈមណ្ឌលបំបែកកូដសង្គ្រាមលោកលើកទី ២ នៅជិតទីក្រុងឡុងដ៍ថា៖«ខ្ញុំបានចំណាយពេលបីទសវត្សរ៍ ធ្វើការក្នុងសន្តិសុខជាតិ ហើយហានិភ័យនៃការគណនាខុស គឺមានកម្រិតខ្ពស់ តាមដែលខ្ញុំធ្លាប់បានឃើញ»៕

កូវ៉ែតនិយាយថា ប្រព័ន្ធការពារដែនអាកាសរបស់ខ្លួន កំពុងស្ទាក់ចាប់មីស៊ីល និងការវាយប្រហារដោយ យានដ្រូន

កងទ័ពកូវ៉ែតបាននិយាយនៅថ្ងៃព្រហស្បតិ៍នេះថា ប្រព័ន្ធការពារដែនអាកាសរបស់ខ្លួន កំពុងស្ទាក់ចាប់ការគំរាមកំហែងដោយមីស៊ីល និងយានដ្រូនរបស់សត្រូវ ប៉ុន្តែមិនបាននិយាយថា ពួកវាទាំងនោះមកពីណានោះទេ។កងទ័ពបាននិយាយថា សំឡេងផ្ទុះណាមួយដែលឮនៅក្នុងប្រទេសនេះ គឺជាលទ្ធផលនៃការដែលប្រព័ន្ធការពារដែនអាកាស ស្ទាក់ចាប់ការគំរាមកំហែង ហើយបានជំរុញឲ្យប្រជាជនអនុវត្តតាមការណែនាំសន្តិសុខ និងសុវត្ថិភាព ដែលចេញដោយអាជ្ញាធរ។សេចក្តីថ្លែងការណ៍នេះ បានធ្វើឡើង បន្ទាប់ពីការវាយប្រហាររបស់សហរដ្ឋអាមេរិកនៅព្រឹកថ្ងៃព្រហស្បតិ៍នេះ ទៅលើអ្វីដែលទីក្រុងវ៉ាស៊ីនតោន បាននិយាយថា ជាប្រតិបត្តិការយានដ្រូនរបស់អ៊ីរ៉ង់ដែលគំរាមកំហែងដល់កងកម្លាំងអាមេរិក និងការដឹកជញ្ជូនពាណិជ្ជកម្មនៅក្នុងច្រកសមុទ្រហ័រមូស។អ៊ីរ៉ង់បានបញ្ជាក់ពីការវាយប្រហាររបស់សហរដ្ឋអាមេរិក ហើយបាននិយាយថា ខ្លួនបានកំណត់គោលដៅមូលដ្ឋានទ័ពអាកាសអាមេរិក នៅម៉ោង ៤:៥០ ព្រឹក (ម៉ោង ០១: ២០ ម៉ោងសកល) បន្ទាប់ពីអ្វីដែលខ្លួនបានពិពណ៌នាថា ជាការវាយប្រហារនៅព្រឹកព្រលឹមរបស់សហរដ្ឋអាមេរិក នៅជិតអាកាសយានដ្ឋាន Bandar Abbas ដោយពុំបាននិយាយថា មូលដ្ឋាននោះ នៅឯណាទេ៕

UN ព្រួយបារម្ភយ៉ាងខ្លាំងចំពោះការសម្លាប់ជនស៊ីវិលហ្កាហ្សាដោយអ៊ីស្រាអែល នៅជិតខ្សែបន្ទាត់បទឈប់បាញ់

ការិយាល័យសិទ្ធិមនុស្សរបស់អង្គការសហប្រជាជាតិ បាននិយាយថា ប្រហែលមួយភាគបីនៃជនជាតិប៉ាឡេស្ទីនដែលត្រូវបានសម្លាប់ដោយអ៊ីស្រាអែល ចាប់តាំងពីបទឈប់បាញ់ខែតុលា គឺស្ថិតនៅក្នុងតំបន់ជិតខ្សែបន្ទាត់បទឈប់បាញ់របស់យោធាជាមួយក្រុមហាម៉ាស ដោយបង្ហាញពីការព្រួយបារម្ភយ៉ាងខ្លាំងថា កងទ័ពអាចនឹងបាញ់ទៅលើជនស៊ីវិលគ្រាន់តែចូលទៅជិតតំបន់នោះ។ ការិយាល័យនេះបាននិយាយថា សកម្មភាពបែបនេះ នឹងជាការសម្លាប់មនុស្សដោយខុសច្បាប់ ហើយដូច្នេះ នេះគឺជាឧក្រិដ្ឋកម្មសង្គ្រាម។យោធាអ៊ីស្រាអែល ដែលនិយាយថា ការបាញ់ប្រហារដោយកងទ័ពរបស់ខ្លួននៅជិតខ្សែបន្ទាត់បទឈប់បាញ់ មានគោលបំណងទប់ស្កាត់ការគំរាមកំហែងរបស់ក្រុមសកម្មប្រយុទ្ធ មិនបានផ្តល់ការអត្ថាធិប្បាយភ្លាមៗអំពីការចោទប្រកាន់ទាំងនោះទេ។អ៊ីស្រាអែលបានកំណត់ព្រំដែនបទឈប់បាញ់របស់ខ្លួនជាមួយក្រុមហាម៉ាស ចាប់តាំងពីបទឈប់បាញ់ជាមួយ «ខ្សែបន្ទាត់់ពណ៌លឿង» ដែលកំណត់នៅលើដីជាមួយនឹងប្លុកបេតុងដែលមានចន្លោះ។ កងទ័ព អ៊ីស្រាអែល នៅតែដាក់ពង្រាយនៅភាគខាងកើតរបស់ខ្លួន ដោយក្រុមហាម៉ាសគ្រប់គ្រងដីឆ្នេរសមុទ្រនេះ៕

ជនជាតិហ្គាណា ៣០០នាក់ វិលត្រឡប់មកពីអាហ្វ្រិកខាងត្បូងវិញ បន្ទាប់ពីមានភាពតានតឹងប្រឆាំងជនអន្តោប្រវេសន៍

ជើងហោះហើរដំបូងរបស់ជនជាតិហ្គាណាដែលត្រូវបានជម្លៀសចេញពីអាហ្វ្រិកខាងត្បូង ដោយសារភាពតានតឹងប្រឆាំងនឹងជនអន្តោប្រវេសន៍ បានចុះចតនៅអាកាសយានដ្ឋាន នៅក្នុងទីក្រុងអាក្រា (Accra) កាលពីថ្ងៃពុធ ហើយត្រូវបានស្វាគមន៍ដោយរដ្ឋមន្ត្រីការបរទេស និងបទចម្រៀងស្នេហាជាតិ បានបន្លឺឡើងនៅលើឧបករណ៍បំពងសំឡេង នៅអាកាសយានដ្ឋាននោះ។ជនជាតិហ្គាណាសរុបប្រមាណ ៨០០នាក់ ត្រូវបានគេរំពឹងថា នឹងចាកចេញពីអាហ្វ្រិកខាងត្បូង បន្ទាប់ពីទីក្រុងអាក្រាបានរៀបចំជើងហោះហើរធ្វើមាតុភូមិនិវត្តន៍ ដើម្បីឆ្លើយតបទៅនឹងរលកនៃការតវ៉ា និងអំពើហិង្សាដែលកំណត់គោលដៅទៅលើជនបរទេសដែលមានឯកសារ និងគ្មានឯកសារ នៅក្នុងប្រទេសនេះ។លោក Victor Atsu Togbe ដែលស្ថិតក្នុងចំណោមអ្នកវិលត្រឡប់ប្រហែល ៣០០នាក់ បានចុះចត នៅរសៀលថ្ងៃពុធ បានប្រាប់សារព័ត៌មាន AFP នៅអាកាសយានដ្ឋានថា៖«ពុំមានភាពងាយស្រួលសម្រាប់យើងនៅអាហ្វ្រិកខាងត្បូងក្នុងរយៈពេលប៉ុន្មានសប្តាហ៍កន្លងមកនេះទេ»។«យើងសូមថ្លែងអំណរគុណដល់រដ្ឋាភិបាលហ្គាណា ដែលបាននាំយើងចេញពីស្ថានភាពគំរាមកំហែងដ៏គ្រោះថ្នាក់នេះ»។ អាហ្វ្រិកខាងត្បូង ដែលជាប្រទេសមានសេដ្ឋកិច្ចឧស្សាហកម្មរីកចម្រើនបំផុតរបស់ទ្វីបនេះ ជាយូរមកហើយ គឺជាគោលដៅសម្រាប់ពលករអាហ្វ្រិកទាំងស្របច្បាប់ និងគ្មានឯកសារ៕

ផ្ទុះស៊ីទែនស្តុកគីមីនៅរដ្ឋវ៉ាស៊ីនតោន បានបណ្តាលឲ្យមនុស្សយ៉ាងតិច ២នាក់ ស្លាប់ និង ៩នាក់ បាត់ខ្លួន

មន្ត្រីនៃនាយកដ្ឋានពន្លត់អគ្គិភ័យ បាននិយាយកាលពីថ្ងៃពុធ (ទី ២៧ ខែឧសភា)ថា ការធ្វើតេស្ត បានបញ្ជាក់ថា សារធាតុពុលបានចូលទៅក្នុងទន្លេកូឡុំប៊ី បន្ទាប់ពីស៊ីទែនស្តុកគីមីមួយ បានផ្ទុះបែក នៅរោងចក្រវេចខ្ចប់ Nippon Dynawave ក្នុងរដ្ឋវ៉ាស៊ីនតោន សហរដ្ឋអាមេរិក កាលពីថ្ងៃអង្គារ (ថ្ងៃទី ២៦ ខែឧសភា) ដែលបានសម្លាប់មនុស្សយ៉ាងហោចណាស់ពីរនាក់។ មន្ត្រីបានប្រាប់អ្នកយកព័ត៌មានកាលពីថ្ងៃពុធថា មនុស្ស ៩នាក់ នៅតែមិនទាន់រកឃើញ បន្ទាប់ពីហេតុការណ៍នោះ ដោយបន្ថែមថា កិច្ចខិតខំប្រឹងប្រែងស្តារឡើងវិញ បានចាប់ផ្តើម នៅព្រឹកថ្ងៃពុធ ហើយនឹង យឺតពេល។ លោក Matt Amos ប្រធានកងវរសេនាធំនៃនាយកដ្ឋានពន្លត់អគ្គិភ័យ Longview បាននិយាយថា បរិយាកាសស្តារឡើងវិញ នៅតែ«មានគ្រោះថ្នាក់ខ្លាំង»។អភិបាលរដ្ឋវ៉ាស៊ីនតោន លោក Bob Ferguson បាននិយាយថា៖«ទំហំ និងវិសាលភាពនៃសោកនាដកម្មនេះ គឺសោកនាដកម្មឧស្សាហកម្មដ៏សាហាវបំផុត នៅក្នុងប្រវត្តិសាស្ត្ររដ្ឋសម័យទំនើប។ អ្នកដឹងហើយថា នៅពេលណាដែលអ្នកកំពុងនិយាយអំពីអ្វីមួយដែលមានទំហំ និងវិសាលភាពបែបនេះ ផលប៉ះពាល់គឺ ធ្ងន់ធ្ងរណាស់»។លោក Scott Goldstein ប្រធាននាយកដ្ឋានពន្លត់អគ្គិភ័យ Cowlitz 2 បាននិយាយថា ពុំទាន់ច្បាស់ថាមនុស្ស ៩នាក់ ដែលបាត់ខ្លួននោះ នៅឯណាទេ ដោយបន្ថែមថា ពួកគេបានស្វែងរកតំបន់ដែលអាចស្វែងរកបាន។ គិតត្រឹមព្រឹកថ្ងៃពុធ យើងបានប្រកាសថា ឧប្បត្តិហេតុនេះ គឺជាការផ្លាស់ប្តូរពីការជួយសង្គ្រោះទៅជាការស្តារឡើងវិញ»៕

ន័រវែសនឹងចូលរួមកម្មវិធីទប់ស្កាត់នុយក្លេអ៊ែរដឹកនាំដោយប្រទេសបារាំង

មេដឹកនាំនៃប្រទេសបារាំង និងន័រវែស បាននិយាយកាលពីថ្ងៃពុធថា ទីក្រុងអូស្លូនឹងចូលរួមគម្រោងទប់ស្កាត់នុយក្លេអ៊ែរដឹកនាំដោយទីក្រុងប៉ារីស ដើម្បីជំរុញសន្តិសុខ នៅលើទ្វីបនេះ។នៅពេលដែលលោក និងប្រធានាធិបតីបារាំង លោក អេម៉ានុយអែល ម៉ាក្រុង (Emmanuel Macron) បានប្រកាសនៅទីក្រុងប៉ារីសថា ប្រទេសទាំងពីរបានចុះហត្ថលេខាលើកតិកាសញ្ញាការពារជាតិ លោក Jonas Gahr Store នាយករដ្ឋមន្ត្រីនៃប្រទេសន័រវែស បាននិយាយថា៖«យើងកំពុងប្រឈមនឹងស្ថានភាពសន្តិសុខធ្ងន់ធ្ងរបំផុត ចាប់តាំងពីសង្គ្រាមលោកលើកទី២»។លោកបាននិយាយថា៖«ក្នុងរយៈពេល ៦ខែកន្លងមកនេះ យើងបានចូលទៅក្នុងកិច្ចព្រមព្រៀងការពារជាតិជាមួយទាំងអាល្លឺម៉ង់ និងចក្រភពអង់គ្លេស ហើយខ្ញុំមានសេចក្តីសោមនស្សរីករាយ ដែលយើងបានចុះហត្ថលេខាលើកិច្ចព្រមព្រៀងការពារជាតិដ៏ទូលំទូលាយជាមួយប្រទេសបារាំង នាពេលនេះ»។កាលពីខែមីនា លោក ម៉ាក្រុង បានបង្ហាញកម្មវិធីមួយ ដែលក្រោមកម្មវិធីនេះ បារាំងគឺជាប្រទេសដែលមានអាវុធនុយក្លេអ៊ែរតែមួយគត់របស់សហភាពអឺរ៉ុប នឹងប្រើប្រាស់ឃ្លាំងស្តុកអាវុធបរមាណូរបស់ខ្លួន ដើម្បីពង្រឹងសន្តិសុខ នៅលើទ្វីបនេះ៕

អារ៉ាប៊ីសាអ៊ូឌីតផ្តល់ជំនួយដល់ប្រទេសយេម៉ែននូវផលិតផលប្រេងដែលមានតម្លៃ ១៥០លានដុល្លារ អាមេរិក

អារ៉ាប៊ីសាអ៊ូឌីតកាលពីថ្ងៃពុធបានប្រកាសអំពីការគាំទ្រជាបន្ទាន់សម្រាប់ប្រទេសយេម៉ែន ក្នុងទម្រង់ជាផលិតផលប្រេងដែលមានតម្លៃ ១៥០ លានដុល្លារអាមេរិក។កម្មវិធីអភិវឌ្ឍន៍ និងកសាងឡើងវិញរបស់អារ៉ាប៊ីសាអ៊ូឌីតសម្រាប់ប្រទេសយេម៉ែន បាននិយាយនៅក្នុងការបង្ហោះមួយនៅលើប្រព័ន្ធផ្សព្វផ្សាយសង្គមX ថា ការគាំទ្រនេះមានបំណងបំពេញតម្រូវការប្រតិបត្តិការនៃប្រេងឥន្ធនៈ និងប្រេងម៉ាស៊ូតសម្រាប់រោងចក្រថាមពល នៅតាមបណ្តាខេត្តរបស់ប្រទេសយេម៉ែន។កម្មវិធីនេះបានបញ្ជាក់ថា ការគាំទ្រនេះ មានគោលបំណងបង្កើនស្ថិរភាពនៃប្រព័ន្ធអគ្គិសនី កែលម្អនិរន្តរភាពនៃសេវាកម្មជាមូលដ្ឋាន និងបន្ធូរបន្ថយការលំបាករបស់ប្រជាជនយេម៉ែន ដោយហេតុនេះចាំបាច់ត្រូវពង្រឹងសេវាកម្មសំខាន់ៗ និងគាំទ្រសកម្មភាពសេដ្ឋកិច្ច និងអភិវឌ្ឍន៍នៅក្នុងប្រទេសនេះ។ដោយត្រូវបានបង្កើតឡើងក្នុងឆ្នាំ ២០១៨ កម្មវិធីនេះដំណើរការក្រោមកិច្ចព្រមព្រៀងអភិវឌ្ឍន៍ដ៏ទូលំទូលាយរវាងរដ្ឋាភិបាលអារ៉ាប៊ីសាអ៊ូឌីត និងយេម៉ែន៕

មន្ត្រីជាន់ខ្ពស់ក្រុមហេសបូឡាបដិសេធការរំសាយអាវុធ ខណៈអ៊ីស្រាអែលបន្តវាយប្រហារនៅភាគខាងត្បូងលីបង់

មន្ត្រីជាន់ខ្ពស់ហេសបូឡាម្នាក់ បាននិយាយកាលពីថ្ងៃពុធថា៖«គ្មាននរណាម្នាក់គួរស្រមៃ»អំពីការរំសាយអាវុធរបស់ក្រុមនេះទេ បន្ទាប់ពីការវាយប្រហារតាមអាកាសដ៏សាហាវរបស់អ៊ីស្រាអែលនៅភាគខាងត្បូងប្រទេសលីបង់ កាលពីយប់ថ្ងៃអង្គារ។ ថ្លែងនៅពិធីរំលឹកវិញ្ញាណក្ខន្ធមួយនៅជាយក្រុងភាគខាងត្បូងនៃទីក្រុងបេរូត លោក Mahmoud Qomati សមាជិកក្រុមប្រឹក្សានយោបាយរបស់ក្រុមហេសបូឡា បាននិយាយថា ក្រុមនេះនឹងមិនប្រគល់អាវុធរបស់ខ្លួនឡើយ។ នេះបើយោងតាមទីភ្នាក់ងារសារព័ត៌មានជាតិលីបង់។ លោក Qomati បាននិយាយថា ក្រុមហេសបូឡា នឹងមិនប្តេជ្ញាចិត្តចំពោះបទឈប់បាញ់ណាមួយឡើយ ប្រសិនបើការកាន់កាប់របស់អ៊ីស្រាអែល ត្រូវបានពង្រឹងយ៉ាងខ្លាំងក្លានៅភាគខាងត្បូងនោះ»។ លោក Qomati ក៏បានចោទប្រកាន់មន្ត្រីលីបង់មួយចំនួនថា បានស្វែងរកគោលដៅក្រុមនេះ ដោយនិយាយថា ក្រុមហេសបូឡា មានឫសគល់យ៉ាងជ្រៅនៅក្នុងប្រទេសលីបង់ ហើយនឹងបន្ត «កាតព្វកិច្ចតស៊ូ» របស់ខ្លួន។ យោងតាមក្រសួងសុខាភិបាលសាធារណៈលីបង់ ការវាយប្រហារតាមអាកាសកាលពីយប់ថ្ងៃអង្គារ បានសម្លាប់មនុស្សយ៉ាងហោចណាស់ ៣៤នាក់ ក្នុងនោះមានកុមារផងដែរ និងរាប់សិបនាក់ទៀត រងរបួស៕

នាយករដ្ឋមន្ត្រីអ៊ីរ៉ាក់ជំរុញឲ្យក្រុមប្រដាប់អាវុធធ្វើប្រតិបត្តិការ ក្រោមអំណាចរបស់រដ្ឋ

នាយករដ្ឋមន្ត្រីអ៊ីរ៉ាក់ លោក Ali al-Zaidi កាលពីថ្ងៃពុធ បានជំរុញឲ្យក្រុមប្រដាប់អាវុធទាំងអស់ នៅក្នុងប្រទេសនេះ ធ្វើប្រតិបត្តិការក្រោមអំណាចរបស់រដ្ឋ។ នេះបើយោងតាមការិយាល័យប្រព័ន្ធផ្សព្វផ្សាយរបស់ លោក al-Zaidi។ ការអំពាវនាវរបស់លោក al-Zaidi បានកើតឡើងជាការឆ្លើយតបទៅនឹងសេចក្តីថ្លែងការណ៍មួយដែលចេញដោយការិយាល័យរបស់បព្វជិតស៊ីអ៊ីតអ៊ីរ៉ាក់ លោក Muqtada al-Sadr មេដឹកនាំចលនាជាតិស៊ីអ៊ីត ដែលបានប្រកាសបំបែកសាខាប្រដាប់អាវុធរបស់ខ្លួន គឺ Saraya al-Salam ចេញពីចលនានេះ និងបានបញ្ជាឲ្យបុគ្គលិករបស់ខ្លួន ធ្វើសមាហរណកម្មទៅក្នុងរដ្ឋ។ដោយសរសើរចលនានេះ លោក al-Zaidi បានចាត់ទុកគំនិតផ្តួចផ្តើមនេះថា ជាជំហានដ៏សំខាន់មួយឆ្ពោះទៅរកការពង្រឹងស្ថិរភាពផ្ទៃក្នុង ដោយពង្រឹងគោលការណ៍នៃការរឹតបន្តឹងអាវុធចំពោះរដ្ឋ និងគាំទ្រកងកម្លាំងសន្តិសុខ។ នេះបើយោងតាមសេចក្តីថ្លែងការណ៍របស់ការិយាល័យប្រព័ន្ធផ្សព្វផ្សាយរបស់លោក al-Zaidi។លោក al-Zaidi ក៏បានអំពាវនាវឲ្យក្រុមប្រដាប់អាវុធទាំងអស់ដើរតាម «មាគ៌ាជាតិដែលមានការទទួល ខុសត្រូវ និងធ្វើប្រតិបត្តិការក្រោមឆត្ររបស់រដ្ឋ» ដោយសង្កត់ធ្ងន់ថា រដ្ឋគឺជាអាជ្ញាធរតែមួយគត់ដែលមានសិទ្ធិផ្តាច់មុខក្នុងការគ្រប់គ្រងអាវុធ និងអនុវត្តច្បាប់៕

កោះតៃវ៉ាន់ ជំរុញឱ្យអាមេរិក បន្តលក់អាវុធ ដោយលើកឡើងពីចំណងមិត្តភាពដ៏រឹងមាំរវាងភាគីទាំងពីរ

មេដឹកនាំកោះតៃវ៉ាន់ លោក ឡៃ ឆឹងតឺ(Lai Ching-te) បានជំរុញឱ្យសហរដ្ឋអាមេរិក បន្តលក់អាវុធ ដោយបានលើកឡើងពីចំណងមិត្តភាពដ៏រឹងមាំរវាងភាគីទាំងពីរ ទោះបីជាមានសម្ពាធពីប្រទេសចិនក៏ដោយ។ លោក ឡៃ បានថ្លែងនៅក្នុងព្រឹត្តិការណ៍មួយក្នុងទីក្រុងតៃប៉ិ។ លោកបាននិយាយសំដៅទៅលើក្របខ័ណ្ឌច្បាប់ ដែលគ្រប់គ្រងការលក់អាវុធទៅឱ្យកោះតៃវ៉ាន់។ លោក ឡៃ និយាយថា «ខ្ញុំសង្ឃឹមយ៉ាងមុតមាំថា ទំនាក់ទំនងរឹងមាំដូចថ្មដែលកោះតៃវ៉ាន់ និងសហរដ្ឋអាមេរិក បានកសាងឡើងរយៈពេលជាច្រើនទសវត្សរ៍ បង្កើតឡើងដោយផ្អែកលើច្បាប់ស្តីពីទំនាក់ទំនងកោះតៃវ៉ាន់ និងឯកសារធានាចំនួន៦ច្បាប់ នឹងបន្តធ្វើឱ្យស៊ីជម្រៅ និងពង្រឹង តាមរយៈកិច្ចសហប្រតិបត្តិការកាន់តែប្រសើរ»។ ដោយនិយាយសំដៅទៅលើប្រទេសចិន លោក ឡៃ បានបន្ថែមថា កោះតៃវ៉ាន់ នឹងមិនអត់ឱនដល់ការផ្លាស់ប្តូរណាមួយចំពោះស្ថានភាពសន្តិភាព និងស្ថិរភាពនៃច្រកសមុទ្រតៃវ៉ាន់ឡើយ។ លោក Trump បាននិយាយថា ការលក់អាវុធដែលអាចកើតមានទៅឱ្យកោះតៃវ៉ាន់ អាចត្រូវបានប្រើប្រាស់ជាទម្ងន់នៃការចរចា ហើយលោកមានឆន្ទះសន្ទនាជាមួយលោក ឡៃ មុនពេលធ្វើការសម្រេចចិត្ត។ ប្រទេសចិនបានជំទាស់ទៅនឹងការលក់នេះ ហើយបានជំរុញឱ្យសហរដ្ឋអាមេរិកឈប់បញ្ជូនសញ្ញាខុស អំពីឯករាជ្យភាពរបស់កោះតៃវ៉ាន់។

បណ្ដាញសង្គម

ព័ត៌មានថ្មីៗ

អតីតកម្មករវិលពីថៃ កំពុងរកឃើញឱកាសការងារស្ថិរភាពក្នុងវិស័យកាត់ដេរ ផលិតកម្ម និងកសិកម្មនៅកម្ពុជា

សាស្ត្រាចារ្យ និងថ្នាក់ដឹកនាំ ៧២រូប ចូលរួមតាក់តែងវិញ្ញាសាប្រឡងប្រជែងជ្រើសរើសមន្ត្រីរាជការ សម្រាប់រដ្ឋលេខាធិការដ្ឋានកិច្ចការព្រំដែន ដែលការប្រឡងនឹងប្រព្រឹត្តទៅនៅរសៀលនេះ

លោក Trump និយាយថា កំពុងធ្វើការសម្រេចចិត្តចុងក្រោយលើកិច្ចព្រមព្រៀងជាមួយអ៊ីរ៉ង់

សម្ដេចធិបតីពន្យល់អំពីកូតាដែលអាមេរិកផ្ដល់អាហារូបករណ៍ឱ្យទៅរៀននៅសាលាបណ្ឌិតសភាយោធាអាមេរិក West Point និងច្រានចោលការលើកឡើងរបស់ពលរដ្ឋថៃថាទៅតាមរយៈកូតារបស់កងទ័ពថៃ

អនុប្រធានទី១ គ.ជ.គ.ម ណែនាំឲ្យរៀបចំផែនការសកម្មភាពត្រៀមឆ្លើយតបចំពោះគ្រោះមហន្តរាយកើតឡើងជាយថាហេតុក្នុងរដូវវស្សា

សម្តេចតេជោ ហ៊ុន សែន ជួបសំណេះសំណាលជាមួយក្រុមប្រឹក្សា មន្ត្រីនៃមន្ទីរអង្គភាពនានា ក្នុងខេត្តពោធិ៍សាត់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877