BTV NEWS

យោធាអាមេរិក បង្ខំឱ្យនាវាចំនួន ១១៨ គ្រឿង ប្តូរទិសដៅ ក្នុងអំឡុងពេលបិទផ្លូវទឹកប្រឆាំងអ៊ីរ៉ង់

កិច្ចសន្ទនា Shangri-La បិទបញ្ចប់ ដោយគណៈប្រតិភូអំពាវនាវឱ្យមានទំនាក់ទំនង និងការសម្របសម្រួល

អារ៉ាប់រួម រិះគន់ការសម្រុកចូលបរិវេណវិហារអ៊ីស្លាម Al-Aqsa ដោយក្រុមអ្នកតាំងលំនៅឋានអ៊ីស្រាអែល

អាមេរិក និងអ៊ីរ៉ង់ បាញ់ផ្លោងដាក់គ្នាជាថ្មីទៀតលើគោលដៅរៀងៗខ្លួន ខណៈនៅតែពុំទាន់រកឃើញចំណុចបញ្ចប់សង្គ្រាមបាន

ព័ត៌មានអន្តរជាតិ

ទីបញ្ជាការយោធាជាន់ខ្ពស់៖ អ៊ីរ៉ង់មិនបានវាយប្រហារអេមីរ៉ាតអារ៉ាប់រួម ក្នុងរយៈពេលប៉ុន្មានថ្ងៃថ្មីៗនេះទេ

ទីបញ្ជាការយោធាជាន់ខ្ពស់ Khatam al-Anbiyaរបស់អ៊ីរ៉ង់ បាននិយាយកាលពីថ្ងៃអង្គារថា កងកម្លាំងប្រដាប់អាវុធរបស់ប្រទេសនេះ មិនបានធ្វើប្រតិបត្តិការមីស៊ីល ឬយានដ្រូនប្រឆាំងនឹងអារ៉ាប់រួម (UAE) ក្នុងរយៈពេលប៉ុន្មានថ្ងៃកន្លងមកនេះទេ។ នេះបើយោងតាមការចុះផ្សាយរបស់ទីភ្នាក់ងារសារព័ត៌មាន ពាក់កណ្តាលផ្លូវការ Fars ។អ្នកនាំពាក្យទីបញ្ជាការ លោក Ebrahim Zolfaghari បានធ្វើសេចក្តីប្រកាសនេះ ដោយសង្កត់ធ្ងន់ថា ប្រសិនបើអ៊ីរ៉ង់បានចាត់វិធានការបែបនេះ យើងនឹងប្រកាសវាយ៉ាងម៉ឺងម៉ាត់ និងច្បាស់លាស់»។លោកបានបដិសេធរបាយការណ៍មួយរបស់អេមីរ៉ាតអារ៉ាប់រួម ដែលបានចោទប្រកាន់អ៊ីរ៉ង់ពីបទបើកការវាយប្រហារដោយយានដ្រូន និងមីស៊ីលប្រឆាំងនឹងប្រទេសនេះ ដោយអំពាវនាវដល់មន្ត្រី និងរដ្ឋបុរសរបស់ អារ៉ាប់រួម កុំឲ្យប្រទេសរបស់ពួកគេធ្លាក់ចូលទៅក្នុងអន្ទាក់ដែលដាក់ដោយសហរដ្ឋអាមេរិក និងអ៊ីស្រាអែល។លោក Zolfaghari ក៏បានជំរុញឲ្យពួកគេកុំធ្វើ «ការឈ្លានពានដោយប្រើប្រព័ន្ធផ្សព្វផ្សាយ» ប្រឆាំងនឹង អ៊ីរ៉ង់ និងចោទប្រកាន់ «ដោយមិនសមហេតុផល» ប្រឆាំងនឹងប្រទេសនេះ ដោយកត់សម្គាល់ថា អេមីរ៉ាតអារ៉ាប់រួមបានក្លាយជាមូលដ្ឋានសំខាន់មួយរបស់សហរដ្ឋអាមេរិក និងអ៊ីស្រាអែល នៅក្នុងតំបន់អាស៊ីខាងលិច និងជាទីតាំងរបស់កងទ័ព និងគ្រឿងយុទ្ធោបករណ៍ភាគច្រើនរបស់ពួកគេ៕

លោក TRUMP នឹងផ្អាកប្រតិបត្តិការនាំនាវាចេញពីច្រកសមុទ្រហ័រមូស ដើម្បីទុកពេលធ្វើកិច្ចព្រមព្រៀងជាមួយអ៊ីរ៉ង់

លោកប្រធានាធិបតី ដូណាល់ ត្រាំ ( Donald Trump) បាននិយាយកាលពីល្ងាចថ្ងៃអង្គារថា លោកកំពុងផ្អាកកិច្ចខិតខំប្រឹងប្រែងរបស់សហរដ្ឋអាមេរិកក្នុងការដឹកនាំនាវាដែលជាប់គាំងចេញពីច្រកសមុទ្រហ័រមូស ដើម្បីផ្តល់ពេលវេលាសម្រាប់កិច្ចព្រមព្រៀង ក្នុងការបញ្ចប់សង្គ្រាមអ៊ីរ៉ង់ ប៉ុន្តែការបិទផ្លូវកំពង់ផែអ៊ីរ៉ង់របស់កងកម្លាំងអាមេរិក នឹងនៅតែមានសុពលភាព។លោក ត្រាំ បានប្រកាសពីការសម្រេចចិត្តនេះ នៅក្នុងការបង្ហោះនៅលើប្រព័ន្ធផ្សព្វផ្សាយសង្គម ដោយនិយាយថា កិច្ចខិតខំប្រឹងប្រែងនេះ ដែលបានចាប់ផ្តើមកាលពីថ្ងៃចន្ទនៅក្នុងផ្លូវទឹកដ៏សំខាន់សម្រាប់ថាមពលសកល នឹងផ្អាកមួយរយៈពេលខ្លី ដើម្បីមើលថាតើកិច្ចព្រមព្រៀងជាមួយទីក្រុងតេអេរ៉ង់ស្តីពីការបញ្ចប់សង្គ្រាមនៅមជ្ឈិមបូព៌ា អាចត្រូវបានបញ្ចប់ឬអត់។លោក ត្រាំ បាននិយាយថា ការសម្រេចនេះ គឺផ្អែកលើ «សំណើរបស់ប៉ាគីស្ថាន និងប្រទេសដទៃទៀត ភាពជោគជ័យផ្នែកយោធាដ៏អស្ចារ្យដែលយើងមានអំឡុងពេលយុទ្ធនាការប្រឆាំងនឹងប្រទេសអ៊ីរ៉ង់ និងលើសពីនេះទៀត ការពិតដែលថា វឌ្ឍនភាពដ៏អស្ចារ្យត្រូវបានធ្វើឡើងឆ្ពោះទៅរកកិច្ចព្រមព្រៀងពេញលេញ និងចុងក្រោយជាមួយតំណាងអ៊ីរ៉ង់»។សេតវិមានមិនបានឆ្លើយតបភ្លាមៗចំពោះសំណើសុំការអត្ថាធិប្បាយសម្រាប់ព័ត៌មានលម្អិតបន្ថែមអំពីវឌ្ឍនភាពក្នុងការចរចាដែលលោក ត្រាំ បានលើកឡើងនោះទេ។ កិច្ចចរចាភាគច្រើនបានជាប់គាំង ទោះបីជាបទឈប់បាញ់ដែលបានកើតឡើងជិតមួយខែមុន នៅមានសុពលភាពក៏ដោយ៕

លោក TRUMP មិនពន្យល់ឲ្យច្បាស់ពីបន្ទាត់ក្រហមនៃបទឈប់បាញ់ ខណៈអះអាងថា អ៊ីរ៉ង់ចង់បានកិច្ចព្រមព្រៀង

ប្រធានាធិបតីអាមេរិក លោក ដូណាល់ ត្រាំ (Donald Trump) កាលពីថ្ងៃអង្គារ បានបដិសេធមិនបញ្ជាក់ពីអ្វីដែលនឹងជាការរំលោភលើបទឈប់បាញ់ដ៏ផុយស្រួយជាមួយអ៊ីរ៉ង់ ដោយបញ្ជាក់ជាថ្មីថា ទីក្រុងតេអេរ៉ង់ចង់បានកិច្ចព្រមព្រៀងសន្តិភាពជាមួយទីក្រុងវ៉ាស៊ីនតោន។នៅពេលអ្នកយកព័ត៌មានសួរនៅក្នុងការិយាល័យពងក្រពើ លោក ត្រាំ មិនបានផ្តល់ព័ត៌មានលម្អិតទេ។លោកបាននិយាយថា៖«ជាការពិតណាស់ អ្នកនឹងដឹង ព្រោះខ្ញុំនឹងប្រាប់អ្នកឲ្យដឹង» ដោយបន្ថែមថា អ៊ីរ៉ង់កំពុង «ស្វែងរកទូកតូចៗ ដើម្បីព្យាយាមទប់ទល់ជាមួយកងទ័ពជើងទឹកដ៏អស្ចារ្យរបស់យើង»។លោកបានលើកឡើងថា៖«ពួកគេ (មេដឹកនាំអ៊ីរ៉ង់) ដឹងពីអ្វីដែលត្រូវធ្វើ»។ «ពួកគេដឹងពីអ្វីដែលមិនត្រូវធ្វើ សំខាន់ជាងនេះទៅទៀត»។លោក ត្រាំ បានបញ្ជាក់ថា៖«អ៊ីរ៉ង់ចង់ធ្វើកិច្ចព្រមព្រៀង»។លោក ត្រាំ បានទទូចថា «គ្មាននរណាម្នាក់ នឹងទម្លាយការបិទផ្លូវ» ដែលដាក់ដោយកងទ័ពជើងទឹកសហរដ្ឋអាមេរិកនោះទេ។ រយៈពេលប៉ុន្មានម៉ោងមុននេះ នាយអគ្គសេនាធិការចម្រុះលោក Dan Caine បានប្រាប់អ្នកយកព័ត៌មាននៅមន្ទីរបញ្ចកោណថា អ៊ីរ៉ង់បានវាយប្រហារកងកម្លាំងអាមេរិក «ច្រើនជាង ១០ដង» ចាប់តាំងពីបទឈប់បាញ់ បានចាប់ផ្តើមកាលពីដើមខែមុន៕

មេបញ្ជាការកងទ័ពអាកាសអ៊ីស្រាអែលនិយាយថា យោធាត្រៀមខ្លួនសម្រាប់ការដាក់ពង្រាយទៅកាន់អ៊ីរ៉ង

មេបញ្ជាការកងទ័ពអាកាសថ្មីរបស់អ៊ីស្រាអែល លោក Omer Tischler បាននិយាយកាលពីថ្ងៃអង្គារថា យោធាត្រៀមខ្លួនរួចជាស្រេច ដើម្បីដាក់ពង្រាយកម្លាំងទ័ពអាកាសពេញលេញរបស់ខ្លួន ទៅទិសខាងកើតឆ្ពោះទៅកាន់ប្រទេសអ៊ីរ៉ង់ ប្រសិនបើចាំបាច់ ស្របពេលមានភាពតានតឹងក្នុងតំបន់កំពុងកើនឡើង។លោក Tischler បានថ្លែងក្នុងពិធីផ្លាស់ប្តូរមេបញ្ជាការដែលចាក់ផ្សាយនៅលើបណ្តាញទូរទស្សន៍អ៊ីស្រាអែលសំខាន់ៗថា៖«យើងកំពុងតាមដានយ៉ាងដិតដល់នូវអ្វីដែលកំពុងកើតឡើងនៅក្នុងប្រទេសអ៊ីរ៉ង់ ហើយត្រៀមខ្លួនរួចជាស្រេច ដើម្បីដឹកនាំកងទ័ពអាកាសទាំងមូលឆ្ពោះទៅទិសខាងកើត ប្រសិនបើយើងត្រូវបានតម្រូវឲ្យធ្វើដូច្នេះ»។លោក Eyal Zamir នាយសេនាធិការកងកម្លាំងការពារជាតិអ៊ីស្រាអែល បានលើកឡើងក្នុងពិធីនោះថា យោធា «ប្រុងជើងការកម្រិតខ្ពស់» និង «ត្រៀមខ្លួនរួចជាស្រេច ដើម្បីឆ្លើយតបដោយបង្ខំ» ប្រសិនបើអ៊ីរ៉ង់វាយប្រហារអ៊ីស្រាអែល បន្ទាប់ពីការកើនឡើងភាពតានតឹងថ្មីៗនេះ នៅក្នុងឈូងសមុទ្រ។លោក Zamir បាននិយាយថា៖«កងកម្លាំងរបស់យើង ត្រូវបានដាក់ពង្រាយនៅទូទាំងគ្រប់ផ្នែក ដោយប្រយុទ្ធ និងត្រៀមខ្លួនរួចជាស្រេចភ្លាមៗសម្រាប់ស្ថានភាពណាមួយពីទីជិត និងទីឆ្ងាយ»។ អ៊ីស្រាអែល និងសហរដ្ឋអាមេរិក បានធ្វើការវាយប្រហារប្រឆាំងនឹងអ៊ីរ៉ង់ នៅថ្ងៃទី២៨ ខែកុម្ភៈ ដែលបង្កឲ្យ មានជម្លោះក្នុងតំបន់ ដែលមានរយៈពេលជិត ៦សប្តាហ៍ មុនពេលបទឈប់បាញ់ចូលជាធរមាន នៅថ្ងៃទី ០៨ ខែមេសា។ បទឈប់បាញ់នៅតែផុយស្រួយ ស្របពេលមានភាពតានតឹងដែលកំពុងបន្តកើតមានលើច្រកសមុទ្រហ័រមូស និងការវាយប្រហារជាបន្តបន្ទាប់របស់អ៊ីស្រាអែលនៅក្នុងប្រទេសលីបង់៕

ប្រធានាធិបតីអ៊ីរ៉ង់និយាយថា ទីក្រុងតេអេរ៉ង់ត្រៀមខ្លួនរួចជាស្រេចសម្រាប់ការសន្ទនា ក្នុងក្របខណ្ឌច្បាប់អន្តរជាតិ

ប្រធានាធិបតីអ៊ីរ៉ង់ លោក Masoud Pezeshkian កាលពីថ្ងៃអង្គារ បានធ្វើការសន្ទនាតាមទូរស័ព្ទ ជាមួយនាយករដ្ឋមន្ត្រីអ៊ីរ៉ាក់ លោក Ali al-Zaidi អំឡុងពេលនោះ លោក Pezeshkian បាននិយាយថា ទីក្រុងតេអេរ៉ង់ ត្រៀមខ្លួនរួចជាស្រេចសម្រាប់ការសន្ទនាក្នុងក្របខណ្ឌច្បាប់អន្តរជាតិ ប៉ុន្តែនឹងមិនយល់ព្រមតាម ការបង្ខំណាមួយឡើយ។លោក Pezeshkian បាននិយាយថា៖«ម៉្យាងវិញទៀត បញ្ហារបស់យើង គឺថា សហរដ្ឋអាមេរិកកំពុងបន្តគោលនយោបាយដាក់សម្ពាធអតិបរមាប្រឆាំងនឹងប្រទេសរបស់យើង ហើយប្រទេសនេះរំពឹងថា អ៊ីរ៉ង់នឹងមកតុចរចា ហើយនៅទីបំផុតចុះចាញ់នឹងការទាមទារឯកតោភាគីរបស់ខ្លួន...សមីការបែបនេះ មិនអាចទៅរួចទេ»។ នេះបើយោងតាមសេចក្តីថ្លែងការណ៍មួយដែលបានចេញផ្សាយដោយការិយាល័យរបស់លោក Pezeshkian។លោកបានកត់សម្គាល់ថា ជាមូលដ្ឋាន អ៊ីរ៉ង់មិនចាត់ទុកសង្គ្រាម និងអសន្តិសុខជាជម្រើសអំណោយផលនោះទេ។លោក Pezeshkian បានសង្កត់ធ្ងន់ថា អ៊ីរ៉ង់មិនត្រូវដកហូតបច្ចេកវិទ្យានុយក្លេអ៊ែរទេ ដោយនិយាយថា សហរដ្ឋអាមេរិកនិយាយតាមរបៀបដូចជាអ៊ីរ៉ង់មិនត្រូវមានឧស្សាហកម្មនុយក្លេអ៊ែរ ហើយដាក់សម្ពាធបន្ថែមលើប្រទេសនេះ ដោយដាក់ការទាមទារហួសហេតុពេក។លោកបានបន្ថែមថា នៅក្នុងការចរចាទាំងអស់ពីមុនមក អ៊ីរ៉ង់បានត្រៀមខ្លួនរួចជាស្រេច ដើម្បីផ្តល់ជូនក្នុងក្របខណ្ឌនៃបទប្បញ្ញត្តិអន្តរជាតិ និងការត្រួតពិនិត្យសកលលោកនូវអ្វីដែលត្រូវបានចាត់ទុកថា ចាំបាច់ក្រោមបទដ្ឋានអន្តរជាតិ ដើម្បីធានាបាននូវលក្ខណៈសន្តិភាពនៃសកម្មភាពនុយក្លេអ៊ែររបស់ខ្លួន៕

កងទ័ពរបស់ប្រទេសឆាដ និយាយថាកងកម្លាំងរបស់ខ្លួន២៣នាក់ស្លាប់ក្នុងការវាយប្រហារពីក្រុមបូកូ ហារ៉ាម

កងទ័ពបាននិយាយក្នុងសេចក្ដីថ្លែងការណ៍មួយកាលពីថ្ងៃអង្គារ ៥ ឧសភា សប្ដាហ៍នេះថា ក្រុមសកម្មប្រយុទ្ធអ៊ីស្លាមជ្រុលនិយមបូកូហារ៉ាម (Boko Haram) បានវាយប្រហារលើមូលដ្ឋានយោធាមួយក្នុងប្រទេសឆាដ ដោយបានសម្លាប់បុគ្គលិកសន្តិសុខយ៉ាងហោចណាស់២៣នាក់ និង២៦នាក់ផ្សេងទៀត បានរងរបួស។ សេចក្ដីថ្លែងការណ៍ខាងលើបាននិយាយថា កងទ័ព បានវាយបណ្ដេញការវាយប្រហារដែលបានកើតឡើងកាលពីយប់ថ្ងៃចន្ទដើមសប្ដាហ៍នេះ ក្នុងតំបន់ Lake Chad និងប្រតិបត្តិការជាច្រើនទៀតដើម្បីបោសសម្អាត។ ក្រុមសកម្មប្រយុទ្ធ បូកូហារ៉ាម បានបន្តវាទទីចាប់តាំងពីឆ្នាំ២០០៩ ពីភាគខាងជើងប្រទេសនីហ្សេរីយ៉ា ដល់ប្រទេសឆាដភាគខាងលិច ជាទីដែលការវាយប្រហារលើមូលដ្ឋានយោធា បានក្លាយជាសកម្មភាពញឹកញាប់។ លោកប្រធានាធិបតីឆាដ Mahamat Idriss Deby Itno បាននិយាយក្នុងការបង្ហោះលើបណ្ដាញសង្គម Facebookកាលពីថ្ងៃអង្គារថា ក្រុមភេរវករបូកូហារ៉ាម បានបើកការវាយប្រហារយ៉ាងកំសាកជាថ្មីទៀតហើយកាលពីយប់មិញ លើមូលដ្ឋានទ័ពរបស់ពួកលោកក្នុងតំបន់ Barka Tolorom ហើយលោកក៏បានថ្កោលទោសផងដែរ។ លោកថា ពួកលោកនឹង បន្តប្រយុទ្ធប្រឆាំងជាមួយនឹងការប្ដេជ្ញាជាថ្មីទៀត រហូតទាល់តែការគំរាមកំហែងទាំងឡាយត្រូវបានកម្ចាត់ចោលទាំងស្រុង និងបានចូលរួមរំលែកទុក្ខដល់ក្រុមគ្រួសារកងទ័ពដែលបានពលី ផងដែរ៕

ការស្ទង់មតិបង្ហាញថា ប្រជាជនអ៊ីស្រាអែលភាគច្រើនប្រឆាំងការបញ្ចប់សង្គ្រាមជាមួយអ៊ីរ៉ង់

ការស្ទង់មតិមួយធ្វើឡើងដោយវិទ្យាស្ថានប្រជាធិបតេយ្យអ៊ីស្រាអែល (IDI) ជាស្ថាប័នស្រាវជ្រាវមួយ បានបង្ហាញថា ប្រជាជនអ៊ីស្រាអែលភាគច្រើនជឿថា ការបញ្ចប់សង្គ្រាមជាមួយអ៊ីរ៉ង់ ក្រោមលក្ខខណ្ឌបច្ចុប្បន្ន នឹងមិនបម្រើផលប្រយោជន៍សន្តិសុខជាតិរបស់ពួកគេបានគ្រប់គ្រាន់ឡើយ។ អ្នកឆ្លើយតបជនជាតិជ្វីហ្វពីរភាគបី បាននិយាយថា ការបញ្ចប់សង្គ្រាមនៅពេលនេះ មិនស្របគ្នាទាល់តែសោះជាមួយនឹងផលប្រយោជន៍សន្តិសុខរបស់អ៊ីស្រាអែល។ជារួម ប្រជាជនអ៊ីស្រាអែល៥៩ភាគរយ ប្រឆាំងការបញ្ចប់សង្គ្រាមនៅដំណាក់កាលនេះ។ ពលរដ្ឋអារ៉ាប់អ៊ីស្រាអែល មានការខ្វែងគំនិតគ្នាយ៉ាងខ្លាំង ដោយស្ទើរតែពាក់កណ្តាលបាននិយាយថា ការបញ្ចប់សង្គ្រាមបម្រើផលប្រយោជន៍របស់អ៊ីស្រាអែល «ក្នុងកម្រិតធំ»។ ប្រហែល៦២ភាគរយនៃអ្នកដែលត្រូវបានស្ទង់មតិទាំងអស់រំពឹងថា អ៊ីស្រាអែលនឹងវិលត្រឡប់ទៅរកជម្លោះទ្រង់ទ្រាយធំជាមួយអ៊ីរ៉ង់វិញ។ការរកឃើញក្នុងការស្ទង់មតិក៏បានបង្ហាញផងដែរថា ប្រជាជនអ៊ីស្រាអែល៥១ភាគរយ ជឿថា សហរដ្ឋអាមេរិក មានឥទ្ធិពលលើការសម្រេចចិត្តផ្នែកការពារជាតិរបស់អ៊ីស្រាអែលច្រើនជាងរដ្ឋាភិបាលរបស់ពួកគេ ដែលកើនឡើងពី៤៤ភាគរយនៅក្នុងខែតុលា ឆ្នាំ២០២៥។ មានតែ១៨ ភាគរយប៉ុណ្ណោះដែលនិយាយថា រដ្ឋាភិបាលអ៊ីស្រាអែល មានឥទ្ធិពលច្រើនជាង។ស្តីពីប្រទេសលីបង់ ពីរភាគបីនៃពលរដ្ឋអ៊ីស្រាអែល បាននិយាយថា ឱកាសនៃការឈានដល់កិច្ចព្រមព្រៀងដែលមានស្ថិរភាពដែលរួមបញ្ចូលការដកហូតអាវុធពីក្រុមហេសបូឡា គឺមានទាប ឬគ្មាន។ ក្នុងចំណោមអ្នកឆ្លើយតបជនជាតិជ្វីហ្វ ជិត៨០ភាគរយមានភាពទុទិដ្ឋិនិយមចំពោះរឿងនេះ។

អាមេរិក៖ កិច្ចព្រមព្រៀងសន្តិភាពអ៊ីស្រាអែល-លីបង់ អាចឈានដល់បាន ប៉ុន្តែក្រុមហេសបូឡាគឺជាបញ្ហា

លោក Marco Rubio រដ្ឋមន្ត្រីការបរទេសសហរដ្ឋអាមេរិក បាននិយាយកាលពីថ្ងៃអង្គារ ទី៥ ខែឧសភា ថា សន្តិភាពរវាងអ៊ីស្រាអែល និងលីបង់ អាចឈានដល់បាន ប៉ុន្តែក្រុមសកម្មប្រយុទ្ធហេសបូឡាលីបង់ គឺជាបញ្ហាមួយ។ លោកបាននិយាយបន្ថែមថា «បញ្ហាជាមួយអ៊ីស្រាអែល និងលីបង់ ពុំមែនជាអ៊ីស្រាអែល ឬលីបង់ទេ វាគឺជាក្រុមហេសបូឡា»។ រដ្ឋាភិបាលលីបង់ ចង់បានកិច្ចព្រមព្រៀងអចិន្ត្រៃយ៍ជាមួយសម្ព័ន្ធមិត្តអាមេរិក គឺអ៊ីស្រាអែលដែលនឹងបញ្ចប់វដ្តនៃការឈ្លានពាន និងការវាយប្រហារដដែលៗរបស់អ៊ីស្រាអែលជាអ្នកដែលបញ្ឈប់ភ្លាមៗពីការនិយាយថាខ្លួនចង់បានកិច្ចព្រមព្រៀងសន្តិភាព។ អ៊ីស្រាអែលនិយាយថា កិច្ចព្រមព្រៀងណាមួយត្រូវតែដកហូតអាវុធជាអចិន្ត្រៃយ៍ពីក្រុមហេសបូឡាគាំទ្រដោយអ៊ីរ៉ង់។ អ៊ីស្រាអែល បានបង្កើនការវាយប្រហារតាមអាកាសលើប្រទេសលីបង់ បន្ទាប់ពីក្រុមហេសបូឡា បានបាញ់មីស៊ីលទៅលើអ៊ីស្រាអែលកាលពីថ្ងៃទី២ ខែមីនា បីថ្ងៃក្នុងសង្គ្រាមរវាងសហរដ្ឋអាមេរិក និងអ៊ីស្រាអែលលើអ៊ីរ៉ង់។ បន្ទាប់មក អ៊ីស្រាអែលបានពង្រីកការឈ្លានពានតាមដីគោកចូលទៅភាគខាងត្បូងប្រទេសលីបង់។ ក្រសួងសុខាភិបាលលីបង់និយាយថា មនុស្សជាង២.៦០០នាក់ត្រូវបានសម្លាប់នៅក្នុងការវាយប្រហាររបស់អ៊ីស្រាអែលចាប់តាំងពីថ្ងៃទី២ ខែមីនា ហើយមនុស្សជាងមួយលាននាក់ត្រូវបានជម្លៀសចេញ។ អ៊ីស្រាអែល និងលីបង់ បានយល់ព្រមលើបទឈប់បាញ់ដ៏ផុយស្រួយនៅពាក់កណ្តាលខែមេសា ដែលចាប់តាំងពីពេលនោះមក ត្រូវបានបន្ថែមពេលដល់ខែឧសភា។ ទោះជាយ៉ាងណា អ៊ីស្រាអែលបានរក្សាការកាន់កាប់ភាគខាងត្បូងប្រទេសលីបង់ និងបានរុះរើភូមិជាច្រើននៅទីនោះ ខណៈក្រុមហេសបូឡា បន្តវាយប្រហារលើកងកម្លាំងអ៊ីស្រាអែល។ ទីក្រុងតេអេរ៉ង់និយាយថា កិច្ចព្រមព្រៀងណាមួយដើម្បីបញ្ចប់សង្គ្រាមអ៊ីរ៉ង់ ក៏ត្រូវតែបញ្ឈប់ការវាយប្រហាររបស់អ៊ីស្រាអែលនៅក្នុងប្រទេសលីបង់ផងដែរ ប៉ុន្តែទីក្រុងវ៉ាស៊ីនតោននិយាយថា បញ្ហាទាំងនេះគឺដាច់ដោយឡែកពីគ្នា។

អគ្គិភ័យដ៏ធំមួយនៅផ្សារទំនើបប្រទេសអ៊ីរ៉ង់ បានបណ្តាលឲ្យមនុស្សស្លាប់ និងរងរបួស

ប្រព័ន្ធផ្សព្វផ្សាយក្នុងស្រុកបានរាយការណ៍ថា មនុស្សយ៉ាងហោចណាស់ ៨ នាក់បានស្លាប់ និង៣៦នាក់បានរងរបួស បន្ទាប់ពីអគ្គិភ័យបានឆាបឆេះនៅផ្សារទំនើប Arghavan ក្នុងទីក្រុង Andisheh ភាគខាងលិចទីក្រុងតេអេរ៉ង់។យោងតាមកាសែតរបស់តុលាការអ៊ីរ៉ង់ Mizan បានឲ្យដឹងថា ផ្សារទំនើបបានឆាបឆេះកាលពីថ្ងៃអង្គារ ដោយសារតែស្រទាប់បិតផ្នែកខាងក្រៅអគារងាយរងភ្លើងឆាបឆេះ។វីដេអូនៃអគ្គិភ័យ ដែលត្រូវបានចែករំលែកពាសពេញបណ្តាញផ្សព្វផ្សាយអ៊ីរ៉ង់ រួមទាំងទីភ្នាក់ងារសារព័ត៌មាន IRNA បានបង្ហាញថា អគារនេះត្រូវបានហ៊ុមព័ទ្ធដោយអណ្តាតភ្លើង។វិទ្យុអ៊ីរ៉ង់ IRIB បាននិយាយថា បទបញ្ជាមួយត្រូវបានចេញដើម្បីកំណត់អត្តសញ្ញាណ និងចាប់ខ្លួនអ្នកដែលទទួលខុសត្រូវចំពោះហេតុការណ៍នេះ ព្រមទាំងអ្នកអភិវឌ្ឍន៍អចលនទ្រព្យនេះផងដែរ។

ចិនទទួលស្វាគមន៍រដ្ឋមន្ត្រីការបរទេសអ៊ីរ៉ង់ ប៉ុន្មានថ្ងៃមុនដំណើរទស្សនកិច្ចរបស់លោក Trump

ប្រទេសចិនបានទទួលស្វាគមន៍រដ្ឋមន្ត្រីការបរទេសអ៊ីរ៉ង់ លោក Abbas Araghchi នៅថ្ងៃពុធ៦ឧសភា សប្ដាហ៍នេះ ជាលើកដំបូងចាប់តាំងពីការផ្ទុះឡើងនៃសង្គ្រាមអាមេរិក-អ៊ីស្រាអែល លើទីក្រុងតេអេរ៉ង់ ត្រឹមតែប៉ុន្មានថ្ងៃមុនដំណើរទស្សនកិច្ចដែលបានគ្រោងទុករបស់ប្រធានាធិបតីអាមេរិក លោក Donald Trump ទៅកាន់ទីក្រុងប៉េកាំង។យោងតាមទីភ្នាក់ងារសារព័ត៌មានរដ្ឋ Xinhua លោក Wang Yi ប្រមុខការទូតរបស់ប្រទេសចិន បានជួបជាមួយលោក Araghchi នៅព្រឹកថ្ងៃពុធនេះ ។ប្រព័ន្ធផ្សព្វផ្សាយរដ្ឋចិនបានផ្សព្វផ្សាយដំណើរទស្សនកិច្ចនេះយ៉ាងផុសផុលកាលពីយប់ថ្ងៃអង្គារសប្ដាហ៍នេះ ដោយដកស្រង់សេចក្តីថ្លែងការណ៍របស់ក្រសួងការបរទេសដែលបានកត់សម្គាល់ថា ទីក្រុងប៉េកាំង បានផ្តួចផ្តើមការអញ្ជើញនេះ។ ប៉ុន្តែសេចក្តីថ្លែងការណ៍ផ្លូវការនេះ ពុំបានបង្ហាញពីរបៀបវារៈទេ។ក្រសួងការបរទេសអ៊ីរ៉ង់បាននិយាយថា កិច្ចពិភាក្សានឹងគ្របដណ្តប់លើទំនាក់ទំនងទ្វេភាគី ក៏ដូចជាបញ្ហាតំបន់ និងអន្តរជាតិ។លោក Amir Handjani សមាជិកក្រុមប្រឹក្សាភិបាលនៅវិទ្យាស្ថាន Quincy ដែលមានមូលដ្ឋានៅក្នុងទីក្រុងវ៉ាស៊ីនតោន ឌីស៊ី សហរដ្ឋអាមេរិក បាននិយាយថា កិច្ចប្រជុំនេះគឺជាយុទ្ធសាស្ត្រយ៉ាងជ្រាលជ្រៅ។ ទីក្រុងតេអេរ៉ង់ និងទីក្រុងប៉េកាំង កំពុងធ្វើការដើម្បីផលប្រយោជន៍របស់ពួកគេមុនពេលកិច្ចប្រជុំកំពូលរបស់លោក Trump ជាមួយប្រធានាធិបតីចិន លោក Xi Jinping ហើយពេលវេលាគឺមានសារៈសំខាន់ខ្លាំងណាស់៕

បណ្ដាញសង្គម

ព័ត៌មានថ្មីៗ

ទីក្រុង Mexico City ពន្លឿនការរៀបចំត្រៀមទទួលព្រឹត្តិការណ៍បាល់ទាត់ពិភពលោក

មួយសប្តាហ៍បណ្តេញជនបរទេសជាង៩០០នាក់ចេញពីកម្ពុជាពាក់ព័ន្ធករណី Online Scams

សម្តេច ម៉ែន សំអន៖«គ្រោះធម្មជាតិមិនអាចហាមឃាត់បាន ប៉ុន្តែយើងអាចកាត់បន្ថយការខូចខាត និងគ្រោះថ្នាក់ដល់អាយុជីវិត តាមរយៈការបង្កើនការប្រុងប្រយ័ត្ន និងការសហការជួយគ្នាទៅវិញទៅមកក្នុងស្មារតីសាមគ្គីភាព»

កម្ពុជា និងលុចសំបួ ពិភាក្សាជំរុញទិសដៅយុទ្ធសាស្ត្រវិស័យអាទិភាពកិច្ចសហប្រតិបត្តិការប្រទេសទាំងពីរ

រដ្ឋមន្ត្រីក្រសួងទេសចរណ៍៖ កុមារគឺជាគ្រាប់ពូជនៃអនាគតជាតិ និងជាកម្លាំងចលករសម្រាប់ការអភិវឌ្ឍសង្គម និងសេដ្ឋកិច្ចកម្ពុជា

ក្រសួងបរិស្ថាន បន្តពង្រឹងការអនុវត្តច្បាប់ ទប់ស្កាត់ការបញ្ចេញទឹកកខ្វក់បានជាង ៣០លានម៉ែត្រគូប មិនឱ្យហូរចូលទៅបំពុលប្រភពទឹកសាធារណៈ

រដ្ឋមន្រ្តីក្រសួងបរិស្ថាន ចូលរួមអបអរសាទរទិវាកុមារអន្តរជាតិ ១ មិថុនា នៅស្រុកពញាក្រែក ខេត្តត្បូងឃ្មុំ

កម្មវិធីរត់ «១ម៉ឺនជំហាន ដើម្បីសិស្ស ១ម៉ឺននាក់» អាចរៀបចំជាបន្ដបន្ទាប់ ក្រោយជោគជ័យនៅឆ្នាំដំបូង

Arsenal និងអ្នកគាំទ្រអបអរជើងឯក Premier League លើកដំបូងក្នុងរយៈពេល ២២ ឆ្នាំទោះទើបខកចិត្តនៅ UCL

ករណីកាត់សៀលចូលយកសម្ភារៈនៅក្នុងកាស៊ីណូព្រែកចាក៖ ចោទប្រកាន់មន្ត្រីនគរបាល-អាវុធហត្ថខេត្តកំពត និងអ្នកទទួលផល សរុប៥៤នាក់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877