BTV NEWS

ចិន ល្បាតតំបន់ថ្មប៉ប្រះទឹក Scarborough Shoal បន្ទាប់ពីហ្វីលីពីនព្រមានពីការគំរាមកំហែងពីទីក្រុងប៉េកាំង

សារព័ត៌មានអាមេរិក៖ លោក Trump កំពុងស្វែងរកការកែសម្រួលកិច្ចព្រមព្រៀងអាមេរិក-អ៊ីរ៉ង់

[UPDATE] ចំនួនអ្នកស្លាប់ក្នុងហេតុការណ៍ដួលរលំអគារកំពុងសាងសង់នៅភាគខាងជើងហ្វីលីពីនកើនឡើងដល់ជាង១០នាក់

អ្នកនយោបាយឃឺដអ៊ីរ៉ង់ អះអាងថាអ៊ីរ៉ង់បានវាយប្រហារមូលដ្ឋានគណបក្សនៅក្រុង Erbil ប្រទេសអ៊ីរ៉ាក់

ព័ត៌មានអន្តរជាតិ

ប្រព័ន្ធផ្សព្វផ្សាយអ៊ីរ៉ង់៖ ជនស៊ីវិល ៥នាក់ បានស្លាប់ នៅក្នុងការវាយប្រហាររបស់អាមេរិកលើទូកដឹកទំនិញ

ទីភ្នាក់ងារសារព័ត៌មាន Tasnim ពាក់កណ្តាលផ្លូវការរបស់អ៊ីរ៉ង់បានរាយការណ៍នៅថ្ងៃអង្គារនេះថា ជនស៊ីវិល ៥នាក់ បានស្លាប់ នៅក្នុងការវាយប្រហាររបស់សហរដ្ឋអាមេរិកលើទូកដឹកទំនិញ។ របាយការណ៍នោះ បានឲ្យដឹងថា បន្ទាប់ពីការអះអាងរបស់យោធាសហរដ្ឋអាមេរិកថា ខ្លួនបានកំណត់គោលដៅលើទូកល្បឿនលឿនអ៊ីរ៉ង់ចំនួន ៦គ្រឿង ហើយពុំមាននាវាប្រយុទ្ធរបស់អ៊ីរ៉ង់ណាមួយ ត្រូវបានវាយប្រហារ ប្រភពព័ត៌មានក្នុងស្រុក ត្រូវបានពិគ្រោះយោបល់ ដើម្បីផ្ទៀងផ្ទាត់លក្ខណៈនៃឧប្បត្តិហេតុនេះ។របាយការណ៍បានបញ្ជាក់ថា កងកម្លាំងសហរដ្ឋអាមេរិកបានវាយប្រហារទូកដឹកទំនិញស៊ីវិលតូចៗចំនួនពីរគ្រឿង ដែលកំពុងធ្វើដំណើរពីទីក្រុង Khasab តាមបណ្តោយឆ្នេរសមុទ្រអូម៉ង់ឆ្ពោះទៅកាន់អ៊ីរ៉ង់ ដោយបានសម្លាប់អ្នកដំណើរស៊ីវិលចំនួន ៥នាក់ នៅលើទូកនោះ។លោក Brad Cooper ប្រធានទីបញ្ជាការកណ្តាលសហរដ្ឋអាមេរិក បាននិយាយកាលពីថ្ងៃចន្ទថា យោធាសហរដ្ឋអាមេរិក បានវាយប្រហារពន្លិចទូកតូចៗរបស់អ៊ីរ៉ង់ចំនួន ៦ គ្រឿង នៅក្នុងច្រកសមុទ្រហ័រមូស។ លោក Cooper បានប្រាប់សន្និសីទសារព័ត៌មានមួយថា ទូកអ៊ីរ៉ង់ត្រូវបានវាយប្រហារដោយឧទ្ធម្ភាគចក្រ Apache និង MH-60 Seahawk របស់សហរដ្ឋអាមេរិក៕

ការវិភាគ៖ រុស្ស៊ីបាត់បង់ទឹកដី នៅអ៊ុយក្រែន ក្នុងខែមេសា ជាលើកដំបូងតាំងពីពាក់កណ្តាលឆ្នាំ២០២៣

ការវិភាគរបស់តីភ្នាក់ងារសារព័ត៌មាន AFP លើទិន្នន័យពីវិទ្យាស្ថានសិក្សាពីសង្គ្រាម (ISW) បានបង្ហាញថា រុស្ស៊ីបានបាត់បង់ទឹកដីច្រើន ជាងអ្វីដែលខ្លួនដណ្ដើមបាន នៅអ៊ុយក្រែន ក្នុងខែមេសា ដោយនេះជាលើកដំបូង គិតចាប់តាំងពីមានការវាយបកតបវិញរបស់អ៊ុយក្រែន នារដូវក្តៅឆ្នាំ២០២៣។ទិន្នន័យរបស់ ISW បានបង្ហាញថា ទីក្រុងមូស្គូបានបាត់បង់ការគ្រប់គ្រងប្រហែល ១២០គីឡូម៉ែត្រការ៉េ ចន្លោះខែមីនា និងខែមេសា។ ទោះបីជាការប្រយុទ្ធគ្នា នៅតំបន់ជួរមុខ ជិតស្ថិតក្នុងស្ថានភាពនៅទ្រឹងក៏ដោយ ក៏ការវាយប្រហារយ៉ាងខ្លាំងក្លា និងបណ្ដាលឲ្យមានអ្នកស្លាប់ ដោយយានដ្រូន នៅតែបន្តមិនថមថយនោះឡើយ ក្នុងរយៈពេលប៉ុន្មានខែថ្មីៗនេះ ខណៈដែលការចរចាដឹកនាំដោយសហរដ្ឋអាមេរិក ស្ដីពីជម្លោះនេះ បានជាប់គាំង ស្របពេលដែលសង្គ្រាមមជ្ឈិមបូព៌ា នៅតែបន្តមានយ៉ាងយឺតៗជាលំដាប់។ការរុលទៅមុខរបស់រុស្ស៊ី បានធ្លាក់ចុះចាប់តាំងពីចុងឆ្នាំ២០២៥ ខណៈដែលបញ្ហាទំនាក់ទំនង នៅក្នុងកងទ័ពរុស្ស៊ី រួមផ្សំជាមួយនឹងការវាយបករបស់អ៊ុយក្រែន បានជួយឲ្យទីក្រុងគីវសម្រេចបាននូវការទម្លុះទីតាំងរបស់សត្រូវ នៅតំបន់ភាគអាគ្នេយ៍។ISW ដែលមានមូលដ្ឋាននៅសហរដ្ឋអាមេរិកបានឲ្យដឹងថា៖ «ការវាយប្រហារចម្ងាយមធ្យមរបស់អ៊ុយក្រែន ការរារាំងមិនឲ្យចូលប្រើប្រាស់ស្ថានីយផ្កាយរណប Starlink របស់រុស្ស៊ី នៅអ៊ុយក្រែន ក្នុងខែកុម្ភៈ ឆ្នាំ២០២៦ និងការរឹតបន្តឹងកម្មវិធីផ្ញើសារ Telegram របស់វិមានក្រឹមឡាំង បានធ្វើឲ្យបញ្ហាដែលមានស្រាប់នៅក្នុងយោធារុស្ស៊ីកាន់តែធ្ងន់ធ្ងរឡើង»។តែទោះជាយ៉ាងនេះក្ដី កងកម្លាំងរុស្ស៊ីក្នុងចំនួនដ៏តិចតួច នៅតែមានវត្តមាន នៅក្នុងតំបន់ប្រហែល ៣ភាគ៤នៃតំបន់ដែលអ៊ុយក្រែនបានដណ្តើមបានវិញ។ នេះបើយោងតាមការវាយតម្លៃរបស់សារព័ត៌មាន AFP ដោយផ្អែកលើទិន្នន័យ ISW៕

អាមេរិកបំផ្លាញទូកតូចៗរបស់អ៊ីរ៉ង់ ៦គ្រឿង បាញ់ទម្លាក់មីស៊ីល និងយានដ្រូន ខណៈបើកច្រកសមុទ្រ Hormuz

យោធាសហរដ្ឋអាមេរិកបានឲ្យដឹងកាលថ្ងៃចន្ទ (ទី៤ ខែឧសភា ឆ្នាំ២០២៦) ថា ខ្លួនបានបំផ្លាញទូកតូចៗរបស់អ៊ីរ៉ង់ចំនួន ៦គ្រឿង ហើយបានស្ទាក់ចាប់មីស៊ីលតម្រង់គោលដៅ និងយានដ្រូនដែលបាញ់ដោយទីក្រុងតេអេរ៉ង់ ខណៈដែលសាធារណរដ្ឋឥស្លាមព្យាយាមរារាំងកិច្ចប្រឹងប្រែងថ្មីរបស់កងទ័ពជើងទឹកអាមេរិកក្នុងការបើកឲ្យការដឹកជញ្ជូនបានឆ្លងកាត់ច្រកសមុទ្រ Hormuz។ប្រធានាធិបតីអាមេរិក លោក Donald Trump បានចាប់ផ្តើមប្រតិបត្តិការ ដែលហៅថា Project Freedom (គម្រោងសេរីភាព) នៅថ្ងៃទី៤ ខែឧសភា ខណៈដែលលោកបានប្រឹងប្រែងដណ្តើមការគ្រប់គ្រងផ្លូវទឹកដ៏សំខាន់មួយនេះ ពីអ៊ីរ៉ង់ បន្ទាប់ពីប្រទេសនេះបានបិទច្រកសមុទ្រ Hormuz យ៉ាងមានប្រសិទ្ធភាព បន្ទាប់ពីសហរដ្ឋអាមេរិក និងអ៊ីស្រាអែល បានចាប់ផ្តើមជម្លោះ កាលពីថ្ងៃទី២៨ ខែកុម្ភៈ។ប្រមុខបញ្ជាការកណ្តាល ឧត្តមនាវីឯកអាមេរិក លោក Brad Cooper បានបដិសេធមិនធ្វើអត្ថាធិប្បាយអ្វីឡើយ ជុំវិញសំណួរថា តើលោកគិតថា បទឈប់បាញ់ដែលបានចាប់ផ្តើមនៅថ្ងៃទី៨ ខែមេសា នៅតែមានសុពលភាពដែរឬទេ ខណៈដែលអ៊ីរ៉ង់បានបើកការវាយប្រហារនៅក្នុងតំបន់ ក្នុងនោះរួមទាំងការវាយប្រហារដោយយានដ្រូន និងមីស៊ីលលើប្រទេសអារ៉ាប់រួម នៅថ្ងៃទី៤ ខែឧសភាផងដែរ។ប៉ុន្តែលោក Cooper បានទទួលស្គាល់កិច្ចប្រឹងប្រែងរបស់កងឆ្មាំបដិវត្តន៍ឥស្លាម (IRGC) ដែលកំពុងបន្តមាន ដើម្បី «រំខាន» ប្រតិបត្តិការរបស់លោក Trump។ លោកបាននិយាយថា៖ «កងកម្លាំង IRGC បានបើកការវាយប្រហារដោយមីស៊ីលតម្រង់គោលដៅ យានដ្រូន និងទូកតូចៗជាច្រើន ទៅលើនាវាដែលយើងកំពុងការពារ។ តែយើងបានកម្ចាត់ការគំរាមកំហែងនីមួយៗតាមរយៈប្រើប្រាស់អាវុធការពារដ៏មានប្រសិទ្ធភាព»។ជាមួយគ្នានេះ លោក Cooper បានបញ្ជាក់បន្ថែមថា លោក «បានណែនាំយ៉ាងម៉ឺងម់ាត់» ទៅកងកម្លាំងអ៊ីរ៉ង់ឲ្យនៅឆ្ងាយពីធនធានយោធាអាមេរិក ខណៈដែលទីក្រុងវ៉ាស៊ីនតោនចាប់ផ្តើមប្រតិបត្តិការ ដែលលោកបាននិយាយថា ពាក់ព័ន្ធនឹងកងទ័ពអាមេរិកចំនួន ១៥.០០០នាក់ នាវាពិឃាតកងទ័ពជើងទឹកអាមេរិក យន្តហោះជាង ១០០គ្រឿង ទាំងនៅផ្លូវគោក និងទឹក និងធនធានក្រោមសមុទ្រ៕

អ៊ីរ៉ង់៖ គ្មានដំណោះស្រាយយោធាចំពោះវិបត្តិទេ ខណៈព្រមានអំពីភាពតានតឹងនៅច្រកសមុទ្រ Hormuz

នាព្រឹកថ្ងៃអង្គារ (ទី៥ ខែឧសភា ឆ្នាំ២០២៦) នេះ រដ្ឋមន្ត្រីការបរទេសអ៊ីរ៉ង់ លោក Abbas Araghchi បាននិយាយថា «គ្មានដំណោះស្រាយយោធា ចំពោះវិបត្តិនយោបាយទេ» ដោយព្រមានសហរដ្ឋអាមេរិក និងអារ៉ាប់រួម អំពីការកើនឡើងនូវភាពតានតឹងបន្ថែមទៀត នៅក្នុងច្រកសមុទ្រ Hormuz។នៅលើវេទិកាបណ្ដាញសង្គម X លោក Araghchi បានលើកឡើងថា «ហេតុការណ៍ នៅច្រកសមុទ្រ Hormuz បង្ហាញយ៉ាងច្បាស់ថា គ្មានដំណោះស្រាយយោធានោះឡើយ ចំពោះវិបត្តិនយោបាយ» ដោយលោកបានបន្ថែមថា «ខណៈពេលដែលការចរចា កំពុងមានវឌ្ឍនភាព ដោយមានកិច្ចខិតខំប្រឹងប្រែងពេញដោយក្ដីសប្បុរសរបស់ប្រទេសប៉ាគីស្ថាន សហរដ្ឋអាមេរិកគួរតែប្រុងប្រយ័ត្ន ចំពោះការណ៍ដែលត្រូវបានទាញត្រឡប់ឲ្យចូលទៅក្នុងស្ថានភាពលំបាកវិញដោយក្រុមទុច្ចរិត។ អារ៉ាប់រួមក៏គួរតែគិតគូរឲ្យច្បាស់លាស់ដូចគ្នាដែរ»។លោក Araghchi ក៏បានបដិសេធផែនការ «Project Freedom» (គម្រោងសេរីភាព) របស់ទីក្រុងវ៉ាស៊ីនតោន ដើម្បីអមដំណើរនាវាពាណិជ្ជកម្មចេញពីច្រកសមុទ្រនេះ ដោយបញ្ជាក់ថា «គម្រោងសេរីភាព គឺជា គម្រោងជាប់គាំង»។អ៊ីរ៉ង់បានបើកការវាយប្រហារសងសឹកនៅថ្ងៃចន្ទ ដោយផ្តោតលើអារ៉ាប់រួម។ ការវាយប្រហារថ្មី ដោយមីស៊ីល និងយានដ្រូន បានក្លាយជាការមានឧប្បត្តិហេតុបែបនេះលើកដំបូង ចាប់តាំងពីបទឈប់បាញ់ រវាងអ៊ីរ៉ង់ និងសហរដ្ឋអាមេរិក បានចូលជាធរមានកាលពីខែមុន។គួរបញ្ជាក់ថា ភាពតានតឹងក្នុងតំបន់ បានកើនឡើង ចាប់តាំងពីសហរដ្ឋអាមេរិក និងអ៊ីស្រាអែល បានបើកការវាយប្រហារលើអ៊ីរ៉ង់កាលពីថ្ងៃទី២៨ ខែកុម្ភៈ ដែលបង្កឲ្យមានការសងសឹកពីទីក្រុងតេអេរ៉ង់ ប្រឆាំងនឹងអ៊ីស្រាអែល ក៏ដូចជាសម្ព័ន្ធមិត្តអាមេរិក នៅតំបន់ឈូងសមុទ្រ រួមជាមួយនឹងការបិទច្រកសមុទ្រ Hormuz ផងដែរ៕

បទឈប់បាញ់អាមេរិក-អ៊ីរ៉ង់ ស្ថិតក្នុងហានិភ័យ ខណៈអារ៉ាប់រួមប្រាប់ពីការវាយប្រហារដោយក្រុងតេអេរ៉ង់

នៅថ្ងៃចន្ទ (ទី៤ ខែឧសភា ឆ្នាំ២០២៦) បទឈប់បាញ់ រវាងអ៊ីរ៉ង់ និងសហរដ្ឋអាមេរិក កំពុងស្ថិតក្នុងស្ថានភាពរង្គោះរង្គើ ខណៈដែលប្រទេសទាំង២ បានបាញ់ប្រហារតគ្នា នៅច្រកសមុទ្រយុទ្ធសាស្ត្រ Hormuz ហើយអេមីរ៉ាតអារ៉ាប់រួម (អារ៉ាប់រួម) បានរាយការណ៍ពីការវាយប្រហារជាលើកដំបូង ចាប់តាំងពីបទឈប់បាញ់ត្រូវបានប្រកាសកាលពីជិត ១ខែមុន។មួយថ្ងៃបន្ទាប់ពីប្រធានាធិបតីអាមេរិក លោក Donald Trump បានប្រកាសពីប្រតិបត្តិការ ដើម្បីអមដំណើរនាវាដែលជាប់ ឲ្យបានឆ្លងកាត់ច្រកសមុទ្រនេះ ប្រព័ន្ធផ្សេព្វផ្សាយ Fox News បានដកស្រង់សម្តីរបស់លោក ខណៈដែលបានគំរាមកំហែងថា អ៊ីរ៉ង់នឹងត្រូវ «បាត់ឈ្មោះពីផែនដី» នេះ ប្រសិនបើវាយប្រហារនាវាអាមេរិក។យ៉ាងណាក្ដី អ៊ីរ៉ង់ហាក់ដូចជាមិនញញើតនឹងការគំរាមនោះឡើយ ខណៈដែលប្រទេសនេះបានប្ដេជ្ញាថា នឹងបន្តគ្រប់គ្រងលើច្រកសមុទ្រ Hormuz ជាផ្លូវទឹកដ៏តូចចង្អៀតដែលលំហូរប្រេង ១ភាគ៥ របស់ពិភពលោក ឆ្លងកាត់ទីនេះ មុនពេលសហរដ្ឋអាមេរិក និងអ៊ីស្រាអែល វាយប្រហារអ៊ីរ៉ង់ កាលពីថ្ងៃទី២៨ ខែកុម្ភៈ។ចំណែកអារ៉ាប់រួម ដែលជាសម្ព័ន្ធមិត្តជិតស្និទ្ធរបស់សហរដ្ឋអាមេរិក និងជាដៃគូអារ៉ាប់ដ៏សំខាន់របស់អ៊ីស្រាអែល បានប្រាប់ឲ្យដឹងថា ខ្លួនបានរងការវាយប្រហារដោយមីស៊ីល និងយានដ្រូនពីអ៊ីរ៉ង់។ ក្រសួងការបរទេសអារ៉ាប់រួមបានឲ្យដឹងនៅក្នុងសេចក្តីថ្លែងការណ៍មួយថា «ការវាយប្រហារទាំងនេះតំណាងឲ្យការកើនឡើងនូវភាពតានតឹងដ៏គ្រោះថ្នាក់ និងជាការរំលោភបំពានមិនអាចទទួលយកបាន ដែលបង្កការគំរាមកំហែងដោយផ្ទាល់ដល់សន្តិសុខ និងស្ថិរភាពរបស់រដ្ឋ និងសុវត្ថិភាពនៃទឹកដីរបស់ខ្លួន»។អាជ្ញាធរអារ៉ាប់រួម បានបញ្ជាក់ថា ការវាយប្រហារដែលកំណត់គោលដៅលើរោងចក្រថាមពលមួយកន្លែងនៅក្នុងទីក្រុង Fujairah បានបណ្ដាលឲ្យជនជាតិឥណ្ឌា ៣នាក់រងរបួស។អំពើហិង្សានេះ បានធ្វើឲ្យរង្គោះរង្គើដល់បទឈប់បាញ់ដែលភាគច្រើនត្រូវបានអនុវត្ត ចាប់តាំងពីថ្ងៃទី៨ ខែមេសាមក៕

ប្រព័ន្ធផ្សព្វផ្សាយ៖ ប្រេងរុស្ស៊ីដំបូងបានមកដល់ប្រទេសជប៉ុន ចាប់តាំងពីសង្គ្រាមអ៊ីរ៉ង់

របាយការណ៍បានឲ្យដឹងថា ប្រទេសជប៉ុនបានទទួលការដឹកជញ្ជូនប្រេងស្តុកដំបូងរបស់ខ្លួនពីប្រទេសរុស្ស៊ី ចាប់តាំងពីការផ្គត់ផ្គង់សកល ត្រូវបានបញ្ឈប់ ដោយការបិទច្រកសមុទ្រហ័រមូស នៅពេលសង្គ្រាមអ៊ីរ៉ង់ បានចាប់ផ្តើម។ ដោយដកស្រង់សម្តីមន្ត្រីដែលមិនបញ្ចេញឈ្មោះរបស់ក្រុមហ៊ុនលក់ដុំ Taiyo Oil ទូរទស្សន៍តូក្យូ កាសែតប្រចាំថ្ងៃ Asahi Shimbun និងប្រព័ន្ធផ្សព្វផ្សាយផ្សេងទៀត បានរាយការណ៍កាលពីថ្ងៃចន្ទថា នាវាដឹកប្រេងឆៅដែលផលិតជាផ្នែកមួយនៃគម្រោងអភិវឌ្ឍន៍ឧស្ម័នធម្មជាតិ Sakhalin-2 បានទៅដល់ឆ្នេរសមុទ្រ Imabari នៅភាគខាងលិចប្រទេសជប៉ុន នាថ្ងៃចន្ទ។ ប្រទេសជប៉ុន ដែលពឹងផ្អែកលើមជ្ឈិមបូព៌ាសម្រាប់ប្រហែល ៩៥ភាគរយនៃការនាំចូលប្រេងរបស់ខ្លួន បានព្យាយាមធ្វើពង្រីកប្រភពផ្គត់ផ្គង់ថាមពល ចាប់តាំងពីការផ្ទុះឡើងនៃសង្គ្រាមនៅថ្ងៃទី ២៨ ខែកុម្ភៈ បានឃើញទីក្រុងតេអេរ៉ង់បិទច្រកសមុទ្រយ៉ាងមានប្រសិទ្ធភាព។គម្រោងនៅក្នុងតំបន់ Sakhalin របស់ប្រទេសរុស្ស៊ី មិនរងការដាក់ទណ្ឌកម្មសេដ្ឋកិច្ចសកលប្រឆាំងនឹងទីក្រុងមូស្គូដែលត្រូវបានដាក់ចេញ បន្ទាប់ពីខ្លួនបានឈ្លានពានអ៊ុយក្រែនក្នុងឆ្នាំ ២០២២ នោះទេ។របាយការណ៍បានបញ្ជាក់ថា ក្រុមហ៊ុន Taiyo Oil បានទទួលសំណើពីក្រសួងសេដ្ឋកិច្ច ដើម្បីនាចំចូល ប្រេងឆៅនេះ៕

អភិបាលក្រុងរុស្ស៊ីនិយាយថា អ៊ុយក្រែនព្យាយាមវាយប្រហាររោងចក្រចម្រាញ់ប្រេង Kirishi របស់រុស្ស៊ី

អភិបាលក្រុងរុស្ស៊ី លោក Alexander Drozdenko បាននិយាយថា អ៊ុយក្រែនបានព្យាយាមវាយប្រហាររោងចក្រចម្រាញ់ប្រេងធំបំផុតមួយរបស់រុស្ស៊ីនៅថ្ងៃអង្គារនេះ ដោយបង្កឱ្យមានអគ្គិភ័យនៅក្នុងតំបន់ឧស្សាហកម្មមួយកន្លែងនៅទីក្រុង Kirishi ក្នុងតំបន់ Leningrad របស់រុស្ស៊ី។លោក Drozdenko បាននិយាយថា «គោលដៅចម្បងរបស់សត្រូវ គឺរោងចក្រចម្រាញ់ប្រេងធំនៅទីក្រុង ប៉ុន្តែពុំមានអ្នកស្លាប់ និងរងរបួសដោយសារការវាយប្រហារនេះទេ។ លោកបាននិយាយថា អគ្គិភ័យត្រូវបានទប់ស្កាត់ ហើយប្រតិបត្តិការពន្លត់អគ្គិភ័យក៏បានបញ្ចប់។យោងតាមប្រភពនៅឧស្សាហកម្មបានឲ្យដឹងថា រោងចក្រចម្រាញ់ប្រេងនៅទីក្រុង Kirishi ជារោងចក្រចម្រាញ់ប្រេងធំបំផុតមួយនៅក្នុងប្រទេស ដែលដំណើរការផលិតប្រេងបានចំនួន១៧,៥លានតោន (៣៥០.០០០ បារ៉ែលក្នុងមួយថ្ងៃ) ក្នុងឆ្នាំ២០២៤ ដែលមានចំនួន៦,៦% នៃបរិមាណចម្រាញ់ប្រេងសរុបរបស់រុស្ស៊ី។ក្រសួងការពារជាតិរុស្ស៊ីបាននិយាយថា កងកម្លាំងការពារដែនអាកាសរបស់ខ្លួន បានបំផ្លាញយានដ្រូនអ៊ុយក្រែនចំនួន ២៨៩ គ្រឿងនៅលើតំបន់របស់រុស្ស៊ីកាលពីពេលយប់។

ជនជាតិនីហ្សេរីយ៉ាយ៉ាងហោចណាស់ ១៣០ នាក់ ស្វែងរកការធ្វើមាតុភូមិនិវត្តន៍ពីអាហ្វ្រិកខាងត្បូងក្រោយមានការតវ៉ា

ពលរដ្ឋនីហ្សេរីយ៉ាយ៉ាងហោចណាស់ ១៣០ នាក់នៅអាហ្វ្រិកខាងត្បូង បានស្នើសុំឱ្យពួកគេត្រូវបានបញ្ជូនត្រឡប់ទៅប្រទេសវិញ បន្ទាប់ពីការតវ៉ាជាច្រើនដាក់គោលដៅលើជនបរទេស។ អ្នកដាក់ពាក្យស្នើសុំទាំងនេះ គឺជាអ្នកដំបូងគេនៅក្រោមគម្រោងធ្វើមាតុភូមិនិវត្តន៍ថ្មីដែលជួយជ្រោមជ្រែងដោយរដ្ឋាភិបាលនីហ្សេរីយ៉ា ក្នុងពេលមានការព្រួយបារម្ភថាការប្រឈមមុខដាក់គ្នានៅអាហ្វ្រិកខាងត្បូង អាចរីកកាន់តែធំ។ក្រុមអ្នកតវ៉ា បានប្រមូលផ្តុំគ្នានៅទីក្រុងព្រីតូរីយ៉ា (Pretoria) និងចូហានណេសប៊ឺក(Johannesburg) កាលពីសប្តាហ៍មុន ដោយបានទាមទារឱ្យមានចំណាត់ការកាន់តែតឹងរ៉ឹងប្រឆាំងនឹងអន្តោប្រវេសន៍ខុសច្បាប់ ដោយនិយាយថា ជនបរទេសគ្មានឯកសារកំពុងដាក់សម្ពាធលើការងារ សន្តិសុខ និងសេវាសាធារណៈ។ ក្រុមសិទ្ធិជនអន្តោប្រវេសន៍ និយាយថាជនបរទេស តែងតែត្រូវបានដាក់កំហុសចំពោះបញ្ហាសេដ្ឋកិច្ចរបស់ប្រទេសអាហ្វ្រិកខាងត្បូង។យោងតាមអ្នកនាំពាក្យក្រសួងការបរទេសបាននិយាយកាលពីថ្ងៃចន្ទថា ប្រទេសនីហ្សេរីយ៉ា ថ្កោលទោសអំពើហិង្សាប្រឆាំងពលរដ្ឋរបស់ខ្លួននៅអាហ្វ្រិកខាងត្បូង រួមទាំងការស្លាប់ជនជាតិនីហ្សេរីយ៉ាពីរនាក់ដែលត្រូវបានចោទប្រកាន់ថាត្រូវបានវាយប្រហារដោយមន្ត្រីសន្តិសុខ។

កាសយានដ្ឋាន និងទីតាំងយោធានៅក្នុងរដ្ឋធានីស៊ូដង់ ត្រូវបានកំណត់គោលដៅវាយប្រហារដោយយានដ្រូន

យោងតាមអាជ្ញាធរ និងសាក្សីបានឲ្យដឹងថា អាកាសយានដ្ឋានអន្តរជាតិ Khartoum និងទីតាំងយោធាពីរកន្លែង នៅក្នុងរដ្ឋធានីរបស់ប្រទេសស៊ូដង់ ត្រូវបានកំណត់គោលដៅវាយប្រហារដោយយានដ្រូនកាលពីថ្ងៃចន្ទ ដែលបង្កឱ្យមានការផ្ទុះ និងបញ្ជូនផ្សែងហុយចេញពីទីតាំងផ្សេងៗគ្នានៅទូទាំងទីក្រុង។ការិយាល័យព័ត៌មាននៃក្រសួងវប្បធម៌និងព័ត៌មានស៊ូដង់ បាននិយាយនៅក្នុងសេចក្តីថ្លែងការណ៍ថា យានដ្រូនមួយគ្រឿងបានវាយប្រហារតំបន់មួយនៅខាងក្នុងអាកាសយានដ្ឋាន Khartoum ប៉ុន្តែបានបញ្ជាក់ថា ពុំមានរបាយការណ៍អំពីអ្នកស្លាប់ រងរបួស ឬការខូចខាតនោះទេ។ ការិយាល័យបាននិយាយបន្ថែមថា អាជ្ញាធរបានជម្លៀសបុគ្គលិកអាកាសយានដ្ឋាន ហើយបានសម្រេចបិទអាកាសយានដ្ឋានរយៈពេល៧២ម៉ោងជាវិធានការប្រុងប្រយ័ត្នជាមុន និងបាននិយាយថា ចរាចរណ៍ផ្លូវអាកាសនឹងបន្តឡើងវិញជាធម្មតា នៅពេលដែលនីតិវិធី ត្រូវបានបញ្ចប់។សាក្សីនិយាយថា ការផ្ទុះបីលើកជាប់ៗគ្នាត្រូវបានគេឮនៅភាគខាងកើតទីក្រុង Khartoum បន្ទាប់មកមានផ្សែងក្រាស់ហុយចេញពីខាងក្នុងអាកាសយានដ្ឋាន ខណៈគ្រាប់ផ្លោងមួយចំនួនបានធ្លាក់ទៅលើតំបន់លំនៅឋាននៅក្បែរនោះ។ អាកាសយានដ្ឋាន Khartoum បានទទួលជើងហោះហើរពាណិជ្ជកម្មលើកដំបូងរបស់ខ្លួននៅថ្ងៃទី១ ខែកុម្ភៈ បន្ទាប់ពីបើកដំណើរការឡើងវិញ ក្រោយការជួសជុល និងថែទាំដោយសារតែការបំផ្លាញធ្ងន់ធ្ងរពីសង្គ្រាម។ តំបន់ធំៗនៅប្រទេសស៊ូដង់ កំពុងមើលឃើញពីការកើនឡើងគួរឱ្យកត់សម្គាល់នៃការប្រើប្រាស់យានដ្រូនក្នុងប្រតិបត្តិការយោធា ក្នុងពេលមានការព្រមានអំពីផលប៉ះពាល់កាន់តែខ្លាំងរបស់វាទៅលើជនស៊ីវិល។

មន្ត្រីអ៊ីស្រាអែល៖ ភាពតានតឹងកាន់តែខ្លាំងឡើងជាមួយអ៊ីរ៉ង់ «បម្រើផលប្រយោជន៍» អ្នកដែលចង់បានសង្គ្រាម

សាជីវកម្មផ្សព្វផ្សាយរបស់អ៊ីស្រាអែល បានដកស្រង់សម្តីមន្ត្រីសន្តិសុខអ៊ីស្រាអែលម្នាក់ដែលបាននិយាយថា ភាពតានតឹងកាន់តែខ្លាំងឡើងជាមួយអ៊ីរ៉ង់ «បម្រើឲ្យផលប្រយោជន៍គ្រប់ភាគីទាំងអស់» ដែលចង់វិលត្រឡប់ទៅរកការប្រយុទ្ធប្រឆាំងទីក្រុងតេអេរ៉ង់ រួមទាំងអ៊ីស្រាអែល ផងដែរ។ប៉ុស្តិ៍ទូរទស្សន៍ Channel 12 របស់អ៊ីស្រាអែល និងសារព័ត៌មាន Israel Hayom ដែលដកស្រង់សម្តីមន្ត្រីអ៊ីស្រាអែល ក៏បាននិយាយផងដែរថា ការវាយតម្លៃរបស់អ៊ីស្រាអែលបង្ហាញថា អ៊ីរ៉ង់ពុំមានបំណងវាយប្រហារអ៊ីស្រាអែលនាពេលបច្ចុប្បន្ននេះទេ ហើយការវាយតម្លៃផ្នែកនយោបាយរបស់អ៊ីស្រាអែលបាននិយាយផងដែរថា ប្រធានាធិបតីសហរដ្ឋអាមេរិក លោក Donald Trump មិនចង់វិលត្រឡប់ទៅរកការប្រយុទ្ធគ្នានៅអ៊ីរ៉ង់វិញនោះទេ។ទោះជាយ៉ាងណា យោធាអ៊ីស្រាអែល កំពុងបង្កើនស្ថានភាពប្រុងប្រយ័ត្នរបស់ខ្លួននៅក្នុងវិស័យជាក់លាក់ ជាពិសេសប្រព័ន្ធការពារដែនអាកាស និងកងទ័ពអាកាសអ៊ីស្រាអែល ក្នុងការត្រៀមទុកមុននូវការវាយប្រហារភ្លាមៗរបស់អ៊ីរ៉ង់ នេះបើយោងតាមរបាយការណ៍។អាកាសយានដ្ឋានអន្តរជាតិ Ben Gurion ក៏ត្រូវបានដាក់ឱ្យស្ថិតក្នុងស្ថានភាពប្រុងប្រយ័ត្នផងដែរ ដោយមានការត្រៀមនៅនឹងកន្លែងប្រសិនបើអ៊ីស្រាអែលសម្រេចបិទដែនអាកាសរបស់ខ្លួនម្តងទៀត។ ប្រភពព័ត៌មានពីយោធាអ៊ីស្រាអែលនិយាយថា យោធាក៏បានត្រៀមកំណត់គោលដៅនាពេលអនាគតជាច្រើនកន្លែងនៅក្នុងប្រទេសអ៊ីរ៉ង់ ដោយការវាយប្រហារនាពេលខាងមុខផ្តោតលើទីតាំងផលិតថាមពល និងហេដ្ឋារចនាសម្ព័ន្ធស៊ីវិលរបស់អ៊ីរ៉ង់។

បណ្ដាញសង្គម

ព័ត៌មានថ្មីៗ

សម្ដេចធិបតី ណែនាំដល់អាជ្ញាធរមូលដ្ឋានគ្រប់លំដាប់ថ្នាក់ និងភាគីពាក់ព័ន្ធបន្តពង្រឹងយន្តការគាំទ្រ និងលើកកម្ពស់សិទ្ធិកុមារ

សម្ដេចធិបតី៖ អត្រាមរណភាពរបស់មាតា កុមារ និងទារកនៅកម្ពុជាបានថយចុះគួរឱ្យកត់សម្គាល់ដែលនេះ គឺជាការពន្លឿនវឌ្ឍនភាពឆ្ពោះទៅសម្រេចគោលដៅអភិវឌ្ឍប្រកបដោយចីរភាពឆ្នាំ២០៣០

អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ ចុះសួរទុក្ខប្រជាពលរដ្ឋភៀសសឹកស្នាក់នៅផ្ទះបណ្តោះអាសន្ន ក្នុងខេត្តព្រះវិហារ

តំណាងអយ្យការអមសាលាដំបូងរាជធានីភ្នំពេញ ចោទប្រកាន់សមត្ថកិច្ចខេត្តកំពត ចំនួន ៤បទល្មើស ក្រោយលួចសម្ភារដែលជាភស្តុតាង Online Scams

សម្ដេចធិបតី៖ កុមារគឺជាធនធានដ៏មានតម្លៃ និងមិនអាចខ្វះបានសម្រាប់ការអភិវឌ្ឍជាតិ និងជាអាទិភាពចម្បងបំផុតក្នុងយុទ្ធសាស្រ្ដអភិវឌ្ឍន៍ជាតិ

សមត្ថកិច្ចចុះត្រួតពិនិត្យទីតាំងចំនួន៣ នៅក្រុងប៉ោយប៉ែតសង្ស័យលបលួចប្រព្រឹត្ត Online Scams ឃាត់ខ្លួនជនបរទេសនិងខ្មែរសរុបចំនួន ១៥២នាក់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877