BTV NEWS

អ្នកនយោបាយឃឺដអ៊ីរ៉ង់ អះអាងថាអ៊ីរ៉ង់បានវាយប្រហារមូលដ្ឋានគណបក្សនៅក្រុង Erbil ប្រទេសអ៊ីរ៉ាក់

ការជាសះស្បើយពីជំងឺអេបូឡានាំមកនូវសញ្ញានៃក្តីសង្ឃឹមនៅកុងហ្គោ ខណៈករណីសង្ស័យលេចឡើងនៅក្រៅទ្វីបអាហ្វ្រិក

ការផ្ទុះគ្រាប់មីនក្នុងតំបន់គ្រប់គ្រងដោយក្រុមឧទ្ទាមនៅមីយ៉ាន់ម៉ា បានសម្លាប់មនុស្សរាប់សិបនាក់

កងទ័ពអ៊ីស្រាអែលដណ្តើមបានប្រាសាទយុទ្ធសាស្ត្រនៅលីបង់ក្នុងការឈ្លានពានដ៏ជ្រៅបំផុតចូលប្រទេសនេះ ក្នុងរយៈពេល២៦ ឆ្នាំ

ព័ត៌មានអន្តរជាតិ

លោក AOUN៖ កិច្ចព្រមព្រៀងសន្តិសុខជាមួយអ៊ីស្រាអែល ត្រូវតែធ្វើឡើង មុនពេលជួបជាមួយលោក NETANYAHU

ប្រធានាធិបតីលីបង់ លោក Joseph Aoun កាលពីថ្ងៃចន្ទ បាននិយាយថា កិច្ចព្រមព្រៀងសន្តិសុខ និងការបញ្ចប់ការវាយប្រហាររបស់អ៊ីស្រាអែល គឺត្រូវការជាចាំបាច់ មុនពេលជួបជាមួយនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) ដែលត្រូវបានស្នើឡើងដោយទីក្រុងវ៉ាស៊ីនតោន។ការិយាល័យរបស់លោក Aoun បាននិយាយនៅក្នុងសេចក្តីថ្លែងការណ៍មួយថា លោកប្រធានាធិបតី «បានបញ្ជាក់ជាថ្មីនូវទស្សនៈរបស់លោកថា ពេលវេលាមិនសមរម្យសម្រាប់កិច្ចប្រជុំជាមួយលោក ណេតាន់យ៉ាហ៊ូ នៅពេលនេះទេ។ សេចក្តីថ្លែងការណ៍នេះ បានដកស្រង់សម្តីរបស់លោក Aoun ដែលបានថ្លែងថា៖«យើងត្រូវតែឈានដល់កិច្ចព្រមព្រៀងសន្តិសុខជាមុនសិន ហើយបញ្ឈប់ការវាយប្រហាររបស់អ៊ីស្រាអែលមកលើយើង មុនពេលយើងលើកឡើងពីបញ្ហានៃកិច្ចប្រជុំរវាងយើងនិងលោក ណេតាន់យ៉ាហ៊ូ។តំណាងអ៊ីស្រាអែល និងលីបង់កាលពីខែមុន បានជួបគ្នាពីរដងនៅទីក្រុងវ៉ាស៊ីនតោន ជាកិច្ចប្រជុំលើកដំបូង ក្នុងរយៈពេលជាច្រើនទសវត្សរ៍ ដែលបានកើតឡើងបន្ទាប់ពីក្រុមហេសបូឡាគាំទ្រដោយអ៊ីរ៉ង់ បានទាញប្រទេសលីបង់ចូលទៅក្នុងសង្គ្រាមមជ្ឈិមបូព៌ា នៅថ្ងៃទី ០២ ខែមីនា ដែលបង្កឲ្យមានការវាយប្រហារយ៉ាងខ្លាំង និងការឈ្លានពានដោយកង័ពជើងគោករបស់អ៊ីស្រាអែល៕

IAEA៖ ការវាយប្រហារដោយដ្រូនបានបំផ្លាញឧបករណ៍នៃរោងចក្រនុយក្លេអ៊ែរ ZAPORIZHZHIA នៅអ៊ុយក្រែន

ទីភ្នាក់ងារថាមពលបរមាណូអន្តរជាតិ (IAEA) បាននិយាយកាលពីថ្ងៃចន្ទថា ឧបករណ៍ត្រួតពិនិត្យឧតុនិយមនៅរោងចក្រថាមពលនុយក្លេអ៊ែរ Zaporizhzhia ដែលកាន់កាប់ដោយរុស្ស៊ីនៅភាគអាគ្នេយ៍អ៊ុយក្រែន ត្រូវបានខូចខាត ដោយការវាយប្រហារដោយយានដ្រូន។រោងចក្រ Zaporizhzhia ជារោងចក្រធំជាងគេនៅអឺរ៉ុប ដែលមានរ៉េអាក់ទ័រចំនួន ៦ ត្រូវបានកងកម្លាំងរុស្ស៊ីរឹបអូស នៅក្នុងសប្តាហ៍ដំបូងនៃការឈ្លានពានរបស់ទីក្រុងមូស្គូនៅអ៊ុយក្រែន ក្នុងខែកុម្ភៈ ឆ្នាំ ២០២២។ ចាប់តាំងពីពេលនោះមក ភាគីនីមួយៗតែងតែចោទប្រកាន់គ្នាទៅវិញទៅមកអំពីសកម្មភាពយោធាដែលអាចធ្វើឲ្យប៉ះពាល់ដល់សុវត្ថិភាពនៅរោងចក្រ ដែលមានទីតាំងនៅជិតខ្សែត្រៀមសង្គ្រាម។ដោយបង្ហោះនៅលើប្រព័ន្ធផ្សព្វផ្សាយសង្គម X IAEA បាននិយាយថា ក្រុមអ្នកជំនាញរបស់ខ្លួន បានទៅ ពិនិត្យមើលមន្ទីរពិសោធន៍ត្រួតពិនិត្យវិទ្យុសកម្មខាងក្រៅរបស់រោងចក្រនេះ មួយថ្ងៃបន្ទាប់ពីថ្នាក់គ្រប់គ្រងរោងចក្ររបស់រុស្ស៊ី បាននិយាយថា វាត្រូវរងការវាយប្រហារដោយយានដ្រូន។IAEA ដែលជាអង្គការឃ្លាំមើលនុយក្លេអ៊ែររបស់អង្គការសហប្រជាជាតិ បាននិយាយនៅក្នុងសេចក្តីថ្លែងការណ៍របស់ខ្លួនថា៖«ក្រុមការងារបានសង្កេតឃើញការខូចខាតដល់ឧបករណ៍ត្រួតពិនិត្យឧតុនិយមមួយចំនួនរបស់មន្ទីរពិសោធន៍ ដែលមិនអាចដំណើរការបានតទៅទៀតហើយ»៕

UN មានការព្រួយបារម្ភអំពីការវាយប្រហារយានដ្រូនកាន់តែខ្លាំងឡើង នៅក្នុងប្រទេសស៊ូដង់

អ្នកនាំពាក្យរបស់UN បាននិយាយកាលពីថ្ងៃចន្ទថា អង្គការសហប្រជាជាតិមានការព្រួយបារម្ភអំពីការវាយប្រហារដោយយានដ្រូនកាន់តែខ្លាំងឡើងនៅក្នុងប្រទេសស៊ូដង់ ដែលកំពុងបង្កគ្រោះថ្នាក់ដល់ជនស៊ីវិល ដោយមានការវាយប្រហារជាបន្តបន្ទាប់ត្រូវបានរាយការណ៍នៅទូទាំងរដ្ឋជាច្រើន ក្នុងរយៈពេលប៉ុន្មានថ្ងៃថ្មីៗនេះ។ថ្លែងនៅក្នុងសន្និសីទសារព័ត៌មានប្រចាំថ្ងៃ លោក Stephane Dujarric អ្នកនាំពាក្យរបស់អគ្គលេខាធិការ U N បាននិយាយថា នាព្រឹកថ្ងៃចន្ទ ដ្រូនមួយគ្រឿងត្រូវបានគេរាយការណ៍ថា ត្រូវបានបាញ់ទម្លាក់នៅលើអាកាសយានដ្ឋានអន្តរជាតិ Khartoum ដែលនាំឲ្យមានការលុបចោលជើងហោះហើរ។អ្នកនាំពាក្យរូបនេះ បាននិយាយថា នៅក្នុងរដ្ឋ Al Jazirah ប្រភពព័ត៌មានក្នុងស្រុកបានរាយការណ៍ថា សមាជិក ៥នាក់នៃគ្រួសារតែមួយ រួមទាំងស្ត្រី និងកុមារ ត្រូវបានសម្លាប់ កាលពីថ្ងៃសៅរ៍។ នៅក្នុងរដ្ឋ White Nile ស្ថានីយប្រេងឥន្ធនៈ និងរថយន្តដឹកប្រេង ត្រូវបានវាយប្រហារនៅជិតទីក្រុង Kosti។ នៅក្នុងរដ្ឋ North Kordofan អគារទូរទស្សន៍រដ្ឋនៅក្នុងរដ្ឋធានីរបស់រដ្ឋ El Obeid ត្រូវបានខូចខាត។ លោកបាននិយាយថា ការវាយប្រហារដោយយានដ្រូនក៏បានកើនឡើង នៅក្នុងតំបន់ Darfur ដោយបន្ថែមថា ការវាយប្រហារនេះ ត្រូវបានរាយការណ៍កាលពីថ្ងៃចន្ទ នៅតំបន់ Darfurខាងលិច និងនៅតំបន់ Nyala នៃតំបន់ Darfur ខាងត្បូង ការវាយប្រហារកាលពីពីរថ្ងៃមុននេះ បានធ្វើឲ្យមនុស្សយ៉ាងតិច ៥នាក់ រងរបួស និងបំផ្លាញអគារនៅជិតការិយាល័យជាច្រើនរបស់អង្គការមនុស្សធម៌៕

អាមេរិកនិងរដ្ឋឈូងសមុទ្រនឹងជំរុញសេចក្តីសម្រេចរបស់UN ដើម្បីទប់ទល់សកម្មភាពអ៊ីរ៉ង់នៅផ្លូវទឹកអន្តរជាតិ

សហរដ្ឋអាមេរិក និងប្រទេសជាសមាជិកក្រុមប្រឹក្សាសហប្រតិបត្តិការឈូងសមុទ្រ (GCC) នឹងចាត់វិធានការនៅសប្តាហ៍នេះ ដើម្បីធ្វើសេចក្តីព្រាងសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដែលមានគោលបំណងទប់ទល់នឹងសកម្មភាពរបស់អ៊ីរ៉ង់ នៅក្នុងផ្លូវទឹកអន្តរជាតិ។ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ លោក Mike Waltz បានប្រាប់អ្នកយកព័ត៌មាន នៅទីក្រុងញូវយ៉ក កាលពីថ្ងៃចន្ទថា កិច្ចខិតខំប្រឹងប្រែងនេះ បានអនុវត្តតាមការណែនាំដែលចេញដោយលោកប្រធានាធិបតី ដូណាល់ ត្រាំ និងរដ្ឋមន្ត្រីការបរទេស លោក Marco Rubio ហើយកំពុងបន្តកិច្ចសហប្រតិបត្តិការពេញលេញជាមួយប្រទេសបារ៉ែន និងប្រទេស GCC ផ្សេងទៀត រួមទាំងអារ៉ាប៊ីសាអ៊ូឌីតផងដែរ។សេចក្តីព្រាងសេចក្តីសម្រេចនេះ កំពុងត្រូវបានសហសរសេរដោយសហរដ្ឋអាមេរិក និងបារ៉ែន និងត្រូវបានបង្កើតឡើងរួមគ្នា ជាមួយប្រទេសគូវ៉ែត កាតា អេមីរ៉ាតអារ៉ាប់រួម និងអារ៉ាប៊ីសាអ៊ូឌីត។ ចេតនាដែលបានបញ្ជាក់ គឺដើម្បីកាត់បន្ថយភាពតានតឹងនៅក្នុងច្រករបៀងសមុទ្រសំខាន់ៗ និងដោះស្រាយហានិភ័យដល់នាវិក និងនាវាពាណិជ្ជកម្មដែលជាប់គាំងក្នុងចំណោមសកម្មភាពយោធាកើនឡើងនៅក្នុងតំបន់។សេចក្តីព្រាងសេចក្តីសម្រេចនេះ នឹងស្វែងរកការធ្វើឲ្យអាជ្ញាធរអ៊ីរ៉ង់ទទួលខុសត្រូវចំពោះការរំលោភបំពានច្បាប់អន្តរជាតិដោយចេតនា រួមទាំងការដាក់មីនសមុទ្រ និងការជ្រៀតជ្រែកជាមួយការដឹកជញ្ជូនស៊ីវិល៕

អង់គ្លេសអំពាវនាវឲ្យមានការបន្ធូរបន្ថយភាពតានតឹង បន្ទាប់ពីអារ៉ាប់រួមរាយការណ៍ពីការវាយប្រហារ

នាយករដ្ឋមន្ត្រីអង់គ្លេស Keir Starmer កាលពីថ្ងៃចន្ទ បានអំពាវនាវឲ្យមានការបន្ធូរបន្ថយភាពតានតឹងនៅមជ្ឈិមបូព៌ា បន្ទាប់ពីអេមីរ៉ាតអារ៉ាប់រួមបានរាយការណ៍ពីការវាយប្រហារជាលើកដំបូង ចាប់តាំងពីបទឈប់បាញ់ ត្រូវបានប្រកាសជិតមួយខែកន្លងមកនេះ។លោក Starmer បាននិយាយនៅក្នុងសេចក្តីថ្លែងការណ៍មួយថា៖«ចក្រភពអង់គ្លេសថ្កោលទោសចំពោះការវាយប្រហារដោយយានដ្រូន និងមីស៊ីលដែលកំណត់គោលដៅលើអារ៉ាប់រួម»។«ការកើនឡើងភាពតានតឹងនេះ ត្រូវតែបញ្ឈប់។ អ៊ីរ៉ង់ត្រូវចូលរួមប្រកបដោយអត្ថន័យក្នុងការចរចា ដើម្បីធានាថា បទឈប់បាញ់នៅមជ្ឈិមបូព៌ា នៅតែបន្ត ហើយដំណោះស្រាយការទូតរយៈពេលវែង ត្រូវបានសម្រេច»។អេមីរ៉ាតអារ៉ាប់រួម ដែលជាសម្ព័ន្ធមិត្តជិតស្និទ្ធរបស់សហរដ្ឋអាមេរិក និងជាដៃគូអារ៉ាប់សំខាន់របស់អ៊ីស្រា អែល បាននិយាយថា ខ្លួនបានរងការវាយប្រហារដោយមីស៊ីល និងយានដ្រូនពីអ៊ីរ៉ង់កាលពីថ្ងៃចន្ទ៕

លក្ខខណ្ឌតវ៉ាថ្មីនៅប្រទេសស៊ីរី បង្កើនការព្រួយបារម្ភអំពីសេរីភាព

អាជ្ញាធរស៊ីរីបានប្រកាសពីលក្ខខណ្ឌថ្មីសម្រាប់ការតវ៉ាតាមដងផ្លូវ ដោយមន្ត្រីម្នាក់បានប្រាប់សារព័ត៌មាន AFP កាលពីថ្ងៃចន្ទថា វិធានការនេះ គឺគ្រាន់តែជាបទប្បញ្ញត្តិប៉ុណ្ណោះ ទោះបីជាមានការព្រួយបារម្ភអំពីការរឹតត្បិតលើសេរីភាពក៏ដោយ។នេះគឺជាវិធានការដំបូងរបស់អាជ្ញាធរឥស្លាម ចាប់តាំងពីការបណ្តេញលោក បាសា អាល់អាសាដ ក្នុងខែធ្នូ ឆ្នាំ២០២៤ បន្ទាប់ពីសង្គ្រាមស៊ីវិលជិត ១៤ ឆ្នាំ ដែលបានផ្ទុះឡើងជាមួយនឹងការបង្ក្រាបយ៉ាងឃោរឃៅរបស់អ្នកកាន់អំណាចដ៏យូរលើការតវ៉ាប្រឆាំងរដ្ឋាភិបាលក្នុងឆ្នាំ ២០១១។សេចក្តីប្រកាសរបស់ក្រសួងមហាផ្ទៃកាលពីថ្ងៃអាទិត្យសប្តាហ៍មុន បានលើកឡើងថា៖«សិទ្ធិក្នុងការធ្វើបាតុកម្ម និងប្រមូលផ្តុំដោយសន្តិវិធី» ត្រូវបានធានា ក្រោមរដ្ឋធម្មនុញ្ញអន្តរកាលរបស់ប្រទេសស៊ីរី ប៉ុន្តែត្រូវតែអនុវត្តស្របតាម «លក្ខខណ្ឌ និងយន្តការផ្លូវច្បាប់» ដើម្បីធានាសន្តិសុខ និងសណ្តាប់ធ្នាប់សាធារណៈ។សេចក្តីប្រកាសនោះ បានបញ្ជាក់ថា គណៈកម្មាធិការមួយ នឹងសម្រេចចិត្តលើពាក្យសុំសម្រាប់បាតុកម្ម ក្នុងរយៈពេល ៥ថ្ងៃ បន្ទាប់ពីដាក់ពាក្យ ដោយអ្នកដាក់ពាក្យមានសិទ្ធិប្តឹងតវ៉ា។ មន្ត្រីក្រសួងមហាផ្ទៃម្នាក់ បានប្រាប់សារព័ត៌មាន AFP ក្នុងលក្ខខណ្ឌមិនបញ្ចេញឈ្មោះកាលពីថ្ងៃចន្ទថា៖ «ការសម្រេចនេះ គឺជាបទប្បញ្ញត្តិសុទ្ធសាធ និងមានគោលបំណងការពារអ្នកតវ៉ា»ពីអំពើហិង្សា៕

អ៊ីរ៉ង់ចោទអេមីរ៉ាតអារ៉ាប់រួមថា បានសហការជាមួយអ្នកឈ្លានពានប្រឆាំងនឹងទីក្រុងតេអេរ៉ង់

អ្នកនាំពាក្យក្រសួងការបរទេសអ៊ីរ៉ង់ លោក Esmaeil Baghaei កាលពីថ្ងៃចន្ទ បានចោទប្រកាន់អេមីរ៉ាត អារ៉ាប់រួម (UAE) ថា បានគាំទ្រ និងសហការជាមួយអ្នកឈ្លានពានប្រឆាំងនឹងទីក្រុងតេអេរ៉ង់។លោក Baghaei បាននិយាយនៅក្នុងសន្និសីទសារព័ត៌មានប្រចាំសប្តាហ៍ថា ឥរិយាបថរបស់អារ៉ាប់រួម «បានបង្កើតបញ្ហាជាច្រើន» មិនត្រឹមតែសម្រាប់អ៊ីរ៉ង់ប៉ុណ្ណោះទេ ប៉ុន្តែថែមទាំងសម្រាប់សន្តិសុខតំបន់ និងសាមគ្គីភាព ក្នុងចំណោមប្រទេសក្នុងតំបន់ផងដែរ។លោកបានបន្ថែមថា អ៊ីរ៉ង់សង្ឃឹមថា «ប្រទេសទាំងអស់ក្នុងតំបន់ បានរៀនមេរៀនចាំបាច់ពីការវិវត្តដែលបានកើតឡើង ក្នុងរយៈពេល ៥០ ថ្ងៃនេះ» ។លើសពីនេះ ខណៈពេលដែលត្រូវបានសួរអំពីជំហររបស់អ៊ីរ៉ង់ចំពោះការដកខ្លួនរបស់អេមីរ៉ាតអារ៉ាប់រួម ចេញពីអង្គការប្រទេសនាំចេញប្រេង (OPEC) លោក Baghaei បាននិយាយថា ការសម្រេចនេះ មិនមាន«លក្ខណៈស្ថាបនា»ទេ ដោយពណ៌នាថា នេះគឺជាប្រតិកម្ម «អវិជ្ជមាន ឬសងសឹក» ប្រឆាំងនឹងតំបន់ និងរដ្ឋជាសមាជិករបស់ OPEC។OPEC ត្រូវបានបង្កើតឡើងក្នុងឆ្នាំ ១៩៦០ ដោយប្រទេសអ៊ីរ៉ង់ អ៊ីរ៉ាក់ គូវ៉ែត អារ៉ាប៊ីសាអ៊ូឌីត និងវ៉េណេស៊ុយអេឡា ដើម្បីសម្របសម្រួលគោលនយោបាយផលិតកម្មប្រេង៕

មនុស្ស១០នាក់ស្លាប់នៅប៉ាគីស្ថាន ខណៈទីក្រុងការ៉ាជីរបស់ប្រទេសនេះកំពុងទប់ទល់នឹងថ្ងៃក្ដៅបំផុតក្នុងពេល៨ឆ្នាំ

ទីក្រុងការ៉ាជីប្រទេសប៉ាគីស្ថាន បានជួបប្រទះថ្ងៃក្តៅបំផុតប្រចាំឆ្នាំកាលពីថ្ងៃចន្ទ៤ឧសភាសប្ដាហ៍នេះខណៈសីតុណ្ហភាពបានឡើងដល់ ៤៤,១អង្សាសេ លើសពីធម្មតាជិតប្រាំបីអង្សាសេ ក្រោមលក្ខខណ្ឌអាកាសធាតុក្តៅ និងស្ងួតខ្លាំង នេះបើយោងតាមទិន្នន័យអាកាសធាតុដែលបានចែករំលែកដោយក្រុមមន្ត្រីឧតុនិយម។ មន្ត្រីបាននិយាយថា មនុស្សយ៉ាងហោចណាស់ ១០ នាក់បានស្លាប់នៅទូទាំងទីក្រុងនេះកាលណពីថ្ងៃចន្ទ ដោយសារតែកម្ដៅក្ដៅខ្លាំង ខណៈសីតុណ្ហភាពបានកើនឡើងដល់ ៤៤,១អង្សាសេ ជាសីតុណ្ហភាពខ្ពស់បំផុតដែលបានកត់ត្រាចាប់តាំងពីឆ្នាំ ២០១៨។ យោងតាមមូលនិធិ Edhi និងសមាគមសុខុមាលភាព Chhipa មនុស្ស ១០ នាក់បានស្លាប់នៅក្នុងទីក្រុងនេះដោយសារតែ រលកកម្ដៅខ្លាំង។ ពួកគេបាននិយាយថា ជនរងគ្រោះភាគច្រើននៅតែមិនស្គាល់អត្តសញ្ញាណ ហើយហាក់ដូចជាអ្នកប្រើប្រាស់ថ្នាំច្រើន ដែលសាកសពរបស់ពួកគេត្រូវបានប្រទះឃើញនៅក្នុងតំបន់ផ្សេងៗគ្នា។ក្រុមមន្ត្រីជួយសង្គ្រោះបាននិយាយថា មនុស្សជាច្រើនត្រូវបានប្រទះឃើញស្លាប់ ឬស្ថិតក្នុងស្ថានភាពធ្ងន់ធ្ងរនៅក្នុងតំបន់ផ្សេងៗគ្នានៃទីក្រុងការ៉ាជី។ បុគ្គលមិនស្គាល់អត្តសញ្ញាណជាច្រើននាក់ ដែលមានអាយុចន្លោះពី ៣៥ ទៅ ៦០ ឆ្នាំ ត្រូវបានរកឃើញពីទីតាំងនានាក្នុងទីក្រុងនេះ ដោយមនុស្សជាច្រើនត្រូវបានគេជឿថាបានស្លាប់ដោយសារតែការប្រើប្រាស់ថ្នាំហួសកម្រិត៕

អង្គភាពសេវាសម្ងាត់និយាយថា មន្ត្រីរបស់ខ្លួនបានបាញ់ជនសង្ស័យប្រដាប់អាវុធនៅជិតសេតវិមាន

អង្គភាពសេវាសម្ងាត់របស់សហរដ្ឋអាមេរិក បាននិយាយកាលពីថ្ងៃចន្ទ ទី ០៤ ខែឧសភា ថា មន្ត្រីរបស់ខ្លួនបានប្រឈមមុខជាមួយ «បុគ្គលប្រដាប់ដោយអាវុធគួរឱ្យសង្ស័យ»ម្នាក់ នៅជិតសេតវិមាន ដែលក្រោយមកបានបាញ់ទៅលើមន្ត្រីមុនពេលរត់គេចខ្លួនដោយថ្មើរជើង ហើយត្រូវបានអាជ្ញាធរអនុវត្តច្បាប់បាញ់។ ហេតុការណ៍នេះ បាននាំឱ្យមានការបិទខ្ទប់រយៈពេលខ្លីនៅសេតវិមាន។ភ្នាក់ងារដែលកំពុងល្បាតនៅបរិវេណខាងក្រៅអគារសេតវិមាន បានកំណត់អត្តសញ្ញាណមនុស្សម្នាក់ដែលអនុប្រធានអង្គភាពសេវាសម្ងាត់លោក Matthew Quinn បាននិយាយថាជា «បុគ្គលគួរឱ្យសង្ស័យដែលទំនងជាមានអាវុធ»។លោក Quinn បាននិយាយនៅក្នុងសន្និសីទសារព័ត៌មាន ថា ជននេះបានរត់គេចខ្លួនដោយថ្មើរជើង បន្ទាប់ពីត្រូវបានមន្ត្រីអង្គភាពសេវាសម្ងាត់ចូលទៅជិត ហើយបានបាញ់ទៅលើពួកគេ។ លោក Quinn និយាយថា ជនសង្ស័យជាអនីតិជន ហើយអាវុធមួយដើមត្រូវបានរកឃើញ។អាជ្ញាធរអនុវត្តច្បាប់ស្ថិតក្នុងការប្រុងប្រយ័ត្នក្នុងរយៈពេលប៉ុន្មានថ្ងៃថ្មីៗនេះនៅក្នុងរដ្ឋធានីសហរដ្ឋអាមេរិក បន្ទាប់ពីការបាញ់ប្រហារនៅពិធីទទួលទានអាហារពេលល្ងាចរបស់សមាគមអ្នកឆ្លើយឆ្លងព័ត៌មានសេតវិមានកាលពីចុងខែមុន ដែលជនសង្ស័យម្នាក់ត្រូវបានចាប់ខ្លួន។

ការជម្លៀសត្រូវបានគ្រោងទុក ខណៈការផ្ទុះឡើងវីរុស Hanta ធ្វើឲ្យជាប់មនុស្ស១៥០នាក់នៅលើនាវាទេសចរណ៍នៅអាហ្វ្រិកខាងលិច

មន្ត្រីបាននិយាយថា ក្រុមគ្រូពេទ្យបានធ្វើការដើម្បីជម្លៀសអ្នកដែលមានរោគសញ្ញាវីរុសHanta បន្ទាប់ពីមានការផ្ទុះឡើងដែលសង្ស័យ នៅលើនាវាទេសចរណ៍ប្រណីតមួយគ្រឿង ដែលបានជាប់គាំងនៅអាហ្វ្រិកខាងលិច ខណៈកំពុងដឹកអ្នកដំណើរភាគច្រើនជាជនជាតិអង់គ្លេស អាមេរិក និងអេស្ប៉ាញ។អាជ្ញាធរបាននិយាយបន្ថែមថា មនុស្សប្រហែល ១៥០ នាក់នៅតែជាប់ខ្លួននៅលើនាវា បន្ទាប់ពីមនុស្សបីនាក់ មានប្តីប្រពន្ធជនជាតិហូឡង់ និងជនជាតិអាល្លឺម៉ង់ម្នាក់បានស្លាប់ ហើយអ្នកផ្សេងទៀតបានធ្លាក់ខ្លួនឈឺ រួមទាំងជនជាតិអង់គ្លេសម្នាក់ដែលបានចាកចេញពីនាវា ហើយកំពុងត្រូវបានព្យាបាលនៅអាហ្វ្រិកខាងត្បូង។វិទ្យាស្ថានជាតិសុខភាពសាធារណៈ និងបរិស្ថានរបស់ប្រទេសហូឡង់ ដែលកំពុងជួយក្នុងការផ្ទុះឡើងវីរុសនេះ បាននិយាយថា វីរុស Hanta ត្រូវបានបញ្ជាក់នៅលើអ្នកជំងឺម្នាក់ដែលបានបង្ហាញរោគសញ្ញា។អង្គការសុខភាពពិភពលោក (WHO) បាននិយាយកាលពីថ្ងៃចន្ទថា អង្គការកំពុងធ្វើការជាមួយប្រទេសនានា និងប្រតិបត្តិករនាវាទេសចរណ៍ ដើម្បីឆ្លើយតបទៅនឹងករណីនៃការឆ្លងវីរុស Hanta ដែលត្រូវបានកំណត់អត្តសញ្ញាណនៅលើនាវាមួយគ្រឿងនៅលើមហាសមុទ្រអាត្លង់ទិក។លោកស្រី Maria Van Kerkhove នាយិកាស្តីទីរបស់អង្គការសុខភាពពិភពលោក (WHO) ទទួលបន្ទុកការត្រៀម និងបង្ការជំងឺរាតត្បាត បានប្រាប់អ្នកសារព័ត៌មានតាមវីដេអូ ថា គិតត្រឹមថ្ងៃទី ៤ ខែឧសភា មានករណីសង្ស័យចំនួន ៦ករណី ត្រូវបានរាយការណ៍ រួមមានអ្នកស្លាប់ចំនួន ៣ នាក់។

បណ្ដាញសង្គម

ព័ត៌មានថ្មីៗ

អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ ចុះសួរទុក្ខប្រជាពលរដ្ឋភៀសសឹកស្នាក់នៅផ្ទះបណ្តោះអាសន្ន ក្នុងខេត្តព្រះវិហារ

តំណាងអយ្យការអមសាលាដំបូងរាជធានីភ្នំពេញ ចោទប្រកាន់សមត្ថកិច្ចខេត្តកំពត ចំនួន ៤បទល្មើស ក្រោយលួចសម្ភារដែលជាភស្តុតាង Online Scams

សម្ដេចធិបតី៖ កុមារគឺជាធនធានដ៏មានតម្លៃ និងមិនអាចខ្វះបានសម្រាប់ការអភិវឌ្ឍជាតិ និងជាអាទិភាពចម្បងបំផុតក្នុងយុទ្ធសាស្រ្ដអភិវឌ្ឍន៍ជាតិ

សមត្ថកិច្ចចុះត្រួតពិនិត្យទីតាំងចំនួន៣ នៅក្រុងប៉ោយប៉ែតសង្ស័យលបលួចប្រព្រឹត្ត Online Scams ឃាត់ខ្លួនជនបរទេសនិងខ្មែរសរុបចំនួន ១៥២នាក់

ថ្នាលផ្ទៀងផ្ទាត់ឯកសារ verify.gov.tl ដែលអភិវឌ្ឍដោយកម្ពុជា បានសម្ពោធដាក់ឲ្យប្រើប្រាស់ជាផ្លូវការ នៅប្រទេសទីម័រឡេស្តេ

ឯកឧត្តម ឌី វិជ្ជា និងលោកជំទាវ ហ៊ុន ម៉ាណា អញ្ជើញនាំយកទេយ្យវត្ថុ ប្រគេនព្រះសង្ឃ និងចែកអំណោយប្រជាពលរដ្ឋ នៅស្រុកភ្នំស្រួច ខេត្តកំពង់ស្ពឺ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877