BTV NEWS

រដ្ឋមន្រ្តីការពារជាតិជប៉ុនលោក Koizumi ច្រានចោលការចោទប្រកាន់ពីយោធានិយមថ្មី

ប្រមុខ WHO ទទួចសុំឲ្យមានការបញ្ចុះសពដោយសុវត្ថិភាព អំឡុងធ្វើដំណើរទៅកាន់តំបន់រីករាលដាលឆ្លងជំងឺអេបូឡា

អ៊ីរ៉ង់និយាយថា កិច្ចប្រជុំជាមួយអាមេរិកកំពុងបន្ត តែពុំឈានដល់កិច្ចព្រមព្រៀងផ្តាច់ព្រ័ត្រនោះទេ

UN៖ ការប៉ះទង្គិចគ្នារវាងអ៊ីស្រាអែល-ក្រុមហេសបូឡា ធ្វើឲ្យប៉ះពាល់ការចូលដល់ជំនួយនៅភាគខាងត្បូងលីបង់

ព័ត៌មានអន្តរជាតិ

អ៊ីស្រាអែលនឹងបន្ថែមថវិកាការពារជាតិចំនួន ១១៩ ពាន់លានដុល្លារ និងទិញយន្តហោះចម្បាំងពីអាមេរិក

មន្ត្រីបាននិយាយកាលពីថ្ងៃអាទិត្យថា អ៊ីស្រាអែលនឹងបន្ថែមថវិកាចំនួន ៣៥០ ពាន់លានសេកែល (ប្រហែល ១១៨,៩ ពាន់លានដុល្លារអាមេរិក) ទៅក្នុងថវិកាការពារជាតិរបស់ខ្លួន ហើយបានអនុម័តការទិញយន្តហោះចម្បាំង F-35 និងយន្តហោះវាយប្រហារធុនធ្ងន់ F-15IA។ក្រសួងការពារជាតិបានបញ្ជាក់ពីការអនុម័តចុងក្រោយសម្រាប់ការទិញយន្តហោះពីក្រុមហ៊ុន Lockheed Martin និង Boeing ដែលមានទីស្នាក់ការកណ្តាលនៅសហរដ្ឋអាមេរិក។ ក្រសួងបាននិយាយនៅក្នុងសេចក្តីថ្លែងការណ៍មួយថា កិច្ចព្រមព្រៀងនេះ ដែលមានតម្លៃរាប់សិបពាន់លានដុល្លារ គឺជាជំហានដំបូង ក្នុងការកសាងយោធារយៈពេលមួយទសវត្សរ៍ ក្រោមគម្រោងថវិកាថ្មីនេះ។រដ្ឋមន្ត្រីក្រសួងការពារជាតិ លោក Israel Katz បាននិយាយថា ការទិញនេះ កើតចេញពី «មេរៀនប្រតិបត្តិការ» ដែលបានរៀនពីសង្គ្រាមជាមួយអ៊ីរ៉ង់។លោក Katz បាននិយាយថា៖«ការប្រយុទ្ធគ្នានៅក្នុងទីតាំងជាច្រើនរបស់អ៊ីស្រាអែលនៅមជ្ឈិមបូព៌ាទាមទារឲ្យយើងពន្លឿនការកសាងកម្លាំង» ដោយបន្ថែមថា ការផ្គត់ផ្គង់យន្តហោះ គឺជា «សមាសធាតុសំខាន់» នៃកម្មវិធី «Magen Israel» ដើម្បីធានាថា កងកម្លាំងការពារអ៊ីស្រាអែលរក្សាបាននូវ «គុណសម្បត្តិប្រកបដោយចីរភាព»៕

ក្រុមហ៊ុនផលិតជី និងកសិករអាល្លឺម៉ង់ កំពុងប្រឈមនឹងផលវិបាកនៃសង្គ្រាមអ៊ីរ៉ង់

ស្របពេលដែលការបិទច្រកសមុទ្រហ័រមូសរបស់អ៊ីរ៉ង់ កំពុងធ្វើឲ្យសេដ្ឋកិច្ចពិភពលោករង្គោះរង្គើ ទីក្រុងមួយរបស់អាល្លឺម៉ង់ បានខិតខំប្រឹងប្រែង ដើម្បីជួយបំពេញបន្ថែមការខ្វះខាតនៃការផ្គត់ផ្គង់ជីសំខាន់ៗ។ទីក្រុង Wittenberg គឺជាទីតាំងនៃរោងចក្រគីមីមួយ ដែលត្រូវបានបង្កើតឡើងក្នុងឆ្នាំ ១៩១៥ នៅពាក់កណ្តាលសង្គ្រាមលោកលើកទី ១។នៅពេលនោះ គោលបំណង គឺដើម្បីផលិតអាសូតសម្រាប់គ្រឿងផ្ទុះ និងជី ដើម្បីគេចវេះការបិទផ្លូវដែលរារាំងវត្ថុធាតុដើមមួយចំនួនពីការនាំចូលពីប្រទេសឈីលី។លោក Christopher Profitlich អ្នកនាំពាក្យរបស់ក្រុមហ៊ុន SKW ដែលមានមូលដ្ឋាននៅក្នុងប្រទេសអាល្លឺម៉ង់ភាគខាងកើតតាំងពីឆ្នាំ ១៩៩៣ បាននិយាយថា រយៈពេលជាងមួយសតវត្សក្រោយមក ការបិទច្រកសមុទ្រហ័រមូស បង្ហាញថា វានៅតែជារឿងដដែលនៅសព្វថ្ងៃនេះ គឺផ្លូវសមុទ្រ អាចដួលរលំ”៕

កងទ័ពអ៊ីស្រាអេលវាយឆ្មក់លើទីក្រុងជាច្រើនទៀត នៅក្នុងតំបន់ WEST BANK

កងកម្លាំងអ៊ីស្រាអែលកាលពីថ្ងៃអាទិត្យ បានធ្វើការលុកលុយជាបន្តបន្ទាប់ចូលទៅក្នុងទីក្រុង និងភូមិជាច្រើន នៅភាគខាងជើងនៃទីក្រុង Tulkarm ក្នុងតំបន់វេសបែង ( West Bank) ក្នុងនោះមានទីក្រុង Saida, Attil, Ellar និង Deir Al-Ghusun។ប្រភពព័ត៌មានក្នុងស្រុក បាននិយាយថា កងកម្លាំងនេះ បានវាយឆ្មក់ និងឆែកឆេរផ្ទះរាប់សិបខ្នង ដោយបំផ្លាញសម្ភារៈ និងឃាតខ្លួនពលរដ្ឋរាប់សិបនាក់។ប្រភពព័ត៌មានទាំងនោះ បានបន្ថែមថា អ្នកដែលត្រូវបានឃាត់ខ្លួន ត្រូវបាននាំទៅកាន់ផ្ទះដែលត្រូវបានរឹបអូសដោយកងទ័ព ក្រោយពីបង្ខំប្រជាពលរដ្ឋឲ្យចាកចេញ ដែលបន្ទាប់មកត្រូវបានបញ្ជូនទៅប៉ុស្តិ៍យោធា និងមជ្ឈមណ្ឌលសួរចម្លើយបណ្តោះអាសន្ន។កងកម្លាំងអ៊ីស្រាអែលក៏បានវាយឆ្មក់លើហាងនានា ដោយសួរចម្លើយអ្នកដែលនៅខាងក្នុងហាងទាំងនោះ និងឆែក ទូរស័ព្ទដៃរបស់ពួកគេ។នៅក្នុងទីក្រុង Tulkarm កងកម្លាំងអ៊ីស្រាអែល បានបង្ហោះយានដ្រូនឈ្លបយកការណ៍ពីលើទីក្រុងនេះ ដោយទម្លាក់ខិត្តប័ណ្ណដែលមានការគំរាមកំហែង និងការព្រមានដល់អ្នកស្រុក៕

ចិន ថ្កោលទោសដំណើរមេដឹកនាំកោះតៃវ៉ាន់ Lai Ching-te ទៅប្រទេសអ៊ីស្វាទីនី ដោយប្រៀបធៀបលោកទៅនឹងសត្វកណ្ដុរ

ទីក្រុងប៉េកាំងបានចាប់ផ្តើមការវាយប្រហារការទូតយ៉ាងខ្លាំងក្លា ដោយថ្កោលទោសយ៉ាងដាច់អហង្ការចំពោះដំណើរទស្សនកិច្ចរបស់មេដឹកនាំកោះតៃវ៉ាន់ លោក ឡៃ ឈីង-ទ (Lai Ching-te)កាលពីថ្ងៃសៅរ៍ ទី ២ ខែឧសភា ឆ្នាំ២០២៦ នេះ ទៅកាន់ព្រះរាជាណាចក្រអេស្វាទីនីនៅអាហ្វ្រិក ជាសម្ព័ន្ធមិត្តការទូតចុងក្រោយដែលនៅសេសសល់របស់ទីក្រុងតៃប៉ិនៅទ្វីបអាហ្វ្រិក។ដំណើរទស្សនកិច្ចនេះមានគោលបំណងរំលឹកខួបលើកទី៤០ នៃការឡើងគ្រងរាជ្យរបស់ព្រះមហាក្សត្រ Mswati III និងថ្ងៃប្រសូត្ររបស់ព្រះអង្គ ក៏ដូចជាដើម្បីពង្រឹងទំនាក់ទំនងការទូត។ ទីក្រុងប៉េកាំងបានជំរុញឱ្យប្រទេសអេស្វាទីនី និងប្រទេសដទៃទៀតមើលទិសដៅនៃប្រវត្តិសាស្ត្រ និងឈប់គាំទ្រឯករាជ្យភាពរបស់តំបន់តៃវ៉ាន់។ប្រទេសអេស្វាទីនី ដែលជាអតីតប្រទេសស្វាស៊ីឡង់ គឺជាសម្ព័ន្ធមិត្តការទូតតែមួយគត់ដែលនៅសេសសល់របស់កោះតៃវ៉ាន់នៅអាហ្វ្រិក។ ដំណើរទស្សនកិច្ចនេះកើតឡើងស្របពេលមានភាពតានតឹងកាន់តែខ្លាំងរវាងចិន និងតៃវ៉ាន់ ដោយប្រទេសចិនកំពុងស្វែងរកការបំបែកកោះតៃវ៉ាន់ចេញពីអន្តរជាតិ ខណៈកោះតៃវ៉ាន់អះអាងសិទ្ធិរបស់ខ្លួនក្នុងការចូលរួមជាមួយពិភពលោក។ប្រទេសចិនអះអាងថា ដែនដីតៃវ៉ាន់គឺជាផ្នែកមួយដែលមិនអាចកាត់ផ្តាច់បានរបស់ដីគោកចិន ហើយការប៉ុនប៉ងណាមួយដើម្បីសហការជាមួយពួកបំបែកខ្លួននឹងត្រូវបរាជ័យ។បន្ទាប់ពីដំណើរទស្សនកិច្ចរបស់លោកទៅកាន់ព្រះរាជាណាចក្រអេស្វាទីនី ប្រព័ន្ធផ្សព្វផ្សាយរដ្ឋចិនបានហៅសកម្មភាពលោក ឡៃ ក្នុងន័យផ្សេងៗគ្នា រួមទាំងការចោទប្រកាន់រូបលោកថាជាជនបង្កបញ្ហា។ លោក Chen Bin-hua អ្នកនាំពាក្យការិយាល័យកិច្ចការកោះតៃវ៉ាន់របស់ក្រុមប្រឹក្សារដ្ឋចិន បានពិពណ៌នាអំពីដំណើរទស្សនកិច្ចរបស់លោកឡៃ ថាជាការសម្តែងដែលបានរៀបចំឡើង និងជាការរត់គេចខ្លួនដោយលួចលាក់ ដោយប្រៀបធៀបរូបលោកទៅនឹងសត្វកណ្តុរ៕

សហរដ្ឋអាមេរិក អនុម័តការលក់អាវុធក្នុងតម្លៃ ៨,៦ ពាន់លានដុល្លារដល់សម្ព័ន្ធមិត្តនៅមជ្ឈិមបូព៌ា

រដ្ឋបាលរបស់លោក Donald Trump បានរំលងសភាដើម្បីអនុម័តការលក់អាវុធបន្ទាន់ក្នុងតម្លៃ ៨,៦ ពាន់លានដុល្លារទៅឲ្យប្រទេសអ៊ីស្រាអែល កាតា គូវ៉ែត និងប្រទេសអារ៉ាប់រួម។កញ្ចប់អាវុធនេះ រួមមានប្រព័ន្ធការពារដែនអាកាសទំនើបៗដូចជាមីស៊ីលប៉ាទ្រីយ៉ូត(Patriot) និងប្រព័ន្ធដែលមានសមត្ថភាពវាយប្រហារស៊ីបគោលដៅ។ក្រសួងការបរទេសបានលើកឡើងពីកាលៈទេសៈបន្ទាន់ បន្ទាប់ពីការវាយប្រហាររួមគ្នារបស់សហរដ្ឋអាមេរិក និងអ៊ីស្រាអែល លើប្រទេសអ៊ីរ៉ង់កាលពីខែកុម្ភៈ នៅពេលដែលទីក្រុងតេអេរ៉ង់ បានសងសឹកវិញដោយមីស៊ីល និងយានដ្រូនទៅលើអ៊ីស្រាអែល និងរដ្ឋឈូងសមុទ្រដែលមូលដ្ឋានយោធាអាមេរិកស្ថិតនៅទីនោះ។នេះជាលើកទីបីហើយដែលរដ្ឋបាលនេះបានគេចវេះពីការអនុម័តដោយសភា ខណៈត្រូវបានរិះគន់ពីក្រុមអ្នកប្រជាធិបតេយ្យ។

នាវាដឹកប្រេងអ៊ីរ៉ង់ទីពីរ បានចូលទៅក្នុងច្រកសមុទ្រ Lombok របស់ប្រទេសឥណ្ឌូនេស៊ី

ក្រុមហ៊ុនតាមដានការដឹកជញ្ជូនប្រេង បាននិយាយថា នាវាដឹកប្រេងឆៅធំទីពីររបស់ប្រទេសអ៊ីរ៉ង់ បានគេចចេញពីកងទ័ពជើងទឹកសហរដ្ឋអាមេរិក ហើយកំពុងធ្វើដំណើរតាមដែនទឹករបស់ប្រទេសឥណ្ឌូនេស៊ីឆ្ពោះទៅកាន់ប្រជុំកោះរីអៅ(Riau)។ នៅក្នុងការបង្ហោះសារនៅលើបណ្តាញ X គេហទំព័រTankerTrackers.com បាននិយាយថា នាវា DERYA បច្ចុប្បន្នកំពុងឆ្លងកាត់ច្រកសមុទ្រ Lombok ក្នុងប្រទេសឥណ្ឌូនេស៊ី បន្ទាប់ពីការប៉ុនប៉ងដឹកជញ្ជូនប្រេងឆៅអ៊ីរ៉ង់ចំនួន១,៨៨លានបារ៉ែលទៅកាន់ប្រទេសឥណ្ឌា នៅពាក់កណ្តាលខែមេសា បានបរាជ័យ។គេហទំព័រ TankerTrackers បាននិយាយបន្ថែមថា «ក្រោយមកយើងបានប្រទះឃើញនាវានេះ បន្តទៅភាគខាងត្បូង ខណៈនាវាច្រើនគ្រឿងនៅក្នុងតំបន់នោះត្រូវបានបញ្ជូនត្រឡប់ទៅអ៊ីរ៉ង់វិញដោយកងទ័ពជើងទឹកសហរដ្ឋអាមេរិក។ បច្ចុប្បន្ននាវានេះ កំពុងធ្វើដំណើរទៅកាន់ចំណុចណាត់ជួបរបស់វានៅប្រជុំកោះ Riau»។ការបង្ហោះនេះ បានធ្វើឡើងមួយថ្ងៃបន្ទាប់ពី គេហទំព័រ TankerTrackers.com បាននិយាយថា នាវាដឹកប្រេងអ៊ីរ៉ង់ HUGE ដែលដឹកប្រេងចំនួន ១,៩លានបារ៉ែល បានគេចចេញពីកងទ័ពជើងទឹកសហរដ្ឋអាមេរិក ហើយស្ថិតនៅក្នុងច្រកសមុទ្រ Lombok ដោយឆ្ពោះទៅកាន់ប្រជុំកោះ Riau។ក្រុមហ៊ុនតាមដាន បាននិយាយថា នាវាដឹកប្រេងប្រហែល២៥គ្រឿងបានចាកចេញពីប្រទេសអ៊ីរ៉ង់ដោយមានផ្ទុកប្រេងឆៅកាលពីក្នុងខែមេសា។ ក្នុងចំណោមនេះ នាវាចំនួន៧គ្រឿងត្រូវបានបញ្ជូនត្រឡប់ទៅកំពង់ផែអ៊ីរ៉ង់វិញដោយកងទ័ពជើងទឹកអាមេរិក ខណៈពីរគ្រឿងត្រូវបានកងកម្លាំងអាមេរិករឹបអូស ហើយ នាវាដែលនៅសល់បានទៅដល់គោលដៅ ឬទៅដល់ចំណុចណាត់ជួបរបស់វា នេះបើយោងតាមការចេញផ្សាយរបស់ទីភ្នាក់ងារសារព័ត៌មានរ៉យទ័រ។

ឆ្មាំល្បាតឆ្នេរស៊ុយអែត រឹបអូសនាវាដឹកប្រេងបំពាក់ទង់ជាតិក្លែងក្លាយនៅសមុទ្របាល់ទិក

ឆ្មាំល្បាតឆ្នេររបស់ប្រទេសស៊ុយអែត បាននិយាយកាលពីថ្ងៃអាទិត្យ ទី៣ ខែឧសភាថា ខ្លួនបានរឹបអូសនាវាដឹកប្រេងមួយគ្រឿងនៅសមុទ្របាល់ទិកដែលត្រូវបានគេជឿថាជាផ្នែកនៃក្បួននាវាស្រមោលរបស់រុស្ស៊ី ជាចំណាត់ការចុងក្រោយក្នុងចំណោមចំណាត់ការស្រដៀងៗគ្នាជាបន្តបន្ទាប់ធ្វើឡើងក្នុងរយៈពេលប៉ុន្មានខែថ្មីៗនេះដោយអាជ្ញាធររបស់ប្រទេសស៊ុយអែត។ ឆ្មាំល្បាតឆ្នេរស៊ុយអែត បាននិយាយនៅក្នុងសេចក្តីថ្លែងការណ៍ថា ក្រុមរបស់ខ្លួន និងនគរបាលបានឡើងទៅលើនាវា Jin Hui ដែលមានបំពាក់ទង់ជាតិស៊ីរីនៅក្នុងដែនទឹករបស់ប្រទេសស៊ុយអែតភាគខាងត្បូង ហើយបានចាប់ផ្តើមការស៊ើបអង្កេតបឋមទៅលើការធ្វើដំណើរឆ្លងកាត់តាមសមុទ្រនេះ។ ឆ្មាំល្បាតឆ្នេរបាននិយាយថា «ក្រុមឆ្មាំសង្ស័យថា នាវានេះកំពុងបើកបរក្រោមរូបភាពទង់ជាតិក្លែងក្លាយ ដោយសារមានភាពមិនប្រក្រតីមួយចំនួនទាក់ទងនឹងស្ថានភាពទង់ជាតិ ហើយមិនបានបំពេញតាមតម្រូវការសម្រាប់ការឆ្លងកាត់តាមសមុទ្រដូចដែលត្រូវបានកំណត់នៅក្នុងបទប្បញ្ញត្តិនិងកិច្ចព្រមព្រៀងអន្តរជាតិ»។ ឆ្មាំល្បាតឆ្នេរបាននិយាយថាគោលដៅរបស់នាវាមិនច្បាស់លាស់និងត្រូវបានគេគិតថាពុំមានដឹកទំនិញដែលត្រូវបានដាក់បញ្ចូលនៅក្នុងបញ្ជីទណ្ឌកម្ម រួមទាំងបញ្ជីទណ្ឌកម្មរបស់សហភាពអឺរ៉ុបនិងចក្រភពអង់គ្លេស។ រដ្ឋមន្ត្រីក្រសួងការពារស៊ីវិលរបស់ប្រទេសស៊ុយអែត លោក Carl-Oskar Bohlin បាននិយាយដាច់ដោយឡែកនៅលើបណ្តាញ X ថា នាវានេះត្រូវបានគេសង្ស័យថាជានាវាស្រមោលរបស់រុស្ស៊ី។ បណ្តាប្រទេសនៅអឺរ៉ុប បានបង្កើនកិច្ចខិតខំប្រឹងប្រែងដើម្បីបង្អាក់ដល់ក្បួននាវាដែលគេហៅថានាវាដឹកប្រេងស្រមោលប្រើប្រាស់ដោយទីក្រុងមូស្គូដើម្បីផ្តល់មូលនិធិដល់សង្គ្រាមរយៈពេលបួនឆ្នាំរបស់ខ្លួនប្រឆាំងអ៊ុយក្រែន។ ប្រទេសរុស្ស៊ី បានថ្កោលទោសចំណាត់ការបែបនេះថាជាអរិភាព។ រហូតមកដល់ពេលនេះក្នុងឆ្នាំនេះ ប្រទេសស៊ុយអែត បានបញ្ឈប់នាវាចំនួនប្រាំគ្រឿងដោយសង្ស័យពីបទល្មើសផ្សេងៗ រួមទាំងការកំពប់ប្រេង និងការបើកបរក្រោមទង់ជាតិក្លែងក្លាយ និងបានបើកដំណើរការនីតិវិធីព្រហ្មទណ្ឌប្រឆាំងសមាជិកនាវិកមួយចំនួន។

ជម្លោះនៅអ៊ីរ៉ង់ ជំរុញអតិផរណារបស់អាមេរិក និងទាញទម្លាក់ប្រជាប្រិយភាពលោក Trump នៅមុនការបោះឆ្នោតពាក់កណ្តាលអាណត្តិ

សង្គ្រាមរបស់សហរដ្ឋអាមេរិក និងអ៊ីស្រាអែលលើប្រទេសអ៊ីរ៉ង់កំពុងរាលដាលនៅពាសពេញអាមេរិក ដោយជំរុញឱ្យតម្លៃប្រេងឥន្ធនៈហក់ឡើងដល់កម្រិតខ្ពស់បំផុតក្នុងរយៈពេលបួនឆ្នាំមកនេះ ជំរុញអតិផរណា និងទាញទម្លាក់ប្រជាប្រិយភាពរបស់លោកប្រធានាធិបតី Donald Trump ដល់កម្រិតទាបបំផុតជាប្រវត្តិសាស្ត្រ ខណៈអ្នកបោះឆ្នោតត្រៀមខ្លួនសម្រាប់ការបោះឆ្នោតពាក់កណ្តាលអាណត្តិនៅខែវិច្ឆិកា។ ជម្លោះដែលបានចាប់ផ្តើមនៅចុងខែកុម្ភៈ បានបង្កឱ្យមានការកើនឡើងការចំណាយ និងការតវ៉ានៅក្នុងស្រុក។ អតិផរណារបស់អ្នកប្រើប្រាស់ បានកើនឡើង៣,៣ភាគរយកាលពីក្នុងខែមីនា ជាការកើនឡើងប្រចាំខែយ៉ាងខ្លាំងចាប់តាំងពីឆ្នាំ២០២២ ខណៈតម្លៃប្រេងឥន្ធនៈបានកើនឡើងនៅទូទាំងប្រទេស។ភាពតានតឹងបច្ចុប្បន្ន ត្រូវបានបង្ហាញនៅក្នុងការស្ទង់មតិ។ ប្រជាប្រិយភាពរបស់លោក Trump បានធ្លាក់ចុះដល់កម្រិតទាបជាប្រវត្តិសាស្ត្រ ខណៈការនាំចេញនៅតែជាប់គាំងនៅច្រកសមុទ្រ Hormuz ដែលជាសរសៃឈាមដ៏សំខាន់សម្រាប់ការដឹកជញ្ជូនប្រេងសកល។ ការស្ទង់មតិបង្ហាញថា ក្រុមអ្នកប្រជាធិបតេយ្យ មានជំហរដើម្បីដណ្តើមយកសភាមកវិញ និងមានឱកាសដ៏រឹងមាំក្នុងការទទួលបានព្រឹទ្ធសភា។លោក Trump បានឆ្លើយតបដោយទំនុកចិត្ត ដោយលើកឡើងពីកំណើនសេដ្ឋកិច្ច និងទទូចថាសង្គ្រាមនៅអ៊ីរ៉ង់នឹងមិនធ្វើឱ្យសេដ្ឋកិច្ចធ្លាក់ចុះនោះទេ។ ទោះជាយ៉ាងណា គ្រួសារអាមេរិកប្រឈមនឹងការកើនឡើងការចំណាយ ទោះបីជាវិស័យថាមពល និងបច្ចេកវិទ្យាបន្តរីកចម្រើនក៏ដោយ។ពីរដ្ឋ Indiana ដល់រដ្ឋ Illinois ផលប៉ះពាល់ផ្នែកសេដ្ឋកិច្ចកំពុងរាលដាល ហើយវាអាចបង្ហាញថាជាការសម្រេចចិត្តដ៏សំខាន់ នៅពេលដែលអ្នកបោះឆ្នោត ធ្វើដំណើរទៅបោះឆ្នោតនៅក្នុងខែវិច្ឆិកា។

អឺរ៉ុប នឹងរក្សាជម្រើសឱ្យនៅបើកចំហបន្ទាប់ពីលោក Trump គំរាមដំឡើងពន្ធលើរថយន្ត២៥ភាគរយ

គណៈកម្មការអឺរ៉ុប បាននិយាយថា ខ្លួននឹងរក្សាជម្រើសឱ្យនៅបើកចំហដើម្បីការពារផលប្រយោជន៍របស់ខ្លួន ខណៈសហភាពអឺរ៉ុប(EU) កំពុងថ្លឹងថ្លែងពីការគំរាមរបស់ប្រធានាធិបតីសហរដ្ឋអាមេរិក លោក Donald Trump ក្នុងការដំឡើងពន្ធ២៥ភាគរយលើរថយន្ត និងរថយន្តដឹកទំនិញដែលនាំចូលពីអឺរ៉ុប ដោយចាប់ផ្តើមពីសប្តាហ៍ក្រោយ។លោក Trump បាននិយាយកាលពីថ្ងៃសុក្រនៅលើបណ្តាញ Truth Social ថា សហភាពអឺរ៉ុប មិនបានគោរពតាមកិច្ចព្រមព្រៀងពាណិជ្ជកម្មទេ ហើយបានប្រកាសថា លោកនឹងដំឡើងពន្ធលើរថយន្ត និងរថយន្តដឹកទំនិញអឺរ៉ុបដល់២៥ភាគរយចាប់ពីសប្តាហ៍ក្រោយ។ក្នុងការឆ្លើយតប អ្នកនាំពាក្យគណៈកម្មការអឺរ៉ុប បាននិយាយកាលពីថ្ងៃសុក្រសប្តាហ៍កន្លងទៅនេះថា សហភាពអឺរ៉ុប កំពុងអនុវត្តកិច្ចព្រមព្រៀងពាណិជ្ជកម្មដែលពាក់ព័ន្ធស្របតាមនីតិវិធីនីតិបញ្ញត្តិស្តង់ដារ ហើយបន្តផ្តល់ព័ត៌មានដល់ភាគីសហរដ្ឋអាមេរិកយ៉ាងពេញលេញ។វានៅតែមិនច្បាស់នោះទេថា តើរដ្ឋបាលលោក Trump ផ្អែកលើមូលដ្ឋានច្បាប់អ្វីសម្រាប់ការដំឡើងពន្ធដែលបានគំរាម ហើយសេតវិមានពុំទាន់បានចេញសេចក្តីថ្លែងការណ៍ជាផ្លូវការណាមួយនៅឡើយ។

រដ្ឋមន្ត្រីហិរញ្ញវត្ថុអាស៊ានបូក៣ បញ្ជាក់ពីការឯកភាពតំបន់ ក្នុងពេលមានជម្លោះនៅមជ្ឈិមបូព៌ា

រដ្ឋមន្ត្រីហិរញ្ញវត្ថុ និងទេសាភិបាលធនាគារកណ្តាលរបស់ប្រទេសជប៉ុន ចិន កូរ៉េខាងត្បូង និងសមាជិកនៃសមាគមប្រជាជាតិអាស៊ីអាគ្នេយ៍ឬអាស៊ាន បានបញ្ជាក់ពីសារៈសំខាន់នៃការឯកភាពតំបន់ និងកិច្ចសហប្រតិបត្តិការ ក្នុងពេលមានជម្លោះនៅអ៊ីរ៉ង់។ រដ្ឋមន្ត្រីទាំងអស់ បានចេញសេចក្តីថ្លែងការណ៍រួមមួយស្តីពីបញ្ហានេះនៅក្នុងកិច្ចប្រជុំក្នុងទីក្រុង Samarkand ប្រទេសអ៊ូសបេគីស្ថាន កាលពីថ្ងៃអាទិត្យ។រដ្ឋមន្ត្រីហិរញ្ញវត្ថុជប៉ុន លោកស្រី Katayama Satsuki បានធ្វើជាសហប្រធាននៃកិច្ចប្រជុំជាមួយអ្នកតំណាងហ្វីលីពីន។ នៅដើមដំបូងនៃកិច្ចប្រជុំ លោកស្រីបានសង្កត់ធ្ងន់ថា ការសម្របសម្រួលក្នុងតំបន់បានក្លាយជារឿងសំខាន់ជាងពេលណាៗទាំងអស់ ក្នុងពេលមានភាពមិនប្រាកដប្រជាជុំវិញជម្លោះនៅតំបន់មជ្ឈិមបូព៌ា។ អ្នកចូលរួម តាមសេចក្តីរាយការណ៍ថាបានបង្ហាញការព្រួយបារម្ភអំពីការកើនឡើងអតិផរណាតាមរយៈការកើនឡើងតម្លៃប្រេងឆៅ ជម្លោះដែលនៅបន្ត និងហានិភ័យនៃការធ្លាក់ចុះសេដ្ឋកិច្ច។អ្នកតំណាងជប៉ុនរូបនេះ បានពន្យល់អំពីក្របខ័ណ្ឌនៃការគាំទ្រហិរញ្ញវត្ថុថ្មីរបស់ខ្លួនដល់ប្រទេសអាស៊ីដែលបានប្រកាសនៅក្នុងខែមេសា ដើម្បីជួយពួកគេទិញប្រេងឆៅ និងផលិតផលប្រេង។ នៅក្នុងសេចក្តីថ្លែងការណ៍រួម អ្នកចូលរួមបានបញ្ជាក់ពីសារៈសំខាន់នៃការរក្សាពហុភាគីនិយម និងពង្រឹងបន្ថែមទៀតនូវការឯកភាព និងកិច្ចសហប្រតិបត្តិការក្នុងតំបន់។កាលពីសប្តាហ៍មុន អាជ្ញាធរហិរញ្ញវត្ថុជប៉ុនត្រូវបានគេរាយការណ៍ថាបានធ្វើអន្តរាគមន៍នៅក្នុងទីផ្សារប្តូរប្រាក់បរទេស បន្ទាប់ពីប្រាក់យ៉េនធ្លាក់ចុះ។ មានការព្រួយបារម្ភកាន់តែខ្លាំងឡើងនៅក្នុងប្រទេសអាស៊ី អំពីការធ្លាក់ចុះរូបិយប័ណ្ណរបស់ខ្លួន។

បណ្ដាញសង្គម

ព័ត៌មានថ្មីៗ

ឯកឧត្តម ឌី វិជ្ជា និងលោកជំទាវ ហ៊ុន ម៉ាណា អញ្ជើញនាំយកទេយ្យវត្ថុ ប្រគេនព្រះសង្ឃ និងចែកអំណោយប្រជាពលរដ្ឋ នៅស្រុកភ្នំស្រួច ខេត្តកំពង់ស្ពឺ

ឯកឧត្តមកិត្តិសង្គហបណ្ឌិត គន់ គីម អញ្ជើញជួបប្រជាពលរដ្ឋភៀសសឹក និងពិនិត្យទីតាំងរៀបចំផ្សារបណ្តោះអាសន្ន ក្នុងខេត្តបន្ទាយមានជ័យ

ក្រសួងការងារ៖ ខេត្តស្ថិតក្នុងតំបន់ទំនាបកណ្ដាលចំនួន៣ មានឱកាសការងារជាង ៨,០០០កន្លែង កំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

ក្រសួងការងារ៖ នៅខេត្តជាប់សមុទ្រទាំង៤ មានឱកាសការងារជិត ៧,០០០កន្លែង ដែលកំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

ឯកឧត្តមឧបនាយករដ្ឋមន្ត្រី ហ៊ុន ម៉ានី៖ វិញ្ញាសាតាក់តែងចប់ភ្លាម ប្រឡងភ្លាមតែម្តង

ក្រសួងការងារ៖ ខេត្តចំនួន៤ នៅភូមិភាគឦសាន្ត មានឱកាសការងារជិត ៤,០០០កន្លែង កំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

អាជ្ញាធរជាតិអប្សរា និង JQA បិទបញ្ចប់កម្មវិធីអប់រំបរិស្ថានសម្រាប់កុមារ ឆ្នាំ២០២៦ និងប្រគល់រង្វាន់ដល់សិស្សឆ្នើម

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877