BTV NEWS

រដ្ឋមន្រ្តីការពារជាតិជប៉ុនលោក Koizumi ច្រានចោលការចោទប្រកាន់ពីយោធានិយមថ្មី

ប្រមុខ WHO ទទួចសុំឲ្យមានការបញ្ចុះសពដោយសុវត្ថិភាព អំឡុងធ្វើដំណើរទៅកាន់តំបន់រីករាលដាលឆ្លងជំងឺអេបូឡា

អ៊ីរ៉ង់និយាយថា កិច្ចប្រជុំជាមួយអាមេរិកកំពុងបន្ត តែពុំឈានដល់កិច្ចព្រមព្រៀងផ្តាច់ព្រ័ត្រនោះទេ

UN៖ ការប៉ះទង្គិចគ្នារវាងអ៊ីស្រាអែល-ក្រុមហេសបូឡា ធ្វើឲ្យប៉ះពាល់ការចូលដល់ជំនួយនៅភាគខាងត្បូងលីបង់

ព័ត៌មានអន្តរជាតិ

រដ្ឋមន្ត្រីការបរទេសរុស្ស៊ី និងអ៊ីរ៉ង់ ពិភាក្សាអំពីសេរីភាពនៃការធ្វើនាវាចរណ៍ និងកម្មវិធីនុយក្លេអ៊ែររបស់អ៊ីរ៉ង់

រដ្ឋមន្ត្រីការបរទេសរុស្ស៊ី លោក សឺហ្គេ ឡាវរ៉ូវ (Sergei Lavrov) បានធ្វើការសន្ទនាតាមទូរស័ព្ទជាមួយរដ្ឋមន្ត្រីការបរទេសអ៊ីរ៉ង់ លោក Seyed Abbas Araghchi កាលពីថ្ងៃសុក្រ ដោយផ្លាស់ប្តូរទស្សនៈលើសេរីភាពនៃការធ្វើនាវាចរណ៍ និងបញ្ហាជុំវិញកម្មវិធីនុយក្លេអ៊ែររបស់អ៊ីរ៉ង់។ នេះបើយោងតាមក្រសួងការបរទេសរុស្ស៊ី។ក្រសួងការបរទេសរុស្ស៊ីបាននិយាយនៅក្នុងសេចក្តីប្រកាសព័ត៌មានមួយថា ភាគីទាំងពីរ បានបន្តផ្លាស់ប្តូរទស្សនៈយ៉ាងហ្មត់ចត់លើការរំពឹងទុកសម្រាប់ការបញ្ឈប់អរិភាពទាំងស្រុង ដែលធ្វើឲ្យស្ថានភាពយោធា និងនយោបាយនៅមជ្ឈិមបូព៌ា មានស្ថិរភាព។រុស្ស៊ីបានបញ្ជាក់ជាថ្មីនូវការគាំទ្ររបស់ខ្លួនចំពោះកិច្ចខិតខំប្រឹងប្រែងសម្របសម្រួលដែលកំពុងបន្ត និងការត្រៀមខ្លួនជាស្រេច ក្នុងការគាំទ្រយ៉ាងពេញលេញដល់ដំណើរការនយោបាយ និងការទូត ដើម្បីឈានដល់កិច្ចព្រមព្រៀងប្រកបដោយចីរភាព ដែលមានគោលបំណងបង្កើតសន្តិភាពរយៈពេលវែង នៅក្នុងតំបន់នេះ។ក្រសួងបានបន្ថែមថា លោករដ្ឋមន្ត្រីទាំងពីរ ក៏បានពិភាក្សាអំពីការឆ្លងកាត់នាវា និងទំនិញរបស់រុស្ស៊ីតាម ច្រកសមុទ្រហ័រមូសផងដែរ៕

របាយការណ៍៖ ការផ្ទុះគ្រាប់បែកដែលនៅសល់ពីការវាយប្រហារ បានសម្លាប់សមាជិកឆ្មាំបដិវត្តន៍អ៊ីរ៉ង់ចំនួន ១៤នាក់

ប្រព័ន្ធផ្សព្វផ្សាយអ៊ីរ៉ង់ បានរាយការណ៍កាលពីថ្ងៃសុក្រថា ការផ្ទុះគ្រាប់បែកដែលនៅសល់ពីការវាយប្រហារអំឡុងសង្គ្រាមប្រឆាំងនឹងប្រទេសនេះ បានសម្លាប់សមាជិក១៤នាក់ របស់កងឆ្មាំបដិវត្តន៍។របាយការណ៍មួយរបស់គេហទំព័រ Nournews ដែលគេជឿថា ស្និទ្ធនឹងសន្តិសុខរបស់អ៊ីរ៉ង់ បានឲ្យដឹងថា ការផ្ទុះនេះ បានកើតឡើងនៅជិតទីក្រុង Zanjan ភាគខាងជើង ដែលស្ថិតនៅភាគពាយ័ព្យនៃទីក្រុងតេ អេរ៉ង់។នេះគឺជាចំនួនច្រើនបំផុតនៃសមាជិកឆ្មាំបដិវត្តន៍ដែលត្រូវបានរាយការណ៍ថា ត្រូវបានសម្លាប់ ចាប់តាំងពីបទឈប់បាញ់ បានចាប់ផ្តើម នៅថ្ងៃទី ០៧ ខែមេសា។របាយការណ៍នេះបានបញ្ជាកថា គ្រាប់រំសេវរួមមានគ្រាប់បែកចង្កោម និងមីនអាកាសដែលត្រូវបានទម្លាក់ក្នុងអំឡុងពេលប្រយុទ្ធនោះ៕

អង្គការ WHO អំពាវនាវឲ្យមានការបញ្ចូលថ្នាំពេទ្យជាបន្ទាន់ទៅកាន់តំបន់ហ្កាហ្សា ដើម្បីកសាងសេវាសុខភាពឡើងវិញ

អង្គការសុខភាពពិភពលោក (WHO) បានអំពាវនាវឲ្យមានការបញ្ចូលថ្នាំពេទ្យ និងសម្ភារៈចាំបាច់ចូលទៅក្នុងតំបន់ហ្កាហ្សាដែលត្រូវបានឡោមព័ទ្ធនេះ ជាបន្ទាន់ ដើម្បីឲ្យសេវាសុខភាពអាចស្តារឡើងវិញបានក្នុងទ្រង់ទ្រាយធំ។លោក Tedros Adhanom Ghebreyesus អគ្គនាយកអង្គការសុខភាពពិភពលោក បាននិយាយនៅក្នុងសារមួយនៅលើប្រព័ន្ធផ្សព្វផ្សាយសង្គម X កាលពីថ្ងៃសុក្រថា អង្គការនេះ បានគាំទ្រការបង្កើតមជ្ឈមណ្ឌលសុខភាពគ្រួសារថ្មីមួយ នៅភាគខាងជើងតំបន់ហ្កាហ្សា ជាកន្លែងដែលការទទួលបានសេវាថែទាំសុខភាព នៅមានកម្រិតខ្លាំង។លោកបានថ្លែងនៅលើប្រព័ន្ធផ្សព្វផ្សាយសង្គម X ថា៖«មជ្ឈមណ្ឌលសុខភាពនេះ នឹងផ្តល់សេវាសុខភាពសំខាន់ៗ រួមទាំងការគ្រប់គ្រងជំងឺមិនឆ្លង សេវាសុខភាពមាតា និងកុមារ ការចាក់វ៉ាក់សាំងជាប្រចាំ ការថែទាំអ្នករងរបួស និងការស្តារនីតិសម្បទារាងកាយជាមូលដ្ឋាន រួមជាមួយនឹងការបញ្ជូនសម្រាប់ករណីដែលត្រូវការការថែទាំកម្រិតខ្ពស់»។លោកបានបន្ថែមថា៖«តម្រូវការសុខភាពនៅទូទាំងតំបន់ហ្កាហ្សា នៅតែមានច្រើន ការផ្លាស់ប្តូរពីដំណាក់កាលអាសន្នស្រួចស្រាវនៃវិបត្តិនេះ ទៅជាការកសាងឡើងវិញ ការធ្វើឲ្យមានស្ថិរភាព និងការពង្រីកប្រព័ន្ធថែទាំសុខភាពកាន់តែទូលំទូលាយ ដើម្បីបំពេញតម្រូវការកាន់តែច្រើនរបស់ប្រជាជន ដូចជាការថែទាំជាប្រចាំ និងការគ្រប់គ្រងជំងឺរ៉ាំរ៉ៃផងដែរ»៕

មេធាវី៖ ជនអន្តោប្រវេសន៍អាហ្វ្រិក ៩នាក់ ត្រូវបានអាមេរិកនិរទេសទៅកាន់ប្រទេសកាមេរូន

មេធាវីម្នាក់របស់ពួកគេ បានប្រាប់សារព័ត៌មាន AFP កាលថ្ងៃព្រហស្បតិ៍ថា ជនអន្តោប្រវេសន៍ចំនួន ៩នាក់មកពីប្រទេសអាហ្វ្រិកចំនួន ៤ បានមកដល់ប្រទេសកាមេរូន ក្នុងសប្តាហ៍នេះ បន្ទាប់ពីត្រូវបានបណ្តេញចេញពីសហរដ្ឋអាមេរិក ដែលជាផ្នែកមួយនៃកិច្ចព្រមព្រៀងរវាងប្រទេសទាំងពីរ។ អ្នកដែលត្រូវបាននិរទេសបានមកដល់ថ្ងៃពុធ ហើយមកពីប្រទេសហ្គាណា អង់ហ្គោឡា អេត្យូពី និងសាធារណរដ្ឋកុងហ្គោ។កាមេរូន គឺជាប្រទេសមួយក្នុងចំណោមប្រទេសអាហ្វ្រិកជាច្រើនដែលបានយល់ព្រមក្នុងរយៈពេលប៉ុន្មានខែថ្មីៗនេះ ដើម្បីចូលរួមក្នុងគម្រោងចម្រូងចម្រាសមួយដែលអនុញ្ញាតឲ្យសហរដ្ឋអាមេរិកបញ្ជូនជនអន្តោប្រវេសន៍ដែលគ្មានឯកសារទៅកាន់ប្រទេសទី៣ នៅពេលដែលមានឧបសគ្គក្នុងការបញ្ជូនពួកគេទៅកាន់ប្រទេសដើមរបស់ពួកគេវិញ។លោក Alma David មេធាវីអន្តោប្រវេសន៍អាមេរិក បានប្រាប់សារព័ត៌មាន AFPថា ស្ត្រី ៦នាក់ និងបុរសបីនាក់ ដែលបានមកដល់កាលពីថ្ងៃពុធ គឺជាផ្នែកមួយនៃជើងហោះហើរលើកទី៣ ចាប់តាំងពីខែមករា ដោយចូលរួមជាមួយជនអន្តោប្រវេសន៍ចំនួន ១៧នាក់ ដែលត្រូវបានសហរដ្ឋអាមេរិកនិរទេស ទៅកាន់ប្រទេសកាមេរូន៕

លោក TRUMP ពង្រីកទណ្ឌកម្មរបស់សហរដ្ឋអាមេរិកប្រឆាំងរដ្ឋាភិបាលគុយបានិងក្រុមអ្នកគាំទ្រ

មន្ត្រីសេតវិមានពីររូប បានប្រាប់សារព័ត៌មានរ៉យទ័រថា ប្រធានាធិបតីអាមេរិក លោក ដូណាល់ ត្រាំ (Donald Trump) បានចុះហត្ថលេខាលើក្រឹត្យមួយ កាលពីថ្ងៃសុក្រ (ទី ០១ ខែឧសភា) ដោយពង្រីកទណ្ឌកម្មរបស់សហរដ្ឋអាមេរិកប្រឆាំងនឹងរដ្ឋាភិបាលគុយបា ខណៈដែលលោកកំពុងស្វែងរកការដាក់សម្ពាធបន្ថែមទៀតលើទីក្រុងឡាហាវ៉ាន បន្ទាប់ពីបណ្តេញមេដឹកនាំវ៉េណេស៊ុយអេឡាចេញពីអំណាច។ មន្ត្រីទាំងនោះបាននិយាយថា ទណ្ឌកម្មថ្មីៗផ្តោតលើមនុស្ស អង្គភាព និងក្រុមអ្នកគាំទ្រ ដែលជួយទ្រទ្រង់ ប្រព័ន្ធសន្តិសុខរបស់រដ្ឋាភិបាលគុយបា ឬជាប់ពាក់ព័ន្ធក្នុងអំពើពុករលួយ ឬការរំលោភសិទ្ធិមនុស្សធ្ងន់ធ្ងរ ក៏ដូចជាភ្នាក់ងារ មន្ត្រី ឬអ្នកគាំទ្ររដ្ឋាភិបាល។ភ្លាមៗនោះ ពុំទាន់ច្បាស់ថាតើអ្នកណាជាអ្នកដែលត្រូវបានវាយប្រហារដោយទណ្ឌកម្មក្រោមក្រឹត្យនេះ ដែលត្រូវបានរាយការណ៍ជាលើកដំបូងដោយសារព័ត៌រ៉យទ័រ។ប៉ុន្តែច្បាប់ចម្លងនៃក្រឹត្យនេះដែលចេញផ្សាយដោយសេតវិមាន បានបញ្ជាក់ថា ទណ្ឌកម្មអាចអនុវត្តចំពោះ «ជនបរទេសណា» ដែលកំពុងប្រតិបត្តិការនៅក្នុង «វិស័យថាមពល ការពារជាតិ និងសម្ភារៈពាក់ព័ន្ធ លោហធាតុ និងរ៉ែ សេវាកម្មហិរញ្ញវត្ថុ ឬសន្តិសុខនៃសេដ្ឋកិច្ចគុយបា ឬវិស័យផ្សេងទៀតនៃសេដ្ឋកិច្ច គុយបា»៕

អ៊ីស្រាអែលរឹតត្បិតការជួបជុំគ្នានៅជិតព្រំដែនលីបង់ ស្របពេលការវាយប្រហារនៅតែបន្តនៅភាគខាងត្បូងប្រទេសនេះ

កងកម្លាំងការពារអ៊ីស្រាអែល (IDF) បាននិយាយកាលពីថ្ងៃសុក្រថា ខ្លួនបានដាក់ចេញនូវការរឹតត្បិតការជួបជុំគ្នាឡើងវិញ នៅក្នុងសហគមន៍នានាតាមបណ្តោយព្រំដែនភាគខាងជើងជាមួយលីបង់ ដោយលើកឡើងពីការកើនឡើងភាពតានតឹងផ្នែកសន្តិសុខ ចំពេលមានការបាញ់ប្រហារជាបន្តបន្ទាប់ជាមួយក្រុមហេសបូឡា ទោះបីជាមានបទឈប់បាញ់ក៏ដោយ។ក្រោមបទបញ្ជានេះ ការជួបជុំក្រៅផ្ទះ ត្រូវបានកំណត់ត្រឹម ២០០នាក់ និងការជួបជុំក្នុងផ្ទះដល់ ៦០០ នាក់ រហូតដល់យ៉ាងហោចណាស់ថ្ងៃចន្ទ វេលាម៉ោង ៨ យប់ ម៉ោងក្នុងស្រុក។បទបញ្ជានេះ ដែលត្រូវបានអនុម័តដោយលោកនាយករដ្ឋមន្ត្រី បេនចាមីន ណេតាន់យ៉ាហ៊ូ រួមបញ្ចូលទាំងតំបន់ភ្នំ Meron នៅក្នុងតំបន់ Upper Galilee ។ តំបន់នេះជាធម្មតាទាក់ទាញជនជាតិជ្វីហ្វគ្រិស្តអូស្សូដក់និយមជ្រុលរាប់ម៉ឺននាក់ សម្រាប់ពិធីបុណ្យប្រចាំឆ្នាំ Lag BaOmer ដែលត្រូវប្រារព្ធនៅចុងសប្តាហ៍នេះ ប៉ុន្តែមន្ត្រីបាននិយាយថា ការប្រារព្ធពិធីទ្រង់ទ្រាយធំនេះ មិនត្រូវបានគេរំពឹងថា នឹងបន្តដូចធម្មតានោះទេ។នៅប្រទេសលីបង់ ការវាយប្រហារតាមអាកាសរបស់អ៊ីស្រាអែល បានបន្តបណ្តាលឲ្យមានអ្នកស្លាប់ និងរបួស ទោះបីជាមានបទឈប់បាញ់ក៏ដោយ។ យ៉ាងហោចណាស់មានមនុស្ស ៩នាក់ ត្រូវបានសម្លាប់ នៅក្នុងការវាយប្រហារនៅទូទាំងប្រទេសកាលពីថ្ងៃសុក្រ។ នេះបើយោងតាមប្រភពក្នុងស្រុក៕

ប្រទេសចិនអំពាវនាវឲ្យបន្តការដឹកជញ្ជូនតាមច្រកសមុទ្រហ័រមូស ឲ្យបានឆាប់តាមដែលអាចធ្វើទៅបាន

ប្រទេសចិនកាលពីថ្ងៃសុក្របានអំពាវនាវឲ្យបន្តការធ្វើនាវាចរណ៍នៅក្នុងច្រកសមុទ្រហ័រមូស ឲ្យបានឆាប់តាមដែលអាចធ្វើទៅបាន ដោយនិយាយថា ការបិទផ្លូវទឹកយុទ្ធសាស្ត្រកំពុងរំខានដល់ការផ្គត់ផ្គង់ថាមពលសកល និងធ្វើឲ្យសេដ្ឋកិច្ចទូទាំងពិភពលោកកាន់តែដុនដាប។ថ្លែងនៅក្នុងសន្និសីទសារព័ត៌មាននៅទីស្នាក់ការកណ្តាលអង្គការសហប្រជាជាតិនៅទីក្រុងញូវយ៉ក តំណាងអចិន្ត្រៃយ៍របស់ប្រទេសចិនប្រចាំអង្គការសហប្រជាជាតិ លោក Fu Cong បាននិយាយថា ការបិទច្រកសមុទ្រហ័រមូស គឺបណ្តាលមកពីសង្គ្រាមខុសច្បាប់របស់សហរដ្ឋអាមេរិក និងអ៊ីស្រាអែលប្រឆាំងនឹងអ៊ីរ៉ង់ ហើយការបិទនេះ បានបង្កការខូចខាតសេដ្ឋកិច្ចយ៉ាងធ្ងន់ធ្ងរ នៅទូទាំងពិភពលោក។លោក Fu បានធ្វើការអត្ថាធិប្បាយនេះ នៅក្នុងសន្និសីទសារព័ត៌មាន ខណៈដែលប្រទេសចិនចូលកាន់តំណែងជាប្រធានប្តូរវេននៃក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃសុក្រ។លោក Fu បានលើកឡើងថា៖«មូលហេតុចម្បងនៃស្ថានភាពនេះ គឺសង្គ្រាមខុសច្បាប់របស់សហរដ្ឋអាមេរិក និងអ៊ីស្រាអែលប្រឆាំងនឹងអ៊ីរ៉ង់ ហើយសង្គ្រាមនេះ បាននាំមកនូវទុក្ខវេទនាយ៉ាងធំធេង នៅក្នុងប្រទេសអ៊ីរ៉ង់សម្រាប់ប្រជាជនអ៊ីរ៉ង់ និងប្រទេសជិតខាង ហើយផលវិបាករបស់វាលាតសន្ធឹងទៅឆ្ងាយ និងទូលំទូលាយ ហើយជាពិសេស ការបិទច្រកសមុទ្រហ័រមូស ពិតជាកំពុងបង្កភាពវឹកវរនៅក្នុងទីផ្សារប្រេង និងសេដ្ឋកិច្ចរបស់ពិភពលោកទាំងមូល ជាពិសេសនៅក្នុងតំបន់កំពុងអភិវឌ្ឍន៍សកលខាងត្បូង»៕

របាយការណ៍៖ មូលដ្ឋានយោធាភាគច្រើនរបស់សអាមេរិកនៅមជ្ឈិមបូព៌ា ត្រូវរងការខូចខាត ក្នុងសង្គ្រាមជាមួយអ៊ីរ៉ង់

អ៊ីរ៉ង់ និងសម្ព័ន្ធមិត្តរបស់ខ្លួន បានបំផ្លាញយ៉ាងហោចណាស់ទីតាំងយោធាអាមេរិកចំនួន ១៦កន្លែង នៅទូទាំងប្រទេសមជ្ឈិមបូព៌ាចំនួន ៨ អំឡុងពេលសង្គ្រាមអាមេរិក-អ៊ីស្រាអែលជាមួយអ៊ីរ៉ង់ ដែលចាប់ផ្តើមនៅថ្ងៃទី ២៨ ខែកុម្ភៈ ដែលធ្វើឲ្យទីតាំងមួយចំនួននោះស្ទើរតែមិនអាចប្រើប្រាស់បាន។ នេះបើយោងតាមការស៊ើបអង្កេតរបស់សារព័ត៌មាន CNN។យោងតាមរបាយការណ៍របស់ CNN ដែលបានដកស្រង់សម្តីជំនួយការសភាដែលដឹងពីការវាយតម្លៃការខូចខាតបានឲ្យដឹងថា ទីតាំងដែលរងការខូចខាតទាំងនេះ គឺជាមូលដ្ឋានយោធាភាគច្រើនរបស់សហរដ្ឋអាមេរិកនៅក្នុងតំបន់នេះ។ប្រភពមួយបាននិយាយថា៖«មានការវាយតម្លៃជាច្រើន»។ «ពីផ្នែកដ៏គួរឲ្យភ្ញាក់ផ្អើលមួយ ទីតាំងទាំងមូលត្រូវបានបំផ្លាញ ហើយត្រូវការបិទ រហូតដល់ថ្នាក់ដឹកនាំដែលនិយាយថា មូលដ្ឋានទាំងនេះ ចាំបាច់ត្រូវការជួសជុល ដោយសារតែអត្ថប្រយោជន៍ជាយុទ្ធសាស្ត្រដែលពួកវាផ្តល់ឲ្យសហរដ្ឋអាមេរិក»។របាយការណ៍នេះដែលបានដកស្រង់រូបភាពផ្កាយរណបរាប់សិប និងការសម្ភាសន៍ជាមួយប្រភពនៅសហរដ្ឋអាមេរិក និងប្រទេសអារ៉ាប់ នៅឈូងសមុទ្រអារ៉ាប់ បានបញ្ជាក់ថា រូបភាពផ្កាយរណបបានបង្ហាញថា គោលដៅសំខាន់ៗរបស់ទីក្រុងតេអេរ៉ង់រួមមានប្រព័ន្ធរ៉ាដាទំនើបរបស់សហរដ្ឋអាមេរិក ប្រព័ន្ធទំនាក់ទំនង និងយន្តហោះដែលដាក់ពង្រាយនៅមជ្ឈិមបូព៌ា ដែលភាគច្រើនមានតម្លៃថ្លៃ និងពិបាកជំនួសពួកវាណាស់៕

ទីភ្នាក់ងារជនភៀសខ្លួនUN ព្រមានថាវិបត្តិមជ្ឈិមបូព៌ារារាំងកិច្ចខិតខំប្រឹងប្រែងផ្តល់ជំនួយ

អ្នកនាំពាក្យរបស់ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) បានព្រមានកាលពីថ្ងៃសុក្រថា វិបត្តិមជ្ឈិមបូព៌ាបានបង្កើតផលប៉ះពាល់យ៉ាងធំធេងហួសពីតំបន់នេះ ជាមួយនឹងផលវិបាកកាន់តែខ្លាំងឡើងសម្រាប់ខ្សែច្រវ៉ាក់ផ្គត់ផ្គង់មនុស្សធម៌សកល និងការផ្តល់ជំនួយ។លោកស្រី Carlotta Wolf បានថ្លែងនៅក្នុងសន្និសីទសារព័ត៌មានជាប្រចាំថា ភាពអសន្តិសុខ និងអស្ថិរភាពកាន់តែខ្លាំងឡើងនៅជុំវិញផ្លូវសំខាន់ៗនៃឈូងសមុទ្រ រួមទាំងច្រកសមុទ្រហ័រសមុទ្រ បានរំខានដល់ចរាចរណ៍ផ្លូវសមុទ្រ។ ការកើនឡើងនៃថ្លៃប្រេងឥន្ធនៈ អាហារ និងការដឹកជញ្ជូនទំនិញនៅទូទាំងពិភពលោក កំពុងជំរុញឲ្យតម្លៃឡើងថ្លៃ និងពន្យារពេលការដឹកជញ្ជូនសម្ភារៈសំខាន់ៗ។ លោកស្រីបាននិយាយថា៖«ថ្លៃដើមកើនឡើងទាំងនេះប៉ះពាល់យ៉ាងខ្លាំងដល់មនុស្សដែលកំពុងរស់នៅក្នុងគ្រាអាសន្នរួចហើយ រួមទាំងជនភៀសខ្លួន និងជនភៀសខ្លួនរាប់លាននាក់ ដែលស្ថិតក្នុងចំណោមអ្នកដែលរងផលប៉ះពាល់ខ្លាំងបំផុត ស្របពេលកាត់បន្ថយសមត្ថភាពរបស់ទីភ្នាក់ងារជំនួយក្នុងការផ្តល់ជំនួយទាន់ពេលវេលាផងដែរ»។ការបិទផ្លូវសំខាន់ៗនៃផ្លូវសមុទ្រ បានបង្ខំឲ្យប្រើប្រាស់ជម្រើសដែលមានរយៈពេលយូរជាង និងថ្លៃជាង ដែលនាំឲ្យមានការកើនឡើងនៃពេលវេលាដឹកជញ្ជូន និងភាពស្មុកស្មាញនៃប្រតិបត្តិការ។ លោកស្រី Wolf បាននិយាយថា អត្រាដឹកជញ្ជូនទំនិញពីប្រទេសប្រភពសំខាន់ៗ បានកើនឡើងជិត ១៨ ភាគរយ ចាប់តាំងពីការចាប់ផ្តើមនៃអរិភាព ខណៈដែលសមត្ថភាពរបស់អ្នកផ្តល់សេវាដឹកជញ្ជូនសកលរបស់ UNHCR បានធ្លាក់ចុះពី ៩៧ ភាគរយ មកត្រឹម ៧៧ ភាគរយ ចាប់តាំងពីដើមឆ្នាំនេះ៕

ថ្ងៃដ៏បង្ហូរឈាមមួយផ្សេងទៀតនៅខាងត្បូងលីបង់ ក្នុងពេលមានការបាញ់ផ្លោងរបស់អ៊ីស្រាអែល

កាលពីថ្ងៃសុក្រ មានការវាយប្រហាររបស់អ៊ីស្រាអែលយ៉ាងហោចណាស់៦លើកនៅជុំវិញតំបន់ភាគខាងត្បូងប្រទេសលីបង់ ដែលផ្តោតគោលដៅលើហេដ្ឋារចនាសម្ព័ន្ធ និងអគារ។ មនុស្សយ៉ាងហោចណាស់១២នាក់ ត្រូវបានសម្លាប់ នៅភាគខាងត្បូងប្រទេសលីបង់ ខណៈអ៊ីស្រអែលបន្តការវាយប្រហាររបស់ខ្លួន ទោះបីជាមានបទឈប់បាញ់ក៏ដោយ។ចំពោះក្រុមហេសបូឡា ពួកគេបានធ្វើប្រតិបត្តិការយោធាចំនួន៩លើក ដែលដាក់គោលដៅលើកងទ័ពអ៊ីស្រាអែលនៅក្នុងទឹកដីលីបង់ ព្រមទាំងបានធ្វើការវាយប្រហារមួយចំនួនឆ្លងកាត់ខ្សែបន្ទាត់ពណ៌ខៀវចូលទៅក្នុងភាគខាងជើងប្រទេសអ៊ីស្រាអែល។ពលរដ្ឋនិយាយថា ស្ថានភាពនៅទីនេះ ទោះបីជាមានបទឈប់បាញ់ជាបន្តបន្ទាប់ក៏ដោយ ក៏នៅតែមានភាពតានតឹងខ្លាំង។ យើងបានឮសំឡេងផ្ទុះមិនទៀងទាត់រយៈពេលជាច្រើនម៉ោងចុងក្រោយនេះ។ នេះគឺជាហានិភ័យដ៏ធំមួយសម្រាប់អ្នកដែលបានវិលត្រឡប់ទៅវិញ។ប្រជាជនលីបង់រាប់ម៉ឺននាក់ដែលត្រូវបានជម្លៀសចេញពីលំនៅឋាន ពេលនេះបានវិលត្រឡប់ទៅភាគខាងត្បូងប្រទេសលីបង់វិញ ដោយប្រឈមនឹងការពិតដ៏លំបាក ដែលសង្គ្រាមនៅមិនទាន់ចប់នៅឡើយ អំពើហិង្សានៅបន្ត ហើយពួកគេអាចជាគោលដៅនៅក្នុងការបាញ់ផ្លោងតគ្នាដែលនៅបន្តរវាងក្រុមហេសបូឡា និងអ៊ីស្រាអែល។

បណ្ដាញសង្គម

ព័ត៌មានថ្មីៗ

ឯកឧត្តម ឌី វិជ្ជា និងលោកជំទាវ ហ៊ុន ម៉ាណា អញ្ជើញនាំយកទេយ្យវត្ថុ ប្រគេនព្រះសង្ឃ និងចែកអំណោយប្រជាពលរដ្ឋ នៅស្រុកភ្នំស្រួច ខេត្តកំពង់ស្ពឺ

ឯកឧត្តមកិត្តិសង្គហបណ្ឌិត គន់ គីម អញ្ជើញជួបប្រជាពលរដ្ឋភៀសសឹក និងពិនិត្យទីតាំងរៀបចំផ្សារបណ្តោះអាសន្ន ក្នុងខេត្តបន្ទាយមានជ័យ

ក្រសួងការងារ៖ ខេត្តស្ថិតក្នុងតំបន់ទំនាបកណ្ដាលចំនួន៣ មានឱកាសការងារជាង ៨,០០០កន្លែង កំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

ក្រសួងការងារ៖ នៅខេត្តជាប់សមុទ្រទាំង៤ មានឱកាសការងារជិត ៧,០០០កន្លែង ដែលកំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

ឯកឧត្តមឧបនាយករដ្ឋមន្ត្រី ហ៊ុន ម៉ានី៖ វិញ្ញាសាតាក់តែងចប់ភ្លាម ប្រឡងភ្លាមតែម្តង

ក្រសួងការងារ៖ ខេត្តចំនួន៤ នៅភូមិភាគឦសាន្ត មានឱកាសការងារជិត ៤,០០០កន្លែង កំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

អាជ្ញាធរជាតិអប្សរា និង JQA បិទបញ្ចប់កម្មវិធីអប់រំបរិស្ថានសម្រាប់កុមារ ឆ្នាំ២០២៦ និងប្រគល់រង្វាន់ដល់សិស្សឆ្នើម

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877