BTV NEWS

ចិនតវ៉ាប្រឆាំងនឹងទណ្ឌកម្មរបស់សហភាពអឺរ៉ុប លើក្រុមហ៊ុនចិន ពាក់ព័ន្ធនឹងបញ្ហារុស្ស៊ី

មនុស្សជាង ១៦០.០០០នាក់ រត់គេចពីចំហេះព្រៃ នៅប្រទេសបារាំង និងអេស្ប៉ាញ

ប្រទេសចិនជម្លៀសមនុស្សជាង ២០.០០០នាក់ ខណៈព្យុះទីហ្វុង Noul បក់បោកជិតដល់

លោក Trump៖ នាយករដ្ឋមន្ត្រីអ៊ីស្រាអែល នឹងធ្វើទស្សនកិច្ចនៅអាមេរិក នាសប្តាហ៍ក្រោយ

ព័ត៌មានអន្តរជាតិ

អ៊ីរ៉ង់ព្រមានប៊ុលហ្គារីកុំឲ្យអាមេរិកប្រើប្រាស់ទឹកដីរបស់ខ្លួនសម្រាប់ប្រតិបត្តិការប្រឆាំងនឹងទីក្រុងតេអេរ៉ង់

អ្នកនាំពាក្យក្រសួងការបរទេសអ៊ីរ៉ង់ លោក Esmaeil Baghaei កាលពីថ្ងៃអង្គារ បានព្រមានប្រទេសប៊ុលហ្គារីកុំឲ្យសហរដ្ឋអាមេរិកប្រើប្រាស់ទឹកដី និងមូលដ្ឋានរបស់ខ្លួនសម្រាប់ប្រតិបត្តិការយោធាប្រឆាំងនឹងទីក្រុងតេអេរ៉ង់។ លោកបានចេញការព្រមាននេះនៅក្នុងបទសម្ភាសន៍ជាមួយទីភ្នាក់ងារសារព័ត៌មានផ្លូវការ IRNA ខណៈពេលដែលកំពុងប្រតិកម្មទៅនឹងការអត្ថាធិប្បាយរបស់នាយករដ្ឋមន្ត្រីប៊ុលហ្គារី លោក Rumen Radev ដែលបាននិយាយកាលពីថ្ងៃចន្ទថា រដ្ឋាភិបាលរបស់លោកបានទទួលកំណត់ទូតមួយពីសហរដ្ឋអាមេរិក ដែលស្នើសុំការអនុញ្ញាតឲ្យដាក់ពង្រាយយន្តហោះដឹកប្រេងរហូតដល់ ៨គ្រឿង នៅមូលដ្ឋានទ័ពអាកាស Bezmer ដើម្បីគាំទ្រប្រតិបត្តិការរបស់សហរដ្ឋអាមេរិកនៅមជ្ឈិមបូព៌ា ហើយថា ក្រុមប្រឹក្សារដ្ឋមន្ត្រីប៊ុលហ្គារី នឹងដាក់សំណើមួយទៅសភា ដើម្បីស្វែងរកការយល់ព្រមលើរឿងនេះ នៅពេលក្រោយ។ លោក Baghaei បានអំពាវនាវដល់សភាប៊ុលហ្គារីបដិសេធការផ្តល់ការអនុញ្ញាតឲ្យសហរដ្ឋអាមេរិកដាក់ពង្រាយកម្លាំងនៅលើទឹកដីរបស់ខ្លួន ហើយកុំឲ្យប្រទេសនេះក្លាយជាអ្នកសមគំនិតរបស់ «អ្នកឈ្លានពាន និងឧក្រិដ្ឋជន»។ លោកបាននិយាយថា ក្រោមសេចក្តីសម្រេចលេខ ៣៣១៤ របស់មហាសន្និបាតអង្គការសហប្រជាជាតិ «ការធ្វើឲ្យទឹកដីនៃរដ្ឋមួយអាចប្រើប្រាស់បានសម្រាប់រដ្ឋមួយទៀត ដើម្បីប្រព្រឹត្តអំពើឈ្លានពានប្រឆាំងនឹងរដ្ឋទីបី ត្រូវបានចាត់ទុកថា ជាទង្វើឈ្លានពាន»៕

UN៖ ការខាតបង់ពីការឆបោកតាមអនឡាញក្នុងតំបន់អាស៊ីរហូតដល់ជាង ១១៤ ពាន់លានដុល្លារនៅឆ្នាំ ២០២៥

របាយការណ៍របស់អង្គការសហប្រជាជាតិបាននិយាយកាលពីថ្ងៃអង្គារសប្ដាហ៍នេះថា ជនរងគ្រោះនៃការឆបោកតាមអ៊ីនធឺណិតឆ្លងដែននៅអាស៊ីបូព៌ា អាស៊ីអាគ្នេយ៍ អូស្ត្រាលី និងនូវែលសេឡង់បានខាតបង់រហូតដល់ ១១៤,១ ពាន់លានដុល្លារកាលពីឆ្នាំមុន ជាមួយនឹងការខាតបង់ដែលបានប៉ាន់ប្រមាណថាយ៉ាងហោចណាស់កើនឡើងបីដងពីឆ្នាំ ២០២៣។ អាស៊ីអាគ្នេយ៍ ពិសេសសហភាពមីយ៉ាន់ម៉ា បានលេចចេញជាមជ្ឈមណ្ឌលក្នុងតំបន់សម្រាប់ក្រុមឧក្រិដ្ឋកម្មដែលដំណើរការគម្រោងវិនិយោគស្នេហាក្លែងក្លាយ និងរូបិយប័ណ្ណគ្រីបតូ ដែលក្រុមអ្នកឆបោក ខ្លះមានឆន្ទៈ ខ្លះទៀតត្រូវបានជួញដូរ បោកប្រាស់អ្នកប្រើប្រាស់អ៊ីនធឺណិតនៅជុំវិញពិភពលោក ជារឿយៗមកពីបរិវេណសំណង់អគារឬផ្ទះដែលមានការយាមកាមសន្តិសុខតឹងរ៉ឹង។ប៉ុន្តែក្រោមសម្ពាធពីប្រទេសជាច្រើនរួមទាំងសហរដ្ឋអាមេរិក អង់គ្លេស និងចិន ក្រុមអាជ្ញាធរនៅក្នុងតំបន់និយាយថា ពួកគេកំពុងបង្ក្រាបឧស្សាហកម្មខុសច្បាប់។ មេដឹកនាំបណ្តាញឆបោកជាច្រើននាក់ដែលត្រូវបានចោទប្រកាន់ត្រូវបានធ្វើបត្យាប័នទៅប្រទេសកំណើតពួកគេវិញក្នុងឆ្នាំចុងក្រោយនេះ បន្ទាប់ពីទីក្រុងវ៉ាស៊ីនតោន និងទីក្រុងឡុងដ៍្របានដាក់ទណ្ឌកម្មលើក្រុមហ៊ុន និងបុគ្គលដែលត្រូវបានចោទប្រកាន់ពីបទដំណើរការការឆបោកតាមអ៊ីនធឺណិតយ៉ាងទូលំទូលាយដែលជំរុញដោយការជួញដូរមនុស្ស។ យោងតាមរបាយការណ៍ថ្មីពីការិយាល័យអង្គការសហប្រជាជាតិស្តីពីគ្រឿងញៀន និងឧក្រិដ្ឋកម្ម (UNODC) បានឱ្យដឹងថា ការឆបោកតាមអនឡាញ ភាគច្រើនមកពីការក្លែងបន្លំវិនិយោគ នៅទូទាំងតំបន់ដែលបានកំណត់ បានធ្វើឱ្យជនរងគ្រោះខាតបង់ប្រមាណ ៨៨,៣ ពាន់លានដុល្លារ ដល់ ១១៤,១ ពាន់លានដុល្លារកាលពីឆ្នាំមុន។របាយការណ៍នេះបាននិយាយថា ការខាតបង់រួមគ្នាលើសពី ១៨ទៅ៣៧ ពាន់លានដុល្លារដែលប៉ាន់ស្មានថាបានបាត់បង់នៅឆ្នាំ ២០២៣ ហើយឆ្លុះបញ្ចាំងពីការពង្រីកយ៉ាងខ្លាំងនៃសេដ្ឋកិច្ចឧក្រិដ្ឋកម្មនេះ។របាយការណ៍នេះបានបន្ថែមថា ក្នុងរយៈពេលពីរឆ្នាំចុងក្រោយនេះ ប្រទេសចិន កូរ៉េខាងត្បូង និងតំបន់តៃវ៉ាន់ បានរាយការណ៍ពីការខាតបង់ច្រើនបំផុតពីការឆបោកនៅក្នុងតំបន់ ដោយប្រទេសនីមួយៗ ខាតបង់រាប់ពាន់លានដុល្លារ៕

ប្រមុខការទូតអាមេរិកប្រាប់អាស៊ានថា ការអនុញ្ញាតឱ្យអ៊ីរ៉ង់គ្រប់គ្រងច្រកសមុទ្រ Hormuz គឺជាគំរូដ៏គ្រោះថ្នាក់

លោក Marco Rubio រដ្ឋមន្ត្រីការបរទេសអាមេរិកបានប្រាប់រដ្ឋមន្ត្រីការបរទេសអាស៊ីអាគ្នេយ៍នៅថ្ងៃពុធ ២២ ខែកក្កដា នេះ ថា ការគ្រប់គ្រងច្រកសមុទ្រ Hormuz របស់អ៊ីរ៉ង់នឹងបង្កើតគំរូដ៏គ្រោះថ្នាក់មួយដែលមានផលវិបាកហួសពីមជ្ឈិមបូព៌ា។ ការអត្ថាធិប្បាយរបស់លោកបានកើតឡើងនៅពេលដែលទីបញ្ជាការកណ្តាលសហរដ្ឋអាមេរិកបាននិយាយថា ខ្លួនបានចាប់ផ្តើមវាយប្រហារគោលដៅយោធានៅក្នុងប្រទេសអ៊ីរ៉ង់សម្រាប់យប់ទី១១ ជាប់ៗគ្នា ក្នុងកិច្ចខិតខំប្រឹងប្រែងដើម្បីបន្ថយសមត្ថភាពរបស់ប្រទេសនេះក្នុងការគំរាមកំហែងដល់ការដឹកជញ្ជូនពាណិជ្ជកម្មនៅក្នុងផ្លូវទឹកនេះ។ លោក Rubio បានប្រាប់ក្រុមអ្នកតំណាងនៅក្នុងការជួបជុំគ្នានៅទីក្រុងម៉ានីលនៃសមាគមប្រជាជាតិអាស៊ីអាគ្នេយ៍ (អាស៊ាន) ថា ប្រសិនបើយើងបង្កើតគំរូមួយនៅមជ្ឈិមបូព៌ាដែលរដ្ឋជាតិមួយអាចសម្រេចចិត្តគ្រប់គ្រងផ្លូវទឹកអន្តរជាតិ គិតថ្លៃសេវា និងបំផ្ទុះកប៉ាល់របស់អ្នក ប្រសិនបើអ្នកមិនបង់ប្រាក់ យើងបានបង្កើតគំរូដ៏គ្រោះថ្នាក់មួយដែលនឹងធ្វើម្តងទៀតនៅក្នុងតំបន់ផ្សេងទៀតនៃពិភពលោក រួមទាំងតំបន់នេះផងដែរ។ លោកថានៅក្នុងខ្លឹមសាររបស់វា វាសាមញ្ញណាស់។ អ៊ីរ៉ង់ទាមទារសិទ្ធិ ដែលពួកគេមិនមាននៅក្រោមយន្តការច្បាប់ណាមួយដែលមានស្រាប់ ដើម្បីគ្រប់គ្រងការដឹកជញ្ជូនឆ្លងកាត់ច្រកសមុទ្រ Hormuz។ លោកបានបន្ថែមថា មានគោលការណ៍ជាមូលដ្ឋានអំពីសេរីភាពនៃការធ្វើនាវាចរណ៍ដែលត្រូវបានគំរាមកំហែង៕

ប្រទេសអាហ្សង់ទីន ជម្លៀសប្រជាជនចេញ ខណៈព្រិលធ្លាក់ខ្លាំងវាយប្រហារតំបន់ភ្នំ Mendoza

យោងតាមសេចក្តីរាយការណ៍ប្រព័ន្ធផ្សព្វផ្សាយក្នុងស្រុកបានឲ្យដឹងថា ព្រិលធ្លាក់ខ្លាំងបានចាប់ផ្តើមកាលពីសប្តាហ៍មុននៅតំបន់ភ្នំខ្ពស់ៗនៃតំបន់ Mendoza ប្រទេសអាហ្សង់ទីន ហើយបានបង្កឱ្យមានការជម្លៀសមនុស្សប្រមាណ ៥០ នាក់នៅក្នុងតំបន់នាពេលថ្មីៗនេះ។វីដេអូមួយដែលត្រូវបានចែករំលែកនៅលើបណ្តាញផ្សព្វផ្សាយសង្គមដោយទីភ្នាក់ងារសង្គ្រោះបន្ទាន់សហព័ន្ធ (AFE) បានបង្ហាញពីការជម្លៀសប្រជាជនតាមរថយន្ត។ទីភ្នាក់ងារបានរាយការណ៍ថា អាហារត្រូវបានផ្តល់ឲ្យដល់បុគ្គលិកដឹកជញ្ជូនដែលជាប់គាំងខ្លួនដោយសារតែអាកាសធាតុមិនអំណោយផល ខណៈអាជ្ញាធរផ្លូវហាយវ៉េ បានធ្វើការដើម្បីសម្អាតព្រិលចេញពីដងផ្លូវ។ នៅតំបន់មួយចំនួន គំនរព្រិលបានឡើងដល់កម្ពស់បីម៉ែត្រ។នៅក្នុងបទសម្ភាសន៍តាមវិទ្យុជាមួយស្ថានីយ៍វិទ្យុ MDZ អាហ្សង់ទីន លោក Osvaldo Valle អ្នកនាំពាក្យសម្រាប់ការសម្របសម្រួលប្រតិបត្តិការព្រំដែននៃប្រព័ន្ធរួមបញ្ចូលគ្នា បាននិយាយថា ស្ថានភាពនៅតែមិនទាន់ល្អប្រសើរ ហើយព្រិលធ្លាក់ខ្លាំងកំពុងបន្តនៅក្នុងតំបន់ភ្នំខ្ពស់ៗជាច្រើនកន្លែង ហើយស្ថានភាពអាចនឹងប្រសើរឡើង ប៉ុន្តែអាកាសធាតុនឹងនៅតែមានបញ្ហាប្រឈមរហូតដល់ថ្ងៃទី២ ខែសីហា។

លោកTrump៖ អាមេរិកត្រៀមជាស្រេចដើម្បីឆ្លើយតប ប្រសិនបើក្រុមហ៊ូទីដាក់ការបិទផ្លូវសមុទ្រក្រហម

ប្រធានាធិបតីសហរដ្ឋអាមេរិក លោក Donald Trump កាលពីថ្ងៃអង្គារ ទី២១ ខែកក្កដា បាននិយាយថា សហរដ្ឋអាមេរិកនឹងឆ្លើយតបប្រសិនបើចលនាក្រុមហ៊ូទីសម្ព័ន្ធមិត្តអ៊ីរ៉ង់នៅយេម៉ែន អនុវត្តតាមការគំរាមកំហែងរបស់ខ្លួនក្នុងការដាក់ការបិទផ្លូវលើការដឹកជញ្ជូនពាណិជ្ជកម្មនៅសមុទ្រក្រហម។ លោក Trump បាននិយាយក្នុងអំឡុងពេលជួបជាមួយប្រធានាធិបតីលីបង់ លោក Joseph Aoun ថា «ប្រសិនបើមានរឿងបែបនេះកើតឡើង យើងត្រូវតែដោះស្រាយបញ្ហានេះ»។ លោកប្រធានាធិបតី Donald Trump ក៏បាននិយាយសម្រាលពីការគំរាមកំហែងរបស់ក្រុមឧទ្ទាមហ៊ូទី ក្នុងការបិទផ្លូវនៅសមុទ្រក្រហម ដោយនិយាយថា សហរដ្ឋអាមេរិកធ្លាប់បានដោះស្រាយជាមួយក្រុមនេះកាលពីពេលមុន។ កងកម្លាំងប្រដាប់អាវុធក្រុមហ៊ូទី បានប្រកាសកាលពីថ្ងៃចន្ទពីការបិទផ្លូវរបស់កងទ័ពជើងទឹកប្រឆាំងប្រទេសអារ៉ាប៊ីសាអ៊ូឌីតនៅក្នុងសមុទ្រក្រហម នៅច្រកសមុទ្រ bab al-Mandab។ អ្នកឆ្លើយឆ្លងព័ត៌មាននៅសេតវិមាន លោក Jon Decker បានសួរប្រធានាធិបតីនៅក្នុងការិយាល័យពងក្រពើអំពីកម្រិតនៃការព្រួយបារម្ភរបស់លោកចំពោះការគំរាមកំហែងនេះ លោក Trump បាននិយាយថា ការបិទផ្លូវនេះមិនទាន់លេចចេញជារូបរាងជាក់ស្តែងនៅឡើយទេ។ ប្រសិនបើក្រុមហ៊ូទីធ្វើតាមការគំរាមកំហែងរបស់ខ្លួន វានឹងបំផ្លាញបទឈប់បាញ់ដែលសហរដ្ឋអាមេរិក និងក្រុមហ៊ូទីបានព្រមព្រៀងគ្នានៅក្នុងខែឧសភា ឆ្នាំ២០២៥ ហើយនឹងរំខានដល់ទីផ្សារប្រេងនៅទូទាំងពិភពលោកបន្ថែមទៀត។

លោកTrump សន្យាថានឹងជួយប្រទេសលីបង់ ប៉ុន្តែមិនបានផ្តល់ពេលវេលាសម្រាប់ការដកទ័ពអ៊ីស្រាអែលទេ

លោកប្រធានាធិបតី Donald Trump បានសន្យាថា សហរដ្ឋអាមេរិកនឹងជួយប្រទេសលីបង់ ខណៈលោកបានជួបជាមួយសមភាគីលីបង់ លោក Joseph Aoun ក្នុងពេលមានការកាន់កាប់នៅភាគខាងត្បូងប្រទេសដោយកងកម្លាំងអ៊ីស្រាអែលនៅបន្ត។ ប្រធានាធិបតីសហរដ្ឋអាមេរិក មិនបានប្រកាសពីគោលនយោបាយជាក់ស្តែងណាមួយចំពោះប្រទេសលីបង់ទេ ខណៈលោកបាននិយាយទៅកាន់អ្នកសារព័ត៌មានរួមជាមួយលោក Aoun នៅឯសេតវិមាន កាលពីថ្ងៃអង្គារ។ នៅពេលត្រូវបានសួរថាតើនឹងមានពេលវេលាសម្រាប់ការដកកងទ័ពរបស់អ៊ីស្រាអែលចេញពីប្រទេសនេះដែរឬទេ លោក Trump បាននិយាយថា «ពួកគេកំពុងស្ថិតក្នុងដំណើរការធ្វើដូច្នេះ។ ពួកគេកំពុងស្ថិតក្នុងដំណើរការដាក់ពង្រាយជាថ្មីទៅកាន់តំបន់ផ្សេងៗទៀត»។ តាមពិត អ៊ីស្រាអែលនៅតែមិនទាន់បានដកថយពីតំបន់ណាមួយដែលខ្លួនបានកាន់កាប់ចាប់តាំងពីខែមីនាមក។ កាលពីថ្ងៃចន្ទ ក្រសួងការបរទេសសហរដ្ឋអាមេរិកបានប្រកាសពីការបង្កើត «តំបន់សាកល្បង»ដំបូងក្រោមក្របខ័ណ្ឌលីបង់-អ៊ីស្រាអែល។ តំបន់បែបនេះ ត្រូវបានគេសន្មត់ថានឹងឃើញកងទ័ពលីបង់ដាក់ពង្រាយទៅកាន់ទីក្រុងដែលធ្លាប់ត្រូវបានកាន់កាប់ និងធានាថាគ្មានវត្តមានយោធាក្រុមហេសបូឡា ដូច្នេះការកសាងឡើងវិញអាចចាប់ផ្តើមបាន ហើយប្រជាជនអាចត្រឡប់ទៅវិញ។ ប៉ុន្តែទីក្រុងទាំងបីដែលបានប្រកាសនៅក្នុងតំបន់សាកល្បងដំបូងមិនស្ថិតនៅក្រោមការគ្រប់គ្រងរបស់អ៊ីស្រាអែលទេ ដូច្នេះអ៊ីស្រាអែលមិនបានដកកងទ័ពចេញពីតំបន់ទាំងនោះទេ។ កាលពីថ្ងៃអង្គារ លោក Aoun ពុំបានលើកឡើងពីការរំលោភបំពានរបស់អ៊ីស្រាអែលនៅក្នុងការថ្លែងរបស់លោកនៅក្បែរលោក Trump ទេ។ ផ្ទុយទៅវិញ លោកបានសរសើរមេដឹកនាំអាមេរិក និងបានសាទរចំពោះកិច្ចព្រមព្រៀងក្របខ័ណ្ឌដែលសម្របសម្រួលដោយសហរដ្ឋអាមេរិករវាងលីបង់ និងអ៊ីស្រាអែល ដែលបានដាក់លក្ខខណ្ឌឱ្យអ៊ីស្រាអែលដកកងទ័ពចេញនៅពេលដកហូតអាវុធពីក្រុមហេសបូឡា។

កងទ័ពលីបង់ ចូលទីក្រុងភាគខាងត្បូងក្រោយការដកទ័ពអ៊ីស្រាអែលក្នុងការសាកល្បងដំបូងនៃកិច្ចព្រមព្រៀងសម្របសម្រួលដោយអាមេរិក

មន្ត្រីសន្តិសុខជាន់ខ្ពស់លីបង់ម្នាក់បាននិយាយថា កងទ័ពរបស់ប្រទេសលីបង់ បានចាប់ផ្តើមដាក់ពង្រាយនៅក្នុងទីក្រុង Zawtar al-Gharbiyeh ភាគខាងត្បូងប្រទេសលីបង់កាលពីថ្ងៃអង្គារ ទី២១ ខែកក្កដា បន្ទាប់ពីកងកម្លាំងអ៊ីស្រាអែលបានដកកងទ័ពរបស់ខ្លួនចេញពីតំបន់នោះ ស្របតាមផែនការដែលត្រូវបានសម្របសម្រួលដោយសហរដ្ឋអាមេរិក។ ផែនការនេះរំពឹងទុកថាកងទ័ពលីបង់នឹងរឹបអូសអាវុធពីក្រុមហេសបូឡាសម្ព័ន្ធមិត្តរបស់អ៊ីរ៉ង់នៅក្នុងតំបន់មួយចំនួននៅភាគខាងត្បូងប្រទេសលីបង់ និងការដកកងទ័ពអ៊ីស្រាអែលជាដំណាក់កាល។ យោធាអ៊ីស្រាអែល បាននិយាយថា ផែនការដែលមានឈ្មោះថាកម្មវិធីតំបន់សាកល្បង បានចាប់ផ្តើមហើយ។ កងទ័ពលីបង់ បាននិយាយនៅពេលក្រោយមកថា កងកម្លាំងអ៊ីស្រាអែលបានបាញ់នៅជិតអង្គភាពរបស់ខ្លួនក្នុងអំឡុងពេលដាក់ពង្រាយកងទ័ព ដោយព្រមានថាឧបទ្ទវហេតុនេះអាចរារាំងចំណាត់ការដែលកំពុងត្រូវបានអនុវត្ត។ យោធាអ៊ីស្រាអែល និយាយថា កងទ័ពរបស់ខ្លួនបានបាញ់ព្រមានទៅលើអាកាស បន្ទាប់ពីបុគ្គលិកកងទ័ពលីបង់អមដោយយានយន្តវិស្វកម្មមួយគ្រឿងបានឆ្លងកាត់ប្រហែល១៥០ ម៉ែត្រចូលទៅក្នុងអ្វីដែលខ្លួនហៅថាជាតំបន់សន្តិសុខនៅជិតក្រុង Zawtar al-Sharqiyeh ហើយបានបំពានរបាំង។ ការប្រគល់ទឹកដីកាលពីថ្ងៃអង្គារ គឺជាការសាកល្បងដំបូងនៃផែនការដែលប្រទេសលីបង់សង្ឃឹមថានឹងអាចឱ្យខ្លួនស្តារឡើងវិញការគ្រប់គ្រងទឹកដីមួយកន្លែងមានជម្រៅចូលជ្រៅប្រហែល ១០ គីឡូម៉ែត្រទៅក្នុងប្រទេសដែលនៅតែកាន់កាប់ដោយកងទ័ពអ៊ីស្រាអែល។

ប្រទេសកាណាដា កំពុងវាយតម្លៃជម្រើសជាច្រើន បន្ទាប់ពីការគំរាមដំឡើងពន្ធថ្មីរបស់អាមេរិក

នាយករដ្ឋមន្ត្រីកាណាដា លោក Mark Carney បាននិយាយកាលពីថ្ងៃអង្គារ ទី២១ ខែកក្កដា ថា លោកកំពុងសំឡឹងមើល «ជម្រើសជាច្រើន» បន្ទាប់ពីប្រធានាធិបតីសហរដ្ឋអាមេរិក លោក Donald Trump មានផែនការដំឡើងពន្ធថ្មី៥០ភាគរយលើមុខទំនិញរបស់កាណាដាជាច្រើនមុខក្នុងរយៈពេល៣០ថ្ងៃទៀត។ លោក Carney ក៏បាននិយាយផងដែរថា លោក និងលោក Trump បានព្រមព្រៀង «ជំរុញកិច្ចពិភាក្សា» នៅក្នុងសប្តាហ៍ខាងមុខលើកិច្ចព្រមព្រៀងដែលអាចធ្វើទៅបាន ប៉ុន្តែមិនបានបង្ហាញថា លោកនឹងធ្វើដំណើរទៅកាន់ទីក្រុងវ៉ាស៊ីនតោនសម្រាប់ការចរចាណាមួយនោះទេ។ លោក Carney បានប្រាប់អ្នកសារព័ត៌មានបន្ទាប់ពីបានសន្ទនាជាមួយលោក Trump ថា «យើងនឹងពិនិត្យមើលជម្រើសទាំងអស់ទាក់ទងនឹងរបៀបដែលយើងនឹងឆ្លើយតប ប្រសិនបើវាចូលជាធរមាន»។ ការដំឡើងពន្ធថ្មីនឹងប៉ះពាល់ដល់អ្វីៗគ្រប់យ៉ាងមានចាប់ពីស្រារបស់កាណាដា ឈើវាយកូនហ្គោលលើទឹកកក រហូតដល់ផលិតផលស៊ីម៉ង់ត៍ ប៉ុន្តែនឹងមិនអនុវត្តចំពោះថាមពល និងទំនិញដែលបានរងផលប៉ះពាល់រួចហើយដោយការដំឡើងពន្ធជាក់លាក់តាមវិស័យ នោះទេ។ ទោះជាយ៉ាងណា ពន្ធនឹងប៉ះពាល់ដល់ផលិតផលក្រោមកិច្ចព្រមព្រៀងពាណិជ្ជកម្មសេរីសហរដ្ឋអាមេរិក-ម៉ិកស៊ិក-កាណាដា (USMCA) ដែលនឹងក្លាយជាប្រធានបទនៃការចរចា បន្ទាប់ពីទីក្រុងវ៉ាស៊ីនតោនបាននិយាយនៅថ្ងៃទី១ ខែកក្កដាថា ខ្លួននឹងមិនបន្ថែមពេលកិច្ចព្រមព្រៀងនេះក្នុងទម្រង់បច្ចុប្បន្នរបស់ខ្លួនឡើយ។ លោក Carney បាននិយាយថា «គោលបំណងដំបូងគឺដើម្បីទទួលបានកិច្ចព្រមព្រៀងដ៏ទូលំទូលាយមួយ»។ ខណៈលោក Trump បានដាក់ពន្ធលើដៃគូពាណិជ្ជកម្មរបស់សហរដ្ឋអាមេរិកចាប់តាំងពីវិលត្រឡប់ទៅកាន់តំណែងប្រធានាធិបតីវិញកាលពីឆ្នាំមុន ក្រឹត្យទាំងនោះភាគច្រើនលើកលែងទំនិញដែលចូលប្រទេសរបស់លោកក្រោមកិច្ចព្រមព្រៀងពាណិជ្ជកម្មសេរីសហរដ្ឋអាមេរិក-ម៉ិកស៊ិក-កាណាដា (USMCA)។

អាមេរិក-ចិន កំពុងរៀបចំសម្រាប់លទ្ធភាពនៃដំណើរទស្សនកិច្ចរបស់លោក Xi ទៅអាមេរិក

លោក Marco Rubio រដ្ឋមន្ត្រីការបរទេសអាមេរិក នឹងជួបជាមួយរដ្ឋមន្ត្រីការបរទេសចិន លោក Wang Yi នៅសប្តាហ៍នេះ មុនកិច្ចប្រជុំកំពូលដែលអាចកើតមានរវាងប្រធានាធិបតី Donald Trump និងប្រធានាធិបតីចិនលោក Xi Jinping ទោះបីជាលោក Trump បាននិយាយថា សហរដ្ឋអាមេរិកនឹងលើកឡើងពីការព្រួយបារម្ភជាមួយប្រទេសចិនជុំវិញការចោទប្រកាន់ថាបានជ្រៀតជ្រែកក្នុងការបោះឆ្នោតក៏ដោយ។ មន្ត្រីក្រសួងការបរទេសអាមេរិកម្នាក់បាននិយាយកាលពីថ្ងៃអង្គារថា លោក Rubio និងលោក Wang នឹងជួបគ្នានៅទីក្រុងម៉ានីល ជាទីដែលរដ្ឋមន្ត្រីការបរទេសមកពីសមាគមប្រជាជាតិអាស៊ីអាគ្នេយ៍ (អាស៊ាន )ចំនួន១១ ប្រទេស និងដៃគូសំខាន់ៗបានជួបជុំគ្នាដើម្បីពិភាក្សាអំពីបញ្ហាសកលជាច្រើន។ ក្រុមអ្នកវិភាគបាននិយាយថា កិច្ចប្រជុំរបស់លោក Rubio ជាមួយសមភាគីចិនរបស់លោក ទំនងជាផ្តោតលើការរៀបចំសម្រាប់កិច្ចប្រជុំលើកទីពីររវាងលោក Trump និងលោក Xi បន្ទាប់ពីមេដឹកនាំទាំងពីរបានជួបគ្នាកាលពីខែឧសភាឆ្នាំ២០២៦ នេះ នៅរដ្ឋធានីប៉េកាំងប្រទេសចិន។ លោក Trump បាននិយាយថា លោក Xi នឹងធ្វើទស្សនកិច្ចទៅកាន់សហរដ្ឋអាមេរិកនៅចុងខែកញ្ញា ហើយលោក Rubio កាលពីថ្ងៃអាទិត្យបាននិយាយថា កិច្ចប្រជុំកំពូលនេះនៅតែត្រូវបានរំពឹងទុក។ ប្រទេសចិនមិនទាន់បានបញ្ជាក់ពីដំណើរទស្សនកិច្ចរបស់លោក Xi ទៅកាន់ទីក្រុងវ៉ាស៊ីនតោននៅឡើយទេ។លោក Rubio បានប្រាប់ក្រុមអ្នកយកព័ត៌មាននៅពេលរូបលោកចេញដំណើរទៅចូលរួមជំនួបអាស៊ាន នៅប្រទេសហ្វីលីពីនថា រូបលោកគ្មានហេតុផលដើម្បីជឿថាពួកគេនឹងមិនមកនោះទេ។ វាជារឿងសំខាន់។កិច្ចព្រមព្រៀងផ្អាកសង្គ្រាមដំឡើងពន្ធដ៏ផុយស្រួយរវាងមហាអំណាចពិភពលោកទាំងពីរអាចមានភាពស្មុគស្មាញដោយសារការចោទប្រកាន់ឡើងវិញរបស់លោក Trump កាលពីសប្តាហ៍មុនអំពីការជ្រៀតជ្រែករបស់ចិនក្នុងការបោះឆ្នោតអាមេរិក ជាការអះអាងដែលទីក្រុងប៉េកាំងបានបដិសេធ៕

សភាបារាំង បោះឆ្នោតអនុម័តបម្រាមបណ្តាញផ្សព្វផ្សាយសង្គមសម្រាប់យុវជនអាយុក្រោម១៥ ឆ្នាំ

សភារបស់ប្រទេសបារាំងកាលពីថ្ងៃអង្គារ ទី២១ ខែកក្កដា បានអនុម័តសេចក្តីស្នើច្បាប់ដ៏សំខាន់មួយដោយហាមឃាត់ការចូលប្រើប្រាស់បណ្តាញផ្សព្វផ្សាយសង្គមសម្រាប់កុមារអាយុក្រោម១៥ឆ្នាំ ដោយ កំណត់ចូលជាធរមាននៅដើមឆ្នាំសិក្សាក្រោយ។ សេចក្តីស្នើច្បាប់ ដែលគាំទ្រដោយប្រធានាធិបតី លោក Emmanuel Macron ត្រូវបានអនុម័តដោយព្រឹទ្ធសភាក្នុងសំឡេងគាំទ្រ២៤៣ទល់នឹង២ និងរដ្ឋសភាមានសំឡេងគាំទ្រ២៧៩ទល់នឹង៨១។ កុមារវ័យជំទង់ដែលមានគណនីបណ្តាញផ្សព្វផ្សាយសង្គមរួចហើយនឹងប្រឈមបម្រាមនេះចាប់ពីថ្ងៃទី១ ខែមករា ឆ្នាំ២០២៧ បន្ទាប់ពីអំឡុងពេលអនុគ្រោះរយៈពេលបួនខែ។ ការបង្កើតគណនីថ្មីនឹងត្រូវបានហាមឃាត់ចាប់ពីថ្ងៃទី១ ខែកញ្ញា ទោះបីជាករណីលើកលែងត្រូវបានរួមបញ្ចូលសម្រាប់វេទិកាអប់រំ និងមុខវិជ្ជាគ្រប់ប្រភេទតាមអនឡាញក៏ដោយ។ ករណីលើកលែងរួមមាន YouTube និង WhatsApp ដែលការមើលវីដេអូ និងការផ្ញើសារនឹងនៅតែមិនរងផលប៉ះពាល់ ប៉ុន្តែមុខងារបញ្ចេញមតិ និងការចែករំលែកនឹងត្រូវបានកំណត់។ ច្បាប់នេះក៏អនុវត្តបម្រាមទូរស័ព្ទដៃនៅក្នុងសាលាវិទ្យាល័យចាប់ពីថ្ងៃទី១ ខែកញ្ញា ដោយអនុញ្ញាតឱ្យមានករណីលើកលែងតែក្រោមច្បាប់សាលារៀនជាក់លាក់ប៉ុណ្ណោះ។ យោងតាមទីភ្នាក់ងារបារាំងសម្រាប់ចំណីអាហារ បរិស្ថាន សុខភាពនិងសុវត្ថិភាពការងារ(ANSES) ក្មេងជំទង់ម្នាក់ក្នុងចំណោមពីរនាក់នៅប្រទេសបារាំងចំណាយពេលពី២ ទៅ៥ម៉ោងជារៀងរាល់ថ្ងៃលើស្មាតហ្វូន ភាគច្រើនប្រើប្រាស់បណ្តាញផ្សព្វផ្សាយសង្គម។ វេទិកាបណ្តាញផ្សព្វផ្សាយសង្គមជាទូទៅប្រឆាំងនឹងបម្រាមនេះទាំងស្រុង ហើយសង្កត់ធ្ងន់ថាពួកគេមានវិធានការការពារអ្នកប្រើប្រាស់វ័យក្មេងរួចហើយ រួមទាំងការរឹតត្បិតតអាយុ។ ប្រជាជនទីក្រុងប៉ារីស បានយល់ស្របតាមចំណាត់ការរបស់សមាជិកសភាបារាំងដើម្បីហាមឃាត់ការចូលប្រើប្រាស់បណ្តាញសង្គមសម្រាប់កុមារអាយុក្រោម១៥ឆ្នាំ ខណៈការព្រួយបារម្ភកើនឡើងនៅជុំវិញពិភពលោកលើផលប៉ះពាល់សុខភាព និងសុវត្ថិភាពរបស់អនីតិជន។

បណ្ដាញសង្គម

ព័ត៌មានថ្មីៗ

មនុស្សជាង ១៦០.០០០នាក់ រត់គេចពីចំហេះព្រៃ នៅប្រទេសបារាំង និងអេស្ប៉ាញ

ប្រទេសចិនជម្លៀសមនុស្សជាង ២០.០០០នាក់ ខណៈព្យុះទីហ្វុង Noul បក់បោកជិតដល់

អគ្គលេខាធិការ UN លោក Guterres ទៅដល់រដ្ឋធានីស៊ីរី ជាទស្សនកិច្ចលើកដំបូង គិតតាំងពីឆ្នាំ២០០៩

លោក Trump បញ្ជាក់ថា អ៊ីរ៉ង់ «កាន់តែមានភាពប្រាកដប្រជា» ក្នុងដំណើរការចរចា

ក្រុមហ៊ូទីអះអាងពីការវាយប្រហារលើអារ៉ាប៊ីសាអូឌីត ខណៈជម្លោះមជ្ឈិមបូព៌ាកាន់តែជ្រៅទៅៗ

ចារកម្មអាមេរិក៖ មេដឹកនាំថ្មីរបស់អ៊ីរ៉ង់ បើកចំហជាង ក្នុងការប្រឹងប្រែងទទួលបានអាវុធនុយក្លេអ៊ែរ

ក្រសួងបរិស្ថាន កំពុងរៀបចំហេដ្ឋារចនាសម្ព័ន្ធនៅសហគមន៍តំបន់ការពារធម្មជាតិកោដូន្តី ដើម្បីទាក់ទាញទេសចរ

សាលាបឋមសិក្សាតាំងក្រសៅ ទទួលបានអគារសិក្សាថ្មី១ខ្នង ផ្តល់ផលប្រយោជន៍ដល់ការសិក្សាយូរអង្វែង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877