BTV NEWS

អគាររងការទម្លាក់គ្រាប់បែករបស់អ៊ីស្រាអែលនៅហ្កាហ្សាក្លាយជាជម្រកភៀសខ្លួនសម្រាប់ជនប៉ាឡេស្ទីន

ជប៉ុននឹងធ្វើតេស្តភក់រ៉ែកម្រលើកចេញពីបាតសមុទ្រជ្រៅនៅដើមឆ្នាំ ២០២៦ខាងមុខ

ពលរដ្ឋស៊ីរីជាគ្រិស្តបរិស័ទវិលត្រឡប់មកផ្ទះរបស់ពួកគេវិញនៅខេត្ត Idlib បន្ទាប់ពីជម្លៀសខ្លួនច្រើនឆ្នាំ

ពពកកង្វក់បរិយាកាសគ្របដណ្តប់ពីលើក្រុង Pljevlja របស់ប្រទេសម៉ុនតេណេហ្គ្រូ បង្ខំឲ្យពលរដ្ឋមិនហ៊ានចេញក្រៅ

ព័ត៌មានអន្តរជាតិ

ស៊ុយអែតកោះអញ្ជើញឯកអគ្គរដ្ឋទូតអ៊ីរ៉ង់ បន្ទាប់ពីមានរបាយការណ៍អំពីការកាត់ទោសប្រហារជីវិតពលរដ្ឋម្នាក់

រដ្ឋមន្ត្រីការបរទេសរបស់ប្រទេសនេះ បាននិយាយកាលពីថ្ងៃសុក្រថា ស៊ុយអែតបានកោះអញ្ជើញឯកអគ្គរដ្ឋទូតអ៊ីរ៉ង់ នៅសប្តាហ៍នេះ បន្ទាប់ពីមានរបាយការណ៍ថា ពលរដ្ឋស៊ុយអែតម្នាក់ ត្រូវបានកាត់ទោសប្រហារជីវិត នៅក្នុងប្រទេសអ៊ីរ៉ង់។ រដ្ឋមន្ត្រីការបរទេសលោកស្រី Maria Malmer Stenergard បានប្រាប់សន្និសីទសារព័ត៌មានមួយថា៖ «ជំហររបស់ប្រទេសស៊ុយអែត និងសហភាពអឺរ៉ុបចំពោះទោសប្រហារជីវិត គឺច្បាស់លាស់ណាស់។ យើងតែងតែប្រឆាំងនឹងទោសប្រហារជីវិត។ គ្រប់ទីកន្លែង និងមិនគិតពីកាលៈទេសៈទេ ហើយរឿងនេះ ត្រូវបានគេដឹងយ៉ាងច្បាស់។ ដូច្នេះ កាលពីថ្ងៃពុធ ក្រសួងការបរទេសបានកោះអញ្ជើញឯកអគ្គរដ្ឋទូតអ៊ីរ៉ង់ ដើម្បីបង្ហាញការតវ៉ារបស់យើងប្រឆាំងនឹងការកាត់ទោសនេះ» ខណៈពេលដែលកត់សម្គាល់ថា របាយការណ៍ទាំងនោះ ពុំទាន់ត្រូវបានបញ្ជាក់នៅឡើយ៕

រដ្ឋមន្ត្រីការបរទេសអ៊ីរ៉ង់រិះគន់ជំហរនុយក្លេអ៊ែររបស់ប្រទេស E3 ក្នុងការសន្ទនាតាមទូរស័ព្ទ ជាមួយសមភាគីអង់គ្លេស

រដ្ឋមន្ត្រីការបរទេសអ៊ីរ៉ង់ លោក Seyed Abbas Araghchi បានរិះគន់វិធីសាស្រ្ត «មិនទទួលខុសត្រូវ» ដែលអនុម័តដោយប្រទេសបារាំង អង់គ្លេស និងអាល្លឺម៉ង់ ដែលត្រូវបានគេស្គាល់ថា ជា ប្រទេសE3 ចំពោះបញ្ហានុយក្លេអ៊ែររបស់អ៊ីរ៉ង់ ក្នុងអំឡុងពេលសន្ទនាតាមទូរស័ព្ទជាមួយសមភាគីអង់គ្លេសរបស់ខ្លួន គឺលោកស្រី Yvette Cooper។ក្រសួងការបរទេសអ៊ីរ៉ង់បាននិយាយនៅក្នុងសេចក្តីថ្លែងការណ៍មួយនៅថ្ងៃសៅរ៍ (ទី ២០ ខែធ្នូ)នេះថា នៅក្នុងការសន្ទនាតាមទូរស័ព្ទកាលពីថ្ងៃសុក្រ លោក Araghchi បានចង្អុលបង្ហាញថា អ៊ីរ៉ង់ «មិនដែលបដិសេធការចរចា និងការសន្ទនាដែលផ្អែកលើការគោរពសិទ្ធិស្របច្បាប់ និងផលប្រយោជន៍ស្របច្បាប់របស់ប្រទេសអ៊ីរ៉ង់ទេ»។ ទោះជាយ៉ាងណាក៏ដោយ លោកបានបន្ថែមថា អ៊ីរ៉ង់នឹងមិនទទួលយកការចរចា ដែលមានគោលបំណងដាក់ការទាមទារជាឯកតោភាគីនោះទេ។ចំណែកលោកស្រី Cooper បានគូសបញ្ជាក់ពីតម្រូវការក្នុងការងាកទៅរកការទូត ដើម្បីដោះស្រាយបញ្ហានុយក្លេអ៊ែរ។ប្រមុខការទូតទាំងពីរបានបញ្ជាក់ពីភាពចាំបាច់ក្នុងការបន្តការពិគ្រោះយោបល់នៅកម្រិតផ្សេងៗគ្នា ដើម្បីកែលម្អការយោគយល់គ្នាទៅវិញទៅមក។ ពួកគេក៏បានពិភាក្សាអំពីកិច្ចការកុងស៊ុលផងដែរ៕

ក្រុមប្រឹក្សាសន្តិសុខអង្គការសហប្រជាជាតិ ថ្កោលទោសការវាយប្រហារដោយដ្រូនទៅលើកងកម្លាំងរក្សាសន្តិUN នៅស៊ូដង់

ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃសុក្រ បានថ្កោលទោសយ៉ាងដាច់អហង្ការចំពោះការវាយប្រហារដោយយានដ្រូនកាលពីសប្តាហ៍មុន ទៅលើមូលដ្ឋានដឹកជញ្ជូនរបស់UN នៅប្រទេសស៊ូដង់ ដែលបានបណ្តាលកងកម្លាំងរក្សាសន្តិភាពបង់ក្លាដែស ៦ នាក់ ស្លាប់ និងរ ៩ នាក់ ផ្សេងទៀត រងរបួស។នៅក្នុងសេចក្តីថ្លែងការណ៍មួយ សមាជិកក្រុមប្រឹក្សាសន្តិសុខ បានសម្តែងការចូលរួមរំលែកទុក្ខយ៉ាងជ្រាលជ្រៅចំពោះក្រុមគ្រួសារនៃកងកម្លាំងរក្សាសន្តិភាពដែលបានស្លាប់ និងរដ្ឋាភិបាល និងប្រជាជនបង់ក្លាដែស ហើយបានជូនពរឲ្យអ្នករងរបួសជាសះស្បើយយ៉ាងឆាប់រហ័ស និងពេញលេញ។ការវាយប្រហារដោយយានដ្រូន បានកើតឡើង នៅក្នុងទីក្រុង Kadugli រដ្ឋ South Kordofan ប្រទេសស៊ូដង់ កាលពីថ្ងៃសៅរ៍សប្តាហ៍មុន។សមាជិកក្រុមប្រឹក្សាបានសម្តែងការព្រួយបារម្ភយ៉ាងខ្លាំងថា ការវាយប្រហារដោយចេតនានេះទៅលើមូលដ្ឋានភស្តុភាររបស់អង្គការសហប្រជាជាតិ និងកងកម្លាំងរក្សាសន្តិភាពបណ្តោះអាសន្នរបស់UN (UNISFA) នៅក្នុងតំបន់ Abyei បង្ហាញពីការមិនគោរពច្បាប់អន្តរជាតិ និងបង្កការគំរាមកំហែងយ៉ាងធ្ងន់ធ្ងរដល់សន្តិភាព និងសន្តិសុខអន្តរជាតិ៕

IPC៖ ស្ថានភាពទុរ្ភិក្ស ត្រូវបានទប់ស្កាត់ នៅហ្កាហ្សា ប៉ុន្តែមនុស្ស ១,៦លាននាក់ នៅតែប្រឈមភាពអត់ឃ្លានកម្រិតវិបត្តិ

ស្ថានភាពទុរ្ភិក្ស នៅក្នុងតំបន់ហ្កាហ្សាស្ទ្រីប ត្រូវបានកាត់បន្ថយជាបណ្ដោះអាសន្ន បន្ទាប់ពីមានការថយចុះនូវអរិភាព និងការធ្វើឲ្យប្រសើរឡើងនូវការទទួលបានស្បៀងអាហារមនុស្សធម៌ និងពាណិជ្ជកម្ម ប៉ុន្តែស្ថានភាពទាំងមូលនៅតែស្ថិតក្នុងស្ថានភាពធ្ងន់ធ្ងរដដែល។ នេះបើយោងតាមការរកឃើញថ្មីដែលបានចេញផ្សាយកាលពីថ្ងៃសុក្រ (ទី១៩ ខែធ្នូ) ដោយស្ថាប័នចាត់ចំណាត់ដំណាក់កាលសន្តិសុខស្បៀងអាហាររួម (IPC)។ការវិភាគនោះបានឲ្យដឹងថា ចន្លោះថ្ងៃទី១៦ ខែតុលា ដល់ថ្ងៃទី៣០ ខែវិច្ឆិកា ឆ្នាំ២០២៥ មនុស្សប្រហែល ១,៦លាននាក់ ឬ ៧៧ភាគរយនៃចំនួនប្រជាជន បានជួបប្រទះនូវកម្រិតអសន្តិសុខអាហារធ្ងន់ធ្ងរដែលត្រូវបានចាត់ថ្នាក់ជាដំណាក់កាលទី៣ (វិបត្តិ) របស់ IPC ឬអាក្រក់ជាងនេះទៅទៀត។ នេះរួមបញ្ចូលទាំងមនុស្សជាងកន្លះលាននាក់ នៅក្នុងគ្រាអាសន្ន (IPC ដំណាក់កាលទី 4) និងមនុស្សជាង ១០.០០០នាក់ ប្រឈមនឹងគ្រោះមហន្តរាយ (ដំណាក់កាលទី៥ របស់ IPC) ដែលជាចំណាត់ថ្នាក់ធ្ងន់ធ្ងរបំផុត។បើទោះបីជាការវិត្តន៍ថ្មីៗនេះ ស្របពេលមានបទឈប់បាញ់ដ៏ផុយស្រួយ ដែលរួមទាំងផែនការសន្តិភាពដែលត្រូវបានស្នើឡើង និងដែលបានធ្វើឲ្យប្រសើរឡើងនូវលំហូរអាហារ បានជួយសម្រួលដល់ស្ថានភាពធ្ងន់ធ្ងរបំផុតក៏ដោយ ក៏ IPC បានព្រមានថា ស្ថានភាពនៅតែធ្ងន់ធ្ងរដដែល។ចាប់ពីថ្ងៃទី១ ខែធ្នូ ដល់ថ្ងៃទី១៥ ខែមេសា ឆ្នាំ២០២៦ មនុស្សប្រហែល ១,៦លាននាក់ នៅតែត្រូវបានគេរំពឹងថា នឹងប្រឈមនឹងកម្រិត «វិបត្តិ ឬកាន់តែអាក្រក់» នៃអសន្តិសុខស្បៀងអាហារ។ នេះរួមបញ្ចូលទាំងមនុស្សប្រមាណ ៥៧១.០០០នាក់ នៅក្នុងស្ថានភាពគ្រោះអាសន្ន និងប្រហែល ១.៩០០នាក់ នៅក្នុងគ្រោះមហន្តរាយ ដែលឆ្លុះបញ្ចាំងពីការថយចុះនូវកម្រិតធ្ងន់ធ្ងរបំផុត ប៉ុន្តែមិនមែនជាការវិលត្រឡប់ទៅរកស្ថិរភាពវិញនោះឡើយ៕

ទីក្រុងហ្សាការតា ត្រៀមប្រឈមនឹងទឹកជំនន់ និងបំណាក់ដី នៅរដូវឈប់សម្រាក

នៅពេលដែលទីក្រុងហ្សារកាតាត្រៀមខ្លួន សម្រាប់ថ្ងៃឈប់សម្រាកបុណ្យណូអែល និងចូលឆ្នាំសកល ទីក្រុងរបស់ប្រទេសឥណ្ឌូនេស៊ីមួយនេះ ក៏កំពុងត្រៀមប្រឈមនឹងហានិភ័យនៃទឹកជំនន់ បំណាក់បាក់ដី និងគ្រោះមហន្តរាយបាតុភូតធម្មជាតិផ្សេងទៀត ស្របពេលមានការព្រមានអំពីហានិភ័យភ្លៀងធ្លាក់ខ្លាំង និងខ្យល់បក់កាន់តែខ្លាំង។យោងតាមការព្យាកររបស់ទីភ្នាក់ងារឧតុនិយម អាកាសធាតុ និងភូគព្ភសាស្ត្រ (BMKG) បានឲ្យដឹងថា ទីក្រុងហ្សាការតា ត្រូវបានរំពឹងថា នឹងមានភ្លៀងធ្លាក់ខ្លាំង និងខ្យល់បក់ខ្លាំង នៅចន្លោះថ្ងៃទី១៩ ខែធ្នូ ដល់ថ្ងៃទី២២ ខែធ្នូ។ ក្នុងរយៈពេលប៉ុន្មានថ្ងៃកន្លងមកនេះ ខ្យល់ត្រូវបានកត់ត្រាក្នុងល្បឿនរហូតដល់ ៥៥គីឡូម៉ែត្រ ក្នុងមួយម៉ោង នៅទីក្រុងហ្សាការតា លើសពីកម្រិតមធ្យមធម្មតាទាបក្រោម ៣០គីឡូម៉ែត្រ ក្នុងមួយម៉ោង។ទីភ្នាក់ងារអាកាសធាតុ បានសន្មតថា លក្ខខណ្ឌអាកាសធាតុអាក្រក់ធ្ងន់ធ្ងរបំផុតបណ្ដាលមកពីរដូវវស្សាមានភ្លៀងធ្លាក់ខ្លាំងបំផុត ដែលត្រូវបានគេរំពឹងថា នឹងបន្តរហូតដល់ខែមករា ឆ្នាំ២០២៦ ក៏ដូចជាព្យុះស៊ីក្លូនត្រូពិក និងចំណុចផ្ដើមព្យុះស៊ីក្លូនចំនួន ២ទៀត ដែលត្រូវបានរកឃើញនៅក្នុងទីតាំង ៣ផ្សេងគ្នា នៅជុំវិញប្រទេសដែលត្រូវបានគេនិយាយថា បានរួមចំណែកដល់ការមានអាកាសធាតុធ្ងន់ធ្ងរ នៅក្នុងទីក្រុងហ្សាការតា និងតំបន់ផ្សេងទៀតរបស់ប្រទេសឥណ្ឌូនេស៊ី។ព្យុះស៊ីក្លូនត្រូពិក Bakung ត្រូវបានប្រទះឃើញកកើតឡើង នៅមហាសមុទ្រឥណ្ឌា ភាគនិរតីនៃខេត្ត Lampung ក្នុងកោះស៊ូម៉ាត្រា។ គិតត្រឹមល្ងាចថ្ងៃទី១៧ ខែធ្នូ គេសង្កេតឃើញបក់បោកចេញពីប្រទេសឥណ្ឌូនេស៊ីក្នុងល្បឿនទាប បើទោះបីជា BMKG បានប្រាប់ថា ព្យុះស៊ីក្លូននេះនឹងនៅតែមានឥទ្ធិពលដល់អាកាសធាតុ នៅក្នុងតំបន់ជាច្រើនរបស់ប្រទេសក៏ដោយ។ក្រៅពីព្យុះ Bakung ទីភ្នាក់ងារអាកាសធាតុក៏កំពុងតាមដានព្យុះស៊ីក្លូនមួយទៀតឈ្មោះ Invest 93S ដែលត្រូវបានរកឃើញដំបូងនៅថ្ងៃទី១១ ខែធ្នូ នៅភាគខាងត្បូងនៃខេត្ត East Java, Bali, East Nusa Tenggara (NTT) និង West Nusa Tenggara (NTB)៕

ទាហានកូឡុំប៊ីយ៉ាងតិច ៧នាក់ បានស្លាប់ និង ៣០ នាក់ រងរបួស ក្នុងការវាយប្រហារលើមូលដ្ឋានយោធា

កងទ័ពជាតិបាននិយាយកាលពីថ្ងៃសុក្រថា យ៉ាងហោចណាស់ទាហានកូឡុំប៊ី ៧នាក់ ត្រូវបានសម្លាប់ និង ៣០នាក់ រងរបួស បន្ទាប់ពីក្រុមឧទ្ទាមមួយក្រុមបានវាយប្រហារមូលដ្ឋានយោធាមួយ នៅក្នុងទីក្រុង Aguachica ភាគឦសាននៃប្រទេសនេះ។ កងទ័ពជាតិបានអះអាងកាលពីថ្ងៃសុក្រថា នៅក្នុង «សកម្មភាពភេរវកម្ម» នេះ កងទ័ពរំដោះជាតិ (ELN) បានប្រើប្រាស់យានដ្រូនដែលបំពាក់ដោយគ្រឿងផ្ទុះ ដោយរំលោភសិទ្ធិមនុស្ស និងច្បាប់មនុស្សធម៌អន្តរជាតិ ដោយធ្វើឲ្យប្រជាជនស្ថិតក្នុងស្ថានភាពហានិភ័យដ៏ធ្ងន់ធ្ងរ។ប្រធានាធិបតីកូឡុំប៊ី លោក Gustavo Petro បាននិយាយនៅលើវេទិកាសង្គម X ថា៖«ការវាយប្រហារនេះ បានកើតឡើង ដោយសារតែខ្វះប្រព័ន្ធប្រឆាំងដ្រូនទំនើប» ដោយបន្ថែមថា ការបញ្ជាទិញប្រព័ន្ធនេះភ្លាមៗ ត្រូវបានធ្វើឡើង ដើម្បីទប់ស្កាត់ការវាយប្រហារបែបនេះដោយក្រុមប្រដាប់អាវុធខុសច្បាប់។លោក Francisco Cubides អគ្គមេបញ្ជាការកងកម្លាំងយោធា បាននិយាយថា សកម្មភាពស៊ើបការណ៍សម្ងាត់ និងប្រតិបត្តិការ នឹងត្រូវបានពង្រឹង ដើម្បីទប់ទល់នឹងសកម្មភាពភេរវកម្មរបស់កងទ័ពរំដោះជាតិ (ELN)៕

ការវាយប្រហាររបស់រុស្ស៊ីទៅលើហេដ្ឋារចនាសម្ព័ន្ធកំពង់ផែ នៅជិតទីក្រុង Odesa ប្រទេសអ៊ុយក្រែន បានសម្លាប់មនុស្ស៧នាក់

មន្ត្រីអ៊ុយក្រែនបាននិយាយថា ការវាយប្រហារដោយមីស៊ីលរបស់រុស្ស៊ីកាលពីយប់ថ្ងៃសុក្រទៅលើហេដ្ឋារចនាសម្ព័ន្ធកំពង់ផែជុំវិញកំពង់ផែសមុទ្រខ្មៅ Odesa របស់អ៊ុយក្រែន បានសម្លាប់មនុស្ស ៧នាក់ និង ១៥នាក់ រងរបួស។ឧបនាយករដ្ឋមន្ត្រី Oleksiy Kuleba បានសរសេរនៅលើបណ្តាញ Telegram ថា៖«នៅពេលល្ងាចថ្ងៃសុក្រ រុស្ស៊ីបានវាយប្រហារហេដ្ឋារចនាសម្ព័ន្ធកំពង់ផែ នៅក្នុងតំបន់ Odesa ដោយមីស៊ីលបាលីស្ទីក»។យោងតាមរបាយការណ៍បឋម លោក Kuleba និងអភិបាលតំបន់ Odesa លោក Oleh Kiper បាននិយាយថា មនុស្ស ៧នាក់ បានស្លាប់ និង ១៥នាក់ រងរបួស។ ប្រភពមួយដែលដឹងច្បាស់អំពីបញ្ហានេះបានអះអាងថា ការវាយប្រហារនេះ គឺកំណត់គោលដៅទៅលើកំពង់ផែ Pivdennyi ដែលជាកំពង់ផែមួយក្នុងចំណោមកំពង់ផែបី នៅក្នុងតំបន់នោះ។ទីក្រុង Odesa ដែលជាចំណុចកណ្តាលនៃការនាំចេញគ្រាប់ធញ្ញជាតិរបស់អ៊ុយក្រែន និងការនាំចេញផ្សេងទៀត គឺជាគោលដៅវាយប្រហាររបស់រុស្ស៊ីជាញឹកញាប់ ចាប់តាំងពីរុស្ស៊ីបានឈ្លានពានប្រទេសជិតខាងតូចជាងរបស់ខ្លួន នៅក្នុងខែកុម្ភៈ ឆ្នាំ ២០២២៕

លោក Putin៖ បទឈប់បាញ់ នៅអ៊ុយក្រែន «អាចមាន» បើទីក្រុងគីវ ព្រមឲ្យពលរដ្ឋ នៅរុស្ស៊ី បោះឆ្នោត

ប្រធានាធិបតីរុស្ស៊ី លោក Vladimir Putin កាលពីថ្ងៃសុក្រ (ទី១៩ ខែធ្នូ) បានលើកឡើងថា លោកបានត្រៀមខ្លួនរួចជាស្រេច ដើម្បីពិចារណាអំពីការបញ្ឈប់ការវាយប្រហារចូលជ្រៅ នៅក្នុងប្រទេសអ៊ុយក្រែន នៅថ្ងៃបោះឆ្នោត ប្រសិនបើដំណើរការនោះកើយឡើង។អំឡុងពេលថ្លែងនៅក្នុងសន្និសីទសារព័ត៌មានចុងឆ្នាំពិសេស នៅទីក្រុងមូស្គូ លោក Putin បានកំណត់បទឈប់បាញ់ ដោយមានការចូលរួមពីពលរដ្ឋអ៊ុយក្រែនដែលរស់នៅក្នុងប្រទេសរុស្ស៊ី ក្នុងការបោះឆ្នោត។លោកបានមានប្រសាសន៍ថា៖ «យើងត្រៀមខ្លួនរួចជាស្រេច ដើម្បីពិចារណាពីការធានាសន្តិសុខ ក្នុងអំឡុងពេលមានការបោះឆ្នោត នៅអ៊ុយក្រែន។ យ៉ាងហោចណាស់ ត្រូវបញ្ឈប់ ដើម្បីចៀសវាងការវាយប្រហារចូលជ្រៅទៅក្នុងដែនដីនេះ នៅថ្ងៃបោះឆ្នោត»។បន្ទាប់មក លោកបានបន្ថែមថា យោងទៅតាមការប៉ាន់ប្រមាណផ្សេងៗគ្នា បានឲ្យដឹងថា មានពលរដ្ឋអ៊ុយក្រែនពី ៥ ទៅ ១០លាននាក់ នៅលើដែនដីរបស់ប្រទេសរុស្ស៊ី ដែលមានសិទ្ធិបោះឆ្នោត។មេដឹកនាំរុស្ស៊ីបានសង្កត់ធ្ងន់ថា៖ «ប្រសិនបើការបោះឆ្នោតត្រូវធ្វើឡើងនោះ យើងមានសិទ្ធិទាមទារពីអ្នកដែលនឹងរៀបចំដំណើរការនោះថា ប្រជាជនអ៊ុយក្រែនដែលកំពុងរស់នៅក្នុងប្រទេសរុស្ស៊ី ត្រូវបានផ្ដល់សិទ្ធិឲ្យបោះឆ្នោតនៅលើដែនដីរបស់សហព័ន្ធរុស្ស៊ី»៕

អ៊ីរ៉ង់ប្រឆាំងការដាក់ទណ្ឌកម្មរបស់សហរដ្ឋអាមេរិកលើមន្ត្រី ICC ចំនួន ២នាក់ បន្ថែមទៀត

អ្នកនាំពាក្យក្រសួងការបរទេសអ៊ីរ៉ង់ លោក Esmaeil Baghaei កាលពីថ្ងៃសុក្រ បានថ្កោលទោសការដាក់ទណ្ឌកម្មរបស់ទីក្រុងវ៉ាស៊ីនតោនលើមន្ត្រីពីររូបទៀតនៃតុលាការឧក្រិដ្ឋកម្មអន្តរជាតិ (ICC) ជុំវិញ «ការចូលរួមដោយផ្ទាល់»របស់ពួកគេ នៅក្នុងការស៊ើបអង្កេតដែលកំពុងបន្តរបស់តុលាការ ICC ប្រឆាំងនឹង អ៊ីស្រាអែល។លោកបានធ្វើការអត្ថាធិប្បាយនៅលើវេទិកាប្រព័ន្ធផ្សព្វផ្សាយសង្គម X មួយថ្ងៃបន្ទាប់ពីរដ្ឋមន្ត្រីការបរទេសអាមេរិក លោក Marco Rubio បានប្រកាសពីការដាក់ទណ្ឌកម្មប្រឆាំងនឹងចៅក្រម ICC លោក Gocha Lordkipanidze មកពីប្រទេសហ្ស៊កហ្ស៊ី និងលោក Erdenebalsuren Damdin មកពីប្រទេសម៉ុងហ្គោលី។លោក Baghaei បាននិយាយថា ទីក្រុងវ៉ាស៊ីនតោន «បង្កើនសម្ពាធ និងដាក់ទណ្ឌកម្ម» លើអ្នកដែលស្វែងរកការទាមទារឲ្យ«ឧក្រិដ្ឋជនសង្គ្រាមប្រល័យពូជសាសន៍»ទទួលខុសត្រូវ ដែលបង្ហាញពី«និទណ្ឌភាពក្នុងទម្រង់ដ៏ច្បាស់លាស់ និងឃោរឃៅបំផុត ហើយនិងភាពមិនប្រក្រតីខាងសីលធម៌យ៉ាងជ្រាលជ្រៅ»។តុលាការ ICC បានបដិសេធយ៉ាងដាច់ខាតចំពោះទណ្ឌកម្មថ្មីរបស់សហរដ្ឋអាមេរិកកាលពីថ្ងៃព្រហស្បតិ៍។យោងតាមតុលាការនេះ ទីក្រុងវ៉ាស៊ីនតោនធ្លាប់បានដាក់ទណ្ឌកម្មលើមន្ត្រី ICC ចំនួន ៩នាក់។ទណ្ឌកម្មទាំងនេះ បានកើតឡើងបន្ទាប់ពីការសម្រេចចិត្តរបស់តុលាការដែលមានមូលដ្ឋាននៅទីក្រុងឡាអេកាលពីឆ្នាំមុន ក្នុងការចេញដីកាចាប់ខ្លួនមន្ត្រីជាន់ខ្ពស់អ៊ីស្រាអែលពីររូប រួមទាំងនាយករដ្ឋមន្ត្រី បេនចាមីន ណេតាន់យ៉ាហ៊ូ ពីបទឧក្រិដ្ឋកម្មប្រឆាំងនឹងមនុស្សជាតិនៅតំបន់ហ្កាហ្សា ក៏ដូចជាការស៊ើបអង្កេតជាបន្តបន្ទាប់របស់តុលាការ ICC ទៅលើឧក្រិដ្ឋកម្មសង្គ្រាមរបស់សហរដ្ឋអាមេរិក នៅក្នុងប្រទេសអាហ្វហ្គានីស្ថាន៕

អ៊ីស្រាអែល និងលីបង់ ពិភាក្សាគ្នាអំពីការរំសាយអាវុធរបស់ក្រុមហេសបូឡា និងការវិលត្រឡប់របស់ប្រជាជនដែលត្រូវបានជម្លៀស

អ៊ីស្រាអែល និងលីបង់ បានធ្វើកិច្ចពិភាក្សាគ្នាកាលពីថ្ងៃសុក្រ ដែលជាផ្នែកមួយនៃកិច្ចសន្ទនាសន្តិសុខ ដោយផ្តោតលើការរំសាយអាវុធរបស់ក្រុមហេសបូឡា និងការវិលត្រឡប់របស់ប្រជាជនទៅកាន់ផ្ទះរបស់ពួកគេ នៅក្នុងភូមិព្រំដែនភាគខាងត្បូងរបស់ប្រទេសលីបង់។ នេះបើយោងតាមប្រភពព័ត៌មានអ៊ីស្រាអែល និងលីបង់។ ក្រោមការសម្របសម្រួលរបស់សហរដ្ឋអាមេរិក កិច្ចប្រជុំនេះ បានធ្វើឡើង នៅក្នុងទីក្រុង Naqoura ភាគនិរតីនៃប្រទេសលីបង់ ជិតព្រំដែនភាគខាងជើងរបស់ប្រទេសអ៊ីស្រាអែល។លោក Yosef Dreznin អនុប្រធានគោលនយោបាយការបរទេសរបស់អ៊ីស្រាអែល នៅក្រុមប្រឹក្សាសន្តិសុខជាតិ បានតំណាងឲ្យអ៊ីស្រាអែលនៅក្នុងកិច្ចពិភាក្សា ខណៈដែលអតីតឯកអគ្គរដ្ឋទូតលីបង់ប្រចាំសហរដ្ឋអាមេរិក លោក Simon Karam បានដឹកនាំគណៈប្រតិភូលីបង់។យោងតាមសេចក្តីថ្លែងការណ៍របស់អ៊ីស្រាអែល កិច្ចប្រជុំនេះផ្តោតលើការរំសាយអាវុធរបស់ក្រុមហេសបូឡា និងការជំរុញគម្រោងសេដ្ឋកិច្ច ដោយបង្ហាញពីចំណាប់អារម្មណ៍ទៅវិញទៅមក ក្នុងការប្រឆាំងនឹងក្រុមហេសបូឡា និងធានាសន្តិសុខរយៈពេលវែងសម្រាប់សហគមន៍ នៅសងខាងនៃព្រំដែន។សេចក្តីថ្លែងការណ៍មួយរបស់ការិយាល័យប្រធានាធិបតីលីបង់ បានបញ្ជាក់ថា ក្នុងអំឡុងពេលនៃកិច្ចពិភាក្សា លោក Karam បានគូសបញ្ជាក់ពីជំហររឹងមាំរបស់ប្រទេសលីបង់ លើសារៈសំខាន់ផ្នែកមនុស្សធម៌ និងជាតិ នៃការអនុញ្ញាតឲ្យអ្នកភូមិដែលត្រូវបានផ្លាស់ទីលំនៅ វិលត្រឡប់ទៅកាន់ផ្ទះរបស់ពួកគេវិញដោយសុវត្ថិភាព៕

បណ្ដាញសង្គម

ព័ត៌មានថ្មីៗ

កិច្ចប្រជុំពិគ្រោះយោបល់លើកទីមួយ កម្ពុជា-បង់ក្លាដែស ផ្ដោតលើនយោបាយ និងការអភិវឌ្ឍវិស័យមួយចំនួន

សង្ខេបស្ថានការណ៍នៅតាមបន្ទាត់ព្រំដែនកម្ពុជា-ថៃ អំពីករណីយោធាថៃនៅតែបន្តការបាញ់ប្រហារ ដើម្បីឈ្លានពានមកលើដែនអធិបតេយ្យរបស់កម្ពុជានៅទិសយោធភូមិភាគទី៤ និងយោធភូមិភាគទី៥

BREAKING NEWS | ម៉ោង ២០:៣១នាទី យោធាថៃបានបាញ់គ្រាប់ភ្លេីងបំភ្លឺចំនួន ១គ្រាប់ទៀត ដែលជាគ្រាប់ទី៣ហើយ នៅភូមិសាស្ត្រសង្កាត់ផ្សាកណ្តាល ក្រុងប៉ោយប៉ែត ខេត្តបន្ទាយមានជ័យ។

អ្នកនាំពាក្យ EU ៖ អធិបតេយ្យភាពរាជាណាចក្រដាណឺម៉ាក ត្រូវតែរក្សាការពារ

ភាពតានតឹងកាន់តែខ្លាំង ពេលដែលក្រុមឧទ្ទាម M23បន្តប្រយុទ្ធនៅកុងហ្គោ បើទោះបីមានបទឈប់បាញ់ក៏ដោយ

ការឈឺចាប់គ្មានទីបញ្ចប់សម្រាប់ជនស៊ីវិលជម្លៀសខ្លួនចេញពីសង្រ្គាមស៊ូដង់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877