BTV NEWS

មនុស្សម្នាក់ស្លាប់ ខណៈ ២នាក់បាត់ខ្លួន ក្រោយលិចនាវាដឹកជនអន្តោប្រវេន៍ នៅម្ដុំកោះ Lampedusa របស់អ៊ីតាលី

មេដឹកនាំកូរ៉េខាងជើង ត្រូវបានឃើញគ្របមឈូសដោយទង់ជាតិ នៅក្នុងរូបភាពវីដេអូ

មន្ត្រី៖ ជម្លោះជាមួយអ៊ីស្រាអែល ឆក់យកជីវិតមនុស្សយ៉ាងតិច ៩៣៥នាក់ នៅអ៊ីរ៉ង់

ភាពតានតឹងរវាងរុស្ស៊ី និងអាស៊ែបៃហ្សង់ កើនឡើង ក្រោយវិមានក្រឹមឡាំង ថ្កោលទោសប្រតិកម្មរបស់ទីក្រុងបាគូ ចំពោះការចាប់ខ្លួន

ព័ត៌មានអន្តរជាតិ

មន្ទីរបញ្ចកោណអះអាងជ័យជម្នះក្នុងបេសកកម្មអ៊ីរ៉ង់ ដោយលម្អិតពីកម្លាំងមហិមារបស់គ្រាប់បែកឃួងបំផ្ទុះក្រោមដី

ថ្នាក់ដឹកនាំមន្ទីរបញ្ចកោណ អះអាងជ័យជម្នះនៅក្នុងបេសកកម្មយោធានៅអ៊ីរ៉ង់ ដោយបានដាក់ចេញនូវសេចក្ដីលម្អិតថ្មីអំពីយុទ្ធសាស្ត្រយោធា និងគ្រឿងផ្ទុះ ដើម្បីពង្រឹងអំណះអំណាងរបស់ពួកគេថា ការវាយប្រហាររបស់សហរដ្ឋអាមេរិក ពិតជាបានបំផ្លាញទីតាំងនុយក្លេអ៊ែរសំខាន់ៗរបស់អ៊ីរ៉ង់ ប៉ុន្តែភាពមិនច្បាស់លាស់នៅតែមានទៅលើថា តើការទម្លាក់គ្រាប់បែកនោះបានរុញកម្មវិធីនុយក្លេអ៊ែររបស់ក្រុងតេអេរ៉ង់ ឱ្យដើរថយក្រោយបានឆ្ងាយប៉ុណ្ណា។យោធាអាមេរិកក៏បានចែករំលែកវីដេអូមួយនៅឯសន្និសីទព័ត៌មានរបស់មន្ទីរបញ្ចកោណនៅថ្ងៃព្រហស្បតិ៍ ដែលបង្ហាញពីកម្លាំងដ៏មហិមារបស់គ្រាប់បែកឃួងបំផ្ទុះគោលដៅក្រោមដី ដែលដូចទៅនឹងគ្រាប់បែកប្រើលើទីតាំងនុយក្លែអ៊ែរអ៊ីរ៉ង់។ វីដេអូនោះហាក់បង្ហាញពីការសាកល្បងដំណើរការគ្រាប់បែកដែលជាអាវុធយុទ្ធភណ្ឌដ៏ធំសម្បើមប្រភេទ GBU-57A/B ដោយទម្លាក់ទៅចំគោលដៅ រួចឃួងទៅក្រោមរួងភ្នំដើម្បីបំផ្ទុះទីតាំងកប់ជ្រៅ ដោយបន្សល់ស្លាកស្នាមខូចខាតតិចតួចប៉ុណ្ណោះនៅខាងលើដី។នៅក្នុងសន្និសីទសារព័ត៌មានដ៏កម្រមួយរបស់មន្ទីរបញ្ចកោណ រដ្ឋមន្ត្រីការពារជាតិ លោក Pete Hegseth និងឧត្តមសេនីយ Dan Caine ប្រធាននាយសេនាធិការចម្រុះ បានជជែកវេកញែកអំពីថា តើគោលដៅនុយក្លេអ៊ែរត្រូវបាន "លុបចោល" ដូចដែលលោកប្រធានាធិបតី Donald Trump បាននិយាយដែរឬទេ ខណៈមេដឹកនាំទាំងពីរបានលាតត្រដាងវីរភាពនៃការវាយប្រហារព្រមទាំងការស្រាវជ្រាវ និងការរៀបចំយ៉ាងទូលំទូលាយ ដែលបានឈានដល់ការអនុវត្តប្រតិបត្តិកានោះ។លោក Hegseth បាននិយាយប្រាប់អ្នកយកព័ត៌មានថា "ចង់ហៅលទ្ធផលនោះថាបំផ្លាញ ផ្ដួល ឬកម្ទេចចោល ឬយ៉ាងណាក៏បានដែរ តែជារួមនោះគឺជាការវាយប្រហារដ៏ជោគជ័យជាប្រវត្តិសាស្ត្រ"៕

មេដឹកនាំប្លុកអឺរ៉ុប ពិភាក្សាសំណើពាណិជ្ជកម្មថ្មីរបស់អាមេរិក ខណៈថ្ងៃផុតកំណត់ពន្ធជិតមកដល់

បណ្ដាមេដឹកនាំសហភាពអឺរ៉ុប បានពិភាក្សាលើសំណើថ្មីពីសហរដ្ឋអាមេរិក លើកិច្ចព្រមព្រៀងពាណិជ្ជកម្មនៅឯកិច្ចប្រជុំកំពូលទីក្រុងព្រុចសែល កាលពីថ្ងៃព្រហស្បតិ៍ (២៦ មិថុនា) ដោយប្រធានគណៈកម្មាការ លោកស្រី Ursula von der Leyen គិតថាកិច្ចចរចារពន្ធអាចបរាជ័យ ហើយនិយាយថា "ជម្រើសទាំងអស់នៅតែមាននៅលើតុចរចា"។ពេលវេលាជិតអស់ហើយសម្រាប់ប្លុកនេះដើម្បីស្វែងរកជំហររួមមួយ មុនពេលការផ្អាកពន្ធខ្ពស់ដែលត្រូវបានគំរាមកំហែងដោយប្រធានាធិបតីអាមេរិក Donald Trump ត្រូវផុតកំណត់នៅថ្ងៃទី០៩ ខែកក្កដា ខាងមុខនេះ ដែលអាចជាការវាយប្រហារដ៏ធំដល់អ្នកនាំចេញអឺរ៉ុប រាប់ចាប់ពីរថយន្ត ទៅដល់ឱសថ។មេដឹកនាំអ៊ឺរ៉ុបកំពុងប្រជុំគ្នាដើម្បីសម្រេចថា តើពួកគេចង់ជំរុញឱ្យមានកិច្ចព្រមព្រៀងពាណិជ្ជកម្មឆាប់រហ័ស ឬបន្តប្រយុទ្ធតតាំងដើម្បីបានកិច្ចព្រមព្រៀងកាន់តែប្រសើរឡើងមួយ ដោយប្រទេសដែលមានសេដ្ឋកិច្ចធំបំផុតទាំងពីររបស់សហភាពអឺរ៉ុប គឺអាល្លឺម៉ង់ និងបារាំង ទំនងជាខ្វែងគំនិត។អធិការបតីអាល្លឺម៉ង់ លោក Friedrich Merz បានជំរុញឱ្យសហភាពអឺរ៉ុប ធ្វើកិច្ចព្រមព្រៀងពាណិជ្ជកម្ម "រហ័ស និងសាមញ្ញ" ជាជាង "យឺតយ៉ាវ និងស្មុគស្មាញ"។ ប៉ុន្តែប្រធានាធិបតីបារាំង លោក Emmanuel Macron បាននិយាយថា ប្រទេសរបស់លោកនឹងមិនទទួលយកលក្ខខណ្ឌដែលមិនមានតុល្យភាពនោះទេ ប៉ុន្តែក៏នៅតែចង់ឱ្យមានកិច្ចព្រមព្រៀងពាណិជ្ជកម្មរហ័ស និងជាក់ស្តែងមួយដែរ។លោកស្រី Von der Leyen និយាយថា ប្លុកអឺរ៉ុបបានទទួលឯកសារចុងក្រោយបំផុតរបស់អាមេរិក ក្នុងថ្ងៃព្រហស្បតិ៍សម្រាប់ការចរចាបន្ថែម ហើយខ្លួនកំពុងវាយតម្លៃលើសំណើនោះ។ មិនមានព័ត៌មានជាក់លាក់ណាលើឯកសារសំណើទេ ប៉ុន្តែអ្នកការទូតសហភាពអឺរ៉ុបម្នាក់បានពិពណ៌នាថាជា "កិច្ចព្រមព្រៀងគោលការណ៍" ដោយបន្ថែមថា អាមេរិកមិនចង់លម្អិតលើវិស័យឧស្សាហកម្មជាក់លាក់ឡើយ៕

ភាពចលាចលនយោបាយបង្កឱ្យមានក្ដីបារម្ភផ្នែកសេដ្ឋកិច្ច ខណៈទាមទារឱ្យនាយករដ្ឋមន្ត្រីលាលែងពីតំណែងឬរំលាយសភា

ភាពមិនច្បាស់លាស់លើអនាគតរបស់នាយករដ្ឋមន្ត្រីលោកស្រី Paetongtarn ជំរុញឱ្យមានការព្រួយបារម្ភផ្នែកសេដ្ឋកិច្ច ជាមួយនឹងហានិភ័យចំពោះថវិកាឆ្នាំ២០២៦ គោលនយោបាយសំខាន់ៗ និងទំនុកចិត្តវិនិយោគិន។ការព្រួយបារម្ភកំពុងកើនឡើងក្នុងវិស័យធុរកិច្ចរបស់ប្រទេសថៃជុំវិញអស្ថិរភាពនយោបាយដែលកំពុងកើនឡើង ស្របពេលមានការរំពឹងទុកថា នាយករដ្ឋមន្ត្រី Paetongtarn Shinawatra អាចលាលែងពីតំណែង ឬរំលាយសភា ជុំវិញការបែកបាក់ផ្ទៃក្នុងរបស់ប្រទេសថៃ ពិសេសពាក់ព័ន្ធសមត្ថភាពដឹកនាំប្រទេសរបស់លោកស្រីនាយករដ្ឋមន្ត្រីរូបនេះ។ភាពមិនច្បាស់លាស់នេះកំពុងក្លាយជាស្រមោលលើសេដ្ឋកិច្ចជាតិ ដោយក្រុមអ្នកវិភាគ និងអ្នកតំណាងវិស័យឯកជនបានព្រមានអំពីការពន្យារពេលដែលអាចកើតមានចំពោះថវិកាសារពើពន្ធឆ្នាំ២០២៦ និងការរំខានដល់គោលនយោបាយសំខាន់ៗ។ ប្រសិនបើនាយករដ្ឋមន្ត្រីចុះចេញពីតំណែង សភានឹងបោះឆ្នោតជ្រើសរើសនាយករដ្ឋមន្ត្រីថ្មីពីបញ្ជីបេក្ខជនដែលត្រូវតែងតាំងដោយគណបក្ស។ ប្រសិនបើមេដឹកនាំថ្មីមកពីសម្ព័ន្ធភាពបច្ចុប្បន្ន ជាពិសេស លោក ឆៃកាសេម និទិស៊ីរី (Chaikasem Nitisiri) នៃគណបក្សភឿថៃ ផលប៉ះពាល់សេដ្ឋកិច្ចត្រូវបានគេរំពឹងថានឹងមានតិចតួច។ នេះទំនងជាអនុញ្ញាតឱ្យសេចក្ដីស្នើច្បាប់កញ្ចប់ថវិកាឆ្នាំ២០២៦ ក្នុងទំហំទឹកប្រាក់សរុប ៣,៧៨សែនកោដិបាត ដំណើរការតាមការគ្រោងទុក រួមជាមួយនឹងរបៀបវារៈគោលនយោបាយសំខាន់ៗរបស់រាជរដ្ឋាភិបាល។ ចំហាកឬ សេណារីយ៉ូដែលរំខានជាងនេះគឺការរំលាយសភាពេញលេញ។ ទោះបីជាអំណានលើកដំបូងនៃច្បាប់ថវិកាជាតិឆ្នាំ ២០២៦ បានអនុម័តនៅសភាជាន់ទាបរួចហើយនៅថ្ងៃទី៣០ខែឧសភាក៏ដោយ ក៏ការរំលាយសភា នឹងលុបចោលសុពលភាពសេចក្ដីស្នើច្បាប់នោះទាំងស្រុង ពេលនោះ រដ្ឋាភិបាលនឹងមិនអាចអនុវត្តកញ្ចប់ថវិកាថ្មីនៅថ្ងៃទី១តុលា២០២៥បានទេ ដែលជាការចាប់ផ្តើមនៃឆ្នាំសារពើពន្ធថ្មី៕

សេតវិមាន មានបំណងកាត់បន្ថយមូលនិធិរបស់អាមេរិកសម្រាប់ការស៊ើបអង្កេតឧក្រិដ្ឋកម្មសង្គ្រាម

យោងតាមប្រភពព័ត៌មានចំនួនបីរបស់សហរដ្ឋអាមេរិកដែលដឹងពីបញ្ហា និងឯកសារផ្ទៃក្នុងរបស់រដ្ឋាភិបាល បានឲ្យដឹងថា សេតវិមានបានផ្តល់ការណែនាំឱ្យបញ្ចប់ការផ្តល់មូលនិធិរបស់សហរដ្ឋអាមេរិកសម្រាប់កម្មវិធីជាង២០ជុំវិញការប្រព្រឹត្តឧក្រិដ្ឋកម្មសង្គ្រាម និងការងារទទួលខុសត្រូវជាសកល រួមទាំងនៅក្នុងសហភាពមីយ៉ាន់ម៉ា ស៊ីរី និងអំពើឃោរឃៅរបស់រុស្ស៊ីដែលត្រូវបានចោទប្រកាន់ក្នុងប្រទេសអ៊ុយក្រែន ។ការណែនាំពីការិយាល័យគ្រប់គ្រងនិងថវិកា ដែលត្រូវបានធ្វើឡើង មិនមែនជាការសម្រេចចុងក្រោយដើម្បីបញ្ចប់កម្មវិធីនោះទេ ខណៈការិយាល័យផ្តល់ឱ្យក្រសួងការបរទេសនូវជម្រើសដើម្បីតវ៉ា។យោងតាមប្រភពព័ត៌មាននិងបញ្ជីមួយ ដែលត្រូវបានមើលឃើញដោយសារព័ត៌មាន Reuters កម្មវិធីទាំងនេះក៏រួមបញ្ចូលនៅក្នុងប្រទេសអ៊ីរ៉ាក់ នេប៉ាល់ ស្រីលង្កា កូឡុំប៊ី បេឡារុស ស៊ូដង់ ស៊ូដង់ខាងត្បូង អាហ្វហ្គានីស្ថាន និងប្រទេសហ្គាំប៊ី។ កម្មវិធីជាច្រើនដែលបានកំណត់សម្រាប់ការបញ្ចប់ដំណើរការគម្រោងការទទួលខុសត្រូវចំពោះឧក្រិដ្ឋកម្មសង្រ្គាមនៅក្នុងប្រទេសអ៊ុយក្រែន ប្រភពដឹងពីបញ្ហានេះបាននិយាយថា រួមទាំងការអនុវត្តសិទ្ធិសកល ដែលជួយប្រមូលភស្តុតាងសម្រាប់ឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិនៅទូទាំងប្រទេសអ៊ុយក្រែន ដូចជាអំពើហិង្សាផ្លូវភេទ និងការធ្វើទារុណកម្មជាដើម។

លោក Netanyahu ព្យាយាមពន្យារពេលការកោះហៅជម្រះក្តី បន្ទាប់ពីលោក Trump គាំទ្រ

នាយករដ្ឋមន្ត្រីអ៊ីស្រាអែល លោក Benjamin Netanyahu កាលពីថ្ងៃព្រហស្បតិ៍ (ទី២៦ ខែមិថុនា) បានស្នើឱ្យតុលាការ ពន្យារពេលការផ្តល់សក្ខីកម្មរបស់លោក នៅក្នុងការជម្រះក្តីអំពើពុករលួយជាយូររបស់លោក បន្ទាប់ពីប្រធានាធិបតីសហរដ្ឋអាមេរិក លោក Donald Trump បានអំពាវនាវឱ្យលុបចោលសំណុំរឿងទាំងស្រុង។ចំណាត់ការរបស់លោក Trump ក្នុងការគាំទ្រលោក Netanyahu ជុំវិញករណីនេះ បានធ្វើឲ្យមានការរិះគន់ពីអ្នកនយោបាយអ៊ីស្រាអែលមួយចំនួន រួមទាំងសមាជិកនៃក្រុមចម្រុះផ្ទាល់របស់មេដឹកនាំអ៊ីស្រាអែល និងមេដឹកនាំគណបក្សប្រឆាំង។ វាបានកើតឡើងប៉ុន្មានថ្ងៃបន្ទាប់ពី លោក Trump និង លោក Netanyahu បានប្រកាសជ័យជម្នះលើអ៊ីរ៉ង់នៅក្នុងជម្លោះរយៈពេល១២ថ្ងៃ ដែលបានមើលឃើញអ៊ីស្រាអែលទម្លាក់គ្រាប់បែកលើសាធារណរដ្ឋអ៊ីស្លាមមួយនេះ ហើយយន្តហោះរបស់អាមេរិក បានទម្លាក់មីស៊ីលដ៏មានឥទ្ធិពលលើទីតាំងនុយក្លេអ៊ែររបស់អ៊ីរ៉ង់។នៅក្នុងឯកសារមួយទៅកាន់តុលាការ មេធាវីរបស់លោក Netanyahu លោក Amit Hadad បាននិយាយថា សក្ខីកម្មរបស់លោកនាយករដ្ឋមន្ត្រី គួរតែត្រូវបានពន្យារពេល ដោយសារ «ការវិវឌ្ឍន៍ក្នុងតំបន់ និងពិភពលោក»។ ឯកសារនេះបាននិយាយថា «តុលាការត្រូវបានស្នើសុំដោយគោរពដើម្បីបង្គាប់ឱ្យលុបចោលសវនាការដែលនាយករដ្ឋមន្ត្រីគ្រោងនឹងផ្តល់សក្ខីកម្មក្នុងរយៈពេលពីរសប្តាហ៍ខាងមុខនេះ»។ឯកសារនិយាយថា លោក Netanyahu «ត្រូវបង្ខំលះបង់ពេលវេលា និងថាមពលទាំងអស់របស់លោកដើម្បីគ្រប់គ្រងបញ្ហាជាតិ ការទូត និងសន្តិសុខ ដែលមានសារៈសំខាន់បំផុត» បន្ទាប់ពីមានជម្លោះជាមួយអ៊ីរ៉ង់ និងក្នុងអំឡុងពេលការប្រយុទ្ធដែលនៅបន្តក្នុងតំបន់ហ្កាហ្សា ជាទីដែលចំណាប់ថ្នូរអ៊ីស្រាអែលត្រូវបានឃុំខ្លួន។ នៅក្នុងសារមួយនៅលើវេទិកាសង្គម Truth Social លោក Trump បាននិយាយថា ការជម្រះក្តីលោក Netanyahu «គួរតែត្រូវបានលុបចោលភ្លាមៗ ឬផ្តល់ការលើកលែងទោសដល់វីរបុរសដ៏អស្ចារ្យ» បន្ទាប់ពីបញ្ចប់សង្រ្គាមជាមួយអ៊ីរ៉ង់។

បន្ទាប់ពីកិច្ចប្រជុំកំពូលណាតូ លោក Trump និងអឺរ៉ុប នៅតែរកាំរកូសជុំវិញមហិច្ឆតារបស់លោក Putin

នៅក្នុងគំនិតរបស់លោកប្រធានាធិបតីអាមេរិក Donald Trump ហាក់មើលឃើញថា មេដឹកនាំរុស្ស៊ី លោក Vladimir Putin កំពុងស្វែងរកច្រកចេញពីសង្រ្គាមដ៏បង្ហូរឈាមអាយុកាល ៣ឆ្នាំរបស់លោកទៅលើអ៊ុយក្រែន ប៉ុន្តែបើតាមទស្សនៈរបស់អគ្គលេខាធិការអង្គការណាតូ លោក Mark Rutte យល់ឃើញថា មហិច្ឆតារបស់មេដឹកនាំរុស្ស៊ីរូបនេះប្រហែលជាទើបតែចាប់ផ្តើមប៉ុណ្ណោះ។ លោក Rutte បានចេញការព្រមានដល់កិច្ចប្រជុំកំពូលប្រចាំឆ្នាំរបស់អង្គការណាតូ កាលពីថ្ងៃអង្គារ (២៤ មិថុនា) សប្ដាហ៍នេះថា ប្រសិនបើសម្ព័ន្ធយោធាមិនវិនិយោគលើសមត្ថភាពការពាររបស់ខ្លួនទេ នោះរុស្ស៊ីអាចវាយប្រហារប្រទេសសមាជិកក្នុងពេល ៣ឆ្នាំបន្ទាប់។ រដ្ឋជាសមាជិកភាគច្រើនបានយល់ព្រមលើការទាមទាររបស់អាមេរិក ដើម្បីជំរុញការចំណាយការពារជាតិដល់ ៥% នៃផលិតផលក្នុងស្រុកសរុប។លោក Trump ដែលធ្លាប់រិះគន់សម្ព័ន្ធយោធានេះថា "ខ្សែលើ" បាននិយាយថា ទស្សនៈរបស់លោកបានផ្លាស់ប្តូរហើយ។ ទោះយ៉ាងនេះក្ដី ជំនួបកំពូលដែលបញ្ចប់កាលពីថ្ងៃពុធនោះ នៅតែគូសបញ្ជាក់ពីគម្លាតកាន់តែទូលាយរវាងអាមេរិក និងអឺរ៉ុប ទៅលើការមើលឃើញពីមហិច្ឆតាយោធារបស់រុស្ស៊ី។លោក Philippe Dickinson នាយករងនៃគំនិតផ្តួចផ្តើមសន្តិសុខអន្តរអាត្លង់ទិក និងជាអតីតអ្នកការទូតអង់គ្លេសលើកឡើងថា "ការខ្វះខាតនូវការយល់ដឹងរួមពីគោលដៅរបស់លោក Putin នឹងបង្កភាពស្មុគស្មាញដល់ផែនការការទូតនាពេលអនាគតដើម្បីបញ្ចប់សង្គ្រាម"។ក្នុងសន្និសីទសារព័ត៌មាននៅថ្ងៃពុធ លោក Trump ទទួលស្គាល់ថា អាចទៅរួចដែលលោក Putin មានមហិច្ឆតាទឹកដីលើសពីអ៊ុយក្រែន ប៉ុន្តែក៏ទទូចថា មេដឹកនាំរុស្ស៊ីរូបនេះនៅតែចង់ឱ្យសង្រ្គាមបញ្ចប់ឆាប់រហ័ស។ ការយល់ឃើញរបស់លោក Trump គឺច្បាស់ណាស់ថាផ្ទុយពីមន្រ្តីណាតូជាច្រើន ដោយមន្ត្រីជាន់ខ្ពស់ណាតូមួយរូបបានប្រាប់អ្នកយកព័ត៌មាននៅថ្ងៃអង្គារថា តាមពិតលោក Putin មិនចាប់អារម្មណ៍នឹងបទឈប់បាញ់ ឬចូលក្នុងកិច្ចពិភាក្សាដោយស្មោះត្រង់ទាល់តែសោះ ដោយបន្តថា មហិច្ឆតារបស់រុស្ស៊ីគឺចង់បានការគ្រប់គ្រងហួសពី "ទឹកដីមួយចំនួនតាមបន្ទាត់រដ្ឋបាលរបស់ពួកគេ"៕

ផ្នែកនានាទូទាំងសហរដ្ឋអាមេរិក ជួបប្រទះកម្ដៅដ៏គ្រោះថ្នាក់ដល់កម្រិតកំណត់ត្រាក្នុងសប្តាហ៍នេះ

កំណត់ត្រាកម្ដៅដ៏គ្រោះថ្នាក់ត្រូវបានបំបែកនៅក្នុងជាង ២៨០ទីតាំងនៅទូទាំងសហរដ្ឋអាមេរិក នៅក្នុងសប្តាហ៍នេះ ជាមួយនឹងការរំពឹងទុកថាសីតុណ្ហភាពកាន់តែខ្លាំងក្លាជាងនេះ។ មជ្ឈមណ្ឌលព្យាករអាកាសធាតុរបស់អាមេរិក NOAA បានឱ្យដឹងថា រលកកម្ដៅដ៏ក្តៅគគុក ដែលកំពុងគ្របដណ្ដប់លើតំបន់កណ្ដាលប៉ែកខាងលិច និងឆ្នេរខាងកើត បាននាំមកនូវស្ថានភាពគ្រោះថ្នាក់ដល់មនុស្សជិត ១៣០លាននាក់ ក្រោមការព្រមានពីកម្ដៅខ្លាំង ឬការណែនាំពីកម្ដៅក្នុងថ្ងៃព្រហស្បតិ៍ (២៦ មិថុនា)។ទិន្នន័យ NOAA បង្ហាញថា ទីតាំងចំនួន ២៨២កន្លែង នៅសហរដ្ឋអាមេរិក បានបំបែកកំណត់ត្រាកម្ដៅប្រចាំថ្ងៃក្នុងសប្តាហ៍នេះ ខណៈទីតាំង ១២១កន្លែងផ្សេងទៀត មើលឃើញកម្រិតខ្ពស់កាលពីមុននៃកម្ដៅដ៏កំណាច។ កំណត់ត្រាកម្ដៅប្រចាំថ្ងៃថ្មីក៏ត្រូវកត់ត្រានៅទីក្រុងធំៗយ៉ាងហោចណាស់៥០ នៅភាគខាងកើតសហរដ្ឋអាមេរិក ក្នុងថ្ងៃអង្គារតែមួយប៉ុណ្ណោះ នេះបើយោងតាមសេវាអាកាសធាតុជាតិ។NOAA និយាយថា រលកកម្ដៅដ៏អូសបន្លាយ និងខ្លាំងក្លាត្រូវរំពឹងថានឹងបន្តដល់ថ្ងៃសុក្រ (២៧ មិថុនា) នេះ ពីតំបន់កណ្កាលប៉ែកខាងលិច ដល់ពាក់កណ្តាលអាត្លង់ទិក។ សេចក្ដីណែនាំពីកម្ដៅនៅតែមានក្នុងរដ្ឋជាច្រើននៅថ្ងៃព្រហស្បតិ៍ រួមទាំងផ្នែកខ្លះនៃរដ្ឋ North Carolina រដ្ឋ Illinois តំបន់ Washington DC រួមទាំងកន្លែងជាច្រើនទៀត។នៅទីក្រុង Springfield រដ្ឋ Ohio បានបង្កើតកំណត់ត្រាកម្ដៅខ្ពស់បំផុត ៤០អង្សាសេក្នុងថ្ងៃអង្គារ ដោយបានផ្តួលកំណត់ត្រា ៣៨អង្សាសេពីមុន។ នៅទីក្រុង Baltimore រដ្ឋ Maryland បានមើលឃើញកំណត់ត្រាខ្ពស់ ៤០,៥អង្សាសេ ដោយបំបែកកំណត់ត្រា ៣៨អង្សាសេក្នុងឆ្នាំ២០១០។ NOAA និយាយថា ថ្ងៃអង្គារសប្ដាហ៍នេះគឺជាថ្ងៃក្តៅបំផុតរបស់ទីក្រុងញូវយ៉ក ចាប់តាំងពីឆ្នាំ២០១២មក៕

អ៊ីរ៉ង់៖ គ្មានផែនការបន្តចរចានុយក្លេអ៊ែរជាមួយអាមេរិកទេ ដោយនិយាយសម្រាលពីផលប៉ះពាល់នៃកាវាយប្រហារ

អ៊ីរ៉ង់ កាលពីថ្ងៃព្រហស្បតិ៍ ទី២៦ មិថុនា បានច្រានចោលដែលថា ខ្លួនគ្រោងនឹងបន្តកិច្ចចរចានុយក្លេអ៊ែរជាមួយសហរដ្ឋអាមេរិក បន្ទាប់ពីការបញ្ចប់សង្គ្រាមរយៈពេល១២ថ្ងៃជាមួយអ៊ីស្រាអែល ហើយបានចោទប្រកាន់ទីក្រុងវ៉ាស៊ីនតោនថា បាននិយាយបំផ្លើសពីផលប៉ះពាល់នៃការវាយប្រហាររបស់អាមេរិក។ជម្លោះធ្ងន់ធ្ងរបំផុតរវាងអ៊ីស្រាអែល និងអ៊ីរ៉ង់ បានបង្អាក់ដល់កិច្ចចរចានុយក្លេអ៊ែររវាងអ៊ីរ៉ង់ និងសហរដ្ឋអាមេរិក ប៉ុន្តែលោកប្រធានាធិបតី Donald Trump បាននិយាយថា ទីក្រុងវ៉ាស៊ីនតោននឹងជួបចរចាជាមួយទីក្រុងតេអេរ៉ង់នៅសប្តាហ៍ក្រោយ ដោយបេសកជនពិសេសរបស់លោក លោកSteve Witkoff បង្ហាញក្តីសង្ឃឹម សម្រាប់កិច្ចព្រមព្រៀងសន្តិភាពដ៏ទូលំទូលាយ។ប៉ុន្តែរដ្ឋមន្ត្រីការបរទេសអ៊ីរ៉ង់ លោក Abbas Araghchi បានបញ្ឈប់នូវអ្វីដែលលោកបាននិយាយថា គឺជា «ការរំពឹងទុក» ដែលថាទីក្រុងតេអេរ៉ងនឹងចូលទៅកាន់តុចរចា និងបាននិយាយថា វា «មិនគួរត្រូវបានយកចិត្តទុកដាក់ខ្លាំងទេ»។ លោកបាននិយាយតាមទូរទស្សន៍រដ្ឋថា «ខ្ញុំចង់បញ្ជាក់ឲ្យច្បាស់ថា គ្មានកិច្ចព្រមព្រៀង គ្មានការរៀបចំ ឬការសន្ទនាណាមួយ ត្រូវបានធ្វើឡើងដើម្បីចាប់ផ្តើមការចរចាថ្មីទេ»។ «មិនទាន់មានផែនការណាមួយត្រូវបានកំណត់នៅឡើយ ដើម្បីចាប់ផ្តើមការចរចា»។ការច្រានចោលរបស់លោក Araghchi បានធ្វើឡើងខណៈសមាជិកសភាអ៊ីរ៉ង់បានអនុម័តសេចក្តីស្នើច្បាប់មួយ ដោយផ្អាកកិច្ចសហប្រតិបត្តិការជាមួយអង្គការឃ្លាំមើលនុយក្លេអ៊ែររបស់អង្គការសហប្រជាជាតិ និងបន្ទាប់ពីមេដឹកនាំកំពូល លោក Ayatollah Ali Khamenei បានចោទប្រកាន់លោក Trump ពីការនិយាយបំផ្លើសពីផលប៉ះពាល់នៃការវាយប្រហាររបស់សហរដ្ឋអាមេរិកលើរោងចក្រនុយក្លេអ៊ែរអ៊ីរ៉ង់។

មេដឹកនាំកំពូលរបស់អ៊ីរ៉ង់ បាននិយាយថា សហរដ្ឋអាមេរិកមិនបានទទួលអ្វីពីការវាយប្រហារនោះទេ

មេដឹកនាំកំពូលរបស់អ៊ីរ៉ង់បានទទូចថាសហរដ្ឋអាមេរិក "ពុំបានទទួលសមិទ្ធផលអ្វីឡើយ" ពីការវាយប្រហារលើរោងចក្រនុយក្លេអ៊ែររបស់ខ្លួន នៅក្នុងសុន្ទរកថាសាធារណៈលើកដំបូងរបស់លោកចាប់តាំងពីបទឈប់បាញ់ជាមួយអ៊ីស្រាអែលត្រូវបានព្រមព្រៀងកាលពីថ្ងៃអង្គារសប្ដាហ៍នេះ។លោក Ayatollah Ali Khamenei បាននិយាយថា ការវាយប្រហារនេះមិន "សម្រេចបាននូវអ្វីដែលសំខាន់" ដើម្បីរំខានដល់កម្មវិធីនុយក្លេអ៊ែររបស់អ៊ីរ៉ង់ឡើយ ហើយបានពណ៌នាការសងសឹកប្រឆាំងនឹងមូលដ្ឋានទ័ពអាកាសអាមេរិកក្នុងប្រទេសកាតាថា ជាការដោះស្រាយការវាយប្រហារយ៉ាងធ្ងន់ធ្ងរ។ការអះអាងរបស់លោកបានកើតឡើងស្របពេលក្រុងវ៉ាស៊ីនតោនបានបញ្ជាក់លើការវាយតម្លៃរបស់ខ្លួនថា ការវាយប្រហារនេះបានធ្វើឱ្យខូចដល់មហិច្ឆតានុយក្លេអ៊ែររបស់អ៊ីរ៉ង់យ៉ាងធ្ងន់ធ្ងរ។រដ្ឋមន្ត្រីការពារជាតិអាមេរិក លោក Pete Hegseth បាននិយាយថា ចារកម្មដែលប្រមូលបានដោយសហរដ្ឋអាមេរិក និងអ៊ីស្រាអែល បង្ហាញពីប្រតិបត្តិការនេះថាបានធ្វើឱ្យខូចខាតធ្ងន់ធ្ងរដល់កម្មវិធីនុយក្លេអ៊ែរ ដែលជាការដើរថយក្រោយច្រើនទសវត្សរ៍។កន្លងមក ប្រធានាធិបតីអាមេរិក លោក Donald Trump បាននិយាយថា ការវាយប្រហារប្រឆាំងនឹងទីតាំងនុយក្លេអ៊ែរសំខាន់ៗចំនួនបី នៅក្នុងប្រទេសអ៊ីរ៉ង់ "បានលុបបំបាត់ចោលទាំងស្រុង" ហើយបានឆ្លើយតបយ៉ាងខឹងសម្បារចំពោះរបាយការណ៍ដែលលើកឡើងពីសំណាក់ក្រុមមន្ត្រីអាមេរិក ដែលមិនបញ្ចេញឈ្មោះ ថា ការខូចខាតអាចមានទំហំតូចជាងការរំពឹងទុក៕

ជនជាតិប៉ាឡេស្ទីនជាង៥៤០នាក់ ត្រូវបានសម្លាប់ក្នុងពេល១ខែពេលស្វែងរកជំនួយពីកន្លែងចែកចាយរបស់អាមេរិក និងអ៊ីស្រាអែល

ដោយយោងតាមការិយាល័យប្រព័ន្ធផ្សព្វផ្សាយរបស់រដ្ឋាភិបាលហ្កាហ្សា សារព័ត៌មាន Al Jazeera រាយការណ៍ថា មានជនជាតិប៉ាឡេស្ទីនយ៉ាងហោចណាស់៥៤៩ នាក់ត្រូវបានសម្លាប់ដោយសារតែព្យាយាមទទួលបានជំនួយចាប់តាំងពីមូលនិធិមនុស្សធម៌ហ្កាហ្សា គាំទ្រដោយសហរដ្ឋអាមេរិក និងអ៊ីស្រាអែលបានចាប់ផ្តើមប្រតិបត្តិការកាលពី ៤ សប្តាហ៍មុន ។ ប្រភពវេជ្ជសាស្ត្របានប្រាប់សារព័ត៌មាន Al Jazeera ថា ការវាយប្រហាររបស់អ៊ីស្រាអែលបានសម្លាប់មនុស្សជាង៩០នាក់នៅតំបន់ហ្កាហ្សាស្ទ្រីបចាប់តាំងពីព្រឹកព្រលឹមពុធសប្ដាហ៍នេះ រួមទាំងជនជាតិប៉ាឡេស្ទីន ១៤ នាក់ដែលកំពុងរង់ចាំនៅជិតមជ្ឈមណ្ឌលចែកចាយជំនួយ។ប្រភពនានាពីមន្ទីរពេទ្យក្នុងដែនដីហ្កាហ្សា បានប្រាប់សារព័ត៌មាន Al Jazeera ថាមនុស្សយ៉ាងហោចណាស់៧១នាក់ត្រូវបានស្លាប់ក្នុងការវាយប្រហាររបស់កងកម្លាំងអ៊ីស្រាអែលទូទាំងដែនដីហែកហួរដោយសង្គ្រាមមួយនេះក្នុងពេល២៤ម៉ោងកន្លងទៅ។ ក្រុមអាជ្ញាធរហ្កាហ្សាបាននិយាយក្នុងសេចក្តីថ្លែងការណ៍មួយថា ការវាយប្រហារដែលគេហៅថាជា “អន្ទាក់មរណៈ” ក៏បានបណ្តាលឱ្យមនុស្សចំនួន៤.០៦៦នាក់រងរបួស និងបានបណ្តាលឱ្យមនុស្ស៣៩នាក់បាត់ខ្លួនផងដែរ ក្នុងចំណោមជនស៊ីវិលប៉ាឡេស្ទីនដែលកំពុងស្រេកឃ្លាន។គ្រប់យ៉ាងដែលកំពុងកើតឡើងនូវអ្វីគេហៅថា 'មជ្ឈមណ្ឌល' ទាំងនេះ បង្កើតជាឧក្រិដ្ឋកម្មសង្គ្រាមពេញទំហឹង ដែលអ៊ីស្រាអែល ត្រូវទទួលខុសត្រូវជាចម្បង និងដោយផ្ទាល់។ពួកគេថ្កោលទោសយ៉ាងដាច់អហង្កាចំពោះឧក្រិដ្ឋកម្មកំពុងបន្តនេះ ក្នុងនោះជនស៊ីវិលដែលស្រេកឃ្លានត្រូវបានបោកបញ្ឆោត ហើយបន្ទាប់មកត្រូវបានគេបាញ់សម្លាប់ជាប្រព័ន្ធ និងដោយចេតនាជារៀងរាល់ថ្ងៃ តាមកាលវិភាគដែលបានកំណត់ទុកជាមុន។ ការិយាល័យប្រព័ន្ធផ្សព្វផ្សាយរដ្ឋាភិបាលរបស់ហ្កាហ្សាបានបន្ថែមថា របបកាន់កាប់របស់អ៊ីស្រាអែល កំពុងប្រើប្រាស់អាហារជាអាវុធនៃការសម្លាប់រង្គាល ដោយបង្វែរអ្វីដែលខ្លួនអះអាងថាជា "ជំនួយ" ទៅជាឧបករណ៍នៃការសម្លាប់រង្គាល និងការត្រួតត្រា៕

បណ្ដាញសង្គម

ព័ត៌មានថ្មីៗ

ក្រសួងអភិវឌ្ឍន៍ចាត់ទុកការថែទាំផ្លូវជនបទជាការចាំបាច់ ដើម្បីលើកកម្ពស់ការរស់នៅរបស់ប្រជាជន

មនុស្សយ៉ាងតិច ១២នាក់ ស្លាប់ ខណៈច្រើននាក់នៅតែជាប់ក្នុងនោះ ក្នុងហេតុការណ៍ផ្ទុះរោងចក្រគីមី នៅឥណ្ឌា

អបអរសាទរ បងប្អូនពលករខ្មែរដែលទើបមកពីប្រទេសថៃចំនួន ៨៣នាក់ បានទទួលការងារភ្លាមៗនៅក្នុងខេត្តកោះកុង

រុស្ស៊ី៖ ការចំណាយលើវិស័យការពារជាតិរបស់អង្គការណាតូ មានហានិភ័យនាំឲ្យសម្ព័ន្ធភាពដួលរលំ

អ៊ីរ៉ង់៖ ខ្លួនមិនអាចធានាសុវត្ថិភាពឲ្យមន្ត្រីត្រួតពិនិត្យពី IAEA បានទេ ហើយផ្អាកកិច្ចសហប្រតិបត្តិការ

រដ្ឋមន្ត្រីការបរទេស៖ អ៊ីស្រាអែល «ចង់» ធ្វើឲ្យមានប្រក្រតីភាពនូវទំនាក់ទំនងជាមួយស៊ីរី និងលីបង់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877