BTV NEWS

អគាររងការទម្លាក់គ្រាប់បែករបស់អ៊ីស្រាអែលនៅហ្កាហ្សាក្លាយជាជម្រកភៀសខ្លួនសម្រាប់ជនប៉ាឡេស្ទីន

ជប៉ុននឹងធ្វើតេស្តភក់រ៉ែកម្រលើកចេញពីបាតសមុទ្រជ្រៅនៅដើមឆ្នាំ ២០២៦ខាងមុខ

ពលរដ្ឋស៊ីរីជាគ្រិស្តបរិស័ទវិលត្រឡប់មកផ្ទះរបស់ពួកគេវិញនៅខេត្ត Idlib បន្ទាប់ពីជម្លៀសខ្លួនច្រើនឆ្នាំ

ពពកកង្វក់បរិយាកាសគ្របដណ្តប់ពីលើក្រុង Pljevlja របស់ប្រទេសម៉ុនតេណេហ្គ្រូ បង្ខំឲ្យពលរដ្ឋមិនហ៊ានចេញក្រៅ

ព័ត៌មានអន្តរជាតិ

អាមេរិកបដិសេធមិនផ្តល់ទិដ្ឋាការដល់មន្ត្រីបោះឆ្នោតហុងឌូរ៉ាស អំឡុងមានភាពវឹកវរនៃការបោះឆ្នោត

រដ្ឋមន្ត្រីការបរទេសអាមេរិក លោក Marco Rubio បាននិយាយកាលពីថ្ងៃសុក្រនេះ (ទី២០ ខែធ្នូ) ថា ក្រសួងការបរទេស បានបដិសេធសំណើសុំទិដ្ឋាការរបស់លោក Marlon Ochoa ដែលជាសមាជិកក្រុមប្រឹក្សាបោះឆ្នោតជាតិហុងឌូរ៉ាស ហើយបានលុបទិដ្ឋាការរបស់លោក Mario Morazan ប្រធានតុលាការបោះឆ្នោតរបស់ប្រទេសហុងឌូរ៉ាស។ការបោះឆ្នោតប្រធានាធិបតីហុងឌូរ៉ាស បានធ្វើឡើងកាលពីថ្ងៃទី៣០ ខែវិច្ឆិកា ប៉ុន្តែកន្លងទៅជិត ៣សប្តាហ៍ហើយ នៅតែមិនទាន់មានភាពច្បាស់លាស់ថា តើបេក្ខជនគណបក្សនយោបាយរូបណា នឹងក្លាយជាប្រធានាធិបតីបន្ទាប់របស់ប្រទេស។ ការបោះឆ្នោតដ៏ច្របូកច្របល់ ត្រូវបានរំខានដោយដំណើរការរាប់សន្លឹកឆ្នោតមិនសូវល្អ ការចោទប្រកាន់ពីការក្លែងបន្លំ និងអន្តរាគមន៍របស់សហរដ្ឋអាមេរិក។ លោក Rubio បានលើកឡើងនៅក្នុងសេចក្តីថ្លែងការណ៍មួយថា៖ «ក្រសួងបានបដិសេធការស្នើសុំទិដ្ឋាការរបស់លោក Marlon Ochoa ហើយបានចាត់វិធានការរឹតបន្តឹងទិដ្ឋាការលើបុគ្គលផ្សេងទៀត ដោយសារការបំផ្លាញលទ្ធិប្រជាធិបតេយ្យ នៅក្នុងប្រទេសហុងឌូរ៉ាស»។ លោកបានបន្ថែមថា៖ «យើងនឹងពិចារណាវិធានការសមស្របទាំងអស់ ដើម្បីរារាំងអ្នកដែលធ្វើជាឧបសគ្គដល់ការរាប់សន្លឹកឆ្នោត នៅក្នុងប្រទេសហុងឌូរ៉ាស»។លោក Ochoa និងលោក Morazan មិនបានឆ្លើយតបភ្លាមៗឡើយ ចំពោះសំណើសុំការអត្ថាធិប្បាយរបស់សារព័ត៌មាន Reuters។ ប៉ុន្មានសប្តាហ៍មុនការបោះឆ្នោតប្រធានាធិបតីកាលពីថ្ងៃទី៣០ ខែវិច្ឆិកា លោក Ochoa បាននិយាយថា ការត្រួតពិនិត្យសាកល្បង បានបង្ហាញពីគុណវិបត្តិយ៉ាងខ្លាំងនៅក្នុងប្រព័ន្ធរាប់សន្លឹកឆ្នោត ពោលគឺមានតែការអនុវត្តរាប់សន្លឹកឆ្នោត ៣៦ភាគរយប៉ុណ្ណោះដែលដំណើរការបានល្អ។ការរាប់ដោយដៃអាចផ្លាស់ប្តូរបានយ៉ាងងាយស្រួលនូវលទ្ធផលនៃការបោះឆ្នោតបឋម ដែលបានឃើញថា បេក្ខជនអភិរក្សនិយម លោក Nasry Asfura របស់គណបក្សជាតិ (National Party) បាននាំមុខជាមួយនឹងសំឡេងស្ដួចស្ដើងចំនួន ៤៣.០០០សំឡេង ក្នុងចំណោមសន្លឹកឆ្នោតជាង ៣លានសន្លឹក លើបេក្ខជនក្រុមឆ្វេង-ស្ដាំនិយម គឺគណបក្សសេរីនិយម (Liberal Party) លោក Salvador Nasralla។ក្រុមប្រឹក្សាមានរយៈពេលរហូតដល់ថ្ងៃទី៣០ ខែធ្នូ ដើម្បីប្រកាសអ្នកឈ្នះការបោះឆ្នោត ដែលនឹងត្រូវចូលកាន់តំណែងនៅចុងខែមករា សម្រាប់អាណត្តិ ៤ឆ្នាំ៕

UN៖ ប៊ូរុនឌីពិបាកដោះស្រាយ ខណៈមនុស្សរាប់ម៉ឺននាក់ ភៀសខ្លួនចេញពីអំពើហិង្សាកុងហ្គោ

ទីភ្នាក់ងារជនភៀសខ្លួនរបស់អង្គការសហប្រជាជាតិ (UN) កាលពីថ្ងៃសុក្រ (ទី១៩ ខែធ្នូ) បានឲ្យដឹងថា ជម្លោះនៅប្រទេសកុងហ្គោ បានធ្វើឲ្យមានជនភៀសសឹកជាង ៨៤.០០០នាក់ ចូលទៅក្នុងប្រទេសជិតខាងប៊ូរុនឌី ក្នុងខែនេះ ជាការចូលទៅយ៉ាងគំហុកក្នុងចំនួនដ៏ច្រើនជាលើកទី២ នៅឆ្នាំនេះ ដែលជាកម្រិតហួសពីសមត្ថភាពឆ្លើយតបរបស់ប្រទេសនេះ។កិច្ចព្រមព្រៀងសន្តិភាពដែលសម្របសម្រួលដោយសហរដ្ឋអាមេរិក ត្រូវបានចុះហត្ថលេខាកាលពីខែមិថុនា រវាងសាធារណរដ្ឋប្រជាធិបតេយ្យកុងហ្គោ និងរ៉្វាន់ដា ប៉ុន្តែការប្រយុទ្ធគ្នា រវាងក្រុមឧទ្ទាម M23 ដែលគាំទ្រដោយរ៉្វាន់ដា និងកងទ័ពកុងហ្គោ បានបន្តមាននៅជុំវិញទីក្រុង Uvira ភាគខាងកើត។ រ៉្វាន់ដាតែងតែបដិសេធជានិច្ចថា មិនបានគាំទ្រក្រុម M23 ឡើយ ហើយបានដាក់ការទទួលខុសត្រូវទៅលើកងកម្លាំងកុងហ្គោ និងប៊ូរុនឌី សម្រាប់ការប្រយុទ្ធគ្នាជាថ្មី។ របាយការណ៍មួយរបស់ក្រុមអ្នកជំនាញរបស់ UN កាលពីខែកក្កដា បានវាយតម្លៃថា ប្រទេសរ៉្វាន់ដាបានអនុវត្តការបញ្ជា និងការគ្រប់គ្រងលើក្រុមឧទ្ទាម M23។តាមរយៈសេចក្តីថ្លែងការណ៍មួយ UNHCR (ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន) បានឲ្យដឹងថា៖ «មនុស្សរាប់ពាន់នាក់ដែលឆ្លងព្រំដែនដោយថ្មើរជើង និងតាមទូកជារៀងរាល់ថ្ងៃ បានមានកម្រិតលើសធនធានឆ្លើយតបក្នុងស្រុក ដោយបង្កើតឲ្យមានគ្រោះអាសន្នមនុស្សធម៌ដ៏ធំដែលទាមទារឲ្យមានការគាំទ្រជាសកលជាបន្ទាន់»។ នៅទីក្រុងហ្សឺណែវ ប្រទេសស្វីស តំណាងរបស់ UNHCR លោកស្រី Brigitte Mukanga-eno បានប្រាប់អ្នកសារព័ត៌មានថា ទូកដែលពេញទៅដោយជនភៀសខ្លួន កំពុងទៅដល់ជារៀងរាល់ថ្ងៃឆ្លងកាត់បឹង Tanganyika ពីតំបន់ South Kivu ដែលរងប៉ះពាល់ នៅជុំវិញទីក្រុង Uvira ទោះបីជាមានការសន្យាដកកងកម្លាំងពីសំណាក់ក្រុម M23 ក៏ដោយ។ UNHCR បានឲ្យដឹងថា កាលពីដើមឆ្នាំនេះ ជម្លោះដូចគ្នា នៅក្នុងប្រទេសកុងហ្គោ បានជំរុញឲ្យមនុស្ស ៧០.០០០នាក់រត់ភៀសខ្លួនទៅប៊ូរុនឌី ជាអ្វីដែលនាពេលនោះ គឺជាចូលយ៉ាងគំហុកដ៏ច្រើនបំផុត ក្នុងរយៈពេលជាច្រើនទសវត្សរ៍ ហើយមានតែពាក់កណ្តាលនៃពួកគេប៉ុណ្ណោះ បានត្រឡប់ទៅប្រទេសវិញ៕

បាតុករបង់ក្លាដែសទាមទារឲ្យចាប់ខ្លួនអ្នកសម្លាប់មេដឹកនាំនិស្សិត

ក្រុមបាតុករបានប្រមូលផ្តុំគ្នា នៅទូទាំងប្រទេសបង់ក្លាដែស កាលពីថ្ងៃសុក្រ (ទី១៩ ខែធ្នូ) ដែលជាថ្ងៃទី២ ជាប់គ្នា ដោយអំពាវនាវឲ្យមានការចាប់ខ្លួនខ្មាន់កាំភ្លើងដែលបានបាញ់សម្លាប់បុគ្គលដ៏សំខាន់ នៅក្នុងការបះបោរគាំទ្រលទ្ធិប្រជាធិបតេយ្យ កាលពីឆ្នាំមុន។ខណៈដែលព័ត៌មានបានផ្សព្វផ្សាយថា មេដឹកនាំនិស្សិតអាយុ ៣២ឆ្នាំ ឈ្មោះ Sharif Osman Hadi បានបាត់បង់ជីវិតហើយ នៅឯមន្ទីរពេទ្យ ក្នុងប្រទេសសិង្ហបុរី កាលពីថ្ងៃព្រហស្បតិ៍ ហ្វូងមនុស្សបាននាំគ្នាចេញមកតាមដងផ្លូវ ដើម្បីបង្ហាញការកាន់ទុក្ខ និងការមានកំហឹងយ៉ាងខ្លាំងក្លា។លោក Hadi ត្រូវបានខ្មាន់កាំភ្លើងពាក់ម៉ាស់បាញ់ប្រហារ ខណៈដែលកំពុងចាកចេញពីវិហារឥស្លាមមួយ ក្នុងរដ្ឋធានី Dhaka កាលពីសប្តាហ៍មុន។ ដំបូងឡើយ រូបលោកបានរងរបួស ហើយត្រូវបានបញ្ជូនទៅប្រទេសសិង្ហបុរី ដើម្បីព្យាបាល ប៉ុន្តែនៅទីបំផុត រូបគេក៏បានបាត់បង់ជីវិត ដោយសាររបួស។នៅទីក្រុង Dhaka កាលពីថ្ងៃសុក្រ បាតុករម្នាក់ឈ្មោះ Sajid Al Adeeb បានប្រាប់សារព័ត៌មានថា៖ «មនុស្សបានប្រមូលផ្តុំគ្នានៅទីនេះទាមទារឲ្យមានការចាប់ខ្លួនអ្នកដែលបានសម្លាប់លោក Hadi ជាបន្ទាន់»។ការតវ៉ាក៏ត្រូវបានធ្វើឡើងផងដែរ នៅក្នុងទីក្រុង Gazipur, Sylhet និង Chattogram នៅថ្ងៃសុក្រនោះ។ ប្រធានសិទ្ធិមនុស្សរបស់អង្គការសហប្រជាជាតិ លោក Volker Turk បានឲ្យដឹងនៅក្នុងសេចក្តីថ្លែងការណ៍មួយកាលពីថ្ងៃសុក្រថា «លោកមានការព្រួយបារម្ភយ៉ាងខ្លាំង» ចំពោះការសម្លាប់លោក Hadi នេះ៕

អឺរ៉ុបចូលរួមជាមួយក្រុមអាមេរិក និងអ៊ុយក្រែន នៅឯកិច្ចពិភាក្សា ក្នុងទីក្រុង Miami

សម្ព័ន្ធមិត្តអ៊ឺរ៉ុបរបស់អ៊ុយក្រែន កំពុងចូលរួមក្នុងការចរចាជុំថ្មី នៅសហរដ្ឋអាមេរិក កាលពីថ្ងៃសុក្រ (ទី១៩ ខែធ្នូ) ខណៈដែលប្រធានាធិបតី Donald Trump ជំរុញផែនការ ដើម្បីបញ្ចប់ការឈ្លានពានរបស់រុស្ស៊ីដែលមានរយៈពេលជិត ៤ឆ្នាំហើយ។បេសកជនសកលរបស់លោក Trump លោក Steve Witkoff និងកូនប្រសារបស់មេដឹកនាំអាមេរិក គឺលោក Jared Kushner កំពុងធ្វើជាម្ចាស់ផ្ទះកិច្ចចរចានេះ នៅទីក្រុង Miami ដែលរួមមានអ្នកចរចាជាន់ខ្ពស់របស់អ៊ុយក្រែន គឺលោក Rustem Umerov អង់គ្លេស បារាំង និងអាល្លឺម៉ង់ផងដែរ។មន្ត្រីអាមេរិក បាននិងកំពុងធ្វើដំណើរ ជុំវិញពិភពលោក ដើម្បីប្រឹងប្រែងធ្វើឲ្យរលូននូវសេចក្ដីលម្អិតនៃផែនការមួយ ដែលជាក្តីសង្ឃឹមនៃការដោះស្រាយសង្គ្រាមដ៏ធំបំផុតរបស់អឺរ៉ុបជាលើកដំបូង ក្នុងរយៈពេលជាច្រើនទសវត្សរ៍។ រដ្ឋមន្ត្រីការបរទេសអាមេរិក លោក Marco Rubio បាននិយាយកាលពីថ្ងៃសុក្រថា ទីក្រុងវ៉ាស៊ីនតោន នឹងមិនបង្ខំឲ្យឈានដល់កិច្ចព្រមព្រៀងនោះទេ ដោយប្រាប់អ្នកសារព័ត៌មានថា «ការនិទានរឿង ដែលថា យើងកំពុងព្យាយាមដាក់សម្ពាធលើអ៊ុយក្រែន គឺជាការនិយាយដោយមិនពិចារណាអ្វីសោះ»។ មន្ត្រីរុស្ស៊ី ដែលតាមសេចក្តីរាយការណ៍ រួមមានអ្នកចរចារបស់វិមានក្រឹមឡាំង លោក Kirill Dmitriev និងមន្ត្រីអាមេរិក ត្រូវបានគេរំពឹងថា នឹងជួបប្រជុំដាច់ដោយឡែកពីគ្នា នៅរដ្ឋ Florida នាចុងសប្តាហ៍នេះ ខណៈដែលកិច្ចប្រឹងប្រែងការទូតដ៏ខ្លាំងក្លានៅតែបន្តមាន។លោក Umerov បានឲ្យដឹងនៅលើបណ្ដាញសង្គមថា លោក និងលោក Andriy Gnatov ដែលជាប្រធានបុគ្គលិកនៃកងកម្លាំងប្រដាប់អាវុធអ៊ុយក្រែន «នឹងចាប់ផ្តើមការពិគ្រោះយោបល់មួយផ្សេងទៀតជាមួយភាគីអាមេរិក» នៅទីក្រុង Miami។ ហើយលោកបានបន្ថែមថា៖ «តាមការអញ្ជើញរបស់ភាគីអាមេរិក ដៃគូអឺរ៉ុបក៏ចូលរួមនៅក្នុងទម្រង់នេះផងដែរ»។មន្ត្រីសេតវិមានបានប្រាប់បណ្ដាញសារព័ត៌មានថា លោក Witkoff និង Kushner «កំពុងជួបជាមួយលោក Umerov ក៏ដូចជាទីប្រឹក្សាសន្តិសុខជាតិមកពីចក្រភពអង់គ្លេស បារាំង និងអាល្លឺម៉ង់ នាពេលព្រឹក»៕

ចិននឹងបង្កើនការហ្វឹកហ្វឺន ហើយគំរាមចាត់វិធានការតឹងរ៉ឹង ជុំវិញកញ្ចប់លក់អាវុធរបស់អាមេរិកទៅកោះតៃវ៉ាន់

យោធារបស់ប្រទេសចិន នឹងបង្កើនការហ្វឹកហ្វឺន និង «ចាត់វិធានការយ៉ាងតឹងរ៉ឹង» ដើម្បីការពារអធិបតេយ្យភាព និងបូរណភាពដែនដីរបស់ប្រទេស ជាការឆ្លើយតបទៅនឹងកញ្ចប់លក់សព្វាវុធរបស់សហរដ្ឋអាមេរិកដែលបានគ្រោងទុកចំនួន ១១,១ពាន់លានដុល្លារ ទៅឲ្យកោះតៃវ៉ាន់។ នេះបើតាមការឲ្យដឹងពីក្រសួងការពារជាតិចិន កាលពីថ្ងៃសុក្រ (ទី១៩ ខែធ្នូ)។កញ្ចប់ ដែលជាកម្រិតដ៏ធំបំផុតរបស់សហរដ្ឋអាមេរិក ក្នុងការលក់អាវុធទៅឲ្យកោះដែលទីក្រុងប៉េកាំងចាត់ទុកជាដែនដីរបស់ខ្លួន កើតឡើងនៅពេលដែលប្រទេសចិន បាននិងកំពុងបង្កើនសម្ពាធផ្នែកយោធា និងនយោបាយលើកោះតៃវ៉ាន់។ ក្រសួងបានឲ្យដឹងថា ខ្លួនបានដាក់ «ការតវ៉ាយ៉ាងខ្លាំង» ជាមួយសហរដ្ឋអាមេរិក ហើយបានជំរុញឲ្យប្រទេសនេះបញ្ឈប់ការលក់អាវុធឲ្យទៅកោះតៃវ៉ាន់ជាបន្ទាន់ និងគោរពតាមការប្តេជ្ញាចិត្តរបស់ខ្លួនមិនគាំទ្រ «កងកម្លាំងចង់បានឯករាជ្យរបស់កោះតៃវ៉ាន់»។ សេចក្តីថ្លែងការណ៍របស់ក្រសួងបានបញ្ជាក់ថា «កងកម្លាំងបំបែកខ្លួន ដើម្បីឯករាជ្យរបស់កោះតៃវ៉ាន់» ដោយមិនខ្វល់ពីសុវត្ថិភាព និងសុខុមាលភាពរបស់ជនរួមជាតិតៃវ៉ាន់ ប្រើប្រាស់ប្រាក់ដែលរកបានដោយលំបាករបស់ប្រជាជនសាមញ្ញ ដើម្បីយកទៅឲ្យឈ្មួញលក់អាវុធរបស់សហរដ្ឋអាមេរិក ជាការប៉ុនប៉ង «ស្វែងរកឯករាជ្យដោយពឹងផ្អែកលើកម្លាំងយោធា»។ក្រសួងបានបន្ថែមថា សហរដ្ឋអាមេរិក ដោយបានរំលោភលើការប្ដេជ្ញាចិត្តម្តងហើយម្តងទៀត ហើយគាំទ្រការចង់បានឯករាជ្យរបស់កោះតៃវ៉ាន់ នឹងប្រឈមជាមួយផលវិបាកជាមិនខាន។ ក្រសួងបានសង្កត់ធ្ងន់ថា៖ «កងទ័ពរំដោះប្រជាជនចិន នឹងបន្តពង្រឹងការហ្វឹកហ្វឺន និងការត្រៀមខ្លួនប្រយុទ្ធ ចាត់វិធានការខ្លាំងក្លា ដើម្បីការពារអធិបតេយ្យភាពជាតិ និងបូរណភាពដែនដី ហើយបញ្ឈប់ទាំងស្រុងនូវការប៉ុនប៉ងបំបែកខ្លួន ដើម្បីឯករាជ្យរបស់កោះតៃវ៉ាន់ និងការជ្រៀតជ្រែកពីខាងក្រៅ»។យ៉ាងណាក្ដី ក្រសួងមិនបានបញ្ជាក់ឲ្យបានលម្អិតថា តើវិធានការអ្វី ដែលទីក្រុងប៉េកាំងនឹងមាននោះទេ។ កាលពីថ្ងៃព្រហស្បតិ៍ ប្រធានាធិបតីអាមេរិក លោក Donald Trump បានចុះហត្ថលេខាលើច្បាប់ឲ្យក្លាយជាច្បាប់ជាធរមាន សម្រាប់សេចក្ដីស្នើច្បាប់ការពារជាតិប្រចាំឆ្នាំមានទឹកប្រាក់ជិត ១សែនកោដិដុល្លារ ដែលផ្តល់មូលនិធិពេញលេញដល់គំនិតផ្តួចផ្តើមកិច្ចសហប្រតិបត្តិការសន្តិសុខកោះតៃវ៉ាន់ ១ពាន់លានដុល្លារ និងអនុញ្ញាតឲ្យផ្តល់មូលនិធិ សម្រាប់កងកម្លាំងសហរដ្ឋអាមេរិក ដើម្បីបន្តការបណ្តុះបណ្តាល សម្រាប់កោះតៃវ៉ាន់៕

ការវាយប្រហាររបស់អ៊ីស្រាអែល លើជម្រកសាលារៀន នៅហ្កាហ្សា សម្លាប់ជនជាតិប៉ាឡេស្ទីន ៥នាក់

លោក Mohamed Abu Selmia ប្រធានមន្ទីរពេទ្យ Al Shifa ក្នុងទីក្រុងហ្កាហ្សា លោក Mohamed Abu Selmia បានប្រាប់សារព័ត៌មាន Reuters កាលពីថ្ងៃសុក្រ (ទី១៩ ខែធ្នូ) ថា ជនជាតិប៉ាឡេស្ទីន ៥នាក់យ៉ាងតិច ត្រូវបានសម្លាប់ អំឡុងការវាយប្រហាររបស់អ៊ីស្រាអែលលើសាលារៀនមួយកន្លែង ដែលផ្តល់ជម្រកដល់ជនភៀសខ្លួន នៅក្នុងសង្កាត់ Al-Tuffah ភាគខាងកើតនៃទីក្រុងហ្កាហ្សា។សេវាសង្គ្រោះបន្ទាន់ស៊ីវិលប៉ាឡេស្ទីន បានឲ្យដឹងនៅក្នុងសេចក្តីថ្លែងការណ៍មួយថា ភាគច្រើននៃអ្នកស្លាប់គឺជាកុមារ ហើយបានបន្ថែមថា អ្នករបួសមួយចំនួនត្រូវបានបញ្ជូនទៅមន្ទីរពេទ្យ ដើម្បីព្យាបាល។ សេវាសង្គ្រោះបន្ទាន់ស៊ីវិលនេះ បានបន្ថែមថា ពួកគេអាចត្រឹមតែយកបានសាកសព បន្ទាប់ពីការិយាល័យអង្គការសហប្រជាជាតិ សម្រាប់ការសម្របសម្រួលកិច្ចការមនុស្សធម៌ បានសម្របសម្រួលជាមួយអ៊ីស្រាអែល។ពាក់ព័ន្ធនឹងការវាយប្រហារនេះ កងកម្លាំងការពារអ៊ីស្រាអែលបានប្រាប់ឲ្យដឹងថា មានបុគ្គលគួរឲ្យសង្ស័យមួយចំនួន ត្រូវបានកំណត់អត្តសញ្ញាណ នៅក្នុងរចនាសម្ព័ន្ធទីបញ្ជាការនៅខាងក្រៅបន្ទាត់បទឈប់បាញ់ដែលត្រូវបានកំណត់ ហើយកងទ័ពរបស់ខ្លួន បានបាញ់ប្រហារពួកគេ។យោធាអ៊ីស្រាអែលបានឲ្យដឹងនៅក្នុងសេចក្តីថ្លែងការណ៍មួយថា៖ «IDF (កងកម្លាំងការពារជាតិអ៊ីស្រាអែល) ដឹងពីការអះអាង ទាក់ទងនឹងការស្លាប់ និងរបួសនៅក្នុងតំបន់នេះ ហើយព័ត៌មានលម្អិត កំពុងស្ថិតក្រោមការត្រួតពិនិត្យ»។បើយោងតាមក្រសួងសុខាភិបាល បានឲ្យដឹងថា ជាមួយនឹងចំនួនអ្នកត្រូវបានសម្លាប់ទាំង ៥នាក់នោះ ជនជាតិប៉ាឡេស្ទីនដែលត្រូវបានសម្លាប់ ដោយការបាញ់ប្រហាររបស់អ៊ីស្រាអែល បានកើនឡើងដល់ ៤០០នាក់ហើយ ចាប់តាំងពីបទឈប់បាញ់ បានចាប់ផ្តើមកើតមានកាលពីខែតុលា៕

ខ្មាន់កាំបិត សម្លាប់មនុស្ស ៣នាក់ នៅទីក្រុងតៃប៉ិ ហើយស្លាប់ពេលនគរបាលដេញតាមចាប់

មន្ត្រីលំដាប់ខ្ពស់របស់កោះតៃវ៉ាន់ បាននិយាយថា មនុស្សយ៉ាងហោចណាស់ ៣នាក់ បានបាត់បង់ជីវិត និង ៥នាក់ទៀត បានរងរបួស នៅពេលដែលអ្នកវាយប្រហារប្រដាប់ដោយកាំបិតមួយរូប បានចូលទៅលុកលុយនៅកណ្តាលទីក្រុងតៃប៉ិ កាលពីថ្ងៃសុក្រ (ទី១៩ ខែធ្នូ) មុនពេលដែលបន្ទាប់មកបានស្លាប់ ដោយសារធ្លាក់ពីលើអាគារ ក្នុងអំឡុងពេលដែលនគរបាលដេញតាមចាប់ ។មន្ត្រីអាជ្ញាធរលំដាប់ខ្ពស់ លោក Cho Jung-tai បាននិយាយថា បុរជាជនបង្កហេតុនោះ បានបោះគ្រាប់បែកផ្សែង នៅស្ថានីយរថភ្លើងដ៏សំខាន់របស់ទីក្រុងតៃប៉ិ ហើយបន្ទាប់មកបានរត់ចូលទៅស្ថានីយរថភ្លើងក្រោមដីនៅក្បែរនោះ ក្នុងតំបន់ទិញទំនិញដ៏មមាញឹក ដោយបានដេញវាយប្រហារមនុស្សម្នានៅតាមផ្លូវ។ លោក Cho បានប្រាប់អ្នកសារព័ត៌មានថា ជនជាប់សង្ស័យដែលស្លាប់ហើយនោះ មានប្រវត្តិប្រព្រឹត្តឧក្រិដ្ឋកម្មពីមុន និងមានដីកាតាមចាប់ខ្លួននៅឡើយ ហើយផ្ទះរបស់គេ ត្រូវបានឆែកឆេរ។ ដោយកំណត់អត្តសញ្ញាណបុរសនេះត្រឹមនាមត្រកូល Change លោកបានបន្ថែមថា៖ «យើងនឹងស៊ើបអង្កេតប្រវត្តិររបស់ជននេះ និងទំនាក់ទំនងដែលពាក់ព័ន្ធ ដើម្បីស្វែងយល់ពីហេតុផលជំរុញចិត្ត និងកំណត់ថា តើមានកត្តាពាក់ព័ន្ធផ្សេងទៀត ដែរឬទេ»។ គួរបញ្ជាក់ថា ឧក្រិដ្ឋកម្មហិង្សា គឺកម្រកើតមានណាស់ នៅកោះតៃវ៉ាន់។

ក្រុមមន្ត្រី៖ អាមេរិកអនុវត្តការវាយប្រហារសងសឹកទ្រង់ទ្រាយធំ ប្រឆាំងនឹងក្រុម ISIS នៅស៊ីរី

មន្ត្រីអាមេរិក បានប្រាប់ឲ្យដឹងថា យោធាអាមេរិក កាលពីថ្ងៃសុក្រ (ទី១៩ ខែធ្នូ) បានបើកការវាយប្រហារតាមអាកាសប្រឆាំងនឹងគោលដៅរបស់ក្រុមរដ្ឋឥស្លាមរាប់សិបកន្លែង នៅប្រទេសស៊ីរី ដើម្បីជាការសងសឹកចំពោះការវាយប្រហារលើបុគ្គលិកអាមេរិក។លោកប្រធានាធិបតី Donald Trump បានប្តេជ្ញាសងសឹក បន្ទាប់ពីមានការវាយប្រហារលើបុគ្គលិកអាមេរិកកាលពីចុងសប្តាហ៍កន្លងទៅ នៅស៊ីរី ដោយសង្ស័យថា ជាស្នាដៃរបស់សមាជិករដ្ឋឥស្លាម។ លោក Trump បាននិយាយកាលពីថ្ងៃទី១៩ ខែធ្នូថា យោធាអាមេរិក បានបើក «ការសងសឹកយ៉ាងធ្ងន់ធ្ងរ» ប្រឆាំងនឹងក្រុមរដ្ឋឥស្លាម នៅស៊ីរី បន្ទាប់ពីមានការវាយប្រហារដែលបានសម្លាប់ជនជាតិអាមេរិក ៣នាក់។លោកបានសរសេរលើបណ្ដាញសង្គម Truth Social ថា៖ «យើងកំពុងវាយប្រហារយ៉ាងខ្លាំងក្លា ប្រឆាំងនឹងទីតាំងរបស់ ISIS (រដ្ឋឥស្លាម) នៅក្នុងប្រទេសស៊ីរី ជាកន្លែងដាបដោយឈាមដែលមានបញ្ហាជាច្រើន ប៉ុន្តែជាកន្លែងមួយដែលមានអនាគតដ៏ភ្លឺស្វាង ប្រសិនបើ ISIS អាចត្រូវបានកម្ចាត់»។រដ្ឋមន្ត្រីក្រសួងការពារជាតិអាមេរិក លោក Pete Hegseth បានបញ្ជាក់អះអាងថា ការវាយប្រហារនេះ សំដៅទៅលើ «អ្នកប្រយុទ្ធ ហេដ្ឋារចនាសម្ព័ន្ធ និងទីតាំងអាវុធរបស់ក្រុម ISIS»។ ហើយមន្ត្រីអាមេរិក ២នាក់ ដែលនិយាយក្នុងលក្ខខណ្ឌមិនបញ្ចេញឈ្មោះ បានឲ្យដឹងថា ការវាយប្រហារនេះ គឺប្រឆាំងនឹងគោលដៅរបស់ក្រុមរដ្ឋឥស្លាមរាប់សិប នៅទូទាំងភាគកណ្តាលនៃប្រទេសស៊ីរី។បើយោងតាមយោធាអាមេរិក បានឲ្យដឹងថា ទាហានអាមេរិក ២នាក់ និងអ្នកបកប្រែជនស៊ីវិលម្នាក់ ត្រូវបានសម្លាប់ កាលពីថ្ងៃទី១៣ ខែធ្នូ នៅក្នុងទីក្រុង Palmyra ភាគកណ្តាលស៊ីរី ដោយអ្នកវាយប្រហារម្នាក់បានកំណត់គោលដៅលើក្បួនរថយន្តរបស់កងកម្លាំងអាមេរិក និងស៊ីរី មុនពេលត្រូវបានបាញ់សម្លាប់។ ទាហានអាមេរិក ៣នាក់ផ្សេងទៀតក៏បានរងរបួសផងដែរ អំឡុងការវាយប្រហារនោះ៕

លោក Trump មិនច្រានចោលលទ្ធភាពមានសង្គ្រាមជាមួយវ៉េណេស៊ុយអេឡា

ប្រធានាធិបតីអាមេរិក លោក Donald Trump បានបើកចំហនូវលទ្ធភាពមានសង្រ្គាមជាមួយវ៉េណេស៊ុយអេឡា ខណៈដែលអ្នកការទូតជាន់ខ្ពស់របស់លោក Marco Rubio កាលពីថ្ងៃសុក្រ (ទី១៩ ខែធ្នូ) បានប្តេជ្ញាអនុវត្តការបិទផ្លូវលើប្រភពចំណូលពីធនានប្រេងរបស់ប្រទេសនេះ។នៅពេលត្រូវបានសួរនៅក្នុងបទសម្ភាសន៍ជាមួយប្រព័ន្ធផ្សព្វផ្សាយ NBC News ដែលបានធ្វើឡើងកាលពីថ្ងៃព្រហស្បតិ៍ ពាក់ព័ន្ធនឹងសង្រ្គាមជាមួយវ៉េណេស៊ុយអេឡា លោក Trump បាននិយាយថា លោកមិនច្រានចោលវាទេ»។តែយ៉ាងណាក្ដី លោក Trump បានបដិសេធមិននិយាយថា តើលោកចង់ទម្លាក់លោកប្រធានាធិបតី Nicolas Maduro ពីអំណាចដែរ ឬទេ បន្ទាប់ពីបាននិយាយនៅក្នុងបទសម្ភាសន៍នៅមុននេះថា «ពេលវេលាមិនយូរទៀតទេ» សម្រាប់អ្នកដឹកនាំឆ្វេងនិយម។ លោក Trump បានឆ្លើយបញ្ជាក់ថា៖ «គាត់ (លោក Maduro) ដឹងពីអ្វីដែលខ្ញុំចង់បាន។ គាត់ដឹងច្បាស់ជាងអ្នកណាទាំងអស់»។ក្នុងអំឡុងពេលមានសន្និសីទសារព័ត៌រយៈពេល ២ម៉ោង នៅក្រសួងការបរទេស ដែលលោកបាននិយាយទាំងជាភាសាអង់គ្លេស និងភាសាអេស្ប៉ាញ លោក Rubio ដែលត្រូវបានសួរម្តងហើយម្តងទៀត អំពីប្រទេសវ៉េណេស៊ុយអេឡា ក៏បានបដិសេធមិនឆ្លើយយ៉ាងច្បាស់លាស់ថា តើសហរដ្ឋអាមេរិកមានបំណងចង់ផ្តួលរំលំលោក Maduro ប៉ុន្តែលោកបានប្ដេជ្ញាថា នឹងបន្តចាត់វិធានការយ៉ាងខ្លាំងក្លា។កាលពីដើមសប្តាហ៍នេះ លោក Trump បានប្រកាសថា វ៉េណេស៊ុយអេឡា «ត្រូវបានហ៊ុព័ទ្ធទាំងស្រុងដោយនាវាចម្បាំងដ៏ច្រើនបំផុតមិនធ្លាប់មាន នៅក្នុងប្រវត្តិសាស្ត្រអាមេរិកខាងត្បូង" ។ លោក Trump បានប្តេជ្ញាថា សហរដ្ឋអាមេរិកនឹងបញ្ឈប់ការនាំចេញប្រេងរបស់វ៉េណេស៊ុយអេឡា ជាអ្វីដែលលោកបានពិពណ៌នាថា ជាការអនុវត្តទណ្ឌកម្មដែលដាក់ដោយសហរដ្ឋអាមេរិកជាឯកតោភាគី៕

រដ្ឋាភិបាលឥណ្ឌូនេស៊ី មានផែនការផ្តល់ប្រាក់ឧបត្ថម្ភរស់នៅប្រចាំថ្ងៃដល់គ្រួសាររងគ្រោះដោយសារទឹកជំនន់នៅកោះស៊ូម៉ាត្រា

ជនរងគ្រោះដោយសារទឹកជំនន់ស្លាប់មនុស្សនៅកោះស៊ូម៉ាត្រា ប្រទេសឥណ្ឌូនេស៊ីកាលពីពេលកន្លងទៅ អាចនឹងទទួលបានការគាំទ្រពីរដ្ឋាភិបាល រួមទាំងការឧបត្ថម្ភការរស់នៅប្រចាំថ្ងៃ ជំនួយគ្រួសារ និងប្រាក់សំណងជំងឺចិត្ត ៨៩៦ដុល្លារសម្រាប់គ្រួសារដែលមានមនុស្សស្លាប់នៅក្នុងគ្រោះមហន្តរាយដែលបានសម្លាប់មនុស្សជាង ១ពាន់នាក់ នៅតាមខេត្តចំនួន ៣ ។មកទល់នឹងថ្ងៃសុក្រនេះ ចំនួនមនុស្សស្លាប់សរុបបានកើនឡើងដល់ ១.០៦៨នាក់ ក្នុងនោះ មនុស្ស ១៩០នាក់ កំពុងបាត់ខ្លួន ហើយមនុស្ស ៧ពាន់នាក់ទៀត បានរងរបួស នៅខេត្តអាឆេ ខេត្តស៊ូម៉ាត្រាខាងលិច និងខេត្តស៊ូម៉ាត្រាខាងជើង ក្រោយព្យុះស៊ីក្លូន Senyar វាយប្រហារកោះស៊ូម៉ាត្រា កាលពីចុងខែវិច្ឆិកា ។យោងតាមការអះអាងរបស់ទីភ្នាក់ងារគ្រប់គ្រងគ្រោះមហន្តរាយជាតិឥណ្ឌូនេស៊ី បានឲ្យដឹងថា មនុស្សប្រហែល ៥៧៧.៦០០នាក់ ត្រូវបានជម្លៀសខ្លួន ហើយផ្ទះសម្បែងប្រជាពលរដ្ឋជាង ១៤៧.០០០ខ្នង ត្រូវបានបំផ្លិចបំផ្លាញ ។លោក Saifullah Yusuf គឺជារដ្ឋមន្រ្តីក្រសួងកិច្ចការសង្គមឥណ្ឌូនេស៊ី និយាយថា រដ្ឋាភិបាលរបស់លោកកំពុងគិតគូរពីគម្រោងផ្តល់ប្រាក់ឧបត្ថម្ភការរស់នៅប្រចាំថ្ងៃ សម្រាប់ជនរងគ្រោះជម្លៀសខ្លួន ។សារព័ត៌មានក្នុងស្រុក រាយការណ៍ថា រដ្ឋាភិបាលឥណ្ឌូនេស៊ី មានគម្រោងផងដែរក្នុងការផ្តល់ប្រាក់ ១៨០ដុល្លារ ដល់គ្រួសាររងផលប៉ះពាល់ ដើម្បីឲ្យពួកគេអាចទិញគ្រឿងសង្ហារឹម និងសម្ភារៈចាំបាច់ ៕

បណ្ដាញសង្គម

ព័ត៌មានថ្មីៗ

កិច្ចប្រជុំពិគ្រោះយោបល់លើកទីមួយ កម្ពុជា-បង់ក្លាដែស ផ្ដោតលើនយោបាយ និងការអភិវឌ្ឍវិស័យមួយចំនួន

សង្ខេបស្ថានការណ៍នៅតាមបន្ទាត់ព្រំដែនកម្ពុជា-ថៃ អំពីករណីយោធាថៃនៅតែបន្តការបាញ់ប្រហារ ដើម្បីឈ្លានពានមកលើដែនអធិបតេយ្យរបស់កម្ពុជានៅទិសយោធភូមិភាគទី៤ និងយោធភូមិភាគទី៥

BREAKING NEWS | ម៉ោង ២០:៣១នាទី យោធាថៃបានបាញ់គ្រាប់ភ្លេីងបំភ្លឺចំនួន ១គ្រាប់ទៀត ដែលជាគ្រាប់ទី៣ហើយ នៅភូមិសាស្ត្រសង្កាត់ផ្សាកណ្តាល ក្រុងប៉ោយប៉ែត ខេត្តបន្ទាយមានជ័យ។

អ្នកនាំពាក្យ EU ៖ អធិបតេយ្យភាពរាជាណាចក្រដាណឺម៉ាក ត្រូវតែរក្សាការពារ

ភាពតានតឹងកាន់តែខ្លាំង ពេលដែលក្រុមឧទ្ទាម M23បន្តប្រយុទ្ធនៅកុងហ្គោ បើទោះបីមានបទឈប់បាញ់ក៏ដោយ

ការឈឺចាប់គ្មានទីបញ្ចប់សម្រាប់ជនស៊ីវិលជម្លៀសខ្លួនចេញពីសង្រ្គាមស៊ូដង់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877