BTV NEWS

រដ្ឋមន្រ្តីការពារជាតិជប៉ុនលោក Koizumi ច្រានចោលការចោទប្រកាន់ពីយោធានិយមថ្មី

ប្រមុខ WHO ទទួចសុំឲ្យមានការបញ្ចុះសពដោយសុវត្ថិភាព អំឡុងធ្វើដំណើរទៅកាន់តំបន់រីករាលដាលឆ្លងជំងឺអេបូឡា

អ៊ីរ៉ង់និយាយថា កិច្ចប្រជុំជាមួយអាមេរិកកំពុងបន្ត តែពុំឈានដល់កិច្ចព្រមព្រៀងផ្តាច់ព្រ័ត្រនោះទេ

UN៖ ការប៉ះទង្គិចគ្នារវាងអ៊ីស្រាអែល-ក្រុមហេសបូឡា ធ្វើឲ្យប៉ះពាល់ការចូលដល់ជំនួយនៅភាគខាងត្បូងលីបង់

ព័ត៌មានអន្តរជាតិ

អ៊ីរ៉ង់ ត្រូវបានគេរាយការណ៍ថា កំពុងប្រើប្រាស់បទឈប់បាញ់ដើម្បីទាញយកអាវុធដែលកប់ទុក

ប្រព័ន្ធផ្សព្វផ្សាយរបស់អាមេរិកបានរាយការណ៍ថា អ៊ីរ៉ង់កំពុងប្រើប្រាស់បទឈប់បាញ់ជាមួយសហរដ្ឋអាមេរិក ដើម្បីទាញយកអាវុធដែលបានលាក់ទុកកាលពីពេលមុន ឬកប់នៅក្រោមគំនរបាក់បែកនៃការវាយប្រហារ។យោងតាមប្រព័ន្ធផ្សព្វផ្សាយ NBC News ដោយដកស្រង់សម្តីមន្ត្រីអាមេរិកម្នាក់ និងបុគ្គលពីរនាក់ផ្សេងទៀតដែលដឹងពីបញ្ហានេះថា រដ្ឋាភិបាលអ៊ីរ៉ង់ បានបង្កើនកិច្ចខិតខំប្រឹងប្រែងដើម្បីជីកកាយរកមីស៊ីល និងគ្រាប់រំសេវផ្សេងទៀតដែលត្រូវបានលាក់ទុកនៅក្រោមដី ឬកប់នៅក្នុងគំនរបាក់បែកបន្ទាប់ពីការវាយប្រហារតាមអាកាសរបស់សហរដ្ឋអាមេរិក និងអ៊ីស្រាអែល។របាយការណ៍នេះបញ្ជាក់ថា មន្ត្រីអាមេរិក ជឿថា អ៊ីរ៉ង់មានបំណងបង្កើតឡើងវិញយ៉ាងឆាប់រហ័សនូវសមត្ថភាពយានដ្រូន និងមីស៊ីលរបស់ខ្លួន ដើម្បីអាចចាប់ផ្តើមការវាយប្រហារនៅទូទាំងតំបន់មជ្ឈិមបូព៌ា ប្រសិនបើប្រធានាធិបតីសហរដ្ឋអាមេរិក លោក Donald Trump សម្រេចបន្តប្រតិបត្តិការយោធា។

ប្រេងអាមេរិកឡើងដល់៤,៣០ដុល្លារក្នុងមួយហ្គាឡុង ដោយលោក Trump និយាយថាតម្លៃនឹងធ្លាក់ចុះក្រោយសង្គ្រាមនៅអ៊ីរ៉ង់

យោងតាមសមាគមរថយន្តសហរដ្ឋអាមេរិក (AAA) បានឲ្យដឹងថា តម្លៃជាមធ្យមនៃប្រេងសាំងមួយហ្គាឡុង (៣,៨ លីត្រ) នៅសហរដ្ឋអាមេរិកបានឡើងដល់ ៤,៣០ ដុល្លារ ដែលកើនឡើងពីតិចជាង ៣ ដុល្លារមុនពេលការចាប់ផ្តើមសង្គ្រាមអាមេរិក-អ៊ីស្រាអែល លើអ៊ីរ៉ង់ នៅថ្ងៃទី ២៨ ខែកុម្ភៈ។តម្លៃកើនឡើងកាលពីថ្ងៃព្រហស្បតិ៍ ខណៈលោកប្រធានាធិបតីសហរដ្ឋអាមេរិក Donald Trump ទទូចថា ពេលវេលាគឺនៅខាងលោកក្នុងការប្រឈមមុខដាក់គ្នាជាមួយ្រទេសអ៊ីរ៉ង់ ទោះបីជាលោកបដិសេធសំណើរបស់ទីក្រុងតេអេរ៉ង់អំពីកិច្ចព្រមព្រៀងបឋមដើម្បីបើកច្រកសមុទ្រ Hormuz ឡើងវិញក៏ដោយ។យោងតាមសមាគមរថយន្តសហរដ្ឋអាមេរិក (AAA) បានឲ្យដឹងថា តម្លៃឧស្ម័ន ឬប្រេងសាំង បានកើនឡើង២៧សេនក្នុងរយៈពេលមួយសប្តាហ៍កន្លងទៅនេះ ក្នុងពេលមានភាពជាប់គាំងកាន់តែជ្រៅឡើង ដោយអ៊ីរ៉ង់ បិទច្រកសមុទ្រ ហើយសហរដ្ឋអាមេរិកបានដាក់ការហ៊ុមព័ទ្ធដោយកងទ័ពជើងទឹកនៅកំពង់ផែអ៊ីរ៉ង់។សមាគម បាននិយាយនៅក្នុងរបាយការណ៍ខ្លីមួយកាលពីថ្ងៃព្រហស្បតិ៍ថា «តម្លៃជាមធ្យមនៅក្នុងប្រទេសគឺខ្ពស់ជាង១,១២ដុល្លារកាលពីឆ្នាំមុន ខណៈតម្លៃប្រេងកើនឡើងលើសពី ១០០ ដុល្លារក្នុងមួយបារ៉ែលដោយគ្មានសញ្ញាបង្ហាញថា នៅពេលណាដែលច្រកសមុទ្រ Hormuz នឹងបើកឡើងវិញ»។តម្លៃឧស្ម័នគឺខ្ពស់បំផុតមិនធ្លាប់មានក្នុងរយៈពេលបួនឆ្នាំកន្លងទៅនេះ ចាប់តាំងពីចុងខែកក្កដា ឆ្នាំ២០២២។ រដ្ឋកាលីហ្វ័រនីញ៉ា ដែលមានប្រជាជនជិត ៤០លាននាក់រស់នៅ បានមើលឃើញថា តម្លៃប្រេងសាំងបានកើនឡើងដល់ជាង៦ដុល្លារក្នុងមួយហ្គាឡុងកាលពីថ្ងៃព្រហស្បតិ៍។

ចិនជំរុញឱ្យសហរដ្ឋអាមេរិករក្សាស្ថិរភាពក្នុងទំនាក់ទំនង ដោយព្រមានថាតៃវ៉ាន់គឺជាចំណុចហានិភ័យ

រដ្ឋមន្ត្រីការបរទេសចិនកាលពីថ្ងៃព្រហស្បតិ៍ ៣០ មេសា សប្ដាហ៍នេះ បានជំរុញឱ្យសហរដ្ឋអាមេរិករក្សាស្ថិរភាពរវាងមហាអំណាចទាំងពីរ និងបានព្រមានថាកោះតៃវ៉ាន់ បានបង្កហានិភ័យធំបំផុត ប៉ុន្មានសប្តាហ៍មុនពេលប្រធានាធិបតីអាមេរិក Donald Trump គ្រោងទៅបំពេញទស្សនកិច្ចទីក្រុងប៉េកាំង។ក្រសួងការបរទេសចិនបាននិយាយថា នៅក្នុងការសន្ទនាតាមទូរស័ព្ទជាមួយរដ្ឋមន្ត្រីការបរទេសអាមេរិកលោក Marco Rubio រដ្ឋមន្ត្រីការបរទេសចិនលោក Wang Yi បាននិយាយថា ទីក្រុងប៉េកាំង និងទីក្រុងវ៉ាស៊ីនតោនគួរតែការពារស្ថិរភាពដែលរកបានដោយលំបាក នៅក្នុងទំនាក់ទំនងចិន-អាមេរិក។ កិច្ចពិភាក្សានោះក៏បានជជែកគ្នាពីបញ្ហានៅមជ្ឈិមបូព៌ាផងដែរ ជាទីដែលចិនជាដៃគូសំខាន់របស់ទីក្រុងតេអេរ៉ង់ ប៉ុន្តែបានរក្សាគម្លាតរបស់ខ្លួនច្រើន បន្ទាប់ពីលោក Trump បានរួមដៃជាមួយអ៊ីស្រាអែលវាយប្រហារអ៊ីរ៉ង់ ដែលបណ្តាលឱ្យតម្លៃប្រេងសកលកើនឡើងយ៉ាងខ្លាំង។ មន្ត្រីក្រសួងការបរទេសអាមេរិកមួយរូបបានបញ្ជាក់ពីជំនួបតាមទូរស័ព្ទនេះ ហើយបាននិយាយថា ខ្លួនកំពុងរៀបចំដំណើរទស្សនកិច្ចរបស់លោក Trump ប៉ុន្តែពុំបានផ្តល់ព័ត៌មានលម្អិតបន្ថែមទេ។លោក Trump គ្រោងបំពេញទស្សនកិច្ចប្រទេសចិននៅថ្ងៃទី ១៤ដល់១៥ ខែឧសភាខាងមុខ ដើម្បីជួបពិភាក្សាជាមួយលោកប្រធានាធិបតី Xi Jinping ដែលជាដំណើរទស្សនកិច្ចលើកដំបូងរបស់មហាសេដ្ឋីមកពីគណបក្សសាធារណរដ្ឋរូបនេះ ទៅកាន់ប្រទេសមហាអំណាចគូប្រជែងរបស់ខ្លួន ចាប់តាំងពីលោកបានវិលត្រឡប់ទៅគ្រប់គ្រងសេតវិមានវិញកាលពីខែមករា ឆ្នាំ ២០២៥។ ក្នុងអំឡុងឆ្នាំដំបូងដែលលោក Trump វិលត្រឡប់ទៅកាន់តំណែងវិញ ទីក្រុងវ៉ាស៊ីនតោន និងទីក្រុងប៉េកាំងបានប៉ះទង្គិចគ្នាលើពាណិជ្ជកម្ម និងពន្ធរហូតដល់មានកិច្ចព្រមព្រៀងផ្អាកការដំឡើងពន្ធដាក់គ្នាត្រូវបានប្រកាសកាលពីក្នុងខែតុលាឆ្នាំមុន នៅពេលលោក Trump និងលោក Xi បានជួបគ្នានៅកូរ៉េខាងត្បូង៕

ការប្រឈមនឹងកំណើនយឺតជាសកលចេះតែកើនឡើង ខណៈសង្គ្រាមអ៊ីរ៉ង់ចូលដល់ខែទីបី

ទីផ្សារហិរញ្ញវត្ថុកំពុងមើលឃើញថាខ្លួនពិបាកមើលរំលងការខាតបង់សេដ្ឋកិច្ចដែលចេះកើនឡើងពីសង្គ្រាមអ៊ីរ៉ង់ ខណៈការបិទច្រកសមុទ្រហ័រមូសជាបន្តបន្ទាប់អូសបន្លាយការរំខានដ៏ធំបំផុតរបស់ពិភពលោកចំពោះការផ្គត់ផ្គង់ថាមពល។ រយៈពេលពីរខែក្នុងជម្លោះ សេដ្ឋកិច្ចពិភពលោកប្រឈមនឹងការប៉ះពាល់ ដែលនាំឲ្យមានកំណើនយឺត អតិផរណាខ្ពស់ និងភាពជាប់គាំង។ទោះបីជាភាគហ៊ុនបច្ចេកវិទ្យាបង្កើនភាគហ៊ុនពិភពលោកក៏ដោយ ក្រុមអ្នកវិភាគព្រមានថា ការបិទច្រកសមុទ្រហ័រមូសកាន់តែយូរ ហានិភ័យនៃវិបត្តិសេដ្ឋកិច្ចកាន់តែធំសម្រាប់តំបន់នាំចូលថាមពល។ ប្រេងបានឡើងដល់កម្រិតខ្ពស់បំផុតក្នុងរយៈពេលបួនឆ្នាំកាលពីថ្ងៃព្រហស្បតិ៍សប្ដាហ៍នេះលើសពី ១២០ ដុល្លារក្នុងមួយបារ៉ែល។លោក Mike Bell ប្រធានយុទ្ធសាស្ត្រទីផ្សារ RBC BlueBay មានមូលដ្ឋាននៅកាណាដា បាននិយាយថា លទ្ធភាពនៃឱនភាពសេដ្ឋកិច្ចនៅអឺរ៉ុប ចក្រភពអង់គ្លេស និងផ្នែកខ្លះនៃអាស៊ី គឺខ្ពស់ជាងតម្លៃផ្សារភាគហ៊ុន។ប្រេងឆៅ Brent ខ្ពស់ជាងកម្រិតមុនសង្គ្រាមដល់ទៅជាង៦៥ % ហើយបន្តកើនឡើងខណៈសង្គ្រាមអូសបន្លាយ។ តម្លៃថាមពលខ្ពស់គំរាមកំហែងដល់កំណើនសេដ្ឋកិច្ចដោយដាក់សម្ពាធខ្លាំងលើអ្នកប្រើប្រាស់ និងក្រុមហ៊ុន ខណៈរុញឲ្យមានអតិផរណា។តម្លៃឧស្ម័ននៅអឺរ៉ុប និងអាស៊ីក៏បានកើនឡើងផងដែរ។ កសិករប្រឈមនឹងការកើនឡើងជាលើកទីពីរនៃតម្លៃជីកសិកម្មក្នុងរយៈពេលបួនឆ្នាំ ខណៈប្រទេសនានារួមទាំងប្រទេសស៊ុយអែត បានព្រមានពីកង្វះខាតប្រេងឥន្ធនៈយន្តហោះ។ ផលប៉ះពាល់ប្រែប្រួលទៅតាមការប៉ះពាល់នឹងលំហូរថាមពលឆ្លងកាត់ច្រកសមុទ្រ Hormuz។ នៅសហរដ្ឋអាមេរិក តម្លៃឧស្ម័នឥឡូវនេះទាបជាងកម្រិតមុនសង្គ្រាម។លោក Mohit Kumar ប្រធានសេដ្ឋវិទូអឺរ៉ុបរបស់ធនាគារវិនិយោគសកល Jefferies បាននិយាយថា ទាំងទំហំ និងសេដ្ឋកិច្ចយឺតយ៉ាវ គឺខុសគ្នានៅទូទាំងតំបន់៕

មេដឹកនាំកំពូលអ៊ីរ៉ង់ ប្រឆាំងការបិទផ្លូវទឹករបស់អាមេរិក ដោយប្រកាសថា អ៊ីរ៉ង់ឥឡូវនេះគឺជាអ្នកកាន់ចង្កូតក្នុងវិបត្តិនេះ

មេដឹកនាំកំពូលអ៊ីរ៉ង់បានប្រកាសកាលពីថ្ងៃព្រហស្បតិ៍ ៣០ មេសាសប្ដាហ៍នេះ ថា សហរដ្ឋអាមេរិកបានរងការបរាជ័យដ៏អាម៉ាស់ ដោយបដិសេធយ៉ាងម៉ឺងម៉ាត់ចំពោះការព្រមានពីប្រធានាធិបតី Donald Trump ថា ការបិទផ្លូវទឹកដោយកងទ័ពជើងទឹករបស់សហរដ្ឋអាមេរិក នឹងបន្តរយៈពេលជាច្រើនទៀត ដែលអាចក្លាយជាការរឹតកសេដ្ឋកិច្ចរបស់អ៊ីរ៉ង់។ តម្លៃប្រេងបានឡើងដល់កម្រិតខ្ពស់បំផុតក្នុងរយៈពេលបួនឆ្នាំ បន្ទាប់មកបានធ្លាក់ចុះបន្តិចមុនពេលលោក Mojtaba Khamenei បានចេញសេចក្តីថ្លែងការណ៍ជាលាយលក្ខណ៍អក្សរដែលត្រូវបានអាននៅលើទូរទស្សន៍រដ្ឋ ដោយប្រកាសថា អ៊ីរ៉ង់ឥឡូវនេះគឺជាអ្នកកាន់ចង្កូតនៅក្នុងវិបត្តិនេះ។លោកថា ថ្ងៃនេះ ពីរខែបន្ទាប់ពីការដាក់ពង្រាយយោធាដ៏ធំបំផុត និងការឈ្លានពានដោយក្រុមអ្នកធ្វើបាបគេរបស់ពិភពលោកនៅក្នុងតំបន់ និងការបរាជ័យដ៏អាម៉ាស់របស់សហរដ្ឋអាមេរិកនៅក្នុងផែនការរបស់ខ្លួន ជំពូកថ្មីមួយកំពុងបង្ហាញខ្លួនសម្រាប់ឈូងសមុទ្រពែក្ស (Persian Gulf) និងច្រកសមុទ្រហ័រមូស (Strait of Hormuz) ដោយសរសើរការគ្រប់គ្រងរបស់អ៊ីរ៉ង់លើការដឹកជញ្ជូនទំនិញនៅក្នុងច្រកសមុទ្រនេះ។លោកបានបន្តព្យាករណ៍ពីអនាគតដ៏ភ្លឺស្វាងសម្រាប់ឈូងសមុទ្រដោយគ្មានសហរដ្ឋអាមេរិក ដោយនិយាយថា អ្នកដែលជ្រៀតជ្រែកក្នុងតំបន់ពីចម្ងាយគ្មានកន្លែងនៅទីនោះទេ លើកលែងតែនៅបាតសមុទ្ររបស់ខ្លួន ប៉ុណ្ណោះ។ លោក Mojtaba បានរងរបួសនៅក្នុងការវាយប្រហារដំបូងពីអាមេរិក និងអ៊ីស្រាអែល ដែលបានសម្លាប់ឪពុករបស់លោក គឺលោក Ali Khamenei ហើយមិនត្រូវបានគេមើលឃើញជាសាធារណៈទេ ចាប់តាំងពីត្រូវបានតែងតាំងជាអ្នកស្នងតំណែងជាមេដឹកនាំកំពូលកាលពីខែមុន។សហរដ្ឋអាមេរិកបានបិទផ្លូវកំពង់ផែរបស់អ៊ីរ៉ង់កាលពីពីរសប្តាហ៍មុន ខណៈសាធារណរដ្ឋអ៊ីស្លាមបានរក្សាការគ្រប់គ្រងរបស់ខ្លួនលើច្រកសមុទ្រយុទ្ធសាស្ត្រ Hormuz ចាប់តាំងពីការចាប់ផ្តើមនៃសង្គ្រាមមជ្ឈិមបូព៌ានៅថ្ងៃទី២៨ខែកុម្ភៈ ២០២៦នេះ ៕

អាមេរិក អនុម័តច្បាប់ដើម្បីបន្តការផ្តល់មូលនិធិដល់ក្រសួងសន្តិសុខមាតុភូមិ និងបញ្ចប់ការបិទរដ្ឋាភិបាលដោយផ្នែក

ប្រធានាធិបតីសហរដ្ឋអាមេរិក លោក ដូណាល់ ត្រាំ បានចុះហត្ថលេខាឲ្យចូលជាច្បាប់នូវសេចក្តីស្នើច្បាប់មួយដើម្បីបន្តការផ្តល់មូលនិធិសម្រាប់ក្រសួងសន្តិសុខមាតុភូមិ(DHS) បន្ទាប់ពីសភាសហរដ្ឋអាមេរិកបានអនុម័តសំណើដែលត្រូវបានអនុម័តដោយព្រឹទ្ធសភា។ការអនុម័តសេចក្តីស្នើច្បាប់ ដែលមិនដាក់បញ្ចូលទីភ្នាក់ងារអនុវត្តច្បាប់អន្តោប្រវេសន៍និងគយ(ICE) ឬគយ និងការពារព្រំដែន(CBP) ដោយសំឡេងនៃការបោះឆ្នោតកាលពីថ្ងៃព្រហស្បតិ៍ បានបញ្ចប់ការបិទរដ្ឋាភិបាលដោយផ្នែករយៈពេល១១សប្តាហ៍។ទោះបីជាទីភ្នាក់ងារទាំងពីរ មានការផ្តល់មូលនិធិគ្រប់គ្រាន់តាមរយៈច្បាប់ដែលត្រូវបានអនុម័តកាលពីពេលមុនក៏ដោយ ប្រធានសភាគណបក្សសាធារណរដ្ឋ លោក Mike Johnson ដំបូងឡើយបានជំទាស់នឹងវិធានការនេះចំពោះការមិនដាក់បញ្ចូលទីភ្នាក់ងារទាំងពីរ។ ប៉ុន្តែនៅទីបំផុត លោកបាននាំយកសំណើនេះទៅបោះឆ្នោត បន្ទាប់ពីលោក Trump បានបង្ហាញការគាំទ្រ។រដ្ឋមន្ត្រីក្រសួងសន្តិសុខមាតុភូមិ លោក Markwayne Mullin បានស្វាគមន៍ចំពោះការអនុម័តសេចក្តីស្នើច្បាប់នេះកាលពីថ្ងៃព្រហស្បតិ៍ និងងបានស្តីបន្ទោសក្រុមប្រជាធិបតេយ្យចំពោះការបិទរដ្ឋាភិបាលដោយផ្នែក។ លោក Mullin បានសរសេរនៅលើបណ្តាញ X ថា «ដើម្បីឲ្យច្បាស់ ការបិទរដ្ឋាភិបាលដោយក្រុមប្រជាធិបតេយ្យនេះ មិនគួរកើតឡើងទេ»។ការបិទរដ្ឋាភិបាលដោយផ្នែក បានធ្វើឱ្យផ្នែកជាច្រើននៅក្នុងក្រសួងសន្តិសុខមាតុភូមិ(DHS) នៅដំណើរការ ប៉ុន្តែនាំឱ្យមានជួរដ៏វែងនៅតាមអាកាសយានដ្ឋាន ជាកន្លែងដែលភ្នាក់ងាររដ្ឋបាលសន្តិសុខដឹកជញ្ជូន (TSA) ជាច្រើនបានរាយការណ៍ថា ធ្វើការដោយមិនទទួលបានប្រាក់ឈ្នួល។

កងទ័ពជើងទឹកនិងអាកាសរបស់ចិន ចេញល្បាតជិតតំបន់ថ្មប៉ប្រាស់ទឹក Scarborough ខណៈហ្វីលីពីន និងអាមេរិកធ្វើសមយុទ្ធ

យោធាប្រទេសចិន បាននិយាយកាលពីថ្ងៃព្រហស្បតិ៍ ទី៣០ ខែមេសា ថា កងទ័ពជើងទឹក និងអាកាសរបស់ខ្លួនបានធ្វើការល្បាតត្រៀមប្រយុទ្ធនៅជិតតំបន់ថ្មប៉ប្រាស់ទឹក ស្កា ប រ៉ូ (Scarborough Shoal) នៅសមុទ្រចិនខាងត្បូងដែលមានជម្លោះ។ «ការល្បាតនេះ មានបំណងការពារដែនអធិបតេយ្យភាពទឹកដីរបស់ប្រទេសចិនយ៉ាងម៉ឺងម៉ាត់ និងរក្សាសន្តិភាព និងស្ថិរភាពនៅសមុទ្រចិនខាងត្បូង»។ កាលពីថ្ងៃព្រហស្បតិ៍ ឆ្មាំសមុទ្រចិនក៏បានចេញសេចក្តីថ្លែងការណ៍មួយដោយនិយាយថា ខ្លួនបានអនុវត្ត «ការល្បាតអនុវត្តច្បាប់» នៅជិតតំបន់ថ្មប៉ប្រាស់ទឹក Scarborough ដែលជាចំណុចជម្លោះដ៏សំខាន់លើដែនអធិបតេយ្យភាព និងសិទ្ធិនេសាទ។ការល្បាតទាំងនេះ ធ្វើឡើងក្នុងការឆ្លើយតបទៅនឹងសមយុទ្ធតំបន់ប្រចាំឆ្នាំចាប់ពីថ្ងៃទី២០ ខែមេសា ដល់ថ្ងៃទី៨ ខែឧសភា ដោយប្រមូលផ្តុំកងកម្លាំងមកពីប្រទេសអូស្ត្រាលី នូវែលហ្សេឡង់ ហ្វីលីពីន សហរដ្ឋអាមេរិក ជប៉ុន កាណាដា និងប្រទេសបារាំង ដើម្បីបង្ហាញពីសមត្ថភាពអាវុធទំនើបៗ និងការត្រៀមខ្លួនធ្វើប្រតិបត្តិការ។មន្ត្រីអាមេរិក និងហ្វីលីពីន បាននិយាយថា សមយុទ្ធប្រចាំឆ្នាំ Balikatan ឬ «ស្មាកៀកស្មា» មានប្រទេសចូលរួមច្រើនបំផុតរហូតមកដល់បច្ចុប្បន្ន។ នៅក្នុងសមយុទ្ធ កងកម្លាំងទាំងនេះបានធ្វើលំហាត់សមសមយុទ្ធការពារឆ្នេរ និងបានសាកល្បងសមត្ថភាពដើម្បីធ្វើការរួមគ្នាការពារដែនទឹកជាមួយនឹងតាកទិក ដូចជាការទប់ទល់ទៅនឹងការវាយរុញច្រានក្លែងប្រដូចទៅនឹងការពិតដោយការបាញ់គ្រាប់ពិតទៅលើគោលដៅដែលបានកំណត់ និងស្ទាក់ចាប់ការគំរាមកំហែងនានា។

អ៊ីស្រាអែល៖ សកម្មជនទូកដឹកជំនួយទៅហ្កាហ្សាដែលត្រូវបានឃុំខ្លួន នឹងត្រូវនាំទៅកាន់ប្រទេសក្រិក

អ៊ីស្រាអែល បាននិយាយកាលពីថ្ងៃព្រហស្បតិ៍ ទី៣០ ខែមេសា ថា សកម្មជនរាប់សិបនាក់ដែលត្រូវបានយោធារបស់ខ្លួនស្ទាក់ចាប់នៅលើក្បួនទូកដឹកជំនួយដែលធ្វើដំណើរទៅកាន់តំបន់ហ្កាហ្សានៅក្នុងដែនទឹកអន្តរជាតិនៅជិតកោះក្រេត(Crete) នឹងត្រូវនាំទៅកាន់ប្រទេសក្រិក។ ក្រសួងការបរទេសអ៊ីស្រាអែល បាននិយាយថា សកម្មជនប្រហែល១៧៥នាក់ត្រូវបាននាំយកចេញពីទូកជាង២០គ្រឿង។ការដឹកជំនួយតាមក្បួនទូកទាំងនេះ គឺជាការប៉ុនប៉ងចុងក្រោយរបស់សកម្មជនគាំទ្រប៉ាឡេស្ទីន ដែលកំពុងស្វែងរកការទម្លាយការបិទផ្លូវទឹករបស់អ៊ីស្រាអែលនៅតំបន់ហ្កាហ្សា ដោយអ្នករៀបចំកម្មវិធីបានដាក់ចំនួនអ្នកដែលត្រូវបានឃុំខ្លួនមានចំនួន២១១នាក់ រួមទាំងក្រុមប្រឹក្សាទីក្រុងប៉ារីសផងដែរ។រដ្ឋមន្ត្រីការបរទេសអ៊ីស្រាអែល លោក Gideon Saar បានសរសេរនៅលើបណ្តាញ X ដោយអរគុណដល់ប្រទេសក្រិក «ចំពោះឆន្ទៈរបស់ប្រទេសនេះក្នុងការទទួលយកអ្នកចូលរួមក្នុងក្បួនទូកដឹកជំនួយ»។អ្នកស្រី Yasmine Scola សកម្មជនម្នាក់នៅលើទូក បាននិយាយថា សហការីរបស់អ្នកស្រីត្រូវបាន «ចាប់ជំរិត» ដោយអ៊ីស្រាអែល។ ជាមួយគ្នានេះ ទីក្រុងប៉ារីស បានប្រកាសថា ជនជាតិបារាំងចំនួន ១៥ នាក់ត្រូវបានឃុំខ្លួន ហើយទីក្រុងរ៉ូម បានអំពាវនាវឱ្យមានការដោះលែងជាបន្ទាន់នូវ «ជនជាតិអ៊ីតាលីដែលត្រូវបានឃុំខ្លួនដោយខុសច្បាប់ទាំងអស់»។

យោធាមីយ៉ាន់ម៉ា និយាយថាអតីតមេដឹកនាំ លោកស្រី អ៊ុងសាន ស៊ូជី ត្រូវបានបញ្ជូនទៅឃុំខ្លួនក្នុងផ្ទះ

ប្រព័ន្ធផ្សព្វផ្សាយរដ្ឋរបស់សហភាពមីយ៉ាន់ម៉ា បានរាយការណ៍ថា អតីតមេដឹកនាំរបស់ប្រទេសនេះ លោកស្រី អ៊ុងសាន ស៊ូជី (Aung San Suu Kyi )ដែលត្រូវបានឃុំខ្លួននៅមន្ទីរឃុំឃាំង ត្រូវបានបញ្ជូនទៅឃុំខ្លួនក្នុងផ្ទះវិញ។ ម្ចាស់ពានរង្វាន់ណូបែលវ័យ ៨០ ឆ្នាំរូបនេះ ត្រូវបានឃុំខ្លួន ប្រហែលជានៅក្នុងពន្ធនាគារយោធាមួយនៅក្នុងរដ្ឋធានី ណៃពិដោ (Nay Pyi Taw ) ចាប់តាំងពីលោកស្រីត្រូវបានទម្លាក់ចេញពីតំណែងក្នុងរដ្ឋប្រហារយោធាក្នុងឆ្នាំ ២០២១។ សេចក្តីថ្លែងការណ៍មួយរបស់មេដឹកនាំយោធា លោក មីន អ៊ុងឡាំង(Min Aung Hlaing) ដែលបានដឹកនាំរដ្ឋប្រហារ បាននិយាយថា លោកបានផ្លាស់ប្តូរទោសដែលនៅសល់របស់លោកស្រី ដើម្បីអនុវត្តនៅក្នុងលំនៅឋានដែលបានកំណត់។ លោកស្រី អ៊ុងសាន ស៊ូជី បានឡើងកាន់អំណាចនៅឆ្នាំ ២០១៥ បន្ទាប់ពីមេដឹកនាំមីយ៉ាន់ម៉ានៅពេលនោះបានដាក់ចេញកំណែទម្រង់ប្រជាធិបតេយ្យ។ មុននោះ លោកស្រីបានចំណាយពេលរាប់ទសវត្សរ៍ក្រោមការគ្រប់គ្រងដោយយោធាក្នុងនាមជាសកម្មជនគាំទ្រលទ្ធិប្រជាធិបតេយ្យ ហើយកន្លងមក ធ្លាប់ត្រូវបានឃុំខ្លួនក្នុងផ្ទះអស់រយៈពេលជាង ១៥ ឆ្នាំ។ ប្រព័ន្ធផ្សព្វផ្សាយរដ្ឋបានចេញផ្សាយរូបភាពលោកស្រីអង្គុយជាមួយបុគ្គលិកស្លៀកពាក់ឯកសណ្ឋានពីរនាក់។កូនប្រុសរបស់លោកស្រី គឺ លោក គីម អារីស (Kim Aris) បាននិយាយថា រូបលោកមានការសង្ស័យចំពោះការប្រកាសនេះ ហើយថាលោកពុំមានភស្តុតាងបង្ហាញថាលោកស្រីនៅមានជីវិតទេ។ លោកបាននិយាយថា រូបភាពនេះគឺគ្មានន័យ ដោយសាររូបថតនេះត្រូវបានថតនៅឆ្នាំ ២០២២។លោកបានប្រាប់ទូរទស្សន៍ BBC ថា រូបលោកសង្ឃឹមថានេះជាការពិត។ លោកនៅតែមិនទាន់មើលឃើញភស្តុតាងពិតប្រាកដណាមួយដើម្បីបង្ហាញថាម្ដាយរបស់លោកត្រូវបានផ្លាស់ប្តូរទីតាំងឃុំខ្លួននោះទេ៕

អ៊ីរ៉ង់ព្រមានអាមេរិកពីការឈឺចាប់អូសបន្លាយពេលយូរស្របពេលមានរបាយការណ៍ស្តីពីផែនការវាយប្រហារដ៏ខ្លាំងក្លា

សារព័ត៌មាន Anadolu បានរាយការណ៍ថា មេបញ្ជាការកងកម្លាំងអវកាសនៃកងឆ្មាំបដិវត្តន៍អ៊ីស្លាមអ៊ីរ៉ង់ (IRGC) បានព្រមានសហរដ្ឋអាមេរិកកាលពីថ្ងៃព្រហស្បតិ៍ ៣០មេសាសប្ដាហ៍នេះពីសកម្មភាពយោធាដែលអាចកើតមាន ស្របពេលមានរបាយការណ៍ថា ទីក្រុងវ៉ាស៊ីនតោន កំពុងពិចារណាវាយប្រហារថ្មីប្រឆាំងនឹងទីក្រុងតេអេរ៉ង់។ ការព្រមាននេះបានកើតឡើងបន្ទាប់ពីរបាយការណ៍មួយរបស់គេហទំព័រព័ត៌មានអាមេរិក Axios ដែលថាប្រធានាធិបតីអាមេរិក លោក Donald Trump ត្រូវគេរំពឹងថានឹងទទួលបានការរាយការណ៍ពីបញ្ជាការកណ្តាលសហរដ្ឋអាមេរិក (CENTCOM) ស្តីពីជម្រើសសម្រាប់ការវាយប្រហារជាបន្តបន្ទាប់ រយៈពេលខ្លី និងខ្លាំងក្លា ក្នុងគោលបំណងបំបែកភាពជាប់គាំងបច្ចុប្បន្ន។ ជាការឆ្លើយតប លោក Majid Mousavi មេបញ្ជាការកងកម្លាំងអវកាស IRGC បាននិយាយថា ទីក្រុងតេអេរ៉ង់នឹងឆ្លើយតបទៅនឹងប្រតិបត្តិការបែបនេះ ទោះបីជារយៈពេលខ្លី និងរហ័សក៏ដោយ ជាមួយនឹង ការវាយប្រហារអូសបន្លាយពេលយូរ និងឈឺចាប់។លោកបានបន្ថែមនៅក្នុងការបញ្ចេញមតិរបស់លោកដែលធ្វើឡើងដោយទីភ្នាក់ងារព័ត៌មានពាក់កណ្តាលផ្លូវការ Tasnim ថា ពួកលោកបានមើលឃើញជោគវាសនានៃមូលដ្ឋានរបស់អ្នកនៅក្នុងតំបន់។ ពួកលោកក៏នឹងមើលឃើញនាវារបស់អ្នកផងដែរ។ យោងតាមសារព័ត៌មាន Axios ដដែល បញ្ជាការកណ្តាលសហរដ្ឋអាមេរិក បានរៀបចំផែនការដែលអាចរួមបញ្ចូលការវាយប្រហារលើហេដ្ឋារចនាសម្ព័ន្ធអ៊ីរ៉ង់ ក៏ដូចជាជម្រើសទូលំទូលាយជាងនេះដូចជាការកើនឡើងសម្ពាធកងទ័ពជើងទឹកនៅក្នុងច្រកសមុទ្រ Hormuz ជាដើម។សំណើទាំងនេះត្រូវបានគេរាយការណ៍ថាមានគោលបំណងបង្ខំឱ្យអ៊ីរ៉ង់វិលត្រឡប់ទៅរកការចរចាវិញដោយមានភាពបត់បែនកាន់តែច្រើន ជាពិសេសលើបញ្ហានុយក្លេអ៊ែរ។ របាយការណ៍នេះក៏បាននិយាយផងដែរថា ទីក្រុងវ៉ាស៊ីនតោន កំពុងពិចារណាលើជំហាននានាដើម្បីធានាផ្លូវសមុទ្រនៅក្នុងច្រកសមុទ្រ Hormuz ហើយកំពុងរៀបចំសម្រាប់ការសងសឹកដែលអាចកើតមានពីអ៊ីរ៉ង់៕

បណ្ដាញសង្គម

ព័ត៌មានថ្មីៗ

ឯកឧត្តម ឌី វិជ្ជា និងលោកជំទាវ ហ៊ុន ម៉ាណា អញ្ជើញនាំយកទេយ្យវត្ថុ ប្រគេនព្រះសង្ឃ និងចែកអំណោយប្រជាពលរដ្ឋ នៅស្រុកភ្នំស្រួច ខេត្តកំពង់ស្ពឺ

ឯកឧត្តមកិត្តិសង្គហបណ្ឌិត គន់ គីម អញ្ជើញជួបប្រជាពលរដ្ឋភៀសសឹក និងពិនិត្យទីតាំងរៀបចំផ្សារបណ្តោះអាសន្ន ក្នុងខេត្តបន្ទាយមានជ័យ

ក្រសួងការងារ៖ ខេត្តស្ថិតក្នុងតំបន់ទំនាបកណ្ដាលចំនួន៣ មានឱកាសការងារជាង ៨,០០០កន្លែង កំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

ក្រសួងការងារ៖ នៅខេត្តជាប់សមុទ្រទាំង៤ មានឱកាសការងារជិត ៧,០០០កន្លែង ដែលកំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

ឯកឧត្តមឧបនាយករដ្ឋមន្ត្រី ហ៊ុន ម៉ានី៖ វិញ្ញាសាតាក់តែងចប់ភ្លាម ប្រឡងភ្លាមតែម្តង

ក្រសួងការងារ៖ ខេត្តចំនួន៤ នៅភូមិភាគឦសាន្ត មានឱកាសការងារជិត ៤,០០០កន្លែង កំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

អាជ្ញាធរជាតិអប្សរា និង JQA បិទបញ្ចប់កម្មវិធីអប់រំបរិស្ថានសម្រាប់កុមារ ឆ្នាំ២០២៦ និងប្រគល់រង្វាន់ដល់សិស្សឆ្នើម

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877