BTV NEWS

ក្រុមអ្នកជួយសង្គ្រោះ៖ មនុស្ស ៤នាក់ទៀតដែលជាប់ក្នុងរូងភ្នំ នៅឡាវ ត្រូវបាននាំចេញដោយសុវត្ថិភាព

លោក Hegseth៖ យុគសម័យឧបត្ថម្ភធនការពារជាតិពីអាមេរិក សម្រាប់ «ប្រទេសអ្នកមាន» ចប់ហើយ

មន្ត្រីជាន់ខ្ពស់អ៊ីរ៉ង់ និយាយថា លោក Trump «ក្បត់ការទូត» ដោយបន្តបិទខ្ទប់ដោយទ័ពជើងទឹកអាមេរិក

វេជ្ជបណ្ឌិត៖ សុខភាពលោក Trump គឺល្អប្រសើរណាស់ ប៉ុន្តែគួរតែសម្រកទម្ងន់

ព័ត៌មានអន្តរជាតិ

បទឈប់បាញ់ស្ថិតក្នុងហានិភ័យ ខណៈប៉ាគីស្ថាន និងអាហ្វហ្គានីស្ថាន រាយការណ៍ពីការវាយប្រហារឆ្លងព្រំដែន

ប្រទេសប៉ាគីស្ថាន និងអាហ្វហ្គានីស្ថាន បានចោទប្រកាន់គ្នាទៅវិញទៅមក ថា បានបើកការវាយប្រហារឆ្លងព្រំដែនជាថ្មី។ អាជ្ញាធរក្រុមតាលីបង់របស់ប្រទេសអាហ្វហ្គានីស្ថាន បាននិយាយកាលពីថ្ងៃចន្ទថា មនុស្សបួននាក់ត្រូវបានសម្លាប់នៅក្នុងការវាយប្រហារនៅខេត្ត Kunar ភាគខាងកើត។ មន្ត្រីប៉ាគីស្ថានបានរាយការណ៍ថា ជនស៊ីវិលយ៉ាងហោចណាស់បីនាក់ បានរងរបួសដោយការបាញ់កាំភ្លើងនៅស្រុកតំបន់ភ្នំ South Waziristan។ ការបន្តអំពើហិង្សា បានគំរាមកំហែងដល់ការចរចាសន្តិភាពដ៏ផុយស្រួយរវាងប្រទេសជិតខាងគ្នានេះ។ ប្រទេសទាំងពីរ បានព្រមព្រៀងគ្នាលើបទឈប់បាញ់ដ៏ផុយស្រួយកាលពីខែមីនា ដែលបានបញ្ឈប់អំពើហិង្សាដ៏បង្ហូរឈាមរយៈពេលជាច្រើនសប្តាហ៍។អ្នកនាំពាក្យរងរបស់ក្រុមតាលីបង់ លោក Hamdullah Fitrat បាននិយាយថា យោធាប៉ាគីស្ថាន បានបើកការវាយប្រហារដោយកាំភ្លើងត្បាល់ និងគ្រាប់រ៉ូកែត ដែលបានធ្វើឱ្យមនុស្ស ៤៥ នាក់រងរបួស។ លោកបាននិយាយថា និស្សិត ស្ត្រី និងកុមារ ស្ថិតក្នុងចំណោមអ្នករងរបួស ខណៈលំនៅឋាន និងសាកលវិទ្យាល័យ Sayed Jamaluddin Afghani ក្នុងក្រុង Asadabad នៃខេត្ត Kunar បានស្ថិតក្រោមការបាញ់ផ្លោង។អ្នកនាំពាក្យបានសរសេរនៅលើបណ្តាញផ្សព្វផ្សាយសង្គមថា «យើងថ្កោលទោសយ៉ាងខ្លាំងចំពោះការវាយប្រហារទាំងនេះ ធ្វើឡើងដោយរបបយោធាប៉ាគីស្ថាន ដែលប្រជាជនសាមញ្ញ គ្រឹះស្ថានសិក្សា និងស្ថាប័នអប់រំត្រូវបានដាក់គោលដៅ ហើយបានប្រកាសថា វាជាឧក្រិដ្ឋកម្មសង្គ្រាមដែលមិនអាចអត់ឱនឲ្យបាន»។ ក្រសួងព័ត៌មានប៉ាគីស្ថាន បានច្រានចោលរបាយការណ៍នេះថាជា «ការនិយាយកុហកយ៉ាងច្បាស់លាស់» ហើយបានទទូចថា ពុំមានការវាយប្រហារលើសាកលវិទ្យាល័យនោះទេ។ ទន្ទឹមនឹងនេះ អ្នកនាំពាក្យកងកម្លាំងព្រំដែនរបស់ប្រទេស បានពិពណ៌នាអំពីឧប្បត្តិហេតុនៅស្រុក South Waziristan ថាជាការប៉ះទង្គិចគ្នាធ្ងន់ធ្ងរបំផុតចាប់តាំងពីបទឈប់បាញ់ត្រូវបានប្រកាស។

កោះតៃវ៉ាន់ប្រកាសអាសន្នក្រោយប្រទះឃើញនាវាចម្បាំងចិនពីរគ្រឿងនៅជិតកោះ Penghu របស់ខ្លួន

អាជ្ញាធរការពារជាតិនៅទីក្រុងតៃប៉ិ បាននិយាយថា កោះតៃវ៉ាន់បានប្រទះឃើញនាវាចម្បាំងចិនពីរគ្រឿងកំពុងធ្វើប្រតិបត្តិការនៅក្នុងដែនទឹកក្បែរកោះ ផាំង ហ៊ូ (Penghu) ក្នុងច្រកសមុទ្រតៃវ៉ាន់ ហើយបានបញ្ជូនកងទ័ពជើងទឹក និងកងទ័ពអាកាសរបស់ខ្លួនដើម្បីតាមដាន។ចិន ដែលចាត់ទុកកោះតៃវ៉ាន់គ្រប់គ្រងតាមបែបប្រជាធិបតេយ្យថាជាទឹកដីរបស់ខ្លួន បានបញ្ជូននាវាចម្បាំង និងយន្តហោះចម្បាំងរបស់ខ្លួនចូលទៅក្នុងដែនទឹក និងផ្ទៃមេឃជុំវិញកោះនេះស្ទើរតែរាល់ថ្ងៃ ដែលធ្វើឲ្យក្រុមអាជ្ញាធរកោះនេះស្ដីបន្ទោស។ខណៈអាជ្ញាធរការពារជាតិកោះតៃវ៉ាន់ផ្តល់ព័ត៌មានថ្មីៗប្រចាំថ្ងៃអំពីទីតាំងយន្តហោះយោធាចិន កោះនេះកម្រផ្តល់ព័ត៌មានលម្អិតអំពីកន្លែងដែលនាវាចម្បាំងចិនកំពុងធ្វើប្រតិបត្តិការណាស់ ជាទូទៅបាន ប្រទះឃើញតែនាវាផ្ទុកយន្តហោះ តែប៉ុណ្ណោះ ជាក់ស្ដែងដូចដែលបានកើតឡើងកាលពីសប្តាហ៍មុន។កាលពីល្ងាចថ្ងៃចន្ទ២៧មេសាសប្ដាហ៍នេះ អាជ្ញាធរកោះបាននិយាយថា នាវាពិឃាតចិនមួយគ្រឿង និងនាវាចម្បាំងមួយគ្រឿងបានចូលទៅក្នុងដែនទឹកនៅភាគនិរតីនៃកោះ Penghu ដែលជាទីតាំងមូលដ្ឋានកងទ័ពជើងទឹក និងកងទ័ពអាកាសសំខាន់ៗរបស់តៃវ៉ាន់ និងនៅជិតច្រកសមុទ្រខាងផ្នែករបស់កោះតៃវ៉ាន់៕

មនុស្សច្រើននាក់បានស្លាប់ និងរងរបួស ក្នុងឧបទ្ទវហេតុរថភ្លើងនៅប្រទេសឥណ្ឌូនេស៊ី ខណៈការជួយសង្គ្រោះនៅបន្ត

⁠មនុស្សយ៉ាងហោចណាស់១៤នាក់បានស្លាប់ និងជាង៨០នាក់បានរងរបួសនៅក្នុងការប៉ះទង្គិចគ្នារវាងរថភ្លើងពីរគ្រឿងនៅជិតរដ្ឋធានីហ្សាកាតា ប្រទេសឥណ្ឌូនេស៊ី និងមានរបាយការណ៍ថា អ្នកដំណើរនៅជាប់ខ្លួនក្នុងគំនរបាក់បែក ខណៈកិច្ចខិតខំប្រឹងប្រែងជួយសង្គ្រោះនៅបន្ត។អ្នកនាំពាក្យរបស់ក្រុមហ៊ុនរថភ្លើងដឹកជញ្ជូនអ្នកដំណើរ បានប្រាប់ទីភ្នាក់ងារសារព័ត៌មានរ៉យទ័រថា គ្រោះថ្នាក់កាលពីយប់ថ្ងៃច័ន្ទ បានកើតឡើងនៅស្ថានីយ៍រថភ្លើងទីក្រុង Bekasi ដែលនៅជិតគ្នាជាមួយទីក្រុងហ្សាកាតា រវាងខ្សែរថភ្លើងដឹកអ្នកដំណើរ និងរថភ្លើងដឹកជញ្ជូនផ្លូវឆ្ងាយមួយគ្រឿងផ្សេងទៀត។បុគ្គលិកសង្គ្រោះបន្ទាន់ នៅតែធ្វើការយ៉ាងសកម្មនៅកន្លែងកើតហេតុនៅព្រឹកថ្ងៃអង្គារនេះ ដោយមន្ត្រីម្នាក់បានប្រាប់ទីភ្នាក់ងារសារព័ត៌មាន AFP ថា មនុស្សមួយចំនួននៅតែជាប់ខ្លួនក្នុងគំនរបាក់បែកនៃរថភ្លើង។លោក Mohammad Syafii ប្រធានទីភ្នាក់ងារស្វែងរកនិងជួយសង្គ្រោះជាតិរបស់ប្រទេសឥណ្ឌូនេស៊ី បាននិយាយនៅព្រឹកថ្ងៃអង្គារនេះថា បច្ចុប្បន្នមានជនរងគ្រោះស្លាប់១៤នាក់ ហើយដំណើរការជម្លៀសនិងសង្គ្រោះ នៅបន្ត ដូច្នេះចំនួនពិតប្រាកដនៃជនរងគ្រោះនៅមិនទាន់បានកំណត់ច្បាស់នៅឡើយ។លោក Syafii បាននិយាយថា កិច្ចខិតខំប្រឹងប្រែងដើម្បីជួយសង្គ្រោះអ្នកដែលនៅជាប់ខ្លួននៅក្នុងគំនរបាក់បែក មានភាពស្មុគស្មាញដោយសារតែទីតាំងហើយក្រុមអ្នកជួយសង្គ្រោះកំពុងធ្វើការ ខណៈមានការខូចខាតធ្ងន់ធ្ងរដល់ទូរថភ្លើង។ លោក Syafii និយាយថា បុគ្គលិកសង្គ្រោះបានកាត់ចេញកម្ទេចកម្ទីបាក់បែក និងនាំអ្នកដែលជាប់ខ្លួននៅក្នុងទូរថភ្លើងចេញ នេះបើយោងតាមគេហទំព័រ Kompas.com។

លោក Putin សន្យាគាំទ្រអ៊ីរ៉ង់ក្នុងកិច្ចពិភាក្សាជាមួយរដ្ឋមន្ត្រីការបរទេសលោក Araghchiស្របពេលការចរចាបញ្ចប់សង្គ្រាមជាប់គាំង

លោក Abbas Araghchi រដ្ឋមន្ត្រីការបរទេសអ៊ីរ៉ង់កាលពីថ្ងៃចន្ទ ២៧មេសាសប្ដាហ៍នេះ បានជួបពិភាក្សាជាមួយប្រធានាធិបតីរុស្ស៊ីលោក Vladimir Putin នៅទីក្រុង St. Petersburg ដោយប្រធានាធិបតីរុស្ស៊ីបានប្រាប់អ្នកការទូតអ៊ីរ៉ង់រូបនេះ ថា លោកសង្ឃឹមថានឹងមានសន្តិភាពឆាប់ៗនេះ។ទីក្រុងមូស្គូ ដែលជាសម្ព័ន្ធមិត្តរបស់អ៊ីរ៉ង់ រហូតមកដល់ពេលនេះ នៅតែច្រានចោលការជាប់ពាក់ព័ន្ធនឹងជម្លោះមជ្ឈិមបូព៌ា ខណៈខ្លួននៅតែបន្តសង្គ្រាមទ្រង់ទ្រាយធំលើអ៊ុយក្រែន។ ប៉ុន្តែលោក Putin កាលពីថ្ងៃចន្ទនោះដែរ បានផ្តល់ការគាំទ្រដល់អ៊ីរ៉ង់ ដោយនិយាយថា លោកសង្ឃឹមថានឹងមានសន្តិភាពឆាប់ៗនេះ ហើយអ៊ីរ៉ង់នឹងឆ្លងកាត់ "ដំណាក់កាលដ៏លំបាក" នៃសង្គ្រាមនេះ នេះបើយោងតាមទីភ្នាក់ងារសារព័ត៌មានរដ្ឋរបស់រុស្ស៊ី។ទីភ្នាក់ងារសារព័ត៌មានរុស្ស៊ី RIA បានដកស្រង់សម្តី លោកប្រធានាធិបតីរុស្ស៊ីក្នុងអំឡុងពេលជួបជាមួយលោក Araghchi ដោយនិយាយថា សម្រាប់ផ្នែករបស់ពួកលោក ពួកលោកនឹងធ្វើគ្រប់យ៉ាងដែលបម្រើផលប្រយោជន៍របស់អ្នក និងផលប្រយោជន៍ប្រជាជនទាំងអស់នៅក្នុងតំបន់ ដើម្បីឱ្យសន្តិភាពអាចសម្រេចបានឆាប់តាមដែលអាចធ្វើទៅបាន។លោក Araghchi បានទៅដល់ប្រទេសរុស្ស៊ីកាលពីថ្ងៃចន្ទ២៧មេសាសប្ដាហ៍នេះ បន្ទាប់ពីការធ្វើដំណើរទៅកាន់ប្រទេសដែលជាអ្នកជួយសម្របសម្រួល គឺ ប៉ាគីស្ថាន និងអូម៉ង់ ដើម្បីពិភាក្សាអំពីជម្លោះមជ្ឈិមបូព៌ា ខណៈកិច្ចខិតខំប្រឹងប្រែងសន្តិភាពរវាងទីក្រុងតេអេរ៉ង់ និងទីក្រុងវ៉ាស៊ីនតោន នៅតែត្រូវបានផ្អាក។ដំណើរទស្សនកិច្ចរបស់លោកAraghchiកើតឡើងស្របពេលការចរចាជាប់គាំងជាមួយអាមេរិក ខណៈភាគីទាំងពីរបានបដិសេធការទាមទារជាច្រើនរបស់គ្នាទៅវិញទៅមក។កាលពីថ្ងៃសៅរ៍ ប្រធានាធិបតីអាមេរិក លោក Donald Trump បានលុបចោលដំណើរទស្សនកិច្ចដែលបានគ្រោងទុកទៅកាន់ទីក្រុងអ៊ីស្លាម៉ាបាដ ដោយបេសកជនរបស់លោក គឺលោក Steve Witkoff និងលោក Jared Kushner ដោយនិយាយថា ការចរចានៅទីនោះនឹងប្រៀបដូចជាការអង្គុយនិយាយគ្នាពីរឿងឥតប្រយោជន៍ ៕

អ៊ីស្រាអែល៖ ត្រូវការចំណាត់ការ ជុំវិញការបាញ់រ៉ូកែត និងយានដ្រូនរបស់ក្រុមហេសបូឡា

នាយករដ្ឋមន្ត្រីអ៊ីស្រាអែល លោក Benjamin Netanyahu កាលពីថ្ងៃចន្ទ ទី ២៧ ខែមេសា បាននិយាយថា គ្រាប់រ៉ូកែត និងយានដ្រូនរបស់ក្រុមហេសបូឡា នៅតែជាការគំរាមកំហែងដ៏សំខាន់ ដែលទាមទារឱ្យមានចំណាត់ការខាងយោធា ខណៈកងទ័ពអ៊ីស្រាអែលបានពង្រីកការវាយប្រហារលើប្រទេសលីបង់ ទោះបីជាមានបទឈប់បាញ់ក៏ដោយ។ ប្រធានាធិបតីលីបង់ លោក Joseph Aoun បាននិយាយថា ការចរចាដោយផ្ទាល់ជាមួយអ៊ីស្រាអែល គឺដើម្បីបញ្ចប់សង្គ្រាមអ៊ីស្រាអែល-ក្រុមហេសបូឡា ហើយអ្នកទាំងឡាយដែលបានអូសទាញប្រទេសលីបង់ឲ្យធ្លាក់ចូលក្នុងសង្គ្រាមនោះគឺជាអ្នកប្រព្រឹត្តអំពើ «ក្បត់ជាតិ» ជាការនិយាយវាយប្រហារទៅលើក្រុមគាំទ្រដោយអ៊ីរ៉ង់ ដែលបានអះអាងពីការវាយប្រហារជាច្រើនលើកទៅលើគោលដៅអ៊ីស្រាអែលនៅភាគខាងត្បូងប្រទេសលីបង់កាលពីថ្ងៃចន្ទ។ លោក Naim Qassem ប្រមុខក្រុមហេសបូឡា បានហៅការចរចាដោយផ្ទាល់រវាងប្រទេសទាំងពីរថាជា «អំពើបាប» ខណៈ រដ្ឋមន្ត្រីក្រសួងការពារជាតិអ៊ីស្រាអែល លោក Israel Katz បានព្រមានថា ការបដិសេធការចរចារបស់ក្រុមនេះ នឹងនាំមកនូវផលវិបាកដ៏មហន្តរាយសម្រាប់ប្រទេសលីបង់។ ឯកអគ្គរដ្ឋទូតរបស់ប្រទេសលីបង់ និងអ៊ីស្រាអែល ប្រចាំសហរដ្ឋអាមេរិក បានជួបគ្នាពីរលើកនៅទីក្រុងវ៉ាស៊ីនតោន ក្នុងរយៈពេលប៉ុន្មានសប្តាហ៍ថ្មីៗនេះ ជាជំនួបលើកដំបូងក្នុងរយៈពេលជាច្រើនទសវត្សរ៍មកនេះ សម្រាប់កិច្ចពិភាក្សាដែលក្រុមហេសបូឡា បានច្រានចោលយ៉ាងដាច់ខាត។ បន្ទាប់ពីកិច្ចចរចាលើកដំបូង ប្រធានាធិបតីសហរដ្ឋអាមេរិក លោក Donald Trump បានប្រកាសពីបទឈប់បាញ់រយៈពេល ១០ថ្ងៃ ដែលបានចាប់ផ្តើមនៅថ្ងៃទី១៧ ខែមេសា ហើយបានប្រកាសពីការបន្តរយៈពេលបីសប្តាហ៍ទៀតបន្ទាប់ពីជុំទីពីរ។លោក Netanyahu បាននិយាយនៅក្នុងសេចក្តីថ្លែងការណ៍ថា «នៅតែមានការគំរាមកំហែងពីក្រុមហេសបូឡា ដោយបានប្រើប្រាស់គ្រាប់រ៉ូកែត១២២មីលីម៉ែត្រ និងយានដ្រូន។ នេះទាមទារឲ្យមានការរួមបញ្ចូលគ្នារវាងសកម្មភាពប្រតិបត្តិការ និងបច្ចេកវិទ្យា»។

អាមេរិក និងអ៊ីរ៉ង់ ប៉ះសម្តីគ្នានៅUN បន្ទាប់ពីទីក្រុងតេអេរ៉ង់ទទួលបានតួនាទី មិនរីកសាយនុយក្លេអ៊ែរ

សហរដ្ឋអាមេរិក និងអ៊ីរ៉ង់ បានប៉ះសម្តីគ្នានៅអង្គការសហប្រជាជាតិកាលពីថ្ងៃចន្ទ ទី២៧ ខែមេសា ជុំវិញកម្មវិធីនុយក្លេអ៊ែររបស់ទីក្រុងតេអេរ៉ង់ និងការជ្រើសរើសឱ្យធ្វើជាអនុប្រធានម្នាក់ក្នុងចំណោមអនុប្រធានរាប់សិបនាក់នៅក្នុងសន្និសីទរយៈពេលមួយខែ ដើម្បីពិនិត្យឡើងវិញនូវសន្ធិសញ្ញាមិនរីកសាយអាវុធនុយក្លេអ៊ែរ(NPT)។ សន្និសីទលើកទី១១ ដើម្បីពិនិត្យឡើងវិញនូវការអនុវត្តសន្ធិសញ្ញាមិនរីកសាយអាវុធនុយក្លេអ៊ែរ (NPT) ដែលបានចូលជាធរមាននៅក្នុងឆ្នាំ១៩៧០ បានចាប់ផ្តើមកាលពីថ្ងៃចន្ទនៅអង្គការសហប្រជាជាតិ ក្នុងទីក្រុងញូវយ៉ក។ ក្រុមផ្សេងៗគ្នា បានតែងតាំងអនុប្រធានសន្និសីទចំនួន៣៤រូប ហើយប្រធានសន្និសីទ ឯកអគ្គរដ្ឋទូតវៀតណាមប្រចាំអង្គការសហប្រជាជាតិ លោក Do Hung Viet បាននិយាយថា អ៊ីរ៉ង់ត្រូវបានជ្រើសរើសដោយ «ក្រុមរដ្ឋមិនមែនបក្សសម្ព័ន្ធ និងរដ្ឋដទៃទៀត»។ លោក Christopher Yeaw ឧបការីរដ្ឋមន្ត្រីទទួលបន្ទុកការិយាល័យគ្រប់គ្រងអាវុធ និងមិនរីកសាយអាវុធសហរដ្ឋអាមេរិក បាននិយាយក្នុងសន្និសីទថា ការជ្រើសរើសអ៊ីរ៉ង់គឺជា «ការប្រមាថ» ចំពោះសន្ធិសញ្ញាមិនរីកសាយអាវុធនុយក្លេអ៊ែរ (NPT)។ វា «មិនអាចប្រកែកបាននោះទេថា អ៊ីរ៉ង់បានបង្ហាញជាយូរមកហើយនូវការប្រមាថរបស់ខ្លួនចំពោះការប្តេជ្ញាចិត្តចំពោះការមិនរីកសាយអាវុធនៃសន្ធិសញ្ញាមិនរីកសាយអាវុធនុយក្លេអ៊ែរ(NPT)» ហើយបានបដិសេធមិនសហការជាមួយអង្គការឃ្លាំមើលនុយក្លេអ៊ែររបស់អង្គការសហប្រជាជាតិ ដើម្បីដោះស្រាយបញ្ហាអំពីកម្មវិធីរបស់ខ្លួន។ លោកបានចាត់ទុកការជ្រើសរើសអ៊ីរ៉ង់ថា «ហួសពីភាពអាម៉ាស់ និងជាការអាម៉ាស់ចំពោះភាពជឿជាក់នៃសន្និសីទ»។ លោក Reza Najafi ដែលជាឯកអគ្គរដ្ឋទូតរបស់ទីក្រុងតេអេរ៉ង់ប្រចាំនៅទីភ្នាក់ងារថាមពលអាតូមិកអន្តរជាតិ បានច្រានចោលសេចក្តីថ្លែងការណ៍របស់សហរដ្ឋអាមេរិកថា «គ្មានមូលដ្ឋាន និងមានហេតុផលនយោបាយ»។ បញ្ហានុយក្លេអ៊ែរគឺជាចំណុចកណ្តាលនៃសង្គ្រាមរយៈពេលពីរខែរបស់សហរដ្ឋអាមេរិកនិងអ៊ីស្រាអែល ជាមួយប្រទេសអ៊ីរ៉ង់ដោយប្រធានាធិបតីអាមេរិក លោក ដូណាល់ ត្រាំ បានបញ្ជាក់ជាថ្មីកាលពីថ្ងៃអាទិត្យថា អ៊ីរ៉ង់មិនអាចមានអាវុធនុយក្លេអ៊ែរបានឡើយ។

តម្លៃប្រេងកើនឡើង ខណៈការប្រឈមដាក់គ្នាក្នុងសង្គ្រាមអ៊ីរ៉ង់-អាមេរិក ហាក់ពុំមានពន្លឺនៃការបញ្ចប់នៅឡើយ

តម្លៃប្រេងបានបន្តកើនឡើងនៅថ្ងៃអង្គារ ២៨មេសាសប្ដាហ៍នេះ ខណៈកិច្ចខិតខំប្រឹងប្រែងដើម្បីបញ្ចប់សង្គ្រាមអាមេរិក-អ៊ីរ៉ង់ហាក់ដូចជាជាប់គាំង ដោយផ្លូវទឹកដ៏សំខាន់នៃច្រកសមុទ្រហ័រមូស (Strait of Hormuz)នៅតែបិទ ដែលធ្វើឱ្យការផ្គត់ផ្គង់ថាមពលពីតំបន់ផលិតប្រេងដ៏សំខាន់នៅមជ្ឈិមបូព៌ា មិនស្ថិតស្ថេរសម្រាប់អតិថិជនសកល។មន្ត្រីអាមេរិកម្នាក់បាននិយាយកាលពីថ្ងៃចន្ទ ២៧មេសាសប្ដាហ៍នេះថា ប្រធានាធិបតីអាមេរិក Donald Trump មិនពេញចិត្តនឹងសំណើចុងក្រោយរបស់អ៊ីរ៉ង់ដែលមានគោលបំណងបញ្ចប់សង្គ្រាមនោះទេ។ ប្រភពព័ត៌មានអ៊ីរ៉ង់បានបង្ហាញកាលពីថ្ងៃចន្ទដែរថា សំណើរបស់ទីក្រុងតេអេរ៉ង់ បានជៀសវាងការដោះស្រាយកម្មវិធីនុយក្លេអ៊ែររបស់ខ្លួន រហូតដល់អរិភាពឈប់ ហើយជម្លោះដឹកជញ្ជូននៅឈូងសមុទ្រនឹងត្រូវបានដោះស្រាយ។ ការមិនពេញចិត្តរបស់លោក Trump ចំពោះការផ្តល់ជូនរបស់អ៊ីរ៉ង់ បានធ្វើឱ្យជម្លោះជាប់គាំង ដោយអ៊ីរ៉ង់បិទលំហូរដឹកជញ្ជូនឆ្លងកាត់ច្រកសមុទ្រហ័រមូស ដែលជាធម្មតាដឹកជញ្ជូនស្មើនឹងប្រហែល២០% នៃការប្រើប្រាស់ប្រេង និងឧស្ម័នសកល ហើយសហរដ្ឋអាមេរិកនៅតែបិទច្រកកំពង់ផែអ៊ីរ៉ង់។ តម្លៃប្រេងឆៅ Brent សម្រាប់ខែមិថុនាបានកើនឡើង ៤៥ សេន ឬ ០,៤% ដល់ ១០៨,៦៨ ដុល្លារក្នុងមួយបារ៉ែល គិតត្រឹមម៉ោង ០០:៥១នាទីម៉ោងសកល បន្ទាប់ពីបានកើនឡើង ២,៨% នៅក្នុងវគ្គមុន ដល់កម្រិតខ្ពស់បំផុតក្នុងពេលបិទការជួញដូរចាប់តាំងពីថ្ងៃទី ៧ ខែមេសា។ តម្លៃប្រេងឆៅ West Texas Intermediate (WTI) របស់សហរដ្ឋអាមេរិក ដែរ សម្រាប់ខែមិថុនាបានកើនឡើង ៥៨ សេន ឬ ០,៦% ដល់ ៩៦,៩៦ ដុល្លារក្នុងមួយបារ៉ែល បន្ទាប់ពីបានកើនឡើង ២,១% នៅក្នុងវគ្គជួញដូរមុន៕

អ៊ីរ៉ង់ថ្លឹងថ្លែងការចរចាជាមួយអាមេរិក ខណៈទីក្រុងវ៉ាស៊ីនតោន ពិនិត្យឡើងវិញលើសំណើថ្មីរបស់ទីក្រុងតេអេរ៉ង់

រដ្ឋមន្ត្រីការបរទេសអ៊ីរ៉ង់ លោក Seyed Abbas Araghchi បានបង្ហោះនៅលើបណ្ដាញ Telegram កាលពីថ្ងៃចន្ទ២៧មេសាសប្ដាហ៍នេះថា អ៊ីរ៉ង់កំពុងពិចារណាសំណើរបស់ប្រធានាធិបតីអាមេរិក លោក Donald Trump សម្រាប់ការចរចា។ លោក Araghchi បាននិយាយក្នុងអំឡុងពេលដំណើរទស្សនកិច្ចរបស់លោកទៅកាន់ប្រទេសរុស្ស៊ីកាលពីព្រឹកថ្ងៃចន្ទថា ទម្លាប់បំផ្លិចបំផ្លាញ របស់សហរដ្ឋអាមេរិក ជាពិសេសការទទូចលើការទាមទារមិនសមហេតុផល ការផ្លាស់ប្តូរជំហរជាញឹកញាប់ ការគំរាមកំហែងដោយវោហារសាស្ត្រ និងការរំលោភលើការសន្យាជាបន្តបន្ទាប់ គឺជាកត្តាដែលធ្វើឱ្យវឌ្ឍនភាពការទូតយឺតយ៉ាវ។ លោក Trump និងក្រុមសន្តិសុខជាតិរបស់លោកកំពុងវាយតម្លៃសំណើសន្តិភាពរបស់អ៊ីរ៉ង់ ក្នុងបំណងបញ្ឈប់សង្គ្រាម និងបើកច្រកសមុទ្រ Hormuz ឡើងវិញ ខណៈក៏ពន្យារពេលការពិភាក្សាលើកម្មវិធីនុយក្លេអ៊ែររបស់ខ្លួនផងដែរ។ទន្ទឹមនឹងនេះ អគ្គលេខាធិការអង្គការសហប្រជាជាតិ លោក Antonio Guterres កាលពីថ្ងៃចន្ទបានអំពាវនាវឱ្យបើកច្រកសមុទ្រ Hormuz ឡើងវិញ ខណៈតម្លៃប្រេងបានកើនឡើងម្តងទៀត។លោកបានថ្លែងនៅក្នុងកិច្ចពិភាក្សាបើកចំហរបស់ក្រុមប្រឹក្សាសន្តិសុខស្តីពីសុវត្ថិភាព និងការការពារផ្លូវទឹកនៅក្នុងដែនសមុទ្រថា សិទ្ធិ និងសេរីភាពក្នុងការធ្វើនាវាចរណ៍តាមរយៈច្រកសមុទ្រ Hormuz ត្រូវតែគោរព ។ គោលការណ៍ទាំងនេះត្រូវតែត្រូវបានគាំទ្រយ៉ាងពេញលេញ និងដោយគ្មានការពន្យារពេល។លោកGuterres បានថ្លែងថា រូបលោកសូមអំពាវនាវដល់ភាគីនានា សូមបើកច្រកសមុទ្រ អនុញ្ញាតឱ្យនាវាឆ្លងកាត់ គ្មានការរំខាន គ្មានការរើសអើង អនុញ្ញាតឱ្យពាណិជ្ជកម្មបន្តឡើងវិញ អនុញ្ញាតឱ្យសេដ្ឋកិច្ចពិភពលោកដកដង្ហើមបានស្រួល៕

[UPDATE] ជនសង្ស័យបាញ់ប្រហារនៅពិធីទទួលទានអាហារពេលល្ងាចនៅទីក្រុងវ៉ាស៊ីនតោនត្រូវបានចោទប្រកាន់ពីបទព្យាយាមធ្វើឃាតលោក Trump

បុរសដែលត្រូវបានចោទប្រកាន់ពីបទបើកការបាញ់ប្រហារនៅឯពិធីទទួលទានអាហារពេលល្ងាចនៅទីក្រុងវ៉ាស៊ីនតោន ចូលរួមដោយលោក Donald Trump ត្រូវបានចោទប្រកាន់កាលពីថ្ងៃចន្ទ ២៧ មេសា សប្ដាហ៍នេះពីបទប៉ុនប៉ងធ្វើឃាតប្រធានាធិបតីអាមេរិក ហើយអាចប្រឈមនឹងការជាប់ពន្ធនាគារអស់មួយជីវិត ប្រសិនបើត្រូវបានផ្តន្ទាទោស។ លោក Cole Tomas Allen អាយុ៣១ឆ្នាំ បានស្លៀកសម្លៀកបំពាក់អ្នកទោសដោយពាក់អាវពណ៌ខៀវ វាលករាងអក្ស V នឹងស្លៀកខោពណ៌ខៀវ នៅក្នុងការបង្ហាញខ្លួនលើកដំបូងរបស់គេក្នុងតុលាការសហព័ន្ធទីក្រុងវ៉ាស៊ីនតោន ពីរថ្ងៃបន្ទាប់ពីក្រុមអាជ្ញាធរបាននិយាយថាខ្មាន់កាំភ្លើងរូបនេះ បានបើកការវាយប្រហារមិនជោគជ័យនៅឯពិធីអាហារពេលល្ងាចរបស់សមាគមអ្នកឆ្លើយឆ្លងព័ត៌មានសេតវិមាន ជាការជួបជុំប្រចាំឆ្នាំរបស់អ្នកកាសែត និងអ្នកនយោបាយដែលមានក្រវ៉ាត់កពណ៌ខ្មៅ។ ដៃរបស់គេត្រូវបានដាក់ខ្នោះពាត់ទៅក្រោយនៅពេលរូបគេត្រូវបាននាំចូល និងចេញពីបន្ទប់សវនាការ។រដ្ឋអាជ្ញាលោកស្រី Jocelyn Ballantine បាននិយាយថា ជនសង្ស័យបានព្យាយាមធ្វើឃាតប្រធានាធិបតីសហរដ្ឋអាមេរិក លោក Donald J Trump។រដ្ឋអាជ្ញាស្តីទី លោក Todd Blanche បានប្រាប់ក្រុមអ្នកសារព័ត៌មានបន្ទាប់ពីសវនាការថា ក្រុមអ្នកស៊ើបអង្កេតជឿថាជនល្មើស Allen បានកំណត់គោលដៅលើលោក Trump មួយផ្នែកដោយសារតែរូបគេហាក់ដូចជាសំដៅទៅលើប្រធានាធិបតីថាជា "ជនក្បត់ជាតិ" និងពាក្យប្រៀបធៀបផ្សេងទៀតនៅក្នុងសារអេឡិចត្រូនិកដែលរូបគេបានផ្ញើទៅសាច់ញាតិនៅយប់កើតហេតុការណ៍នោះ។ហេតុការណ៍នេះគឺជាអំពើហិង្សានយោបាយចុងក្រោយបង្អស់នៅក្នុងសហរដ្ឋអាមេរិក។ សកម្មជននយោបាយអភិរក្សនិយម លោក Charlie Kirk ត្រូវបានបាញ់សម្លាប់នៅក្នុងការជួបជុំមួយកាលពីខែកញ្ញាឆ្នាំមុន ជាច្រើនខែបន្ទាប់ពីសមាជិកសភារដ្ឋ Minnesota មកពីគណបក្សប្រជាធិបតេយ្យ និងស្វាមីរបស់លោកស្រីត្រូវបានសម្លាប់។ លោក Trump ផ្ទាល់គឺជាគោលដៅនៃការប៉ុនប៉ងធ្វើឃាតពីរលើកក្នុងយុទ្ធនាការបោះឆ្នោតប្រធានាធិបតីឆ្នាំ ២០២៤ ៕

លោក Rubio៖ អាមេរិកនឹងមិនអត់ធ្មត់ចំពោះការគ្រប់គ្រង ឬការឲ្យបង់ប្រាក់របស់អ៊ីរ៉ង់នៅច្រកសមុទ្រ Hormuz ឡើយ

លោក Marco Rubio រដ្ឋមន្ត្រីការបរទេសសហរដ្ឋអាមេរិក បាននិយាយថា ជំហររបស់អ៊ីរ៉ង់នៅច្រកសមុទ្រ Hormuz ជាផ្លូវទឹកសំខាន់មួយដែលប្រេងនិងឧស្ម័នធម្មជាតិរាវមួយភាគប្រាំរបស់ពិភពលោកជាធម្មតាឆ្លងកាត់ មិនបានបំពេញតាមការទាមទាររបស់សហរដ្ឋអាមេរិកទេ។លោក Rubio បាននិយាយនៅក្នុងបទសម្ភាសន៍ជាមួយសារព័ត៌មាន Fox News កាលពីថ្ងៃចន្ទ ទី២៧ ខែមេសា ថា «ប្រសិនបើ អ្វីដែលពួកគេចង់និយាយដោយការបើកច្រកសមុទ្រ «ពិតណាស់ ច្រកសមុទ្របើក ដរាបណាអ្នកសម្របសម្រួលជាមួយអ៊ីរ៉ង់ និងទទួលបានការអនុញ្ញាតពីយើង បើមិនដូច្នេះទេយើងនឹងបំផ្ទុះអ្នក ហើយអ្នកត្រូវបង់ប្រាក់ឱ្យយើង» នោះ ពុំមែនជាការបើកច្រកសមុទ្រទេ»។ លោកបាននិយាយថា «អ៊ីរ៉ង់មិនអាចធ្វើឱ្យមានលក្ខណៈប្រក្រតីបានទេ ហើយយើងក៏មិនអាចអត់ធ្មត់ចំពោះពួកគេដែលកំពុងព្យាយាមធ្វើឱ្យមានលក្ខណៈប្រក្រតីដែរ ជាប្រព័ន្ធមួយដែលអ៊ីរ៉ង់សម្រេចថាអ្នកណាអាចប្រើប្រាស់ផ្លូវទឹកអន្តរជាតិ និងតើចំនួនប៉ុន្មានដែលអ្នកត្រូវបង់ប្រាក់ឱ្យពួកគេដើម្បីប្រើប្រាស់ច្រកសមុទ្រ»។ ទន្ទឹមនឹងនេះ ប្រធានាធិបតីសហរដ្ឋអាមេរិក លោក Donald Trump បានជួបជាមួយទីប្រឹក្សាសន្តិសុខជាន់ខ្ពស់របស់លោកកាលពីថ្ងៃចន្ទ ដើម្បីពិភាក្សាអំពីសំណើរបស់អ៊ីរ៉ង់ ដែលតាមសេចក្តីរាយការណ៍ថានឹងបើកច្រកសមុទ្រ Hormuz ឡើងវិញ ខណៈការចរចាជុំវិញសង្គ្រាមនៅតែបន្ត នេះបើយោងតាមសេតវិមាន។ នៅពេលត្រូវបានសួរអំពីផែនការដែលត្រូវបានរាយការណ៍ ដែលនឹងមើលឃើញទាំងអ៊ីរ៉ង់ និងសហរដ្ឋអាមេរិក ដកចេញការបិទផ្លូវរបស់ខ្លួន នៅមុនកិច្ចចរចាបន្ថែមទៀតលើបញ្ហាដ៏ស្មុគស្មាញនៃកម្មវិធីនុយក្លេអ៊ែររបស់ទីក្រុងតេអេរ៉ង់ នោះអ្នកនាំពាក្យលោកស្រី Karoline Leavitt បាននិយាយក្នុងសន្និសីទសារព័ត៌មាននៅសេតវិមានថា «សំណើនេះ កំពុងត្រូវបានពិភាក្សា»។

បណ្ដាញសង្គម

ព័ត៌មានថ្មីៗ

វេជ្ជបណ្ឌិត៖ សុខភាពលោក Trump គឺល្អប្រសើរណាស់ ប៉ុន្តែគួរតែសម្រកទម្ងន់

អ្នកនៅរស់ពីការជាប់ក្នុងរូងភ្នំ នៅឡាវ បានបរិភោគថាសឈើសម្រាប់រែងមាស ដើម្បីបន្តជីវិត

មនុស្ស ១៨នាក់ស្លាប់ និង ៣០នាក់រងរបួស ដោយសាររថយន្តដឹកជនភៀសខ្លួន ក្រឡាប់នៅភាគខាងកើតអាហ្វហ្គានីស្ថាន

សេតវិមាន៖ លោក Trump «នឹងធ្វើតែកិច្ចព្រមព្រៀងដែលល្អសម្រាប់អាមេរិកប៉ុណ្ណោះ» ជាមួយអ៊ីរ៉ង់

នាយករដ្ឋមន្ត្រី៖ កាណាដា និងចិន កំពុងសាង «ភាពជាដៃគូប្រកបដោយស្ថិរភាព និងការស្ថាបនាបន្ថែមទៀត»

រដ្ឋមន្រ្ដីក្រសួងការងារ ចុះពិនិត្យមើលខ្សែច្រវាក់ផលិតកម្មក្រុមហ៊ុន THACO AGRI ក្នុងខេត្តក្រចេះ ដែលផ្តល់ឱកាសការងារប្រមាណ២ម៉ឺននាក់ និងផ្ទេរជំនាញបច្ចេកទេសកសិកម្មទំនើប

របាយការណ៍៖ សភាអាមេរិកកំពុងធ្វើសមាហរណកម្មកងកម្លាំងយោធាអាមេរិក និងអ៊ីស្រាអែលដោយស្ងាត់ៗ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877