BTV NEWS

ក្រុមអ្នកជួយសង្គ្រោះ៖ មនុស្ស ៤នាក់ទៀតដែលជាប់ក្នុងរូងភ្នំ នៅឡាវ ត្រូវបាននាំចេញដោយសុវត្ថិភាព

លោក Hegseth៖ យុគសម័យឧបត្ថម្ភធនការពារជាតិពីអាមេរិក សម្រាប់ «ប្រទេសអ្នកមាន» ចប់ហើយ

មន្ត្រីជាន់ខ្ពស់អ៊ីរ៉ង់ និយាយថា លោក Trump «ក្បត់ការទូត» ដោយបន្តបិទខ្ទប់ដោយទ័ពជើងទឹកអាមេរិក

វេជ្ជបណ្ឌិត៖ សុខភាពលោក Trump គឺល្អប្រសើរណាស់ ប៉ុន្តែគួរតែសម្រកទម្ងន់

ព័ត៌មានអន្តរជាតិ

ប្រធានអាជ្ញាធរប៉ាឡេស្ទីនទទួលបានជ័យជម្នះក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់កាលពីចុងសប្តាហ៍មុន

ក្រុមអ្នកស្មោះត្រង់ជាមួយប្រធានអាជ្ញាធរប៉ាឡេស្ទីន លោក Mahmoud Abbas បានទទួលជ័យជម្នះក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់ កាលពីថ្ងៃសៅរ៍ ទី២៥ ខែមេសា ឆ្នាំ២០២៦នេះ ដោយទទួលបានសម្លេងគាំទ្រនៅក្នុងឃុំសង្កាត់ភាគច្រើន រួមទាំងឃុំនៅតំបន់ការហ្កាហ្សាថែមទៀតក្នុងការបោះឆ្នោតនៅឆ្នាំនេះ ។នេះជាលើកដំបូងហើយ ចាប់តាំងពីសង្រ្គាមនៅហ្កាហ្សាបានផ្ទុះឡើង កាលពីឆ្នាំ២០២៣ ហើយប្រជាជនប៉ាឡេស្ទីន នៅតំបន់ស៊ីហ្សកដានី និងនៅតំបន់ហ្កាហ្សា ជាង១លាននាក់ បានចុះឈ្មោះបោះឆ្នោត ដោយដំណើរការបោះឆ្នោតលើកនេះ បានប្រព្រឹត្តទៅយ៉ាងរលូន ដោយគ្មានការប្រឆាំងពីក្រុមប្រដាប់អាវុធហាម៉ាស ដែលជាអ្នកតែងតែជំទាស់នឹងការរៀបចំការបោះឆ្នោត ។ការបោះឆ្នោតនេះ មានប្រជាជនប៉ាឡេស្ទីនចំនួនជាង១លាននាក់ បានចុះឈ្មោះបោះឆ្នោត ហើយក្នុងនោះតំបន់ស៊ីហ្សកដានី មានប្រជាជនចំនួនប្រមាណ១លាន៥សែននាក់ និងមានឃុំសង្កាត់ចំនួន ១៨២ ហើយចំណែកតំបន់ហ្កាហ្សាវិញ មានប្រជាជនតែ៧ម៉ឺននាក់ និងមានសង្កាត់តែមួយប៉ុណ្ណោះ ដែលស្ថិតនៅតំបន់ Deir el-Balah ភាគកណ្តាលតំបន់ហ្កាហ្សា ។ ប្រជាពលរដ្ឋឡេស្ទីនប្រមាណ ២៤,៥៣% តែប៉ុណ្ណោះបានចេញទៅបោះឆ្នោត ហើយក្រុមប្រដាប់អាវុធហាម៉ាស ដែលកំពុងគ្រប់ដែនដីហ្កាហ្សាជាងពាក់កណ្តាល និងជាអ្នកតែងតែជំទាស់នឹងការរៀបចំការបោះឆ្នោត មិនបានឈរឈ្មោះបោះឆ្នោតជ្រើសរើសក្រុមប្រឹក្សាឃុំសង្កាត់នៅឆ្នាំនេះទេ ៕

ព្រះមហាក្សត្រ Charles និងម្ចាស់ក្សត្រីរបស់ចក្រភពអង់គ្លេស យាងបំពេញទស្សនកិច្ចទៅកាន់សហរដ្ឋអាមេរិកតាមការគ្រោងទុក បើទោះបីជាមានបញ្ហាសន្តិសុខនៅអាមេរិកកាលពីសប្តាហ៍មុន

ប្រភពពីព្រះរាជវាំង Buckingham Palace បានឱ្យដឹងថា ព្រះមហាក្សត្រ Charles និងម្ចាស់ក្សត្រី Camilla បានយាងបំពេញព្រះរាជទស្សនកិច្ចទៅកាន់សហរដ្ឋអាមេរិកតាមការគ្រោងទុក នៅថ្ងៃចន្ទ ទី២៧ ខែមេសា ឆ្នាំ២០២៦នេះ បើទោះបីជាសហរដ្ឋអាមេរិកមានបញ្ហាសន្តិសុខ កាលពីចុងសប្តាហ៍មុនក៏ដោយ ។សូមរំលឹកជូនថា កាលពីថ្ងៃសៅរ៍ ទី២៦ ខែមេសា ឆ្នាំ២០២៦នេះ ប្រធានាធិបតីរបស់សហរដ្ឋអាមេរិក លោក Donald Trump បានរៀបចំពិធីជួបជុំសមាគមអ្នកសារព័ត៌មានមួយនៅទីក្រុងវ៉ាស៊ីនតោន ហើយខណៈដែលពិធីកំពុងប្រព្រឹត្តទៅ ខ្មាន់កាំភ្លើងម្នាក់ដែលមានអាវុធ និងកាំបិតជាប់ខ្លួន និងមានបំណងធ្វើឃាតលោក Donald Trump បានសម្រុកចូលក្នុងពិធីនោះ និងបានបាញ់ប្រហារជាច្រើនគ្រាប់ ប៉ុន្តែលោក Donald Trump មានសុវត្ថិភាព ។ ព្រះរាជវាំង Buckingham Palace បានឱ្យដឹងថា ព្រះរាជដំណើរទស្សនកិច្ចរបស់ព្រះមហាក្សត្រ Charles និងម្ចាស់ក្សត្រី Camilla ទៅកាន់សហរដ្ឋអាមេរិក គឺមានបំណងពង្រឹងទំនាក់ទំនងទ្វេភាគី ចក្រភពអង់គ្លេស និងសហរដ្ឋអាមេរិក ខណៈដែលប្រទេសមហាអំណាចទាំងពីរមានភាពរកាំរកុះផ្នែកការទូត ។ក្រុមភ្នាក់ងារសន្តិសុខសម្រាប់ព្រះរាជវង្សចក្រភពអង់គ្លេស បានឱ្យដឹងថា ពួកគេមានកិច្ចសហប្រតិបត្តិការជាមួយទីភ្នាក់ងារសេវាកម្មសន្តិសុខសម្ងាត់របស់សហរដ្ឋអាមេរិក ដើម្បីធានាសន្តិសុខថ្វាយព្រះមហាក្សត្រ និងម្ចាស់ក្សត្រី ក្នុងអំឡុងពេលព្រះរាជដំណើរទស្សនកិច្ចនេះ ៕

អ្នកឃ្លំាមើលនុយក្លេអ៊ែរ៖ គ្រោះមហន្តរាយ Chornobyl មិនមែនជាប្រវត្តិសាស្រ្តនោះទេ តែជាទំនួលខុសត្រូវចំពោះអាយុជីវិតមនុស្ស

ប្រធានក្រុមឃ្លាំមើលនុយក្លេអ៊ែរអង្គការសហប្រជាជាតិ(UN)និយាយនៅខួបលើកទី ៤០នៃគ្រោះមហន្តរាយវិទ្យុសកម្មដ៏អាក្រក់បំផុតរបស់ពិភពលោកថា គ្រោះមហន្តរាយនុយក្លេអ៊ែរ Chornobyl ពុំត្រូវបានគេមើលឃើញថា ជាប្រវត្តិសាស្រ្តនោះទេ ប៉ុន្តែវាគឺជាទំនួលខុសត្រូចំពោះអាយុជីវិតមនុស្ស ។ លោក Rafael Grossi គឺជាប្រធានទីភ្នាក់ងារថាមពលអាតូមិកអន្តរជាតិ(IAEA)និយាយនៅក្នុងសារជាវីដេអូដែលបានបញ្ចេញកាលពីថ្ងៃអាទិត្យថា អង្គការរបស់លោក បានធ្វើការក្នុងរយៈពេល ៤០ឆ្នាំកន្លងមកនេះ ជាមួយអ៊ុយក្រែន ដើម្បីយល់ឲ្យច្បាស់ពីអ្វីដែលបានកើតឡើង ដើម្បីលាតត្រដាងការពិត ហើយនិងគាំទ្រដំណើរការយូរអង្វែងនៃការកែលម្អឡើងវិញ និងការសា្តឡើងវិញ ។ លោកថា បច្ចុប្បន្នតំបន់ជាច្រើននៅតំបន់លើកលែងជុំវិញរោងចក្រ បានបិទកម្រិតធម្មតានៃសារធាតុវិទ្យុសកម្ម ប៉ុន្តែតំបន់ខ្លះទៀត ជាពិសេសនៅជុំវិញម៉ាស៊ីនរ៉េអាក់ទ័ររងការបំផ្លិចបំផ្លាញ នៅតែមានកម្រិតបំពុលខ្ពស់ ។ កាលពីឆ្នាំមុន ការវាយប្រហារយានដ្រូនរុស្ស៊ី បានធ្វើឲ្យរហែកឧបករណ៍ការពារគម្របម៉ាស៊ីនរ៉េអាក់ទ័រនុយក្លេអ៊ែរ Chornobyl ដែលរងគ្រោះដោយសារគ្រោះមហន្តរាយ ស្ទើតែធ្វើឲ្យកើតមានសោកនាដកម្មមួយទៀតទៅហើយ ។ លោក Grossi និយាយថា ក្រុមការងាររបស់ពួកយើង បន្តនៅរោងចក្រថាមពលនុយក្លេអ៊ែរទាំងអស់របស់អ៊ុយក្រែន ដើម្បីគាំទ្រសុវត្ថិភាពនុយក្លេអ៊ែរ ហើយនិងបន្តជូនដំណឹងដល់ពិភពលោកពីអ្វីដែលកំពុងកើតឡើង ៕

អាជ្ញាធរសន្តិសុខដែនសមុទ្រអង់គ្លេស៖ នាវាដឹកទំនិញមួយគ្រឿង ត្រូវបានប្លន់នៅឆ្នេរសមុទ្រសូម៉ាលី

មជ្ឈមណ្ឌលប្រតិបត្តិការពាណិជ្ជកម្មដែនសមុទ្រចក្រភពអង់គ្លេស (UKMTO) បាននិយាយនៅក្នុងសេចក្តីថ្លែងការណ៍មួយថា នាវាដឹកទំនិញមួយគ្រឿង ត្រូវបានគេប្លន់ នៅចម្ងាយជាង ៩ គីឡូម៉ែត្រ ភាគឦសាននៃទីក្រុង Garacad ប្រទេសសូម៉ាលី។ សេចក្តីថ្លែងការណ៍នេះ បានឲ្យដឹងថា៖«UKMTO បានទទួលរបាយការណ៍អំពីឧប្បត្តិហេតុមួយ នៅជាង ៩ គីឡូម៉ែត្រ ភាគឦសាននៃ Garacad ប្រទេសសូម៉ាលី»។យោងតាម UKMTO មនុស្សដែលគ្មានការអនុញ្ញាត បានគ្រប់គ្រងនាវាដឹកទំនិញមួយគ្រឿង ដែលត្រូវបានបញ្ជូនចូលក្នុងដែនទឹកនេះ»៕

នាយករដ្ឋមន្ត្រីជប៉ុន សម្រេចមិនអនុវត្តវិធានការកញ្ចប់ថវិកាបន្ថែម សម្រាប់ពេលនេះ

នាយករដ្ឋមន្ត្រីជប៉ុន លោកស្រី Sanae Takaichi នៅថ្ងៃចន្ទ (ទី២៧ ខែមេសា ឆ្នាំ២០២៦) នេះ បាននិយាយថា លោកស្រីមិនបានឃើញតម្រូវការបន្ទាន់ណាមួយ ក្នុងការរៀបចំកញ្ចប់ថវិកាបន្ថែមនោះទេ ប៉ុន្តែបានសន្យាថា នឹងឆ្លើយតប «ប្រកបដោយភាពបត់បែន» អាស្រ័យលើកម្រិតនៃការខូចខាតសេដ្ឋកិច្ច ដោយសារជម្លោះ នៅតំបន់មជ្ឈិមបូព៌ា។ការកត់សម្គាល់នេះធ្វើឡើងបន្ទាប់ពីមានការអំពាវនាវកាន់តែខ្លាំងឡើង ពីសមាជិកសភានៃគណបក្សកាន់អំណាច និងប្រឆាំង ឲ្យរដ្ឋាភិបាលរៀបចំកញ្ចប់វិធានការថ្មី ដើម្បីទប់ស្កាត់ផលប៉ះពាល់ ដោយសារការហក់ឡើងនូវតម្លៃប្រេង និងការរំខានដល់ការផ្គត់ផ្គង់ដែលបណ្តាលមកពីសង្គ្រាមអ៊ីរ៉ង់។លោកស្រី Takaichi បានប្រាប់សភាថា៖ «បច្ចុប្បន្ននេះ ខ្ញុំមិនឃើញតម្រូវការ ក្នុងការរៀបចំកញ្ចប់ថវិកាបន្ថែមនោះទេ»។ លោកស្រីបានបន្ថែមថា រដ្ឋាភិបាលនៅតែមានថវិកាគ្រប់គ្រាន់ ដើម្បីចំណាយលើការឧបត្ថម្ភធនប្រេងឥន្ធនៈ។យ៉ាងណាក្ដី លោកស្រីបានសង្កត់ធ្ងន់ថា៖ «ប៉ុន្តែសភាពការណ៍វិវត្ត នៅតំបន់មជ្ឈិមបូព៌ា ពិបាកនឹងមើលឃើញជាមុនណាស់។ យើងនឹងតាមដានដោយប្រុងប្រយ័ត្ន ចំពោះផលប៉ះពាល់លើសេដ្ឋកិច្ចរបស់ជប៉ុន និងចាត់វិធានការចាំបាច់ប្រកបដោយភាពបត់បែន»។ជាមួយគ្នានេះ លោកស្រី Takaichi ក៏បានលើកឡើងផងដែរថា រដ្ឋាភិបាលមិនគួរចាត់វិធានការ ដើម្បីទប់ស្កាត់សកម្មភាពសេដ្ឋកិច្ចទេ ទោះបីជាមានក្ដីបារម្ភ ដែលថា ប្រទេសជប៉ុនអាចនឹងជួបប្រទះការខ្វះខាតប្រេងឆៅ និងផលិតផលទាក់ទងនឹងប្រេង ដោយសារតែការបិទច្រកសមុទ្រ Hormuz ប្រកបដោយប្រសិទ្ធភាពក៏ដោយ៕

ទីក្រុងមូស្គូរបស់រុស្ស៊ី រងការវាយប្រហារពីព្យុះព្រិលកម្រដ៏ខ្លាំងក្លាក្នុងខែមេសា

ប្រជាពលរដ្ឋរស់នៅក្នុងទីក្រុងមូស្គូរបស់រុស្ស៊ី ភ្ញាក់ឡើងឃើញទីក្រុងរបស់ពួកគេគ្របដណ្តប់ដោយព្រិលនោព្រឹកថ្ងៃចន្ទនេះ ស្របពេលរងការវាយប្រហារពីព្យុះព្រិល ដែលជាព្យុះព្រិលដ៏កម្រខុសពីធម្មតានៅចុងខែមេសា ។ ដើមឈើជាច្រើនបានបាក់ដោយសារទ្រព្រិលដ៏ធ្ងន់ ហើយនិងខ្យល់បក់ខ្លាំង ក្នុងនោះរថយន្តខូចខាតមួយចំនួន បានចតចោលនៅក្បែរគ្នា ។ លោក Alexander ដែលរថយន្តរបស់លោកស្ថិតនៅក្រោមមែកឈើបាក់ និយាយប្រាប់ទីភ្នាក់ងារព័ត៌មានរ៉យទ័រថា វាមិនល្អទាល់តែសោះ នៅពេលជួបស្ថានភាពអាកាសធាតុដ៏ចម្លែកខុសពីធម្មតាបែបនេះ ។ ការធ្វើដំណើរដោយថ្មើរជើង ក៏មិនងាយស្រួលនោះដែរ ពេលដែលស្ថានភាពផ្លូវមានព្រិល និងទឹកកកបែបនេះ បង្កឲ្យរអិលខ្លាំង ។ សេចក្តីរាយការណ៍បានឲ្យដឹងថា ដោយសាររយៈចម្ងាយមើលឃើញពុំសូវច្បាស់ និងខ្យល់បក់ខ្លាំង ជើងហោះហើរជាង ៥០វ៉ុល ត្រូវបានផ្អាកនៅតាមអាកាសយានដ្ឋានក្នុងទីក្រុងមូស្កូ ។ សេវាកម្មសង្រ្គោះបន្ទាន់ បានប្រកាសការគំរាមកំហែងអាកាសធាតុក្នុងកម្រិតពណ៌លឿងទុំ ហើយការតាំងលំនៅ ៥០កន្លែងនៅតំបន់មូស្កូ ត្រូវបានរាយការណ៍ថា រងផលប៉ះពាល់ដោយសារការកាត់ផ្តាច់ចរន្តអគ្គិសនី ។ យោងតាមការព្យាករអាកាសធាតុ បានឲ្យដឹងថា នៅពុំទានមានទិន្នន័យផ្លូវការពីអ្នករងរបួសនោះទេ ។ ព្រិល និងភ្លៀងធ្លាក់ ត្រូវបានគេរំពឹងថា នឹងកើតមានរយៈពេល ១ថ្ងៃទៀត ហើយក្រោយមក សីតុណ្ហភាពនឹងវិលត្រឡប់ទៅរកសភាពធម្មតាវិញ ៕

លោក Trump៖ ការជជែកជាមួយមេដឹកនាំរុស្ស៊ី និងអ៊ុយក្រែន គឺល្អ ខណៈសង្ឃឹមដោះស្រាយសង្គ្រាម

ប្រធានាធិបតីអាមេរិក លោក Donald Trump កាលពីថ្ងៃអាទិត្យ (ទី២៦ ខែមេសា ឆ្នាំ២០២៦) បានប្រាប់ឲ្យដឹងថា លោកមាននូវ «ការសន្ទនាដ៏ល្អ» ជាមួយប្រធានាធិបតីរុស្ស៊ី លោក Vladimir Putin និងមេដឹកនាំអ៊ុយក្រែន លោក Volodymyr Zelenskyy ខណៈដែលលោកមានគោលបំណងដោះស្រាយសង្គ្រាមអ៊ុយក្រែន។នៅក្នុងបទសម្ភាសន៍មួយ ជាមួយកម្មវិធី «The Sunday Briefing» របស់ប្រព័ន្ធផ្សព្វផ្សាយ Fox News លោក Trump បាននិយាយថា៖ «យើងកំពុងធ្វើការ ជុំវិញស្ថានភាពរុស្ស៊ី ពោលគឺរុស្ស៊ី និងអ៊ុយក្រែន ហើយសង្ឃឹមថា យើងនឹងសម្រេចបានលទ្ធផលល្អ»។ ដោយមិនបានបញ្ជាក់ថា តើពេលណាដែលការសន្ទានាតាមទូរស័ព្ទជាមួយមេដឹកនាំទាំង២ ត្រូវបានធ្វើឡើងនោះ លោក Trump បាននិយាយថា៖ «ខ្ញុំពិតជាមានការសន្ទនាជាមួយគាត់ (លោក Putin) ហើយខ្ញុំមានការសន្ទនាជាមួយលោកប្រធានាធិបតី Zelenskyy ហើយនោះគឺជាការសន្ទនាដ៏ល្អ» ។ជាមួយគ្នានេះ មេដឹកនាំអាមេរិកបានបន្ថែមថា «កម្រិតស្អប់ខ្ពើមគ្នា រវាងលោកប្រធានាធិបតី Putin និងលោកប្រធានាធិបតី Zelenskyy គឺជារឿងធ្ងន់ធ្ងរខ្លាំងណាស់។ វាគឺរឿងមិនល្អសោះឡើយ។ ហើយការស្អប់ខ្ពើម គឺជារឿងអាក្រក់។ ការស្អប់ខ្ពើមបែបនេះ គឺជារឿងមិនល្អសោះ នៅពេលដែលអ្នកកំពុងព្យាយាមដោះស្រាយបញ្ហាអ្វីមួយ ប៉ុន្តែវានឹងទទួលបានលទ្ធផលល្អមិនខាន»។គួរបញ្ជាក់ថា លោក Trump បានសន្យាថា នឹងបញ្ចប់សង្គ្រាមដែលបានចាប់ផ្តើមជាមួយនឹងការឈ្លានពានទ្រង់ទ្រាយធំរបស់រុស្ស៊ី លើអ៊ុយក្រែន ក្នុងខែកុម្ភៈ ឆ្នាំ២០២២ ប៉ុន្តែរយៈពេលជាង ១ឆ្នាំនៃអាណត្តិទី២ របស់លោក ជម្លោះនៅតែបន្តមានដដែល៕

ចិនប្ដេជ្ញាថា នឹងចាត់វិធានការតបតវិញ ប្រសិនបើ EU អនុវត្តផែនការ «ផលិតនៅអឺរ៉ុប»

ទីក្រុងប៉េកាំង នៅថ្ងៃចន្ទ (ទី២៧ ខែមេសា ឆ្នាំ២០២៦) នេះ បានរិះគន់ផែនការរបស់សហភាពអឺរ៉ុប (EU) ដែលមានគោលបំណងជំរុញឧស្សាហកម្មរបស់ប្លុកប្រឆាំងនឹងការប្រកួតប្រជែងដ៏ខ្លាំងក្លាពីប្រទេសចិន ដោយប្ដេជ្ញាថា នឹងចាត់វិធានការតបវិញ ប្រសិនបើចំណាត់ការត្រូវបានអនុវត្ត។EU បានបង្ហាញកាលពីខែមីនា នូវច្បាប់ «ផលិតនៅអឺរ៉ុប» ថ្មី សម្រាប់ក្រុមហ៊ុនដែលកំពុងព្យាយាមទទួលបានមូលនិធិសាធារណៈ នៅក្នុងវិស័យយុទ្ធសាស្ត្រ ក្នុងនោះរួមមានទាំងរថយន្ត បច្ចេកវិទ្យាបៃតង និងដែកថែបផងដែរ ដោយតម្រូវឲ្យក្រុមហ៊ុននានាបំពេញតាមកម្រិតអប្បបរមា សម្រាប់គ្រឿងបន្លាស់ដែលផលិត នៅ EU។សំណើនេះ ដែលត្រូវបានពន្យាររយៈពេលជាច្រើនខែមកហើយ ដោយសារការមិនស្របគ្នា ជុំវិញវិធានការនានា គឺជាផ្នែកសំខាន់មួយនៃកម្លាំងជំរុញរបស់ EU ដើម្បីទទួលបានអត្ថប្រយោជន៍ប្រកួតប្រជែងរបស់ខ្លួនឡើងវិញ កាត់បន្ថយការធ្លាក់ចុះឧស្សាហកម្មរបស់ខ្លួន ហើយទប់ស្កាត់ការបាត់បង់ការងាររាប់សែនកន្លែង។ក្រសួងពាណិជ្ជកម្មរបស់ទីក្រុងប៉េកាំង បានលើកឡើងនៅថ្ងៃចន្ទនេះថា ខ្លួនបានដាក់ស្នើមតិយោបល់ទៅកាន់គណៈកម្មការអឺរ៉ុប កាលពីថ្ងៃសុក្រចុងសប្ដាហ៍កន្លងមក ដោយបង្ហាញពី «ក្ដីបារម្ភយ៉ាងធ្ងន់ធ្ងរ» របស់ប្រទេសចិន ទាក់ទងនឹងចំណាត់ការដែលខ្លួនចាត់ទុកថា «ការរើសអើងជាប្រព័ន្ធ»។ក្រសួងពាណិជ្ជកម្មបានព្រមាននៅក្នុងសេចក្តីថ្លែងការណ៍មួយថា៖ «ប្រសិនបើសហភាពអឺរ៉ុប ចាប់ផ្ដើមអនុវត្តឡើងវិញនូវច្បាប់នេះ ហើយធ្វើឲ្យប៉ះពាល់ដល់ផលប្រយោជន៍របស់ក្រុមហ៊ុនចិន ប្រទេសចិននឹងគ្មានជម្រើសអ្វីក្រៅពីចាត់វិធានការតបតវិញយ៉ាងម៉ឺងម៉ាត់នោះទេ ដើម្បីការពារសិទ្ធិ និងផលប្រយោជន៍ស្របច្បាប់របស់សហគ្រាសរបស់ខ្លួន»។គួរបញ្ជាក់ថា សំណើរបស់ EU ដែលត្រូវបានគេស្គាល់ជាផ្លូវការថា «ច្បាប់ពន្លឿនឧស្សាហកម្ម» ផ្តោតលើក្រុមហ៊ុនផលិតអាគុយ និងយានយន្តអគ្គិសនីរបស់ចិន ដោយចេតនា ដោយទាមទារឲ្យក្រុមហ៊ុនបរទេសសហការជាមួយក្រុមហ៊ុនអឺរ៉ុប និងចែករំលែកចំណេះដឹងបច្ចេកវិទ្យា នៅពេលបើករៀងចក្រនៅក្នុងប្លុក៕

រដ្ឋមន្រ្តីការបរទេសអ៊ីរ៉ង់ធ្វើដំណើរទៅដល់រុស្ស៊ីសម្រាប់កិច្ចប្រជុំជាមួយលោក Putin

នៅថ្ងៃចន្ទនេះ រដ្ឋមន្រ្តីការបរទេសអ៊ីរ៉ង់លោក Abbas Araqchi បានធ្វើដំណើរទៅដល់ទីក្រុង St. Petersburg ដែលជាជើងចុងក្រោយនៃដំណើរទស្សនកិច្ចក្នុងតំបន់របស់លោកដែលគេមើលឃើញរូបលោកធ្វើដំណើរទៅកាន់ប្រទេសប៉ាគីស្ថាន និងប្រទេសអូម៉ង់ផងដែរ ។ លោក Araqchi ត្រូវបានគេរំពឹងថា នឹងជួបជាមួយប្រធានាធិបតីរុស្ស៊ីលោក Vladimir Putin ។ នៅមុននេះ លោក Araqchi និយាយថា ការពិគ្រោះយោបល់កាលពីពេលថ្មីៗនៅប្រទេសប៉ាគីស្ថាន បានពិនិត្យមើលឡើងវិញលក្ខខណ្ឌដែលអាចឲ្យកិច្ចពិភាក្សារវាងសហរដ្ឋអាមេរិក និងអ៊ីរ៉ង់ចាប់ផ្តើមឡើងវិញបាន ដោយរូបលោកធ្វើការសង្កត់ធ្ងន់ថា ទីក្រុងតេអេរ៉ង់នឹងព្យាយាមទទួលបានសិទ្ធិ និងផលប្រយោជន៍ជាតិរបស់ខ្លួន បន្ទាប់ពីជម្លោះអស់រយៈពេលជាច្រើនសប្តាហ៍ ។លោកបាននិយាយផងដែរថា អ៊ីរ៉ង់ និងអូម៉ង់ ក្នុងនាមជារដ្ឋតំបន់ឆ្នេរច្រកសមុទ្រ Hormuz បានយល់ព្រមបន្តការពិគ្រោះយោបល់កម្រិតអ្នកជំនាញ ដើម្បីធានាការឆ្លងកាត់ប្រកបដោយសុវត្ថិភាព ហើយនិងការពារផលប្រយោជន៍រួមនៅក្នុងផ្លូវទឹកមួយនេះ ។សូមបញ្ជាក់ថា ក្តីសង្ឃឹមនៃការស្រោចស្រង់កិច្ចខិតខំសន្តិភាព បែរជាលែងមានកាលពីថ្ងៃសៅរ៍ ពេលដែលប្រធានាធិបតីសហរដ្ឋអាមេរិកលោក Donald Trump លុបចោលដំណើរទស្សនកិច្ចរបស់ប្រេសិតពិសេសរបស់គាត់គឺលោក Steve Witkoff និងលោក Jared Kushner ទៅកាន់ទីក្រុងអ៊ីស្លាម៉ាបាដ របស់ប្រទេសប៉ាគីស្ថាន ៕

ផែនការបញ្ចប់សង្គ្រាមរបស់អ៊ីរ៉ង់ មាន ៣ដំណាក់កាល ខណៈភាពតានតឹងនៅច្រកសមុទ្រ Hormuz កើនឡើង

រដ្ឋមន្ត្រីការបរទេសអ៊ីរ៉ង់ លោក Seyed Abbas Araghchi បានបង្ហាញពីលក្ខខណ្ឌរបស់ទីក្រុងតេអេរ៉ង់ ដើម្បីបញ្ចប់សង្គ្រាម ទៅកាន់សហរដ្ឋអាមេរិកតាមរយៈប្រទេសប៉ាគីស្ថាន ដោយបង្ហាញសំណើ ៣ដំណាក់កាល ដែលមានគោលបំណងកាត់បន្ថយភាពតានតឹង។ នេះបើយោងតាមការឲ្យដឹងពីប្រភពអ៊ីរ៉ង់។លោក Araghchi បានទៅដល់ទីក្រុងអ៊ីស្លាម៉ាបាដ កាលពីថ្ងៃអាទិត្យ (ទី២៦ ខែមេសា ឆ្នាំ២០២៦) បន្ទាប់ពីឈប់សំចតរយៈពេលខ្លី នៅប្រទេសអូម៉ង់ ដែលជាដំណើរទស្សនកិច្ចលើកទី២ របស់លោក ទៅកាន់រដ្ឋធានីរបស់ប៉ាគីស្ថាន ក្នុងរយៈពេលប៉ុន្មានថ្ងៃថ្មីៗនេះ ដោយនេះគឺជាផ្នែកមួយនៃការជំរុញការទូត ក្នុងតំបន់យ៉ាងទូលំទូលាយ។យោងតាមសំណើនេះ បានបង្ហាញថា ដំណាក់កាលទី១ ផ្តោតលើការបញ្ឈប់អរិភាពទាំងស្រុង និងការធានាជាប់ចំណងផ្លូវច្បាប់ ដើម្បីកុំឲ្យមានការវាយប្រហារឡើងវិញលើអ៊ីរ៉ង់ និងលីបង់។ មានតែបន្ទាប់ពីការប្តេជ្ញាចិត្តបែបនេះត្រូវបានធានាប៉ុណ្ណោះទេ ទើបការចរចាចូលទៅកាន់ដំណាក់កាលទី២ ដែលផ្តោតលើការគ្រប់គ្រង និងសន្តិសុខនៃច្រកសមុទ្រ Hormuz។ ហើយដំណាក់កាលទី៣ នឹងដោះស្រាយកម្មវិធីនុយក្លេអ៊ែររបស់អ៊ីរ៉ង់ តែទីក្រុងតេអេរ៉ង់ បានសង្កត់ធ្ងន់ថា ខ្លួននឹងមិនចូលរួមក្នុងការចរចានុយក្លេអ៊ែរនោះទេ រហូតដល់មានវឌ្ឍនភាពនៅដំណាក់កាលដំបូងសិន។ទីភ្នាក់ងារព័ត៌មានពាក់កណ្តាលផ្លូវការ Fars របស់អ៊ីរ៉ង់ បានរាយការណ៍ថា លោក Araghchi ក៏បានផ្ញើសារជាលាយលក្ខណ៍អក្សរទៅកាន់ទីក្រុងវ៉ាស៊ីនតោនផងដែរ ដោយគូសបញ្ជាក់ពី «បន្ទាត់ក្រហម» របស់ទីក្រុងតេអេរ៉ង់ ជាពិសេសលើកម្មវិធីនុយក្លេអ៊ែររបស់ខ្លួន និងច្រកសមុទ្រ Hormuz។ របាយការណ៍នេះបានឲ្យដឹងថា សារនេះមានបំណងបញ្ជាក់ពីជំហររបស់អ៊ីរ៉ង់ ជាជាងសារបង្ហាញពីការចរចាផ្លូវការ។ទោះបីជាមានកិច្ចប្រឹងប្រែងផ្នែកការទូតទាំងនេះក៏ដោយ ក៏ការខ្វែងគំនិតគ្នាយ៉ាងខ្លាំងនៅតែមានដដែល។ ប្រធានាធិបតីអាមេរិក លោក Donald Trump បាននិយាយថា លោកបានលុបចោលដំណើរទស្សនកិច្ចរបស់គណៈប្រតិភូអាមេរិកទៅប៉ាគីស្ថាន ដោយចាត់ទុកថា ការចូលរួមបន្ថែមទៀតថា ជាការខ្ជះខ្ជាយពេលវេលា៕

បណ្ដាញសង្គម

ព័ត៌មានថ្មីៗ

វេជ្ជបណ្ឌិត៖ សុខភាពលោក Trump គឺល្អប្រសើរណាស់ ប៉ុន្តែគួរតែសម្រកទម្ងន់

អ្នកនៅរស់ពីការជាប់ក្នុងរូងភ្នំ នៅឡាវ បានបរិភោគថាសឈើសម្រាប់រែងមាស ដើម្បីបន្តជីវិត

មនុស្ស ១៨នាក់ស្លាប់ និង ៣០នាក់រងរបួស ដោយសាររថយន្តដឹកជនភៀសខ្លួន ក្រឡាប់នៅភាគខាងកើតអាហ្វហ្គានីស្ថាន

សេតវិមាន៖ លោក Trump «នឹងធ្វើតែកិច្ចព្រមព្រៀងដែលល្អសម្រាប់អាមេរិកប៉ុណ្ណោះ» ជាមួយអ៊ីរ៉ង់

នាយករដ្ឋមន្ត្រី៖ កាណាដា និងចិន កំពុងសាង «ភាពជាដៃគូប្រកបដោយស្ថិរភាព និងការស្ថាបនាបន្ថែមទៀត»

រដ្ឋមន្រ្ដីក្រសួងការងារ ចុះពិនិត្យមើលខ្សែច្រវាក់ផលិតកម្មក្រុមហ៊ុន THACO AGRI ក្នុងខេត្តក្រចេះ ដែលផ្តល់ឱកាសការងារប្រមាណ២ម៉ឺននាក់ និងផ្ទេរជំនាញបច្ចេកទេសកសិកម្មទំនើប

របាយការណ៍៖ សភាអាមេរិកកំពុងធ្វើសមាហរណកម្មកងកម្លាំងយោធាអាមេរិក និងអ៊ីស្រាអែលដោយស្ងាត់ៗ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877