នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ក្រុមអ្នកជួយសង្គ្រោះ៖ មនុស្ស ៤នាក់ទៀតដែលជាប់ក្នុងរូងភ្នំ នៅឡាវ ត្រូវបាននាំ​ចេញ​ដោយសុវត្ថិភាព
លោក Hegseth៖ យុគ​សម័យឧបត្ថម្ភធនការពារជាតិ​ពីអាមេរិក សម្រាប់ «ប្រទេសអ្នកមាន» ចប់ហើយ
មន្ត្រីជាន់ខ្ពស់អ៊ីរ៉ង់ និយាយ​ថា លោក Trump «ក្បត់ការទូត» ដោយបន្តបិទខ្ទប់​ដោយទ័ព​ជើង​ទឹក​​អាមេរិក
វេជ្ជបណ្ឌិត៖ សុខភាព​លោក Trump គឺ​ល្អប្រសើរណាស់​ ប៉ុន្តែ​គួរតែសម្រកទម្ងន់

ព័ត៌មានអន្តរជាតិ

អាកាសយានដ្ឋានធំបំផុតរបស់ទីក្រុងតេអេរ៉ង់ បន្តជើងហោះហើរអន្តរជាតិក្រោយការបិទជាង៥០ថ្ងៃ

2026/04/27 12:04:25 pm        74
Facebook Telegram Linkin
អាកាសយានដ្ឋានអន្តរជាតិអ៊ីម៉ាម ខូម៉េនី (Imam Khomeini) របស់អ៊ីរ៉ង់ បានបន្តជើងហោះហើរដឹកអ្នកដំណើរអន្តរជាតិមានកំណត់ បន្ទាប់ពីការផ្អាករយៈពេលជាង៥០ថ្ងៃ ដោយចរាចរណ៍ដឹកអ្នកដំណើរត្រូវបានគេរំពឹងថានឹងងើបឡើងវិញជាបណ្តើរៗ ខណៈផ្លូវហោះហើរបានបើកឡើងវិញជាដំណាក់កាល។គោលដៅរួមមាន ទីក្រុងមេឌីណាក្នុងប្រទេសអារ៉ាប៊ីសាអ៊ូឌីត ទីក្រុងមូស្កាតក្នុងប្រទេសអូម៉ង់ និងទីក្រុងអ៊ីស្តង់ប៊ុលប្រទេសទួរគី គឺជាគោលដៅដំបូងដែលបានបើកដំណើរការឡើងវិញ ខណៈអ្នកធ្វើដំណើរបានធ្វើដំណើរជាលើកដំបូងចាប់តាំងពីសហរដ្ឋអាមេរិក និងអ៊ីស្រាអែល បើកការវាយប្រហារលើប្រទេសនេះ ដែលជំរុញឱ្យអ៊ីរ៉ង់ វាយប្រហារសងសឹកលើគោលដៅអ៊ីស្រាអែល និងសហរដ្ឋអាមេរិក នៅទូទាំងប្រទេសជាច្រើនក្នុងតំបន់។សម្រាប់អ្នកដំណើរជាច្រើន ការបើកដំណើរការឡើងវិញបាននាំមកនូវការជួបជុំគ្នាដែលរង់ចាំជាយូរមកហើយជាមួយមនុស្សជាទីស្រលាញ់នៅបរទេស។ ។អ្នកដំណើរមួយចំនួននៅតែមានការព្រួយបារម្ភ ដោយនិយាយថាបទឈប់បាញ់រវាងសហរដ្ឋអាមេរិក និងអ៊ីរ៉ង់ មានសភាពផុយស្រួយ។ អ្នកដំណើរម្នាក់និយាយថា «យើងមានការព្រួយបារម្ភដោយសារតែសង្គ្រាម ខណៈយើងបានឮសំឡេងផ្ទុះនៅទីក្រុងតេអេរ៉ង់កាលពីប៉ុន្មានយប់មុន»។មន្ត្រីអាកាសយានដ្ឋានបាននិយាយថា មានតែគោលដៅមួយចំនួនតូចប៉ុណ្ណោះដែលអាចដំណើរការបាននាពេលបច្ចុប្បន្ន ប៉ុន្តែការវិលត្រឡប់ទៅវិញបន្តិចម្តងៗនៃជើងហោះហើរអន្តរជាតិបង្ហាញពីជំហានដ៏ប្រុងប្រយ័ត្នឆ្ពោះទៅរកភាពប្រក្រតីឡើងវិញ ដោយផ្លូវអន្តរជាតិសំខាន់ៗនៅតែស្ថិតក្នុងដំណាក់កាលរៀបចំផែនការ។

ភាពមិនប្រាកដប្រជាជុំវិញកិច្ចចរចាសន្តិភាពរវាងអាមេរិកនិងអ៊ីរ៉ង់ កើនឡើង ខណៈលោក Trump ថា លែងបញ្ជូនគណៈប្រតិភូសម្រាប់កិច្ចចរចាទៀតហើយ

2026/04/27 12:01:13 pm        57
Facebook Telegram Linkin
ភាពមិនប្រាកដប្រជា ជុំវិញកិច្ចចរចាសន្តិភាពរវាងសហរដ្ឋអាមេរិក និងអ៊ីរ៉ង់ កាន់តែជ្រៅឡើង ក្នុងពេលមានការមិនចុះសម្រុងគ្នាជាបន្តបន្ទាប់ និងសញ្ញានៃភាពតានតឹងឡើងវិញ។ ប្រធានាធិបតីសហរដ្ឋអាមេរិក លោក Donald Trump បាននិយាយកាលពីថ្ងៃអាទិត្យថា លោកនឹងលែងបញ្ជូនគណៈប្រតិភូដើម្បីចរចាជាមួយអ៊ីរ៉ង់ទៀតហើយ ដោយបញ្ជាក់ថា ទីក្រុងតេអេរ៉ង់ គួរតែទាក់ទងជាមួយទីក្រុងវ៉ាស៊ីនតោនដោយផ្ទាល់ ប្រសិនបើខ្លួនចង់ចរចា។ លោក Trump បានប្រាប់ប្រព័ន្ធផ្សព្វផ្សាយ Fox News ថា «ប្រសិនបើពួកគេចង់ធ្វើ យើងអាចចរចាគ្នាបាន។ ប៉ុន្តែយើងមិនបញ្ជូនមនុស្សឱ្យធ្វើដំណើរ រយៈពេល១៨ម៉ោងដើម្បីជួបគ្នានោះទេ»។ លោក Trump ក៏បាននិយាយផងដែរថា លោកមានការគោរពយ៉ាងខ្លាំងចំពោះប្រទេសប៉ាគីស្ថាន ដែលធ្លាប់ធ្វើជាម្ចាស់ផ្ទះនៃកិច្ចចរចារវាងសហរដ្ឋអាមេរិក និងអ៊ីរ៉ង់នៅទីក្រុងអ៊ីស្លាម៉ាបាដ និងបាននិយាយបន្ថែមថា ប្រទេសប៉ាគីស្ថាន នឹងនៅតែពាក់ព័ន្ធ។ លោកបានបញ្ជាក់ជាថ្មីថា អ៊ីរ៉ង់ «មិនអាចមានអាវុធនុយក្លេអ៊ែរបានទេ» «បើមិនដូច្នេះទេ គ្មានហេតុផលដើម្បីជួបគ្នាឡើយ»។ ប្រធានាធិបតីអ៊ីរ៉ង់ លោក Masoud Pezeshkian បាននិយាយថា សម្ពាធ និងសកម្មភាពអរិភាពរបស់សហរដ្ឋអាមេរិក កំពុងធ្វើឱ្យខូចទំនុកចិត្ត និងធ្វើឱ្យវឌ្ឍនភាពឆ្ពោះទៅរកកិច្ចចរចាជាថ្មីកាន់តែពិបាក នេះបើយោងតាមសេចក្តីថ្លែងការណ៍មួយពីការិយាល័យរបស់លោកកាលពីថ្ងៃអាទិត្យ។ លោកបាននិយាយបន្ថែមថា ទីក្រុងវ៉ាស៊ីនតោន មិនអាចបន្តការចរចាបាន ខណៈកំពុងបង្កើនសម្ពាធលើអ៊ីរ៉ង់ ដោយនិយាយថា សកម្មភាពបែបនេះ «រំខានដល់បរិយាកាសចាំបាច់» សម្រាប់ផ្នែកការទូត។ ទីភ្នាក់ងារសារព័ត៌មាន Tasnim ពាក់កណ្តាលផ្លូវការរបស់អ៊ីរ៉ង់ បានរាយការណ៍កាលពីថ្ងៃអាទិត្យថា រដ្ឋមន្ត្រីការបរទេសអ៊ីរ៉ង់ លោក Seyed Abbas Araghchi បានបង្ហាញពីលក្ខខណ្ឌរបស់អ៊ីរ៉ង់សម្រាប់ការបញ្ចប់សង្គ្រាមទៅកាន់ប្រទេសប៉ាគីស្ថាន ជាប្រទេសសម្របសម្រួល។ ទីភ្នាក់ងារសារព័ត៌មាន Fars ពាក់កណ្តាលផ្លូវការបានរាយការណ៍កាលពីថ្ងៃអាទិត្យថា លោក Araghchi បានបង្ហាញពី «ខ្សែបន្ទាត់ក្រហម» របស់ទីក្រុងតេអេរ៉ង់ទៅកាន់សហរដ្ឋអាមេរិកតាមរយៈប្រទេសប៉ាគីស្ថានក្នុងអំឡុងពេលដំណើរទស្សនកិច្ចកាលពីពេលថ្មីៗនេះ របស់លោក។ របាយការណ៍នេះបាននិយាយថា «ខ្សែបន្ទាត់ក្រហម» ដែលបានបញ្ជូនទៅកាន់ភាគីសហរដ្ឋអាមេរិកក្នុងទម្រង់ជាសារជាលាយលក្ខណ៍អក្សរ ទាក់ទងនឹងកម្មវិធីនុយក្លេអ៊ែររបស់ទីក្រុងតេអេរ៉ង់ និងច្រកសមុទ្រ Hormuz។

តម្លៃប្រេងកើនឡើងជិត២% ខណៈការចរចាសន្តិភាព អាមេរិក -អ៊ីរ៉ង់ ជាប់គាំង

2026/04/27 11:07:55 am        66
Facebook Telegram Linkin
តម្លៃប្រេងបានកើនឡើងបន្ថែមទៀតនៅថ្ងៃចន្ទ ២៧មេសាសប្ដាហ៍នេះ ដោយកើនឡើងជិត ២% ខណៈការចរចាសន្តិភាពរវាងសហរដ្ឋអាមេរិក និងអ៊ីរ៉ង់ជាប់គាំង ស្របពេលដែលការដឹកជញ្ជូនឆ្លងកាត់ច្រកសមុទ្រ Hormuz នៅតែមានកម្រិត ដែលរក្សាការផ្គត់ផ្គង់ប្រេងសកលឱ្យតឹងតែង។តម្លៃប្រេងឆៅ Brent បានកើនឡើង ២,១៦ ដុល្លារ ឬ២,០៥ % ដល់១០៧,៤៩ ដុល្លារក្នុងមួយបារ៉ែល គិតត្រឹមម៉ោង ២៣និង៤៦នាទីម៉ោងសកល ដែលជាកម្រិតខ្ពស់បំផុតចាប់តាំងពីថ្ងៃទី ៧ ខែមេសា ហើយតម្លៃប្រេងឆៅ West Texas Intermediate របស់សហរដ្ឋអាមេរិកដែរនោះ មានតម្លៃ៩៦,១៧ ដុល្លារក្នុងមួយបារ៉ែល កើនឡើង១,៧៧ដុល្លារ ឬ១,៨៨%។កាលពីសប្តាហ៍មុន តម្លៃប្រេងឆៅBrent និង WTI បានកើនឡើងជិត ១៧% និង១៣%ជាបន្តបន្ទាប់ ដែលជាការកើនឡើងប្រចាំសប្តាហ៍ដ៏ធំបំផុតចាប់តាំងពីការចាប់ផ្តើមនៃសង្គ្រាម។ ក្តីសង្ឃឹមនៃការរស់ឡើងវិញនូវកិច្ចខិតខំប្រឹងប្រែងសន្តិភាពបានថយចុះក្នុងអំឡុងពេលចុងសប្តាហ៍ នេះនៅពេលប្រធានាធិបតីសហរដ្ឋអាមេរិក Donald Trump បានលុបចោលដំណើរទស្សនកិច្ចដែលបានគ្រោងទុកទៅកាន់ទីក្រុងអ៊ីស្លាម៉ាបាដដោយបេសកជនរបស់លោក គឺលោក Steve Witkoff និង លោកJared Kushner ទោះបីជារដ្ឋមន្ត្រីការបរទេសអ៊ីរ៉ង់ លោក Abbas Araqchi បានទៅដល់ប្រទេសប៉ាគីស្ថានក៏ដោយ។លោក Tony Sycamore អ្នកវិភាគទីផ្សារនៅក្រុមហ៊ុន IG របស់អូស្ត្រាលី បាននិយាយនៅក្នុងកំណត់ចំណាំមួយថា សកម្មភាពនេះធ្វើឱ្យបាល់វិលត្រឡប់មកនៅក្នុងដៃអ៊ីរ៉ង់វិញ ហើយពេលវេលាកំពុងដើរយ៉ាងលឿន ដោយបន្ថែមថា ទីក្រុងតេអេរ៉ង់អាចនឹងត្រូវបង្ខំឱ្យបិទផលិតកម្មនៅតំបន់ប្រេងចាស់របស់ខ្លួន នៅពេលអស់សមត្ថភាពផ្ទុក។ទិន្នន័យផ្នែកការដឹកជញ្ជូនតាមនាវាពីក្រុមហ៊ុនវិភាគទីផ្សារសកល Kpler បានបង្ហាញថា ទីក្រុងតេអេរ៉ង់ បានបិទច្រកសមុទ្រ ខណៈទីក្រុងវ៉ាស៊ីនតោនបានបិទកំពង់ផែរបស់អ៊ីរ៉ង់។ ការធ្វើចរាចរណ៍នៅច្រកសមុទ្រ Hormuz នៅតែត្រូវបានកំណត់ ដោយមាននាវាដឹកប្រេងតែមួយគ្រឿងប៉ុណ្ណោះបានចូលទៅក្នុងឈូងសមុទ្រកាលពីថ្ងៃអាទិត្យ៕

រុស្ស៊ី និងកូរ៉េខាងជើង យល់ព្រមលើកិច្ចសហប្រតិបត្តិការយោធារយៈពេលវែង

2026/04/27 10:51:13 am        83
Facebook Telegram Linkin
រដ្ឋមន្ត្រីការពារជាតិ និងប្រធានសភារុស្ស៊ី កំពុងបំពេញទស្សនកិច្ចនៅកូរ៉េខាងជើង។ មួយរូបបានជួយសម្ពោធបើកការដ្ឋានសាងសង់វិមានរំលឹកដល់ទាហានកូរ៉េខាងជើងដែលបានស្លាប់ក្នុងការប្រយុទ្ធនៅអ៊ុយក្រែន មួយរូបទៀតបានចុះហត្ថលេខាលើកិច្ចព្រមព្រៀងការពារជាតិថ្មីមួយដែលគ្រោងនឹងដំណើរការរហូតដល់ឆ្នាំ ២០៣១។ កិច្ចសហប្រតិបត្តិការយោធា នយោបាយ និងសេដ្ឋកិច្ចរបស់ប្រទេសទាំងពីរបានកើនឡើងយ៉ាងខ្លាំង ស្របពេលមានការវាយលុកពេញបន្ទុករបស់រុស្ស៊ីលើអ៊ុយក្រែន ដោយទីក្រុងព្យុងយ៉ាងផ្តល់ការគាំទ្រផ្នែកយោធាដល់ទីក្រុងមូស្គូ ជាពិសេសដើម្បីរុញច្រានកងកម្លាំងអ៊ុយក្រែនចេញពីតំបន់ព្រំដែន Kursk របស់រុស្ស៊ី។ទីក្រុងមូស្គូ និងទីក្រុងព្យុងយ៉ាង បានចុះហត្ថលេខាលើកិច្ចព្រមព្រៀងការពារជាតិទៅវិញទៅមករួចហើយនៅឆ្នាំ ២០២៤ ស្របពេលមានកិច្ចប្រជុំរវាងលោក Kim Jong Un និងប្រធានាធិបតី Vladimir Putin នៅទីក្រុងព្យុងយ៉ាងក្នុងខែមិថុនានោះ។ប្រព័ន្ធផ្សព្វផ្សាយរបស់ប្រទេសទាំងពីរបានរាយការណ៍កាលពីថ្ងៃអាទិត្យ ២៦មេសា ចុងសប្ដាហ៍នេះថា រដ្ឋមន្ត្រីការពារជាតិរុស្ស៊ី លោក Andrei Belousov បានទៅដល់កូរ៉េខាងជើង និងបានជួបពិភាក្សាជាមួយលោក Kim និងមន្ត្រីដទៃទៀត។លោក Belousov បាននិយាយ ដោយប្រើអក្សរកាត់នៃឈ្មោះផ្លូវការរបស់កូរ៉េខាងជើង ថា ពួកលោកបានព្រមព្រៀងជាមួយក្រសួងការពារជាតិកូរ៉េខាងជើង ដើម្បីដាក់កិច្ចសហប្រតិបត្តិការយោធារបស់ពួកលោកឱ្យស្ថិតនៅលើមូលដ្ឋានស្ថិរភាព និងយូរអង្វែង។  រដ្ឋមន្ត្រីការពារជាតិរុស្ស៊ីរូបនេះ ក៏បានប្រគល់រង្វាន់យោធាដល់ទាហានកូរ៉េខាងជើងផងដែរ ដែលបានប្រយុទ្ធប្រឆាំងនឹងកងកម្លាំងអ៊ុយក្រែននៅក្នុងតំបន់ព្រំដែន Kursk របស់រុស្ស៊ី។ ចំណែកលោក Kim បាននិយាយថា ប្រទេសរបស់លោកនឹងបន្តគាំទ្រដល់ប្រទេសរុស្ស៊ី៕

ទីក្រុងប៉េកាំងព្រមានសហភាពអឺរ៉ុប ក្រោយក្រុមហ៊ុនចិន ត្រូវបានដាក់បញ្ចូលក្នុងទណ្ឌកម្មចុងក្រោយបំផុតរបស់រុស្ស៊ី

2026/04/27 10:31:52 am        82
Facebook Telegram Linkin
ទីក្រុងប៉េកាំងបានព្រមានទីក្រុងព្រុចសែលថា សហភាពអឺរ៉ុបនឹងទទួលផលវិបាកទាំងអស់ បន្ទាប់ពីប្លុកនេះបានដាក់បញ្ចូលក្រុមហ៊ុនចិននៅក្នុងកញ្ចប់ទណ្ឌកម្មចុងក្រោយបំផុតរបស់ខ្លួនប្រឆាំងនឹងប្រទេសរុស្ស៊ី ដោយធ្វើឲ្យភាពតានតឹងកាន់តែខ្លាំងឡើងនៅក្នុងទំនាក់ទំនងពាណិជ្ជកម្មចិន-អឺរ៉ុបដែលមានភាពតានតឹងរួចទៅហើយ។នៅក្នុងសេចក្តីថ្លែងការណ៍មួយចេញផ្សាយកាលពីយប់ថ្ងៃសៅរ៍ ក្រសួងពាណិជ្ជកម្មចិនបាននិយាយថា ខ្លួន មិនពេញចិត្តយ៉ាងខ្លាំង និងប្រឆាំងយ៉ាងម៉ឺងម៉ាត់លើការដាក់បញ្ចូលធុរកិច្ចចិននៅក្នុងទណ្ឌកម្មរបស់រុស្ស៊ី ដោយចោទប្រកាន់សហភាពអឺរ៉ុបថាបានធ្វើសកម្មភាពដោយឥតប្រយោជន៍ ទោះបីជាមានការជំទាស់ម្តងហើយម្តងទៀតក៏ដោយ។ក្រសួងបាននិយាយនៅក្នុងសេចក្តីថ្លែងការណ៍ថា ប្រទេសចិនជំរុញឱ្យសហភាពអឺរ៉ុបដកក្រុមហ៊ុន និងបុគ្គលចិនចេញពីបញ្ជីទណ្ឌកម្មជាបន្ទាន់ ដោយព្រមានថា ទីក្រុងប៉េកាំង នឹងចាត់វិធានការចាំបាច់ដើម្បីការពារផលប្រយោជន៍របស់ខ្លួនយ៉ាងម៉ឺងម៉ាត់។ កញ្ចប់ទណ្ឌកម្មទី២០ របស់សហភាពអឺរ៉ុប ដែលត្រូវបានអនុម័តកាលពីសប្តាហ៍មុន បន្ទាប់ពីប្រទេសហុងគ្រី និងស្លូវ៉ាគី បានទម្លាក់ចោលការវេតូរបស់ពួកគេ ផ្តោតលើធនាគាររុស្ស៊ីចំនួន២០ ផ្សេងទៀត ដោយកាត់ផ្តាច់ធនាគារពីប្រតិបត្តិការ និងធុរកិច្ចប្រាក់អឺរ៉ូនៅក្នុងប្លុកនេះ។ ការទម្លាយភាពជាប់គាំងឈានដល់ការដាក់ទណ្ឌកម្មនេះបានកើតឡើងបន្ទាប់ពីជម្លោះលើបំពង់បង្ហូរប្រេង Druzhba ដែលបញ្ជូនប្រេងឆៅរបស់រុស្ស៊ីឆ្លងកាត់អ៊ុយក្រែនទៅកាន់អឺរ៉ុបកណ្តាល ត្រូវបានដោះស្រាយ។កញ្ចប់នេះក៏ផ្តោតលើធនាគារ និងក្រុមហ៊ុននៅក្នុងប្រទេសទីបី រួមទាំងប្រទេសចិនផងដែរ ដែលជាផ្នែកមួយនៃការជំរុញឱ្យកាន់តែទូលំទូលាយ ដើម្បីបិទបណ្តាញដែលប្រើក្នុងការគាំទ្រសេដ្ឋកិច្ចសង្គ្រាមរបស់រុស្ស៊ី ដោយផ្តោតយ៉ាងខ្លាំងទៅលើវិធានការប្រឆាំងនឹងការគេចវេះនៅទូទាំងបណ្តាញពាណិជ្ជកម្ម ថាមពល និងហិរញ្ញវត្ថុ៕

អតីតនាយករដ្ឋមន្ត្រីអ៊ីស្រាអែល២រូប រួមគ្នាដើម្បីប្រជែងជាមួយលោក Netanyahu ក្នុងការបោះឆ្នោត

2026/04/27 10:18:15 am        64
Facebook Telegram Linkin
គូប្រជែងផ្នែកនយោបាយធំបំផុតពីររូបរបស់នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយថា ពួកគេកំពុងរួមកម្លាំងគ្នាក្នុងបំណងផ្តួលរំលំរដ្ឋាភិបាលចម្រុះរបស់លោកនៅក្នុងការបោះឆ្នោតនាពេលខាងមុខ ដែលត្រូវបានគេរំពឹងថាធ្វើឡើងនៅចុងឆ្នាំនេះ។ អតីតនាយករដ្ឋមន្ត្រីស្តាំនិយម លោក Naftali Bennett និងនិយមកណ្តាល លោក Yair Lapid បានចេញសេចក្តីថ្លែងការណ៍មួយកាលពីថ្ងៃអាទិត្យ ដោយប្រកាសពីការរួមបញ្ចូលគ្នានៃគណបក្សរបស់ពួកគេទាំងពីរ។សម្ព័ន្ធភាពរបស់គណបក្សទាំងពីរ មានគោលបំណងបង្រួបបង្រួមគណបក្សប្រឆាំងដែលបែកបាក់ ដែលទំនងជាមានចំណុចរួមតិចតួចប៉ុណ្ណោះ ក្រៅពីអរិភាពរួមគ្នារបស់ខ្លួនចំពោះលោក Netanyahu។ ការិយាល័យរបស់លោក Bennett បាននិយាយថា គណបក្សថ្មីនឹងត្រូវបានគេហៅថា Together ហើយលោកនឹងក្លាយជាមេដឹកនាំរបស់គណបក្សនេះ។លោក Bennett បាននិយាយនៅក្នុងសេចក្តីថ្លែងការណ៍រួមគ្នាតាមទូរទស្សន៍ជាមួយលោក Lapid ថា «ខ្ញុំមានសេចក្តីរីករាយក្នុងការប្រកាសថា យប់នេះរួមជាមួយមិត្តរបស់ខ្ញុំ លោក Yair Lapid ខ្ញុំកំពុងមានវិធានការគិតនិងស្ថាបនា និងជំហានស្នេហាជាតិដែលយើងមិនធ្លាប់បានធ្វើសម្រាប់ប្រទេសរបស់យើង»។ក្នុងអំឡុងពេលសេចក្តីថ្លែងការណ៍តាមទូរទស្សន៍ លោក Lapid បាននិយាយថា «លោក Bennett គឺជាអ្នកនយោបាយស្តាំនិយម ប៉ុន្តែជាអ្នកស្មោះត្រង់ ហើយមានការជឿទុកចិត្តគ្នារវាងពួកយើង»។លោក Lapid ក៏បាននិយាយផងដែរថា «ចំណាត់ការនេះ មានបំណងបង្រួបបង្រួមប្លុក បញ្ចប់ការបែកបាក់ផ្ទៃក្នុង និងផ្តោតការខិតខំប្រឹងប្រែងទាំងអស់លើការទទួលជ័យជម្នះក្នុងការបោះឆ្នោតដ៏សំខាន់នាពេលខាងមុខ និងដឹកនាំប្រទេសអ៊ីស្រាអែល ឈានឆ្ពោះទៅមុខ នាពេលអនាគត»។

ការវាយប្រហារដោយគ្រាប់បែកនៅប្រទេសកូឡុំប៊ី សម្លាប់មនុស្សច្រើននាក់នៅមុនការបោះឆ្នោត

2026/04/27 10:16:42 am        77
Facebook Telegram Linkin
ការវាយប្រហារដោយគ្រាប់បែកនៅលើផ្លូវហាយវ៉េនៅភាគនិរតីប្រទេសកូឡុំប៊ី បានសម្លាប់មនុស្ស ១៩ នាក់ និងរបួសយ៉ាងហោចណាស់ ៣៨ នាក់ ជារលកនៃអំពើហិង្សាចុងក្រោយនៅមុនការបោះឆ្នោតប្រធានាធិបតី នៅខែក្រោយ។ រថយន្តក្រុង និងរថយន្តទេសចរណ៍ ត្រូវបានបំផ្លាញនៅក្នុងការបំផ្ទុះកាលពីថ្ងៃសៅរ៍នៅលើផ្លូវហាយវ៉េ Pan-American។រថយន្តជាច្រើនគ្រឿង ត្រូវបានក្រឡាប់ដោយកម្លាំងផ្ទុះ។ អភិបាលតំបន់ បានផ្តល់ចំនួនអ្នកស្លាប់ថាមាន ១៤ នាក់ និងអ្នករងរបួសមាន៣៨ នាក់ ប៉ុន្តែវិទ្យាស្ថានជាតិវេជ្ជសាស្ត្រ និងវិទ្យាសាស្ត្រកោសល្យវិច្ច័យ បាននិយាយកាលពីថ្ងៃអាទិត្យថា វិទ្យាស្ថានបានចាប់ផ្តើមពិនិត្យសាកសពចំនួន ១៩ នាក់។មេបញ្ជាការយោធា លោក Hugo Lopez បាននិយាយក្នុងសន្និសីទសារព័ត៌មានថា គ្រាប់បែកបានផ្ទុះបន្ទាប់ពីអ្នកវាយប្រហារ បានបញ្ឈប់ចរាចរណ៍ដោយបិទផ្លូវជាមួយរថយន្តក្រុង និងរថយន្តមួយគ្រឿងផ្សេងទៀត។ ការវាយប្រហារ កើតឡើងនៅមុនការបោះឆ្នោតជាតិដែលនឹងធ្វើឡើងនៅជាង១ខែខាងមុខ ដោយអ្នកបោះឆ្នោតនឹងធ្វើការជ្រើសរើសអ្នកបន្តតំណែងពីប្រធានាធិបតី លោក Gustavo Petro។លោក Petro បានស្តីបន្ទោសការបំផ្ទុះគ្រាប់បែកទៅលើលោក Ivan Mordisco ជាឧក្រិដ្ឋជនដែលគេតាមចាប់ខ្លួនរបស់ប្រទេសនៅអាមេរិកខាងត្បូងមួយនេះ។ អំពើហិង្សា បានកើតឡើងបន្ទាប់ពីការវាយប្រហារដោយគ្រាប់បែកកាលពីថ្ងៃសុក្រលើមូលដ្ឋានយោធាមួយកន្លែងក្នុងទីក្រុង Cali ជាទីក្រុងធំទីបីរបស់ប្រទេសកូឡុំប៊ី បណ្តាលឱ្យមនុស្សពីរនាក់រងរបួស និងបង្កឱ្យមានការវាយប្រហារជាបន្តបន្ទាប់នៅក្នុងតំបន់ Valle del Cauca និងតំបន់ Cauca។

ការវាយប្រហាររបស់អ៊ីស្រាអែលបានសម្លាប់មនុស្សច្រើននាក់នៅលីបង់ ខណៈព្រមានប្រជាជនឱ្យចេញពីទីក្រុងនានាហួសពី «តំបន់ទ្រនាប់»

2026/04/27 10:14:23 am        65
Facebook Telegram Linkin
ក្រសួងសុខាភិបាលរបស់ប្រទេសលីបង់បាននិយាយថា ការវាយប្រហាររបស់អ៊ីស្រាអែលបានសម្លាប់មនុស្ស ១៤ នាក់ និងរបួស ៣៧ នាក់កាលពីថ្ងៃអាទិត្យ ទី ២៦ ខែមេសា ខណៈយោធាអ៊ីស្រាអែលបានព្រមានប្រជាជនឱ្យចាកចេញពីក្រុងចំនួនប្រាំពីរហួសពី «តំបន់ទ្រនាប់» ដែលខ្លួនកាន់កាប់មុនពេលមានបទឈប់បាញ់ដែលបរាជ័យក្នុងការបញ្ឈប់អរិភាពទាំងស្រុង។ ក្រសួងសុខាភិបាល បាននិយាយបន្ថែមនៅក្នុងសេចក្តីថ្លែងការណ៍ថា ចំនួនអ្នកស្លាប់កាលពីថ្ងៃអាទិត្យរួមមានកុមារពីរនាក់ និងស្ត្រីពីរនាក់។ អ៊ីស្រាអែល បាននិយាយថា ទាហានម្នាក់របស់ខ្លួនក៏ត្រូវបានសម្លាប់ ខណៈបទឈប់បាញ់ដ៏ផុយស្រួយបានស្ថិតនៅក្រោមភាពតានតឹងបន្ថែមទៀត។ អ្នកនាំពាក្យរបស់យោធាអ៊ីស្រាអែល បាននិយាយនៅក្នុងសេចក្តីថ្លែងការណ៍មួយនៅលើបណ្តាញ X ថា ក្រុមប្រដាប់អាវុធហេសបូឡាលីបង់ កំពុងរំលោភលើបទឈប់បាញ់ ហើយអ៊ីស្រាអែល នឹងធ្វើសកម្មភាពប្រឆាំងការបំពាននេះ ដោយប្រាប់ប្រជាជនឱ្យធ្វើដំណើរទៅភាគខាងជើង និងទៅភាគខាងលិច ឆ្ងាយពីទីក្រុង។ ទីក្រុងទាំងនេះ ស្ថិតនៅភាគខាងជើងនៃទន្លេ Litani និងតំបន់នៅភាគខាងត្បូងប្រទេសលីបង់កាន់កាប់ដោយកងទ័ពអ៊ីស្រាអែល ដែលបានបន្តប្រតិបត្តិការយោធា ទោះបីជាមានបទឈប់បាញ់ក៏ដោយ។ យោធាបាននិយាយថា ខ្លួនបានវាយប្រហារយន្តហោះចម្បាំងរបស់ក្រុមហេសបូឡា ជើងទម្របាញ់រ៉ូកែត និងឃ្លាំងអាវុធមួយកន្លែង។ នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយក្នុងកិច្ចប្រជុំគណៈរដ្ឋមន្ត្រីនៅទីក្រុងយេរុយសាឡឹមថា «តាមទស្សនៈរបស់យើង អ្វីដែលជាកាតព្វកិច្ចរបស់យើង គឺសន្តិសុខរបស់អ៊ីស្រាអែល សន្តិសុខរបស់ទាហានយើង និងសន្តិសុខរបស់សហគមន៍យើង» ។ ក្រុមហេសបូឡា បាននិយាយថា ខ្លួននឹងមិនបញ្ឈប់ការវាយប្រហារទៅលើកងទ័ពអ៊ីស្រាអែលនៅក្នុងប្រទេសលីបង់ និងទៅលើក្រុងនានានៅភាគខាងជើងប្រទេសអ៊ីស្រាអែលទេ ដរាបណាអ៊ីស្រាអែល នៅតែបន្ត «ការរំលោភលើបទឈប់បាញ់»។

ការបាញ់ប្រហារនៅពិធីទទួលទានអាហារពេលល្ងាចនៅសេតវិមាន ជំរុញឱ្យមានការពិនិត្យឡើងវិញសន្តិសុខរបស់លោក Trump

2026/04/27 09:06:04 am        112
Facebook Telegram Linkin
មន្ត្រីអនុវត្តច្បាប់របស់សហរដ្ឋអាមេរិក កំពុងវាយតម្លៃឡើងវិញនូវការរៀបចំសន្តិសុខបន្ទាប់ពីខ្មាន់កាំភ្លើងម្នាក់បានបើកការបាញ់ប្រហារនៅជិតពិធីទទួលទានអាហារពេលល្ងាចរបស់សមាគមអ្នកឆ្លើយឆ្លងព័ត៌មានសេតវិមាន ដែលបង្កើនសំណួរអំពីថាតើខ្មាន់កាំភ្លើងអាចចូលទៅជិតព្រឹត្តិការណ៍ដែលចូលរួមដោយប្រធានាធិបតី លោក Donald Trump សមាជិកគណៈរដ្ឋមន្ត្រី និងសមាជិកសភា បានដោយរបៀបណា។ អតីតភ្នាក់ងារអង្គភាពសេវាចារកម្មពីររូប និងមន្ត្រីជាន់ខ្ពស់អាមេរិកបីរូប បានប្រាប់សារព័ត៌មានរ៉យទ័រកាលពីថ្ងៃអាទិត្យ ទី២៦ ខែមេសា ថា ភ្នាក់ងារសហព័ន្ធទំនងជាអនុវត្តផែនការរបស់ពួកគេដើម្បីការពារប្រធានាធិបតីដោយប្រសិទ្ធភាពកាលពីយប់ថ្ងៃសៅរ៍ ដោយបានបញ្ឈប់ខ្មាន់កាំភ្លើងដែលត្រូវបានចោទប្រកាន់មុនពេលជននេះទៅដល់ជាន់ក្រោមដីនៃសណ្ឋាគារ Washington Hilton ជាកន្លែងដែលលោក Trump ត្រូវបានរៀបចំឱ្យថ្លែងសុន្ទរកថា។ មន្ត្រីបាននិយាយថា ប៉ុន្តែការពិតដែលថា អ្នកចូលរួមមួយចំនួនអាចឮសំឡេងបាញ់កាំភ្លើងទៅលើភ្នាក់ងារអង្គភាពសេវាសម្ងាត់បានបញ្ជាក់ពីភាពងាយរងគ្រោះ ទោះបីក្រោយការប៉ុនប៉ងធ្វើឃាតពីរលើកលើលោក Trump ក្នុងអំឡុងពេលយុទ្ធនាការឆ្នាំ២០២៤ ក៏ដោយ ដែលបានជំរុញឱ្យមានវិធានការកាន់តែតឹងរ៉ឹងជុំវិញសន្តិសុខរបស់លោកប្រធានាធិបតី។ អតីតមន្ត្រីអនុវត្តច្បាប់និយាយថា មេរៀនជាក់ស្តែងបំផុតពីឧបទ្ទវហេតុនេះគឺ បុគ្គលិកសន្តិសុខអាចចាំបាច់ត្រូវពង្រីកនៅបរិវេណការពារជុំវិញប្រធានាធិបតីនៅទីសាធារណៈធំៗ ទោះបីជាវានាំឱ្យមានការរំខានជាសាធារណៈក៏ដោយ។ នៅក្នុងពិធីជប់លៀងទទួលទានអាហារពេលល្ងាចកាលពីថ្ងៃសៅរ៍ ភ្ញៀវត្រូវបានតម្រូវឱ្យឆ្លងកាត់ឧបករណ៍ត្រួតពិនិត្យម៉ាញេទិក ឬឧបករណ៍រាវរកលោហៈ ដើម្បីចូលទៅក្នុងបន្ទប់រៀបចំពិធី ប៉ុន្តែត្រូវការតែសំបុត្រដើម្បីចូលទៅក្នុងសណ្ឋាគារប៉ុណ្ណោះ។ មនុស្សជាច្រើន បានព្យាយាមចូលដោយប្រើប្រាស់សំបុត្រកាលពីឆ្នាំមុន នេះបើយោងតាមមនុស្សម្នាក់ដែលដឹងអំពីការរៀបចំព្រឹត្តិការណ៍នេះ។

អ្នកការទូតជាន់ខ្ពស់អ៊ីរ៉ង់បានវិលត្រឡប់ទៅប៉ាគីស្ថានវិញមួយរយៈខ្លី ខណៈលោកTrumpថាភាគីនានាអាចនិយាយគ្នាតាមទូរស័ព្ទបាន

2026/04/27 08:52:05 am        107
Facebook Telegram Linkin
រដ្ឋមន្ត្រីការបរទេសអ៊ីរ៉ង់បានទៅកាន់ទីក្រុងអ៊ីស្លាម៉ាបាដម្តងទៀតមួយរយៈខ្លីកាលពីថ្ងៃអាទិត្យ ខណៈថ្នាក់ដឹកនាំនយោបាយ និងយោធារបស់ប៉ាគីស្ថានបានប្រញាប់ប្រញាល់ចាប់ផ្តើមការចរចាបទឈប់បាញ់រវាងទីក្រុងតេអេរ៉ង់ និងទីក្រុងវ៉ាស៊ីនតោន ប៉ុន្តែប្រធានាធិបតី Donald Trump បាននិយាយថាពួកគេអាចនិយាយគ្នាតាមទូរស័ព្ទជំនួសវិញ។  ប្រព័ន្ធផ្សព្វផ្សាយរដ្ឋអ៊ីរ៉ង់បាននិយាយថា លោក Abbas Araghchi បានចាកចេញពីរដ្ឋធានីប៉ាគីស្ថានកាលពីយប់ថ្ងៃមុន ដោយបានបង្កើតភាពច្របូកច្របល់ជុំវិញការចរចាជុំទីពីរដែលរំពឹងទុកនៅទីនោះ ប៉ុន្តែលោកបានត្រឡប់មកវិញមុនពេលបន្តទៅកាន់ទីក្រុងមូស្គូកាលពីថ្ងៃអាទិត្យ ។លោកធ្លាប់បានទៅកាន់ប្រទេសអូម៉ង់ ដែលកន្លងមកជាអ្នកសម្របសម្រួលការចរចា ហើយនៅម្ខាងទៀតនៃច្រកសមុទ្រយុទ្ធសាស្ត្រ Hormuz។សេតវិមានកាលពីសប្តាហ៍មុនបាននិយាយថា ខ្លួននឹងបញ្ជូនបេសកកជនលោក Steve Witkoff និង លោក Jared Kushner ទៅកាន់ទីក្រុងអ៊ីស្លាម៉ាបាដ ដើម្បីបន្តការចរចាដោយផ្ទាល់ជាប្រវត្តិសាស្ត្រនៅដើមខែនេះ។ ប៉ុន្តែភ្លាមៗបន្ទាប់ពីការចាកចេញរបស់លោក Araghchi កាលពីថ្ងៃសៅរ៍ លោក Trump បាននិយាយថា លោកបានលុបចោលបេសកកម្មនេះ ដោយសារតែខ្វះវឌ្ឍនភាពជាមួយអ៊ីរ៉ង់។លោកTrump បានប្រាប់សារព័ត៌មាន Fox News កាលពីថ្ងៃអាទិត្យថា ប្រសិនបើពួកគេចង់ ពួកលោកអាចនិយាយគ្នាបាន ប៉ុន្តែពួកលោកនឹងមិនបញ្ជូនមនុស្សទៅទេ។ លោកបាននិយាយមុននេះនៅលើបណ្ដាញសង្គមថា អ្វីដែលពួកគេត្រូវធ្វើគឺគ្រាន់តែទូរស័ព្ទទៅរករូបលោកទៅបានហើយ។  មន្ត្រីប៉ាគីស្ថានពីររូបបាននិយាយក្នុងលក្ខខណ្ឌមិនបញ្ចេញឈ្មោះទៅកាន់ប្រព័ន្ធផ្សព្វផ្សាយថាការចរចាដោយប្រយោលរវាងភាគីទាំងពីរកំពុងដំណើរការ៕

បណ្ដាញសង្គម

ព័ត៌មានថ្មីៗ

ក្រុមអ្នកជួយសង្គ្រោះ៖ មនុស្ស ៤នាក់ទៀតដែលជាប់ក្នុងរូងភ្នំ នៅឡាវ ត្រូវបាននាំ​ចេញ​ដោយសុវត្ថិភាព
05/30/2026 05:05 PM
Facebook Telegram Linkin
លោក Hegseth៖ យុគ​សម័យឧបត្ថម្ភធនការពារជាតិ​ពីអាមេរិក សម្រាប់ «ប្រទេសអ្នកមាន» ចប់ហើយ
05/30/2026 05:05 PM
Facebook Telegram Linkin
មន្ត្រីជាន់ខ្ពស់អ៊ីរ៉ង់ និយាយ​ថា លោក Trump «ក្បត់ការទូត» ដោយបន្តបិទខ្ទប់​ដោយទ័ព​ជើង​ទឹក​​អាមេរិក
05/30/2026 05:05 PM
Facebook Telegram Linkin
វេជ្ជបណ្ឌិត៖ សុខភាព​លោក Trump គឺ​ល្អប្រសើរណាស់​ ប៉ុន្តែ​គួរតែសម្រកទម្ងន់
05/30/2026 05:05 PM
Facebook Telegram Linkin
អ្នកនៅ​រស់​ពីការ​ជាប់​ក្នុង​រូងភ្នំ នៅ​ឡាវ បានបរិភោគ​ថាសឈើសម្រាប់រែង​​មាស ដើម្បីបន្ត​ជីវិត
05/30/2026 05:05 PM
Facebook Telegram Linkin
មនុស្ស​ ១៨នាក់ស្លាប់ និង ៣០នាក់រងរបួស ដោយសារ​រថយន្តដឹកជនភៀសខ្លួន ក្រឡាប់នៅភាគខាងកើតអាហ្វហ្គានីស្ថាន
05/30/2026 05:05 PM
Facebook Telegram Linkin
សេតវិមាន៖ លោក Trump «នឹងធ្វើតែ​កិច្ចព្រមព្រៀងដែលល្អសម្រាប់អាមេរិកប៉ុណ្ណោះ​» ជាមួយអ៊ីរ៉ង់
05/30/2026 05:05 PM
Facebook Telegram Linkin
នាយករដ្ឋមន្ត្រី៖ កាណាដា និងចិន កំពុង​សាង​​ «ភាពជាដៃគូប្រកប​ដោយ​ស្ថិរភាព និងការ​ស្ថាបនាបន្ថែម​ទៀត​»
05/30/2026 05:05 PM
Facebook Telegram Linkin
រដ្ឋមន្រ្ដីក្រសួងការងារ ចុះពិនិត្យមើលខ្សែច្រវាក់ផលិតកម្មក្រុមហ៊ុន THACO AGRI ក្នុងខេត្តក្រចេះ ដែលផ្តល់ឱកាសការងារប្រមាណ២ម៉ឺននាក់ និងផ្ទេរជំនាញបច្ចេកទេសកសិកម្មទំនើប
05/30/2026 05:05 PM
Facebook Telegram Linkin
របាយការណ៍៖ សភាអាមេរិកកំពុងធ្វើសមាហរណកម្មកងកម្លាំងយោធាអាមេរិក និងអ៊ីស្រាអែលដោយស្ងាត់​ៗ
05/30/2026 05:05 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.