BTV NEWS

កងកម្លាំងរុស្ស៊ី បានប្រមូលផ្ដុំទាហាន ១១ម៉ឺននាក់ នៅជិតទីក្រុងយុទ្ធសាស្ត្ររបស់អ៊ុយក្រែន

មនុស្សជាច្រើននាក់ ស្លាប់និងរបួស ក្នុងហេតុការណ៍រត់ជាន់គ្នា ក្នុងពិធីបុណ្យសាសនានៅឥណ្ឌា

បាតុករសម្រុកតវ៉ានៅទីក្រុង Venice របស់អ៊ីតាលី ក្នុងពិធីមង្គលការរបស់ស្ថាបនិកក្រុមហ៊ុន Amazon

UN៖ ជនជាតិអាហ្វហ្គានីស្ថានយ៉ាងតិច ១,២លាននាក់ ត្រូវបង្ខំឱ្យចាកចេញពីអ៊ីរ៉ង់ និងប៉ាគីស្ថាន នៅឆ្នាំនេះ

ព័ត៌មានអន្តរជាតិ

វិមានក្រឹមឡាំង៖ លោក Putin នឹងមិនទៅចូលរួមកិច្ចប្រជុំកំពូល BRICS នៅប្រេស៊ីល សប្ដាហ៍ក្រោយនេះទេ

មន្រ្តីគោលនយោបាយការបរទេសរបស់វិមានក្រឹមឡាំង លោក Yuri Ushakov បាននិយាយកាលពីថ្ងៃពុធ (២៥ មិថុនា) ថា ប្រធានាធិបតីរុស្ស៊ី លោក Vladimir Putin នឹងមិនធ្វើដំណើរទៅចូលរួមកិច្ចប្រជុំកំពូល BRICS នៅសប្តាហ៍ក្រោយនេះក្នុងប្រទេសប្រេស៊ីលទេ ដោយសារតែដីកាចាប់ខ្លួនមួយដែលចេញដោយតុលាការព្រហ្មទណ្ឌអន្តរជាតិ (ICC)។គួរឱ្យដឹងថា តុលាការ ICC បានចេញដីកានោះនៅឆ្នាំ២០២៣ ត្រឹមតែជាងមួយឆ្នាំប៉ុណ្ណោះបន្ទាប់ពីរុស្ស៊ី បានចាប់ផ្តើមសង្គ្រាមទ្រង់ទ្រាយធំរបស់ខ្លួនប្រឆាំងនឹងអ៊ុយក្រែន ដោយចោទប្រកាន់លោក Putin ពីឧក្រិដ្ឋកម្មសង្រ្គាមក្នុងការនិរទេសកុមាររាប់រយនាក់ពីអ៊ុយក្រែន។ រុស្ស៊ី បានបដិសេធការចោទប្រកាន់ទាំងនេះ ហើយវិមានក្រឹមឡាំង ដែលមិនបានចុះហត្ថលេខាលើសន្ធិសញ្ញាបង្កើត ICC បានច្រានចោលដីកានេះទុកជាមោឃៈ។ទោះយ៉ាងនេះក៏ដោយ ដីកាចាប់ខ្លួនមានន័យថា លោក Putin ចាំបាច់ត្រូវតែថ្លឹងថ្លែងហានិភ័យ ដែលលោកអាចនឹងត្រូវចាប់ខ្លួន ប្រសិនបើធ្វើដំណើរទៅប្រទេសផ្សេងទៀត ដែលជាហត្ថលេខីនៃសន្ធិសញ្ញា ICC។ លោក Ushakov បាននិយាយថា លោក Putin នឹងចូលរួមជំនួបកំពូលនោះតាមរយៈការហៅជាវីដេអូនៅក្នុងកិច្ចប្រជុំកំពូល BRICS ដែលនឹងធ្វើឡើងពីថ្ងៃទី០៦-០៧ ខែកក្កដា នៅប្រេស៊ីល។រដ្ឋមន្ត្រីការបរទេសរុស្ស៊ី លោក Sergei Lavrov នឹងធ្វើដំណើរទៅចូលរួមកិច្ចប្រជុំកំពូលនោះដើម្បីតំណាងឱ្យប្រទេសរុស្ស៊ី។ យោងតាមរបាយការណ៍ប្រព័ន្ធផ្សព្វផ្សាយ បានឱ្យដឹងថា ប្រធានាធិបតីចិន លោក Xi Jinping ក៏នឹងមិនចូលរួមកិច្ចប្រជុំកំពូលនោះដែរ៕

លោកTrump ចំអកឱ្យអ៊ីរ៉ង់ចំពោះកិច្ចពិភាក្សានៅសប្តាហ៍ក្រោយថា កម្មវិធីនុយក្លេអ៊ែត្រូវដើរថយក្រោយច្រើនទសវត្សរ៍

លោកប្រធានាធិបតី Donald Trump បាននិយាយកាលពីថ្ងៃពុធថា សហរដ្ឋអាមេរិកនឹងពិភាក្សាអំពីកម្មវិធីនុយក្លេអ៊ែរជាមួយអ៊ីរ៉ង់នៅសប្តាហ៍ក្រោយ ដោយនិយាយចំអកអំពីលទ្ធភាពនៃកិច្ចព្រមព្រៀងមួយ ក្រោយពីនិយាយអួតថា ការវាយប្រហាររបស់សហរដ្ឋអាមេរិកកាលពីពេលថ្មីៗនេះ បានធ្វើឱ្យកម្មវិធីអាតូមិករបស់សាធារណរដ្ឋអ៊ីស្លាមមួយនេះ ជាប់គាំង។លោក Trump បានសរសើរការវាយប្រហាររបស់សហរដ្ឋអាមេរិកមិនធ្លាប់មានពីមុនមក ដោយ «ការបំផ្លាញទាំងស្រុង» នៃសមត្ថភាពនុយក្លេអ៊ែររបស់អ៊ីរ៉ង់ និងបាននិយាយថាកម្មវិធីនុយក្លេអ៊ែររបស់ប្រទេសនេះត្រូវដើរថយក្រោយច្រើនទសវត្សរ៍។ ប៉ុន្តែការបែកធ្លាយព័ត៌មានសម្ងាត់របស់សហរដ្ឋអាមេរិក បានធ្វើឱ្យមានការសង្ស័យលើការវាយតម្លៃនោះ ដោយនិយាយថា ការវាយប្រហារទំនងជាពន្យារពេលសម្រាប់ទីក្រុងតេអេរ៉ង់ ត្រឹមតែប៉ុន្មានខែប៉ុណ្ណោះ។មុនពេលកិច្ចព្រមព្រៀងបទឈប់បាញ់កាលពីថ្ងៃអង្គារសប្តាហ៍នេះ អ៊ីស្រាអែល បានវាយលុកលើទីតាំងនុយក្លេអ៊ែរ និងយោធារបស់អ៊ីរ៉ង់ក្នុងសង្គ្រាមរយៈពេល១២ថ្ងៃ ខណៈអ៊ីរ៉ង់បានបាញ់មីស៊ីលជាបន្តបន្ទាប់ទៅកាន់សត្រូវក្នុងតំបន់របស់ខ្លួន ជាការប្រឈមមុខដាក់គ្នាខ្លាំងក្លាបំផុតមិនធ្លាប់មាន។សហរដ្ឋអាមេរិក បានចូលរួមក្នុងការគាំទ្រសម្ព័ន្ធមិត្តរបស់ខ្លួន ដោយវាយប្រហារលើទីតាំងនុយក្លេអ៊ែរចំនួនពីរកន្លែងដោយគ្រាប់បែកខួងទម្លុះដីដ៏ធំកាលពីចុងសប្តាហ៍កន្លងទៅ ខណៈមីស៊ីលស៊ីបគោលដៅចេញពីនាវាមុជទឹកបានវាយប្រហារលើរោងចក្រនុយក្លេអ៊ែរទីបី។

លោក Trump បង្ហើបពីលទ្ធភាពដែលលោក Putin អាចវាយលុកលើប្រទេសផ្សេងទៀតហួសពីអ៊ុយក្រែន

ប្រធានាធិបតីអាមេរិកលោក Donald Trump បានលើកឡើងពីលទ្ធភាពដែលសមភាគីរុស្ស៊ីលោក Vladimir Putin អាចនឹងលុកលុយប្រទេសផ្សេងទៀតបន្ទាប់ពីការវាយប្រហារពេញបន្ទុកលើអ៊ុយក្រែនក្នុងអំឡុងពេលសន្និសីទសារព័ត៌មាននៅឯកិច្ចប្រជុំកំពូលអង្គការណាតូនៅទីក្រុងឡាអេកាលពីថ្ងៃពុធសប្ដាហ៍នេះ។ នៅពេលសួរថាតើលោកបានចាត់ទុកលោក Putin ជាសត្រូវឬទេ ហើយលោកជឿថាមេដឹកនាំរុស្ស៊ីមានមហិច្ឆតាទឹកដីលើសពីអ៊ុយក្រែនទៀតដែរទេ លោក Trump បានឆ្លើយតបថាអាចទៅរួច។ លោក Trump ក៏បាននិយាយផងដែរថា លោក Putin បានទូរស័ព្ទមករូបលោកសុំខ្លួនជួយដោះស្រាយជម្លោះមជ្ឈិមបូព៌ានាពេលថ្មីៗនេះ និងដើរតួជាអ្នកសម្របសម្រួលរវាងសហរដ្ឋអាមេរិក អ៊ីស្រាអែល និងអ៊ីរ៉ង់។ នៅមុនអាណត្តិទីពីររបស់លោកក្នុងសេតវិមាន លោក Trump បានប្រកាសថាលោកនឹងចរចាបញ្ចប់ការវាយលុករបស់រុស្ស៊ីលើអ៊ុយក្រែនក្នុងរយៈពេល ២៤ ម៉ោង ប៉ុន្តែលោកបានប្រាប់អ្នកសារព័ត៌មាននៅឯកិច្ចប្រជុំកំពូលរបស់អង្គការណាតូថាលោកត្រូវបានគេនិយាយបំផ្លើសទេ។ លោកបាននិយាយថាការចរចាគឺពិបាកជាងដែលនរណាម្នាក់បានគិត ហើយថា លោក Putin រឹតតែពិបាកនិយាយ។លោក Trump ក៏បាននិយាយផងដែរថាលោកមានកិច្ចប្រជុំដ៏ល្អជាមួយប្រធានាធិបតីអ៊ុយក្រែន លោកVolodymyr Zelenskyy នៅខាងក្រៅកិច្ចប្រជុំកំពូលណាតូ៕

មនុស្សជាច្រើននាក់ស្លាប់ ខណៈពលរដ្ឋកេនយ៉ា រាប់ពាន់នាក់សម្រុកតវ៉ាយ៉ាងហិង្សាទូទាំងប្រទេស

ប្រធានអង្គការលើកលែងទោសកេនយ៉ា បាននិយាយថា មនុស្សយ៉ាងតិច ១៦នាក់ បានស្លាប់ក្នុងអំឡុងបាតុកម្មយ៉ាងហិង្សាប្រឆាំងរដ្ឋាភិបាលទូទាំងប្រទេស នៅកេនយ៉ា កាលពីថ្ងៃពុធ (២៥ មិថុនា) ដែលភាគច្រើននៃជនរងគ្រោះត្រូវបានសម្លាប់ដោយនគរបាល រយៈពេលមួយឆ្នាំបន្ទាប់ពីបាតុកម្មដ៏បង្ហូរឈាមប្រឆាំងនឹងច្បាប់ពន្ធមួយ ដែលឈានដល់ការសម្រុកយ៉ាងកម្រោលចូលក្នុងសភា។យោងតាមប្រព័ន្ធផ្សព្វផ្សាយក្នុងស្រុក និងសាក្សីរបស់សារព័ត៌មានរ៉យទ័របានឱ្យដឹងថា ប្រជាជនកេនយ៉ារាប់ពាន់នាក់ បានចេញដើរតាមដងផ្លូវដើម្បីរំលឹកដល់បាតុកម្មកាលពីឆ្នាំមុន ដែលក្នុងនោះមនុស្សជាង ៦០នាក់បានស្លាប់ ដោយនគរបាលបានបាញ់ឧស្ម័នបង្ហូរទឹកភ្នែក និងកាណុងបាញ់ទឹកដើម្បីបំបែកពួកគេនៅក្នុងរដ្ឋធានីណៃរ៉ូប៊ី។នាយកប្រតិបត្តិនៃអង្គការលើកលែងទោសកេនយ៉ា លោក Irungu Houghton បានប្រាប់រ៉យទ័រថា បាតុករខ្លះបានប៉ះទង្គិចជាមួយនគរបាល ហើយមនុស្ស ១៦នាក់ត្រូវបាន "ផ្ទៀងផ្ទាត់ថាបានស្លាប់" ដោយបន្ថែមថា តួលេខនេះត្រូវផ្ទៀងផ្ទាត់ដោយអង្គការឃ្លាំមើលសិទ្ធិសកល និងគណៈកម្មការសិទ្ធិមនុស្សជាតិកេនយ៉ា (KNCHR)។អាជ្ញាធរត្រួតពិនិត្យនគរបាលឯករាជ្យ (IPOA) ដែលផ្តល់មូលនិធិដោយរដ្ឋ បាននិយាយក្នុងសេចក្តីថ្លែងការណ៍មួយថា មនុស្សជាង ៦០នាក់ ត្រូវចាប់ខ្លួនអំឡុងពេលតវ៉ានោះ។ មន្ត្រីម្នាក់នៅមន្ទីរពេទ្យជាតិ Kenyatta ដ៏សំខាន់របស់រដ្ឋធានី បាននិយាយថា មន្ទីរពេទ្យនោះបានទទួលអ្នករបួសរាប់សិបនាក់៕

អ៊ីរ៉ង់ ងាកទៅរកការបង្រ្កាបផ្ទៃក្នុង ដោយចាប់ខ្លួនមនុស្សរាប់រយនាក់ បន្ទាប់ពីសង្រ្គាម ១២ថ្ងៃរួច

ក្រុមមន្រ្តី និងសកម្មជនបាននិយាយថា អាជ្ញាធរអ៊ីរ៉ង់ កំពុងតែចាប់ឱកាសក្នុងពេលភាពធូរស្បើយពីបទឈប់បាញ់ជាមួយអ៊ីស្រាអែល ដើម្បីពង្រឹងការបង្ក្រាបសន្តិសុខផ្ទៃក្នុងនៅទូទាំងប្រទេស ជាមួយនឹងការចាប់ខ្លួនទ្រង់ទ្រាយធំ ការប្រហារជីវិត និងការដាក់ពង្រាយយោធា ជាពិសេសនៅក្នុងតំបន់ Kurdish ដែលងាយកើតមានភាពចលាចល។ក្រុមមន្ត្រី និងសកម្មជននិយាយថា ក្នុងប៉ុន្មានថ្ងៃនៃការវាយប្រហារតាមអាកាសរបស់អ៊ីស្រាអែល ដែលចាប់ផ្តើមនៅថ្ងៃទី១៣ ខែមិថុនា កងកម្លាំងសន្តិសុខអ៊ីរ៉ង់ ក៏ចាប់ផ្តើមយុទ្ធនាការនៃការចាប់ខ្លួនយ៉ាងទូលំទូលាយ អមដោយវត្តមានមន្រ្តីកាន់តែច្រើនតាមដងផ្លូវ ដែលមានមូលដ្ឋាននៅជុំវិញប៉ុស្តិ៍ត្រួតពិនិត្យ។អ្នកមួយចំនួននៅអ៊ីស្រាអែល និងក្រុមប្រឆាំងដែលនិរទេសខ្លួនបានសង្ឃឹមថា យុទ្ធនាការយោធាដែលផ្តោតលើឆ្មាំបដិវត្តន៍ និងកងកម្លាំងសន្តិសុខផ្ទៃក្នុងក៏ដូចជាទីតាំងនុយក្លេអ៊ែរនេះ នឹងបង្កឱ្យមានការបះបោរដ៏ធំនៅអ៊ីរ៉ង់ និងការផ្តួលរំលំសាធារណរដ្ឋអ៊ិស្លាមមួយនេះ។សារព័ត៌មានរ៉យទ័របានសាកសួរប្រជាជនអ៊ីរ៉ង់ជាច្រើន ដែលខឹងសម្បារនឹងរដ្ឋាភិបាលចំពោះគោលនយោបាយដែលពួកគេជឿថាបាននាំឱ្យមានការវាយប្រហាររបស់អ៊ីស្រាអែលនោះ ប៉ុន្តែទោះយ៉ាងនេះក្ដី មិនទាន់មានសញ្ញាណាមួយនៃការតវ៉ាសំខាន់ៗប្រឆាំងនឹងអាជ្ញាធរនៅឡើយទេ។សកម្មជននៅអ៊ីរ៉ង់ មិនហ៊ានចេញមុខពេកនោះទេអំឡុងពេលនេះ ដោយសកម្មជនខ្លះនិយាយថា ពួកគេបានស្គាល់មនុស្សរាប់សិបនាក់ដែលត្រូវអាជ្ញាធរកោះហៅ និងត្រូវចាប់ខ្លួន ឬត្រូវព្រមានប្រឆាំងនឹងការបញ្ចេញមតិណាមួយនៃការមិនយល់ស្របរបស់ពួកគេ។ អង្គការសិទ្ធិមនុស្សអ៊ីរ៉ង់ HRNA បាននិយាយកាលពីថ្ងៃចន្ទដើមសប្ដាហ៍នេះថា ខ្លួនបានកត់ត្រាការចាប់ខ្លួនមនុស្សចំនួន ៧០៥នាក់ ពីបទចោទប្រកាន់ផ្នែកនយោបាយ ឬសន្តិសុខ ចាប់តាំងពីការចាប់ផ្តើមនៃសង្គ្រាម ១២ថ្ងៃនោះមក៕

លោក Trump អះអាងពីជោគជ័យ ខណៈសម្ព័ន្ធយោធាណាតូ ឯកភាពចំណាយដ៏ខ្ពស់លើវិស័យការពារជាតិ

ប្រទេសជាសមាជិកសម្ព័ន្ធយោធាណាតូបានព្រមព្រៀងគ្នាកាលពីថ្ងៃពុធ ២៥ មិថុនា ដើម្បីបង្កើនការចំណាយលើវិស័យការពារជាតិរបស់ខ្លួនយ៉ាងច្រើន ក្នុងការបំពេញចិត្តប្រធានាធិបតីអាមេរិក លោក Donald Trump ដែលបានសាទរថាជា "ជ័យជម្នះដ៏ធំធេង" សម្រាប់អាមេរិក ហើយបានអះអាងជាថ្មីនូវការប្តេជ្ញាចិត្តរបស់ប្រទេសលោកក្នុងការការពារសម្ព័ន្ធមិត្តអឺរ៉ុបរបស់ខ្លួន។ លោក Trump បានទទួលបានភាពរីករាយ បន្ទាប់ពីប្រទេសចំនួន ៣២ របស់អង្គការណាតូបានយល់ព្រមលើគោលដៅជាអាទិភាពរបស់លោកចំនួន ៥ ភាគរយនៃ GDP លើការចំណាយលើវិស័យការពារជាតិ បន្ទាប់ពីកិច្ចពិភាក្សាពីរថ្ងៃ ពីថ្ងៃអង្គារដល់ថ្ងៃពុធសប្ដាហ៍នេះនៅទីក្រុងឡាអេ ប្រទេសហូឡង់។ លោកTrump បានហៅការបង្កើនការចំណាយនោះថាជា ជោគជ័យដ៏ធំធេងសម្រាប់សហរដ្ឋអាមេរិក ដោយទទួលយកនូវលទ្ធផលដ៏គាប់ប្រសើរ ដែលគ្មាននរណាម្នាក់គិតថាអាចធ្វើទៅបាន។ លោក Trump ក៏បានចុះហត្ថលេខាលើសេចក្តីប្រកាសចុងក្រោយផងដែរដែលបញ្ជាក់ពីការប្តេជ្ញាចិត្តដ៏ម៉ឺងម៉ាត់ចំពោះការសន្យាការពារជាតិរួមគ្នារបស់ណាតូថា រាល់ការវាយប្រហារលើប្រទេសណាមួយគឺជាការវាយប្រហារលើសមាជិកទាំងអស់របស់សម្ព័ន្ធភាពនេះ ជាវិធានការធានាសម្រាប់បណ្តាប្រទេសអឺរ៉ុបដែលព្រួយបារម្ភពីប្រទេសរុស្ស៊ី។មេដឹកនាំអាមេរិករូបនេះ បានលើកឡើងដដែលៗថា ទីក្រុងវ៉ាស៊ីនតោន អាចបដិសេធការការពារពីបណ្តាប្រទេសអឺរ៉ុប ដែលមិនចង់ចំណាយបន្ថែមទៀតលើវិស័យការពារជាតិ។ ការសម្របសម្រួលដែលបង្កើតឡើងដោយណាតូមើលឃើញថាប្រទេសនានាសន្យាថានឹងផ្ដល់៣,៥% នៃផលិតផលក្នុងស្រុកសរុប GDP សម្រាប់ការចំណាយយោធាស្នូលនៅឆ្នាំ ២០៣៥ និង១,៥% បន្ថែមទៀតដល់ផ្នែកដែលទាក់ទងនឹងសន្តិសុខកាន់តែទូលំទូលាយដូចជាហេដ្ឋារចនាសម្ព័ន្ធជាដើម៕

ក្រុមហ៊ុននេប៉ាល់ ប្រើប្រាស់យានដ្រូន ដើម្បីដឹកជញ្ជូនសម្ភារៈ និងកាកសំណល់នៅលើភ្នំ Everest

ក្រុមហ៊ុនបច្ចេកវិទ្យាយានដ្រូននេប៉ាល់ បានប្រើប្រាស់យានដ្រូន UAVនៅលើភ្នំ Everest ដើម្បីដឹកជញ្ជូនសម្ភារៈឡើងភ្នំចាំបាច់ ទៅកាន់តំបន់ក្រហែងទឹកកកដ៏គ្រោះថ្នាក់ និងក្រោយមកប្រើប្រាស់យានដ្រូនតែមួយនេះ ដើម្បីដឹកជញ្ជូនកាកសំណល់ចុះពីលើភ្នំវិញ ។ភ្នំ Everest ដែលជាភ្នំខ្ពស់ជាងគេបំផុតនៅលើពិភពលោក និងជាកន្លែងដាច់ស្រយាលជាងគេបំផុតនៅលើផែនដី ត្រូវបានញាំញីដោយសារសំរាមសម័យទំនើប ។ ជំរំត្រូវបានរាយប៉ាយដោយតង់រហែក កញ្ចប់អាហារ ដបអុកស៊ីសែនទទេ ហើយសូម្បីតែកាកសំណល់បន្សល់ទុកដោយក្រុមអ្នកឡើងភ្នំ ។ក្រុមហ៊ុន Airlift Technology ដែលមានមូលដ្ឋាននៅប្រទេសនេប៉ាល់ បានលើកឡើងពីវិបត្តិមួយនេះ ដោយបញ្ជូនយានដ្រូន ដើម្បីចែកចាយគ្រឿងផ្គត់ផ្គង់ និងនាំយកកាកសំណល់ពីលើភ្នំ ដែលពួកគេចាត់ទុកថា “គំនរសំរាមខ្ពស់បំផុតនៅលើពិភពលោក” ។ ក្រោយសាកល្បងដោយជោគជ័យកាលពីឆ្នាំ ២០២៤ ក្រុមហ៊ុន Airlift Technology ប៉ាន់ប្រមាណថា ពួកគេបាននាំយកសំរាមទម្ងន់ជាង ១ពាន់គ.ក ចន្លោះខែមីនា និងខែឧសភា ឆ្នាំ ២០២៥ ។ លោក Milan Pandey គឺជាសហស្ថាបនិកក្រុមហ៊ុន Airlift Technology បាននិយាយប្រាប់ទីភ្នាក់ងារព័ត៌មានរ៉យទ័រពីជំរំ Everest Base ថា រូបលោក និងដៃគូរបស់លោក កំពុងគិតថាហេតុអ្វីបានជាពួកយើងមិនចូលចិត្តភ្នំ Everest ស្អាត? លោកបន្តថា ជាការពិតណាស់ថា គោលបំណងសំខាន់ គឺនាំសំរាមចុះពីលើភ្នំ ពីព្រោះថា មានសំរាមរាប់តោននៅលើភ្នំ Everest ។ ដោយសហការណ៍ជាមួយដៃគូចិនដែលជាក្រុមហ៊ុនយានដ្រូន DJI ក្រុមហ៊ុន Airlift Technology បានជួលយានដ្រូន DJI FlyCart 30 ដែលមានសមត្ថភាពដឹកទំនិញបាន ១៥គ.ក ។ យានដ្រូនទាំងនេះ ដឹកជញ្ជូនគ្រឿងផ្គត់ផ្គង់ចាំបាច់ជាច្រើនដូចជាដបអុកស៊ីហ្សែន ជណ្តើរ និងខ្សែពួរពីជំរុញ Everest Base ស្ថិតនៅលើរយៈកម្ពស់ ៥.៣៦៤ម៉ែត្រ ទៅកាន់ជំរំ Camp 1 ស្ថិតនៅលើរយៈកម្ពស់ ៦.០៦៥ម៉ែត្រ ត្រឹមតែរយៈពេល ៣នាទីប៉ុណ្ណោះ ពេលដែលស្ថានភាពអាកាសធាតុអំណោយផលល្អ ៕

លោក Macron ៖ អឺរ៉ុបនឹងចំណាយបន្ថែមទៀតលើថ្លៃការពារ ដើម្បីប្រឈមការគំរាមកំហែងពីរុស្ស៊ី

ប្រធានាធិបតីបារំាងលោក Emmanuel Macron បាននិយាយប្រាប់ក្រុមអ្នកសារព័ត៌មានថា អឺរ៉ុបនឹងចំណាយបន្ថែមទៀតលើវិស័យការពារជាតិ ដើម្បីបំពាក់គ្រឿងយុទ្ធោបករណ៍ល្អប្រសើរជាងនេះ ជាការប្រឈមនឹងការគំរាមកំហែងពីរុស្ស៊ី ប៉ុន្តែបណ្តាប្រទេសអឺរ៉ុបមិនអាចត្រូវបានស្នើសុំឲ្យចំណាយច្រើនជាងមុននោះឡើយ ស្របពេលដែលពួកគេប្រឈមនឹងសង្រ្គាមពាណិជ្ជកម្ម ។លោក Macron បញ្ជាក់ថា ពួកយើងនឹងធ្វើអ្វីគ្រប់បែបយ៉ាងទាំងអស់ ដោយសារការគំរាមកំហែងរបស់រុស្ស៊ី ។ពន្ធបដិការសកលរបស់លោក DonaldTrump បង្កឲ្យមានការភ្ញាក់ផ្អើលនៅទូទាំងពិភពលោក ។ នៅថ្ងៃទី ៩ ខែមេសា ប្រធានាធិបតីសហរដ្ឋអាមេរិករូបនេះ បានដំឡើងពន្ធ ១០ភាគរយលើការនាំចូលទាំងអស់ បន្ថែមពីលើអត្រាពន្ធបដិការខ្ពស់ជាងមុនសម្រាប់ប្រទេសដែលសហរដ្ឋអាមេរិកមានឱនភាពពាណិជ្ជកម្មធំ ។ ក្រោយមក លោកបានផ្អាក និងបន្ទាបអត្រាពន្ធទាំងនោះ ប៉ុន្តែនៅរក្សាអត្រាពន្ធ ១០ភាគរយដដែល ។ខណៈពេលនោះដែរ អគ្គលេខាធិការអង្គការណាតូលោក Mark Rutte មានជំនឿចិត្តថា សម្ព័ន្ធមិត្តយោធាមួយនេះ នឹងឯកភាពគ្នាបង្កើនគោលដៅថ្លៃការពារជាតិរបស់ពួកគេដល់ ៥ភាគរយនៅថ្ងៃពុធនេះ អំឡុងកិច្ចប្រជុំកំពូលក្រុងឡាអេ បើទោះបីជាមានការជំទាស់ពីសមាជិកមួយចំនួនក៏ដោយ ។លោក Rutte និយាយថា លោកពុំព្រួយបារម្ភនោះឡើយចំពោះការរារាំងការផ្លាស់ប្តូរនេះរបស់អេស្ប៉ាញ ក្រោយពេលពួកគេប្រកាសថា វាគ្មានតម្រូវការសោះឡើយក្នុងការឈានដល់គោលដៅនោះ ៕

ពលរដ្ឋហ្កាហ្សាចូលរួមពិធីបុណ្យសពអ្នកកាសែតដែលត្រូវបានសម្លាប់ក្នុងការវាយប្រហាររបស់អ៊ីស្រាអែល

នៅថ្ងៃពុធនេះ ជនប៉ាឡេស្ទីនៅទីក្រុងហ្កាហ្សា បានចូលរួមពិធីបុណ្យសពរបស់អ្នកកាសែតក្នុងស្រុកម្នាក់គឺលោក Mahmoud Abu Sharbi ដែលត្រូវបានសម្លាប់នៅក្នុងការវាយប្រហាររបស់អ៊ីស្រាអែល ។ខណៈពេលនោះដែរ ពលរដ្ឋហ្កាហ្សា បាននាំគ្នាលាចុងក្រោយផងដែរ ជាមួយមនុស្សជាទីស្រលាញ់របស់ពួកគេ ដែលត្រូវបានសម្លាប់នៅក្នុងការវាយប្រហាររបស់អ៊ីស្រាអែល រួមទាំងអ្នកដែលស្លាប់ ពេលព្យាយាមស្វែងរកជំនួយ ។អ៊ីស្រាអែលតែងតែច្រានចោលគោលដៅលើក្រុមអ្នកសារព័ត៌មាន ហើយពួកគេនិយាយថា ខ្លួនបានចាត់វិធានការ ដើម្បីចៀសវាងការវាយប្រហារចំគោលដៅស៊ីវិល ។សង្រ្គាមនៅតំបន់ហ្កាហ្សា បានធ្វើឲ្យអ៊ីស្រាអែលឃ្លាតឆ្ងាយពីប្រទេសដៃគូអន្តរជាតិជាច្រើន ដោយសារយុទ្ធនាការយោធារបស់ពួកគេ ។អំឡុងរយៈពេល ១២ថ្ងៃនៃសង្រ្គាមអ៊ីស្រាអែល-ប៉ាឡេស្ទីន ជនប៉ាឡេស្ទីនជាង ៨០០នាក់ ត្រូវបានសម្លាប់នៅក្នុងតំបន់ហ្កាហ្សាដោយយោធាអ៊ីស្រាអែល ក្នុងនោះមនុស្សយ៉ាងហោច ៣០នាក់ បានស្លាប់នៅថ្ងៃពុធនេះ ៕

អាកាសយានដ្ឋានក្រុងតែល អាវីវ ចាប់ផ្តើមជើងហោះហើរអន្តរជាតិឡើងវិញ ក្រោយមានបទឈប់បាញ់ជាមួយអ៊ីរ៉ង់

នៅថ្ងៃពុធនេះ ក្រុមហ៊ុនអាកាសចរណ៍ បានចាប់ផ្តើមឡើងវិញជើងហោះហើរចេញ-ចូលទីក្រុងតែល អាវីវ ស្របពេលមានបទឈប់បាញ់ជាមួយអ៊ីរ៉ង់ បន្ទាប់ពីដែនអាកាសអ៊ីស្រាអែល ត្រូវបានបិទអស់រយៈពេលជិត ២សប្តាហ៍ ។យោធាអ៊ីស្រាអែល បានដកចេញការរឹតត្បិតសកម្មភាពនៅទូទាំងប្រទេសកាលពីល្ងាចថ្ងៃអង្គារ រយៈពេល ១២ថ្ងៃ ក្រោយពេលអ៊ីស្រាអែល និងអ៊ីរ៉ង់ បើកការវាយប្រហារតាមច្រកអាកាសលើគ្នាទៅវិញទៅមក ។ក្រុមមន្រ្តីនិយាយថា អាកាសយានដ្ឋាន Ben Gurion ដែលជាអាកាសយានដ្ឋានដ៏សំខាន់នៅក្នុងប្រទេសមួយនេះ បានបើកដំណើរការឡើងវិញហើយ ។ អាជ្ញាធរអាកាសយានដ្ឋានអ៊ីស្រាអែល និយាយថា ពួកគេបានទាក់ទងជាមួយក្រុមហ៊ុនអាកាសចរណ៍ ដើម្បីព្យាយាមពន្លឿនការវិលត្រឡប់មករកការធ្វើចរាចរណ៍លើអាកាសវិញ ស្របពេលដែលអ្នកដំណើរអ៊ីស្រាអែលរាប់ម៉ឺននាក់ បានជាប់ខ្លួននៅបរទេស បន្ទាប់ពីការចាប់ផ្តើមសង្រ្គាមអ៊ីស្រាអែល-អ៊ីរ៉ង់កាលពីថ្ងៃទី ១៣ ខែមិថុនាកន្លងទៅ ។ក្រុមហ៊ុន El Al Israel Airlines ELAL.TA ដែលជាក្រុមហ៊ុនដឹកជញ្ជូនចងទង់ជាតិអ៊ីស្រាអែល និយាយថា ពួកគេកំពុងធ្វើការ ដើម្បីនាំពលរដ្ឋអ៊ីស្រាអែលវិលត្រឡប់ទៅកាន់ប្រទេសរបស់ពួកគេវិញ ។ដោយឡែក ជើងហោះចាកចេញ បានប្រតិបត្តិការផងដែរ ហើយជនបរទេសដែលជាប់ខ្លួននៅអ៊ីស្រាអែល អាចចាកចេញពីប្រទេសមួយនេះ ៕

បណ្ដាញសង្គម

ព័ត៌មានថ្មីៗ

រដ្ឋមន្រ្តីក្រសួងសុខាភិបាល បន្តចុះពិនិត្យ និងគាំទ្រតម្រូវការជាក់ស្តែងចំពោះមុខ ក្នុងមូលដ្ឋានសុខាភិបាលជាប់ព្រំដែន នៅមណ្ឌលសុខភាព ស្រអែម និងមណ្ឌលសុខភាពសម្តេចអគ្គមហាធម្មពោធិសាល ជា ស៊ីម ខេត្តព្រះវិហារ

ឯកឧត្តម ឌិត ទីណា បន្តជួបមន្ត្រីកសិកម្មឃុំ-សង្កាត់ ដេីម្បីផ្សព្វផ្សាយគោលនយោបាយអាទិភាព "មានហូប មានប្រេី មានបាន និងមានរហូត"

មនុស្សជាង ២០នាក់ស្លាប់ និងជាច្រើននាក់បន្តបាត់ខ្លួន ក្នុងបំណាក់ដីនៅប្រទេសកូឡុំប៊ី

ឯកឧត្តម ប៉េង ពោធិ៍នា៖ «យើងត្រូវរួបរួមគ្នាជាធ្លុងមួយទប់ស្កាត់ និងបំផ្លាញមហិច្ឆតានយោបាយរបស់ក្រុមជ្រុលនិយមមួយក្តាប់តូច ដែលតែងតែបញ្ឆេះកំហឹងជាតិសាសន៍»

ឯកឧត្តម ហេង សួរ ឯកភាពជាមួយវិទ្យាស្ថាន CDRI ដើម្បីសិក្សាស្រាវជ្រាវពីវឌ្ឍនភាពតម្រូវការជំនាញនៅលើទីផ្សារ

លោក Trump៖ បទឈប់បាញ់នៅតំបន់ហ្កាហ្សា អាចកើតឡើងក្នុងពេលត្រឹមតែមួយសប្តាហ៍

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877