នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ក្រុមអ្នកជួយសង្គ្រោះ៖ មនុស្ស ៤នាក់ទៀតដែលជាប់ក្នុងរូងភ្នំ នៅឡាវ ត្រូវបាននាំ​ចេញ​ដោយសុវត្ថិភាព
លោក Hegseth៖ យុគ​សម័យឧបត្ថម្ភធនការពារជាតិ​ពីអាមេរិក សម្រាប់ «ប្រទេសអ្នកមាន» ចប់ហើយ
មន្ត្រីជាន់ខ្ពស់អ៊ីរ៉ង់ និយាយ​ថា លោក Trump «ក្បត់ការទូត» ដោយបន្តបិទខ្ទប់​ដោយទ័ព​ជើង​ទឹក​​អាមេរិក
វេជ្ជបណ្ឌិត៖ សុខភាព​លោក Trump គឺ​ល្អប្រសើរណាស់​ ប៉ុន្តែ​គួរតែសម្រកទម្ងន់

ព័ត៌មានអន្តរជាតិ

EU អនុម័តប្រាក់កម្ចី ៩០ពាន់លានអឺរ៉ូដល់អ៊ុយក្រែន និងទណ្ឌកម្មថ្មី លើរុស្ស៊ី ក្រោយហុងគ្រីបោះបង់សិទ្ធិវេតូ

2026/04/22 07:39:41 pm        103
Facebook Telegram Linkin
ឯកអគ្គរដ្ឋទូតសហភាពអឺរ៉ុប (EU) នៅថ្ងៃពុធ (ទី២២ ខែមេសា ឆ្នាំ២០២៦) នេះ បានអនុម័តផ្តល់ប្រាក់កម្ចីដែលបានសន្យាចំនួន ៩០ពាន់លានអឺរ៉ូ (១០៦ពាន់លានដុល្លារ) ដល់អ៊ុយក្រែន ក៏ដូចជាកញ្ចប់ទណ្ឌកម្មថ្មីប្រឆាំងនឹងរុស្ស៊ី បន្ទាប់ពីប្រទេសហុងគ្រីបោះបង់សិទ្ធិវេតូរបស់ខ្លួន។ នេះបើយោងតាមការឲ្យដឹងពីប្រធានប្ដូរវេនរបស់ប្លុក គឺស៊ីប។អ្នកនាំពាក្យរបស់ប្រធានប្ដូរវេនស៊ីប បានបន្ថែមថា រដ្ឋជាសមាជិកចំនួន ២៧ របស់ EU ឥឡូវនេះ ត្រូវបានគេរំពឹងថា នឹងចុះហត្ថលេខាលើកិច្ចព្រមព្រៀងនេះ នារសៀលថ្ងៃព្រហស្បតិ៍។EU បានយល់ព្រមកាលពីឆ្នាំមុនលើប្រាក់កម្ចីនេះ ដើម្បីបន្តធ្វើឲ្យអ៊ុយក្រែនមានលំនឹងហិរញ្ញវត្ថុ រហូតដល់ឆ្នាំ២០២៦ និងឆ្នាំ២០២៧។ ប៉ុន្តែហុងគ្រីបានបដិសេធមិនចុះហត្ថលេខាលើកិច្ចព្រមព្រៀងនេះទេ ខណៈដែលនាយករដ្ឋមន្ត្រីដែលមានភាពជិតស្និទ្ធជាមួយរុស្ស៊ី គឺលោក Viktor Orban បានចោទប្រកាន់អ៊ុយក្រែនថា បានធ្វើឲ្យប៉ះពាល់ដល់ការបញ្ជូនប្រេងឆ្លងកាត់របស់រុស្ស៊ីតាមរយៈបំពង់បង្ហូរ ដែលរងការខូចខាតដោយការវាយប្រហាររបស់រុស្ស៊ី។ជម្លោះនេះក៏បានពន្យារពេលទណ្ឌកម្មថ្មី ប្រឆាំងនឹងរុស្ស៊ីផងដែរ ដែលដំបូងឡើយ EU មានគោលបំណងអនុម័ត ដើម្បីប្រារព្ធខួប ៤ឆ្នាំនៃការឈ្លានពានទ្រង់ទ្រាយធំរបស់រុស្ស៊ី លើអ៊ុយក្រែន នៅថ្ងៃទី២៤ ខែកុម្ភៈ ឆ្នាំ២០២២។នៅទីបំផុត ឧបសគ្គនេះត្រូវបានលុបបំបាត់នៅពេលដែលក្រុមហ៊ុនប្រេងរបស់ហុងគ្រី MOL បានប្រាប់នៅថ្ងៃពុធនេះថា ខ្លួនត្រូវបានជូនដំណឹងថា ប្រតិបត្តិករអ៊ុយក្រែននៃបំពង់បង្ហូរប្រេង Druzhba បានត្រៀមរួចរាល់ហើយ ដើម្បីចាប់ផ្ដើមបញ្ជូនប្រេងឆៅទៅកាន់ហុងគ្រី និងស្លូវ៉ាគី។ការរំពឹងទុករបស់អ៊ុយក្រែន ក្នុងការទទួលបានប្រាក់កម្ចីនេះ បានមានកម្រិតខ្ពស់រួចហើយ នៅពេលដែលលោក Orban បានចាញ់ការបោះឆ្នោតសភារបស់ហុងគ្រី កាលពីថ្ងៃទី១២ ខែមេសា។ មេដឹកនាំគណបក្សឈ្នះឆ្នោត លោក Peter Magyar បាននិយាយថា លោកនឹងលែងរារាំងមូលនិធិរបស់ EU សម្រាប់ទីក្រុងគីវទៀតហើយ ទោះបីជារូបលោកត្រូវបានគេរំពឹងថា នឹងឡើងកាន់អំណាចនៅខែក្រោយក៏ដោយ៕

រដ្ឋមន្ត្រីការបរទេសអ៊ីស្រាអែលអំពាវនាវឲ្យលីបង់ធ្វើការជាមួយអ៊ីស្រាអែល ប្រឆាំងនឹងក្រុមហេសបូឡា

2026/04/22 07:19:10 pm        48
Facebook Telegram Linkin
រដ្ឋមន្ត្រីការបរទេសអ៊ីស្រាអែល នៅថ្ងៃពុធ (ទី២២ ខែមេសា ឆ្នាំ២០២៦) នេះ បានជំរុញឲ្យទីក្រុងបេរូតប្រឹងប្រែងរួមគ្នាជាមួយអ៊ីស្រាអែល ដើម្បីទប់ទល់នឹងក្រុមប្រដាប់អាវុធលីបង់ គឹហេសបូឡា នៅមុនការចរចា រវាងប្រទេសទាំង២ ដែលគ្រោងនឹងចាប់ផ្ដើមឡើងវិញនៅទីក្រុងវ៉ាស៊ីនតោន សហរដ្ឋងាមេរិក។នៅក្នុងសុន្ទរកថាមួយទៅកាន់អ្នកការទូត លោក Gideon Saar បានលើកឡើងថា៖ «ថ្ងៃស្អែកការចរចាដោយផ្ទាល់ រវាងអ៊ីស្រាអែល និងលីបង់ នឹងចាប់ផ្ដើមឡើងវិញនៅទីក្រុងវ៉ាស៊ីនតោន។ ខ្ញុំសូមអំពាវនាវដល់រដ្ឋាភិបាលលីបង់ សូមធ្វើការរួមគ្នាប្រឆាំងនឹងរដ្ឋភេរវកម្មដែលក្រុមហេសបូឡាបានបង្កើតឡើងនៅក្នុងទឹកដីរបស់អ្នក»។លោក Saar បានបន្តថា៖ «ពួកអ្នកត្រូវការកិច្ចសហប្រតិបត្តិការនេះ ច្រើនជាងពួកយើង។ វាទាមទារភាពច្បាស់លាស់ខាងសីលធម៌ និងភាពក្លាហាន ក្នុងការប្រថុយប្រថាន។ ប៉ុន្តែមិនមានជម្រើសពិតប្រាកដនោះទេ ដើម្បីធានាអនាគតនៃការមានសន្តិភាព ទាំងសម្រាប់ពួកអ្នក និងសម្រាប់ពួកយើង»។មន្ត្រីក្រសួងការបរទេសម្នាក់ បានប្រាប់សារប័ត៌មាន AFP ថា អ៊ីស្រាអែល និងលីបង់ ដែលមិនមានទំនាក់ទំនងការទូត នឹងធ្វើកិច្ចចរចាថ្មី នៅទីក្រុងវ៉ាស៊ីនតោន នាថ្ងៃព្រហស្បតិ៍នេះ។អ៊ីស្រាអែលបានធ្វើការវាយប្រហារតាមអាកាសយ៉ាងខ្លាំងក្លា នៅទូទាំងប្រទេសលីបង់ និងបានចូលលុកលុយភាគខាងត្បូង បន្ទាប់ពីក្រុមហេសបូឡា បានចូលរួមក្នុងសង្គ្រាមមជ្ឈិមបូព៌ា កាលពីថ្ងៃទី២ ខែមីនា ដើម្បីបង្ហាញសាមគ្គីជាមួយអ៊ីរ៉ង់ដែលជាអ្នកគាំទ្រខ្លួន។ ទោះបីជាមានបទឈប់បាញ់ដែលបានចាប់ផ្តើមកនៅថ្ងៃសុក្រសប្ដាហ៍មុនក៏ដោយ ក៏ទាហានអ៊ីស្រាអែលនៅតែសកម្មនៅភាគខាងត្បូងលីបង់ ដោយរដ្ឋមន្ត្រីក្រសួងការពារជាតិ លោក Israel Katz បាននិយាយកាលពីសប្តាហ៍មុនថា ពួកគេនឹងប្រើប្រាស់ «កម្លាំងពេញលេញ» ប្រសិនបើត្រូវបានគំរាមកំហែង៕

អ៊ីស្រាអែលអាចបាត់បង់ឋានៈជាអ្នកសង្កេតការណ៍នៅក្នុងសភានយោបាយអឺរ៉ុប ដោយសារច្បាប់ទោសប្រហារជីវិត

2026/04/22 07:15:30 pm        58
Facebook Telegram Linkin
ប្រធានសភាបានព្រមានថា អ៊ីស្រាអែលអាចបាត់បង់ឋានៈជាអ្នកសង្កេតការណ៍នៅក្នុងសភានៃក្រុមប្រឹក្សាអឺរ៉ុប ដោយសារច្បាប់ទោសប្រហារជីវិតថ្មី។  ច្បាប់នេះអាចធ្វើឲ្យប្រជាជនប៉ាឡេស្ទីនប្រឈមនឹងការប្រហារជីវិតចំពោះបទល្មើសរួមទាំងឃាតកម្ម និងភេរវកម្ម ប្រសិនបើត្រូវបានកាត់ទោសនៅក្នុងតុលាការយោធានៅក្នុងប៉ាឡេស្ទីន ឬតុលាការស៊ីវិលនៅក្នុងប្រទេសអ៊ីស្រាអែល។ប្រធានសភា លោកស្រី Petra Bayr បាននិយាយថា វា «ពិតជាតម្រូវការ» សម្រាប់រដ្ឋអ្នកសង្កេតការណ៍ក្នុងការមិនមានទោសប្រហារជីវិត ហើយឋានៈរបស់អ៊ីស្រាអែល «អាចត្រូវបានផ្អាក រហូតដល់មានការសម្រេចចិត្ត (ប្រឆាំង) ឬរហូតដល់វាច្បាស់ណាស់ថា ច្បាប់នេះ នឹងមិនចូលជាធរមាន»។លោកស្រី Bayr បានបន្ថែមថា «មានបន្ទាត់ក្រហម… សូម្បីតែទោសប្រហារជីវិតដែលមិនរើសអើង ក៏មិនអាចអនុវត្តបានដែរ»៕

រដ្ឋមន្ត្រីក្រសួងរតនាគាររបស់សហរដ្ឋអាមេរិក ដាក់សម្ពាធសេដ្ឋកិច្ចកាន់តែខ្លាំង លើអ៊ីរ៉ង់

2026/04/22 07:11:48 pm        53
Facebook Telegram Linkin
រដ្ឋមន្ត្រីក្រសួងរតនាគារ លោក Scott Bessent បាននិយាយនៅថ្ងៃពុធ (ទី២២ ខែមេសា ឆ្នាំ២០២៦) នេះថា សហរដ្ឋអាមេរិកនឹងបន្តដាក់សម្ពាធលើអ៊ីរ៉ង់ តាមរយៈប្រតិបត្តិការ «Economic Fury» របស់ខ្លួន ដោយកត់សម្គាល់ថា ការរឹតបន្តឹងពាណិជ្ជកម្មតាមសមុទ្ររបស់អ៊ីរ៉ង់ ផ្តោតលើ «ការទ្រទ្រង់ចំណូល» ជាចម្បងរបស់របបនេះ។តាមរយៈសំណេរបង្ហោះ នៅលើបណ្ដាញសង្គម X លោក Bessent បានឲ្យដឹងថា ដូចដែលលោកប្រធានាធិបតី Donald Trump បានបញ្ជាក់យ៉ាងច្បាស់ កងកម្លាំងកងទ័ពជើងទឹកសហរដ្ឋអាមេរិក នឹងបន្តបិទផ្លូវកំពង់ផែរបស់អ៊ីរ៉ង់។លោក Bessent បានបន្តទៀតថា៖ «ក្នុងរយៈពេលប៉ុន្មានថ្ងៃទៀត កន្លែងស្តុកប្រេង នៅកោះ Kharg នឹងពេញ ហើយអណ្តូងប្រេងដ៏ផុយស្រួយរបស់អ៊ីរ៉ង់ នឹងត្រូវបិទ។ ការរឹតបន្តឹងពាណិជ្ជកម្មតាមសមុទ្ររបស់អ៊ីរ៉ង់ ផ្តោតលើការទ្រទ្រង់ចំណូលជាចម្បងរបស់របបនេះដោយផ្ទាល់»។លោក Bessent បានបន្ថែមថា ក្រសួងរតនាគារ នឹងបន្ត «អនុវត្តសម្ពាធអតិបរមាតាមរយៈប្រតិបត្តិការ Economic Fury ដើម្បីបន្ថយជាលំដាប់នូវសមត្ថភាពរបស់ទីក្រុងតេអេរ៉ង់ ក្នុងការបង្កើត ផ្ទេរ និងបញ្ជូនមូលនិធិត្រឡប់ចូលទៅប្រទេសវិញ»។លោកបានព្រមានថា៖ «បុគ្គល ឬនាវាណាមួយដែលសម្របសម្រួលលំហូរទាំងនេះ តាមរយៈពាណិជ្ជកម្ម និងហិរញ្ញវត្ថុដោយសម្ងាត់ ប្រឈមនឹងហានិភ័យរងទណ្ឌកម្មរបស់សហរដ្ឋអាមេរិក។ យើងបន្តបង្កកមូលនិធិដែលត្រូវបានលួចដោយថ្នាក់ដឹកនាំពុករលួយ តាងនាមឲ្យប្រជាជនអ៊ីរ៉ង់»។គួរបញ្ជាក់ថា សហរដ្ឋអាមេរិកបានអនុវត្តការបិទផ្លូវទឹក ចំពោះកំពង់ផែអ៊ីរ៉ង់ បន្ទាប់ពីការចរចា នៅទីក្រុងអ៊ីស្លាម៉ាបាដ ប្រទេសប៉ាគីស្ថាន កាលពីដើមខែនេះ រវាងអ៊ីរ៉ង់ និងសហរដ្ឋអាមេរិក បានបរាជ័យ៕

យោធាអង់គ្លេសនិយាយថា នាវាមួយគ្រឿងទៀតត្រូវបានវាយប្រហារនៅច្រកសមុទ្រហ័រមូស

2026/04/22 07:09:17 pm        49
Facebook Telegram Linkin
យោធាអង់គ្លេសបាននិយាយថា នាវាទីពីរត្រូវបានវាយប្រហារ នៅច្រកសមុទ្រហ័រមូស នៅថ្ងៃពុធនេះ ត្រឹមតែមួយរយៈពេលខ្លីបន្ទាប់ពីកងឆ្មាំបដិវត្តន៍អ៊ីរ៉ង់ បានបើកការបាញ់ប្រហារលើនាវាដឹកកុងតឺន័រមួយគ្រឿង។មជ្ឈមណ្ឌលប្រតិបត្តិការពាណិជ្ជកម្មតាមសមុទ្រចក្រភពអង់គ្លេសរបស់យោធាអង់គ្លេស មិនបានកំណត់អត្តសញ្ញាណភ្លាមៗថា អ្នកណាជាអ្នកបាញ់ទៅលើនាវាទីពីរនោះទេ។ ទោះជាយ៉ាងណាក៏ដោយ ការសង្ស័យបានធ្លាក់ទៅលើអ៊ីរ៉ង់ភ្លាមៗ ដែលកងឆ្មាំបដិវត្តន៍អ៊ីរ៉ង់ពីមុន បានបើកការបាញ់ប្រហារលើនាវាដឹកកុងតឺន័រនោះ។នៅក្នុងការវាយប្រហារលើកទី២នេះ នាវាដឹកទំនិញនោះ ត្រូវបានគេថា វាត្រូវបានបាញ់ប្រហារ ហើយត្រូវបានបញ្ឈប់នៅក្នុងទឹក ហើយពុំមានរបាយការណ៍អំពីការខូចខាតដល់នាវានោះទេ៕

អ៊ីរ៉ង់៖ ការបិទផ្លូវទឹករបស់សហរដ្ឋអាមេរិក មានផលប៉ះពាល់តិចតួច លើការផ្គត់ផ្គង់ស្បៀងអាហារ

2026/04/22 07:05:09 pm        35
Facebook Telegram Linkin
រដ្ឋមន្ត្រីក្រសួងកសិកម្មអ៊ីរ៉ង់ បានឲ្យដឹងថា ការបិទខ្ទប់ផ្លូវទឹករបស់សហរដ្ឋអាមេរិក មានផលប៉ះពាល់តិចតួច លើសមត្ថភាពរបស់ប្រទេស ក្នុងការផ្គត់ផ្គង់ទំនិញ និងស្បៀងអាហារមូលដ្ឋាន ដោយលើកឡើងពីផលិតកម្មក្នុងស្រុកដ៏រឹងមាំ និងផ្លូវនាំចូលជំនួស។កាលពីថ្ងៃអង្គារ (ទី២១ ខែមេសា ឆ្នាំ២០២៦) រដ្ឋមន្ត្រីក្រសួងកសិកម្ម លោក Gholamreza Nouri បាននិយាយថា៖ «ទោះបីជាមានការបិទផ្លូវទឹកដោយសហរដ្ឋអាមេរិកក៏ដោយ ក៏យើងមិនមានបញ្ហាក្នុងការផ្គត់ផ្គង់ទំនិញ និងស្បៀងអាហារមូលដ្ឋាននោះទេ ដ្បិតដោយសារតែទំហំប្រទេស អាចមានការនាំចូលពីព្រំដែនផ្សេងៗបាន»។យោងតាមទីភ្នាក់ងារសារព័ត៌មានផ្លូវការ IRNA បានឲ្យដឹងថា លោករដ្ឋមន្ត្រីបានបន្ថែមថា «ប្រហែល ៨៥ភាគរយនៃផលិតផលកសិកម្ម និងទំនិញមូលដ្ឋាន ត្រូវបានផលិតនៅក្នុងស្រុក ដូច្នេះ សន្តិសុខស្បៀងអាហាររបស់ប្រទេស ត្រូវបានបង្កើតឡើង»។គួរបញ្ជាក់ថា សហរដ្ឋអាមេរិកបានធ្វើការបិទខ្ទប់ផ្លូវទឹក ចំពោះកំពង់ផែ និងឆ្នេរសមុទ្ររបស់អ៊ីរ៉ង់ កាលពីថ្ងៃទី១៣ ខែមេសា ពោលគឺប៉ុន្មានថ្ងៃបន្ទាប់ពីបទឈប់បាញ់ត្រូវបានប្រកាស ជាកិច្ចព្រមព្រៀងដែលបានផ្អាកសង្គ្រាមរបស់ខ្លួន ជាមួយអ៊ីរ៉ង់។ អ៊ីរ៉ង់បានរិះគន់យ៉ាងខ្លាំង ចំពោះការបិទផ្លូវនេះ ដោយចាត់ទុកថា វាគឺជាការរំលោភលើបទឈប់បាញ់៕

មន្ទីរបញ្ចកោណនិយាយថា មិនទាន់អាចវាយតម្លៃការខូចខាតដែលបង្កឡើងដោយអ៊ីរ៉ង់ចំពោះមូលដ្ឋានទ័ពអាមេរិកនៅឡើយទេ

2026/04/22 07:02:43 pm        47
Facebook Telegram Linkin
ក្រសួងសង្គ្រាមសហរដ្ឋអាមេរិក បាននិយាយថា ខ្លួនមិនទាន់អាចផ្តល់ការវាយតម្លៃអំពីការខូចខាតដែលបង្កឡើងលើមូលដ្ឋានទ័ពអាមេរិកនៅមជ្ឈិមបូព៌ាដោយការវាយប្រហារសងសឹករបស់អ៊ីរ៉ង់នៅឡើយទេ។លោក Jules Hurst អនុរដ្ឋមន្ត្រីក្រសួងការពារជាតិស្តីទី បានប្រាប់សន្និសីទសារព័ត៌មានស្តីពីសេចក្តីព្រាងថវិកាសម្រាប់ឆ្នាំសារពើពន្ធ ២០២៧ របស់មន្ទីរបញ្ចកោណថា៖«យើងមិនមានតួលេខចុងក្រោយសម្រាប់ការខូចខាតដល់មូលដ្ឋានទ័ពរបស់យើងនៅក្រៅប្រទេសទេ»។«វាពិតជាអាស្រ័យលើរបៀបដែលយើងសម្រេចចិត្តសាងសង់ឡើងវិញនូវមូលដ្ឋានទ័ពទាំងនោះ ឬប្រសិនបើយើងធ្វើ ដៃគូរបស់យើង ក៏អាចចូលរួមចំណែកក្នុងការសាងសង់នោះដែរ។ ដូច្នេះ យើងមិនមានការប៉ាន់ស្មានច្រើនអំពីអ្វីដែលវាត្រូវការ ដើម្បីបង្កើតឡើងវិញនូវមូលដ្ឋានទ័ពទាំងនោះទេ»។សហរដ្ឋអាមេរិក និងអ៊ីស្រាអែលបានចាប់ផ្តើមប្រតិបត្តិការទ្រង់ទ្រាយធំប្រឆាំងនឹងអ៊ីរ៉ង់នៅថ្ងៃទី ២៨ ខែកុម្ភៈ។ នៅថ្ងៃទី ០៧ ខែមេសា ប្រធានាធិបតីសហរដ្ឋអាមេរិក លោក ដូណាល់ ត្រាំ បានប្រកាសពីបទឈប់បាញ់រយៈពេលពីរសប្តាហ៍ជាមួយសាធារណរដ្ឋឥស្លាម។ នៅថ្ងៃទី ១១ ខែមេសា អ៊ីរ៉ង់ និងសហរដ្ឋអាមេរិកបានធ្វើកិច្ចចរចាជាច្រើនជុំដែលដួលរលំនៅទីក្រុងអ៊ីស្លាម៉ាបាដ។ គណៈប្រតិភូអ៊ីរ៉ង់ដឹកនាំដោយប្រធានសភាលោក Mohammad Bagher Ghalibaf ហើយគណៈប្រតិភូអាមេរិកដឹកនាំដោយអនុប្រធានាធិបតី JD Vance។ គេសន្មត់ថា ការចរចា អាចបន្តឡើងវិញ នៅថ្ងៃទី ២២ ខែមេសានេះ។

ប្រភព៖ អាមេរិកងាកទៅរកបច្ចេកវិទ្យាប្រឆាំងយានដ្រូនរបស់អ៊ុយក្រែន ក្រោយរងការវាយប្រហារពីអ៊ីរ៉ង់

2026/04/22 07:00:31 pm        54
Facebook Telegram Linkin
យោងតាមបុគ្គល ៥រូបដែលដឹងពីបញ្ហានេះ បានឲ្យដឹងថា យោធាសហរដ្ឋអាមេរិក បានចាប់ផ្ដើមប្រើប្រាស់បច្ចេកវិទ្យាប្រឆាំងយានដ្រូនរបស់អ៊ុយក្រែន ក្នុងរយៈពេលប៉ុន្មានសប្តាហ៍ថ្មីៗនេះ នៅឯមូលដ្ឋានទ័ពអាកាសសំខាន់មួយរបស់សហរដ្ឋអាមេរិក ក្នុងប្រទេសអារ៉ាប៊ីសាអ៊ូឌីត ខណៈដែលខ្លួនកំពុងស្វែងរកការទប់ស្កាត់ការវាយប្រហារដែលបានបំផ្លាញយន្តហោះ និងអគារ ហើយបានសម្លាប់សមាជិកយោធាយ៉ាងហោចណាស់ម្នាក់។ការដាក់ពង្រាយប្រព័ន្ធបញ្ជា និងត្រួតពិនិត្យរបស់អ៊ុយក្រែនឈ្មោះ Sky Map នៅមូលដ្ឋានទ័ពអាកាស Prince Sultan Air Base ដែលមិនធ្លាប់មានការរាយការណ៍ពីមុនមកនោះ គឺជាសញ្ញាមួយដែលបង្ហាញថា តើយោធាអ៊ុយក្រែនបានរីកចម្រើនទៅមុខយ៉ាងដូចម្ដេច នៅក្នុងបច្ចេកវិទ្យាយានដ្រូន និងប្រឆាំងយានដ្រូន ដែលត្រូវបានពង្រឹង អំឡុងសង្គ្រាមរយៈពេល ៤ឆ្នាំរបស់ខ្លួន ជាមួយរុស្ស៊ី។មន្ត្រីយោធាអ៊ុយក្រែនបានទៅដល់មូលដ្ឋាននេះ ក្នុងរយៈពេលប៉ុន្មានសប្តាហ៍ថ្មីៗនេះ ដើម្បីបណ្តុះបណ្តាលបុគ្គលិកយោធាអាមេរិកប្រើប្រាស់ប្រព័ន្ធ Sky Map នេះ ដែលត្រូវបានប្រើប្រាស់យ៉ាងទូលំទូលាយដោយយោធាអ៊ុយក្រែន ដើម្បីតាមរកឃើញការគំរាមកំហែងដោយយានដ្រូន ក្នុងនោះរួមទាំងយានដ្រូន Shahed ដែលផលិតដោយអ៊ីរ៉ង់ផងដែរ ហើយបើកការវាយប្រហារតបតជាមួយយានដ្រូនស្ទាក់ចាប់។ដោយសារតែយានដ្រូនតម្លៃទាប និងផលិតទ្រង់ទ្រាយធំ ដើរតួនាទីយ៉ាងសំខាន់ក្នុងសង្គ្រាមរបស់រុស្ស៊ី នៅអ៊ុយក្រែន មន្ទីរបញ្ចកោណបានបង្កើនការវិនិយោគលើបច្ចេកវិទ្យាប្រឆាំងយានដ្រូននេះ។ ប៉ុន្តែអ្នកវិភាគ បានលើកឡើងថា ការប្រើប្រាស់បច្ចេកវិទ្យាអ៊ុយក្រែន នៅមូលដ្ឋាន Prince Sultan ដែលមានចម្ងាយប្រហែល ៦៤០គីឡូម៉ែត្រ ពីប្រទេសអ៊ីរ៉ង់ និងដែលបានប្រឹងប្រែងទប់ទល់នឹងការវាយប្រហារដោយយានដ្រូន និងមីស៊ីល ចាប់តាំងពីសង្គ្រាមបានចាប់ផ្តើម បានបង្ហាញពីភាពងាយរងគ្រោះនៅក្នុងការការពារដែនអាកាស និងមីស៊ីលរបស់សហរដ្ឋអាមេរិក៕

ក្រុមកាន់កាប់អ៊ីស្រាអែល សម្រុកចូលវិហារ Al-Aqsa របស់ក្រុងយេរូសាឡឹម ចំពេលមានភាពតានតឹង

2026/04/22 06:57:38 pm        49
Facebook Telegram Linkin
អាជ្ញាធរប៉ាឡេស្ទីន បានឲ្យដឹងថា នៅថ្ងៃពុធ (ទី២២ ខែមេសា ឆ្នាំ២០២៦) នេះ ក្រុមកាន់កាប់អ៊ីស្រាអែលរាប់សិបនាក់ បានសម្រុកចូលបរិវេណវិហារឥស្លាម Al-Aqsa នៅទីក្រុងកាន់កាប់យេរូសាឡឹមខាងកើត (East Jerusalem) ក្រោមការការពារយ៉ាងតឹងរ៉ឹងដោយនគរបាល ខណៈដែលភាពតានតឹងនៅតែបន្តឡើងកម្ដៅ នៅទូទាំងតំបន់កាន់កាប់ West Bank។អាជ្ញាធររដ្ឋបាលក្រុងយេរូសាឡឹម បានឲ្យដឹងថា ក្រុមកាន់កាប់បាននាំគ្នាដើរនៅទីធ្លានៃបរិវេណរបស់វិហារនេះ ហើយបានធ្វើពិធីសាសនាបង្កហេតុ ក្នុងនោះរួមមានទាំងអ្វីដែលហៅថា «ពីធីកម្មដ៏ចម្រូងចម្រាស» នៅជិតច្រកទ្វារ Bab al-Rahma និងទីសក្ការនៅខាងក្នុងបរិវេណវិហារនេះ។នៅក្នុងសេចក្តីថ្លែងការណ៍មួយដែលត្រូវបានផ្សាយដោយទីភ្នាក់ងារសារព័ត៌មានផ្លូវការ Wafa អាជ្ញាធរក្រុងរូបនោះបានបន្ថែមថា ក្រុមដែលមានទំនាក់ទំនងជាមួយចលនា Temple Movement បានពង្រីកការអំពាវនាវឲ្យអ្នកស្នាក់នៅកាន់តែច្រើនសម្រុកចូលទីតាំងក្ដៅ និងលើកទង់ជាតិអ៊ីស្រាអែល នៅខាងក្នុងទីធ្លារបស់វិហារនេះ។ការលុកលុយនេះបានកើតឡើងនៅពេលដែលនគរបាលអ៊ីស្រាអែល បានបន្តរឹតបន្តឹងការរឹតបន្តឹងនៅទូទាំងទីក្រុងយេរូសាឡឹមខាងកើត ដោយបង្កើតចំណុចត្រួតពិនិត្យ បិទផ្លូវ និងកម្រិតការចូលទៅកាន់វិហារនេះ សម្រាប់អ្នកគោរពបូជា។ ចាប់តាំងពីដើមខែមេសាមក ល្បឿននៃការលុកលយុយបែបនេះ បានកើនឡើង ដោយអ្នកស្នាក់នៅអ៊ីស្រាអែល ធ្វើពិធីបុណ្យសាធារណៈនៅខាងក្នុងបរិវេណនេះ។កាលពីសប្តាហ៍មុន រដ្ឋមន្ត្រីសន្តិសុខជាតិអ៊ីស្រាអែល លោក Itamar Ben-Gvir បានចូលទៅកាន់បរិវេណនោះភ្លាមៗ ហើយបានធ្វើពិធីសាសនា Talmudic រួមជាមួយអ្នកស្នាក់នៅ ដែលជាការលុកលុយលើកទី៣ របស់លោកនៅឆ្នាំនេះ និងលើកទី១៦ ចាប់តាំងពីបានចូលកាន់តំណែងកាលពីចុងឆ្នាំ២០២២៕

មេបញ្ជាការកងទ័ព៖ អ៊ីរ៉ង់នឹងបន្តប្រយុទ្ធ«រហូតដល់ដំណក់ឈាមចុងក្រោយ»

2026/04/22 06:54:59 pm        64
Facebook Telegram Linkin
អគ្គមេបញ្ជាការកងទ័ពអ៊ីរ៉ង់ លោកឧត្តមសេនីយ៍ទោ Amir Hatami បាននិយាយនៅថ្ងៃពុធនេះថា ប្រទេសនេះ នឹងប្រយុទ្ធរហូតដល់ទីបញ្ចប់។ ទីភ្នាក់ងារសារព័ត៌មាន Tasnim បានដកស្រង់សម្តីរបស់ លោក Hatami ដែលបាននិយាយថា៖«ថ្ងៃនេះ នៅពេលដែលប្រទេសនេះ និងប្រជាជនជាទីស្រឡាញ់របស់យើង កំពុងត្រូវបានវាយប្រហារដោយសត្រូវដ៏ឧក្រិដ្ឋបំផុត ពួកគេនឹងប្រយុទ្ធប្រកៀកស្មាគ្នា រហូតដល់ដំណក់ឈាមចុងក្រោយ ហើយទទួលបានជ័យជម្នះចុងក្រោយ»។សហរដ្ឋអាមេរិក និងអ៊ីស្រាអែល បានចាប់ផ្តើមប្រតិបត្តិការយោធាប្រឆាំងនឹងអ៊ីរ៉ង់ នៅថ្ងៃទី ២៨ ខែកុម្ភៈ។ ទីក្រុងតេអេរ៉ង់បានសម្រេចចិត្តបិទច្រកសមុទ្រហ័រមូសចំពោះនាវាដែលមានទំនាក់ទំនងជាមួយសហរដ្ឋអាមេរិក អ៊ីស្រាអែល និងប្រទេសដែលគាំទ្រការឈ្លានពានប្រឆាំងនឹងអ៊ីរ៉ង់។ នៅថ្ងៃទី ០៧ ខែមេសា ទីក្រុងវ៉ាស៊ីនតោន បានប្រកាសពីបទឈប់បាញ់ «ទ្វេភាគី» រយៈពេលពីរសប្តាហ៍ជាមួយអ៊ីរ៉ង់។ យោងតាមសេវាសង្គ្រោះបន្ទាន់របស់អ៊ីរ៉ង់ មនុស្សសរុបចំនួន ៣,៣៧៥ នាក់ ត្រូវបានសម្លាប់ នៅក្នុងការវាយប្រហាររបស់សហរដ្ឋអាមេរិក និងអ៊ីស្រាអែល ក្នុងរយៈពេល ៤០ថ្ងៃនៃសង្គ្រាមនេះ៕

បណ្ដាញសង្គម

ព័ត៌មានថ្មីៗ

ក្រុមអ្នកជួយសង្គ្រោះ៖ មនុស្ស ៤នាក់ទៀតដែលជាប់ក្នុងរូងភ្នំ នៅឡាវ ត្រូវបាននាំ​ចេញ​ដោយសុវត្ថិភាព
05/30/2026 05:05 PM
Facebook Telegram Linkin
លោក Hegseth៖ យុគ​សម័យឧបត្ថម្ភធនការពារជាតិ​ពីអាមេរិក សម្រាប់ «ប្រទេសអ្នកមាន» ចប់ហើយ
05/30/2026 05:05 PM
Facebook Telegram Linkin
មន្ត្រីជាន់ខ្ពស់អ៊ីរ៉ង់ និយាយ​ថា លោក Trump «ក្បត់ការទូត» ដោយបន្តបិទខ្ទប់​ដោយទ័ព​ជើង​ទឹក​​អាមេរិក
05/30/2026 05:05 PM
Facebook Telegram Linkin
វេជ្ជបណ្ឌិត៖ សុខភាព​លោក Trump គឺ​ល្អប្រសើរណាស់​ ប៉ុន្តែ​គួរតែសម្រកទម្ងន់
05/30/2026 05:05 PM
Facebook Telegram Linkin
អ្នកនៅ​រស់​ពីការ​ជាប់​ក្នុង​រូងភ្នំ នៅ​ឡាវ បានបរិភោគ​ថាសឈើសម្រាប់រែង​​មាស ដើម្បីបន្ត​ជីវិត
05/30/2026 05:05 PM
Facebook Telegram Linkin
មនុស្ស​ ១៨នាក់ស្លាប់ និង ៣០នាក់រងរបួស ដោយសារ​រថយន្តដឹកជនភៀសខ្លួន ក្រឡាប់នៅភាគខាងកើតអាហ្វហ្គានីស្ថាន
05/30/2026 05:05 PM
Facebook Telegram Linkin
សេតវិមាន៖ លោក Trump «នឹងធ្វើតែ​កិច្ចព្រមព្រៀងដែលល្អសម្រាប់អាមេរិកប៉ុណ្ណោះ​» ជាមួយអ៊ីរ៉ង់
05/30/2026 05:05 PM
Facebook Telegram Linkin
នាយករដ្ឋមន្ត្រី៖ កាណាដា និងចិន កំពុង​សាង​​ «ភាពជាដៃគូប្រកប​ដោយ​ស្ថិរភាព និងការ​ស្ថាបនាបន្ថែម​ទៀត​»
05/30/2026 05:05 PM
Facebook Telegram Linkin
រដ្ឋមន្រ្ដីក្រសួងការងារ ចុះពិនិត្យមើលខ្សែច្រវាក់ផលិតកម្មក្រុមហ៊ុន THACO AGRI ក្នុងខេត្តក្រចេះ ដែលផ្តល់ឱកាសការងារប្រមាណ២ម៉ឺននាក់ និងផ្ទេរជំនាញបច្ចេកទេសកសិកម្មទំនើប
05/30/2026 05:05 PM
Facebook Telegram Linkin
របាយការណ៍៖ សភាអាមេរិកកំពុងធ្វើសមាហរណកម្មកងកម្លាំងយោធាអាមេរិក និងអ៊ីស្រាអែលដោយស្ងាត់​ៗ
05/30/2026 05:05 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.