BTV NEWS

ប្រមុខ WHO ទទួចសុំឲ្យមានការបញ្ចុះសពដោយសុវត្ថិភាព អំឡុងធ្វើដំណើរទៅកាន់តំបន់រីករាលដាលឆ្លងជំងឺអេបូឡា

អ៊ីរ៉ង់និយាយថា កិច្ចប្រជុំជាមួយអាមេរិកកំពុងបន្ត តែពុំឈានដល់កិច្ចព្រមព្រៀងផ្តាច់ព្រ័ត្រនោះទេ

UN៖ ការប៉ះទង្គិចគ្នារវាងអ៊ីស្រាអែល-ក្រុមហេសបូឡា ធ្វើឲ្យប៉ះពាល់ការចូលដល់ជំនួយនៅភាគខាងត្បូងលីបង់

ករណីឆ្លងសង្ស័យជំងឺអេបូឡានៅសាធារណរដ្ឋប្រជាធិបតេយ្យកុងហ្គោកើនឡើងដល់ ១.០២៨នាក់

ព័ត៌មានអន្តរជាតិ

នាយករដ្ឋមន្ត្រីកាណាដា៖ ទំនាក់ទំនងសេដ្ឋកិច្ចជិតស្និទ្ធជាមួយអាមេរិកក្លាយជា «ចំណុចខ្សោយ»

នាយករដ្ឋមន្ត្រីប្រទេសកាណាដា លោក Mark Carney បាននិយាយថា បន្ទាប់ពីភាពជាដៃគូជាមួយសហរដ្ឋអាមេរិករយៈពេលជាច្រើនទសវត្សរ៍មក ទំនាក់ទំនងសេដ្ឋកិច្ចជិតស្និទ្ធរវាងប្រទេសទាំងពីរបានក្លាយជា «ចំណុចខ្សោយ» ដែលត្រូវតែកែតម្រូវ។លោក Carney បានថ្លែងសុន្ទរកថាស្តីពីទំនាក់ទំនងរបស់ប្រទេសកាណាដា ជាមួយសហរដ្ឋអាមេរិកតាមវីដេអូរយៈពេល១០នាទីកាលពីថ្ងៃអាទិត្យ ដែលលោកបានបង្ហាញសញ្ញាថា ប្រទេសកាណាដា ត្រូវតែផ្លាស់ប្តូរចេញពីការពឹងផ្អែកខ្លាំងលើប្រទេសណាមួយ។លោក Carney និយាយថា «ពិភពលោកកាន់តែមានគ្រោះថ្នាក់ និងខ្វែងគំនិតគ្នា»។ «សហរដ្ឋអាមេរិកបានផ្លាស់ប្តូរវិធីសាស្រ្តពាណិជ្ជកម្មជាមូលដ្ឋាន ដោយបង្កើនពន្ធរបស់ខ្លួនដល់កម្រិតដែលបានមើលឃើញចុងក្រោយក្នុងអំឡុងពេលវិបត្តិសេដ្ឋកិច្ចដ៏ធំ»។ លោកបាននិយាយបន្ថែមថា «ចំណុចខ្លាំងជាច្រើនកាលពីពេលមុនរបស់យើងដែលផ្អែកលើទំនាក់ទំនងជិតស្និទ្ធជាមួយអាមេរិក បានក្លាយជាចំណុចខ្សោយ»។ «ចំណុចខ្សោយទាំងនេះ យើងត្រូវតែកែតម្រូវ»។ការអធិប្បាយទាំងនេះ គឺជាគំនិតចុងក្រោយពីលោក Carney ដើម្បីបង្ហាញពីលក្ខណៈផ្លាស់ប្តូរនៃទំនាក់ទំនងសហរដ្ឋអាមេរិក-កាណាដា បន្ទាប់ពីការធ្វើសមាហរណកម្មសេដ្ឋកិច្ចរយៈពេលជាច្រើនទសវត្សរ៍ ខណៈការគំរាមកំហែងនៃការដំឡើងពន្ធកាន់តែខ្ពស់ពីប្រធានាធិបតីសហរដ្ឋអាមេរិក លោក Donald Trump បានធ្វើឱ្យខូចទំនាក់ទំនងពាណិជ្ជកម្មជាមួយសត្រូវ និងសម្ព័ន្ធមិត្តនៅទូទាំងពិភពលោក។ ការថ្លែងរបស់លោក Trump ថា ប្រទេសកាណាដា គួរតែក្លាយជារដ្ឋរបស់អាមេរិក ក៏បានធ្វើឱ្យប្រជាជនកាណាដា រង្គោះរង្គើផងដែរ។

អ្នកចរចាជាន់ខ្ពស់របស់អ៊ីរ៉ង់ និយាយថាទីក្រុងតេអេរ៉ង់នឹងតតាំងប្រឆាំងសម្ពាធរបស់សហរដ្ឋអាមេរិក ដល់ទីបញ្ចប់

លោក Mohammad Bagher Ghalibaf ប្រធានសភា និងជាអ្នកចរចាជាន់ខ្ពស់ បាននិយាយថា អ៊ីរ៉ង់នឹងមិនចុះចាញ់នឹងសម្ពាធរបស់សហរដ្ឋអាមេរិកទេ។ លោកបានសង្កត់ធ្ងន់ថា វឌ្ឍនភាពត្រូវបានធ្វើឡើងនៅក្នុងការចរចា ទោះបញ្ហាជាមូលដ្ឋាននៅតែមិនទាន់ដោះស្រាយក៏ដោយ។ការចរចាជុំទីមួយរវាងសហរដ្ឋអាមេរិក និងអ៊ីរ៉ង់នៅទីក្រុងអ៊ីស្លាម៉ាបាដ បានធ្វើឡើងកាលពីចុងសប្តាហ៍មុន នៅក្នុងរដ្ឋធានីអ៊ីស្លាម៉ាបាដរបស់ប្រទេសប៉ាគីស្ថាន។ បន្ទាប់ពីការចរចា ប្រធានាធិបតីអាមេរិក លោក Donald Trump បានប្រកាសបិទច្រកកំពង់ផែរបស់អ៊ីរ៉ង់ និងការដឹកជញ្ជូនតាមរយៈច្រកសមុទ្រ Hormuz ដែលគ្រប់គ្រងពាណិជ្ជកម្មប្រេងឆៅប្រហែល២៥% នៃពិភពលោក។កាលពីថ្ងៃសុក្រ អ៊ីរ៉ង់បានបើកផ្លូវទឹកសម្រាប់នាវាពាណិជ្ជកម្មទាំងអស់ ដោយកំណត់សកម្មភាពនេះជាផ្នែកមួយនៃការរៀបចំបទឈប់បាញ់ដែលភ្ជាប់ទៅនឹងបទឈប់បាញ់អ៊ីស្រាអែល-លីបង់ និងកិច្ចខិតខំប្រឹងប្រែងកាត់បន្ថយភាពតានតឹងក្នុងតំបន់កាន់តែទូលំទូលាយ។ ទោះជាយ៉ាងណាក៏ដោយ ច្រកសមុទ្រនេះត្រូវបានបិទម្តងទៀតនៅថ្ងៃបន្ទាប់ ក្រោយលោក Trump បាននិយាយថា ការបិទច្រកកំពង់ផែអ៊ីរ៉ង់ពីសំណាក់សហរដ្ឋអាមេរិកនឹងនៅតែមានសុពលភាពពេញលេញរហូតដល់កិច្ចព្រមព្រៀងសន្តិភាពត្រូវបានសម្រេច។លោក Ghalibaf បានថ្លែងនៅក្នុងសុន្ទរកថាតាមទូរទស្សន៍ដែលបានចាក់ផ្សាយកាលពីព្រឹកថ្ងៃអាទិត្យ១៩មេសាថា ពួកលោកនឹងក្រោកឈរតតាំងរហូតដល់ទីបញ្ចប់។លោកបានបញ្ជាក់ជាថ្មីថា គណៈប្រតិភូអ៊ីរ៉ង់បានទៅកាន់ទីក្រុងអ៊ីស្លាម៉ាបាដ ដោយមានសុច្ឆន្ទៈ ប៉ុន្តែស្ថិតក្នុងការមិនទុកចិត្តគ្នាយ៉ាងខ្លាំង ដោយសង្កត់ធ្ងន់ថា ទីក្រុងតេអេរ៉ង់នៅតែត្រៀមខ្លួនសម្រាប់សង្គ្រាមប្រសិនបើចាំបាច់៕

ប្រធានាធិបតីកូរ៉េខាងត្បូង សម្លឹងរកការជំរុញទំនាក់ទំនងសេដ្ឋកិច្ច ក្នុងកិច្ចប្រជុំកំពូលជាមួយ នាយករដ្ឋមន្ត្រីឥណ្ឌា

ប្រធានាធិបតីកូរ៉េខាងត្បូង លោក Lee Jae Myung បានចាប់ផ្តើមកិច្ចពិភាក្សាជាមួយនាយករដ្ឋមន្ត្រីឥណ្ឌា លោក Narendra Modi ក្នុងទីក្រុង New Delhi នៅថ្ងៃចន្ទ ២០មេសានេះ ក្នុងគោលបំណងជំរុញយ៉ាងខ្លាំងនូវកិច្ចសហប្រតិបត្តិការសេដ្ឋកិច្ច ជាពិសេសក្នុងវិស័យដូចជាការសាងសង់នាវាជាដើម។នេះគឺជាដំណើរទស្សនកិច្ចផ្លូវរដ្ឋលើកដំបូងរបស់ប្រធានាធិបតីកូរ៉េខាងត្បូង ទៅកាន់ប្រទេសឥណ្ឌាក្នុងរយៈពេលប្រាំបីឆ្នាំ។លោក Lee បាននិយាយកាលពីថ្ងៃអាទិត្យ ក្នុងការជួបជុំអាហារពេលល្ងាចជាមួយសមាជិកសហគមន៍កូរ៉េនៅទីក្រុង New Delhi ថា កម្រិតនៃកិច្ចសហប្រតិបត្តិការសេដ្ឋកិច្ចរវាងកូរ៉េខាងត្បូង និងឥណ្ឌានៅតែទាបខ្លាំង។ចាប់ពីពេលនេះតទៅ ពួកលោកនឹងពង្រីកជំហាននេះ ហើយធ្វើឱ្យទំនាក់ទំនងរវាងកូរ៉េខាងត្បូង និងឥណ្ឌាខុសគ្នាទាំងស្រុងពីអ្វីដែលមាននៅពេលនេះ។ យោងតាមទីប្រឹក្សាប្រធានាធិបតី លោក Wi Sung-lac បានឲ្យដឹងថា ប្រទេសទាំងពីរកំពុងស្វែងរកការកែលម្អកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរបស់ខ្លួន ដោយមានគោលបំណងបង្កើនពាណិជ្ជកម្មទ្វេភាគីជិតទ្វេដងដល់៥០ពាន់លានដុល្លារនៅឆ្នាំ២០៣០ ពីទំហំពាណិជ្ជកម្ម ២៥,៧ ពាន់លានដុល្លារកាលពីឆ្នាំមុន ៕

ហាង និងសាលារៀនបានបិទក្នុងទីក្រុងភាគខាងជើងអ៊ីស្រាអែល ដើម្បីតវ៉ាប្រឆាំងនឹងបទឈប់បាញ់នៅលីបង់

អាជីវកម្ម និងសាលារៀននៅក្នុងទីក្រុង Kiryat Shmona ភាគខាងជើងអ៊ីស្រាអែល ត្រូវបានបិទទ្វារកាលពីថ្ងៃអាទិត្យ ១៩ មេសា ដើម្បីតវ៉ាប្រឆាំងនឹងបទឈប់បាញ់នៅលីបង់។ខណៈអ្នកស្រុកមួយចំនួនបានសម្តែងក្តីសង្ឃឹមរបស់ពួកគេសម្រាប់សន្តិភាពយូរអង្វែងជាមួយលីបង់ អ្នកផ្សេងទៀតបាននិយាយថា អ៊ីស្រាអែលមិនគួរឈប់ប្រយុទ្ធជាមួយកងជីវពលហេសបូឡាគាំទ្រដោយអ៊ីរ៉ង់ទេ ព្រោះពុំទទួលបានអ្វីឡើយ។យោងតាមអត្ថបទនៃកិច្ចព្រមព្រៀងចេញផ្សាយដោយក្រសួងការបរទេសសហរដ្ឋអាមេរិក អ៊ីស្រាអែល និងលីបង់ បានព្រមព្រៀងគ្នាលើការបញ្ឈប់អរិភាព កាលពីថ្ងៃទី១៦ ខែមេសា វេលាម៉ោង ២១:០០នាទី ម៉ោងសកល សម្រាប់រយៈពេលដំបូង១០ ថ្ងៃ ដើម្បីអាចឱ្យមានការចរចាសន្តិភាពរវាងប្រទេសទាំងពីរ។ប៉ុន្តែអំពើហិង្សាបានបន្តកាលពីថ្ងៃសៅរ៍១៨ មេសាសប្ដាហ៍មុន នៅពេលដែលទាហានជនជាតិបារាំងម្នាក់ត្រូវបានសម្លាប់ និងបីនាក់ផ្សេងទៀតរងរបួសនៅភាគខាងត្បូងលីបង់ ក្នុងការវាយប្រហារមួយដែលកងកម្លាំងរក្សាសន្តិភាព UNIFIL និងក្រុមមន្ត្រីបារាំងបាននិយាយថា ទំនងជាត្រូវបានធ្វើឡើងដោយក្រុមហេសបូឡា។ដោយឡែក យោធាអ៊ីស្រាអែលបាននិយាយថា ខ្លួនបានសម្លាប់សមាជិកម្នាក់របស់ក្រុមភេរវករ ដែលបានរំលោភលើបទឈប់បាញ់សម្របសម្រួលដោយសហរដ្ឋអាមេរិក ដោយនិយាយថា ខ្លួនត្រូវបានអនុញ្ញាតឱ្យចាត់វិធានការការពារខ្លួនក្នុងករណីចាំបាច់៕

លំនៅឋាន១ពាន់ខ្នង ត្រូវបានអគ្គិភ័យឆេះបំផ្លាញនៅរដ្ឋ Sabah ប្រទេសម៉ាឡេស៊ី ខណៈមនុស្សរាប់ពាន់នាក់ត្រូវបានជម្លៀស

មនុស្សរាប់ពាន់នាក់ត្រូវបានជម្លៀសចេញបន្ទាប់ពីអគ្គិភ័យបានឆេះបំផ្លាញលំនៅឋានប្រហែល ១.០០០ ខ្នងក្នុងភូមិឆ្នេរសមុទ្រមួយនៅរដ្ឋ Sabah លើកោះ Borneo ប្រទេសម៉ាឡេស៊ី កាលពីថ្ងៃអាទិត្យ ១៩ មេសា នេះបើយោងតាមនាយកដ្ឋានពន្លត់អគ្គិភ័យ។លោក Jimmy Lagung ប្រធានផ្នែកពន្លត់អគ្គិភ័យ និងជួយសង្គ្រោះថ្នាក់ស្រុកបាននិយាយនៅក្នុងសេចក្តីថ្លែងការណ៍មួយថា អាជ្ញាធរត្រូវបានជូនដំណឹងអំពីអគ្គិភ័យនៅក្នុងស្រុក Sandakan នៅម៉ោងប្រហែល ០១:៣២នាទីព្រឹក ។លោក Lagung បាននិយាយថា ខ្យល់បក់ខ្លាំង និងផ្ទះនៅជាប់ៗ បានបណ្តាលឱ្យអគ្គិភ័យរាលដាលយ៉ាងឆាប់រហ័ស ខណៈស្ថានភាពទឹកសមុទ្រទាបក៏ធ្វើឱ្យពិបាកក្នុងការទទួលបានប្រភពទឹកសម្រាប់ពន្លត់ផងដែរ។ អគ្គិភ័យបានឆាបឆេះនៅក្នុងភូមិលើទឹកមួយរបស់រដ្ឋ Sabah ដែលផ្ទះទាំងនោះត្រូវបានសាងសង់ពីឈើ និងជាជម្រករបស់សហគមន៍ក្រីក្របំផុតមួយចំនួនរបស់ប្រទេសនេះ រួមទាំងក្រុមជនជាតិដើមភាគតិច និងមនុស្សរស់នៅដោយគ្មានរដ្ឋជាច្រើន។យោងតាមទីភ្នាក់ងារសារព័ត៌មានរដ្ឋ Bernama បានឲ្យដឹងថា ប្រជាជនជាង ៩.០០០ នាក់បានរងផលប៉ះពាល់ដោយអគ្គិភ័យនេះ ទោះបីជាមិនមានរបាយការណ៍អំពីការស្លាប់ក៏ដោយ ។នាយករដ្ឋមន្ត្រីម៉ាឡេស៊ី លោក Anwar Ibrahim បាននិយាយថា រដ្ឋាភិបាលសហព័ន្ធកំពុងសម្របសម្រួលជាមួយអាជ្ញាធររដ្ឋ Sabah ដើម្បីផ្តល់ជំនួយជាមូលដ្ឋាន និងការផ្លាស់ទីលំនៅបណ្តោះអាសន្នសម្រាប់អ្នកដែលរងផលប៉ះពាល់៕

មេដឹកនាំកូរ៉េខាងជើង បានពិនិត្យការសាកល្បងមីស៊ីលបំពាក់ក្បាលគ្រាប់បែកង្កោម

ប្រព័ន្ធផ្សព្វផ្សាយរដ្ឋ KCNA បានរាយការណ៍នៅថ្ងៃចន្ទ ទី២០ ខែមេសា នេះថា មេដឹកនាំប្រទេសកូរ៉េខាងជើង គីម ជុងអ៊ុន បានពិនិត្យការបាញ់សាកល្បងមីស៊ីលបាលីស្ទិកកាលពីថ្ងៃអាទិត្យ ជាផ្នែកមួយនៃកិច្ចខិតខំប្រឹងប្រែងដើម្បីវាយតម្លៃប្រសិទ្ធភាពនៃក្បាលគ្រាប់ផ្ទុកគ្រាប់បែកចង្កោម និងប្រភេទគ្រាប់មីនសាចអំបែង។ ការធ្វើតេស្តទាំងនេះ បង្ហាញពីការបាញ់មីស៊ីលបាលីស្ទិកលើកទីបួនក្នុងខែនេះ និងជាលើកទី៧នៅឆ្នាំនេះ ខណៈកូរ៉េខាងជើងកំពុងស្វែងរកការកសាងសមត្ថភាពមីស៊ីល និងនុយក្លេអ៊ែររបស់ខ្លួន ក្នុងការផ្គើនទៅនឹងសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។ ប្រព័ន្ធផ្សព្វផ្សាយ KCNA បាននិយាយថា ការធ្វើតេស្តទាំងនេះពាក់ព័ន្ធនឹងការបាញ់មីស៊ីលបាលីស្ទិកយុទ្ធសាស្ត្ររយៈចម្ងាយជិត Hwasong-11 Ra ចំនួនប្រាំលើកដែលបានធ្វើឱ្យប្រសើរឡើងក្នុងការវាយតម្លៃថាមពល និងប្រសិទ្ធភាពនៃក្បាលគ្រាប់ថ្មី។ កូរ៉េខាងជើង បានបាញ់មីស៊ីលទៅកាន់តំបន់គោលដៅកោះមួយចម្ងាយប្រហែល១៣៦គីឡូម៉ែត្រ ដោយវាយប្រហារតំបន់មួយមានទំហំប្រហែល ១២,៥ ទៅ១៣ហិកតា។ កាលពីថ្ងៃអាទិត្យ កូរ៉េខាងត្បូង បាននិយាយថា កូរ៉េខាងជើងបានបាញ់មីស៊ីលចេញពីជិតទីក្រុង Sinpo នៅឆ្នេរសមុទ្រភាគខាងកើតរបស់ខ្លួនឆ្ពោះទៅសមុទ្រនៅម៉ោងប្រហែល ៦:១០ ព្រឹក ដោយវិមានប្រធានាធិបតី បានជំរុញឱ្យទីក្រុងព្យុងយ៉ាងបញ្ឈប់ «ការបង្ករឿង» បែបនេះ។ KCNA បាននិយាយថា លោក គីម បានបង្ហាញការពេញចិត្តជាមួយនឹងលទ្ធផលនៃការធ្វើតេស្ត ដោយចាត់ទុកវាថាជាភស្តុតាងដែលថាការងារជាច្រើនឆ្នាំមកនេះរបស់ក្រុមស្រាវជ្រាវជំនាញក្បាលគ្រាប់មីស៊ីល មិនឥតប្រយោជន៍នោះទេ ហើយបានជំរុញឱ្យអ្នកវិទ្យាសាស្ត្រផ្នែកការពារជាតិ បន្តជំរុញបច្ចេកវិទ្យាដែលត្រូវការដើម្បីពង្រឹងការត្រៀមខ្លួនប្រយុទ្ធរបស់យោធា។ រូបភាពដែលចេញផ្សាយដោយ KCNA បានបង្ហាញ លោកគីម និងកូនស្រីរបស់លោក ឈ្មោះ Ju Ae បានពិនិត្យមើលការបាញ់បង្ហោះដែលហ៊ុព័ទ្ធដោយមន្ត្រីយោធាជាច្រើននាក់។ នេះជាឱកាសចុងក្រោយដែល Ju Ae បានចូលរួមជាមួយឪពុករបស់នាងដើម្បីធ្វើជាសាក្សីនៃការធ្វើតេស្តអាវុធ ដែលបង្កើនការរំពឹងទុកថា នាងកំពុងត្រូវបានតែងតាំងជាអ្នកបន្តតំណែងរបស់ លោក គីម។

អ៊ុយក្រែនជំរុញឱ្យអឺរ៉ុប ដំឡើងប្រព័ន្ធការពារប្រឆាំងអាវុធបាលីស្ទីក

ប្រធានាធិបតីអ៊ុយក្រែន លោក Volodymyr Zelenskyy បាននិយាយកាលពីថ្ងៃអាទិត្យ ទី១៩ ខែមេសាថា អឺរ៉ុប ត្រូវតែមានប្រព័ន្ធការពារផ្ទាល់ខ្លួនប្រឆាំងអាវុធបាលីស្ទីក ហើយអ៊ុយក្រែនកំពុងធ្វើការចរចាជាមួយប្រទេសជាច្រើនរួចហើយលើការដំឡើងរបស់ខ្លួន ។ ការការពារប្រឆាំងមីស៊ីលបាលីស្ទីកគឺជាបញ្ហាប្រឈមដធំបំផុតមួយរបស់អ៊ុយក្រែននៅក្នុងសង្គ្រាមជាមួយរុស្ស៊ី ព្រោះថាមានតែមីស៊ីលមួយចំនួនប៉ុណ្ណោះដែលត្រូវបានប្រើប្រាស់ដោយប្រព័ន្ធប៉ាទ្រីយ៉ូតរបស់អាមេរិក មានសមត្ថភាពស្ទាក់ចាប់មីស៊ីលបាលីស្ទីករបស់រុស្ស៊ី។រុស្ស៊ី ប្រើប្រាស់មីស៊ីលបាលីស្ទីកដើម្បីវាយប្រហារហេដ្ឋារចនាសម្ព័ន្ធថាមពលរបស់អ៊ុយក្រែន ដោយបានបំផ្លាញប្រព័ន្ធផលិតថាមពលកម្ដៅ និងប្រព័ន្ធបញ្ជូនអគ្គិសនី។ ជឿជាក់ចុះ គំនិតរបស់ខ្ញុំគឺថា យើងគួរតែឲ្យអឺរ៉ុបមានប្រព័ន្ធការពារមីស៊ីលប្រឆាំងមីស៊ីលបាលីស្ទីក។ លោកបាននិយាយបន្ថែមថា «យើងចាំបាច់ត្រូវដំឡើងប្រព័ន្ធការពារប្រឆាំងមីស៊ីលបាលីស្ទីករបស់យើងក្នុងរយៈពេលមួយឆ្នាំ»។ លោក Zelenskyy បាននិយាយថា ភារកិច្ចនេះពិបាកខ្លាំង ប៉ុន្តែមានភាពប្រាកដប្រជា ហើយលោកបានពិភាក្សារឿងនេះជាមួយប្រទេសសំខាន់ៗនៅអឺរ៉ុបរួចហើយ ទោះបីជាលោកមិនបានប្រាប់ឈ្មោះប្រទេសទាំងនោះក៏ដោយ។

តម្លៃប្រេងកើនឡើង និងភាគហ៊ុនសកលមិនទៀងទាត់ ខណៈបទឈប់បាញ់នៅមជ្ឈិមបូព៌ាមានភាពមិនច្បាស់លាស់

តម្លៃប្រេងឡើងថ្លៃ ប្រាក់ដុល្លារអាមេរិកងើបឡើងពីកម្រិតទាបបំផុត និងទីផ្សារភាគហ៊ុនសកលឡើងចុះមិនទៀងទាត់ នៅថ្ងៃចន្ទ ២០ មេសានេះ ខណៈការកើនឡើងភាពតានតឹងនៅមជ្ឈិមបូព៌ា បានធ្វើឱ្យការដឹកជញ្ជូនទាំងចូល និងចេញពីឈូងសមុទ្រមានកម្រិតទាបបំផុត ទោះបីជាពាណិជ្ជករកំពុងរក្សាក្តីសង្ឃឹមសម្រាប់ដំណោះស្រាយក៏ដោយ។ បទឈប់បាញ់ក្នុងសង្គ្រាមអ៊ីរ៉ង់ ដែលគ្រោងនឹងបន្តរហូតដល់ថ្ងៃអង្គារ២១មេសាស្អែកនេះ ស្ថិតក្នុងភាពមិនច្បាស់លាស់ បន្ទាប់ពីសហរដ្ឋអាមេរិកបានរឹបអូសនាវាដឹកទំនិញអ៊ីរ៉ង់មួយគ្រឿង ហើយបញ្ជាការយោធាកំពូលរបស់ទីក្រុងតេអេរ៉ង់ បានសន្យាសងសឹក។អ៊ីរ៉ង់បានបិទច្រកសមុទ្រ Hormuz ឡើងវិញ ទោះបីជាទិន្នន័យរបស់ស្ថាប័នតាមដានទីផ្សារសកល Kpler បានបង្ហាញថា នាវាជាង ២០ គ្រឿងដែលដឹកផលិតផលប្រេង លោហធាតុ ឧស្ម័ន និងជីកសិកម្មបានឆ្លងកាត់ច្រកនេះកាលពីថ្ងៃសៅរ៍ ដែលជាថ្ងៃដ៏មមាញឹកបំផុតសម្រាប់ផ្លូវឆ្លងកាត់នេះ ចាប់តាំងពីថ្ងៃទី ១ ខែមីនា។ តម្លៃប្រេងឆៅ Brent បានកើនឡើងប្រហែល ៦ ភាគរយដល់៩៦ ដុល្លារអាមេរិកក្នុងមួយបារ៉ែលក្នុងការជួញដូរដំបូងនៅតំបន់អាស៊ី។ ប្រាក់ដុល្លារ ដែលបានធ្លាក់ថ្លៃកាលពីថ្ងៃសុក្រ នៅពេលដែលច្រកសមុទ្របានបើកមួយរយៈខ្លី បានកើនឡើងបន្តិចនៅថ្ងៃចន្ទនេះ។ ចំណែកតម្លៃសន្ទស្សន៍ភាគហ៊ុន S&P 500 បានធ្លាក់ចុះប្រហែល ០,៧ ភាគរយ ជាការប្រែប្រួលតិចតួច ក្រោយសន្ទស្សន៍នេះបានឡើងដល់កម្រិតខ្ពស់បំផុតកាលពីថ្ងៃសុក្រ។ ទីផ្សារអាស៊ីប៉ាស៊ីហ្វិកមានភាពចម្រុះទាំងឡើងនិងចុះ ដោយតម្លៃផ្សារហ៊ុន S&P/ASX 200 របស់អូស្ត្រាលីធ្លាក់ចុះ ០,៥ ភាគរយ សន្ទស្សន៍គោល Nikkei របស់ជប៉ុនកើនឡើង០,៧ ភាគរយ និង KOSPI របស់កូរ៉េខាងត្បូងកើនឡើង ០,៣ភាគរយ៕

នគរបាល៖ កុមារ៨នាក់ស្លាប់ក្នុងការបាញ់ប្រហារដោយអំពើហិង្សាក្នុងគ្រួសារនៅសហរដ្ឋអាមេរិក

អាជ្ញាធរតំបន់បាននិយាយថា ខ្មាន់កាំភ្លើងម្នាក់បានសម្លាប់កុមារ៨នាក់មានអាយុចាប់ពី១ឆ្នាំដល់ ១៤ ឆ្នាំ នៅក្នុងការបាញ់ប្រហារទ្រង់ទ្រាយធំមួយកាលពីថ្ងៃអាទិត្យ ទី ១៩ ខែមេសា នៅលំនៅឋានមួយកន្លែងក្នុងទីក្រុង Shreveport រដ្ឋ Louisiana សហរដ្ឋអាមេរិកក្នុងហេតុការណ៍មួយដែលត្រូវបានគេពិពណ៌នាថាជាអំពើហិង្សាក្នុងគ្រួសារ មុនពេលនគរបាលបាញ់សម្លាប់ខ្មាន់កាំភ្លើងក្នុងពេលដេញតាមរថយន្ត។សាកសពរបស់កុមារចំនួនប្រាំពីរនាក់ត្រូវបានគេរកឃើញនៅក្នុងលំនៅឋាន ខណៈសាកសពកុមារទីប្រាំបីត្រូវបានបាញ់ខណៈកំពុងព្យាយាមរត់គេចខ្លួននៅលើដំបូល នេះបើយោងតាមអ្នកនាំពាក្យនៃអង្គភាពនគរបាលទីក្រុង Shreveport។ នគរបាល បាននិយាយថា ជនសង្ស័យក៏មានកូនៗរស់នៅក្នុងលំនៅឋាននេះដែរ។ យោងតាមការបង្ហោះនៅលើបណ្តាញFacebook របស់នគរបាលក្រុង Shreveport បានឲ្យដឹងថា ព័ត៌មានបឋមបានបង្ហាញថា ហេតុការណ៍បានចាប់ផ្តើមនៅពេលដែលជនសង្ស័យបានបាញ់ស្ត្រីម្នាក់ ហើយក្រោយមកបានចាកចេញទៅកាន់លំនៅឋានមួយកន្លែងដែលកុមាររស់នៅ។ នគរបាលបានកំណត់អត្តសញ្ញាណជនសង្ស័យមានឈ្មោះ Shamar Elkins។ ហេតុការណ៍នេះ បានកើតឡើងក្រោយម៉ោង ៦ ព្រឹកថ្ងៃអាទិត្យ ម៉ោងក្នុងស្រុក ។ នគរបាលនិយាយថា មនុស្សយ៉ាងហោចណាស់ ១០ នាក់ត្រូវបានបាញ់ ប៉ុន្តែពុំបានផ្តល់ព័ត៌មានលម្អិតអំពីស្ថានភាពជនរងគ្រោះដែលនៅរស់រានមានជីវិតនោះទេ។ជនសង្ស័យបានប្លន់យករថយន្តមួយគ្រឿងបន្ទាប់ពីការបាញ់ប្រហារ ហើយត្រូវបានសម្លាប់នៅពេលដែលនគរបាលបានបាញ់ទៅលើរថយន្តនោះក្នុងអំឡុងពេលដេញតាម។ អ្នកនាំពាក្យរបស់នគរបាលរដ្ឋ Louisiana បាននិយាយថា នគរបាលរដ្ឋ Louisiana កំពុងស៊ើបអង្កេតការបាញ់ប្រហារដែលពាក់ព័ន្ធនឹងមន្ត្រីនគរបាលទៅលើបុរសខ្មាន់កាំភ្លើង។

លោក Zelenskyy ថ្កោលទោសការបន្តលើកលែងទណ្ឌកម្មរបស់សហរដ្ឋអាមេរិកចំពោះប្រេងរុស្ស៊ី

ប្រធានាធិបតីអ៊ុយក្រែន លោក Volodymyr Zelenskyy បានថ្កោលទោសការសម្រេចចិត្តរបស់សហរដ្ឋអាមេរិកក្នុងការពង្រីករយៈពេលដែលរុស្ស៊ីត្រូវបានអនុញ្ញាតឱ្យលក់ប្រេង ទោះបីជាមានទណ្ឌកម្មពីលោកខាងលិចក៏ដោយ។សកម្មភាពនេះមានន័យថាប្រទេសនានាអាចទិញប្រេង និងផលិតផលប្រេងកាតរបស់រុស្ស៊ី ដែលបានផ្ទុករួចហើយក្នុងនាវានៅលើសមុទ្ររហូតដល់ថ្ងៃទី១៦ ខែឧសភា។សហរដ្ឋអាមេរិកអះអាងថា ការលើកលែងនេះមានន័យថាដើម្បីបន្ធូរបន្ថយវិបត្តិផ្គត់ផ្គង់ថាមពលដែលបង្កឡើងដោយសង្គ្រាមអាមេរិក-អ៊ីស្រាអែល ជាមួយអ៊ីរ៉ង់។ប៉ុន្តែនៅក្នុងសុន្ទរកថារបស់លោកកាលពីថ្ងៃអាទិត្យ១៩មេសា លោក Zelenskyy បាននិយាយថា គ្រប់សន្លឹកប្រាក់ដុល្លារដែលបានបង់សម្រាប់ប្រេងរបស់រុស្ស៊ីគឺជាប្រាក់សម្រាប់ធ្វើសង្គ្រាម នៅអ៊ុយក្រែន។ ទណ្ឌកម្មយ៉ាងទូលំទូលាយត្រូវបានអនុវត្តប្រឆាំងនឹងរុស្ស៊ីចាប់តាំងពីលោកប្រធានាធិបតី Vladimir Putin បានចាប់ផ្តើមវាយលុកទ្រង់ទ្រាយធំលើប្រទេសជិតខាងរបស់ខ្លួនកាលពី២៤ខែកុម្ភៈ ឆ្នាំ២០២២ ។ ការវាយប្រហារដ៏សាហាវរបស់សហរដ្ឋអាមេរិក និងអ៊ីស្រាអែលប្រឆាំងនឹងអ៊ីរ៉ង់ បានជំរុញឱ្យប្រទេសនេះសងសឹកមិនត្រឹមតែប្រឆាំងនឹងអ៊ីស្រាអែល និងមូលដ្ឋានយោធាអាមេរិកនៅឈូងសមុទ្រប៉ុណ្ណោះទេ ប៉ុន្តែថែមទាំងដាក់គោលដៅលើថាមពល និងទីតាំងស៊ីវិលផ្សេងទៀតនៅទូទាំងសម្ព័ន្ធមិត្តអារ៉ាប់របស់សហរដ្ឋអាមេរិកនៅក្នុងតំបន់ផងដែរ៕

បណ្ដាញសង្គម

ព័ត៌មានថ្មីៗ

ក្រសួងការងារ៖ ខេត្តចំនួន៤ នៅភូមិភាគឦសាន្ត មានឱកាសការងារជិត ៤,០០០កន្លែង កំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

អាជ្ញាធរជាតិអប្សរា និង JQA បិទបញ្ចប់កម្មវិធីអប់រំបរិស្ថានសម្រាប់កុមារ ឆ្នាំ២០២៦ និងប្រគល់រង្វាន់ដល់សិស្សឆ្នើម

អភិបាលខេត្តបន្ទាយមានជ័យ អំពាវនាវដល់មន្ត្រីរាជការសប្បុរសជនចូលរួមយុទ្ធនាការ "១ម៉ឺនរៀល ១ម៉ឺននាក់"

អគ្គកុងស៊ុលវៀតណាម រៀបចំកម្មវិធីសប្ដាហ៍វប្បធម៌វៀតណាម ឆ្នាំ២០២៦ នៅខេត្ដសៀមរាប

រដ្ឋបាលខេត្តកំពតត្រៀមទុរេនទុំ ២តោន សម្រាប់ទទួលទេសចរចូលរួមព្រឹត្តិការណ៍ «មរតកផ្លែឈើ និងនំចំណីកំពត»

មន្ត្រីជំនាញ ស្នើដល់កសិករ សហគមន៍ និងអ្នកពាក់ព័ន្ធរួមគ្នាលើកកម្ពស់វិស័យកសិកម្មខេត្តកែប

គណៈកម្មការការពារទប់ស្កាត់ និងបង្ក្រាបបទល្មើសធនធានធម្មជាតិ ផ្សព្វផ្សាយសេចក្តីជូនដំណឹងស្ដីពីរដូវបិទនេសាទ

អ្នកដាំទុរេនស្រុកចម្ការលើចង់ឲ្យអ្នកលក់ប្រកាន់ភាពស្មោះត្រង់លើអតិថិជន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877