BTV NEWS

រដ្ឋមន្រ្តីការពារជាតិជប៉ុនលោក Koizumi ច្រានចោលការចោទប្រកាន់ពីយោធានិយមថ្មី

ប្រមុខ WHO ទទួចសុំឲ្យមានការបញ្ចុះសពដោយសុវត្ថិភាព អំឡុងធ្វើដំណើរទៅកាន់តំបន់រីករាលដាលឆ្លងជំងឺអេបូឡា

អ៊ីរ៉ង់និយាយថា កិច្ចប្រជុំជាមួយអាមេរិកកំពុងបន្ត តែពុំឈានដល់កិច្ចព្រមព្រៀងផ្តាច់ព្រ័ត្រនោះទេ

UN៖ ការប៉ះទង្គិចគ្នារវាងអ៊ីស្រាអែល-ក្រុមហេសបូឡា ធ្វើឲ្យប៉ះពាល់ការចូលដល់ជំនួយនៅភាគខាងត្បូងលីបង់

ព័ត៌មានអន្តរជាតិ

អ្នកចរចាជាន់ខ្ពស់៖ អ៊ីរ៉ង់នៅបន្តគ្រប់គ្រងច្រកសមុទ្រ Hormuz ថ្វីបើមានការបិទរបស់អាមេរិកក៏ដោយ

លោក Mohammad Baqer Qalibaf គឺជាប្រធានសភាអ៊ីរ៉ង់ និងជាអ្នកចរចាជាន់ខ្ពស់មួយរូបនិយាយនៅក្នុងបទសម្ភាសន៍ចេញផ្សាយកាលពីថ្ងៃសៅរ៍ថា អ៊ីរ៉ង់នៅតែបន្តគ្រប់គ្រងច្រកសមុទ្រ Hormuz បើទោះបីជាមានការបិទការធ្វើនាវាចរណ៍របស់កងទ័ពជើងទឹកសហរដ្ឋអាមេរិកក៏ដោយ ។លោក Qalibaf បានព្រមានថា ទីក្រុងតេអេរ៉ង់ អាចនឹងធ្វើការរឹតត្បិតលើការធ្វើនាវាចរណ៍ឆ្លងកាត់ច្រកសមុទ្រយុទ្ធសាស្រ្តមួយនេះ បើសិនជាការបិទរបស់អាមេរិកនៅតែបន្ត ។អ៊ីរ៉ង់បានប្រកាសការបើកឡើងវិញបណ្តោះអាសន្នច្រកសមុទ្រ Hormuz បន្ទាប់ពីកិច្ចព្រមព្រៀងដាច់ដោយឡែកសម្រាប់បទឈប់បាញ់រយៈពេល ១០ថ្ងៃ រៀបចំឡើងដោយសហរដ្ឋអាមេរិកកាលពីថ្ងៃព្រហស្បតិ៍រវាងអ៊ីស្រាអែល និងលីបង់ ។ អ៊ីស្រាអែលបានឈ្លានពានផ្នែកខ្លះនៅតំបន់ភាគខាងត្បូងលីបង់ ក្រោយក្រុមហេសបូឡាគាំទ្រអ៊ីរ៉ង់ បានចូលរួមធ្វើសង្រ្គាមកាលពីដើមខែមីនាកន្លងទៅ ។ប៉ុន្តែកាលពីថ្ងៃសៅរ៍ ទីបញ្ជាការកងកម្លាំងប្រដាប់អាវុធអ៊ីរ៉ង់ និយាយថា ការឆ្លងកាត់ច្រកសមុទ្រ Hormuz បានវិលទៅរកការគ្រប់គ្រងយ៉ាងតឹងរ៉ឹងរបស់យោធាអ៊ីរ៉ង់ ដោយពួកគេលើកឡើងពីអ្វីដែលពួកគេចាត់ទុកថាជាការបំពានម្តងហើយម្តងទៀតរបស់សហរដ្ឋអាមេរិក និងជាសកម្មភាពចោរប្លន់ ក្រោមរូបភាពបិទច្រកសមុទ្រ ។ដោយឡែក ទីបញ្ជាការកណ្តាលសហរដ្ឋអាមេរិក និយាយនៅក្នុងសេចក្តីថ្លែងការណ៍ថា កងកម្លាំងសហរដ្ឋអាមេរិក បាននឹងកំពុងពង្រឹងការបិទការធ្វើនាវាចរណ៍របស់អ៊ីរ៉ង់ ប៉ុន្តែពួកគេពុំបានធ្វើសេចក្តីអត្ថាធិប្បាយពីសម្មភាពចុងក្រោយរបស់អ៊ីរ៉ង់នោះទេ ៕

កូរ៉េខាងជើងបាញ់មីស៊ីលជាច្រើនគ្រាប់ឆ្ពោះទៅកាន់សមុទ្រជិតតំបន់ឆ្នេរភាគខាងកើតរបស់ខ្លួន

យោងតាមការអះអាងរបស់កូរ៉េខាងត្បូង និងជប៉ុន បានឲ្យដឹងថា កូរ៉េខាងជើង បានបាញ់មីស៊ីលបាលីស្ទិកជាច្រើនគ្រាប់ឆ្ពោះទៅកាន់សមុទ្រនៅជិតតំបន់ឆ្នេរភាគខាងកើតរបស់ខ្លួន ។ ឧបទ្ទេវហេតុនៅថ្ងៃអាទិត្យនេះ បានក្លាយជាការបាញ់មីស៊ីលបាលីស្ទិកលើកទី ៧របស់កូរ៉េខាងជើងក្នុងឆ្នាំនេះ និងជាលើកទី ៤របស់ពួកគេ ក្នុងខែមេសា ។ យោធាកូរ៉េខាងត្បូងនិយាយនៅក្នុងសេចក្តីថ្លែងការណ៍ថា មីស៊ីលទាំងនេះ ត្រូវបានបាញ់នៅជិតទីក្រុង Sinpo ស្ថិតនៅតំបន់ឆ្នេរភាគខាងកើតកូរ៉េខាងជើង កាលពីវេលាម៉ោង ៦ និង ១០នាទីព្រឹក ម៉ោងក្នុងស្រុក ថ្ងៃអាទិត្យ ។ សេចក្តីថ្លែងការណ៍បន្តថា កូរ៉េខាងត្បូងបានពង្រឹងស្ថានការឃ្លាំមើលរបស់ខ្លួន ហើយនិងបានផ្លាស់ប្តូរព័ត៌មានយ៉ាងជិតស្និតជាមួយសហរដ្ឋអាមេរិក និងជប៉ុន ។ ខណៈពេលនោះដែរ រដ្ឋាភិបាលជប៉ុន បានបង្ហោះសារនៅលើបណ្តាញព័ត៌មានសង្គមថា មីស៊ីលបាលីស្ទិកត្រូវបានគេមានជំនឿថា បានធ្លាក់នៅជិតតំបន់ឆ្នេរភាគខាងកើតឧបទ្វីបកូរ៉េ ។ គ្មានការឈ្លានពានជ្រៀតចូលទៅក្នុងតំបន់សេដ្ឋកិច្ចផ្តាច់មុខរបស់ជប៉ុន ត្រូវបានបញ្ជាក់នោះទេ ។ យោងតាមសារព័ត៌មាន បានឲ្យដឹងថា ការិយាល័យកូរ៉េខាងត្បូង និយាយថា ពួកគេបានរៀបចំជំនួបសន្តិសុខដ៏បន្ទាន់មួយ ។ សូមបញ្ជាក់ថា ការបាញ់សាកល្បងបែបនេះ បានបំពានលើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ(UN)ប្រឆាំងនឹងកម្មវិធីមីស៊ីលរបស់កូរ៉េខាងជើង ។ ប្រទេសឯកាផ្នែកការទូតមួយនេះ បានច្រានចោលបំរាមរបស់ UN ហើយពួកគេនិយាយថា វាបានរំលោភលើសិទ្ធិអធិបតេយ្យភាពរបស់ខ្លួនក្នុងការការពារខ្លួន ៕

ព្យុះខ្សាច់បានវាយប្រហារតំបន់ស៊ីនជាំងរបស់ប្រទេសចិន

ព្យុះខ្សាច់បានវាយប្រហារផ្នែកខ្លះនៃតំបន់ស្វយ័តស៊ីនជាំងអ៊ុយហ្គឺរ (Xinjiang Uygur Autonomous )ភាគពាយ័ព្យប្រទេសចិនកាលពីថ្ងៃសុក្រសប្ដាហ៍នេះ ។វីដេអូឃ្លាំមើលពីទីក្រុងស៊ីហឺហ្ស៊ី (Shihezi City)បង្ហាញថានៅម៉ោងប្រហែល ១៧:១៥នាទី ខ្យល់បក់ខ្លាំងដែលនាំសំណុំខ្សាច់ និងធូលី បានបក់មកពីភាគពាយ័ព្យឆ្ពោះទៅកាន់ទីប្រជុំជន បង្កើតជាជញ្ជាំងខ្សាច់ដ៏ធំមួយដែលគ្របដណ្ដប់តំបន់នោះ។ជាសំណាងល្អ ភ្លៀងធ្លាក់ខ្លាំងបានចាប់ផ្តើមធ្លាក់ភ្លាមៗបន្ទាប់ពីនោះ ដែលធ្វើឲ្យគុណភាពខ្យល់ប្រសើរឡើង។លោក An Dongliang អនុប្រធានការិយាល័យឧតុនិយមក្នុងស្រុកបាននិយាយថា ភ្លៀងអាចកាត់បន្ថយភាគល្អិតនៅក្នុងខ្យល់បានយ៉ាងមានប្រសិទ្ធភាព និងកាត់បន្ថយផលប៉ះពាល់អវិជ្ជមាននៃខ្យល់បក់ខ្លាំង និងព្យុះធូលីលើផលិតកម្មកសិកម្ម។ព្យុះខ្សាច់ក៏បានវាយប្រហារទីក្រុង អ៊ូរ៉ុមឈី ដែលជារដ្ឋធានីក្នុងតំបន់ នៅម៉ោងប្រហែល ២០:០០នាទី នៅថ្ងៃដដែល ផងដែរ ដោយកំណត់ភាពមើលឃើញនៅក្នុងតំបន់ទីក្រុងនៅចន្លោះពី៥០០ ទៅ ១.០០០ ម៉ែត្រ។ព្យុះខ្សាច់មានរយៈពេលប្រហែល ៣០ នាទី មុនពេលរសាយបាត់បន្តិចម្តងៗ នៅពេលភ្លៀងចាប់ផ្តើមធ្លាក់។យោងតាមក្រមអ្នកជំនាញឧតុនិយមក្នុងស្រុក មូលហេតុចម្បងនៃព្យុះខ្សាច់គឺកង្វះទឹកភ្លៀងរួមផ្សំជាមួយនឹងខ្យល់បក់ខ្លាំងក្នុងរយៈពេលប៉ុន្មានថ្ងៃថ្មីៗនេះ៕

ប្រធានាធិបតីបារាំង ស្វាគមន៍ការបើកច្រកសមុទ្រ Hormuz ឡើងវិញនៅក្នុងកិច្ចប្រជុំពហុភាគី

ប្រធានាធិបតីបារាំង លោក Emmanuel Macron បាននិយាយកាលពីថ្ងៃសុក្រថា ការប្រកាសរបស់អ៊ីរ៉ង់អំពីការបើកច្រកសមុទ្រ Hormuz ឡើងវិញកំពុងដើរលើទិសដៅត្រឹមត្រូវ។លោក Macron បានធ្វើសេចក្តីថ្លែងការណ៍នេះនៅក្នុងសេចក្តីប្រកាសរួមមួយ បន្ទាប់ពីសន្និសីទមួយ រៀបចំរួមគ្នាដោយបារាំង និងអង់គ្លេសនៅទីក្រុងប៉ារីស ដែលបាននាំប្រទេសចំនួន ៤៩ មកពិភាក្សាអំពីការធានាសេរីភាពនៃការធ្វើនាវាចរណ៍នៅក្នុងច្រកសមុទ្រ Hormuz។នាយករដ្ឋមន្ត្រីអង់គ្លេស លោក Keir Starmer អធិការបតីអាល្លឺម៉ង់ លោក Friedrich Merz និងនាយករដ្ឋមន្ត្រីអ៊ីតាលី លោកស្រី Giorgia Meloni បានចូលរួមកិច្ចប្រជុំនេះ ខណៈមន្ត្រីមកពីទូទាំងអឺរ៉ុប អាស៊ី អាមេរិកឡាទីន និងមជ្ឈិមបូព៌ាបានចូលរួមតាមរយៈសន្និសីទវីដេអូ។នៅក្នុងកិច្ចប្រជុំនេះ លោក Macron បានស្វាគមន៍បទឈប់បាញ់នៅក្នុងប្រទេសអ៊ីរ៉ង់ និងលីបង់ ដោយហៅបទឈប់បាញ់ទាំងនោះថាជាការអភិវឌ្ឍវិជ្ជមាន។ ទោះជាយ៉ាងណាក៏ដោយ លោកបានសង្កត់ធ្ងន់ថា ចាំបាច់ត្រូវមានការប្រុងប្រយ័ត្ន។លោកថា ពួកលោកទាំងអស់គ្នាប្រឆាំងនឹងការរឹតបន្តឹងណាមួយ និងរបបកិច្ចព្រមព្រៀងណាមួយដែលនឹងបង្កើតបានជាការប៉ុនប៉ងធ្វើឯកជនភាវូបនីយកម្មច្រកសមុទ្រ៕

អូស្ត្រាលី និងជប៉ុនចុះហត្ថលេខាលើកិច្ចសន្យាដើម្បីចាប់ផ្តើមកិច្ចព្រមព្រៀងនាវាចម្បាំងតម្លៃ៧ពាន់លានដុល្លារ

អូស្ត្រាលី និងជប៉ុនបានចុះហត្ថលេខាលើកិច្ចសន្យានៅថ្ងៃសៅរ៍ ១៨ មេសា នេះ ដោយចាប់ផ្តើមកិច្ចព្រមព្រៀងដ៏សំខាន់របស់ប្រទេសទាំងពីរក្នុងទំហំទឹកប្រាក់ ១០ ពាន់លានដុល្លារអូស្ត្រាលី ស្មើ៧ ពាន់លានដុល្លារអាមេរិក ដើម្បីផ្គត់ផ្គង់នាវាចម្បាំងដល់អូស្ត្រាលី ដែលជាការលក់ផ្នែកយោធាដ៏សំខាន់បំផុតរបស់ទីក្រុងតូក្យូ ចាប់តាំងពីបញ្ចប់ការហាមប្រាមការនាំចេញយោធាក្នុងឆ្នាំ ២០១៤។លោក Richard Marles រដ្ឋមន្ត្រីការពារជាតិអូស្ត្រាលី បាននិយាយនៅក្នុងសេចក្តីថ្លែងការណ៍មួយថា រូបលោក និងសមភាគីជប៉ុន គឺលោក Shinjiro Koizumi បានចុះហត្ថលេខាលើអនុស្សរណៈមួយ «ដើម្បីបញ្ជាក់ជាថ្មីអំពីការប្តេជ្ញាចិត្តរួមគ្នារបស់រដ្ឋាភិបាលអូស្ត្រាលី និងជប៉ុន ចំពោះការដឹកជញ្ជូននាវាចម្បាំងដោយជោគជ័យ» ។កិច្ចព្រមព្រៀងដែលបានធ្វើឡើងកាលពីខែសីហា បានភ្ជាប់កិច្ចខិតខំរបស់ប្រទេសជប៉ុនក្នុងការដកខ្លួនពីសន្តិនិយមក្រោយសង្គ្រាមដើម្បីបង្កើតចំណងមិត្តភាពសន្តិសុខលើសពីសម្ព័ន្ធភាពរបស់ខ្លួនជាមួយសហរដ្ឋអាមេរិកក្នុងបំណងទប់នឹងឥទ្ធិពលរបស់ប្រទេសចិន។អូស្ត្រាលីគ្រោងដាក់ពង្រាយនាវាចម្បាំងទាំងនេះ ដែលត្រូវបានផលិតឡើងដើម្បីប្រមាញ់នាវាមុជទឹក វាយប្រហារនាវាលើដី និងផ្តល់ការការពារផ្លូវអាកាស ដើម្បីការពារផ្លូវពាណិជ្ជកម្មសមុទ្រដ៏សំខាន់ និងវិធីសាស្រ្តភាគខាងជើងរបស់ខ្លួននៅក្នុងមហាសមុទ្រឥណ្ឌា និងប៉ាស៊ីហ្វិក ជាកន្លែងដែលឥទ្ធិពលយោធារបស់ចិនកំពុងកើនឡើង៕

អ៊ុយក្រែនត្រៀមខ្លួនរួចជាស្រេចសម្រាប់កិច្ចប្រជុំថ្នាក់ដឹកនាំជាមួយរុស្ស៊ីក្រោមការសម្របសម្រួល

ទីភ្នាក់ងារសារព័ត៌មាន Interfax-Ukraine បានរាយការណ៍កាលពីថ្ងៃសុក្រ ១៧មេសាសប្ដាហ៍នេះ ដោយដកស្រង់សម្តីរដ្ឋមន្ត្រីការបរទេសអ៊ុយក្រែន លោក Andrii Sybiha ថា ទីក្រុងគីវត្រៀមខ្លួនរួចជាស្រេចសម្រាប់លទ្ធភាពនៃកិច្ចប្រជុំកម្រិតខ្ពស់ ដែលពាក់ព័ន្ធនឹងប្រធានាធិបតីអ៊ុយក្រែន លោក Volodymyr Zelenskyy និងប្រធានាធិបតីរុស្ស៊ី លោក Vladimir Putin ជាមួយនឹងការសម្របសម្រួលដោយប្រទេសទួរគី និងសហរដ្ឋអាមេរិក ។ លោក Sybiha បានថ្លែងក្នុងអំឡុងពេលទស្សនកិច្ចរបស់លោកទៅកាន់ប្រទេសទួរគីថា ពួកលោកត្រៀមខ្លួនរួចជាស្រេចសម្រាប់កិច្ចប្រជុំបែបនេះនៅក្នុងប្រទេសទួរគី។ លោកកំពុងសំដៅទៅលើកិច្ចប្រជុំរវាងលោក Zelenskyy លោក Putin លោកប្រធានាធិបតីទួរគី Recep Tayyip Erdogan និងអាចមានការចូលរួមពីប្រធានាធិបតីអាមេរិក លោក Donald Trump។លោក Sybiha បានគូសបញ្ជាក់ពីតួនាទីដ៏សំខាន់របស់ប្រទេសទួរគីក្នុងកិច្ចខិតខំប្រឹងប្រែងសន្តិភាព និងបានថ្លែងអំណរគុណដល់ទីក្រុងអង់ការ៉ាចំពោះការគាំទ្ររបស់ខ្លួន ជាពិសេសតួនាទីរបស់ខ្លួនក្នុងការបង្កើត “ច្រករបៀងគ្រាប់ធញ្ញជាតិ” នៅក្នុងសមុទ្រខ្មៅ៕

តម្លៃប្រេងឆៅធ្លាក់ចុះជាង ១០ ភាគរយ ខណៈច្រកសមុទ្រហ័រមូសបើកដំណើរការឡើងវិញ

តម្លៃប្រេងឆៅបានធ្លាក់ចុះជាង ១០ ភាគរយកាលពីព្រឹកថ្ងៃសុក្រ ខណៈអ៊ីរ៉ង់បានប្រកាសបើកច្រកសមុទ្រហ័រមូសឡើងវិញដល់នាវាពាណិជ្ជកម្មទាំងអស់ក្នុងអំឡុងពេលបទឈប់បាញ់នៅលីបង់។នៅក្នុងវគ្គជួញដូរព្រឹកថ្ងៃសុក្រ តម្លៃប្រេងឆៅ West Texas Intermediate សម្រាប់ការចែកចាយខែឧសភាបានធ្លាក់ចុះទាបដល់ ៨៤,៤៨ ដុល្លារអាមេរិកក្នុងមួយបារ៉ែល ដែលជាការថយចុះយ៉ាងខ្លាំងជាង ១២ ភាគរយបើប្រៀបធៀបទៅនឹងតម្លៃទូទាត់នៃវគ្គជួញដូរចុងក្រោយ។ តម្លៃប្រេងឆៅBrent សម្រាប់ការចែកចាយខែមិថុនាមានកម្រិតទាប ៨៨,៧៦ ដុល្លារក្នុងមួយបារ៉ែល ធ្លាក់ចុះជាង ១០ ភាគរយបើប្រៀបធៀបទៅនឹងតម្លៃទូទាត់នៃវគ្គជួញដូរចុងក្រោយ។ នៅពេលបិទវគ្គជួញដូរ តម្លៃប្រេងឆៅ West Texas Intermediate សម្រាប់ការចែកចាយខែឧសភាបានខាតបង់ ១០,៨៤ ដុល្លារអាមេរិក ឬ ១១,៤៥ ភាគរយ មកនៅត្រឹម ៨៣,៨៥ ដុល្លារក្នុងមួយបារ៉ែលនៅលើផ្សារហ៊ុនញូវយ៉ក។ ប្រេងឆៅប្រភេទ Brent សម្រាប់ចែកចាយនៅខែមិថុនាបានធ្លាក់ចុះ ៩,០១ ដុល្លារ ឬ ៩,០៧ ភាគរយ មកនៅត្រឹម ៩០,៣៨ ដុល្លារក្នុងមួយបារ៉ែល នៅលើផ្សារហ៊ុន ICE Futures Exchange ក្នុងទីក្រុងឡុងដ៍្រ។ប្រធានាធិបតីអាមេរិក លោក Donald Trump បានថ្លែងអំណរគុណដល់អ៊ីរ៉ង់ចំពោះការប្រកាសបើកច្រកសមុទ្រ Hormuz ឡើងវិញទាំងស្រុងកាលពីថ្ងៃសុក្រ។ លោក បាននិយាយថា ការបិទផ្លូវទឹករបស់ទាហានសហរដ្ឋអាមេរិកលើអ៊ីរ៉ង់នឹងនៅតែមានសុពលភាពពេញលេញរហូតដល់ប្រតិបត្តិការរបស់ទីក្រុងវ៉ាស៊ីនតោនជាមួយទីក្រុងតេអេរ៉ង់បានបញ្ចប់ ១០០ ភាគរយ៕

ពលរដ្ឋលីបង់ភៀសខ្លួនពីសង្គ្រាមសម្រុកវិលត្រឡប់ទៅភាគខាងត្បូងវិញនៅថ្ងៃទីពីរនៃបទឈប់បាញ់ជាមួយអ៊ីស្រាអែល

ពលរដ្ឋដែលបានភៀសខ្លួនពីសង្គ្រាមសម្រុកវិលត្រឡប់ទៅកាន់ផ្ទះសម្បែងដែលរងការបំផ្លិចបំផ្លាញរបស់ពួកគេវិញដោយឆ្លងកាត់លើស្ពាន Qasmiyeh និងផ្លូវរងការខូចខាតជាមួយនឹងសម្ភារៈរបស់ពួកគេ និងក្តីសង្ឃឹមដ៏ផុយស្រួយនៅភាគខាងត្បូងប្រទេសលីបង់នៅថ្ងៃសៅរ៍ទី ១៨ ខែមេសា នេះ ថ្ងៃទីពីរនៃបទឈប់បាញ់រវាងក្រុមហេសបូឡា និងអ៊ីស្រាអែល។ប្រធានាធិបតីអាមេរិកលោក Donald Trump បាននិយាយកាលពីថ្ងៃសុក្រ ១៧ ខែមេសា ថា សហរដ្ឋអាមេរិកបានហាមឃាត់អ៊ីស្រាអែលពីការទម្លាក់គ្រាប់បែកបន្ថែមទៀតនៅក្នុងប្រទេសលីបង់ មួយថ្ងៃបន្ទាប់ពីលោកបានប្រកាសបទឈប់បាញ់រយៈពេល១០ ថ្ងៃ។កិច្ចព្រមព្រៀងរវាងលីបង់ និងអ៊ីស្រាអែល បានបន្ថែមសុទិដ្ឋិនិយមថា សង្គ្រាមរវាងសហរដ្ឋអាមេរិក និងអ៊ីរ៉ង់ អាចជិតដល់ទីបញ្ចប់។ប្រធានាធិបតីលីបង់ លោក ចូសេហ្វ អូន (Joseph Aoun) បាននិយាយកាលពីថ្ងៃសុក្រថា បទឈប់បាញ់ដែលបានព្រមព្រៀងដោយប្រទេសរបស់លោកគួរតែត្រូវបានផ្លាស់ប្តូរទៅជា "កិច្ចព្រមព្រៀងអចិន្ត្រៃយ៍"។ក្រុមហេសបូឡាគាំទ្រដោយអ៊ីរ៉ង់ ដែលធ្វើប្រតិបត្តិការដោយឯករាជ្យពីរដ្ឋលីបង់ បាននិយាយថា ខ្លួនរក្សា "សិទ្ធិក្នុងការតស៊ូ"៕

អ្នកស្រុក Manipur របស់ឥណ្ឌាប្រមូលផ្ដុំដោយកាន់គប់ភ្លើង ជុំវិញការផ្ទុះដ៏សាហាវដែលបានសម្លាប់កុមារពីរនាក់

ក្រុមអ្នកតវ៉ានៅរដ្ឋ Manipur ភាគឦសាននៃប្រទេសឥណ្ឌា បានប្រមូលផ្ដុំគ្នាដោយកាន់គប់ភ្លើងគ្រប់ដៃកាលពីថ្ងៃសុក្រ ១៧មេសាសប្ដាហ៍នេះ ថ្កោលទោសការផ្ទុះដ៏សាហាវដែលបានកើតឡើងនៅដើមខែនេះ។កុមារពីរនាក់មកពីសហគមន៍មីតី(Meitei) ដែលភាគច្រើនជាហិណ្ឌូសាសនិក បានស្លាប់បន្ទាប់ពីគ្រាប់បែកមួយបានផ្ទុះនៅក្នុងផ្ទះមួយនៅស្រុក Bishnupur ដែលភាគច្រើនជាជនជាតិភាគតិច Meitei។បុគ្គលិកសន្តិសុខបានបាញ់ឧស្ម័នបង្ហូរទឹកភ្នែកដើម្បីបំបែកក្រុមអ្នកតវ៉ាដែលកាន់គប់ភ្លើងគ្រប់ដៃ និងលើកពាក្យស្លោកនៅតាមដងផ្លូវ។ការស្លាប់នេះបានធ្វើឱ្យតំបន់ទាំងមូលធ្លាក់ក្នុងភាពចលាចល ដែលបង្កឱ្យមានការតវ៉ាយ៉ាងទូលំទូលាយ និងពិធីរំឭកវិញ្ញាណក្ខន្ធ។ ការប៉ះទង្គិចគ្នាបានផ្ទុះឡើងជាលើកដំបូងនៅក្នុងខែឧសភា ឆ្នាំ ២០២៣ រវាងសហគមន៍ Meitei ដែលភាគច្រើនជាអ្នកកាន់សាសនាហិណ្ឌូរបស់រដ្ឋ Manipur និងកុលសម្ព័ន្ធ Kuki ដែលភាគច្រើនជាគ្រិស្តសាសនា ជុំវិញអត្ថប្រយោជន៍សេដ្ឋកិច្ច និងកូតាការងារ។ សរុបមក មនុស្សប្រហែល២៦០ នាក់ត្រូវបានសម្លាប់ និងជាង៦ម៉ឺននាក់ ត្រូវបានភៀសខ្លួន៕

អាមេរិកបន្តលើកលែងទណ្ឌកម្មប្រេងរុស្ស៊ី ក្រោយមានសម្ពាធពីប្រទេសដែលកំពុងដោះស្រាយវិបត្តិតម្លៃប្រេងក្នុងពេលមានសង្គ្រាមអ៊ីរ៉ង់

រដ្ឋបាលលោក Trump កាលពីថ្ងៃសុក្រ១៧មេសា បានបន្តការលើកលែង ដែលអនុញ្ញាតឱ្យប្រទេសនានាទិញប្រេងជាប់ទណ្ឌកម្មរបស់រុស្ស៊ីនៅលើសមុទ្ររយៈពេលប្រហែលមួយខែ ទោះបីជាក្រុមតំណាងរាស្ត្របានចោទប្រកាន់រដ្ឋាភិបាលនេះ ថាបានបន្ធូរបន្ថយសម្ពាធលើទីក្រុងមូស្គូ ខណៈសង្គ្រាមរបស់ខ្លួនលើអ៊ុយក្រែនកំពុងបន្តក៏ដោយ។ការលើកលែងរបស់ក្រសួងរតនាគារអនុញ្ញាតឱ្យប្រទេសនានាទិញផលិតផលប្រេងឥន្ធនៈ និងប្រេងកាតរបស់រុស្ស៊ីដែលផ្ទុកនៅលើនាវាគិតចាប់ពីថ្ងៃសុក្រសប្ដាហ៍នេះដល់ថ្ងៃទី១៦ឧសភាខាងមុខ។ ការលើកលែងនេះ ជំនួសការលើកលែងរយៈពេល ៣០ថ្ងៃដែលផុតកំណត់នៅថ្ងៃទី១១ ខែមេសា និងមិនរាប់បញ្ចូលប្រតិបត្តិការដែលពាក់ព័ន្ធនឹងអ៊ីរ៉ង់ គុយបា និងកូរ៉េខាងជើង។ចំណាត់ការនេះគឺជាផ្នែកមួយនៃកិច្ចខិតខំប្រឹងប្រែងរបស់រដ្ឋបាលក្នុងការគ្រប់គ្រងតម្លៃថាមពលសកលដែលបានហក់ឡើងខ្ពស់ក្នុងអំឡុងពេលសង្គ្រាមអាមេរិក-អ៊ីស្រាអែលលើអ៊ីរ៉ង់។ ការលើកលែងនេះដែរបានកើតឡើងបន្ទាប់ពីប្រទេសនានានៅអាស៊ី ដែលទទួលរងផលប៉ះពាល់ផ្នែកថាមពលសកល បានដាក់សម្ពាធលើទីក្រុងវ៉ាស៊ីនតោន អនុញ្ញាតឱ្យមានការផ្គត់ផ្គង់ជំនួសទៅកាន់ទីផ្សារ។អ្នកនាំពាក្យក្រសួងរតនាគារបាននិយាយថា ខណៈការចរចា ជាមួយអ៊ីរ៉ង់ បង្កើនល្បឿន ក្រសួងរតនាគារចង់ធានាថាប្រេងអាចរកបានសម្រាប់អ្នកដែលត្រូវការ។កាលពីពីរថ្ងៃមុន រដ្ឋមន្ត្រីក្រសួងរតនាគារលោក Scott Bessent បាននិយាយថា ទីក្រុងវ៉ាស៊ីនតោននឹងមិនបន្តការលើកលែងសម្រាប់ប្រេងរបស់រុស្ស៊ី និងមួយទៀតសម្រាប់ប្រេងអ៊ីរ៉ង់ ដែលគ្រោងនឹងផុតកំណត់នៅថ្ងៃអាទិត្យ នោះទេ៕

បណ្ដាញសង្គម

ព័ត៌មានថ្មីៗ

ឯកឧត្តមឧបនាយករដ្ឋមន្ត្រី ហ៊ុន ម៉ានី៖ វិញ្ញាសាតាក់តែងចប់ភ្លាម ប្រឡងភ្លាមតែម្តង

ក្រសួងការងារ៖ ខេត្តចំនួន៤ នៅភូមិភាគឦសាន្ត មានឱកាសការងារជិត ៤,០០០កន្លែង កំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

អាជ្ញាធរជាតិអប្សរា និង JQA បិទបញ្ចប់កម្មវិធីអប់រំបរិស្ថានសម្រាប់កុមារ ឆ្នាំ២០២៦ និងប្រគល់រង្វាន់ដល់សិស្សឆ្នើម

អភិបាលខេត្តបន្ទាយមានជ័យ អំពាវនាវដល់មន្ត្រីរាជការសប្បុរសជនចូលរួមយុទ្ធនាការ "១ម៉ឺនរៀល ១ម៉ឺននាក់"

អគ្គកុងស៊ុលវៀតណាម រៀបចំកម្មវិធីសប្ដាហ៍វប្បធម៌វៀតណាម ឆ្នាំ២០២៦ នៅខេត្ដសៀមរាប

រដ្ឋបាលខេត្តកំពតត្រៀមទុរេនទុំ ២តោន សម្រាប់ទទួលទេសចរចូលរួមព្រឹត្តិការណ៍ «មរតកផ្លែឈើ និងនំចំណីកំពត»

មន្ត្រីជំនាញ ស្នើដល់កសិករ សហគមន៍ និងអ្នកពាក់ព័ន្ធរួមគ្នាលើកកម្ពស់វិស័យកសិកម្មខេត្តកែប

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877