នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ក្រុមអ្នកជួយសង្គ្រោះ៖ មនុស្ស ៤នាក់ទៀតដែលជាប់ក្នុងរូងភ្នំ នៅឡាវ ត្រូវបាននាំ​ចេញ​ដោយសុវត្ថិភាព
លោក Hegseth៖ យុគ​សម័យឧបត្ថម្ភធនការពារជាតិ​ពីអាមេរិក សម្រាប់ «ប្រទេសអ្នកមាន» ចប់ហើយ
មន្ត្រីជាន់ខ្ពស់អ៊ីរ៉ង់ និយាយ​ថា លោក Trump «ក្បត់ការទូត» ដោយបន្តបិទខ្ទប់​ដោយទ័ព​ជើង​ទឹក​​អាមេរិក
វេជ្ជបណ្ឌិត៖ សុខភាព​លោក Trump គឺ​ល្អប្រសើរណាស់​ ប៉ុន្តែ​គួរតែសម្រកទម្ងន់

ព័ត៌មានអន្តរជាតិ

គណបក្សសាធារណរដ្ឋព្រមានលោក TRUMP អំពីការសម្រេចកិច្ចព្រមព្រៀងជាមួយអ៊ីរ៉ង់យ៉ាងប្រញាប់ប្រញាល់

2026/05/27 04:10:02 pm        35
Facebook Telegram Linkin
សមាជិកសភាគណបក្សសាធារណរដ្ឋដែលមានឥទ្ធិពលមួយចំនួន បានព្រមានប្រធានាធិបតីអាមេរិកលោក ដូណាល់ ត្រាំ ( Donald Trump) អំពីការសម្រេចកិច្ចព្រមព្រៀងសន្តិភាពជាមួយអ៊ីរ៉ង់យ៉ាង ប្រញាប់ប្រញាល់ ដោយខ្លាចថា លក្ខខណ្ឌរបស់វាអាចមិនអំណោយផលសម្រាប់ទីក្រុងវ៉ាស៊ីនតោន។ នេះបើយោងតាមរបាយការណ៍របស់សារព័ត៌មាន Politico។សារព័ត៌មាននេះ និយាយថា៖«ការជំរុញរបស់លោកប្រធានាធិបតី ដូណាល់ ត្រាំ សម្រាប់កិច្ចព្រមព្រៀងសន្តិភាពអ៊ីរ៉ង់ ប្រឈមមុខនឹងការប្រឆាំងពីក្រុមនេះដ៏គួរឲ្យភ្ញាក់ផ្អើលមួយ៖ ក្រុមអ្នកនយោបាយសាធារណរដ្ឋនិយមដែលខ្លាចថា សេតវិមាននឹងធ្វើកិច្ចព្រមព្រៀងមិនល្អ។ «មន្ត្រីជាន់ខ្ពស់នៃបក្សសាធារណរដ្ឋ បានព្រមានថា កិច្ចព្រមព្រៀងដ៏ឆាប់រហ័សអាចធ្វើឲ្យអ៊ីរ៉ង់មានឧបករណ៍ ដើម្បីគំរាមកំហែងដល់តំបន់ និងបិទចរាចរណ៍ពាណិជ្ជកម្ម នៅក្នុងច្រកសមុទ្រហ័រមូស»។Politico បានសរសេរថា៖«ចំណុចជាប់គាំងសំខាន់ៗ នឹងរួមបញ្ចូលអនាគតនៃកម្មវិធីនុយក្លេអ៊ែររបស់អ៊ីរ៉ង់ រួមទាំងស្តុកអ៊ុយរ៉ានីញ៉ូមដែលមានធាតុសុទ្ធកម្រិតខ្ពស់ និងការបើកផ្លូវសម្រាប់ការដឹកជញ្ជូនតាមផ្លូវ សមុទ្រនៃច្រកនេះ»។សំណេរនោះបានបញ្ជាក់ថា៖«មន្ត្រីជាន់ខ្ពស់ជាច្រើននៃគណបក្សសាធារណរដ្ឋ កំពុងជំរុញរដ្ឋបាលនេះឲ្យបោះបង់ចោលការចរចា និងរក្សាសម្ពាធលើអ៊ីរ៉ង់»៕

អារ៉ាប់រួម ស្វាគមន៍សេចក្តីថ្លែងការណ៍របស់ក្រុមប្រឹក្សាសន្តិសុខស្តីពីការវាយប្រហាររោងចក្រថាមពលនុយក្លេអ៊ែរ Barakah

2026/05/27 03:51:37 pm        43
Facebook Telegram Linkin
ប្រទេសអារ៉ាប់រួម បានស្វាគមន៍សេចក្តីថ្លែងការណ៍មួយពីក្រុមប្រឹក្សាសន្តិសុខអង្គការសហប្រជាជាតិដែលបានបង្ហាញ «ការព្រួយបារម្ភយ៉ាងខ្លាំង» អំពីការវាយប្រហារដោយយានដ្រូនកាលពីថ្ងៃទី១៧ ខែឧសភា ទៅលើរោងចក្រថាមពលនុយក្លេអ៊ែរ Barakah របស់ខ្លួន។បេសកកម្មរបស់ប្រទេសអារ៉ាប់រួមប្រចាំនៅអង្គការសហប្រជាជាតិ បាននិយាយនៅក្នុងសារនៅលើបណ្តាញ X ថា «ក្រុមប្រឹក្សា បាននិយាយក្នុងការឯកភាពគ្នាថា ត្រូវតែបញ្ឈប់ជាបន្ទាន់និងជាអចិន្ត្រៃយ៍ចំពោះការវាយប្រហារទាំងអស់ប្រឆាំងនឹងជនស៊ីវិល និងហេដ្ឋារចនាសម្ព័ន្ធស៊ីវិលនៅក្នុងប្រទេសអារ៉ាប់រួម រួមទាំងការវាយប្រហារ និងការគំរាមកំហែងវាយប្រហារទៅលើរោងចក្រនុយក្លេអ៊ែរ»។បេសកកម្មនេះ ក៏បានអំពាវនាវឱ្យអ្នកទាំងឡាយដែលទទួលខុសត្រូវចំពោះ «សកម្មភាពឈ្លានពាន រួមទាំងអ្នកទាំងឡាយដែលធ្វើសកម្មភាពតាមរយៈបណ្តាញតំណាង» ត្រូវតែនាំមកឲ្យទទួលខុសត្រូវ។ក្រសួងការបរទេសអារ៉ាប់រួម កាលពីពេលមុនបានអំពាវនាវឱ្យប្រទេសអ៊ីរ៉ាក់ ទប់ស្កាត់សកម្មភាពអរិភាពដែលមានប្រភពចេញពីទឹកដីរបស់ខ្លួនបន្ទាប់ពីការវាយប្រហារដោយយានដ្រូនបានកើតឡើង។

ប្រធាន EU៖ សហភាពអឺរ៉ុបកំពុងរៀបចំកញ្ចប់ទណ្ឌកម្មលើកទី ២១ ប្រឆាំងនឹងរុស្ស៊ី

2026/05/27 03:49:24 pm        27
Facebook Telegram Linkin
ប្រធានគណៈកម្មការអឺរ៉ុប លោកស្រី Ursula von der Leyen បានថ្លែងនៅក្នុងសន្និសីទសារព័ត៌មានមួយនៅទីក្រុងវីលនីញូសថា បណ្តាប្រទេសសហភាពអឺរ៉ុប បានចាប់ផ្តើមបង្កើតកញ្ចប់ទណ្ឌកម្មលើកទី ២១ ប្រឆាំងនឹងរុស្ស៊ី ដែលមានគោលបំណងកាត់បន្ថយស្តង់ដាជីវភាពរបស់ប្រជាជននៃប្រទេសនេះ។លោកស្រី von der Leyen បាននិយាយថា៖«តាមពិតទៅ យើងកំពុងរៀបចំកញ្ចប់បន្ទាប់ឥឡូវនេះរួចហើយ។ អ្វីដែលគួរឲ្យចាប់អារម្មណ៍ផងដែរនោះ គឺថា ប្រជាជនរុស្ស៊ីកំពុងមានអារម្មណ៍ថា មានផលប៉ះពាល់សេដ្ឋកិច្ចនៃសង្គ្រាមទៅលើជីវិតប្រចាំថ្ងៃរបស់ពួកគេកាន់តែខ្លាំងឡើង»។លោកស្រីក៏បានកត់សម្គាល់ផងដែរថា សហភាពអឺរ៉ុបទើបតែបានអនុម័តថវិកាចំនួន ៩០ ពាន់លានអឺរ៉ូសម្រាប់របបក្រុងគីវ ដែលត្រូវបានគេសន្មត់ថា មានបំណងជួយអ៊ុយក្រែន «ចរចាពីជំហរដ៏រឹងមាំ»៕

មានការរំពឹងទុកកិច្ចព្រមព្រៀងនៅអ៊ីរ៉ង់ ខណៈការចរចាជាមួយអាមេរិកនៅបន្ត ក្នុងពេលមានការវាយប្រហារនិងសង្គ្រាមពាក្យសម្ដី

2026/05/27 03:37:29 pm        20
Facebook Telegram Linkin
អ៊ីរ៉ង់ និងសហរដ្ឋអាមេរិក បន្តការចរចាតាមរយៈអន្តរការី ដើម្បីឈានដល់ការយោគយល់គ្នា ប៉ុន្តែគ្មានកិច្ចព្រមព្រៀងណាមួយទំនងជាជិតឈានដល់នោះទេបន្ទាប់ពីការបាញ់ប្រហារតគ្នាមួយផ្សេងទៀត រវាងកងកម្លាំង ក្នុងពេលមានឥរិយាបថមិនទុកចិត្តគ្នា។ ទីផ្សារនៅទីក្រុងតេអេរ៉ង់ ហាក់ដូចជារំពឹងទុកថានឹងមានកិច្ចព្រមព្រៀងជាមួយទីក្រុងវ៉ាស៊ីនតោន ដោយរូបិយប័ណ្ណជាតិរបស់អ៊ីរ៉ង់កើនឡើងជាង៥ភាគរយនៅសប្តាហ៍នេះ។ សេដ្ឋកិច្ចអ៊ីរ៉ង់ទាំងមូល ស្ថិតនៅក្រោមសម្ពាធយ៉ាងខ្លាំង បណ្តាលមកពីការគ្រប់គ្រងមិនល្អក្នុងស្រុក និងសម្ពាធកាន់តែខ្លាំងពីសហរដ្ឋអាមេរិក រួមទាំងការបិទផ្លូវរបស់កងទ័ពជើងទឹកនៅកំពង់ផែភាគខាងត្បូងប្រទេសអ៊ីរ៉ង់។ អាជីវករនៅហាងមួយកន្លែងក្នុងទីក្រុងតេអេរ៉ង់ លក់ទូរស័ព្ទដៃនិងផលិតផលឌីជីថលផ្សេងទៀត ដែលភាគច្រើននាំចូលពីប្រទេសអារ៉ាប់រួមនៅមុនសង្គ្រាម បាននិយាយថា «ការផ្គត់ផ្គង់កំពុងជួបបញ្ហាយ៉ាងហោចណាស់ពីរទៅបីខែទៀត ដូច្នេះមិនទាន់និយាយបាននោះទេថានឹងមានអ្វីកើតឡើងនៅលើទីផ្សារ»។

ប្រធានក្រុមប្រឹក្សាសន្តិសុខ៖ បេឡារុស និងរុស្ស៊ី នឹងប្រើប្រាស់គ្រប់មធ្យោបាយដែលមាន ដើម្បីការពារខ្លួន

2026/05/27 03:35:44 pm        101
Facebook Telegram Linkin
លេខាធិការក្រុមប្រឹក្សាសន្តិសុខរដ្ឋនៃសាធារណរដ្ឋបេឡារុស លោក Alexander Volfovich បាននិយាយថា បេឡារុស និងរុស្ស៊ី មិនបង្កការគំរាមកំហែងដល់នរណាម្នាក់ឡើយ ប៉ុន្តែនឹងការពារទឹកដីនៃរដ្ឋសហភាព ជាមួយនឹងធនធានទាំងអស់ដែលមាន។ លោក Volfovich បានថ្លែងអំឡុងពេលកិច្ចប្រជុំរបស់គណៈកម្មាធិការលេខាធិការក្រុមប្រឹក្សាសន្តិសុខនៃអង្គការសន្ធិសញ្ញាសន្តិសុខសមូហភាព (CSTO)ថា៖«យើងមិនបង្កការគំរាមកំហែងដល់នរណាម្នាក់ឡើយ។ ទាំងប្រធានាធិបតីរុស្ស៊ី លោក វ្ល៉ាឌីមៀ ពូទីន និង សមភាគីបេឡារុស លោក Alexander Lukashenko សុទ្ធតែបាននិយាយបែបនេះ។ ប៉ុន្តែយើងនឹងការពារទឹកដីរបស់យើង ជាមួយនឹងមធ្យោបាយទាំងអស់ដែលមាន នៅក្នុងរដ្ឋសហភាព»។លោកបានកត់សម្គាល់ថា ការដាក់ពង្រាយអាវុធនុយក្លេអ៊ែរយុទ្ធសាស្ត្ររបស់រុស្ស៊ី និងប្រព័ន្ធមីស៊ីល Oreshnik នៅក្នុងប្រទេសបេឡារុស បានរួមចំណែកដល់ការពង្រឹងវិធានការទប់ស្កាត់ជាយុទ្ធសាស្ត្រនៅក្នុងរដ្ឋសហភាព។ លោកលេខាធិការក្រុមប្រឹក្សាសន្តិសុខរដ្ឋបេឡារុសបានសង្កត់ធ្ងន់ថា៖ «ប្រសិនបើក្រុមមេដឹកនាំលោកខាងលិចរបស់យើងណាម្នាក់ធ្លាប់សង្ស័យថា នេះគឺជាការបោកប្រាស់នោះ គឺពុំមែនដូច្នេះទេ។ សមយុទ្ធហ្វឹកហ្វឺនកម្លាំងនុយក្លេអ៊ែរដែលធ្វើឡើង ក្រោមការដឹកនាំរបស់ប្រធានាធិបតីទាំងពីរនៃប្រទេសយើង បានបង្ហាញឲ្យឃើញ និងបញ្ជាក់ដល់មនុស្សគ្រប់គ្នាថា យើងមានអាវុធនុយក្លេអ៊ែរ ហើយ នឹងប្រើប្រាស់ពួកវា ក្នុងករណីមានការឈ្លានពានប្រឆាំងនឹងរដ្ឋសហភាព ដើម្បីការពារផលប្រយោជន៍ជាតិរបស់យើង»៕

សារព័ត៌មាន៖ អ៊ីរ៉ង់ទាមទារឲ្យដោះលែងទ្រព្យសកម្មដែលបានបង្កក អំឡុងពេលចរចាសន្តិភាពជាមួយ អាមេរិក

2026/05/27 03:32:59 pm        40
Facebook Telegram Linkin
អ៊ីរ៉ង់បានទាមទារឲ្យមានការដោះលែងទ្រព្យសកម្មដែលត្រូវបានបង្កករបស់ខ្លួន ដែលមានតម្លៃ ២៤ពាន់លានដុល្លារអាមេរិក ក្នុងអំឡុងពេលចរចាជាមួយសហរដ្ឋអាមេរិកស្តីពីការបញ្ចប់សង្គ្រាម។ នេះបើយោងតាមការចុះផ្សាយរបស់ទីភ្នាក់ងារសារព័ត៌មាន Tasnim ពាក់កណ្តាលផ្លូវការរបស់អ៊ីរ៉ង់។ដោយដកស្រង់ប្រភពព័ត៌មានដែលជិតស្និទ្ធនឹងក្រុមចរចារបស់អ៊ីរ៉ង់ សារព័ត៌មាន Tasnim បាននិយាយថា យោងតាមអត្ថបទនៃអនុស្សរណៈយោគយល់ (MoU) ចំនួន ១៤ ចំណុច ដែលកំពុងត្រូវបានដំណើរការដើម្បីបញ្ចប់ រវាងទីក្រុងតេអេរ៉ង់ និងទីក្រុងវ៉ាស៊ីនតោន ទ្រព្យសកម្មដែលត្រូវបានបង្កករបស់ អ៊ីរ៉ង់ ត្រូវតែត្រូវបានដោះលែង អំឡុងពេលចរចាសន្តិភាព។ ប្រភពបានបន្ថែមថា អ៊ីរ៉ង់ទទូចថា ពាក់កណ្តាលនៃចំនួនទឹកប្រាក់ទាំងនោះ ត្រូវតែប្រគល់ឲ្យ នៅពេលមានការប្រកាសអំពីអនុស្សរណៈយោគយល់នោះ ហើយចំនួនប្រាក់នៅសល់ត្រូវប្រគល់ឲ្យ ក្នុងរយៈពេល ៦០ថ្ងៃ។ យោងតាមប្រភពព័ត៌មាន ដំណើរទស្សនកិច្ចកាលពីថ្ងៃចន្ទរបស់ប្រធានសភាអ៊ីរ៉ង់ លោក Mohammad Baqer Qalibaf ទៅកាន់ប្រទេសកាតា មានគោលបំណងឈានដល់ការយោគយល់គ្នាលើការអនុវត្តតម្រូវការរបស់អ៊ីរ៉ង់ និងវិធីដើម្បីផ្តល់ឲ្យប្រទេសនេះនូវសិទ្ធិចូលប្រើប្រាស់ទ្រព្យសកម្មដែលបង្កករបស់ខ្លួនចំនួន ១២ ពាន់លានដុល្លារអាមេរិក នៅក្នុងជំហានដំបូង និងបញ្ចប់ឧបសគ្គចំពោះគោលដៅនោះ៕

អ៊ីរ៉ង់ តាមសេចក្តីរាយការណ៍ថាបានដោះលែងនាវិកឥណ្ឌាចំនួន១០នាក់ បន្ទាប់ពីការចរចាផ្នែកការទូត

2026/05/27 03:24:19 pm        55
Facebook Telegram Linkin
យោងតាមសេចក្តីរាយការណ៍របស់សារព័ត៌មាន AFP បានឲ្យដឹងថា អាជ្ញាធរដឹកជញ្ជូនរបស់ប្រទេសឥណ្ឌា បានប្រកាសថានាវិកឥណ្ឌា១០នាក់នៅលើនាវាដឹកប្រេងដែលត្រូវបានឃុំខ្លួននៅក្នុងប្រទេសអ៊ីរ៉ង់ ចាប់តាំងពីខែកក្កដា ឆ្នាំ២០២៥ ត្រូវបានដោះលែងបន្ទាប់ពី «ការចូលរួមផ្នែកការទូតជាបន្តបន្ទាប់»។ អាជ្ញាធរដឹកជញ្ជូនរបស់ប្រទេសឥណ្ឌា បាននិយាយថាសមាជិកនាវិកមកពីនាវា MV Harbour Phoenix ត្រូវបានអាជ្ញាធរអ៊ីរ៉ង់ចាប់ខ្លួន និងដាក់ពន្ធនាគារ បន្ទាប់ពីនាវារបស់ពួកគេត្រូវបានស្ទាក់ចាប់នៅជិតកំពង់ផែ Jask កាលពីឆ្នាំមុន។ អាជ្ញាធរដឹកជញ្ជូនបាននិយាយថា «នាវិកនៅពេលនេះ ត្រូវបានដោះលែង និងជួបជុំគ្នាដោយសុវត្ថិភាព» ហើយ«ការរៀបចំចាំបាច់ កំពុងត្រូវបានសម្របសម្រួលសម្រាប់ការវិលត្រឡប់ទៅវិញឲ្យបានឆាប់បំផុតរបស់សមាជិកនាវិកទៅកាន់ប្រទេសឥណ្ឌា»។ អាជ្ញាធរមិនបានផ្តល់ព័ត៌មានលម្អិតបន្ថែមអំពីមូលហេតុនៃការចាប់ខ្លួន ឬរារាំងនាវា ដែលអង្គភាពចុះបញ្ជីនិយាយថា ជានាវាដឹកផលិតផលប្រេងបំពាក់ទង់ជាតិកោះ Palau។

មេដឹកនាំបាល់ទិក និងប្រមុខEU ជួបពិភាក្សាអំពីសន្តិសុខតំបន់ ខណៈភាពតានតឹងភូមិសាស្ត្រនយោបាយកាន់ខ្លាំងឡើង

2026/05/27 03:22:06 pm        27
Facebook Telegram Linkin
ប្រធានាធិបតីនៃរដ្ឋបាល់ទិកទាំងបីបានជួបជាមួយប្រធានគណៈកម្មការអឺរ៉ុប លោកស្រី Ursula von der Leyen នៅទីក្រុងវីលនីញូស (Vilnius) កាលពីថ្ងៃអង្គារ ដើម្បីពិភាក្សាអំពីសន្តិសុខតំបន់ ការពង្រឹង ព្រំដែនភាគខាងកើតរបស់សហភាពអឺរ៉ុប (EU) និងការបង្កើនសមត្ថភាពការពារជាតិរបស់អឺរ៉ុប ស្របពេលមានភាពតានតឹងផ្នែកភូមិសាស្ត្រនយោបាយកាន់តែខ្លាំងឡើង។ប្រធានាធិបតីលីទុយអានី លោក Gitanas Nauseda បានទទួលស្វាគមន៍ប្រធានាធិបតីអេស្តូនី លោក Alar Karis ប្រធានាធិបតីឡាតវី លោក Edgars Rinkevics និងលោកស្រី Ursula von der Leyen សម្រាប់កិច្ចពិភាក្សាកម្រិតខ្ពស់ ដែលផ្តោតលើបញ្ហាប្រឈមសន្តិសុខដែលតំបន់បាល់ទិក និងសហភាពអឺរ៉ុបទាំងមូល កំពុងជួបប្រទះ។ យោងតាមវិទ្យុ និងទូរទស្សន៍ជាតិលីទុយអានី (LRT) ការពិភាក្សាផ្តោតលើការពង្រឹងសមត្ថភាពការពារដែនអាកាស និងប្រឆាំងយានដ្រូន ការកែលម្អការការពារហេដ្ឋារចនាសម្ព័ន្ធសំខាន់ៗ ការជំរុញការចល័តយោធា និងបង្កើនការអភិវឌ្ឍឧស្សាហកម្មការពារជាតិអឺរ៉ុប។មេដឹកនាំទាំងនេះបានឯកភាពគ្នាលើភាពបន្ទាន់នៃការពង្រឹងសន្តិសុខតាមបណ្តោយព្រំដែនភាគខាងកើតរបស់សហភាពអឺរ៉ុប ដោយផ្តោតជាពិសេសលើគំនិតផ្តួចផ្តើមឃ្លាំមើលផ្នែកខាងកើតរបស់ EU ។គំនិតផ្តួចផ្តើមនេះមានគោលបំណងធ្វើឲ្យប្រសើរឡើងនូវការត្រៀមខ្លួនការពារជាតិក្នុងតំបន់ តាមរយៈការឃ្លាំមើលដែនអាកាសកាន់តែប្រសើរឡើង ប្រព័ន្ធប្រឆាំងយានដ្រូនដែលបានធ្វើឲ្យប្រសើរឡើង បណ្តាញការពារដែនអាកាសឲ្យកាន់តែរឹងមាំ និងការយល់ដឹងអំពីស្ថានភាពកាន់តែច្រើននៅទូទាំងរដ្ឋជាសមាជិកភាគខាងកើត៕

ក្រុមប្រឹក្សាសន្តិសុខUN ថ្កោលទោសការវាយប្រហារដោយដ្រូននៅជិតរោងចក្រថាមពលនុយក្លេអ៊ែររបស់អារ៉ាប់រួម

2026/05/27 03:19:28 pm        41
Facebook Telegram Linkin
ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃអង្គារ បានថ្កោលទោសចំពោះអ្វីដែលខ្លួនពិពណ៌នាថា ជាការវាយប្រហារដោយយានដ្រូនដ៏អាក្រក់» ដែលបានកំណត់គោលដៅលើម៉ាស៊ីនភ្លើងនៅខាងក្រៅបរិវេណខាងក្នុងនៃរោងចក្រថាមពលនុយក្លេអ៊ែរ Barakah របស់អេមីរ៉ាតអារ៉ាប់រួម។ ក្រុមប្រឹក្សាសន្តិសុខបានបញ្ជាក់ថា ការវាយប្រហារនៅថ្ងៃទី ១៧ ខែឧសភា បានបង្កហានិភ័យធ្ងន់ធ្ងរដល់ជីវិតជនស៊ីវិល ហេដ្ឋារចនាសម្ព័ន្ធសំខាន់ៗ និងបរិស្ថាន។ ដោយមិនបញ្ចេញឈ្មោះអ៊ីរ៉ង់ សមាជិកក្រុមប្រឹក្សាបាននិយាយថា ការវាយប្រហារនេះ គឺជាការរំលោភបំពានច្បាប់អន្តរជាតិយ៉ាងធ្ងន់ធ្ងរ» ហើយបានសម្តែងការព្រួយបារម្ភយ៉ាងខ្លាំងចំពោះអ្វីដែលពួកគេពិពណ៌នាថា ជាការកើនឡើងភាពតានតឹងដ៏គ្រោះថ្នាក់ ដែលពាក់ព័ន្ធនឹងហេដ្ឋារចនាសម្ព័ន្ធស៊ីវិល និងទាក់ទងនឹងនុយក្លេអ៊ែរ។ពួកគេបាននិយាយនៅក្នុងសេចក្តីថ្លែងការណ៍មួយថា៖«សមាជិកនៃក្រុមប្រឹក្សាសន្តិសុខថ្កោលទោសយ៉ាងដាច់អហង្ការចំពោះការវាយប្រហារដោយយានដ្រូនដ៏អាក្រក់នេះ ដោយបន្ថែមថា ការវាយប្រហារ ឬការគំរាមកំហែងប្រឆាំងនឹងរោងចក្រនុយក្លេអ៊ែរសន្តិភាព គឺមិនអាចទទួលយកបានទេ ហើយត្រូវតែបញ្ចប់ជា បន្ទាន់៕

នាយករដ្ឋមន្ត្រីអ៊ីស្រាអែលនិយាយថា កងទ័ពកំពុងបង្កើនប្រតិបត្តិការ នៅក្នុងប្រទេសលីបង់

2026/05/27 03:09:20 pm        73
Facebook Telegram Linkin
នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បាននិយាយកាលពីថ្ងៃអង្គារថា កងកម្លាំងជើងគោកអ៊ីស្រាអែលដ៏ធំ កំពុងបង្កើនប្រតិបត្តិការរបស់ពួកគេ នៅក្នុងប្រទេសលីបង់ និងដណ្តើមយក«តំបន់ដែលគ្រប់គ្រងមួយចំនួន»។ នៅក្នុងសេចក្តីថ្លែងការណ៍វីដេអូមួយនៅពេលចាប់ផ្តើមកិច្ចប្រជុំគណៈរដ្ឋមន្ត្រីសន្តិសុខរបស់ខ្លួន លោក ណេតាន់យ៉ាហ៊ូ បាននិយាយថា ប្រតិបត្តិការដែលបានពង្រីកនេះ មានគោលបំណងពង្រឹងអ្វីដែលលោកបានពិពណ៌នាថា ជា «តំបន់ទ្រនាប់» នៅភាគខាងត្បូងប្រទេសលីបង់ តាមបណ្តោយព្រំដែនភាគខាងជើងរបស់អ៊ីស្រាអែល។ លោក ណេតាន់យ៉ាហ៊ូ បានលើកឡើងថា៖«កងកម្លាំងការពារអ៊ីស្រាអែល (IDF) កំពុងប្រតិបត្តិការជាមួយកម្លាំងថ្មើរជើងយ៉ាងច្រើន និងដណ្តើមយកតំបន់សំខាន់ៗ»។ លោកបានបន្ថែមថា អ៊ីស្រាអែលកំពុងអនុវត្តអ្វីដែលលោកហៅថា ជាកិច្ចខិតខំប្រឹងប្រែងដ៏សំខាន់មួយដើម្បីអភិវឌ្ឍន៍ដំណោះស្រាយ «ប្រកបដោយភាពច្នៃប្រឌិត និងវិធីសាស្ត្រថ្មី» ប្រឆាំងនឹងយានដ្រូនបំផ្ទុះរបស់ក្រុមហេសបូឡា ដែលបានសម្លាប់ និងធ្វើឲ្យកងទ័ពអ៊ីស្រាអែលរងរបួស អំឡុងពេលប្រយុទ្ធគ្នា។ នាព្រឹកថ្ងៃអង្គារ ទូរទស្សន៍ Kan ដែលគ្រប់គ្រងដោយរដ្ឋ បានរាយការណ៍ថា កងកម្លាំងជើងគោកអ៊ីស្រា អែល បានចាប់ផ្តើមប្រតិបត្តិការហួសពី «តំបន់ទ្រនាប់» នៅភាគខាងត្បូងប្រទេសលីបង់៕

បណ្ដាញសង្គម

ព័ត៌មានថ្មីៗ

ក្រុមអ្នកជួយសង្គ្រោះ៖ មនុស្ស ៤នាក់ទៀតដែលជាប់ក្នុងរូងភ្នំ នៅឡាវ ត្រូវបាននាំ​ចេញ​ដោយសុវត្ថិភាព
05/30/2026 05:05 PM
Facebook Telegram Linkin
លោក Hegseth៖ យុគ​សម័យឧបត្ថម្ភធនការពារជាតិ​ពីអាមេរិក សម្រាប់ «ប្រទេសអ្នកមាន» ចប់ហើយ
05/30/2026 05:05 PM
Facebook Telegram Linkin
មន្ត្រីជាន់ខ្ពស់អ៊ីរ៉ង់ និយាយ​ថា លោក Trump «ក្បត់ការទូត» ដោយបន្តបិទខ្ទប់​ដោយទ័ព​ជើង​ទឹក​​អាមេរិក
05/30/2026 05:05 PM
Facebook Telegram Linkin
វេជ្ជបណ្ឌិត៖ សុខភាព​លោក Trump គឺ​ល្អប្រសើរណាស់​ ប៉ុន្តែ​គួរតែសម្រកទម្ងន់
05/30/2026 05:05 PM
Facebook Telegram Linkin
អ្នកនៅ​រស់​ពីការ​ជាប់​ក្នុង​រូងភ្នំ នៅ​ឡាវ បានបរិភោគ​ថាសឈើសម្រាប់រែង​​មាស ដើម្បីបន្ត​ជីវិត
05/30/2026 05:05 PM
Facebook Telegram Linkin
មនុស្ស​ ១៨នាក់ស្លាប់ និង ៣០នាក់រងរបួស ដោយសារ​រថយន្តដឹកជនភៀសខ្លួន ក្រឡាប់នៅភាគខាងកើតអាហ្វហ្គានីស្ថាន
05/30/2026 05:05 PM
Facebook Telegram Linkin
សេតវិមាន៖ លោក Trump «នឹងធ្វើតែ​កិច្ចព្រមព្រៀងដែលល្អសម្រាប់អាមេរិកប៉ុណ្ណោះ​» ជាមួយអ៊ីរ៉ង់
05/30/2026 05:05 PM
Facebook Telegram Linkin
នាយករដ្ឋមន្ត្រី៖ កាណាដា និងចិន កំពុង​សាង​​ «ភាពជាដៃគូប្រកប​ដោយ​ស្ថិរភាព និងការ​ស្ថាបនាបន្ថែម​ទៀត​»
05/30/2026 05:05 PM
Facebook Telegram Linkin
រដ្ឋមន្រ្ដីក្រសួងការងារ ចុះពិនិត្យមើលខ្សែច្រវាក់ផលិតកម្មក្រុមហ៊ុន THACO AGRI ក្នុងខេត្តក្រចេះ ដែលផ្តល់ឱកាសការងារប្រមាណ២ម៉ឺននាក់ និងផ្ទេរជំនាញបច្ចេកទេសកសិកម្មទំនើប
05/30/2026 05:05 PM
Facebook Telegram Linkin
របាយការណ៍៖ សភាអាមេរិកកំពុងធ្វើសមាហរណកម្មកងកម្លាំងយោធាអាមេរិក និងអ៊ីស្រាអែលដោយស្ងាត់​ៗ
05/30/2026 05:05 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.