BTV NEWS

ក្រុមអ្នកជួយសង្គ្រោះ៖ មនុស្ស ៤នាក់ទៀតដែលជាប់ក្នុងរូងភ្នំ នៅឡាវ ត្រូវបាននាំចេញដោយសុវត្ថិភាព

លោក Hegseth៖ យុគសម័យឧបត្ថម្ភធនការពារជាតិពីអាមេរិក សម្រាប់ «ប្រទេសអ្នកមាន» ចប់ហើយ

មន្ត្រីជាន់ខ្ពស់អ៊ីរ៉ង់ និយាយថា លោក Trump «ក្បត់ការទូត» ដោយបន្តបិទខ្ទប់ដោយទ័ពជើងទឹកអាមេរិក

វេជ្ជបណ្ឌិត៖ សុខភាពលោក Trump គឺល្អប្រសើរណាស់ ប៉ុន្តែគួរតែសម្រកទម្ងន់

ព័ត៌មានអន្តរជាតិ

អេហ្ស៊ីបជំរុញឲ្យមានការរំសាយអាវុធនុយក្លេអ៊ែរ និងតំបន់គ្មានអាវុធប្រល័យលោកនៅមជ្ឈិមបូព៌ា

ក្រសួងការបរទេសអេហ្ស៊ីប បាននិយាយនៅក្នុងសេចក្តីថ្លែងការណ៍មួយថា កាលពីថ្ងៃអង្គារ ប្រទេសអេហ្ស៊ីបបានអំពាវនាវឲ្យមានជំហានជាក់ស្តែងឆ្ពោះទៅរកការរំសាយអាវុធនុយក្លេអ៊ែរ និងបានបន្តការជំរុញរបស់ខ្លួនសម្រាប់មជ្ឈិមបូព៌ាដែលគ្មានអាវុធនុយក្លេអ៊ែរ និងអាវុធប្រល័យលោកផ្សេងទៀត។ ប្រទេសអេហ្ស៊ីបបានសម្តែងការសោកស្តាយចំពោះអ្វីដែលខ្លួនពិពណ៌នាថា ជា «ឱកាសដែលខកខាន» សម្រាប់សហគមន៍អន្តរជាតិ ក្នុងការបញ្ជាក់ជាថ្មីនូវការប្តេជ្ញាចិត្តរបស់ខ្លួនក្នុងការអនុវត្តគោលបំណងនៃសន្ធិសញ្ញាស្តីពីការមិនរីកសាយអាវុធនុយក្លេអ៊ែរ (NPT) បន្ទាប់ពីសន្និសីទពិនិត្យឡើងវិញលើកទី ១១ នៃសន្ធិសញ្ញា ដែលបានធ្វើឡើងនៅទីក្រុងញូវយ៉ក ចាប់ពីថ្ងៃទី ២៧ ខែមេសា ដល់ថ្ងៃទី ២២ ខែឧសភា បានបញ្ចប់ដោយគ្មានកិច្ចព្រមព្រៀងលើឯកសារចុងក្រោយឡើយ។ ក្រសួងបាននិយាយថា ទីក្រុងគែរបានសង្កត់ធ្ងន់លើសុពលភាពជាបន្តបន្ទាប់នៃលទ្ធផលសន្និសីទពិនិត្យឡើងវិញពីមុន ជាពិសេសសេចក្តីសម្រេចឆ្នាំ ១៩៩៥ ស្តីពី «ការបង្កើតតំបន់គ្មានអាវុធនុយក្លេអ៊ែរ និងអាវុធប្រល័យលោក ផ្សេងទៀតនៅមជ្ឈិមបូព៌ា» ដែលជាផ្នែកសំខាន់នៃកិច្ចព្រមព្រៀងកញ្ចប់ដែលអនុញ្ញាតឲ្យមានការបន្តសន្ធិសញ្ញានេះ។ យោងតាមសេចក្តីថ្លែងការណ៍ ប្រទេសអេហ្ស៊ីបក៏បានសង្កត់ធ្ងន់លើតួនាទីសំខាន់របស់ NPT ក្នុងការរក្សា និងពង្រឹងសន្តិសុខអន្តរជាតិ ចាប់តាំងពីការអនុម័តរបស់ខ្លួននៅឆ្នាំ ១៩៦៨ ដោយអំពាវនាវឲ្យសន្ធិសញ្ញានេះមានភាពសកល ជាពិសេសនៅមជ្ឈិមបូព៌ា៕

ប្រធានាធិបតីអ៊ីរ៉ង់បញ្ជាក់ជាថ្មីអំពីការប្តេជ្ញាចិត្តចំពោះការទូត ដើម្បីបញ្ចប់ភាពតានតឹងក្នុងតំបន់

យោងតាមសេចក្តីថ្លែងការណ៍ដែលបានចេញផ្សាយនៅលើគេហទំព័រការិយាល័យរបស់លោកកាលពីថ្ងៃអង្គារ លោក Masoud Pezeshkian ប្រធានាធិបតីអ៊ីរ៉ង់បានបញ្ជាក់ជាថ្មីអំពីការប្តេជ្ញាចិត្តរបស់ទីក្រុងតេអេរ៉ង់ចំពោះការទូត ដើម្បីបញ្ចប់ភាពតានតឹងនៅអាស៊ីខាងលិច។នៅក្នុងការសន្ទនាតាមទូរស័ព្ទជាមួយសមភាគីអេហ្ស៊ីប ទួរគី កាតា និងអូម៉ង់ លោក Pezeshkian បាន បង្ហាញពីការត្រៀមខ្លួនរបស់អ៊ីរ៉ង់ ក្នុងការសម្រេចបាននូវ «ក្របខណ្ឌដ៏ថ្លៃថ្នូរ» ដើម្បីបញ្ចប់សង្គ្រាមជាមួយសហរដ្ឋអាមេរិក និងអ៊ីស្រាអែល ដោយបន្ថែមថា អ៊ីរ៉ង់បានសម្តែងភាពស្មោះត្រង់របស់ខ្លួន នៅក្នុងការ សន្ទនា។ លោកបាននិយាយថា កិច្ចខិតខំប្រឹងប្រែងដ៏ម៉ឺងម៉ាត់ និងកម្រិតអ្នកជំនាញ កំពុងដំណើរការដើម្បីបញ្ចប់សេចក្តីព្រាងឯកសារសម្រាប់កិច្ចព្រមព្រៀង «ទូលំទូលាយ និងយុត្តិធម៌»។ប្រធានាធិបតីអេហ្ស៊ីប លោក Abdel-Fattah al-Sisi បានសង្កត់ធ្ងន់លើតម្រូវការក្នុងការពង្រឹងឯកភាពមូស្លីម និងបានសម្តែងការគាំទ្រយ៉ាងម៉ឺងម៉ាត់ចំពោះការចរចាដែលកំពុងដំណើរការ។ មេដឹកនាំកាតា លោក Sheikh Tamim bin Hamad Al Thani បានសង្ឃឹមថា នឹងមានកិច្ចព្រមព្រៀងចុងក្រោយ និងបានសន្យាបន្តកិច្ចខិតខំប្រឹងប្រែងសម្របសម្រួល។ ប្រធានាធិបតីទួរគី លោក រ៉េសិប តាយីប អឺដូហ្កាន់ (Recep Tayyip Erdogan) បានស្វាគមន៍ចំពោះកិច្ចចរចាដែលកំពុងដំណើរការ ហើយមេដឹកនាំប្រទេសអូម៉ង លោក Haitham bin Tariq Al Said បានបញ្ជាក់ជាថ្មីនូវការប្តេជ្ញាចិត្តរបស់ប្រទេសលោកចំពោះការពិគ្រោះយោបល់ប្រកបដោយស្ថាបនា។អ៊ីរ៉ង់ និងសហរដ្ឋអាមេរិកបានឈានដល់បទឈប់បាញ់នៅថ្ងៃទី ០៨ ខែមេសា បន្ទាប់ពីការប្រយុទ្ធគ្នាអស់ រយៈពេល ៤០ ថ្ងៃ។ បន្ទាប់ពីមានបទឈប់បាញ់នោះ ពួកគេបានធ្វើកិច្ចចរចាសន្តិភាពមួយជុំនៅទីក្រុង អ៊ីស្លាម៉ាបាដ ប្រទេសប៉ាគីស្ថាន នៅថ្ងៃទី ១១ និង ១២ ខែមេសា ដែលមិនបានសម្រេចកិច្ចព្រមព្រៀងណាមួយឡើយ៕

[UPDATE] ផ្លូវរូងក្រោមដីលាក់កំបាំង និងទ្វារក្លែងក្លាយ គ្របដណ្ដប់លើការស៊ើបអង្កេតសោកនាដកម្មអាជីវកម្មរ៉ែដែលបានសម្លាប់មនុស្ស ៨២នាក់នៅចិន

ប្រព័ន្ធផ្សព្វផ្សាយរដ្ឋបានរាយការណ៍កាលពីថ្ងៃអង្គារ ២៦ ឧសភា សប្ដាហ៍នេះ ថា ផ្លូវរូងក្រោមដីដែលគ្មានបិទស្លាកសញ្ញា ការបាត់ឧបករណ៍តាមដានផ្សេងៗ និងទ្វារក្លែងក្លាយ ត្រូវបានរកឃើញក្នុងអំឡុងពេលស៊ើបអង្កេតដំបូងទៅលើសោកនាដកម្មអាជីវកម្មរ៉ែដ៏សាហាវបំផុតនៅប្រទេសចិនក្នុងរយៈពេលជាង ១៥ឆ្នាំ មកនេះ ដោយរដ្ឋាភិបាលសន្យាថានឹងរកមូលហេតុឲ្យឃើញ។ ប្រព័ន្ធផ្សព្វផ្សាយរដ្ឋខាងលើបាននិយាយ មនុស្សយ៉ាងហោចណាស់ ៨២នាក់បានស្លាប់ដោយសារការផ្ទុះឧស្ម័នកាលពីយប់ថ្ងៃសុក្រ សប្ដាហ៍មុននៅអណ្តូងរ៉ែ Liushenyu ក្នុងខេត្ត Shanxi ដែលសម្បូរទៅដោយធ្យូងថ្មនៅភាគខាងជើងប្រទេសចិន។ មនុស្សពីរនាក់នៅតែបាត់ខ្លួន ដោយមានមនុស្ស ១២៨នាក់ផ្សេងទៀតត្រូវបានបញ្ជូនទៅព្យាបាលនៅមន្ទីរពេទ្យ។ ការផ្ទុះនេះគឺជាសោកនាដកម្មអាជីវកម្មរ៉ែដ៏សាហាវបំផុតនៅក្នុងប្រទេសចិនចាប់តាំងពីឆ្នាំ ២០០៩ នៅពេលការផ្ទុះឧស្ម័ននៅអណ្តូងរ៉ែ Xinxing ក្នុងខេត្ត Heilongjiang បានសម្លាប់មនុស្ស ១០៨នាក់។ ខណៈមូលហេតុនៃឧបទ្ទវហេតុកាលពីថ្ងៃសុក្រនៅតែស្ថិតក្រោមការស៊ើបអង្កេត ទីភ្នាក់ងារសារព័ត៌មានផ្លូវការស៊ីនហួរកាលពីថ្ងៃអង្គារ ២៦ឧសភា សប្ដាហ៍នេះ បាននិយាយថា ផ្លូវរូងក្រោមដីដែលលាក់កំបាំងពីភ្នែកមនុស្ស គំនូរក្លែងក្លាយ និងកម្មកររ៉ែមិនបានចុះបញ្ជី ដែលមិនត្រូវបានផ្តល់ឧបករណ៍តាមដានទីតាំងសង្គ្រោះជីវិតដែលត្រូវការចាំបាច់ គឺជាកត្តារួមចំណែកដល់ឧបទ្ទវហេតុដ៏សាហាវនេះ។ យោងតាមវីដេអូដែលបង្ហាញលើទូរទស្សន៍រដ្ឋ CCTV កាលពីថ្ងៃចន្ទបានឲ្យដឹងថានៅពេលការផ្ទុះបានកើតឡើងកាលពីថ្ងៃសុក្រ កំណត់ហេតុផ្លូវការបានបង្ហាញថា មានតែកម្មករ១២៤ នាក់ប៉ុណ្ណោះដែលបានចុះទៅក្រោមដី ។ តាមពិតទៅ កម្មករសរុបចំនួន២៤៧ នាក់កំពុងធ្វើការនៅក្នុងអណ្តូងរ៉ែ ដែលបង្ហាញថាមនុស្ស ១២៣ នាក់មិនត្រូវបានតាមដានក្នុងផ្លូវរូងក្រោមដីនៅខាងក្រៅវិសាលភាពផ្លូវការ។ ប្រព័ន្ធផ្សព្វផ្សាយរដ្ឋបាននិយាយថា កង្វះផែនទីត្រឹមត្រូវ និងព័ត៌មានទីតាំងរបស់កម្មកររ៉ែបានរារាំងយ៉ាងខ្លាំងដល់ប្រតិបត្តិការជួយសង្គ្រោះ៕

បណ្ដាប្រទេសនៅអាហ្វ្រិក បង្កើនវិធានការឆ្លើយតបជំងឺអេបូឡា ខណៈករណីឆ្លង និងស្លាប់កើនឡើង

បណ្ដាមេដឹកនាំ និងទីភ្នាក់ងារសុខភាពអាហ្រ្វិកកំពុងបង្កើនកិច្ចខិតខំប្រឹងប្រែងទប់ស្កាត់ការហក់ឡើងឥតឈប់ឈរនៃការផ្ទុះរាលដាលជំងឺអេបូឡា ក្នុងសាធារណរដ្ឋប្រជាធិបេត្យកុងហ្គោ និងអ៊ូហ្គង់ដា ដោយប្ដេជ្ញាបញ្ចេញថវិកាជិត៥០០លានដុល្លារអាមេរិកសម្រាប់ការឆ្លើយតប ខណៈបណ្ដាក្រុមហ៊ុនផលិតវ៉ាក់សាំង កំពុងប្រឹងប្រែងផលិតថ្នាំព្យាបាលជំងឺនេះ ស្របពេលអត្រាឆ្លងរាលដាល និងស្លាប់កំពុងហក់ឡើងខ្ពស់។ ថ្លែងក្នុងកិច្ចប្រជុំរដ្ឋមន្ត្រីកម្រិតខ្ពស់តាមប្រព័ន្ធអនឡាញកាលពីថ្ងៃចន្ទ លោក Jean Kaseya អគ្គនាយកមជ្ឈមណ្ឌលគ្រប់គ្រង និងបង្ការជំងឺអាហ្វ្រិក បាននិយាយថា ករណីសង្ស័យជាង ៩០០ ករណីត្រូវបានរាយការណ៍នៅក្នុងប្រទេសសាធារណរដ្ឋប្រជាធិបតេយ្យកុងហ្គោ ដោយមានករណីឆ្លងដែលបានបញ្ជាក់ជាង ១០០ ករណីត្រូវបានកត់ត្រានៅក្នុងសាធារណរដ្ឋប្រជាធិបតេយ្យកុងហ្គោ និងអ៊ូហ្គង់ដា រួមជាមួយនឹងករណីស្លាប់ជាង ២០០ នាក់នៅក្នុងប្រទេសទាំងពីរ។ លោកថា ការផ្ទុះឡើងនៃជំងឺអេបូឡាបច្ចុប្បន្នបានលើសពីទំហំនៃការផ្ទុះឡើងនៃជំងឺអេបូឡាពីមុនរួចទៅហើយ នៅពេលដែលវីរុសនេះ ត្រូវបានប្រកាសជាផ្លូវការ។ លោកបន្តថា នៅពេលដែលការផ្ទុះឡើងនៃជំងឺបច្ចុប្បន្នត្រូវបានប្រកាស ពួកលោកមានករណីសង្ស័យថាបានឆ្លងចំនួន ២៣៦ ករណី និងអ្នកស្លាប់ចំនួន ៦៤ នាក់រួចហើយ ហើយទោះបីជាមាននិន្នាការនេះក៏ដោយ ពួកលោកនៅតែមិនទាន់មានវ៉ាក់សាំង ឬថ្នាំព្យាបាលដែលមានអាជ្ញាប័ណ្ណនៅឡើយដែរ៕

មនុស្សរាប់លាននាក់ប្រមូលផ្តុំគ្នានៅពេលថ្ងៃលិចសម្រាប់ការបួងសួងបុណ្យហាជ នៅភ្នំ Arafat ប្រទេសអារ៉ាប៊ីសាអ៊ូឌីត

ប្រជាជនមូស្លីមរាប់លាននាក់ បានប្រមូលផ្តុំគ្នានៅពេលថ្ងៃលិចនៅលើភ្នំ Arafat កាលពីថ្ងៃអង្គារ ទី២៦ ខែឧសភា ដើម្បីបួងសួងក្នុងអំឡុងពេលពិធីសាសនានៃធម្មយាត្រាបុណ្យហាជ នៅទីក្រុង Mecca ប្រទេសអារ៉ាប៊ីសាអ៊ូឌីត។ អ្នកដើរធម្មយាត្រា បានប្រមូលផ្តុំគ្នានៅជុំវិញភ្នំមានកម្ពស់ប្រហែល៧០ម៉ែត្រ មានទីតាំងប្រហែល២០ គីឡូម៉ែត្រពីទីក្រុង Mecca ជាកន្លែងដែលអ្នកដើរធម្មយាត្រាបានបួងសួង និងសូត្រគម្ពីរគូរ៉ាន។ ការជួបជុំគ្នានៅភ្នំ Arafat ត្រូវបានចាត់ទុកថា ជាពិធីសំខាន់បំផុតនៃធម្មយាត្រាប្រចាំឆ្នាំ។ ពិធីបុណ្យហាជ ជាសសរស្តម្ភមួយក្នុងចំណោមសសរស្តម្ភចំនួនប្រាំរបស់សាសនាអ៊ីស្លាម បានទាក់ទាញប្រជាជនមូស្លីមមកពីជុំវិញពិភពលោក។ ពិធីនេះមានរយៈពេលជាច្រើនថ្ងៃ និងរួមបញ្ចូលសកម្មភាពសាសនាជាបន្តបន្ទាប់។ ពិធីបុណ្យហាជ គឺជាកាតព្វកិច្ចសាសនាដែលតម្រូវមានម្តងក្នុងមួយជីវិតសម្រាប់ប្រជាជនមូស្លីមគ្រប់រូបដែលមានលទ្ធភាព។ វាបង្ហាញពីការបញ្ចេញមតិខ្ពស់បំផុតនៃជំនឿ ការលះបង់ និងការឯកភាពសកលរបស់សាសនាអ៊ីស្លាម។

រដ្ឋមន្ត្រីការបរទេសរុស្ស៊ី ប្រាប់រដ្ឋមន្ត្រីការបរទេសអាមេរិកថា រុស្ស៊ីនឹងបន្តការវាយប្រហារលើទីក្រុងគីវ

ទីក្រុងមូស្គូ បាននិយាយថា ខ្លួនមានផែនការបន្តវាយប្រហារទីក្រុងគីវ។ រដ្ឋមន្ត្រីការបរទេសរុស្ស៊ី លោក Sergey Lavrov បានបញ្ជូនសារនេះទៅកាន់រដ្ឋមន្ត្រីការបរទេសសហរដ្ឋអាមេរិក លោក Marco Rubio ក្នុងការសន្ទនាតាមទូរស័ព្ទកាលពីពេលថ្មីៗនេះ។ ក្រសួងការបរទេសអាមេរិក បាននិយាយថា លោក Lavrov បានផ្តួចផ្តើមការសន្ទនាតាមទូរស័ព្ទនេះដោយលោកបានចោទប្រកាន់អ៊ុយក្រែនថា បានវាយប្រហារទីតាំងស៊ីវិលនៅក្នុងប្រទេសរុស្ស៊ី។ លោកក៏បាននិយាយផងដែរថា កងកម្លាំងរុស្ស៊ី នឹងបន្តកំណត់គោលដៅលើសហគ្រាសឧស្សាហកម្មការពារជាតិ និងមជ្ឈមណ្ឌលធ្វើការសម្រេចចិត្ត នៅក្នុងទីក្រុងគីវ។ ក្រសួងការបរទេសរុស្ស៊ី បានចេញសេចក្តីថ្លែងការណ៍មួយដោយបាននិយាយថា ចំណាត់ការនេះគឺជាការសងសឹកចំពោះការវាយប្រហាររបស់អ៊ុយក្រែននៅក្នុងទីក្រុង Luhansk គ្រប់គ្រងដោយរុស្ស៊ី។ សេចក្តីថ្លែងការណ៍ ក៏បានជំរុញឱ្យពលរដ្ឋ និងអ្នកការទូតបរទេសចាកចេញពីទីក្រុងគីវជាបន្ទាន់។ ប្រភពព័ត៌មានអ៊ុយក្រែន បាននិយាយថា រុស្ស៊ីបានបើកការវាយប្រហារទ្រង់ទ្រាយធំដោយបានសម្លាប់មនុស្សច្រើននាក់ និងរងរបួសជាង ៨០ នាក់នៅក្នុងទីក្រុងគីវ និងតំបន់ផ្សេងៗទៀត។ ប្រធានាធិបតីអ៊ុយក្រែន លោក Volodymyr Zelenskyy បានរិះគន់ខ្លាំងៗចំពោះរុស្ស៊ីសម្រាប់ការវាយប្រហារនេះ។ លោកបាននិយាយថា ទីក្រុងមូស្គូ បានប្រើប្រាស់មីស៊ីល Oreshnik ដ៏មានអានុភាពក្នុងការវាយប្រហារ។ មីស៊ីលបាលីស្ទីកថ្មីនេះត្រូវបានគេនិយាយថា មានល្បឿនលឿនជាងសំឡេង និងមានសមត្ថភាពបំពាក់ក្បាលគ្រាប់នុយក្លេអ៊ែរ។

រុស្ស៊ី៖ អាមេរិក មិនបានផ្តល់ទិដ្ឋាការដល់អនុរដ្ឋមន្ត្រីដើម្បីចូលរួមក្នុងកិច្ចប្រជុំអង្គការសហប្រជាជាតិទេ

ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិ បាននិយាយកាលពីថ្ងៃអង្គារ ទី២៦ ខែឧសភា ថា សហរដ្ឋអាមេរិក មិនបានផ្តល់ទិដ្ឋាការដល់អនុរដ្ឋមន្ត្រីការបរទេសរុស្ស៊ី លោក Alexander Alimov ដើម្បីចូលរួមក្នុងកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិទេ និងបានចាត់ទុកថា ជាការរំលោភលើកាតព្វកិច្ចរបស់សហរដ្ឋអាមេរិកក្រោមកិច្ចព្រមព្រៀងទីស្នាក់ការកណ្តាលអង្គការសហប្រជាជាតិ។ លោក Vassily Nebenzia បានធ្វើអត្ថាធិប្បាយនៅក្នុងកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិដែលមានសមាជិក១៥រូប ដឹកនាំដោយរដ្ឋមន្ត្រីការបរទេសចិន លោក Wang Yi ថា លោក Alimov មានបំណងចូលរួមក្នុងកិច្ចប្រជុំ។ ក្រសួងការបរទេស និងបេសកកម្មអង្គការសហប្រជាជាតិរបស់សហរដ្ឋអាមេរិក មិនបានឆ្លើយតបភ្លាមៗចំពោះសំណួរអំពីសេចក្តីថ្លែងការណ៍របស់លោក Nebenzia ទេ។ លោក Nebenzia និយាយថា «គណៈប្រតិភូរុស្ស៊ី ដោយផ្អែកលើការអញ្ជើញរបស់រដ្ឋមន្ត្រីការបរទេសចិន លោក Wang Yi គួរតែត្រូវមានតំណាងក្នុងអំឡុងពេលកិច្ចប្រជុំនៅកម្រិតថ្នាក់អនុរដ្ឋមន្ត្រីការបរទេសនៃសហព័ន្ធរុស្ស៊ី លោក Alexander Alimov ដែលពិនិត្យមើលបញ្ហាទាក់ទងនឹងអង្គការសហប្រជាជាតិ»។ លោកបាននិយាយបន្ថែមថា «ទោះជាយ៉ាងណា ទោះបីជាយើងព្យាយាមបញ្ចុះបញ្ចូលភាគីសហរដ្ឋអាមេរិកឱ្យចេញទិដ្ឋាការដល់លោកក៏ដោយ ក៏ទិដ្ឋាការនោះមិនត្រូវបានផ្តល់ឱ្យនៅទីបំផុតដែរ»។ លោក Nebenzia បាននិយាយថា ក្រោមកិច្ចព្រមព្រៀងទីស្នាក់ការកណ្តាលរបស់អង្គការសហប្រជាជាតិ ការចូលទៅកាន់ទីស្នាក់ការកណ្តាលរបស់អង្គការសហប្រជាជាតិនៅទីក្រុងញូវយ៉ក «ត្រូវផ្តល់ជូនមន្ត្រីទាំងអស់នៃរដ្ឋជាសមាជិក»។ លោកបាននិយាយថា រុស្ស៊ីក៏បានចាត់ទុកបញ្ហានេះថាជា «គំរូដ៏អាក្រក់មួយនៃការមិនគោរពចំពោះតំណែងប្រធានក្រុមប្រឹក្សាសន្តិសុខរបស់ប្រទេសចិន និងប្រធានបទ ដែលកំពុងពិភាក្សានៅថ្ងៃនេះ គឺធម្មនុញ្ញអង្គការសហប្រជាជាតិ»។

រដ្ឋមន្ត្រីការបរទេសចិន៖ ចិនសង្ឃឹមថាភាគីសង្គ្រាមនៅអ៊ីរ៉ង់ អាចជួបគ្នានៅពាក់កណ្តាលផ្លូវ

រដ្ឋមន្ត្រីការបរទេសចិន លោក Wang Yi បាននិយាយកាលពីថ្ងៃអង្គារ ទី២៦ ខែឧសភា ថា លោកសង្ឃឹមថាភាគីនានាក្នុងជម្លោះនៅអ៊ីរ៉ង់ នៅតែអាចប្តេជ្ញាចិត្តក្នុងការបន្តបទឈប់បាញ់ និងបន្តជួបគ្នានៅពាក់កណ្តាលផ្លូវ។ អ៊ីរ៉ង់ បាននិយាយកាលពីថ្ងៃអង្គារថា សហរដ្ឋអាមេរិក បានរំលោភលើបទឈប់បាញ់ បន្ទាប់ពីសហរដ្ឋអាមេរិក បានធ្វើអ្វីដែលខ្លួនហៅថាជាការវាយប្រហារការពារនៅភាគខាងត្បូងប្រទេសអ៊ីរ៉ង់ ខណៈរដ្ឋមន្ត្រីការបរទេសអាមេរិក លោក Marco Rubio បាននិយាយថា ការចរចាកិច្ចព្រមព្រៀងដើម្បីបញ្ឈប់ជម្លោះអាច «ចំណាយពេលពីរបីថ្ងៃ»។ លោក Wang Yi បានប្រាប់អ្នកសារព័ត៌មាននៅអង្គការសហប្រជាជាតិក្នុងទីក្រុងញូវយ៉កបន្ទាប់ពីដឹកនាំកិច្ចប្រជុំក្រុមប្រឹក្សាសន្តិសុខដែលមានសមាជិក១៥រូបថា «យើងសង្ឃឹមថា ភាគីពាក់ព័ន្ធនៅតែអាចប្តេជ្ញាចិត្តក្នុងការបន្តបទឈប់បាញ់ និងបន្តជួបគ្នានៅពាក់កណ្តាលផ្លូវ ដូច្នេះសន្តិភាពអាចវិលត្រឡប់ទៅតំបន់មជ្ឈិមបូព៌ាវិញ បានកាន់តែឆាប់តាមដែលអាចធ្វើទៅបាន»។ លោក Wang បាននិយាយបន្ថែមថា «ដូចដែលយើងបាននិយាយ បញ្ហាដែលមានជាយូរមកហើយមិនអាចដោះស្រាយបានក្នុងពេលតែមួយយប់នោះទេ»។ «ទោះជាយ៉ាងណា រាល់ជំហានឆ្ពោះទៅមុខក្នុងការចរចា នាំមកនូវក្តីសង្ឃឹមកាន់តែច្រើនចំពោះសន្តិភាព »។

ភាពវឹកវរនៅបូលីវី បានបន្តក្រោយការតវ៉ាច្រើនសប្តាហ៍ដែលបានហ៊ុមព័ទ្ធរដ្ឋាភិបាលរបស់លោកប្រធានាធិបតី Rodrigo Paz

ភាពវឹកវរនៅក្នុងប្រទេសបូលីវី បានបន្តកាលពីថ្ងៃអង្គារ ទី២៦ ខែឧសភា បន្ទាប់ពីការតវ៉ារយៈពេលជាច្រើនសប្តាហ៍ដែលបានហ៊ុមព័ទ្ធរដ្ឋាភិបាលរបស់ប្រធានាធិបតី លោក Rodrigo Paz ខណៈសមាជិកសភា មានចំណាត់ការដកចេញវិធានការរឹតត្បិតលើការដាក់ពង្រាយកងកម្លាំងប្រដាប់អាវុធដើម្បីបង្ក្រាបជម្លោះសង្គម។ ក្រុមអ្នកតវ៉ា កំពុងជំរុញឲ្យរដ្ឋាភិបាលនិយមកណ្តាលរបស់លោក Paz ដកចេញវិធានការរឹតត្បិតថវិកា និងដោះស្រាយការកើនឡើងការចំណាយលើជីវភាពរស់នៅ។ ការតវ៉ា បានបណ្តាលឱ្យមានការរំខានដល់ខ្សែច្រវ៉ាក់ផ្គត់ផ្គង់កាន់តែខ្លាំងឡើងនៅក្នុងទីក្រុងនានាដូចជា ទីក្រុង La Paz និងទីក្រុង El Alto ជាកន្លែងដែលកង្វះស្បៀង ប្រេងឥន្ធនៈ និងថ្នាំពេទ្យ កំពុងធ្វើឲ្យប៉ះពាល់ដល់ទីផ្សារ មន្ទីរពេទ្យ និងស្ថានីយប្រេងឥន្ធនៈ។ វិស័យជាច្រើន ដែលមានកំហឹងចំពោះការបិទផ្លូវ និងរងផលប៉ះពាល់ បានចេញធ្វើបាតុកម្មតាមដងផ្លូវដើម្បីទាមទារដំណោះស្រាយពីរដ្ឋាភិបាលរបស់លោក Paz។ ក្នុងការប៉ុនប៉ងដើម្បីបន្ធូរបន្ថយភាពតានតឹង ប្រធានាធិបតីបូលីវី លោក Rodrigo Paz បាននិយាយ ថា លោកនឹងកាត់បន្ថយប្រាក់ខែលោក និងប្រាក់ខែរដ្ឋមន្ត្រីរបស់លោក ពាក់កណ្តាល។ លោកនិយាយថា ការកាត់បន្ថយប្រាក់ខែបានបង្ហាញពី «ការប្តេជ្ញាចិត្តរបស់រដ្ឋាភិបាលចំពោះប្រទេស»។ កាលពីថ្ងៃអង្គារ សភាជាន់ទាបរបស់ប្រទេសបូលីវី បានបើកកិច្ចប្រជុំតាមអ៊ីនធឺណិត ដើម្បីជំរុញសេចក្តីស្នើច្បាប់ដែលត្រូវបានអនុម័តដោយព្រឹទ្ធសភារួចហើយ ដែលនឹងលុបចោលការរឹតបន្តឹងលើការប្រើប្រាស់កងកម្លាំងប្រដាប់អាវុធក្នុងជម្លោះសង្គម។

អ្នកវិភាគ៖ ក្រុមហេសបូឡា មិនចាញ់សង្គ្រាមទេ ខណៈអ៊ីស្រាអែលបង្កើនការវាយប្រហារលើលីបង់

អ៊ីស្រាអែល កំពុងបង្កើនយុទ្ធនាការយោធារបស់ខ្លួននៅភាគខាងត្បូងប្រទេសលីបង់ ទោះបីជាមាន «បទឈប់បាញ់» ដែលបានសម្របសម្រួលដោយសហរដ្ឋអាមេរិកក៏ដោយ។ បន្ថែមលើការពង្រីកបទបញ្ជាជម្លៀសដោយបង្ខំនៅទូទាំងទីក្រុងនិងភូមិជាច្រើន ការទម្លាក់គ្រាប់បែករបស់អ៊ីស្រាអែលកាលពីពេលថ្មីៗនេះ បានវាយប្រហារលើទីតាំងដូចជាតំបន់ Nabatieh នៅភាគខាងត្បូង និងតំបន់ Mashghara នៅជ្រលងភ្នំ Bekaa ភាគខាងកើតប្រទេស។ លោក Ali Rizk អ្នកវិភាគកិច្ចការសន្តិសុខនិងជាអ្នកឧបត្ថម្ភទស្សនាវដី្ត Responsible Statecraft បានប្រាប់សារព័ត៌មាន Al Jazeera ថា ក្រុមហេសបូឡា មិនចាញ់សង្គ្រាមទេ។ លោកអះអាងថា ការពង្រីកធំរបស់អ៊ីស្រាអែល គ្រាន់តែបង្ហាញពីការបង្អាក់ចំពោះការអនុវត្តនៅសមរភូមិរបស់ក្រុមហេសបូឡាប៉ុណ្ណោះ ប៉ុន្តែសម្ពាធក្នុងស្រុកកាន់តែខ្លាំងឡើងលើនាយករដ្ឋមន្ត្រីអ៊ីស្រាអែល លោក Benjamin Netanyahu។

បណ្ដាញសង្គម

ព័ត៌មានថ្មីៗ

វេជ្ជបណ្ឌិត៖ សុខភាពលោក Trump គឺល្អប្រសើរណាស់ ប៉ុន្តែគួរតែសម្រកទម្ងន់

អ្នកនៅរស់ពីការជាប់ក្នុងរូងភ្នំ នៅឡាវ បានបរិភោគថាសឈើសម្រាប់រែងមាស ដើម្បីបន្តជីវិត

មនុស្ស ១៨នាក់ស្លាប់ និង ៣០នាក់រងរបួស ដោយសាររថយន្តដឹកជនភៀសខ្លួន ក្រឡាប់នៅភាគខាងកើតអាហ្វហ្គានីស្ថាន

សេតវិមាន៖ លោក Trump «នឹងធ្វើតែកិច្ចព្រមព្រៀងដែលល្អសម្រាប់អាមេរិកប៉ុណ្ណោះ» ជាមួយអ៊ីរ៉ង់

នាយករដ្ឋមន្ត្រី៖ កាណាដា និងចិន កំពុងសាង «ភាពជាដៃគូប្រកបដោយស្ថិរភាព និងការស្ថាបនាបន្ថែមទៀត»

រដ្ឋមន្រ្ដីក្រសួងការងារ ចុះពិនិត្យមើលខ្សែច្រវាក់ផលិតកម្មក្រុមហ៊ុន THACO AGRI ក្នុងខេត្តក្រចេះ ដែលផ្តល់ឱកាសការងារប្រមាណ២ម៉ឺននាក់ និងផ្ទេរជំនាញបច្ចេកទេសកសិកម្មទំនើប

របាយការណ៍៖ សភាអាមេរិកកំពុងធ្វើសមាហរណកម្មកងកម្លាំងយោធាអាមេរិក និងអ៊ីស្រាអែលដោយស្ងាត់ៗ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877