BTV NEWS

ប្រមុខយោធាលីប៊ី និងមនុស្ស ៧នាក់ទៀត ស្លាប់ក្នុងហេតុការណ៍ធ្លាក់យន្តហោះ ក្រោយហោះឡើងចេញពីទួរគី

នាយករដ្ឋមន្ត្រីកូសូវ៉ូ៖ កូសូវ៉ូ និងស៊ែរប៊ី ត្រូវតែធ្វើប្រក្រតីភាពទំនាក់ទំនង

ប្រភព៖ ទួរគី និងក្រុមហាម៉ាស ពិភាក្សាអំពីកិច្ចព្រមព្រៀងបទឈប់បាញ់ដំណាក់កាលទី២ នៅហ្កាហ្សា

វិមានក្រឹមឡាំង៖ រុស្ស៊ីនឹងរៀបចំគោលជំហរ ជុំវិញសំណើរបស់អាមេរិក សម្រាប់កិច្ចព្រមព្រៀងសន្តិភាពអ៊ុយក្រែន

ព័ត៌មានអន្តរជាតិ

មនុស្សជាច្រើននាក់ រងរបួស ក្នុងហេតុការណ៍វាយប្រហារ នៅស្ថានីយរថភ្លើងក្រោមដីរបស់ទីក្រុងតៃប៉ិ

មន្ត្រីអាជ្ញាធរកម្រិតខ្ពស់របស់កោះតៃវ៉ាន់ លោក Cho Jung-tai បាននិយាយថា មនុស្សជាច្រើននាក់ បានរងរបួស បន្ទាប់ពីមនុស្សម្នាក់ បានបោះគ្រាប់បែកផ្សែងចូលស្ថានីយរថភ្លើងក្រោមដី ក្នុងទីក្រុង Taipei ហើយបន្ទាប់មកបានវាយប្រហារទៅលើអ្នកឈរមើលនៅក្បែរនោះ។តែយ៉ាងណាក្ដី តាមរយៈការអត្ថាធិប្បាយលើទំព័របណ្ដាញសង្គម Facebook របស់លោក នាថ្ងៃសុក្រ (ទី១៩ ខែធ្នូ) នេះ លោក Cho មិនបានផ្តល់ព័ត៌មានលម្អិតបន្ថែមនោះឡើយ ពាក់ព័ន្ធនឹងហេតុការណ៍នេះ។ចំណែកទីភ្នាក់ងារសារព័ត៌មាន Central News Agency បានរាយការណ៍ថា ជនបង្កហេតុ ត្រូវបានគេសង្ស័យថា បានសម្លាប់ខ្លួនឯង បន្ទាប់ពីមានការវាយប្រហារមនោះ។ ភ្លាមៗនេះ គេមិនទាន់ដឹងច្បាស់នៅឡើយទេថា តើអ្វីជាហេតុផលដែលនាំឲ្យមានការប្រព្រឹត្តិរឿងនេះ៕

កសិករស្រីលង្កាប្រឈមនឹងការងារដ៏លំបាកក្នុងការដាំដុះឡើងវិញ ក្រោយព្យុះស៊ីក្លូន Ditwah

ភក់ និងដីខ្សាច់ បានកប់ពន្លិចវាលស្រីទំហំជិតកន្លះហិចតារបស់លោក Nimesh Bandukumara ដែលជាកសិករវ័យ ២៧ឆ្នាំម្នាក់ ក្រោយពេលព្យុះស៊ីក្លូន Ditwah បោកបក់ឆ្លងកាត់ប្រទេសស្រីលង្កា ។លោក Bandukumara ដែលរស់រានទៅបានដោយសារការធ្វើស្រែនោះ និយាយថា ព្យុះស៊ីក្លូន បានបំផ្លិចបំផ្លាញអ្វីៗគ្រប់បែបយ៉ាងទាំងអស់ គ្មានអ្វីអាចស្រោចស្រង់បាននោះទេ ។ វាបានវាយប្រហារ រយៈពេល ១ខែប៉ុណ្ណោះ ក្រោយពេលពួកយើងសាបព្រួសគ្រាប់ពូជ ពួកយើងទិញគ្រាប់ពូជដោយខ្ចីប្រាក់ធនាគារ ហើយនិងបញ្ចំគ្រឿងអល្លង្ការ ប៉ុន្តែពេលនេះ លោកប្រឈមនឹងវិបត្តិបំណុលធ្ងន់ធ្ងរខ្លាំងណាស់ ក្នុងការស្តាជីវភាពគ្រួសារឡើងវិញ ។ការងារដំាដុះឡើង ពិតជាពិបាកខ្លាំងណាស់ ក្រោយព្យុះ Ditwah បានបំផ្លិចបំផ្លាញដំណាំជាង ៥៣៥.០០០ហិចតា ខណៈទិន្នន័យរដ្ឋាភិបាល បង្ហាញថា ដំណាំជាង ១២.០០០ហិចតា ត្រូវបានទឹកហូរនាំយកទៅទាំងស្រុង ឬកប់លិចនៅក្រោមភក់ និងដីខ្សាច់ ។ព្យុះ Ditwah បានវាយប្រហារតំបន់ដាំស្រូវ បន្លែ និងពោតដ៏សំខាន់របស់មនុស្សជិត ១,៨លានគ្រួសារ ពេលដែលវាបោកបក់ឆ្លងកាត់ប្រទេសកោះមានពលរដ្ឋរស់នៅ ២២លាននាក់មួយនេះ កាលពីខែវិច្ឆិកា ដោយបានសម្លាប់មនុស្ស ៦៤៣នាក់ និងធ្វើឲ្យមនុស្សជាង ៧ម៉ឺននាក់ ជម្លៀសខ្លួនទៅកាន់ជម្រកបណ្តោះអាសន្ន ។ប្រជាកសិករភាគច្រើន ពុំទាន់ទទួលបាននៅឡើយទេសំណងតាមការសន្យារបស់រដ្ឋាភិបាលចំនួន ៤៨៥ដុល្លារ សម្រាប់វាលស្រែដែលរងការខូចខាតទាំងស្រុង ហើយពួកគេមានការព្រួយបារម្ភថា ប្រាក់នឹងខោចទៅភ្លាមៗ ៕

លោកតាសាន់តាក្លូសមុជទឹកក្នុងជលវប្យដ្ឋានរបស់ទីក្រុង Rio ដើម្បីចែករំលែកក្តីសប្បាយរីករាយបុណ្យណូអែល

កាលពីថ្ងៃព្រហស្បតិ៍ម្សិលមិញ លោកតាសាន់តាក្លូស បានមុជទឹកនៅក្នុងជលវប្យដ្ឋានធំបំផុតរបស់អាមេរិកខាងត្បូង ស្ថិតក្នុងទីក្រុង Rio របស់ប្រទេសប្រេស៊ីល ដើម្បីចែករំលែកក្តីសប្បាយរីករាយបុណ្យណូអែល ។នៅជលវប្យដ្ឋាន AquaRio ស្ថិតក្នុងទីក្រុង Rio de Janeiro លោកតាសាន់តាក្លូស ២នាក់ បានមុជចូលទៅក្នុងអាងទឹកដ៏ធំមួយ ស្លៀកពាក់ឈុតតាសាន់តាក្លូសពណ៌ក្រហម ។អ្នកមុជទឹកទាំង ២នាក់នេះ បាននាំយកទៅជាមួយនូវដើមណូអែល បង្កើតបានជាទស្សនីយភាពដ៏អស្ចារ្យ បង្ហាញពីកាយវិការអភិរក្សមហាសមុទ្រ អំឡុងពេលរដូវបុណ្យទាន ។ការបង្ហាញនេះ មានការទាក់ខ្លាំងនៅក្នុងចំណោមអ្នកស្រុក និងភ្ញៀវទេសចរ ពេលដែលពួកគេឃើញលោកតាសាន់តាក្លូស ត្រូវបានហែលក្រឡឹងជុំវិញដោយត្រីឆ្លាម និងត្រីត្រូពិកជាច្រើនប្រភេទទៀត ជំនួសដោយសត្វរមាំង ៕

ជើងហោះហើរត្រូវបានលុបចោល ហើយផ្លូវថ្នល់ត្រូវបានជន់លិច ខណៈព្យុះបោកបក់លើអារ៉ាប់រួម

អាជ្ញាធរអាកាសយានដ្ឋានរបស់ប្រទេសអេមីរ៉ាតអារ៉ាប់រួម (អារ៉ាប់រួម) បានលុបចោល ឬពន្យារពេលជើងហោះហើររាប់សិបជើង ហើយផ្លូវថ្នល់ជាច្រើនខ្សែក្នុងទីក្រុងធំៗ ត្រូវបានជន់លិច ខណៈដែលព្យុះភ្លៀងខ្លាំងបំផុតជាលើកដំបូង ក្នុងរយៈពេលជាច្រើនខែ បានបោកបក់លើប្រទេសវាលខ្សាច់មួយនេះ នៅថ្ងៃសុក្រ (ទី១៩ ខែធ្នូ) នេះ។ក្រុមហ៊ុនអាកាសចរណ៍ Emirates របស់ទីក្រុងឌូបៃ បានលុបជើងហោះហើរចំនួន ១៣ជើង ហើយមានការពន្យារពេល និងការលុបចោលផងដែរ នៅអាកាសយានដ្ឋាន Sharjah ដែលនៅជិតខាង បន្ទាប់ពីមានភ្លៀងធ្លាក់ពេញមួយយប់ ដែលបានធ្វើឲ្យអ្នកស្រុកសម្រាកមិនបានជាមួយនឹងសំឡេងដ៏ខ្លាំងរបស់ផ្គររន្ទះ។ផ្លូវសំខាន់ៗរបស់ទីក្រុង Sharjah ត្រូវបានជន់លិចទាំងស្រុង នាព្រឹកព្រលឹមថ្ងៃទី១៩ ខែធ្នូ ដោយឃើញមានអ្នកស្រុកឃើញដើរកាត់ទឹកដោយជើងទទេរ។ ទឹកជំនន់នេះបានធ្វើឲ្យនឹកឃើញឡើងវិញនូវទិដ្ឋភាពខែមេសា ឆ្នាំ២០២៤ នៅពេលដែលភ្លៀងធ្លាក់ខ្លាំង បានបង្កជាទឹកជំនន់គ្រប់ទីកន្លែង និងបានបង្ខំឲ្យមានការលុបចោលជើងហោះហើរជាង ២.០០០ជើង នៅមជ្ឈមណ្ឌលអាកាសអន្តរជាតិដ៏សំខាន់របស់ទីក្រុង Dubai។កាលពីថ្ងៃទី១៨ ខែធ្នូ នគរបាលទីក្រុង Dubai បានជំរុញអ្នកស្រុកស្នាក់នៅតែក្នុងផ្ទះ ប្រសិនបើមិនមានកិច្ចការ «ចាំបាច់» នៅពេលដែលព្យុះភ្លៀងបានបោកបក់ជិតដល់។ នាព្រឹកព្រលឹមថ្ងៃទី១៩ ខែធ្នូនេះ រថយន្តបូមទឹក ត្រូវបានគេឃើញ នៅជុំវិញទីក្រុង Dubai ដែលកំពុងសម្អាតផ្លូវថ្នល់ និងភក់ធំៗ នៅតាមដងផ្លូវនានា។គេហទំព័រអាកាសយានដ្ឋានទីក្រុង Dubai បានបង្ហាញថា ជើងហោះហើររាប់សិបជើង ត្រូវបានពន្យារពេលនៅថ្ងៃទី១៩ ខែធ្នូនេះ ហើយខ្លះត្រូវបានលុបចោលតែម្ដង៕

ក្រុមឧទ្ទាម M23 ដកទ័ពចេញពីទីក្រុង Uvira របស់កុងហ្គោ ខណៈពលរដ្ឋអំពាវនាវឲ្យមានការការពារពីរដ្ឋាភិបាល

ក្រុមឧទ្ទាម M23គាំទ្រដោយរ៉្វាន់ដា បានចាប់ផ្តើមដកទ័ពចេញពីទីក្រុងភាគខាងកើត Uvira របស់កុងហ្គោ នៅក្នុងកិច្ចខិតខំមួយ ដើម្បីគាំទ្រដំណើរការសន្តិភាពគាំទ្រដោយសហរដ្ឋអាមេរិក ។កាលពីថ្ងៃព្រហស្បតិ៍ ទាហានរបស់ក្រុមឧទ្ទាម M23មួយចំនួន ត្រូវបានគេមើលឃើញចាកចេញ តាមរថយន្តធំ ខណៈអគាររដ្ឋបាលដែលពួកគេកាន់កាប់ ត្រូវបានបោះបង់ដោយគ្មានអ្នកគ្រប់គ្រង ហើយពលរដ្ឋ មានការព្រួយបារម្ភថាតើអ្នកណាជាអ្នកផ្តល់សន្តិសុខដល់ពួកគេ ។ប្រជាពលរដ្ឋនាំគ្នាបង្ហាញក្តីបារម្ភចំពោះកង្វះខាតវត្តមានរបស់កងកម្លាំងរដ្ឋាភិបាល ហើយនិងអំពាវនាវឲ្យក្រុមអាជ្ញាធរ បង្កើតការគ្រប់គ្រងរបស់ពួកគេ ។លោក Moustapha Ramazani គឺជាអ្នកស្រុកម្នាក់រស់នៅក្នុងទីក្រុង Uvira និយាយថា សំណើសំខាន់របស់ពួកយើង គឺពលរដ្ឋមិនអាចគ្រប់គ្រងទីនេះបានទេ ។ មាននូវអចលនទ្រព្យរបស់រដ្ឋជាច្រើន ដែលត្រូវការការពារដោយរដ្ឋ ហើយពួកយើងជាជនស៊ីវិល មានសិទ្ធិទទួលបានការការពារពីរដ្ឋផងដែរ ។បើទោះបីជាមានការចាកចេញរបស់ក្រុមឧទ្ទាម M23ក៏ដោយ ប្រជាពលរដ្ឋមួយចំនួន បង្ហាញការខកចិត្តជាខ្លាំងចំពោះការបំពានចោទប្រកាន់ ប្រព្រឹត្តឡើងដោយយុទ្ធជនជីវពល Wazalendo ដែលជាក្រុមប្រដាប់អាវុធគាំទ្ររដ្ឋាភិបាលកុងហ្គោ ។លោក Jacques Muhumuza ដែលជាពលរដ្ឋម្នាក់ទៀត និយាយថា ក្រុមជីវពល Wazalendo បានប្រព្រឹត្តការរំលោភបំពាន និងការយាយីច្រើនណាស់ដែលមិនអាចពន្យល់បាន ។ ថ្ងៃនេះ ពួកយើងសុំឲ្យក្រុមឧទ្ទាម M23 ដកទ័ព នេះគឺជារឿងគួរភ្ញាក់ផ្អើលខ្លាំង ៕

នគរបាលអេស្ប៉ាញរុករកនៅមន្ទីរពិសោធន៍ក្នុងការស៊ើបអង្កេតជំងឺប៉េស្តជ្រូកអាហ្វ្រិក

នគរបាលអេស្ប៉ាញ បានរុករកនៅមន្ទីរពិសោធន៍ផ្តល់មូលនិធិដោយរដ្ឋនៅជិតទីក្រុង Barcelona ដែលជាផ្នែកមួយនៃការស៊ើបអង្កេតចំពោះប្រភពដើមនៃការរីករាលដាលឆ្លងជំងឺប៉េស្តជ្រូកអាហ្វ្រិកនៅតំបន់នេះ ។ ចំណាត់ការបញ្ជាដោយតុលាការនេះ បានធ្វើឡើង បន្ទាប់ពីក្តីកង្វល់កើនឡើងក្នុងខែនេះថា ការរីករាលដាលឆ្លងជំងឺប៉េស្តជ្រូក បានរកឃើញលើសត្វជ្រូកព្រៃដែលអាចបណ្តាលមកពីការលេចធ្លាយពីមន្ទីរពិសោធន៍ ។ ជំងឺប៉េស្តជ្រូកអាហ្វ្រិក គ្មានផលប៉ះពាល់ចំពោះមនុស្សនោះទេ ប៉ុន្តែវាអាចបណ្តាលឲ្យជ្រូក និងជ្រូកព្រៃងាប់ ហើយនិងរីករាលដាលយ៉ាងឆាប់រហ័ស ។ អេស្ប៉ាញ គឺជាប្រទេសផលិតសាច់ជ្រូកធំបំផុតរបស់សហភាពអឺរ៉ុប ស្មើនឹងប្រហែល ១ភាគ ៤នៃទិន្នផលសរុបនៅក្នុងប្លុកមួយនេះ ហើយការរីករាលដាលជំងឺប៉េស្តជ្រូកអាហ្វ្រិក បានគំរាមកំហែងដល់ការនាំចេញ បង្ខំឲ្យក្រុមអាជ្ញាធរ ធ្វើការរឹតត្បិតការធ្វើដំណើរ និងបង្កើនកិច្ចខិតខំដើម្បីធានាដល់ប្រទេសដៃគូនសេដ្ឋកិច្ច ។ នគរបាលនិយាយថា ការរុករកនៅមន្ទីរស្រាវជ្រាវសុខភាពសត្វ(Cresa) ត្រូវបានបញ្ជាដោយចៅក្រមស៊ើបអង្កេតក្នុងស្រុក និងជាផ្នែកមួយនៃដំណើរការបឋមដែលត្រូវបានប្រកាសដោយសម្ងាត់ ។ មន្ទីរ Cresa ពុំបានឆ្លើយតបភ្លាមៗនោះទេចំពោះសំណើសុំសេចក្តីអត្ថាធិប្បាយ ប៉ុន្តែពួកគេនិយាយប្រាប់គេហទំព័រ Maldita.es ថា ពួកគេពុំបានរកឃើញភ័ស្តុតាងដែលជាប្រភពនៃការរីករាលដាលឆ្លងនោះទេ ៕

លោកប្រធានាធិបតី Lukashenko៖ មីស៊ីល Oreshnik របស់រុស្ស៊ី ត្រូវបានដាក់ពង្រាយនៅបេឡារុស

ប្រធានាធិបតីបេឡារុស លោក Alexander Lukashenko កាលពីថ្ងៃព្រហស្បតិ៍ (ទី១៨ ខែធ្នូ) បាននិយាយថា ប្រទេសរបស់លោក បានដាក់ពង្រាយប្រព័ន្ធមីស៊ីល Oreshnik របស់រុស្សី ហើយ «ឥឡូវនេះកំពុងស្ថិតក្នុងស្ថានភាពប្រុងជើងការប្រយុទ្ធ»។អំឡុងពេលថ្លែងសុន្ទរកថាទៅកាន់ប្រទេសជាតិ នៅឯសន្និបាតប្រជាជនបេឡារុសគ្រប់លំដាប់ថ្នាក់លើកទី៧ នៅទីក្រុង Minsk ដែលត្រូវបានផ្សាយបន្តផ្ទាល់ដោយទីភ្នាក់ងារសារព័ត៌មានរដ្ឋ Belta លោក Lukashenko បានប្រកាសថា៖ «ទីតាំងយោធាឈរទី១ ត្រូវបានបំពាក់ដោយប្រព័ន្ធមីស៊ីល Oreshnik។ វាត្រូវបានដាក់ពង្រាយ កាលពីម្សិលមិញ (ថ្ងៃពុធ) ហើយឥឡូវនេះកំពុងស្ថិតក្នុងស្ថានភាពប្រុងជើងការប្រយុទ្ធ»។ការកត់សម្គាល់នេះកើតឡើងក្នុងរយៈពេលជាង ១ខែបន្ទាប់ពី Lukashenko បាននិយាយថា ប្រព័ន្ធមីស៊ីលផលិតដោយរុស្ស៊ី នឹងត្រូវបានដាក់ឲ្យប្រុងជើងការប្រយុទ្ធ កាលពីខែធ្នូ ដោយបង្ហាញថា ការដាក់ពង្រាយរបស់ខ្លួន គឺចង់បង្ហាញសញ្ញាថា ទីក្រុង Minsk «អាចវាយប្រហារបាន ប្រសិនបើស្ថានការណ៍កាន់តែតានតឹង»។នៅមុននេះ ក្នុងពិធីប្រារព្ធទិវាឯករាជ្យរបស់ប្រទេសបេឡារុស ក្នុងខែកក្កដា លោកបានលើកឡើងថា រូបលោក និងប្រធានាធិបតីរុស្ស៊ី លោក Vladimir Putin បានយល់ព្រមថា ប្រព័ន្ធនេះនឹងត្រូវដាក់ឲ្យប្រើប្រាស់នៅចុងឆ្នាំនេះ។Oreshnik ត្រូវបានប្រើប្រាស់ជាលើកដំបូង នៅក្នុងខែវិច្ឆិកា ឆ្នាំ២០២៤ នៅពេលដែលទីក្រុងមូស្គូបានប្រាប់ថា មីស៊ីលនេះបានវាយប្រហាររោងចក្រមួយ នៅក្នុងទីក្រុង Dnipro របស់អ៊ុយក្រែន ជាការឆ្លើយតបទៅនឹងការប្រើប្រាស់អាវុធចម្ងាយឆ្ងាយដែលផ្តល់ដោយលោកខាងលិចរបស់ទីក្រុងគីវ វាយចូលដែនដីរុស្ស៊ី៕

EU ពន្យាពេលកិច្ចព្រមព្រៀងពាណិជ្ជកម្មជាមួយប្លុក Mercosur របស់អាមេរិកខាងត្បូង ខណៈបាតុកម្មរបស់កសិករ

សហភាពអឺរ៉ុប(EU) បានពន្យាពេលកិច្ចព្រមព្រៀងពាណិជ្ជកម្មសេរីសំខាន់ជាមួយបណ្តាប្រទេសអាមេរិកខាងត្បូង ស្របពេលបាតុកម្មរបស់ប្រជាកសិករ EU ហើយការជំទាស់នាទីចុងក្រោយដោយបារាំង និងអ៊ីតាលី គំរាមកំហែងធ្វើឲ្យអន្តរាយដល់កិច្ចព្រមព្រៀងមួយនេះ ។លោក Paula Pinho គឺជាអ្នកនាំពាក្យគណៈកម្មការអឺរ៉ុប បានបញ្ជាក់កាលពីព្រហស្បតិ៍ថា ការចុះហត្ថលេខាកិច្ចព្រមព្រៀងពាណិជ្ជកម្មរវាង EU និងប្លុក Mercosur របស់អាមេរិកខាងត្បូង នឹងពន្យាពេលរហូតដល់ខែមករា ។ប្រធានគណៈកម្មការអឺរ៉ុបលោកស្រី Ursula von der Leyen ត្រូវបានគេរំពឹងថា នឹងធ្វើដំណើរទៅកាន់ប្រទេសប្រេស៊ីលនៅថ្ងៃសៅរ៍ស្អែក ដើម្បីចុះហត្ថលេខាលើកិច្ចព្រមព្រៀង ប៉ុន្តែលោកស្រីត្រូវការការគំាទ្រសំឡេងភាគច្រើនពីរដ្ឋសមាជិក EU ទើបអាចចុះហត្ថលេខាបាន ។សារព័ត៌មាន AP រាយការណ៍ថា កិច្ចព្រមព្រៀងពន្យាពេល ត្រូវបានឈានដល់រវាងលោកស្រី von der Leyen និងប្រធានក្រុមប្រឹក្សាអឺរ៉ុបលោក Antonio Costa និងនាយករដ្ឋមន្រ្តីអ៊ីតាលីលោកស្រី Giorgia Meloni ដែលបាននិយាយនៅកិច្ចប្រជុំ EUកាលពីថ្ងៃព្រហស្បតិ៍ លើលក្ខខណ្ឌដែលអ៊ីតាលនឹងបោះឆ្នោតគាំទ្រកិច្ចព្រមព្រៀងនៅខែមករា ។ប្រធានាធិបតីបារាំងលោក Emmanuel Macron បានច្រានចោលកិច្ចព្រមព្រៀងនេះផងដែរ ពេលដែលលោកធ្វើដំណើរមកដល់កិច្ចប្រជុំកំពូលកាលពីថ្ងៃព្រហស្បតិ៍ នៅទីក្រុងព្រុចសែល ដោយរូបលោកអំពាវនាវឲ្យមានកិច្ចប្រជុំ និងកិច្ចពិភាក្សាបន្ថែមទៀត នៅខែមករា ៕

បារាំងប្រឈមនឹងការទាស់ទែងកញ្ចប់ថវិកា ខណៈសមាជិកសភាប្រឹងប្រែងបញ្ចៀសភាពជាប់គាំង

កញ្ចប់ថវិកាឆ្នាំ២០២៦ របស់ប្រទេសបារាំង ប្រឈមនឹងពេលវេលាដ៏សំខាន់ នៅថ្ងៃសុក្រ (ទី១៩ ខែធ្នូ) នេះ ខណៈដែលសមាជិកសភាប្រឹងប្រែងយ៉ាងសស្រាក់សស្រាំ ដើម្បីបញ្ចៀសភាពជាប់គាំងសារពើពន្ធ នៅក្នុងកិច្ចពិភាក្សាដំណាក់កាលចុងក្រោយ ក្នុងគោលបំណងឲ្យឈានដល់ការព្រមព្រៀងលើសេចក្ដីស្នើច្បាប់ទទួលយកបានពីគ្រប់ភាគី។គណៈកម្មាធិការរួមមកពីរដ្ឋសភា និងព្រឹទ្ធសភា នឹងជួបប្រជុំ ដើម្បីចេញអត្ថបទថវិកាចុងក្រោយ ដែលបន្ទាប់មកនឹងត្រូវដាក់ឲ្យបោះឆ្នោត នៅសភាទាំង២ នាថ្ងៃអង្គារសប្ដាហ៍ក្រោយ។ លទ្ធផលមិនជោគជ័យ នឹងជំរុញឲ្យលោកនាយករដ្ឋមន្ត្រី Sebastien Lecornu ស្វែងរកច្បាប់គ្រាអាសន្ន ដើម្បីអាចឲ្យមានការចំណាយ ការប្រមូលពន្ធ និងការខ្ចីប្រាក់ ក្នុងឆ្នាំថ្មី រហូតដល់កញ្ចប់ថវិកាសមស្រប អាចត្រូវបានអនុម័ត។តែទេសាភិបាលធនាគារកណ្តាលរបស់បារាំង លោក Francois Villeroy de Galhau បាននិយាយនៅថ្ងៃសុក្រនេះថា ច្បាប់បែបនេះនឹងផ្តល់ដំណោះស្រាយរយៈពេលខ្លីតែប៉ុណ្ណោះ។ លោក Villeroy បានប្រាប់វិទ្យុ France Inter ថា៖ «ច្បាប់គ្រាអាសន្នមិនបានផ្ដល់នូវជម្រើសណាមួយឡើយ។ ប៉ុន្តែយើងត្រូវការចំណាយជាច្រើនបន្ថែមទៀត ជាឧទាហរណ៍ លើវិស័យការពារជាតិជាដើម»។ជាមួយគ្នានេះ លោកបានបញ្ជាក់បន្ថែមថា ច្បាប់ពិសេសមួយ ក៏នឹងនាំឲ្យមានឱនភាព លើសពីអ្វីដែលត្រូវការ ព្រោះវាមិនរាប់បញ្ចូលវិធានការកាត់បន្ថយការចំណាយណាមួយ ហើយក៏មិនរួមបញ្ចូលវិធានការពន្ធណាមួយនោះដែរ»។ព្រឹទ្ធសភាបានអនុម័តច្បាប់ថវិកាឆ្នាំ២០២៦ កាលពីថ្ងៃចន្ទ ដោយមានឱនភាពសារពើពន្ធ ៥,៣ភាគរយ បន្ទាប់ពីក្រុមអភិរក្សបានរារាំងការដំឡើងពន្ធ ដើម្បីទូទាត់ការខ្វះខាតថវិកាច្រើនជាងការគ្រោងទុក នៅក្នុងថវិកាសន្តិសុខសង្គមដែលសភាជាន់ទាបបានផ្ដល់ការអនុម័ត៕

អ៊ីស្រាអែលចោទប្រកាន់ជនជាតិរុស្ស៊ីពីបទចារកម្មឲ្យអ៊ីរ៉ង់

នគរបាលអ៊ីស្រាអែល និងទីភ្នាក់ងារសន្តិសុខផ្ទៃក្នុងរបស់ខ្លួន បាននិយាយនៅថ្ងៃសុក្រនេះថា អ៊ីស្រាអែលបានចោទប្រកាន់ពលរដ្ឋរុស្ស៊ីម្នាក់ពីបទចារកម្មឲ្យអ៊ីរ៉ង់ រួមទាំងការថតរូបកំពង់ផែ និងហេដ្ឋារចនាសម្ព័ន្ធ អ៊ីស្រាអែល ក្រោមការដឹកនាំរបស់ទីភ្នាក់ងារចារកម្មអ៊ីរ៉ង់។ នគរបាលនិងទីភ្នាក់ងារនេះ បាននិយាយនៅក្នុងសេចក្តីថ្លែងការណ៍រួមមួយថា បន្ទាប់មក បុគ្គលរុស្ស៊ីរូបនេះ ត្រូវបានបង់ប្រាក់ជារូបិយប័ណ្ណឌីជីថល។ សង្គ្រាមស្រមោលរយៈពេលជាច្រើនទសវត្សរ៍រវាងអ៊ីស្រាអែល និងអ៊ីរ៉ង់ បានកើនឡើងដល់សង្គ្រាមដោយផ្ទាល់ នៅក្នុងខែមិថុនា នៅពេលដែលអ៊ីស្រាអែលបានវាយប្រហារគោលដៅផ្សេងៗ នៅក្នុងប្រទេសអ៊ីរ៉ង់ រួមទាំងតាមរយៈប្រតិបត្តិការដែលពឹងផ្អែកលើកងកម្លាំងកុម្ម៉ង់ដូ Mossad ដែលកំពុងត្រូវបានដាក់ពង្រាយយ៉ាងជ្រៅ នៅក្នុងប្រទេសនេះ។អ៊ីស្រាអែលបានចាប់ខ្លួនពលរដ្ឋរាប់សិបនាក់ដែលត្រូវបានចោទប្រកាន់ថា បានចារកម្មឲ្យអ៊ីរ៉ង់ ដែលប្រភពបានប្រាប់សារព័ត៌មានរ៉យទ័រថា គឺជាកិច្ចខិតខំប្រឹងប្រែងដ៏ធំបំផុតរបស់ទីក្រុងតេអេរ៉ង់ ក្នុងរយៈពេលជាច្រើនទសវត្សរ៍ ដើម្បីលួចជ្រៀតចូលទឹកដីរបស់គូប្រជែងដ៏សំខាន់របស់ខ្លួន។ការចាប់ខ្លួននេះ បានកើតឡើង បន្ទាប់ពីកិច្ចខិតខំប្រឹងប្រែងម្តងហើយម្តងទៀតដោយភ្នាក់ងារចារកម្មអ៊ីរ៉ង់ក្នុងរយៈពេលប៉ុន្មានឆ្នាំមកនេះ ដើម្បីជ្រើសរើសជនជាតិអ៊ីស្រាអែលធម្មតា ដើម្បីប្រមូលព័ត៌មានស៊ើបការណ៍សម្ងាត់ និងអនុវត្តការវាយប្រហារជាថ្នូរនឹងប្រាក់៕

បណ្ដាញសង្គម

ព័ត៌មានថ្មីៗ

កម្ពុជា-ជប៉ុន ពង្រឹងកិច្ចសហការ ក្នុងវិស័យសកម្មភាពកម្ចាត់មីន ទាំងនៅកម្ពុជា និងក្នងសកលលោក

ក្រសួងកសិកម្ម ថ្កោលទោសដាច់អហង្ការ សង្គ្រាមឈ្លានពានរបស់ថៃមកលើអធិបតេយ្យភាពកម្ពុជា

រដ្ឋមន្រ្តីសុខាភិបាល «សុខាភិបាល គឺនៅជាមួយវីរកងទ័ព ជនភៀសសឹក និងប្រជាពលរដ្ឋទាំងអស់ គ្រប់ទីកន្លែង និងគ្រប់ស្ថានភាព ដោយមិនទុកនរណាម្នាក់ចោល មិនទទួលបានការថែទាំសុខភាពនោះឡើយ»

គណបក្ស នយោបាយ២ ចេញថ្កោលទោស ការវាយប្រហារមិនរើសគោលដៅរបស់ថៃ មកលើកម្ពុជា

ក្រសួងការងារ ថ្កោលទោសដាច់អហង្ការ សង្គ្រាមឈ្លានពានរបស់ថៃ មកលើអធិបតេយ្យភាពកម្ពុជា

អេស្ប៉ាញបង្ហាញ «សាមគ្គី» ជាមួយដាណឺម៉ាក និង Greenland ក្រោយអាមេរិកតែងតាំងបេសកជនពិសេស

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877