BTV NEWS

ក្រុមអ្នកជួយសង្គ្រោះ៖ មនុស្ស ៤នាក់ទៀតដែលជាប់ក្នុងរូងភ្នំ នៅឡាវ ត្រូវបាននាំចេញដោយសុវត្ថិភាព

លោក Hegseth៖ យុគសម័យឧបត្ថម្ភធនការពារជាតិពីអាមេរិក សម្រាប់ «ប្រទេសអ្នកមាន» ចប់ហើយ

មន្ត្រីជាន់ខ្ពស់អ៊ីរ៉ង់ និយាយថា លោក Trump «ក្បត់ការទូត» ដោយបន្តបិទខ្ទប់ដោយទ័ពជើងទឹកអាមេរិក

វេជ្ជបណ្ឌិត៖ សុខភាពលោក Trump គឺល្អប្រសើរណាស់ ប៉ុន្តែគួរតែសម្រកទម្ងន់

ព័ត៌មានអន្តរជាតិ

ពលរដ្ឋអ៊ុយក្រែននៅទីក្រុងគីវនិយាយថា ការព្រមានវាយប្រហារជាប្រព័ន្ធរបស់រុស្ស៊ី គ្មានអ្វីថ្មីនោះទេ

ពលរដ្ឋរស់នៅក្នុងទីក្រុងគីវ និយាយនៅថ្ងៃអង្គារនេះថា ការគំរាមវាយប្រហារជាប្រព័ន្ធរបស់រុស្ស៊ី គ្មានអ្វីថ្មីនោះទេ ក្រោយទីក្រុងមូស្គូ និយាយកាលពីរយៈពេល ១ថ្ងៃមុនថា ពួកគេមានគម្រោងវាយប្រហារគោលដៅទីក្រុងគីវដែលពាក់ព័ន្ធនឹងយោធាអ៊ុយក្រែន ក៏ដូចជាមជ្ឈមណ្ឌលសម្រេចចិត្ត ។ រុស្ស៊ីបានគំរាមវាយប្រហារជាប្រព័ន្ធជាថ្មីទៀតប្រឆាំងនឹងទីក្រុងគីវ ប៉ុន្មានថ្ងៃបន្ទាប់ពីបានបើកការវាយប្រហារដ៏ធំបំផុតមួយរបស់ពួកគេទៅលើរដ្ឋធានីរបស់អ៊ុយក្រែនចាប់តាំងពីការចាប់ផ្តើមនៃសង្គ្រាម ។ ក្រសួងការបរទេសរុស្ស៊ីនិយាយក្នុងសេចក្តីថ្លែងការណ៍ថា ការវាយប្រហារថ្មីនឹងកំណត់គោលដៅទៅលើមជ្ឈមណ្ឌលធ្វើការសម្រេចចិត្ត និងប៉ុស្តិ៍បញ្ជាការ រួមជាមួយនឹងរោងចក្រផលិតយានដ្រូន នៅក្នុងទីក្រុងនេះ ។ ពួកគេបានអំពាវនាវផងដែរឲ្យជនបរទេស និងមន្រ្តីការទូតចាកចេញពីទីក្រុងគីវឲ្យបានឆាប់តាមដែលអាចធ្វើទៅបាន និងបានព្រមានពលរដ្ឋអ៊ុយក្រែននៅឲ្យឆ្ងាយពីអគាររដ្ឋបាល និងយោធា។ទោះបីជាយ៉ាងណាក៏ដោយ អ្នកស្រី Kateryna Kozechenko វ័យ ៣៨ឆ្នាំ ដែលរស់នៅក្នុងទីក្រុងគីវ និយាយថា អ្នកស្រីគិតគូរខ្លាំងពីការគំរាមកំហែងរបស់រុស្ស៊ី ប៉ុន្តែអ្នកស្រីបន្តថា ការវាយប្រហារបានកើតឡើងឥតឈប់ឈររួចទៅហើយ ។ ដូច្នេះហើយ អ្នកស្រីត្រៀមខ្លួនរួចជាស្រេចសម្រាប់ការព្រមានមួយនេះ ៕

អ៊ីរ៉ង់ទាមទារឲ្យបញ្ចេញទ្រព្យបង្កក ១២ពាន់លានដុល្លារ ក្នុងកិច្ចព្រមព្រៀងដែលអាចមានជាមួយអាមេរិក

អ៊ីរ៉ង់ទាមទារឲ្យមានការបញ្ចេញទ្រព្យសម្បត្តិដែលត្រូវបានបង្កកចំនួន ១២ពាន់លានដុល្លារ នៅក្នុងកិច្ចព្រមព្រៀងដែលអាចកើតមានជាមួយសហរដ្ឋអាមេរិក ហើយទទូចថា ១២ពាន់លានដុល្លារផ្សេងទៀត «គួរតែត្រូវបានផ្ទេរក្នុងរយៈពេល ៦០ថ្ងៃ» បន្ទាប់ពីមានការចុះហត្ថលេខាលើកិច្ចព្រមព្រៀង។ នេះបើយោងតាមទីភ្នាក់ងារសារព័ត៌មានពាក់កណ្តាលផ្លូវការ Tasnim ដែលបានរាយការណ៍នៅថ្ងៃអង្គារ (ទី២៦ ខែឧសភា ឆ្នាំ២០២៦) នេះ។ដោយសំអាងដល់ប្រភពដែលស្និទ្ធនឹងបញ្ហានេះ សារព័ត៌មាន Tasnim បានឲ្យដឹងថា អ្នកចរចាជាន់ខ្ពស់ និងជាប្រធានសភាអ៊ីរ៉ង់ លោក Mohammed Bagher Qalibaf បានទៅទស្សនកិច្ចប្រទេសកាតា កាលពីថ្ងៃចន្ទ ដើម្បីពិភាក្សាអំពី «ការធានាសិទ្ធិទទួលបានប្រាក់ចំនួន ១២ពាន់លានដុល្លារ នៅក្នុងដំណាក់កាលដំបូង ក៏ដូចជាការលុបបំបាត់ឧបសគ្គនានា»។ប្រភពនេះបានបញ្ជាក់ថា៖ «ដោយផ្អែកលើបទពិសោធន៍កន្លងមក ពាក់ព័ន្ធនឹងការបញ្ចេញមូលនិធិអ៊ីរ៉ង់ ទាំងនៅកូរ៉េខាងត្បូង និងកាតា ការសង្កត់ធ្ងន់ត្រូវបានដាក់លើការត្រួតពិនិត្យដំណើរការអនុវត្តដោយប្រុងប្រយ័ត្ន ដើម្បីបញ្ចៀសកុំឲ្យបញ្ហាពីមុនកើតឡើងជាថ្មី»។ប្រភពបានកត់សម្គាល់ថា ដំណើរទស្សនកិច្ចរបស់លោក Qalibaf មានគោលបំណងធានាការទទួលបានមូលនិធិដោយរលូន។ លោកបានបន្ថែមថា ការចរចា នៅកាតា «ជាទូទៅមានភាពវិជ្ជមាន និងរួមចំណែកដល់វឌ្ឍនភាពក្នុងការចរចាកាន់តែទូលំទូលាយ»។គួរបញ្ជាក់ថា ភាពតានតឹងក្នុងតំបន់បានកើនឡើងចាប់តាំងពីសហរដ្ឋអាមេរិក និងអ៊ីស្រាអែល បានបើកការវាយប្រហារប្រឆាំងនឹងអ៊ីរ៉ង់ កាលពីខែកុម្ភៈ។ ទីក្រុងតេអេរ៉ង់បានសងសឹកវិញដោយការវាយប្រហារដែលផ្តោតលើអ៊ីស្រាអែល ក៏ដូចជាសម្ព័ន្ធមិត្តរបស់សហរដ្ឋអាមេរិក នៅតំបន់ឈូងសមុទ្រពែក្ស រួមជាមួយនឹងការបិទច្រកសមុទ្រហ័រមូសផងដែរ។ បទឈប់បាញ់មួយបានចូលជាធរមាននៅថ្ងៃទី៨ ខែមេសា តាមរយៈការសម្របសម្រួលរបស់ប៉ាគីស្ថាន ហើយក្រោយមកត្រូវបានបន្តដោយប្រធានាធិបតីអាមេរិក លោក Donald Trump ដោយគ្មានកំណត់៕

ជប៉ុនគ្រោងដាក់ចេញថវិកា ១៩ពាន់លានដុល្លារបន្ថែមទៀត ខណៈវិបត្តិថាមពលអ៊ីរ៉ង់ បង្កការគំរាមកំហែង

លោកស្រីនាយករដ្ឋមន្រ្តី Sanae Takaichi និយាយកាលពីថ្ងៃចន្ទថា រដ្ឋាភិបាលជប៉ុននឹងបញ្ចេញថវិកាបន្ថែមទៀតចំនួន ៣សែនកោដិយ៉េន(ស្មើនឹង ១៩ពាន់លានដុល្លារ) បង្កឲ្យមានក្តីបារម្ភពីការពង្រីកសារពើពន្ធ ដែលអាចធ្វើឲ្យហិរញ្ញវត្ថុរបស់ប្រទេសមួយនេះ កាន់តែតានតឹងបន្ថែមទៀត ។ ថវិកាបន្ថែមទៀត នឹងកើតមានឡើង ស្របពេលរដ្ឋាភិបាលសម្រេចចិត្តប្រើប្រាស់ពាក់កណ្តាលនៃទុនបម្រុងបន្ទាន់ ១សែនកោដិយ៉េនរបស់ខ្លួន ដើម្បីផ្តល់ហិរញ្ញប្បទានដល់ឧបត្ថម្ភធន មានគោលដៅទប់ស្កាត់វិក្កយបត្រប្រើប្រាស់សេវាសាធារណៈ បង្កើនតម្រូវការបំពេញទុនបម្រុង ស្របពេលកើតមានហានិភ័យនៃវិបត្តិតំបន់មជ្ឈិមបូព៌ារយៈពេលយូរ ។ ជប៉ុនបានពង្រីកឧបត្ថម្ភធនដាច់ដោយឡែកផងដែរ ដើម្បីរក្សាតម្លៃប្រេងសាំងឲ្យនៅថេរ គឺជាជំហានមួយ ដើម្បីប្រើប្រាស់ទុនបម្រុងបន្ទាន់ ស្របពេលដែលតម្លៃប្រេងនៅតែបន្តកើនឡើង ។ លោកស្រី Takaichi និយាយថា ជប៉ុនមានគោលដៅផងដែរ ដើម្បីបង្កើនចំណែកថាមពលនុយក្លេអ៊ែរ និងថាមពលកកើតថ្មី ដែលខ្លួនប្រើប្រាស់ ដើម្បីកាត់បន្ថយភាពពឹងផ្អែកលើឥន្ធនៈហ្វូស៊ីលរបស់ខ្លួន ដែលគ្រោងនឹងកំណត់គោលដៅ ៧០ភាគរយ ត្រឹមឆ្នាំ ២០៤០ ៕

អ្នករួចជីវិត និងមន្ត្រី៖ ការវាយប្រហារដោយយានដ្រូន សម្លាប់មនុស្សយ៉ាងតិច ១៤នាក់ នៅក្រុងព្រំដែនរបស់ស៊ូដង់

នៅថ្ងៃអង្គារ (ទី២៦ ខែឧសភា ឆ្នាំ២០២៦) នេះ អ្នករស់រានមានជីវិតម្នាក់ និងមន្ត្រីរដ្ឋាភិបាលមួយរូប បានប្រាប់សារព័ត៌មាន AFP ថា ការវាយប្រហារដោយយានដ្រូនដែលត្រូវបានចាត់ទុកថា ជាស្នាដៃរបស់កងកម្លាំងគាំទ្ររហ័ស (RSF) បានសម្លាប់មនុស្សយ៉ាងហោចណាស់ ១៤នាក់ ដែលភាគច្រើនជាស្ត្រី នៅក្នុងទីក្រុង al-Tina របស់ប្រទេសស៊ូដង់ ជាប់ព្រំដែនជាមួយឆាដ ។អ្នករួចជីវិតពីការវាយប្រហារនេះ បានប្រាប់ថា អ្នកស្រុកដែលប្រញាប់ប្រញាល់ទៅបញ្ចុះសពអ្នកស្លាប់ «បានប្រទះឃើញសាកសពចំនួនយ៉ាងតិច ១៤នាក់នៅកន្លែងផ្ទុះគ្រាប់បែក ដែលភាគច្រើនជាស្ត្រី»។ ដោយសុំមិនបញ្ចេញឈ្មោះ ដើម្បីសុវត្ថិភាពរបស់ពួកគេ ពួកគេបានប្រាប់ថា ការវាយប្រហារកាលពីថ្ងៃចន្ទ «បានកំណត់គោលដៅលើកន្លែងជុំគ្នារបស់ស្ត្រីដែលកំពុងលក់អាហារ និងតែ នៅក្នុងផ្សាររបស់ទីក្រុង al-Tina។ការវាយប្រហារសាហាវលើទីតាំងស៊ីវិល ក្នុងនោះរួមទាំងផ្សារផងដែរ គឺមិនមែនជារឿងប្លែកឡើយ នៅក្នុងសង្គ្រាម រវាងកងទ័ពស៊ូដង់ និងកងកម្លាំង RSF ដែលចាប់តាំងពីខែមេសា ឆ្នាំ២០២៣ មក បានផ្ដាច់ជីវិតមនុស្សរាប់ម៉ឺននាក់។ ចំនួនអ្នកស្លាប់ពិតប្រាកដ មិនអាចបញ្ជាក់បានឡើយ ប៉ុន្តែបុគ្គលិកជំនួយ ប៉ាន់ប្រមាណថា មានមនុស្សជាង ២០០.០០០នាក់ ត្រូវបានសម្លាប់។មន្ត្រីរដ្ឋាភិបាលម្នាក់ បានបញ្ជាក់ពីការមានការវាយប្រហារនេះដែរ ហើយបាននិយាយថា អាជ្ញាធរកំពុង «ធ្វើការ ដើម្បីសរុបចំនួនអ្នកស្លាប់ និងរបួស»។ ទីក្រុង Al-Tina ស្ថិតនៅតាមព្រំដែនជាមួយប្រទេសឆាដ នៅភាគខាងលិចបំផុតនៃតំបន់ Darfur ត្រូវបានវាយប្រហារជាប្រចាំពីកងកម្លាំង RSF នៅឆ្នាំនេះ៕

ក្រសួងការបរទេសអ៊ីរ៉ង់ ប្រកាសថា សហរដ្ឋអាមេរិកបានរំលោភបទឈប់បាញ់

នៅក្នុងសេចក្តីថ្លែងការណ៍មួយ នាថ្ងៃអង្គារ (ទី២៦ ខែឧសភា ឆ្នាំ២០២៦) នេះ ក្រសួងការបរទេសអ៊ីរ៉ង់បានប្រកាសថា សហរដ្ឋអាមេរិកបានរំលោភលើបទឈប់បាញ់ ដោយបានវាយប្រហារក្នុងខេត្ត Hormozgan នៅភាគខាងត្បូងរបស់ប្រទេសអ៊ីរ៉ង់។កាលពីថ្ងៃចន្ទ យោធាអាមេរិកបានធ្វើការវាយប្រហារ នៅភាគខាងត្បូងអ៊ីរ៉ង់ លើគោលដៅជាច្រើន ក្នុងនោះរួមមានទាំងទូកដែលព្យាយាមដាក់មីន និងទីតាំងបាញ់មីស៊ីល ដែលខ្លួនពិពណ៌នាថា ជាវិធានការការពារ។ប្រព័ន្ធផ្សព្វផ្សាយអ៊ីរ៉ង់ បានរាយការណ៍នៅព្រឹកថ្ងៃអង្គារនេះថា សំឡេងផ្ទុះត្រូវបានគេឮ នៅក្នុងទីក្រុង Bandar Abbas ក្នុងខេត្តនេះ។ហើយតាមរយៈសេចក្តីថ្លែងការណ៍នេះ ក្រសួងការបរទេសបានបញ្ជាក់ថា៖ «សហរដ្ឋអាមេរិកបានប្រព្រឹត្តការរំលោភបំពានយ៉ាងធ្ងន់ធ្ងរ លើបទឈប់បាញ់ នៅក្នុងតំបន់ Hormozgan ក្នុងរយៈពេល ៤៨ម៉ោងកន្លងមកនេះ។ ប្រទេសអ៊ីរ៉ង់ត្រូវឲ្យរបបអាមេរិកទទួលខុសត្រូវ ចំពោះផលវិបាកទាំងអស់ដែលបណ្តាលមកពីសកម្មភាពឈ្លានពាន និងមិនសមហេតុផលទាំងនេះ»។គួរបញ្ជាក់ថា ការវាយប្រហារទាំងនេះបានកើតឡើង ខណៈអ្នកនាំពាក្យក្រសួងការបរទេសអ៊ីរ៉ង់ លោក Esmail Baqai បាននិយាយថា មានវឌ្ឍនភាពមួយចំនួន ក្នុងដំណើរការចរចាជាមួយសហរដ្ឋអាមេរិក ប៉ុន្តែកិច្ចព្រមព្រៀងដើម្បីបញ្ចប់ជម្លោះ «មិនទាន់កើតឡើងនោះទេ»៕

អង់គ្លេសបំបែកកំណត់ត្រាថ្ងៃក្តៅបំផុតប្រចាំខែឧសភាពេលដែលសីតុណ្ហភាពកើនឡើងដល់ ៣៣,៥អង្សាសេ

ប្រជាពលរដ្ឋរស់នៅក្នុងទីក្រុង Warwickshire ស្ថិតនៅតំបន់ Midlands របស់អង់គ្លេស នាំគ្នាផឹកកាហ្វេទឹកកក និងទទួលទានការ៉េមកី ពេលដែលអង់គ្លេសជួបប្រទេសសីតុណ្ហភាពក្តៅខ្លាំងកាលពីថ្ងៃចន្ទ ។ ការិយាល័យឧតុនិយម និយាយថា អង់គ្លេសបំបែកកំណត់ត្រាថ្ងៃក្តៅបំផុតប្រចាំខែឧសភាពេលដែលសីតុណ្ហភាពកើនឡើងដល់ ៣៣,៥អង្សាសេ នៅអាកាសយានដ្ឋាន Heathrow ស្ថិតក្នុងទីក្រុងឡុងដ្រ៍ ។ សីតុណ្ហភាពលើសពី៣០អង្សាសេនៅទីក្រុងឡុងដ្រ៍ ពិតជាកម្រខ្លាំងណាស់ អំឡុងខែឧសភា ។ ការិយាល័យឧតុនិយមអង់គ្លេស និយាយទៀតថា សីតុណ្ហភាពជាប់កំណត់ត្រាសម្រាប់ខែឧសភាមានត្រឹម ២២,៨អង្សាសេប៉ុណ្ណោះ អំឡុងឆ្នាំ ១៩២២ និងឆ្នាំ ១៩៤៤ ។ ខណៈពេលនោះដែរ រដ្ឋាភិបាលបារាំងបាននិយាយថាមនុស្ស៧នាក់ត្រូវបានរយការណ៍ថាបានស្លាប់ក្នុងឧបទ្ទវហេតុពាក់ព័ន្ធនឹងរលកកម្ដៅនាពេលថ្មីៗនេះដែលបានដុតរោលតំបន់ភាគច្រើននៃអឺរ៉ុបខាងលិច។ រលកកម្ដៅដែលគេបានមើលឃើញថាជាការហក់ឡើងសីតុណ្ហភាពក្ដៅបំបែកកំណត់ត្រាទូទាំងប្រទេសនេះត្រូវគេរំពឹងថានឹងកើនឡើងថែមទៀត ក្នុងនោះស្រុកចំនួន ៨ នៅភាគខាងលិចប្រទេសបារាំង បានប្រកាសអាសន្នស្ដីពីរលកកម្ដៅកម្រិតពណ៌លឿងទុំជាលើកដំបូងសម្រាប់ខែឧសភានេះ ៕

ហ្គាណាជម្លៀសពលរដ្ឋចេញ ខណៈបាតុកម្មប្រឆាំងអន្តោប្រវេសន៍នៅអាហ្វ្រិកខាងត្បូង

ហ្គាណានឹងជម្លៀសពលរដ្ឋរបស់ខ្លួនប្រហែល ៣០០នាក់ចេញពីអាហ្វ្រិកខាងត្បូង ស្របពេលក្តីបារម្ភកើនឡើង បន្ទាប់ពីការដង្ហែរក្បួនប្រឆាំងនឹងអន្តោប្រវេសន៍កើនឡើង បានធ្វើឲ្យភាពតានតឹងកាន់តែខ្លាំងនៅតាមតំបន់មួយចំនួន ក្នុងប្រទេសមួយនេះ ។ ឧត្តមស្នងការហ្គាណាប្រចាំនៅអាហ្វ្រិកខាងត្បូងលោក Benjamin Quashie និយាយថា ពលរដ្ឋហ្គាណា ត្រូវបានគេមើលឃើញបំលាស់ទីដោយស្ម័គ្រចិត្ត ក្រោយរលកនៃការវាយប្រហារបែបរើសអើងជាតិសាសន៍ ក្នុងរយៈពេលប៉ុន្មានសប្តាហ៍កន្លងមកនេះ ធ្វើពលរដ្ឋមួយចំនួនគ្មានអារម្មណ៍ថាសុវត្ថិភាព ។ លោក Quashie និយាយថា ភាគច្រើននៃអ្នកជម្លៀសខ្លួន គឺមនុស្សដែលយល់ឃើញថា ពួកគេលែងត្រូវបានគេស្វាគមន៍ទៀតហើយនៅក្នុងប្រទេសអាហ្វ្រិកខាងត្បូង ឬពួកគេយល់ថា ពួកគេប្រឈមនឹងការលំបាកជាច្រើនដែលរដ្ឋាភិបាលអាហ្វ្រិកខាងត្បូងគួរតែដោះស្រាយ ប៉ុន្តែគ្មានអ្វីកើតឡើងនោះទេ ។ នៅក្នុងចំណោមពលរដ្ឋហ្គាណាដែលបានសម្រេចចិត្តចាកចេញគឺជាលោក Opoku Augustine ដែលបាននិយាយពីក្តីបារម្ភចំពោះសុវត្ថិភាពក្រុមគ្រួសាររបស់លោក ។ លោកនិយាយថា លោកមិនព្រួយបារម្ភខ្លាំងពីខ្លួនឯងនោះទេ ប៉ុន្តែកូនៗរបស់លោក និងគ្រួសាររបស់លោក ។ ដូច្នេះហើយ ពួកយើងត្រូវតែសម្រេចចិត្តចាកចេញពីប្រទេសអាហ្វ្រិកខាងត្បូង ៕

អ្នកស្រុកនៅទីក្រុង Tubize ប្រទេសបែលហ្ស៊ិក ជម្លៀសខ្លួនចេញ ដោយសារហានិភ័យនៃអគារឆាបឆេះ

អភិបាលក្នុងតំបន់និយាយថា មនុស្សរស់នៅជិតឃ្លាំងវាយនភណ្ឌរងការឆាបឆេះ ស្ថិតក្នុងទីក្រុង Tubize នៅភាគខាងលិចរដ្ឋធានីព្រុចសែល ត្រូវបានជម្លៀសចេញពីផ្ទះសម្បែអរបស់ពួកគេ ដោយសារហានិភ័យខ្ពស់នៃធុងហ្គាសស្ថិតនៅក្បែរកន្លែងផ្ទុះ ។ ចំណែកឯអ្នកស្រុកខ្លះទៀតរស់នៅក្នុងទីក្រុង Tubize ត្រូវបានគេនិយាយប្រាប់ឲ្យបន្តស្នាក់នៅក្នុងផ្ទះរបស់ពួកគេ ក្នុងនោះបង្អួចផ្ទះ ត្រូវបិទឲ្យជិត ដោយសារជាតិពុលពីផ្សែងអគ្គិភ័យ ។ លោក Samuel d'Orazio គឺជាអភិបាលក្រុង Tubize និយាយប្រាប់វិទ្យុ RTBF ថា បច្ចុប្បន្នពួកយើងបានជម្លៀសអ្នករាល់គ្នានៅតាមផ្លូវ ដោយសារមានហានិភ័យខ្ពស់នៃការផ្ទុះសម្រាប់អគារក្បែរនោះ ដោយសារមានធុងហ្គាសនៅក្នុងអគារ ។ លោកបន្តថា ក្រុមអាជ្ញាធរកំពុងវាស់កម្រិតជាតិពុលពីផ្សែងខ្មៅដ៏ក្រាស់ទាំងនោះ ។ ការប្រកាសអាសន្ននេះដែរ តម្រូវឲ្យទ្វារ និងបង្អួចផ្ទះត្រូវបិទ ដល់អ្នកដែលរស់នៅតំបន់ភាគខាងលិចទីក្រុងព្រុចសែល ស្របពេលដែលសំណុំផ្សែងពុល រីករាលនៅទូទាំងតំបន់ ៕

កូរ៉េខាងត្បូងបង្ហាញផែនការដំណើរការនាវាមុជទឹកដើរដោយថាមពលនុយក្លេអ៊ែរដំបូង នៅឆ្នាំ២០៣០

ប្រទេសកូរ៉េខាងត្បូង នៅថ្ងៃអង្គារ (ទី២៦ ខែឧសភា ឆ្នាំ២០២៦) នេះ បានបង្ហាញផែនការ ដើម្បីអភិវឌ្ឍនាវាមុជទឹកដើរដោយថាមពលនុយក្លេអ៊ែរដែលផលិតក្នុងស្រុកដំបូងរបស់ខ្លួន ដោយរដ្ឋាភិបាលមានគោលបំណងដាក់ឲ្យដំណើរការនាវានេះនៅពាក់កណ្តាលទសវត្សរ៍ឆ្នាំ២០៣០។ក្រសួងការពារជាតិបានប្រកាសពីផែនទីបង្ហាញផ្លូវ សម្រាប់ «គម្រោង Jangbogo N» ដែលជាផ្នែកមួយនៃយុទ្ធសាស្ត្ររយៈពេលវែង ដើម្បីពង្រឹងសន្តិសុខដែនសមុទ្ររបស់ប្រទេស និងទប់ទល់នឹងការគំរាមកំហែងនុយក្លេអ៊ែរ និងមីស៊ីលដែលមានមូលដ្ឋានលើនាវាមុជទឹកកូរ៉េខាងជើង។បើយោងតាមសារព័ត៌មាន Yonhap News បានឲ្យដឹងថា ក្នុងអំឡុងពេលមានកិច្ចប្រជុំយុទ្ធសាស្ត្រការពារជាតិដឹកនាំដោយប្រធានាធិបតី លោក Lee Jae Myung នៅមូលដ្ឋានកងទ័ពជើងទឹក ក្នុងទីក្រុង Changwon រដ្ឋមន្ត្រីក្រសួងការពារជាតិ លោក Ahn Gyu-back បានលើកឡើងថា៖ «យើងនឹងខិតខំធ្វើការ ដើម្បីដាក់ដំណើរការនាវាមុជទឹកដើរដោយថាមពលនុយក្លេអ៊ែរលើកដំបូង នៅពាក់កណ្តាលទសវត្សរ៍ឆ្នាំ២០៣០ និងជំរុញការអភិវឌ្ឍ ដើម្បីចាប់ផ្ដើមប្រតិបត្តិការ នៅពាក់កណ្តាលចុងទសវត្សរ៍ឆ្នាំ២០៣០ ឬបន្ទាប់ពីនោះ»។នាវាមុជទឹកទាំងនេះត្រូវបានគេរំពឹងថា នឹងធ្វើឲ្យប្រសើរឡើងយ៉ាងខ្លាំងនូវសមត្ថភាពយោធារបស់កូរ៉េខាងត្បូង ពីព្រោះពួកវាអាចនៅក្នុងទឹកបានយូរ និងដំណើរការជាមួយនឹងល្បឿន និងការចល័តខ្ពស់ជាងនាវាមុជទឹកដើរដោយថាមពលម៉ាស៊ូតធម្មតា។ លោក Ahn បានបញ្ជាក់ថា នាវាមុជទឹកទាំងនេះនឹងប្រើប្រាស់សារធាតុអ៊ុយរ៉ានីញ៉ូមដែលមានកម្រិតទាបរហូតដល់ ២០ភាគរយ សម្រាប់ប្រេងឥន្ធនៈ។ការប្រកាសនេះធ្វើឡើងបន្ទាប់ពីសម្រេចបាននូវកិច្ចព្រមព្រៀងមួយជាមួយសហរដ្ឋអាមេរិក កាលពីឆ្នាំមុន ដែលអនុញ្ញាតឲ្យមានកិច្ចសហប្រតិបត្តិការកាន់តែជិតស្និទ្ធ លើគម្រោងនាវាមុជទឹក ក្នុងនោះរួមទាំងការពិភាក្សា អំពីប្រភពប្រេងឥន្ធនៈ និងតម្រូវការបច្ចេកទេសផងដែរ៕

ក្រុមមន្រ្តីនិយាយថា អធិបតេយ្យភាពរបស់អ៊ីរ៉ង់លើច្រកសមុទ្រ Hormuz ចាំបាច់សម្រាប់សន្តិភាពជាមួយអាមេរិក

មន្រ្តីអ៊ីរ៉ង់និយាយថា អធិបតេយ្យភាពអ៊ីរ៉ង់លើច្រកសមុទ្រ Hormuz ចាំបាច់សម្រាប់ការស្វែងរកកិច្ចព្រមព្រៀងសន្តិភាពជាមួយសហរដ្ឋអាមេរិក ។ លោក Ebrahim Azizi គឺជាប្រធានគណៈកម្មាធិការសន្តិសុខជាតិសភាអ៊ីរ៉ង់ និយាយថា ច្រកសមុទ្រមួយនេះ ពុំស្ថិតនៅលើតុចរចានោះទេ ដូចដែលពួកយើងធ្វើជាមួយបញ្ហានុយក្លេអ៊ែរ។ គួរឲ្យដឹងថា តម្លៃប្រេងបានធ្លាក់ចុះជិត ៧ភាគរយ កាលពីថ្ងៃចន្ទ ស្របពេលសុទិដ្ឋិនិយមកើនឡើងថា សហរដ្ឋអាមេរិក និងអ៊ីរ៉ង់ ខិតកាន់តែជិតទៅរកកិច្ចព្រមព្រៀងដែលនឹងបើកច្រកសមុទ្រឡើងវិញ បើទោះបីជាទីក្រុងតេអេរ៉ង់ និងទីក្រុងវ៉ាស៊ីនតោន ច្រានចោលក្តីសង្ឃឹមសម្រាប់ការទម្លុះភាពទាល់ច្រកក៏ដោយ ។ ខណៈពេលនោះដែរ អ្នកចរចាកំពូលអ៊ីរ៉ង់ និងរដ្ឋមន្រ្តីការបរទេសរបស់ពួកគេ កំពុងស្ថិតនៅក្នុងទីក្រុងដូហា សម្រាប់កិច្ចប្រជុំជាមួយនាយករដ្ឋមន្រ្តីកាតា លើកិច្ចព្រមព្រៀងដ៏មានសក្តានុពលជាមួយសហរដ្ឋអាមេរិក ដើម្បីបញ្ចប់សង្រ្គាមរយៈពេល ៣ខែនេះ ។ ដោយឡែក ទីបញ្ជាការកណ្តាលរបស់សហរដ្ឋអាមេរិកដែលសម្របសម្រួលប្រតិបត្តិការយោធាទាំងអស់របស់សហរដ្ឋអាមេរិកនៅក្នុងតំបន់ នៅក្នុង និងជុំវិញអ៊ីរ៉ង់ បានចេញសេចក្តីថ្លែងការណ៍មួយ ថាឧបទ្ទវហេតុដែលបានកើតឡើងក្នុងរយៈពេល២៤ម៉ោងកន្លងទៅនេះ គឺដើម្បីការពារកងកម្លាំងសហរដ្ឋអាមេរិក ៕

បណ្ដាញសង្គម

ព័ត៌មានថ្មីៗ

វេជ្ជបណ្ឌិត៖ សុខភាពលោក Trump គឺល្អប្រសើរណាស់ ប៉ុន្តែគួរតែសម្រកទម្ងន់

អ្នកនៅរស់ពីការជាប់ក្នុងរូងភ្នំ នៅឡាវ បានបរិភោគថាសឈើសម្រាប់រែងមាស ដើម្បីបន្តជីវិត

មនុស្ស ១៨នាក់ស្លាប់ និង ៣០នាក់រងរបួស ដោយសាររថយន្តដឹកជនភៀសខ្លួន ក្រឡាប់នៅភាគខាងកើតអាហ្វហ្គានីស្ថាន

សេតវិមាន៖ លោក Trump «នឹងធ្វើតែកិច្ចព្រមព្រៀងដែលល្អសម្រាប់អាមេរិកប៉ុណ្ណោះ» ជាមួយអ៊ីរ៉ង់

នាយករដ្ឋមន្ត្រី៖ កាណាដា និងចិន កំពុងសាង «ភាពជាដៃគូប្រកបដោយស្ថិរភាព និងការស្ថាបនាបន្ថែមទៀត»

រដ្ឋមន្រ្ដីក្រសួងការងារ ចុះពិនិត្យមើលខ្សែច្រវាក់ផលិតកម្មក្រុមហ៊ុន THACO AGRI ក្នុងខេត្តក្រចេះ ដែលផ្តល់ឱកាសការងារប្រមាណ២ម៉ឺននាក់ និងផ្ទេរជំនាញបច្ចេកទេសកសិកម្មទំនើប

របាយការណ៍៖ សភាអាមេរិកកំពុងធ្វើសមាហរណកម្មកងកម្លាំងយោធាអាមេរិក និងអ៊ីស្រាអែលដោយស្ងាត់ៗ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877