BTV NEWS

អ៊ីស្រាអែលបញ្ជាក់ថា ខ្លួននឹងឆ្លើយតបចំពោះការរំលោភបទឈប់បាញ់របស់ក្រុមហាម៉ាស

លោក Zelenskyy ស្វែងរកការជួបជាមួយលោក Trump ដើម្បីពិភាក្សា និងដោះស្រាយបញ្ហាដែនដី

ប្រមុខយោធាលីប៊ី និងមនុស្ស ៧នាក់ទៀត ស្លាប់ក្នុងហេតុការណ៍ធ្លាក់យន្តហោះ ក្រោយហោះឡើងចេញពីទួរគី

នាយករដ្ឋមន្ត្រីកូសូវ៉ូ៖ កូសូវ៉ូ និងស៊ែរប៊ី ត្រូវតែធ្វើប្រក្រតីភាពទំនាក់ទំនង

ព័ត៌មានអន្តរជាតិ

បារាំងប្រឈមនឹងការទាស់ទែងកញ្ចប់ថវិកា ខណៈសមាជិកសភាប្រឹងប្រែងបញ្ចៀសភាពជាប់គាំង

កញ្ចប់ថវិកាឆ្នាំ២០២៦ របស់ប្រទេសបារាំង ប្រឈមនឹងពេលវេលាដ៏សំខាន់ នៅថ្ងៃសុក្រ (ទី១៩ ខែធ្នូ) នេះ ខណៈដែលសមាជិកសភាប្រឹងប្រែងយ៉ាងសស្រាក់សស្រាំ ដើម្បីបញ្ចៀសភាពជាប់គាំងសារពើពន្ធ នៅក្នុងកិច្ចពិភាក្សាដំណាក់កាលចុងក្រោយ ក្នុងគោលបំណងឲ្យឈានដល់ការព្រមព្រៀងលើសេចក្ដីស្នើច្បាប់ទទួលយកបានពីគ្រប់ភាគី។គណៈកម្មាធិការរួមមកពីរដ្ឋសភា និងព្រឹទ្ធសភា នឹងជួបប្រជុំ ដើម្បីចេញអត្ថបទថវិកាចុងក្រោយ ដែលបន្ទាប់មកនឹងត្រូវដាក់ឲ្យបោះឆ្នោត នៅសភាទាំង២ នាថ្ងៃអង្គារសប្ដាហ៍ក្រោយ។ លទ្ធផលមិនជោគជ័យ នឹងជំរុញឲ្យលោកនាយករដ្ឋមន្ត្រី Sebastien Lecornu ស្វែងរកច្បាប់គ្រាអាសន្ន ដើម្បីអាចឲ្យមានការចំណាយ ការប្រមូលពន្ធ និងការខ្ចីប្រាក់ ក្នុងឆ្នាំថ្មី រហូតដល់កញ្ចប់ថវិកាសមស្រប អាចត្រូវបានអនុម័ត។តែទេសាភិបាលធនាគារកណ្តាលរបស់បារាំង លោក Francois Villeroy de Galhau បាននិយាយនៅថ្ងៃសុក្រនេះថា ច្បាប់បែបនេះនឹងផ្តល់ដំណោះស្រាយរយៈពេលខ្លីតែប៉ុណ្ណោះ។ លោក Villeroy បានប្រាប់វិទ្យុ France Inter ថា៖ «ច្បាប់គ្រាអាសន្នមិនបានផ្ដល់នូវជម្រើសណាមួយឡើយ។ ប៉ុន្តែយើងត្រូវការចំណាយជាច្រើនបន្ថែមទៀត ជាឧទាហរណ៍ លើវិស័យការពារជាតិជាដើម»។ជាមួយគ្នានេះ លោកបានបញ្ជាក់បន្ថែមថា ច្បាប់ពិសេសមួយ ក៏នឹងនាំឲ្យមានឱនភាព លើសពីអ្វីដែលត្រូវការ ព្រោះវាមិនរាប់បញ្ចូលវិធានការកាត់បន្ថយការចំណាយណាមួយ ហើយក៏មិនរួមបញ្ចូលវិធានការពន្ធណាមួយនោះដែរ»។ព្រឹទ្ធសភាបានអនុម័តច្បាប់ថវិកាឆ្នាំ២០២៦ កាលពីថ្ងៃចន្ទ ដោយមានឱនភាពសារពើពន្ធ ៥,៣ភាគរយ បន្ទាប់ពីក្រុមអភិរក្សបានរារាំងការដំឡើងពន្ធ ដើម្បីទូទាត់ការខ្វះខាតថវិកាច្រើនជាងការគ្រោងទុក នៅក្នុងថវិកាសន្តិសុខសង្គមដែលសភាជាន់ទាបបានផ្ដល់ការអនុម័ត៕

អ៊ីស្រាអែលចោទប្រកាន់ជនជាតិរុស្ស៊ីពីបទចារកម្មឲ្យអ៊ីរ៉ង់

នគរបាលអ៊ីស្រាអែល និងទីភ្នាក់ងារសន្តិសុខផ្ទៃក្នុងរបស់ខ្លួន បាននិយាយនៅថ្ងៃសុក្រនេះថា អ៊ីស្រាអែលបានចោទប្រកាន់ពលរដ្ឋរុស្ស៊ីម្នាក់ពីបទចារកម្មឲ្យអ៊ីរ៉ង់ រួមទាំងការថតរូបកំពង់ផែ និងហេដ្ឋារចនាសម្ព័ន្ធ អ៊ីស្រាអែល ក្រោមការដឹកនាំរបស់ទីភ្នាក់ងារចារកម្មអ៊ីរ៉ង់។ នគរបាលនិងទីភ្នាក់ងារនេះ បាននិយាយនៅក្នុងសេចក្តីថ្លែងការណ៍រួមមួយថា បន្ទាប់មក បុគ្គលរុស្ស៊ីរូបនេះ ត្រូវបានបង់ប្រាក់ជារូបិយប័ណ្ណឌីជីថល។ សង្គ្រាមស្រមោលរយៈពេលជាច្រើនទសវត្សរ៍រវាងអ៊ីស្រាអែល និងអ៊ីរ៉ង់ បានកើនឡើងដល់សង្គ្រាមដោយផ្ទាល់ នៅក្នុងខែមិថុនា នៅពេលដែលអ៊ីស្រាអែលបានវាយប្រហារគោលដៅផ្សេងៗ នៅក្នុងប្រទេសអ៊ីរ៉ង់ រួមទាំងតាមរយៈប្រតិបត្តិការដែលពឹងផ្អែកលើកងកម្លាំងកុម្ម៉ង់ដូ Mossad ដែលកំពុងត្រូវបានដាក់ពង្រាយយ៉ាងជ្រៅ នៅក្នុងប្រទេសនេះ។អ៊ីស្រាអែលបានចាប់ខ្លួនពលរដ្ឋរាប់សិបនាក់ដែលត្រូវបានចោទប្រកាន់ថា បានចារកម្មឲ្យអ៊ីរ៉ង់ ដែលប្រភពបានប្រាប់សារព័ត៌មានរ៉យទ័រថា គឺជាកិច្ចខិតខំប្រឹងប្រែងដ៏ធំបំផុតរបស់ទីក្រុងតេអេរ៉ង់ ក្នុងរយៈពេលជាច្រើនទសវត្សរ៍ ដើម្បីលួចជ្រៀតចូលទឹកដីរបស់គូប្រជែងដ៏សំខាន់របស់ខ្លួន។ការចាប់ខ្លួននេះ បានកើតឡើង បន្ទាប់ពីកិច្ចខិតខំប្រឹងប្រែងម្តងហើយម្តងទៀតដោយភ្នាក់ងារចារកម្មអ៊ីរ៉ង់ក្នុងរយៈពេលប៉ុន្មានឆ្នាំមកនេះ ដើម្បីជ្រើសរើសជនជាតិអ៊ីស្រាអែលធម្មតា ដើម្បីប្រមូលព័ត៌មានស៊ើបការណ៍សម្ងាត់ និងអនុវត្តការវាយប្រហារជាថ្នូរនឹងប្រាក់៕

ប្រមុខ SVR ៖ រុស្ស៊ីសង្ឃឹមថា ស៊ែរប៊ីផ្តល់អាទិភាពដល់ផលប្រយោជន៍ជាតិ ជាជាងការភូតកុហករបស់លោកខាងលិច

លោក Sergey Naryshkin ប្រធានសេវាស៊ើបការណ៍សម្ងាត់បរទេសរុស្ស៊ី (SVR) បានប្រាប់សារព័ត៌មាន TASS ក្នុងបទសម្ភាសន៍មួយថា រុស្ស៊ីនឹងគោរពជម្រើសណាមួយដែលស៊ែរប៊ីធ្វើនៅក្នុងកិច្ចការអឺរ៉ុបរបស់ខ្លួន ប៉ុន្តែសង្ឃឹមថា ការសម្រេចចិត្តរបស់ខ្លួននឹងផ្អែកលើផលប្រយោជន៍ជាតិ ជាជាងការភូតកុហករបស់លោកខាងលិច។ លោក Naryshkin បាននិយាយថា៖«ជម្រើសនេះជាកម្មសិទ្ធិរបស់ប្រជាជន និងថ្នាក់ដឹកនាំនយោបាយ។ ខ្ញុំរំពឹងថា ថ្នាក់ដឹកនាំស៊ែរប៊ីនឹងធ្វើការសម្រេចចិត្តរបស់ពួកគេ ដោយផ្អែកលើផលប្រយោជន៍យុទ្ធសាស្ត្រ រយៈពេលវែងរបស់ប្រជាជនស៊ែរប៊ី ប្រជាជាតិបងប្អូនរបស់យើង ជាជាងការសន្យា និងការភូតកុហករបស់លោកខាងលិច»។លោកបានបន្ថែមថា៖«យើងនឹងមិនជ្រៀតជ្រែកឡើយ ហើយនឹងគោរពជម្រើសណាមួយដែលពួកគេធ្វើ»។លោក Naryshkin ក៏បាននិយាយផងដែរថា លោកខាងលិចមិនបានបោះបង់ចោលផែនការសម្រាប់ការបះបោរបែប Maidan នៅក្នុងប្រទេសស៊ែរប៊ីទេ ហើយកំពុងដាក់សម្ពាធលើថ្នាក់ដឹកនាំនយោបាយរបស់ប្រទេសនេះ។លោកបានពន្យល់ថា៖«លោកខាងលិចមិនបានបោះបង់ចោលផែនការទាំងនេះទេ។ ការផ្តោតការយកចិត្តទុកដាក់បច្ចុប្បន្ននេះ បានផ្លាស់ប្តូរទៅជាការដាក់សម្ពាធលើថ្នាក់ដឹកនាំរបស់ស៊ែរប៊ី។ លោកខាងលិចកំពុងជំរុញយ៉ាងខ្លាំងដល់អ្នកនយោបាយរបស់ប្រទេសនេះ ឲ្យធ្វើការជ្រើសរើសដែលហៅថា ជាជម្រើសអរិយធម៌។ នេះមានន័យថា ការបោះបង់ចោលទំនាក់ទំនងមិត្តភាព ឬ ទំនាក់ទំនងណាមួយជាមួយរុស្ស៊ី ការកាត់ផ្តាច់ទំនាក់ទំនងប្រវត្តិសាស្ត្រ និងភាតរភាពជាមួយរុស្ស៊ី ដែលគេសន្មតថា នឹងបើកផ្លូវឲ្យស៊ែរប៊ីចូលរួមជាមួយសហភាពអឺរ៉ុបដែល «មានសុភមង្គល»៕

ការស្រាវជ្រាវ៖ អ៊ីស្រាអែលវាយប្រហារលីបង់ជាមធ្យមរៀងរាល់ ៤ ម៉ោងម្តង

ទិន្នន័យថ្មីបានបង្ហាញថា អ៊ីស្រាអែលកំពុងវាយប្រហារលីបង់ក្នុងអត្រាស្មើនឹងការវាយប្រហារមួយដងរៀងរាល់ ៤ម៉ោង ទោះបីជាមានការឈានដល់បទឈប់បាញ់ជាងមួយឆ្នាំមុនក៏ដោយ។ACLED ដែលជាអង្គការតាមដានជម្លោះឯករាជ្យមួយ បានកត់ត្រាការវាយប្រហាររបស់អ៊ីស្រាអែលចំនួន ១.៨៤៦ លើកលើលីបង់ ចាប់តាំងពីការចាប់ផ្តើមនៃបទឈប់បាញ់ជាមួយក្រុមហេសបូឡា។សារព័ត៌មាន Sky News បានរាយការណ៍ថា ជាមធ្យមមានត្រឹមតែពីរថ្ងៃក្នុងមួយខែ ចាប់តាំងពីពេលនោះមក ដែលមិនបានឃើញការវាយប្រហាររបស់អ៊ីស្រាអែលឡើយ។ក្នុងរយៈពេលប៉ុន្មានសប្តាហ៍ថ្មីៗនេះ អ៊ីស្រាអែលបានបង្កើនការវាយប្រហារឆ្លងកាត់ព្រំដែន ដោយខែធ្នូឃើញជាមធ្យម ៦ដង ក្នុងមួយថ្ងៃ ឬវាយប្រហារម្តងរៀងរាល់ ៤ម៉ោង។ នេះគឺជាល្បឿនលឿនបំផុតនៃការវាយប្រហារដោយអ៊ីស្រាអែល ចាប់តាំងពីខែឧសភាមក។កងកម្លាំងបណ្តោះអាសន្នរបស់អង្គការសហប្រជាជាតិនៅលីបង់(UNIFIL) បាននិយាយថា បទឈប់បាញ់ត្រូវបានរំលោភបំពានជាង ១០.០០០ ដង ឬជាមធ្យមរៀងរាល់ ៥៣ នាទីម្តង។តួលេខនោះរួមបញ្ចូលទាំងសកម្មភាពថ្មើរជើងជាង ២.៥០០ ដង ដោយកងកម្លាំងការពារអ៊ីស្រាអែល និងការរំលោភលើដែនអាកាសលីបង់ជាង ៧.៨០០ ដង ។UNIFIL បានរកឃើញឃ្លាំងអាវុធ និងគ្រាប់រំសេវជាង ៣៦០ កន្លែង នៅភាគខាងត្បូងនៃទន្លេ Litani។ ទាំងអស់នេះ ត្រូវបានរាយការណ៍ថា ជាការរំលោភលើបទឈប់បាញ់៕

មនុស្ស ៣នាក់ ត្រូវបានចាប់ខ្លួន សម្រាប់ការចោទប្រកាន់ថា បានដុតដំរីព្រៃនៅស្រីលង្កា

សារព័ត៌មានស្រីលង្កា រាយការណ៍ថា នគរបាលស្រីលង្កា បានចាប់ខ្លួនបុរស ៣នាក់ ដែលរងការចោទប្រកាន់ថា បានដុតដំរីព្រៃមួយក្បាលដោយប្រើប្រាស់ភ្លើងគប់ ខណៈព្យាយាមដេញវាចេញទៅឆ្ងាយ ។រូបភាពវីដេអូឃ្លីបនៃឧបទ្ទេវហេតុនេះ ដែលបានកើតឡើងនៅភូមិមួយកន្លែងស្ថិតនៅភាគខាងជើងប្រទេសស្រីលង្កា បានធ្វើឲ្យមានប្រតិកម្មយ៉ាងខ្លាំង ពេលដែលវាផ្សព្វផ្សាយនៅលើបណ្តាញព័ត៌មានសង្គមក្នុងសប្តាហ៍នេះ ។បើទោះបីជាទទួលបានការព្យាបាលពីពេទ្យសត្វយ៉ាងណាក្តី ដំរីឈ្មោលមួយក្បាលនេះ បានងាប់កាលពីថ្ងៃអង្គារ ។សារព័ត៌មានក្នុងស្រុករាយការណ៍ថា ជនសង្ស័យដែលត្រូវបានចាប់ខ្លួនកាលពីថ្ងៃព្រហស្បតិ៍ មានអាយុចន្លោះពី ៤២ឆ្នាំ ដល់ ៥០ឆ្នាំ ។សារព័ត៌មានក្នុងស្រុករាយការណ៍ទៀតថា ដំរីឈ្មោលមួយក្បាលនេះ ត្រូវបានគេប្រទះឃើញមានស្នាមរលាកធ្ងន់ធ្ងរ និងរបួសត្រូវគ្រាប់កាំភ្លើងត្រង់ជើង ។ វាត្រូវបានព្យាបាលដោយពេទ្យសត្វជាច្រើនលើក មកហើយ កាលពីដើមឆ្នាំនេះ ។ករណីដុតដំរីនេះដែរ បង្កឲ្យមានការរិះគន់យ៉ាងខ្លាំងនៅក្នុងចំណោមក្រុមគាំទ្រសិទ្ធិសត្វ និងអ្នកប្រើប្រាស់បណ្តាញព័ត៌មានសង្គម ។ញត្តិដែលបានបង្កើតឡើងកាលពីថ្ងៃព្រហស្បតិ៍ទាមទារឲ្យមានការដាក់ទោសជនល្មើស និងវិធានការការពារសកម្មភាបឃោឃៅស្រដៀងគ្នានេះ ទទួលបានហត្ថលេខាជាង ៤០០ ។ដំរីត្រូវបានចាត់ទុកថាជាសត្វដ៏ពិសិដ្ឋនៅប្រទេសស្រីលង្កា ជាទីដែលភាគច្រើននៃប្រជាពលរដ្ឋគឺជាពុទ្ធបរិស័ទ ។ ដំរីស្រុកតែងតែជាចំណែកមួយនៃពិធីសាសនា ក៏ដូចជាគោលដៅទេសចរណ៍ដ៏ទាក់ទាញ ។យោងតាមមូលនិធិសត្វព្រៃពិភពលោក បានឲ្យដឹងថា ការសម្លាប់ដំរីនៅក្នុងប្រទេសស្រីលង្កា គឺជាការបំពានមួយដែលអាចដាក់ទោសប្រហារជីវិត ៕

ស្ត្រីជនជាតិបារាំងត្រូវបានកាត់ទោសឲ្យជាប់ពន្ធនាគាររយៈពេល ១០ ឆ្នាំ ពីបទសមគំនិតភេរវកម្ម

ស្ត្រីជនជាតិបារាំងទីពីរដែលត្រូវបានបញ្ជូនត្រឡប់មកពីជំរំស៊ីរីដែលឃុំឃាំងសមាជិកក្រុមរដ្ឋអ៊ីស្លាម DAESH និងជនភៀសខ្លួន ត្រូវបានកាត់ទោសឲ្យជាប់ពន្ធនាគាររយៈពេល ១០ ឆ្នាំ កាលពីថ្ងៃព្រហស្បតិ៍។អ្នកស្រី Carole Sun អាយុ ៣០ ឆ្នាំ ត្រូវបានរកឃើញថាមានទោសពីបទចូលរួមក្នុងការសមគំនិត ឧក្រិដ្ឋកម្មភេរវកម្ម ដោយតុលាការព្រហ្មទណ្ឌពិសេសមួយ នៅទីក្រុងប៉ារីស។អ្នកស្រីបានចាកចេញពីប្រទេសបារាំងទៅកាន់ប្រទេសស៊ីរី ក្នុងខែកក្កដា ឆ្នាំ ២០១៤ ជាមួយបងប្រុសរបស់ខ្លួន ហើយត្រូវបានចាប់ខ្លួនដោយកងកម្លាំងឃើដក្នុងខែធ្នូ ឆ្នាំ ២០១៧ នៅពេលដែលរដ្ឋកាលីហ្វ ដែលហៅខ្លួនឯងថា DAESH បានដួលរលំ។បន្ទាប់មកអ្នកស្រី និងស្ត្រីដទៃទៀត ត្រូវបានឃុំខ្លួននៅក្នុងជំរំឃុំឃាំងមួយ នៅភាគឦសាននៃប្រទេសស៊ីរី។ លោកស្រី Sun បានវិលត្រឡប់ទៅប្រទេសបារាំងវិញ នៅថ្ងៃទី ០៥ ខែកក្កដា ឆ្នាំ ២០២២ ដែលជាផ្នែកមួយនៃការធ្វើមាតុភូមិនិវត្តន៍លើកដំបូងរបស់ជនជាតិបារាំង។អ្នកស្រីបានប្រាប់តុលាការថា ខ្លួនត្រូវបានគេបណ្តុះបណ្តាលតាមអ៊ីនធឺណិត។ចៅក្រមបាននិយាយថា ជនជាប់ចោទរូបនេះ បានស្គាល់ ឬរស់នៅជាមួយ «បុគ្គលដែលគេស្គាល់ច្រើន» ដែលល្បីដោយសារ សកម្មភាន«ដ៏ឃោរឃៅ» ឬសម្រាប់ការប្រយុទ្ធគ្នា នៅក្នុងអង្គភាពដែលមានទំនាក់ទំនងជាមួយការវាយប្រហារទីក្រុងប៉ារីស ក្នុងខែវិច្ឆិកា ឆ្នាំ ២០១៥៕

អាល្លឺម៉ង់នឹងទទួលយកជនជាតិអាហ្វហ្គានីស្ថានជាង ៥០០នាក់ ដោយផ្តល់ទីជម្រកដល់ពួកគេ

រដ្ឋាភិបាលអាល្លឺម៉ង់បាននិយាយកាលពីថ្ងៃព្រហស្បតិ៍ថា ខ្លួននឹងទទួលយកជនជាតិអាហ្វហ្គានីស្ថានចំនួន ៥៣៥ នាក់ដែលត្រូវបានសន្យាផ្តល់ឲ្យនូវទីជម្រកនៅក្នុងប្រទេសនេះ ប៉ុន្តែបានជាប់គាំងនៅក្នុងប្រទេសប៉ាគីស្ថាន។រដ្ឋមន្ត្រីក្រសួងមហាផ្ទៃ លោក Alexander Dobrindt បានប្រាប់បណ្តាញប្រព័ន្ធផ្សព្វផ្សាយ RND ថា ទីក្រុងប៊ែរឡាំង ចង់បញ្ចប់ដំណើរការនៃសំណុំរឿងនេះ«នៅក្នុងខែធ្នូ តាមដែលអាចធ្វើទៅបាន» ដើម្បីអនុញ្ញាតឲ្យពួកគេចូលទៅក្នុងប្រទេសអាល្លឺម៉ង់។ជនជាតិអាហ្វហ្គានីស្ថាន ត្រូវបានទទួលយក ក្រោមគម្រោងជនភៀសខ្លួនដែលបង្កើតឡើងដោយរដ្ឋាភិបាលអាល្លឺម៉ង់មុន ប៉ុន្តែបានជាប់គាំងនៅក្នុងប្រទេសប៉ាគីស្ថាន ចាប់តាំងពីអធិការបតីអភិរក្សនិយម លោក Friedrich Merz បានឡើងកាន់តំណែង ក្នុងខែឧសភា ហើយបានបង្កកកម្មវិធីនេះ។អ្នកដែលចូលរួមក្នុងគម្រោងនេះ ទាំងបានធ្វើការជាមួយកងកម្លាំងប្រដាប់អាវុធអាល្លឺម៉ង់ នៅក្នុងប្រទេសអាហ្វហ្គានីស្ថាន ក្នុងអំឡុងពេលសង្គ្រាមប្រឆាំងនឹងក្រុមតាលីបង់ ឬត្រូវបានវិនិច្ឆ័យថា មានហានិភ័យពិសេសពីក្រុមតាលីបង់ បន្ទាប់ពីការវិលត្រឡប់មកកាន់អំណាចវិញនៅឆ្នាំ ២០២១ ជាឧទាហរណ៍ មានសកម្មជនសិទ្ធិមនុស្ស និងអ្នកកាសែត ក៏ដូចជាក្រុមគ្រួសាររបស់ពួកគេ។ប្រទេសប៉ាគីស្ថានបានកំណត់ថ្ងៃផុតកំណត់សម្រាប់ចុងឆ្នាំនេះសម្រាប់សំណុំរឿងរបស់ជនជាតិអាហ្វហ្គានីស្ថាន ត្រូវបានដោះស្រាយ បន្ទាប់ពីនោះពួកគេនឹងត្រូវនិរទេសត្រឡប់ទៅស្រុកកំណើតរបស់ពួកគេវិញ៕

របបសឹកមីយ៉ាន់ម៉ា ចោទប្រកាន់មនុស្សជាង ២០០នាក់ ពីបទបំពានច្បាប់បោះឆ្នោត មុនកាលបរិច្ឆេតកំណត់បោះឆ្នោតជិតមកដល់

រដ្ឋាភិបាលយោធាមីយ៉ាន់ម៉ា បានចោទប្រកាន់មនុស្សជាង ២០០នាក់ ពីបទបំពានច្បាប់បោះឆ្នោតរបស់ប្រទេសនៅអាស៊ីអាគ្នេយ៍មួយនេះ មុនការបោះឆ្នោតសកលនៅដំណាច់ខែនេះ ជាការដាក់សម្ពាធលើក្រុមប្រឆាំងនៅក្នុងការបោះឆ្នោត ។ក្រុមអ្នករិះគន់ការបោះឆ្នោតដែលនឹងចាប់ផ្តើមនៅថ្ងៃទី ២៨ ខែធ្នូខាងមុខនេះ អះអាងថា គ្មានទេការបោះឆ្នោតដោយសេរី ឬយុត្តិធម៌ ហើយការបោះឆ្នោតនេះ ត្រូវបានរៀបចំឡើងគ្រាន់តែបន្ថែមការលាបពណ៌ខាងក្រៅនៃភាពស្របច្បាប់ការគ្រប់គ្រងរបស់យោធាប៉ុណ្ណោះដែលបានចាប់ផ្តើមឡើង ក្រោយយោធាទម្លាក់រដ្ឋាភិបាលជាប់ឆ្នោតរបស់លោកស្រី Aung San Suu Kyiកាលពីខែកុម្ភៈ ឆ្នាំ ២០២១ ។ការដណ្តើមអំណាចនេះ បង្កឲ្យមានការប្រឆាំងទ្រង់ទ្រាយធំ ហើយនិងប្រែក្លាយជាសង្រ្គាមស៊ីវិល ដែលធ្វើឲ្យកាន់តែស្មុគស្មាញដល់ការបោះឆ្នោតនៅតាមតំបន់ប្រទាញប្រទង់ជាច្រើន ។ វាស្ថិតក្នុងហេតុផលដែលការបោះឆ្នោតនឹងរៀបចំឡើង ៣ដំណាក់កាល ដែលដំណាក់កាលទី ២ នឹងធ្វើឡើងនៅថ្ងៃទី ១១ ខែមករា ឆ្នាំ ២០២៦ ហើយដំណាក់ទី ៣ នឹងរៀបចំឡើងនៅថ្ងៃទី ២៥ ខែមករា ឆ្នាំ ២០២៦ ។មាននូវការដាក់ទោសធ្ងន់ធ្ងររហូតដល់ទោសប្រហារជីវិត សម្រាប់អ្នកប្រឆាំង ឬអ្នកធ្វើឲ្យអាក់ខានដល់ការបោះឆ្នោត ក្រោមច្បាប់បោះឆ្នោតដែលត្រូវបានអនុម័តឡើងដោយរបបសឹក ។យោងតាមសេចក្តីរាយការណ៍ពីកាសែតរដ្ឋមីយ៉ាន់ម៉ា Alinn បានឲ្យដឹងថា រដ្ឋមន្រ្តីក្រសួងមហាផ្ទៃមីយ៉ាន់ម៉ាលោកឧត្តមសេនីយ៍ឯក Tun Tun Naung បាននិយាយប្រាប់ជំនួបកាលពីថ្ងៃអង្គារថា ក្រុមអាជ្ញាធរ បានកំណត់អត្តសញ្ញាណ និងចាត់វិធានការលើមនុស្ស ២២៩នាក់ រួមមានបុរស ២០១ និងស្រ្តី ២៩នាក់ ក្នុងករណីចោទប្រកាន់ប៉ុនប៉ងបំផ្លិចបំផ្លាញដំណើរការបោះឆ្នោត ៕

ចក្រភពអង់គ្លេសមានការចាប់ខ្លួនភេរវករកើនឡើង ៦៦០% បន្ទាប់ពីមានបម្រាមលើចលនាប៉ាឡេស្ទីន

យោងតាមតួលេខផ្លូវការ បានឲ្យដឹងថា ការចាប់ខ្លួន ដោយសារបទល្មើសទាក់ទងនឹងអំពើភេរវកម្ម នៅចក្រភពអង់គ្លេស បានកើនឡើងច្រើនជាង ៦ដង ក្នុងឆ្នាំកន្លងទៅ ដែលជំរុញភាគច្រើនដោយការហាមឃាត់លើចលនាតវ៉ាពាក់ព័ន្ធនឹងប៉ាឡេស្ទីន (Palestine Action)។ទិន្នន័យបង្ហាញថា មនុស្ស ១.៨៨៦នាក់ ត្រូវបានចាប់ខ្លួន ដោយសារមានសកម្មភាពទាក់ទងនឹងភេរវកម្ម រយៈពេល ១២ខែ រហូតដល់ខែកញ្ញា ឆ្នាំ២០២៥ ដោយធៀបនឹង ២៤៨នាក់ កាលពីឆ្នាំមុន កើនឡើងប្រហែល ៦៦០ភាគរយ។ក្នុងចំណោមអ្នកដែលត្រូវបានចាប់ខ្លួន មាន ១.៦៣០នាក់ ឬ ៨៦ភាគរយ ត្រូវបានភ្ជាប់ទៅនឹងយុទ្ធនាការ Palestine Action ដែលត្រូវបានបញ្ចូលទៅក្នុងបញ្ជីជាអង្គការភេរវករដែលត្រូវបានហាមឃាត់របស់ចក្រភពអង់គ្លេស កាលពីខែកក្កដា។ សហស្ថាបនិកក្រុមនេះ លោកស្រី Huda Ammori កំពុងដំណើរការផ្លូវច្បាប់ប្រឆាំងនឹងការិយាល័យក្រសួងមហាផ្ទៃ ជុំវិញការសម្រេចនេះ។នៅក្រោមបម្រាមនេះ សមាជិកភាព ឬការគាំទ្រ ចំពោះយុទ្ធនាការ Palestine Action គឺជាបទល្មើសព្រហ្មទណ្ឌដែលអាចត្រូវបានផ្តន្ទាទោសដាក់ពន្ធនាគាររហូតដល់ ១៤ឆ្នាំ។ ការស្លៀកសម្លៀកបំពាក់ ឬកាន់សញ្ញា បង្ហាញឈ្មោះក្រុមនេះ អាចនឹងត្រូវជាប់ទោសយូរបំផុត ៦ខែ។តួលេខបង្ហាញថា ការចាប់ខ្លួនចំនួន ១.៧០៦ករណី បានកើតឡើងក្នុងរយៈពេល ៣ខែ ចាប់ពីខែកក្កដា ដល់ខែកញ្ញា ឆ្នាំ២០២៥ នៅពេលដែលការហាមឃាត់នេះចូលជាធរមាន។ កម្រិតនេះតំណាងឲ្យការកើនឡើង ២.៦០៨ភាគរយ បើធៀបនឹងត្រីមាសមុន ពីខែមេសា ដល់ខែមិថុនា នៅពេលដែលការចាប់ខ្លួន ពាក់ព័ន្ធនឹងអំពើភេរវកម្ម មានចំនួន ៦៣ករណី។ នៅក្នុងត្រីមាសចុងក្រោយបង្អស់ ការចាប់ខ្លួន ១.៦៣០នាក់ ត្រូវបានផ្សារភ្ជាប់ទៅនឹងការគាំទ្រយុទ្ធនាការ Palestine Action៕

EU ព្រមព្រៀងលើច្បាប់ថ្មីដែលរឹតបន្តឹងការទទួលយកពាក្យសុំសិទ្ធិជ្រកកោន

យោងតាមសេចក្តីថ្លែងការណ៍មួយ បានឲ្យដឹងថា ក្រុមប្រឹក្សាអឺរ៉ុប និងសភាអឺរ៉ុប បានឈានដល់កិច្ចព្រមព្រៀងបណ្ដោះអាសន្ន ស្តីពីច្បាប់ថ្មីដែលរឹតបន្តឹងការទទួលយកពាក្យសុំសិទ្ធិជ្រកកោន ដោយកែសម្រួលទស្សននៃការកំណត់លក្ខខណ្ឌសុវត្ថិភាពរបស់ប្រទេសទី៣។បើយោងតាមសេចក្តីថ្លែងការណ៍នោះ បានឲ្យដឹងថា អ្នកចរចាមកពីក្រុមប្រឹក្សាអឺរ៉ុប និងសភាអឺរ៉ុប បានឈានដល់កិច្ចព្រមព្រៀងបណ្ដោះអាសន្ន ស្ដីពីច្បាប់របស់សហភាពអឺរ៉ុប (EU) ដែលកែសម្រួលទស្សននៃការកំណត់លក្ខខណ្ឌសុវត្ថិភាពរបស់ប្រទេសទី៣ និងពង្រីកកាលៈទេសៈដែលពាក្យសុំសិទ្ធិជ្រកកោន អាចត្រូវបានបដិសេធថា មិនអាចទទួលយកបាន។សេចក្តីថ្លែងការណ៍របស់ក្រុមប្រឹក្សាអឺរ៉ុបនេះ បានបន្ថែមថា ការវិវត្តនេះ បង្ហាញពី «ការប្តេជ្ញាចិត្តរបស់សមាជិកសភា EU ក្នុងការធ្វើឲ្យប្រព័ន្ធសុំសិទ្ធិជ្រកកោនរបស់ EU កាន់តែមានប្រសិទ្ធភាព និងរឹងមាំ»។រដ្ឋមន្ត្រីក្រសួងអន្តោប្រវេសន៍ និងសមាហរណកម្មដាណឺម៉ាក លោក Rasmus Stoklund បានលើកឡើងនៅក្នុងសេចក្តីថ្លែងការណ៍ថា៖ «ក្នុងអំឡុងពេលធ្វើតួនាទីជាប្រធានរបស់យើង យើងបានដោះស្រាយ ដើម្បីកែសម្រួលទស្សននៃការកំណត់លក្ខខណ្ឌសុវត្ថិភាពរបស់ប្រទេសទី៣ ជាពេលវេលាជាប្រវត្តិសាស្ត្រដែលអនុញ្ញាតឲ្យរដ្ឋជាសមាជិកធ្វើកិច្ចព្រមព្រៀងជាមួយបណ្ដាប្រទេសទី៣ ដែលមានសុវត្ថិភាព ស្តីពីដំណើរការសុំសិទ្ធិជ្រកកោន នៅក្រៅអឺរ៉ុប»។គួរបញ្ជាក់ថា ទស្សននៃការកំណត់លក្ខខណ្ឌសុវត្ថិភាពរបស់ប្រទេសទី៣ អនុញ្ញាតឲ្យរដ្ឋជាសមាជិក EU បដិសេធពាក្យសុំសិទ្ធិជ្រកកោនថា មិនអាចទទួលយកបាន នៅពេលដែលអ្នកស្វែងរកសិទ្ធិជ្រកកោន អាចស្វែងរកបាន ហើយប្រសិនបើមានសិទ្ធិគ្រប់គ្រាន់ បានទទួលការការពារអន្តរជាតិ នៅក្នុងប្រទេសដែលមិនមែនជាសមាជិក EU ដែលត្រូវបានចាត់ទុកថា មានសុវត្ថិភាព សម្រាប់ពួកគេ៕

បណ្ដាញសង្គម

ព័ត៌មានថ្មីៗ

ក្រសួងទេសចរណ៍ ថ្កោលទោសដាច់អហង្ការ សង្គ្រាមឈ្លានពានរបស់ថៃមកលើអធិបតេយ្យភាពកម្ពុជា

BREAKING NEWS | ចាប់ពីម៉ោង ៧ ដល់ជាង ៨ យប់នេះ យោធាថៃបានបាញ់ផ្លោងគ្រាប់ភ្លើងបំភ្លឺផ្លូវចំនួន ៤គ្រាប់លើភូមិសាស្ត្របឹងត្រកួន និងប្រើប្រាស់រថក្រោះបាញ់បំបុកចូលលំនៅដ្ឋានរបស់ប្រជាពលរដ្ឋជាច្រើនគ្រាប់

ការផ្សាយរបស់ថៃ ជាព័ត៌មានមិនពិត ខណៈកម្ពុជាគាំទ្រកិច្ចប្រជុំ GBC ដើម្បីពង្រឹងបទឈប់បាញ់ស្របតាមសេចក្តីថ្លែងការណ៍របស់ប្រធានអាស៊ាន

លោក Zelenskyy ស្វែងរកការជួបជាមួយលោក Trump ដើម្បីពិភាក្សា និងដោះស្រាយបញ្ហាដែនដី

សម្ដេចព្រះពោធិវ័ង្ស ណយ ច្រឹក យាងសួរសុខទុក្ខផ្ដល់អំណោយដល់គ្រួសារកងទ័ព និងអ្នកភៀសសឹកនៅខេត្តពោធិ៍សាត់

សង្ខេបស្ថានការណ៍នៅតាមបន្ទាត់ព្រំដែនកម្ពុជា-ថៃ អំពីករណីយោធាថៃនៅតែបន្តការបាញ់ប្រហារ ដើម្បីឈ្លានពានមកលើដែនអធិបតេយ្យរបស់កម្ពុជានៅទិសយោធភូមិភាគទី៤ និងយោធភូមិភាគទី៥

កម្ពុជា-ជប៉ុន ពង្រឹងកិច្ចសហការ ក្នុងវិស័យសកម្មភាពកម្ចាត់មីន ទាំងនៅកម្ពុជា និងក្នងសកលលោក

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877