BTV NEWS

រដ្ឋមន្រ្តីការពារជាតិជប៉ុនលោក Koizumi ច្រានចោលការចោទប្រកាន់ពីយោធានិយមថ្មី

ប្រមុខ WHO ទទួចសុំឲ្យមានការបញ្ចុះសពដោយសុវត្ថិភាព អំឡុងធ្វើដំណើរទៅកាន់តំបន់រីករាលដាលឆ្លងជំងឺអេបូឡា

អ៊ីរ៉ង់និយាយថា កិច្ចប្រជុំជាមួយអាមេរិកកំពុងបន្ត តែពុំឈានដល់កិច្ចព្រមព្រៀងផ្តាច់ព្រ័ត្រនោះទេ

UN៖ ការប៉ះទង្គិចគ្នារវាងអ៊ីស្រាអែល-ក្រុមហេសបូឡា ធ្វើឲ្យប៉ះពាល់ការចូលដល់ជំនួយនៅភាគខាងត្បូងលីបង់

ព័ត៌មានអន្តរជាតិ

កងទ័ពលីបង់រាយការណ៍អំពី«សកម្មភាពឈ្លានពាន»របស់អ៊ីស្រាអែល ដែលជា «ការរំលោភលើបទឈប់បាញ់»

កងទ័ពលីបង់ បានរាយការណ៍អំពី «សកម្មភាពឈ្លានពាន» របស់អ៊ីស្រាអែលនៅថ្ងៃសុក្រនេះ ដោយនិយាយថា ពួកគេបានរំលោភលើបទឈប់បាញ់ដែលបានចូលជាធរមាននៅពាក់កណ្តាលអធ្រាត្រ ទោះបីជាបទឈប់បាញ់រយៈពេល ១០ថ្ងៃ បានបង្កើនក្តីសង្ឃឹមក្នុងការបញ្ឈប់ជម្លោះដ៏សាហាវអស់រយៈពេលជាច្រើនសប្តាហ៍ក៏ដោយ។នៅក្នុងការបង្ហោះមួយនៅលើប្រព័ន្ធផ្សព្វផ្សាយសង្គម X នៅព្រឹកថ្ងៃសុក្រនេះ កងទ័ពលីបង់បានជំរុញឲ្យ ប្រជាជននៅភាគខាងត្បូងប្រុងប្រយ័ត្ន «ដោយសារតែការរំលោភបំពានមួយចំនួន» បន្ទាប់ពី «សកម្មភាពឈ្លានពានជាច្រើនរបស់អ៊ីស្រាអែល»។ការព្រមាននេះ បានកើតឡើងភ្លាមៗ បន្ទាប់ពីការឈប់បាញ់ បានចាប់ផ្តើម ដោយទីភ្នាក់ងារសារព័ត៌មានជាតិដែលគ្រប់គ្រងដោយរដ្ឋលីបង់ បានរាយការណ៍អំពីការបាញ់ផ្លោងរបស់អ៊ីស្រាអែល នៅក្នុងភូមិភាគខាងត្បូងនៃ Khiam និង Dibbine ប្រហែល ៣០នាទី បន្ទាប់ពីបទឈប់បាញ់ ចូលជាធរមាន។ យោធាអ៊ីស្រាអែល បាននិយាយថា ខ្លួនកំពុងពិនិត្យមើលរបាយការណ៍ទាំងនេះ។បទឈប់បាញ់ដែលប្រកាសដោយប្រធានាធិបតីអាមេរិក លោក ដូណាល់ ត្រាំ មានគោលបំណងផ្អាកការប្រយុទ្ធគ្នារវាងកងកម្លាំងអ៊ីស្រាអែល និងក្រុមសកម្មប្រយុទ្ធហេសបូឡា នៅលីបង់ ទោះបីជាក្រុមនេះ មិនមែនជាភាគីនៃកិច្ចព្រមព្រៀងជាផ្លូវការក៏ដោយ។ កិច្ចព្រមព្រៀងនេះ ក៏ត្រូវបានគេមើលឃើញថា ជាផ្នែកមួយនៃកិច្ចខិតខំប្រឹងប្រែងទូលំទូលាយ ដើម្បីរក្សាបទឈប់បាញ់ស្របគ្នាដែលពាក់ព័ន្ធនឹងអ៊ីរ៉ង់ សហរដ្ឋអាមេរិក និងអ៊ីស្រាអែល៕

ប្រធានទីភ្នាក់ងារថាមពល៖ អឺរ៉ុបនៅសល់ប្រេងឥន្ធនៈយន្តហោះប្រហែល ៦សប្តាហ៍ទៀត

ប្រធានទីភ្នាក់ងារថាមពលអន្តរជាតិ (IEA) បាននិយាយនៅក្នុងបទសម្ភាសន៍យ៉ាងទូលំទូលាយជាមួយ សារព័ត៌មាន AP កាលពីថ្ងៃព្រហស្បតិ៍ថា អឺរ៉ុបមាន «ប្រេងឥន្ធនៈយន្តហោះប្រហែល ៦សប្តាហ៍ទៀត» ដោយព្រមានអំពីការលុបចោលជើងហោះហើរដែលអាចកើតមាន «ឆាប់ៗនេះ» ប្រសិនបើការផ្គត់ផ្គង់ប្រេង នៅតែត្រូវបានរារាំងដោយសង្គ្រាមអ៊ីរ៉ង់។លោក Fatih Birol នាយកប្រតិបត្តិ IEA បានបង្ហាញពីការព្រួយបារម្ភអំពីផលវិបាកសកលនៃអ្វីដែលលោកហៅថា «វិបត្តិថាមពលដ៏ធំបំផុតដែលយើងមិនធ្លាប់បានជួបប្រទះ» ដោយសារការបិទខ្ទប់ប្រេង ឧស្ម័ន និងការផ្គត់ផ្គង់សំខាន់ៗផ្សេងទៀត តាមរយៈច្រកសមុទ្រហ័រមូស។លោកបាននិយាយថា៖«កាលពីអតីតកាលមានក្រុមមួយដែលគេហៅថា «ស្ថានភាពលំបាកយ៉ាងខ្លាំង»។ ឥឡូវនេះ ស្ថានភាពនេះ នឹងមានផលវិបាកយ៉ាងធំធេងដល់សេដ្ឋកិច្ចពិភពលោក ហើយកាន់តែយូរ វានឹងកាន់តែអាក្រក់សម្រាប់កំណើនសេដ្ឋកិច្ច និងអតិផរណា នៅជុំវិញពិភពលោក»។ដោយថ្លែងនៅក្នុងការិយាល័យរបស់លោក នៅទីក្រុងប៉ារីស និងសម្លឹងមើលទៅប៉ម Eiffel លោក Birol បានប្រាប់ AP ថា ផលប៉ះពាល់ នឹងជា«តម្លៃប្រេងសាំងខ្ពស់ តម្លៃឧស្ម័នខ្ពស់ និងតម្លៃអគ្គិសនីខ្ពស់»៕

ស៊ូដង់ចូលដល់ឆ្នាំទី៤នៃសង្គ្រាម ខណៈដែលមន្ត្រីនានាសោកស្ដាយចំពោះ «វិបត្តិដែលគេបោះបង់ចោល»

គ្រោះទុរ្ភិក្ស ការសម្លាប់រង្គាល ហើយឥឡូវនេះ ស្បៀងអាហារ និងសម្ភារៈផ្សេងៗទៀតដែលត្រូវការយ៉ាងខ្លាំង កំពុងស្ថិតក្នុងស្ថានភាពលំបាក។ កាលពីថ្ងៃពុធ ប្រទេសស៊ូដង់ បានចូលដល់ឆ្នាំទី៤ នៃសង្គ្រាម ដែលត្រូវបានគេហៅថា «វិបត្តិដែលគេបោះបង់ចោល» ស្របពេលជម្លោះមជ្ឈិមបូព៌ាថ្មីមួយ បានធ្លាក់ចូលទៅក្នុងស្រមោលនៃការប្រយុទ្ធគ្នា ដែលបានបង្ខំឲ្យមនុស្ស ១៣លាននាក់ រត់គេចខ្លួនចេញពីផ្ទះសម្បែងរបស់ពួកគេ។ប្រទេសស៊ូដង់ ត្រូវបានពិពណ៌នាថា ជាបញ្ហាប្រឈមមនុស្សធម៌ដ៏ធំបំផុតរបស់ពិភពលោក ជាពិសេសទាក់ទងនឹងការផ្លាស់ទីលំនៅ និងភាពអត់ឃ្លាន។ ការប្រយុទ្ធគ្នារវាងយោធា និងក្រុមកងកម្លាំងគាំទ្ររហ័ស (RSF) ទំនងជាបន្តអូសបន្លាយពេលយូរទៀត ដោយសាក្សី និងក្រុមផ្តល់ជំនួយនិយាយថា បានបំផ្លាញផ្នែកខ្លះនៃតំបន់ Darfur ដ៏ធំទូលាយនោះ។កិច្ចប្រឹងប្រឹងរបស់សហរដ្ឋអាមេរិក និងមហាអំណាចក្នុងតំបន់ បានបរាជ័យក្នុងការបង្កើតបទឈប់បាញ់។ដោយចង្អុលម្រាមដៃលើស្លាកស្នាមនៅលើក្បាលរបស់លោក ជាកន្លែងដែលលោក បាននិយាយថា អ្នក បាញ់ស៊ីបរបស់កងកម្លាំងគាំទ្ររហ័ស ( RSF) បានបាញ់លោក នៅក្នុងទីក្រុង Omdurman ជិតទីក្រុង ខាទុំ( Khartoum) រដ្ឋធានីនៃប្រទេសស៊ូដង់ លោក Hussein Mohammed Shareef បានអះអាងថា៖«យើងបានបាត់បង់មនុស្សយ៉ាងច្រើន នៅក្នុងសង្គ្រាមនេះ»៕

សង្គ្រាមអ៊ីរ៉ង់បង្ហាញពីស្ថានភាពចុះខ្សោយនៃកងកម្លាំងប្រដាប់អាវុធរបស់ចក្រភពអង់គ្លេស

សង្គ្រាមអ៊ីរ៉ង់ បានបង្ហាញពីចំណុចខ្សោយសំខាន់ៗនៃកងកម្លាំងប្រដាប់អាវុធរបស់ចក្រភពអង់គ្លេស ដោយបង្កើនសម្ពាធយ៉ាងខ្លាំងទៅលើលោកនាយករដ្ឋមន្ត្រី Keir Starmer ឲ្យធ្វើសកម្មភាពតាមការសន្យារបស់លោក ក្នុងការវិនិយោគលើវិស័យការពារជាតិ បន្ទាប់ពីការព្រមានជាច្រើនឆ្នាំពីក្រុមមេដឹកនាំយោធាអំពីសមត្ថភាពរួមតូចរបស់ប្រទេសនេះ។នៅពេលដែលមូលដ្ឋានយោធាអង់គ្លេសមួយនៅប្រទេសកោះស៊ីប ត្រូវបានវាយប្រហារដោយយានដ្រូន នៅដើមដំបូងនៃជម្លោះអ៊ីរ៉ង់ ក្នុងខែមីនា ចក្រភពអង់គ្លេស ដែលកងទ័ពជើងទឹករបស់ខ្លួនធំជាងគេបំផុតនៅលើពិភពលោក នៅពេលចាប់ផ្តើមសង្គ្រាមលោកលើកទី២ បានចំណាយពេលបីសប្តាហ៍ ដើម្បីដាក់ពង្រាយនាវាចម្បាំងមួយគ្រឿងទៅកាន់សមុទ្រមេឌីទែរ៉ាណេភាគខាងកើត។ប្រទេសបារាំង ក្រិក និងអ៊ីតាលី បានបញ្ជូននាវាចម្បាំងទៅកាន់កោះស៊ីប ក្នុងរយៈពេលប៉ុន្មានថ្ងៃ។ សមត្ថភាពយោធាដែលថយចុះរបស់ចក្រភពអង់គ្លេស ត្រូវបានប្រធានាធិបតីអាមេរិក លោក ដូណាល់ ត្រាំ រិះគន់ជាបន្តបន្ទាប់។ លោកបានចាត់ទុកនាវាផ្ទុកយន្តហោះពីរគ្រឿងរបស់ចក្រភពអង់គ្លេសថា ជា «របស់ក្មេងលេង» ខណៈពេលដែលរដ្ឋមន្ត្រីការពារជាតិរបស់ខ្លួន លោក Pete Hegseth បាននិយាយចំអកអ្វីដែលលោកហៅថា «កងទ័ពជើងទឹកមានចំនួនច្រើន ប៉ុន្តែសមត្ថភាពខ្សោយ»។ដោយការពារកំណត់ត្រារបស់លោកលើកងកម្លាំងប្រដាប់អាវុធ លោក Starmer បាននិយាយកាលពីថ្ងៃពុធថា រដ្ឋាភិបាលរបស់ខ្លួនដែលកាន់អំណាចរយៈពេលជិតពីរឆ្នាំនេះ បានបង្កើនការចំណាយលើយោធាច្រើនបំផុត ចាប់តាំងពីសង្គ្រាមត្រជាក់៕

ប្រមុខUN ជំរុញឲ្យមាន «ការគោរព» ចំពោះបទឈប់បាញ់អ៊ីស្រាអែល-លីបង់

អ្នកនាំពាក្យរបស់លោក បាននិយាយថា ប្រមុខអង្គការសហប្រជាជាតិ លោក អង់តូនីញ៉ូ ហ្គុយតឺរេស (Antonio Guterres) បានស្វាគមន៍ចំពោះបទឈប់បាញ់រយៈពេល ១០ថ្ងៃ ដែលបានប្រកាសកាលពីថ្ងៃព្រហស្បតិ៍រវាងអ៊ីស្រាអែល និងលីបង់ ហើយបានជំរុញឲ្យ«តួអង្គទាំងអស់» គោរពបទឈប់បាញ់យ៉ាងពេញលេញ។ អ្នកនាំពាក្យ លោក Stephane Dujarric បានថ្លែងក្នុងសេចក្តីថ្លែងការណ៍មួយថា៖«លោកអគ្គលេខាធិការស្វាគមន៍ចំពោះការប្រកាសបទឈប់បាញ់រយៈពេល ១០ថ្ងៃ រវាងអ៊ីស្រាអែល និងលីបង់ ហើយសរសើរ តួនាទីរបស់សហរដ្ឋអាមេរិកក្នុងការសម្របសម្រួល»បទឈប់បាញ់នេះ។ លោកបានបន្ថែមថា លោកសង្ឃឹមថា ការបញ្ឈប់ការប្រយុទ្ធជាបណ្តោះអាសន្ន នឹង«បើកផ្លូវសម្រាប់ការចរចា»។លោកបាននិយាយថា លោក ហ្គុយតឺរេស «ជំរុញឲ្យតួអង្គទាំងអស់គោរពបទឈប់បាញ់យ៉ាងពេញលេញ និងគោរពតាមកាតព្វកិច្ចរបស់ពួកគេ ក្រោមច្បាប់អន្តរជាតិ រួមទាំងច្បាប់មនុស្សធម៌អន្តរជាតិ គ្រប់ពេលវេលា» ជាសេចក្តីថ្លែងការណ៍មួយដែលអាចពង្រីកហួសពីអ៊ីស្រាអែល និងលីបង់ រហូតដល់ក្រុមសកម្មប្រយុទ្ធហេសបូឡាថែមទៀតផង៕

បទឈប់បាញ់រយៈពេល ១០ថ្ងៃ រវាងអ៊ីស្រាអែល និងលីបង់ ចូលជាធរមាន

បទឈប់បាញ់រយៈពេល ១០ថ្ងៃ រវាងអ៊ីស្រាអែល និងលីបង់ បានចូលជាធរមាន នៅពាក់កណ្តាលអធ្រាត្ររវាងថ្ងៃព្រហស្បតិ៍ និងថ្ងៃសុក្រ ម៉ោងក្នុងស្រុក (ម៉ោង ២១: 00 ម៉ោងសកល) បន្ទាប់ពីការប្រកាសមុននេះដោយប្រធានាធិបតីអាមេរិក លោក ដូណាល់ ត្រាំ។បទឈប់បាញ់នេះ មានគោលបំណងបញ្ចប់ការកើនឡើងភាពតានតឹងដ៏សាហាវជាងមួយខែ រវាងអ៊ីស្រា អែល និងក្រុមហេសបូឡា ដែលបានឆក់យកជីវិតមនុស្សជាង ២.០០០នាក់។នៅក្នុងសេចក្តីថ្លែងការណ៍មួយ យោធាអ៊ីស្រាអែល បាននិយាយថា ខ្លួនបានវាយប្រហារគោលដៅរបស់ក្រុមហេសបូឡាជាង ៣៨០ កន្លែង នៅភាគខាងត្បូងប្រទេសលីបង់ ក្នុងរយៈពេលមួយថ្ងៃកន្លងមក រួមទាំងក្រុមសកម្មប្រយុទ្ធ ជើងទម្របាញ់រ៉ូកែត និងទីបញ្ជាការយោធារបស់ក្រុមនេះ។សេវាជួយសង្គ្រោះអ៊ីស្រាអែល Magen David Adom បានអះអាងថា ក្រុមហេសបូឡា បានបាញ់រ៉ូកែតជាច្រើនគ្រាប់ ចូលទៅក្នុងទឹកដីអ៊ីស្រាអែល អំឡុងពេលប៉ុន្មានម៉ោងចុងក្រោយ មុនពេលបទឈប់បាញ់ចូលជាធរមាន ដែលបានបណ្តាលឲ្យមនុស្ស បីនាក់ រងរបួស។ នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បាននិយាយនៅក្នុងសេចក្តីថ្លែងការណ៍តាម វីដេអូថា អ៊ីស្រាអែលនឹងរក្សាតំបន់សន្តិសុខចម្ងាយ ១០គីឡូម៉ែត្រ នៅភាគខាងត្បូងប្រទេសលីបង់ អំឡុងពេលបទឈប់បាញ់នេះ៕

មីយ៉ាន់ម៉ានឹងដោះលែងអ្នកទោសជាង ៤.០០០នាក់ ជាការលើកលែងទោស

នៅថ្ងៃសុក្រ (ទី១៧ ខែមេសា ឆ្នាំ២០២៦) នេះ ទូរទស្សន៍រដ្ឋបានរាយការណ៍ថា ប្រធានាធិបតីថ្មីរបស់សហភាពមីយ៉ាន់ម៉ា លោក មីន អ៊ុងឡាំង (Min Aung Hlaing) បានអនុម័តការលើកលែងទោសដល់អ្នកទោសចំនួន ៤.៣៣៥នាក់ ដែលជាការមានចំណាត់ការបែបនេះលើកទី៣ ក្នុងរយៈពេល ៣ខែកន្លងមកនេះ។យ៉ាងណាក្ដី ឈ្មោះរបស់អ្នកដែលរួមបញ្ចូលក្នុងការលើកលែងទោសមិនត្រូវបានបង្ហាញ នៅក្នុងសេចក្តីប្រកាស នៅលើទូរទស្សន៍ MRTV ទេ។ ការលើកលែងទោសនេះ ជាធម្មតាធ្វើឡើងនៅក្នុងប្រទេសមីយ៉ាន់ម៉ាជារៀងរាល់ឆ្នាំ ដើម្បីអបអរសាទរទិវាឯករាជ្យរបស់ខ្លួនក្នុងខែមករា និងឆ្នាំថ្មីរបស់ខ្លួន នៅខែមេសា។ បើយោងតាមប្រព័ន្ធផ្សព្វផ្សាយ MRTV បានឲ្យដឹងទៀតថា ក្នុងចំណោមអ្នកទោសទាំង ៤.៣៣៥នាក់ដែលត្រូវដោះលែងនេះ មានជនបរទេសចំនួន ១៧៩នាក់ ដែលនឹងត្រូវនិរទេស។ ហើយដោយមិនបានពន្យល់លម្អិតឲ្យបានច្បាស់លាស់ សេចក្ដីរាយការណ៍នេះក៏បានលើកឡើងពីការបន្ថយទោសប្រហារជីវិតមកត្រឹមជាប់ទោសអស់មួយជីវិត ហើយទោសជាប់ពន្ធនាគារអស់មួយជីវិតមកត្រឹម ៤០ឆ្នាំ និងការបន្ថយទោស ១ភាគ៦ សម្រាប់អ្នកទោសផ្សេងទៀតផងដែរ។គួរបញ្ជាក់ថា សមាគមជំនួយ សម្រាប់អ្នកទោសនយោបាយ ដែលជាក្រុមសិទ្ធិមនុស្ស បានឲ្យដឹងថា មនុស្សជាង ៣០.០០០នាក់ ត្រូវបានឃុំខ្លួនពីបទចោទប្រកាន់នយោបាយ ចាប់តាំងពីយោធាដឹកនាំដោយលោក មីន អ៊ុង លាំង វ័យ ៦៩ឆ្នាំ ដែលត្រូវបានសភាជ្រើសរើសជាប្រធានាធិបតីកាលថ្ងៃទី៣ ខែមេសា បានធ្វើរដ្ឋប្រហារប្រឆាំងនឹងរដ្ឋាភិបាលជាប់ឆ្នោតរបស់លោកស្រី លោកស្រី អ៊ុង សាន ស៊ូជី (Aung San Suu Kyi) ក្នុងឆ្នាំ២០២១។ លោកស្រី ស៊ូជី កំពុងអនុវត្តទោសជាប់ពន្ធនាគាររយៈពេល ២៧ឆ្នាំ ពាក់ព័ន្ធនឹងបទល្មើសជាច្រើនដែលសម្ព័ន្ធមិត្តរបស់លោកស្រី បានលើកឡើងថា មានហេតុផលខាងនយោបាយ ដើម្បីធ្វើលោកស្រីឲ្យនៅឆ្ងាយពីឆាកនយោបាយ ដោយបទចោទទាំងនោះ មានរាប់ចាប់ពីការញុះញង់ និងអំពើពុករលួយ រហូតដល់ការក្លែងបន្លំការបោះឆ្នោត និងការរំលោភច្បាប់សម្ងាត់រដ្ឋ៕

រុស្ស៊ីបើកការវាយប្រហារតាមអាកាសដ៏សាហាវបំផុតក្នុងរយៈពេលជាច្រើនខែ ដោយសម្លាប់មនុស្ស ១៨ នាក់នៅអ៊ុយក្រែន

រុស្ស៊ីបានបាញ់យានដ្រូន និងមីស៊ីលជាង ៧០០ គ្រាប់ ទៅលើអ៊ុយក្រែនក្នុងរលកជាច្រើនដងពេញមួយយប់ ដោយសម្លាប់មនុស្សយ៉ាងហោចណាស់ ១៨ នាក់ ដែលមន្ត្រីមូលដ្ឋានបាននិយាយថាជាការវាយប្រហារដ៏សាហាវបំផុតក្នុងរយៈពេលប៉ុន្មានខែមកនេះ។មន្ត្រីបាននិយាយថា មនុស្សប្រាំបួននាក់ត្រូវបានសម្លាប់នៅក្នុងទីក្រុងកំពង់ផែភាគខាងត្បូង Odesa ប្រាំនាក់នៅទីក្រុង Dnipro ភាគកណ្តាល និងបួននាក់ រួមទាំងកុមារម្នាក់ នៅក្នុងរដ្ឋធានី Kyiv។ទីក្រុងមូស្គូ បានឲ្យដឹងថា នៅប្រទេសរុស្ស៊ី មនុស្សពីរនាក់ រួមទាំងកុមារម្នាក់ ត្រូវបានសម្លាប់ក្នុងការវាយប្រហារដោយយានដ្រូនរបស់អ៊ុយក្រែននៅតំបន់ Krasnodar ភាគខាងត្បូង ។ការវាយប្រហារទៅវិញទៅមកនេះ កើតឡើងបន្ទាប់ពីបទឈប់បាញ់មួយរយៈពេលខ្លីបានកើតឡើងក្នុងអំឡុងពេលបុណ្យ Easter សាសនាគ្រិស្តអូតូដុកកាលពីចុងសប្តាហ៍មុន ទោះបីជាភាគីទាំងពីរបានចោទប្រកាន់គ្នាទៅវិញទៅមកពីបទរំលោភបំពានបទឈប់បាញ់រាប់រយលើកក៏ដោយ។រុស្ស៊ីបានបើកការវាយប្រហារទ្រង់ទ្រាយធំលើអ៊ុយក្រែនក្នុងខែកុម្ភៈ ឆ្នាំ ២០២២។នៅទីក្រុង Kyiv សំឡេងស៊ីរ៉ែនព្រមានបានធ្វើឱ្យមនុស្សភ្ញាក់ពីដំណេកនៅម៉ោង ០២:៣០នាទី ម៉ោងក្នុងស្រុកកាលពីថ្ងៃព្រហស្បតិ៍ សប្ដាហ៍នេះ បន្ទាប់ពីមានការផ្ទុះលើកដំបូង។រូបភាពដែលបានបង្ហោះតាមអ៊ីនធឺណិតដោយសាក្សីដែលបានមើលឃើញផ្ទាល់ភ្នែកបង្ហាញពីអណ្ដាតភ្លើងឆាបឆេះយ៉ាងសន្ធោសន្ធៅ និងផ្សែងខ្មៅខ្មួលខ្មាញ់នៅតំបន់កណ្តាលទីក្រុង។ នៅក្នុងវីដេអូមួយ យានដ្រូនមួយគ្រឿងត្រូវគេថតបានពេលកំពុងហោះបំបុកចំ ចំហៀងអគាអឹផាតមិនមួយ។អភិបាលក្រុងគីវ លោក Vitali Klitschko បានសរសេរនៅលើ Telegram ថា ក្មេងប្រុសអាយុ១២ ឆ្នាំម្នាក់ស្ថិតក្នុងចំណោមមនុស្សបួននាក់ដែលបានស្លាប់។ មនុស្ស៤៥នាក់ផ្សេងទៀតបានរងរបួស៕

ស៊ីរី៖ ការប្រគល់ឲ្យទៅរដ្ឋាភិបាលនៃទីតាំងយោធាដែលត្រូវបានប្រើប្រាស់ដោយកងកម្លាំងអាមេរិក បានបញ្ចប់

ស៊ីរី បាននិយាយកាលពីថ្ងៃព្រហស្បតិ៍ ទី១៦ ខែមេសា ថា ការប្រគល់ទៅឱ្យរដ្ឋាភិបាលនូវទីតាំងយោធាដែលកាលពីពេលមុនត្រូវបានប្រើប្រាស់ដោយកងទ័ពសហរដ្ឋអាមេរិកបានបញ្ចប់ ដែលខ្លួនបាននិយាយថា បង្ហាញពីការរួមបញ្ចូលគ្នាដោយជោគជ័យនៃក្រុមកងកម្លាំងប្រជាធិបតេយ្យស៊ីរី(SDF) ដឹកនាំដោយក្រុមឃឺដ ទៅក្នុងរចនាសម្ព័ន្ធជាតិ។វីដេអូមួយរបស់សារព័ត៌មានរ៉យទ័រ បានបង្ហាញពីបុគ្គលិកមកពីកងកម្លាំងប្រជាធិបតេយ្យស៊ីរីដឹកនាំដោយក្រុមឃឺដ និងកងទ័ពស៊ីរី កំពុងដណ្តើមយកការគ្រប់គ្រងមូលដ្ឋាន Qasrak នៅតំបន់ Hasakah កាលពីថ្ងៃព្រហស្បតិ៍។ផ្សែងត្រូវបានគេមើលឃើញហុយឡើងពីផ្នែកមួយចំនួននៅមូលដ្ឋាន ដែលអ្នកប្រយុទ្ធកងកម្លាំងប្រជាធិបតេយ្យស៊ីរី(SDF) ម្នាក់បាននិយាយថា បណ្តាលមកពីកងកម្លាំងអាមេរិក ដុតសម្ភារៈមុនពេលពួកគេចាកចេញ។រដ្ឋាភិបាលស៊ីរី និងកងកម្លាំងឃឺដ បានប្រកាសពីកិច្ចព្រមព្រៀងបទឈប់បាញ់មួយកាលពីខែមករា ដែលបានកំណត់ពីសមាហរណកម្មជាដំណាក់កាលរបស់អ្នកប្រយុទ្ធឃឺដ ជាសម្ព័ន្ធមិត្តយូរអង្វែងជាមួយសហរដ្ឋអាមេរិក ចូលទៅក្នុងរដ្ឋនេះ។ ទីក្រុងវ៉ាស៊ីនតោន បានដាក់មូលដ្ឋានកងទ័ពនៅក្នុងប្រទេសស៊ីរីរយៈពេលជាងមួយទសវត្សរ៍មកហើយ ដើម្បីជួយប្រយុទ្ធប្រឆាំងក្រុមរដ្ឋអ៊ីស្លាម។

កងកម្លាំងអាមេរិក អាមេរិកកណ្តាល និងដូមីនីក ចាប់ផ្តើមសមយុទ្ធយោធាពហុជាតិសាសន៍រួមគ្នា

កងកម្លាំងយោធាមកពីអាមេរិកកណ្តាល សាធារណរដ្ឋដូមីនីក និងសហរដ្ឋអាមេរិក បានចាប់ផ្តើមសមយុទ្ធយោធាពហុជាតិសាសន៍មួយនៅប្រទេសអែលសាល់វ៉ាឌ័រ កាលពីថ្ងៃព្រហស្បតិ៍ ទី១៦ ខែមេសា ក្នុងគោលបំណងពង្រឹងកិច្ចសហប្រតិបត្តិការសន្តិសុខប្រចាំតំបន់ប្រឆាំងការជួញដូរគ្រឿងញៀន ឧក្រិដ្ឋកម្មរៀបចំទុក និងការធ្វើអន្តោប្រវេសន៍ខុសច្បាប់។សមយុទ្ធនេះ ត្រូវបានបើកនៅមូលដ្ឋានទីបញ្ជាការកងកម្លាំងពិសេសរបស់ប្រទេសអែលសាល់វ៉ាឌ័រ ក្នុងទីក្រុង Ilopango ហើយដឹកនាំដោយទីបញ្ជាការភាគខាងត្បូងសហរដ្ឋអាមេរិក។ វានឹងដំណើរការរហូតដល់ថ្ងៃទី២៧ ខែមេសា នៅទូទាំងទីតាំងជាច្រើនកន្លែងក្នុងប្រទេសអែលសាល់វ៉ាឌ័រ ដែលកំពុងសហការធ្វើជាម្ចាស់ផ្ទះរួមគ្នានៃសមយុទ្ធនេះ ជាមួយសហរដ្ឋអាមេរិក។ប្រទេសដែលចូលរួមមាន ប្រទេសអែលសាល់វ៉ាឌ័រ កាតេម៉ាឡា ហុងឌុយរ៉ាស កូស្តារីកា បេលីស សាធារណរដ្ឋដូមីនីក និងសហរដ្ឋអាមេរិក ដោយបន្តសមយុទ្ធប្រចាំឆ្នាំដែលត្រូវបានធ្វើឡើងចាប់តាំងពីឆ្នាំ២០២២។ អនុប្រធានទីបញ្ជាការភាគខាងត្បូងសហរដ្ឋអាមេរិក លោក Evan Pettus បានពិពណ៌នាអំពីសមយុទ្ធនេះថាជា «ការបង្ហាញដ៏រស់រវើកអំណាចនៃភាពជាដៃគូ» ដោយនិយាយថា វាគ្របដណ្តប់លើដែនគោក ដែនសមុទ្រ ដែនអាកាស និងលំហអាកាស និងរួមបញ្ចូលចំណុចខ្លាំងៗរបស់ប្រទេសដែលមកចូលរួម។រដ្ឋមន្ត្រីក្រសួងការពារជាតិអែលសាល់វ៉ាឌ័រ លោក Rene Merino Monroy បាននិយាយថា លំហាត់សមយុទ្ធនេះផ្តោតសំខាន់លើប្រតិបត្តិការឆ្លើយតបរហ័ស ដើម្បីទប់ទល់ការគំរាមកំហែង រួមទាំងការជួញដូរគ្រឿងញៀន ឧក្រិដ្ឋកម្មរៀបចំទុក ក្រុមជនអន្ធពាល ការធ្វើអន្តោប្រវេសន៍ខុសច្បាប់ ការជួញដូរអាវុធ និងការជួញដូរមនុស្សនៅតាមច្រកព្រំដែន។

បណ្ដាញសង្គម

ព័ត៌មានថ្មីៗ

ឯកឧត្តម ឌី វិជ្ជា និងលោកជំទាវ ហ៊ុន ម៉ាណា អញ្ជើញនាំយកទេយ្យវត្ថុ ប្រគេនព្រះសង្ឃ និងចែកអំណោយប្រជាពលរដ្ឋ នៅស្រុកភ្នំស្រួច ខេត្តកំពង់ស្ពឺ

ឯកឧត្តមកិត្តិសង្គហបណ្ឌិត គន់ គីម អញ្ជើញជួបប្រជាពលរដ្ឋភៀសសឹក និងពិនិត្យទីតាំងរៀបចំផ្សារបណ្តោះអាសន្ន ក្នុងខេត្តបន្ទាយមានជ័យ

ក្រសួងការងារ៖ ខេត្តស្ថិតក្នុងតំបន់ទំនាបកណ្ដាលចំនួន៣ មានឱកាសការងារជាង ៨,០០០កន្លែង កំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

ក្រសួងការងារ៖ នៅខេត្តជាប់សមុទ្រទាំង៤ មានឱកាសការងារជិត ៧,០០០កន្លែង ដែលកំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

ឯកឧត្តមឧបនាយករដ្ឋមន្ត្រី ហ៊ុន ម៉ានី៖ វិញ្ញាសាតាក់តែងចប់ភ្លាម ប្រឡងភ្លាមតែម្តង

ក្រសួងការងារ៖ ខេត្តចំនួន៤ នៅភូមិភាគឦសាន្ត មានឱកាសការងារជិត ៤,០០០កន្លែង កំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

អាជ្ញាធរជាតិអប្សរា និង JQA បិទបញ្ចប់កម្មវិធីអប់រំបរិស្ថានសម្រាប់កុមារ ឆ្នាំ២០២៦ និងប្រគល់រង្វាន់ដល់សិស្សឆ្នើម

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877