BTV NEWS

ក្រុមអ្នកជួយសង្គ្រោះ៖ មនុស្ស ៤នាក់ទៀតដែលជាប់ក្នុងរូងភ្នំ នៅឡាវ ត្រូវបាននាំចេញដោយសុវត្ថិភាព

លោក Hegseth៖ យុគសម័យឧបត្ថម្ភធនការពារជាតិពីអាមេរិក សម្រាប់ «ប្រទេសអ្នកមាន» ចប់ហើយ

មន្ត្រីជាន់ខ្ពស់អ៊ីរ៉ង់ និយាយថា លោក Trump «ក្បត់ការទូត» ដោយបន្តបិទខ្ទប់ដោយទ័ពជើងទឹកអាមេរិក

វេជ្ជបណ្ឌិត៖ សុខភាពលោក Trump គឺល្អប្រសើរណាស់ ប៉ុន្តែគួរតែសម្រកទម្ងន់

ព័ត៌មានអន្តរជាតិ

ប្រទេសបារាំង ប្រកាសពីការជំរុញថវិកាចំនួន ៣៦ ពាន់លានអឺរ៉ូ ដើម្បីធ្វើឲ្យប្រសើរឡើងវិញផ្នែកសព្វាវុធ

រដ្ឋមន្ត្រីក្រសួងការពារជាតិ លោកស្រី Catherine Vautrin កាលពីថ្ងៃពុធ ទី៨ ខែមេសា ក្នុងអំឡុងពេលសន្និសីទសារព័ត៌មានមួយ បាននិយាយថា ប្រទេសបារាំង មានផែនការបន្ថែមថវិកាចំនួន ៣៦ ពាន់លានអឺរ៉ូ (៣៩ ពាន់លានដុល្លារ) បន្ថែមទៀតទៅក្នុងការចំណាយលើវិស័យការពារជាតិរបស់ខ្លួនចាប់ពីពេលនេះរហូតដល់ឆ្នាំ២០៣០ ក្រោមច្បាប់ផែនការយោធាដែលបានធ្វើបច្ចុប្បន្នភាព ដោយពង្រីកឃ្លាំងអាវុធនុយក្លេអ៊ែររបស់ខ្លួន និងបង្កើនការស្តុកមីស៊ីល និងយានដ្រូន។ការបង្កើននេះ ត្រូវបានស្នើឡើង ទោះបីជាមានឱនភាពថវិកាធំបំផុតមួយរបស់តំបន់ចាយប្រាក់អឺរ៉ូក៏ដោយ ដែលបានបង្ហាញពីសម្ពាធសន្តិសុខកាន់តែខ្លាំងឡើងពីសង្គ្រាមនៅអ៊ុយក្រែន និងនៅមជ្ឈិមបូព៌ា និងការកើនឡើងភាពមិនប្រាកដប្រជាជុំវិញការប្តេជ្ញាចិត្តរបស់សហរដ្ឋអាមេរិកចំពោះសម្ព័ន្ធយោធាណាតូ ក្រោមរបបប្រធានាធិបតីសហរដ្ឋអាមេរិក លោក Donald Trump។លោកស្រី Vautrin បាននិយាយថា «ជម្លោះបច្ចុប្បន្ននេះ ពង្រីកពីបាតសមុទ្រទៅលំហអាកាស ហើយយើងត្រូវតែមានសមត្ថភាពក្នុងការឆ្លើយតបនៅទូទាំងដែនទាំងអស់នោះ»។ច្បាប់ឆ្នាំ២០២៤-២០៣០ ដែលត្រូវបានកែប្រែ នឹងបង្កើនការចំណាយលើវិស័យការពារជាតិដល់ ២,៥% នៃផលិតផលក្នុងស្រុកសរុប (GDP) នៅចុងទសវត្សរ៍នេះ ពីប្រហែល ២% នាពេលបច្ចុប្បន្ន ដោយថវិកាប្រចាំឆ្នាំនឹងឈានដល់៧៦,៣ ពាន់លានអឺរ៉ូ (៨៩,២៥ ពាន់លានដុល្លារ) ក្នុងឆ្នាំ២០៣០។ លោកស្រី Vautrin ក៏បាននិយាយផងដែរថា នៅឆ្នាំ២០៣១ ប្រទេសបារាំងរំពឹងថានឹងទទួលបានការបញ្ជាទិញទាក់ទងនឹងវិស័យការពារជាតិចំនួន ២៦ ពាន់លានអឺរ៉ូ (៣០,៤១ ពាន់លានដុល្លារ)។

ប្រេងឡើងថ្លៃ ខណៈក្រុមវិនិយោគិននៅតែមានការប្រុងប្រយ័ត្នចំពោះបទឈប់បាញ់រអាមេរិក-អ៊ីរ៉ង់

តម្លៃប្រេងបានកើនឡើងនៅថ្ងៃព្រហស្បតិ៍៩មេសានេះ ដោយសារក្តីបារម្ភរបស់ក្រុមវិនិយោគិនថា ការផ្គត់ផ្គង់ពីតំបន់ផលិតប្រេងដ៏សំខាន់នៅមជ្ឈិមបូព៌ាអាចនឹងមិនបន្តឡើងវិញទាំងស្រុងទេ ស្របពេលមានការប្រុងប្រយ័ត្នចំពោះបទឈប់បាញ់រយៈពេលពីរសប្តាហ៍រវាងសហរដ្ឋអាមេរិក និងអ៊ីរ៉ង់ ខណៈច្រកសមុទ្រ Hormuz ដ៏សំខាន់នៅតែមានការរឹតត្បិត។តម្លៃប្រេងឆៅ Brent បានកើនឡើង២,៦ ដុល្លារ ឬ ២,៧៤% ដល់៩៧,៣៥ ដុល្លារក្នុងមួយបារ៉ែល នៅម៉ោង ០០និង៤៨នាទី ម៉ោងសកល ខណៈប្រេងឆៅ West Texas Intermediate (WTI) របស់សហរដ្ឋអាមេរិកដែរនោះបានកើនឡើង៣,០២ដុល្លារ ឬ៣,២%ដល់៩៧,៤៣ ដុល្លារក្នុងមួយបារ៉ែល។តម្លៃគោលទាំងពីរបានធ្លាក់ចុះក្រោម១០០ដុល្លារក្នុងមួយបារ៉ែលក្នុងវគ្គជួញដូរកាលពីកន្លងទៅ ដោយ WTI បានកត់ត្រាការធ្លាក់ចុះធំបំផុតរបស់ខ្លួនចាប់តាំងពីខែមេសា ឆ្នាំ ២០២០ លើការរំពឹងទុកថាបទឈប់បាញ់ដែលបញ្ចប់ការប្រយុទ្ធគ្នារវាងសហរដ្ឋអាមេរិក និងអ៊ីស្រាអែលប្រឆាំងនឹងអ៊ីរ៉ង់ នឹងបើកច្រកសមុទ្រ Hormuz ឡើងវិញ។ផ្លូវទឹកនេះភ្ជាប់ការផ្គត់ផ្គង់ពីប្រទេសផលិតប្រេងនៅឈូងសមុទ្រដូចជាអ៊ីរ៉ាក់ អារ៉ាប៊ីសាអ៊ូឌីត កូវ៉ែត និងកាតាទៅកាន់ទីផ្សារពិភពលោក ហើយជាធម្មតាដឹកជញ្ជូនប្រហែល២០% នៃការផ្គត់ផ្គង់ប្រេង។យ៉ាងណាក៏ដោយ សំណួរអំពីលទ្ធភាពជោគជ័យនៃបទឈប់បាញ់នៅតែមាន ខណៈអ៊ីស្រាអែលបានបន្តវាយប្រហារប្រទេសលីបង់កាលពីថ្ងៃពុធ ដែលបណ្តាលឱ្យអ៊ីរ៉ង់ព្រមានថា នឹងមិនសមហេតុផលទេក្នុងការបន្តការចរចាដើម្បីបង្កើតកិច្ចព្រមព្រៀងសន្តិភាពអចិន្ត្រៃយ៍៕

អ៊ីស្រាអែលវាយប្រហារទូទាំងលីបង់សម្លាប់មនុស្សជាង២៥០នាក់ក្រោយបទឈប់បាញ់រវាងអ៊ីរ៉ង់-អាមេរិក

ការវាយប្រហាររបស់អ៊ីស្រាអែលបានប៉ះចំតំបន់ពាណិជ្ជកម្ម និងលំនៅឋានជាច្រើនកន្លែងនៅកណ្តាលទីក្រុងបេរូត ប្រទេសលីបង់ ដែលគ្មានការព្រមានជាមុន ដោយបានសម្លាប់មនុស្សរាប់រយនាក់ និងមនុស្សជាង១.០០០ នាក់ផ្សេងទៀតរបួស ប៉ុន្មានម៉ោងបន្ទាប់ពីបទឈប់បាញ់ត្រូវបានប្រកាសនៅក្នុងសង្គ្រាមរវាងសហរដ្ឋអាមេរិក និងអ៊ីស្រាអែល លើអ៊ីរ៉ង់។ ក្រសួងការពារជាតិស៊ីវិលលីបង់បាននិយាយថា មនុស្សយ៉ាងហោចណាស់ ២៥៤ នាក់ត្រូវបានសម្លាប់ និង ១.១៦៥ នាក់ផ្សេងទៀតបានរងរបួសនៅក្នុងការវាយប្រហារកាលពីថ្ងៃពុធ៨មេសាសប្ដាហ៍នេះ។រដ្ឋមន្ត្រីក្រសួងសុខាភិបាលលោក Rakan Nassereddine បាននិយាយថា ប្រទេសលីបង់កំពុងប្រឈមនឹងការកើនឡើងដ៏គ្រោះថ្នាក់ បន្ទាប់ពីអ៊ីស្រាអែលបានបើកការវាយប្រហារតាមអាកាសជាង ១០០លើក នៅទូទាំងប្រទេស។លោក Nassereddine បានប្រាប់សារព័ត៌មាន Al Jazeera ថា រថយន្តសង្គ្រោះបន្ទាន់នៅតែដឹកជញ្ជូនជនរងគ្រោះទៅកាន់មន្ទីរពេទ្យ ហើយពួកលោកជំរុញឱ្យអង្គការអន្តរជាតិជួយដល់វិស័យសុខាភិបាលលីបង់។កងទ័ពអ៊ីស្រាអែលបាននិយាយថា ខ្លួនបានវាយប្រហារដោយមានការសម្របសម្រួលដ៏ធំបំផុតរបស់ខ្លួននៅទូទាំងប្រទេសលីបង់ចាប់តាំងពីបានចាប់ផ្តើមប្រតិបត្តិការយោធាថ្មីនៅក្នុងប្រទេសនេះកាលពីថ្ងៃទី ២ មីនា បន្ទាប់ពីការផ្ទុះសង្គ្រាមអាមេរិក- អ៊ីស្រាអែលលើអ៊ីរ៉ង់ ថ្ងៃ២៨កុម្ភៈ២០២៦ នៅពេលដែលក្រុមហេសបូឡាបើកការវាយប្រហារលើអ៊ីស្រាអែល ជាការបង្ហាញសាគ្គីភាពជាមួយអ៊ីរ៉ង់។ ការវាយប្រហារបានកំណត់គោលដៅតំបន់នានានៅទីក្រុងបេរូត ជ្រលងភ្នំ Bekaa និងភាគខាងត្បូងប្រទេសលីបង់។ចាប់តាំងពីពេលនោះមក ការទម្លាក់គ្រាប់បែក និងការឈ្លានពានថ្មើរជើងឥតឈប់ឈររបស់អ៊ីស្រាអែលលើលីបង់ បានបណ្ដាលឲ្យអ្នកស្លាប់កើនឡើងដល់ជាង១.៧០០នាក់ និងបានបង្ខំឲ្យមនុស្សជាង១,២សែននាក់ភៀសខ្លួនចេញពីផ្ទះសម្បែង៕

មនុស្សជិត២០០នាក់ត្រូវបានចាប់ខ្លួន បន្ទាប់ពីការវាយប្រហារ លើស្ថានកុងស៊ុលអ៊ីស្រាអែល

រដ្ឋមន្ត្រីក្រសួងយុត្តិធម៌លោក Akin Gurlek បាននិយាយកាលពីថ្ងៃពុធ ទី ៨ ខែមេសា ថា កងកម្លាំងសន្តិសុខរបស់ប្រទេសទួរគី បានចាប់ខ្លួនមនុស្សជិត ២០០ នាក់នៅក្នុងការបោសសម្អាតនៅទូទាំងប្រទេសមួយថ្ងៃបន្ទាប់ពីការបាញ់ប្រហារនៅខាងក្រៅស្ថានកុងស៊ុលអ៊ីស្រាអែលក្នុងទីក្រុងអ៊ីស្តង់ប៊ុល។ លោក Gurlek បានបង្ហោះសារនៅលើបណ្តាញ X ថា មន្ត្រីបានចាប់ខ្លួនជនសង្ស័យ១៩៨នាក់ក្នុងប្រតិបត្តិការពេលដំណាលៗគ្នានៅក្នុងខេត្តចំនួន៣៤ ប្រឆាំងនឹង «អង្គការភេរវកម្ម Daesh» ជាឈ្មោះមួយផ្សេងទៀតសម្រាប់ក្រុមរដ្ឋអ៊ីស្លាម។យោងតាមក្រសួងយុត្តិធម៌ ខ្មាន់កាំភ្លើងម្នាក់ត្រូវបានសម្លាប់និងពីរនាក់ទៀតរងរបួសនៅក្នុងការបាញ់ប្រហារជាមួយនគរបាលកាលពីថ្ងៃអង្គារសប្តាហ៍នេះ នៅខាងក្រៅស្ថានកុងស៊ុល ដោយមន្ត្រីពីរនាក់បានរងរបួសស្រាល។ មនុស្ស១២នាក់ក្នុងចំណោមអ្នកដែលត្រូវបានចាប់ខ្លួន ត្រូវបានឃុំខ្លួនមុនការជម្រះក្តី រួមទាំងខ្មាន់កាំភ្លើងរងរបួសពីរនាក់ ដែលត្រូវបានបញ្ជូនទៅកាន់មន្ទីរពេទ្យ។ គ្មានក្រុមណាមួយ អះអាងទទួលខុសត្រូវចំពោះការបាញ់ប្រហារកាលពីថ្ងៃអង្គារនៅឡើយទេ។ របាយការណ៍ប្រព័ន្ធផ្សព្វផ្សាយទួរគីបាននិយាយថា ខ្មាន់កាំភ្លើងដែលត្រូវបានសម្លាប់គឺជាបុរសអាយុ ៣២ ឆ្នាំ មានទំនាក់ទំនងជាមួយក្រុមអាយស៊ីស។ការបាញ់ប្រហារ បានកើតឡើងនៅក្នុងសង្កាត់ពាណិជ្ជកម្ម Levent មានទីតាំងនៅទីក្រុងអ៊ីស្តង់ប៊ុល ប៉ុន្តែ ពុំមានអ្នកការទូតអ៊ីស្រាអែលណាម្នាក់នៅក្នុងបេសកកម្មនោះទេនៅពេលមានការបាញ់ប្រហារ ព្រោះភាគច្រើនត្រូវបានជម្លៀសចេញចាប់តាំងពីការវាយប្រហារនៅក្នុងប្រទេសអ៊ីស្រាអែល នៅថ្ងៃទី៧ ខែតុលា ឆ្នាំ ២០២៣ ដោយក្រុមហាម៉ាស ដែលបានបង្កឱ្យមានសង្គ្រាមនៅតំបន់ហ្កាហ្សា។

លោក Trump ជួបពិភាក្សាអំពីការចាកចេញពីសម្ព័ន្ធយោធា NATO ជាមួយលោក Rutte ក្រោយរិះគន់ខ្លាំងៗលើសម្ព័ន្ធនេះ

ប្រធានាធិបតីសហរដ្ឋអាមេរិក លោក Donald Trump បានជួបពិភាក្សាជាមួយប្រមុខសម្ព័ន្ធយោធា NATO លោក Mark Rutte កាលពីថ្ងៃពុធ ទី៨ ខែមេសា ដោយសេតវិមានបាននិយាយថា លោកពិភាក្សាអំពីលទ្ធភាពនៃការចាកចេញពីសម្ព័ន្ធមិត្តនេះ បន្ទាប់ពីសម្ព័ន្ធមិត្តមិនបានចូលរួមក្នុងសង្គ្រាមនៅអ៊ីរ៉ង់។យោងតាមការចុះផ្សាយរបស់កាសែត Wall Street Journal បានឲ្យដឹងថា ផ្ទុយទៅវិញ លោក Trump ក៏កំពុងសម្លឹងមើលការដាក់ទណ្ឌកម្មលើសមាជិក NATO មួយចំនួន ដែលលោកជឿថាពុំមានប្រយោជន៍ក្នុងអំឡុងពេលជម្លោះដោយការដកកងទ័ពសហរដ្ឋអាមេរិកចេញពីប្រទេសរបស់ពួកគេ។អ្នកនាំពាក្យសេតវិមាន លោកស្រី Karoline Leavitt បានប្រាប់អ្នកសារព័ត៌មានថា «វាពិតជាគួរឱ្យសោកស្ដាយដែលសម្ព័ន្ធយោធា NATO បានងាកចេញពីប្រជាជនអាមេរិកក្នុងរយៈពេល៦សប្តាហ៍កន្លងងទៅនេះ ខណៈដែលប្រជាជនអាមេរិកបានផ្តល់ហិរញ្ញវត្ថុដល់វិស័យការពារជាតិរបស់ពួកគេ»។នៅពេលត្រូវបានសួរថាតើលោក Trump ពិភាក្សាអំពីការដកខ្លួនចេញពីសម្ព័ន្ធយោធា NATO ដែរឬទេ លោកស្រី Leavitt បាននិយាយថា «វាជាអ្វីមួយដែលលោកប្រធានាធិបតីបានពិភាក្សា ហើយខ្ញុំគិតថាវាជាប្រធានបទមួយដែលលោកប្រធានាធិបតីនឹងពិភាក្សាជាមួយអគ្គលេខាធិការ លោក Rutte»។ជំនួបនេះ ធ្វើឡើងមួយថ្ងៃបន្ទាប់ពីសហរដ្ឋអាមេរិក និងអ៊ីរ៉ង់ បានព្រមព្រៀងលើបទឈប់បាញ់រយៈពេលពីរសប្តាហ៍ដ៏ផុយស្រួយ។ លោក Trump បានបង្ហាញពីកំហឹងចំពោះការច្រានចោលរបស់ដៃគូលោកខាងលិចក្នុងការគាំទ្រសង្គ្រាមរបស់លោកនៅអ៊ីរ៉ង់ ដោយបានធ្វើឲ្យរង្គោះរង្គើសម្ព័ន្ធមិត្តឆ្លងកាត់សមុទ្រអាត្លង់ទិកដែលមានអាយុកាល៧៧ ឆ្នាំ ជាអាយុកាលតិចជាងរូបលោកត្រឹមតែពីរឆ្នាំប៉ុណ្ណោះ។

មេដឹកនាំអ៊ីស្រាអែលត្រៀមខ្លួនរួចរាល់វិលត្រឡប់ទៅសមរភូមិវិញនៅពេលណាក៏បាន ប្រឆាំងនឹងអ៊ីរ៉ង់

នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយកាលពីថ្ងៃពុធ ៨ មេសា សប្ដាហ៍នេះថា អ៊ីស្រាអែលនៅតែត្រៀមខ្លួនរួចជាស្រេចដើម្បីប្រឈមនឹងអ៊ីរ៉ង់ប្រសិនបើចាំបាច់ ទោះបីជាមានបទឈប់បាញ់រវាងសហរដ្ឋអាមេរិក និងអ៊ីរ៉ង់ក៏ដោយ។លោក Netanyahu បានថ្លែងនៅក្នុងសេចក្តីថ្លែងការណ៍តាមទូរទស្សន៍ថា រូបលោកសូមបញ្ជាក់ឲ្យច្បាស់ថា ពួកលោកនៅតែមានគោលបំណងត្រូវបំពេញ ហើយពួកលោកនឹងសម្រេចបាននូវគោលបំណងទាំងនោះ ទាំងតាមរយៈការព្រមព្រៀង ឬតាមរយៈការប្រយុទ្ធគ្នាឡើងវិញ។ ពួកលោកត្រៀមខ្លួនរួចជាស្រេចដើម្បីវិលត្រឡប់ទៅសមរភូមិវិញនៅពេលណាចាំបាច់។ ម្រាមដៃរបស់ពួកលោកនៅតែស្ថិតនៅលើកៃកាំភ្លើង។នេះមិនមែនជាចុងបញ្ចប់នៃយុទ្ធនាការនោះទេ ប៉ុន្តែជាជំហានមួយលើផ្លូវឆ្ពោះទៅរកការសម្រេចបាននូវគោលបំណងទាំងអស់របស់អ៊ីស្រាអែល។ លោក Netanyahu ក៏បានវាយបកផងដែរ ទៅលើមេដឹកនាំប្រឆាំងដែលបានស្តីបន្ទោសរូបលោកចំពោះការយល់ព្រមលើបទឈប់បាញ់មុនពេលអ៊ីស្រាអែលសម្រេចបាននូវគោលបំណងរបស់ខ្លួនក្នុងសង្គ្រាម។លោក Netanyahu បានថ្លែងនៅក្នុងសេចក្តីថ្លែងការណ៍តាមទូរទស្សន៍ថា ដូចដែលអ្នកបានដឹងហើយថា កាលពីយប់មិញ បទឈប់បាញ់រយៈពេលពីរសប្តាហ៍ជាបណ្តោះអាសន្នរវាងសហរដ្ឋអាមេរិក និងអ៊ីរ៉ង់បានចូលជាធរមាន ដោយមានការសម្របសម្រួលយ៉ាងពេញលេញជាមួយអ៊ីស្រាអែល។ ឥស្សរជនប្រឆាំងសំខាន់របស់អ៊ីស្រាអែល លោក Yair Lapid បានហៅបទឈប់បាញ់នេះថាជា «គ្រោះមហន្តរាយការទូត» សម្រាប់អ៊ីស្រាអែល ដោយនិយាយថា លោក Netanyahu បានបរាជ័យក្នុងការសម្រេចគោលដៅរបស់ប្រទេសនេះ៕

អ៊ីរ៉ង់បានឱ្យដឹងថា ការចរចាសន្តិភាព នឹងមិនសមហេតុផលទេ ក្រោយការវាយប្រហាររបស់អ៊ីស្រាអែលលើលីបង់

អ៊ីស្រាអែលបានបាញ់ស្រោចលើប្រទេសលីបង់ក្នុងការវាយប្រហារដ៏ខ្លាំងក្លាបំផុតរបស់ខ្លួនកាលពីថ្ងៃពុធ ៨ មេសា ដោយបានសម្លាប់មនុស្សជិត១០០នាក់ និងទទួលបានការគំរាមសងសឹកពីអ៊ីរ៉ង់ ដែលបានបង្ហាញថានឹងមិនសមហេតុផលទេ ក្នុងការបន្តការចរចាដើម្បីបង្កើតកិច្ចព្រមព្រៀងសន្តិភាពអចិន្ត្រៃយ៍ជាមួយសហរដ្ឋអាមេរិក។រដ្ឋមន្ត្រីក្រសួងសុខាភិបាលលីបង់លោក Rakan Nasreddine បាននិយាយថា ការវាយប្រហារតាមអាកាសរបស់អ៊ីស្រាអែលបានសម្លាប់មនុស្ស៨៩នាក់ និង៧២២នាក់រងរបួស ហើយចំនួនអ្នកស្លាប់អាចបន្តកើនឡើងទៀតខណៈការវាយប្រហារនៅតែបន្ត។ការព្រមានពីអ្នកចរចាឈានមុខគេរបស់អ៊ីរ៉ង់ គឺប្រធានសភាលោក Mohammed Bager Qalibaf បានបង្ហាញឱ្យឃើញពីភាពមិនច្បាស់លាស់នៅតែមានក្នុងតំបន់នេះ បន្ទាប់ពីការប្រកាសបទឈប់បាញ់កាលពីថ្ងៃអង្គារ ៧មេសាសប្ដាហ៍នេះ ដោយប្រធានាធិបតី Donald Trump។ ភាគីទាំងពីរបានដាក់ចេញនូវរបៀបវារៈផ្ទុយគ្នាយ៉ាងខ្លាំងសម្រាប់ការចរចាសន្តិភាពដែលគ្រោងនឹងចាប់ផ្តើមនៅថ្ងៃសៅរ៍ខាងមុខ ប៉ុន្តែគេមិនច្បាស់ថាតើបទឈប់បាញ់រយៈពេលពីរសប្តាហ៍នឹងអាចបន្តបានរហូតដល់ពេលនោះឬអត់នោះទេ។លោក Qalibaf បាននិយាយថា អ៊ីស្រាអែលបានរំលោភលើលក្ខខណ្ឌជាច្រើននៃបទឈប់បាញ់នោះរួចហើយ ដោយបង្កើនសង្គ្រាមស្របគ្នារបស់ខ្លួនប្រឆាំងនឹងកងជីវពលហេសបូឡា(Hezbollah) ដែលមានសម្ព័ន្ធភាពជាមួយអ៊ីរ៉ង់ ខណៈសហរដ្ឋអាមេរិកបានរំលោភលើកិច្ចព្រមព្រៀងដោយទទូចឱ្យអ៊ីរ៉ង់បោះបង់ចោលមហិច្ឆតានុយក្លេអ៊ែររបស់ខ្លួន។ លោកបាននិយាយនៅក្នុងសេចក្តីថ្លែងការណ៍មួយថា ក្នុងស្ថានភាពបែបនេះ បទឈប់បាញ់ទ្វេភាគី ឬការចរចាគឺមិនសមហេតុផលទេ។អ៊ីស្រាអែល និងសហរដ្ឋអាមេរិក សុទ្ធតែបាននិយាយថា បទឈប់បាញ់រយៈពេលពីរសប្តាហ៍នេះពុំបានគ្របដណ្តប់លើប្រទេសលីបង់ទេ ហើយនាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយថា ការវាយប្រហារនឹងបន្ត៕

អគ្គិភ័យឆាបឆេះរោងចក្រចម្រាញ់ប្រេង Lavan របស់អ៊ីរ៉ង់ រយៈពេលប៉ុន្មានម៉ោងក្រោយមានបទឈប់បាញ់

សំណុំផ្សែងខ្មៅបានគ្របដណ្តប់ពីលើរោងចក្រចម្រាញ់ប្រេងនៅលើកោះ Lavan របស់អ៊ីរ៉ង់នាថ្ងៃពុធនេះ គឺជាអ្វីដែលក្រុមមន្រ្តីអ៊ីរ៉ង់និយាយថា វាគឺជាការវាយប្រហាររបស់សត្រូវ ។ទីភ្នាក់ងារព័ត៌មានរ៉យទ័រ បានបញ្ជាក់ទីតាំងមួយនេះ ដោយប្រើប្រាស់សឺទែនប្រេង ដើមឈើ ស្លាកសំគាល់ ប្លង់ផ្លូវ និងប៉មចម្រាញ់ប្រេង ដែលផ្គូរផ្គងជាមួយរូបភាពផ្កាយរណប ។ ពុំមានរូបភាពវីដេអូឃ្លីបចាស់ៗ ត្រូវបានរកឃើញបង្ហោះនោះទេ មុនថ្ងៃពុធនេះ ។ក្រុមហ៊ុនចែកចាយ និងចម្រាញ់ប្រេងជាតិអ៊ីរ៉ង់ និយាយថា រោងចក្រចម្រាញ់ប្រេងនេះ រងការវាយប្រហារនៅវេលាម៉ោង ១០ព្រឹក ម៉ោងក្នុងស្រុក ថ្ងៃពុធ ដោយពុំបណ្តាលឲ្យមានគ្រោះថ្នាក់នោះទេ ។ ក្រមហ៊ុននិយាយទៀតថា ក្រុមការងារសុវត្ថិភាព និងក្រុមភ្នាក់ងារពន្លត់អគ្គិភ័យ កំពុងធ្វើការដើម្បីទប់ស្កាត់អណ្តាតភ្លើង និងធានាសុវត្ថិភាពរោងចក្រចម្រាញ់ប្រេង ។ សូមបញ្ជាក់ថា សហរដ្ឋអាមេរិក និងអ៊ីរ៉ង់ បានយល់ព្រមបទឈប់បាញ់រយៈពេល ២សប្តាហ៍ ដើម្បីផ្អាកសង្រ្គាមរយៈពេល ៦សប្តាហ៍របស់ពួកគេដែលបានសម្លាប់មនុស្សរាប់ពាន់នាក់ និងរីករាលដាលពេញតំបន់មជ្ឈិមបូព៌ា និងបណ្តាលឲ្យមានការអាក់ខានមិនធ្លាប់មានពីមុនមកនូវការផ្គត់ផ្គង់ថាមពលពិភពលោក ៕

អារ៉ាប់រួម គូវ៉ែត បារ៉ែន រាយការណ៍ការវាយប្រហារ បើទោះបីជាមានបទឈប់បាញ់អ៊ីរ៉ង់-អាមេរិក

បណ្តាប្រទេសជាច្រើននៅតំបន់ឈូងសមុទ្រ បានរាយការណ៍ពីការវាយប្រហារមីស៊ីល និងយានដ្រូន លើទឹកដីរបស់ពួកគេ រយៈពេលប៉ុន្មានម៉ោងប៉ុណ្ណោះ ក្រោយអ៊ីរ៉ង់ និងសហរដ្ឋអាមេរិក ប្រកាសបទឈប់បាញ់រយៈពេល ២សប្តាហ៍ ។នៅថ្ងៃពុធនេះ អារ៉ាប់រួម បាននិយាយថា ប្រព័ន្ធការពារដែនអាកាសរបស់ខ្លួន បានចូលរួមបាញ់ទម្លាក់មីស៊ីល និងយានដ្រូនបាញ់ចេញពីអ៊ីរ៉ង់ ។ក្រសួងការពារជាតិអារ៉ាប់រួមនិយាយនៅក្នុងសេចក្តីថ្លែងការណ៍ថា សំឡេងផ្ទុះ ត្រូវបានឮនៅតាមតំបន់ជាច្រើនទូទាំងប្រទេស បណ្តាលមកពីប្រព័ន្ធការពារដែនអាកាសបាញ់ស្កាត់មីស៊ីលបាលីស្ទិក មីស៊ីលតម្រង់គោលដៅ និងយានដ្រូន ។គូវ៉ែត បាននិយាយផងដែរថា ប្រព័ន្ធការពារដែនអាកាស បានបាញ់ស្កាត់រលកនៃយានដ្រូនអ៊ីរ៉ង់ដែលបានបាញ់បង្ហោះចាប់ពីវេលាម៉ោង ៨ព្រឹក ម៉ោងក្នុងស្រុករហូតមក ។ដោយឡែក ក្រសួងមហាផ្ទៃបារ៉ែន និយាយថា ការវាយប្រហាររបស់អ៊ីរ៉ង់ បណ្តាលឲ្យមនុស្ស ២នាក់ រងរបួស រយៈពេលប៉ុន្មានម៉ោងប៉ុណ្ណោះ ក្រោយសហរដ្ឋអាមេរិកប្រកាសបទឈប់បាញ់ជាមួយអ៊ីរ៉ង់ ៕

អនុប្រធានាធិបតីអាមេរិក លោក Vance បញ្ជាក់ថា ជម្លោះអ៊ុយក្រែន គឺ «ពិបាកដោះស្រាយបំផុត»

អនុប្រធានាធិបតីអាមេរិក លោក J.D. Vance នៅថ្ងៃពុធ (ទី៨ ខែមេសា ឆ្នាំ២០២៦) នេះ បានរិះគន់មេដឹកនាំអឺរ៉ុប ក្នុងការមិនបានធ្វើឲ្យគ្រប់គ្រាន់ ដើម្បីព្យាយាមបញ្ចប់ជម្លោះអ៊ុយក្រែន ដោយបន្ថែមថា វាគឺជា «បញ្ហាពិបាកដោះស្រាយបំផុត»។នៅថ្ងៃទី៨ ខែមេសានេះ ទីក្រុងគីវបានអំពាវនាវឲ្យសហរដ្ឋអាមេរិកដាក់សម្ពាធលើរុស្ស៊ី ដើម្បីឲ្យបញ្ចប់ការឈ្លានពានរបស់ខ្លួនលើអ៊ុយក្រែន ដោយលើកឡើងថា កិច្ចព្រមព្រៀងឈប់បាញ់របស់ទីក្រុងវ៉ាស៊ីនតោនជាមួយប្រទេសអ៊ីរ៉ង់ បានបង្ហាញពីភាពជោគជ័យនៃ «ការសម្រេចចិត្ត» របស់សហរដ្ឋអាមេរិក។ក្នុងអំឡុងពេលធ្វើទស្សនកិច្ច នៅប្រទេសហុងគ្រី លោក Vance បាននិយាយថា៖ «យើងមានការខកចិត្ត ចំពោះថ្នាក់ដឹកនាំនយោបាយជាច្រើន នៅអឺរ៉ុប ពីព្រោះពួកគេហាក់ដូចជាមិនចាប់អារម្មណ៍ជាពិសេស ក្នុងការដោះស្រាយជម្លោះជាក់លាក់នោះទេ»។លោកបានបញ្ជាក់ថា កិច្ចប្រឹងប្រែង ដើម្បីដោះស្រាយជម្លោះនេះ បានឃើញ «វឌ្ឍនភាពគួរឲ្យកត់សម្គាល់» ប៉ុន្តែវាគឺជា «សង្គ្រាមដ៏លំបាកដោះស្រាយបំផុត»។លោក Vance បានឲ្យដឹងបន្តថា៖ «យើងទទួលបានឯកសារពីអ៊ុយក្រែន និងឯកសារពីរុស្ស៊ី។ តាមពិតយើងបានឲ្យភាគីទាំង២ បញ្ជាក់ពីជំហរជាក់ស្ដែងរបស់ពួកគេ ហើយបន្តិចម្ដងៗ ជំហររបស់ពួកគេកាន់តែមានភាពស្រដៀងគ្នាខ្លាំងឡើងៗ»។អនុប្រធានាធិបតីរូបនេះ បានបន្ថែមថា៖ «ហើយនោះហើយជាមូលហេតុដែលយើងសម្រេចបានវឌ្ឍនភាពខ្លះ។ យើងមិនទាន់សម្រេចបានវឌ្ឍនភាពចុងក្រោយនៅឡើយទេ ប៉ុន្តែខ្ញុំមានសុទិដ្ឋិនិយមយ៉ាងខ្លាំងអំពីរឿងនេះ»៕

បណ្ដាញសង្គម

ព័ត៌មានថ្មីៗ

វេជ្ជបណ្ឌិត៖ សុខភាពលោក Trump គឺល្អប្រសើរណាស់ ប៉ុន្តែគួរតែសម្រកទម្ងន់

អ្នកនៅរស់ពីការជាប់ក្នុងរូងភ្នំ នៅឡាវ បានបរិភោគថាសឈើសម្រាប់រែងមាស ដើម្បីបន្តជីវិត

មនុស្ស ១៨នាក់ស្លាប់ និង ៣០នាក់រងរបួស ដោយសាររថយន្តដឹកជនភៀសខ្លួន ក្រឡាប់នៅភាគខាងកើតអាហ្វហ្គានីស្ថាន

សេតវិមាន៖ លោក Trump «នឹងធ្វើតែកិច្ចព្រមព្រៀងដែលល្អសម្រាប់អាមេរិកប៉ុណ្ណោះ» ជាមួយអ៊ីរ៉ង់

នាយករដ្ឋមន្ត្រី៖ កាណាដា និងចិន កំពុងសាង «ភាពជាដៃគូប្រកបដោយស្ថិរភាព និងការស្ថាបនាបន្ថែមទៀត»

រដ្ឋមន្រ្ដីក្រសួងការងារ ចុះពិនិត្យមើលខ្សែច្រវាក់ផលិតកម្មក្រុមហ៊ុន THACO AGRI ក្នុងខេត្តក្រចេះ ដែលផ្តល់ឱកាសការងារប្រមាណ២ម៉ឺននាក់ និងផ្ទេរជំនាញបច្ចេកទេសកសិកម្មទំនើប

របាយការណ៍៖ សភាអាមេរិកកំពុងធ្វើសមាហរណកម្មកងកម្លាំងយោធាអាមេរិក និងអ៊ីស្រាអែលដោយស្ងាត់ៗ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877