BTV NEWS

UN៖ ការប៉ះទង្គិចគ្នារវាងអ៊ីស្រាអែល-ក្រុមហេសបូឡា ធ្វើឲ្យប៉ះពាល់ការចូលដល់ជំនួយនៅភាគខាងត្បូងលីបង់

ករណីឆ្លងសង្ស័យជំងឺអេបូឡានៅសាធារណរដ្ឋប្រជាធិបតេយ្យកុងហ្គោកើនឡើងដល់ ១.០២៨នាក់

កូរ៉េខាងត្បូងពង្រឹងប្រព័ន្ធប្រឆាំងនុយក្លេអ៊ែរ-មីស៊ីល និងជំរុញកិច្ចសហប្រតិបត្តិការជាមួយអាមេរិក

ព្យុះខ្សាច់ដ៏ខ្លាំងក្លាបានបោកបក់ឆ្លងកាត់តំបន់ជាច្រើនក្នុងរដ្ឋវាលខ្សាច់ Rajasthan របស់ឥណ្ឌា

ព័ត៌មានអន្តរជាតិ

ស្ត្រីនៅគុយបា តវ៉ាប្រឆាំងការរឹតត្បិតរបស់អាមេរិក ដោយនិយាយថា «កុមារគ្រប់រូបកើតមកនៅគុយបា គឺជាជ័យជម្នះ»

ស្ត្រីនៅប្រទេសគុយបារាប់រយនាក់ បានចេញតវ៉ាកាលពីថ្ងៃអង្គារ ទី៧ ខែមេសា ប្រឆាំងនឹងការរឹតត្បិតរបស់សហរដ្ឋអាមេរិកដែលបានរារាំងកោះមួយនេះ ខណៈប្រធានាធិបតី លោក ដូណាល់ ត្រាំ បានដាក់ចេញនូវការបិទផ្លូវប្រេង ក្នុងបំណងធ្វើឱ្យរដ្ឋាភិបាលដឹកនាំដោយកុម្មុយនិស្តរបស់ប្រទេសគុយបា ដួលរលំ។ព្រឹត្តិការណ៍ ដែលត្រូវបានរៀបចំដោយសហព័ន្ធស្ត្រីគុយបា (FMC) បានទាក់ទាញបុគ្គលិក និងនិស្សិតក្នុងវិស័យសាធារណៈជាច្រើន។ ការជួបជុំគ្នានេះក៏បានប្រារព្ធខួបគម្រប់៩៦ឆ្នាំរបស់ស្ថាបនិក និងជាអតីតស្ត្រីទីមួយរបស់សហព័ន្ធស្ត្រីគុយបា(FMC) លោកស្រី Vilma Espin ជាភរិយារបស់អតីតប្រធានាធិបតី លោក Raul Castro ។លោក ត្រាំ កាលពីពេលថ្មីៗនេះបាននិយាយថា លោករំពឹងថានឹង «យកមកគ្រប់គ្រងប្រទេសគុយបាក្នុងទម្រង់ណាមួយ» និងបាននិយាយថា «ខ្ញុំអាចធ្វើអ្វីដែលខ្ញុំចង់បាន» ជាមួយប្រទេសជិតខាង។ទោះបីជាមានការគំរាមកំហែងបែបនេះក៏ដោយ លោក ត្រាំ ពុំមានវិធានការដើម្បីបញ្ឈប់នាវាដឹកប្រេងរុស្ស៊ីមួយគ្រឿង ដែលកាលពីសប្តាហ៍មុនបានដឹកជញ្ជូនប្រេងឆៅចំនួន ៧០០.០០០ បារ៉ែល ជាតម្រូវការខ្លាំងទៅកាន់ប្រទេសគុយបា នោះទេ។

អ៊ីស្រាអែលគាំទ្របទឈប់បាញ់រយៈពេលពីរសប្តាហ៍របស់លោក Trump លើអ៊ីរ៉ង់ តែមិនរាប់បញ្ជូលប្រទេសលីបង់ទេ

ការិយាល័យរបស់នាយករដ្ឋមន្ត្រីអ៊ីស្រាអែលលោក Benjamin Netanyahu បាននិយាយនៅថ្ងៃពុធ៨មេសា សប្ដាហ៍នេះ ថា អ៊ីស្រាអែលគាំទ្រការសម្រេចចិត្តរបស់ប្រធានាធិបតីអាមេរិកលោក Donald Trump ក្នុងការផ្អាកវាយប្រហារប្រឆាំងនឹងអ៊ីរ៉ង់រយៈពេលពីរសប្តាហ៍ ប៉ុន្តែបាននិយាយថាបទឈប់ បាញ់នោះមិនរាប់បញ្ចូលប្រទេសលីបង់ទេ ។ការិយាល័យនេះបាននិយាយថា អ៊ីស្រាអែលគាំទ្រសកម្មភាពរបស់សហរដ្ឋអាមេរិក ដោយតម្រូវឲ្យទីក្រុងតេអេរ៉ង់ ត្រូវតែបើកច្រកសមុទ្រភ្លាមៗ និងបញ្ឈប់ការវាយប្រហារប្រឆាំងនឹងសហរដ្ឋអាមេរិក អ៊ីស្រាអែល និងប្រទេសនានានៅក្នុងតំបន់។ការអត្ថាធិប្បាយនេះ បានកើតឡើងបន្ទាប់ពីទីក្រុងវ៉ាស៊ីនតោនបានប្រកាសផ្អាកការវាយប្រហាររយៈពេលពីរសប្តាហ៍ប្រឆាំងនឹងអ៊ីរ៉ង់ ដែលជាផ្នែកមួយនៃកិច្ចខិតខំប្រឹងប្រែងដើម្បីពន្លត់ភ្លើងសង្គ្រាម និងបើកឱកាសសម្រាប់ការចរចា។អ៊ីស្រាអែលក៏បាននិយាយផងដែរថា ខ្លួនគាំទ្រកិច្ចខិតខំប្រឹងប្រែងរបស់សហរដ្ឋអាមេរិក ដើម្បីធានាថាអ៊ីរ៉ង់លែងបង្កការគំរាមកំហែងនុយក្លេអ៊ែរ មីស៊ីល ឬភេរវកម្ម ដល់សហរដ្ឋអាមេរិក អ៊ីស្រាអែល និងប្រទេសជិតខាងអារ៉ាប់របស់អ៊ីរ៉ង់ទៀតហើយ ដោយបន្ថែមថា ទីក្រុងវ៉ាស៊ីនតោនបានប្រាប់អ៊ីស្រាអែលថា ខ្លួនប្តេជ្ញាសម្រេចគោលដៅរួមរបស់ពួកគេនៅក្នុងការចរចានាពេលខាងមុខ។អ៊ីរ៉ង់បាននិយាយនៅថ្ងៃពុធនេះថា ការចរចាជាមួយសហរដ្ឋអាមេរិកនឹងចាប់ផ្តើមនៅថ្ងៃសុក្រ ទី១០ ខែមេសា សប្ដាហ៍នេះ នៅទីក្រុងអ៊ីស្លាម៉ាបាដ ប្រទេស ប៉ាគីស្ថាន៕

ប្រជាជនអ៊ីរ៉ង់ប្ដេជ្ញាដើរតាមលោក Mojtabaបន្ទាប់ពីបទឈប់បាញ់ត្រូវបានប្រកាសជាមួយអាមេរិក និងអ៊ីស្រាអែល

មហាជនអ៊ីរ៉ង់បានសម្រុកចូលទៅក្នុងទីលានចតុរង្គ Enghelab ក្នុងទីក្រុងតេអេរ៉ង់នៅព្រឹកថ្ងៃពុធ ៨ មេសានេះ ដោយគ្រវីទង់ជាតិ និងប្ដេជ្ញាស្មោះត្រង់ដោយគ្មានលក្ខខណ្ឌចំពោះមេដឹកនាំកំពូល លោក Mojtaba Khamenei ខណៈសហរដ្ឋអាមេរិក និងអ៊ីរ៉ង់បានយល់ព្រមលើបទឈប់បាញ់រយៈពេលពីរសប្តាហ៍ដែលបានទាញប្រទេសនានាចេញពីមាត់ជ្រោះនៃការកើនឡើងភាពតានតឹងដ៏មហន្តរាយ។ ស្ត្រីម្នាក់ដែលបានចូលរួមបាតុកម្មបាននិយាយថា អ្វីទាំងអស់ដែលមេដឹកនាំរបស់ពួកគេនិយាយគឺត្រឹមត្រូវ។ ប្រសិនបើលោកយល់ថាវាសមរម្យ ពួកអ្នកស្រីនឹងមានបទឈប់បាញ់។ បើមិនដូច្នោះទេ ពួកអ្នកស្រីត្រៀមខ្លួនរួចជាស្រេចដើម្បីស្នាក់នៅតាមដងផ្លូវ និងងើបតតាំងជារៀងរហូត។ ការបង្ហាញសាមគ្គីភាពនេះ បានកើតឡើងនៅពេលប្រធានាធិបតីអាមេរិក Donald Trump បានប្រកាសបទឈប់បាញ់រយៈពេលពីរសប្តាហ៍ជាមួយអ៊ីរ៉ង់កាលពីថ្ងៃអង្គារ៧ មេសា សប្ដាហ៍នេះ ប៉ុន្មានម៉ោងបន្ទាប់ពីរូបលោកបានគំរាមថា "អរិយធម៌ទាំងមូលនឹងស្លាប់នៅយប់នេះ" និងប្រហែល ៩០ នាទីមុនថ្ងៃផុតកំណត់ដែលលោកបានកំណត់សម្រាប់ទីក្រុងតេអេរ៉ង់ដើម្បីឈានដល់កិច្ចព្រមព្រៀង។ លោក Trump បានយល់ព្រមផ្អាកការទម្លាក់គ្រាប់បែក និងការវាយប្រហារលើអ៊ីរ៉ង់រយៈពេលពីរសប្តាហ៍ ដោយមានលក្ខខណ្ឌថាអ៊ីរ៉ង់ ត្រូវតែបើកច្រកសមុទ្រ Hormuz ឡើងវិញ។បន្ទាប់ពីការប្រកាសរបស់លោក Trump ក្រុមប្រឹក្សាសន្តិសុខជាតិជាន់ខ្ពស់របស់អ៊ីរ៉ង់បានបង្ហោះសេចក្តីថ្លែងការណ៍ដ៏វែងមួយនៅលើប្រព័ន្ធផ្សព្វផ្សាយរដ្ឋអ៊ីរ៉ង់ដោយប្រកាសពីជ័យជម្នះ និងដាក់ចេញព័ត៌មានលម្អិតនៃផែនការ ១០ ចំណុចសម្រាប់បញ្ចប់សង្គ្រាម៕

កូរ៉េខាងជើងបាញ់អាវុធសង្ស័យថាជាមីស៊ីល ខណៈទីក្រុងព្យុងយ៉ាងបដិសេធក្តីសង្ឃឹមការទូតរបស់ទីក្រុងសេអ៊ូល

យោធាកូរ៉េខាងត្បូងបាននិយាយថា កូរ៉េខាងជើងបានបាញ់អាវុធមិនស្គាល់អត្តសញ្ញាណមួយគ្រាប់ឆ្ពោះទៅសមុទ្រក្បែរឆ្នេរសមុទ្រភាគខាងកើតរបស់ខ្លួននៅថ្ងៃពុធ ៨មេសាសប្ដាហ៍នេះ បន្ទាប់ពីការបាញ់ដាច់ដោយឡែកមួយដែលត្រូវបានរកឃើញមួយថ្ងៃមុន ខណៈទីក្រុងព្យុងយ៉ាងបានបំបាត់ក្តីសង្ឃឹមរបស់ទីក្រុងសេអ៊ូលក្នុងការបន្ធូរបន្ថយភាពតានតឹង។ យោធាកូរ៉េខាងត្បូងបាននិយាយដោយឡែកពីគ្នាថា ខ្លួនបានរកឃើញការបាញ់អាវុធដែលសង្ស័យថាជាមីស៊ីលបាលីស្ទីកពីតំបន់ទីក្រុងព្យុងយ៉ាងក្នុងប្រទេសកូរ៉េខាងជើងកាលពីថ្ងៃអង្គារ។យោងតាមការចុះផ្សាយរបស់ទីភ្នាក់ងារសារព័ត៌មាន Yonhap របស់កូរ៉េខាងត្បូង ដោយដកស្រង់សម្តីមន្ត្រីយោធាថា មីស៊ីលដែលបានបាញ់កាលពីថ្ងៃអង្គារ បានហោះទៅទិសខាងកើតមុនពេលបង្ហាញសញ្ញានៃភាពមិនប្រក្រតីនៅដំណាក់កាលដំបូងនៃការហោះហើរ និងបាត់ស្រមោល។សារព័ត៌មាន Yonhap បានរាយការណ៍ថា នាយសេនាធិការចម្រុះរបស់កូរ៉េខាងត្បូងគិតថា វត្ថុនោះជាមីស៊ីលផ្លោង ដែលអាចចាត់ទុកថាជាការបរាជ័យបន្ទាប់ពីការបាញ់។ កូរ៉េខាងត្បូងជាធម្មតាប្រកាសពីការបាញ់មីស៊ីលផ្លោងរបស់កូរ៉េខាងជើងភ្លាមៗ ដោយសារការសាកល្បងបែបនេះរំលោភលើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ខណៈខ្លួនបង្កើនការប្រុងប្រយ័ត្នជាងមុននៅពេលវត្ថុនោះត្រូវគេជឿថាជាអាវុធ ឬមីស៊ីលតម្រង់គោលដៅ។ក្រសួងបង្រួបបង្រួមរបស់ប្រទេសកូរ៉េខាងត្បូង កាលពីថ្ងៃអង្គារ៧ មេសា សប្ដាហ៍នេះ បានឲ្យដឹងថា ការឆ្លើយតបដ៏កម្ររបស់កូរ៉េខាងជើង ចំពោះការបង្ហាញការសោកស្តាយរបស់ប្រធានាធិបតីលោក Lee Jae Myung ពាក់ព័ន្ធនឹងការលុកលុយដោយយានដ្រូន គឺជា «វឌ្ឍនភាពដ៏មានអត្ថន័យ» ឆ្ពោះទៅរកការបន្ធូរបន្ថយភាពតានតឹងផ្នែកយោធា៕

ប្រទេសប៉ាគីស្ថាន បិទហាង និងផ្សារ មុនម៉ោងកកំណត់ ដើម្បីសន្សំសំចៃថាមពល

ហាង និងផ្សារនានា បានបិទនៅម៉ោង ៨:០០ យប់ (ម៉ោងក្នុងស្រុក) កាលពីថ្ងៃអង្គារ ទី ៧ ខែមេសា នៅទីក្រុងឡាហ័រ ខណៈរដ្ឋាភិបាលប៉ាគីស្ថាន បានប្រកាសមួយថ្ងៃមុននោះថា ហាង ផ្សារ និងផ្សារទំនើបនៅទូទាំងប្រទេសនឹងត្រូវបិទមុនម៉ោង ចាប់ពីថ្ងៃទី ៧ ខែមេសា ឆ្នាំ ២០២៦ ជាផ្នែកមួយនៃផែនការសន្សំសំចៃថាមពលនៅទូទាំងប្រទេស។យោងតាមសេចក្តីថ្លែងការណ៍ពីការិយាល័យនាយករដ្ឋមន្ត្រីបានឲ្យដឹងថា ការសម្រេចនេះ ត្រូវបានធ្វើឡើងដើម្បីបិទផ្សារ និងផ្សារទំនើបនៅក្នុងទីក្រុងជាច្រើន នៅម៉ោង ៨ យប់។វិធានការនេះ មានគោលបំណងកាត់បន្ថយការប្រើប្រាស់អគ្គិសនីក្នុងអំឡុងម៉ោងមមាញឹកដោយសារតែវិបត្តិថាមពលកំពុងនៅបន្ត និងការកើនឡើងតម្លៃប្រេងឥន្ធនៈ។ ហាងលក់ទំនិញចាំបាច់ប្រចាំថ្ងៃ និងផ្សារទំនើបគ្រប់ប្រភេទក៏ត្រូវបិទនៅម៉ោង ៨ យប់ដូចគ្នា។ហាងនំប៉័ង ភោជនីយដ្ឋាន និងហាងលក់អាហារនិងភេសជ្ជៈផ្សេងទៀតនឹងត្រូវបិទនៅម៉ោង១០យប់ នេះបើយោងតាមសេចក្តីថ្លែងការណ៍។សាលអាពាហ៍ពិពាហ៍ រោងតង់ធំ និងទីតាំងពាណិជ្ជកម្មផ្សេងទៀតដែលរៀបចំពិធីអាពាហ៍ពិពាហ៍នឹងនៅតែបើករហូតដល់ម៉ោង១០យប់។ ទន្ទឹមនឹងនេះ នឹងមានបម្រាមមិនឱ្យរៀបចំពិធីអាពាហ៍ពិពាហ៍ក្រោយម៉ោង១០យប់នៅទីតាំង និងផ្ទះឯកជន។ ម៉ោងធ្វើការរបស់ហាងលក់ឱសថ នឹងត្រូវបានលើកលែងពីការរឹតត្បិតទាំងនេះ។ប្រាក់ឧបត្ថម្ភប្រេងឥន្ធនៈរបស់ក្រសួងរដ្ឋាភិបាលត្រូវបានកាត់បន្ថយ ៥០% សម្រាប់រយៈពេលពីរខែខាងមុខ ខណៈសប្តាហ៍ធ្វើការត្រូវបានកាត់បន្ថយមកត្រឹមបួនថ្ងៃសម្រាប់ការិយាល័យរដ្ឋាភិបាល។

ទស្សនកិច្ចរបស់ប្រមុខ NATO ទៅទីក្រុងវ៉ាស៊ីនតោន មានបំណងរក្សាអឺរ៉ុបឲ្យនៅលើផែនទីរបស់លោក Trump

អគ្គលេខាធិការសម្ព័ន្ធយោធាណាតូ លោក Mark Rutte នឹងធ្វើទស្សនកិច្ចទៅទីក្រុងវ៉ាស៊ីនតោននៅថ្ងៃពុធ ទី៨ ខែមេសានេះ សម្រាប់អ្វីដែលអ្នកនាំពាក្យរបស់សម្ព័ន្ធយោធានេះហៅថា «ដំណើរទស្សនកិច្ចតាមការគ្រោងទុកជាយូរមកហើយ» ដែលធ្វើឡើងបន្ទាប់ពីលោកប្រធានាធិបតី ដូណាល់ ត្រាំ បានរិះគន់ខ្លាំងៗលើសម្ព័ន្ធមិត្តអឺរ៉ុបជុំវិញការខ្វែងគំនិតគ្នាសង្គ្រាមនៅអ៊ីរ៉ង់។ លោក Trump បាននិយាយថា លោកកំពុងពិចារណាដកសហរដ្ឋអាមេរិកចេញពីសម្ព័ន្ធយោធាលោកខាងលិច ដោយសារតែការបដិសេធរបស់សមាជិកអឺរ៉ុបក្នុងការបញ្ជូននាវាដើម្បីបើកច្រកសមុទ្រ Hormuz។ លោកស្រី Constanze Stelzenmüller នាយកមជ្ឈមណ្ឌលសហរដ្ឋអាមេរិកនិងអឺរ៉ុប នៅវិទ្យាស្ថាន Brookings ក្នុងទីក្រុងវ៉ាស៊ីនតោនឌីស៊ី បាននិយាយថា ដំណើរទស្សនកិច្ចរបស់លោក Rutte ដើម្បីជួបលោក Trump ទំនងជាមានបំណង «រក្សាការសន្ទនាឱ្យនៅបើកចំហដើម្បីធានាថា អឺរ៉ុបមិនធ្លាក់ចេញទាំងស្រុងពីផែនទី» របស់រដ្ឋបាលលោក Trump នោះទេ។ ដំណើរទស្សនកិច្ចនេះ ក៏មានគោលបំណងធានាថាសហរដ្ឋអាមេរិក បំពេញតាមការសន្យារបស់ខ្លួនក្នុងការបន្តលក់អាវុធទៅឱ្យអឺរ៉ុបដើម្បីប្រគល់បន្តទៅឱ្យអ៊ុយក្រែន។ លោកស្រី Stelzenmüller និយាយថា វា «មិនទំនងនោះទេ» ដែលលោក Trump នឹងដកខ្លួនចេញពីសម្ព័ន្ធយោធាណាតូជាផ្លូវការ។ លោកស្រី ក៏បាននិយាយផងដែរថា សម្ព័ន្ធយោធាណាតូ ពុំមានកាតព្វកិច្ចទៅជួយសហរដ្ឋអាមេរិកក្នុងសង្គ្រាមនៅអ៊ីរ៉ង់ទេ ជាពិសេសនៅពេលដែលសំណើផ្លូវការមិនទាន់ត្រូវបានបញ្ជូនទៅក្រុមប្រឹក្សាអាត្លង់ទិកខាងជើង។ ទោះជាយ៉ាងណា លោកស្រីបាននិយាយថា សម្ព័ន្ធមិត្តអឺរ៉ុបមួយចំនួនបានអនុញ្ញាតឱ្យប្រើប្រាស់ទាំងមូលដ្ឋានយោធារបស់ពួកគេនិងផ្តល់សិទ្ធិហោះហើរឆ្លងកាត់ដល់សហរដ្ឋអាមេរិក ដែលផ្ទុយពីអ្នកទាំងឡាយដែលនិយាយថា អឺរ៉ុបកំពុងច្រានចោលមិនជួយធ្វើប្រតិបត្តិការប្រឆាំងនឹងអ៊ីរ៉ង់។ នៅក្នុងសុន្ទរកថាទៅកាន់សម្ព័ន្ធមិត្តដែលបានជួបជុំគ្នាសម្រាប់ពិធីទទួលទានអាហារក្នុងពីធីបុណ្យ Easter នៅសេតវិមាន លោក Trump បានរិះគន់ប្រទេសបារាំង និងចក្រភពអង់គ្លេស ក្នុងចំណោមសម្ព័ន្ធមិត្តអាមេរិកផ្សេងទៀត ថាជា «ខ្លាក្រដាស»។

ប្រជាជនអ៊ីរ៉ង់ បានប្រមូលផ្តុំគ្នា និងគ្រវីទង់ជាតិ បន្ទាប់ពីការប្រកាសបទឈប់បាញ់

ប្រជាជនអ៊ីរ៉ង់មួយចំនួន បានដាក់ការសង្ស័យជុំវិញបំណងនៃបទឈប់បាញ់ជាមួយសហរដ្ឋអាមេរិក និងអ៊ីស្រាអែល បន្ទាប់ពីប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយកាលពីថ្ងៃអង្គារ ទី ៧ ខែមេសា ថា លោកបានព្រមព្រៀងផ្អាកការប្រយុទ្ធជាមួយអ៊ីរ៉ង់រយៈពេលពីរសប្តាហ៍។ការប្រកាសរបស់លោក ត្រាំ បានធ្វើឡើងតិចជាងពីរម៉ោងមុនកាលបរិច្ឆេទផុតកំណត់របស់លោកនៅថ្ងៃពុធ ទី៨ ខែមេសានេះសម្រាប់ទីក្រុងតេអេរ៉ង់ដើម្បីបើកច្រកសមុទ្រ Hormuz ឡើងវិញ បើមិនដូច្នេះទេត្រូវប្រឈមនឹងការវាយប្រហារយ៉ាងធ្ងន់ធ្ងរលើហេដ្ឋារចនាសម្ព័ន្ធស៊ីវិលរបស់ខ្លួន។ពលរដ្ឋទីក្រុងតេអេរ៉ង់ បាននិយាយនៅព្រឹកព្រលឹមថ្ងៃពុធនេះថា ចំណាត់ការនេះមានបំណងសម្រាប់សហរដ្ឋអាមេរិកដើម្បីប្រមូលផ្តុំក្រុមឡើងវិញ និង «ពន្យាពេលវេលាសម្រាប់អ៊ីស្រាអែល»។ក្រុមប្រឹក្សាសន្តិសុខជាតិជាន់ខ្ពស់របស់អ៊ីរ៉ង់ បានចាត់ទុកកិច្ចព្រមព្រៀងនេះថាជាជ័យជម្នះលើសហរដ្ឋអាមេរិក ដោយអះអាងថា លោក ត្រាំ បានទទួលយកលក្ខខណ្ឌរបស់អ៊ីរ៉ង់សម្រាប់ការបញ្ចប់អរិភាព។ក្នុងការឆ្លើយតប អ្នកនាំពាក្យសេតវិមាន លោកស្រី Karoline Leavitt បាននិយាយថា «ការពិតគឺថា លោកប្រធានាធិបតី ត្រាំ និងយោធាដ៏មានឥទ្ធិពលរបស់យើង បានធ្វើឱ្យអ៊ីរ៉ង់យល់ព្រមបើកច្រកសមុទ្រ Hormuz ឡើងវិញ ហើយការចរចានឹងបន្ត»។

នាយករដ្ឋមន្ត្រីប៉ាគីស្ថាន៖ បទឈប់បាញ់រវាងអាមេរិក និងអ៊ីរ៉ង់ គ្របដណ្តប់ «គ្រប់ទីកន្លែង» រួមទាំងប្រទេសលីបង់

នាយករដ្ឋមន្ត្រីប្រទេសប៉ាគីស្ថាន លោក Shehbaz Sharif បាននិយាយនៅថ្ងៃពុធ ទី៨ ខែមេសា ថា សហរដ្ឋអាមេរិក អ៊ីរ៉ង់ និងសម្ព័ន្ធមិត្តរបស់ពួកគេ បានព្រមព្រៀងលើបទឈប់បាញ់នៅ «គ្រប់ទីកន្លែង» រួមទាំងនៅប្រទេសលីបង់ផងដែរ បន្ទាប់ពីការសម្របសម្រួលដោយរដ្ឋាភិបាលរបស់លោក ដើម្បីបញ្ឈប់ការប្រយុទ្ធគ្នារយៈពេលជាច្រើនសប្តាហ៍មកនេះ។ លោក Sharif បានបង្ហោះសារនៅលើបណ្តាញ X ថា «ខ្ញុំមានសេចក្តីរីករាយដើម្បីប្រកាសថា សាធារណរដ្ឋអ៊ីស្លាមអ៊ីរ៉ង់ និងសហរដ្ឋអាមេរិក រួមជាមួយសម្ព័ន្ធមិត្តរបស់ខ្លួន បានព្រមព្រៀងលើបទឈប់បាញ់បន្ទាន់នៅគ្រប់ទីកន្លែង រួមទាំងនៅប្រទេសលីបង់ និងនៅកន្លែងផ្សេងទៀតដែលបានចូលជាធរមានភ្លាមៗ»។ លោកបាននិយាយបន្ថែមថា រដ្ឋធានីអ៊ីស្លាម៉ាបាដរបស់ប្រទេសប៉ាគីស្ថាន នឹងស្វាគមន៍គណៈប្រតិភូមកពីប្រទេសទាំងពីរនៅថ្ងៃសុក្រខាងមុខនេះ ដើម្បីបើកកិច្ចចរចាក្នុងបំណងឈានដល់ «កិច្ចព្រមព្រៀងប្រាកដប្រជាចុងក្រោយ»។ យើងសង្ឃឹមយ៉ាងមុតមាំថា «កិច្ចចរចានៅទីក្រុងអ៊ីស្លាម៉ាបាដ» នឹងទទួលបានជោគជ័យក្នុងការសម្រេចបានសន្តិភាពប្រកបដោយចីរភាព ហើយនឹងមានព័ត៌មានល្អៗបន្ថែមទៀតក្នុងពេលប៉ុន្មានថ្ងៃខាងមុខ»។ ទាំងទីក្រុងតេអេរ៉ង់ និងទីក្រុងវ៉ាស៊ីនតោន បានប្រកាសថា ពួកគេបានព្រមព្រៀងលើបទឈប់បាញ់រយៈពេលពីរសប្តាហ៍ ត្រឹមតែមួយម៉ោងមុនកាលបរិច្ឆេទកំណត់របស់ប្រធានាធិបតីសហរដ្ឋអាមេរិក លោក ដូណាល់ ត្រាំ ក្នុងការ «កម្ទេច»អ៊ីរ៉ង់ ត្រូវផុតកំណត់។ សង្គ្រាមបានចាប់ផ្តើមនៅពេលដែលអ៊ីស្រាអែល និងសហរដ្ឋអាមេរិក បានបើកការវាយប្រហារលើអ៊ីរ៉ង់ ដែលបានសម្លាប់មេដឹកនាំកំពូលរបស់ខ្លួននៅថ្ងៃទី២៨ ខែកុម្ភៈ បង្កឱ្យមានការវាយប្រហារសងសឹកពីទីក្រុងតេអេរ៉ង់ទៅលើប្រទេសឈូងសមុទ្រ និងអ៊ីស្រាអែល។ ប្រទេសលីបង់ ក៏ត្រូវបានទាញឲ្យធ្លាក់ចូលទៅក្នុងជម្លោះនេះផងដែរ បន្ទាប់ពីក្រុមហេសបូឡាគាំទ្រដោយអ៊ីរ៉ង់ បានបើកការវាយប្រហារលើអ៊ីស្រាអែល។

អនុប្រធានាធិបតីអាមេរិក រិះគន់ការជ្រៀតជ្រែករបស់អឺរ៉ុប ក្នុងដំណើរទស្សនកិច្ចដ៏សំខាន់ទៅហុងគ្រី

អនុប្រធានាធិបតីសហរដ្ឋអាមេរិក លោក J.D. Vance បានជួបលោក Viktor Orban នាយករដ្ឋមន្ត្រីហុងគ្រី នៅទីក្រុង Budapest ក្នុងដំណើរទស្សនកិច្ចដ៏សំខាន់មួយ មុនការបោះឆ្នោតសភាដ៏សំខាន់។ គណបក្សរបស់នាយករដ្ឋមន្ត្រីហុងគ្រីកំពុងដើរពីក្រោយគូប្រជែងគាំទ្រដោយសហភាពអឺរ៉ុប ក្នុងការស្ទង់មតិ ហើយលោកបានចោទប្រកាន់ទីក្រុងព្រុចសែលថាបានជ្រៀតជ្រែកក្នុងការបោះឆ្នោតនេះ។ លោក Vance បានទៅដល់ទីក្រុង Budapest កាលពីថ្ងៃអង្គារ ជាទីដែលរូបលោកត្រូវបានស្វាគមន៍ដោយរដ្ឋមន្ត្រីការបរទេសហុងគ្រី លោក Peter Szijjarto។ នៅក្នុងវីដេអូខ្លីមួយដែលបានចេញផ្សាយនៅលើប្រព័ន្ធផ្សព្វផ្សាយសង្គម លោក Szijjarto បានសាទរដំណើរទស្សនកិច្ចនេះថាជាសញ្ញានៃយុគមាសសម្រាប់ទំនាក់ទំនងហុងគ្រី-អាមេរិក។ លោក Vance គឺជាមន្ត្រីអាមេរិកកម្រិតខ្ពស់បំផុតដែលបានទៅទស្សនកិច្ចនៅរដ្ឋធានីហុងគ្រីចាប់តាំងពីប្រធានាធិបតីអាមេរិក លោក George W. Bush បានទៅទីនោះក្នុងឆ្នាំ២០០៦។ បន្ទាប់មក លោក Vance និងលោក Orban បានធ្វើសន្និសីទសារព័ត៌មានរួមគ្នា ដែលក្នុងនោះលោក Vance បានហៅនាយករដ្ឋមន្ត្រីហុងគ្រីថាជា រដ្ឋបុរសពិតប្រាកដមួយរូបគត់ក្នុងចំណោមរដ្ឋបុរសពិតប្រាកដជាច្រើននៅអឺរ៉ុប។ តាមរយៈដំណើរទស្សនកិច្ចទៅកាន់ទីក្រុង Budapest លោក Vance បាននិយាយថា លោកមានគោលបំណង ផ្ញើសញ្ញាមួយទៅកាន់មនុស្សគ្រប់គ្នា ជាពិសេសមន្ត្រីនៅទីក្រុងព្រុចសែល ដែលបានធ្វើអ្វីគ្រប់យ៉ាងដែលពួកគេអាចធ្វើបាន ដើម្បីរារាំងប្រជាជនហុងគ្រី។ ដំណើរទស្សនកិច្ចនេះ បានកើតឡើងនៅពេលវេលាដ៏សំខាន់មួយសម្រាប់លោក Orban និងសម្រាប់សហភាពអឺរ៉ុប។ ប្រជាជនហុងគ្រីនឹងទៅបោះឆ្នោតនៅថ្ងៃអាទិត្យសប្ដាហ៍នេះ ក្នុងការបោះឆ្នោតសកល។ ការស្ទង់មតិមុនការបោះឆ្នោតបង្ហាញថា គណបក្ស Fidesz របស់លោក Orban នៅពីក្រោយគណបក្ស Tisza របស់លោក Peter Magyar ដែលគាំទ្រដោយសហភាពអឺរ៉ុប ហើយយុទ្ធនាការរហូតមកដល់បច្ចុប្បន្នត្រូវបានក្រកួតប្រជែងគ្នាយ៉ាងជូរចត់៕

ការស៊ើបអង្កេតបឋម UN ស្តីបន្ទោសអ៊ីស្រាអែល និងទំនងជាក្រុមហេសបូឡាដែរ ចំពោះការស្លាប់របស់កងកម្លាំងរក្សាសន្តិភាព

អង្គការសហប្រជាជាតិបាននិយាយកាលពីថ្ងៃអង្គារ៧មេសាសប្ដាហ៍នេះថា ការរកឃើញបឋមក្នុងការស៊ើបអង្កេតរបស់អង្គការសហប្រជាជាតិលើការស្លាប់របស់កងកម្លាំងរក្សាសន្តិភាពឥណ្ឌូនេស៊ី បីនាក់ក្នុងប្រទេសលីបង់កាលពីខែមុនបង្ហាញថា ម្នាក់ត្រូវបានសម្លាប់ដោយគ្រាប់កាំភ្លើងរថក្រោះអ៊ីស្រាអែល និងពីរនាក់ទៀតត្រូវបានសម្លាប់ដោយគ្រឿងផ្ទុះដែលទំនងជាដាក់ដោយក្រុមហេសបូឡា។អ្នកនាំពាក្យអង្គការសហប្រជាជាតិលោក Stephane Dujarric បានប្រាប់សន្និសីទសារព័ត៌មានថា ទាំងនេះគឺជាការរកឃើញបឋម ផ្អែកលើភស្តុតាងរូបវន្តដំបូង ដោយបន្ថែមថា ដំណើរការស៊ើបអង្កេតពេញលេញកំពុងបន្ត ដែលរួមមានការចូលរួមជាមួយភាគីពាក់ព័ន្ធ។ លោក Dujarric បានហៅឧបទ្ទវហេតុទាំងនេះថា "មិនអាចទទួលយកបាន" ហើយបាននិយាយថា ពួកគេអាចចាត់ទុកថាជាឧក្រិដ្ឋកម្មសង្គ្រាមក្រោមច្បាប់អន្តរជាតិ។ លោកថា អង្គការសហប្រជាជាតិបានស្នើសុំឱ្យអាជ្ញាធរជាតិស៊ើបអង្កេត និងកាត់ទោសជនល្មើស។កងកម្លាំងរក្សាសន្តិភាពឥណ្ឌូនេស៊ីត្រូវបានសម្លាប់នៅក្នុងឧបទ្ទវហេតុពីរដាច់ដោយឡែកពីគ្នានៅភាគខាងត្បូងប្រទេសលីបង់កាលពីថ្ងៃទី២៩ និង៣០ ខែមីនា បន្ទាប់ពីចុងសប្តាហ៍ដ៏បង្ហូរឈាម ដែលក្រុមអ្នកសារព័ត៌មាន និងគ្រូពេទ្យលីបង់ក៏ត្រូវបានសម្លាប់ក្នុងការវាយប្រហាររបស់អ៊ីស្រាអែលផងដែរ។កាលពីថ្ងៃអង្គារសប្ដាហ៍នេះដែរ អ្នកនាំពាក្យរបស់កងកម្លាំងរក្សាសន្តិភាព ដែលជាកងកម្លាំងបណ្ដោះអាសន្នរបស់អង្គការសហប្រជាជាតិប្រចាំប្រទេសលីបង់ ហៅកាត់ថា UNIFIL បាននិយាយថា យោធាអ៊ីស្រាអែលបានរារាំងក្បួនរថយន្តដឹកជញ្ជូន UNIFIL និងបានឃុំខ្លួនកងកម្លាំងរក្សាសន្តិភាពរបស់ខ្លួនម្នាក់មួយរយៈពេលខ្លី៕

បណ្ដាញសង្គម

ព័ត៌មានថ្មីៗ

អគ្គកុងស៊ុលវៀតណាម រៀបចំកម្មវិធីសប្ដាហ៍វប្បធម៌វៀតណាម ឆ្នាំ២០២៦ នៅខេត្ដសៀមរាប

រដ្ឋបាលខេត្តកំពតត្រៀមទុរេនទុំ ២តោន សម្រាប់ទទួលទេសចរចូលរួមព្រឹត្តិការណ៍ «មរតកផ្លែឈើ និងនំចំណីកំពត»

មន្ត្រីជំនាញ ស្នើដល់កសិករ សហគមន៍ និងអ្នកពាក់ព័ន្ធរួមគ្នាលើកកម្ពស់វិស័យកសិកម្មខេត្តកែប

គណៈកម្មការការពារទប់ស្កាត់ និងបង្ក្រាបបទល្មើសធនធានធម្មជាតិ ផ្សព្វផ្សាយសេចក្តីជូនដំណឹងស្ដីពីរដូវបិទនេសាទ

អ្នកដាំទុរេនស្រុកចម្ការលើចង់ឲ្យអ្នកលក់ប្រកាន់ភាពស្មោះត្រង់លើអតិថិជន

មេបញ្ជាការតំបន់ប្រតិបត្តិការសឹករងកំពង់ឆ្នាំង នាំយកអំណោឧបត្ថម្ភដល់កុមារីកំព្រា កំពុងមើលថែប្អូនតូចនៅកំពង់ឆ្នាំង

ក្រុមការងារចុះមូលដ្ឋានស្រុកជើងព្រៃ ណែនាំអាជ្ញាធរផ្សព្វផ្សាយពីច្បាប់កាតព្វកិច្ចយោធាដល់ពលរដ្ឋ

អាវុធហត្ថរាជធានីភ្នំពេញ បង្ក្រាបទីតាំងលក់សម្ភារៈអាសអាភាសចំនួន ៣កន្លែង ឃាត់ខ្លួនជនសង្ស័យ ៩នាក់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877