BTV NEWS

រដ្ឋមន្រ្តីការពារជាតិជប៉ុនលោក Koizumi ច្រានចោលការចោទប្រកាន់ពីយោធានិយមថ្មី

ប្រមុខ WHO ទទួចសុំឲ្យមានការបញ្ចុះសពដោយសុវត្ថិភាព អំឡុងធ្វើដំណើរទៅកាន់តំបន់រីករាលដាលឆ្លងជំងឺអេបូឡា

អ៊ីរ៉ង់និយាយថា កិច្ចប្រជុំជាមួយអាមេរិកកំពុងបន្ត តែពុំឈានដល់កិច្ចព្រមព្រៀងផ្តាច់ព្រ័ត្រនោះទេ

UN៖ ការប៉ះទង្គិចគ្នារវាងអ៊ីស្រាអែល-ក្រុមហេសបូឡា ធ្វើឲ្យប៉ះពាល់ការចូលដល់ជំនួយនៅភាគខាងត្បូងលីបង់

ព័ត៌មានអន្តរជាតិ

លោក TO LAM ជាប់ឆ្នោតជាអគ្គលេខាធិការបក្សកុម្មុយនិស្ត និងជាប្រធានាធិបតីវៀតណាម

នៅថ្ងៃថ្ងៃអង្គារនេះ សមាជិកសភាវៀតណាម បានបោះឆ្នោតជ្រើសរើសលោក To Lam ជាអគ្គលេខាធិការបក្សកុម្មុយនិស្ត ជាប្រធានាធិបតីនៃប្រទេសនេះ សម្រាប់រយៈពេល ៥ឆ្នាំខាងមុខ ដែលធ្វើឲ្យលោកក្លាយជាមេដឹកនាំវៀតណាមដ៏មានឥទ្ធិពលបំផុត ក្នុងរយៈពេលជាច្រើនទសវត្សរ៍មកនេះ។ការសម្រេចនេះ ដែលរំពឹងទុកយ៉ាងទូលំទូលាយនេះ គឺជាការបំបែកចេញពីប្រព័ន្ធដឹកនាំរួមជាប្រពៃណីរបស់វៀតណាម ដោយពង្រឹងអំណាចក្នុងទម្រង់មួយតាមរបៀបដែលអ្នកវិភាគនិយាយថា អាចធ្វើឲ្យរដ្ឋឯក បក្ស ងាកទៅរកអំណាចផ្តាច់ការកាន់តែខ្លាំង ខណៈដែលអាចធ្វើឲ្យការសម្រេចចិត្តកាន់តែលឿនផងដែរ ស្រដៀងនឹងប្រទេសចិនជិតខាងរបស់ខ្លួន។សភាបានគាំទ្រការតែងតាំងរបស់បក្សកុម្មុយនិស្ត ដែលមន្ត្រីបាននិយាយថា ត្រូវបានបញ្ចប់ នៅក្នុងកិច្ចប្រជុំមួយ នៅចុងខែមីនា។អតីតប្រធានសន្តិសុខសាធារណៈឥឡូវនេះ មានតំណែងពីរក្នុងពេលតែមួយ ដើម្បីគ្រប់គ្រងប្រទេសសម្រាប់រយៈពេល ៥ឆ្នាំ ខាងមុខ បន្ទាប់ពីលោកទទួលបានអាណត្តិទី២ ជាអគ្គលេខាធិការបក្ស ក្នុងខែ មករា៕

កងទ័ពអ៊ីស្រាអែលនិយាយថា សមត្ថភាពនាំចេញប្រេងឥន្ធនៈរបស់អ៊ីរ៉ង់ ៨៥% មិនអាចដំណើរការបានទេ

កងកម្លាំងការពារជាតិអ៊ីស្រាអែល (IDF) បាននិយាយនៅក្នុងសេចក្តីថ្លែងការណ៍មួយកាលពីថ្ងៃចន្ទថា រហូតមកទល់ពេលនេះ ខ្លួនបានធ្វើឲ្យសមត្ថភាពនាំចេញប្រេងឥន្ធនៈរបស់អ៊ីរ៉ង់ជាង ៨៥ភាគរយ មិនអាចដំណើរការបាន បន្ទាប់ពីការវាយប្រហារទៅលើរោងចក្រប្រេងឥន្ធនៈធំជាងគេទី២ របស់អ៊ីរ៉ង់។កងកម្លាំងការពារជាតិអ៊ីស្រាអែល បានបញ្ជាក់ថា កងទ័ពអាកាសរបស់ខ្លួន ដែលធ្វើសកម្មភាពស៊ើបការណ៍សម្ងាត់ កាលពីថ្ងៃចន្ទ បានវាយប្រហារហេដ្ឋារចនាសម្ព័ន្ធនៅរោងចក្រប្រេងឥន្ធនៈធំបំផុតរបស់អ៊ីរ៉ង់ ដែលមានទីតាំងនៅស្រុក Assaluyeh ក្នុងខេត្ត Bushehr ភាគខាងត្បូង។នាព្រឹកថ្ងៃចន្ទ រដ្ឋមន្ត្រីការពារជាតិអ៊ីស្រាអែល លោក Israel Katz បានប្រកាសពីការវាយប្រហារតាមអាកាសលើរោងចក្រនេះ ដែលមានប្រហែល ៥០ ភាគរយនៃផលិតកម្មប្រេងឥន្ធនៈរបស់អ៊ីរ៉ង់។សេចក្តីថ្លែងការណ៍របស់ IDF បានចោទថា រោងចក្រនេះផលិត និងនាំចេញសម្ភារៈគីមីសម្រាប់កងកម្លាំងប្រដាប់អាវុធអ៊ីរ៉ង់។ សេចក្តីថ្លែងការណ៍នោះ បានបន្ថែមថា រោងចក្រនេះ បានបម្រើជាមជ្ឈមណ្ឌលសំខាន់សម្រាប់ផលិតគ្រឿងបន្លាស់សំខាន់ៗសម្រាប់ឧស្សាហកម្មមីស៊ីលរបស់អ៊ីរ៉ង់ ហើយការខូចខាតនេះ នឹងរំខានដល់សមត្ថភាពរបស់អ៊ីរ៉ង់ក្នុងការប្រើប្រាស់សម្ភារៈទាំងនេះ ដើម្បីផលិតអាវុធ៕

ការវិភាគតាមសមុទ្រ៖ ការដឹកជញ្ជូនតាមសមុទ្រឆ្លងកាត់ច្រកសមុទ្រហ័រមូសបានប្តូរទៅជា «ប្រព័ន្ធច្រករបៀង ២

ក្រុមហ៊ុនវិភាគតាមសមុទ្រដែលមានទីស្នាក់ការ កណ្តាលនៅទីក្រុងឡុងដ៍ បាននិយាយកាលពីថ្ងៃអាទិត្យថា ការដឹកជញ្ជូនតាមសមុទ្រឆ្លងកាត់ច្រកសមុទ្រហ័រមូស បានប្តូរទៅជា«ប្រព័ន្ធច្រករបៀងពីរ» ដោយរួមបញ្ចូលគ្នានូវផ្លូវភាគខាងជើងដែលគ្រប់គ្រងដោយកងឆ្មាំបដិវត្តន៍ឥស្លាមអ៊ីរ៉ង់ (IRGC) និងផ្លូវភាគខាងត្បូងដែលទើបបង្កើតថ្មីតាមបណ្តោយឆ្នេរសមុទ្រអូម៉ង់។ យោងតាមរបាយការណ៍មួយដែលចេញផ្សាយដោយក្រុមហ៊ុន Windward នាវាសរុបចំនួន ១១ គ្រឿង បានឆ្លងកាត់ច្រកសមុទ្រ នៅថ្ងៃទី ០៥ ខែមេសា រួមទាំងនាវាចូលចំនួនបីគ្រឿង និងនាវាចេញចំនួន ៨គ្រឿង។ នាវាចូលទាំងអស់ គឺជានាវាដឹកប្រេង ខណៈដែលចរាចរណ៍ចេញរួមមានទាំងនាវាដឹកប្រេង និងនាវាដឹកទំនិញ។លំហូរចេញទៅគោលដៅខាងក្រៅ ត្រូវបានបែងចែករវាងផ្លូវទាំងពីរ។ នាវាចំនួន ៥គ្រឿង បានឆ្លងកាត់ច្រករបៀងខាងជើង នៅជិតកោះ Larak ដែលស្ថិតនៅក្រោមការគ្រប់គ្រងរបស់ IRGC ខណៈដែលនាវាចំនួន បីគ្រឿង បានប្រើប្រាស់ច្រករបៀងខាងត្បូងតាមបណ្តោយឆ្នេរសមុទ្រអូម៉ង់។របាយការណ៍នោះ បានកត់សម្គាល់ថា ផ្លូវភាគខាងជើង នៅតែបន្តដំណើរការ ក្រោមការគ្រប់គ្រងរបស់ IRGC ដែលផ្តោតលើកោះ Larak។ ទន្ទឹមនឹងនេះ ការលេចចេញនូវច្រករបៀងខាងត្បូង អនុញ្ញាតឲ្យនាវាឆ្លងកាត់នៅខាងក្រៅតំបន់ត្រួតពិនិត្យដើម៕

ប្រធានាធិបតីទួរគីចោទអ៊ីស្រាអែលថា បានបំផ្លាញគំនិតផ្តួចផ្តើមសន្តិភាព

ប្រធានាធិបតីទួរគីលោក រ៉េសិប តាយីប អឺដូហ្កាន់ ( Recep Tayyip Erdogan) កាលពីថ្ងៃចន្ទ បានចោទប្រកាន់អ៊ីស្រាអែលថា បានធ្វើឲ្យប៉ះពាល់ដល់កិច្ចខិតខំប្រឹងប្រែងទាំងអស់ ដើម្បីបញ្ឈប់សង្គ្រាមនៅមជ្ឈិមបូព៌ា ប៉ុន្តែបាននិយាយថា ទីក្រុងអង់ការ៉ា នឹងបន្តស្វែងរកឱកាសណាមួយ ក្នុងការជំរុញបទឈប់បាញ់។លោក អឺដូហ្កាន់ បាននិយាយបន្ទាប់ពីកិច្ចប្រជុំគណៈរដ្ឋមន្ត្រីប្រចាំសប្តាហ៍ នៅក្នុងរដ្ឋធានីទួរគីថា៖«រដ្ឋាភិបាលអ៊ីស្រាអែល បានបន្តបំផ្លាញគំនិតផ្តួចផ្តើមទាំងអស់ដែលមានគោលបំណងបញ្ចប់សង្គ្រាម»។លោកបានបន្ថែមថា៖«ប្រសិនបើមានឱកាសតិចតួចបំផុត ដើម្បីបញ្ចប់ជម្លោះប្រដាប់អាវុធនិងបង្កើតបរិយាកាសសម្រាប់ការចរចា យើងកំពុងខិតខំប្រឹងប្រែងដោយស្មោះ ដើម្បីចាប់យកឱកាស»។ “ក្តីសង្ឃឹមរបស់យើង គឺថា សង្គ្រាមខុសច្បាប់ គ្មានន័យ មិនស្របច្បាប់ និងបង្កឲ្យមានផលវិបាកធ្ងន់ធ្ងរ សម្រាប់មនុស្សជាតិទាំងអស់នេះ នឹងត្រូវបញ្ចប់ឲ្យបានឆាប់តាមដែលអាចធ្វើទៅបាន»។លោក អឺដូហ្កាន់ ក៏បាននិយាយផងដែរថា ទួរគីបានបង្កើនទំនាក់ទំនងការទូត ដើម្បីសម្រេចបាននូវបទឈប់បាញ់៕

លោក GROSSI និយាយថា ការវាយប្រហារនៅជិតរោងចក្រថាមពលនុយក្លេអ៊ែរអ៊ីរ៉ង់ «ត្រូវតែបញ្ឈប់»

ប្រធានអង្គការឃ្លាំមើលនុយក្លេអ៊ែររបស់អង្គការសហប្រជាជាតិ កាលពីថ្ងៃចន្ទ បានព្រមានថា ការវាយប្រហារនៅជិតរោងចក្រថាមពលបរមាណូ Bushehr របស់អ៊ីរ៉ង់ «បង្កគ្រោះថ្នាក់យ៉ាងពិតប្រាកដដល់សុវត្ថិភាពនុយក្លេអ៊ែរ ហើយត្រូវតែបញ្ឈប់»។រោងចក្រនេះ ដែលមានទីតាំងនៅភាគខាងត្បូងនៃប្រទេសនេះ និងបំពាក់ដោយរ៉េអាក់ទ័រកម្លាំង ១.000 មេហ្គាវ៉ាត់ ត្រូវបានគេកំណត់គោលដៅចំនួន ៤លើក ចាប់តាំងពីសង្គ្រាមអាមេរិក-អ៊ីស្រាអែលលើអ៊ីរ៉ង់ បានចាប់ផ្តើម។ការវាយប្រហារចុងក្រោយនេះ ត្រូវបានរាយការណ៍ដោយប្រព័ន្ធផ្សព្វផ្សាយរដ្ឋអ៊ីរ៉ង់ កាលពីថ្ងៃសៅរ៍។លោក Rafael Grossi នាយកទីភ្នាក់ងារថាមពលបរមាណូអន្តរជាតិ បាននិយាយនៅលើប្រព័ន្ធផ្សព្វផ្សាយសង្គម X ថា ការវាយប្រហារនៅជិតរោងចក្រដែលកំពុងដំណើរការនេះ «អាចបង្កឲ្យមានគ្រោះថ្នាក់ វិទ្យុសកម្មធ្ងន់ធ្ងរ ជាមួយនឹងផលវិបាកដ៏គ្រោះថ្នាក់ដល់មនុស្ស និងបរិស្ថាន នៅក្នុងប្រទេសអ៊ីរ៉ង់ និងលើសពីនេះ»៕

លោក TRUMP ៖ អាមេរិកប្រើប្រាស់យន្តហោះចម្បាំង ១៥៥គ្រឿង ដើម្បីជួយសង្គ្រោះអ្នកបើកយន្តហោះនៅអ៊ីរ៉ង់

ប្រធានាធិបតីអាមេរិក លោក ដូណាល់ ត្រាំ (Donald Trump) បាននិយាយកាលពីថ្ងៃចន្ទថា យោធាអាមេរិកបានប្រើប្រាស់យន្តហោះចម្បាំងចំនួន ១៥៥ គ្រឿង ដើម្បីជួយសង្គ្រោះអ្នកបើកយន្តហោះទី២ នៅអ៊ីរ៉ង់ ហើយត្រូវបានបង្ខំឲ្យបំផ្លាញយន្តហោះដឹកទំនិញមួយចំនួន ដែលបានជាប់គាំងនៅទីនោះ ដើម្បីទប់ស្កាត់កុំឲ្យពួកវា ធ្លាក់ទៅក្នុងដៃអ៊ីរ៉ង់។លោក ត្រាំ បានប្រាប់សន្និសីទសារព័ត៌មានមួយ នៅសេតវិមាន ខណៈពេលដែលផ្តោតលើព័ត៌មានលម្អិតនៃការជួយសង្គ្រោះនោះថា៖ «យើងបានបំផ្ទុះយន្តហោះចាស់ៗមួយចំនួន»។យន្តហោះចម្បាំងទាំងនោះ ត្រូវបានគេរាយការណ៍ថា មានឧបករណ៍ទំនាក់ទំនង និងបច្ចេកវិទ្យាប្រឆាំង មីស៊ីល ដែលមន្ទីរបញ្ចកោណមិនចង់ឲ្យអ៊ីរ៉ង់រឹបអូស។លោក ត្រាំ បាននិយាយថា បេសកកម្មស្វែងរក និងជួយសង្គ្រោះ ត្រូវបានជម្លៀសចេញដោយយន្តហោះ «ដែលមានល្បឿនលឿន និងមានទម្ងន់ស្រាល»៕

មេដឹកនាំកំពូលអ៊ីរ៉ង់ថ្កោលទោសការធ្វើឃាតប្រមុខចារកម្ម IRGC

មេដឹកនាំកំពូលអ៊ីរ៉ង់ លោក Mojtaba Khamenei បានសម្តែងការចូលរួមរំលែកទុក្ខចំពោះឧត្តមសេនីយ៍ជាន់ខ្ពស់នៃកងឆ្មាំបដិវត្តន៍ឥស្លាម (IRGC) ដោយនិយាយថា «ការធ្វើឃាត និងឧក្រិដ្ឋកម្ម» ប្រឆាំងនឹងថ្នាក់ដឹកនាំអ៊ីរ៉ង់នឹងមិនបញ្ឈប់ដំណើរការរបស់ប្រទេសនេះទេ។នៅក្នុងសេចក្តីថ្លែងការណ៍ជាលាយលក្ខណ៍អក្សរមួយ លោក Khamenei បានសរសើរលោក Majid Khademi ប្រធានអង្គការការពារចារកម្មរបស់ IRGC សម្រាប់ «កិច្ចខិតខំប្រឹងប្រែងស្ងាត់ៗ ក្នុងវិស័យសន្តិសុខ ចារកម្ម និងការពារជាតិ»របស់ប្រទេសអ៊ីរ៉ង់ អស់រយៈពេលជាច្រើនទសវត្សរ៍។លោកក៏បានចោទប្រកាន់អ៊ីស្រាអែល និងសហរដ្ឋអាមេរិកថា បានងាកទៅរក «ភេរវកម្ម និងការធ្វើឃាត» បន្ទាប់ពី «ការបរាជ័យជាបន្តបន្ទាប់"។ លោក Khademi ត្រូវបានសម្លាប់ នៅទីក្រុងតេអេរ៉ង់ កាលពីថ្ងៃចន្ទនៅក្នុងការវាយប្រហារតាមអាកាសដែលអ៊ីស្រាអែលបានអះអាង។លោក Khamenei បានសម្តែងការចូលរួមរំលែកទុក្ខដល់ក្រុមគ្រួសារ និងសមមិត្តរបស់លោក Khademi ក៏ដូចជាមេបញ្ជាការផ្សេងទៀតនៃអង្គការចារកម្មរបស់កងឆ្មាំបដិវត្តន៍ឥស្លាម (IRGC)៕

យានអវកាស Artemis II បំបែកកំណត់ត្រាសម្រាប់ការធ្វើដំណើររបស់មនុស្សឆ្ងាយបំផុតពីភពផែនដី

បេសកកម្មយានអវកាស Artemis II បានបង្កើតប្រវត្តិសាស្ត្រ ដោយក្រុមអវកាសយានិករបស់ខ្លួនធ្វើដំណើរកាន់តែឆ្ងាយពីភពផែនដីជាងជំនាន់មនុស្សណាៗទាំងអស់ពីមុន ដោយលើសពីកំណត់ត្រាដែលមានរយៈពេលជាងកន្លះសតវត្សរ៍ មកនេះ។អវកាសយានិករបស់អង្គការ NASA គឺលោក Reid Wiseman លោក Victor Glover និងលោកស្រី Christina Koch រួមជាមួយអវកាសយានិករបស់ទីភ្នាក់ងារអវកាសកាណាដា (CSA) គឺលោក Jeremy Hansen កាលពីថ្ងៃចន្ទដើមសប្ដាហ៍នេះ បានវ៉ាដាច់កំណត់ត្រាចម្ងាយឆ្ងាយរបស់បេសកកម្ម Apollo 13 ចំនួន ២៤៨.៦៥៥ ម៉ាយពីភពផែនដី ដែលត្រូវបានបង្កើតកំណត់ត្រានៅឆ្នាំ១៩៧០។ ឥឡូវនេះបេសកកម្ម Artemis II បានលើសពីកំណត់ត្រានោះជាង៤.០០០ម៉ាយឬស្មើ៦.៤៣៧ គីឡូម៉ែត្រ ដោយឈានដល់ចម្ងាយអតិបរមាប្រហែល២៥២.៧៥៧ ម៉ាយពីភពផែនដី។ សមិទ្ធផលនេះក្លាយជាចំណុចរបត់និមិត្តរូបមួយនៅក្នុងការជំរុញថ្មីរបស់អង្គការ NASA ឆ្ពោះទៅរកការរុករកកាន់តែជ្រៅក្នុងទីអវកាស និងគោលដៅរយៈពេលវែងរបស់ខ្លួនក្នុងការបញ្ជូនមនុស្សត្រឡប់ទៅកាន់ភពព្រះចន្ទវិញ និងទីបំផុតបញ្ជូនបេសកកម្មទៅកាន់ភពអង្គារ។ថ្លែងបន្ទាប់ពីព្រឹត្តិការណ៍សំខាន់នេះ អវកាសយានិកម្នាក់ក្នុងចំណោមពួកគេបានបង្ហាញការគោរពដល់ក្រុមអ្នករុករកជំនាន់មុន។ យោងតាមទូរទស្សន៍ BBC សមាជិកក្រុមយានអវកាសរូបនេះបាននិយាយថា ពួកគេបានធ្វើដំណើរលើសពីចម្ងាយឆ្ងាយបំផុតដែលមនុស្សធ្លាប់ធ្វើដំណើរពីភពផែនដី។ពួកគេធ្វើដូច្នេះដើម្បីបង្ហាញការគោរពដល់កិច្ចខិតខំប្រឹងប្រែង និងស្នាដៃដ៏អស្ចារ្យរបស់ក្រុមបេសកកម្មជំនាន់មុនរបស់ពួកគេក្នុងការរុករករបស់មនុស្សនៅលើទីអវកាស។អង្គការណាសា បានរាយការណ៍ពីវឌ្ឍនភាពយ៉ាងល្អនៃការហោះក្រឡឹងជុំវិញព្រះចន្ទ ចាប់តាំងពី បេសកកម្មដែលមានរយៈពេលប្រហែល ១០ថ្ងៃនេះ បានចាប់ផ្ដើមកាលពីថ្ងៃពុធសប្ដាហ៍មុនមក៕

ក្រុមហ៊ុនប្រេង Basra៖ អ៊ីរ៉ាក់ អាចស្តារការនាំចេញប្រេងក្នុង១សប្តាហ៍ ប្រសិនច្រកសមុទ្រ Hormuz បើកឡើងវិញ

ប្រធានក្រុមហ៊ុនប្រេង Basra គ្រប់គ្រងដោយរដ្ឋរបស់ប្រទេស បាននិយាយថា អ៊ីរ៉ាក់ អាចស្តារឡើងវិញការនាំចេញប្រេងឆៅដល់ប្រហែល៣,៤លានបារ៉ែលក្នុងមួយថ្ងៃ ក្នុងរយៈពេលមួយសប្តាហ៍ ប្រសិនបើសង្គ្រាមអ៊ីរ៉ង់បញ្ចប់ ហើយច្រកសមុទ្រ Hormuz បើកដំណើរការឡើងវិញ។ ក្នុងចំណោមប្រទេសផលិតប្រេងនៅឈូងសមុទ្រ អ៊ីរ៉ាក់បានរងការធ្លាក់ចុះខ្លាំងបំផុតនៃប្រាក់ចំណូលពីប្រេងបណ្តាលមកពីការបិទច្រកសមុទ្រដោយប្រសិទ្ធភាព នេះបើយោងតាមការវិភាគរបស់សារព័ត៌មាន Reuters ព្រោះប្រទេសនេះខ្វះផ្លូវដឹកជញ្ជូនជំនួស។ ប៉ុន្តែប្រទេសអ៊ីរ៉ាក់ ជាប្រទេសផលិតប្រេងធំបំផុតទីពីរនៅក្នុងអង្គការប្រទេសនាំចេញប្រេង(OPEC) អាចស្តារទិន្នផលឡើងវិញបានយ៉ាងឆាប់រហ័សដល់កម្រិតមុនការវាយប្រហាររបស់សហរដ្ឋអាមេរិក និងអ៊ីស្រាអែលលើអ៊ីរ៉ង់នៅចុងខែកុម្ភៈ ដែលនាំឱ្យមានការបិទផ្លូវទឹកដោយប្រសិទ្ធភាព។ ច្រកសមុទ្រនេះ ជាធម្មតាគឺជាផ្លូវសម្រាប់លំហូរប្រេង និងឧស្ម័នធម្មជាតិរាវ (LNG) មានប្រហែលមួយភាគប្រាំនៃពិភពលោក។ លោក Bassem Abdul Karim បាននិយាយថា អ៊ីរ៉ង់រហូតមកដល់ពេលនេះ បានផ្តល់តែការធានាដោយពាក្យសំដីដែលនឹងអនុញ្ញាតឱ្យនាវាដឹកប្រេងអ៊ីរ៉ាក់ឆ្លងកាត់ច្រកសមុទ្រ។ លោកនិយាយថា «យើងពុំទាន់បានទទួលឯកសារផ្លូវការណាមួយទាក់ទងនឹងការអនុញ្ញាតឱ្យនាវាដឹកប្រេងអ៊ីរ៉ាក់ ឆ្លងកាត់នៅឡើយទេ»។ លោកបញ្ជាក់ថា ផលិតកម្មពីអណ្តូងប្រេងនៅភាគខាងត្បូងរបស់ប្រទេសអ៊ីរ៉ាក់ មានប្រហែល ៩០០.០០០បារ៉ែលក្នុងមួយថ្ងៃ ប៉ុន្តែប្រសិនបើសង្គ្រាមបញ្ចប់ ហើយការឆ្លងកាត់ដោយសុវត្ថិភាពតាមច្រកសមុទ្រត្រូវបានធានា ការនាំចេញអាចឡើងដល់៣,៤លានបារ៉ែលក្នុងមួយថ្ងៃ ក្នុងរយៈពេលមួយសប្តាហ៍។

អ៊ីរ៉ង់ ចោទសហរដ្ឋអាមេរិក ពីភាពមិនស៊ីគ្នារវាងវោហាសាស្ត្រ និងសកម្មភាព

លោក Esmaeil Baghaei អ្នកនាំពាក្យក្រសួងការបរទេសអ៊ីរ៉ង់ កាលពីថ្ងៃចន្ទបាននិយាយថា សហរដ្ឋអាមេរិក បានបាត់បង់ភាពជឿជាក់លើផ្នែកការទូតរបស់ខ្លួន ហើយចោទប្រកាន់ទីក្រុងវ៉ាស៊ីនតោនថា និយាយរឿងមួយ ហើយធ្វើរឿងមួយផ្សេងទៀតដោយគំរាមវាយប្រហារបន្ថែមទៀត ខណៈក៏កំពុងស្នើការចរចា ក្នុងពេលដំណាលគ្នា។ថ្លែងនៅក្នុងសន្និសីទសារព័ត៌មានប្រចាំសប្តាហ៍នៅទីក្រុងតេអេរ៉ង់ លោក Baghaei បាននិយាយថា សហរដ្ឋអាមេរិក បានវាយប្រហារលើអ៊ីរ៉ង់ពីរលើកក្នុងអំឡុងពេលចរចា ដោយបានប្រព្រឹត្តឧក្រិដ្ឋកម្មសង្គ្រាម និងបង្ហាញពីការមិនអើពើចំពោះផ្នែកការទូត។ លោកបានសង្កត់ធ្ងន់ថា គោលដៅរបស់អ៊ីរ៉ង់ គឺច្បាស់លាស់ ដែលកិច្ចខិតខំប្រឹងប្រែងទាំងអស់របស់ខ្លួនផ្តោតសំខាន់លើការការពារប្រទេសជាតិ។ទាក់ទងនឹងសំណើបទឈប់បាញ់របស់សហរដ្ឋអាមេរិក ដែលបានបង្ហាញដោយអ្នកសម្របសម្រួល លោក Baghaei បាននិយាយថា អ៊ីរ៉ង់បានបង្ហាញពីជំហរ និងការទាមទារច្បាស់លាស់របស់ខ្លួនរួចហើយ។ «គោលដៅរបស់យើងគឺត្រូវការពារផលប្រយោជន៍ប្រទេសនិងសន្តិសុខ ព្រមទាំងការទាមទារស្របច្បាប់របស់ប្រជាជនអ៊ីរ៉ង់។ អ៊ីរ៉ង់ បានដឹងពីការទាមទារ និងបន្ទាត់ក្រហមរបស់ខ្លួនជាយូរមកហើយ ហើយបច្ចុបន្នជំហររបស់យើងគឺច្បាស់លាស់ខ្លាំង»។ ដោយឆ្លើយតបទៅនឹងអ្វីដែលហៅថា «កាលកំណត់» របស់ប្រធានាធិបតីសហរដ្ឋអាមេរិក លោក ដូណាល់ ត្រាំ សម្រាប់អ៊ីរ៉ង់ក្នុងការបង្កើតកិច្ចព្រមព្រៀង និងបើកច្រកសមុទ្រ Hormuz ឡើងវិញនៅថ្ងៃអង្គារនេះ លោក Baghaei បាននិយាយថា ការចេញការគំរាមបែបនេះគឺជាឧក្រិដ្ឋកម្មសង្គ្រាម ហើយប្រទេសណាមួយដែលជួយក្នុងឧក្រិដ្ឋកម្មបែបនេះ ត្រូវតែទទួលខុសត្រូវ។ លោកបានសង្កត់ធ្ងន់ថា ដើម្បីសម្រេចបាននូវបទឈប់បាញ់ ការទាមទារទាំងអស់របស់អ៊ីរ៉ង់ត្រូវតែបានបំពេញ។ ហេតុផលដែលយើងមិនទទួលយកចំពោះបទឈប់បាញ់គឺផ្អែកលើបទពិសោធន៍កន្លងទៅ ដែលបទឈប់បាញ់មានន័យថា ពន្យាពេលមួយរយៈខ្លីដោយអនុញ្ញាតឱ្យភាគីម្ខាងទៀតពង្រឹងកម្លាំងរបស់ខ្លួន និងប្រព្រឹត្តឧក្រិដ្ឋកម្មបន្ថែមទៀតនៅពេលក្រោយ។

បណ្ដាញសង្គម

ព័ត៌មានថ្មីៗ

ឯកឧត្តមកិត្តិសង្គហបណ្ឌិត គន់ គីម អញ្ជើញជួបប្រជាពលរដ្ឋភៀសសឹក និងពិនិត្យទីតាំងរៀបចំផ្សារបណ្តោះអាសន្ន ក្នុងខេត្តបន្ទាយមានជ័យ

ក្រសួងការងារ៖ ខេត្តស្ថិតក្នុងតំបន់ទំនាបកណ្ដាលចំនួន៣ មានឱកាសការងារជាង ៨,០០០កន្លែង កំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

ក្រសួងការងារ៖ នៅខេត្តជាប់សមុទ្រទាំង៤ មានឱកាសការងារជិត ៧,០០០កន្លែង ដែលកំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

ឯកឧត្តមឧបនាយករដ្ឋមន្ត្រី ហ៊ុន ម៉ានី៖ វិញ្ញាសាតាក់តែងចប់ភ្លាម ប្រឡងភ្លាមតែម្តង

ក្រសួងការងារ៖ ខេត្តចំនួន៤ នៅភូមិភាគឦសាន្ត មានឱកាសការងារជិត ៤,០០០កន្លែង កំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

អាជ្ញាធរជាតិអប្សរា និង JQA បិទបញ្ចប់កម្មវិធីអប់រំបរិស្ថានសម្រាប់កុមារ ឆ្នាំ២០២៦ និងប្រគល់រង្វាន់ដល់សិស្សឆ្នើម

អភិបាលខេត្តបន្ទាយមានជ័យ អំពាវនាវដល់មន្ត្រីរាជការសប្បុរសជនចូលរួមយុទ្ធនាការ "១ម៉ឺនរៀល ១ម៉ឺននាក់"

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877