BTV NEWS

អ៊ីស្រាអែលបញ្ជាក់ថា ខ្លួននឹងឆ្លើយតបចំពោះការរំលោភបទឈប់បាញ់របស់ក្រុមហាម៉ាស

លោក Zelenskyy ស្វែងរកការជួបជាមួយលោក Trump ដើម្បីពិភាក្សា និងដោះស្រាយបញ្ហាដែនដី

ប្រមុខយោធាលីប៊ី និងមនុស្ស ៧នាក់ទៀត ស្លាប់ក្នុងហេតុការណ៍ធ្លាក់យន្តហោះ ក្រោយហោះឡើងចេញពីទួរគី

នាយករដ្ឋមន្ត្រីកូសូវ៉ូ៖ កូសូវ៉ូ និងស៊ែរប៊ី ត្រូវតែធ្វើប្រក្រតីភាពទំនាក់ទំនង

ព័ត៌មានអន្តរជាតិ

លោកTrump៖ «គ្មានបញ្ហាទេ» ក្នុងការប្រាប់សភាអំពីការវាយប្រហារណាមួយដែលអាចកើតមាននៅវ៉េណេស៊ុយអេឡា

ប្រធានាធិបតីសហរដ្ឋអាមេរិក លោក Donald Trump បាននិយាយកាលពីថ្ងៃព្រហស្បតិ៍ ទី១៨ ខែធ្នូ ថា លោក «គ្មានបញ្ហាទេ» ក្នុងការជូនដំណឹងដល់សភាអំពីការវាយប្រហារដែលអាចកើតមានលើប្រទេសវ៉េណេស៊ុយអេឡា។កាលពីដើមសប្តាហ៍នេះ ប្រធានាធិបតីអាមេរិក លោក Donald Trump បានបញ្ជាឱ្យបិទផ្លូវទាំងស្រុងចំពោះនាវាដឹកប្រេងជាប់ទណ្ឌកម្មទាំងអស់ដែលប៉ុនប៉ងចាកចេញពីដែនទឹកវ៉េណេស៊ុយអេឡា និងនាវាទាំងឡាយដែលទៅដល់ខណៈទីក្រុងវ៉ាស៊ីនតោនបានដាក់ពង្រាយកងទ័ព និងនាវាចម្បាំងនៅក្នុងតំបន់នោះ។លោក Trump និយាយថា សហរដ្ឋអាមេរិកកំពុងដាក់គំនាបប្រភពចំណូលចម្បងរបស់ប្រទេសវ៉េណេស៊ុយអេឡា ក្នុងការប៉ុនប៉ងរបស់ខ្លួនដើម្បីកំណត់គោលដៅភេរវកម្ម ការរត់ពន្ធគ្រឿងញៀន និងការជួញដូរមនុស្ស។ កាលពីសប្តាហ៍មុន ឆ្មាំល្បាតឆ្នេរសហរដ្ឋអាមេរិក បានរឹបអូសនាវាដឹកប្រេងមួយគ្រឿងនៅឆ្នេរសមុទ្រវ៉េណេស៊ុយអេឡា។ប្រធានាធិបតី លោក Nicolas Maduro បាននិយាយថា សហរដ្ឋអាមេរិកចង់ឲ្យធនធានប្រេងឆៅរបស់ប្រទេសOPEC និងការបង្កើនយោធាផ្តួលរំលំលោក។ នៅក្នុងបទសម្ភាសន៍ជាមួយ Politico លោក Trump បាននិយាយថា ថ្ងៃរបស់លោក Maduro «ត្រូវបានគេកំណត់រួចហើយ»។ប្រទេសវ៉េណេស៊ុយអេឡា បានស្នើសុំឱ្យក្រុមប្រឹក្សាសន្តិសុខអង្គការសហប្រជាជាតិជួបប្រជុំគ្នាដើម្បីពិភាក្សាអំពី «ការឈ្លានពានរបស់សហរដ្ឋអាមេរិកដែលកំពុងបន្ត» នេះបើយោងតាមលិខិតមួយច្បាប់ផ្ញើទៅកាន់ស្ថាប័នដែលមានសមាជិក១៥រូប ដែលបានឃើញដោយសារព័ត៌មាន Reuters។

ប្រជាជនបូលីវី ប្រឈមការហក់ឡើងតម្លៃប្រេងក្រោយការកាត់ការឧបត្ថម្ភធន បង្កឱ្យមានការខកចិត្តជាសាធារណៈ

ប្រជាជនបូលីវី មានប្រតិកម្មដោយការខកចិត្តនិងភាពមិនប្រាកដប្រជា កាលពីថ្ងៃព្រហស្បតិ៍ ទី១៨ ខែធ្នូ បន្ទាប់ពីរដ្ឋាភិបាល បានលុបចោលការឧបត្ថម្ភធនលើប្រេងឥន្ធនៈដែលមានជាយូរមកហើយ បង្កឱ្យតម្លៃប្រេងហក់ឡើងខ្លាំង ធ្វើឲ្យប៉ះពាល់ដល់ជីវភាពប្រចាំថ្ងៃនៅក្នុងទីក្រុង El Alto នៃតំបន់ខ្ពង់រាប។ជួររថយន្តក្រុងខ្នាតតូច តាក់ស៊ី និងរថយន្តដឹកទំនិញ បានលាតសន្ធឹងជាច្រើនប្លុកនៅស្ថានីយ៍ប្រេងឥន្ធនៈ ខណៈអ្នកបើកបរបានប្រឈមទៅនឹងការកើនឡើងតម្លៃប្រេងសាំង៨៦% និង១៦៣%សម្រាប់ប្រេងម៉ាស៊ូត ក្រោមក្រឹត្យដែលត្រូវបានប្រកាសដោយរដ្ឋមន្ត្រីក្រសួងសេដ្ឋកិច្ច។សម្រាប់បុគ្គលិកដឹកជញ្ជូន ការកើនឡើងនេះមិនអាចទ្រទ្រង់បានទេ។ សមាគមបានព្រមានថា តម្លៃឈ្នួលដឹកជញ្ជូនអាចកើនឡើងទ្វេដង ដែលបង្កើនការព្រួយបារម្ភអំពីអតិផរណាកាន់តែទូលំទូលាយនៅក្នុងប្រទេសដែលទទួលរងដោយកង្វះប្រេងឥន្ធនៈ និងកង្វះប្រាក់ដុល្លាររយៈពេលជាងពីរឆ្នាំមកហើយ។ប្រធានាធិបតីប្រទេសបូលីវី លោក Rodrigo Paz ដែលទើបតែចូលកាន់តំណែងបាន៤០ថ្ងៃ បានទទួលមរតកសេដ្ឋកិច្ចស្ថិតក្នុងភាពវឹកវរបន្ទាប់ពីការគ្រប់គ្រងរបស់អ្នកសង្គមនិយមរយៈពេលពីរទសវត្សរ៍ និងអ្វីដែលអ្នកវិភាគចាត់ទុកថាជាវិបត្តិដ៏អាក្រក់បំផុតក្នុងរយៈពេល៤០ឆ្នាំមកនេះ។ រដ្ឋាភិបាលនិយាយថា ចំណាត់ការនឹងទប់ស្កាត់បណ្តាញរត់ពន្ធដែលទាញយកប្រេងនាំចូលជិត៣០% មានតម្លៃជាង១ពាន់លានដុល្លារជារៀងរាល់ឆ្នាំ។

ក្រុមកសិករបែលហ្ស៊ិក ប៉ះទង្គិចជាមួយកងកម្លាំងនគរបាលក្នុងការតវ៉ាប្រឆាំងពាណិជ្ជកម្ម

កងកម្លាំងនគរបាលបានចាប់ខ្លួនបាតុករដែលប្រឡាក់ដោយឈាមម្នាក់ ខណៈក្រុមបាតុកម្មរបស់កសិករប្រឆាំងនឹងកិច្ចព្រមព្រៀងពាណិជ្ជកម្មសេរីរវាង អឺរ៉ុបនិងទីផ្សាររួមអាមេរិកឡាទីន បានប្រែក្លាយជាអំពើហិង្សាកាលពីថ្ងៃព្រហស្បតិ៍១៨ធ្នូសប្ដាហ៍នេះ។ ការប៉ះទង្គិចគ្នានានាបានផ្ទុះឡើងនៅជិតសភាសហភាពអឺរ៉ុប ខណៈកងកម្លាំងនគរបាលបែលហ្ស៊ិកបានបាញ់ឧស្ម័នបង្ហូរទឹកភ្នែក និងកាណុងទឹក ស្របពេលក្រុមបាតុករគប់គ្រាប់បែកផ្សែងនិងដំឡូង។ នគរបាលបានធ្វើអន្តរាគមន៍នៅពេលអំពើហិង្សាកាន់តែធ្ងន់ធ្ងរ ហើយបានស្វែងរកចាប់ខ្លួនក្រុមបាតុករមួយចំនួន។ ជាមួយគ្នានោះ ត្រាក់ទ័រមួយគ្រឿងត្រូវបានបើកបំបុកចូលក្នុងជួររបស់នគរបាលបង្ក្រាបកុបកម្ម ទោះបីជាទំនងមិនបានបុកនរណាម្នាក់ក៏ដោយ។នគរបាលនិយាយថា ពួកគេបានអនុញ្ញាតឱ្យមានការតវ៉ាជាមួយត្រាក់ទ័ររហូតដល់៥០ គ្រឿង ប៉ុន្តែនៅរសៀលថ្ងៃព្រហស្បតិ៍នោះ មានមនុស្សប្រហែល១.០០០នាក់បានមកដល់រដ្ឋធានីបែលហ្ស៊ិក។ពួកគេបានប៉ាន់ប្រមាណចំនួនអ្នកតវ៉ាប្រហែល ៧.០០០នាក់។ ក្រុមមេដឹកនាំសហភាពអឺរ៉ុបគ្រោងជជែកពិភាក្សាក្នុងកិច្ចប្រជុំកំពូលមួយនៅទីក្រុងព្រុចសែលកាលពីថ្ងៃព្រហស្បតិ៍ ថាតើសហភាពអឺរ៉ុបគួរចុះហត្ថលេខាលើកិច្ចព្រមព្រៀងជាមួយប្លុកអាហ្សង់ទីន ប្រេស៊ីល ប៉ារ៉ាហ្គាយ និងអ៊ុយរ៉ាហ្គាយដែរឬអត់។ក្រុមអ្នករិះគន់នៃកិច្ចព្រមព្រៀងពាណិជ្ជកម្មនិយាយថា ទំនិញមានតម្លៃថោកអាចសម្រុកហូរចូលលើទីផ្សារដែលបង្កគ្រោះថ្នាក់ដល់អ្នកផលិតអឺរ៉ុប៕

មេដឹកនាំសហភាពអឺរ៉ុបយល់ព្រមលើប្រាក់កម្ចីចំនួន៩០ពាន់លានអឺរ៉ូដល់អ៊ុយក្រែន

ប្រធានក្រុមប្រឹក្សាសហភាពអឺរ៉ុប លោក Antonio Costa បាននិយាយថា ក្រុមមេដឹកនាំសហភាពអឺរ៉ុបបានយល់ព្រមនៅថ្ងៃសុក្រទី១៩ធ្នូសប្ដាហ៍នេះក្នុងការផ្តល់ប្រាក់កម្ចីដ៏ច្រើនសន្ធឹកសន្ធាប់ដោយគ្មានការប្រាក់ដល់អ៊ុយក្រែន ដើម្បីបំពេញតម្រូវការយោធា និងសេដ្ឋកិច្ចរបស់ខ្លួនសម្រាប់រយៈពេលពីរឆ្នាំខាងមុខ ។ លោក Costa បាននិយាយក្នុងការបង្ហោះមួយនៅលើប្រព័ន្ធផ្សព្វផ្សាយសង្គមថា ពួកលោកមានកិច្ចព្រមព្រៀងមួយហើយ។ ការសម្រេចចិត្តផ្តល់ការគាំទ្រចំនួន ៩០ ពាន់លានអឺរ៉ូ ឬ ស្មើ ១០៦ ពាន់លានដុល្លារអាមេរិក ដល់អ៊ុយក្រែនសម្រាប់ឆ្នាំ២០២៦ ដល់២០២៧ ត្រូវបានអនុម័ត។ ក្រុមមេដឹកនាំសហភាពអឺរ៉ុបបានធ្វើការយ៉ាងខ្លាំងរហូតដល់យប់ជ្រៅកាលពីថ្ងៃព្រហស្បតិ៍ ដើម្បីធានាដល់ប្រទេសបែលហ្ស៊ិកថា ពួកគេនឹងផ្តល់ការធានាដើម្បីការពារប្រទេសនេះពីការសងសឹករបស់រុស្ស៊ី ប្រសិនបើប្រទេសនេះ គាំទ្រប្រាក់កម្ចីសម្រាប់អ៊ុយក្រែន។ ប្លុកសហរដ្ឋអឺរ៉ុប បានបង្វែរពីការប្រើប្រាស់ទ្រព្យសកម្មបង្ករបស់រុស្ស៊ី ទៅជាការរួមគ្នាផ្ដល់ប្រាក់កម្ចីដល់អ៊ុយក្រែន វិញ ក្រោយក្រុមមេដឹកនាំទាំងនេះ បានបរាជ័យក្នុងការព្រមព្រៀងប្រើប្រាស់លុយរុស្ស៊ី ជួយដល់អ៊ុយក្រែន៕

មន្រ្តីជាន់ខ្ពស់៖ រុស្ស៊ី បំពាក់មីស៊ីលល្បឿនលឿនជាងសំឡេង Oreshnik ថ្មីដល់កងពលតូចមួយរបស់ខ្លួន

ទីភ្នាក់ងារសារព័ត៌មានរុស្ស៊ី TASS បានរាយការណ៍ ដោយដកស្រង់សម្តីលោក Valery Gerasimov ប្រធាននាយសេនាធិការ ដែលបានប្រាប់សន្និសីទសារព័ត៌មានមួយសម្រាប់មន្ត្រីយោធាបរទេស កាលពីថ្ងៃព្រហស្បតិ៍ (១៨ ធ្នូ) ថា នៅឆ្នាំ២០២៥នេះ រុស្ស៊ីបានបង្កើតកងពលយោធាមួយក្រុម ដែលបំពាក់ដោយមីស៊ីលបាលីស្ទិករយៈចម្ងាយមធ្យមល្បឿនលឿនជាងសំឡេង Oreshnik ថ្មីរបស់ខ្លួន។គួររម្លឹកថា រុស្ស៊ីបានបាញ់មីស៊ីល Oreshnik ដ៏មានឥទ្ធិពលនេះលើអ៊ុយក្រែន ជាលើកដំបូងបំផុតក្នុងខែវិច្ឆិកា ឆ្នាំ២០២៤។ លោកប្រធានាធិបតី Vladimir Putin ក៏បានអួតសរសើរថា ពុំមានប្រព័ន្ធការពារដែនអាកាសណា អាចស្ទាក់ចាប់មីស៊ីលនេះបានទេ ហើយ Oreshnik មានឥទ្ធិពលបំផ្លិចបំផ្លាញខ្លាំង ដែលអាចប្រៀបផ្ទឹមទៅនឹងអាវុធនុយក្លេអ៊ែរ សូម្បីតែបំពាក់ត្រឹមក្បាលគ្រាប់ធម្មតាក៏ដោយ។យ៉ាងណាមិញ អ្នកជំនាញលោកខាងលិចមួយចំនួននិយាយថា ការអះអាងទាំងនោះគឺជាការបំផ្លើសពេកហើយ។ យោងតាមព័ត៌មានដែលមានជាសាធារណៈ ប្រព័ន្ធ “Oreshnik” នេះ មានល្បឿនអតិបរមាជាង ១២.៣០០គីឡូម៉ែត្រក្នុងមួយម៉ោង (ប្រហែល ៣,៤២ គីឡូម៉ែត្រក្នុងមួយវិនាទី) ហើយអាចវាយប្រហារទីក្រុងធំៗក្នុងប្រទេសជិតខាង ជាមួយនឹងល្បឿនគួរឱ្យព្រួយបារម្ភ នេះបើយោងតាមប្រព័ន្ធផ្សព្វផ្សាយអ៊ុយក្រែន Telegraf។សារព័ត៌មានដែលគ្រប់គ្រងដោយរដ្ឋាភិបាលអ៊ុយក្រែន UNITED24 Media បានលើកឧទាហរណ៍ទាក់ទងនឹងឥទ្ធិពលមីស៊ីលនេះថា បើគិតពីចំណុចកណ្តាលមួយក្នុងប្រទេសសម្ព័ន្ធមិត្តរុស្ស៊ី គឺបេឡារុស — ដែលមានទីតាំងចន្លោះរដ្ឋធានីមីនស្ក៍ និងទីក្រុង Bobruisk — មីស៊ីល Oreshnik នឹងហោះទៅដល់រដ្ឋធានីវីលនីញ៉ូស របស់ប្រទេសលីទុយអានី ក្នុងពេលប្រហែល ១នាទី និង ៤វិនាទី ប៉ុណ្ណោះ៕

បង់ក្លាដែស រងភាពរង្គោះរង្គើដោយចលាចលជាថ្មី ស្របពេលការបោះឆ្នោតជាតិខិតជិតមកដល់

កាលពីល្ងាចថ្ងៃព្រហស្បតិ៍ (១៨ ធ្នូ) សប្ដាហ៍នេះ ប្រទេសបង់ក្លាដែស បានរងភាពរង្គោះរង្គើជាថ្មី ដោយបាតុកម្មដោយហិង្សាក្នុងទីក្រុងជាច្រើននៅទូទាំងប្រទេស បន្ទាប់ពីការស្លាប់របស់មេដឹកនាំក្រុមយុវជន ឈ្មោះ Sharif Osman Hadi ដោយបង្កក្ដីបារម្ភអំពីភាពចលាចលបន្ថែមទៀត មុនការបោះឆ្នោតជាតិនៅប៉ុន្មានខែខាងមុខនេះ។គួរឱ្យដឹងថា លោក Hadi -- ដែលជាអ្នកនាំពាក្យរបស់វេទិកានិស្សិត Inquilab Mancha និងជាបេក្ខជនម្នាក់ក្នុងការបោះឆ្នោតសកល -- ត្រូវបានជនវាយប្រហារមួយក្រុមបាញ់ប្រហារចំក្បាល កាលពីថ្ងៃសុក្រសប្តាហ៍មុន ខណៈពេលកំពុងចាប់ផ្តើមយុទ្ធនាការបោះឆ្នោតនៅទីក្រុងដាកា។ ដំបូងឡើយ លោក Hadi ទទួលការព្យាបាលនៅមន្ទីរពេទ្យក្នុងស្រុក ក្រោយមកក៏ត្រូវបញ្ជូនទៅសិង្ហបុរី ជាទីដែលលោកបានស្លាប់ រយៈពេល ៦ថ្ងៃបន្ទាប់។នៅទីក្រុងដាកា ភាពវឹកវរបានផ្ទុះឡើងជាថ្មី ដោយវីដេអូលើបណ្តាញសង្គមបានបង្ហាញឱ្យឃើញហ្វូងមនុស្សកំពុងដុតបំផ្លាញការិយាល័យកាសែតធំជាងគេរបស់ប្រទេសនេះឈ្មោះ Prothom Alo ក៏ដូចជា Daily Star ផងដែរ។ បាតុកម្មទាំងនោះគ្របដណ្ដប់ដោយឃ្លាតវ៉ា ដែលលើកឡើងពីឈ្មោះលោក Hadi ហើយក្រុមអ្នកតវ៉ាបានសន្យាថា នឹងបន្តចលនារបស់ពួកគេ ទាមទារយុត្តិធម៌ជាបន្ទាន់ និងវែកមុខអ្នកទទួលខុសត្រូវចំពោះឃាតកម្មនេះ។តំបន់ជាច្រើននៅទូទាំងប្រទេសបង់ក្លាដែស បន្តមានភាពតានតឹងរហូតដល់យប់ជ្រៅ ដោយកម្លាំងនគរបាល និងកងកម្លាំងយោធាជាច្រើន ត្រូវបានដាក់ពង្រាយដើម្បីទប់ស្កាត់អំពើហិង្សាដ៏អាក្រក់។ ភាពតានតឹងជាថ្មីនេះ កើតឡើងបន្ទាប់ពីចលាចលដ៏អាក្រក់លើកមុន ដែលនាំឱ្យបង់ក្លាដែស ធ្លាក់ក្នុងរដ្ឋបាលបណ្ដោះ ចាប់តាំងពីខែសីហា ឆ្នាំ២០២៤ មក ហើយការបោះឆ្នោតជាតិ ត្រូវកំណត់ពេលធ្វើឡើងនៅថ្ងៃទី១២ ខែកុម្ភៈ ឆ្នាំក្រោយនេះ៕

លោក Trump បង្ហើបថា "ជិតឈានដល់អ្វីមួយហើយ" ក្នុងការបញ្ចប់សង្រ្គាមអ៊ុយក្រែន មុនជំនួបមន្រ្តីអាមេរិក-រុស្ស៊ី

ប្រធានាធិបតីអាមេរិក លោក Donald Trump កាលពីថ្ងៃព្រហស្បតិ៍ (១៨ ធ្នូ) បាននិយាយថា លោកជឿជាក់ថា កិច្ចចរចាឆ្ពោះទៅរកការបញ្ចប់សង្គ្រាមនៅអ៊ុយក្រែន «កំពុងខិតជិតដល់អ្វីមួយហើយ» មុនពេលកិច្ចប្រជុំរបស់សហរដ្ឋអាមេរិក ជាមួយមន្ត្រីរុស្ស៊ី នៅចុងសប្តាហ៍នេះ។ ក្នុងអំឡុងព្រឹត្តិការណ៍មួយនៅការិយាល័យ Oval Office លោក Trump ប្រាប់អ្នកយកព័ត៌មានថា "លោកសង្ឃឹមថា អ៊ុយក្រែននឹងបោះជំហានឱ្យឆាប់រហ័ស"។ លោកបន្តថា អ៊ុយក្រែនត្រូវតែរហ័ស "ព្រោះរុស្ស៊ីកំពុងនៅទីនោះហើយ" ដែលជាក់ស្តែងសំដៅទៅលើជ័យជម្នះសមរភូមិថ្មីៗរបស់រុស្ស៊ី។មន្ត្រីសេតវិមានមួយរូបបានបញ្ជាក់ថា ប្រេសិតពិសេសរបស់អាមេរិក គឺលោក Steve Witkoff និងកូនប្រសាររបស់លោក Trump គឺលោក Jared Kushner មានគម្រោងជួបជាមួយគណៈប្រតិភូរុស្ស៊ី នៅទីក្រុង Miami នាចុងសប្តាហ៍នេះ ដើម្បីបន្តព្យាយាមបញ្ចុះបញ្ចូលទាំងរុស្ស៊ី និងអ៊ុយក្រែន ឱ្យសម្រេចកិច្ចព្រមព្រៀងមួយ ក្នុងការបញ្ចប់សង្រ្គាមរបស់ទីក្រុងមូស្គូ នៅអ៊ុយក្រែន។លោក Witkoff និងលោក Kushner បានជួបគណៈប្រតិភូអ៊ុយក្រែន រួចមកហើយនៅទីក្រុងប៊ែរឡាំង នៅថ្ងៃអាទិត្យ និងថ្ងៃចន្ទ កន្លងទៅ ហើយមន្ត្រីអាមេរិកក៏សម្ដែងទំនុកចិត្តថា គំនិតភាគីទាំងពីរមិននៅឆ្ងាយពីគ្នាទេ ទោះបីជាបញ្ហាដ៏លំបាកបំផុតនៅតែមិនទាន់ដោះស្រាយបានក៏ដោយ ពោលគឺ ការទទូចទាមទាររបស់រុស្ស៊ី លើទឹកដីអ៊ុយក្រែន៕

ប្រទេសចិនជំរុញឱ្យសហរដ្ឋអាមេរិកបញ្ឈប់ការផ្តល់អាវុធដល់តំបន់តៃវ៉ាន់របស់ប្រទេសចិនជាបន្ទាន់

ការិយាល័យកិច្ចការតៃវ៉ាន់របស់ក្រុមប្រឹក្សារដ្ឋចិនកាលពីថ្ងៃព្រហស្បតិ៍១៨ធ្នូសប្ដាហ៍នេះ បានជំរុញឱ្យសហរដ្ឋអាមេរិកបញ្ឈប់ការផ្តល់អាវុធដល់តំបន់តៃវ៉ាន់របស់ប្រទេសចិនជាបន្ទាន់។លោក Chen Binhua អ្នកនាំពាក្យការិយាល័យនេះ បានថ្លែងបែបនេះ ខណៈកំពុងធ្វើអត្ថាធិប្បាយលើការប្រកាសចុងក្រោយរបស់សហរដ្ឋអាមេរិកអំពីកញ្ចប់លក់អាវុធទៅឱ្យតំបន់តៃវ៉ាន់របស់ប្រទេសចិនដែលមានតម្លៃរហូតដល់១១ពាន់លានដុល្លារ។ លោក Chen បាននិយាយថា បញ្ហាតៃវ៉ាន់គឺជាស្នូលនៃផលប្រយោជន៍ស្នូលរបស់ប្រទេសចិន និងជាខ្សែបន្ទាត់ក្រហមនៅក្នុងទំនាក់ទំនងចិន-សហរដ្ឋអាមេរិកដែលមិនត្រូវឆ្លងកាត់ ហើយការប្រកាសរបស់សហរដ្ឋអាមេរិកអំពីការលក់អាវុធយ៉ាងច្រើនទៅឱ្យកោះតៃវ៉ាន់ គឺជាការជ្រៀតជ្រែកយ៉ាងធ្ងន់ធ្ងរនៅក្នុងកិច្ចការផ្ទៃក្នុងរបស់ប្រទេសចិន។ទង្វើនេះបានរំលោភលើគោលការណ៍ចិនតែមួយ និងបទប្បញ្ញត្តិនៃសេចក្តីថ្លែងការណ៍រួមទាំងបីរបស់ចិន-សហរដ្ឋអាមេរិក ដែលធ្វើឱ្យប៉ះពាល់ដល់អធិបតេយ្យភាព និងផលប្រយោជន៍សន្តិសុខរបស់ប្រទេសចិនយ៉ាងធ្ងន់ធ្ងរ ព្រមទាំងបញ្ជូនសញ្ញាធ្ងន់ធ្ងរ និងខុស ទៅកាន់ក្រុមអ្នកបំបែកខ្លួននៅកោះតៃវ៉ាន់។លោក Chen បានជំរុញឱ្យភាគីសហរដ្ឋអាមេរិកឈប់គាំទ្រដល់ក្រុមបំបែកខ្លួនដែលស្វែងរក "ឯករាជ្យភាពកោះតៃវ៉ាន់" និងបញ្ឈប់សកម្មភាពគ្រោះថ្នាក់នេះ ហើយត្រូវប្រកាន់ខ្ជាប់នូវគោលការណ៍ចិនតែមួយ និងសេចក្តីថ្លែងការណ៍រួមទាំងបីរវាងចិន-សហរដ្ឋអាមេរិក៕

លោក Trump ចុះហត្ថលេខាលើថវិកាការពារជាតិឆ្នាំ២០២៦ ដ៏ធំសម្បើមរបស់សហរដ្ឋអាមេរិក

ប្រធានាធិបតីអាមេរិក លោក Donald Trump កាលពីថ្ងៃព្រហស្បតិ៍ (១៨ ធ្នូ) បានចុះហត្ថលេខា ផ្ដល់ភាពផ្លូវការលើច្បាប់ស្តីពីគោលនយោបាយការពារជាតិប្រចាំឆ្នាំ ក្នុងទំហំជិត ១ សែនកោដិដុល្លារ ដ៏ច្រើនសន្ធឹកសន្ធាប់ ដោយមានបទប្បញ្ញត្តិផ្តល់ជំនួយថ្មីដល់អ៊ុយក្រែន ក្នុងចំណោមចំណាត់ការសំខាន់ជាច្រើន ប៉ុន្តែពិធីចុះហត្ថលេខានេះបែរជាប្រព្រឹត្តទៅយ៉ាងស្ងៀមស្ងាត់ ដោយពុំមានការអបអរធំដុំឡើយ។ច្បាប់អនុញ្ញាតការពារជាតិឆ្នាំសារពើពន្ធ ២០២៦ ឬហៅថាច្បាប់ NDAA អនុញ្ញាតឱ្យមានការចំណាយលើយោធាប្រចាំឆ្នាំចំនួន ៩០១ពាន់លានដុល្លារ ដែលច្រើនជាងការស្នើដំបូងរបស់លោក Trump ដល់ទៅ ៨ពាន់លានដុល្លារ។ ច្បាប់ដ៏ទូលំទូលាយនេះកំណត់លើអ្វីៗគ្រប់យ៉ាង រាប់ចាប់ពីចំនួននាវា យន្តហោះ និងប្រព័ន្ធមីស៊ីលដែលត្រូវទិញ រហូតដល់ការដំឡើងប្រាក់ខែឱ្យកងទ័ព និងវិធីដោះស្រាយការគំរាមកំហែងភូមិសាស្ត្រនយោបាយ។សេតវិមានប្រកាសថា លោកប្រធានាធិបតីចុះហត្ថលេខាលើច្បាប់នេះហើយ ប៉ុន្តែក្នុងទម្រង់យ៉ាងស្ងប់ស្ងាត់មួយ ដោយពុំមានពិធីអបអរនៅការិយាល័យ Oval Office ដែលមានអ្នកយកព័ត៌មានចូលរួមនោះទេ។ កញ្ចប់ NDAA ឆ្នាំសារពើពន្ធ ២០២៦ ផ្តល់ជំនួយចំនួន ៨០០ លានដុល្លារសម្រាប់អ៊ុយក្រែន - ពោលគឺ ៤០០ លានដុល្លារក្នុងពេលពីរឆ្នាំបន្ទាប់ - ជាផ្នែកមួយនៃគំនិតផ្តួចផ្តើមជំនួយសន្តិសុខអ៊ុយក្រែន ដែលបង់ប្រាក់ឱ្យក្រុមហ៊ុនអាមេរិក សម្រាប់ផលិតអាវុធឱ្យយោធាអ៊ុយក្រែន។ច្បាប់ការពារជាតិថ្មីនេះក៏ផ្តល់សិទ្ធិដល់គំនិតផ្តួចផ្តើមសន្តិសុខបាល់ទិក និងផ្តល់ថវិកាចំនួន ១៧៥ លានដុល្លារ ដើម្បីគាំទ្រដល់វិស័យការពារជាតិឡាតវី លីទុយអានី និងអេស្តូនី ក្នុងចំណោមចំណុចសំខាន់ផ្សេងទៀត៕

ប្រទេសប៉ូឡូញ ប្រកាសពីការត្រៀមខ្លួនប្រយុទ្ធពេញលេញដោយប្រព័ន្ធមីស៊ីលប៉ាទ្រីយ៉ូត

ប្រទេសប៉ូឡូញបានប្រកាសកាលពីថ្ងៃព្រហស្បតិ៍ ទី១៨ ខែធ្នូថា ប្រព័ន្ធការពារដែនអាកាសនិងមីស៊ីល ប៉ាទ្រីយ៉ូត(Patriot) របស់ខ្លួន ដែលរួមបញ្ចូលជាមួយប្រព័ន្ធបញ្ជាប្រយុទ្ធរួមគ្នាផលិតដោយសហរដ្ឋអាមេរិក សម្រេចបានការត្រៀមប្រយុទ្ធពេញលេញ ជាការវិវឌ្ឍដ៏សំខាន់នៅក្នុងកិច្ចខិតខំប្រឹងប្រែងធ្វើទំនើបកម្មវិស័យការពារជាតិរបស់ប្រទេស។ ជើងទម្របាញ់មីស៊ីលប៉ាទ្រីយ៉ូត(Patriot) បង្កើតស្នូលនៃកម្មវិធី Wisla របស់ប្រទេសប៉ូឡូញ ក្នុងគោលបំណងបង្កើតប្រព័ន្ធការពារដែនអាកាសរួមបញ្ចូលគ្នាដើម្បីទប់ទល់នឹងមីស៊ីល យន្តហោះ និងយានដ្រូននៅស្លាបខាងកើតរបស់សម្ព័ន្ធយោធាណាតូ។ រដ្ឋមន្ត្រីក្រសួងការពារជាតិប៉ូឡូញ លោក Wladyslaw Kosiniak-Kamysz ដែលថ្លែងរួមគ្នាជាមួយឯកអគ្គរដ្ឋទូតសហរដ្ឋអាមេរិក លោក Thomas Rose បានពិពណ៌នាអំពីមីស៊ីលប៉ាទ្រីយ៉ូត(Patriots) ថាជាសមាសធាតុការពារជាតិដ៏មានតម្លៃបំផុតរបស់ប្រទេសប៉ូឡូញ។ លោក Thomas Rose ឯកអគ្គរដ្ឋទូតសហរដ្ឋអាមេរិក និយាយថា ប្រទេសប៉ូឡូញបាននាំមុខគេ ហើយជាមួយនឹងប្រព័ន្ធបញ្ជាប្រយុទ្ធរួមបញ្ចូលគ្នា (IBCS) ដែលសូម្បីតែសហរដ្ឋអាមេរិកក៏ពុំមានដែរនោះ នេះគឺជាការផ្លាស់ប្តូរហ្គេម។ ចំណាត់ការនេះ បង្ហាញពីព្រឹត្តិការណ៍សំខាន់មួយទៀតនៅក្នុងការជំរុញរបស់ទីក្រុងវ៉ាសូវី ដើម្បីពង្រឹងការការពារដែនអាកាស និងមីស៊ីលនៅស្លាបខាងកើតរបស់ណាតូ ជាកន្លែងដែលប្រទេសនានាដូចជាប្រទេសប៉ូឡូញមានព្រំដែនជាប់ប្រទេសអ៊ុយក្រែន។ កាលពីក្នុងខែមីនា ឆ្នាំ២០២៥ ប្រទេសប៉ូឡូញបានចុះហត្ថលេខាលើកិច្ចព្រមព្រៀងជិត២ពាន់លានដុល្លារជាមួយសហរដ្ឋអាមេរិកសម្រាប់ការគាំទ្រផ្នែកដឹកជញ្ជូនសម្រាប់មីស៊ីលប៉ាទ្រីយ៉ូត(Patriot) រួមទាំងការគាំទ្រផ្នែកបច្ចេកទេស និងការបណ្តុះបណ្តាល។ចាប់តាំងពីការឈ្លានពានរបស់រុស្ស៊ីលើអ៊ុយក្រែនក្នុងឆ្នាំ២០២២ សហរដ្ឋអាមេរិកបានផ្តល់ប្រាក់កម្ចីជាង១ពាន់លានដុល្លារនិងការធានាសម្រាប់កម្មវិធីអាវុធរបស់ប្រទេសប៉ូឡូញ។ ប្រទេសប៉ូឡូញបានកំណត់គោលដៅ ៤,៧% នៃការចំណាយផ្នែកការពារជាតិនៃផលិតផលក្នុងស្រុកសរុប(GDP) ក្នុងឆ្នាំ២០២៥ និង៥%ក្នុងឆ្នាំ២០២៦។

បណ្ដាញសង្គម

ព័ត៌មានថ្មីៗ

ថ្ងៃស្អែក គឺជាការប្រឡងប្រជែងជ្រើសរើសមន្ត្រីក្រមការ ជំនាន់ទី១២ នៃសាលាភូមិន្ទរដ្ឋបាល (វិញ្ញាសាសរសេរលើកទី១)

នៅយប់នេះសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានសម្រេចផ្តល់អង្ករចំនួន ២០តោន, ទឹកបរិសុទ្ធ ២០០កេស និងភេសជ្ជៈ វី-កូឡា ២០០កេស ជូនសាខាកាកបាទក្រហមខេត្តបាត់ដំបង ដើម្បីប្រតិបត្តិការមនុស្សធម៌ចែកជូនប្រជាជនភៀសសឹក

ពលរដ្ឋ និងព្រះសង្ឃ រាប់រយអង្គ/នាក់ ចូលរួមពិធី «ដើរដោយជើងទទេដើម្បីសន្តិភាព» ផ្ញើសារទៅកាន់សហគមន៍អន្តរជាតិថា កម្ពុជាជាប្រទេសដែលគាំទ្រសន្តិភាព

ក្រសួងទេសចរណ៍ ថ្កោលទោសដាច់អហង្ការ សង្គ្រាមឈ្លានពានរបស់ថៃមកលើអធិបតេយ្យភាពកម្ពុជា

BREAKING NEWS | ចាប់ពីម៉ោង ៧ ដល់ជាង ៨ យប់នេះ យោធាថៃបានបាញ់ផ្លោងគ្រាប់ភ្លើងបំភ្លឺផ្លូវចំនួន ៤គ្រាប់លើភូមិសាស្ត្របឹងត្រកួន និងប្រើប្រាស់រថក្រោះបាញ់បំបុកចូលលំនៅដ្ឋានរបស់ប្រជាពលរដ្ឋជាច្រើនគ្រាប់

ការផ្សាយរបស់ថៃ ជាព័ត៌មានមិនពិត ខណៈកម្ពុជាគាំទ្រកិច្ចប្រជុំ GBC ដើម្បីពង្រឹងបទឈប់បាញ់ស្របតាមសេចក្តីថ្លែងការណ៍របស់ប្រធានអាស៊ាន

លោក Zelenskyy ស្វែងរកការជួបជាមួយលោក Trump ដើម្បីពិភាក្សា និងដោះស្រាយបញ្ហាដែនដី

សម្ដេចព្រះពោធិវ័ង្ស ណយ ច្រឹក យាងសួរសុខទុក្ខផ្ដល់អំណោយដល់គ្រួសារកងទ័ព និងអ្នកភៀសសឹកនៅខេត្តពោធិ៍សាត់

សង្ខេបស្ថានការណ៍នៅតាមបន្ទាត់ព្រំដែនកម្ពុជា-ថៃ អំពីករណីយោធាថៃនៅតែបន្តការបាញ់ប្រហារ ដើម្បីឈ្លានពានមកលើដែនអធិបតេយ្យរបស់កម្ពុជានៅទិសយោធភូមិភាគទី៤ និងយោធភូមិភាគទី៥

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877