BTV NEWS

មីយ៉ាន់ម៉ា ត្រៀមបើកការបោះឆ្នោតសកលនៅចុងសប្ដាហ៍នេះ ស្របពេលសង្រ្គាមស៊ីវិលកំពុងឆាបឆេះ

ចិនប្ដេជ្ញាសងសឹកការដំឡើងពន្ធលើឧបករណ៍អេឡិចត្រូនិករបស់អាមេរិកដោយមិនសមហេតុផល

អ៊ុយក្រែន លើកឡើងថា រុស្ស៊ី ច្រានចោលសំណើបទឈប់បាញ់មុនបុណ្យណូអែល

រុស្ស៊ី មានគម្រោងសាងសង់រោងចក្រថាមពលនុយក្លេអ៊ែរ នៅលើឋានព្រះចន្ទ ក្នុងពេល១ទសវត្សរ៍

ព័ត៌មានអន្តរជាតិ

ទីក្រុងគីវ៖ មន្រ្តីការទូតជាន់ខ្ពស់អ៊ុយក្រែន នឹងមានជំនួបជាមួយក្រុមមន្រ្តីចិននៅទីក្រុងប៉េកាំង

មន្រ្តីការទូតជាន់ខ្ពស់អ៊ុយក្រែនមួយរូបប្រកាសនៅថ្ងៃព្រហស្បតិ៍នេះថា លោកបានធ្វើដំណើរទៅដល់ទីក្រុងប៉េកាំង ដែលជាសម្ព័ន្ធមិត្តជិតស្និតរបស់រុស្ស៊ី ជាទីដែលលោករំពឹងថានឹងចូលរួមកិច្ចប្រជុំជាមួយក្រុមមន្រ្តីចិន ។ដំណើរទស្សនកិច្ចនេះ តំណាងឲ្យជំនួបដ៏កម្រមួយរវាងក្រុមមន្រ្តីមកពីទីក្រុងគីវ និងទីក្រុងប៉េកាំង ដែលរងការចោទប្រកាន់ថាជួយទីក្រុងមូស្គូ ពន្យាពេលសង្រ្គាមរបស់ខ្លួនប្រឆាំងអ៊ុយក្រែន ។អនុរដ្ឋមន្រ្តីការបរទេសទី ១របស់អ៊ុយក្រែនលោក Sergiy Kyslytsya បានសរសេរលើបណ្តាញព័ត៌មានសង្គមថា ថ្ងៃដ៏មមាញឹកមួយនៅទីក្រុងប៉េកាំង ។អ្នកនាំពាក្យក្រសួងការបរទេសអ៊ុយក្រែន បានបញ្ជាក់ប្រាប់ទីភ្នាក់ងារព័ត៌មាន AFPថា លោក Kyslytsya នឹងពិគ្រោះយោបល់ជាមួយក្រុមមន្រ្តីការទូតចិន ដោយរូបលោកពុំបានផ្តល់សេចក្តីលម្អិតនោះទេ ។លោក Kyslytsya និយាយថា លោកមានជំនួបជាមួយឯកអគ្គរដ្ឋទូតសហរដ្ឋអាមេរិកប្រចាំនៅចិនលោក David Perdue ។ចិនដែលជាដៃគូពាណិជ្ជកម្មសំខាន់របស់រុស្ស៊ី បាននិយាយថា ពួកគេប្រកាន់ជំហរអព្យាក្រឹតលើសង្រ្គាមអ៊ុយក្រែន ហើយពុំដែលថ្កោលទោសការវាយលុករបស់ទីក្រុងមូស្គូម្តងណាឡើយ ។ជាញឹកញាប់ទីក្រុងប៉េកាំង តែងតែអំពាវនាវឲ្យមានកិច្ចប្រជុំសន្តិភាព និងគោរពបូរណភាពទឹកដីប្រទេសទាំងអស់ ៕

មេដឹកនាំ EU ប្រឈមនឹងការសម្រេចសែនពិបាក ជុំវិញការយកទ្រព្យសម្បត្តិបង្កករបស់រុស្ស៊ីឲ្យអ៊ុយក្រែនប្រើប្រាស់

បណ្ដាមេដឹកនាំសហភាពអឺរ៉ុប (EU) នឹងព្យាយាមឈានដល់ព្រមព្រៀងគ្នា លើវិធីផ្តល់ប្រាក់កម្ចីរាប់ពាន់លានអឺរ៉ូនៃសាច់ប្រាក់ដែលត្រូវការយ៉ាងខ្លាំង ឲ្យដល់អ៊ុយក្រែន នៅក្នុងកិច្ចប្រជុំមួយ នាថ្ងៃព្រហស្បតិ៍ (ទី១៨ ខែធ្នូ) នេះ ដែលត្រូវបានគេមើលឃើញថា ជាការសាកល្បងដ៏សំខាន់នៃកម្លាំងរបស់ក្រុមនេះ បន្ទាប់ពីប្រធានាធិបតីអាមេរិក លោក Donald Trump ហៅប្លុកនេះថា មានភាពទន់ខ្សោយ។EU មើលឃើញសង្រ្គាមរុស្ស៊ីថា ជាការគំរាមកំហែងដល់សន្តិសុខរបស់ខ្លួន ហើយចង់បន្តផ្តល់ហិរញ្ញប្បទាន ដើម្បីឲ្យអ៊ុយក្រែនមានលទ្ធភាពប្រយុទ្ធ។ គណៈកម្មការអឺរ៉ុបបានស្នើឲ្យប្រើប្រាស់ទ្រព្យសម្បត្តិបង្កករបស់ធនាគារកណ្តាលរុស្ស៊ី ដែលភាគច្រើនត្រូវបានរក្សាទុកនៅក្នុងស្ថាប័នទូទាត់ហិរញ្ញវត្ថុរបស់ប្រទេសបែលហ្សិក ដើម្បីធានាឲ្យមាននូវប្រាក់កម្ចីដ៏ធំដល់ទីក្រុងគីវ ប៉ុន្តែបែលហ្ស៊ិកមានកង្វល់ថា ផែនការនេះមិនមានភាពស្របច្បាប់ ខណៈដែលរដ្ឋផ្សេងទៀត រួមទាំងប្រទេសអ៊ីតាលីផងដែរ បានសម្តែងការព្រួយបាម្ភ។មន្ត្រី និងអ្នកការទូត EU យល់ស្របគ្នាថា ពួកគេត្រូវតែស្វែងរកដំណោះស្រាយ នៅក្នុងកិច្ចប្រជុំកំពូលនេះ។ នៅព្រឹកព្រលឹមថ្ងៃទី១៨ ខែធ្នូនេះ នាយករដ្ឋមន្ត្រីបែលហ្ស៊ិក លោក Bart De Wever បានប្រាប់សភារបស់ប្រទេសរបស់លោកថា លោកមិនទាន់ឃើញការធានាដែលឆ្លើយតបនឹងកង្វល់របស់លោកនៅឡើយទេ ជុំវិញហានិភ័យផ្នែកច្បាប់ និងការគ្មានទ្រព្យសកម្មនោះ ហើយថា ផែនការផ្ដល់ហិរញ្ញវត្ថុនៅតែប្រែប្រួល «ដូចដែលយើងលើកឡើង»។ធនាគារកណ្តាលរបស់រុស្ស៊ី បានប្រាប់ថា ផែនការរបស់ EU ក្នុងការប្រើប្រាស់ទ្រព្យសម្បត្តិរបស់ខ្លួន គឺខុសច្បាប់ ហើយថា ខ្លួនរក្សាសិទ្ធិក្នុងការប្រើប្រាស់មធ្យោបាយដែលមានទាំងអស់ ដើម្បីការពារផលប្រយោជន៍របស់ខ្លួន។ ស្ថាប័ននេះបានដាក់ពាក្យបណ្តឹងនៅទីក្រុងមូស្គូ ក្នុងសប្តាហ៍នេះ ដើម្បីទាមទារចំនួន ២៣០ពាន់លានដុល្លារ ជាសំណងខូចខាតពីស្ថាប័នទូទាត់ហិរញ្ញវត្ថុ Euroclear៕

លោក PUTIN បន្ទោសលោកខាងលិចចំពោះការបែកបាក់របស់ប្រទេសយូហ្គោស្លាវី

ប្រធានាធិបតីរុស្ស៊ី វ្ល៉ាឌីមៀ ពូទីន បានប្រាប់កិច្ចប្រជុំក្រុមប្រឹក្សាភិបាលនៃក្រសួងការពារជាតិថា លោកខាងលិចទទួលខុសត្រូវចំពោះការបែកបាក់យូហ្គោស្លាវី។ លោក ពូទីន បាននិយាយថា៖«នៅទីបំផុត ប្រទេសលោកខាងលិចបានបំបែកយូហ្គោស្លាវី និងស៊ែរប៊ី ពួកគេបានហែកពួកវាជាបំណែកៗ» ដោយសង្កត់ធ្ងន់ថា «ហែកប្រទេសតែមួយទៅជាបំណែកៗ»។លោកប្រធានាធិបតីបានកត់សម្គាល់ថា គ្មានអ្វីដែលត្រូវបានបង្កើតឡើង នៅក្នុងសម័យក្រោយសង្គ្រាមដំណើរការក្នុងទំនាក់ទំនងជាមួយលោកខាងលិចនោះទេ។លោកបានបន្តថា៖«អ្វីៗទាំងអស់បានចាប់ផ្តើមធ្លាក់ចុះយ៉ាងឆាប់រហ័ស ច្បាប់ទាំងអស់នេះ ហើយធម្មនុញ្ញអង្គការសហប្រជាជាតិ បានចាប់ផ្តើមត្រូវបានគេមិនអើពើ។ ព្រឹត្តិការណ៍នៅយូហ្គោស្លាវី តើធម្មនុញ្ញអង្គការសហប្រជាជាតិ ការប្រើប្រាស់កម្លាំងនៅឯណា? យើងបាននិយាយអំពីរឿងនេះច្រើនដងហើយ ប៉ុន្តែនេះ គឺ ជាការពិត»។ លោកបានបន្ថែមថា៖«នៅលោកខាងលិច ពួកគេគ្រាន់តែធ្វើតាមអ្វីដែលពួកគេពេញចិត្តប៉ុណ្ណោះ។ យើងបានចូលរួមជួយ និងបង្ខំពួកគេឲ្យបោះឆ្នោត ប៉ុន្តែយើងមិនបានជោគជ័យទេ ដោយសារពួកគេមិនខ្វល់អ្វីទាំងអស់»៕

ចិនថ្កោលទោសការលក់អាវុធអាមេរិកដល់កោះតៃវ៉ាន់ ដោយលើកឡើងថា វាបំពានគោលការណ៍ចិនតែមួយ

នៅថ្ងៃព្រហស្បតិ៍ ចិនបានថ្កោលទោសការលក់អាវុធថ្មីរបស់សហរដ្ឋអាមេរិកដល់កោះតៃវ៉ាន់ ដោយពួកគេនិយាយថា ទីក្រុងវ៉ាស៊ីនតោន បានបំពានយ៉ាងធ្ងន់ធ្ងរលើគោលការណ៍ចិនតែមួយ ហើយនិងធ្វើប៉ះពាល់ដល់សន្តិភាព និងស្ថិរភាពនៅច្រកសមុទ្រតៃវ៉ាន់ ។កាលពីថ្ងៃពុធម្សិលមិញ សហរដ្ឋអាមេរិក បានអនុម័តការលក់សព្វាវុធតម្លៃ ១១,១ ពាន់លានដុល្លារ ទៅឲ្យកោះតៃវ៉ាន់ ដែលជាកញ្ចប់អាវុធដ៏ធំបំផុតមិនធ្លាប់មានរបស់សហរដ្ឋអាមេរិកសម្រាប់កោះនេះ ដែលកំពុងស្ថិតនៅក្រោមសម្ពាធយោធាកាន់តែខ្លាំងឡើងពីប្រទេសចិន ។ការប្រកាសលក់អាវុធឱ្យកោះតៃវ៉ាន់ចុងក្រោយបំផុតនេះដែរ គឺជាលើកទីពីរហើយ ក្រោមរដ្ឋបាលបច្ចុប្បន្នរបស់លោកប្រធានាធិបតីអាមេរិក Donald Trump ហើយបានកើតឡើងនៅពេលទីក្រុងប៉េកាំង បង្កើនសម្ពាធយោធា និងការទូតលើកោះតៃវ៉ាន់ ដែលប្រទេសចិន អះអាងសិទ្ធិថា ជាខេត្តផ្តាច់ខ្លួនរបស់ពួកគេ ។អ្នកនាំពាក្យក្រសួងការបរទេសចិនលោក Guo Jiakun និយាយនៅក្នុងសន្និសីទសារព័ត៌មានថា ភាគីសហរដ្ឋអាមេរិកបានប្រកាសដោយបើកចំហរកម្មវិធីទ្រង់ទ្រាយធំ ដើម្បីទិញអាវុធទំនើបៗ ដែលជាការបំពានយ៉ាងធ្ងន់ធ្ងរលើគោលការណ៍ចិនតែមួយ ហើយនិងសេចក្តីថ្លែងការណ៍រួមចិន-អាមេរិក ចំនួន ៣ ដែលធ្វើឲ្យប៉ះពាល់យ៉ាងធ្ងន់ធ្ងរដល់អធិបតេយ្យភាព សន្តិសុខ និងបូរណភាពទឹកដីរបស់ចិន ។លោក Guo បានជំរុញឲ្យសហរដ្ឋអាមេរិកឈប់ជាបន្ទាន់ការបំពាក់អាវុធដល់កោះតៃវ៉ាន់ ស្របពេលដែលលោកបញ្ជាក់ថា ចំណាត់ការបែបនេះ មានតែផលអវិជ្ជមានប៉ុណ្ណោះ ៕

រដ្ឋមន្ត្រីការបរទេស៖ ទួរគីជំរុញឲ្យមានកិច្ចចរចាស៊ីរី-SDF ដោយសន្តិវិធី និងបានព្រមានថា នឹងអស់ការអត់ធ្មត់

រដ្ឋមន្ត្រីការបរទេស លោក Hakan Fidan បាននិយាយថ្ងៃព្រហស្បតិ៍នេះថា ប្រទេសទួរគី មិនចង់ងាកទៅរកសកម្មភាពយោធាម្តងទៀតប្រឆាំងនឹងកងកម្លាំងប្រជាធិបតេយ្យស៊ីរី (SDF) ដែលដឹកនាំដោយជនជាតិឃើដរបស់ប្រទេសស៊ីរីទេ ប៉ុន្តែបានព្រមានថា ការអត់ធ្មត់របស់អ្នកពាក់ព័ន្ធ គឺជិតអស់ហើយចំពោះ អ្វីដែលលោកបានពិពណ៌នាថា ជាការពន្យារពេលក្នុងការអនុវត្តកិច្ចព្រមព្រៀងសមាហរណកម្ម។លោក Fidan បានប្រាប់បទសម្ភាសន៍ជាមួយសារព័ត៌មាន TRT World ថា៖«យើងគ្រាន់តែសង្ឃឹមថា អ្វីៗនឹងឆ្លងកាត់ការសន្ទនា ការចរចា និងដោយសន្តិវិធី។ យើងមិនចង់ឃើញតម្រូវការណាមួយ ក្នុងការងាកទៅរកមធ្យោបាយយោធាម្តងទៀតទេ។ ប៉ុន្តែ កងកម្លាំងប្រជាធិបតេយ្យស៊ីរី (SDF) គួរតែយល់ថា ការអត់ធ្មត់របស់អ្នកពាក់ព័ន្ធ គឺជិតអស់ហើយ»។លោកបានបន្ថែមថា៖«ពួកគេគួរតែមកដល់កន្លែងដែលការប្តេជ្ញាចិត្តរបស់ពួកគេចំពោះកិច្ចព្រមព្រៀងថ្ងៃទី ១០ ខែមីនា គួរតែត្រូវបានគោរព។ មនុស្សគ្រប់គ្នារំពឹងពីពួកគេ ដើម្បីគោរពកិច្ចព្រមព្រៀងនោះ ដោយគ្មានការពន្យារពេល និងដោយគ្មានការបង្ខូចទ្រង់ទ្រាយណាមួយឡើយ ពីព្រោះយើងមិនចង់ឃើញការងាកចេញពីកិច្ចព្រមព្រៀងនេះទេ»៕

ទឹកជំនន់ នៅម៉ាឡេស៊ី បង្ខំឲ្យមនុស្សរាប់ពាន់នាក់ជម្លៀសចេញ នៅទូទាំងរដ្ឋចំនួន ៦

ទឹកជំនន់ឡើងកាន់ខ្ពស់ បានបង្ខំឲ្យប្រជាជនរាប់ពាន់នាក់ត្រូវជម្លៀសចេញ នៅទូទាំងរដ្ឋចំនួន ៦ ក្នុងប្រទេសម៉ាឡេស៊ី ដោយការបង្ហោះនៅលើបណ្តាញសង្គមបង្ហាញឲ្យឃើញផ្ទះសម្បែង និងសាកលវិទ្យាល័យរងការខូចខាត។នៅម៉ោងប្រហែល ៩ព្រឹក (ម៉ោងក្នុងស្រុក) នាថ្ងៃព្រហស្បតិ៍ ទី១៨ ខែធ្នូនេះ ក្រុមហ៊ុនបណ្ដាញសង្គម បានបង្ហោះឡើងវិញនូវវីដេអូយកពីប្រភពអ្នកស្រុក នៅតំបន់ Gua Musang របស់រដ្ឋ Kelantan ដោយបង្ហាញពីទឹកជំនន់នៅក្នុងផ្ទះមួយខ្នង។ បុគ្គលនៅក្នុងវីដេអូដែលថតនៅម៉ោងប្រហែល ៨:២០ព្រឹក (ម៉ោងក្នុងស្រុក) ជឿថា ទឹកហូរទៅទន្លេ Sungai Lebir ទោះបីជាមិនមានភ្លៀងធ្លាក់ខ្លាំងនាពេលនោះក៏ដោយ។នៅទីក្រុង Kuantan រដ្ឋ Pahang អ្នកស្រុកម្នាក់ទៀត បានចែករំលែកវីដេអូដែលបង្ហាញពីទឹកឡើងកាន់តែខ្ពស់នៅក្នុងលំនៅឋានរបស់នាង ជាកន្លែងដែលគេឃើញរបស់របរប្រើប្រាស់ក្នុងផ្ទះ ដូចជាធុងហ្គាស និងប្រអប់ស្នោក្លាសេ អណ្តែតពេញក្នុងផ្ទះ។ អ្នកស្រុកខ្លះក៏ត្រូវបានឃើញរើទៅកាន់ទីជម្រកសុវត្ថិភាព ខណៈទឹកឡើងដល់ត្រឹមចង្កេះ។យោងតាមរបាយការណ៍របស់ទីភ្នាក់ងារគ្រប់គ្រងគ្រោះមហន្តរាយជាតិ នាថ្ងៃទី១៨ ខែធ្នូនេះ គិតត្រឹមថ្ងៃត្រង់ បានឲ្យដឹងថា ការជម្លៀសដោយទឹកជំនន់ បានកើនឡើងដល់ ៩.២៦១នាក់ នៅក្នុងរដ្ឋចំនួន ៦ គឺ Pahang, Terengganu, Johor, Selangor, Kelantan និង Sarawak។ អាជ្ញាធរបានបង្កើតជម្រកបណ្តោះអាសន្នចំនួន ៧៥កន្លែង នៅទូទាំងរដ្ឋចំនួន ៦ នេះ ដើម្បីជួយដល់គ្រួសារដែលរងផលប៉ះពាល់៕

ការវាយប្រហារអ៊ីស្រាអែលឆ្លងចូលតំបន់ភាគខាងត្បូង ភាគខាងកើតលីបង់នៅក្នុងការបំពានបទឈប់បាញ់ចុងក្រោយ

យោធាអ៊ីស្រាអែលបើកការវាយប្រហារតាមច្រកអាកាសនៅទូទាំងតំបន់ភាគខាងត្បូង និងតំបន់ភាគខាងកើតលីបង់ នៅក្នុងការបំពានស្ទើតែរាល់ថ្ងៃចុងក្រោយនៃបទឈប់បាញ់រយៈពេលជាង ១ឆ្នាំ ។អ្នកឆ្លើយឆ្លងព័ត៌មានរបស់កាសែត Al Jazeera រាយការណ៍ថា ការវាយប្រហារទាំងនេះ មានគោលដៅលើតំបន់ al-Jabour, al-Qatrani និងតំបន់ al-Rayhan ស្ថិតនៅភាគខាងត្បូងលីបង់ ក៏ដូចជាតំបន់ Buday និងតំបន់ Hermel នៅជ្រលងភ្នំ Bekaa ភាគខាងកើតលីបង់ ។អ៊ីស្រាអែល អះអាងថា ពួកគេមានគោលដៅលើទីតាំងប្រតិបត្តិការ និងកន្លែងលាក់អាវុធរបស់ក្រុមហេសបូឡា ដើម្បីដាក់សម្ពាធក្រុមប្រដាប់អាវុធលីបង់មួយនេះ រំសាយអាវុធ ។ក្រុមហេសបូឡា បដិសេធន៍ទាំងស្រុងការបោះបង់ចោលឃ្លាំងអាវុធ ដរាបណាអ៊ីស្រាអែលនៅតែបន្តទម្លាក់គ្រាប់បែក ហើយនិងតំបន់កាន់កាប់នៅលីបង់ ។ភាពតានតឹងបានកើនឡើងកាលពីរយៈពេលជាច្រើនសប្តាហ៍មុន ពេលដែលអ៊ីស្រាអែលទម្លាក់គ្រាប់បែកលើតំបន់ជាយក្រុងភាគខាងត្បូងទីក្រុងបេរូត ដោយបានសម្លាប់មេបញ្ជាការយោធាជាន់ខ្ពស់ម្នាក់របស់ក្រុមហេសបូឡាលោក Haytham Ali Tabatabai ។ការទម្លាក់គ្រាប់បែករបស់អ៊ីស្រាអែល បានធ្វើឲ្យមានការរិះគន់យ៉ាងខ្លាំងពីអង្គការសហប្រជាជាតិដែលបានរាយការណ៍កាលពីខែវិច្ឆិកាថា ជនស៊ីវិលយ៉ាងហោច ១២៧នាក់ រួមទាំងកុមារផងដែរ ត្រូវបានសម្លាប់នៅលីបង់ ចាប់តាំងពីបទឈប់បាញ់ចូលជាធរមានកាលពីចុងឆ្នាំ ២០២៤ ៕

ចិនបញ្ជាក់ពីការផ្តល់ជូនអាជ្ញាបណ្ណនាំចេញរ៉ែកម្រមួយចំនួន

ក្រសួងពាណិជ្ជកម្មចិន បញ្ជាក់នៅថ្ងៃព្រហស្បតិ៍នេះថា ពួកគេបានផ្តល់ជូនអាជ្ញាបណ្ណទូទៅជាច្រើនសម្រាប់ការនាំចេញរ៉ែកម្រ ដែលមានគោលបំណងពន្លឿនការដឹកជញ្ជូនសារធាតុចាំបាច់ ។វាបានក្លាយជាលទ្ធផលតាមការសន្យាដ៏សំខាន់ បន្ទាប់ពីជំនួបរវាងប្រធានាធិបតីសហរដ្ឋអាមេរិកលោក Donald Trump និងប្រធានាធិបតីចិនលោក Xi Jinping ដែលបានបន្ធូរបន្ថយភាពតានតឹងពាណិជ្ជកម្មរវាងប្រទេសមហាអំណាចទាំង ២ ។ទីក្រុងប៉េកាំងបានបន្ថែមសារធាតុរ៉ែកម្រ និងមេដែក ទៅក្នុងបញ្ជីគ្រប់គ្រងការនាំចេញរបស់ខ្លួន កាលពីដើមខែមេសា តម្រូវឲ្យមានអាជ្ញាបណ្ណប្រើប្រាស់ ២យ៉ាង សម្រាប់ការនាំចេញ ។ ការនាំចេញរ៉ែកម្ររបស់ចិន បានធ្លាក់ចុះនៅខែមេសា និងខែឧសភា បង្ខំឲ្យក្រុមហ៊ុនរថយន្តសកលមួយចំនួន បិទការផលិតគ្រឿងបង្គុំរបស់ខ្លួន ។ទីភ្នាក់ងារព័ត៌មានរ៉យទ័រ រាយការណ៍កាលពីដើមខែវិច្ឆិកាថា អាជ្ញាបណ្ណថ្មី ត្រូវបានរៀបចំឡើងដើម្បីអនុញ្ញាតឲ្យមានការនាំចេញបន្ថែមទៀត ក្រោមលិខិតអនុញ្ញាតរយៈពេល ១ឆ្នាំ សម្រាប់អតិថិជនម្នាក់ៗ ។ ប៉ុន្តែវានឹងមិនជំនួសអាជ្ញាបណ្ណប្រើប្រាស់ ២យ៉ាងមានស្រាប់នោះទេ ហើយមានតែក្រុមហ៊ុនរ៉ែកម្រចិនធំៗប៉ុណ្ណោះ មានសិទ្ធិទទួលបានវា ៕

កាតា៖ ការបំពានបទឈប់បាញ់របស់អ៊ីស្រាអែល ធ្វើឲ្យគ្រោះថ្នាក់ដល់ដំណើរការសន្តិភាពនៅតំបន់ហ្កាហ្សាទាំងមូល

នាយករដ្ឋមន្រ្តីកាតាព្រះអង្គម្ចាស់ Sheikh Mohammed bin Abdulrahman bin Jassim Al Thani បានធ្វើការព្រមានថា ការបំពានបទឈប់បាញ់ហ្កាហ្សារាល់ថ្ងៃរបស់អ៊ីស្រាអែល កំពុងគំរាមកំហែងដល់កិច្ចព្រមព្រៀងទាំងមូល ខណៈពេលដែលទ្រង់អំពាវនាវឲ្យមានវឌ្ឍភាពបន្ទាន់ឆ្ពោះទៅរកដំណាក់កាលបន្ទាប់នៃកិច្ចព្រមព្រៀង ដើម្បីបញ្ចប់សង្រ្គាមប្រល័យពូជសាសន៍របស់អ៊ីស្រាអែលលើដែនដីឡោមព័ទ្ធមួយនេះ ។ព្រះអង្គម្ចាស់ Al Thani បានធ្វើការអំពាវនាវបែបនេះ បន្ទាប់ពីកិច្ចប្រជុំជាមួយរដ្ឋមន្រ្តីការបរទេសសហរដ្ឋអាមេរិកលោក Marco Rubio នៅទីក្រុងវ៉ាស៊ីនតោនកាលពីថ្ងៃពុធ ។ព្រះអង្គម្ចាស់ Al Thani ដែលប្រទេសរបស់ទ្រង់រួមចំណែសម្របសម្រួលយ៉ាងសំខាន់ មានបន្ទូលថា ជំនួយមនុស្សធម៌ត្រូវតែទៅដល់តំបន់ហ្កាហ្សាដោយគ្មានលក្ខខណ្ឌ ហើយដំណាក់កាលទី ២នៃកិច្ចព្រមព្រៀង ត្រូវតែចាប់ផ្តើមជាបន្ទាន់ ។កិច្ចពិភាក្សានៅជំនួបយុទ្ធសាស្រ្តកាតា-សហរដ្ឋអាមេរិកលើកទី ៧ បានកើតមានឡើង ស្របពេលបទឈប់បាញ់ដ៏ផុយស្រួយនៅតែបន្តរង្គោះរង្គើរ ស្របពេលគ្រាអាសន្នមនុស្សធម៌កាន់តែលិចលង់នៅទូទាំងតំបន់ហ្កាហ្សា ។យោងតាមការតាមដានការបំពានរបស់កាសែត Al Jazeera បានឲ្យដឹងថា ចាប់តាំងពីបទឈប់បាញ់ចូលជាធរមានកាលពីថ្ងៃទី ១០ ខែតុលា អ៊ីស្រាអែល បានបំពានបទឈប់បាញ់យ៉ាងហោច ៧៣៨លើក ដោយបានសម្លាប់ជនប៉ាឡេស្ទីន ៣៩៤នាក់ និងធ្វើមនុស្ស ១.០៧៥នាក់ផ្សេងទៀត រងរបួស ៕

ប្រធានាធិបតីប្រេស៊ីលបង្ហាញក្តីកង្វល់ពីជំហររបស់លោក Trumpចំពោះអាមេរិកឡាទីន

អំឡុងជំនួបគណៈរដ្ឋមន្រ្តីសាធារណៈនៅទីក្រុង Brasilia ប្រធានាធិបតីប្រេស៊ីលលោក Luiz Inacio Lula da Silva បាននិយាយកាលពីថ្ងៃពុធថា លោកមានការព្រួយបារម្ភចំពោះអាមេរិកឡាទីន និងជំហររបស់លោកប្រធានាធិបតី Donald Trump ចំពោះតំបន់មួយនេះ ។លោក Lulaនិយាយប្រាប់រដ្ឋមន្រ្តីរបស់លោកថា ពួកគេត្រូវការបន្តប្រុងប្រយ័ត្នខ្ពស់ចំពោះស្ថានភាព ហើយនិងស្នើសុំពួកគេបន្តនៅជិតគ្នា ក្នុងករណីកិច្ចសន្ទនាត្រូវការជាមួយមេដឹកនាំផ្សេង ។ប្រធានាធិបតីប្រេស៊ីលបានរូបនេះ រំលឹកឡើងវិញថា អាមេរិកឡាទីន គឺជាតំបន់សន្តិភាព ដោយគ្មានអាវុធនុយក្លេអ៊ែរ ហើយលោកបាននិយាយប្រាប់លោក Trump ថា កម្លាំងពាក្យសម្តី អាចមានតម្លៃជាងកម្លាំងអាវុធទៅទៀត ។លោក Lulaបានផ្តល់ការជួយ ដើម្បីសម្របសម្រួលកិច្ចប្រជុំរវាងសហរដ្ឋអាមេរិក និងវ៉េណេស៊ុយអេឡាផងដែរ ដោយលោកនិយាយថា ប្រេស៊ីលអាចរួមចំណែក បើសិនជាលោក Trumpចាប់អារម្មណ៍និយាយពីលក្ខខណ្ឌល្អជាមួយប្រទេសមួយនេះ ។សូមបញ្ជាក់ថា រដ្ឋាភិបាលរបស់លោក Trumpពុំទទួលស្គាល់លោក Nicolas Maduro ថាជាមេដឹកនាំស្របច្បាប់របស់វេណេស៊ុយអេឡានោះទេ ហើយនិងបានបង្កើនវត្តមានយោធានៅក្នុងតំបន់នេះ ដោយបើកការវាយប្រហារលើនាវារត់ពន្ធគ្រឿងញៀនសង្ស័យ និងរឹបអូសនាវាដឹកប្រេង ៕

បណ្ដាញសង្គម

ព័ត៌មានថ្មីៗ

ឯកឧត្តម គន់ គីម អញ្ជើញជាអធិបតីក្នុងពិធីចុះ MoU ជំរុញការអភិវឌ្ឍកសិកម្ម និងសេដ្ឋកិច្ចគ្រួសារអតីតយុទ្ធជន និងនិវត្តជន

អ៊ុយក្រែន លើកឡើងថា រុស្ស៊ី ច្រានចោលសំណើបទឈប់បាញ់មុនបុណ្យណូអែល

ថៃជារដ្ឋបំពានច្បាប់អន្តរជាតិ បំផ្លាញសន្ដិភាព និងសន្ដិសុខមិនត្រឹមតែរវាងកម្ពុជាទេ ប៉ុន្ដែតំបន់ទាំងមូល

ឯកឧត្តមរដ្ឋមន្ត្រី ជា វ៉ាន់ដេត ដឹកនាំកិច្ចប្រជុំលើកទី៨របស់គណៈកម្មាធិការរដ្ឋាភិបាលឌីជីថល ដើម្បីពិនិត្យ និងពិភាក្សាលើប្រធានបទចំនួន ៤

ទាហានថៃបន្តបាញ់ផ្លោងយ៉ាងកំរោលចូលមកលើជនស៊ីវិលកម្ពុជា ដែលមកដល់ពេលនេះ បណ្តាលឲ្យជនស៊ីវិលស្លាប់ និងរបួសជាងមួយរយនាក់

បេក្ខជនប្រធានាធិបតីហុងឌុយរ៉ាស ដែលគាំទ្រដោយលោក Trump បានឈ្នះក្នុងការបោះឆ្នោតដ៏តានតឹង

លោក Trump បញ្ជាក់ពីការវាយប្រហារជើងគោកឆាប់ៗ ប្រឆាំងគោលដៅគ្រឿងញៀននៅអាមេរិកឡាទីន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877