BTV NEWS

កុមារយ៉ាង ៦៦នាក់ បានស្លាប់ដោយសារកង្វះអាហារូបត្ថម្ភនៅតំបន់ហ្កាហ្សា អំឡុងការឡោមព័ទ្ធរបស់អ៊ីស្រាអែល

មនុស្សយ៉ាងហោច ៨១នាក់ត្រូវបានសម្លាប់ក្នុងការវាយប្រហាររបស់អ៊ីស្រាអែលលើតំបន់ហ្កាហ្សា

លោក Trump ច្រានចោលសេចក្តីរាយការណ៍ថា អាមេរិកកំពុងថ្លឹងថ្លែងកិច្ចព្រមព្រៀងនុយក្លេអ៊ែរស៊ីវិលតម្លៃ ៣០ពាន់ដុល្លារជាមួយអ៊ីរ៉ង់

ការវាយប្រហារយានដ្រូនរុស្ស៊ីសម្លាប់មនុស្ស ២នាក់ និង ១៤នាក់ទៀត រងរបួសនៅទីក្រុង Odesa ប្រទេសអ៊ុយក្រែន

ព័ត៌មានអន្តរជាតិ

អ៊ីស្រាអែលបានសម្លាប់ជនជាតិប៉ាឡេស្ទីនជាង៤០នាក់បន្ថែមទៀតនៅតំបន់ហ្កាហ្សា រួមទាំងអ្នកស្វែងរកជំនួយ

ប្រភពវេជ្ជសាស្ត្របាននិយាយថា មនុស្សយ៉ាងហោចណាស់៤៣នាក់បន្ថែមទៀតត្រូវបានសម្លាប់ក្នុងការវាយប្រហារផ្សេងៗរបស់អ៊ីស្រាអែលចាប់តាំងពីព្រឹកព្រលឹម ខណៈយោធាកំពុងវាយលុកតំបន់ដែលរងការឡោមព័ទ្ធមួយឥតឈប់ឈរ ស្របពេលចំនួនអ្នកស្លាប់សរុបរបស់ពលរដ្ឋប៉ាឡេស្ទីនក្នុង សង្គ្រាមរ៉ាំរ៉ៃនេះ បានកើនឡើងលើសពី ៥៦.០០០ នាក់ ។ អ្នកដែលត្រូវបានសម្លាប់កាលពីថ្ងៃចន្ទដើមសប្ដាហ៍នេះ រួមមានអ្នកស្វែងរកជំនួយយ៉ាងហោចណាស់ ២០ នាក់ដែលបានបាត់បង់ជីវិតពេលកំពុងព្យាយាមស្វែងរកអាហារសម្រាប់គ្រួសាររបស់ពួកគេនៅឯមជ្ឈមណ្ឌលចែកចាយមូលនិធិមនុស្សធម៌ហ្កាហ្សាគ្រប់គ្រងដោយសហរដ្ឋអាមេរិក និងគាំទ្រដោយអ៊ីស្រាអែល ដែលអង្គការសហប្រជាជាតិបានថ្កោលទោសថាយកជំនួយធ្វើជាអាវុធ។ ការសម្លាប់នេះគឺជាវិនាសកម្មចុងក្រោយបង្អស់ក្នុងរលកនៃការសម្លាប់រង្គាលប្រចាំថ្ងៃ ដោយផ្តោតលើប្រជាជនប៉ាឡេស្ទីនកំពុងស្រេកឃ្លាន ដែលបន្តធ្វើដំណើរដ៏គ្រោះថ្នាក់ទៅកាន់ចំណុចចែកចាយអាហារ។ ក្រុមអ្នករិះគន់បានថ្កោលទោសទីតាំងចែកចាយជំនួយទាំងនេះថាជា "កន្លែងសត្តឃាតសម្រាប់មនុស្ស" ស្របពេលមានភាពអត់ឃ្លានកាន់តែធ្ងន់ធ្ងរ និងវិបត្តិទុរ្ភិក្សកំពុងកើតមាន។ការវាយប្រហាររបស់អ៊ីស្រាអែលលើប្រជាជនប៉ាឡេស្ទីននៅជិតមជ្ឈមណ្ឌលផ្តល់ជំនួយបានសម្លាប់មនុស្សជាង៤០០ នាក់ និងរបួសប្រហែល១.០០០នាក់ ចាប់តាំងពីមូលនិធិជំនួយមនុស្សធម៌នេះ បានចាប់ផ្តើមចែកចាយនៅថ្ងៃទី ២៧ ខែឧសភា។ លោក Hani Mahmoudអ្នកសារព័ត៌មានរបស់ Al Jazeera រាយការណ៍ពីទីក្រុង ហ្កាហ្សា ថា ហ្វូងមនុស្សស្រេកឃ្លានប្រមូលផ្តុំគ្នានៅមជ្ឈមណ្ឌលចែកចាយអាហារនៅក្រុង Rafah ឬច្រករបៀង Netzarim មកទល់ពេលនេះ ។អ្នកស្វែងរកជំនួយ ១៣ នាក់ត្រូវបានបាញ់សម្លាប់នៅថ្ងៃនេះ។ ពួកគេស្ថិតក្នុងចំណោមមនុស្ស៣០ នាក់ដែលត្រូវបានសម្លាប់ដោយយោធាអ៊ីស្រាអែលតាំងពីព្រឹកព្រលឹម៕

លោក Trump អរគុណអ៊ីរ៉ង់ដែលបានជូនដំណឹងជាមុនពីការវាយប្រហារតបតលើមូលដ្ឋានទ័ពអាមេរិកនៅកាតា

លោកប្រធានាធិបតីDonald Trump បាននិយាយកាលពីថ្ងៃចន្ទសប្ដាហ៍នេះថា រដ្ឋាភិបាលអ៊ីរ៉ង់បានផ្តល់ "ការជូនដំណឹងជាមុន" អំពីការវាយប្រហារដោយមីស៊ីលជាបន្តបន្ទាប់ដែលសំដៅលើមូលដ្ឋានទ័ពអាកាស Al Udeid របស់សហរដ្ឋអាមេរិកក្នុងប្រទេសកាតា ដោយបាននិយាយសម្រាលការឆ្លើយតបរបស់អ៊ីរ៉ង់ចំពោះការទម្លាក់គ្រាប់បែករបស់សហរដ្ឋអាមេរិកលើទីតាំងនុយក្លេអ៊ែរអ៊ីរ៉ង់ចំនួនបីកន្លែងកាលពីថ្ងៃសៅរ៍ចុងសប្តាហ៍ថា "ខ្សោយណាស់" ។ លោក Trump បានសរសេរក្នុងសារបង្ហោះលើបណ្ដាញសង្គម Truth Social ថា លោកចង់ថ្លែងអំណរគុណដល់ប្រទេសអ៊ីរ៉ង់ ដែលបានជូនដំណឹងជាមុនដល់ពួកលោក ដែលអាចបញ្ចៀសបាននូវការបាត់បង់ជីវិតមនុស្ស និងគ្មាននរណាម្នាក់រងរបួសក្នុងការវាយប្រហារនោះ ។ប្រធានាធិបតីរូបនេះ ពុំបានបញ្ជាក់ថាតើការព្រមានជាមុនបានកើតឡើងពេលណា ឬរបៀបណានោះទេ ។ ប៉ុន្តែសាររបស់លោក Trump ហាក់ដូចជាបញ្ជាក់ពីការរំពឹងទុកថា អ៊ីរ៉ង់អាចបញ្ជូនផែនការរបស់ខ្លួនសម្រាប់ការសងសឹកជាមុន ដោយផ្តល់ឱកាសឱ្យសហរដ្ឋអាមេរិកកាត់បន្ថយការខូចខាត និងជៀសវាងការកើនឡើងជម្លោះ។ ប៉ុន្មានម៉ោងបន្ទាប់ពីការវាយប្រហារលើមូលដ្ឋានទ័ពអាមេរិកនៅកាតាកាលពីថ្ងៃចន្ទ លោក Trump បានប្រកាសថា អ៊ីស្រាអែល និងអ៊ីរ៉ង់ បានយល់ព្រមលើបទឈប់បាញ់ដែលចាប់ផ្តើមនៅពាក់កណ្តាលអធ្រាត្រម៉ោងក្នុងស្រុក តិចជាងពីរសប្តាហ៍បន្ទាប់ពីអ៊ីស្រាអែលបានចាប់ផ្តើមវាយប្រហារគោលដៅរបស់អ៊ីរ៉ង់ ហើយអ៊ីរ៉ង់បានឆ្លើយតបដោយមីស៊ីល។ ទាំងអ៊ីស្រាអ៊ែល និងអ៊ីរ៉ង់ សុទ្ធតែពុំបានធ្វើអត្ថាធិប្បាយលើបទឈប់បាញ់ទេ ដោយភាគីទាំងពីរនិយាយថា បទឈប់បាញ់អាចកើតឡើងលុះត្រាតែមានការបញ្ឈប់ការវាយប្រហារពីភាគីជម្លោះរបស់ខ្លួន៕

តម្លៃភាគហ៊ុនសកលហក់ឡើង និងតម្លៃប្រេងធ្លាក់ចុះខណៈលោកTrump ប្រកាសបទឈប់បាញ់អ៊ីរ៉ង់-អ៊ីស្រាអែល

តម្លៃភាគហ៊ុនសកលបានកើនឡើង ហើយប្រាក់ដុល្លារបានបន្តធ្លាក់ចុះនៅថ្ងៃអង្គារសប្ដាហ៍នេះ បន្ទាប់ពីប្រធានាធិបតីអាមេរិកលោក Donald Trump និយាយថា អ៊ីរ៉ង់ និងអ៊ីស្រាអែល បានយល់ព្រមលើបទឈប់បាញ់ ដោយរុញតម្លៃប្រេងធ្លាក់ចុះយ៉ាងខ្លាំង ខណៈក្ដីបារម្ភពីការរំខានការផ្គត់ផ្គង់បានធ្លាក់ចុះ។តាមរយៈសំណេរលើបណ្ដាញសង្គម Truth Social លោក Trump បញ្ចាក់ថាបទឈប់បាញ់នឹងចូលជាធរមានក្នុងរយៈពេល១២ ម៉ោងទៀតបន្ទាប់ពីនោះ សង្រ្គាមនឹងត្រូវបានចាត់ទុកថាបានបញ្ចប់។ មន្ត្រីជាន់ខ្ពស់អ៊ីរ៉ង់មួយរូបបានអះអាងថា ទីក្រុងតេអេរ៉ង់បានយល់ព្រមលើបទឈប់បាញ់ជាមួយអ៊ីស្រាអែល។ សារព័ត៌មាន Channel 12 របស់អ៊ីស្រាអែលបានរាយការណ៍ថា នាយករដ្ឋមន្ត្រី Benjamin Netanyahu បានយល់ព្រមក្នុងការសន្ទនាជាមួយលោក Trump ចំពោះបទឈប់បាញ់មួយ ដរាបណាអ៊ីរ៉ង់បញ្ឈប់ការវាយប្រហាររបស់ខ្លួន។ ស្របពេលនោះ តម្លៃប្រេងបានធ្លាក់ចុះជិត៤%បន្ថែមទៀត ក្រោយបានធ្លាក់ចុះ៩%រួចហើយកាលពីថ្ងៃចន្ទដើមសប្ដាហ៍នេះ ខណៈអ៊ីរ៉ង់បានសងសឹកលើមូលដ្ឋានរបស់សហរដ្ឋអាមេរិកនៅមជ្ឈិមបូព៌ា។ស្របពេលការគំរាមកំហែងភ្លាមៗចំពោះការបិទផ្លូវដឹកជញ្ជូនដ៏សំខាន់នៃច្រកសមុទ្រ Hormuz ហាក់ដូចជាបានបញ្ចប់ ភាគហ៊ុនប្រេងឆៅរបស់សហរដ្ឋអាមេរិកបានធ្លាក់ចុះ៣,៤%បន្ថែមទៀត មកនៅត្រឹម ៦៦,២៤ ដុល្លារក្នុងមួយបារ៉ែល ជាកម្រិតទាបបំផុតចាប់តាំងពីថ្ងៃទី១១ ខែមិថុនា។ ទ្រព្យសកម្មងាយរងហានិភ័យ បានកើនឡើង ដោយភាគហ៊ុន S&P 500របស់អាមេរិក បានកើនឡើង ០,៥% និងតម្លៃភាគហ៊ុន Nasdaq លោតឡើងជាង ០,៧%។ ចំណែកតម្លៃភាគហ៊ុនរបស់អឺរ៉ុប EUROSTOXX 50 បានហក់ឡើង១,១%ហើយភាគហ៊ុន FTSEរបស់អង់គ្លេសកើនឡើង០,៣%។ ដំណឹងនៃបទឈប់បាញ់បានមើលឃើញថាប្រាក់ដុល្លារបានបន្តធ្លាក់ចុះកាលពីយប់រំលងអធ្រាត្រ ហើយប្រាក់យ៉េនជប៉ុនកើនឡើង ស្របពេលប្រាក់អឺរ៉ូ បានកើនឡើងដែរនៅថ្ងៃអង្គារនេះ៕

អ៊ីស្រាអែល ដាក់គោលដៅវាយប្រហារលើឆ្មាំអ៊ីរ៉ង់ និងពន្ធនាគារនៅទីក្រុងតេអេរ៉ង់ក្នុងការវាយប្រហារថ្មី

អ៊ីស្រាអែល បានវាយប្រហារលើទីតាំងឆ្មាំបដិវត្តន៍ និងពន្ធនាគារ Evin ក្នុងទីក្រុងតេអេរ៉ង់ ក្នុងថ្ងៃទី១១នៃសង្រ្គាមកាលពីថ្ងៃចន្ទ ទី២៣ មិថុនា ជាអ្វីដែលប្រទេសនេះនិយាយថាជាការវាយប្រហារដ៏ខ្លាំងក្លាបំផុតរបស់ខ្លួនលើរដ្ឋធានីរបស់អ៊ីរ៉ង់។ ក្នុងការឆ្លើយតបវិញ អ៊ីរ៉ង់បានបាញ់ស្រោចមីស៊ីលទៅកាន់ដែនដីអ៊ីស្រាអែល និងបានប្តេជ្ញាសងសឹកសហរដ្ឋអាមេរិក បន្ទាប់ពីបានវាយប្រហារលើទីតាំងនុយក្លេអ៊ែររបស់សាធារណរដ្ឋអ៊ីស្លាមមួយនេះ។ការផ្ទុះយ៉ាងខ្លាំង បានអង្រួនរដ្ឋធានីអ៊ីរ៉ង់ ដែលរដ្ឋមន្ត្រីការពារជាតិអ៊ីស្រាអែល លោក Israel Katz បាននិយាយថា យោធាបានវាយប្រហារ «គោលដៅរបស់របបនេះ» ដោយកម្លាំងមិនធ្លាប់មានពីមុនមក ហើយរំពឹងទុកថា អ៊ីស្រាអែលអាចឈានដល់ការផ្តួលរំលំមេដឹកនាំរបស់អ៊ីរ៉ង់។គោលដៅនានារួមមានទាំងពន្ធនាគារ Evin ដែលលោក Katz និយាយថា «ដាក់អ្នកទោសនយោបាយ និងក្រុមប្រឆាំងរបបអ៊ីរ៉ង់» ព្រមទាំងមជ្ឈមណ្ឌលទីបញ្ជាការកងជីវពល Basij ក្នុងស្រុក និងកងឆ្មាំបដិវត្តន៍អ៊ីស្លាមដ៏មានឥទ្ធិពល។យោធាអ៊ីស្រាអែលបាននិយាយនៅក្នុងសេចក្តីថ្លែងការណ៍ថា គោលដៅជាច្រើនជាកម្មសិទ្ធិរបស់កងកម្លាំងអ៊ីរ៉ង់ ដែលទទួលបន្ទុកសម្រាប់ការការពារសន្តិសុខមាតុភូមិ ការបង្ក្រាបការគំរាមកំហែង និងការរក្សាស្ថេរភាពរបស់របបនេះ។ប្រព័ន្ធផ្សព្វផ្សាយអ៊ីរ៉ង់ និងយោធាអ៊ីស្រាអែលនិយាយថា អ៊ីស្រាអែលក៏បានវាយលុកនៅតំបន់ Fordo ជាទីតាំងរោងចក្រចម្រាញ់សារធាតុអ៊ុយរ៉ានីញ៉ូមនុយក្លេអែរដ៏សំខាន់ ដែលត្រូវបានបង្កប់យ៉ាងជ្រៅនៅតំបន់ភ្នំភាគខាងត្បូងទីក្រុងតេអេរ៉ង់។

ចៅក្រមអាមេរិក រារាំងផែនការរបស់លោក Trump ជុំវិញបម្រាមលើនិស្សិតអន្តរជាតិ ក្នុងសាលា Harvard

ចៅក្រមសហព័ន្ធ កាលពីថ្ងៃចន្ទ (២៣ មិថុនា) បានរារាំងរដ្ឋបាលរបស់លោកប្រធានាធិបតីអាមេរិក Donald Trump មិនឱ្យអនុវត្តផែនការរបស់លោកក្នុងការហាមប្រាមជនបរទេសមិនឱ្យចូលទឹកដីសហរដ្ឋអាមេរិក ដើម្បីទៅសិក្សានៅសកលវិទ្យាល័យ Harvard ដ៏ល្បីល្បាញ។ចៅក្រមប្រចាំតំបន់អាមេរិក Allison Burroughs នៅទីក្រុង Boston បានចេញដីកាហាមឃាត់រដ្ឋបាលរបស់លោក Trump មិនឱ្យអនុវត្តនូវកិច្ចប្រឹងប្រែងចុងក្រោយរបស់ខ្លួន ក្នុងការកាត់បន្ថយសមត្ថភាពរបស់ Harvard ក្នុងការទទួលនិស្សិតអន្តរជាតិ ស្របពេលជម្លោះកាន់តែខ្លាំងរវាងលោក Trump ប្រធានាធិបតីមកពីបក្សសាធារណរដ្ឋ ទល់នឹងសកលវិទ្យាល័យដ៏មានកិត្យានុភាពមួយនេះ។ដីកាបឋមថ្មីនេះ បានបន្ថែមពេលវេលាដល់ដីកាបណ្ដោះអាសន្នមួយ ដែលចៅក្រមបានចេញកាលពីថ្ងៃទី០៥ ខែមិថុនា ដែលរារាំងរដ្ឋបាលមិនឱ្យអនុវត្តសេចក្តីប្រកាសដែលលោក Trump បានចុះហត្ថលេខា ដោយលើកហេតុផលកង្វល់សន្តិសុខជាតិដើម្បីបង្ហាញពីភាពត្រឹមត្រូវថាហេតុអ្វីបានជាសាលា Harvard លែងអាចទុកចិត្តបានទៀតក្នុងការទទួលនិស្សិតអន្តរជាតិ។គួរឱ្យដឹងថា និស្សិតអន្តរជាតិជិត ៦.៨០០នាក់ បានចូលរៀននៅសកលវិទ្យាល័យ Harvard ក្នុងឆ្នាំសិក្សាថ្មីបំផុតរបស់ខ្លួន ដែលស្មើនឹង ២៧% នៃចំនួននិស្សិតនៃសាលាដ៏មានកិត្យានុភាពមានមូលដ្ឋាននៅរដ្ឋ Massachusetts របស់សហរដ្ឋអាមេរិក មួយនេះ៕

ការស្ទង់មតិ៖ ប្រជាជនអាមេរិកបារម្ភថា ជម្លោះជាមួយអ៊ីរ៉ង់ អាចកើនឡើងកាន់តែអាក្រក់

យោងតាមការស្ទង់មតិរបស់សារព័ត៌មានរ៉យទ័រ និងស្ថាប័ន Ipsos ដែលបិទកាលពីថ្ងៃចន្ទ (២៣ មិថុនា) បានបង្ហាញថា ប្រជាជនអាមេរិក មានការភ័យព្រួយយ៉ាងខ្លាំងចំពោះជម្លោះដ៏ចម្រូងចម្រាសរវាងសហរដ្ឋអាមេរិក និងអ៊ីរ៉ង់ ហើយបារម្ភថា អំពើហិង្សាអាចកើនឡើងកាន់តែអាក្រក់ បន្ទាប់ពីលោកប្រធានាធិបតី Donald Trump បានបញ្ជាឱ្យទម្លាក់គ្រាប់បែកលើរោងចក្រនុយក្លេអ៊ែរអ៊ីរ៉ង់។ប្រជាជនអាមេរិកប្រមាណ ៧៩% ដែលត្រូវស្ទង់មតិបាននិយាយថា ពួកគេព្រួយបារម្ភណាស់ថា អ៊ីរ៉ង់អាចកំណត់គោលដៅលើជនស៊ីវិលអាមេរិក ក្នុងការឆ្លើយតបទៅនឹងការវាយប្រហារតាមអាកាសរបស់ទីក្រុងវ៉ាស៊ីនតោន។ ការស្ទង់មតិរយៈពេលបីថ្ងៃ — ដែលចាប់ផ្តើមបន្ទាប់ពីការវាយប្រហារតាមអាកាសរបស់អាមេរិក និងបានបញ្ចប់នៅព្រឹកថ្ងៃចន្ទ មុនពេលអ៊ីរ៉ង់ បាញ់មីស៊ីលដាក់មូលដ្ឋានទ័ពអាកាសអាមេរិកក្នុងប្រទេសកាតា — បានបង្ហាញឱ្យឃើញថា ជនជាតិអាមេរិក ក៏ព្រួយបារម្ភក្នុងតួលេខស្រដៀងគ្នានេះពីសុវត្ថិភាពបុគ្គលិកយោធាអាមេរិក ដែលឈរជើងនៅមជ្ឈិមបូព៌ា។ ចំណែកអ្នកឆ្លើយតប ៨៤% បាននិយាយថា ពួកគេព្រួយបារម្ភជាទូទៅអំពីជម្លោះដែលកំពុងកើនឡើង។ការស្ទង់មតិ ដែលធ្វើឡើងលើមនុស្សពេញវ័យនៅសហរដ្ឋអាមេរិកចំនួន ១.១៣៩នាក់ទូទាំងប្រទេសនេះ បានគូសបញ្ជាក់ពីការខ្វែងគំនិតយ៉ាងស៊ីជម្រៅទៅលើអ្វីដែលទីក្រុងវ៉ាស៊ីនតោនគួរធ្វើបន្ទាប់ ហើយក៏គូសបញ្ជាក់ពីហានិភ័យនយោបាយដែលលោក Trump កំពុងប្រឈមមុខ ខណៈប្រជាប្រិយភាពរបស់ប្រធានាធិបតីរូបនេះបានធ្លាក់ចុះដល់ ៤១% ដែលជាកម្រិតទាបបំផុតនៃអាណត្តិបច្ចុប្បន្នរបស់លោក នៅក្នុងតំណែងលើកទី២ ដែលចាប់ផ្តើមនៅក្នុងខែមករា៕

ចិន ថ្កោលទោស មេដឹកនាំតំបន់តៃវ៉ាន់ ជុំវិញការភូតកុហកឯករាជ្យភាពតៃវ៉ាន់

អ្នកនាំពាក្យចិនដីគោកកាលពីថ្ងៃចន្ទដើមសប្ដាហ៍នេះបានថ្កោលទោសលោក Lai Ching-te មេដឹកនាំរបស់តំបន់តៃវ៉ាន់ចំពោះការចេញសេចក្តីប្រកាសជាសាធារណៈទាក់ទងនឹង "ឯករាជ្យភាពកោះតៃវ៉ាន់" ក្នុងគោលបំណងញុះញង់ឱ្យមានការប្រឈមដាក់គ្នានៅទូទាំងច្រកសមុទ្រ។លោក Chen Binhua អ្នកនាំពាក្យការិយាល័យកិច្ចការកោះតៃវ៉ាន់នៃក្រុមប្រឹក្សារដ្ឋចិន បានលើកឡើងបែបនេះឆ្លើយតបទៅនឹងសុន្ទរកថារបស់លោក Lai កាលពីថ្ងៃអាទិត្យ។លោក Chen បាននិយាយថា សុន្ទរកថានេះពោពេញដោយការភូតភរ ការបោកបញ្ឆោត អរិភាព និងការញុះញង់។ លោកបន្តថា មេដឹកនាំកោះនេះ មានចេតនាបំភ្លៃ និងបំបែកប្រវត្តិសាស្ត្រ។លោក Chen បាននិយាយថាលោក Lai បានប្រើវោហាសាស្ត្របំបែកខ្លួននិងការភូតកុហកនៃ "ឯករាជ្យភាពរបស់កោះតៃវ៉ាន់" ដោយព្យាយាមប្រឌិតនូវហេតុផលសម្រាប់ការនិទានរឿងរបស់ខ្លួន។ អ្នកនាំពាក្យរូបនេះបាននិយាយថា នោះបម្រើជាការឃោសនាដើម្បីជំរុញរបៀបវារៈនយោបាយរបស់ខ្លួននៃអ្វីដែលគេហៅថាការរំលើកគុណ សម្រាប់ផលប្រយោជន៍នយោបាយអាត្មានិយម។លោកថា មិនថាលោក Lai ប្រើយុទ្ធសាស្ត្របែបណានោះទេ បុគ្គលព្យាយាមផ្ដាច់ខ្លួនរូបនេះ មិនអាចកែប្រែការពិតផ្លូវច្បាប់ដែលថាកោះតៃវ៉ាន់ជាផ្នែកមួយនៃប្រទេសចិន ឬធ្វើឱ្យមានការរំជើបរំជួលដល់ការប្តេជ្ញាចិត្តជាសកលចំពោះគោលការណ៍ចិនតែមួយនោះទេ។បុគ្គលនេះក៏មិនអាចរារាំងការបង្រួបបង្រួមជុំជាតិដោយចៀសមិនរួចរបស់ប្រទេសចិនបានដែរ៕

អ៊ីរ៉ង់ ខ្នះខ្នែងត្រៀមផែនការរកអ្នកស្នងតំណែងមេដឹកនាំកំពូលពីលោក Khamenei

អ៊ីរ៉ង់ កំពុងតែស្វះស្វែងរកអ្នកស្នងតំណែងបន្ទាប់ពីមេដឹកនាំកំពូលរបស់ខ្លួនគឺលោក Ayatollah Ali Khamenei ហើយក្រុមប្រឹក្សាមេដឹកនាំសាសនាជាន់ខ្ពស់ ៣រូបរបស់ប្រទេស បានពន្លឿនផែនការនេះក្នុងប៉ុន្មានថ្ងៃចុងក្រោយ ចាប់តាំងពីអ៊ីស្រាអែល បានវាយប្រហារអ៊ីរ៉ង់ និងបានគម្រាមធ្វើឃាតមេដឹកនាំជើងចាស់រូបនោះ នេះបើតាមប្រភពផ្ទៃក្នុង ៥នាក់បានប្រាប់សារព័ត៌មានរ៉យទ័រ។ប្រភពអ៊ីរ៉ង់ និយាយថា លោក លោក Khamenei វ័យ ៨៦ឆ្នាំ កំពុងត្រូវបានរាយការណ៍ជាទៀងទាត់ពីកិច្ចពិភាក្សានេះ។ មន្ត្រីសន្តិសុខជាន់ខ្ពស់ម្នាក់បានប្រាប់ថា មេដឹកនាំកំពូលរូបនេះបានចូលទៅសម្ងំលាក់ខ្លួនជាមួយក្រុមគ្រួសាររបស់លោក ហើយត្រូវបានការពារយ៉ាងតឹងរ៉ឹងដោយអង្គភាពកងកម្លាំងពិសេស Vali-ye Amr នៃឆ្មាំបដិវត្តន៍។ប្រភពបន្តថា បេក្ខភាពលេចធ្លោ ២រូប កំពុងស្ថិតនៅក្នុងការពិភាក្សាជាបន្តបន្ទាប់រួមមានកូនប្រុសវ័យ ៥៦ឆ្នាំរបស់ Khamenei ឈ្មោះថា Mojtaba ដែលត្រូវគេមើលឃើញថាជាជម្រើសបន្តបន្ទាប់គ្នាជាយូរមកហើយ ហើយនិងគូប្រជែងថ្មីគឺលោក Hassan Khomeini ជាចៅប្រុសរបស់បិតាបដិវត្តអ៊ិស្លាម។ផែនការរកអ្នកស្នងតំណែងនេះបានកំពុងដំណើរការរួចទៅហើយ ដោយសារវ័យចំណាស់របស់លោក Khamenei និងបញ្ហាសុខភាពយូរអង្វែងរបស់លោក ប៉ុន្តែភាពបន្ទាន់ថ្មីៗនេះគឺត្រូវបានគូសបញ្ជាក់ក្នុងខែកញ្ញា នៅពេលអ៊ីស្រាអែល សម្លាប់មេដឹកនាំក្រុមហេសបូឡា លោក Sayyed Hassan Nasrallah ដែលជាសម្ព័ន្ធមិត្តជិតស្និទ្ធរបស់លោក Khamenei ហើយផែនការក៏ត្រូវពន្លឿនកាន់តែប្រញាប់នៅក្នុងខែនេះ បន្ទាប់ពីការវាយប្រហាររបស់អ៊ីស្រាអែល លើទីតាំងនុយក្លេអ៊ែរ ដែលត្រូវបានបន្តដោយការវាយប្រហាររបស់អាមេរិក កាលពីចុងសប្តាហ៍៕

លោកTrump ប្រកាសបទឈប់បាញ់គ្នារវាងអ៊ីរ៉ង់-អ៊ីស្រាអែល ក្រោយការវាយប្រហារដោយមីស៊ីលអ៊ីរ៉ង់លើមូលដ្ឋានទ័ពអាមេរិកនៅកាតា

លោកប្រធានាធិបតីអាមេរិក ដូណាល់ ត្រាំ (Donald Trump )បានប្រកាសថា អ៊ីស្រាអែល និងអ៊ីរ៉ង់បានយល់ព្រមលើបទឈប់បាញ់ពេញលេញ និងទាំងស្រុងភ្លាមៗ បន្ទាប់ពីអ៊ីរ៉ង់បានបើកការវាយប្រហារដោយមីស៊ីលមានកំណត់កាលពីថ្ងៃចន្ទ លើមូលដ្ឋានយោធាអាមេរិកក្នុងប្រទេសកាតា ជាការសងសឹកចំពោះការទម្លាក់គ្រាប់បែករបស់អាមេរិកទៅលើទីតាំងនុយក្លេអ៊ែររបស់ខ្លួន។លោក Trump បានបង្ហោះលើបណ្ដាញសង្គម Truth Social ថាបទឈប់បាញ់ជាដំណាក់កាលរយៈពេល ២៤ ម៉ោងនឹងចាប់ផ្តើមនៅប្រហែលពាក់កណ្តាលអធ្រាត្រថ្ងៃអង្គារម៉ោងក្នុងស្រុកដោយផ្តល់ឱ្យប្រទេសទាំងពីរនូវរយៈពេល៦ម៉ោងដើម្បីសម្រួលនិងបញ្ចប់បេសកកម្មចុងក្រោយរបស់ពួកគេ។ លោកបាននិយាយថាប្រការនេះ នឹងនាំមកនូវការបញ្ចប់ជាផ្លូវការចំពោះសង្រ្គាមរវាងប្រទេសទាំងពីរ។ យោធាអ៊ីស្រាអែលបានបដិសេធមិនធ្វើអត្ថាធិប្បាយលើសេចក្តីថ្លែងការណ៍របស់លោក Trump ហើយការិយាល័យរបស់នាយករដ្ឋមន្ត្រីអ៊ីស្រាអែល Benjamin Netanyahu ពុំបានឆ្លើយតបភ្លាមៗចំពោះសារដែលស្វែងរកការអត្ថាធិប្បាយនោះទេ ។អ៊ីរ៉ង់និយាយថាខ្លួននឹងយល់បទឈប់បាញ់ បើអ៊ីស្រាអែលបញ្ឈប់ការវាយប្រហារ។ ការវាយប្រហាររបស់អ៊ីរ៉ង់កាលពីថ្ងៃចន្ទសប្ដាហ៍នេះ បានបង្ហាញថាខ្លួនបានត្រៀមខ្លួនដើម្បីដកថយពីការបង្កើនភាពតានតឹងក្នុងតំបន់ដែលមានការប្រែប្រួល។ លោកប្រធានាធិបតី Donald Trump ដែលបានច្រានចោលការវាយប្រហារនេះថាជា "ការឆ្លើយតបខ្សោយខ្លាំង" បាននិយាយថា សហរដ្ឋអាមេរិកត្រូវបានព្រមានដោយអ៊ីរ៉ង់ជាមុន ហើយមិនមានអ្នកស្លាប់និងរបួសនោះទេ។កាតាបានថ្កោលទោសការវាយប្រហារលើមូលដ្ឋានទ័ពអាកាស Al Udeid ថាជាការរំលោភលើអធិបតេយ្យភាព ដែនអាកាស និងច្បាប់អន្តរជាតិរបស់ខ្លួន។ ប្រទេសកាតាបាននិយាយថា ខ្លួនបានស្ទាក់ចាប់បានមីស៊ីល១៨គ្រាប់ក្នុងចំណោម១៩គ្រាប់ ទោះគេមិនច្បាស់ថា មីស៊ីលមួយគ្រាប់នោះបានបង្កការខូចខាតអ្វីខ្លះក៏ដោយ៕

ស្របពេលតម្លៃមាសហក់ឡើងខ្ពស់ ហ្គាណាប្រើប្រាស់យានដ្រូនដើម្បីស្វែងរកកម្មករជីករ៉ែខុសច្បាប់

ដោយហោះសំកាំងលើអាកាសពីលើតំបន់ភាគនិរតីហ្គាណា យានដ្រូនបានក្លាយជាប្រព័ន្ធការពារថ្មីនៅក្នុងការប្រយុទ្ធប្រឆាំងរបស់អាហ្វ្រិកខាងលិចលើកម្មករជីករ៉ែមាសខុសច្បាប់ ។លោក Edwin Asare គឺជាប្រធានសេវាកម្មការពារតំបន់ជីករ៉ែមាស Tarkwa មានជំនឿថា វាបានក្លាយជាអ្នកផ្លាស់ប្តូរហ្គេមតាមរកមើលសកម្មភាពជីករ៉ែមាសខុសច្បាប់ នៅទូទាំងតំបន់មួយនេះ ។លោកបន្តថា យានដ្រូនគឺជាមធ្យោបាយលឿន ហើយគ្របដណ្តប់បានលឿន ។ ដូច្នេះហើយ អ្នកប្រើពេលតែប៉ុន្មាននាទីប៉ុណ្ណោះ បង្ហោះយានដ្រូនលើតំបន់ដីសម្បទានទាំងមូល ។ ប៉ុន្តែបើសិនជាអ្នកចង់ប្រើមធ្យោបាយកម្លាំង អ្នកត្រូវការប្រេងឥន្ធនៈ និងធនធានមនុស្ស ដើម្បីធ្វើដំណើរជុំវិញតំបន់រ៉ែមាសទាំងមូល ។ក្រុមមន្រ្តីប្រដាប់អាវុធ បានរកឃើញសម្ភារៈបោះបង់ចោលដោយក្រុមកម្មកររ៉ែខុសច្បាប់ ។នៅពេលមាសឡើងថ្លៃខ្លាំង សកម្មភាពខុសច្បាប់នៅតំបន់ជាយៗនៃតំបន់ជីករ៉ែមាសផ្លូវការរបស់អាហ្វ្រិកខាងលិច បានកើនឡើង ។ក្រុមប្រតិបត្តិ និងក្រុមជំនាញឧស្សាហកម្មរ៉ែដែលបានផ្តល់បទសម្ភាសន៍ជាមួយទីភ្នាក់ងារព័ត៌មានរ៉យទ័រ និយាយថា ការប្រឈមដាក់គ្នាស្លាប់មនុស្ស បានកើនឡើងរវាងក្រុមហ៊ុនដីសម្បទាន និងក្រុមកម្មករជីករ៉ែខុសច្បាប់ នៅអាហ្វ្រិកខាងលិច ៕

បណ្ដាញសង្គម

ព័ត៌មានថ្មីៗ

គណបក្សប្រជាជនកម្ពុជាជាកម្លាំងនយោបាយតែមួយគត់រួមសុខរួមទុក្ខជាមួយប្រជាជនគ្រប់កាលៈទេសៈ

ការសម្រេចបានជោគជ័យរបស់គណបក្សប្រជាជនកម្ពុជាជាង៤៦ឆ្នាំមកនេះអាស្រ័យមូលហេតុធំៗចំនួន៦

សម្ដេចតេជោអំពាវនាវជនរួមជាតិរួមសាមគ្គីគាំទ្រកងកម្លាំងប្រដាប់អាវុធដើម្បីពង្រឹងខឿនការពារជាតិ

ក្រសួងការងារ បើកកិច្ចប្រជុំជាមួយតំណាងអង្គការ ILO ផ្ដោតលើវឌ្ឍនភាពវិស័យការងារនៅកម្ពុជា

សហព័ន្ធស្រូវអង្ករកម្ពុជា៖ កញ្ចប់អង្ករដែលមានរូបភាពស្រដៀងទៅនឹងទង់ជាតិប្រទេសថៃ មិនត្រូវបានបោះពុម្ពក្នុងប្រទេសកម្ពុជាឡើយ

គណបក្សប្រជាជនកម្ពុជារាជធានីភ្នំពេញ ប្រកាសបញ្ចូលសមាជិកសមាជិកាគណបក្សប្រជាជនកម្ពុជា ៥៧៧នាក់ ដែលជាអតីតសកម្មជនមកពីគណបក្សប្រឆាំង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877