BTV NEWS

អាមេរិក និងអ៊ីរ៉ង់ បង្ហាញសញ្ញាកិច្ចព្រមព្រៀងសន្តិភាពជិតមកដល់ ទោះបីមានភាពខ្វែងគំនិតគ្នាលើលក្ខខណ្ឌមួយចំនួនក៏ដោយ

បុព្វជនអ៊ីរ៉ង់៖ អាមេរិក និងអ៊ីស្រាអែលយល់តែភាសាកម្លាំង មិនមែនការចរចានោះទេ

អ្នកជំនាញ៖ ផែនទីបង្ហាញផ្លូវបទឈប់បាញ់ហ្កាហ្សា រងការគំរាមកំហែង ខណៈអ៊ីស្រាអែលពង្រីកការគ្រប់គ្រង

ការផ្ទុះឡើងនៃជំងឺ Ebola រាលដាលដល់ជំរំភៀសខ្លួនមានមនុស្សកកកុញ នៅប្រទេសកុងហ្គោ

ព័ត៌មានអន្តរជាតិ

អ៊ីរ៉ង់និយាយថា សហរដ្ឋអាមេរិក គឺជាអ្នកទទួលខុសត្រូវចំពោះការបន្តអរិភាពជាមួយអ៊ីស្រាអែល

អ៊ីរ៉ង់បាននិយាយនៅថ្ងៃចន្ទនេះថា សហរដ្ឋអាមេរិកគឺជាអ្នកទទួលខុសត្រូវចំពោះការបន្តការប្រយុទ្ធជាមួយអ៊ីស្រាអែល ដោយនិយាយថា សកម្មភាពរបស់អ៊ីស្រាអែល «មិនអាចបំបែកចេញ» ពីគោលនយោបាយរបស់សហរដ្ឋអាមេរិកបានទេ។អ្នកនាំពាក្យក្រសួងការបរទេសលោក Esmaeil Baqaei បានថ្លែងនៅក្នុងសន្និសីទសារព័ត៌មានមួយនៅទីក្រុងតេអេរ៉ង់ដែលមានការចូលរួមពីទីភ្នាក់ងារសារព័ត៌មាន AFP ថា «ដោយគ្មានការសង្ស័យទេ ដូចដែលខ្ញុំបាននិយាយ សកម្មភាពរបស់របបជ្វីហ្វ នៅក្នុងតំបន់ មិនអាចបំបែកចេញពីគោលនយោបាយរបស់សហរដ្ឋអាមេរិកបានទេ»។លោកបានបន្ថែមថា៖«គ្មាននរណាម្នាក់ជឿថា របបជ្វីហ្វ នឹងអនុវត្តសកម្មភាពណាមួយ ដោយគ្មានការសម្របសម្រួល និងកិច្ចសហប្រតិបត្តិការជាមុនជាមួយសហរដ្ឋអាមេរិកនោះទេ»។លោក Baqaei បាននិយាយថា៖«នេះគឺជារឿងធម្មតាទេដែលដំណើរការការទូត ដែលបានចាប់ផ្តើម ដើម្បីបញ្ចប់សង្គ្រាមដែលដាក់ចេញនេះ នឹងរងផលប៉ះពាល់យ៉ាងខ្លាំង»៕

[UPDATE] ហ្វីលីពីនដកការព្រមាន អំពីរលកយក្សស៊ូណាមិ ខណៈអ្នកស្លាប់ដោយសាររញ្ជួយដី កើនឡើងដល់យ៉ាងតិច ១៩នាក់

រញ្ជួយដីកម្រិត ៧,៨រ៉ិចទ័រ បានកើតឡើងនៅឆ្នេរសមុទ្រកោះ Mindanao នៅភាគខាងត្បូងនៃប្រទេសហ្វីលីពីន នាព្រឹកថ្ងៃចន្ទ (ទី៨ ខែមិថុនា ឆ្នាំ២០២៦) នេះ ដោយបានបណ្ដាលឲ្យមនុស្សយ៉ាងហោចណាស់ ១៩នាក់សា្លប់ និងជាង ២០០នាក់ផ្សេងទៀតរងរបួស។ទីភ្នាក់ងាររញ្ជួយដីរបស់ប្រទេសហ្វីលីពីន ឥណ្ឌូនេស៊ី និងម៉ាឡេស៊ី បានចេញការព្រមានអំពីរលកយក្សស៊ូណាមិ ដោយណែនាំប្រជាជនរស់នៅតាមបណ្តោយឆ្នេរសមុទ្រឲ្យជម្លៀសទៅកាន់តំបន់ខ្ពស់ៗ ឬធ្វើដំណើរទៅកាន់ដីគោក។ បន្ទាប់មក នៅថ្ងៃចន្ទដដែលនេះ ប្រទេសទាំង ៣ បានដកការព្រមាននោះ។ការខូចខាតដោយសាររលកយក្សស៊ូណាមិ ត្រូវបានរាយការណ៍នៅក្នុងភូមិយ៉ាងហោចណាស់មួយ បន្ទាប់ពីរញ្ជួយដីនេះ បានធ្វើឲ្យមានរលកកម្ពស់ ១ម៉ែត្រ ចូលទៅក្នុងតំបន់ឆ្នេរសមុទ្រក្បែរនោះ។ប្រធានាធិបតីហ្វីលីពីន លោក Ferdinand Marcos Jr. បាននិយាយថា អាជ្ញាធរកំពុងធ្វើចាត់វិធានការយ៉ាងឆាប់រហ័ស ដើម្បីឆ្លើយតបនឹងគ្រោះមហន្តរាយ។ លោក Marcos បានលើកឡើងនៅក្នុងសេចក្តីថ្លែងការណ៍មួយថា៖ «រដ្ឋាភិបាលជាតិកំពុងចាត់វិធានការយ៉ាងឆាប់រហ័ស ហើយយើងនឹងមិនទុកកោះ Mindanao ចោលទេ»។យោងតាមមន្ត្រីមកពីទីភ្នាក់ងារគ្រោះមហន្តរាយ ចំនួនអ្នកស្លាប់ដោយសារគ្រោះរញ្ជួយដី បានកើនឡើងដល់យ៉ាងហោចណាស់ ១៩នាក់ នៅក្នុងប្រទេសហ្វីលីពីន ខណៈដែលមនុស្សជាង ២០០នាក់ បានរងរបួស។ អ្នកនាំពាក្យការិយាល័យការពារជនស៊ីវិលហ្វីលីពីន លោក Junie Castillo បានឲ្យដឹងថា រហូតមកដល់ពេលនេះ មានមនុស្សស្លាប់ចំនួន ១៩នាក់ ត្រូវបានបញ្ជាក់។ ហើយលោកបានបន្ថែមថា ១២នាក់នៅតែបាត់ខ្លួន។General Santos ជាទីក្រុងកំពង់ផែមួយនៅភាគខាងត្បូងនៃកោះ Mindanao ដែលមានប្រជាជនជាង ៧០០.០០០នាក់ និងជាមជ្ឈមណ្ឌលសម្រាប់ការនាំចេញត្រីធូណា និងពាណិជ្ជកម្មផ្សេងទៀត គឺជាតំបន់ដែលរងផលប៉ះពាល់ខ្លាំងបំផុតដោយសារគ្រោះរញ្ជួយដីនេះ៕

លោក ស៊ី ត្រូវបានស្វាគមន៍យ៉ាងកក់ក្តៅ នៅកូរ៉េខាងជើង ខណៈលោក គីម កំណត់បន្ទាត់ក្រហមនុយក្លេអ៊ែរ

ប្រធានាធិបតីចិន លោក ស៊ី ជីនពីង (Xi Jinping) ត្រូវបានស្វាគមន៍យ៉ាងកក់ក្តៅ នៅពេលទៅដល់កូរ៉េខាងជើង ដោយចាប់ផ្តើមដំណើរទស្សនកិច្ចមួយ ដែលមានគោលបំណងបញ្ជាក់ពីឥទ្ធិពលរបស់ទីក្រុងប៉េកាំង លើប្រទេសជិតខាងដែលមិនញញើតក្នុងការពង្រីកឃ្លាំងអាវុធនុយក្លេអ៊ែរ និងមានសម្ព័ន្ធភាពកាន់តែស៊ីជម្រៅជាមួយរុស្ស៊ី។ទីភ្នាក់ងារសារព័ត៌មានផ្លូវការ Xinhua បានរាយការណ៍ថា មេដឹកនាំកូរ៉េខាងជើង លោក គីម ជុងអ៊ុន (Kim Jong Un) និងភរិយារបស់លោក គឺលោកស្រី រី សូលជូ (Ri Sol Ju) បានស្វាគមន៍លោក ស៊ី ដោយផ្ទាល់ នៅពេលដែលលោកបានទៅដល់ទីក្រុងព្យុងយ៉ាង នៅថ្ងៃចន្ទ (ទី៨ ខែមិថុនា ឆ្នាំ២០២៦) នេះ។ បន្ទាប់មក មេដឹកនាំទាំង២ បានបន្តដំណើរទៅកាន់ទីលានគីម អ៊ីលស៊ុង (Kim Il Sung) សម្រាប់ពិធីស្វាគមន៍ជាផ្លូវការ ដែលមានការបាញ់កាំភ្លើងធំគំនាប់ចំនួន ២១ណាត់ និងបដា ២ភាសា ដែលប្រកាសពីមិត្តភាព «មិនអាចបំបែកបាន»។ដំណើរទស្សនកិច្ចរយៈពេល ២ថ្ងៃនេះ គឺជាដំណើរទស្សនកិច្ចលើកដំបូងរបស់មេដឹកនាំចិនទៅកាន់ប្រទេសជិតខាងរបស់ខ្លួន ក្នុងរយៈពេល ៧ឆ្នាំ ហើយកើតឡើងប៉ុន្មានសប្តាហ៍បន្ទាប់ពីលោកបានទទួលប្រធានាធិបតីអាមេរិក លោក Donald Trump និងមេដឹកនាំរុស្ស៊ី លោក Vladimir Putin នៅទីក្រុងប៉េកាំង សម្រាប់កិច្ចប្រជុំកម្រិតខ្ពស់ជាបន្តបន្ទាប់។ទិដ្ឋភាពនេះ នឹងបង្ហាញពីអំណះអំណាងរបស់លោក ដែលថា ប្រទេសចិនបម្រើជាកម្លាំងស្ថិរភាពដែលមានសមត្ថភាពចូលរួមជាមួយគ្រប់ភាគីទាំងអស់ នៅពេលដែលការបែកបាក់ខាងភូមិសាស្ត្រនយោបាយ កំពុងមានកាន់តែធំឡើងៗ នៅទូទាំងពិភពលោក។ ផ្ទុយទៅវិញ លោក Trump បានធ្វើឲ្យសម្ព័ន្ធមិត្តឃ្លាតឆ្ងាយ និងធ្វើឲ្យទីផ្សារពិភពលោកមានភាពច្របូកច្របល់ជាមួយនឹងសង្គ្រាមរបស់លោកលើអ៊ីរ៉ង់ និងដោយសារការបង្កើនរបាំងពាណិជ្ជកម្ម។មួយថ្ងៃមុនដំណើរទស្សនកិច្ចរបស់លោក ស៊ី ប្អូនស្រីរបស់លោក គីម គឺលោកស្រី គីម យ៉ូជុង (Kim Yo Jong) បាននិយាយថា កម្មវិធីអាវុធបរមាណូរបស់ប្រទេសនេះ គឺ «មិនអាចចរចាបានឡើយ» ហើយថា «មន្ត្រីនៅសហរដ្ឋអាមេរិក នៅតែមិនភ្ញាក់ពីសុបិន និងភាពហួសសម័យរបស់ពួកគេ» ដោយផ្ញើសារច្បាស់លាស់ អំពីខ្សែបន្ទាត់ក្រហមរបស់កូរ៉េខាងជើង ស្តីពីការរំសាយអាវុធនុយក្លេអ៊ែរ៕

ប្រធានាធិបតីបញ្ជាក់ជាថ្មីពីវិធីសាស្រ្តតាមដំណាក់កាលឆ្ពោះទៅលុបបំបាត់អាវុធនុយក្លេអ៊ែររបស់កូរ៉េខាងជើង

លោកប្រធានាធិបតី Lee Jae Myung នៅថ្ងៃចន្ទ (ទី៨ ខែមិថុនា ឆ្នាំ២០២៦) នេះ បានអំពាវនាវឲ្យមានវិធីសាស្រ្តជាជំហានៗ ចំពោះការលុបបំបាត់អាវុធនុយក្លេអ៊ែររបស់កូរ៉េខាងជើង ខណៈពេលដែលលោកបាននិយាយថា កូរ៉េខាងត្បូងគួរតែបន្តការសន្ទនាជាមួយទីក្រុងព្យុងយ៉ាង ទោះបីជាទំនាក់ទំនងអន្តរកូរ៉េស្ថិតក្នុងភាពតានតឹងខ្លាំងក៏ដោយ។អំឡុងពេលថ្លែងនៅឯវិមាន Cheong Wa Dae សម្រាប់សន្និសីទសារព័ត៌មានដែលប្រារព្ធខួបមួយឆ្នាំនៃការចូលកាន់តំណែងរបស់លោក លោក Lee បាននិយាយថា ការលុបបំបាត់អាវុធនុយក្លេអ៊ែរទាំងស្រុង នៅតែជាគោលដៅចុងក្រោយ ប៉ុន្តែបានលើកឡើងថា ការចរចាគួរតែផ្តោតលើការបញ្ឈប់ការផលិតសម្ភារៈនុយក្លេអ៊ែរបន្ថែមជាមុនសិន ការពារការផ្ទេររបស់ពួកគេទៅក្រៅប្រទេស និងបញ្ឈប់ការអភិវឌ្ឍបន្ថែមទៀតនៃបច្ចេកវិទ្យាមីស៊ីលបាលីស្ទិក។ លោកបាននិយាយថា ការកំណត់គោលដៅរយៈពេលខ្លី មធ្យម និងរយៈពេលវែង គឺជាវិធីសាស្រ្តប្រាកដនិយម ជាជាងការទទូចឲ្យលុបបំបាត់អាវុធនុយក្លេអ៊ែរភ្លាមៗ។អមដោយការបន្ថែមថា លោកបានពិភាក្សាអំពីគំនិតនេះជាមួយប្រធានាធិបតីសហរដ្ឋអាមេរិក លោក Donald Trump ជាច្រើនដង លោក Lee បានបញ្ជាក់ថា៖ «ប្រសិនបើនរណាម្នាក់និយាយថា នេះមានន័យថា បោះបង់ចោលការលុបបំបាត់អាវុធនុយក្លេអ៊ែរ នោះគ្រាន់តែជាការមិនអើពើនឹងស្ថានភាពជាក់ស្ដែង និងធ្វើឲ្យស្ថានភាពកាន់តែអាក្រក់ទៅៗប៉ុណ្ណោះ»។ជាមួយគ្នានេះ លោក Lee បានពិពណ៌នាអំពីទំនាក់ទំនងអន្តរកូរ៉េថា បានធ្លាក់ចុះដល់ចំណុចដែល «ស្ទើរតែមិនអាចបណ្ដោយឲ្យកាន់តែអាក្រក់ទៅៗ» បានទៀតឡើយ។លោកបានសង្កត់ធ្ងន់ថា ទីក្រុងសេអ៊ូលនៅតែប្តេជ្ញាចិត្ត ចំពោះការសន្ទនា កិច្ចសហប្រតិបត្តិការ និងការរួមរស់ជាមួយទីក្រុងព្យុងយ៉ាង ដោយអះអាងថា ការគោរពគ្នាទៅវិញទៅមក គឺមានសារៈសំខាន់ណាស់ក្នុងការកែលម្អទំនាក់ទំនង៕

OPEC+ នឹងជំរុញការផលិតប្រេង ខណៈបទឈប់បាញ់ នៅអ៊ីរ៉ង់ នៅតែសម្រេចមិនទាន់បាន

ក្រុមប្រទេសផលិតប្រេងដែលមានឥទ្ធិពល ដែលគេស្គាល់ថា ជា OPEC+ កាលពីថ្ងៃអាទិត្យ (ទី៧ ខែមិថុនា ឆ្នាំ២០២៦) បានយល់ព្រមបង្កើនការផលិតចំនួន ១៨៨.០០០បារ៉ែល ក្នុងមួយថ្ងៃ នៅក្នុងខែកក្កដា ខណៈដែលសហរដ្ឋអាមេរិក និងអ៊ីរ៉ង់ ពិបាកឈានដល់កិច្ចព្រមព្រៀងមួយ ដើម្បីបញ្ចប់សង្គ្រាម និងបើកច្រកសមុទ្រ Hormuz ឡើងវិញទាំងស្រុង។ចំណាត់ការនេះ គឺជាការសន្យាចុងក្រោយបំផុត ក្នុងរយៈពេលប៉ុន្មានខែថ្មីៗនេះ ដោយក្រុមនេះ ដើម្បីបង្កើនទិន្នផល។ តាមធម្មតា ការបង្កើនដោយក្រុមប្រទេសរបស់ប្លុក OPEC+ នឹងជួយជំរុញឲ្យតម្លៃប្រេងធ្លាក់ចុះ។ ប៉ុន្តែការបិទច្រកសមុទ្រប្រកបដោយប្រសិទ្ធភាព បានធ្វើឲ្យការផ្គត់ផ្គង់ប្រេងប្រចាំថ្ងៃរបស់ពិភពលោកភាគច្រើនជាប់គាំង ដែលធ្វើឲ្យការបង្កើនការផលិតនេះភាគច្រើនជានិមិត្តរូប។សម្ព័ន្ធប្រទេសផលិតប្រេងនេះ បានឲ្យដឹងនៅក្នុងសេចក្តីថ្លែងការណ៍មួយថា «ប្រទេសនានានឹងបន្តតាមដាន និងវាយតម្លៃស្ថានភាពទីផ្សារយ៉ាងដិតដល់» ហើយបានកត់សម្គាល់ពី «សារៈសំខាន់នៃការអនុម័តវិធីសាស្រ្តប្រុងប្រយ័ត្ន»។ការសម្រេចនេះបានធ្វើឡើងបន្ទាប់ពីមានកិច្ចប្រជុំមួយ ដែលធ្វើឡើងពីចម្ងាយ ដោយក្រុមប្រទេស OPEC+ ដែលរួមមានអាល់ហ្សេរី អ៊ីរ៉ាក់ កាហ្សាក់ស្ថាន គុយវ៉ែត អូម៉ង់ រុស្ស៊ី និងអារ៉ាប៊ីសាអ៊ូឌីត៕

កងទ័ពអ៊ីស្រាអែល៖ អ៊ីរ៉ង់បានប្រព្រឹត្តនូវ «កំហុសធ្ងន់ធ្ងរ» ដោយការបាញ់មីស៊ីលជាបន្តបន្ទាប់

កាលពីថ្ងៃអាទិត្យ (ទី៧ ខែមិថុនា ឆ្នាំ២០២៦) អ៊ីស្រាអែលបានចោទប្រកាន់ទីក្រុងតេអេរ៉ង់ថា បានប្រព្រឹត្តនូវ «កំហុសធ្ងន់ធ្ងរ» បន្ទាប់ពីរាយការណ៍ថា ខ្លួនបានរងការបាញ់មីស៊ីលជាច្រើនលើកច្រើនសារ ពីអ៊ីរ៉ង់ ដែលជាការវាយប្រហារលើកដំបូង ចាប់តាំងពីបទឈប់បាញ់ត្រូវបានប្រកាសនៅថ្ងៃទី៨ ខែមេសា សម្រាប់សង្គ្រាមមជ្ឈិមបូព៌ា។យោងតាមយោធា បានឲ្យដឹងថា សំឡេងស៊ីរ៉ែនព្រមានពីការវាយប្រហារតាមអាកាស បានបន្លឺឡើងនៅទូទាំងតំបន់ធំៗនៃភាគខាងជើង និងភាគកណ្តាលអ៊ីស្រាអែល ក្នុងនោះរួមទាំងទីក្រុង Haifa, Caesarea និង Hadera ផងដែរ។ យោធាបានឲ្យដឹងថា ក្រោយមក មេបញ្ជាការយោធាអ៊ីស្រាអែល លោកឧត្តមសេនីយ៍ឯក Eyal Zamir បានប្ដេជ្ញាថា យោធានឹង «វាយប្រហារសត្រូវដោយកម្លាំងភ្លាមៗ នៅពេលដែលមានការអនុញ្ញាត»។ នៅក្នុងសេចក្តីថ្លែងការណ៍ជាបន្តបន្ទាប់ដែលត្រូវចេញផ្សាយក្នុងរយៈពេលដ៏ខ្លី យោធាបានឲ្យដឹងថា ខ្លួនបានប្រទះឃើញមីស៊ីលដែលបាញ់ចេញពីអ៊ីរ៉ង់ ហើយមីស៊ីលទាំងអស់ត្រូវបានស្ទាក់ចាប់។ ដោយបានឆ្លើយតបទៅនឹងសំណើសុំព័ត៌មានលម្អិត យោធាបានបញ្ជាក់ថា មីស៊ីលសរុបចំនួន ១១គ្រាប់ ត្រូវបានបាញ់ចេញពីអ៊ីរ៉ង់។យ៉ាងណាក្ដី សេវាសង្គ្រោះបន្ទាន់របស់អ៊ីស្រាអែល Magen David Adom បានឲ្យដឹងថា មិនមានរបាយការណ៍ អំពីអ្នកស្លាប់ និងរបួសដោយសារមីស៊ីលនេះនៅឡើយទេ ប៉ុន្តែមនុស្សមួយចំនួន បានរងរបួស ខណៈពេលកំពុងប្រញាប់ប្រញាល់រត់ទៅកាន់ទីជម្រកសុវត្ថិភាព។ចំណែកទីក្រុងតេអេរ៉ង់បានប្រាប់ថា ការបាញ់មីស៊ីលទាំងនេះ ត្រូវបានធ្វើឡើងទុកជា «ការព្រមាន» បន្ទាប់ពីការវាយប្រហារតាមអាកាសរបស់អ៊ីស្រាអែលលើតំបន់ជាយក្រុងភាគខាងត្បូងនៃទីក្រុងបេរូត កាលពីព្រឹកព្រលឹមថ្ងៃនោះ ដោយបន្ថែមថា ការឈ្លានពានបន្ថែមទៀត នឹងត្រូវបានឆ្លើយតបជាមួយនឹងការឆ្លើយតប «កាន់តែទូលំទូលាយ» ប្រឆាំងនឹងគោលដៅទាំងអស់របស់សហរដ្ឋអាមេរិក-អ៊ីស្រាអែលនៅក្នុងតំបន់៕

ភាពចលាចលក្នុងពេលគ្រោះរញ្ជួយដីកម្រិត៧,៨រ៉ិចទ័រ ដែលបណ្ដាលឲ្យដំបូលសាលារៀនមួយដួលរលំ នៅហ្វីលីពីន

ដំបូលសាលារៀនបឋមសិក្សាមួយ បានដួលរលំ ក្នុងប្រទេសហ្វីលីពីន នៅថ្ងៃចន្ទ (ទី ៨ ខែមិថុនា) បន្ទាប់ពីមានការរញ្ជួយដីកម្រិ ៧,៨រ៉ិចទ័រ បានវាយប្រហារកោះភាគខាងត្បូង។ រូបភាពវីដេអូពីសាលាបឋមសិក្សា Mahayahay នៅក្នុងទីក្រុង Digos បានបង្ហាញឲ្យឃើញថា សិស្សានុសិស្ស កំពុងមានភាពជ្រួលច្របល់ ក្នុងអំឡុងពេលមានការរញ្ជួយដីដ៏ខ្លាំងក្លា មុនពេលរចនា សម្ព័ន្ធដំបូល បានដួលរលំ ដោយបុគ្គលិកកំពុងជួយធ្វើឲ្យមានភាពស្ងប់ស្ងាត់ និងជម្លៀសកុមារទៅរកទីសុវត្ថិភាព។ទីភ្នាក់ងារសារព័ត៌មានរ៉យទ័ព អាចបញ្ជាក់ទីតាំងពីដំបូល ជណ្តើរ ធុងស្តុកទឹក និងប្លង់សាលារៀនដែលត្រូវគ្នា នឹងឯកសារ និងរូបភាពផ្កាយរណប។ កាលបរិច្ឆេទ ត្រូវបានផ្ទៀងផ្ទាត់ដោយមន្ត្រីមូលដ្ឋាន។ការិយាល័យការពារជនស៊ីវិលរបស់ប្រទេសហ្វីលីពីន បានរាយការណ៍ថា មានអ្នកស្លាប់យ៉ាងហោចណាស់៨ នាក់ បន្ទាប់ពីរញ្ជួយដីនេះ បានកើតឡើង។ ការិយាល័យនេះ បានបន្ថែមថា ចំនួនអ្នកស្លាប់ នៅត្រូវរង់ចាំការផ្ទៀងផ្ទាត់។ ការព្រមានអំពីរលកយក្សស៊ូណាមិ ត្រូវបានចេញនៅក្នុងប្រទេសហ្វីលីពីន និងប្រទេសជិតខាងឥណ្ឌូនេស៊ី ដោយប្រព័ន្ធព្រមានរលកយក្សស៊ូណាមិរបស់សហរដ្ឋអាមេរិក ចំណែកប្រជាជននៅតំបន់ឆ្នេរសមុទ្រ ត្រូវបានព្រមានឲ្យផ្លាស់ទៅកាន់កន្លែងខ្ពស់ៗ៕

លោក Trump៖ លោកនឹងមិនបញ្ចេញទ្រព្យសកម្មរបស់អ៊ីរ៉ង់មុនពេលកិច្ចព្រមព្រៀងបទឈប់បាញ់ឈានដល់ឡើយ

ប្រធានាធិបតីសហរដ្ឋអាមេរិក លោក Donald Trump បាននិយាយថា លោកនឹងមិនបញ្ចេញទ្រព្យសកម្មរបស់អ៊ីរ៉ង់រាប់ពាន់លានដុល្លារនៅមុនពេលកិច្ចព្រមព្រៀងបទឈប់បាញ់យូរអង្វែងដែលត្រូវឈានដល់ដើម្បីបញ្ចប់សង្គ្រាមអាមេរិក-អ៊ីស្រាអែលជាមួយអ៊ីរ៉ង់ជាផ្លូវការនោះទេ។ លោក Trump បានថ្លែងបែបនេះនៅក្នុងបទសម្ភាសន៍មួយក្នុងកម្មវិធី Meet the Press របស់ទូរទស្សន៍ NBC News ដែលបានចេញផ្សាយកាលពីថ្ងៃអាទិត្យ ដោយបញ្ជាក់ពីការប្រឈមមុខដាក់គ្នាខ្លាំងក្លាជុំវិញមូលនិធិដែលត្រូវបានបង្កក។ប្រធានាធិបតីសហរដ្ឋអាមេរិកបាននិយាយថា ការបញ្ចេញទ្រព្យសកម្មរបស់អ៊ីរ៉ង់ណាមួយ កើតឡើងបន្ទាប់ពីកិច្ចព្រមព្រៀងមួយត្រូវបានឈានដល់។ លោកនិយាយថា ប្រសិនបើពួកគេមានឥរិយាបថល្អ បើពួកគេធ្វើការងារបានល្អ នោះយើងចាប់ផ្តើមចរចា។ មន្ត្រីអ៊ីរ៉ង់បានបង្ហាញដដែលៗថា កិច្ចព្រមព្រៀងណាមួយអាចអាស្រ័យលើការបញ្ចេញទ្រព្យសកម្មរបស់ទីក្រុងតេអេរ៉ង់យ៉ាងហោចណាស់ដោយផ្នែក ដោយលើកឡើងពីការមិនទុកចិត្តយ៉ាងទូលំទូលាយចំពោះការចរចារបស់សហរដ្ឋអាមេរិក។សហរដ្ឋអាមេរិក បានបើកប្រតិបត្តិការយោធាពីរលើកប្រឆាំងនឹងអ៊ីរ៉ង់ ក្នុងអំឡុងពេលនៃការចរចាដែលកំពុងបន្តលើកម្មវិធីនុយក្លេអ៊ែររបស់ខ្លួន ជាការពិតដែលអ្នកវិភាគជាច្រើននិយាយថា បានធ្វើឱ្យមន្ត្រីអ៊ីរ៉ង់មានការប្រុងប្រយ័ត្ននៅក្នុងកិច្ចចរចាបទឈប់បាញ់ដែលកំពុងបន្ត។ លោក Trump បាននិយាយជាច្រើនសប្តាហ៍មកហើយថា ការទម្លាយភាពទាល់ច្រកអាចធ្វើទៅបាន ទោះបីជាមានសញ្ញាតិចតួចនៃការផ្លាស់ប្តូរសំខាន់ៗលើបញ្ហាសំខាន់ៗ រួមមានការគ្រប់គ្រងនាពេលអនាគតនៅច្រកសមុទ្រ Hormuz កម្មវិធីនុយក្លេអ៊ែររបស់អ៊ីរ៉ង់ និងទ្រព្យសកម្មដែលត្រូវបានបង្កក។

លោក Trump៖ ការវាយប្រហារថ្មីរបស់អ៊ីស្រាអែល និងអ៊ីរ៉ង់ នឹងមិនប៉ះពាល់កិច្ចព្រមព្រៀងសន្តិភាពទេ

ប្រទេសអ៊ីស្រាអែលបានឲ្យដឹងថា ខ្លួនបានវាយប្រហារគោលដៅយោធា នៅភាគខាងលិច និងភាគកណ្តាលរបស់អ៊ីរ៉ង់ នាថ្ងៃចន្ទ (ទី៨ ខែមិថុនា ឆ្នាំ២០២៦) នេះ ដោយប្រតិបត្តិការនេះនៅតែកើតឡើង បើទោះជាប្រធានាធិបតីអាមេរិក លោក Donald Trump ត្រូវបានគេរាយការណ៍ថា បានប្រាប់នាយករដ្ឋមន្ត្រីអ៊ីស្រាអែល លោក Benjamin Netanyahu ឲ្យចៀសវាងការវាយប្រហារបន្ថែមទៀតក៏ដោយ។កាលពីថ្ងៃទី៧ ខែមិថុនា លោក Trump បាននិយាយថា ការវាយប្រហារថ្មីដោយអ៊ីស្រាអែល និងអ៊ីរ៉ង់ នឹងមិនប៉ះពាល់ដល់កិច្ចចរចាសន្តិភាពរបស់រដ្ឋបាលលោកជាមួយទីក្រុងតេអេរ៉ង់ទេ ដោយបន្ថែមថា លោក Netanyahu «មិនមែនអ្នកសម្រេចចិត្ត» នោះទេ។លោក Trump បានជំរុញយ៉ាងខ្លាំងឲ្យអ៊ីស្រាអែលបញ្ឈប់ការវាយប្រហាររបស់ខ្លួន នៅក្នុងប្រទេសលីបង់ ដែលអាចបើកឱកាសឲ្យមានកិច្ចព្រមព្រៀងមួយ ដើម្បីបញ្ចប់សង្គ្រាមកាន់តែទូលំទូលាយជាមួយអ៊ីរ៉ង់ ដោយក្នុងនោះរួមមានទាំងការស្តីបន្ទោស ចំពោះលោក Netanyahu ជាមួយពាក្យសម្ដីអសុរោះ អំឡុងការជជែកតាមទូរស័ព្ទ កាលពីសប្តាហ៍មុនផងដែរ។តែអ៊ីស្រាអែល កាលពីថ្ងៃទី៧ ខែមិថុនា បានចាប់ផ្តើមការវាយប្រហារនៅក្នុងតំបន់បេរូតជាលើកដំបូង ចាប់តាំងពីសហរដ្ឋអាមេរិក បានប្រកាសពីផែនការឈប់បាញ់ សម្រាប់ប្រទេសលីបង់កាលពីសប្តាហ៍មុន។ អ៊ីរ៉ង់បានបាញ់មីស៊ីលជាច្រើនគ្រាប់ទៅលើគោលដៅអ៊ីស្រាអែល ដើម្បីសងសឹក ដែលធ្វើឲ្យកិច្ចចរចាសន្តិភាពរវាងសហរដ្ឋអាមេរិក និងអ៊ីរ៉ង់ស្ថិតក្នុងហានិភ័យ។យ៉ាងណាក្ដី លោក Trump បានទទូចថា កិច្ចព្រមព្រៀងមួយ ដើម្បីបញ្ចប់សង្គ្រាមកាន់តែទូលំទូលាយនៅតែអាចនឹងកើតមាន។ លោក Trump បានប្រាប់សារព័ត៌មាន Financial Times ថា៖ «វា (ការវាយប្រហារ) នឹងមិនមានផលប៉ះពាល់អ្វីដល់កិច្ចព្រមព្រៀងនោះទេ។ ខ្ញុំជាអ្នកសម្រេចចិត្ត។ ខ្ញុំជាអ្នកសម្រេចចិត្តទាំងអស់។ គាត់ (លោក Netanyahu) មិនជាអ្នកសម្រេចចិត្តនោះទេ»៕

លោក XI សាទរចំពោះ «ការចាប់ផ្តើមថ្មី»ក្នុងទំនាក់ទំនងជាមួយកូរ៉េខាងជើង នៅមុនកិច្ចប្រជុំកំពូល

លោក ប្រធានាធិបតី ស៊ី ជីនពីង បាននិយាយនៅពីថ្ងៃចន្ទ (ទី៨ ខែមិថុនា)នេះ នៅក្នុងការអត្ថាធិប្បាយមួយ ដែលបានចេញផ្សាយនៅក្នុងប្រព័ន្ធផ្សព្វផ្សាយរដ្ឋរបស់ប្រទេសជិតខាងនេះ មុនពេលលោកទៅដល់ទីក្រុងព្យុងយ៉ាងសម្រាប់កិច្ចប្រជុំកំពូលដ៏កម្រមួយជាមួយលោកមេដឹកនាំ គីម ជុងអ៊ុន ថា ទំនាក់ទំនងរវាងប្រទេសចិន និងកូរ៉េខាងជើង កំពុងស្ថិតនៅ «ចំណុចចាប់ផ្តើមប្រវត្តិសាស្ត្រថ្មី»។ លោក ស៊ី បាននិយាយនៅក្នុងកាសែត Rodong Sinmun មុនពេលដំណើរទស្សនកិច្ចមួយ ដែលត្រូវបានគេមើលឃើញថា មានសារៈសំខាន់ ពីព្រោះវាជាដំណើរទស្សនកិច្ចអន្តរជាតិលើកដំបូងរបស់លោកនៅឆ្នាំនេះថា គោលនយោបាយដ៏រឹងមាំរបស់ចិន គឺការអភិវឌ្ឍទំនាក់ទំនងជាមួយកូរ៉េខាងជើង ហើយប្រទេសទាំងពីរ នឹងពង្រឹងការផ្លាស់ប្តូរទស្សនៈគ្នាលើគ្រប់វិស័យ។ លោក ស៊ី បានបន្ថែមថា៖«យើងត្រូវតែប្រឆាំងនឹងអនុត្តរភាព អំណាចផ្តាច់ការ និងការប៉ុនប៉ង និងការសមគំនិតគ្នាទាំងអស់ ដើម្បីស្តារឡើងវិញនូវលទ្ធិយោធានិយម ដែលបង្កគ្រោះថ្នាក់ដល់សន្តិសុខ និងស្ថិរភាពក្នុងតំបន់»។លោក ស៊ី ត្រូវបានគេរំពឹងថា នឹងធ្វើការពិភាក្សាជាមួយលោក គីម ក្នុងដំណើរទស្សនកិច្ចរយៈពេលពីរថ្ងៃ ដែលជាដំណើរទស្សនកិច្ចលើកដំបូងរបស់លោក ក្នុងរយៈពេល ៧ឆ្នាំ ទៅកាន់ប្រទេសជិតខាងរបស់ចិន នៅពេលដែលសេដ្ឋកិច្ចរបស់ខ្លួន ដែលត្រូវបានពង្រឹងដោយទំនាក់ទំនងពាណិជ្ជកម្ម និងយោធាកាន់តែកើនឡើងជាមួយប្រទេសរុស្ស៊ី អាចជំរុញទំនុកចិត្តរបស់លោក គីម ក្នុងកិច្ចពិភាក្សានេះ៕

បណ្ដាញសង្គម

ព័ត៌មានថ្មីៗ

រយៈពេល១០ថ្ងៃ ជនបរទេស ២,២៧៨នាក់ មាន២៨សញ្ជាតិខុសច្បាប់ ត្រូវបានបណ្ដេញចេញពីកម្ពុជា

ការប្រឡងប្រជែងជ្រើសរើសមន្ត្រីរាជការ ឱ្យចូលបម្រើការងារក្នុងក្របខ័ណ្ឌរដ្ឋលេខាធិការដ្ឋានកិច្ចការព្រំដែន វិញ្ញាសាសួរផ្ទាល់មាត់ចាប់ផ្តើមនៅព្រឹកនេះ

នាយករដ្ឋមន្រ្តីអ៊ីតាលីលោកស្រី Giorgia Meloni ជួបប្រធានាធិបតិកូរ៉េខាងត្បូងនៅទីក្រុងរ៉ូម

អ្នកនយោបាយ៖ ហេសបូឡាជឿជាក់ថា កិច្ចព្រមព្រៀង រវាងអាមេរិក និងអ៊ីរ៉ង់ នឹងរួមបញ្ចូលលីបង់

អគ្គិភ័យបានឆាបឆេះអាកាសយានដ្ឋាន Wellington របស់ប្រទេសណូវែលសេឡង់

ណាតូ៖ ការកាត់បន្ថយតួនាទីយោធារបស់អាមេរិក នៅអឺរ៉ុប នឹងពង្រឹងសម្ព័ន្ធភាពក្នុងរយៈពេលវែង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានអន្តរជាតិ

អ៊ីរ៉ង់និយាយថា សហរដ្ឋអាមេរិក គឺជាអ្នកទទួលខុសត្រូវចំពោះការបន្តអរិភាពជាមួយអ៊ីស្រាអែល

លោក ស៊ី ត្រូវបាន​ស្វាគមន៍យ៉ាងកក់ក្តៅ នៅ​កូរ៉េខាងជើង ខណៈលោក គីម កំណត់​បន្ទាត់​ក្រហមនុយក្លេអ៊ែរ

ប្រធានាធិបតីបញ្ជាក់ជាថ្មីពីវិធីសាស្រ្តតាម​ដំណាក់កាលឆ្ពោះទៅលុប​បំបាត់អាវុធនុយក្លេអ៊ែររបស់កូរ៉េខាងជើង

OPEC+ នឹងជំរុញការផលិតប្រេង ខណៈបទឈប់បាញ់ នៅអ៊ីរ៉ង់ នៅតែសម្រេចមិន​ទាន់​បាន​​

កងទ័ពអ៊ីស្រាអែល៖ អ៊ីរ៉ង់បានប្រព្រឹត្តនូវ​ «កំហុសធ្ងន់ធ្ងរ» ដោយការបាញ់មីស៊ីលជាបន្ត​បន្ទាប់​