BTV NEWS

មន្ត្រី៖ ក្រុមហ៊ុនអាកាសចរណ៍អន្តរជាតិប៉ាគីស្ថាន(PIA) នឹងត្រូវគ្រប់គ្រងដោយម្ចាស់ថ្មីចាប់ពីខែមេសា

មនុស្ស២នាក់រងរបួស បន្ទាប់ពីភ្នាក់ងារICE បាញ់ទៅលើរថយន្តនៅរដ្ឋMaryland អំឡុងពេលបង្ក្រាប

ហ្ស៊កដានី បើកការវាយប្រហារតាមអាកាសលើបណ្តាញគ្រឿងញៀនដែលសង្ស័យតាមព្រំដែនស៊ីរី

អ្នកជំនាញ UN រិះគន់ការឃុំខ្លួនភរិយារបស់អតីតនាយករដ្ឋមន្ត្រីប៉ាគីស្ថាន លោក KHAN

ព័ត៌មានអន្តរជាតិ

UN៖ ជនស៊ីវិលជាង ១.០០០នាក់ ត្រូវបានសម្លាប់នៅ Darfur របស់ស៊ូដង់ កាលក្រុមទាហានប៉ារ៉ា គ្រប់គ្រងជំរំ

បើយោងតាមរបាយការណ៍របស់ការិយាល័យសិទ្ធិមនុស្សអង្គការសហប្រជាជាតិ (UN) បានឲ្យដឹងនៅថ្ងៃព្រហស្បតិ៍ (ទី១៨ ខែធ្នូ) នេះថា ជនស៊ីវិលជាង ១.០០០នាក់ ត្រូវបានសម្លាប់ នៅពេលដែលក្រុមទាហានប៉ារ៉ាស៊ូដង់ បានចូលកាន់កាប់ជំរំជនភៀសខ្លួនដែលរងគ្រោះដោយទុរភិក្ស នៅតំបន់ Darfur របស់ប្រទេសស៊ូដង់ កាលពីខែមេសា ដោយរួមមានប្រហែល ១ភាគ៣ ត្រូវបានផ្ដាច់ជីវិតភា្លមៗ នាពេលនោះ។បើយោងតាមរបាយការណ៍របស់ UN នេះ បានឲ្យដឹងថា អស់រយៈពេលជាច្រើនខែ មុនការវាយលុកថ្ងៃទី ១១-១៣ ខែមេសា កងកម្លាំងគាំទ្ររហ័ស (RSF) បានរាំងខ្ទប់មិនឲ្យមានលំហូរស្បៀងអាហារ និងការផ្គត់ផ្គង់ទៅកាន់ជំរំ Zamzam នៅតំបន់ Darfur ភាគខាងលិចស៊ូដង់ ជាទីជ្រកកោនរបស់មនុស្សជិតកន្លះលាននាក់ដែលភៀសខ្លួនដោយសង្រ្គាមស៊ីវិល។របាយការណ៍របស់ UN បានឲ្យដឹងទៀតថា ក្នុងអំឡុងពេលនៃការកាន់កាប់នោះ ក្រុម RSF បានកំណត់គោលដៅវាយប្រហារលើជនស៊ីវិល ហើយអ្នករួចជីវិត បានរាយការណ៍ពីការកាប់សម្លាប់ ការរំលោភ ការធ្វើទារុណកម្ម និងការចាប់ពង្រត់គ្រប់ទីកន្លែង ដោយមានយ៉ាងហោចណាស់មនុស្ស ៣១៩នាក់ ត្រូវបានប្រហារជីវិត នៅក្នុងជំរុំ ឬនៅពេលពួកគេព្យាយាមរត់គេច។នៅក្នុងសេចក្តីថ្លែងការណ៍មួយ អមជាមួយរបាយការណ៍ដែលមាន ១៨ទំព័រ ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស (UNHCR) លោក Volker Turk បានប្រាប់ឲ្យដឹងថា៖ «ការសម្លាប់ជនស៊ីវិលដោយចេតនាបែបនេះ ឬមនុស្សដែលលែងមានសមត្ថភាពប្រយុទ្ធហើយនោះ អាចបង្កើតជាឧក្រិដ្ឋកម្មសង្គ្រាម»។ការរកឃើញនេះ គឺផ្អែកលើការសម្ភាសន៍ដែលធ្វើឡើង ក្នុងខែកក្កដា ឆ្នាំ២០២៥ ជាមួយអ្នកនៅរស់រានមានជីវិត និងសាក្សីចំនួន ១៥៥នាក់ ដែលបានភៀសខ្លួនទៅប្រទេសឆាដ៕

កសិករនាំគ្នាចោលគ្រាប់បែកផ្សែងលើនគរបាល ខណៈមេដឹកនាំ EUជួបគ្នានៅទីក្រុងព្រុចសែល

នៅថ្ងៃព្រហស្បតិ៍នេះ ក្រុមបាតុករបានចោលគ្រាប់បែកផ្សែង និងប៉េងប៉ោះលើក្រុមនគរបាល ស្របពេលក្រុមមេដឹកនាំសហភាពអឺរ៉ុប(EU) ជួបគ្នាពិភាក្សាលើគោលនយោបាយពាណិជ្ជកម្ម និងកសិកម្ម នៅទីក្រុងព្រុចសែល ប្រទេសបែលហ្ស៊ិក ។កសិកររាប់រយនាក់ បានបើកត្រាក់ទ័ររបស់ពួកគេទៅកាន់ទីក្រុងព្រុចសែល ចុចស៊ីផ្លេ និងផ្តល់គ្រាប់បែកផ្សែងឲ្យក្រុមបាតុករចោលលើក្រុមនគរបាល ។នៅពាក់កណ្តាលព្រឹកនេះ នគរបាលបានឆ្លើយតបវិញជាមួយការបាញ់កាណុងទឹកលើក្រុមបាតុករដែលនៅក្បែរ ។ក្រុមកសិករមកពីទូទាំងអឺរ៉ុប និយាយថា វិស័យកសិកម្មបានជួបវិបត្តិអស់រយៈពេលជាច្រើនឆ្នាំមកហើយ ហើយនិងបានចោទប្រកាន់សហភាពអឺរ៉ុប(EU)ថាបានធ្វើឲ្យអន្តរាយដល់ជីវិតរស់នៅប្រចាំថ្ងៃរបស់ពួកគេ តាមរយៈកិច្ចព្រមព្រៀងពាណិជ្ជកម្មដូចជាកិច្ចព្រមព្រៀង Mercosur និងការកាត់បន្ថយថវិកាគោលនយោបាយកសិកម្ម ។បាតុកម្មនេះ សង្ឃឹមថានឹងបន្ថែមសម្ពាតលើក្រុមមេដឹកនាំ EU ពេលដែលពួកគេថ្លឹងថ្លែងអាទិភាពថវិកា និងកិច្ចព្រមព្រៀងដែលក្រុមកសិករ ព្រួយបារម្ភថា នឹងបង្កើនការប្រកួតប្រជែង និងបន្ទាបតម្លៃផលិតផលកសិកម្មរបស់ពួកគេ ៕

តៃវ៉ាន់រង្គើដោយរញ្ជួយដីកម្រិត ៥,១រ៉ិចទ័រ តែមិនមានសេចក្តីរាយការណ៍ភ្លាមៗពីការខូចខាតឡើយ

រដ្ឋបាលអាកាសធាតុរបស់តៃវ៉ាន់ បានឲ្យដឹងថា រញ្ជួយដីកម្រិត ៥,១រ៉ិចទ័រ បានកើតមានចម្ងាយ ១៨គីឡូម៉ែត្រ នៅម្ដុំភាគខាងនៃកើតទីក្រុង Hualien របស់កោះតៃវ៉ាន់ នាថ្ងៃព្រហស្បតិ៍ (ទី១៨ ខែធ្នូ) នេះ តែមិនមានរបាយការណ៍ភ្លាមៗ អំពីការខូចខាតឡើយ។រញ្ជួយដីនេះបានធ្វើឲ្យអគារនានាមានរំញ័រមួយភ្លែត ក្នុងរដ្ឋធានីតៃប៉ិ។ រដ្ឋបាលអាកាសធាតុ បានឲ្យដឹងថា រញ្ជួយដីនេះ មានជម្រៅ ៣១,៦គីឡូម៉ែត្រ។គួរបញ្ជាក់ថា កោះតៃវ៉ាន់ងាយនឹងរងគ្រោះដោយសាររញ្ជួយដីណាស់។ មនុស្សជាង ១០០នាក់ បានបាត់បង់ជីវិត ក្នុងអំឡុងពេលមានគ្រោះរញ្ជួយដី នៅភាគខាងត្បូងកោះតៃវ៉ាន់ ក្នុងឆ្នាំ២០២៦ ខណៈដែលការរញ្ជួយកម្រិត ៧,៣រ៉ិចទ័រ បានផ្ដាច់ជីវិតមនុស្សជាង ២.០០០នាក់ ក្នុងឆ្នាំ១៩៩៩៕

មន្ត្រីអារ៉ាប៊ីសាអ៊ូឌីត បារាំង និងអាមេរិក ពិភាក្សាអំពីការគាំទ្រកងទ័ពលីបង់ ក្នុងកិច្ចប្រជុំ នៅទីក្រុងប៉ារីស

កិច្ចប្រជុំត្រីភាគីរបស់មន្ត្រីបារាំង អារ៉ាប៊ីសាអ៊ូឌីត និងសហរដ្ឋអាមេរិក ស្តីពីប្រទេសលីបង់ នឹងត្រូវធ្វើឡើងនៅក្នុងទីក្រុងប៉ារីស ប្រទេសបារាំង នាថ្ងៃព្រហស្បតិ៍ (ទី១៨ ខែធ្នូ) នេះ ដើម្បីពិភាក្សា អំពីការគាំទ្រដល់កងទ័ពលីបង់ និងកំណត់កាលបរិច្ឆេទ សម្រាប់សន្និសីទអន្តរជាតិថ្មីមួយ ដោយមានមេទ័ព លោក Rodolphe Haykal ចូលរួម។កិច្ចពិភាក្សានឹងផ្តោតលើយន្តការនានា ដើម្បីគាំទ្រដល់កងទ័ពលីបង់ ក្នុងភារកិច្ចសន្តិសុខ ការអនុវត្តផែនការដាក់ពង្រាយនៅភាគខាងត្បូងប្រទេស ការបង្ហាញផែនទីទាក់ទងនឹងការកំណត់ព្រំដែន និងតួនាទីរបស់លីបង់ ក្នុងការរក្សាស្ថិរភាព។កិច្ចប្រជុំនេះក៏ត្រូវបានគេមើលឃើញផងដែរថា ជាការសាកល្បងនៃភាពប្រាកដប្រជារបស់រដ្ឋលីបង់ ក្នុងការអនុវត្តកំណែទម្រង់ ការទប់ស្កាត់អាវុធខុសច្បាប់ និងការគូសបញ្ជាក់ផែនទីបង្ហាញផ្លូវ សម្រាប់ការគាំទ្រអន្តរជាតិនាពេលអនាគត។គួរបញ្ជាក់ថា កិច្ចព្រមព្រៀងបទឈប់បាញ់ដែលសម្រេចបានក្នុងខែវិច្ឆិកា ឆ្នាំ២០២៤ បានបញ្ចប់សង្គ្រាមដែលអូសបន្លាយជាង ១ឆ្នាំ រវាងក្រុមហេសបូឡា និងអ៊ីស្រាអែល។ តែអ៊ីស្រាអែលបានបន្តវាយប្រហារតាមផ្លូវអាកាសលើតំបន់ផ្សេងៗ ក្នុងប្រទេសលីបង់ ដោយអះអាងថា គោលបំណង គឺដើម្បីរារាំងក្រុមហេសបូឡាកុំឲ្យកសាងសមត្ថភាពរបស់ខ្លួនឡើងវិញ បន្ទាប់ពីខូចខាតយ៉ាងធ្ងន់ធ្ងរ ក្នុងអំឡុងពេលសង្គ្រាមនោះ៕

នគរបាលអូស្រ្តាលី ស្កាត់ស្ទាក់ចាប់រថយន្ត ២គ្រឿង ក្រោយការណ៍សម្ងាត់បង្ហាញពីលទ្ធភាពនៃអំពើហិង្សា

នគរបាលអូស្រ្តាលីនិយាយនៅថ្ងៃព្រហស្បតិ៍នេះថា ពួកគេបានស្កាត់ស្ទាក់ចាប់រថយន្ត ២គ្រឿង នៅទីក្រុងស៊ីដនី ក្រោយទទួលបានការណ៍សម្ងាត់ថា អំពើហិង្សាអាចនឹងត្រូវបានគេរៀបផែនការ ។ក្រុមនគរបាល បានចាប់រថយន្ត ពេលដែលពួកគេបើកឆ្លងកាត់តំបន់ជាយក្រុង Liverpool ស្ថិតនៅភាគនិរតីទីក្រុងស៊ីដនី ។យោងតាមសារព័ត៌មានអូស្រ្តាលី បានឲ្យដឹងថា បុរសនៅក្នុងរថយន្ត ត្រូវបានគេជឿថា ស្ថិតនៅតាមផ្លូវឆ្ពោះទៅកាន់តំបន់ឆ្នេរ Bondi ។ ក្រុមមនុស្សប្រុស ត្រូវបានគេមើលឃើញឃាត់ខ្លួននៅចិញ្ចើមផ្លូវ ដោយដៃរបស់ពួកគេចងស្លាបសេក ។ នគរបាលរដ្ឋ New South Wales និយាយនៅក្នុងសេចក្តីថ្លែងការណ៍ថា ត្រង់ចំណុចនេះ នគរបាលពុំបានកំណត់អត្តសញ្ញាណនៃការជាប់ពាក់ព័ន្ធនឹងការស៊ើបអង្កេតបច្ចុប្បន្នរបស់នគរបាលលើការវាយប្រហារភេរវកម្មនៅតំបន់ឆ្នេរ Bondi នោះទេ ។ ស្របពេលដែលការស៊ើបអង្កេតនៅបន្ត បុរស ៧នាក់ បានជួយនគរបាល ជាមួយនឹងការសាកសួររបស់ពួកគេ ។អូស្រ្តាលីស្ថិតនៅក្នុងការប្រុងប្រយ័ត្នខ្ពស់បំផុត ក្រោយមនុស្ស ១៥នាក់ ត្រូវបានសម្លាប់ នៅក្នុងករណីបាញ់ប្រហារទ្រង់ទ្រាយធំ នៅឆ្នេរសមុទ្រ Bondi កាលពីល្ងាចថ្ងៃអាទិត្យ អំឡុងការប្រារព្ធពិធីជនជាតិជ្វីហ្វ ៕

ទីក្រុងគីវ៖ មន្រ្តីការទូតជាន់ខ្ពស់អ៊ុយក្រែន នឹងមានជំនួបជាមួយក្រុមមន្រ្តីចិននៅទីក្រុងប៉េកាំង

មន្រ្តីការទូតជាន់ខ្ពស់អ៊ុយក្រែនមួយរូបប្រកាសនៅថ្ងៃព្រហស្បតិ៍នេះថា លោកបានធ្វើដំណើរទៅដល់ទីក្រុងប៉េកាំង ដែលជាសម្ព័ន្ធមិត្តជិតស្និតរបស់រុស្ស៊ី ជាទីដែលលោករំពឹងថានឹងចូលរួមកិច្ចប្រជុំជាមួយក្រុមមន្រ្តីចិន ។ដំណើរទស្សនកិច្ចនេះ តំណាងឲ្យជំនួបដ៏កម្រមួយរវាងក្រុមមន្រ្តីមកពីទីក្រុងគីវ និងទីក្រុងប៉េកាំង ដែលរងការចោទប្រកាន់ថាជួយទីក្រុងមូស្គូ ពន្យាពេលសង្រ្គាមរបស់ខ្លួនប្រឆាំងអ៊ុយក្រែន ។អនុរដ្ឋមន្រ្តីការបរទេសទី ១របស់អ៊ុយក្រែនលោក Sergiy Kyslytsya បានសរសេរលើបណ្តាញព័ត៌មានសង្គមថា ថ្ងៃដ៏មមាញឹកមួយនៅទីក្រុងប៉េកាំង ។អ្នកនាំពាក្យក្រសួងការបរទេសអ៊ុយក្រែន បានបញ្ជាក់ប្រាប់ទីភ្នាក់ងារព័ត៌មាន AFPថា លោក Kyslytsya នឹងពិគ្រោះយោបល់ជាមួយក្រុមមន្រ្តីការទូតចិន ដោយរូបលោកពុំបានផ្តល់សេចក្តីលម្អិតនោះទេ ។លោក Kyslytsya និយាយថា លោកមានជំនួបជាមួយឯកអគ្គរដ្ឋទូតសហរដ្ឋអាមេរិកប្រចាំនៅចិនលោក David Perdue ។ចិនដែលជាដៃគូពាណិជ្ជកម្មសំខាន់របស់រុស្ស៊ី បាននិយាយថា ពួកគេប្រកាន់ជំហរអព្យាក្រឹតលើសង្រ្គាមអ៊ុយក្រែន ហើយពុំដែលថ្កោលទោសការវាយលុករបស់ទីក្រុងមូស្គូម្តងណាឡើយ ។ជាញឹកញាប់ទីក្រុងប៉េកាំង តែងតែអំពាវនាវឲ្យមានកិច្ចប្រជុំសន្តិភាព និងគោរពបូរណភាពទឹកដីប្រទេសទាំងអស់ ៕

មេដឹកនាំ EU ប្រឈមនឹងការសម្រេចសែនពិបាក ជុំវិញការយកទ្រព្យសម្បត្តិបង្កករបស់រុស្ស៊ីឲ្យអ៊ុយក្រែនប្រើប្រាស់

បណ្ដាមេដឹកនាំសហភាពអឺរ៉ុប (EU) នឹងព្យាយាមឈានដល់ព្រមព្រៀងគ្នា លើវិធីផ្តល់ប្រាក់កម្ចីរាប់ពាន់លានអឺរ៉ូនៃសាច់ប្រាក់ដែលត្រូវការយ៉ាងខ្លាំង ឲ្យដល់អ៊ុយក្រែន នៅក្នុងកិច្ចប្រជុំមួយ នាថ្ងៃព្រហស្បតិ៍ (ទី១៨ ខែធ្នូ) នេះ ដែលត្រូវបានគេមើលឃើញថា ជាការសាកល្បងដ៏សំខាន់នៃកម្លាំងរបស់ក្រុមនេះ បន្ទាប់ពីប្រធានាធិបតីអាមេរិក លោក Donald Trump ហៅប្លុកនេះថា មានភាពទន់ខ្សោយ។EU មើលឃើញសង្រ្គាមរុស្ស៊ីថា ជាការគំរាមកំហែងដល់សន្តិសុខរបស់ខ្លួន ហើយចង់បន្តផ្តល់ហិរញ្ញប្បទាន ដើម្បីឲ្យអ៊ុយក្រែនមានលទ្ធភាពប្រយុទ្ធ។ គណៈកម្មការអឺរ៉ុបបានស្នើឲ្យប្រើប្រាស់ទ្រព្យសម្បត្តិបង្កករបស់ធនាគារកណ្តាលរុស្ស៊ី ដែលភាគច្រើនត្រូវបានរក្សាទុកនៅក្នុងស្ថាប័នទូទាត់ហិរញ្ញវត្ថុរបស់ប្រទេសបែលហ្សិក ដើម្បីធានាឲ្យមាននូវប្រាក់កម្ចីដ៏ធំដល់ទីក្រុងគីវ ប៉ុន្តែបែលហ្ស៊ិកមានកង្វល់ថា ផែនការនេះមិនមានភាពស្របច្បាប់ ខណៈដែលរដ្ឋផ្សេងទៀត រួមទាំងប្រទេសអ៊ីតាលីផងដែរ បានសម្តែងការព្រួយបាម្ភ។មន្ត្រី និងអ្នកការទូត EU យល់ស្របគ្នាថា ពួកគេត្រូវតែស្វែងរកដំណោះស្រាយ នៅក្នុងកិច្ចប្រជុំកំពូលនេះ។ នៅព្រឹកព្រលឹមថ្ងៃទី១៨ ខែធ្នូនេះ នាយករដ្ឋមន្ត្រីបែលហ្ស៊ិក លោក Bart De Wever បានប្រាប់សភារបស់ប្រទេសរបស់លោកថា លោកមិនទាន់ឃើញការធានាដែលឆ្លើយតបនឹងកង្វល់របស់លោកនៅឡើយទេ ជុំវិញហានិភ័យផ្នែកច្បាប់ និងការគ្មានទ្រព្យសកម្មនោះ ហើយថា ផែនការផ្ដល់ហិរញ្ញវត្ថុនៅតែប្រែប្រួល «ដូចដែលយើងលើកឡើង»។ធនាគារកណ្តាលរបស់រុស្ស៊ី បានប្រាប់ថា ផែនការរបស់ EU ក្នុងការប្រើប្រាស់ទ្រព្យសម្បត្តិរបស់ខ្លួន គឺខុសច្បាប់ ហើយថា ខ្លួនរក្សាសិទ្ធិក្នុងការប្រើប្រាស់មធ្យោបាយដែលមានទាំងអស់ ដើម្បីការពារផលប្រយោជន៍របស់ខ្លួន។ ស្ថាប័ននេះបានដាក់ពាក្យបណ្តឹងនៅទីក្រុងមូស្គូ ក្នុងសប្តាហ៍នេះ ដើម្បីទាមទារចំនួន ២៣០ពាន់លានដុល្លារ ជាសំណងខូចខាតពីស្ថាប័នទូទាត់ហិរញ្ញវត្ថុ Euroclear៕

លោក PUTIN បន្ទោសលោកខាងលិចចំពោះការបែកបាក់របស់ប្រទេសយូហ្គោស្លាវី

ប្រធានាធិបតីរុស្ស៊ី វ្ល៉ាឌីមៀ ពូទីន បានប្រាប់កិច្ចប្រជុំក្រុមប្រឹក្សាភិបាលនៃក្រសួងការពារជាតិថា លោកខាងលិចទទួលខុសត្រូវចំពោះការបែកបាក់យូហ្គោស្លាវី។ លោក ពូទីន បាននិយាយថា៖«នៅទីបំផុត ប្រទេសលោកខាងលិចបានបំបែកយូហ្គោស្លាវី និងស៊ែរប៊ី ពួកគេបានហែកពួកវាជាបំណែកៗ» ដោយសង្កត់ធ្ងន់ថា «ហែកប្រទេសតែមួយទៅជាបំណែកៗ»។លោកប្រធានាធិបតីបានកត់សម្គាល់ថា គ្មានអ្វីដែលត្រូវបានបង្កើតឡើង នៅក្នុងសម័យក្រោយសង្គ្រាមដំណើរការក្នុងទំនាក់ទំនងជាមួយលោកខាងលិចនោះទេ។លោកបានបន្តថា៖«អ្វីៗទាំងអស់បានចាប់ផ្តើមធ្លាក់ចុះយ៉ាងឆាប់រហ័ស ច្បាប់ទាំងអស់នេះ ហើយធម្មនុញ្ញអង្គការសហប្រជាជាតិ បានចាប់ផ្តើមត្រូវបានគេមិនអើពើ។ ព្រឹត្តិការណ៍នៅយូហ្គោស្លាវី តើធម្មនុញ្ញអង្គការសហប្រជាជាតិ ការប្រើប្រាស់កម្លាំងនៅឯណា? យើងបាននិយាយអំពីរឿងនេះច្រើនដងហើយ ប៉ុន្តែនេះ គឺ ជាការពិត»។ លោកបានបន្ថែមថា៖«នៅលោកខាងលិច ពួកគេគ្រាន់តែធ្វើតាមអ្វីដែលពួកគេពេញចិត្តប៉ុណ្ណោះ។ យើងបានចូលរួមជួយ និងបង្ខំពួកគេឲ្យបោះឆ្នោត ប៉ុន្តែយើងមិនបានជោគជ័យទេ ដោយសារពួកគេមិនខ្វល់អ្វីទាំងអស់»៕

ចិនថ្កោលទោសការលក់អាវុធអាមេរិកដល់កោះតៃវ៉ាន់ ដោយលើកឡើងថា វាបំពានគោលការណ៍ចិនតែមួយ

នៅថ្ងៃព្រហស្បតិ៍ ចិនបានថ្កោលទោសការលក់អាវុធថ្មីរបស់សហរដ្ឋអាមេរិកដល់កោះតៃវ៉ាន់ ដោយពួកគេនិយាយថា ទីក្រុងវ៉ាស៊ីនតោន បានបំពានយ៉ាងធ្ងន់ធ្ងរលើគោលការណ៍ចិនតែមួយ ហើយនិងធ្វើប៉ះពាល់ដល់សន្តិភាព និងស្ថិរភាពនៅច្រកសមុទ្រតៃវ៉ាន់ ។កាលពីថ្ងៃពុធម្សិលមិញ សហរដ្ឋអាមេរិក បានអនុម័តការលក់សព្វាវុធតម្លៃ ១១,១ ពាន់លានដុល្លារ ទៅឲ្យកោះតៃវ៉ាន់ ដែលជាកញ្ចប់អាវុធដ៏ធំបំផុតមិនធ្លាប់មានរបស់សហរដ្ឋអាមេរិកសម្រាប់កោះនេះ ដែលកំពុងស្ថិតនៅក្រោមសម្ពាធយោធាកាន់តែខ្លាំងឡើងពីប្រទេសចិន ។ការប្រកាសលក់អាវុធឱ្យកោះតៃវ៉ាន់ចុងក្រោយបំផុតនេះដែរ គឺជាលើកទីពីរហើយ ក្រោមរដ្ឋបាលបច្ចុប្បន្នរបស់លោកប្រធានាធិបតីអាមេរិក Donald Trump ហើយបានកើតឡើងនៅពេលទីក្រុងប៉េកាំង បង្កើនសម្ពាធយោធា និងការទូតលើកោះតៃវ៉ាន់ ដែលប្រទេសចិន អះអាងសិទ្ធិថា ជាខេត្តផ្តាច់ខ្លួនរបស់ពួកគេ ។អ្នកនាំពាក្យក្រសួងការបរទេសចិនលោក Guo Jiakun និយាយនៅក្នុងសន្និសីទសារព័ត៌មានថា ភាគីសហរដ្ឋអាមេរិកបានប្រកាសដោយបើកចំហរកម្មវិធីទ្រង់ទ្រាយធំ ដើម្បីទិញអាវុធទំនើបៗ ដែលជាការបំពានយ៉ាងធ្ងន់ធ្ងរលើគោលការណ៍ចិនតែមួយ ហើយនិងសេចក្តីថ្លែងការណ៍រួមចិន-អាមេរិក ចំនួន ៣ ដែលធ្វើឲ្យប៉ះពាល់យ៉ាងធ្ងន់ធ្ងរដល់អធិបតេយ្យភាព សន្តិសុខ និងបូរណភាពទឹកដីរបស់ចិន ។លោក Guo បានជំរុញឲ្យសហរដ្ឋអាមេរិកឈប់ជាបន្ទាន់ការបំពាក់អាវុធដល់កោះតៃវ៉ាន់ ស្របពេលដែលលោកបញ្ជាក់ថា ចំណាត់ការបែបនេះ មានតែផលអវិជ្ជមានប៉ុណ្ណោះ ៕

រដ្ឋមន្ត្រីការបរទេស៖ ទួរគីជំរុញឲ្យមានកិច្ចចរចាស៊ីរី-SDF ដោយសន្តិវិធី និងបានព្រមានថា នឹងអស់ការអត់ធ្មត់

រដ្ឋមន្ត្រីការបរទេស លោក Hakan Fidan បាននិយាយថ្ងៃព្រហស្បតិ៍នេះថា ប្រទេសទួរគី មិនចង់ងាកទៅរកសកម្មភាពយោធាម្តងទៀតប្រឆាំងនឹងកងកម្លាំងប្រជាធិបតេយ្យស៊ីរី (SDF) ដែលដឹកនាំដោយជនជាតិឃើដរបស់ប្រទេសស៊ីរីទេ ប៉ុន្តែបានព្រមានថា ការអត់ធ្មត់របស់អ្នកពាក់ព័ន្ធ គឺជិតអស់ហើយចំពោះ អ្វីដែលលោកបានពិពណ៌នាថា ជាការពន្យារពេលក្នុងការអនុវត្តកិច្ចព្រមព្រៀងសមាហរណកម្ម។លោក Fidan បានប្រាប់បទសម្ភាសន៍ជាមួយសារព័ត៌មាន TRT World ថា៖«យើងគ្រាន់តែសង្ឃឹមថា អ្វីៗនឹងឆ្លងកាត់ការសន្ទនា ការចរចា និងដោយសន្តិវិធី។ យើងមិនចង់ឃើញតម្រូវការណាមួយ ក្នុងការងាកទៅរកមធ្យោបាយយោធាម្តងទៀតទេ។ ប៉ុន្តែ កងកម្លាំងប្រជាធិបតេយ្យស៊ីរី (SDF) គួរតែយល់ថា ការអត់ធ្មត់របស់អ្នកពាក់ព័ន្ធ គឺជិតអស់ហើយ»។លោកបានបន្ថែមថា៖«ពួកគេគួរតែមកដល់កន្លែងដែលការប្តេជ្ញាចិត្តរបស់ពួកគេចំពោះកិច្ចព្រមព្រៀងថ្ងៃទី ១០ ខែមីនា គួរតែត្រូវបានគោរព។ មនុស្សគ្រប់គ្នារំពឹងពីពួកគេ ដើម្បីគោរពកិច្ចព្រមព្រៀងនោះ ដោយគ្មានការពន្យារពេល និងដោយគ្មានការបង្ខូចទ្រង់ទ្រាយណាមួយឡើយ ពីព្រោះយើងមិនចង់ឃើញការងាកចេញពីកិច្ចព្រមព្រៀងនេះទេ»៕

បណ្ដាញសង្គម

ព័ត៌មានថ្មីៗ

កម្ពុជា និងជប៉ុន បេ្តជ្ញាបន្តពង្រឹង និងពង្រីកកិច្ចសហប្រតិបត្តិការវិស័យការងារឱ្យកាន់តែទូលំទូលាយថែមទៀត

យន្តហោះទម្លាក់គ្រាប់បែកយុទ្ធសាស្ត្ររុស្ស៊ីហោះហើរពីលើដែនទឹកអព្យាក្រឹតនៃសមុទ្រ Barents និងសមុទ្រន័រវែស

ឧត្តមសេនីយ៍អាល្លឺម៉ង់៖ ការបដិសេធមិនព្រមដើរតាមមាគ៌ាសន្តិភាព គឺជាសោកនាដកម្មរបស់អ៊ុយក្រែន

អ្នកជំនាញUN អំពាវនាវឲ្យសភាអាមេរិកធ្វើអន្តរាគមន៍ ដើម្បីបញ្ឈប់ការឈ្លានពានប្រឆាំងនឹងវ៉េណេស៊ុយអេឡា

សហភាពអឺរ៉ុបគាំទ្រកិច្ចខិតខំប្រឹងប្រែងរបស់អង្គការសហប្រជាជាតិ ដើម្បីសន្តិភាពយេម៉ែន

អ្នកជំនាញUN៖ ក្រុមជ្រុលនិយម AL-SHABAB នៅតែបង្កការគំរាមកំហែងធ្ងន់ធ្ងរដល់សន្តិភាពនៅសូម៉ាលី និងតំបន់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877