BTV NEWS

ស៊ីរីបញ្ជាក់ថា មេដឹកនាំជាន់ខ្ពស់របស់ ISIS ត្រូវបានសម្លាប់

អារ៉ាប៊ីសាអ៊ូឌីត៖ ក្រុមបំបែកខ្លួនយេម៉ែន គួរតែដកកងកម្លាំងចេញពីខេត្តដែលដណ្ដើមបាន

ចិនជំរុញទីភ្នាក់ងារទេសចរណ៍កាត់បន្ថយភ្ញៀវទេសចរទៅជប៉ុនចំនួន ៤0ភាគរយ

យន្តហោះទម្លាក់គ្រាប់បែករុស្ស៊ី អនុវត្តការហោះហើរ «តាមការគ្រោងទុក» លើសមុទ្រន័រវ៉ែស និង Barents

ព័ត៌មានអន្តរជាតិ

ចិនថ្កោលទោសការលក់អាវុធអាមេរិកដល់កោះតៃវ៉ាន់ ដោយលើកឡើងថា វាបំពានគោលការណ៍ចិនតែមួយ

នៅថ្ងៃព្រហស្បតិ៍ ចិនបានថ្កោលទោសការលក់អាវុធថ្មីរបស់សហរដ្ឋអាមេរិកដល់កោះតៃវ៉ាន់ ដោយពួកគេនិយាយថា ទីក្រុងវ៉ាស៊ីនតោន បានបំពានយ៉ាងធ្ងន់ធ្ងរលើគោលការណ៍ចិនតែមួយ ហើយនិងធ្វើប៉ះពាល់ដល់សន្តិភាព និងស្ថិរភាពនៅច្រកសមុទ្រតៃវ៉ាន់ ។កាលពីថ្ងៃពុធម្សិលមិញ សហរដ្ឋអាមេរិក បានអនុម័តការលក់សព្វាវុធតម្លៃ ១១,១ ពាន់លានដុល្លារ ទៅឲ្យកោះតៃវ៉ាន់ ដែលជាកញ្ចប់អាវុធដ៏ធំបំផុតមិនធ្លាប់មានរបស់សហរដ្ឋអាមេរិកសម្រាប់កោះនេះ ដែលកំពុងស្ថិតនៅក្រោមសម្ពាធយោធាកាន់តែខ្លាំងឡើងពីប្រទេសចិន ។ការប្រកាសលក់អាវុធឱ្យកោះតៃវ៉ាន់ចុងក្រោយបំផុតនេះដែរ គឺជាលើកទីពីរហើយ ក្រោមរដ្ឋបាលបច្ចុប្បន្នរបស់លោកប្រធានាធិបតីអាមេរិក Donald Trump ហើយបានកើតឡើងនៅពេលទីក្រុងប៉េកាំង បង្កើនសម្ពាធយោធា និងការទូតលើកោះតៃវ៉ាន់ ដែលប្រទេសចិន អះអាងសិទ្ធិថា ជាខេត្តផ្តាច់ខ្លួនរបស់ពួកគេ ។អ្នកនាំពាក្យក្រសួងការបរទេសចិនលោក Guo Jiakun និយាយនៅក្នុងសន្និសីទសារព័ត៌មានថា ភាគីសហរដ្ឋអាមេរិកបានប្រកាសដោយបើកចំហរកម្មវិធីទ្រង់ទ្រាយធំ ដើម្បីទិញអាវុធទំនើបៗ ដែលជាការបំពានយ៉ាងធ្ងន់ធ្ងរលើគោលការណ៍ចិនតែមួយ ហើយនិងសេចក្តីថ្លែងការណ៍រួមចិន-អាមេរិក ចំនួន ៣ ដែលធ្វើឲ្យប៉ះពាល់យ៉ាងធ្ងន់ធ្ងរដល់អធិបតេយ្យភាព សន្តិសុខ និងបូរណភាពទឹកដីរបស់ចិន ។លោក Guo បានជំរុញឲ្យសហរដ្ឋអាមេរិកឈប់ជាបន្ទាន់ការបំពាក់អាវុធដល់កោះតៃវ៉ាន់ ស្របពេលដែលលោកបញ្ជាក់ថា ចំណាត់ការបែបនេះ មានតែផលអវិជ្ជមានប៉ុណ្ណោះ ៕

រដ្ឋមន្ត្រីការបរទេស៖ ទួរគីជំរុញឲ្យមានកិច្ចចរចាស៊ីរី-SDF ដោយសន្តិវិធី និងបានព្រមានថា នឹងអស់ការអត់ធ្មត់

រដ្ឋមន្ត្រីការបរទេស លោក Hakan Fidan បាននិយាយថ្ងៃព្រហស្បតិ៍នេះថា ប្រទេសទួរគី មិនចង់ងាកទៅរកសកម្មភាពយោធាម្តងទៀតប្រឆាំងនឹងកងកម្លាំងប្រជាធិបតេយ្យស៊ីរី (SDF) ដែលដឹកនាំដោយជនជាតិឃើដរបស់ប្រទេសស៊ីរីទេ ប៉ុន្តែបានព្រមានថា ការអត់ធ្មត់របស់អ្នកពាក់ព័ន្ធ គឺជិតអស់ហើយចំពោះ អ្វីដែលលោកបានពិពណ៌នាថា ជាការពន្យារពេលក្នុងការអនុវត្តកិច្ចព្រមព្រៀងសមាហរណកម្ម។លោក Fidan បានប្រាប់បទសម្ភាសន៍ជាមួយសារព័ត៌មាន TRT World ថា៖«យើងគ្រាន់តែសង្ឃឹមថា អ្វីៗនឹងឆ្លងកាត់ការសន្ទនា ការចរចា និងដោយសន្តិវិធី។ យើងមិនចង់ឃើញតម្រូវការណាមួយ ក្នុងការងាកទៅរកមធ្យោបាយយោធាម្តងទៀតទេ។ ប៉ុន្តែ កងកម្លាំងប្រជាធិបតេយ្យស៊ីរី (SDF) គួរតែយល់ថា ការអត់ធ្មត់របស់អ្នកពាក់ព័ន្ធ គឺជិតអស់ហើយ»។លោកបានបន្ថែមថា៖«ពួកគេគួរតែមកដល់កន្លែងដែលការប្តេជ្ញាចិត្តរបស់ពួកគេចំពោះកិច្ចព្រមព្រៀងថ្ងៃទី ១០ ខែមីនា គួរតែត្រូវបានគោរព។ មនុស្សគ្រប់គ្នារំពឹងពីពួកគេ ដើម្បីគោរពកិច្ចព្រមព្រៀងនោះ ដោយគ្មានការពន្យារពេល និងដោយគ្មានការបង្ខូចទ្រង់ទ្រាយណាមួយឡើយ ពីព្រោះយើងមិនចង់ឃើញការងាកចេញពីកិច្ចព្រមព្រៀងនេះទេ»៕

ទឹកជំនន់ នៅម៉ាឡេស៊ី បង្ខំឲ្យមនុស្សរាប់ពាន់នាក់ជម្លៀសចេញ នៅទូទាំងរដ្ឋចំនួន ៦

ទឹកជំនន់ឡើងកាន់ខ្ពស់ បានបង្ខំឲ្យប្រជាជនរាប់ពាន់នាក់ត្រូវជម្លៀសចេញ នៅទូទាំងរដ្ឋចំនួន ៦ ក្នុងប្រទេសម៉ាឡេស៊ី ដោយការបង្ហោះនៅលើបណ្តាញសង្គមបង្ហាញឲ្យឃើញផ្ទះសម្បែង និងសាកលវិទ្យាល័យរងការខូចខាត។នៅម៉ោងប្រហែល ៩ព្រឹក (ម៉ោងក្នុងស្រុក) នាថ្ងៃព្រហស្បតិ៍ ទី១៨ ខែធ្នូនេះ ក្រុមហ៊ុនបណ្ដាញសង្គម បានបង្ហោះឡើងវិញនូវវីដេអូយកពីប្រភពអ្នកស្រុក នៅតំបន់ Gua Musang របស់រដ្ឋ Kelantan ដោយបង្ហាញពីទឹកជំនន់នៅក្នុងផ្ទះមួយខ្នង។ បុគ្គលនៅក្នុងវីដេអូដែលថតនៅម៉ោងប្រហែល ៨:២០ព្រឹក (ម៉ោងក្នុងស្រុក) ជឿថា ទឹកហូរទៅទន្លេ Sungai Lebir ទោះបីជាមិនមានភ្លៀងធ្លាក់ខ្លាំងនាពេលនោះក៏ដោយ។នៅទីក្រុង Kuantan រដ្ឋ Pahang អ្នកស្រុកម្នាក់ទៀត បានចែករំលែកវីដេអូដែលបង្ហាញពីទឹកឡើងកាន់តែខ្ពស់នៅក្នុងលំនៅឋានរបស់នាង ជាកន្លែងដែលគេឃើញរបស់របរប្រើប្រាស់ក្នុងផ្ទះ ដូចជាធុងហ្គាស និងប្រអប់ស្នោក្លាសេ អណ្តែតពេញក្នុងផ្ទះ។ អ្នកស្រុកខ្លះក៏ត្រូវបានឃើញរើទៅកាន់ទីជម្រកសុវត្ថិភាព ខណៈទឹកឡើងដល់ត្រឹមចង្កេះ។យោងតាមរបាយការណ៍របស់ទីភ្នាក់ងារគ្រប់គ្រងគ្រោះមហន្តរាយជាតិ នាថ្ងៃទី១៨ ខែធ្នូនេះ គិតត្រឹមថ្ងៃត្រង់ បានឲ្យដឹងថា ការជម្លៀសដោយទឹកជំនន់ បានកើនឡើងដល់ ៩.២៦១នាក់ នៅក្នុងរដ្ឋចំនួន ៦ គឺ Pahang, Terengganu, Johor, Selangor, Kelantan និង Sarawak។ អាជ្ញាធរបានបង្កើតជម្រកបណ្តោះអាសន្នចំនួន ៧៥កន្លែង នៅទូទាំងរដ្ឋចំនួន ៦ នេះ ដើម្បីជួយដល់គ្រួសារដែលរងផលប៉ះពាល់៕

ការវាយប្រហារអ៊ីស្រាអែលឆ្លងចូលតំបន់ភាគខាងត្បូង ភាគខាងកើតលីបង់នៅក្នុងការបំពានបទឈប់បាញ់ចុងក្រោយ

យោធាអ៊ីស្រាអែលបើកការវាយប្រហារតាមច្រកអាកាសនៅទូទាំងតំបន់ភាគខាងត្បូង និងតំបន់ភាគខាងកើតលីបង់ នៅក្នុងការបំពានស្ទើតែរាល់ថ្ងៃចុងក្រោយនៃបទឈប់បាញ់រយៈពេលជាង ១ឆ្នាំ ។អ្នកឆ្លើយឆ្លងព័ត៌មានរបស់កាសែត Al Jazeera រាយការណ៍ថា ការវាយប្រហារទាំងនេះ មានគោលដៅលើតំបន់ al-Jabour, al-Qatrani និងតំបន់ al-Rayhan ស្ថិតនៅភាគខាងត្បូងលីបង់ ក៏ដូចជាតំបន់ Buday និងតំបន់ Hermel នៅជ្រលងភ្នំ Bekaa ភាគខាងកើតលីបង់ ។អ៊ីស្រាអែល អះអាងថា ពួកគេមានគោលដៅលើទីតាំងប្រតិបត្តិការ និងកន្លែងលាក់អាវុធរបស់ក្រុមហេសបូឡា ដើម្បីដាក់សម្ពាធក្រុមប្រដាប់អាវុធលីបង់មួយនេះ រំសាយអាវុធ ។ក្រុមហេសបូឡា បដិសេធន៍ទាំងស្រុងការបោះបង់ចោលឃ្លាំងអាវុធ ដរាបណាអ៊ីស្រាអែលនៅតែបន្តទម្លាក់គ្រាប់បែក ហើយនិងតំបន់កាន់កាប់នៅលីបង់ ។ភាពតានតឹងបានកើនឡើងកាលពីរយៈពេលជាច្រើនសប្តាហ៍មុន ពេលដែលអ៊ីស្រាអែលទម្លាក់គ្រាប់បែកលើតំបន់ជាយក្រុងភាគខាងត្បូងទីក្រុងបេរូត ដោយបានសម្លាប់មេបញ្ជាការយោធាជាន់ខ្ពស់ម្នាក់របស់ក្រុមហេសបូឡាលោក Haytham Ali Tabatabai ។ការទម្លាក់គ្រាប់បែករបស់អ៊ីស្រាអែល បានធ្វើឲ្យមានការរិះគន់យ៉ាងខ្លាំងពីអង្គការសហប្រជាជាតិដែលបានរាយការណ៍កាលពីខែវិច្ឆិកាថា ជនស៊ីវិលយ៉ាងហោច ១២៧នាក់ រួមទាំងកុមារផងដែរ ត្រូវបានសម្លាប់នៅលីបង់ ចាប់តាំងពីបទឈប់បាញ់ចូលជាធរមានកាលពីចុងឆ្នាំ ២០២៤ ៕

ចិនបញ្ជាក់ពីការផ្តល់ជូនអាជ្ញាបណ្ណនាំចេញរ៉ែកម្រមួយចំនួន

ក្រសួងពាណិជ្ជកម្មចិន បញ្ជាក់នៅថ្ងៃព្រហស្បតិ៍នេះថា ពួកគេបានផ្តល់ជូនអាជ្ញាបណ្ណទូទៅជាច្រើនសម្រាប់ការនាំចេញរ៉ែកម្រ ដែលមានគោលបំណងពន្លឿនការដឹកជញ្ជូនសារធាតុចាំបាច់ ។វាបានក្លាយជាលទ្ធផលតាមការសន្យាដ៏សំខាន់ បន្ទាប់ពីជំនួបរវាងប្រធានាធិបតីសហរដ្ឋអាមេរិកលោក Donald Trump និងប្រធានាធិបតីចិនលោក Xi Jinping ដែលបានបន្ធូរបន្ថយភាពតានតឹងពាណិជ្ជកម្មរវាងប្រទេសមហាអំណាចទាំង ២ ។ទីក្រុងប៉េកាំងបានបន្ថែមសារធាតុរ៉ែកម្រ និងមេដែក ទៅក្នុងបញ្ជីគ្រប់គ្រងការនាំចេញរបស់ខ្លួន កាលពីដើមខែមេសា តម្រូវឲ្យមានអាជ្ញាបណ្ណប្រើប្រាស់ ២យ៉ាង សម្រាប់ការនាំចេញ ។ ការនាំចេញរ៉ែកម្ររបស់ចិន បានធ្លាក់ចុះនៅខែមេសា និងខែឧសភា បង្ខំឲ្យក្រុមហ៊ុនរថយន្តសកលមួយចំនួន បិទការផលិតគ្រឿងបង្គុំរបស់ខ្លួន ។ទីភ្នាក់ងារព័ត៌មានរ៉យទ័រ រាយការណ៍កាលពីដើមខែវិច្ឆិកាថា អាជ្ញាបណ្ណថ្មី ត្រូវបានរៀបចំឡើងដើម្បីអនុញ្ញាតឲ្យមានការនាំចេញបន្ថែមទៀត ក្រោមលិខិតអនុញ្ញាតរយៈពេល ១ឆ្នាំ សម្រាប់អតិថិជនម្នាក់ៗ ។ ប៉ុន្តែវានឹងមិនជំនួសអាជ្ញាបណ្ណប្រើប្រាស់ ២យ៉ាងមានស្រាប់នោះទេ ហើយមានតែក្រុមហ៊ុនរ៉ែកម្រចិនធំៗប៉ុណ្ណោះ មានសិទ្ធិទទួលបានវា ៕

កាតា៖ ការបំពានបទឈប់បាញ់របស់អ៊ីស្រាអែល ធ្វើឲ្យគ្រោះថ្នាក់ដល់ដំណើរការសន្តិភាពនៅតំបន់ហ្កាហ្សាទាំងមូល

នាយករដ្ឋមន្រ្តីកាតាព្រះអង្គម្ចាស់ Sheikh Mohammed bin Abdulrahman bin Jassim Al Thani បានធ្វើការព្រមានថា ការបំពានបទឈប់បាញ់ហ្កាហ្សារាល់ថ្ងៃរបស់អ៊ីស្រាអែល កំពុងគំរាមកំហែងដល់កិច្ចព្រមព្រៀងទាំងមូល ខណៈពេលដែលទ្រង់អំពាវនាវឲ្យមានវឌ្ឍភាពបន្ទាន់ឆ្ពោះទៅរកដំណាក់កាលបន្ទាប់នៃកិច្ចព្រមព្រៀង ដើម្បីបញ្ចប់សង្រ្គាមប្រល័យពូជសាសន៍របស់អ៊ីស្រាអែលលើដែនដីឡោមព័ទ្ធមួយនេះ ។ព្រះអង្គម្ចាស់ Al Thani បានធ្វើការអំពាវនាវបែបនេះ បន្ទាប់ពីកិច្ចប្រជុំជាមួយរដ្ឋមន្រ្តីការបរទេសសហរដ្ឋអាមេរិកលោក Marco Rubio នៅទីក្រុងវ៉ាស៊ីនតោនកាលពីថ្ងៃពុធ ។ព្រះអង្គម្ចាស់ Al Thani ដែលប្រទេសរបស់ទ្រង់រួមចំណែសម្របសម្រួលយ៉ាងសំខាន់ មានបន្ទូលថា ជំនួយមនុស្សធម៌ត្រូវតែទៅដល់តំបន់ហ្កាហ្សាដោយគ្មានលក្ខខណ្ឌ ហើយដំណាក់កាលទី ២នៃកិច្ចព្រមព្រៀង ត្រូវតែចាប់ផ្តើមជាបន្ទាន់ ។កិច្ចពិភាក្សានៅជំនួបយុទ្ធសាស្រ្តកាតា-សហរដ្ឋអាមេរិកលើកទី ៧ បានកើតមានឡើង ស្របពេលបទឈប់បាញ់ដ៏ផុយស្រួយនៅតែបន្តរង្គោះរង្គើរ ស្របពេលគ្រាអាសន្នមនុស្សធម៌កាន់តែលិចលង់នៅទូទាំងតំបន់ហ្កាហ្សា ។យោងតាមការតាមដានការបំពានរបស់កាសែត Al Jazeera បានឲ្យដឹងថា ចាប់តាំងពីបទឈប់បាញ់ចូលជាធរមានកាលពីថ្ងៃទី ១០ ខែតុលា អ៊ីស្រាអែល បានបំពានបទឈប់បាញ់យ៉ាងហោច ៧៣៨លើក ដោយបានសម្លាប់ជនប៉ាឡេស្ទីន ៣៩៤នាក់ និងធ្វើមនុស្ស ១.០៧៥នាក់ផ្សេងទៀត រងរបួស ៕

ប្រធានាធិបតីប្រេស៊ីលបង្ហាញក្តីកង្វល់ពីជំហររបស់លោក Trumpចំពោះអាមេរិកឡាទីន

អំឡុងជំនួបគណៈរដ្ឋមន្រ្តីសាធារណៈនៅទីក្រុង Brasilia ប្រធានាធិបតីប្រេស៊ីលលោក Luiz Inacio Lula da Silva បាននិយាយកាលពីថ្ងៃពុធថា លោកមានការព្រួយបារម្ភចំពោះអាមេរិកឡាទីន និងជំហររបស់លោកប្រធានាធិបតី Donald Trump ចំពោះតំបន់មួយនេះ ។លោក Lulaនិយាយប្រាប់រដ្ឋមន្រ្តីរបស់លោកថា ពួកគេត្រូវការបន្តប្រុងប្រយ័ត្នខ្ពស់ចំពោះស្ថានភាព ហើយនិងស្នើសុំពួកគេបន្តនៅជិតគ្នា ក្នុងករណីកិច្ចសន្ទនាត្រូវការជាមួយមេដឹកនាំផ្សេង ។ប្រធានាធិបតីប្រេស៊ីលបានរូបនេះ រំលឹកឡើងវិញថា អាមេរិកឡាទីន គឺជាតំបន់សន្តិភាព ដោយគ្មានអាវុធនុយក្លេអ៊ែរ ហើយលោកបាននិយាយប្រាប់លោក Trump ថា កម្លាំងពាក្យសម្តី អាចមានតម្លៃជាងកម្លាំងអាវុធទៅទៀត ។លោក Lulaបានផ្តល់ការជួយ ដើម្បីសម្របសម្រួលកិច្ចប្រជុំរវាងសហរដ្ឋអាមេរិក និងវ៉េណេស៊ុយអេឡាផងដែរ ដោយលោកនិយាយថា ប្រេស៊ីលអាចរួមចំណែក បើសិនជាលោក Trumpចាប់អារម្មណ៍និយាយពីលក្ខខណ្ឌល្អជាមួយប្រទេសមួយនេះ ។សូមបញ្ជាក់ថា រដ្ឋាភិបាលរបស់លោក Trumpពុំទទួលស្គាល់លោក Nicolas Maduro ថាជាមេដឹកនាំស្របច្បាប់របស់វេណេស៊ុយអេឡានោះទេ ហើយនិងបានបង្កើនវត្តមានយោធានៅក្នុងតំបន់នេះ ដោយបើកការវាយប្រហារលើនាវារត់ពន្ធគ្រឿងញៀនសង្ស័យ និងរឹបអូសនាវាដឹកប្រេង ៕

យន្តហោះយោធាអាមេរិកយ៉ាងតិច ៥គ្រឿង កំពុងប្រតិបត្តការនៅលើសមុទ្រ ក្បែរព្រំដែនវ៉េណេស៊ុយ អេឡា

ប្រភពមួយនៅក្នុងផ្នែកត្រួតពិនិត្យចរាចរណ៍ផ្លូវអាកាស បានប្រាប់សារព័ត៌មានTASSថា យ៉ាងហោចណាស់មានយន្តហោះយោធាអាមេរិកចំនួន ៥គ្រឿង កំពុងប្រតិបត្តិការលើដែនទឹកអព្យាក្រឹតនៅសមុទ្រ ការ៉ាអ៊ីប ក្បែរព្រំដែនវ៉េណេស៊ុយអេឡា។ យោងតាមប្រភពនោះ យន្តហោះទាំងនោះមានមូលដ្ឋាននៅលើនាវាផ្ទុកយន្តហោះ។ប្រភពដដែលបាននិយាយថា៖«យ៉ាងហោចណាស់មានយន្តហោះទម្លាក់គ្រាប់បែក Boeing F/A-18E Super Hornet ចំនួន បីគ្រឿង និងយន្តហោះចាប់សញ្ញាដោយរ៉ាដារយៈចម្ងាយឆ្ងាយគ្រប់អាកាសធាតុចំនួន ពីរគ្រឿង ត្រូវបានគេឃើញ។នាពេលមុននេះ អ្នកកាសែតអាមេរិកលោក Tucker Carlson បានលើកឡើងថា ប្រធានាធិបតីអាមេ រិកលោក ដូណាល់ ត្រាំ (Donald Trump) អាចប្រកាសសង្គ្រាមលើប្រទេសវ៉េណេស៊ុយអេឡា នៅព្រឹកថ្ងៃទី១៨ ខែធ្នូ។ លោក Carlson បាននិយាយដើម្បីឆ្លើយតបទៅនឹងសំណួរអំពីថាតើ ត្រាំ អាចចាប់ផ្តើមសង្គ្រាមលើគេហទំព័រ YouTube របស់អ្នកវិភាគផ្នែកច្បាប់លោក Andrew Napolitano ដែរឬទេថា៖ «សមាជិកសភាត្រូវបានជូនដំណឹងកាលពីថ្ងៃអង្គារថា សង្គ្រាមមួយកំពុងមកដល់ ហើយវានឹងត្រូវបានប្រកាសនៅក្នុងសុន្ទរកថាទៅកាន់ប្រជាជាតិនៅថ្ងៃពុធ វេលាម៉ោង ៩ យប់ ដោយលោក ប្រធានាធិបតី។ អ្នកកាសែតរូបនេះ បានបន្ថែមថា លោកមិនដឹងថា ការប្រកាសនេះ «នឹងកើតឡើងពិតប្រាកដឬអត់» នោះទេ។ នៅថ្ងៃទី១៦ ខែធ្នូ លោក ត្រាំ បាននិយាយថា លោកមានបំណងថ្លែងទៅកាន់ប្រជាជាតិពីសេតវិមាននៅថ្ងៃទី១៧ ខែធ្នូ វេលាម៉ោង ៩យប់ (ម៉ោង ២ព្រឹក ម៉ោងសកល)។ លោកប្រធានាធិបតី មិនបានបញ្ជាក់ថា ប្រធានបទនៃសុន្ទរកថានេះ ជាអ្វីនោះទេ៕

ប្រមុខជនភៀសខ្លួន ប្រាប់ទីក្រុងវ៉ាស៊ីនតោនថា UN គឺ «សំខាន់ខ្លាំងណាស់»

ប្រធានជនភៀសខ្លួនរបស់អង្គការសហប្រជាជាតិ នៅថ្ងៃព្រហស្បតិ៍ (ទី១៨ ខែធ្នូ) នេះ បានឲ្យដឹងថា លោកចង់រំលឹកទីក្រុងវ៉ាស៊ីនតោនថា ទោះបីជាមានការរិះគន់សមហេតុសមផលក៏ដោយ ក៏ UN នៅតែមានសារៈសំខាន់ផ្ដល់អត្ថប្រយោជន៍យ៉ាងធំធេង នៅក្នុងពិភពលោកមួយដែលហ៊ុមព័ទ្ធដោយជម្លោះ និងវិបត្តិ។ឧត្តមស្នងការជិតផុតអាណត្តិរបស់ UN ទទួលបន្ទុកជនភៀសខ្លួន (UNHCR) លោក Filippo Grandi បានប្រាប់អ្នកសារព័ត៌មានថា លោកចង់រំលឹកទៅសហរដ្ឋអាមេរិក ដែលជាម្ចាស់ជំនួយដ៏ធំបំផុត សម្រាប់ទីភ្នាក់ងាររបស់លោក អំពីតម្លៃដែល UN អាចផ្តល់ជូន។នៅចុងបញ្ចប់នៃវេទិកាជនភៀសខ្លួនពិភពលោករយៈពេល ៣ថ្ងៃ ក្នុងទីក្រុងហ្សឺណែវ ប្រទេសស្វីស លោកបាននិយាយថា៖ «មានស្ថានភាពជច្រើន ដែលមិនអាចខ្វះ UN បាន ពីព្រោះគ្មាននរណាម្នាក់អាចធ្វើការងារនោះបានទេ»។ លោកបានបញ្ជាក់ថា៖ «យើងមានភាពស្របច្បាប់ យើងមានចំណេះដឹង និងមានអាណត្តិ»។យ៉ាងណាក្ដី លោកបានទទួលស្គាល់ការរិះគន់ ដែលថា UN គឺជា «អង្គការដែលមានភាពស្មុគស្មាញពេក ទំហំធំជ្រុល និងគ្មានប្រសិទ្ធភាព»។ តែលោកសង្កត់ធ្ងន់ថា៖ «សាររបស់ខ្ញុំទៅកាន់ទីក្រុងវ៉ាស៊ីនតោន នាពេលនេះ គឺជាសារយ៉ាងច្បាស់លាស់ណាស់ ហើយឥឡូវនេះ យើងទាំងអស់គ្នា កំពុងប្រញាប់ប្រញាល់រៀបចំខ្លួនឲ្យល្អប្រសើរឡើងវិញ។ សូមចងចាំថា UN មានតម្លៃណាស់»។គួរបញ្ជាក់ថា UNHCR ក៏ដូចទីភ្នាក់ងារ UN ជាច្រើនទៀតដែរ ដែលត្រូវបានរងផលប៉ះពាល់ដោយសារការកាត់ជំនួយអន្តរជាតិ ចាប់តាំងពីប្រធានាធិបតីអាមេរិក លោក Donald Trump បានវិលត្រលប់ទៅកាន់តំណែងវិញ កាលខែមករា និងដោយសារតែម្ចាស់ជំនួយធំៗជាច្រើនផ្សេងទៀត ក៏បានរឹតត្បិតការផ្ដល់មូលនិធិរបស់ពួកគេផងដែរ៕

អ្នកការទូត៖ រុស្ស៊ីសង្ឃឹមថា អាមេរិកនឹងប្រើប្រាស់វិធីសាស្រ្តជាក់ស្តែងចំពោះស្ថានភាពជុំវិញប្រទេសវ៉េណេស៊ុយអេឡា

មន្ត្រីជាន់ខ្ពស់ម្នាក់នៃក្រសួងការបរទេសរុស្ស៊ី បានប្រាប់សារព័ត៌មាន TASSថា រុស្ស៊ីសង្ឃឹមថា រដ្ឋបាលអាមេរិកនឹងបង្ហាញវិធីសាស្រ្តជាក់ស្តែងចំពោះស្ថានភាពជុំវិញប្រទេសវ៉េណេស៊ុយអេឡា ដើម្បីជៀសវាងកំហុសឆ្គង ដែលនឹងប៉ះពាល់ដល់តំបន់ទាំងមូល។ លោក Alexander Shchetinin ប្រធាននាយកដ្ឋានទទួលបន្ទុកកិច្ចការអាមេរិកឡាទីនរបស់ក្រសួងនេះ បានថ្លែង ដោយធ្វើអត្ថាធិប្បាយលើសេចក្តីថ្លែងការណ៍របស់លោក ត្រាំ ស្តីពីការទទួលស្គាល់អាជ្ញាធរវ៉េណេស៊ុយអេឡាថា ជា «អង្គការភេរវកម្ម»ថា៖«យើងសង្ឃឹមថា វិធីសាស្រ្តជាក់ស្តែង និងច្បាស់លាស់ចំពោះស្ថានភាព ដែលតែងតែស្របតាមរដ្ឋបាលប្រធានាធិបតីអាមេរិក ដូណាល់ ត្រាំ នឹងទទួលបានជ័យជម្នះក្នុងសកម្មភាពជាក់ស្តែងរបស់រដ្ឋបាលនេះ។ វិធីសាស្រ្តជាក់ស្តែងបែបនេះ នឹងធ្វើឲ្យ ប្រទេសនេះអាច បញ្ជៀសស្ថានភាពដែលអាចមានផលវិបាកធ្ងន់ធ្ងរខ្លាំងសម្រាប់តំបន់ ដើម្បីជៀសវាងកំហុសឆ្គងដែលនឹងត្រូវកែតម្រូវនៅពេលក្រោយ។ យើងសង្ឃឹមថា វិធីសាស្រ្តរបស់ពួកគេនឹងដូចនេះ»។ លោកបាននិយាយ៖«យើងសង្ឃឹមថា សុភវិនិច្ឆ័យនឹងមានជ័យជម្នះ ហើយនឹងបន្តពីរឿងនេះ នៅក្នុងសកម្មភាពរបស់យើង»។ នាពេលថ្មីៗនេះ លោក ត្រាំ បានបញ្ជាឲ្យរារាំងនាវាដឹកប្រេងទាំងអស់ដែលត្រូវបានដាក់ទណ្ឌកម្ម ពីការធ្វើដំណើរទៅ និងមកពីប្រទេសវ៉េណេស៊ុយអេឡា ហើយបានសរសេរនៅលើវេទិកានៃប្រព័ន្ធផ្សព្វផ្សាយ Truth Social របស់លោកថា លោកបានចាត់ទុកអាជ្ញាធរវ៉េណេស៊ុយអេឡាថា ជា «អង្គការភេរវកម្មបរទេស»៕

បណ្ដាញសង្គម

ព័ត៌មានថ្មីៗ

ស៊ីរីបញ្ជាក់ថា មេដឹកនាំជាន់ខ្ពស់របស់ ISIS ត្រូវបានសម្លាប់

សង្ខេបស្ថានការណ៍នៅតាមបន្ទាត់ព្រំដែនកម្ពុជា-ថៃ អំពីករណីយោធាថៃនៅតែបន្តការបាញ់ប្រហារ ដើម្បីឈ្លានពានមកលើដែនអធិបតេយ្យរបស់កម្ពុជានៅទិសយោធភូមិភាគទី៤ និងយោធភូមិភាគទី៥

ចិនជំរុញទីភ្នាក់ងារទេសចរណ៍កាត់បន្ថយភ្ញៀវទេសចរទៅជប៉ុនចំនួន ៤0ភាគរយ

រដ្ឋមន្រ្តីសុខាភិបាល បានផ្តល់ការបូកសរុបការងារសុខាភិបាលសម្រាប់ឆ្នាំ២០២៥ មានលក្ខណៈល្អ និងកំពុងបន្តឈរលើផ្លូវនៃវឌ្ឍនភាពដ៏វិជ្ជមានជាបន្តបន្ទាប់

ប៉ូឡូញស្ទាក់យន្តហោះឈ្លបយកការណ៍រុស្ស៊ី នៅលើសមុទ្របាល់ទិក

នាយករដ្ឋមន្ត្រីជប៉ុន ធានាជាថ្មីដល់ទីផ្សារ ជាមួយនឹងការគ្រប់គ្រងសារពើពន្ធ ក្នុងថវិកាឆ្នាំក្រោយ

G7 នឹងពិភាក្សាអំពីខ្សែច្រវាក់ផ្គត់ផ្គង់រ៉ែសំខាន់ៗ ដើម្បីដោះស្រាយការពឹងផ្អែកលើចិន

មន្ត្រីជាន់ខ្ពស់៖ កងទ័ពចិនពង្រឹងការសន្ទនាជាមួយរុស្ស៊ី សហរដ្ឋអាមេរិក និងសហភាពអឺរ៉ុប នៅក្នុងឆ្នាំ ២០២៥

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877