BTV NEWS

លោកLavrov៖ ការប្រឈមមុខដាក់គ្នាដោយផ្ទាល់រវាងNATO និងរុស្ស៊ី អាចកើនឡើងដល់ការវាយប្រហារនុយក្លេអ៊ែរ

អ៊ុយក្រែនវាយប្រហារដោយដ្រូនជិត ២០០គ្រឿងទៅលើទីក្រុងមូស្គូ បណ្តាលឲ្យមនុស្សយ៉ាងតិច១៧នាក់រងរបួស

លោក TRUMP ពិពណ៌នាការចុះហត្ថលេខាលើ MoU របស់អ៊ីរ៉ង់ជាមួយអាមេរិកថា ជា «ការចុះចាញ់ដោយគ្មានលក្ខខណ្ឌ»

លោក Vance៖ អាមេរិកត្រៀមខ្លួនជាស្រេចដើម្បីកាត់បន្ថយវត្តមានយោធានៅជិតអ៊ីរ៉ង់ដល់កម្រិតមុនជម្លោះ

ព័ត៌មានអន្តរជាតិ

អ្នកចម្រៀង Shakira និង Burna Boy ធ្វើឲ្យអ្នកទស្សនារំភើបរីករាយ ក្នុងពិធីបើកព្រឹត្តិការណ៍ World Cup

តារាចម្រៀងស្រី Shakira និងអ្នកចម្រៀងប្រុសសញ្ជាតិនីហ្សេរីយ៉ា Burna Boy បានធ្វើឲ្យអ្នកទស្សនាអង្គុយមិនជាប់នឹងកៅអីរបស់ពួកគេ ក្នុងពិធីបើកព្រឹត្តិការណ៍ប្រកួតបាល់ទាត់ពិភពលោកឆ្នាំ២០២៦ (2026 World Cup) នៅឯកីឡដ្ឋាន Estadio Azteca កាលពីថ្ងៃព្រហស្បតិ៍ (ទី១១ ខែមិថុនា ឆ្នាំ២០២៦) នៅមុនការប្រកួតបើកឆាក រវាងក្រុមសហម្ចាស់ផ្ទះ គឺម៉ិកស៊ិក និងអាហ្វ្រិកខាងត្បូង។អំឡុងការសម្ដែងដ៏គួរឲ្យជក់ចិត្តនោះ គេបានឃើញអ្នករាំនាំគ្នារាំជុំវិញពានចម្លង World Cup ខណៈពេលដែលកាំជ្រួចភ្ញីបានផ្ទុះឡើងនៅឯពហុកីឡដ្ឋានប្រវត្តិសាស្ត្រដែលអាចផ្ទុកមនុស្ស ៨០.០០០នាក់ ជាទីដែលធ្លាប់បានរៀបចំការប្រកួតវគ្គផ្តាច់ព្រ័ត្រ World Cup ឆ្នាំ១៩៧០ និងឆ្នាំ១៩៨៦ ហើយត្រូវបានជួសជុលឡើងវិញ សម្រាប់ការប្រកួតឆ្នាំនេះ។នៅក្នុងពេលវេលាដ៏គួរឲ្យរំភើបខ្លាំងនៃពិធីបើកនេះ តារាចម្រៀងស្រីសញ្ជាតិកូឡុំប៊ី Shakira និងអ្នកចម្រៀង Burna Boy បានច្រៀងរួមគ្នានូវបទ «Dai Dai» ដែលជាបទចម្រៀងផ្លូវការនៃការប្រកួតបាល់ទាត់កម្រិតពិភពលោក ខណៈសំឡេងហ៊ោកញ្ជ្រៀវលាន់ចេញពីហ្វូងមនុស្សយ៉ាងកងរំពងពេញកីឡដ្ឋាន។គួរបញ្ជាក់ថា ការប្រកួតកីឡាបាល់ទាត់របស់ពិភពលោកដែលតែងកើតមានឡើង ៤ឆ្នាំម្ដង និងដែលមាន ៤៨ក្រុមចូលរួមនេះ ក៏កំពុងត្រូវបានធ្វើជាម្ចាស់ផ្ទះដោយសហរដ្ឋអាមេរិក និងកាណាដាផងដែរ ហើយនឹងមានការប្រកួតចំនួន ១០៤ប្រកួត ដែលវគ្គផ្តាច់ព្រ័ត្រ នឹងត្រូវធ្វើឡើងនៅរដ្ឋ New Jersey នាថ្ងៃទី១៩ ខែកក្កដា៕

NYT៖ អាមេរិកគ្រោងកាត់បន្ថយយន្តហោះចម្បាំង និងនាវាចម្បាំង សម្រាប់ប្រតិបត្តិការណាតូ នៅអឺរ៉ុប

ដោយដកស្រង់សម្តីមន្ត្រីជាន់ខ្ពស់អឺរ៉ុប ២រូប សារព័ត៌មាន New York Times (NYT) បានរាយការណ៍នៅថ្ងៃសុក្រ (ទី១២ ខែមិថុនា ឆ្នាំ២០២៦) នេះថា សហរដ្ឋអាមេរិកមានគម្រោងកាត់បន្ថយយន្តហោះ និងនាវាចម្បាំងយ៉ាងច្រើន ដែលខ្លួនផ្តល់ជូន សម្រាប់ប្រតិបត្តិការរបស់អង្គការណាតូ (NATO) នៅតំបន់អឺរ៉ុប ។សេចក្ដីរាយការណ៍នេះបានឲ្យដឹងថា ការសម្រេចនេះនឹងកម្រិតសមត្ថភាពរបស់អង្គការណាតូ ក្នុងការបើកការវាយប្រហារចម្ងាយឆ្ងាយ និងធ្វើការឃ្លាំមើល។របាយការណ៍នេះបានបញ្ជាក់ថា ផែនការរបស់សហរដ្ឋអាមេរិក រួមមានការកាត់បន្ថយចំនួនយន្តហោះចម្បាំង F-16 និង F-15E ពីប្រហែល ១៥០គ្រឿង មកត្រឹម ១០០គ្រឿង ក៏ដូចជាការកាត់បន្ថយយន្តហោះឈ្លបយកការណ៍នៅសមុទ្រ ពី ២៦គ្រឿង មកត្រឹម ១៥គ្រឿង និងការដកយន្តហោះដឹកប្រេងឥន្ធនៈទាំង ៨គ្រឿង ដែលខ្លួនធ្លាប់ផ្តល់ឲ្យអឺរ៉ុប។ជាមួយគ្នានេះ សារព័ត៌មាន NYT បានឲ្យដឹងទៀតថា គម្រោងនេះក៏មានគោលបំណងចល័តទៅទីតាំងផ្សេងនូវនាវាមុជទឹកបាញ់មីស៊ីល និងនាវាផ្ទុកយន្តហោះ រួមជាមួយនឹងនាវាចម្បាំងជាច្រើនគ្រឿង និងយន្តហោះចម្បាំងជាច្រើនគ្រឿង ដែលចូលរួមក្នុងបេសកកម្មរបស់នាវាផ្ទុកយន្តហោះ ដោយបន្ថែមថា ក្រុមយន្តហោះទម្លាក់គ្រាប់បែកមួយ ក្នុងចំណោម ២ក្រុមដែលពីមុនត្រូវបានចាត់តាំង សម្រាប់ការពារជាតិអឺរ៉ុប ក៏អាចនឹងត្រូវបានផ្លាស់ប្តូរទីតាំងផងដែរ។ទីភ្នាក់ងារសារព័ត៌មាន Reuters មិនអាចផ្ទៀងផ្ទាត់របាយការណ៍នេះភ្លាមៗបានទេ។ ហើយអង្គការណាតូ និងក្រសួងការពារជាតិសហរដ្ឋអាមេរិក ក៏មិនបានឆ្លើយតបភ្លាមៗនោះដែរ ចំពោះសំណើសុំការអត្ថាធិប្បាយ ពាក់ព័ន្ធនឹងរបាយការណ៍នេះ៕

NATO នឹងកាត់បន្ថយចំនួនកងកម្លាំងរក្សាសន្តិភាពនៅប្រទេសកូសូវ៉ូ

អង្គការណាតូបាននិយាយនៅថ្ងៃសុក្រនេះថា ខ្លួននឹងកាត់បន្ថយចំនួនកងទ័ពក្នុងបេសកកម្មរក្សាសន្តិភាពរបស់ខ្លួន នៅប្រទេសកូសូវ៉ូ ដោយសារស្ថានភាពសន្តិសុខ បានប្រសើរឡើង។បេសកកម្ម KFOR (កងកម្លាំងកូសូវ៉ូ) ដែលបច្ចុប្បន្នមានកងទ័ព ៤.៦០០នាក់ ត្រូវបានឈរជើង នៅប្រទេសកូសូវ៉ូ ចាប់តាំងពីចុងបញ្ចប់នៃសង្គ្រាមឆ្នាំ ១៩៩៨-១៩៩៩ រវាងក្រុមឧទ្ទាមបំបែកខ្លួនជនជាតិ អាល់បានី និងកងកម្លាំងស៊ែរប៊ី។លោកឧត្តមសេនីយ៍អាមេរិក Alexus Grynkewich មេបញ្ជាការយាធាជាន់ខ្ពស់របស់អង្គការណាតូប្រចាំទ្វីបអឺរ៉ុប បានលើកឡើងថា៖«លក្ខខណ្ឌបច្ចុប្បន្នផ្តល់ឱកាស ដើម្បីបង្កើនប្រសិទ្ធភាពទំហំ និងឥរិយាបថរបស់បេសកកម្ម KFOR បន្ថែមទៀត»។អង្គការណាតូបាននិយាយថា៖«ការកាត់បន្ថយដែលបានកំណត់ចំនួន» ត្រូវបានគេរំពឹងថា នឹងកើតឡើង នៅឆ្នាំនេះ ហើយការកាត់បន្ថយនឹង «កើតឡើងជាបណ្តើរៗ និងស្របតាមលក្ខខណ្ឌជាក់ស្តែង ហើយអាចត្រូវបានផ្លាស់ប្តូរ៕

កិច្ចព្រមព្រៀងរបស់លោក Trump ជាមួយអ៊ីរ៉ង់ យឺតយ៉ាវដោយសាររបៀបនៃការចរចារបស់ភាគីទាំង២

លោកប្រធានាធិបតី Donald Trump បាននិយាយម្តងហើយម្តងទៀតថា សហរដ្ឋអាមេរិក និងអ៊ីរ៉ង់ កំពុងស្ថិតនៅលើចំណុចកៀកមែនទែនហើយ ក្នុងការឈានកិច្ចព្រមព្រៀង ដើម្បីបញ្ចប់ជម្លោះរបស់ភាគីទាំង២។ ប៉ុន្តែការពិតជាក់ស្ដែង បានបង្ហាញថា វាគឺជាអ្វីដែលពិបាកនឹងសម្រេចបាន ដោយមួយផ្នែកដោយសារតែលក្ខណៈនៃការចរចាផ្ទាល់តែម្ដង។ឧទាហរណ៍ចុងក្រោយបំផុត បានកើតឡើងនៅថ្ងៃសុក្រ (ទី១២ ខែមិថុនា ឆ្នាំ២០២៦) នេះ នៅពេលដែលលោក Trump បានអះអាងថា កិច្ចព្រមព្រៀងមួយជិតកើតមានហើយ ដោយប្រាប់អ្នកសារព័ត៌មានថា កិច្ចព្រមព្រៀងមួយអាចត្រូវបានចុះហត្ថលេខាក្នុងរង្វង់ចុងសប្តាហ៍នេះ។ តែអ៊ីរ៉ង់បានបដិសេធការអះអាងរបស់លោក Trump ដោយទីភ្នាក់ងារសារព័ត៌មានពាក់កណ្តាលផ្លូវការ Fars របស់ប្រទេសនេះ បានរាយការណ៍ថា មេដឹកនាំរបបនេះមិនបានអនុម័តឯកសារណាមួយជាមួយសហរដ្ឋអាមេរិកនោះទេ។ទោះបីជាទំនោររបស់លោក Trump ក្នុងការនិយាយលើសពីការពិត ការគំរាមកំហែង និងការបញ្ចុះបញ្ចូល ជួយពន្យល់ពីភាពមិនច្បាស់លាស់ ស្ដីពីស្ថានភាពនៃការចរចាក៏ដោយ ក៏មានហេតុផលមួយទៀតដែលកិច្ចព្រមព្រៀងមួយ ពិបាកសម្រេចបាន ដោយនោះគឺវិធីដែលសហរដ្ឋអាមេរិក និងអ៊ីរ៉ង់កំពុងអនុវត្តការចរចារបស់ពួកគេ។មន្ត្រីអាមេរិក អ្នកវិភាគ និងបុគ្គលដែលដឹងពីបញ្ហានេះ លើកឡើងថា ការចរចា គឺមិនសូវផ្ដោតលើកិច្ចពិភាក្សាជាក់ស្តែង និងជាដំណើរការយឺតយ៉ាវស្មុគស្មាញ ដែលសារត្រូវចំណាយពេលច្រើនថ្ងៃ ដើម្បីបញ្ជូនទីទៅមក។ អ្នកទាំងនោះបានស្នើសុំនិយាយ ក្នុងលក្ខខណ្ឌមិនបញ្ចេញឈ្មោះ ដោយសារកិច្ចពិភាក្សាមិនត្រូវបានឲ្យដឹងជាសាធារណៈឡើយ។បុគ្គលទាំងនោះ បានប្រាប់ឲ្យដឹងបន្ថែមទៀតថា អ្វីដែលសំខាន់នោះ គឺថា សំណើពីក្រុមអ្នកចរចាអាមេរិក ឆ្លងកាត់ផ្លូវការទូតដ៏ស្មុគស្មាញខ្លាំង ដែលជារឿយៗពាក់ព័ន្ធនឹងអ្នកនាំសារខាងអ៊ីរ៉ង់ ដោយសារពួកគេត្រូវលាក់បាំងទីតាំងរបស់មេដឹកនាំកំពូល លោក Mojtaba Khamenei៕

របាយការណ៍៖ អារ៉ាប់រួម និងអ៊ីរ៉ង់ ជួបពិភាក្សាទល់មុខគ្នា ដើម្បីបន្ធូរបន្ថយភាពតានតឹង

យោងតាមការចេញផ្សាយរបស់ប្រព័ន្ធផ្សព្វផ្សាយអាមេរិកបានឲ្យដឹងថា មន្ត្រីសន្តិសុខជាន់ខ្ពស់មកពីប្រទេសអារ៉ាប់រួម(UAE) និងអ៊ីរ៉ង់ បានជួបប្រជុំទល់មុខគ្នាជាលើកដំបូង ចាប់តាំងពីសហរដ្ឋអាមេរិក និងអ៊ីស្រាអែល បានបើកការវាយប្រហារទ្រង់ទ្រាយធំលើអ៊ីរ៉ង់ កាលពីថ្ងៃទី ២៨ ខែកុម្ភៈ ។យោងតាមសេចក្តីរាយការណ៍របស់សារព័ត៌មាន Bloomberg បាននិយាយថា កិច្ចប្រជុំនេះ បានបង្ហាញពីការផ្លាស់ប្តូរច្រើនសម្រាប់ភាគីទាំងពីរ ហើយបានកើតឡើងក្នុងពេលមានការកើនឡើងការទទួលស្គាល់អំពីសារៈសំខាន់នៃទំនាក់ទំនងទ្វេភាគីដ៏ស្ងប់ស្ងាត់។ប្រទេសអារ៉ាប់រួម បច្ចុប្បន្នទំនងជាកំពុងអនុវត្តតាមវិធីដូចគ្នា ខណៈប្រទេសកាតា និងអារ៉ាប៊ីសាអ៊ូឌីត ត្រូវបានវាយប្រហារដោយអ៊ីរ៉ង់ ប៉ុន្តែកំពុងបន្តផ្នែកការទូតដើម្បីបន្ធូរបន្ថយភាពតានតឹង។យោងតាមរបាយការណ៍ ក្នុងអំឡុងពេលជម្លោះ អ៊ីរ៉ង់បានវាយប្រហារលើប្រទេសអារ៉ាប់រួមជាច្រើនលើក ខណៈទីក្រុងអាប៊ូដាប៊ីបានវាយបកវិញ។ ប្រទេសអារ៉ាប់រួម គឺជាដៃគូពាណិជ្ជកម្មធំបំផុតមួយរបស់អ៊ីរ៉ង់ នៅមុនពេលសង្គ្រាម។

ប្រទេសនៅអឺរ៉ុប បង្កើនការចំណាយលើវិស័យការពារជាតិ ក្នុងពេលមានការព្រួយបារម្ភខ្លាំងឡើងអំពីសន្តិសុខ

ការប្រកាសកាលពីពេលថ្មីៗនេះរបស់សហរដ្ឋអាមេរិកថា ខ្លួននឹងកាត់បន្ថយវត្តមានយោធានៅអឺរ៉ុប រួមជាមួយនឹងទំនាក់ទំនងដ៏តានតឹងរបស់សហភាពអឺរ៉ុប(EU) ជាមួយរុស្ស៊ី បានបង្កើនការព្រួយបារម្ភអំពីសន្តិសុខនៅទូទាំងប្លុក និងបានពន្លឿនកិច្ចខិតខំប្រឹងប្រែងដើម្បីពង្រឹងសមត្ថភាពយោធា។រដ្ឋមន្ត្រីក្រសួងការពារជាតិប្រទេសបែលហ្ស៊ិក លោក Theo Francken បានប្រកាសពីផែនការវិនិយោគទឹកប្រាក់ចំនួន៣,៧ពាន់លានអឺរ៉ូ ឬ៤,២៧ពាន់លានដុល្លារអាមេរិក លើនវានុវត្តន៍ការពារជាតិនៅទសវត្សរ៍បន្ទាប់។ ក្រសួងការពារជាតិ បាននិយាយថា ការវិនិយោគនេះ មានគោលបំណងជំរុញការស្រាវជ្រាវ អភិវឌ្ឍន៍ និងពង្រឹងឧស្សាហកម្មការពារជាតិរបស់ប្រទេស។ប្រទេសនានា រួមមានអាល្លឺម៉ង់ អង់គ្លេស ប៉ូឡូញ និងរ៉ូម៉ានី ក៏បានប្រកាសពីផែនការវិនិយោគថ្មីលើការចំណាយលើវិស័យការពារជាតិ ការផ្គត់ផ្គង់យោធា និងការផលិតសព្វាវុធផងដែរ ខណៈយន្តការផ្តល់ហិរញ្ញវត្ថុរបស់សហភាពអឺរ៉ុបដើម្បីពង្រឹងការត្រៀមការពារជាតិ បានចូលដល់ដំណាក់កាលអនុវត្ត ក្នុងការឆ្លើយតបទៅនឹងការព្រួយបារម្ភកាន់តែខ្លាំងឡើងអំពីសន្តិសុខ។កាលពីថ្ងៃទី៥ ខែមិថុនា នាយករដ្ឋមន្ត្រីអង់គ្លេស លោក Keir Starmer បានព្រមានអំពីលទ្ធភាពនៃការវាយប្រហារលើរដ្ឋជាសមាជិកណាតូ និងបានប្រកាសពីផែនការបង្កើនការចំណាយលើវិស័យការពារជាតិដល់២,៥ ភាគរយនៃផលិតផលក្នុងស្រុកសរុប (GDP) ចាប់ពីឆ្នាំ២០២៧ ជាមួយនឹងការបង្កើនបន្ថែម ដល់៣ភាគរយ ដែលបានគ្រោងទុកនៅពេលក្រោយ។

អេហ្ស៊ីប ជំរុញឱ្យសហរដ្ឋអាមេរិក និងអ៊ីរ៉ង់ ចាប់យកឱកាសដើម្បីបញ្ចប់សង្គ្រាម

ក្រសួងការបរទេសអេហ្ស៊ីប បានបង្ហាញនូវក្តីសង្ឃឹមថា ឱកាសនេះនឹងត្រូវបានចាប់យកដើម្បីឈានដល់កិច្ចព្រមព្រៀងចុងក្រោយរវាងសហរដ្ឋអាមេរិក និងអ៊ីរ៉ង់។នៅក្នុងសេចក្តីថ្លែងការណ៍មួយដែលចេញផ្សាយនៅលើបណ្តាញសង្គម X ក្រសួងបាននិយាយថា អេហ្ស៊ីប «បានតាមដានដោយមានការពេញចិត្តយ៉ាងខ្លាំង និងសរសើរអ្វីដែលត្រូវបានប្រកាសដោយប្រធានាធិបតីសហរដ្ឋអាមេរិក លោក Donald Trump ទាក់ទងនឹងការលុបចោលការវាយប្រហារដោយយោធាតាមផែនការ ទៅលើប្រទេសអ៊ីរ៉ង់»។ក្រសួងបាននិយាយថា អេហ្ស៊ីបសង្ឃឹមថា «ឱកាស នឹងត្រូវបានចាប់យកដើម្បីឈានដល់កិច្ចព្រមព្រៀងលើបញ្ហាដែលនៅសេសសល់នានា និងដើម្បីជំរុញបរិយាកាសដែលអំណោយផលដល់ការបញ្ចប់សង្គ្រាម និងការចាប់ផ្តើមដំណាក់កាលថ្មីនៃស្ថិរភាពក្នុងតំបន់»។ក្រសួងបាននិយាយបន្ថែមថា អេហ្ស៊ីប «បន្តកិច្ចខិតខំប្រឹងប្រែងដោយមិននឿយហត់ ហ្មត់ចត់ និងស្មោះត្រង់ ក្នុងការសម្របសម្រួល និងមានកិច្ចសហប្រតិបត្តិការជាមួយដៃគូក្នុងតំបន់ និងអន្តរជាតិ ដើម្បីបន្ធូរបន្ថយភាពតានតឹង»។

អ្នកវិភាគ៖ ការបើកច្រកសមុទ្រ Hormuz នឹងផ្តល់ប្រយោជន៍ដល់អ៊ីរ៉ង់ តំបន់ និងពិភពលោក

លោក Richard Weitz អ្នកជំនាញសន្តិសុខអន្តរជាតិនៅមហាវិទ្យាល័យការពារជាតិណាតូ បាននិយាយទៅកាន់សារព័ត៌មាន Al Jazeera អំពីការប្រកាសរបស់លោក Trump ជុំវិញកិច្ចព្រមព្រៀងដែលជិតមកដល់ដោយត្រូវចុះហត្ថលេខាជាមួយអ៊ីរ៉ង់។លោកបាននិយាយថា «វាទំនងជាកិច្ចព្រមព្រៀងតាមដំណាក់កាល ដែលលក្ខខណ្ឌមួយចំនួនត្រូវបានអនុវត្តយ៉ាងឆាប់រហ័ស ដូចជាការបើកច្រកសមុទ្រ Hormuz» និង «លក្ខខណ្ឌផ្សេងទៀតដែលត្រូវដោះស្រាយនៅពេលបន្ទាប់ ដូចជាបញ្ហានុយក្លេអ៊ែរ»។លោកបាននិយាយបន្ថែមថា «តែងតែមានហានិភ័យ ដែលអ្នកអាចចាប់ផ្តើមធ្វើបានល្អគ្រប់គ្រាន់ ប៉ុន្តែក្រោយមកវាជាប់គាំងនៅក្នុងព័ត៌មានលម្អិតណាមួយ ហើយនោះនាំឱ្យមានការដាក់ចេញឡើងវិញ ឬត្រឡប់ទៅរកការសម្រេចបាននៅដំណាក់កាលទីមួយ»។ទាក់ទងនឹងការបើកច្រកសមុទ្រ Hormuz លោក Weitz បាននិយាយថា វាសំខាន់សម្រាប់អ៊ីរ៉ង់ ដែលត្រូវការនាំចេញប្រេងរបស់ខ្លួន ព្រមទាំងសម្ព័ន្ធមិត្តឈូងសមុទ្ររបស់សហរដ្ឋអាមេរិក និងសេដ្ឋកិច្ចពិភពលោកផងដែរ។

ក្រុមសង្គមស៊ីវិលអ៊ីស្រាអែល និងប៉ាឡេស្ទីនជំរុញសហគមន៍អន្តរជាតិកុំឲ្យបោះបង់ចោលដំណោះស្រាយរដ្ឋពីរ

ក្រុមសង្គមស៊ីវិលអ៊ីស្រាអែល និងប៉ាឡេស្ទីន នឹងជួបគ្នានៅប្រទេសបារាំង នៅថ្ងៃសុក្រនេះ ដើម្បីជំរុញសហគមន៍អន្តរជាតិកុំឲ្យបោះបង់ចោលដំណោះស្រាយរដ្ឋពីរ ខណៈដែលទីក្រុងប៉ារីសព្យាយាមរក្សាបញ្ហានេះឲ្យនៅរស់រវើក ខណៈសង្គ្រាមមជ្ឈិមបូព៌ានៅតែបន្ត។កិច្ចប្រជុំនេះ ដែលមានការចូលរួមពីរដ្ឋមន្ត្រីការបរទេស និងមន្ត្រីជាន់ខ្ពស់មកពីរាប់សិបប្រទេស គឺជាខួបមួយឆ្នាំ ចាប់តាំងពីសេចក្តីប្រកាសញូវយ៉កដែលគាំទ្រដោយអង្គការសហប្រជាជាតិ ដែលបានកំណត់ផែនទីបង្ហាញផ្លូវឆ្ពោះទៅរករដ្ឋប៉ាឡេស្ទីន និងបានជំរុញឲ្យប្រទេសជាង ១០ ក្នុងនោះមានបារាំង អង់គ្លេស និងកាណាដា ទទួលស្គាល់រដ្ឋប៉ាឡេស្ទីន។អ្នកនាំពាក្យក្រសួងការបរទេសបារាំងបានប្រាប់អ្នកយកព័ត៌មានកាលពីថ្ងៃព្រហស្បតិ៍ថា៖«ដោយសារស្ថានភាពបច្ចុប្បន្ននៅក្នុងតំបន់ ដែលត្រូវបានបង្កឡើងដោយជម្លោះដែលហាក់ដូចជាគ្មានទីបញ្ចប់ ជនស៊ីវិលស្លាប់ច្រើនពេក និងវដ្តនៃអំពើហិង្សា និងដោយសារការអនុវត្តបទឈប់បាញ់នៅហ្កាហ្សាដែលជាប់គាំង...យើងជឿជាក់ថា សន្និសីទនេះឥឡូវនេះ មានសារៈសំខាន់ និងបន្ទាន់ជាងពេលណាៗទាំងអស់»។ជំនួបនេះនឹងបញ្ចប់ដោយការអំពាវនាវឲ្យមានសកម្មភាព»ចំនួន ៨ ចំណុច ដោយជំរុញឲ្យមានបទឈប់បាញ់ជាអចិន្ត្រៃយ៍ ការបញ្ឈប់ការតាំងទីលំនៅ ការកសាងឡើងវិញនៅហ្កាហ្សា កំណែទម្រង់អភិបាលកិច្ច និងការគាំទ្រពីអន្តរជាតិកាន់តែខ្លាំងសម្រាប់សង្គមស៊ីវិល៕

លោក TRUMP បង្កើនវោហាសាស្ត្ររបស់លោកទាក់ទងនឹងការដណ្តើមយកកោះ Kharg របស់អ៊ីរ៉ង់

លោកប្រធានាធិបតី ដូណាល់ ត្រាំ បានបង្កើនវោហាសាស្ត្ររបស់លោកទាក់ទងនឹងការដណ្តើមយកកោះខាករបស់អ៊ីរ៉ង់ ដោយសន្យាថា នឹងដណ្តើមយកស្ថានីយប្រេងដ៏សំខាន់នេះនៅក្នុង «អនាគតដ៏ខ្លីខាងមុខនេះ» ដើម្បី គ្រប់គ្រងទាំងស្រុងលើទីផ្សារប្រេង និងឧស្ម័នរបស់ពួកគេ»។ទោះបីជាលោកប្រធានាធិបតីបានប្រើប្រាស់ប្រព័ន្ធផ្សព្វផ្សាយសង្គម ដើម្បីបង្កើនការគំរាមកំហែងប្រឆាំងនឹងកោះនេះ លោកក៏បានទទួលស្គាល់ពីផលវិបាកនៃការឈ្លានពានទឹកដីនេះផងដែរ។ នៅក្នុងការអត្ថាធិប្បាយថ្មីៗនេះ ទៅកាន់សារព័ត៌មាន Fox News លោក ត្រាំ បាននិយាយថា «ចំណង់ចំណូលចិត្ត» របស់លោក គឺការដណ្តើមយកកោះនេះ ដើម្បីរកធនធានសម្រាប់សហរដ្ឋអាមេរិក ប៉ុន្តែលោកបានសួរថាតើប្រជាជនអាមេរិក មានឆន្ទៈចង់បានវា ដែរឬទេ ដោយបន្ថែមថាលោក «មិនចង់ដាក់ពង្រាយកងទ័ងជើងគោកទេ»។កោះ Kharg គឺជាកោះផ្កាថ្មតូចមួយដែលមានទីតាំងប្រហែល ១៥ ទៅ ១៦ ម៉ាយសមុទ្រពីឆ្នេរសមុទ្រអ៊ីរ៉ង់។ វាបម្រើជាមជ្ឈមណ្ឌលសេដ្ឋកិច្ចដ៏សំខាន់ ដោយកែច្នៃប្រេងឆៅ ៩០ ភាគរយរបស់អ៊ីរ៉ង់សម្រាប់នាំចេញតាមរយៈកំពង់ផែទឹកជ្រៅដែលអាចឲ្យនាវាដឹកប្រេងធំៗធ្វើដំណើរចេញចូលបាន។សារព័ត៌មាន BBC រាយការណ៍ថា «៩០% នៃប្រេងឆៅរបស់ប្រទេសអ៊ីរ៉ង់ ចូលមកតាមរយៈស្ថានីយមួយនៅលើកោះនេះ» ដែលផ្តល់ប្រភពចំណូលដ៏សំខាន់សម្រាប់កងឆ្មាំបដិវត្តន៍ឥស្លាម (IRGC)។ ទោះជាយ៉ាងណាក៏ដោយ សារព័ត៌មានរ៉យទ័រកត់សម្គាល់ថា ការដណ្តើមយកនេះ អាចមិនមាន «ផលប៉ះពាល់ភ្លាមៗ» ទៅលើសេដ្ឋកិច្ចអ៊ីរ៉ង់ទេ ដោយសារការនាំចេញប្រេងរបស់ប្រទេសនេះ ត្រូវបានកាត់បន្ថយយ៉ាងច្រើនទៅហើយ ដោយសង្គ្រាមដែលបានចាប់ផ្តើមនៅថ្ងៃទី ២៨ ខែកុម្ភៈ៕

បណ្ដាញសង្គម

ព័ត៌មានថ្មីៗ

កម្ពុជា និងអង្គការ SCO វាយតម្លៃខ្ពស់ចំពោះកិច្ចសហប្រតិបត្តិការទ្វេភាកីដ៏ល្អប្រសើរ នាពេលកន្លងមក

មន្ត្រីជំនាញខេត្តកំពង់ចាម ចុះត្រួតពិនិត្យទីតាំងស្តុកសាច់បង្កកតែមិនឃើញមានទំនិញនាំចូលខុសច្បាប់ពីថៃទេ

កម្ពុជា-សហភាពសេដ្ឋកិច្ចអឺរ៉ុប-អាស៊ី (EAEU) ពិនិត្យ និង ពិចារណាលើកិច្ចព្រមព្រៀងពាណិជ្ជកម្មសេរី (FTA)

ស៊ីរីរាយការណ៍អំពីការលុកលុយថ្មីរបស់អ៊ីស្រាអែលចូលក្នុងទឹកដីរបស់ខ្លួន ខណៈភាពតានតឹងព្រំដែនកំពុងបន្ត

នាយឧត្តមសេនីយ៍ គន់ គីម បន្តអញ្ជើញជួបសំណេះសំណាល និងពិភាក្សាការងារជាមួយថ្នាក់ដឹកនាំ និងសមាជិកនៃសមាគមមិត្តភាពរណសិរ្សភូមិភាគនិរតីកម្ពុជា

លោក LAVROV៖ អឺរ៉ុបចង់បង្កកជម្លោះនៅអ៊ុយក្រែន ដើម្បីដាក់ពង្រាយកងយោធារបស់ខ្លួន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877