BTV NEWS

ប្រមុខUN៖ សំខាន់ណាស់ក្នុងការរក្សាទុកកងកម្លាំងUN នៅលីបង់ ក្រោយកងកម្លាំងរក្សាសន្តិភាពបច្ចុប្បន្នផុតអាណត្តិ

លីបង់ ប្រកាសបទឈប់បាញ់ដោយផ្នែករវាងអ៊ីស្រាអែលនិងក្រុមហេសបូឡា ប៉ុន្តែការវាយប្រហារនៅតែបន្ត

មនុស្ស៤នាក់ស្លាប់ និងមួយចំនួនរងរបួសបន្ទាប់ពីការវាយប្រហារដ៏ធំរបស់រុស្ស៊ីទូទាំងអ៊ុយក្រែន

លោក Trump ថា ការចរចាជាមួយអ៊ីរ៉ង់កំពុងដំណើរការយ៉ាងលឿន ទោះមានការគំរាមកំហែងពង្រីកសង្គ្រាមក៏ដោយ

ព័ត៌មានអន្តរជាតិ

UN៖ សង្គ្រាមមជ្ឈិមបូព៌ា ធ្វើឲ្យមានអ្នកភៀសខ្លួន ១០០.០០០នាក់ នៅលីបង់ ក្នុងរយៈពេលតែ ១ថ្ងៃ

ការវាយប្រហាររបស់អ៊ីស្រាអែល និងការបញ្ជាជម្លៀសប្រជាជនដ៏ច្រើន បានធ្វើឲ្យមនុស្សជិត ៧០០.០០០នាក់ភៀសខ្លួនចេញពីផ្ទះសម្បែងរបស់ពួកគេ នៅក្នុងប្រទេសលីបង់ ក្នុងរយៈពេលត្រឹមតែជាងមួយសប្តាហ៍ប៉ុណ្ណោះ ដោយមានអ្នកភៀសខ្លួនជាង ១០០.០០០នាក់ ក្នុងរយៈពេល ២៤ម៉ោង។ នេះបើយោងតាមការលើកឡើងរបស់អង្គការសហប្រជាជាតិ (UN) នៅថ្ងៃអង្គារ (ទី១០ ខែមីនា ឆ្នាំ២០២៦) នេះ។លោកស្រី Karolina Lindholm Billing តំណាងប្រចាំប្រទេសលីបង់របស់អង្គការ UNHCR ដែលជាទីភ្នាក់ងារជនភៀសខ្លួនរបស់ UN បាននិយាយថា «ជីវិតរស់នៅរបស់មនុស្សត្រូវបានផ្លាស់ប្តូរយ៉ាងខ្លាំង»។ដោយបាននិយាយពីទីក្រុងបេរូត លោកស្រីបានប្រាប់អ្នកសារព័ត៌មាននៅទីក្រុងហ្សឺណែវ ប្រទេសស្វីសថា ក្នុងរយៈពេលត្រឹមតែជាងមួយសប្តាហ៍ប៉ុណ្ណោះ ចាប់តាំងពីការកើនឡើងនូវភាពតានតឹងថ្មី នៅក្នុងប្រទេសលីបង់ ការវាយប្រហារតាមអាកាសរបស់អ៊ីស្រាអែល និងការព្រមានឲ្យជម្លៀសប្រជាជន នៅតាមភូមិរាប់សិប «បានជំរុញឲ្យគ្រួសារនានានៅទូទាំងលីបង់ភៀសខ្លួន ក្នុងរង្វង់រយៈពេលតែប៉ុន្មាននាទី»។លោកស្រីបានចង្អុលបង្ហាញថា «មនុស្សជាង ៦៦៧.០០០នាក់ នៅក្នុងប្រទេសលីបង់ ឥឡូវនេះបានចុះឈ្មោះនៅលើវេទិកាអនឡាញរបស់រដ្ឋាភិបាល (លីបង់) ថា ជាជនភៀសខ្លួន»។លោកស្រី Lindholm Billing បានបញ្ជាក់ថា៖ «ចំនួនកើនឡើង គឺ ១០០.០០០នាក់ ក្នុងរយៈពេលត្រឹមតែមួយថ្ងៃប៉ុណ្ណោះ»។ លោកបានសង្កត់ធ្ងន់ថា នេះគឺជា «ល្បឿននៃការធ្វើបម្លាស់ទីលំនៅលឿនជាងមុនខ្លាំង បើធៀបទៅនឹងឆ្នាំ២០២៤ ក្នុងអំឡុងពេលមានសង្គ្រាមចុងក្រោយរបស់អ៊ីស្រាអែល ប្រឆាំងនឹងក្រុមហេសបូឡា នៅលីបង់។ គួរបញ្ជាក់ថា លីបង់ត្រូវបានអូសទាញឲ្យធ្លាក់ចូលទៅក្នុងសង្គ្រាមមជ្ឈិមបូព៌ា កាលពីសប្តាហ៍មុន នៅពេលដែលក្រុមហេសបូឡាដែលគាំទ្រដោយអ៊ីរ៉ង់ បានវាយប្រហារអ៊ីស្រាអែល ដើម្បីឆ្លើយតបទៅនឹងការសម្លាប់មេដឹកនាំកំពូលអ៊ីរ៉ង់លោក Ali Khamenei អំឡុងការវាយប្រហារដោយសហរដ្ឋអាមេរិក និងអ៊ីស្រាអែល៕

អេហ្ស៊ីបដំឡើងតម្លៃប្រេងក្នុងស្រុកដល់ចំនួន ១៧ភាគរយ ស្របពេលភាពចលាចលថាមពលសកល

ក្រសួងប្រេងអេហ្ស៊ីបនិយាយថា អេហ្ស៊ីបដំឡើងថ្លៃប្រេងឥន្ធនៈជាច្រើនប្រភេទនៅថ្ងៃអង្គារនេះ ស្របពេលដែលតំបន់បន្តរងផលប៉ះពាល់ដោយសារការកើនឡើងតម្លៃប្រេង និងឧស្ម័នសកល ហើយនិងការអាក់ខានទិន្នផលនៅមជ្ឈិមបូព៌ា ដោយសារសង្រ្គាមសហដ្ឋអាមេរិក-អ៊ីស្រាអែលលើអ៊ីរ៉ង់ ។ក្រសួងបាននិយាយនៅក្នុងសេចក្តីថ្លែងការណ៍ថា ការសម្រេចចិត្តនេះ បានធ្វើឡើង ដោយសារស្ថានភាពពិសេសបង្កឡើងពីដំណើរវិវត្តន៍ភូមិសាស្រ្តនយោបាយនៅតំបន់មជ្ឈិមបូព៌ា និងផលប៉ះពាល់ដោយផ្ទាល់របស់ពួកគេ លើទីផ្សារថាមពលសកល ។ការសម្រេចចិត្តបានកើតមានរយៈពេលប៉ុន្មានថ្ងៃប៉ុណ្ណោះ ក្រោយនាយករដ្ឋមន្រ្តីអេហ្ស៊ីបលោក Mostafa Madbouly និយាយនៅក្នុងសន្និសីទសារព័ត៌មានកាលពីថ្ងៃទី ៣ ខែមីនាថា រដ្ឋាភិបាលរបស់លោកអាចងាកទៅរកវិធានការពិសេស បើសិនជាតម្លៃប្រេងសកល កើនឡើងខ្លាំងដោយសារសង្រ្គាម ។តម្លៃប្រេង និងឧស្ម័នសកល បានកើនឡើង ពេលដែលសង្រ្គាមបង្អាក់ការនាំចេញថាមពលពីមជ្ឈិមបូព៌ា ក្នុងនោះទីក្រុងតេអេរ៉ង់ បានវាយប្រហារនាវា និងទីតាំងថាមពល ដែលបិទការធ្វើនាវាចរណ៍នៅតំបន់ឈូងសមុទ្រ ហើយនិងបង្ខំឲ្យមានការបញ្ឈប់ផលិតកម្មប្រេងនៅកាតា និងប្រទេសអ៊ីរ៉ាក់ ។កំណើនពី ១៤ភាគរយ ដល់ ១៧ភាគលើផលិតផលប្រេងជាច្រើនប្រភេទ គឺជាការឡើងថ្លៃលើកដំបូងក្នុងឆ្នាំនេះ ហើយនិងបន្ទាប់ពីការឡើងថ្លៃពីជិត ១០,៥ភាគរយ ដល់ ១២,៩ភាគរយ កាលពីខែតុលា ឆ្នាំមុន ៕

អាល្លឺម៉ង់ជួយទិញមីស៊ីលការពារដែនអាកាសដែលខ្វះខាត សម្រាប់អ៊ុយក្រែន

រដ្ឋមន្ត្រីក្រសួងការពារជាតិអាល្លឺម៉ង់ លោក Boris Pistorius បានបញ្ចុះបញ្ចូលដៃគូអឺរ៉ុបជាច្រើនឲ្យរួមគ្នាផ្តល់មីស៊ីលមានប្រព័ន្ធនាំផ្លូវ PAC-3 ប្រហែល ៣០គ្រាប់ សម្រាប់ប្រព័ន្ធការពារដែនអាកាស Patriot របស់អ៊ុយក្រែន ដើម្បីធ្វើឲ្យប្រសើរឡើងដល់ស្តុកអាវុធដែលកំពុងធ្លាក់ចុះ។ដោយសុំនិយាយដោយមិនបញ្ចេញឈ្មោះ ដោយសារកិច្ចពិភាក្សានេះជារឿងសម្ងាត់ បុគ្គលដែលដឹងពីផែនការនេះបានឲ្យដឹងថា រួមជាមួយនឹងឈុតបន្ថែមចំនួន ៥ ពីកងកម្លាំងប្រដាប់អាវុធអាល្លឺម៉ង់ មីស៊ីលស្ទាក់ចាប់ប្រហែល ៣៥គ្រាប់ នឹងត្រូវបញ្ជូនទៅអ៊ុយក្រែនឲ្យបានឆាប់តាមដែលអាចធ្វើទៅបាន។ក្រសួងការពារជាតិអាល្លឺម៉ង់មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ ពាក់ព័ន្ធនឹងផែនការនេះ ដែលត្រូវបានរាយការណ៍ជាលើកដំបូងដោយទស្សនាវដ្តី Der Spiegel។ ការផ្គត់ផ្គង់គ្រាប់រំសេវដល់អ៊ុយក្រែន កំពុងស្ថិតនៅក្រោមសម្ពាធកាន់តែខ្លាំងឡើងៗ បន្ទាប់ពីមានការវាយប្រហារយ៉ាងខ្លាំងរបស់រុស្ស៊ីអស់រយៈពេលជាច្រើនខែ។ក្នុងពេលជាមួយគ្នានេះ មន្ត្រីអឺរ៉ុបមានក្ដីបារម្ភ ដែលថា បរិមាណគ្រាប់រំសេវច្រើន ដែលត្រូវបានប្រើប្រាស់នៅសហរដ្ឋអាមេរិក និងការវាយប្រហាររបស់អ៊ីស្រាអែល លើអ៊ីរ៉ង់ អាចមានផលប៉ះពាល់ដល់ស្តុកអាវុធរបស់អាមេរិក និងការលក់អាវុធរបស់ទីក្រុងវ៉ាស៊ីនតោនទៅឲ្យរដ្ឋាភិបាល នៅទីក្រុងគីវ។សហរដ្ឋអាមេរិក និងដៃគូរបស់ខ្លួន នៅក្នុងតំបន់ឈូងសមុទ្រ ទំនងជាបានប្រើប្រាស់មីស៊ីលស្ទាក់ចាប់ PAC-3 ជាង ១.០០០គ្រាប់ ចាប់តាំងពីយុទ្ធនាការផ្លូវអាកាស លើអ៊ីរ៉ង់ បានចាប់ផ្តើមជាងមួយសប្តាហ៍មុន ដែលធ្វើឲ្យមានការលំបាកដល់ការផ្គត់ផ្គង់ និងបង្កើតបានជាសំណួរអំពីថា តើអាចមានការបញ្ជូនបន្ថែមទៀតទៅកាន់អ៊ុយក្រែនបានដែរ ឬទេ។លោក Pistorius បានលើកឡើងក្នុងអំឡុងពេលកិច្ចប្រជុំមួយកាលពីខែកុម្ភៈថា ប្រទេសអាល្លឺម៉ង់នឹងផ្តល់មីស៊ីល PAC-3 ចំនួន ៥គ្រាប់ពីស្តុករបស់យោធា Bundeswehr ទៅអ៊ុយក្រែន ប្រសិនបើប្រទេសដទៃទៀត រួមគ្នាផ្គត់ផ្គង់មីស៊ីលបន្ថែមឲ្យបានចំនួន ៣០គ្រាប់៕

ជនម្នាក់សង្ស័យជាសមាជិកក្រុមហាម៉ាស ត្រូវបានឃុំខ្លួននៅស៊ីប ជុំវិញករណីទិញអាវុធ

អាជ្ញាធរស៊ីបបានឃុំខ្លួនជនម្នាក់ដែលត្រូវបានសង្ស័យជាសមាជិករបស់ក្រុមសកម្មប្រយុទ្ធហាម៉ាសប៉ាឡេស្ទីន និងដែលត្រូវបានចាប់ខ្លួននៅប្រទេសអាល្លឺម៉ង់ ពាក់ព័ន្ធនឹងទិញអាវុធ និងគ្រាប់រំសេវ សម្រាប់ការវាយប្រហារលើជនជាតិអ៊ីស្រាអែល ឬទីតាំងជនជាតិជ្វីហ្វ។ នេះបើតាមការបញ្ជាក់របស់រដ្ឋអាជ្ញាសហព័ន្ធអាល្លឺម៉ង់ នាថ្ងៃអង្គារ (ទី១០ ខែមីនា ឆ្នាំ២០២៦) នេះ។តាមរយៈសេចក្ដីថ្លែងការណ៍ រដ្ឋអាជ្ញាបានឲ្យដឹងបន្ថែមថា ជនសង្ស័យដែលកើតនៅប្រទេសលីបង់ និងដែលត្រូវបានកំណត់អត្តសញ្ញាណឈ្មោះ Kamel M. ស្របតាមច្បាប់ឯកជនភាពរបស់អាល្លឺម៉ង់ ត្រូវបានចាប់ឃុំខ្លួននៅអាកាសយានដ្ឋាន Larnaca របស់ប្រទេសស៊ីប កាលពីថ្ងៃទី៦ ខែមីនា ពេលមកដល់ពីលីបង់។យោងតាមរដ្ឋអាជ្ញា បានឲ្យដឹងទៀតថា ជនសង្ស័យត្រូវបានចាប់ខ្លួនទាក់ទងនឹងការដឹកជញ្ជូនគ្រាប់រំសេវពិតចំនួន ៥០០គ្រាប់។ សេចក្តីថ្លែងការណ៍នេះ មិនបានបញ្ជាក់លម្អិតថា តើគ្រាប់ទាំងនោះមកពីណា ឬថា តើគ្រាប់ទាំងនោះកំពុងឆ្ពោះទៅកាន់ទីណា។សេចក្ដីថ្លែងការណ៍បានឲ្យដឹងថា៖ «ប្រតិបត្តិការនេះបានបម្រើជាការរៀបចំ សម្រាប់ការវាយប្រហារដ៏សាហាវរបស់ក្រុមហាម៉ាសទៅលើស្ថាប័នអ៊ីស្រាអែល ឬជ្វីហ្វ នៅអាល្លឺម៉ង់ និងអឺរ៉ុប»។នគរបាលក៏បានឆែកឆេរផងដែរក្នុងអាផាតមិន (Apartment) របស់ជនសង្ស័យ នៅទីក្រុងប៊ែរឡាំង។ សេចក្តីថ្លែងការណ៍បានបញ្ជាក់បន្ថែមថា នៅពេលដែលជនសង្ស័យ Kamel M. ត្រូវបានធ្វើបត្យាប័នទៅកាន់អាល្លឺម៉ង់ ចៅក្រមនឹងសម្រេចលើការឃុំខ្លួន មុនការកាត់ក្តី៕

អ្នកប្រើប្រាស់អាមេរិកបង្ហាញការខកចិត្តចំពោះការកើនឡើងតម្លៃឧស្ម័ន ក្រោយការវាយប្រហារអ៊ីរ៉ង់

តម្លៃថាមពលហក់ឡើងខ្ពស់បណ្តាលមកពីសង្រ្គាសហរដ្ឋអាមេរិក-អ៊ីស្រាអែលលើអ៊ីរ៉ង់ អាចធ្វើឲ្យប៉ះពាល់ដល់សេដ្ឋកិច្ចសហរដ្ឋអាមេរិក បង្កើនភាពតានតឹងបន្ថែមទៀតលើអ្នកប្រើប្រាស់ នៅពេលដែលការចំណាយច្រើនលើការរស់នៅប្រចាំថ្ងៃ បានក្លាយជាក្តីបារម្ភចម្បាងរបស់ពួកគេរួចទៅហើយ ។តម្លៃប្រេងឆៅ បានកើនឡើងពីប្រហែល ៦៧ដុល្លារ ក្នុង ១បារ៉ែល មុនសង្រ្គាមចាប់ផ្តើមកាលពីថ្ងៃទី ២៨ ខែកុម្ភៈ ដល់ជិត ៩៧ដុល្លារ ក្នុង ១បារ៉ែល កាលពីថ្ងៃចន្ទ ស្របពេលដែលជម្លោះ បានធ្វើឲ្យប៉ះពាល់ដល់ផលិតកម្ម និងការដឹកជញ្ជូននៅតំបន់មួយក្នុងចំណោមតំបន់សម្បូរថាមពលបំផុតនៅលើផែនដី ។ ប្រេងបានឡើងថ្លៃបណ្តោះអាសន្ន ១០០ដុល្លារ ក្នុង ១បារ៉ែល កាលពីថ្ងៃអាទិត្យ មុនពេលវាធ្លាក់ចុះបន្តិចមកវិញ ។អ្នកស្រី Alma Newell វ័យ ៥២ឆ្នាំ ដែលជាពលរដ្ឋមួយរូបរស់នៅទីក្រុងតំបន់ឆ្នេរ Goleta រដ្ឋ California សហរដ្ឋអាមេរិក និយាយថា ច្បាស់ណាស់ថា អ្នកស្រីព្រួយបារម្ភចំពោះការកើនឡើងតម្លៃប្រេងនៅតាមស្ថានីយប្រេង ។អ្នកស្រីបន្តថា អ្នកស្រី ពុំបានទៅធ្វើការនោះទេ ដោយសារតែមានរបួសស្មា ហើយអ្នកស្រីខកចិត្ត និងព្រួយបារម្ភថា ការកើនឡើងការចាយវាយ អាចនឹងធ្វើឲ្យប៉ះពាល់ដល់ថវិកាមានដែនកំណត់របស់អ្នកស្រីរួចទៅហើយ ៕

ពលរដ្ឋហ្កាហ្សាមានអារម្មណ៍ថាត្រូវបានគេបោះបង់ចោល ពេលផ្អាកផែនការសន្តិភាពរបស់លោក Trump

ប្រជាពលរដ្ឋហ្កាហ្សា បានបង្ហាញពីអារម្មណ៍ត្រូវបានគេបោះបង់ចោល ស្របពេលចំណាប់អារម្មណ៍អន្តរជាតិ បានផ្លាស់ប្តូរ ចាប់តាំងសហរដ្ឋអាមេរិក និងអ៊ីស្រាអែលរួមគ្នាវាយប្រហារអ៊ីរ៉ង់ បង្កឲ្យមានសង្រ្គាមតំបន់មជ្ឈិមបូព៌ា ។អ្នកស្រី Um Haitham Sobh គឺជាជនប៉ាឡេស្ទីនមួយរូបនិយាយពីសំពត់តង់របស់គាត់នៅក្នុងទីក្រុងហ្កាហ្សាថា ពួកយើងពិតជាបានសង្ឃឹមថា ក្រុមប្រឹក្សាសន្តិភាពនឹងសាងសង់ផ្ទះរបស់ពួកយើងឡើងវិញ ដូច្នេះហើយ ពួកយើងអាចវិលត្រឡប់ទៅផ្ទះរបស់ពួកយើងវិញបាន ប៉ុន្តែក្រោយផែនការមួយនេះ បញ្ឈប់ ឭថាផ្អាកបែបនេះ តើអ្នកណាទៅ នឹងសាងសង់ផ្ទះសម្បែង សម្រាប់ពួកយើងនោះ?កិច្ចពិភាក្សាដើម្បីជំរុញផែនការរបស់លោកប្រធានាធិបតី Donald Trump ដើម្បីបញ្ចប់សង្រ្គាម ហ្គាហ្សា បានផ្អាក ចាប់តាំងពីសប្តាហ៍មុនរហូតមក ។ការផ្អាកនេះ បានគំរាមកំហែងដល់ការអនុវត្តគំនិតផ្តួចផ្តើមសន្តិភាពតំបន់មជ្ឈិមបូព៌ារបស់លោក Trump ដែលលោកចាត់ទុកថាជាគោលដៅគោលនយោបាយបរទេសសំខាន់របស់លោក ។ វាបានកើតមានឡើងរយៈពេលតិចជាង ១ខែប៉ុណ្ណោះ ក្រោយលោកទទួលបានការសន្យាប្រាក់រាប់ពាន់លានដុល្លារ សម្រាប់ហា្កហ្សាពីបណ្តារដ្ឋឈូងសមុទ្រអារ៉ាប់ គឺជាប្រទេសដែលបច្ចុប្បន្នប្រឈមនឹងការវាយប្រហាររបស់អ៊ីរ៉ង់ ស្របពេលដែលជម្លោះរីកកាន់តែធំ ។ទោះបីជាយ៉ាងណាក៏ដោយ មន្រ្តីមួយរូបរបស់សេតវិមាន ច្រានចោលថា គ្មានការផ្អាកកិច្ចពិភាក្សានោះទេ ដោយលោកនិយាយថា ការជជែកគ្នាលើការរំសាយអាវុធ កំពុងធ្វើឡើង និងទទួលបានលទ្ធផលវិជ្ជមាន ។ លោកថា អ្នកសម្របសម្រួលទាំងអស់ឯកភាពគ្នាថា នេះគឺជាជំហានដ៏សំខាន់ ដើម្បីជំរុញការកសាងឡើវងវិញសម្រាប់ប្រជាជននៅហ្កាហ្សា ៕

ជើងហោះហើរដឹកពលរដ្ឋ ២៣៣នាក់ ចេញសពីមជ្ឈិមបូព៌ា បានចុះចតនៅអេស្ប៉ាញ

រដ្ឋមន្រ្តីការបរទេសអេស្ប៉ាញលោក Manuel Albares និយាយនៅថ្ងៃអង្គារនេះថា យន្តហោះដឹកពលរដ្ឋអេស្ប៉ាញ ២៣៣នាក់ ដែលបានធ្វើមាតុភូមិនិវត្តន៍ពីតំបន់មជ្ឈិមបូព៌ា បានចុះចតនៅមូលដ្ឋានទ័ព Torrejon de Ardoz ។លោក Albares និយាយកាលពីសប្តាហ៍មុនថា ពលរដ្ឋអេស្ប៉ាញប្រហេល ៣ម៉ឺននាក់ កំពុងរស់នៅ ឬធ្វើដំណើរនៅតំបន់មជ្ឈិមបូព៌ា ។ ការជម្លៀសខ្លួនដែលសម្របសម្រួលជាកងទ័ពអាកាសនេះ បានចាប់ផ្តើមកាលពីថ្ងៃទី ៣ ខែមីនា ។សូមបញ្ជាក់ថា ការធ្វើចរាចរណ៍ផ្លូវអាកាសពាណិជ្ជកម្ម បន្តអវត្តមាននៅទូទាំងតំបន់ភាគច្រើន នៅមជ្ឈិមបូព៌ា ក្នុងនោះមជ្ឈមណ្ឌលឈូងសមុទ្រសំខាន់ៗ រួមទាំងនៅទីក្រុង Dubai ដែលជាអាកាសយានដ្ឋានដ៏មមាញឹកជាងគេបំផុតរបស់ពិភពលោក សម្រាប់អ្នកដំណើរអន្តរជាតិ បានបិទភាគច្រើន រយៈពេល ៥ថ្ងៃជាប់ៗគ្នា ដែលជាការបង្អាក់ការធ្វើដំណើរធំបំផុត ចាប់តាំងពីការរីករាលដាលឆ្លងសកលជំងឺ COVID-19 ៕

ពលរដ្ឋចិនជាង ១ម៉ឺននាក់ បានវិលត្រឡប់មកពីតំបន់មជ្ឈិមបូព៌ា ស្របពេលកើតមានសង្រ្គាមអ៊ីរ៉ង់

អ្នកនាំពាក្យក្រសួងការបរទេសចិនលោក Guo Jiakun និយាយនៅថ្ងៃអង្គារនេះថា ពលរដ្ឋចិនជាង ១ម៉ឺននាក់ បានវិលត្រឡប់មកវិញដោយសុវត្ថិភាព ចេញពីបណ្តាប្រទេសនៅតំបន់មជ្ឈិមបូព៌ា រួមទាំងអារ៉ាប់រួម អូម៉ង់ និងអារ៉ាប៊ីសាអ៊ូឌីត ។លោក Guo និយាយប្រាប់ក្រុមអ្នកសារព័ត៌មាននៅក្នុងសន្និសីទសារព័ត៌មានថា ក្រសួងការបរទេសចិនជំរុញឲ្យមានបទឈប់បាញ់បន្ទាន់ ហើយភាគីទាំងអស់មាននូវទំនួលខុសត្រូវ ដើម្បីធានាដល់ស្ថិរភាព និងការផ្គត់ផ្គង់ថាមពលដ៏រលូត ។លោក Guo និយាយថា ចិននឹងចាត់វិធានការចាំបាច់ ដើម្បីការពារសន្តិសុខថាមពលផ្ទាល់ខ្លួន ។គួរឲ្យដឹងថា ឆ្មាំបដិវត្តន៍អ៊ីរ៉ង់និយាយនៅថ្ងៃអង្គារនេះថា ទីក្រុងតេអេរ៉ង់ នឹងមិនអនុញ្ញាតប្រេងសូម្បី ១លីត្រដឹកជញ្ជូនចេញពីតំបន់មជ្ឈិមបូព៌ា បើសិនជាការវាយប្រហាររបស់សហរដ្ឋអាមេរិក-អ៊ីស្រាអែលនៅតែបន្ត បង្កឲ្យមានការព្រមានពីប្រធានាធិបតីសហរដ្ឋអាមេរិកលោក Donald Trump ថា សហរដ្ឋអាមេរិកនឹងវាយប្រហារអ៊ីរ៉ង់កាន់តែខ្លាំងច្រើនជាងមុន បើសិនជាពួកគេបិទការនាំចេញប្រេងពីតំបន់ផលិតថាមពលសំខាន់ៗ ។សង្រ្គាមមួយនេះ បានធ្វើឲ្យផ្លូវដឹកជញ្ជូនសំខាន់នៅច្រកសមុទ្រ Hormuz បិទទាំងស្រុង ក្នុងនោះបណ្តាប្រទេសនៅលើពិភពលោក បានកាត់ផ្តាច់ ១ភាគ ៥នៃការផ្គត់ផ្គង់ឧស្ម័នធម្មជាតិរាវ និងប្រេងសកលលោក ៕

វិមានក្រឹមឡាំងបដិសេធមិនឆ្លើយថា តើអាមេរិកព្រមានពាក់ព័ន្ធការចែករំលែកព័ត៌មានសម្ងាត់ឲ្យអ៊ីរ៉ង់ដែរ ឬទេ

វិមានក្រឹមឡាំង នៅថ្ងៃអង្គារ (ទី១០ ខែមីនា ឆ្នាំ២០២៦) នេះ បានបដិសេធមិនឆ្លើយតប ជុំវិញថា តើសហរដ្ឋអាមេរិកបានព្រមានដែរ ឬទេ ពាក់ព័ន្ធនឹងការចែករំលែកព័ត៌មានសម្ងាត់ជាមួយអ៊ីរ៉ង់ ខណៈដែលសង្គ្រាម នៅតំបន់មជ្ឈិមបូព៌ា បានឈានចូលដល់ថ្ងៃទី១១ ហើយ។សហរដ្ឋអាមេរិក និងអ៊ីស្រាអែល បានចាប់ផ្តើមបើកប្រតិបត្តិការយោធាលើអ៊ីរ៉ង់ កាលពីថ្ងៃទី២៨ ខែកុម្ភៈ ដែលបង្កឲ្យមានការវាយប្រហារសងសឹកពីអ៊ីរ៉ង់វិញ នៅទូទាំងឈូងសមុទ្រ។ សារព័ត៌មាន Washington Post បានរាយការណ៍កាលពីថ្ងៃសុក្រសប្ដាហ៍កន្លងទៅថា ទីក្រុងមូស្គូបានបញ្ជូនព័ត៌មានសម្ងាត់ទៅកាន់ទីក្រុងតេអេរ៉ង់ ក្នុងនោះរួមមានទាំងទីតាំងនៃនាវាចម្បាំង និងយន្តហោះរបស់សហរដ្ឋអាមេរិកនៅក្នុងតំបន់ផងដែរ។ប្រេសិតពិសេសរបស់សហរដ្ឋអាមេរិក លោក Steve Witkoff បាននិយាយកាលពីថ្ងៃសៅរ៍ថា លោកបានធ្វើការទាក់ទងយ៉ាងដិតដល់ទៅកាន់រុស្ស៊ីកុំឲ្យចែករំលែកព័ត៌មានកំណត់គោលដៅ ជាមួយទីក្រុងតេអេរ៉ង់។នៅពេលត្រូវបានសួរដោយសារព័ត៌មាន AFP អំពីសេចក្តីថ្លែងការណ៍របស់លោក Witkoff ឬថា តើប្រធានាធិបតីអាមេរិក លោក Donald Trump និងសមភាគីរុស្ស៊ីរបស់លោក គឺលោក Vladimir Putin បានពិភាក្សាអំពីរឿងនេះ អំឡុងជំនួបតាមទូរស័ព្ទកាលពីថ្ងៃចន្ទ អ្នកនាំពាក្យវិមានក្រឹមឡាំង លោក Dmitry Peskov បានឆ្លើយថា៖ «អ្វីដែលខ្ញុំអាចនិយាយបាន គឺថា លោក Witkoff មានទំនាក់ទំនងជាប់លាប់ជាមួយសមភាគីរុស្ស៊ីរបស់លោក ហើយថា បណ្តាញទំនាក់ទំនងនេះ ពិតជាអាចឲ្យយើងផ្តល់សញ្ញាគ្នាទៅវិញទៅមក អំពីបញ្ហារសើបបំផុត»។លោក Trump បាននិយាយកាលពីថ្ងៃសៅរ៍ថា លោកមិនមានការចង្អុលបង្ហាញ ដែលថា រុស្ស៊ីកំពុងគាំទ្រអ៊ីរ៉ង់ នៅក្នុងសង្គ្រាមនេះនោះទេ ប៉ុន្តែប្រសិនបើពួកគេគាំទ្រមែន វាមិន «ជួយអ្វីបានច្រើនឡើយ»៕

ព្រះចៅមហាម៉ាត់គូវ៉ែត៖ ប្រទេសរបស់ទ្រង់រងការវាយប្រហារពីប្រទេសជិតខាងមូស្លីមដែលខ្លួនចាត់ទុកថាជាមិត្ត

នៅក្នុងសុន្ទរកថាចាក់ផ្សាយលើកញ្ចក់ទូរទស្សន៍គូវ៉ែតកាលពីថ្ងៃចន្ទ ព្រះចៅមហាម៉ាត់គូវ៉ែត ព្រះអង្គម្ចាស់ Sheikh Meshal Al-Ahmad Al-Jaber Al-Sabah មានព្រះបន្ទូលថា ប្រទេសរបស់ទ្រង់បានក្លាយជាកម្មវត្ថុនៃការវាយប្រហារដ៏ឃោឃៅពីប្រទេសជិតខាងមូស្លីមដែលខ្លួនចាត់ទុកថាជាមិត្ត ។ព្រះអង្គមានបន្ទូលថា គូវ៉ែតមិនអនុញ្ញាតឲ្យទឹកដីរបស់ខ្លួន ដែនអាកាស ឬតំបន់ឆ្នេរត្រូវបានប្រើប្រាស់សម្រាប់សកម្មភាពយោធាណាមួយប្រឆាំងនឹងប្រទេសមួយនោះទេ ហើយសូមបញ្ជាក់ពីសិទ្ធិស្វ័យការពារខ្លួនរបស់គូវ៉ែត ក្រោមច្បាប់អន្តរជាតិ ។កាលពីព្រឹកថ្ងៃចន្ទ ពិធីបុណ្យសពត្រូវបានរៀបចំឡើងសម្រាប់មន្រ្តីគូវ៉ែត ២នាក់ ដែលត្រូវបានសម្លាប់ អំឡុងជម្លោះក្នុងតំបន់កំពុងបន្ត ។ ក្រោយមកមន្រ្តី ២រូបនោះ ត្រូវបាននាំយកទៅបញ្ចុះ ។ក្រសួងមហាផ្ទៃគូវ៉ែត និយាយកាលពីថ្ងៃអាទិត្យថា មន្រ្តីរបស់ខ្លួន ២នាក់ ត្រូវបានសម្លាប់ អំឡុងពេលបំពេញតួនាទី ។ទោះបីជាយ៉ាងណាក៏ដោយ ពួកគេពុំបានផ្តល់មូលហេតុនៃការស្លាប់របស់មន្រ្តី ២រូបនោះឡើយ ប៉ុន្តែគូវ៉ែត បានបាញ់ស្កាត់យានដ្រូន និងមីស៊ីល ដែលបាញ់ចេញពីអ៊ីរ៉ង់ បន្ទាប់ពីការវាយប្រហាររបស់សហរដ្ឋអាមេរិក-អ៊ីស្រាអែល លើសាធារណរដ្ឋអ៊ិស្លាមអ៊ីរ៉ង់ ៕

បណ្ដាញសង្គម

ព័ត៌មានថ្មីៗ

ក្រសួងសេដ្ឋកិច្ចដាក់ឱ្យប្រើប្រាស់ជាកាតព្វកិច្ច ប្រព័ន្ធវិក្កយបតអឡិចត្រូនិកកម្ពុជាជំហានទី៤

ប្រធានាធិបតីមីយ៉ាន់ម៉ាបញ្ជាក់ឡើងវិញពីការប្តេជ្ញាចិត្តចំពោះសន្តិសុខរបស់ឥណ្ឌា

ប្រតិបត្តិករនាវា ជំរុញឲ្យមានច្បាប់ច្បាស់វិលត្រឡប់មកកាន់ច្រកសមុទ្រ Hormuz វិញ

កងទ័ពជើងទឹកបារាំងដោយមានការគាំទ្រពីអង់គ្លេស បានស្កាត់ចាប់នាវាដឹកប្រេងរុស្ស៊ី

EU ជំរុញឲ្យអ៊ីស្រាអែលឈប់បង្កើនភាពតានតឹងផ្នែកយោធា នៅលីបង់ និងគាំទ្រកិច្ចប្រឹងប្រែងការទូត

មន្ត្រី៖ ក្រុមហាម៉ាសនឹងធ្វើកិច្ចពិភាក្សាជាមួយអន្តរការីតំបន់ហ្កាហ្សា នៅអេហ្ស៊ីប

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877