BTV NEWS

ប្រធានាធិបតីមីយ៉ាន់ម៉ាបញ្ជាក់ឡើងវិញពីការប្តេជ្ញាចិត្តចំពោះសន្តិសុខរបស់ឥណ្ឌា

ប្រតិបត្តិករនាវា ជំរុញឲ្យមានច្បាប់ច្បាស់វិលត្រឡប់មកកាន់ច្រកសមុទ្រ Hormuz វិញ

កងទ័ពជើងទឹកបារាំងដោយមានការគាំទ្រពីអង់គ្លេស បានស្កាត់ចាប់នាវាដឹកប្រេងរុស្ស៊ី

EU ជំរុញឲ្យអ៊ីស្រាអែលឈប់បង្កើនភាពតានតឹងផ្នែកយោធា នៅលីបង់ និងគាំទ្រកិច្ចប្រឹងប្រែងការទូត

ព័ត៌មានអន្តរជាតិ

លោក Netanyahu និយាយពីសង្រ្គាមអ៊ីរ៉ង់ថា ពួកយើងកំពុងកាច់ធ្មុងរបស់ពួកគេ

នាយករដ្ឋមន្រ្តីអ៊ីស្រាអែលលោក Benjamin Netanyahu និយាយថា លោកមានបំណងជំរុញឲ្យប្រជាពលរដ្ឋអ៊ីរ៉ង់លុបបំបាត់ចោលរបបផ្តាច់ការ ។ នៅក្នុងរូបភាពវីដេអូឃ្លីបចែករំលែកដោយការិយាល័យព័ត៌មានរដ្ឋាភិបាលអ៊ីស្រាអែលនាថ្ងៃអង្គារនេះ ឃើញលោក Netanyahu ត្រូវបានរៀបរាប់និយាយប្រាប់ដោយក្រុមន្រ្តីសុខាភិបាលនៅមន្ទីរគ្រប់គ្រងសុខភាពជាតិអ៊ីស្រាអែល ។ លោក Netanyahu និយាយថា ច្បាស់ណាស់ថា តាមរយៈវិធានការដែលពួកយើងបានធ្វើមកទល់នឹងពេលនេះ គឺពួកយើងកំពុងកាច់ធ្មុងរបស់ពួកគេ ហើយវិធានការច្រើនទៀត នឹងកើតមានឡើងជាបន្តបន្ទាប់ ។ នៅព្រឹកថ្ងៃអង្គារនេះ ឆ្មាំបដិវត្តន៍អ៊ីរ៉ង់និយាយថា ពួកគេមិនអនុញ្ញាតឲ្យប្រេងសូម្បី ១លីត្រ ដឹកជញ្ជូនចេញពីតំបន់មជ្ឈិមបូព៌ានោះឡើយ បើសិនជាការវាយប្រហាររបស់សហរដ្ឋអាមេរិក និងអ៊ីស្រាងែល នៅតែបន្ត បង្កឲ្យមានការព្រមានពីប្រធានាធិបតីសហរដ្ឋអាមេរិកលោក Donald Trump ថា សហរដ្ឋអាមេរិកនឹងវាយប្រហារអ៊ីរ៉ង់កាន់តែខ្លាំងច្រើនជាងមុន បើសិនជាពួកគេបិទការនាំចេញប្រេងពីតំបន់ផលិតថាមពលសំខាន់ៗ ។ អ៊ីស្រាអែលនិយាយថា សង្រ្គាមរបស់ខ្លួនមានគោលបំណងផ្តួលរំលំប្រព័ន្ធគ្រប់គ្រងបុព្វជិតរបស់អ៊ីរ៉ង់ ខណៈក្រុមមន្រ្តីសហរដ្ឋអាមេរិកនិយាយថា គោលបំណងរបស់ទីក្រុងវ៉ាស៊ីនតោន គឺបំផ្លាញសមត្ថភាពមីស៊ីល និងកម្មវិធីនុយក្លេអ៊ែររបស់អ៊ីរ៉ង់ ប៉ុន្តែលោក Trumpនិយាយថា សង្រ្គាមអាចបញ្ចប់បានតែជាមួយរដ្ឋាភិបាលអ៊ីរ៉ង់ដែលចេះស្តាប់បង្គាប់តែប៉ុណ្ណោះ ៕

អារ៉ាប៊ីសាអ៊ូឌីត និងហ្ស៊កដានី ថ្កោលទោសការវាយប្រហារដោយដ្រូនប្រឆាំងនឹងស្ថានកុងស៊ុលអេមីរ៉ាតអារ៉ាប់រួម នៅអ៊ីរ៉ាក់

អារ៉ាប៊ីសាអ៊ូឌីត និងហ្ស៊កដានី បានថ្កោលទោសចំពោះការវាយប្រហារដោយយានដ្រូនដែលកំណត់គោលដៅលើស្ថានកុងស៊ុលរបស់អេមីរ៉ាតអារ៉ាប់រួមប្រចាំទីក្រុង Irbil ប្រទេសអ៊ីរ៉ាក់។អារ៉ាប់រួមក៏បានចេញសេចក្តីថ្លែងការណ៍មុននេះ ដោយបានថ្កោលទោសការវាយប្រហារនេះ។សេវាប្រឆាំងភេរវកម្មនៅតំបន់ឃើដឌីស្តង់អ៊ីរ៉ាក់ បាននិយាយកាលពីថ្ងៃចន្ទថា ខ្លួនបានបាញ់ទម្លាក់ដ្រូន ចំនួន បីគ្រឿង នៅក្នុងទីក្រុង Irbil ដោយបំណែកយានដ្រូនមួយគ្រឿង បានធ្លាក់នៅជិតស្ថានកុងស៊ុលរបស់អេមីរ៉ាតអារ៉ាប់រួម។សេវានេះ បានបញ្ជាក់ថា ពុំមានរបាយការណ៍អំពីអ្នកស្លាប់ និងរបួសនោះទេ។នៅក្នុងសេចក្តីថ្លែងការណ៍មួយដែលចេញផ្សាយតាមរយៈក្រសួងការបរទេសរបស់ខ្លួន អារ៉ាប៊ីសាអ៊ូឌីត បានថ្កោលទោសដាច់អហង្ការ ចំពោះការកំណត់គោលដៅស្ថានកុងស៊ុលរបស់អារ៉ាប់រួមប្រចាំទីក្រុង Irbil ប្រទេសអ៊ីរ៉ាក់។នៅក្នុងសេចក្តីថ្លែងការណ៍មួយ ក្រសួងការបរទេសហ្ស៊កដានី បានសង្កត់ធ្ងន់លើសារៈសំខាន់នៃ «ការគោរពច្បាប់អន្តរជាតិ និងការប្រកាន់ខ្ជាប់នូវអនុសញ្ញាទីក្រុងហ្សឺណែវឆ្នាំ ១៩៤៩ និងអនុសញ្ញាទីក្រុងវីយែនឆ្នាំ ១៩៦១ ស្តីពីទំនាក់ទំនងការទូត»៕

អ៊ីរ៉ង់៖ ប្រទេសជាច្រើនបានទាក់ទងទីក្រុងតេអេរ៉ង់ ដើម្បីឲ្យមានបទឈប់បាញ់

អនុរដ្ឋមន្ត្រីការបរទេសអ៊ីរ៉ង់ លោក Kazem Gharibabadi កាលពីថ្ងៃចន្ទ (ទី៩ ខែមីនា ឆ្នាំ២០២៦) បាននិយាយថា ប្រទេសជាច្រើន រួមមានទាំងចិន រុស្ស៊ី និងបារាំងផងដែរ បានទាក់ទងទីក្រុងតេអេរ៉ង់ ពាក់ព័ន្ធនឹងលទ្ធភាពដែលអាចមានបទឈប់បាញ់។យោងតាមទីភ្នាក់ងារសារព័ត៌មាន ISNA របស់អ៊ីរ៉ង់ បានឲ្យដឹងថា លោក Gharibabadi បាននិយាយថា៖ «លក្ខខណ្ឌដំបូងរបស់យើងសម្រាប់បទឈប់បាញ់ គឺថា ការឈ្លានពានមិនត្រូវកើតឡើងម្តងទៀតទេ»។គួរបញ្ជាក់ថា ការកើនឡើងនូវភាពតានតឹងក្នុងតំបន់ បានឡើងកម្ដៅកាន់តែខ្លាំងទៅ ចាប់តាំងពីអ៊ីស្រាអែល និងសហរដ្ឋអាមេរិក បានបើកការវាយប្រហាររួមគ្នា ប្រឆាំងនឹងអ៊ីរ៉ង់ កាលពីថ្ងៃទី២៨ ខែកុម្ភៈ ហើយបើយោងតាមអាជ្ញាធរអ៊ីរ៉ង់ បានឲ្យដឹងថា មនុស្សជាង ១.២០០នាក់ ក្នុងនោះរួមមានទាំងមេដឹកនាំកំពូល លោក Ayatollah Ali Khamenei ត្រូវបានសម្លាប់។អ៊ីរ៉ង់បានសងសឹកដោយការវាយប្រហារដោយយានដ្រូន និងមីស៊ីលដែលកំណត់គោលដៅលើអ៊ីស្រាអែល ហ្ស៊កដានី អ៊ីរ៉ាក់ និងប្រទេសឈូងសមុទ្រ ដែលជាទីតាំងនៃគ្រឿងយុទ្ធោបករណ៍របស់អាមេរិក៕

មេដឹកនាំបារាំង៖ របបអ៊ីរ៉ង់ មិនអាចផ្លាស់ប្តូរ «តាមរយៈការទម្លាក់គ្រាប់បែកតែម៉្យាង» នោះទេ

ប្រធានាធិបតីបារាំង លោក Emmanuel Macron កាលពីថ្ងៃចន្ទ (ទី៩ ខែមីនា ឆ្នាំ២០២៦) បានលើកឡើងថា ការផ្លាស់ប្តូរ «ស៊ីជម្រៅ» ចំពោះថ្នាក់ដឹកនាំអ៊ីរ៉ង់ មិនអាចកើតឡើង «តាមរយៈការទម្លាក់គ្រាប់បែករបស់អាមេរិក-អ៊ីស្រាអែលតែម៉្យាង» នោះទេ ខណៈដែលបន្ថែមថា សង្គ្រាមនៅតំបន់មជ្ឈិមបូព៌ា អាចបន្តរយៈពេល «ជាច្រើនសប្តាហ៍»។នៅលើនាវាផ្ទុកយន្តហោះ Charles de Gaulle របស់បារាំង ដែលកំពុងឈរជើងនៅសមុទ្រមេឌីទែរ៉ាណេ លោក Macron បាននិយាយថា៖ «ខ្ញុំមិនគិតថា អ្នកអាចសម្រេចបាននូវការផ្លាស់ប្តូររបបស៊ីជម្រៅ ឬការផ្លាស់ប្តូរនៅក្នុងប្រព័ន្ធនយោបាយតាមរយៈការទម្លាក់គ្រាប់បែកតែម៉្យាងនោះទេ»។លោក Macron បានបន្តថា សង្គ្រាមដែលបង្កឡើងដោយការវាយប្រហាររបស់សហរដ្ឋអាមេរិក-អ៊ីស្រាអែល ប្រឆាំងនឹងអ៊ីរ៉ង់ «ក្នុងដំណាក់កាលដ៏ខ្លាំងក្លានេះ» អាចមានរយៈពេល «ជាច្រើនថ្ងៃ ឬប្រហែលជាច្រើនសប្តាហ៍»។ លោកបានបន្ថែមថា ខណៈដែលសង្គ្រាមមជ្ឈិមបូព៌ា បានចូលដល់សប្តាហ៍ទី២ ហើយ ប្រទេសបារាំង និងសម្ព័ន្ធមិត្តរបស់ខ្លួន កំពុងរៀបចំបេសកកម្ម «ការពារ» ដើម្បីបើកច្រកសមុទ្រ Hormuz ដ៏សំខាន់ជាយុទ្ធសាស្ត្រឡើងវិញ។ឧទ្ធម្ភាគចក្ររបស់មេដឹកនាំបារាំងបានចុះចតនៅលើនាវាផ្ទុកយន្តហោះ Charles de Gaulle ដែលត្រូវបានបញ្ជូនទៅសមុទ្រមេឌីទែរ៉ាណេ បន្ទាប់ពីការវាយប្រហាររបស់សហរដ្ឋអាមេរិក-អ៊ីស្រាអែលលើអ៊ីរ៉ង់ កាលពីថ្ងៃទី២៨ ខែកុម្ភៈ បានបង្កជាសង្គ្រាម ដែលបានបង្កើតឲ្យមានភាពវឹកវរ នៅតំបន់មជ្ឈិមបូព៌ា និងគំរាមកំហែងរីករាលដាលដល់តំបន់ផ្សេងទៀត៕

ប្រធានាធិបតី៖ កូរ៉េខាងត្បូងមិនអាចរារាំងកងកម្លាំងអាមេរិកបានទេ ពាក់ព័ន្ធការផ្ទេរអាវុធទៅមជ្ឈិមបូព៌ា

ប្រធានាធិបតីកូរ៉េខាងត្បូង លោក Lee Jae Myung នៅថ្ងៃអង្គារ (ទី១០ ខែមីនា ឆ្នាំ២០២៦) នេះ បានប្រាប់ឲ្យដឹងថា ប្រទេសកូរ៉េខាងត្បូងមិនអាចបញ្ឈប់កងកម្លាំងអាមេរិក នៅកូរ៉េខាងត្បូង មិនឲ្យយកអាវុធមួយចំនួនទៅដាក់ពង្រាយឡើងវិញបានទេ បន្ទាប់ពីមានរបាយការណ៍ថា ប្រព័ន្ធការពារមីស៊ីល Patriot ខ្លះៗរបស់សហរដ្ឋអាមេរិក កំពុងត្រូវបានបញ្ជូនទៅតំបន់មជ្ឈិមបូព៌ា។លោក Lee បាននិយាយនៅក្នុងកិច្ចប្រជុំគណៈរដ្ឋមន្ត្រីថា «វាហាក់ដូចជាមានភាពចម្រូងចម្រាសថ្មីៗនេះ អំពីកងកម្លាំងអាមេរិកនៅកូរ៉េខាងត្បូងដែលដឹកជញ្ជូនអាវុធមួយចំនួន ដូចជាកាំភ្លើងធំ និងប្រព័ន្ធការពារដែនអាកាស ចេញពីប្រទេស» ដោយលោកបានកត់សម្គាល់ថា បើទោះបីជាទីក្រុងសេអ៊ូល បានបង្ហាញការជំទាស់ក៏ដោយ ក៏ខ្លួនមិនមានសិទ្ធិទាមទារបែបនោះឡើយ។ជាមួយគ្នានេះ លោក Lee ក៏បានបញ្ជាក់ផងដែរថា ការដកអាវុធអាមេរិកមួយចំនួនចេញពីប្រទេស «មិនប៉ះពាល់ដល់យុទ្ធសាស្ត្រការពារ ទល់នឹងកូរ៉េខាងជើងឡើយ» ដោយបានកត់សម្គាល់ថា ការចំណាយលើការការពារជាតិ និងសមត្ថភាពធម្មតារបស់កូរ៉េខាងត្បូងលើសពីកម្រិតស្មើគ្នា នៅកូរ៉េខាងជើង។គួរបញ្ជាក់ថា រដ្ឋមន្ត្រីការបរទេសកូរ៉េខាងត្បូង លោក Cho Hyun បាននិយាយកាលពីថ្ងៃទី៦ ខែមីនាថា យោធាអាមេរិក និងកូរ៉េខាងត្បូង កំពុងពិភាក្សាអំពីលទ្ធភាពនៃការផ្ទេរប្រព័ន្ធការពារមីស៊ីល Patriot មួយចំនួនរបស់សហរដ្ឋអាមេរិកដែលមានមូលដ្ឋាននៅកូរ៉េខាងត្បូង ដើម្បីយកទៅប្រើប្រាស់ក្នុងជម្លោះ នៅតំបន់មជ្ឈិមបូព៌ា៕

ក្រសួងការបរទេសទួរគីកោះអញ្ជើញឯកអគ្គរដ្ឋទូតអ៊ីរ៉ង់ បន្ទាប់ពីមានការវាយប្រហារដោយមីស៊ីល

ទូរទស្សន៍ NTV បានរាយការណ៍ដោយដកស្រង់ប្រភពពីក្រសួងថា ឯកអគ្គរដ្ឋទូតអ៊ីរ៉ង់ប្រចាំប្រទេសទួរគី ត្រូវបានកោះអញ្ជើញទៅក្រសួងការបរទេសទួរគី ទាក់ទងនឹងការវាយប្រហារដោយមីស៊ីលមួយផ្សេងទៀតលើទឹកដីរបស់ខ្លួនពីអ៊ីរ៉ង់។ ប្រភពទាំងនោះ បាននិយាយថា៖«ឯកអគ្គរដ្ឋទូតអ៊ីរ៉ង់ប្រចាំទីក្រុងអង់ការ៉ា ត្រូវបានកោះអញ្ជើញទៅក្រសួងការបរទេស ដើម្បីពន្យល់អំពីឧប្បត្តិហេតុដែលមីស៊ីលបាលីស្ទីកមួយគ្រាប់ ត្រូវបានបាញ់ឆ្ពោះទៅប្រទេសទួរគីពីទឹកដីអ៊ីរ៉ង់»។នាពេលព្រឹកថ្ងៃចន្ទ ក្រសួងការពារជាតិទួរបានរាយការណ៍ពីការស្ទាក់ចាប់មីស៊ីលបាលីស្ទីកថ្មីមួយគ្រាប់ដែលបាញ់ចេញពីអ៊ីរ៉ង់ ហើយចូលទៅក្នុងដែនអាកាសទួរគី។ មីស៊ីលនោះ ត្រូវបានបំផ្លាញដោយប្រព័ន្ធប្រឆាំងមីស៊ីលនិងការពារដែនអាកាសរបស់អង្គការណាតូ ដែលដាក់ពង្រាយនៅភាគខាងកើតសមុទ្រមេឌីទែរ៉ាណេ។ កម្ទេចកម្ទីមួយចំនួនពីគ្រាប់រំសេវបានធ្លាក់ទៅលើដីទំនេរនៅក្នុងទីក្រុង Gaziantep ដោយពុំបានបណ្តាលឲ្យមានអ្នកស្លាប់ ឬរបួសនោះទេ៕

ចិន ឲ្យដឹងថា កំណើនពាណិជ្ជកម្មមានកម្រិតលើសការព្យាករ នៅក្នុងខែមករា-កុម្ភៈ

នៅថ្ងៃអង្គារ (ទី១០ ខែមីនា ឆ្នាំ២០២៦) នេះ ទិន្នន័យផ្លូវការបានបង្ហាញថា ពាណិជ្ជកម្មរបស់ប្រទេសចិនបានកើនឡើង ១ភាគ៥ ក្នុងរយៈពេល ២ខែដំបូងនៃឆ្នាំនេះ ដែលជាកម្រិតលើសពីការព្យាករយ៉ាងខ្ពស់ ទោះបីជាមានការធ្លាក់ចុះនូវការដឹកជញ្ជូនទៅកាន់សហរដ្ឋអាមេរិកក៏ដោយ។តួលេខផ្លូវការ សម្រាប់រយៈពេល ២ខែដំបូងនៃឆ្នាំនេះ ដែលជាធម្មតាត្រូវបានបញ្ចូលគ្នា ដើម្បីរាប់បញ្ចូលការប្រែប្រួលចេញពីថ្ងៃឈប់សម្រាកបុណ្យចូលឆ្នាំចិនដែលកើតឡើងក្នុងពេលវេលាខុសៗគ្នា បានបង្ហាញការចាប់ផ្តើមដ៏រឹងមាំ នៅឆ្នាំ២០២៦ មុនពេលសង្គ្រាមផ្ទុះឡើងនៅតំបន់មជ្ឈិមបូព៌ា។អគ្គរដ្ឋបាលគយ បានឲ្យដឹងថា ការនាំចេញក្នុងរយៈពេលនេះ បានកើនឡើង ២១,៨ភាគរយ ធៀបនឹងរយៈពេលដូចគ្នានៅឆ្នាំមុន ដោយលើសពីការព្យាករ ៧,២ភាគរយ នៅក្នុងការស្ទង់មតិរបស់សារព័ត៌មាន Bloomberg ចំពោះសេដ្ឋវិទូ។ ជាមួយគ្នានេះ ការនាំចូលបានកើនឡើង ១៩,៨ភាគរយ ដែលខ្ពស់ជាងការប៉ាន់ប្រមាណ ៧ភាគរយ នៅក្នុងការស្ទង់មតិរបស់សារព័ត៌មាន Bloomberg។ការកើនឡើងនូវការនាំចូល បានកើតឡើងបន្ទាប់ពីមានទិន្នន័យផ្លូវការ កាលពីថ្ងៃចន្ទ ដែលបង្ហាញថា តម្លៃទំនិញប្រើប្រាស់ហក់ឡើងក្នុងល្បឿនដ៏លឿនបំផុតជាលើកដំបូង ក្នុងរយៈពេល ៣ឆ្នាំ។ តែការនាំចេញទៅកាន់សហរដ្ឋអាមេរិកបានធ្លាក់ចុះ ១១ភាគរយ ខណៈដែលជម្លោះពាណិជ្ជកម្មជាមួយទីក្រុងវ៉ាស៊ីនតោននៅតែបន្តមាន ហើយប្រធានាធិបតី Donald Trump បានជំរុញយុទ្ធនាការដំឡើងពន្ធរបស់លោក។តួលេខបានបង្ហាញថា ការដឹកជញ្ជូនទៅកាន់សហរដ្ឋអាមេរិក មានចំនួនសរុប ៦៧,២៤ពាន់លានដុល្លារ ពីខែមករា ដល់ខែកុម្ភៈ ធៀបនឹង ៧៥,៥៦ពាន់លានដុល្លារ ក្នុងរយៈពេលដូចគ្នាកាលពីឆ្នាំមុន។ ប៉ុន្តែការនាំចេញទៅកាន់សហភាពអឺរ៉ុប បានកើនឡើង ២៧,៨ភាគរយ ខណៈដែលការនាំចេញទៅកាន់អាស៊ាន បានកើនឡើង ២៩,២ភាគរយ៕

លោក Trump ជំរុញឲ្យបក្សសាធារណរដ្ឋរឹតបន្តឹងការបោះឆ្នោត មុនការបោះឆ្នោតពាក់កណ្ដាលអាណត្តិ

ប្រធានាធិបតីអាមេរិក លោក Donald Trump ដែលបានថ្លែងទៅកាន់សមាជិកសភាគណបក្សសាធារណរដ្ឋដោយផ្ទាល់ កាលពីថ្ងៃចន្ទ (ទី៩ ខែមីនា ឆ្នាំ២០២៦) បានជំរុញឲ្យអ្នកទាំងនោះអនុវត្តច្បាប់រឹតបន្តឹងការបោះឆ្នោតថ្មីយ៉ាងទូលំទូលាយ ជាមធ្យោបាយ ដើម្បី «ធានា» ជ័យជម្នះ នៅក្នុងការបោះឆ្នោតពាក់កណ្ដាលអាណត្តិ នាខែវិច្ឆិកា ដោយបានបញ្ជាក់ថា លោកនឹងបដិសេធមិនចុះហត្ថលេខាលើសេចក្ដីព្រាងច្បាប់ថ្មីឲ្យក្លាយជាច្បាប់ជាធរមាន រហូតដល់ពួកគេអនុវត្តកិច្ចការនោះ។ច្បាប់ស្តីពីការការពារសិទ្ធិបោះឆ្នោតជនជាតិអាមេរិក (SAVE) នឹងដាក់ការរឹតបន្តឹងការបោះឆ្នោតថ្មី ក្នុងនោះរួមទាំងការតម្រូវឲ្យផ្ដល់ភស្តុតាងសញ្ជាតិ សម្រាប់អ្នកដែលចុះឈ្មោះបោះឆ្នោត។ វាបានលេចឡើងជាលើកដំបូង កាលពី ២ឆ្នាំមុន ដើម្បីឆ្លើយតបទៅនឹងការអះអាងមិនពិតរបស់លោក Trump ដែលថា ប្រជាជនក្នុងប្រទេសនេះ បានបោះឆ្នោតដោយខុសច្បាប់នៅក្នុងការបោះឆ្នោតអាមេរិក។អំឡុងពេលមានជួបជុំ នៅឯក្លឹបវាយកូនហ្គោល Doral របស់លោក ក្នុងទីក្រុង Miami ដើម្បីពិភាក្សាអំពីរបៀបវារៈនីតិបញ្ញត្តិរបស់លោកប្រធានាធិបតី មេដឹកនាំអាមេរិករូបនេះបានប្រាប់សមាជិកសភាគណបក្សសាធារណរដ្ឋថា៖ «វា (ការឹតបន្តឹង) នឹងធានាដល់ការបោះឆ្នោតពាក់កណ្ដាលអាណត្តិ។ បើអ្នកមិនយល់ទេនោះ នេះគឺជាបញ្ហាធំណាស់ តាមការយល់ឃើញរបស់ខ្ញុំ» ។គណបក្សសាធារណរដ្ឋរបស់លោក កំពុងឆ្ពោះទៅរកការធ្វើយុទ្ធនាការដែលប្រឈមនឹងផលប៉ះពាល់ផ្នែកនយោបាយ ហើយអ្នកវិភាគ លើកឡើងថា ក្រុមនេះអាចនឹងជួបការលំបាក ក្នុងការរក្សាសំឡេងភាគច្រើនស្ដួចស្ដើងរបស់ខ្លួន នៅក្នុងសភា ខណៈដែលគណបក្សប្រជាធិបតេយ្យទាញយកផលពីការមិនពេញចិត្តរបស់អ្នកបោះឆ្នោត ពាក់ព័ន្ធនឹងបញ្ហាសេដ្ឋកិច្ច។ច្បាប់រឹតបន្តឹងនេះនឹងតម្រូវឲ្យជនជាតិអាមេរិកបញ្ជាក់ពីសញ្ជាតិរបស់ពួកគេ នៅពេលចុះឈ្មោះបោះឆ្នោត និងបង្ហាញអត្តសញ្ញាណប័ណ្ណដែលមានរូបថតមុនពេលបោះឆ្នោត។ វាក៏នឹងរឹតបន្តឹងការប្រើប្រាស់សន្លឹកឆ្នោតតាមប្រៃសណីយ៍ផងដែរ។ វាគឺករណីខុសច្បាប់រួចទៅហើយ សម្រាប់អ្នកដែលមិនមែនជាពលរដ្ឋទៅបោះឆ្នោត នៅក្នុងការបោះឆ្នោតសហព័ន្ធ។ ក្រុមឯករាជ្យ ទាំងនៅខាងឆ្វេងនិយម និងខាងស្តាំនិយម ក៏ដូចជាមន្ត្រីបោះឆ្នោតរដ្ឋ បានរកឃើញថា ការបោះឆ្នោតបែបនេះកម្រកើតមានណាស់៕

លោក Trump ប្រឈមនឹងហានិភ័យនយោបាយកាន់តែខ្លាំង ខណៈសង្គ្រាមអ៊ីរ៉ង់កាន់តែក្ដៅ

សមាជិកសភាសាធារណរដ្ឋ កាលពីថ្ងៃចន្ទ (ទី៩ ខែមីនា ឆ្នាំ២០២៦) បានរៀបចំកិច្ចប្រជុំយុទ្ធសាស្ត្រប្រចាំឆ្នាំជាមួយប្រធានាធិបតីអាមេរិក លោក Donald Trump នៅរដ្ឋ Florida ដោយមានបញ្ហាបន្ទាន់មួយធំជាង នៅក្នុងរបៀបវារៈ ដែលនោះគឺ វិធីការពារសង្គ្រាមអ៊ីរ៉ង់កុំឲ្យក្លាយជាការប៉ះពាល់ ក្នុងការបោះឆ្នោតពាក់កណ្តាលអាណត្តិ។កិច្ចប្រជុំប្រចាំឆ្នាំដែលបានគ្រោងទុកយូរហើយ និងដែលបានរៀបចំនៅក្លឹបវាយកូនហ្គោលរបស់លោក Trump នៅទីក្រុង Miami ចាប់ផ្តើមឡើងក្នុងរយៈពេលជាងមួយសប្តាហ៍បន្ទាប់ពីលោកបានបញ្ជាឲ្យមានការវាយប្រហាររួមគ្នាជាមួយអ៊ីស្រាអែលលើអ៊ីរ៉ង់ ដែលជំរុញឲ្យមានការវាយប្រហារសងសឹកវិញ នៅទូទាំងមជ្ឈិមបូព៌ា និងបង្កឲ្យមានផលប៉ះពាល់ នៅជុំវិញពិភពលោក។ខណៈពេលដែលតម្លៃប្រេងឆៅហក់ឡើងដល់កម្រិតខ្ពស់បំផុតជាលើកដំបូង ក្នុងរយៈពេលច្រើនឆ្នាំ ដោយតម្លៃប្រេងឥន្ធនៈរបស់សហរដ្ឋអាមេរិកក៏ឡើងដូចគ្នាដែរ គណបក្សសាធារណរដ្ឋប្រឈមនឹងផលប៉ះពាល់ផ្នែកនយោបាយដែលអាចកើតមាន ពោលគឺត្រឹមតែ ៨ខែប៉ុណ្ណោះ មុនការបោះឆ្នោតខែវិច្ឆិកា។ ការបាត់បង់ការគ្រប់គ្រងដ៏ស្ដួចស្ដើងនៅសភា ក៏អាចប៉ះពាល់រយៈពេល ២ឆ្នាំចុងក្រោយនៃអាណត្តិរបស់លោក Trump ផងដែរ។ជម្លោះអ៊ីរ៉ង់បែបបើកចំហថ្មីនេះ បានធ្វើឲ្យមានការខ្វែងគំនិតគ្នារួចហើយនៅក្នុងចំណោមអ្នកគាំទ្រលោកប្រធានាធិបតី បន្ទាប់ពីមហាសេដ្ឋីជំនួញវ័យ ៧៩ឆ្នាំរូបនេះ បានធ្វើយុទ្ធនាការបញ្ចប់សង្គ្រាមនៅក្រៅប្រទេស។លោកសាស្ត្រាចារ្យ Todd Belt ដែលជាអ្នកជំនាញផ្នែកគ្រប់គ្រងនយោបាយ នៅសាកលវិទ្យាល័យ George Washington បានប្រាប់សារព័ត៌មាន AFP ថា៖ «ជាធម្មតា គោលនយោបាយការបរទេសមិនដើរតួនាទីសំខាន់ នៅក្នុងការបោះឆ្នោតពាក់កណ្តាលអាណត្តិទេ ប្រសិនបើមិនមានទំនាក់ទំនងផ្ទាល់ទៅនឹងរបៀបដែលវាធ្វើឲ្យជីវិតមនុស្សកាន់តែពិបាកទៅៗនោះទេ»។លោកសាស្ត្រាចារ្យរូបនេះ បានព្រមានថា ផលប៉ះពាល់សេដ្ឋកិច្ច ដោយសារតម្លៃប្រេងដែលកំពុងហក់ឡើង អាចអូសបន្លាយរហូតដល់ថ្ងៃបោះឆ្នោត និងបន្ថែមផលវិបាកដែលគណបក្សរបស់ប្រធានាធិបតី ត្រូវប្រឈមអំឡុងការបោះឆ្នោតពាក់កណ្តាលអាណត្តិ៕

លោក Trump ពិចារណាសម្រាលទណ្ឌកម្មលើរុស្ស៊ី និងវិធានការផ្សេងទៀត ដើម្បីទម្លាក់តម្លៃប្រេង

យោងតាមប្រភពជាច្រើន បានឲ្យដឹងថា ប្រធានាធិបតីអាមេរិក លោក Donald Trump កំពុងពិចារណាពីការបន្ធូរបន្ថយទណ្ឌកម្មប្រេង លើប្រទេសរុស្ស៊ី ព្រមទាំងប្រទេសផ្សេងទៀត និងការបញ្ចេញស្តុកប្រេងឆៅបន្ទាន់ ជាផ្នែកមួយនៃជម្រើសជាច្រើនដែលមានគោលបំណងទប់ស្កាត់ការហក់ឡើងនូវតម្លៃប្រេងសកល ក្នុងអំឡុងពេលមានជម្លោះ ជាមួយអ៊ីរ៉ង់។ការពិភាក្សាយ៉ាងម៉ត់ចត់ទាំងនេះ ឆ្លុះបញ្ចាំងពីក្ដីបារម្ភរបស់សេតវិមាន ដែលថា តម្លៃប្រេងឡើងខ្ពស់បន្ទាប់ពីមានការវាយប្រហារជាងមួយសប្តាហ៍របស់សហរដ្ឋអាមេរិក និងអ៊ីស្រាអែល លើអ៊ីរ៉ង់ នឹងធ្វើឲ្យប៉ះពាល់ដល់អាជីវកម្ម និងអ្នកប្រើប្រាស់អាមេរិក មុនការបោះឆ្នោតពាក់កណ្តាលអាណត្តិខែវិច្ឆិកា ជាពេលដែលសមាជិកគណបក្សសាធារណរដ្ឋរបស់លោក Trump សង្ឃឹមថា នឹងរក្សាបាននូវការគ្រប់គ្រង នៅសភា។នៅរដ្ឋ Florida កាលពីថ្ងៃចន្ទ (ទី៩ ខែមីនា ឆ្នាំ២០២៦) លោក Trump បានប្រាប់អ្នកសារព័ត៌មានថា រដ្ឋបាលរបស់លោក កំពុងដកទណ្ឌកម្មលើប្រទេសមួយចំនួន ដែលជាផ្នែកមួយនៃកិច្ចប្រឹងប្រែង ដើម្បីធ្វើឲ្យទីផ្សារប្រេងមានស្ថិរភាព ប៉ុន្តែបានបដិសេធមិនផ្តល់សេចក្ដីលម្អិត។ មេដឹកនាំអាមេរិករូបនេះ បាននិយាយថា៖ «យើងមានទណ្ឌកម្មលើប្រទេសមួយចំនួន។ យើងនឹងដកទណ្ឌកម្មទាំងនោះ រហូតដល់ច្រកសមុទ្រត្រូវបានបើកចំហឡើងវិញ»។ការសម្រេចសម្រាលទណ្ឌកម្មលើរុស្ស៊ី អាចជួយជំរុញដល់ការផ្គត់ផ្គង់ប្រេងពិភពលោក នៅពេលដែលមានការរំខានយ៉ាងខ្លាំងដល់ការដឹកជញ្ជូន នៅតំបន់មជ្ឈិមបូព៌ា ដោយសារជម្លោះនៅអ៊ីរ៉ង់ដែលកាន់តែរាលដាល។ ប៉ុន្តែវាក៏អាចធ្វើឲ្យស្មុគស្មាញដល់កិច្ចប្រឹងប្រែងរបស់សហរដ្ឋអាមេរិក ក្នុងការលុបបំបាត់ប្រាក់ចំណូលរបស់រុស្ស៊ី ពាក់ព័ន្ធនឹងសង្គ្រាមរបស់ប្រទេសនេះ នៅអ៊ុយក្រែន៕

បណ្ដាញសង្គម

ព័ត៌មានថ្មីៗ

មន្ត្រី៖ ក្រុមហាម៉ាសនឹងធ្វើកិច្ចពិភាក្សាជាមួយអន្តរការីតំបន់ហ្កាហ្សា នៅអេហ្ស៊ីប

កម្អែហូរចេញពីមាត់ភ្នំភ្លើង Kilauea របស់រដ្ឋហាវ៉ៃ ខណៈការកម្រើកត្រូវបានគេរំពឹងថានឹងកើនឡើង

កិច្ចព្រមព្រៀងពាណិជ្ជកម្មឥណ្ឌា-អាមេរិក ឆ្លុះបញ្ចាំងពីការផ្លាស់ប្តូរពន្ធរបស់ទីក្រុងវ៉ាស៊ីនតោន

អ៊ីស្រាអែល៖ «គ្មានភាពស្ងប់ស្ងាត់ នៅទីក្រុងបេរូត» ទេ បើក្រុមហេសបូឡាមិនបញ្ឈប់ការវាយប្រហារ

វិមានក្រឹមឡាំង៖ អាជ្ញាធរកំពុងធ្វើការដោះស្រាយបញ្ហាបែងចែកប្រេងនៅតំបន់គ្រីមៀ

ពលរដ្ឋជម្លៀសខ្លួនចេញពីតំបន់ជាយក្រុងភាគខាងត្បូងទីក្រុងបេរូត ក្រោយលោក Netanyahu បញ្ជាឲ្យវាយប្រហារក្រុមហេសបូឡា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877