BTV NEWS

ប្រធានាធិបតីមីយ៉ាន់ម៉ាបញ្ជាក់ឡើងវិញពីការប្តេជ្ញាចិត្តចំពោះសន្តិសុខរបស់ឥណ្ឌា

ប្រតិបត្តិករនាវា ជំរុញឲ្យមានច្បាប់ច្បាស់វិលត្រឡប់មកកាន់ច្រកសមុទ្រ Hormuz វិញ

កងទ័ពជើងទឹកបារាំងដោយមានការគាំទ្រពីអង់គ្លេស បានស្កាត់ចាប់នាវាដឹកប្រេងរុស្ស៊ី

EU ជំរុញឲ្យអ៊ីស្រាអែលឈប់បង្កើនភាពតានតឹងផ្នែកយោធា នៅលីបង់ និងគាំទ្រកិច្ចប្រឹងប្រែងការទូត

ព័ត៌មានអន្តរជាតិ

បេសកជនរុស្ស៊ី៖ ការរៀបចំកិច្ចចរចាអ៊ុយក្រែននៅក្នុងសហភាពអឺរ៉ុប មានបញ្ហាស្មុកស្មាញ ដោយសារតែសម្ពាធ

លោក Rodion Miroshnik ឯកអគ្គរដ្ឋទូតទទួលបន្ទុកបេសកកម្មពិសេសនៃក្រសួងការបរទេសរុស្ស៊ី បាននិយាយនៅក្នុងបទសម្ភាសន៍ជាមួយសារព័ត៌មាន TASS ថា ការរៀបចំកិច្ចចរចាស្តីពីការដោះស្រាយជម្លោះអ៊ុយក្រែននៅក្នុងបណ្តាប្រទេសនៅអឺរ៉ុប គឺមានបញ្ហាដ៏ស្មុកស្មាញ ខណៈដែលមន្ត្រីសហភាពអឺរ៉ុបព្យាយាមដាក់សម្ពាធលើអ្នកចរចា។ អ្នកការទូតរុស្ស៊ីបានត្អូញត្អែរថា៖«អឺរ៉ុបក៏កំពុងក្លាយជាបញ្ហាយ៉ាងខ្លាំងសម្រាប់ការធ្វើជាម្ចាស់ផ្ទះនៃកិច្ចចរចា។ យើងបានឃើញកិច្ចប្រជុំចុងក្រោយបំផុតនៅទីក្រុងហ្សឺណែវ នៅពេលដែលអឺរ៉ុបអសមត្ថភាពក្នុងការដឹកនាំ និងជ្រៀតជ្រែកក្នុងការចរចា ឬមានឥទ្ធិពលលើដំណើរការនេះ បន្ទាប់មកបានដាក់មន្ត្រីជាន់ខ្ពស់របស់ខ្លួន នៅមុខទ្វារបន្ទប់ចរចា»។ លោកបានពន្យល់ថា៖«សម្ពាធបែបនេះ មិនរួមចំណែកដល់ការឈានដល់កិច្ចព្រមព្រៀងទាក់ទងនឹងតម្រូវការជាក់លាក់នូវទីកន្លែងមួយសម្រាប់កិច្ចចរចានោះទេ ក្នុងនោះមានទាំងសន្តិសុខ ភស្តុភារ និងគ្មានសម្ពាធ»។ ទាក់ទងនឹងការរៀបចំកិច្ចចរចា លោក Miroshnik បានបន្តថា កិច្ចចរចាទាំងនោះ គួរតែត្រូវបានធ្វើឡើងជាចម្បង នៅពីក្រោយទ្វារបិទជិត ដើម្បីការពារអ្នកចរចាពីសម្ពាធខាងក្រៅណាមួយ។ លោកបានសម្តែងការសោកស្តាយថា «មានមនុស្សច្រើនពេកដែលចង់មានឥទ្ធិពលលើការចរចាដល់កម្រិត ដែលពួកគេមិនអាចបន្តបាន»៕

សេវាកម្មសង្គ្រោះបន្ទាន់៖ មន្ទីរពេទ្យអ៊ីរ៉ង់ជិត ៣០កន្លែង ត្រូវខូចខាតយ៉ាងធ្ងន់ធ្ងរ ពីការទម្លាក់គ្រាប់បែក

អ្នកនាំពាក្យនៃនាយកដ្ឋានស្ថានភាពអាសន្នរបស់ប្រទេសអ៊ីរ៉ង់ បាននិយាយថា ចាប់តាំងពីការចាប់ផ្តើមប្រតិបត្តិការយោធារបស់សហរដ្ឋអាមេរិក និងអ៊ីស្រាអែលមក មន្ទីរពេទ្យជិត ៣០ កន្លែង និងមជ្ឈមណ្ឌលវេជ្ជសាស្ត្រជាង ៤០កន្លែង ត្រូវបានខូចខាតយ៉ាងធ្ងន់ធ្ងរ នៅទូទាំងប្រទេសនេះ។ លោកបាននិយាយថា៖«ដោយសារការវាយប្រហារលើសាធារណរដ្ឋឥស្លាមនេះ មន្ទីរពេទ្យចំនួន ២៩កន្លែង មជ្ឈមណ្ឌលវេជ្ជសាស្ត្រចំនួន ៤១ កន្លែង និងមជ្ឈមណ្ឌលរថយន្តសង្គ្រោះបន្ទាន់ចំនួន ១៨ កន្លែង ត្រូវបានខូចខាត»។យោងតាមរបាយការណ៍ចុងក្រោយរបស់អឌ្ឍចន្ទក្រហមអ៊ីរ៉ង់ យ៉ាងហោចណាស់មានជនស៊ីវិលអ៊ីរ៉ង់ចំនួន ១.៣៣២នាក់ បានបាត់បង់ជីវិត ដោយសារតែការវាយប្រហាររបស់សហរដ្ឋអាមេរិក និងអ៊ីស្រាអែលលើសាធារណរដ្ឋនេះ៕

ស៊ីរីចោទក្រុមហេសបូឡានៅលីបង់ថា បានបាញ់គ្រាប់ផ្លោងចូលទៅក្នុងទឹកដីរបស់ខ្លួន

ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃអង្គារនេះថា ស៊ីរីបាននិយាយថា ក្រុមហេសបូឡាដែលគាំទ្រដោយអ៊ីរ៉ង់ បានបាញ់គ្រាប់កាំភ្លើងធំចូលទៅក្នុងទឹកដីរបស់ខ្លួនពីប្រទេសលីបង់ពេញមួយយប់ ស្របពេលមានជម្លោះដែលកំពុងបន្តរវាងអ៊ីស្រាអែល និងចលនាស៊ីអ៊ីតលីបង់។ទីភ្នាក់ងារសារព័ត៌មានរដ្ឋ SANA បានឲ្យដឹងនៅថ្ងៃអង្គារនេះថា មន្ត្រីកងទ័ពស៊ីរី បាននិយាយថា គ្រាប់កាំភ្លើងធំដែលបាញ់ចេញពីប្រទេសលីបង់ បានធ្លាក់នៅជិតទីក្រុង Serghaya ភាគខាងលិចនៃទីក្រុងដាម៉ាស។ កងទ័ព បានចោទប្រកាន់ក្រុមហេសបូឡាថា បានកំណត់គោលដៅទីតាំងឈរជើងរបស់ទាហានស៊ីរី ដោយប្រាប់ទីភ្នាក់ងារសារព័ត៌មានថា ខ្លួនបានសង្កេតឃើញក្រុមហេសបូឡាបន្ថែមកម្លាំងនៅតាមព្រំដែនស៊ីរី-លីបង់។កងទ័ពបាននិយាយនៅក្នុងសេចក្តីថ្លែងការណ៍មួយទៅកាន់ SANA ថា៖«កងទ័ពអារ៉ាប់ស៊ីរី នឹងមិនអត់ឱនចំពោះការឈ្លានពានណាមួយដែលកំណត់គោលដៅទៅលើប្រទេសស៊ីរីទេ»។លីបង់ត្រូវបានអូសទាញចូលទៅក្នុងសង្គ្រាមមជ្ឈិមបូព៌ា កាលពីសប្តាហ៍មុន នៅពេលដែលក្រុមហេសបូឡាបានវាយប្រហារអ៊ីស្រាអែល ជាការឆ្លើយតបទៅនឹងការសម្លាប់មេដឹកនាំកំពូលអ៊ីរ៉ង់ លោក Ayatollah Ali Khamenei អំឡុងពេលវាយប្រហាររបស់សហរដ្ឋអាមេរិក និងអ៊ីស្រាអែល។ក្រុមហេសបូឡា និងកងកម្លាំងអ៊ីស្រាអែល បានប៉ះទង្គិចគ្នានៅភាគខាងកើតប្រទេសលីបង់ ក្នុងរយៈពេលប៉ុន្មានថ្ងៃថ្មីៗនេះ ហើយអ៊ីស្រាអែលបានធ្វើការវាយប្រហារនៅទូទាំងប្រទេសលីបង់ រួមទាំងនៅរដ្ឋធានីបេរូតផងដែរ៕

មន្ត្រីជាន់ខ្ពស់ទួរគី៖ ប្រព័ន្ធការពារដែនអាកាសរបស់ណាតូស្ទាក់ចាប់មីស៊ីលបាលីស្ទីកដែលបាញ់ចេញពី អ៊ីរ៉ង់

ក្រសួងការពារជាតិទួរគី បានរាយការណ៍ពីការស្ទាក់ចាប់មីស៊ីលបាលីស្ទីកថ្មីមួយគ្រាប់ ដែលបានបាញ់ចេញពីអ៊ីរ៉ង់ ហើយចូលទៅក្នុងដែនអាកាសទួរគី។ក្រសួងបាននិយាយនៅក្នុងសេចក្តីថ្លែងការណ៍មួយថា៖«មីស៊ីលបាលីស្ទីកមួយគ្រាប់ដែលត្រូវបានបាញ់ចេញពីអ៊ីរ៉ង់ ហើយចូលទៅក្នុងដែនអាកាសទួរគី ត្រូវបានបំផ្លាញដោយប្រព័ន្ធប្រឆាំងមីស៊ីលនិង ការពារដែនអាកាសរបស់អង្គការណាតូ ដែលដាក់ពង្រាយនៅភាគខាងកើតសមុទ្រមេឌីទែរ៉ាណេ។ កម្ទេចកម្ទីមួយចំនួនពីមីស៊ីលនោះ បានធ្លាក់ទៅលើដីទំនេរនៅក្នុងទីក្រុង Gaziantep ដោយពុំបានបង្កឲ្យមានអ្នកស្លាប់ ឬរងរបួសទេ»។ក្រសួងបានសង្កត់ធ្ងន់ថា ប្រទេសទួរគី «ផ្តល់សារៈសំខាន់យ៉ាងខ្លាំងទៅលើទំនាក់ទំនងអ្នកជិតខាងល្អ និងស្ថិរភាពក្នុងតំបន់»។ សេចក្តីថ្លែងការណ៍នេះ បានបញ្ជាក់ថា៖«ទោះជាយ៉ាងណាក៏ដោយ យើងសង្កត់ធ្ងន់ជាថ្មីថា វិធានការចាំបាច់ទាំងអស់ នឹងត្រូវធ្វើឡើងយ៉ាងម៉ឺងម៉ាត់ និងដោយគ្មានការស្ទាក់ស្ទើរប្រឆាំងនឹងការគំរាមកំហែងណាមួយដែលតម្រង់ទៅលើទឹកដី និងដែនអាកាសរបស់ប្រទេសយើងនោះ»៕

ប្រធានាធិបតីលីបង់អំពាវនាវឲ្យមានការចរចាដោយផ្ទាល់ ជាមួយអ៊ីស្រាអែល

ប្រធានាធិបតីលីបង់ លោក Joseph Aoun កាលពីថ្ងៃចន្ទ បានអំពាវនាវឲ្យមានការចរចាដោយផ្ទាល់រវាងលីបង់ និងអ៊ីស្រាអែល ក្រោមការឧបត្ថម្ភពីអន្តរជាតិ ជាផ្នែកមួយនៃគំនិតផ្តួចផ្តើមថ្មីមួយ ដែលមានគោលបំណងបញ្ចប់ការកើនឡើងភាពតានតឹងដែលកំពុងបន្តនេះ។ក្នុងអំឡុងពេលនៃកិច្ចប្រជុំតាមអ៊ីនធឺណិតជាមួយប្រធានក្រុមប្រឹក្សាអឺរ៉ុប លោក Antonio Costa និងប្រធានគណៈកម្មការអឺរ៉ុប លោកស្រី Ursula von der Leyen លោក Aoun បានជំរុញឲ្យសហគមន៍អន្តរជាតិគាំទ្រគំនិតផ្តួចផ្តើមនេះ និងជួយអនុវត្តបទប្បញ្ញត្តិរបស់ខ្លួន។យោងតាមសំណើដែលបង្ហាញដោយលោក Aoun ប្រទេសលីបង់ និងអ៊ីស្រាអែល នឹងចាប់ផ្តើមការចរចាដោយផ្ទាល់ ក្រោមការឧបត្ថម្ភពីអន្តរជាតិ ដើម្បីអនុវត្តការរៀបចំសន្តិសុខមួយចំនួន ដែលមានគោលបំណងស្តារស្ថិរភាពឡើងវិញ។សេចក្តីថ្លែងការណ៍មួយដែលចេញផ្សាយដោយការិយាល័យប្រធានាធិបតីលីបង់ បានរាយការណ៍ថា គំនិតផ្តួចផ្តើមនេះ អំពាវនាវឲ្យបង្កើតបទឈប់បាញ់ពេញលេញ និងបញ្ឈប់ការវាយប្រហារតាមផ្លូវគោក ផ្លូវអាកាស និងផ្លូវសមុទ្ររបស់អ៊ីស្រាអែលទាំងអស់លើប្រទេសលីបង់។ បទឈប់បាញ់នោះ ក៏រួមបញ្ចូលទាំងការផ្តល់ការគាំទ្រផ្នែកភស្តុភារជាបន្ទាន់ដល់កងកម្លាំងប្រដាប់អាវុធលីបង់ផងដែរ។ក្រោមសំណើនេះ កងទ័ពលីបង់នឹងដាក់ពង្រាយភ្លាមៗទៅកាន់តំបន់ ដែលទើបតែមានភាពតានតឹងថ្មីៗនេះកើតឡើង គ្រប់គ្រងតំបន់ទាំងនោះ រឹបអូសអាវុធ និងរុះរើឃ្លាំងអាវុធ និងឃ្លាំងស្តុកសម្ភារៈមួយចំនួន ដែលជាកម្មសិទ្ធិរបស់ក្រុមហេសបូឡា ដោយផ្អែកលើព័ត៌មានដែលមាន៕

ក្រុមសិទ្ធិមនុស្ស៖ មនុស្សជាង ១.២០០នាក់ បានស្លាប់ក្នុងការវាយប្រហារដោយយានដ្រូននៅប្រទេសហៃទី

អង្គភាពឃ្លាំមើលសិទ្ធិមនុស្ស HRW បាននិយាយក្នុងរបាយការណ៍មួយនៅថ្ងៃអង្គារ (១០ មីនា) នេះថា ការវាយប្រហារដោយយានដ្រូនដឹកគ្រាប់បែក ពីសំណាក់កងកម្លាំងសន្តិសុខហៃទី ដែលកំណត់គោលដៅលើក្រុមជនអន្ធពាលប្រដាប់អាវុធ បានសម្លាប់មនុស្សជាង ១.២០០ នាក់ រួមទាំងជនស៊ីវិលពេញវ័យ ៤៣ នាក់ និងកុមារ ១៧ នាក់ ដោយបន្ថែមថា ប្រតិបត្តិការនោះកើនឡើងខ្លាំងក្នុងប៉ុន្មានខែថ្មីៗនេះ។ចាប់តាំងពីខែមីនាឆ្នាំមុន កងកម្លាំងសន្តិសុខហៃទី ដោយមានការគាំទ្រពីស្ថាប័ន Vectus Global បានធ្វើប្រតិបត្តិការប្រឆាំងនឹងក្រុមឧក្រិដ្ឋជន ដោយប្រើប្រាស់យានដ្រូនមានស្លាបបួន ដែលបំពាក់ដោយគ្រឿងផ្ទុះជាញឹកញាប់ លើតំបន់ដែលមានប្រជាជនរស់នៅច្រើននៃរដ្ឋធានីព័រអូប្រាំង។ គួរឱ្យដឹងថា ស្ថាប័ន Vectus Global នេះគឺជាក្រុមហ៊ុនយោធាឯកជនមួយ មានមូលដ្ឋាននៅសហរដ្ឋអាមេរិក។ភារធារីសហរដ្ឋអាមេរិកប្រចាំហៃទី បានប្រាប់គណៈកម្មាធិការព្រឹទ្ធសភាកាលពីខែមុនថា ក្រសួងការបរទេសអាមេរិក បានផ្តល់អាជ្ញាប័ណ្ណដល់ក្រុមហ៊ុន Vectus ឱ្យនាំចេញសេវាកម្មរបស់ខ្លួនទៅហៃទី។ លោកស្រី Juanita Goebertus ប្រធានអង្គការ HRW ប្រចាំទ្វីបអាមេរិក បានប្រាប់សារព័ត៌មានរ៉យទ័រថា ក្រុមសិទ្ធិមនុស្សមួយនេះ បានកត់ត្រាការប្រើប្រាស់កម្លាំងដោយខុសច្បាប់ជាច្រើនករណី ហើយលោកស្រីបានជំរុញឱ្យបណ្ដាដៃគូរបស់ហៃទី គួរតែឈប់សហការជាមួយកងកម្លាំងសន្តិសុខរបស់ប្រទេសនេះ រហូតដល់ពួកគេអនុវត្តវិធានការការពារជនស៊ីវិល។ដោយផ្អែកលើការសម្ភាសន៍ជាមួយក្រុមវេជ្ជបណ្ឌិត សាច់ញាតិជនរងគ្រោះ មេដឹកនាំសហគមន៍ និងវីដេអូនៃការវាយប្រហារនានា អង្គការ HRW បានរកឃើញថា ការវាយប្រហារដោយយានដ្រូនបានសម្លាប់មនុស្សចំនួន ១.២៤៣ នាក់ ចន្លោះខែមីនា ឆ្នាំមុន ដល់ថ្ងៃទី២១ ខែមករា នៃឆ្នាំនេះ។ ប្រជាពលរដ្ឋហៃទីមួយចំនួនបានប្រាប់អង្គការ HRW ថា ពួកគេខ្លាចមិនហ៊ានចាកពីផ្ទះសម្បែងឡើយ ដោយសារតែយានដ្រូនវាយប្រហារ បន្តហោះហើរពាសពេញតំបន់រដ្ឋធានី៕

មេដឹកនាំក្នុងតំបន់អំពាវនាវឲ្យមានកិច្ចខិតខំប្រឹងប្រែងផ្នែកការទូត ដើម្បីបញ្ចប់សង្គ្រាមនៅមជ្ឈិមបូព៌ា

ក្រុមមេដឹកនាំនៅមជ្ឈិមបូព៌ាកាលពីថ្ងៃចន្ទ បានជំរុញឲ្យមានកិច្ចខិតខំប្រឹងប្រែងផ្នែកការទូត ដើម្បីទប់ស្កាត់ភាពតានតឹងដែលកំពុងកើនឡើងនៅក្នុងតំបន់ ខណៈដែលសហរដ្ឋអាមេរិក និងអ៊ីស្រាអែល បានបន្តការវាយប្រហាររួមគ្នាលើអ៊ីរ៉ង់ ដែលជំរុញឲ្យមានការវាយប្រហារសងសឹក។មេដឹកនាំទាំងនោះ បានធ្វើការអត្ថាធិប្បាយតាមរយៈសន្និសីទតាមវីដេអូ នៅក្នុងកិច្ចប្រជុំបន្ទាន់មួយ ដែលបានធ្វើឡើងដោយសហភាពអឺរ៉ុបទាក់ទងនឹងការវិវត្តក្នុងតំបន់នាពេលបច្ចុប្បន្ន ដោយមានការចូលរួមពីមេដឹកនាំ និងមន្ត្រីមកពីប្រទេសក្រុមប្រឹក្សាសហប្រតិបត្តិការឈូងសមុទ្រ (GCC) ហ្ស៊កដានី លីបង់ ស៊ីរី ទួរគី អ៊ីរ៉ាក់ អាមេនី និងអាស៊ែរបៃហ្សង់។អំឡុងពេលសន្និសីទ ប្រធានាធិបតីអេហ្ស៊ីប លោក Abdel-Fattah al-Sisi បានសង្កត់ធ្ងន់លើសារៈសំខាន់នៃគ្រប់ភាគីទាំងអស់ដែលអនុវត្តការអត់ធ្មត់ ធ្វើការដើម្បីកាត់បន្ថយការកើនឡើងភាពតានតឹង ការផ្តល់អាទិភាពដល់ភាសានៃការសន្ទនា និងជំរុញឲ្យមានផ្លូវការទូត។ នេះបើយោងតាមសេចក្តីថ្លែងការណ៍មួយពីការិយាល័យប្រធានាធិបតីនៃប្រទេសនេះ។លោក Sisi បានសង្កត់ធ្ងន់ថា ការដោះស្រាយវិបត្តិ និងជម្លោះតាមរយៈមធ្យោបាយសន្តិភាព គឺជាជម្រើសត្រឹមត្រូវសម្រាប់ការសម្រេចបាននូវស្ថិរភាព និងសន្តិសុខដែលប្រាថ្នាចង់បាន។ លោកក៏បានបញ្ជាក់ពីភាពចាំបាច់នៃការបញ្ឈប់ជាបន្ទាន់ចំពោះ «ការវាយប្រហារទាំងអស់» លើបណ្តាប្រទេសអារ៉ាប់។យោងតាមសេចក្តីថ្លែងការណ៍របស់ស្ថាប័នទំនាក់ទំនងផ្នែករដ្ឋបាលនិងនយោបាយរវាងព្រះមហាក្សត្រនិងរដ្ឋហ្ស៊កដានី ព្រះមហាក្ស Abdullah ទី២ បានគូសបញ្ជាក់ពីសារៈសំខាន់នៃការពឹងផ្អែកលើការទូត និងការសន្ទនា ដើម្បីទប់ស្កាត់ភាពតានតឹងដែលកំពុងកើនឡើង នៅក្នុងតំបន់នេះ៕

និស្សិតសាកលវិទ្យាល័យគុយបា ធ្វើបាតុកម្មដ៏កម្រមួយ ស្របពេលកង្វះថាមពល និងដាច់អ៊ីនធឺណិត

និស្សិតសាកលវិទ្យាល័យគុយបាមួយក្រុមតូច បានរៀបចំបាតុកម្មដ៏កម្រមួយដែលមានរយៈពេលរាប់ម៉ោង នៅសាកលវិទ្យាល័យឡាហាវ៉ាន កាលពីថ្ងៃចន្ទ (៩ មីនា) ដោយសារការខឹងសម្បារចំពោះភាពរអាក់រអួលនៃម៉ោងសិក្សា ស្របពេលការបិទខ្ទប់ផ្លូវដឹកជញ្ជូនប្រេងពីសំណាក់សហរដ្ឋអាមេរិក ដែលបានរួមចំណែកធ្វើឱ្យបណ្ដាញអគ្គិសនីរបស់ប្រទេសគុយបា ខិតជិតសភាពដួលរលំ ព្រមទាំងការដាច់អ៊ិនធឺណិតឥតឈប់ឈរ។ក្រុមនិស្សិតបានអង្គុយតវ៉ានៅក្រោមពន្លឺថ្ងៃដ៏ក្តៅគគុក ដែលបង្កឱ្យមានជម្លោះពាក្យសម្ដីន្តិចបន្តួចជាមួយសាស្ត្រាចារ្យ និងបុគ្គលិករដ្ឋបាលសាកលវិទ្យាល័យមួយចំនួន។ ហ្វូងនិស្សិតតវ៉ាទាំងនោះបាននិយាយថា អាជ្ញាធរបានបរាជ័យក្នុងការចាត់វិធានការឱ្យបានសមស្រប ដើម្បីទប់ស្កាត់ការរំខានធ្ងន់ធ្ងរដល់ការសិក្សា ក្នុងពេលដែលលសហរដ្ឋអាមេរិក បានបង្កើនការដាក់ទណ្ឌកម្ម និងសម្ពាធលើប្រទេសកោះក្នុងតំបន់ការ៉ាអ៊ីពមួយនេះ។កាលពីខែមករា អាមេរិក បានកាត់ផ្ដាច់ការដឹកជញ្ជូនប្រេងពីវ៉េណេស៊ុយអេឡា មិនឱ្យទៅដល់គុយបានោះទេ ដែលបានធ្វើឱ្យបណ្ដាញអគ្គិសនីដែលកំពុងតែទ្រុឌទ្រោមស្រាប់ទៅហើយរបស់ប្រទេសកោះនេះ កាន់តែអាក្រក់ទៅៗ ដោយសារកង្វះខាតប្រេងឥន្ធនៈ និងបង្កឱ្យមានផលប៉ះពាល់ជាបន្តបន្ទាប់ដល់ការដឹកជញ្ជូន ការផ្គត់ផ្គង់ស្បៀងអាហារ និងបណ្ដាញទំនាក់ទំនងតាមប្រព័ន្ធអ៊ីនធឺណិត។អាជ្ញាធរគុយបា បានប្រកាសវិធានការជាបន្តបន្ទាប់កាលពីខែមករា ដើម្បីជួយសម្រួលវិបត្តិថាមពល រួមទាំងការសិក្សាពីចម្ងាយដូចកាលពីសម័យជំងឺរាតត្បាតកូវីដ-១៩ជាដើម។ ប៉ុន្តែក្រុមនិស្សិតបានលើកឡើងថា វិធានការទាំងនោះមិនទាន់គ្រប់គ្រាន់ឡើយ ហើយបានសម្រេចចិត្តធ្វើបាតុកម្មដើម្បីសម្ដែងកង្វល់របស់ពួកគេ៕

អ៊ីស្រាអែលអះអាងថា ទាហាននិងមេបញ្ជាការអ៊ីរ៉ង់ប្រហែល ១.៩០០នាក់ ត្រូវបានសម្លាប់ ក្នុងការវាយប្រហារ

អ្នកនាំពាក្យយោធា Effie Defrin បាននិយាយកាលពីថ្ងៃចន្ទថា យោធាអ៊ីស្រាអែល បានសម្លាប់ទាហាន និងមេបញ្ជាការអ៊ីរ៉ង់ប្រហែល ១.៩០០នាក់ ចាប់តាំងពីការចាប់ផ្តើមនៃជម្លោះ ដោយបន្ថែមថា អ៊ីស្រាអែលមិនបានច្រានចោលការកំណត់គោលដៅលើមេដឹកនាំកំពូលដែលទើបប្រកាសថ្មីរបស់អ៊ីរ៉ង់នោះទេ។ថ្លែងនៅក្នុងសន្និសីទសារព័ត៌មានមួយ លោក Defrin ក៏បានបញ្ជាក់ផងដែរថា មនុស្សទី២ ត្រូវបានសម្លាប់នៅព្រឹកថ្ងៃចន្ទ នៅក្នុងការវាយប្រហារដោយមីស៊ីលរបស់អ៊ីរ៉ង់នៅអ៊ីស្រាអែល ដែលធ្វើឲ្យចំនួនអ្នកស្លាប់សរុបពីការវាយប្រហាររបស់អ៊ីរ៉ង់នៅក្នុងប្រទេសនេះ កើនឡើងដល់ ១២នាក់ បន្ថែមពីលើទាហានពីរនាក់ដែលត្រូវបានសម្លាប់ នៅក្នុងការប្រយុទ្ធជាមួយក្រុមសកម្មប្រយុទ្ធហេសបូឡានៅប្រទេសលីបង់។យោងតាមក្រសួងសុខាភិបាលអ៊ីស្រាអែល មនុស្សសរុបចំនួន ២.២៣៨នាក់ នៅអ៊ីស្រាអែល ត្រូវបានជម្លៀសទៅកាន់មន្ទីរពេទ្យ ចាប់តាំងពីការចាប់ផ្តើមនៃការវាយប្រហាររបស់សហរដ្ឋអាមេរិក និងអ៊ីស្រា អែលលើអ៊ីរ៉ង់ ដោយ ៩១នាក់ក្នុងចំណោមពួកគេ កំពុងស្ថិតនៅក្នុងមន្ទីរពេទ្យ។លោក Defrin បាននិយាយថា កងទ័ពអាកាសបានបន្តការវាយប្រហាររបស់ខ្លួនកាលពីថ្ងៃចន្ទ ជាមួយនឹងការវាយប្រហារនៅទីក្រុងតេអេរ៉ង់, Isfahan និងភាគខាងត្បូងអ៊ីរ៉ង់៕

IAEA៖ អ៊ុយរ៉ានីញ៉ូមភាគច្រើនរបស់អ៊ីរ៉ង់ ដែលជិតកម្រិតគ្រាប់បែកនុយក្លេអ៊ែរ ទំនងជាទុកនៅទីក្រុង Isfahan

អគ្គនាយកទីភ្នាក់ងារថាមពលអាតូមិកអន្តរជាតិ (IAEA) លោក Rafael Grossi បានថ្លែងកាលពីថ្ងៃចន្ទ (៩ មីនា) ថា ចំនួនជិតពាក់កណ្តាលនៃសារធាតុអ៊ុយរ៉ានីញ៉ូមរបស់អ៊ីរ៉ង់ ដែលមានកម្រិតភាពសុទ្ធដល់ទៅ ៦០% ពោលគឺជាកម្រិតកៀកនឹងការផលិតអាវុធនុយក្លេអ៊ែរ ត្រូវបានរក្សាទុកក្នុងបណ្តាញផ្លូវរូងក្រោមដីមួយនៅទីក្រុង Isfahan ហើយទំនងជាលាក់ទុកនៅទីនោះនៅឡើយ។លោក Grossi បានប្រាប់អ្នកយកព័ត៌មាននៅទីក្រុងប៉ារីសថា៖ «អ្វីដែល IAEA ជឿជាក់នោះគឺថា គិតត្រឹមការត្រួតពិនិត្យចុងក្រោយរបស់ស្ថាប័ន IAEA បានឱ្យដឹងថា ទីក្រុង Isfahan មានអ៊ុយរ៉ានីញ៉ូមកម្រិតភាពសុទ្ធ ៦០% ចំនួនជាង ២០០ គីឡូក្រាម ឬអាចលើសនេះបន្តិចបន្តួច»។ លោកបន្តថា ស្តុកទាំងនោះ «ជាចម្បង» គឺស្ថិតនៅ Isfahan ហើយសារធាតុខ្លះដែលរក្សាទុកនៅកន្លែងផ្សេងទៀត អាចនឹងត្រូវបានបំផ្លាញចោលរួចទៅហើយ។បណ្តាញផ្លូវរូងក្រោមដីនេះ គឺជាគោលដៅតែមួយគត់ ដែលហាក់ដូចជាមិនបានរងការខូចខាតធ្ងន់ធ្ងរ នៅក្នុងការវាយប្រហារកាលពីខែមិថុនាឆ្នាំមុន ដោយអ៊ីស្រាអែល និងសហរដ្ឋអាមេរិក លើទីតាំងនុយក្លេអ៊ែររបស់អ៊ីរ៉ង់។ ក្រុមអ្នកការទូតបានលើកឡើងជាយូរមកហើយថា រោងចក្រនៅទីក្រុង Isfahan ត្រូវបានប្រើសម្រាប់រក្សាទុកអ៊ុយរ៉ានីញ៉ូម ដែលមានកម្រិតភាពសុទ្ធ ៦០% ខណៈទីភ្នាក់ងារ IAEA ក៏បានបញ្ជាក់ពីបញ្ហានេះនៅក្នុងរបាយការណ៍របស់ខ្លួនជូនរដ្ឋជាសមាជិកកាលពីខែមុន ប៉ុន្តែមិនបានលម្អិតពីចំនួនពិតប្រាកដនោះទេ។យោងតាមការប៉ាន់ស្មានរបស់ទីភ្នាក់ងារ IAEA បានបង្ហាញថា នៅពេលដែលអ៊ីស្រាអែល បើកការវាយប្រហារលើកដំបូងក្នុងខែមិថុនា អ៊ីរ៉ង់មានអ៊ុយរ៉ានីញ៉ូមកម្រិតសុទ្ធ ៦០% ចំនួន ៤៤០,៩ គីឡូក្រាម។ ប្រសិនបើត្រូវបានចម្រាញ់បន្ថែមទៀត ចំនួននេះនឹងផ្តល់នូវសារធាតុផ្ទុះដែលត្រូវការ សម្រាប់ផលិតអាវុធនុយក្លេអ៊ែរចំនួន ១០គ្រាប់ នេះបើយោងតាមរង្វាស់កំណត់របស់ IAEA៕

បណ្ដាញសង្គម

ព័ត៌មានថ្មីៗ

មន្ត្រី៖ ក្រុមហាម៉ាសនឹងធ្វើកិច្ចពិភាក្សាជាមួយអន្តរការីតំបន់ហ្កាហ្សា នៅអេហ្ស៊ីប

កម្អែហូរចេញពីមាត់ភ្នំភ្លើង Kilauea របស់រដ្ឋហាវ៉ៃ ខណៈការកម្រើកត្រូវបានគេរំពឹងថានឹងកើនឡើង

កិច្ចព្រមព្រៀងពាណិជ្ជកម្មឥណ្ឌា-អាមេរិក ឆ្លុះបញ្ចាំងពីការផ្លាស់ប្តូរពន្ធរបស់ទីក្រុងវ៉ាស៊ីនតោន

អ៊ីស្រាអែល៖ «គ្មានភាពស្ងប់ស្ងាត់ នៅទីក្រុងបេរូត» ទេ បើក្រុមហេសបូឡាមិនបញ្ឈប់ការវាយប្រហារ

វិមានក្រឹមឡាំង៖ អាជ្ញាធរកំពុងធ្វើការដោះស្រាយបញ្ហាបែងចែកប្រេងនៅតំបន់គ្រីមៀ

ពលរដ្ឋជម្លៀសខ្លួនចេញពីតំបន់ជាយក្រុងភាគខាងត្បូងទីក្រុងបេរូត ក្រោយលោក Netanyahu បញ្ជាឲ្យវាយប្រហារក្រុមហេសបូឡា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877