BTV NEWS

ប្រធានាធិបតីមីយ៉ាន់ម៉ាបញ្ជាក់ឡើងវិញពីការប្តេជ្ញាចិត្តចំពោះសន្តិសុខរបស់ឥណ្ឌា

ប្រតិបត្តិករនាវា ជំរុញឲ្យមានច្បាប់ច្បាស់វិលត្រឡប់មកកាន់ច្រកសមុទ្រ Hormuz វិញ

កងទ័ពជើងទឹកបារាំងដោយមានការគាំទ្រពីអង់គ្លេស បានស្កាត់ចាប់នាវាដឹកប្រេងរុស្ស៊ី

EU ជំរុញឲ្យអ៊ីស្រាអែលឈប់បង្កើនភាពតានតឹងផ្នែកយោធា នៅលីបង់ និងគាំទ្រកិច្ចប្រឹងប្រែងការទូត

ព័ត៌មានអន្តរជាតិ

តម្លៃប្រេងធ្លាក់ចុះ១០% ខណៈលោក Trump ព្រមានវាយប្រហារអ៊ីរ៉ង់«ខ្លាំងជាង២០ដង» បើបិទច្រកសមុទ្រ Hormuz

តម្លៃប្រេងបានធ្លាក់ចុះ ១០% នៅថ្ងៃអង្គារនេះ បន្ទាប់ពីប្រធានាធិបតីសហរដ្ឋអាមេរិក លោក Donald Trump បានព្រមានថា ទីក្រុងតេអេរ៉ង់នឹងត្រូវបានវាយប្រហារ «ខ្លាំងជាងនេះ ២០ ដង» ប្រសិនបើអ៊ីរ៉ង់ព្យាយាមបញ្ឈប់លំហូរប្រេងឆ្លងកាត់ច្រកសមុទ្រ Hormuz ខណៈបានបង្ហាញសញ្ញាផងដែរថា ជម្លោះជាមួយអ៊ីរ៉ង់អាចនឹងបញ្ចប់ក្នុងពេលឆាប់ៗនេះ។ ប្រេងឆៅអន្តរជាតិ Brent បានធ្លាក់ចុះជិត ១១% មកនៅត្រឹម ៨៨,៣៦ ដុល្លារក្នុងមួយបារ៉ែល នៅម៉ោង ៩:២៥ យប់ ម៉ោងនៅអាមេរិក។ ប្រេងឆៅអាមេរិកបានធ្លាក់ចុះជាង ១០% មកនៅត្រឹម ៨៥,១៧ ដុល្លារក្នុងមួយបារ៉ែល។ ការធ្លាក់ចុះនេះ កើតឡើងបន្ទាប់ពីតម្លៃប្រេងបានហក់ឡើងលើសពី ១០០ ដុល្លារក្នុង១បារ៉ែល កាលពីថ្ងៃចន្ទ។ ប្រធានាធិបតីសហរដ្ឋអាមេរិក លោក Donald Trump បាននិយាយនៅក្នុងការបង្ហោះនៅលើបណ្តាញ Truth Social ថា «ប្រសិនបើអ៊ីរ៉ង់ ធ្វើអ្វីមួយដែលបញ្ឈប់លំហូរប្រេងនៅច្រកសមុទ្រ Hormuz ប្រទេសនេះនឹងត្រូវបានសហរដ្ឋអាមេរិកវាយប្រហារខ្លាំងជាងនេះ២០ដង ខ្លាំងជាងអ្វីដែលធ្លាប់វាយប្រហាររហូតមកដល់ពេលនេះ»។ ច្រកសមុទ្រនេះស្ថិតនៅចន្លោះប្រទេសអូម៉ង់ និងប្រទេសអ៊ីរ៉ង់ គឺជាផ្លូវឆ្លងកាត់ដ៏សំខាន់សម្រាប់ទីផ្សារថាមពលពិភពលោក។ យោងតាមវេទិកា Kpler បានឱ្យដឹងថា ប្រេងប្រហែល១៣លានបារ៉ែល បានឆ្លងកាត់ផ្លូវទឹកនេះក្នុងឆ្នាំ២០២៥ មានចំនួនប្រហែល៣១% នៃលំហូរប្រេងតាមសមុទ្រនៅទូទាំងពិភពលោក។ វាភ្ជាប់ប្រទេសផលិតប្រេងធំៗនៅឈូងសមុទ្រ រួមមានប្រទេសអារ៉ាប៊ីសាអ៊ូឌីត អ៊ីរ៉ង់ អ៊ីរ៉ាក់ និងអារ៉ាប់រួម ទៅកាន់ឈូងសមុទ្រអូម៉ង់ និងសមុទ្រអារ៉ាប់។ លោក Trump បាននិយាយនៅក្នុងសាររបស់លោកថា «នេះគឺជាអំណោយពីសហរដ្ឋអាមេរិកដល់ប្រទេសចិន និងប្រទេសទាំងអស់ ដែលប្រើប្រាស់ច្រកសមុទ្រ Hormuz យ៉ាងច្រើន ហើយសង្ឃឹមថាវាជាកាយវិការមួយដែលនឹងត្រូវបានកោតសរសើរ»។ សង្គ្រាមអ៊ីរ៉ង់ ដែលកំពុងរាលដាល បានធ្វើឱ្យផលិតកម្មប្រេង និងការដឹកជញ្ជូនប្រេងឆ្លងកាត់តំបន់មជ្ឈិមបូព៌ាធ្លាក់ចុះ ដែលធ្វើឱ្យការផ្គត់ផ្គង់ថាមពលនៅទូទាំងពិភពលោកមានភាពតានតឹង។

ប្រមុខការទូតអ៊ីរ៉ង់៖ ការជ្រើសរើសលោក Mojtaba Khameneiជាមេដឹកនាំកំពូលអ៊ីរ៉ង់បង្ហាញពីនិរន្តរភាពនិងស្ថិរភាព

រដ្ឋមន្ត្រីការបរទេសអ៊ីរ៉ង់លោក Seyed Abbas Araghchi បានបន្តការគាំទ្រដល់មេដឹកនាំថ្មីរបស់ប្រទេសលោក បន្ទាប់ពីការតែងតាំងជាផ្លូវការរបស់លោក Ayatollah Seyyed Mojtaba Hosseini Khamenei ជាមេដឹកនាំកំពូលទីបីនៃបដិវត្តន៍អ៊ីស្លាមអ៊ីរ៉ង់។ លោកថាការជ្រើសរើសលោក Mojtaba Khameneiជាមេដឹកនាំកំពូលអ៊ីរ៉ង់ បង្ហាញពីនិរន្តរភាពនិងស្ថិរភាព។ប្រមុខការទូតរូបនេះ បានបង្ហាញអារម្មណ៍របស់លោកនៅក្នុងសារមួយលើបណ្ដាញសង្គម X ដោយស្វាគមន៍ជាផ្លូវការចំពោះការផ្លាស់ប្តូរដែលបានកើតឡើងអំឡុងពេលដ៏សំខាន់មួយក្នុងប្រតិទិនអ៊ីស្លាម។ នៅក្នុងសាររបស់លោក Araghchi បាននិយាយថា «សូមអបអរសាទរចំពោះការជ្រើសរើសដ៏សក្តិសមរបស់លោក Ayatollah Seyyed Mojtaba Hosseini Khamenei ជាមេដឹកនាំកំពូលទីបីនៃបដិវត្តន៍អ៊ីស្លាម ដែលស្របគ្នានឹងរាត្រីដំបូងពោពេញដោយអំណាច។ ដោយផ្អែកលើអារម្មណ៍នេះ រដ្ឋមន្ត្រីការបរទេសរូបនេះបានបន្តចេញការប្តេជ្ញាចិត្តជាផ្លូវការក្នុងនាមឧបករណ៍ការទូត និងសន្តិសុខចំពោះមេដឹកនាំថ្មីនៃបដិវត្តន៍។ លោក Araghchi បានលើកឡើងថាពួកលោកសន្យាការពារសិទ្ធិរបស់ប្រជាជាតិអ៊ីរ៉ង់ដ៏អស្ចារ្យ ការជំរុញផលប្រយោជន៍ជាតិ និងសន្តិសុខ និងការសម្រេចបាននូវគោលដៅដ៏ខ្ពង់ខ្ពស់នៃបដិវត្តន៍អ៊ីស្លាម អ៊ីរ៉ង់ ហើយនឹងមិនរង្គោះរង្គើឡើយ។សេចក្តីថ្លែងការណ៍នេះកើតឡើងនៅពេលមានភាពប្រែប្រួលក្នុងតំបន់កាន់តែខ្លាំង ខណៈទីក្រុងតេអេរ៉ង់ពង្រឹងការគ្រប់គ្រងផ្ទៃក្នុងរបស់ខ្លួនបន្ទាប់ពីការសម្លាប់អតីតមេដឹកនាំ។ ការសន្យានេះពង្រឹងជំហររបស់រដ្ឋបាលលើការរក្សាគោលនយោបាយការបរទេសដ៏រឹងមាំ និងផ្តល់អាទិភាពដល់សន្តិសុខជាតិក្រោមការណែនាំរបស់មេដឹកនាំកំពូលថ្មី៕

ទីផ្សារអាស៊ីងើបឡើងវិញ តែប្រេងធ្លាក់ចុះ ខណៈលោក Trump ថាសង្គ្រាមអ៊ីរ៉ង់អាចនឹងបញ្ចប់ឆាប់ៗនេះ

ទីផ្សារអាស៊ីងើបឡើងវិញ តែប្រេងធ្លាក់ចុះ ខណៈលោក Trump ថាសង្គ្រាមអ៊ីរ៉ង់អាចនឹងបញ្ចប់ឆាប់ៗនេះភាគហ៊ុនអាស៊ីបានកើនឡើង ហើយតម្លៃប្រេងបានធ្លាក់ចុះនៅពេលចាប់ផ្តើមការជួញដូរនៅថ្ងៃអង្គារ ១០មីនានេះ បន្ទាប់ពីវគ្គជួញដូរគ្របដណ្ដប់ដោយការប្រែប្រួលសម្រាប់ទីផ្សារពេញមួយយប់ ក្រោយប្រធានាធិបតីអាមេរិក Donald Trump បានប្រកាសថាសង្គ្រាមមជ្ឈិមបូព៌ាអាចនឹងចប់ឆាប់ៗនេះ។ សន្ទស្សន៍ទូលំទូលាយបំផុតរបស់ MSCI នៃភាគហ៊ុនអាស៊ីប៉ាស៊ីហ្វិកនៅខាងក្រៅប្រទេសជប៉ុនបានកើនឡើង២,៦% ដោយកាត់បន្ថយការខាតបង់ចាប់តាំងពីការចាប់ផ្តើមនៃជម្លោះ ខណៈភាគហ៊ុនប្រេងឆៅ Brent បានធ្លាក់ចុះដល់ទៅ១០% មកនៅត្រឹមក្រោម៩០ ដុល្លារក្នុងមួយបារ៉ែល ខណៈការជួញដូរបានចាប់ផ្តើមឡើងវិញ។ភាគហ៊ុនអាមេរិកមានភាពស្ងប់ស្ងាត់ជាងមុន ដោយភាគហ៊ុន S&P 500 ធ្លាក់ចុះ ០,២%។ ការអត្ថាធិប្បាយរបស់លោក Trump បានបញ្ចូលសុទិដ្ឋិនិយមយ៉ាងខ្លាំង ដែលផ្ទុយស្រឡះពីព្រឹត្តិការណ៍នៅក្នុងប្រទេសអ៊ីរ៉ង់ ជាទីដែលក្រុមអ្នកប្រកាន់តឹងបានប្រមូលផ្តុំគ្នាគាំទ្រមេដឹកនាំកំពូលថ្មី លោក Mojtaba Khamenei ក្នុងការបង្ហាញការប្រឆាំង។សញ្ញាប្រកួតប្រជែងបានធ្វើឱ្យទីផ្សារសកលធ្លាក់ចុះកាលពីថ្ងៃចន្ទដើមសប្ដាហ៍នេះ តម្លៃប្រេងដំបូងឡើយបានកើនឡើង ហើយភាគហ៊ុននៅ Wall Street បានធ្លាក់ចុះមុនពេលងើបឡើងវិញយ៉ាងខ្លាំងបន្ទាប់ពីការអត្ថាធិប្បាយរបស់លោក Trump និងរបាយការណ៍ថ្មីៗដែលបង្ហាញថាទីក្រុងវ៉ាស៊ីនតោនអាចនឹងបន្ធូរបន្ថយទណ្ឌកម្មលើថាមពលរុស្ស៊ី។ដោយសារទំនុកចិត្តរបស់វិនិយោគិនមានស្ថិរភាពបន្ទាប់ពីការលក់ចេញកាលពីថ្ងៃចន្ទ ស្របពេលមានសញ្ញាការកើនឡើងនៃការទទួលយកហានិភ័យដោយក្រុមវិនិយោគិនលក់រាយ សន្ទស្សន៍ភាគហ៊ុន Nikkei 225 របស់ជប៉ុនបានកើនឡើង ៣,៦% ខណៈសន្ទស្សន៍ភាគហ៊ុន Kospi របស់កូរ៉េខាងត្បូងបានកើនឡើង ៦,៤%៕

លោក Trump ព្រមានវាយប្រហារអ៊ីរ៉ង់ «ខ្លាំងជាងមុន ២០ដង» បើរារាំងលំហូរប្រេងនៅច្រកសមុទ្រ Hormuz

ប្រធានាធិបតីអាមេរិក លោក Donald Trump កាលពីថ្ងៃចន្ទ (៩ មីនា) បានព្រមានអ៊ីរ៉ង់ ប្រឆាំងនឹងការបញ្ឈប់លំហូរប្រេងឆ្លងកាត់ច្រកសមុទ្រ Hormuz ខណៈតម្លៃប្រេងឥន្ធនៈនៅក្នុងសហរដ្ឋអាមេរិក ក៏ដូចជានៅទូទាំងពិភពលោក កំពុងកើនឡើងយ៉ាងគំហុក ស្របពេលមានសង្គ្រាមរវាងសហរដ្ឋអាមេរិក និងអ៊ីស្រាអែល ទល់នឹងអ៊ីរ៉ង់។លោក Trump បានសរសេរបង្ហោះលើវេទិកាសង្គម Truth Social របស់លោកថា «ប្រសិនបើអ៊ីរ៉ង់ ធ្វើអ្វីមួយដែលបញ្ឈប់លំហូរប្រេងនៅក្នុងច្រកសមុទ្រ Hormuz ពួកគេនឹងត្រូវសហរដ្ឋអាមេរិក វាយប្រហារឱ្យកាន់តែខ្លាំងក្លាជាងការរវាយប្រហាររហូតមកដល់ពេលនេះ ដល់ទៅ ២០ដង»។ លោក Trump បានបន្ថែមថា ការទាមទាររបស់លោកគឺជា «អំណោយមួយពីសហរដ្ឋអាមេរិក ដល់ប្រទេសចិន និងប្រទេសទាំងអស់ដែលប្រើប្រាស់ច្រកសមុទ្រនេះ»។គួរឱ្យដឹងថា ច្រកសមុទ្រ Hormuz ដែលមានទីតាំងស្ថិតនៅចន្លោះអូម៉ង់ និងអ៊ីរ៉ង់ ហើយភ្ជាប់ឈូងសមុទ្រពែក្សជាមួយឈូងសមុទ្រអូម៉ង់ និងសមុទ្រអារ៉ាប់ គឺជាចំណុចចរាចរណ៍ដ៏សំខាន់បំផុតមួយរបស់ពិភពលោក ជាពិសេសលើលំហូរប្រេង។ នៅឆ្នាំ ២០២៤ ការប្រើប្រាស់ប្រេងឥន្ធនៈសកលស្មើនឹងប្រហែល ២០% បានឆ្លងកាត់ច្រកនេះ នេះបើយោងតាមរដ្ឋបាលព័ត៌មានថាមពលសហរដ្ឋអាមេរិក។ប៉ុន្តែស្របពេលការវាយប្រហាររបស់សហរដ្ឋអាមេរិក-អ៊ីស្រាអែល លើអ៊ីរ៉ង់ កងឆ្មាំបដិវត្តន៍អ៊ីរ៉ង់បានបិទច្រកសមុទ្រនេះ និងបានគំរាមវាយប្រហារនាវាទាំងឡាយណាដែលព្យាយាមឆ្លងកាត់។ យោងតាមគេហទំព័រតាមដានការធ្វើដំណើរនៅច្រកសមុទ្រ Hormuz បានបង្ហាញថា ក្នុងរយៈពេល ២៤ ម៉ោងចុងក្រោយនេះ មាននាវាតែពីរគ្រឿងប៉ុណ្ណោះដែលបានឆ្លងកាត់ ដែលធ្លាក់ចុះយ៉ាងខ្លាំងពីចំនួនធម្មតា ៦០ គ្រឿងក្នុងមួយថ្ងៃ៕

ក្រុមប្រទេសG7 នឹងចាត់វិធានការចាំបាច់ដើម្បីគាំទ្រការផ្គត់ផ្គង់ថាមពលដោយសារសង្គ្រាមអាមេរិក-អ៊ីរ៉ង់

ក្រុមប្រទេស G7 បាននិយាយថា ខ្លួនត្រៀមរួចជាស្រេចដើម្បីចាត់វិធានការចាំបាច់ គាំទ្រការផ្គត់ផ្គង់ថាមពលសកល បន្ទាប់ពីសង្គ្រាមរវាងសហរដ្ឋអាមេរិក និងអ៊ីស្រាអែល ជាមួយអ៊ីរ៉ង់ បានធ្វើឱ្យតម្លៃប្រេងឡើងចុះមិនទៀងទាត់។ទោះជាយ៉ាងណាក៏ដោយ កិច្ចប្រជុំរបស់រដ្ឋមន្ត្រីហិរញ្ញវត្ថុ G7 និងទីភ្នាក់ងារថាមពលអន្តរជាតិ (IEA) បានបញ្ចប់ដោយគ្មានកិច្ចព្រមព្រៀងក្នុងការបញ្ចេញទុនបម្រុងប្រេងឆៅជាយុទ្ធសាស្ត្រ។តម្លៃប្រេងបានឡើងដល់ជិត១២០ ដុល្លារក្នុងមួយបារ៉ែលកាលពីថ្ងៃចន្ទ៩មីនាសប្ដាហ៍នេះ ដោយសារតែក្ដីបារម្ភនៃការរំខានដល់ការផ្គត់ផ្គង់រយៈពេលយូរ មុនពេលធ្លាក់ចុះយ៉ាងខ្លាំងបន្ទាប់ពីប្រធានាធិបតី Trump បានលើកឡើងនូវក្តីសង្ឃឹមថាសង្គ្រាមនឹងបញ្ចប់ក្នុងពេលឆាប់ៗនេះ។នៅក្នុងកិច្ចប្រជុំតាមវីដេអូ ជម្រើសនៃការបញ្ចេញប្រេងពីស្តុកប្រេងគឺជាជម្រើសមួយក្នុងចំណោមជម្រើសជាច្រើនដែលត្រូវបានពិភាក្សា ខណៈលោក Fatih Birol ប្រធានទីភ្នាក់ងារថាមពលអន្តរជាតិ IEAនិយាយថា ទីផ្សារប្រេងសកលមានសភាពយ៉ាប់យ៉ឺនយ៉ាងខ្លាំងក្នុងរយៈពេលប៉ុន្មានថ្ងៃថ្មីៗនេះ។លោក Birol បាននិយាយថា បន្ថែមពីលើបញ្ហាប្រឈមនៃការដឹកជញ្ជូនឆ្លងកាត់ច្រកសមុទ្រ Hormuz ការផលិតប្រេងយ៉ាងច្រើនត្រូវបានកាត់បន្ថយ។ នេះកំពុងបង្កើតហានិភ័យសំខាន់ៗ និងកំពុងកើនឡើងសម្រាប់ទីផ្សារ។បច្ចុប្បន្នប្រទេសជាសមាជិក IEA មានស្តុកប្រេងសង្គ្រោះបន្ទាន់សាធារណៈជាង១,២ ពាន់លានបារ៉ែល ដោយមានស្តុកឧស្សាហកម្មចំនួន៦០០លានបារ៉ែលបន្ថែមទៀត ដែលកាន់កាប់ក្រោមកាតព្វកិច្ចរបស់រដ្ឋាភិបាល ៕

កូរ៉េខាងជើង រិះគន់សមយុទ្ធរួមគ្នារវាងសហរដ្ឋអាមេរិក-កូរ៉េខាងត្បូង ថាធ្វើឱ្យប៉ះពាល់ដល់ស្ថិរភាពក្នុងតំបន់

ទីភ្នាក់ងារសារព័ត៌មានរដ្ឋកូរ៉េខាងជើង KCNA បានរាយការណ៍នៅថ្ងៃអង្គារ (១០ មីនា) នេះថា លោកស្រី គីម យ៉ូជុង ដែលជាប្អូនស្រីដ៏មានឥទ្ធិពលរបស់មេដឹកនាំរ៉េខាងជើង គីម ជុងអ៊ុន បាននិយាយថា សមយុទ្ធយោធារវាងសហរដ្ឋអាមេរិក និងកូរ៉េខាងត្បូង ដែលចាប់ផ្តើមនៅសប្តាហ៍នេះ គឺជា «ការហាត់សមធ្វើសង្គ្រាម ដែលមានលក្ខណៈញុះញង់ និងឈ្លានពាន» ដែលនឹងប៉ះពាល់ដល់ស្ថិរភាពក្នុងតំបន់។លោកស្រី គីម បាននិយាយក្នុងសេចក្តីថ្លែងការណ៍មួយថា សមយុទ្ធយោធាប្រចាំឆ្នាំ ឈ្មោះថា ខែលការពារសេរីភាព (Freedom Shield) របស់អាមេរិក និងកូរ៉េខាងត្បូង បានបង្ហាញពី «គោលនយោបាយអរិភាពជាទម្លាប់» របស់សម្ព័ន្ធមិត្តទាំងពីរនេះ ចំពោះកូរ៉េខាងជើង ហើយ «នឹងបំផ្លាញស្ថិរភាពក្នុងតំបន់បន្ថែមទៀត»។ លោកស្រី គីម បានពណ៌នាសមយុទ្ធនៅកូរ៉េខាងត្បូងនោះថា ពាក់ព័ន្ធនឹងកងកម្លាំងកូរ៉េខាងត្បូង និងសហរដ្ឋអាមេរិកជាង ១៨.០០០ នាក់ ហើយកំពុងត្រូវបានធ្វើឡើង «ទាំងយប់ទាំងថ្ងៃ នៅទូទាំងដីគោក សមុទ្រ អាកាស លំហអាកាស និងលំហអ៊ីនធឺណិត» របស់កូរ៉េខាងជើង។កូរ៉េខាងត្បូង និងសហរដ្ឋអាមេរិក បាននិយាយថា សមយុទ្ធនេះ ដែលដំណើរការពីថ្ងៃទី ៩ ដល់ថ្ងៃទី ១៩ ខែមីនា គឺមាន «លក្ខណៈការពារ» ប៉ុណ្ណោះ ហើយនឹងរួមបញ្ចូលសេណារីយ៉ូទប់ស្កាត់ ទាក់ទងនឹងអាវុធនុយក្លេអ៊ែររបស់កូរ៉េខាងជើង។សមយុទ្ធនេះបានកើតឡើង ត្រឹមតែមួយខែបន្ទាប់ពីលោក គីម ជុងអ៊ុន បាននិយាយនៅក្នុងសមាជបក្សកាន់អំណាចរបស់កូរ៉េខាងជើងថា លោកនឹងផ្តោតលើការពង្រីកឃ្លាំងអាវុធនុយក្លេអ៊ែររបស់កូរ៉េខាងជើងបន្ថែមទៀត៕

អ្នកជំនាញ៖ អ៊ីរ៉ង់ ប្រើយុទ្ធសាស្រ្តស៊ូទ្រាំ និងអង្រួនវិស័យថាមពល ក្នុងសង្រ្គាមជាមួយអាមេរិក-អ៊ីស្រាអែល

សារព័ត៌មានរ៉យទ័របានរាយការណ៍ដោយដកស្រង់សម្ដីក្រុមអ្នកជំនាញថា អ៊ីរ៉ង់ កំពុងភ្នាល់ថាខ្លួនអាចមានប្រៀបជាងសហរដ្ឋអាមេរិក និងអ៊ីស្រាអែល ប៉ុន្តែមិនមែនតាមរយៈមធ្យោបាយយោធានោះទេ គឺតាមរយៈការអូសបន្លាយសង្គ្រាមឱ្យទៅជាការប្រកួតប្រជែងថា ភាគីណាស៊ូទ្រាំបានយូរជាង ដោយក្រាញននៀលក្នុងសង្គ្រាមរហូតដល់ទីក្រុងវ៉ាស៊ីនតោន ទ្រាំមិនបាន។ អ្នកជំនាញនិយាយថា យុទ្ធសាស្ត្ររបស់អ៊ីរ៉ង់គឺច្បាស់ណាស់ថា ប្រើប្រាស់យានដ្រូន និងបាញ់មីស៊ីល កាត់ផ្ដាច់ផ្លូវដឹកជញ្ជូនថាមពលសំខាន់ៗ និងធ្វើឱ្យទីផ្សារសកលមានភាពរង្គោះរង្គើខ្លាំង ដើម្បីបង្ខំឱ្យទីក្រុងវ៉ាស៊ីនតោន ដកថយមុន។ទោះបីជាមានការភ្ញាក់ផ្អើលចំពោះការវាយប្រហារពីសំណាក់សហរដ្ឋអាមេរិក និងអ៊ីស្រាអែល និងការបាត់បង់បុគ្គលសំខាន់ៗក៏ដោយ ក៏កងឆ្មាំបដិវត្តន៍អ៊ីស្លាម (IRGC) របស់អ៊ីរ៉ង់ នៅតែគ្រប់គ្រងស្ថានភាពយ៉ាងរឹងមាំ ដោយដឹកនាំទាំងសមរភូមិ ទាំអការអនុវត្តផែនការត្រៀមទុកជាមុន និងកំណត់យុទ្ធសាស្ត្រនានា ព្រមទាំងគោលដៅនៅក្នុងសង្គ្រាម។កងឆ្មាំបដិវត្តន៍ IRGC ក៏ដើរតួនាទីយ៉ាងសំខាន់ក្នុងការលើកលោក Mojtaba Khamenei ឱ្យឡើងជាមេដឹកនាំកំពូលថ្មី បន្ទាប់ពីលោក Ayatollah Ali Khamenei ត្រូវបានសម្លាប់ ក្នុងការវាយប្រហារថ្ងៃដំបូងរបស់អាមេរិក-អ៊ីស្រាអែល។ លោក Fawaz Gerges មកពីសាលាសេដ្ឋកិច្ចទីក្រុងឡុងដ្រ៍ បាននិយាយថា «សម្រាប់អ៊ីរ៉ង់ ពួកគេកំពុងតស៊ូដើម្បីអត្ថិភាព ហើយនេះគឺជាសង្គ្រាមពេញបន្ទុកដ៏ខ្លាំងក្លាបំផុត»។អ្នកជំនាញផ្សេងទៀតបានលើកឡើងថា ផ្នត់គំនិតនៃសង្គ្រាមពេញទំហឹងនេះហើយ គឺជាមូលហេតុពីក្រោយការបង្កើនការវាយប្រហាររបស់អ៊ីរ៉ង់ ទូទាំងតំបន់ឈូងសមុទ្រ ដោយកំណត់គោលដៅលើមជ្ឈមណ្ឌលថាមពលនានា ចាប់ពីកាតា រហូតដល់អារ៉ាប៊ីសាអ៊ូឌីត ដើម្បីបង្កការរំខានដល់សេដ្ឋកិច្ចជាអតិបរមា ក្នុងគោលបំណងបង្កើនការខាតបង់ដល់ប្រទេសជិតខាង អឺរ៉ុប និងសហរដ្ឋអាមេរិក ព្រមទាំងសាកល្បងឆន្ទៈនយោបាយរបស់ទីក្រុងវ៉ាស៊ីនតោន ថាទ្រាំទ្រក្នុងសង្រ្គាមនេះបានយូរប៉ុនណា៕

លោក Trump និយាយថាសង្គ្រាមអាចនឹងចប់ក្នុងពេលឆាប់ៗនេះ ខណៈអ៊ីរ៉ង់គាំទ្រមេដឹកនាំថ្មីប្រកាន់តឹង

ប្រធានាធិបតីអាមេរិក លោក Donald Trump កាលពីថ្ងៃចន្ទ៩មីនា ដើមសប្ដាហ៍នេះ បានព្យាករណ៍ថាសង្គ្រាមនៅមជ្ឈិមបូព៌ាអាចនឹងចប់ក្នុងពេលឆាប់ៗនេះ ទោះក្រុមប្រកាន់តឹងរបស់អ៊ីរ៉ង់បានបង្ហាញភក្ដីភាពចំពោះមេដឹកនាំកំពូលថ្មី លោក Mojtaba Khamenei ជាសញ្ញាមួយដែលបង្ហាញថាប្រទេសនេះ មិនទាន់ត្រៀមខ្លួនដកថយក្នុងពេលឆាប់ៗនេះក៏ដោយ។ សញ្ញាផ្ទុយគ្នានេះបានរុញទីផ្សារសកលឱ្យរង្គោះរង្គើ ដោយតម្លៃប្រេងកើនឡើង និងទីផ្សារភាគហ៊ុនធ្លាក់ចុះយ៉ាងខ្លាំង មុនពេលប្រែប្រួលទៅទិសដៅផ្សេងទៀត បន្ទាប់ពីការអត្ថាធិប្បាយរបស់លោក Trump និងរបាយការណ៍អំពីការបន្ធូរបន្ថយទណ្ឌកម្មលើថាមពលរុស្ស៊ី។លោក Mojtaba Khamenei វ័យ៥៦ឆ្នាំ ជាបព្វជិតនិកាយស៊ីអ៊ីត ដែលមានមូលដ្ឋានអំណាចក្នុងចំណោមកងកម្លាំងសន្តិសុខ និងអាណាចក្រធុរកិច្ចដ៏ធំរបស់ពួកគេ ត្រូវបានប្រកាសថាមិនអាចទទួលយកបានឡើយចំពោះសម្ដីរបស់លោក Trump ដែលបានទាមទារឱ្យអ៊ីរ៉ង់ចុះចាញ់ដោយគ្មានលក្ខខណ្ឌនោះ។លោក Trump បាននិយាយថាសង្គ្រាមនឹងបន្តរហូតដល់អ៊ីរ៉ង់ ចាញ់ទាំងស្រុង និងដាច់ខាត ប៉ុន្តែបានព្យាករណ៍ថាសង្គ្រាមនេះ នឹងចប់ក្នុងពេលឆាប់ៗនេះ។លោកបានប្រាប់សមាជិកសភាសាធារណរដ្ឋថា សង្គ្រាមនឹងត្រូវបញ្ចប់យ៉ាងឆាប់រហ័ស។ លោកថាពួកលោកបានឈ្នះរួចទៅហើយតាមវិធីជាច្រើន ប៉ុន្តែពួកលោកមិនទាន់ឈ្នះគ្រប់គ្រាន់នៅឡើយទេ។ទោះយ៉ាងណាក៏ដោយ លោក Trump ពុំបានកំណត់ច្បាស់ថាជ័យជម្នះក្នុងសង្គ្រាមនឹងទៅជាយ៉ាងណានោះទេ។ប្រព័ន្ធផ្សព្វផ្សាយរដ្ឋអ៊ីរ៉ង់បានបង្ហាញហ្វូងមនុស្សយ៉ាងច្រើននៅក្នុងទីក្រុងជាច្រើនដែលកំពុងប្រមូលផ្តុំគ្នាគាំទ្រមេដឹកនាំថ្មី ដោយគ្រវីទង់ជាតិអ៊ីរ៉ង់ និងកាន់រូបថតឪពុករបស់លោក គឺលោក Ali Khamenei ជាមេដឹកនាំកំពូលដែលត្រូវបានសម្លាប់ដោយការវាយប្រហាររបស់អ៊ីស្រាអែលនៅថ្ងៃ ២៨កុម្ភៈ២០២៦ ជាថ្ងៃដំបូងនៃសង្គ្រាម៕

លីបង់សម្រេចពន្យារពេលការបោះឆ្នោតសភា រយៈពេល ២ឆ្នាំ

សភាលីបង់ នៅថ្ងៃចន្ទ (ទី៩ ខែមីនា ឆ្នាំ២០២៦) នេះ បានសម្រេចពន្យារពេលការបោះឆ្នោតអង្គនីតិបញ្ញត្តិរយៈពេល ២ឆ្នាំ ដោយសារតែសង្គ្រាម រវាងអ៊ីស្រាអែល និងក្រុមហេសបូឡាដែលគាំទ្រដោយអ៊ីរ៉ង់។ នេះបើយោងតាមសេចក្តីថ្លែងការណ៍របស់ប្រធានសភា។ប្រទេសលីបង់ត្រូវបានទាញចូលទៅក្នុងសង្គ្រាមមជ្ឈិមបូព៌ា កាលពីសប្តាហ៍មុន នៅពេលដែលក្រុមហេសបូឡា បានវាយប្រហារអ៊ីស្រាអែល ដើម្បីឆ្លើយតបទៅនឹងការសម្លាប់មេដឹកនាំកំពូលអ៊ីរ៉ង់ លោក Ali Khamenei ក្នុងអំឡុងពេលមានការវាយប្រហាររបស់សហរដ្ឋអាមេរិក-អ៊ីស្រាអែល។សេចក្តីថ្លែងការណ៍ពីប្រធានសភា និងជាសម្ព័ន្ធមិត្តដ៏សំខាន់របស់ក្រុមហេសបូឡា គឺលោក Nabih Berri បានឲ្យដឹងថា៖ «ការបោះឆ្នោតដំបូងឡើយ ត្រូវបានគ្រោងធ្វើឡើងនៅក្នុងខែឧសភា តែឥឡូវនេះ សភាបានសម្រេចអនុម័តបន្តអាណត្តិរបស់ខ្លួនរយៈពេល ២ឆ្នាំទៀត»។សមាជិកសភាបានកោះប្រជុំ ទោះបីជាយន្តហោះចម្បាំងអ៊ីស្រាអែល បានហោះពីលើតំបន់ជាយក្រុងក្បែរនោះ នៅភាគខាងត្បូងនៃទីក្រុងបេរូតក៏ដោយ។ អ្នកសារព័ត៌មានរបស់ទីភ្នាក់ងារសារព័ត៌មាន AFP បានរាយការណ៍ថា សមាជិកសភាជាច្រើនរូបនៃប្លុកដែលមានសមាជិក ១៣រូបរបស់ក្រុមហេសបូឡា បានចូលរួមក្នុងកិច្ចប្រជុំនេះ ក្នុងនោះរួមមានទាំងប្រធានរបស់ក្រុមនេះ គឺលោក Mohammed Raad ផងដែរ។លីបង់បានពន្យារពេលការបោះឆ្នោតជាច្រើនមកហើយនាពេលកន្លងមក។ ប្រទេសនេះបានធ្វើដូច្នេះ ២ដង ចន្លោះឆ្នាំ២០១៣ និងឆ្នាំ២០១៤ ដោយលើកឡើងពីការបែកបាក់នយោបាយរបស់លីបង់ ដែលបណ្តាលមកពីសង្គ្រាម នៅក្នុងប្រទេសជិតខាងស៊ីរី និងលើកទី៣ នៅឆ្នាំ២០១៧ ដោយសារតែជម្លោះ ជុំវិញច្បាប់បោះឆ្នោត៕

ប្រមុខ EU៖ ផលប៉ះពាល់នៃសង្គ្រាមអ៊ីរ៉ង់ បានក្លាយជាការពិតរួចហើយនៅអឺរ៉ុប

ប្រមុខសហភាពអឺរ៉ុប (EU) លោកស្រី Ursula von der Leyen បានលើកឡើងនៅថ្ងៃចន្ទ (ទី៩ ខែមីនា ឆ្នាំ២០២៦) នេះថា ផលវិបាកដោយសារសង្គ្រាម នៅតំបន់មជ្ឈិមបូព៌ា កំពុងកើតឡើងរួចហើយ នៅតំបន់អឺរ៉ុប ដោយតម្លៃថាមពលកើនឡើង ហើយសម្ព័ន្ធមិត្តណាតូ (NATO) ត្រូវបានកំណត់គោលដៅ។តម្លៃប្រេងបានហក់ឡើងខ្ពស់ខ្លាំងនៅថ្ងៃចន្ទនេះ ដោយឡើងដល់កម្រិតជិត ១២០ដុល្លារ ក្នុងមួយបារ៉ែល ខណៈដែលសង្គ្រាមអាមេរិក-អ៊ីស្រាអែលប្រឆាំងនឹងអ៊ីរ៉ង់ បានបន្តឈានចូលសប្តាហ៍ទី២ ហើយ ដោយទីក្រុងតេអេរ៉ង់បានបើកការវាយប្រហារសងសឹកថ្មីលើបណ្ដារដ្ឋឈូងសមុទ្រ។នៅមុនពេលមានការជជែកតាមទូរស័ព្ទនាវេលាថ្ងៃត្រង់ជាមួយមេដឹកនាំតំបន់មជ្ឈិមបូព៌ា លោកស្រីប្រធានគណៈកម្មការអឺរ៉ុបរូបនេះ បានប្រាប់ឯកអគ្គរដ្ឋទូត EU ថា៖ «ឥឡូវនេះយើងកំពុងឃើញជម្លោះក្នុងតំបន់ ដែលផ្ដល់នូវផលវិបាកដោយមិនបានគិតទុកមុន។ ហើយការររាលដាលនៃផលវិបាក គឺជាការពិតរួចទៅហើយនៅថ្ងៃនេះ»។ដោយបានលើកឡើងពីយានដ្រូនផលិតដោយអ៊ីរ៉ង់វាយប្រហារមូលដ្ឋានអង់គ្លេសមួយ នៅលើកោះស៊ីបដែលជាសមាជិករបស់ EU ការរំខានពាណិជ្ជកម្ម និងការផ្លាស់ទីលំនៅរបស់ប្រជាជន លោកស្រី von der Leyen បាននិយាយថា៖ «ប្រជាពលរដ្ឋរបស់យើងត្រូវបានជាប់នៅក្នុងជម្លោះនេះ។ ដៃគូរបស់យើងកំពុងត្រូវបានវាយប្រហារ»។បើទោះបីជាអ៊ីរ៉ង់មិនទាន់បានបិទច្រកសមុទ្រ Hormuz ជាផ្លូវការក៏ដោយ ក៏ការដឹកជញ្ជូនតាមផ្លូវទឹកដ៏សំខាន់នេះ ស្ទើរតែលែងមានហើយ។ តម្លៃប្រេងឥន្ធនៈនៅអឺរ៉ុប ក៏បានឡើងរហូតដល់ ៣០ភាគរយ នៅថ្ងៃចន្ទនេះផងដែរ ទោះបីជានៅតែទាបជាងកម្រិតខ្ពស់ដែលបានឈានដល់បន្ទាប់ពីមានការឈ្លានពានរបស់រុស្ស៊ីនៅឆ្នាំ២០២២ លើប្រទេសអ៊ុយក្រែនក៏ដោយ៕

បណ្ដាញសង្គម

ព័ត៌មានថ្មីៗ

មន្ត្រី៖ ក្រុមហាម៉ាសនឹងធ្វើកិច្ចពិភាក្សាជាមួយអន្តរការីតំបន់ហ្កាហ្សា នៅអេហ្ស៊ីប

កម្អែហូរចេញពីមាត់ភ្នំភ្លើង Kilauea របស់រដ្ឋហាវ៉ៃ ខណៈការកម្រើកត្រូវបានគេរំពឹងថានឹងកើនឡើង

កិច្ចព្រមព្រៀងពាណិជ្ជកម្មឥណ្ឌា-អាមេរិក ឆ្លុះបញ្ចាំងពីការផ្លាស់ប្តូរពន្ធរបស់ទីក្រុងវ៉ាស៊ីនតោន

អ៊ីស្រាអែល៖ «គ្មានភាពស្ងប់ស្ងាត់ នៅទីក្រុងបេរូត» ទេ បើក្រុមហេសបូឡាមិនបញ្ឈប់ការវាយប្រហារ

វិមានក្រឹមឡាំង៖ អាជ្ញាធរកំពុងធ្វើការដោះស្រាយបញ្ហាបែងចែកប្រេងនៅតំបន់គ្រីមៀ

ពលរដ្ឋជម្លៀសខ្លួនចេញពីតំបន់ជាយក្រុងភាគខាងត្បូងទីក្រុងបេរូត ក្រោយលោក Netanyahu បញ្ជាឲ្យវាយប្រហារក្រុមហេសបូឡា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877